Category: សង្គម និងសេដ្ឋកិច្ច

ក្រសួងសេដ្ឋកិច្ចកែសម្រួលអត្រាជាប់ពន្ធមធ្យម និងពន្ធធំលើផលរបរប្រចាំឆ្នាំ
ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីប្រកាសមួយដោយកែសម្រួលលើអត្រាប្រភេទពន្ធតាមរបបស្វ័យប្រកាស សម្រាប់អ្នកជាប់ពន្ធមធ្យម និងអ្នកជាប់ពន្ធធំ ដោយដំឡើងចំនួននៃចំណូលប្រចាំឆ្នាំ ខណៈដែលអ្នកជាប់ពន្ធតូចគឺនៅរក្សាដដែល។
ប្រកាសចុះថ្ងៃទី24 ខែមករា ឆ្នាំ2018នេះ ដែលចុះហត្ថលេខាដោយ ឯកឧត្តម ទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានកំណត់ថា អ្នកជាប់ពន្ធតាមរបបស្វ័យប្រកាសត្រូវបានបែងចែកជាបីប្រភេទ គឺអ្នកជាប់ពន្ធតូច អ្នកជាប់ពន្ធមធ្យម និង អ្នកជាប់ពន្ធធំ។ សម្រាប់អ្នកជាប់ពន្ធតូច គឺកំណត់នៅដដែលធៀបនឹងប្រកាសដែលចេញកាលពីចុងឆ្នាំ2015ដោយអ្នកជាប់ពន្ធតូច គឺជាសហគ្រាសឯកបុគ្គល ឬសហគ្រាសសហកម្មសិទ្ធិ មានផលរបរប្រចាំឆ្នាំចាប់ពី 250លានរៀល ដល់700លានរៀល។
ដោយឡែកអ្នកជាប់ពន្ធមធ្យមត្រូវបានកំណត់ថា ជាសហគ្រាសដែលបានចុះបញ្ជីជានីតិបុគ្គល ដែលមានផលរបរប្រចាំឆ្នាំលើសពី 700លានរៀល ដល់4,000លានរៀល ខណៈដែលប្រកាសកាលពីចុងឆ្នាំ2015 បានកំណត់ថា អ្នកជាប់ពន្ធមធ្យមជាសហគ្រាសដែលមានផលរបរប្រចាំឆ្នាំលើសពី 700លានរៀល ដល់2,000លានរៀល ។
ប្រកាសថ្មីបានបង្ហាញថា អ្នកជាប់ពន្ធធំត្រូវបានកំណត់ដំឡើងទឹកប្រាក់អតិបរមារហូតដល់4,000លានរៀល។ ប្រកាសនោះក៏បានបង្ហាញថា អ្នកជាប់ពន្ធធំ ជាសហគ្រាសដែលមានផលរបរប្រចាំឆ្នាំលើសពី 4,000លានរៀល ឬបុត្រសម្ព័ន្ធរបស់ក្រុមហ៊ុនពហុជាតិ សាខាក្រុមហ៊ុនបរទេស ឬសហគ្រាសដែលបានចុះបញ្ជីជាគម្រោងវិនិយោគដែលមានលក្ខណៈសម្បត្តិគ្រប់គ្រាន់។ ដែលប្រកាសកាលពីចុងឆ្នាំ2015 បានកំណត់ថា អ្នកជាប់ពន្ធធំជាសហគ្រាសដែលមានផលរបរប្រចាំឆ្នាំលើសពី 2,000លានរៀល ឬសហគ្រាសដែលបានចុះបញ្ជីជាគម្រោងវិនិយោគមានលក្ខណសម្បត្តិគ្រប់គ្រាន់។
ក្រោយរយៈពេលជិត1ឆ្នាំ បន្ទាប់ពីការប្រកាសប្តូររបៀបប្រមូលពន្ធពីរបបម៉ៅការ ទៅជារបបស្វ័យប្រកាសវិញ មានក្រុមហ៊ុនឯកជនក្នុងស្រុករហូតដល់ 80% បានអះអាងថា ខ្លួនប្រកបរបរអាជីវកម្មខាតប៉ុន្តែអគ្គនាយកពន្ធដារមិនបានជឿជាក់នោះទេ។
នៅក្នុងពិធីប្រគល់អាជ្ញាប័ណ្ណដល់ក្រុមហ៊ុនចំនួន43 ដើម្បីក្លាយជាភ្នាក់ងារសេវាកម្មជាលើកដំបូងនៅអគ្គនាយកដ្ឋានពន្ធដារ កាលពីថ្ងៃទី1 ខែវិច្ឆិកា ឆ្នាំ2016 ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកដ្ឋានពន្ធដារបានលើកឡើងឡើងថា ក្រុមហ៊ុនមិនតិចជាង 80%ទេ ដែលដាក់លិខិតប្រកាសខាតមកពន្ធដារ តែថ្នាក់ដឹកនាំពន្ធដារមិនជឿលើលិខិតប្រកាសខាតទាំងនោះទេ។
បើទោះបីជាមានការលើកឡើងធ្ងន់ៗបែបនេះក៏ដោយ តែឯកឧត្តម គង់ វិបុល មិនបានបញ្ចេញឈ្មោះក្រុមហ៊ុនណាមួយនោះទេ ដោយគ្រាន់តែបញ្ជាក់ថា ក្រុមហ៊ុនបុរីខ្លះប្រើប្រាស់ទុនពីធនាគាររហូតដល់ 50លានដុល្លារ ហើយក្រុមហ៊ុនខ្លះវិញប្រើប្រាស់កម្ចីពីក្រៅប្រទេសរាប់រយលានដុល្លារ តែម្ចាស់អាជីវកម្មនោះបែរជាអះអាងថា ខាតទៅវិញ។
ឯកឧត្តម គង់ វិបុល មានប្រសាសន៍ថា៖ “គាត់មកប្រាប់ថា គាត់រកស៊ីជាលក្ខណៈគ្រួសារទេ ពេលខ្លះអត់ចំណេញទេ។ ខ្ញុំថា ឥឡូវសុំមើលរបាយការណ៍ តើធនាគារឲ្យលោកខ្ចីប៉ុន្មាន ខ្ចី 50លានដុល្លារ។ បើឃើញអត់ចំណេញ គេឱ្យខ្ចី 50លានដុល្លារ? ធនាគារហ្នឹងដូចជាមិនសូវចេះវិភាគពីហានិភ័យរបស់ខ្លួនទេអី?។
រាជរដ្ឋាភិបាលកម្ពុជាបានធ្វើការប្រកាសពីការផ្លាស់ប្តូររបៀបប្រមូលពន្ធពីរបបម៉ៅការទៅជារបបស្វ័យប្រកាស ចាប់តាំងពីឆ្នាំ2016មក។ បន្ទាប់ពីមានការផ្លាស់ប្តូរនេះ ត្រូវបានវិស័យឯកជនយល់ឃើញថា របបស្វ័យប្រកាសនេះ បានបង្ករផលលំបាកមួយចំនួនចំពោះអ្នកជាប់ពន្ធតូច ដោយសារការអនុវត្តតាមរបបម៉ៅការពីមុនមិនតម្រូវឱ្យមានគណនេយ្យទេ ហើយពេលប្តូរមករបបស្វ័យប្រកាសវិញមានការតម្រូវលើការធ្វើបញ្ជីស្នាមគណនេយ្យច្រើនដែលធ្វើឱ្យបន្ទុកនៃការចំណាយកាន់តែខ្ពស់ឡើង ហើយអាជីវកម្មបែបលក្ខណៈគ្រួសារមួយចំនួនប្រឈមនឹងការលំបាកកាន់តែខ្លាំងទៅលើការចំណាយបង់ពន្ធ និងផ្សេងៗទៀត ដូចជាពន្ធកាត់ទុកជាដើម៕
February 2, 2018
Instagram នឹងមានមុខងារ Video Call ឆាប់ៗ?
អាមេរិក៖ យោងតាមសេចក្ដីរាយការណ៍បានឱ្យដឹងថា Instagram កំពុងតែត្រៀមលក្ខណៈបញ្ចូលនូវមុខងារថ្មី ដែលអនុញ្ញាតឱ្យអ្នកប្រើប្រាស់កាត់តែមានភាពស្និទ្ធស្នាលជាងមុន នោះគឺមុខងារ Video Call។
មុខងារមួយនេះ នឹងលោតបង្ហាញឡើងតែសម្រាប់អ្នកប្រើប្រាស់ទាំងឡាយណាដែលបានផ្សារភ្ជាប់ទំនាក់ទងជាមួយគ្នា ហើយបើសិនជាចង់ប្រើប្រាស់មុខងារនេះ អ្នកប្រើត្រូវចុចប៊ូតុង Video Call តែមុខងារនេះ ក៏មានចំណុចពិសេសដែរគឺភាគីម្ខាងទៀត អាចមានសិទ្ធិមិនទទួលការហៅជា Video Call នេះបានដែរ។
សម្រាប់ព័ត៌មាននេះដែរ ត្រូវបានលេចធ្លាយប្រហែលជា ៣ខែមកហើយ ប៉ុន្តែព័ត៌មានដែលបានបែកធ្លាយនោះ មិនទាន់យកជាការបាន ព្រោះតែគ្មានប្រភពច្បាស់លាស់ ចំណែកនៅពេលនេះ គឺរូបភាពមុខងារ Video Call ត្រូវបានគេចែករំលែកពាសពេញបណ្ដាញសង្គម ខណៈដែលអ្នកនាំពេលរបស់ Instagram មិនធ្វើសេចក្ដីអត្ថាធិប្បាយអ្វីទាំងអស់៕
February 1, 2018
ចិនគ្រោងសាងសង់មន្ទីរពេទ្យខ្នាតអន្តរជាតិនៅកម្ពុជា
ដើម្បីចូលរួមលើកកម្ពស់វិស័យសុខាភិបាលនៅក្នុងប្រទេសកម្ពុជាឱ្យមានការរីកចម្រើនដូចបណ្តាប្រទេសនៅក្នុងតំបន់ និងក៏ដូចជានៅលើឆាកអន្តរជាតិដែរនោះ ក្រុមវេជ្ជបណ្ឌិតល្បីៗរបស់ចិនគ្រោងនឹងសាងសង់មន្ទីរពេទ្យលំដាប់អន្តរជាតិនៅកម្ពុជានាពេលខាងមុខ។
គម្រោងសាងសង់នេះត្រូវបានបង្ហាញតាមរយៈឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មដែលបានដឹកនាំប្រតិភូទៅទស្សនកិច្ចមន្ទីរពេទ្យ Yi Zhou Proton Therapy Center នៅទីក្រុង Zhuozhou នៃខេត្តហឺប៉ី ប្រទេសចិន ដែលជាមន្ទីរពេទ្យឯកទេសព្យាបាលជំងឺមហារីកដ៏ធំ និងទំនើបបំផុតនៅក្នុងប្រទេសចិន។
ឯកឧត្តមរដ្ឋមន្ត្រីបានមានប្រសាសន៍ថា មន្ទីរពេទ្យនេះត្រូវបានវិនិយោគលើផ្ទៃដីប្រមាណ90 ហិកតា ចំណាយអស់ទុនសាងសង់ចំនួន 6.2 ប៊ីលានយន់ (ប្រមាណ 1ប៊ីលានដុល្លារអាមេរិក) និងមានបុគ្គលិក គ្រូពេទ្យ និងវេជ្ជបណ្ឌិតជំនាញប្រមាណ 3,000 នាក់កំពុងបំពេញការងារ ដោយមានបំពាក់ឧបករណ៍ និងគ្រឿងបរិក្ខារទំនើបបំផុត។ ក្នុងបរិវេណមន្ទីរពេទ្យនេះមានអគារព្យាបាលជំងឺទូទៅ ជំងឺមហារីកព្យាបាលតាមបែបគីមី តាមបែបកោសិកា តាមបែបវិទ្យាសាស្ត្រចិន និងតាមបែបបស្ចិមប្រទេស ព្រមទាំងមានអគារស្នាក់នៅសម្រាប់បុគ្គលិក-គ្រូពេទ្យ មន្ទីរពិសោធ សាលប្រជុំ ភោជនីយដ្ឋាន និងកន្លែងហាត់កីឡាទៀតផង។
ក្នុងជំនួបនេះលោក Han Ge ដែលជាអ្នកវិនិយោគមន្ទីរពេទ្យនេះបានមានប្រសាសន៍ថា តាមរយៈមន្ទីរពេទ្យនេះ លោកមានបំណង និងកំពុងសិក្សាលើគម្រោងសាងសង់មន្ទីរពេទ្យដែលមានស្តង់ដារដូចគ្នានេះនៅក្នុងប្រទេសកម្ពុជា និងបង្កើតវិទ្យាស្ថានវេជ្ជសាស្ត្រមួយទៀតផង។
ជាមួយគ្នានេះ ឯកឧត្ដមរដ្ឋមន្ត្រី បានសម្ដែងនូវការស្វាគមន៍ចំពោះគម្រោងវិនិយោគនេះ ព្រោះការបង្កើតបាននូវមន្ទីរពេទ្យលំដាប់ស្តង់ដារខ្ពស់នឹងជួយផ្ដល់ឱកាសការងារក្នុងស្រុក និងជាមូលដ្ឋានដ៏សំខាន់ក្នុងការថែរក្សាសុខភាពប្រជាជន។ បើគម្រោងសាងសង់មន្ទីរពេទ្យនេះសម្រេចបានជោគជ័យ វានឹងក្លាយជាមន្ទីរពេទ្យដែលបម្រើសេវាព្យាបាល មិនត្រឹមតែសម្រាប់ប្រជាជនកម្ពុជាប៉ុណ្ណោះទេ តែសម្រាប់ប្រជាជនទូទាំងតំបន់ផងដែរ៕
February 1, 2018
Aubameyang បំពេញការផ្ទេរទៅ Arsenal ខណៈ Giroud ទៅ Chelsea
ខ្សែប្រយុទ្ធអន្តរជាតិបារាំង Olivier Giroud បានបំពេញការផ្ទេរក្នុងតម្លៃខ្លួន 18លានផោន (ស្មើនឹង 25.56លានដុល្លារអាមេរិក) របស់គេទៅកាន់ក្លិប Chelsea និងបានចុះហត្ថលេខាលើកុងត្រារយៈពេល 18ខែ នៅឯកីឡដ្ឋាន Stamford Bridge។
នៅមុននេះបន្តិច កាលពីថ្ងៃពុធ ក្លិប Arsenal បានបំបែកកំណត់ត្រាផ្ទេររបស់ពួកគេ សម្រាប់ការបើកទីផ្សារដោះដូរកីឡាករជាលើកទី 2នៅរដូវកាលនេះ តាមរយៈការបំពេញការផ្ទេរខ្សែប្រយុទ្ធ Pierre-Emerick Aubameyang ពីក្លិប Borussia Dortmund ក្នុងតម្លៃខ្លួន 56លានផោន (ស្មើនឹង 74លានដុល្លារអាមេរិក)។ ដោយឡែក ក្លិបយក្សរបស់អាល្លឺម៉ង់មួយនេះ បានចុះហត្ថលេខាជាមួយនឹងខ្សែប្រយុទ្ធ Michy Batshuayi ពីក្លិប Chelsea ជំនួសវិញក្នុងលក្ខខណ្ឌខ្ចីជើងរហូតដល់បញ្ចប់រដូវកាលនេះ។
Giroud នឹងពាក់អាវលេខ 18ក្នុងក្លិបថ្មីរបស់គេ ក្រោយពីការចូលរួមរបស់គេបានកើតឡើង មុនពេលក្លិប Dortmund បានប្រកាសពីការខ្ចីជើង Batshuayi។ Aubameyang វ័យ 28ឆ្នាំ ដែលបានចុះហត្ថលេខាលើកុងត្រាមួយជាមួយនឹងក្លិប Arsenal រហូតដល់ឆ្នាំ2021នោះ នឹងក្លាយជាកីឡាករចំណូលថ្មីមានឈ្មោះល្បីទី 2របស់ Arsenal នៅខែមករានេះ ក្រោយពី Henrikh Mkhitaryan បានចូលរួមដោយមកពីក្លិប Manchester United។
ការផ្ទេរមួយនេះ នឹងបង្កើនជម្រើសក្នុងតំបន់ប្រយុទ្ធរបស់ Arsenal ក្រោយពីការចាកចេញរបស់ Alexis Sanchez ទៅកាន់ Man United ក្នុងការផ្ទេរមួយដែលមានការដោះដូរជាមួយនឹង Mkhitaryan ប៉ុន្តែ វាបានបង្កើតឲ្យមានសំណួរជាច្រើនជុំវិញអនាគតរបស់ Alexandre Lacazette ក្នុងជម្រើសទាំង 11នាក់ដំបូង៕
ប្រភពពី៖ The Guardian
February 1, 2018
គង់ ចាន់ស្រីមុំ បញ្ចេញសាច់ក្បាលពោះកំពុងតាំងគភ៌នៅតែស្រស់ស្អាត
តាមរយៈបណ្ដាញសង្គមហ្វេសប៊ុករបស់តារាស្រី គង់ ចាន់ស្រីមុំ នៅថ្ងៃទី1 ខែកុម្ភៈ ឆ្នាំ2018 នេះបានបង្ហោះរូបភាពបញ្ចេញសាច់ក្បាលពោះដ៏ស្រស់ស្អាត ខណៈដែលអ្នកនាងកំពុងពពោះប្រមាណជាជាង 4 ខែហើយ។
ជាទូទៅដូចដែលប្រិយមិត្តទាំងអស់គ្នាបានដឹងហើយថា តារាស្រីរូបនេះកាលពីមិនទាន់មានស្វាមី នាងពិតជាមានរូបសម្ផស្សស្រស់ស្អាតខ្លាំងណាស់ និងបានទាក់ទាញចិត្តបុរសៗជាច្រើននាក់ឱ្យលង់ក្នុងសម្រស់របស់អ្នកនាងទៀតផង ហើយបើទោះជាពេលនេះ អ្នកនាងមានស្វាមីហើយក្ដី ក៏អ្នកនាងនៅតែថែរក្សាសម្រស់បានស្អាតដដែល។ ដោយឡែក ខណៈដែលកំពុងតែពពោះកូនដំបូងនេះ អ្នកនាង គង់ ចាន់ស្រីមុំ បានបង្ហោះរូបភាពបញ្ចេញសាច់ក្បាលពោះ ឱ្យមហាជនអ្នកគាំទ្របានទស្សនាពីសាច់ក្បាលពោះដ៏សខ្ចីម៉ដ្ឋរលោង និងនៅតែមានភាពសិចស៊ីស្រស់ស្អាតរហូត។
យ៉ាងណាមិញ អ្នកនាង គង់ ចាន់ស្រីមុំ បានរៀបរាប់ក្នុងសារនូវពាក្យមួយឃ្លាថា «i can’t wait to see u , i already love u.» ដែលស្ដែងឱ្យដឹងថា នាងមានក្ដីរំភើប និងអន្ទះសាជាខ្លាំងក្នុងការរង់ចាំថ្ងៃដែលបុត្រសម្លាញ់នឹងបានឃើញពន្លឺព្រះអាទិត្យ។ ដូច្នេះកុំបង្អង់យូរ សូមទស្សនារូបភាពខាងក្រោមនេះទាំងអស់គ្នា៖
February 1, 2018
Moura បំពេញការផ្ទេរពី PSG ទៅ Spurs ក្នុងតម្លៃខ្លួន 25លានផោន
ក្លិបមាន់ខ្នាយមាស Tottenham បានបំពេញការចុះហត្ថលេខាជាមួយនឹងខ្សែបម្រើស្លាបអន្តរជាតិប្រេស៊ីល Lucas Moura ពីក្លិប Paris Saint-Germain ក្នុងតម្លៃខ្លួន 25លានផោន (ស្មើនឹង 35.4លានដុល្លារអាមេរិក) ក្នុងរយៈពេល 5ឆ្នាំកន្លះ។
Moura គឺជាកីឡាករចំណូលថ្មីដំបូងគេរបស់ Spurs នៅរដូវរងានេះ បើគិតចាប់តាំងពីឆ្នាំ2015 ដែលនៅពេលនោះពួកគេបានទិញខ្សែបម្រើ Dele Alli ពីក្លិប MK Dons ហើយខ្សែបម្រើរូបនោះក៏បានក្លាយជាកីឡាករទី2របស់ PSG ក្នុងការចាកចេញពីក្លិបនេះនៅរដូវកាលនេះផងដែរ បន្ទាប់ពីការចាកចេញរបស់ Serge Aurier កាលពីរដូវក្តៅ។ Moura បានធ្វើដំណើរទៅដល់ទីក្រុងឡុងដ៍ហើយកាលពីរាត្រីថ្ងៃចន្ទ ហើយនិងត្រូវបាននាំទៅកាន់ទីលានហ្វឹកហាត់របស់ក្លិប Spurs កាលពីថ្ងៃអង្គារ ដើម្បីពិនិត្យសុខភាព។
Lucas ដែលសង្ឃឹមថានឹងបានចូលលេងក្នុងជម្រើសទាំង 11នាក់ដំបូងនោះ បាននិយាយនៅលើបណ្តាញសង្គម Twitter របស់ Tottenham ថា៖ «វាជាទំព័រថ្មីមួយក្នុងជីវិតរបស់ខ្ញុំ ជាការប្រជែងថ្មីមួយសម្រាប់ខ្ញុំ។ ខ្ញុំពិតជារីករាយណាស់»។ ខ្សែបម្រើស្លាបវ័យ 25ឆ្នាំដែលបានបង្ហាញខ្លួនជាអន្តរជាតិចំនួន 34លើករូបនេះ បានសម្តែងពីការខកចិត្តរបស់គេទៅកាន់កាសែតកីឡាប្រចាំថ្ងៃរបស់បារាំង L’Equipe កាលពីដើមសប្តាហ៍នេះ សម្រាប់ការដែលត្រូវបានបង្កកដោយក្លិប PSG ខណៈដែលការទៅដល់របស់មិត្តរួមជាតិរបស់គេ Neymar ពីក្លិប Barcelona បានធ្វើឲ្យគេកាន់តែបាត់បង់ឱកាសក្នុងការចូលលេងក្នុងជម្រើសដំបូងទៅទៀត៕
ប្រភពពី៖ Sky Sports
February 1, 2018
Vivo បង្ហាញ X20 Plus UD ស្មាតហ្វូនបង្កប់ស្គែនខ្ចៅដៃក្រោមអេក្រង់មុនគេលើពិភពលោក
នៅទីបំផុតក៏ដល់ពេលបង្ហាញខ្លួនជាផ្លូវការហើយសម្រាប់ Vivo X20 Plus UD ស្មាតហ្វូនដែលខាង Vivo ចាត់ភាពទំនើបមកព្រមជាមួយនឹងសេនស៊ើរស្គែនស្នាមខ្ចៅម្រាមដៃក្រោមអេក្រង់ដំបូងគេបំផុតក្នុងពិភពលោក។
សេនស៊ើរស្គែនស្នាមខ្ចៅម្រាមដៃក្រោមអេក្រង់របស់ Vivo ដែលបានធ្វើឡើងរួមគ្នាជាមួយ Synaptics នោះមានឈ្មោះហៅថា Clear ID FS9500 ស្គែនស្នាមខ្ចៅម្រាមដៃដោយប្រព័ន្ធ Optical ដោយប្រើសេនស៊ើរទទួលរូបភាព CMOS ដែលមានកម្រាស់ស្ដើងបំផុតត្រឹមតែ 0.7 មីល្លីម៉ែត្រ បំពាក់នៅស្រទាប់ក្រោមអេក្រង់ OLED ដែលនឹងមានតួនាទីបញ្ចាំងពន្លឺទៅរកស្នាមខ្ចៅម្រាមដៃដើម្បីឱ្យសេនស៊ើរស្គែន និងបញ្ជូនព័ត៌មានទៅឈិពរក្សាទិន្នន័យ ដើម្បីពិនិត្យស្នាមខ្ចៅម្រាមដៃថា តើត្រឹមត្រូវឬទេ?។ ក្រៅពីនេះ សេនស៊ើរស្គែនស្នាមខ្ចៅម្រាមដៃបែបក្នុងអេក្រង់
របស់ Synaptics នេះថែមទាំងធន់នឹងការឆ្កូតឬស្នាមផ្សេងៗ និងអាចការពារការជ្រាបទឹកបានទៀតផង ព្រោះបំពាក់នៅក្រោមកញ្ចក់។
Synaptics នៅបានប្រាប់ទៀតថា Clear ID FS9500 នេះធ្វើការបានលឿនជាង Face ID ដល់ទៅ 2ដង និងធ្វើការបានល្អទោះជានៅក្នុងកន្លែងដែលមានពន្លឺថ្ងៃចាំងខ្លាំងក៏ដោយ។
Vivo X20 Plus UD នឹងចេញមកព្រមជាមួយអេក្រង់ AMOLED ទំហំ 6.43អីុញ អត្រាចំណែក 18:9 ភាពលម្អិតច្បាស់ Full HD គូគ្នាជាមួយ RAM 4GB ផ្ទុកបាន 128GB ប្រើឈិពសិត Snapdragon 660 Support និងការប្រើស៊ីម 2 បែប HighBrid។ ចំណែកឯផ្នែកកាមេរ៉ាវិញ កាមេរ៉ាខាងមុខនឹងចេញមកព្រមជាមួយភាពលម្អិតច្បាស់ 12 Mega Pixel។ កាមេរ៉ាក្រោយ 1គូ មានភាពលម្អិតច្បាស់ 12+5 Mega Pixel និងថែមទាំងប្រើថ្មបាត់តេរីទំហំ 3,950mAh ទៀតផង៕
February 1, 2018
ទោះវរល់យ៉ាងណា ខេមរៈ សេរីមន្ដ មិនភ្លេចធ្វើបុណ្យសាងកុសលជាមួយគ្រួសារ
តាមរយៈបណ្ដាញទំនាក់ទំនងសង្គមហ្វេសប៊ុកនៅថ្ងៃទី1 ខែកុម្ភៈនេះបានឱ្យដឹងថា បើទោះបីជាមួយរយៈក្រោយៗនេះតារាចម្រៀងប្រុសរូបសង្ហា និងជាម្ចាស់បទ “ស្ទឹងសែនបងអើយ” កំពុងតែកក្រើក និងទាក់ទាញអារម្មណ៍ទស្សនិកជនខ្លាំងបំផុត និងមានភាពមមាញឹកជាមួយនឹងការងារសិល្បៈខ្លាំងយ៉ាងណាក៏ដោយ ក៏លោក ខេមរៈ សេរីមន្ដ មិនភ្លេចរឿងធ្វើបុណ្យសាងកុសលឡើយ។
ជាក់ស្ដែងកាលពីថ្ងៃម្សិលមិញនេះ គឺជាថ្ងៃបុណ្យមាឃបូជា លោក ខេមរៈ សេរីមន្ដ បានឆ្លៀតពេលដ៏រវល់របស់ខ្លួននាំក្រុមគ្រួសារទៅធ្វើបុណ្យនៅឯវត្ត ដោយក្នុងនោះលោកក៏បានបង្ហោះរូបប៉ុន្មានសន្លឹកនៅក្នុងគណនីហ្វេសប៊ុករបស់ខ្លួនដែរ ព្រមជាមួយនឹងសារអមថា៖”មាឃបូជាជូនបុណ្យបងប្អូនទាំងអស់គ្នា”។ ដោយឡែក ការបង្ហាញវត្តមាននៅទីតាមទីវត្តអារ៉ាមរបស់តារាចម្រៀងរូបនេះ គេឃើញមានអ្នកគាំទ្រតាមដង្ហែរូបលោក ព្រមទាំងសុំថតរូបជាមួយមិនចេះដាច់ឡើយ។
គួរបញ្ជាក់ផងដែរថា ចាប់តាំងពីលោក ខេមរៈ សេរីមន្ដ ផ្លាស់មកចូលនៅក្នុងផលិតកម្មរស្មីហង្សមាសមក ត្រូវបានគេកត់សម្គាល់ឃើញថា លោកមានការកើនឡើងនៃសម្ទុះការគាំទ្រជាខ្លាំងពីសំណាក់ទស្សនិកជន។ ហើយលោកតែងតែចេញបទចម្រៀងថ្មីៗមកបំពេញចិត្តអ្នកគាំទ្ររបស់ខ្លួន ក៏ដូចជាការបង្ហាញស្ទីលប្លែកៗជាច្រើនទៀតផង៕
February 1, 2018
ឯកឧត្តម វេង សាខុន ជំរុញការដាំដុះឫស្សីតាមសហគមន៍ព្រៃឈើ ដើម្បីបង្កើនប្រាក់ចំណូល
រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទបានអះអាងពីគោលបំណងបង្កើនប្រាក់ចំណូលដល់ប្រជាពលរដ្ឋក្នុងសហគមន៍ការពារព្រៃឈើ តាមរយៈការបង្កើនការដាំដើមឈើដែលមានប្រយោជន៍ ការផលិតបន្លែ និងការចិញ្ចឹមសត្វ ស្របពេលដែលតម្រូវការនៅក្នុងប្រទេសកាន់តែកើនឡើង។
ការប្រកាសរបស់ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខា ប្រមាញ់ និងនេសាទ បានធ្វើឡើងនៅក្នុងវេទិកាកសិកម្មក្នុងខែមករានេះ។ ការប្រកាសនេះត្រូវបានគេមើលឃើញថា ស្របពេលដែលផលិតកម្មកសិកម្មរបស់ប្រទេសកម្ពុជាកំពុងធ្លាក់ចុះជាបន្តបន្ទាប់ ដោយលើកលែងតែការផលិតស្រូវ ខណៈដែលកម្ពុជាមានតម្រូវការខ្ពស់ផ្នែកបន្លែ និងត្រីសាច់ ដើម្បីបំពេញតម្រូវការទីផ្សារក្នុងស្រុកដែលកំពុងមានកំណើនខ្ពស់ និងកើនឡើងតាមរយៈកំណើនទេសចរ និងកំណើនសេដ្ឋកិច្ច។
ឯកឧត្តម វេង សាខុន មានប្រសាសន៍ថា ៖ “ទិសដៅរបស់ខ្ញុំ គឺយើងមិនអាចទៅចៀរជ័រទឹក ហើយយកទៅលក់ដើម្បីរស់បានទៀតនោះទេ ព្រោះសេដ្ឋកិច្ចរបស់យើងកើនឡើងហើយ និងកើនឡើងរហូត។ ខ្ញុំឱ្យប្រមូលធនធានដើម្បីជួយដល់សហគមន៍ព្រៃឈើដែលបានបង្កើតហើយនោះ ដែលមិនត្រឹមតែការពារព្រៃឈើប៉ុណ្ណោះទេ ប៉ុន្តែយើងត្រូវធ្វើការដាំដុះបន្ថែមទៀត ទាំងអគ្គនាយកដ្ឋានកសិកម្ម និងរដ្ឋបាលជលផលត្រូវសហការគ្នា គឺកន្លែងណាដែលអាចជួយគាត់បាន។
តាមអ្វីដែលរដ្ឋមន្ត្រីក្រសួងកសិកម្ម រុក្ខា ប្រមាញ់និងនេសាទបានមានប្រសាសន៍នោះគឺ សហគមន៍ព្រៃឈើនៅកម្ពុជាមានសក្តានុពលច្រើនក្នុងការអភិវឌ្ឍការថែរក្សាព្រៃឈើរបស់ខ្លួន និងបង្កើនប្រាក់ចំណូលបន្ថែមតាមរយៈការដាំដុះប្រភេទរុក្ខជាតិដែលមានប្រយោជន៍ដល់សេដ្ឋកិច្ចតាមរយៈការប្រើប្រាស់ប្រចាំថ្ងៃ។
ប្រភេទរុក្ខជាតិដែលមានប្រយោជន៍ដល់សេដ្ឋកិច្ចគ្រួសារ និងសហគមន៍ព្រៃឈើនោះគឺការដាំដុះដើមឫស្សី ព្រោះដើមឫស្សីត្រូវបានគេប្រើប្រាស់ ចាប់តាំងពីទំពាំងរហូតដល់ដើមរបស់វា ដែលជាហេតុផលមួយរួមចំណែកដល់ការកាត់បន្ថយការពឹងផ្អែកលើការនាំចូលប្រភេទបន្លែទំពាំងពីប្រទេសជិតខាង។
ឯកឧត្តម វេង សាខុន បានបញ្ជាក់ថា ៖ “ខ្ញុំមើលនៅក្នុងកាសែត ខ្ញុំឃើញថាមានចំណូលច្រើនពីដំណាំឫស្សី អ៊ីចឹងនៅក្នុងព្រៃនោះ ម៉េចមិនព្រមដាំឫស្សី? ព្រោះបានផលច្រើន ប្រមូលផលពីដើមឫស្សីផង និងទំពាំងផង។ ខ្ញុំឃើញក្នុងពិធីការនីមួយៗ ទំពាំងត្រូវគេយកទៅឆាធ្វើម្ហូប មិនតិចនោះទេ ហើយយើងមិនព្រមគិតគូរដាំ បែជាទៅនាំទំពាំងពីគេមកវិញ។
តាមរយៈគំនិតផ្តួចផ្តើមនេះ ប្រជាជនដែលរស់នៅតាមតំបន់ដែលមានសហគមន៍ព្រៃឈើ មិនត្រឹមតែមានឱកាសថែរក្សាព្រៃឈើដែលមានប្រយោជន៍យូរអង្វែងដល់អនាគតក្រុមគ្រួសាររបស់គាត់ប៉ុណ្ណោះទេ ប៉ុន្តែថែមទាំងទទួលបានមុខរបរ និងប្រាក់ចំណូលដើម្បីបង្កើនជីវភាពគ្រួសារឱ្យបានល្អប្រសើរជាងមុនផងដែរ។ ឯកឧត្តម វេង សាខុន បានបញ្ជាក់ថែមទៀតថា៖“យើងអាចកែច្នៃបាន អ្វីដែលមិនប៉ះពាល់ដល់ព្រៃឈើ ហើយទទួលបានចំណូលផង។ សេដ្ឋកិច្ចចេះតែកើនឡើង មានសេចក្តីត្រូវការច្រើនណាស់ យើងត្រូវបង្កើនមុខរបរថ្មីៗបន្ថែមទៀត ខាងអគ្គនាយកដ្ឋានផលិតកម្មសត្វ និងសុខភាពសត្វត្រូវតែគិតគូរថា តើយើងអាចលែងគោ លែងក្របីក្នុងព្រៃឈើនោះបានឬទេ?។
ឯកឧត្តម វេង សាខុន បន្ថែមទៀតថា៖ “ខ្ញុំកំពុងបុករុកជាមួយក្រសួងសេដ្ឋកិច្ច និងហិរញ្ញវត្ថុ ដើម្បីឱ្យផ្តល់ទុនវិនិយោគលើបញ្ហានេះ ដើម្បីបន្ថែមទុនទៅដល់អគ្គនាយកដ្ឋានផលិតកម្មសត្វ និងសុខភាពសត្វដើម្បីជំរុញកិច្ចការនេះ យើងមិនធ្វើឱ្យប៉ះពាល់ព្រៃឈើទេ ប៉ុន្តែយើងត្រូវចិញ្ចឹមជាមួយគ្នាតែម្តង ដូចជាដាំដើមឫស្សី ចិញ្ចឹមសត្វ គឺយើងអាចធ្វើទៅរួច ដើម្បីបន្ថយសម្ពាធ។
យោងតាមទិន្នន័យដែលបានសិក្សានាពេលកន្លងមក កម្ពុជាបាននាំចូលបន្លែជាច្រើនប្រភេទពីប្រទេសជិតខាងដែលមានបរិមាណប្រមាណជា 400តោនក្នុងមួយថ្ងៃ ចន្លោះពីខែមីនារហូតដល់ខែវិច្ឆិកា ហើយកម្ពុជាត្រូវចំណាយទឹកប្រាក់ប្រមាណ 200លានដុល្លារសម្រាប់ការនាំចូលបន្លែទាំងនោះ។
បច្ចុប្បន្ននេះ ផ្ទៃដីដាំដុះបន្លែនៅកម្ពុជាបានថយចុះជាបន្តបន្ទាប់យ៉ាងគួរឱ្យព្រួយបារម្ភចំពោះការផលិតស្បៀងនៅក្នុងស្រុក។ ក្នុងឆ្នាំ2016 ផ្ទៃដីដាំដុះបន្លែនៅសល់តែជាង 12,000 ដោយថយចុះអស់ជាង 3,000ហិកតា ពីជាង 15,000ហិកតាក្នុងឆ្នាំ2015 ហើយនៅឆ្នាំ2017 ផ្ទៃដីដាំដុះបន្លែគ្រប់ប្រភេទនៅសល់តែជាង 9,000ហិកតាប៉ុណ្ណោះ៕
February 1, 2018
ភ្ញាក់ផ្អើល! ម៉េង កែវពេជ្ជតា បង្ហាញអក្សរសរសេរដៃ ស្អាតដូចបោះពុម្ព
តាមរយៈបណ្ដាញទំនាក់ទំនងសង្គមហ្វេសប៊ុកនៅថ្ងៃទី1 ខែកុម្ភៈ ឆ្នាំ2018 នេះបានឱ្យដឹងថា រាជិនីសំឡេងមាស ម៉េង កែវពេជ្ជតា បានបង្ហោះរូបភាពជាច្រើនសន្លឹកនៅពេលថ្មីៗនេះ ដែលគេមើលឃើញថា ជាអក្សរប៉ារ៉ូល(ទំនុកច្រៀង)ចម្រៀងបទ “ទឹកភ្នែកសំងាត់” ដោយអ្នកស្រី សុង សេងហ៊ន ដែលធ្វើឱ្យមហាជនមានការភ្ញាក់ផ្អើលយ៉ាងខ្លាំង ព្រោះមិនធ្លាប់បានឃើញអក្សរដែលតារាស្រីរូបនេះសរសេរដោយផ្ទាល់ដៃនោះឡើយ ពោលគឺ ពិតជាកម្របានឃើញមែន។
ដូចដែលធ្លាប់បានដឹងហើយថា រាជិនីសំឡេងមាសរូបនេះ មិនត្រឹមតែជាតារាចម្រៀងដែលមានទឹកដមសំឡេងពិរោះរណ្ដំបេះដូងនោះទេ អ្នកនាងក៏មានចំណេះដឹងផ្នែកអក្សរសាស្ត្រខ្មែរជ្រៅជ្រះផងដែរ។ អ្នកនាង ម៉េង កែវពេជ្ជតា បានបញ្ជាក់នៅលើហ្វេសប៊ុកថា «គ្រប់គ្នាថាអក្សរខ្ញុំដូចជាអក្សរមនុស្សប្រុស? ដូចមែនឬ? ទឹកភ្នែកសំងាត់ ដោយអ្នកស្រី សុង សេងហ៊ន (ស្រលាញ់ណាស់)»។
យ៉ាងណាមិញ អ្នកគាំទ្រជាច្រើននាក់បានលាន់មាត់សរសើអក្សរតារាស្រីរូបនេះថា «អក្សរស្អាតដូចបោះពុម្ព» ខ្លះទៀតថា «សូមសរសើរ បងស្រីសរសេរអក្សរបានស្អាតណាស់ ហើយមានឃ្លា មានបន្ទាត់ និងល ល្អឥតខ្ចោះ។ អក្សរបងស្រីសរសេរពិតជាដូចអក្សរមនុស្សប្រុសជាអ្នកសរសេរមែន! (ប្អូនសរសេរអក្សរមិនស្អាតដូចបងស្រីទេ (ប្អូនពិតជាខ្មាស់បងស្រីណាស់) ពីព្រោះប្អូនមិនបានរៀនសាលាល្អដូចបង និងមនុស្សគេឯទៀត) រូបជាមនុស្សស្រី តែសមត្ថភាពវិញជាបុរស ( មិនចាញ់បុរស )។ ប្អូនសូមសរសើរបងពិតមែន ហើយប្អូនសូមជូនពរបងឱ្យមានសុខភាពល្អ និងខិតខំបន្តទៀត ដើម្បីសិល្បៈខ្មែរយើងទាំងអស់គ្នា ។ love you sister , wish you all the best »៕
ដើម្បីឱ្យកាន់តែជ្រាបច្បាស់បន្ថែមទៀត សូមទស្សនារូបភាពទាំងឡាយខាងក្រោមនេះ៖
February 1, 2018