ក្រុមអាជីវករនៅខេត្តព្រះសីហនុបានថ្លែងអំពីក្តីបារម្ភរបស់ពួកគាត់ ខណៈដែលជនជាតិចិនបានចូលមករស់នៅកាន់តែច្រើនឡើងៗ បង្កឱ្យមានភាពរញ៉េរញ៉ៃ និងកំពុងដណ្តើមទីផ្សារ និងអាជីវកម្មខ្នាតតូចរបស់ពួកគាត់ទៀតផង។
លោក ស្រ៊ន វ៉ាន់ឌី អាជីវករលក់គ្រឿងសមុទ្រនៅខេត្តព្រះសីហនុបានរៀបរាប់ថា បច្ចុប្បន្នជនជាតិចិនបានចូលមករស់នៅកាន់តែច្រើនឡើងៗ ហើយពេលពួកគេចេញដើរទៅណាមកណាចូលចិត្តនិយាយគ្នាឮៗ ជក់បារីបង្ហុយដាក់គេឯង ហើយមិនតែប៉ុណ្ណោះពួកគេបានដណ្តើមទីផ្សារខ្នាតតូចដែលជាអាជីវកម្មចិញ្ចឹមជីវិតរបស់ពលរដ្ឋខ្មែរយើងទៀតផង។
លោកថា គ្រប់មុខរបរលក់ដូររួមមានហាងលក់ម្ហូបអាហារ ហាងប្តូរប្រាក់ និងហាងកាត់សក់ហាងកម្សាន្តផ្សេងៗ គឺពួកគេបើកព្រោងព្រាតដើម្បីចាំទទួលបម្រើសេវាកម្មដល់ភ្ញៀវទេសចរ ដែលទៅកម្សាន្តនៅតំបន់នោះ ធ្វើឱ្យអាជីវករខ្មែរបាត់បង់ប្រាក់ចំណូលមួយផ្នែកធំ។ លោកបញ្ជាក់ដូច្នេះថា “បច្ចុប្បន្ននេះដើរទៅណាក៏ឃើញចិនដែរ មិនមែនតែនៅតាមកន្លែងកម្សាន្តមាត់សមុទ្រនោះទេសូម្បីតែក្នុងផ្សារលក់ត្រី លក់សាច់ជ្រូក លក់គ្រឿងទេសផ្សេងៗក៏មានចិនចូលទៅលក់នៅទីនោះដែរគឺទិញពីផ្សារយកទៅលក់បន្ត ពិសេសលក់ឱ្យជនជាតិចិនគ្នាគេហ្នឹង។
ក្រៅពីការដណ្តើមទីផ្សារខ្នាតតូចហើយ ក្រុមវិនិយោគិនចិនក៏បានចូលមកជួល និងទិញអចលនទ្រព្យផ្សេងៗជាច្រើន ដូចជាដីធ្លី អគារខុនដូ ផ្ទះសំណាក់ និងសណ្ឋាគារជាដើម ដើម្បីទុកបម្រើសេវាកម្មដល់ជនបរទេស ពិសេសជនជាតិចិនគ្នាគេតែម្តង ដែលជាកត្តាធ្វើឱ្យតម្លៃដីនៅទីនោះមានសម្ទុះកើនឡើងយ៉ាងខ្លាំង។
ជាមួយគ្នានេះ លោកស្រី កែវ សុភា អ្នករស់នៅក្នុងក្រុងកំពង់សោមបាននិយាយថា បច្ចុប្បន្នចិនពិតជាកំពុងដណ្តើមទីផ្សាររបស់អាជីវករក្រុងកំពង់សោមមែន ដោយពួកគេបានជួលតូបលក់ដូរនៅក្នុងផ្សារតែម្តង លើសពីនេះពួកគេបានដើរជួលផ្ទះប្រជាពលរដ្ឋបើកហាងលក់ដូរទំនិញផ្សេងៗ បើកហាងផឹកស៊ីតាំងពីព្រលប់រហូតទល់ភ្លឺក៏មានដែរ។
ចំណែកលោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា ការចូលមកវិនិយោគកាន់តែច្រើនរបស់ចិនគឺជារឿងល្អ ព្រោះវាសុទ្ធតែផ្តល់ផលប្រយោជន៍ដល់កម្ពុជា ប៉ុន្តែការពឹងផ្អែកលើចិនតែមួយមិនមែនជារឿងល្អនោះទេ ព្រោះបើចិនមានបញ្ហាកម្ពុជាក៏នឹងមានបញ្ហាដែរ។ លោកបន្តថា នៅខេត្តព្រះសីហនុមានប្រជាជនមួយចំនួនមិនសូវជាសប្បាយចិត្តប៉ុន្មានឡើយ ហេតុនេះយើងគួរស្រឡាញ់ចិនក្នុងកម្រិតមួយដែលប្រជាជនយើងទាំងអស់ទទួលយកបាន។
ទោះយ៉ាងណា ដើម្បីទប់ស្កាត់ការដណ្តើមទីផ្សារខ្នាតតូចនេះ ក្រសួងពាណិជ្ជកម្មបានកោះហៅមន្ត្រីជំនាញពាក់ព័ន្ធនានានៅខេត្តព្រះសីហនុ ដោយមានការចូលរួមពីតំណាងក្រសួងការបរទេស អគ្គនាយកដ្ឋានអន្តោប្រវេសន៍នៃក្រសួងមហាផ្ទៃដើម្បីប្រជុំដោះស្រាយជាបន្ទាន់។
ឯកឧត្តម សុខ សុភ័ក្ត្រ អនុរដ្ឋលេខាធិការក្រសួងពាណិជ្ជកម្មមានប្រសាសន៍ថា កម្ពុជាគឺជាទិសដៅវិនិយោគមួយដ៏សំខាន់នៅក្នុងតំបន់ដែលទទួលបានកំណើនគួរឱ្យកត់សម្គាល់ ទន្ទឹមនឹងនេះ ការវិនិយោគផ្ទាល់ពីបរទេសនៅខេត្តព្រះសីហនុក៏មានកំណើនឡើងយ៉ាងគំហុកដែរក្នុងអំឡុងឆ្នាំ2017 ដែលភាគច្រើនលើវិស័យសណ្ឋាគារ និងកាស៊ីណូ។
ដោយឡែកជនបរទេសដែលកំពុងស្នាក់នៅ និងប្រកបអាជីវកម្មក្នុងខេត្តព្រះសីហនុមានចំនួន 15សញ្ជាតិ ដូចជាអាល្លឺម៉ង់ អុីតាលី ហ្វីលីពីន តួកគីអូស្ត្រាលី ឥណ្ឌា ឥណ្ឌូនេស៊ី អុីស្រាអែល ជប៉ុន បារាំង ចិន រុស្សី អាមេរិក អង់គ្លេស និងកូរ៉េ។ ក្នុងចំណោមបណ្តាជនជាតិទាំងនេះ ជនជាតិចិនមានចំនួនច្រើនជាងគេ និងមួយចំនួនទៀតកំពុងតែប្រកបអាជីវកម្មខ្នាតតូច ដូចជា កាត់សក់ លក់គ្រឿងទេស លក់គ្រឿងសំណង់ លក់ម្ហូបអាហារ បន្លែ និងផ្លែឈើបើកប្តូរប្រាក់ និងអាហារដ្ឋានដែលបានបង្កជាក្តីកង្វល់ដល់ប្រជាពលរដ្ឋនៅមូលដ្ឋានដែលប្រកបមុខរបរខាងលើដូចគ្នាដែរនោះ។
ឯកឧត្តមមានប្រសាសន៍បន្ថែមថា ការយល់ដឹងអំពីច្បាប់ជាតិ និងអន្តរជាតិ ច្បាប់អន្តោប្រវេសន៍របស់មន្ត្រីជំនាញ និងអាជ្ញាធរមូលដ្ឋាននៅមានកម្រិត កង្វះខាតបទប្បញ្ញតិ្តជាតិសម្រាប់គ្រប់គ្រងជនបរទេសក្នុងការធ្វើអាជីវកម្មខ្នាតតូច និងការកំណត់មុខរបរនៅកម្ពុជានិងភាពនៅមានកម្រិតនៃការផ្លាស់ប្តូរព័ត៌មានរវាងអន្តរក្រសួងស្ថាប័នជំនាញពាក់ព័ន្ធជាមួយនឹងរដ្ឋបាលថ្នាក់ក្រោមជាតិគឺជាកត្តាចម្បងដែលធ្វើឱ្យបញ្ហាដែលបានលើកឡើងខាងលើនេះនៅមិនទាន់មានដំណោះស្រាយបានពេញលេញនៅឡើយ។
យ៉ាងណាក៏ដោយ អាជ្ញាធរ និងស្ថាប័នពាក់ព័ន្ធបានសន្យាបង្កើនការផ្សព្វផ្សាយ និងអនុវត្តលិខិតបទដ្ឋានច្បាប់ដោយយកចិត្តទុកដាក់ និងតាមដានស្ថានការណ៍ជាប្រចាំ បង្កើតឱ្យមានមន្ត្រីបង្គោលសម្រាប់សម្របសម្រួល និងទំនាក់ទំនងអន្តរក្រសួងស្ថាប័ន បង្កើនការចែករំលែកព័ត៌មាន និងផ្សព្វផ្សាយច្បាប់ពាក់ព័ន្ធដល់មន្ត្រីមូលដ្ឋាន ព្រមទាំងពិនិត្យលទ្ធភាពកំណត់ ឬបង្កើតបទប្បញ្ញត្តិថ្មីច្បាប់អន្តោប្រវេសន៍លើការកំណត់មុខរបរតូចតាច ស្តង់ដារសម្រាប់ការស្នាក់នៅ ការគ្រប់គ្រងចលនាចេញចូលនៃជនបរទេសជាដើម៕
