សង្គម និងសេដ្ឋកិច្ច - La Reine Media

តើអ្នកគួរសម្លៀកបំពាក់បែបណា ដើម្បីឱ្យស័ក្ដិសមនឹងសម្បុរស្បែករបស់អ្នក?

បញ្ហាធំៗរបស់សុភាពនារី សុភាពបុរសជាច្រើននាក់ គឺជាការជ្រើសរើសសម្លៀកបំពាក់ និងពណ៌សម្លៀកបំពាក់ឱ្យស័ក្ដិសមទៅនឹងសម្បុរស្បែករបស់ខ្លួន។ នៅពេលសម្លឹងមើលលើការជ្រើសរើស ទោះជាឈុតណា ក៏អ្នកគិតថា ស័ក្ដិសមនឹងខ្លួនអ្នកតែទាំងអស់នឹង។ ក៏ប៉ុន្ដែ អ្នកមិនបានគិតថានៅពេលអ្នកយកមកសាកល្បងពាក់នៅលើខ្លួន តែបើជាវាមិនស័ក្តិសមនឹងរូបរាងរបស់អ្នកទៅវិញ។ ដូច្នេះហើយ មុននឹងធ្វើការសម្រេចចិត្តទិញ ឬជ្រើសរើសសម្លៀកបំពាក់ឱ្យសមនឹងរូបរាង ពណ៌សម្បុរស្បែករបស់អ្នកនោះ អ្នកត្រូវដឹងពីគន្លឹះដូចខាងក្រោមនេះជាមុនសិន។

1/ សម្បុរស្បែកពណ៌ខ្មៅ ( ខ្មៅរលោង-ខ្មៅស្រអែម)

សម្បុរស្បែកខ្មៅ (ខ្មៅរលោង-ខ្មៅស្រអែម) គួរតែជ្រើសរើសប្រើពណ៌ដែលស្រាលៗ ដូចជា ពណ៌លឿងខ្ចី ពណ៌ផ្កាឈូកខ្ចី ពណ៌ស្វាយផ្កាឡាវ៉ែនឌើ ពណ៌ស និងពណ៌កំបោរ ហើយចៀសវាងការជ្រើសរើសពណ៌ដែលដិត ឬចាស់ពេក។ មិនតែប៉ុណ្ណោះ អ្នកអាចជ្រើសរើសពណ៌សម្លៀកបំពាក់ដែលស្រដៀងនឹងពណ៌សម្បុររបស់អ្នកដូចជា ពណ៌ទឹកប៊ិចក្រម៉ៅ ពណ៌ត្នោតចាស់ ពណ៌ផ្ទៃមេឃ ពណ៌ស្វាយ ពណ៌ប្រផេះ ពណ៌បៃតងចាស់ ព្រោះការតែងខ្លួនដោយពណ៌ទាំងអស់នេះ នឹងជួយលើកសម្រស់បន្ថែមទៀតចំពោះតែអ្នកដែលមានសម្បុរស្បែកខ្មៅ។ យ៉ាងណាមិញសូមអ្នកកុំព្យាយាមរើសយកពណ៌ណាដែលដិតខ្លាំងដូចជា ពណ៌ក្រហម ពណ៌លឿង និងពណ៌ដែលចាំងជាដើម។

2/ សម្បុរស្បែកពណ៌លឿងសណ្ដែកបាយ

សម្រាប់អ្នកដែលមានសម្បុរស្បែកស បែបលឿងសណ្ដែកបាយឬហៅម្យ៉ាងទៀតថា សម្បុរកូនចិន គឺមានភាពងាយស្រួលក្នុងការជ្រើសរើសពណ៌សម្លៀកបំពាក់ខ្លាំងណាស់ ព្រោះថា សម្បុរបែបនេះមិនសូវជាប្រកាន់ពណ៌ប៉ុន្មានទេ ទោះជាអ្នកពាក់ពណ៌អ្វីក៏មើលឃើញស្អាតដែរ។ អ្នកអាចធ្វើការជ្រើសពណ៌តាមចំណូលចិត្តដូចជា ពណ៌ដិតៗ ពណ៌ប្រផេះ និងពណ៌ទឹកប៊ិច ព្រោះពណ៌ទាំងអស់នេះនឹងធ្វើឱ្យស្បែកខ្លួនអ្នកកាន់តែឆ្លុះ ហើយសចែងចាំង។

3/ សម្បុរស្បែកពណ៌ផ្កាឈូក

ចំពោះអ្នកដែលមានសម្បុរស្បែកពណ៌ផ្កាឈូក ដូចជា នារីកូរ៉េ ជប៉ុន និងអឺរុបមិនពិបាកក្នុងការជ្រើសរើសដូចជាក្រុមអ្នកដែលមានសម្បុរស្បែកខ្មៅនោះទេ។ សម្បុរស្បែកពណ៌ផ្កាឈូក បានបង្ហាញពីឯកលក្ខណៈស្បែកពណ៌ក្រហមព្រឿងៗ ដូច្នេះហើយអ្នកគួរតែជ្រើសរើសពណ៌សម្លៀកបំពាក់ណាដែលមានពណ៌ស្ដើងៗ មិនដិតពេក ក៏ប៉ុន្ដែមិនមែនបានន័យថា អ្នកមិនអាចពាក់ពណ៌ដិតបាននោះទេ។ ពណ៌ដែលស័ក្ដិសមនឹងសម្បុរស្បែករបស់អ្នកបំផុតនោះគឺ ពណ៌ផ្ទៃមេឃខ្ចីពណ៌សណ្ដែកដី ពណ៌ផ្កាឈូកខ្ចី ពណ៌ទឹកក្រូច និងពណ៌បៃតងខ្ចីជាដើម។

4/ សម្បុរស្បែកស

ចំពោះអ្នកដែលមានសម្បុរស្បែកស យើងសូមណែនាំឱ្យជ្រើសរើសអម្បូរពណ៌ដិតៗ ដូចជា ពណ៌ក្រហម ពណ៌ទឹកប៊ិច ពណ៌លឿង ពណ៌លឿងលាយត្នោត ពណ៌ត្នោតចាស់ ពណ៌បៃតង ពណ៌ស្វាយ និងពណ៌កាប់ស្ទាំងជាដើម។ អ្នកមិនគួរជ្រើសរើសពណ៌សម្លៀកបំពាក់បែបពណ៌ស ប្រផេះ និងពណ៌ស្រាលៗ ព្រោះថា ប្រភេទពណ៌បែបស្រាលៗបែបនេះ អាចនឹងធ្វើឱ្យសម្រស់របស់អ្នកមិនសូវលើក ឬឆ្លុះឡើយ។ កត្តាសំខាន់សម្រាប់មនុស្សដែលមានសម្បុរស្បែកស គួរតែព្យាយាមហាត់ប្រាណនាពេលព្រឹកព្រលឹម ដើម្បីឱ្យស្បែកបានទទួលពន្លឺរស្មីព្រះអាទិត្យ ព្រោះដើម្បីជំនួយឱ្យស្បែកអ្នកសភ្លឺរលោង និងមានសំណើម ហើយមិនមានសភាពស្បែកបែបសស្លេកស្លាំងនោះឡើយ៕

February 17, 2018

ពោះធំហើយ! គង់ ចាន់ស្រីមុំ នៅតែសិចស៊ីស្អាតកប់

តាមរយៈបណ្ដាញទំនាក់ទំនងសង្គមហ្វេសប៊ុករបស់តារាស្រី គង់ ចាន់ស្រីមុំ នៅថ្ងៃទី 17 ខែកុម្ភៈ ឆ្នាំ 2018 បានបង្ហោះរូបភាពជាច្រើនសន្លឹកនៅក្នុងថ្ងៃចូលឆ្នាំប្រពៃណីចិន គេសង្កេតឃើញតារាស្រីរូបនេះ បង្ហាញម៉ូដរ៉ូបព័ណ៌ក្រហមលេងស្ទាយកាច់រាងសិចស៊ី បើទោះបីជារូបនាងកំពុងតែពរពោះធំយ៉ាងណាក៏ដោយ ។ អ្នកនាងនៅតែនិយមស្លៀកសំលៀកបំពាក់បែបស៊ីវិល័យសិចស៊ី មិនចាញ់អ្នកនៅលើលីវប៉ុន្មាននោះទេ ធ្វើឲ្យមហាជនឃើញហើយកោតសរសើររាងដ៏ស្រស់ស្អាតរបស់អ្នកនាងយ៉ាងខ្លាំង។

សូមជម្រាបបន្ថែមថា ប្រិយមិត្តទាំងអស់គ្នាបានដឹងហើយថា តារាស្រីរូបនេះកាលពីមិនទាន់មានស្វាមី នាងពិតជាមានរូបសម្ផស្សស្រស់ស្អាតខ្លាំងណាស់ និងបានទាក់ទាញចិត្តបុរសៗជាច្រើននាក់ឱ្យលង់ក្នុងសម្រស់របស់អ្នកនាងទៀតផង ហើយបើទោះជាពេលនេះ អ្នកនាងមានស្វាមីហើយក្ដី ក៏អ្នកនាងនៅតែថែរក្សាសម្រស់បានស្អាតដដែល។ ដោយឡែក ខណៈដែលកំពុងតែពពោះកូនដំបូងបាន 4 ខែនេះ អ្នកនាង គង់ ចាន់ស្រីមុំ បានបង្ហោះរូបភាពបញ្ចេញសាច់ក្បាលពោះ និងរូបរាងសិចស៊ី ឱ្យមហាជនអ្នកគាំទ្របានទស្សនាពីសាច់ក្បាលពោះដ៏សខ្ចីម៉ដ្ឋរលោង និងនៅតែមានភាពសិចស៊ីស្រស់ស្អាតរហូត៕

February 17, 2018

កម្ពុជាមានសមត្ថភាពផលិតស៊ីម៉ង់ត៍យ៉ាងតិច 5.6លានតោនក្នុងមួយឆ្នាំ

តម្រូវការស៊ីម៉ង់ត៍សម្រាប់ផ្គត់ផ្គង់ និងបំពេញក្នុងវិស័យសំណង់ក្នុងប្រទេសកម្ពុជាបានកើនឡើងយ៉ាងខ្លាំង ខណៈវិស័យនេះកំពុងរីកធំធាត់ឡើងវិញ បន្ទាប់ពីជាប់គាំងនៅឆ្នាំ2009 ដោយសារវិបត្តិសេដ្ឋកិច្ចសកលរួចមក។

បច្ចុប្បន្ននេះ កម្ពុជាមានក្រុមហ៊ុនដែលដំណើរការរោងចក្រផលិតស៊ីម៉ង់ត៍ចំនួនពីររួចមកហើយនៅខេត្តកំពត គឺ ក្រុមហ៊ុនស៊ីម៉ង់ត៍កម្ពុជាចក្រីទីង(Cambodia Chakrey Ting Cement Co., Ltd)ដែលជាក្រុមហ៊ុនចិន ដែលមានសមត្ថភាពផលិតបានប្រមាណ 2លានតោនក្នុងមួយឆ្នាំហើយ និងក្រុមហ៊ុនមួយទៀត គឺក្រុមហ៊ុន kampot Cementដែលដំណើរការរោងចក្រនៅខេត្តកំពតដែរ យីហោ ខេស៊ីម៉ង់ត៍ បច្ចុប្បន្ននេះកំពុងដំណើរការផលិតស៊ីម៉ង់ត៍បានជិត 2លានតោនដែលមានខ្សែចង្វាក់ផលិតកម្មពីរ គឺខ្សែទីមួយមានសមត្ថភាពផលិតបាន 2,800តោនក្នុងមួយថ្ងៃ និងខ្សែទីពីរមានសមត្ថភាពផលិតបាន 2,500តោនក្នុងមួយថ្ងៃ។

ថ្មីៗនេះក៏មានរោងចក្រស៊ីម៉ង់ត៍ថ្មីមួយទៀតដែលទើបនឹងសម្ពោធដាក់ឱ្យដំណើរការផលិតស៊ីម៉ង់ត៍កាលពីពេលថ្មីៗនេះ ដើម្បីបំពេញតម្រូវការទីផ្សារក្នុងស្រុកដែលមានកំណើនជាបន្តបន្ទាប់ក្នុងវិស័យសំណង់ដែរ។

រោងចក្រផលិតស៊ីម៉ង់ត៍ថ្មីនេះឈ្មោះថា ជីបម៉ុង អុិនស៊ី ស៊ីមេន ខបភើរេសិន ដែលកើតចេញពីការវិនិយោគរួមគ្នារវាងក្រុមហ៊ុន ជីបម៉ុង និងក្រុមហ៊ុន ថៃ ស្យ៉ាម ស៊ីធី ស៊ីមេន ក្នុងទឹកប្រាក់ 262លានដុល្លារដែលមានសមត្ថភាពផលិតស៊ីម៉ង់ត៍បានរហូតដល់ទៅ 5,000តោនក្នុងមួយថ្ងៃ ឬប្រមាណ 1.7លានតោនក្នុងមួយឆ្នាំ។

សមត្ថភាពផលិតស៊ីម៉ង់ត៍របស់ក្រុមហ៊ុន ជីបម៉ុង អុិនស៊ី ស៊ីមេន ខបភើរេសិន នាពេលនេះបានធ្វើឱ្យកម្លាំងផលិតស៊ីម៉ង់ត៍ក្នុងស្រុកកើនឡើងយ៉ាងហោចណាស់ក៏ដល់ 5,634,500តោនដែរក្នុងមួយឆ្នាំចេញពីទីតាំងខេត្តកំពតតែមួយ ដោយមិនរាប់បញ្ចូលរោងចក្រស៊ីម៉ង់ត៍ដែលសាងសង់ឡើងក្នុងទឹកដីខេត្តបាត់ដំបង ដែលវិនិយោគដោយក្រុមហ៊ុនមកពីប្រទេសចិននោះទេ។

កាលពីឆ្នាំ2011 កម្ពុជានាំចូលស៊ីម៉ង់ត៍ 816,000តោនពីប្រទេសថៃ វៀតណាម និងប្រទេសចិនហើយការនាំចូលបានកើនឡើងជាលំដាប់ ខណៈតម្រូវការបានកើនឡើងច្រើន ស្របពេលវិនិយោគិនបរទេស និងក្នុងស្រុកបានបោះទុនយ៉ាងច្រើនទៅលើវិស័យសំណង់។

របាយការណ៍របស់ក្រសួងរៀបចំដែនដី នគរូបនីយកម្ម និងសំណង់បានបង្ហាញឱ្យដឹងថា នៅឆ្នាំ2007 វិស័យសំណង់បានហក់ឡើងដល់ចំណុចខ្ពស់បំផុតដែលមិនធ្លាប់មាន គឺទទួលបានទុនវិនិយោគដល់ទៅ3,200លានដុល្លារអាមេរិក ហើយនៅឆ្នាំ2008ទទួលបានការវិនិយោគសរុបជាង 3,100លានដុល្លារចំពេលមានវិបត្តិសេដ្ឋកិច្ចសកលធ្វើដែលឱ្យនិន្នាការវិស័យសំណង់មានការធ្លាក់ចុះជាបន្តបន្ទាប់។

ការផ្តល់ឥណទានរបស់គ្រឹះស្ថានធនាគារទៅឱ្យវិស័យសំណង់ និងអចលនទ្រព្យនៅកម្ពុជាគិតត្រឹមឆ្នាំ2017 មានទំហំទឹកប្រាក់សរុបប្រមាណ 3.91ពាន់លានដុល្លារអាមេរិក ដែលស្មើនឹងប្រមាណ 24,28ភាគរយនៃចំនួនឥណទានសរុប។ នេះបើយោងតាមរបាយការណ៍ធនាគារជាតិនៃកម្ពុជា។

របាយការណ៍ដដែលនោះបានបង្ហាញថា ការផ្តល់ឥណទានផ្នែកសំណង់មានទំហំទឹកប្រាក់ប្រមាណ 1,52ពាន់លានដុល្លារ ការផ្តល់ឥណទានផ្នែកទិញផ្ទះជាកម្មសិទ្ធិផ្ទាល់ខ្លួន មានតម្លៃទឹកប្រាក់ប្រមាណ 1,48ពាន់លានដុល្លារអាមេរិក និងការផ្តល់ឥណទានផ្នែកការជួញដូរអចលនទ្រព្យមានតម្លៃទឹកប្រាក់ប្រមាណ 917លានដុល្លារអាមេរិក៕

February 17, 2018

សុខ រក្សា គ្រោងចូលរោងការជាមួយ កុល ដាវី ចុងឆ្នាំ 2018 នេះ

អស់រយៈពេលជាង 5 ឆ្នាំមកហើយដែលតារាស្រីចាយរាងសិចស៊ីកញ្ញា កុល ដាវី និងលោក សុខ រក្សា បានរស់នៅជាមួយគ្នាដូចប្តីប្រពន្ធស្របច្បាប់ទៅហើយ ដោយសារតែគេសង្កេតឃើញអ្នកទាំងពីរទៅដល់ទីណាឃើញមានវត្តមានទាំងគូព្រមគ្នាតែម្តង ខណៈដំណឹងភ្ជាប់ពាក្យ និងដំណឹងដឹកដៃគ្នាចូលរោងការស្ថិតក្នុងភាពស្ងាត់ជ្រងំ ក៏ប៉ុន្ដែ ទាំងអ្នកសិល្បៈ និងមហាជនអ្នកគាំទ្រ សុទ្ធតែបានដឹងអំពីទំនាក់ទំនងរបស់ពួកគេ។

ថ្មីៗនេះប្រភពដែលទទួលបាន បានឱ្យដឹងថា តារាចម្រៀងប្រុស និងជាម្ចាស់បទ ” សំបុត្រស្នេហាក្នុងកន្ត្រកកង់ ” លោក សុខ រក្សា វិញ ធ្លាប់បានបង្ហើបប្រាប់អ្នកសារព័ត៌មានថា « បច្ចុប្បន្ននេះ លោកមានផ្ទះប្រណីត 2 ល្វែងនិងមានរថយន្ដសមរម្យជិះ ទើបគិតគ្រោងចូលរោងការនៅចុងឆ្នាំ2018 នេះហើយព្រោះថា ខ្ញុំនិងដាវីស្រលាញ់គ្នាគឺជាស្នេហាពិត មិនមែនលេងសើចទេហើយអ្នកសិល្បះណាក៏បានដឹងរឿងរបស់ពួកយើងដែរ »។

យ៉ាងណាមិញ តារាចាយសម្រស់សិចស៊ីកញ្ញា កុល ដាវី បានបញ្ជាក់ប្រាប់បន្ថែមថា « ពិធីមង្គលការនោះគឺពិតជាជិតដល់ពេលឆាប់ៗនេះមែន តែមិនទាន់កំណត់ពេលវេលាពិតប្រាកដទេ ហើយថ្ងៃរៀបការនាងខ្ញុំគឺធ្វើដោយចំហរដោយហៅអ្នកសារព័តមានទាំងអស់ឲ្យចូលរួម»៕

February 17, 2018

កម្ពុជាដាក់សំណើខ្ចីប្រាក់$100លានពីធនាគារពិភពលោកសម្រាប់ជួសជុលផ្លូវជាតិលេខ4 ឡើងវិញ

កម្ពុជាបានដាក់សំណើខ្ចីប្រាក់ជាង 100លានដុល្លារពីធនាគារពិភពលោក (WB) សម្រាប់កែលម្អផ្លូវជាតិលេខ4 ដែលមានប្រវែងជាង 260គីឡូម៉ែត្រពីភ្នំពេញទៅកាន់ខេត្តព្រះសីហនុ ដើម្បីពង្រីកសក្តានុពលសេដ្ឋកិច្ចរបស់ខ្លួននាថ្ងៃអនាគត។

សំណើរបស់កម្ពុជានឹងត្រូវពិភាក្សា និងសម្រេចដោយក្រុមប្រឹក្សាភិបាលរបស់ធនាគារពិភពលោក នៅក្នុងកិច្ចប្រជុំក្នុងខែមិថុនា ខាងមុខនេះ។ នេះបើតាមការអះអាងរបស់ ឯកឧត្តម ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា។

ការដាក់សំណើខ្ចីកញ្ចប់ថវិកាជាង 100លានដុល្លារសម្រាប់កែលម្អផ្លូវជាតិដ៏សំខាន់មួយនេះ កើតឡើង ក្រោយរយៈពេលជាងពីរឆ្នាំដែលរាជរដ្ឋាភិបាលសម្រេចដកយកការគ្រប់គ្រងផ្លូវជាតិលេខ4 ពីការគ្រប់គ្រងរបស់ក្រុមហ៊ុន អេ.ហ្សិត អុីនវេសមេន (AZ Investment) កាលពីពាក់កណ្តាលខែមករា ឆ្នាំ2016 បន្ទាប់ពីក្រុមហ៊ុននោះគ្រប់គ្រង និងធ្វើអាជីវកម្មដោយយកប្រាក់ពីម្ចាស់រថយន្តដែលធ្វើដំណើរទៅ-មកអស់រយៈពេល 15ឆ្នាំរួចមក។

ឯកឧត្តម ទេសរដ្ឋមន្ត្រី ស៊ុន ចាន់ថុល បានមានប្រសាសន៍ថា ផ្លូវជាតិលេខ4 កំពុងទទួលរងការខូចខាតមួយចំនួន បន្ទាប់ពីការបញ្ចប់កិច្ចសន្យារបស់ក្រុមហ៊ុន AZ Investment រួចមក ហើយសកម្មភាពអនាធិបតេយ្យនៅលើដងផ្លូវ និងការរំលោភយកដីចំណីផ្លូវបានកើនឡើងឥតឈប់ឈរ ដោយសារតែគ្មានការគ្រប់គ្រងច្បាស់លាស់។

ឯកឧត្តម បានបន្ថែមថា៖ “នៅខែមិថុនាខាងមុខនេះ ក្រុមប្រឹក្សាភិបាលធនាគារពិភពលោកនឹងប្រជុំពិនិត្យមើលសំណើខ្ចីប្រាក់ជាង 100លានដុល្លារអាមេរិករបស់រដ្ឋាភិបាលកម្ពុជា ដើម្បីយកមកជួសជុលឡើងវិញ ដោយសារផ្លូវជាតិលេខ4នេះជាផ្លូវដ៏សំខាន់មួយខាងសេដ្ឋកិច្ចតាមរយៈការនាំយកផលិតផលក្នុងស្រុកទៅលក់នៅបរទេស។

ទោះជាកម្ពុជាកំពុងខិតខំប្រឹងប្រែងដើម្បីធ្វើផ្លូវល្បឿនលឿនពីទីក្រុងភ្នំពេញទៅកាន់ខេត្តព្រះសីហនុឱ្យបានឆាប់ក៏ដោយ ប៉ុន្តែឯកឧត្តម ទេសរដ្ឋមន្ត្រី ស៊ុន ចាន់ថុល ក៏នៅតែអះអាងអំពីភាពចាំបាច់ក្នុងការកែលម្អផ្លូវជាតិលេខ4 ដោយសារតែផ្លូវនេះបានដើរតួនាទីសំខាន់ក្នុងការដឹកជញ្ជូនផលិតផលគ្រប់ប្រភេទរបស់កម្ពុជាទៅកាន់ទីផ្សារអន្តរជាតិ តាមច្រកកំពង់ផែខេត្តព្រះសីហនុ។

យោងតាមព័ត៌មានដែលបានផ្សព្វផ្សាយដោយអ្នកជំនាញការនៃធនាគារពិភពលោក ក្នុងសិក្ខាសាលាពិគ្រោះយោបល់លើកទី2 ស្តីពីការអភិវឌ្ឍផែនការមេភ័ស្តុភារកម្មនៅកម្ពុជា កាលពីថ្ងៃទី4 ខែកុម្ភៈ ឆ្នាំ2018 បានឱ្យដឹងថា ការនាំចេញរបស់កម្ពុជាមានកំណើនរហូតដល់ 12% រយៈពេល 11ឆ្នាំ ពីឆ្នាំ2005 ដល់2016។ ការនាំចេញរបស់កម្ពុជាភាគច្រើនគឺ ផលិតផលវាយនភណ្ឌ។ នៅឆ្នាំ2016 ទំហំពាណិជ្ជកម្មសរុបរបស់កម្ពុជាមានជាង 10ប៊ីលានដុល្លារ ហើយការនាំចេញ និងនាំចូលបានពឹងផ្អែកសំខាន់លើកំពង់ផែសមុទ្រមួយនេះ។

របាយការណ៍ដដែលបានព្យាករថា បើគ្មានការប្រែប្រួល ឬទទួលរងឥទ្ធិពលអ្វីនោះទេ ទំហំពាណិជ្ជកម្មសរុបរបស់កម្ពុជានឹងកើនឡើងដល់ 4ដងនៅឆ្នាំ2030 ធៀបនឺងឆ្នាំ2016 រហូតដល់ជាង 41ប៊ីលានដុល្លារ។

បច្ចុប្បន្ននេះ កំពង់ផែស្វយ័តខេត្តព្រះសីហនុកំពុងដំណើរការពង្រីកការវិនិយោគ ដើម្បីបង្កើនសក្តានុពលរបស់ខ្លួនសម្រាប់សមត្ថភាពស្តុកទំនិញ និងផ្លូវនាវាចរណ៍ខ្នាតធំ ដោយប្រើប្រាស់ហិរញ្ញប្បទានពីទីភ្នាក់ងារកិច្ចសហប្រតិបត្តិការអន្តរជាតិជប៉ុន (JICA) ហើយហេដ្ឋារចនាសម្ព័ន្ធនោះ នឹងត្រូវសាងសង់រួចរាល់នៅឆ្នាំ2022៕

February 16, 2018

ក្រសួងគ្រោងបណ្តុះបណ្តាលអ្នកជំនាញទេសចរណ៍ឱ្យមានស្តង់ដារអាស៊ាន

វិស័យទេសចរណ៍ជាផ្នែកដ៏សំខាន់មួយដែលបាននាំមកនូវចំណូលជាច្រើនលានដុល្លារដល់កម្ពុជាជារៀងរាល់ឆ្នាំ ដោយក្នុងនោះវិស័យមួយនេះបានបង្កើតការងារ ព្រមទាំងជំរុញឱ្យជីវភាពប្រជាជនជាច្រើនលាននាក់មានស្ថានភាពប្រសើរឡើងជាលំដាប់។ ពីមួយថ្ងៃទៅមួយថ្ងៃ ក្រសួងទេសចរណ៍រួមទាំងដៃគូនានាបានព្យាយាមគ្រប់លទ្ធភាពដើម្បីបណ្តុះបណ្តាលអ្នកជំនាញឱ្យមានគុណភាពស្របតាមស្តង់ដារអន្តរជាតិ។

រដ្ឋមន្ត្រីក្រសួងទេសចរណ៍ និងជាប្រធានគណៈកម្មការជាតិអ្នកជំនាញទេសចរណ៍ ឯកឧត្តម ថោងខុន បានលើកឡើងថា រហូតមកដល់ពេលបច្ចុប្បន្ននេះ កម្ពុជាបានបណ្តុះបណ្តាលអ្នកជំនាញទេសចរណ៍ស្របតាមកម្មវិធីវិជ្ជាជីវៈ ទេសចរណ៍អាស៊ានបានប្រមាណជា 2,000នាក់ហើយ។ អ្នកជំនាញទាំងអស់នោះ សុទ្ធតែជាអ្នកដែលទទួលបានការទទួលស្គាល់គុណភាពដោយលេខាធិការដ្ឋានអាស៊ាន និងប្រទេសជាសមាជិកទាំងអស់ ដែលពួកគេអាចធ្វើការងារដោយសេរីនៅក្នុងប្រទេសទាំងអស់ក្នុងតំបន់អាស៊ាន។

ឯកឧត្តម ថោង ខុន បានមានប្រសាសន៍ថា៖ “ក្នុងចំណោមអ្នកជំនាញទេសចរណ៍កម្ពុជាប្រមាណ 620,000នាក់ មានអ្នកជំនាញប្រមាណ 40% បានឆ្លើយតបទៅនឹងស្តង់ដារសមត្ថភាពអាស៊ាន ហើយក្រសួងទេសចរណ៍នឹងយកចិត្តទុកដាក់បណ្តុះបណ្តាល និងវាយតម្លៃអ្នកជំនាញទេសចរណ៍បន្ថែមប្រមាណ 60%ទៀត ដើម្បីអាចឆ្លើយតបនឹងស្តង់ដារសមត្ថភាពអាស៊ានឱ្យបាន100% ត្រឹមឆ្នាំ2025”។

រដ្ឋមន្ត្រីក្រសួងទេសចរណ៍ បានលើកឡើងផងដែរថា វិស័យទេសចរណ៍បានចូលរួមចំណែក 13%នៃផលិតផលក្នុងស្រុកសរុប (GDP) និងមានការរីកចម្រើនខ្លាំងក្នុងឆ្នាំ 2017 ដែលក្នុងនោះកម្ពុជាទទួលបានភ្ញៀវទេសចរអន្តរជាតិប្រមាណ 5.6លាននាក់។ ចំនួននេះបានបង្ហាញឱ្យឃើញថា នៅកម្ពុជាមានកំណើនទេសចរប្រមាណ 11.8% បើធៀបនឹងរយៈពេលដូចគ្នាក្នុងឆ្នាំ2016។ ហើយតាមការព្យាកររបស់ឯកឧត្តម ទេសចរអន្តរជាតិនឹងអាចកើនឡើងដល់ចំនួនប្រមាណ 7លាននាក់នៅឆ្នាំ 2025 ដែលវានឹងផ្តល់ឱកាសការងារផ្ទាល់ដល់ប្រជាជនកម្ពុជាប្រមាណ 1.2លាននាក់នៅឆ្នាំ2025 និងអាចឈានដល់ 1.7លាននាក់នៅឆ្នាំ2030 ខាងមុខ។

ដើម្បីសម្រេចគោលដៅនេះ ក្រសួងទេសចរណ៍បានចេញនូវយុទ្ធសាស្ត្រមួយចំនួនដើម្បីគាំទ្រដល់ផែនការយុទ្ធសាស្ត្រអភិវឌ្ឍន៍ធនធានមនុស្សក្នុងវិស័យទេសចរណ៍រួមមាន អនុវត្តកម្មវិធី 2018សម្រាប់ស្តង់ដារ និងវាយតម្លៃអ្នកជំនាញទេសចរណ៍ឆ្ពោះទៅកាន់ការសិក្សាពេញមួយជីវិត សំដៅអភិវឌ្ឍកម្មវិធីបណ្តុះបណ្តាលដែលមានស្តង់ដារខ្ពស់ មានការទទួលស្គាល់ពីគ្រប់ភាគីពាក់ព័ន្ធ និងធ្វើការវាយតម្លៃទទួលស្គាល់សមត្ថភាពអ្នកជំនាញទេសចរណ៍ដែលកំពុងបម្រើការងារបច្ចុប្បន្នតាមរយៈកម្មវិធីវាយតម្លៃការសិក្សាពីមុន (RPL) ឱ្យទទួលបានការទទួលស្គាល់ជាក់លាក់ ដើម្បីតម្រង់ទិសដៅការងារពេញមួយជីវិត។

ក្រសួងក៏មានកម្មវិធីបណ្តុះបណ្តាលជំនាញទេសចរណ៍ដល់ពលករចំណាកស្រុក ដើម្បីផ្តល់ឱកាសដល់ពួកគេឱ្យបានបំពេញការងារលើវិស័យទេសចរណ៍ផងដែរ។ ក្រៅពីនេះក្រសួងទេសចរណ៍ ក៏បានដាក់ចុះនូវកម្មវិធីបណ្តុះបណ្តាលជំនាញទេសចរណ៍អាស៊ាន តាមកម្រិតមធ្យមសិក្សាចំណេះទូទៅ និងបច្ចេកទេសទូទាំងប្រទេសដោយសហការជាមួយក្រសួងអប់រំ យុវជន និងកីឡា រួមទាំងអ្នកជំនាញជាច្រើនទៀត ដើម្បីធ្វើការបណ្តុះបណ្តាលជំនាញនេះជូនដល់សិស្សដែលបានបញ្ចប់ថ្នាក់មធ្យមសិក្សាបឋមភូមិ (ថ្នាក់ទី9) ដែលចង់ចាប់យកជំនាញទេសចរណ៍រយៈពេល3ឆ្នាំពេញ ដើម្បីទទួលបានសញ្ញាបត្រវិជ្ជាជីវៈដែលមានតម្លៃស្មើនឹងសញ្ញាបត្រ មធ្យមសិក្សាទុតិយភូមិ។

ពាក់ព័ន្ធនឹងបញ្ហានេះដែរ លោក ពត សុផល នាយកប្រតិបត្តិអង្គការបណ្តុះបណ្តាលថ្នាក់មូលដ្ឋាន ដែលជាអង្គការបណ្តុះបណ្តាលភាសាបរទេស និងទេសចរណ៍បានលើកឡើងថា ជំនាញទេសចរណ៍ជាជំនាញសំខាន់មួយដែលអាចជួយឱ្យប្រជាជននៅក្នុងមូលដ្ឋានអាចផ្លាស់ប្តូរកម្រិតជីវភាពបានយ៉ាងល្អប្រសើរ។ លោកលើកឡើងថា តាមរយៈការបណ្តុះបណ្តាលវិស័យទេសចរណ៍សិស្សជាច្រើនបានចេញទៅធ្វើការងារក្នុងវិស័យទេសចរណ៍រួមទាំងស្ថាប័នទេសចរណ៍ជាច្រើនផ្សេងទៀតដែលពេលខ្លះពួកគេអាចទទួលបានចំណូលដល់ខ្ទង់ពាន់ដុល្លារថែមទៀតផង។

លោក ពត សុផល បាននិយាយថា៖ “លោកគាំទ្រចំពោះការខិតខំប្រឹងប្រែងរបស់ក្រសួងទេសចរណ៍ ដែលមានគម្រោងវាយតម្លៃអ្នកទេសចរណ៍ចាស់ និងបង្រៀនអ្នកជំនាញទេសចរណ៍ថ្មីឱ្យទទួលបានការទទួលស្គាល់តាមស្តង់ដារអាស៊ាន។ ប្រធានអង្គការខាងលើបានលើកឡើងថា ប្រសិនបើប្រជាជនខ្មែរអាចមានជំនាញទេសចរណ៍ដែលទទួលស្គាល់ដោយប្រទេសទាំងអស់ក្នុងតំបន់អាស៊ាន នោះយើងនឹងអាចប្រកួតប្រជែងទីផ្សារការងារនៅក្នុងបណ្តាប្រទេសផ្សេងៗទៀត។ ចំណុចនេះផ្តល់ឱកាសច្រើន ដល់យុវជនកម្ពុជាដែលមានសក្តានុពលមួយចំនួនឱ្យទទួលបានឱកាសក្នុងការអភិវឌ្ឍសមត្ថភាព និងប្រកួតប្រជែងលើទីផ្សារការងារនៅក្នុងតំបន់។

លោកថា ប្រជាជនកម្ពុជាអាចនឹងមានចំណុចខ្លាំងច្រើនលើការងារទេសចរណ៍នេះ ព្រោះប្រទេសយើងជាប្រទេសដែលមានការអំណោយផលពីធម្មជាតិផ្នែកទេសចរណ៍ និងមានតំបន់ស្រស់ស្អាតជាច្រើនដែលភ្ញៀវបរទេសចាប់អារម្មណ៍ ហើយស្របពេលជាមួយគ្នានេះ យើងឃើញថាប្រជាជនមួយចំនួនធ្លាប់បានស្គាល់ពីការបម្រើសេវាទេសចរណ៍ក្នុងសហគមន៍របស់គេមុនពេលដែលពួកគេចូលរៀនជំនាញទេសចរណ៍៕

February 16, 2018

MV ចម្រៀង ” បើអាច ” សម្ដែងដោយ មាន សុនីតា ចាក់ដោតចិត្តយុវវ័យខ្លាំង

បើតាមបណ្ដាញទំនាក់ទំនងសង្គមហ្វេសប៊ុកនៅថ្ងៃទី 16 ខែកុម្ភៈ ឆ្នាំ 2018 នេះ បានឱ្យដឹងថា បទចម្រៀងដែលមានចំណងជើងថា ” បើអាច ” របស់ក្រុមច្រៀង ក្រុមតូច ដែលមានការចូលរួមសម្ដែងពីតារាសម្ដែង បង្ហាញម៉ូដស្រី និងជារាជនីក្រម៉ា គឺកញ្ញា មាន សុនីតា នៅពេលនេះ បានចេញជាវីដេអូចម្រៀងពេញហើយ ក្នុងការបំពេញបំណងមិត្តយុវវ័យដែលបានទន្ទឹងរង់ចាំទស្សនាអស់រយៈជាយូរ។

តារាស្រីរូបនេះ បានរៀបរាប់ថា « សម្រាប់អត្ថន័យនៃបទចម្រៀងនេះគឺ ចាក់ដោតអារម្មណ៍មែនទែន ។ នាងខ្ញុំមានអារម្មណ៍រំភើបសប្បាយចិត្តជាខ្លាំង ដែលបានសម្ដែងនៅក្នុងបទចម្រៀងនេះ ព្រោះថា នាងខ្ញុំបានរង់ចាំអស់រយៈពេលជាង 2 ឆ្នាំហើយ ទើបបានចេញថត ហើយស្រឡាញ់បទមួយនេះមែនទែន»។ កាន់តែពិសេស តារាស្រីសំឡេងស្រួយរូបនេះ បានបន្ថែមថា «សម្រាប់ពាក្យពេចន៍ដែលនិយាយទៅកាន់សង្សារចាស់គឺ ជានិស្ស័យទើបបណ្ដាលឱ្យបានជួបគ្នា តែវាគ្រាន់តែជាអតីតកាលតែប៉ុណ្ណោះ អ្វីដែលត្រូវទទួលយកគឺបច្ចុប្បន្ន ដែលយើងរស់នៅជាមួយសង្គម និងមនុស្សជុំវិញខ្លួន ជាពិសេសគឺ មនុស្សដែលយើងស្រឡាញ់»។

ចង់ដឹងថា ផ្ទៃរឿងទាំងមូលដែលស្ដែងតាមរយៈបទចម្រៀងមួយនេះ មានន័យ និងចាក់ដោតអារម្មណ៍ប្រិយមិត្តយ៉ាងណានោះ សូមទស្សនាវីដេអូខាងក្រោមនេះ៖

February 16, 2018

ស្រាយចម្ងល់… តើមានគ្រោះថ្នាក់ទេ ពេលស្ត្រីមានគភ៌ មានអាការឈឺ និងស្ពឹកម្រាមដៃ?

សម្រាប់ស្ត្រីមានផ្ទៃពោះអាចនឹងមានអាការឈឺ និងស្ពឹកម្រាមដៃ ដែលធ្វើឱ្យស្ត្រីមានគភ៌កូនដំបូងជាច្រើនអាចនឹងនឹកសង្ស័យថា តើអាការដែលកើតឡើងនេះ ជាអាការធម្មតារបស់ស្ត្រីមានផ្ទៃពោះដែរឬទេ? ត្រូវប្រញាប់ទៅមន្ទីរពេទ្យឬទេ? ហើយតើកូនក្នុងគភ៌នឹងមានគ្រោះថ្នាក់ដែឬទេ? ជាដើម។

ដើម្បីកុំឱ្យស្ត្រីមានគភ៌ថ្មោងថ្មីទាំងឡាយត្រូវខូចសុខភាពផ្លូវចិត្ត ឡារ៉ែន មានពាក្យអធិប្បាយមកជម្រាបអនាគតអ្នកម្ដាយទាំងអស់ឱ្យបាត់ចម្ងល់ចំពោះរឿងខាងលើនោះដូចតទៅ។

មូលហេតុរបស់អាការឈឺ និងស្ពឹកតាមម្រាមដៃ ម្រាមជើង

ភាគច្រើនអាការឈឺ និងស្ពឹកម្រាមដៃរបស់ស្ត្រីមានផ្ទៃពោះមានមូលហេតុមកពីការដែលសរសៃប្រសាទដែលទៅចិញ្ចឹមបរិវេណបាតដៃត្រូវបានសង្កត់ ជាហេតុធ្វើឱ្យសាច់ភ្នាសនៅត្រង់ម្ដុំនោះមានអាការហើម រហូតធ្វើឱ្យមានអាការឈឺស្ពឹកនៅតាមម្រាមដៃឡើង ដោយមូលហេតុសំខាន់ដែលធ្វើឱ្យស្ត្រីមានផ្ទៃពោះមានអាការទាំងនេះឡើង ក៏ដោយសារតែក្នុងអំឡុងពេលតាំងគភ៌ កម្រិតអ័រម៉ូននៅក្នុងរាងកាយរបស់ស្ត្រីមានគភ៌នឹងប្រែប្រួល ដោយអ័រម៉ូនមួយប្រភេទដែលឈ្មោះថា ប្រូជេស្ទើរ៉ូន បានទៅជំរុញឱ្យសរសៃវាវកើតការបន្ធូរខ្លួន និងធ្វើឱ្យសន្លាក់តឆ្អឹងកើតការបន្ទន់ខ្លួនខ្លាំងឡើង ហុចផលឱ្យខាងក្នុងរាងកាយមានជាតិទឹកប្រមូលសន្សំក្នុងបរិមាណច្រើន ហើយដោយបរិមាណទឹកដែលច្រើនជ្រុលពេកនេះ វាបានធ្វើឱ្យចន្លោះត្រង់ផ្នែកកៃដរួមតូច និងធ្វើឱ្យសរសៃប្រសាទត្រូវបានសង្កត់។

អាការឈឺ និងស្ពឹកម្រាមដៃនេះ អាចនឹងកើតឡើងនៅលើតែម្រាមដៃណាតែម្ខាង ឬអាចនឹងកើតឡើងទាំងសងខាងដំណាលគ្នាក៏មាន ដោយស្ត្រីមានគភ៌អាចនឹងមានអាការនេះទៅរហូតដល់ថ្ងៃបញ្ចប់ការតាំងគភ៌ គឺពេលឆ្លងទន្លេរួច។

វិធីសម្រាលអាការនៅពេលឈឺ និងស្ពឹកតាមម្រាមដៃ ម្រាមជើង

1/ នៅពេលស្ត្រីមានគភ៌មានអាការឈឺ និងស្ពឹកកើតឡើងក្នុងខណៈដែលខ្លួនប្រើដៃក្នុងការធ្វើកិច្ចការងារផ្សេងៗនោះ ចូរស្ត្រីមានគភ៌ឈប់សម្រាកដៃពីការងារដែលកំពុងធ្វើនោះភ្លាម ហើយសម្រាកទុកចោលមួយស្របក់ នោះអាការនឹងល្អប្រសើរឡើងបានដោយឯកឯង។

2/ ចូរយកបាតដៃទៅដាក់ត្រាំនៅក្នុងទឹកក្ដៅឧណ្ហ។ ដោយសារតែទឹកក្ដៅឧណ្ហៗនឹងជួយជំរុញឱ្យការហូរវិលរបស់ឈាមធ្វើការបានល្អឡើង ដែលនឹងធ្វើឱ្យស្ត្រីមានគភ៌មានអារម្មណ៍ធូរស្រាល និងបាត់ឈឺជាបណ្ដើរៗរហូតដល់ប្រក្រតីឡើងវិញ។ បើសិនជាធ្វើជាប់ជាប្រចាំមុនពេលគេង នឹងជួយឱ្យភាពញឹកញាប់របស់អាការនេះថយចុះបាន។

3/ ហ្វឹកហាត់ធ្វើយ៉ូហ្កាគ្រប់គ្រងសាច់ដុំ។ ការ ធ្វើយ៉ូហ្កាជាវិធីមួយទៀតដែលអាចជួយសាងនូវភាពធូរស្រាលដល់សាច់ដុំ និងជួយឱ្យការហូរវិលរបស់ឈាមកាន់តែល្អឡើង ហើយថែមទាំងជួយឱ្យសាច់ដុំមានភាពរឹងមាំខ្លាំងឡើងទៀតផង តែត្រូវជ្រើសរើសធ្វើក្បាច់ណាដែលមិនប៉ះពាល់ដល់កូនតូចនៅក្នុងផ្ទៃខ្លាំងពេក។

អាការឈឺ និងស្ពឹកម្រាមដៃ ម្រាមជើងគឺជាអាការម្យ៉ាងរបស់អ្នកមានផ្ទៃពោះដែលនឹងអាចបាត់ទៅវិញបានដោយឯកឯង ដោយសារតែក្រោយពីពេលប្រសូត អាការហើមនឹងថយចុះធ្វើឱ្យចន្លោះត្រង់ផ្នែកម្រាមដៃធំស្រឡះឡើងវិញធ្វើឱ្យអាការឈឺ និងស្ពឹកពីការសង្កត់របស់សរសៃប្រសាទបាត់លែងមាន។ អាការឈឺ និងស្ពឹកម្រាមដៃ ម្រាមជើងនេះមិនបង្កឱ្យមានគ្រោះថ្នាក់អ្វីដល់ស្ត្រីមានគភ៌ និងកូនក្នុងផ្ទៃឡើយ តែយ៉ាងណាក៏ដោយ បើសិនជាអាការនេះកើតឡើងធ្ងន់ធ្ងរខ្លាំង ឬមានកើតអាការខុសប្រក្រតីផ្សេងទៀតរួមជាមួយផងនោះ គួរប្រញាប់ទៅជួបគ្រូពេទ្យជំនាញជាបន្ទាន់៕

February 16, 2018

ដាក់ឱ្យកូនតូចគេង យ៉ាងណាកុំឱ្យក្បាលសំប៉ែត?

រឿងកង្វល់មួយទៀតរបស់ឪពុកម្ដាយថ្មោងថ្មី គឺប្រហែលជាគេចមិនផុតពីរឿងចង់ឱ្យកូនមានក្បាលមូលស្អាត មិនសំប៉ែតនោះឡើយ តែបច្ចុប្បន្នមានក្មេងក្បាលសំប៉ែតកាន់តែច្រើនឡើង ដោយសារតែខាងវេជ្ជសាស្ត្របានណែនាំឱ្យទារកគេងផ្ងារច្រើនជាងគេងផ្កាប់ ដើម្បីការពារសភាវ SDS (Sudden Death Syndrome) ឬឱកាសដែលក្មេងទារកស្លាប់បាត់បង់ជីវិតខណៈគេងលក់។

មូលហេតុរបស់ក្បាលសំប៉ែត ដោយសារតែឆ្អឹងរបស់ទារកទើបកើតដំបូងជាឆ្អឹងដែលមានភាពទន់ខ្ចី បើគេងសង្កត់ក្នុងឥរិយាបថដដែលគ្រប់ពេលវេលា នឹងធ្វើឱ្យឆ្អឹងលលាដ៍ក្បាលរបស់ទារកទៅជាសំប៉ែតបាន។ យ៉ាងណាក៏ដោយ សភាវក្បាលសំប៉ែតនេះមិនបង្កគ្រោះថ្នាក់អ្វីឡើយ (មានផលប៉ះពាល់តែលើភាពស្រស់ស្អាតរបស់ទ្រង់ទ្រាយក្បាលប៉ុណ្ណោះ) ដូច្នេះសម្រាប់លោកឪពុកអ្នកម្ដាយដែលមិនចង់កូនមានក្បាលសំប៉ែត ឡារ៉ែន មានពាក្យណែនាំយ៉ាងងាយៗមកជម្រាបជូន។

1/ រៀបចំឥរិយាបថឱ្យកូនគេងផ្អៀង ឆ្លាស់គ្នាទៅមក ម្ដងឆ្វេង ម្ដងស្ដាំ។

2/ ឱ្យកូនគេងផ្កាប់ ក្បាលច្បាស់ជាស្អាតប្រាកដណាស់ តែក៏ហាក់ដូចជាប្រថុយនឹងគ្រោះថ្នាក់ខ្លាំងដែរ ចំពោះក្មេងទារកអាយុ 3ខែដំបូង ព្រោះអាចនឹងធ្វើឱ្យក្មេងស្ទះខ្យល់ដកដង្ហើម ដូច្នេះបើដាក់កូនតូចឱ្យគេងផ្កាប់ ឪពុកម្ដាយត្រូវនៅមើលថែទាំយ៉ាងជិតស្និទ្ធដិតដល់ កុំឱ្យមានខ្នើយ ឬរបស់អ្វីម្យ៉ាងខ្ទប់ច្រមុះកូន។

3/ បើកូនមិនព្រមគេងផ្កាប់ ចូររកខ្នើយដែលមានប្រហោងកណ្ដាលមកដាក់ឱ្យកូនគេង។

4/ អំឡុងពេលដែលកូនភ្ញាក់ កុំឱ្យកូនស្ថិតក្នុងឥរិយាបថគេងផ្ងារតែម្យ៉ាង ចូរដាក់ឱ្យកូនគេងក្នុងឥរិយាបថផ្សេងទៀតផង ដូចជា គេងផ្កាប់ដោយមានអ្វីទ្រក្បាល គេងផ្អៀង ឬពកូនឡើងក៏បាន ទោះជាក្នុងអំឡុងពេលខ្លីៗក៏ដោយ។

5/ មិនគួរឱ្យគេងក្នុង ខារ៍ស៊ីត ឬរទេះរុញសម្រាប់ក្មេងទារកយូរពេកទេ។

6/ ការបី ឬពកូនតូច ក៏គួរតែឆ្លាស់ខាងគ្នា ឆ្វេង ស្ដាំដែរ។

7/ បើនឹងបី ឬពកូន មិនថានៅក្នុងផ្ទះ ឬនាំចេញទៅខាងក្រៅក៏ដោយ ក៏គួរប្រើក្រណាត់អង្រឹងបីកូន ដើម្បីឱ្យក និងក្បាលកូនតូចមិនមានគំនាប៕

February 16, 2018

ញាក់សាច់! ដួង ម៉ានិច បង្ហាញសាច់ខ្នងដោយមិនពាក់អាវក្នុង

តាមរយៈបណ្ដាញទំនាក់ទំនងសង្គមហ្វេសប៊ុករបស់តារាស្រី ដួង ម៉ានិច នៅថ្ងៃទី 16 ខែកុម្ភៈ ឆ្នាំ 2018 នេះបានឱ្យឃើញថា តារាស្រីរូបនេះបានបង្ហោះរូបភាពជាច្រើនសន្លឹកនាឱកាសថ្ងៃសែន ចូលឆ្នាំប្រពៃណីបងប្អូនជនជាតិចិន ដែលរូបនាងបង្ហាញឱ្យឃើញពីឈុតរ៉ូបព័ណ៌ខៀវចាស់ និងបញ្ចេញសាច់ខ្នងឱ្យមហាជនបានទស្សនាកម្សាន្ដផងដែរ។

កានតែពិសេជាងនេះទៅទៀត តាមរយៈរូបភាពដែលបានបង្ហាញ គេអាចមើលឃើញយ៉ាងច្បាស់ថា តារាស្រីរូបនេះពុំមានពាក់អាវក្នុងនេះទេ ហើយឈរកាច់រាងនៅខាងមុខតុកញ្ចក់ ពោលនាងចង់បង្ហាញពីភាពសិចស៊ីរបស់នាង និងស្រស់ដ៏ស្រស់ស្អាតជាការទាក់ទាញចិត្តបុរសៗ។ ដួង ម៉ានិច បានសរសេរនៅខាងលើរូបភាពរបស់នាងថា « កូនខ្មែរ100% ថ្ងែគេដើរលេង ថ្ងែគេឈប់ ខ្ញុំនៅតែថតរឿង ចង់និយាយថាអត់អីទេ ..»៕

ដើម្បីឱ្យកាន់តែជាក់ច្បាស់បន្ថែមទៀតសូមទស្សនារូបភាពទាំងឡាយខាងក្រោមនេះ៖

February 16, 2018

Category: សង្គម និងសេដ្ឋកិច្ច