កិច្ចសហប្រតិបត្តិការរវាងកម្ពុជា និងជប៉ុន ជាកិច្ចសហការល្អមួយដែលកន្លងមកតាមរយៈជំនួយរបស់ជប៉ុន និងការជំរុញឱ្យមានការវិនិយោគនៅកម្ពុជា បានធ្វើឱ្យប្រទេសទាំង2មានភាពជិតស្និទ្ធ ហើយអាចជួយគ្នាលើវិស័យជាច្រើននៅក្នុងតំបន់។
នៅចុងខែកុម្ភៈនេះ ក្រុមប្រឹក្សាអភិវឌ្ឍន៍កម្ពុជាបានជួបជាមួយលោកឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំនៅកម្ពុជា រួមជាមួយនឹងសមាគមទាក់ទងនឹងការវិនិយោគរបស់ជប៉ុនមួយចំនួនដើម្បីជជែកពិភាក្សាលើយន្តការថែទាំអ្នកវិនិយោគ ដែលផ្តល់ឱកាសឱ្យមានការសន្ទនារវាងតំណាងស្ថាប័នរដ្ឋរបស់កម្ពុជា និងអ្នកវិនិយោគជប៉ុន ដើម្បីស្វែងយល់ពីបញ្ហាប្រឈម និងស្តាប់សំណូមពរផ្សេងៗរបស់វិនិយោគិនជប៉ុនផង។
កិច្ចពិភាក្សានេះបានផ្តោតលើរឿងសំខាន់ៗមួយចំនួនដូចជា លើកទឹកចិត្តផ្នែកពន្ធដារចំពោះគម្រោងវិនិយោគដែលមានលក្ខណៈគ្រប់គ្រាន់ (គ.ល.គ) របស់ក្រុមហ៊ុនវិនិយោគតែមួយដែលមានសកម្មភាពច្រើន។ ធ្វើបច្ចុប្បន្នភាពនៃសេចក្តីព្រាងច្បាប់ស្តីពីវិនិយោគ និងច្បាប់ស្តីពីតំបន់សេដ្ឋកិច្ចពិសេស រៀបចំបទដ្ឋាននៃកិច្ចការពារបរិស្ថានកម្ពុជាចំពោះគម្រោងវិនិយោគ និងធ្វើបច្ចុប្បន្នភាពនៃការរៀបចំបទប្បញ្ញត្តិពាក់ព័ន្ធនឹងមូលនិធិបរិស្ថាន និងសង្គមសម្រាប់ឧស្សាហកម្ម។ សិក្សាពីកិច្ចការពាក់ព័ន្ធនឹងពន្ធដារ និងរៀបចំសេចក្តីព្រាងបទបញ្ជាផ្ទៃក្នុងរបស់សមាគមធុរកិច្ចជប៉ុននៅកម្ពុជា និងកិច្ចការពាក់ព័ន្ធនឹងឡូជីស្ទិក និងហេដ្ឋារចនាសម្ព័ន្ធ។
គួរបញ្ជាក់ថា គិតមកត្រឹមឆ្នាំ 2017 តាមរយៈក្រុមប្រឹក្សាអភិវឌ្ឍន៍កម្ពុជា រាជរដ្ឋាភិបាលកម្ពុជាបានទទួលស្វាគមន៍ និងចុះបញ្ជីគម្រោងវិនិយោគដែលមានលក្ខណសម្បត្តិគ្រប់គ្រាន់របស់ជប៉ុនចំនួន 130គម្រោងក្នុងទុនវិនិយោគសរុបប្រមាណ 1.6ប៊ីលានដុល្លារអាមេរិក ក្នុងវិស័យមួយចំនួន រួមមានធនាគារ ឧស្សាហកម្ម កសិ-ឧស្សាហកម្ម សេវាកម្ម និងហេដ្ឋារចនាសម្ព័ន្ធ និងវិស័យ មួយចំនួនទៀត។ដោយឡែកក្នុងឆ្នាំ2017នេះដែរ ក៏មានគម្រោងវិនិយោគជប៉ុនចំនួន9 ក្នុងទុនវិនិយោគសរុបប្រមាណ 63លានដុល្លារអាមេរិក ក្នុងនោះមានគម្រោងវិនិយោគចំនួន8 បានបោះទីតាំងក្នុងតំបន់សេដ្ឋកិច្ចពិសេស ដែលមានទុនវិនិយោគប្រមាណ 59លានដុល្លារអាមេរិក៕
