Category: សង្គម និងសេដ្ឋកិច្ច

ធនាគារជាតិ​នៃ​កម្ពុជា បានបង្ហាញ​ឱ្យឃើញ​នូវ​វឌ្ឍនភាព​នៃ​វិស័យ​ភតិសន្យា​ហិរញ្ញវត្ថុ​ក្នុង​រយៈពេល​ចុងក្រោយ​នេះ ខណៈដែល​អ្នកផ្តល់​សេវា​ភតិសន្យា បានកត់សម្គាល់​ឃើញថា តម្រូវការ​កើនឡើង​ក្នុង​បរិបទ​សេដ្ឋកិច្ច​រីកចម្រើន បាន​នាំទៅដល់​តម្រូវការ​សេវា​ភតិសន្យា​នេះ។

ធនាគារជាតិ​នៃ​កម្ពុជា បាន​កត់សម្គាល់ថា វិស័យ​ភតិសន្យា​ហិរញ្ញវត្ថុ​ជា​វិស័យ​ថ្មី​មួយ​នៅក្នុង​សេដ្ឋកិច្ចកម្ពុជា ប៉ុន្តែ​វិស័យនេះ​មានការ​រីកចម្រើន​គួរឱ្យកត់សម្គាល់។ រដ្ឋសភា​កម្ពុជា បានអនុម័ត​សេចក្ដីស្នើច្បាប់​ស្ដីពី​ភតិសន្យា កាលពី​ថ្ងៃទី6 ខែកក្កដា ឆ្នាំ2015។ ច្បាប់​ភតិសន្យា​នេះ​មាន 4ជំពូក និង11មាត្រា។

យោងតាម​របាយការណ៍ ធនាគារជាតិ​នៃ​កម្ពុជា បច្ចុប្បន្ន​ក្រុមហ៊ុន​ភតិសន្យា​ហិរញ្ញវត្ថុ​មាន​ចំនួន 11កន្លែង​បានផ្តល់​សេវា​ភតិសន្យា​លើ​ចលនទ្រព្យ រួមមាន៖ ម៉ូតូ រថយន្ត គ្រឿងយន្ត​ប្រើប្រាស់​ក្នុង​វិស័យ​កសិកម្ម គ្រឿងចក្រ​សាងសង់ គ្រឿង​អេឡិចត្រូនិក គ្រឿងសង្ហារិម សម្ភារ​ប្រើប្រាស់​ក្នុង​គ្រួសារ និង ចលនវត្ថុផ្សេងៗទៀត​ដល់​អតិថិជន។ របាយការណ៍​ដដែល​បាន​បង្ហាញថា វិស័យចម្បងៗ ដែល​ទទួលបាន​សេវា​ភតិសន្យា ហិរញ្ញវត្ថុ​រួមមាន កសិកម្ម25% ក្រុមគ្រួសារ40% ពាណិជ្ជកម្ម10% និង​សំណង់10%។ ទ្រព្យសកម្ម​សរុប​ក្នុង​វិស័យនេះ​បាន​កើនឡើង19.5% ដល់0.7ទ្រី​លាន​រៀល (ក្នុង​រយៈពេល​ឆ្នាំ​លើ​ឆ្នាំ) និង ឥណទាន​ភតិសន្យា​ហិរញ្ញវត្ថុ​សរុប​បាន​កើនឡើង1.8% ដល់0.5ទ្រី​លាន​រៀល និង​មាន​អតិថិជន​ចំនួន 67,791នាក់។

ធនាគារជាតិ​បាន​បញ្ជាក់ថា៖ “តម្រូវការ​ប្រើប្រាស់​រប​ស់​អតិថិជន បាន​ជំរុញ​ឱ្យ​ទីផ្សារ​ភតិសន្យា​ហិរញ្ញវត្ថុ​ទទួលបាន​ការចាប់អារម្មណ៍​ពី​វិនិយោគិន​ទាំង​ក្នុង និង​ក្រៅប្រទេស។ ធនាគារ​អេស៊ីលីដា​ដែល​បានផ្តល់​សេវា​ភតិសន្យា​ដល់​អតិថិជន​របស់ខ្លួន បានបង្ហាញ​ហេតុផល​មួយចំនួន​ដែល​បណ្តាលឱ្យ​វិស័យនេះ​ទទួលបាន​ការគាំទ្រ​យ៉ាង​ឆាប់​ពី​អ្នកមាន​តម្រូវការ​ហិរញ្ញវត្ថុ។

លោកស្រី​បណ្ឌិត សូ ផន​ណា​រី អនុប្រធាន​ប្រតិ​ប​តិ្ត និង​ជា​ប្រធាន​មន្ត្រី​ប្រតិ​ប​តិ្ត​ការ នៅ​ធនាគារ​អេស៊ីលីដា បាន​អះអាងថា កំណើន​ក្នុង​វិស័យចម្បងៗនៃ​សេដ្ឋកិច្ចកម្ពុជា​ពីមួយ​ឆ្នាំទៅ​មួយឆ្នាំ គួបផ្សំ​នឹង​ស្ថានភាព​ល្អប្រសើរ​នៃ​សេដ្ឋកិច្ចពិភពលោក និង​ក្នុង​តំបន់ និង​ការបន្ត​អនុវត្ត​ជំរុញ​កំណើនសេដ្ឋកិច្ច​របស់​រា​ជ​រដ្ឋាភិបាល​នៅតាម​វិស័យនីមួយៗបានធ្វើឱ្យ​វិស័យ​ភតិសន្យា​ហិរញ្ញវត្ថុ​មានការ​រីកចម្រើន​ឆាប់រហ័ស និង​គួរឱ្យកត់សម្គាល់​តាមរ​យៈ​ការពង្រីក​សេវា​លើ​ចលនទ្រព្យ ដូចជា​រថយន្ដ ម៉ូតូ គ្រឿងយន្ដ​ប្រើប្រាស់​ក្នុង​វិស័យ​កសិកម្ម គ្រឿងចក្រ​សំណង់ គ្រឿង​អេឡិចត្រូនិក គ្រឿងសង្ហារិម សម្ភារ​ប្រើប្រាស់​ក្នុង​គ្រួសារ និង​សម្ភារផ្សេងៗទៀត តាម​តម្រូវការ​ប្រើប្រាស់​របស់​អតិថិជន។

លោកស្រី​បណ្ឌិត​បាន​អះអាងថា ភតិសន្យា​ហិរញ្ញវត្ថុ​របស់​ធនាគារ អេស៊ីលីដា ភីអិលស៊ី ត្រូវបាន​ផ្តល់ជូន​អតិថិជន​ជា​លក្ខណៈ​ឯកត្តជន និង​នីតិបុគ្គល​ដើម្បី​ផ្តល់​ជម្រើស​ថ្មី​ដល់​អ្នកប្រើប្រាស់ផ្ទាល់ខ្លួន អាជីវករ ពាណិជ្ជករ និង​ក្រុមហ៊ុន​ក្នុងប្រទេស​កម្ពុជា​មានលទ្ធភាព​ពង្រីក​អាជីវកម្ម ឬ​ប្រើប្រាស់​ផ្ទាល់ខ្លួន។

លោកស្រី​បណ្ឌិត​បាន​បន្ថែមថា ភតិសន្យា​ហិរញ្ញវត្ថុ​ត្រូវបាន​ផ្តល់ជូន​អតិថិជន​ជា​ប្រាក់រៀល និង​ប្រាក់​ដុល្លារ​អាមេរិក និង​ថ្លៃដើម​ចលនវត្ថុ​ជួល ផ្អែក​ទៅតាម​តម្រូវការ​ជាក់ស្តែង​រប​ស់​អតិថិជន​ដែល​ទំហំ​អតិបរមា​មាន​រហូតដល់ 250,000ដុល្លារ​អាមេរិក​ក្នុង​មួយ​ឯក​តា​ចលនវត្ថុ។ រយៈពេល​ជួល​អប្បបរមា 12ខែ និង​អតិបរមា​មិន​លើសពី​អាយុកាល​នៃ​ចលនវត្ថុ​ដែល​ត្រូវ​ជួល។

លោកស្រី​បណ្ឌិត សូ ផន​ណា​រី បាន​អះអាងថា៖ “ដោយសារ​កំណើន​តម្រូវការ​ប្រើប្រាស់​របស់​អតិថិជន បាន​ជំរុញ​ឱ្យ​វិនិយោគិន​ទាំង​ក្នុង និង​ក្រៅប្រទេស​មានការ​ចាប់អារម្មណ៍ និង​វិនិយោគ​លើ​ទីផ្សារ​ភតិសន្យា​ហិរញ្ញវត្ថុ​នៅ​កម្ពុជា”៕

ទោះបី​ការផ្គត់ផ្គង់​សំណង់​អគារ​លំនៅឋាន បាន​រីកដុះដាល​ព្រោងព្រាត នៅ​រយៈពេល​ប៉ុន្មាន​ឆ្នាំ​ចុង​ក្រោយនេះ​ក៏ដោយ ប៉ុន្តែ​តម្រូវការ​នៃ​ការ​ស្នាក់​នៅផ្ទះ​ផ្ទាល់ខ្លួន នៅតែមាន​ការកើនឡើង បន្តទៀត​ទៅ​ថ្ងៃ​អនាគត ដែល​នៅត្រឹម​ឆ្នាំ2030 យ៉ាងហោចណាស់​ក៏ត្រូវ​ការ 80ម៉ឺន​ខ្នង​បន្ថែមទៀត​ដើម្បី​ផ្គត់ផ្គង់​លើ​តម្រូវការ​ទីផ្សារ​លំនៅឋាន​នៅ​កម្ពុជា។

ឯកឧត្តម ប៉ែន សុផល រដ្ឋលេខាធិការ​ក្រសួង​រៀបចំ​ដែនដី នគរូបនីយកម្ម និង​សំណង់ មានប្រសាសន៍ថា ជាមួយនឹង​កំណើនសេដ្ឋកិច្ច​ដែល​អាច​រក្សាបាន​ក្នុង​រង្វង់​ចន្លោះ7%ជា​រៀងរាល់ឆ្នាំ​នោះ​វិស័យ​នគរូបនីយកម្ម​ក៏បាន​កើនឡើង​យ៉ាង​ឆាប់រហ័ស​ផងដែរ ព្រោះថា បើ​ផ្អែក​តាម​ការសិក្សា​របស់​ក្រសួង​អំពី​ក្របខ័ណ្ឌ​យុទ្ធសាស្ត្រ​អភិវឌ្ឍន៍​ទីក្រុង​នៅ​កម្ពុជា​បាន​រកឃើញថា ចំនួន​ប្រជាជន​រស់នៅក្នុង​រាជធានី​និង​ទីប្រជុំជន​កាលពី​ឆ្នាំ 2014 មាន​ចំនួន 4.5លាន​នាក់ ស្មើនឹង 27.1ភាគរយ នឹង​បន្ត​កើនឡើង​ដល់ 7.92លាន​នាក់​នៅ​ឆ្នាំ 2030 ស្មើនឹង 44ភាគរយ នៃ​ចំនួន​ប្រជាជន​កម្ពុជា​សរុប។

ទិន្នន័យ​នៃ​ការសិក្សា​ស្រាវជ្រាវ​ខាងលើ បាន​រកឃើញថា ក្នុង​រយៈពេល 15ឆ្នាំ​ទៀត រាប់​គិត​ចាប់ពី​ឆ្នាំ 2015 ដល់ 2030 ខាងមុខនេះ តម្រូវការ​លំនៅ​ឋានស​ម្រា​ប់រាជ​ធានី និង​ទីប្រជុំជន​មាន​ប្រមាណ 80ម៉ឺន​លំនៅឋាន បន្ថែមទៀត ដែល​គិត​ជា​មធ្យម​មាន​តម្រូវការ​ប្រមាណ​ជា 5ម៉ឺន​លំនៅឋាន ក្នុង​មួយឆ្នាំ។

ឆ្លើយតប​នឹង​បញ្ហា​នេះ​ក្រសួង​រៀបចំ​ដែនដី​នគរូបនីយកម្ម និង​សំណង់ បាននិងកំពុង​ជំរុញ​ការអនុវត្ត​គោលនយោបាយ​ជាតិ​ស្តីពី​ការរៀបចំ​ដែនដី​ក្នុង​ការកសាង​ផែនការ​រៀបចំ​ដែនដី​ប្លង់គោល និង​ផែនការ​ប្រើប្រាស់​ដី​គ្រប់​កម្រិត និង​គោលនយោបាយ​ជាតិ​ស្តីពី​លំនៅឋាន ពិសេស​លំនៅឋាន ដែលមាន​តម្លៃ​សមរម្យ​ជូន​មន្ត្រីរាជការ កងកម្លាំងប្រដាប់អាវុធ និង​ប្រជាពលរដ្ឋ​ដែលមាន​ប្រាក់ចំណូល​មធ្យម ប្រាក់ចំណូល​ទាប និង​ជន​ងាយ​រងគ្រោះ ដើម្បី​ធានា​ការអភិវឌ្ឍ​ប្រកបដោយ​ចីរភាព និង​សមធម៌ ។

គួរបញ្ជាក់​ផងដែរ​ថា កាលពី​ឆ្នាំ2017កន្លងទៅ ការវិនិយោគ​វិស័យ​សំណង់​បាន​កើនឡើង​ជាង 22% ដែលមាន​តម្លៃ​ទឹកប្រាក់​ប៉ាន់ស្មាន​ប្រមាណ​ចំនួន​ជាង6,428 លាន​ដុល្លារ លើ​គម្រោង 3,052 ខណៈដែល​ឆ្នាំ2016មាន​ត្រឹម 5,256 លាន​ដុល្លារ​អាមេរិក​តែប៉ុណ្ណោះ៕

សភាព​ជុំវិញខ្លួន​នៅក្នុង​ផ្ទៃ​ម្ដាយ​ស័ក្តិសម​សម្រាប់​ការ​គេង​របស់​ទារ​កបំ​ផុត ព្រោះ​នៅក្នុង​ពោះ​របស់​ម្ដាយ​ទាំង​ងងឹត កក់ក្ដៅ ស្ងាត់ គ្មាន​ការប្រែប្រួល ហើយ​ពេលដែល​អ្នក​ម្ដាយ​ដើរទៅណា​មក​ណា​ក៏​ប្រៀបដូចជា​យោលអង្រឹង​ឱ្យ​កូន​បាន​គេង​លក់​ដូច្នោះ​ដែរ។

សំឡេង​បេះដូង សំឡេង​កូរពោះ និង​សំឡេង​និយាយ​របស់​អ្នក​ម្ដាយ ដែល នឹងធ្វើ​ឱ្យគេ​មាន​អារម្មណ៍​កក់ក្ដៅ ក្រៅពីនោះ​ទារក​ក្នុង​គភ៌​ថែមទាំង​មិនមាន​អារម្មណ៍​ឃ្លាន​ទៀតផង ព្រោះ​មាន​ខ្សែ​ទងផ្ចិត​ត​ភ្ជាប់​អាហារ ដែលជា​មូលហេតុ​មួយ​ធ្វើឱ្យ​ទារក​បាន​គេង​លក់​យ៉ាង​សប្បាយចិត្ត។

• ការ​ភ្ញាក់​ពី​គេង​របស់​ទារក​ក្នុង​គភ៌​កើតឡើង​មិន​ទៀងពេល​ឡើយ ហើយ​កូន​នឹង​ភ្ញាក់​ត្រឹមតែ​ក្នុង​រយៈពេលខ្លីៗប៉ុណ្ណោះ។
• អំឡុង​ពេលដែល​កូន​គេង​លក់​នៅក្នុង​ពោះ​ម្ដាយ​អាច​មានការ​កម្រើកខ្លួន និង​ធាក់​ម្ដាយខ្លះៗ មិន​ខាន ព្រោះ​កូន​នៅក្នុង​ផ្ទៃ​អាចជា​ក្មេង​ដែល​គេង​រើ។
• នៅពេល​តាំង​គភ៌​ដល់7ខែ ទារក​ក្នុង​ផ្ទៃ​នឹង​ចាប់ផ្ដើម​មានការ​យល់សប្តិ​ខ្លះ​ហើយ ព្រោះ​តួ​កំណើត​នៅក្នុង​គភ៌​នេះ​មានការ​សាង​ខួរក្បាល​គ្រប់គ្រាន់​ល្មម​ធ្វើឱ្យ​កើតការ​គេង​លក់​បែប REM (Rapid Eye Movement) ទារក​ចាប់ផ្ដើម​មាន​ក្រសែ​ប្រសាទ​ដែល​ពាក់ព័ន្ធ​ជាមួយ​សមត្ថភាព​ក្នុងការ​មើលឃើញ និង​បានឮ​ហើយ។

• នៅពេល​តាំង​គភ៌​គ្រប់8ខែ ទារក​ក៏​នឹង​ចាប់ផ្ដើម​គេង​លក់​បែប non-REM ឬ​បែប​គេង​លង់លក់​ខ្លាំង​បាន​ហើយ​ដែរ។
• បើ​ធ្វើ​ការថត​អេកូ 4 D ពេលខ្លះ​អ្នក​ម្ដាយ​អាច​នឹង​បានឃើញ​កូនតូច​គេង​ញញឹម​ទៀតផង​នេះ​ក៏ដោយ​សារ​ថា អំឡុង​ពេលដែល​កូនតូច​គេង​លក់​បែប REM សាច់ដុំ​បរិវេណ​ផ្ទៃមុខ​កើតអាការ​ញាក់ ឬ​មានការ​ទាញ​ហ្នឹងឯង។

• បេ​ប៊ី​ក្នុង​ផ្ទៃ​ចូលចិត្ត​គេង​ពេល​ថ្ងៃ និង​ភ្ញាក់​នៅពេល​យប់ ព្រោះ​ក្នុងអំឡុង​ពេលយប់​ដែល​អ្នក​ម្ដាយ​គេង​លក់​នឹងមាន​ទីកន្លែង​ឱ្យ​កូនតូច​បាន​កម្រើកខ្លួន​ច្រើនជាង ថែមទាំង​នៅ​អំឡុងពេល​ថ្ងៃ ពេលដែល​អ្នក​ម្ដាយ​ដើរ​ច្រើន​ផង​នោះ រឹតតែ​ធ្វើឱ្យ​កូនតូច​មាន​អារម្មណ៍​ដូច​កំពុង​គេង​យោល​យោក​ទៅមក​ធ្វើឱ្យ​គេង​លក់​តែម្តង។
• បេ​ប៊ី​ក្នុង​ផ្ទៃ​ចូលចិត្ត​គេង​ពេល​ថ្ងៃ និង​ភ្ញាក់​នៅពេល​យប់ ព្រោះ​ក្នុងអំឡុង​ពេលយប់​ដែល​អ្នក​ម្ដាយ​គេង​លក់​នឹងមាន​ទីកន្លែង​ឱ្យ​កូនតូច​បាន​កម្រើកខ្លួន​ច្រើនជាង ថែមទាំង​នៅ​អំឡុងពេល​ថ្ងៃ ពេលដែល​អ្នក​ម្ដាយ​ដើរ​ច្រើន​ផង​នោះ រឹតតែ​ធ្វើឱ្យ​កូនតូច​មាន​អារម្មណ៍​ដូច​កំពុង​គេង​យោល​យោក​ទៅមក​ធ្វើឱ្យ​គេង​លក់​តែម្តង៕

ដោយគេសង្កេតឃើញថា បន្ទាប់ពី​ផ្ទុះ​សង្គ្រោះ​ពាក្យសម្តី​រវាង​កំពូល​តារា​ចម្រៀង​រាជនីសំឡេងមាសអ្នកនាង ម៉េង កែវពេជ្ជតា និង​ព្រះ​តេជគុណ ឡុង ចន្ថា កាន់តែបញ្ឆេះឡើងៗ បណ្ដាឱ្យកក្រើកពេញបណ្ដាញទំនាក់ទំនងសង្គមហ្វេសប៊ុក រហូតដល់មានមហាជនជាច្រើនយល់ស្របតាមគំនិតតារាស្រីរូបនេះ និងរិះគន់ព្រះតេជគុណយ៉ាងពេញទំហឹង។

ដោយឡែក ព្រះ​តេជគុណ ឡុង ចន្ថា បាន​ប្រតិកម្ម​ឆ្លើយតប​ចំពោះ​ការរិះគន់​ដោយ​មិន​សំចៃមាត់​របស់​អ្នកនាង ម៉េង កែវពេជ្ជតា ដោយ​ព្រះ​តេជគុណ​ចាត់ទុកថា​ ការរិះគន់​នេះ​ជា​ការ​ឈ្នានីស​ដល់​ព្រះ​តេជគុណ។ ជាថ្មី​ម្តង​ទៀត​អ្នកនាង ម៉េង កែវពេជ្ជតា ​​​​បាន​លេង​យ៉ាង​ចាស់ដៃ​ ដោយ​ស្នើ​ឱ្យ​ក្រសួង​ពាក់ព័ន្ធ​ត្រូវ​មាន​ចំណាត់ការ​លើ​ករណី​ព្រះ​តេជគុណ ឡុង ចន្ថា។

ភ្ជាប់​ជាមួយ​វីដេអូ​របស់​ព្រះ​តេជគុណ ឡុង ចន្ថា រាជនីសំឡេងរូបនេះបានបង្ហោះសារនៅលើហ្វេសប៊ុកខ្លួនទទូចទាមទាររកចំណាត់ការក្ដៅៗថា« ច្បាស់ៗ​ប៉ុណ្ណឹង​ហើយ តើ​ក្រសួង​លោក​អាច​ធ្វើ​ការ​បាន​ឬ​នៅ ?​ណែនាំ​អោយ​ឈប់​ ព្រមាន​ផ្សឹក ឬ​ផ្សឹក​តែម្តង? ​រស់​ក្រោម​ម្លប់​សាសនា​ តែ​បំផ្លាញ​សាសនា។ មាក់ងាយ​សូម្បី​ម្តាយ​ឯង​ប្រមាថ​ជីវិត​គេ​ពេញៗ​មាត់​ យក​វេទិកា​ទេសនា​ជា​កន្លែង​បញ្ចេញ​កំហឹង កន្លែង​ហែកហួរ កន្លែង​និយាយ​ដើម កន្លែង​អួត»។ ផងដែរនោះ ​ក៏​មាន​អ្នក​គាំទ្រ​ជាច្រើន​បាន​គាំទ្រ​សម្តី​របស់​អ្នកនាង ម៉េង កែវពេជ្ជតា ព្រមជាមួយ​ការរិះគន់​ធ្ងន់​ដល់​ព្រះអង្គ​ ឡុង ចន្ថា ផង​ដែរ​ ចំពោះ​ករណី​មួយ​នេះជាខ្លាំង៕

តម្លៃ​អង្ករ​ដែល​ចរាចរ​លក់​នៅលើ​ទីផ្សារ​កំពុង​ឡើងថ្លៃ​ក្នុង​រយៈពេលថ្មីៗនេះ ដែល​អ្នក​ប្រកប​អាជីវកម្ម​ក្នុង​វិស័យនេះ​បាន​មើលឃើញថា មាន​កត្តា​ជាច្រើន​កំពុង​ជះឥទ្ធិពល​ដល់​តម្លៃ​អង្ករ​នៅ​ប្រទេស​កម្ពុជា ខណៈដែល​ការនាំចេញ​អង្ករ​ជា​ផ្លូវការ​ពី​ប្រទេស​កម្ពុជា មាន​កំណើន​តិចតួច​ក្នុង​រយៈពេល​ពីរ​ខែ​ដើមឆ្នាំ​នេះ។

អ្នក​ប្រកប​អាជីវកម្ម​លក់​អង្ក​រទាំង​ទីផ្សារ​ក្នុងស្រុក និង​នាំចេញ​ដែល​ស្នើសុំ​មិន​បញ្ចេញ​ឈ្មោះ ម្នាក់​បានឱ្យដឹងថា តម្លៃ​អង្ករ​បាន​ហក់​ឡើង​ទាំង​ទីផ្សារ​ក្នុងស្រុក និង​នាំចេញ។ ម្ចាស់​ក្រុមហ៊ុន​រូបនោះ​បាន​អះអាងថា តម្លៃ​អង្ករ​នាងខុន​ដែល​ពេញនិយម​ប្រើប្រាស់​ក្នុងស្រុក​បាន​ហក់​ឡើង​ជិត 100ដុល្លារ​ក្នុង​មួយ​តោន រហូតដល់​ជាង 500ដុល្លារ​ក្នុង​មួយ​តោន ខណៈ​តម្លៃ​ពីមុន​គឺ​ត្រឹមតែ​ជាង 400ដុល្លារ​ប៉ុណ្ណោះ​ក្នុង​បរិមាណ​ដូចគ្នា។ ជាមួយគ្នានេះ តម្លៃ​អង្ករ​សែន​ក្រអូប វិញ​បាន​ហក់​ឡើង​ជិត 200ដុល្លារ​ក្នុង​មួយ​តោន។

ម្ចាស់​អាជីវកម្ម​រូបនោះ​បាន​អះអាងថា តម្លៃ​នេះ​ត្រូវបាន​ម្ចាស់​រោង​ម៉ាស៊ីនកិនស្រូវ​ដំឡើងថ្លៃ ហើយ អះអាងថា ទីផ្សារ​ខាងក្រៅ​កំពុងមាន​តម្រូវការ។ លោក ហេង ផេង ម្ចាស់​រោង​ម៉ាស៊ីនកិនស្រូវ និងក្រុមហ៊ុននាំចេញ​អង្ករ ថ្មគោល​រ៉ា​យស៍ បាន​កត់សម្គាល់ថា នាពេល​បច្ចុប្បន្ននេះ អង្ករ​គ្រប់​ប្រភេទ​ដូចជា អង្ករ​ផ្កាម្លិះ រំដួល និង​សែន​ក្រអូប​ព្រមទាំង​អង្ករ​នាងខុន​បាន​ហក់​ឡើង​ខ្លាំង ដោយសារ​កត្តា​ជាច្រើន។

លោក​បាន​អះអាងថា ឆ្នាំនេះ​អង្ករ​នាងខុន​មាន​បរិមាណ​តិចជាង​ឆ្នាំ​កន្លងទៅ ដោយសារ​ឈ្មួញ​ប្រមូល​ទិញស្រូវ​នាងខុន​យកទៅ​ទីផ្សារ​វៀតណាម។ បន្ថែម​ពីលើ​នេះ ម្ចាស់​រោង​ម៉ាស៊ីន​ដែល​ធ្លាប់​ទិញស្រូវ​នាងខុន​ទុក​ក្នុង​ស្តុក បាន​បោះ​បង់ការ​ស្តុក​ស្រូវ​នាងខុន ដោយ​ប្តូរ​ទៅ​ស្តុក​ស្រូវ​ប្រភេទ​ផ្សេង​ដែល​ចំណេញ និង​បង្វិល​លុយ​បាន​លឿន​ជាង​វិញ។

បច្ចុប្បន្ននេះ អង្ករ​សែន​ក្រអូប​មានតម្លៃ​លក់​នៅមុខ​រោង​ម៉ាស៊ីន បាន​កើនឡើង​ពី 600ដុល្លារ ដល់​ជាង 700ដុល្លារ​ក្នុង​មួយ​តោន រីឯ​អង្ករ​ផ្កាម្លិះ​វិញ កើន​ពី 650ដុល្លារ​ក្នុង1តោន ដល់ 770ដុល្លារ​ក្នុង​បរិមាណ 1តោន​ដូចគ្នា។

លោក​បញ្ជាក់ថា៖ “រោង​ម៉ាស៊ីន​បាន​ស្តុក​ទុក​នាងខុន​នៅ​ប៉ុន្មាន​ឆ្នាំ​ចុងក្រោយ​នេះ តែ​គាត់​មិន​ចំណេញ​ដោយសារ​តម្លៃ​អង្ករ​នាងខុន​មិន​ឡើងថ្លៃ ហើយ​គាត់​ខាតបង់​ការប្រាក់។ រោង​ម៉ាស៊ីន​ដែល​ធ្លាប់​ទុក​នាងខុន បាន​កាត់បន្ថយ​ស្តុក​រហូតដល់ 50% ធៀប​នឹង​ឆ្នាំមុន។ រោង​ម៉ាស៊ីន​មាន​ស្តុក​តិច ដល់​កិន​ស្តុក​ស្រូវ​ចាស់​អស់ រកទិញស្រូវ​ថ្មី​ក៏​មិនទាន់ មិន​គ្រប់​កិន ទើប​បណ្តាលឱ្យ​តម្លៃ​កើនឡើង។

លោក​បន្ថែមថា៖ “ឆ្នាំនេះ​ខ្ញុំ​ទិញ​នាងខុន​បាន​តិច​ដូច​កាលពី​ឆ្នាំ​កន្លងទៅ​ដែរ ហេតុផល​មិនមែន​អត់​ស្រូវ​ទេ​នៅ​រដូវ​ប្រមូល​ផល តែ​ខ្ញុំ​គឹ​ត​ថា តម្លៃនឹង​បន្ត​ឡើង​ដោយសារ​ការប្រើប្រាស់​អង្ករ​នាងខុន​ក្នុងស្រុក​ច្រើន។

លោក​បាន​បន្ថែមថា សម្រាប់​ប្រភេទ​អង្ក​រស (White rice)តម្លៃ​មិន​ប្រែប្រួល​ច្រើន​ដូច​នាងខុន​ទេ ដោយសារតែ​រដូវ​នេះ​ប្រមូល​ផល​បាន​ច្រើន ហើយ​វៀតណាម​ក៏​ប្រមូលយក​ច្រើន​ដែរ ដូច្នេះ​តម្លៃ​ប្រភេទ​ស្រូវ​អង្ក​រស ឬ​ស្រូវ​អ៊ី​អ៊ែរ គឺមាន​ស្ថេរភាព ប៉ុន្តែ​បើសិន​ខាង​វៀតណាម​នៅតែ​បន្ត​ចូលមក​ទិញ​ពី​ប្រទេស​កម្ពុជា​នោះ តម្លៃ​ក៏​នឹង​ប្រែប្រួល​ទៅតាម​ហេង​ឆេង និង​តម្រូវការ​ពី​ប្រទេស​វៀតណាម​ដែរ។

គួរ​រំឭក​ផងដែរ​ថា​កាលពី​ចុងខែ​មករា ឆ្នាំ2018 កន្លងទៅ​កម្ពុជា​បាន​សម្ពោធ​ម៉ាក​វិញ្ញាតកម្ម​អង្ករ​ថ្មី​មួយ ឈ្មោះថា “ម្លិះ​អង្គរ MALYS ANGKOR” ដើម្បី​ជំរុញ​ទីផ្សារ​លក់​នៅក្រៅ​ប្រទេស​ឱ្យ​កាន់តែមាន​ប្រសិទ្ធ​ភាពខ្លាំង​ឡើង​ទៀត ខណៈដែល​ថ្នាក់ដឹកនាំ​ក្រសួង​នានា​បាន​រំពឹងទុក​ថា ផលិតកម្ម​ស្រូវ​បន្ត​រីកចម្រើន និង មានលទ្ធភាព​ពង្រីក​ផលិតកម្ម​បន្ថែមទៀត​ក្នុងពេល​អនាគត។

ម៉ាក​វិញ្ញាតកម្ម “ម្លិះ​អង្គរ” ត្រូវបាន​សម្ពោធ​ដាក់ឱ្យ​ប្រើប្រាស់​ជា​ម៉ាក​សញ្ញា​ពាណិជ្ជកម្ម​រួម​ថ្មី​មួយ​របស់​កម្ពុជា ដែលមាន​សហព័ន្ធ​ស្រូវ​អង្ករ​ជា​កម្មសិទ្ធិករ ដែល​នឹង​ផ្តល់​ការបញ្ជាក់​ទៅលើ​សម្បក​វេច​ខ្ចប់​នៃ​ផលិតផល​អង្ករ​នាំចេញ។ ទោះបីជា​បែបនេះ​ក្តី ការប្រើប្រាស់​ម៉ាក​វិញ្ញាតកម្ម​នេះ​នឹង​ត្រូវការ​ពេល​យូរ​បន្ថែមទៀត សម្រាប់​ឱ្យ​អ្នក​នាំចេញ និង​ទីផ្សារ​ខាងក្រៅ​ទទួលស្គាល់។

ឯកឧត្តម សុខ ពុ​ទ្ធី​វុ​ធ ប្រធាន​សហព័ន្ធ​ស្រូវ​អង្ករ​កម្ពុជា បានលើកឡើង​ក្នុង​ពិធី​សម្ពោធ​ម៉ាក​អង្ករ​នោះ​ថា នេះ​គ្រាន់តែ​ជា​ចំណុច​ចាប់ផ្តើម​ប៉ុណ្ណោះ​សម្រាប់​ម៉ាក​រួមមួយ​នេះ ដោយ​សហព័ន្ធ​ត្រូវធ្វើ​ការងារ​ជាច្រើន​ទៀត​ជាមួយ​អ្នក​នាំចេញ។

រហូតមកដល់​ពេលនេះ នីតិវិធី​ប្រើប្រាស់​ម៉ាក​វិញ្ញាតកម្ម ម្លិះ​អង្គរ មិនទាន់​ត្រូវបាន​ប្រកាស និង​ដាក់ឱ្យ​ប្រើប្រាស់​ជា​ផ្លូវការ​នៅឡើយ​ទេ ប៉ុន្តែ​តម្រូវការ​អង្ករ​អាចមាន​ច្រើន​សម្រាប់​ធានា​សន្តិសុខ​ស្បៀង ខណៈដែល​តំបន់​ខ្លះ​អាច​ទទួលរង​នូវ​ផលប៉ះពាល់​ដោយសារ​ផលិតកម្ម​ថយចុះ​ឬ​ខូចខាត ដោយសារ​ការប្រែប្រួល​អាកាសធាតុ៕

ព័ត៌មាន​មិន​ពិតជា​ច្រើន​ត្រូវបាន​ផ្សព្វផ្សាយ និង​ចែករំលែក​យ៉ាង​រហ័ស និង​ច្រើនសន្ធឹក​តាមរយៈ​បណ្ដាញ​សង្គម Twitter ទៅកាន់​ពិភពលោក។ នេះ​បើ​យោងតាម​ការសិក្សា​ស្រាវជ្រាវ​ថ្មី​មួយ​ដែល​បានបង្ហាញ​នាពេលថ្មីៗនេះ និង​ត្រូវបាន​ចុះផ្សាយ​ដោយ​ភ្នាក់ងារ​ព័ត៌មាន Reuters។

វិទ្យាស្ថាន​ស្រាវជ្រាវ Massachusetts Institute of Technology’s Media Lab បានបង្ហាញ​របាយការណ៍​ស្រាវជ្រាវ​របស់ខ្លួន ដោយនៅ​ក្នុងនោះ​បានឱ្យដឹង​ថា នៅ​ចន្លោះ​ឆ្នាំ2006 ដល់ 2017 មាន​ព័ត៌មាន​មិន​ពិតជា​ច្រើន​ត្រូវបាន​បង្ហោះ​នៅលើ Twitter ហើយ​បើ​គិត​ទៅ គឺ​ស្មើនឹង 70% នៃ​ព័ត៌មាន​ទាំងអស់​ដែល​បានបង្ហាញ​នៅលើ​ប្រព័ន្ធ​ទំនាក់ទំនង​មួយ​នោះ។

ប្រភព​ដដែល​បានបញ្ជាក់​បន្ថែមទៀតថា ព័ត៌មាន​មិន​ពិត​ទាំងនោះ ភាគច្រើន​ត្រូវបាន​បង្ហោះ​ដោយ​ជនអនាមិក និង​ជា​ព័ត៌មាន​ដែល​គ្មាន​ប្រភព​ច្បាស់លាស់ ហើយ​ជាពិសេស គឺ​អ្នកប្រើប្រាស់ Twitter បាននាំគ្នា​ចែករំលែក​នូវ​ព័ត៌មាន​ទាំងនោះ​ថែម​ទៀតផង ដោយ​មិនបាន​គិតពិចារណា​ឱ្យបាន​ល្អិតល្អន់​ថា វា​ជា​រឿង​ពិត ឬ​ក្លែងក្លាយ​នោះឡើយ។

ពាក់ព័ន្ធ​នឹង​បញ្ហា​នេះ ខាង Twitter ក៏​ធ្លាប់បាន​ចេញមុខ​បញ្ជាក់​ជាច្រើនលើក​ច្រើនសា​មកហើយ​ដែរ ជាពិសេស​ថែមទាំង​បានចាប់ផ្ដើម​រឹតបន្តឹង​លើ​ការត្រួតពិនិត្យ​សកម្មភាព​នៃ​ការ​បង្ហោះ​សារ​របស់​អ្នកប្រើប្រាស់​ទៀតផង ខណៈដែល​ពេលនេះ Facebook និង YouTube ក៏បាន​បន្ថែម​កម្លាំង​មនុស្ស​ដើម្បី​ត្រួតពិនិត្យ​លើ​បញ្ហា​នេះដែរ៕