Category: សង្គម និងសេដ្ឋកិច្ច

ញាក់សាច់ ! តារាម៉ូដែលថៃនាង Jessie Vard បង្ហាញក្បាច់រាំ « មាន់ស្រែ » សិចស៊ីរោលរាល
ពិតជាកួរឱ្យភ្ញាក់ផ្អើលបំផុតដែលបទចម្រៀង « មាន់ស្រែ » របស់តារាចម្រៀងស្រី រ៉ា ប៊ី ប្រចាំផលិតកម្មថោន មានភាពល្បីរន្ធឺដល់បណ្ដាប្រជិតខាងរួមមានទាំង ថៃ និងវៀតណាម។ ដោយឡែកថ្មីនេះៗ គេបានឃើញតារាម៉ូដែលកូនកាត់ថៃ និងជនជាតិអៀឡង់ គឺនាង Jessie Vard បានបង្ហាញក្បាច់រាំក្នុងបទចម្រៀង « មាន់ស្រែ » ក្នុងឈុតសម្លៀកបំពាក់សិចស៊ីបំផុត ដែលធ្វើអោយអ្នកទស្សនាស្ទើរឈាមច្រមុះ អត់ទ្រាំមិនបាននឹងសម្រស់របស់នាង។
គួរបញ្ជាក់ផងដែរថា បទ «មាន់ស្រែ» កំពុងទទួលបានភាពពេញនិយមជាច្រើនពីយុវវ័យបច្ចុប្បន្ន ម៉ោងនេះពេលនេះមានអ្នកចូលទស្សនារាប់លានដង ជាងនេះទៅទៀតនោះថែមទាំងបង្កភាពល្បីល្បាញដល់ប្រទេសថៃ ដោយកន្លងទៅនេះមានហ្វេនបាល់ទាត់របស់ថៃយកទៅរាំ Cover ផងដែរ។ បទនេះទៀតសោទ ជាស្នាដៃនិពន្ធទំនុកច្រៀង ដោយ សយ រតនា និងនិពន្ធបទភ្លេង លាង ស៊ានលីន ដែលបានធ្វើឲ្យបទចម្រៀងមួយបទនេះ មានភាពទាក់ទាញ គួរឲ្យចាប់អារម្មណ៍ ជាមួយស្ទាយថ្មី។ តោះមកទស្សនាក្បាច់រាំបទ “មាន់ស្រែ” របស់ Jessie Vard នៅក្នុងវិដេអូខាងក្រោមទាំងអស់គ្នា៖
March 19, 2018
Chelsea ទម្លាក់ Leicester ដើម្បីទៅជួប Southampton ក្នុងវគ្គ1/2នៃ FA Cup
ក្រុម Manchester United ត្រូវបានចាប់ឆ្នោតឱ្យជួបជាមួយនឹងក្រុម Tottenham Hotspurs ក្នុងការប្រកួតវគ្គពាក់កណ្តាលផ្តាច់ព្រ័ត្រនៃពាន FA Cup នៅរដូវកាលនេះ។ ក្នុងការប្រកួតមួយគូផ្សេងទៀតដែលនឹងត្រូវរៀបចំឡើងនៅចុងសប្តាហ៍នាថ្ងៃទី21 និងទី22 ខែមេសា ក្រុម Chelsea ដែលជាម្ចាស់ជើងឯករងកាលពីឆ្នាំមុន នឹងត្រូវជួបជាមួយនឹងក្រុម Southampton។
ក្រោយពីដណ្តើមបានជ័យជម្នះលើក្រុម Brighton ក្នុងការប្រកួតវគ្គ 8ក្រុមចុងក្រោយកាលពីថ្ងៃសៅរ៍ ក្រុមរបស់លោក Jose Mourinho នឹងត្រូវប៉ះជាមួយនឹងក្រុមរបស់លោក Mauricio Pochettino នាកីឡដ្ឋានបណ្តោះអាសន្នរបស់ក្រុម Spurs គឺWembley។
ក្រុម Spurs បានយកឈ្នះលើក្រុម Swansea ក្នុងលទ្ធផល 3-០ នៅថ្ងៃដដែលនោះ។ ការជួបគ្នារវាងក្រុមទាំង2កាលពីលើកមុន បានកើតឡើងកាលពីថ្ងៃទី31 ខែមករា នាកីឡដ្ឋាន Wembley ដែលនៅពេលនោះក្រុម Tottenham បានយកឈ្នះក្នុងលទ្ធផល 2-។
ស្របពេលជាមួយគ្នានេះ ក្រុម Southampton របស់លោក Mark Hughes បានផ្តួលក្រុម Wiganក្នុងលទ្ធផល 2-០ កាលពីថ្ងៃអាទិត្យ ក្រោយពីគ្រាប់បាល់បញ្ចូលទីពីសំណាក់កីឡាករ Cedric Soares និង Pierre-Emile Hojbjerg ដើម្បីឈានទៅប្រកួតនៅកីឡដ្ឋាន Wembley ក្នុងការប្រកួតជាលើកទី1 របស់គ្រូបង្វឹកវែលស៍រូបនេះ ក្នុងនាមជាគ្រូបង្វឹកចាប់តាំងពីចូលកាន់តំណែង បន្ទាប់ពីលោក Mauricio Pellegrino ត្រូវបានបណ្តេញចេញ។
ក្រុម Chelsea ដណ្តើមបានជ័យជម្នះក្នុងការប្រកួតវគ្គ 8ក្រុមចុងក្រោយរបស់ពួកគេ ក្នុងលទ្ធផល 2-1 នៅលើទឹកដីក្រុម Leicester កាលពីថ្ងៃអាទិត្យ ក្រោយពីនាទីបន្ថែម 15នាទី 2ដង ដោយ Pedro រកបានគ្រាប់បាល់ឈ្នះនៅនាទីទី105 បន្ទាប់ពីខ្សែប្រយុទ្ធ Jamie Vardy បានរកគ្រាប់បាល់តាមស្មើគ្រាប់បាល់បើកឆាករបស់ Alvaro Morata៕
ប្រភពពី៖ The Guardian
March 19, 2018
Messi បង្ហាញថ្វីជើងម្តងទៀត ខណៈ Ronaldo រកបាន 4គ្រាប់សម្រាប់ Real
ការបង្ហាញពីទម្រង់លេងយ៉ាងល្អឥតខ្ចោះក្នុងតង់ទី1 បានផ្តល់ការខកចិត្តដល់ក្រុម Athletic Bilbao ខណៈដែលការមិនស្គាល់ចាញ់របស់ក្រុម Barcelona ក្នុងយុទ្ធនាការ La Ligaនៅរដូវកាលនេះ បានឈានដល់ 29ប្រកួត នៅមុនពេលឈប់សម្រាកសម្រាប់ការប្រកួតអន្តរជាតិ។
គ្រាប់បាល់ស៊ុតបញ្ចូលទីពីសំណាក់កីឡាករ PacoAlcacer និង Lionel Messi ក្នុងរយៈពេល 45នាទីដំបូង បានជួយឱ្យក្រុម Barcaដណ្តើមបានជ័យជម្នះក្នុងលទ្ធផល 2-០ នៅពេលប្រកួតជាមួយនឹងអតីតក្រុមរបស់លោក Ernesto Valverde។ ស្របពេលដែល Luis Suarez suspended និង Sergio Busquets មានបញ្ហារបួស កីឡាករ Alcacer បានចូលលេងនៅនាទីទី8 ហើយ Messi បានបំពេញជ័យជម្នះរបស់ក្រុមនៅនាទីទី30 ក្នុងតង់ទី1។
ទាក់ទងនឹង Messi ដែលជាអ្នករកគ្រាប់បាល់បានច្រើនជាងគេក្នុងក្របខ័ណ្ឌអេស្ប៉ាញ La Liga នៅរដូវកាលនេះតាមរយៈការរកបាន 25គ្រាប់នោះ លោក Valverde គ្រូបង្វឹករបស់ Barcelona បានឱ្យដឹងថា៖ «រាល់ថ្ងៃ រូបគេបានរកឃើញអ្វីថ្មីៗ និងអ្វីៗដែលលំបាកជានិច្ច ហើយរូបគេដឹងយ៉ាងច្បាស់ពីអ្វីដែលរូបគេត្រូវធ្វើ និងអ្វីដែលក្រុមត្រូវការពីរូបគេ»។គ្រូបង្វឹករូបនេះបានបន្ថែមទៀតថា៖ «ភាគច្រើន វាហាក់បង្ហាញថា គ្រូបង្វឹកត្រូវតែពន្យល់ដល់កីឡាករ ប៉ុន្តែអ្វីដែលគ្រូបង្វឹកបានធ្វើនោះគឺការរៀនរួមជាមួយនឹងក្រុម។ យើងសង្ឃឹមថា យើងអាចរក្សាការរៀនសូត្រជាមួយគ្នាបាន»។
ស្របពេលជាមួយគ្នានេះ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី 4គ្រាប់ ខណៈដែលក្រុម Real Madrid បានផ្តួលក្រុម Girona ក្នុងលទ្ធផល 6-3 ដើម្បីឡើងទៅឈរលេខ3 បើទោះបីនៅតែដេញតាមពីក្រោយ Barcelona 15ពិន្ទុក៏ដោយ៕
ប្រភពពី៖ Sky Sports
March 19, 2018
6 ចំណុចនៃគុណប្រយោន៍ទឹកកក ក្នុងការរក្សាសម្រស់
អ្នកប្រហែលជាធ្លាប់ដឹងហើយថា ទឹកកក មានគុណប្រយោជន៍ជាច្រើនរួមមានដូចជា ក្លាសេបន្លែ សាច់ និងគ្រឿងទេស ជួយបង្កើតរសជាតិរបស់ភេសជ្ជៈជាដើម។ អ្នកខ្លះទៀតបានយកទឹកកកទៅស្អំពោះ ស្អំដៃជើង ដើម្បីជួយរំលាយគ្រាប់ឈាមកកបានផងដែរ។
ក្រៅពីនេះតើអ្នកមានធ្លាប់ប្រើដុំទឹកកកដាក់នៅលើផ្ទៃមុខរបស់អ្នកដែរឬទេ? ប្រសិនបើអ្នកឆ្ងល់ថា ហេតុអី្វចាំបាច់ធ្វើដូចនេះនោះ អ្នកត្រូវតែធ្វើការស្វែងយល់នូវអត្ថប្រយោជន៍របស់ដុំទឹកកកចំពោះសម្រស់ហើយ ព្រោះដុំទឹកកកអាចប្រើសម្រាប់ជួយដល់ការលើកសម្រស់បានជាច្រើនយ៉ាង។ ពេលនេះ ទស្សនាវដ្តី ឡារ៉ែន សូមជម្រាបជូនពីការថែរក្សាសម្រស់ដោយប្រើដុំ ទឹកកកដូចខាងក្រោមនេះ។
1/ សម្រួលលំហូវិលនៃចរន្ដឈាមរត់
ប្រសិនបើអ្នកយកដុំទឹកកកមកត្រដុសនៅលើផ្ទៃមុខ នោះវានឹងអាចបង្កើនដល់ចរន្តឈាមរត់របស់អ្នកឱ្យដំណើរការល្អ។ ជាលទ្ធផលនោះ គឺវាមានប្រសិទ្ធភាពក្នុងការបង្ការដល់សញ្ញានៃភាពចាស់មុនវ័យ។ អ្នកអាចយកដុំទឹកកកមកជូត និងត្រដុសថ្នមៗនៅលើផ្ទៃមុខរបស់អ្នកក្នុងយៈពេល1នាទី នោះវានឹងធ្វើឱ្យផ្ទៃ មុខរបស់អ្នកភ្លឺថ្លាតាមបែបធម្មជាតិជាមិនខានឡើយ។ អ្នកអាចធ្វើដូចនេះឱ្យបាន2ដងក្នុងមួយសប្តាហ៍។
2/ បំបាត់មុននៅលើផ្ទៃមុខ
ការយកដុំទឹកកកមកត្រដុសជូតថ្នមៗនៅលើផ្ទៃមុខនៃតំបន់ដែលត្រូវបានរងគ្រោះដោយសារការកើតមុន គឺវាអាចជួយកាត់បន្ថយបាននូវស្ថានភាពអាក្រក់របស់មុន។ អ្នកគួរអនុវត្តតាមវិធីនេះឱ្យបានជាបន្តបន្ទាប់ទើបអាចផ្តល់នូវផលិតផលដ៏ល្អដល់ផ្ទៃមុខរបស់អ្នក។ ចូរយកដុំទឹកកកមកត្រដុសនៅលើផ្ទៃមុខរបស់អ្នកឱ្យបាន1 ឬ2នាទី។ ប្រសិនបើនៅលើផ្ទៃមុខរបស់អ្នកត្រង់កន្លែងណាដែលហាក់មានសភាពស្ពឹក នោះអ្នកត្រូវសម្រាក1នាទីសិន រួចសឹមចាប់ផ្តើមធ្វើវាម្តងទៀត។
ការធ្វើបែបនេះ គឺអាចជួយកម្ចាត់មុនក្នុងកម្រិតស្រាលបាន ដោយប្រើពេលត្រឹមតែរយៈពេល2ថ្ងៃប៉ុណ្ណោះ ប៉ុន្តែអ្នកត្រូវប្រាកដចិត្តថា ស្បែករបស់អ្នក គឺអាចទទួលយកនូវភាពត្រជាក់បែបនេះបាន មុនពេលដែលអ្នកសម្រេចជ្រើសរើសអនុវត្តតាមវិធីនេះ ចៀសវាងមានបញ្ហាចំពោះស្បែកមុខរបស់អ្នក។
3/ ព្យាបាលការរលាកដោយសារកម្ដៅថ្ងៃ
ដុំទឹកកកអាចជួយសម្រាលដល់ស្ថានភាពនៃការរលាកនឹងកម្ដៅថ្ងៃ។ ដាក់ដុំទឹកកក2 ឬ3ដុំនៅក្នុងក្រណាត់ និងយកវាមកជូតនៅតំបន់ដែលកំពុងមានបញ្ហា ហើយសូមធ្វើបែបនេះឱ្យបាន 2ទៅ 3ដង។ វាអាចជួយសម្រាលដល់ការរមាស់ដែលបណ្តាលមកពីស្ថានភាពរលាកដោយកម្តៅថ្ងៃ។
4/ លុបលាងជាតិកង្វក់នៅលើស្បែកមុខ
អ្នកមិនចាំបាច់មានការភ្ញាក់ផ្អើលនោះទេ នៅពេលអ្នកបានឮដូចនេះ។ ដុំទឹកកក ប្រសិនបើត្រូវបានគេប្រើ វាមកត្រដុសនៅលើផ្ទៃមុខ មុនពេលអ្នកចាប់ផ្តើមលាបគ្រឿងសម្អាង គឺអាចជួយឱ្យគ្រឿងសម្អាងជាប់បានយូរ។
5/ ព្យាបាលការរលាក និងហើមភ្នែក
តើអ្នកធ្លាប់រងគ្រោះពីស្ថានភាពនៃអាការហើមប៉ោងនៅលើត្របកភ្នែក ឬរលាក និងមានសរសៃក្រហមនៅក្នុងភ្នែកដែរឬទេ? ដាក់ដុំទឹកកកមួយចំនួននៅក្នុងក្រណាត់ទន់មួយ រួចដាក់វានៅក្រោមភ្នែករបស់អ្នក។ វិធីនេះគឺអាចជួយសម្រាលនូវភាពហើមប៉ោងបាន។ ដុំទឹកកក ក៏អាចជួយសម្រាលដល់ភាពនឿយហត់របស់គ្រាប់ភ្នែក ហើយវាក៏ត្រូវបានគេប្រើសម្រាប់បញ្ហារោគសញ្ញានៃការស្ងួតគ្រាប់ភ្នែកបានផងដែរ។
6/ ធ្វើម៉ាសបិទមុខ
តើអ្នកមានធ្លាប់ប្រើម៉ាសកកត្រជាក់បិតមុខដែរឬទេ? ចូរលាយទឹកត្រសក់ និងទឹកផ្កាកូលាប។ បន្ទាប់មកដាក់វាក្លាសេឱ្យកក រួចយកវាចេញមកក្រៅ និងដាក់វាស្អំនៅលើផ្ទៃមុខរបស់អ្នក។ ម៉ាសកកត្រជាក់នេះ អាចជួយកាត់បន្ថយនូវស្នាមជាំ និងស្នាមជ្រាវ-ជ្រួញនៅលើស្បែកមុខរបស់អ្នកបាន។ ហើយវាក៏អាចជួយធ្វើឱ្យស្បែកមុខរបស់អ្នកស្រស់ថ្លាជាងមុនតាមបែបធម្មជាតិដែរ៕
March 19, 2018
បងស្រី ដេននី ក្វាន់ មានទឹកចិត្តសប្បុរសធម៌យកអំណោចទៅជូនក្មេងកំព្រា និងជនពិកា
តាមរយៈបណ្ដាញទំនាក់ទំនងសង្គមហ្វេសប៊ុករបស់បងស្រីអ្នកនាង ដេននី ក្វាន់ គឺអ្នកនាង ចោម ចាន់ នៅពេលថ្មីៗនេះ បានបង្ហោះរូបភាពជាច្រើនសន្លឹក ដែលស្ដែងឱ្យដឹងថា អ្នកនាង និងក្រុមគ្រួសារបានត្រៀមយកអំណោយបន្ដិចបន្ដួចដែលមានរួម អង្ករ ទឹកស៊ីអ៊ីវ ត្រីខកំប៉ុង មី និងប៊ីចេង ទៅចែកជូនបងប្អូនជនពិកា ក្មេងកំព្រា និងចាស់ជរាមានជីវភាពខ្វះខាតនៅក្នុងខេត្តកំពង់ធំ ដែលទឹកចិត្តសប្បុរសធម៌នេះ ធ្វើឱ្យមហាជនអ្នកគាំទ្រអ្នកនាង ស្ងើចសរសើរយ៉ាងខ្លាំង។
អ្នកនាង ចោម ចាន់ បានបញ្ជាក់នៅលើហ្វេសប៊ុកផ្ទាល់ខ្លួនថា « ត្រៀមហើយៗសម្រាប់យកទៅជូន លោកតា លោកយាយ ព្រមទាំងក្មេងកំព្រា និងជនពិកាដែរមានជីវភាព ទីទាល់ក្រចំនួន30គ្រួសារនៅខេត្តកំពង់ធំ។ នេះជាថវិកា នាងខ្ញុំផ្ទាល់ខ្លួន នរណាខ្លះចង់ចូលរួម?? (ចង់ប្រាប់ថាអំពើល្អគឺមិនសាបសូន្យឡើយ ) »។ សូមជម្រាបបន្ថែមថា កន្លងមក អ្ននាង ដេននី ក្វាន់ និងអ្នកនាងផ្ទាល់ ក៏បានយកអំណោយជាច្រើនច្រើនសន្លឹកសន្លាប់ ទៅចែកជូនបងប្អូនប្រជាពលរដ្ឋខ្មែរ និងកុមារតូចៗ រួមមានសម្ភារសិក្សា និងកង់ និងថវិកាមួយចំនួនជូនដល់ប្អូនៗកុមារទីទាល់ក្រនៅក្នុងឃុំអង្គរ ស្រុកមេសាង ខេត្តព្រៃវែងផងដែរ៕
March 19, 2018
ចង់បានស្បែកស តឹងណែនល្អត្រូវចំណាយពេលបន្តិច!
នាសម័យបច្ចុប្បន្ន ចង់ឱ្យស្បែកសស្អាតតឹងណែនមិនពិបាកនោះទេ ព្រោះថាមានផលិតផលថែរក្សាសម្រស់ដែលមានគុណភាពល្អច្រើនណាស់ ដែលតម្រៀបគ្នាចាំឱ្យអ្នកប្រើប្រាស់ជ្រើសរើសទៅតាមប្រភេទស្បែករបស់ខ្លួន។ ដោយសារតែចំណូលចិត្តរបស់មនុស្សយើងមិនដូចគ្នា ហេតុនេះហើយបានជាវិធីនៃការថែរក្សា និងផ្តល់នូវភាពស្រស់ស្អាតឱ្យខ្លួនឯងមានភាពខុសប្លែកពីគ្នា។
សម្រាប់អ្នកដែលមិនចង់ចំណាយប្រាក់ច្រើនទៅលើការទិញផលិតផល ឬបារម្ភខ្លាចថា ផលិតផលដែលអ្នកប្រើអាចមិនត្រូវជាមួយប្រភេទស្បែករបស់ខ្លួននោះ ទើបធ្វើឱ្យពួកគេសុខចិត្តងាកមកថែរក្សាសម្រស់របស់ពួកគេតាមបែបសាមញ្ញវិញ បើទោះជាពួកគេបានដឹងយ៉ាងច្បាស់ហើយថា ការថែរក្សាស្បែកដោយវិធីនេះ គឺត្រូវចំណាយពេលយូរជាងការប្រើផលិតផលក៏ដោយ។ ចំពោះអ្នកដែលចាប់អារម្មណ៍ជាមួយនឹងវិធីថែរក្សាសម្រស់តាមបែបធម្មជាតិនោះ សូមតាមដានជាមួយនឹងគន្លឹះសំខាន់ៗដូចខាងក្រោម។
ស្បែកតឹងណែន
សម្រាប់អ្នកដែលនិយមចង់រក្សាស្បែកឱ្យមានភាពតឹងណែនតាមបែបធម្មជាតិ គេនិយមប្រើសារធាតុផ្សំពីធម្មជាតិមួយចំនួនដូចជា ផ្នែកពណ៌សនៃស៊ុត លាយជាមួយនឹងទឹកក្រូចឆ្មាររួចលាបនៅលើផ្ទៃមុខ លុះដល់ពេលស្ងួត គេប្រើទឹកក្តៅតិចៗលាងសម្អាតល្បាយនោះចេញរួចសម្អាតម្តងទៀតជាមួយទឹកត្រជាក់។ វិធីមួយទៀតដែលអាចជួយឱ្យស្បែកតឹងណែនល្អនោះគឺ ម៉ាសត្រសក់ និងផ្លែប៊័រ។ សារធាតុផ្សំដែលគេយកមកប្រើមានដូចជា ស៊ុតស ម្សៅទឹកដោះគោ ផ្លែប៊័រ និងផ្លែត្រសក់។
យកគ្រឿងផ្សំទាំងអស់ដាក់ចូលគ្នាកិនឱ្យម៉ដ្ឋរួចយកទៅទុកក្នុងទូទឹកកកឱ្យត្រជាក់រយៈពេលប្រមាណជា1ម៉ោង បន្ទាប់មកសឹមលាបល្បាយនោះនៅលើផ្ទៃមុខ និងក។ រួចទុកចោល30នាទី ហើយសឹមលាងវាចេញដោយទឹកក្តៅឧណ្ហៗ បន្ទាប់មកសម្អាតវាឱ្យស្អាតម្តងទៀតជាមួយទឹកត្រជាក់។
ស្បែកសស្អាត
ដោយសារតែក្រូចឆ្មារត្រូវបានប្រើប្រាស់ជាច្រើនឆ្នាំមកហើយក្នុងការជួយឱ្យស្បែក-សភ្លឺថ្លា ព្រោះវាមានជាតិអាស៊ីតដែលអាចជួយប្រែពណ៌ស្បែកពីខ្មៅមកជាសបាន។ ប៉ុន្តែដោយសារថាក្រូចឆ្មារតែម្យ៉ាងអាចបណ្តាលឱ្យស្បែករមាស់ ហេតុនេះហើយបានជាគេត្រូវការជំនួយពីទឹក ដើម្បីកាត់បន្ថយភាពកាត់របស់វា។ ទឹក និងទឹកក្រូចឆ្មារត្រូវប្រើក្នុងល្បាយស្មើគ្នា រួចយកអេប៉ុងទន់ៗមកជ្រលក់ក្នុងទឹកល្បាយនោះ ហើយលាបនៅលើស្បែករបស់អ្នក។
ទុកចោល15នាទី រួចសឹមលាងសម្អាតចេញដោយទឹកក្តៅឧណ្ហ។ ចំណែកអ្នកខ្លះ បានជ្រើសរើសម៉ាសប៉េងប៉ោះ ព្រោះគេជឿថាវាមានប្រសិទ្ធភាពក្នុងការបន្ថែមភាពសស្អាតដល់ស្បែក និងជួយការពារស្បែកពីកាំរស្មីព្រះអាទិត្យផងដែរ។ មិនមានអ្វីច្រើននោះទេ គេគ្រាន់តែយកប៉េងប៉ោះទុំកិនលាយជាមួយម្សៅ Baking Soda ទឹកឃ្មុំ រួចលាប និងត្រដុសវាថ្នមៗនៅលើផ្ទៃមុខ និងនៅបរិវេណករបស់អ្នកប្រហែល5នាទី រួចលាងសម្អាតចេញជាការស្រេច។
បើទោះជាមនុស្សមួយភាគនិយមថែរក្សាស្បែកតាមបែបធម្មជាតិក៏ដោយ ប៉ុន្តែពួកគេក៏មិនដែលបោះបង់ចោលផលិតផលថែរក្សាស្បែកទាំងស្រុងនោះដែរ។ ឡេការពារស្បែកពីកម្តៅថ្ងៃ និងក្រែមបន្ថែមសំណើមជាដើម នៅតែដើរតួនាទីយ៉ាងសំខាន់ក្នុងការថែរក្សាសម្រស់ស្បែករបស់ពួកគេ។ ក្រៅពីនេះពួកគេក៏នៅតែរក្សាទម្លាប់ល្អៗមួយចំនួនឱ្យបានយ៉ាងខ្ជាប់ខ្ជួនដូចជា ទទួលទានទឹក បន្លែឆៅ ផ្លែឈើស្រស់ហាត់ប្រាណ ហាត់យ៉ូហ្គា រក្សាទម្ងន់ ម៉ាស្សា ចំហុយស្បែក ការពារស្បែកពីការបំផ្លាញផ្សេងៗជាប់ជានិច្ច ដើម្បីឱ្យស្បែកនៅតែមានសភាពសស្អាតរលោងភ្លឺថ្លា៕
March 19, 2018
« កង្កែបពាក់មួក » បទថ្មី ពេជ្រ សោភា ច្នៃពីបទយីកេនិងចម្រៀងកុមារ
នៅពេលថ្មីនេះ នៅលើគណនីយូធូបរបស់ផលិតកម្មរស្មីហង្សមាស បានបង្ហោះបទចម្រៀងថ្មីរបស់អ្នកនាង ពេជ្រ សោភា ដែលមានចំណងជើងថា « កង្កែបពាក់មួក » ដែលស្ដែងឱ្យគេបានដឹងថា បទចម្រៀងថ្មីសម្រាប់អបអរសាទរបុណ្យចូលឆ្នាំប្រពៃណីខ្មែរមួយបទនេះ មានការច្នៃប្រឌិតបទភ្លេងពីរបញ្ចូលគ្នារវាងបទយីកេ និងបទចម្រៀងកុមារ។ បទមានលំនាំយីកេខ្មែរគឺមានចំណងជើងថា « បទ កាទ្រឹមបហេរ » និងបទកុមារមានចំណងជើងថា « អក្សរ ក កុក » ដែលបទទាំងពីរនេះមានដាក់បញ្ចូលនៅក្នុងកម្មវិធីសិក្សាថ្នាក់បឋមសិក្សា ហើយអ្នកនាងក៏បានយកមកច្នៃបញ្ជូលគ្នា បង្កើតបានជាបទថ្មីនោះឡើង។
សូមជម្រាបបន្ថែមថា កាលពីឆ្នាំមុនៗកន្លងទៅ តារាចម្រៀងស្រី ពេជ្រ សោភា ត្រូវបានក្រសួងវប្បធម៌ និងវិចិត្រសិល្បៈ បានដាក់បម្រាមមិនឱ្យចាក់បទចម្រៀងរបស់អ្នកនាងជាច្រើនបទ ដែលសុទ្ធសឹងជាបទមានជាប់កម្មសិទ្ធបញ្ញា ដែលនៅក្នុងនោះរួមមានបទ « ស្អាតជានិច្ច » និងបទ « កាច់ចង្កេះ » ដែលមានជាប់កម្មសិទ្ធបញ្ញាបទដើម « តាក់ទីងណឹងៗ » ។ តែយ៉ាងណាមិញ បទថ្មី « កង្កែបពាក់មួក » ក៏កំពុងតែទទួលបានការគាំទ្រខ្លាំងដែរ រហូតមកទល់ពេលនេះ មានអ្នកគាំទ្រចូលទស្សនាជាច្រើនពាន់នាក់ហើយ។ ដើម្បីឱ្យដឹងកាន់តែច្បាស់ថា « កង្កែបពាក់មួក » មានភាពកំប្លុកកំប្លែងសើចសប្បាយ និងរួមបញ្ជូលភ្លេងខ្មែរពីរោះរណ្ដំយ៉ាងណានោះ សូមស្ដាប់ និងទស្សនាវីដេអូខាងក្រោមនេះ៖

March 19, 2018
យក់ ដួងតារា គ្មានទីផ្សារសិល្បៈរហូតដល់ថ្នាក់បង្ហោះសារបែបនេះ….
គួរឱ្យសង្រែងបំផុតដែល តារាប្រុស យក់ ដួងតារា ជាតារាចម្រៀងបែបចម្រៀងប្រពៃណី កន្រ្តឹម មនោសញ្ចេតនា ប្រចាំផលិតកម្មរស្មីហង្សមាស ត្រូវបានគេសង្កេតឃើញថា លោកពុំសូវជាមានទីផ្សារសិល្បៈដូចជាតារាចម្រៀងសម័យ ឬតារាជំនាន់ថ្មីនោះទេ ពោលគឺ លោកមិនសូវមានវត្តមានអញ្ចើញឱ្យច្រៀងតាមរយៈការប្រគំតន្រ្តីធំៗឡើយ។ បទចម្រៀងរបស់លោកទៀតសោទ ក៏មានសូវជាមានចេញគគ្រឹកគគ្រែងភ្លូកទឹកភ្លូកដីផងដែរ គេរមែងឃើញមានតែនៅក្នុងអំឡុងពេលចូលឆ្នាំតែប៉ុណ្ណោះ ឬរដូវបុណ្យធំៗជាដើម ។ ថ្មីៗនេះ នៅលើបណ្ដាញទំនាក់ទំនងសង្គមហ្វេសប៊ុករបស់លោក បានបង្ហោះសាររៀបរាប់ពីអារម្មណ៍ពិត និងជីវិតនៃការតស៊ូនៅក្នុងវីថីសិល្បៈដ៏ជូរចត់នេះ ។
អតីតបេក្ខភាពប្រឡងកម្មវិធីកំពូលតារាចម្រៀង I am a singer Cambodia រូបនេះ បានរៀបរាប់ថា « ជីវិតពិតជាប្រែប្រួលទៅតាមពេលវេលាមែន! ពេលនេះខ្ញុំធ្នាក់ខ្លួនដើរលេងល្ខោនមួយយប់ដប់ពីរមុឺនរៀល ព្រោះតែមិនសូវមានឱកាសដូចក្មេងៗដែលទើបនឹងឡើងមកក្រោយៗ ម្យា៉ងឯងចាស់ហើយ ក្មេងៗគេឡើងមកជាន់ឯងលិចបាត់ងើបលែងរួច ព្រោះក្មេងៗគេចេះច្រើនជំនាញ ដូចជាខាងយុវវ័យក៏គេចេះច្រៀង ខាងបុរាណក៏គេចេះច្រៀង ខាងកន្ទ្រឹមក៏គេចេះច្រៀង ដូច្នេះសេដ្ឋកិច្ចទីផ្សារផ្នែកវិស័យលើសិល្បះចំរៀងមួយនេះត្រូវបានក្មេងៗទាញស្រូបយកស្ទើរតែទាំងស្រុង »។
លោកបានបញ្ជាក់ទាំងអារម្មណ៍ក្ដុកក្ដួលទៀតថា « រីឯអ្នកចំរៀងចាស់ៗវិញ ខ្លះនៅមានមុខ ខ្លះក៏បាត់មុខ ខ្លះក៏ទៅដាំជី ដាំស្លឹកគ្រៃ ចិញ្ចឹមមាន់ចិញ្ចឹមទា ព្រោះតែបាត់បង់ឱកាស ចំណេះដឹងនឹងទេពកោសល្យដែលមាន តិទៀតនឹងត្រូវស្លាប់ទៅតាមម្ចាស់ដែរហើយ ព្រោះតែមិនសូវមានអ្នកអើពើនិងផ្តល់តម្លៃអោយ។ (បើដើរទៅមុខ ក៏គួរតែងាកមើលក្រោយខ្លះផង) »៕
March 19, 2018
ក្រុមហ៊ុន 5 បោះទុនវិនិយោគដំបូងគេនៅតំបន់សេដ្ឋកិច្ចពិសេសក្រុងប៉ោយប៉ែត
បន្ទាប់ពីរដ្ឋាភិបាលប្រកាសបើកតំបន់សេដ្ឋកិច្ចពិសេស អូរនាង ក្រុងប៉ោយប៉ែតរួចមក គេសង្កេតឃើញមានក្រុមហ៊ុនចំនួន 5 បានចាប់ផ្តើមបោះទុនវិនិយោគជាផ្លូវការហើយ ដោយសារតែទីតាំងនោះត្រូវបានគេមើលឃើញថា មានភាពងាយស្រួលក្នុងការដឹកជញ្ជូនទំនិញឆ្លងកាត់ព្រំដែន។
លោក ឡុង សុភ័ណ្ឌ មន្ត្រីតំណាងរដ្ឋមន្ត្រីក្រសួងពាណិជ្ជកម្ម ប្រចាំរដ្ឋបាលតំបន់សេដ្ឋកិច្ចពិសេស អូរនាងប៉ោយប៉ែត បានបញ្ជាក់ថា បច្ចុប្បន្ននៅក្នុងតំបន់សេដ្ឋកិច្ចពិសេសអូរនាង ប៉ោយប៉ែត មានក្រុមហ៊ុនរោងចក្រចំនួន 5 ហើយដែលបានចុះបញ្ជីពាណិជ្ជកម្ម និងទទួលបានគោលការណ៍អនុញ្ញាតពីក្រុមប្រឹក្សាអភិវឌ្ឍន៍កម្ពុជា(CDC) ដើម្បីវិនិយោគ និងដំណើរការផលិតកម្ម។
ក្រុមហ៊ុនទាំងនោះរួមមាន៖
1.រោងចក្រ Hi -Tech Apparel (Cambodia) Co,Ltd ផលិតសម្លៀកបំពាក់ ម៉ាក NIKE មានកម្មករសរុបចំនួន 2,175នាក់។
2.រោងចក្រ ML Intimate (Cambodia) Co,Ltd ផលិតសម្លៀកបំពាក់ក្នុង(ឈុតក្នុង)របស់ស្ត្រីមានកម្មករសរុបចំនួន 931នាក់ ស្រី 800នាក់។
3.រោងចក្រ CAMPACK (Cambodia) Co,
Ltd ផលិតប្រអប់ដាក់គ្រឿងអលង្ការ មានកម្មករសរុប 164នាក់ ស្រី 128នាក់។
4.រោងចក្រ Simmer Inter Co,Ltd ជារោងចក្រផលិតគ្រឿងអលង្ការ(បានចុះកិច្ចសន្យាសាងសង់រួចហើយ )
5.រោងចក្រ Wire Form Precision Part Co,Ltd កំពុងដំណើរការសាងសង់ និងផលិតផលិតផលអេឡិចត្រូនិកដែលមានទិសដៅនាំចេញ ទៅកាន់ទីផ្សារសហគមន៍អឺរ៉ុប សហរដ្ឋអាមេរិក ចិន កូរ៉េ ឥណ្ឌា អូស្ត្រាលី ញីវហ្ស៊ីលែន និងទីផ្សារអាស៊ានមួយចំនួន។
លោក ឡុង សុភ័ណ្ឌ បានបញ្ជាក់បន្ថែមថា ដោយមានការបញ្ជាទិញមានចំនួនខ្ពស់ រោងចក្រ Hi-Tech Apparel (Cambodia) បាន និងកំពុងសាងសង់ និងបំពាក់ខ្សែចង្វាក់ផលិតកម្មថែមមួយអគារដូចគ្នាទៀត ហើយនៅពេលខាងមុខឆាប់ៗនេះ យើងនឹងបានទទួលរោងចក្រវិនិយោគរបស់ជប៉ុនមួយបន្ថែមទៀតឈ្មោះ Hiro-Tech Product Cambodia ផ្នែកផលិតគ្រឿងផ្គុំខ្សែភ្លើងរថយន្ត។
ថ្លែងក្នុងពិធីចុះពិនិត្យស្វែងយល់ជាក់ស្តែងនៅតំបន់សេដ្ឋកិច្ចពិសេសអូរនាង ឯកឧត្តម ហេង សុខគង់រដ្ឋលេខាធិការក្រសួងឧស្សាហកម្ម និងសិប្បកម្មបានមានប្រសាសន៍ថា ការមកទស្សនកិច្ចផ្ទាល់ដល់ទីតាំងតំបន់សេដ្ឋកិច្ចពិសេស អូរនាងប៉ោយប៉ែតនេះ ដោយសារតែតំបន់សេដ្ឋកិច្ចពិសេសនៅព្រំដែនប៉ោយប៉ែត ខេត្តបន្ទាយមានជ័យនេះកំពុងមានសក្តានុពលខ្លាំងក្នុងការទាក់ទាញការវិនិយោគបន្ថែមពីវិនិយោគិនបរទេស ដូចជាថៃ ចិន និងជប៉ុន ជាដើម។ ពីព្រោះការផលិតនៅកម្ពុជាត្រូវបាននាំចេញទៅកាន់ទីផ្សារធំៗលើពិភពលោកដោយមិនជាប់ពន្ធ និងកូតា ហើយក៏ជាការជំរុញការអនុវត្តគោលនយោបាយអភិវឌ្ឍន៍វិស័យឧស្សាហកម្ម 2015-2025 របស់កម្ពុជាឱ្យសម្រេចបានលទ្ធផលល្អប្រសើរដែរ។
ក្នុងគោលដៅលើកកម្ពស់ជីវភាពកម្មករ ឯកឧត្តមហេង សុខគង់ បានណែនាំដល់ម្ចាស់រោងចក្រក្នុងតំបន់សេដ្ឋកិច្ចពិសេសនេះ សូមបន្តយកចិត្តទុកដាក់ការពារសិទ្ធិការងារ និងសិទ្ធិរបស់កម្មករ លើកកម្ពស់បរិយាកាសល្អប្រសើរក្នុងរោងចក្រ ធ្វើអាងប្រព្រឹត្តិកម្មបង្ហូរកាកសំណល់ ឱ្យស្របតាមបទដ្ឋានបច្ចេកទេស និងបង្កើតសហជីពស្របតាមគោលការណ៍ច្បាប់ជាដើមផង៕
March 19, 2018
ពេជ្រ សោភា មិនខ្លាចពាក្យរិះគន់
តាមរយៈបណ្ដាញទំនាក់ទំនងសង្គមហ្វេសប៊ុករបស់តារាស្រីល្បីឈ្មោះ ពេជ្រ សោភា នៅពេលថ្មីនេះ បានបង្ហោះសារចាក់ដោតអារម្មណ៍យ៉ាងខ្លាំង ដែលស្ដែងឱ្យគេឃើញថា អ្នកនាងជាមនុស្សម្នាក់មានទំនួលខុសត្រូវ មិនខ្លាចចំពោះពាក្យរិះគន់ទាំងអស់ ព្រោះអ្នកនាងអះអាងថា « ម៉េចគិតថាមនុស្សម្នាក់ៗធ្វើត្រូវគ្រប់រឿងមែន? »។
យ៉ាងណាមិញ ការបង្ហោះសារមួយនេះបានធ្វើឱ្យមហាជនលោកងឿងឆ្ងល់ថា នេះអាចជាការតបត ឬប្រតិកម្មចំពោះមតិរិះគន់នូវចង្វាក់បែកស្លុយឬយ៉ាងណា? ព្រោះថា អ្នកនាងក៏មានចំណែកមួយនៃការផលិតបទបែបចង្វាក់ស្លុយ ហើយលាយលំចង្វាក់ភ្លេងប្រពៃណីខ្មែរផងដែរ។ ក្នុងសារនោះបានបញ្ជាក់ថា « ធ្វើជាមនុស្សហេតុអីត្រូវខ្លាចពាក្យរិះគន់ ។ ម៉េចគិតថាមនុស្សម្នាក់ៗធ្វើត្រូវគ្រប់រឿងមែន? ខ្ញុំខុសគេ បើគេថាយើងត្រូវមើលខ្លួនឯង កន្លែងណាមិនល្អកែទៅ ត្រូវទេ?»។
គួរបញ្ជាក់ផងដែរថា សារព័ត៌មានឡារ៉ែន នៅពុំអាចទាក់ទងតារាស្រីរូបនេះ សុំការបញ្ជាក់បន្ថែមអំពីសារចាក់ដោតអារម្មណ៍មួយបាននៅឡើយទេ។ យ៉ាងណាមិញ បទចម្រៀង « បីឆ្កែចូលរាំ » របស់អ្នកនាង ពេជ្រ សោភា កំពុងតែទទួលបានប្រជាប្រិយភាពខ្លាំងពិតមែន មកទល់ពេលនេះ មានអ្នកចូលទស្សនារាល់លាននាក់ហើយ៕
March 17, 2018