សង្គម និងសេដ្ឋកិច្ច - La Reine Media

ក្រសួងសាធារណការ តាំងពិព័រណ៍ លក់ លក់ដេញថ្លៃផ្លាកលេខយានយន្ត និងប្រគំតន្ត្រីក្នុងពីរថ្ងៃខាងមុខ

ក្រសួងសាធារណការ និងដឹកជញ្ជូន នឹងរៀបចំកម្មវិធី «អបអរសាទរ ខួប 3 ឆ្នាំ លេខពិសេសផ្ទាល់ខ្លួន» អមជាមួយនឹង ការតាំងពិព័រណ៍ផ្លាកលេខ និងរថយន្ត, ការដាក់តាំងលក់ និងដេញថ្លៃលេខពិសេសនៅក្នុងសប្ដាហ៍នេះ។

ថ្ងៃអង្គារ និងថ្ងៃពុធសប្ដាហ៍នេះ ក្រសួងសាធារណការ នឹងមានកម្មវិធី «អបអរសាទរ ខួប 3 ឆ្នាំ លេខពិសេសផ្ទាល់ខ្លួន» ដោយអមជាមួយនឹងការតាំងពិព័រណ៍ផ្លាកលេខ និងរថយន្ត, ការដាក់តាំងលក់ និងដេញថ្លៃ លេខពិសេស ដើម្បីកៀរគរថវិកាជួយដល់មូលនិធិគន្ធបុប្ផា និងមន្ទីរពេទ្យកុមារជាតិ។ ក្នុងព្រឹត្តិការណ៍ខាងលើនេះ ឯកឧត្តមទេសរដ្ឋមន្ត្រី ស៊ុន ចាន់ថុល នឹងផ្តល់កិត្តិយសដ៏ខ្ពង់ខ្ពស់ អញ្ជើញជាអធិបតីក្នុងពិធីបើកសម្ពោធនៅថ្ងៃទី 07 មីនា។

យោងតាមក្រសួងសាធារណការ នៅល្ងាចថ្ងៃទីពីរ ព្រឹត្តិការណ៍ខាងលើនឹងមានការប្រគំតន្ត្រី ដោយមានការចូលរួមពីសំណាក់សិល្បករ សិល្បការិនីល្បីៗ ក្នុងន័យបញ្ជ្រាបការយល់ដឹងអំពី សុវត្ថិភាពចរាចរណ៍ផ្លូវគោក ទៅកាន់សាធារណជន។

ក្រសួងសាធារណការ បញ្ជាក់ថា អ្នកចូលរួមព្រឹត្តិការណ៍ដែលនឹងធ្វើនៅលើសួនច្បារវត្តបទុមវតី រាជធានីភ្នំពេញ ចាប់ពីថ្ងៃទី 07 ដល់ 08 មីនា 2023 (ចាប់ពីម៉ោង 8 ព្រឹកដល់ម៉ោង 9 យប់) នឹងមានឱកាសក្នុងការទទួលបានរង្វាន់អនុស្សាវរីយ៍ ដោយការលេងល្បែងកំសាន្តនៅតាមស្តង់នានាផងដែរ៕

March 6, 2023

ផ្លូវការ៖ Kylian Mbappe បញ្ជាក់ពីគោលដៅបន្ទាប់សម្រាប់អនាគត

នៅក្នុងពិធីលើកតម្កើងកិត្តិយសនៃការក្លាយជាកីឡាករដែលរកគ្រាប់បាល់បានច្រើនគ្រាប់ជាងគេសម្រាប់ PSG កំពូលតារាបាល់ទាត់បារាំង Kylian Mbappe បានបញ្ចេញប្រតិកម្មទាក់ទិននឹងពាក្យចចាមអារ៉ាមស្ដីពីគោលដៅអនាគតរបស់ខ្លួន។

កាលពីថ្ងៃទី 05 មីនា (ពេលវេលានៅកម្ពុជា) Kylian Mbappe បានក្លាយជាកីឡាករដែលរកបានគ្រាប់បាល់ច្រើនជាងគេក្នុងប្រវត្តិសាស្ត្ររបស់ PSG បន្ទាប់ពីបានជួយឱ្យក្លឹបនេះឈ្នះ Nantes 4-2។ ដើម្បីលើកតម្កើងកិត្តិយសរបស់ Mbappe ក្លឹប PSG ក៏បានធ្វើពិធីមួយដ៏ធំ។

នៅក្នុងពិធីខាងលើ Mbappe បានបញ្ចេញប្រតិកម្មចំពោះពាក្យចចាមអារ៉ាមកន្លងមកដែលនិយាយថា កីឡាករកើតឆ្នាំ 1998 នេះនឹងចាកចេញពីកីឡដ្ឋាន Le Parc des Princes នៅចុងរដូវកាលនេះ ពិសេសនៅក្នុងករណីដែល PSG ត្រូវ Bayern Munich ជម្រុះត្រឹមជើងទីពីរនៃវគ្គ knock-out ខាងមុខ។

«ខ្ញុំមិនគិតថានឹងចាកចេញឡើយ។ ខ្ញុំកំពុងមានសេចក្ដីសុខនៅទីនេះ និងមិនគិតអ្វីផ្សេងក្រៅតែពីការទទួលយកនូវអ្វីដែលខ្លួនកំពុងមាននៅ PSG» Mbappe ថ្លែងដូច្នេះ។

Mbappe ថា ថ្ងៃណាមួយគាត់ប្រាកដជាដណ្ដើមបានគ្រាប់បាល់មាស

Mbappe បន្ថែមថា «ពិតជាមានមោទកភាពនៅពេលបានប្រកួតនៅទីនេះ ចារក្នុងប្រវត្តិសាស្ត្រសម្រាប់រដ្ឋធានីប៉ារីសរបស់ខ្ញុំ ទឹកដីបារាំងរបស់ខ្ញុំ។ ប្រការនេះពិតជាល្អប្រសើរ ពិសេសនៅពេលខ្ញុំបានក្លាយជាផ្នែកមួយរបស់ក្លឹបនេះ»។

ក្រៅពីនេះ Kylian Mbappe ក៏បាននិយាយអំពីមហិច្ឆតារបស់ខ្លួន៖ «ថ្ងៃណាមួយខ្ញុំប្រាកដជាដណ្ដើមបានគ្រាប់បាល់មាស។ នោះគឺជាបេសកកម្មដ៏ធំរបស់ខ្ញុំ»។

ការអះអាងខាងលើរបស់ Mbappe បានធ្វើឱ្យពាក្យចចាមអារ៉ាមទាំងឡាយដែលថា កីឡាកររូបនេះនឹងចាកចេញពីក្លឹប PSG ក្លាយជាអតីតកាល និងអស់ន័យខ្លឹមសារ៕

March 6, 2023

ពីឡុត AI យកឈ្នះលើពីឡុតមនុស្សក្នុង «សង្គ្រាម» នៅប្រទេសចិន

ក្រុមអ្នកស្រាវជ្រាវក្នុងជួរកងទ័ពចិនបានធ្វើសង្គ្រាមមួយទល់នឹងមួយ រវាងយន្តហោះដ្រូនដែលបញ្ជាដោយបញ្ញាសិប្បនិម្មិត (AI) និងយន្តហោះដែលបញ្ជាដោយមនុស្សនៅក្នុងស្ថានភាពពិត។

ប្រព័ន្ធបញ្ញាសិប្បនិម្មិតបានបង្ហាញប្រសិទ្ធភាពយ៉ាងលេចធ្លោនៅក្នុងសង្គ្រាម និងតែងតែធ្វើឱ្យសត្រូវស្ថិតក្នុងស្ថានភាព «ចាញ់ប្រៀប»។ លទ្ធផលនៃការសាកល្បងនេះត្រូវបានប្រកាសលើទស្សនាវដ្ដី Acta Aeronautica et Astronautica Sinica របស់ប្រទេសចិនកាលពីថ្ងៃទី 27 កុម្ភៈ 2023 មួយខែក្រោយពីកងទ័ពអាម៉េរិកបានឱ្យដឹងថា អ្នកបើកបរយន្តហោះ AI ថ្មីៗនេះបានចូលរួមការសាកល្បងជាច្រើន រួមទាំងការធ្វើសមយុទ្ធលើយន្តហោះចម្បាំង F-16 ផងដែរ។

សង្គ្រាមអាកាសដែលធ្វើតេស្តដោយប្រទេសចិននេះរួមមាន កូនយន្តហោះពីរគ្រឿង ក្នុងនោះមួយគ្រឿងគ្រប់គ្រងដោយពីឡុត AI និងមួយគ្រឿងទៀតបើកបរពីចម្ងាយដោយមនុស្ស។ ពេលសង្គ្រាមផ្ទុះឡើង ពីឡុតពិតផ្លាស់ទីទៅមុខដើម្បីមានប្រៀបជាង និងបាននៅពីលើ។ ប៉ុន្តែ ពីឡុត AI ស្មាតត្រូវគំនិតរបស់សត្រូវ និងទប់ទល់ដោយការហោះតាមយ៉ាងប្រកិតពីក្រោយ។

យន្តហោះដែលបញ្ជាដោយមនុស្ស ហោះដាំក្បាលទៅក្រោមដើម្បីបញ្ឆោតយន្តហោះ AI ហោះតាម ក្នុងបំណងធ្វើឱ្យវាជ្រុលទៅបុកនឹងដី។ ប៉ុន្តែ យន្តហោះ AI ក៏បានផ្លាស់ទីទៅកាន់ទីតាំងពួនស្ទាក់ និងរង់ចាំសត្រូវហោះឡើងខ្ពស់។ ពីឡុតពិតបានសាកល្បងយុទ្ធសាស្ត្រផ្សេងៗគ្នាជាច្រើនដើម្បីបញ្ឆោតនៅក្នុងការដេញតាមគ្នានេះ។ ក្រុមវិស្វករបានផ្អាកការសាកល្បងត្រឹមវិនាទីទី 90 ដោយសារតែពីឡុតពិតមិនអាចគេចផុតពីពីឡុត AI។

គម្រោងខាងលើនេះត្រូវបានដឹកនាំដោយសាស្ត្រាចារ្យ Huang Juntao នៅមជ្ឈមណ្ឌលស្រាវជ្រាវ និងអភិវឌ្ឍបច្ចេកវិទ្យាអាវុធអនាគតរបស់កងទ័ពចិន។

ក្នុងសង្គ្រាមខាងលើ ពីឡុត AI មានប្រៀបជាងច្រើនចំណុច បើធៀបនឹងពីឡុតពិត ពិសេសគឺការគិត និងការសម្រេចចិត្តរបស់ពីឡុត AI មានភាពរហ័ស មិនភ័យខ្លាច និងអាចស្មានត្រូវការវិវិត្តនៃឆាកប្រយុទ្ធ។ ក្រុមអ្នកជំនាញរបស់ចិនមិនបានឱ្យដឹងច្បាស់អំពីពេលវេលា និងទីកន្លែងនៃការសាកល្បងបច្ចេកវិទ្យាខាងលើ ប៉ុន្តែការបញ្ជូនអត្ថបទព័ត៌មានត្រូវបានធ្វើឡើងមុនខែតុលា 2022។

បច្ចេកវិទ្យាខាងលើនេះប្រាកដជានឹងត្រូវបានដាក់បញ្ចូលទៅក្នុងជួរកងទ័ពចិននាពេលខាងមុខ ហើយអនាគត ពីឡុត AI ក៏នឹងមានវត្តមាននៅក្នុងជួរទ័ពអាកាសរបស់ប្រទេសមហាអំណាចនានាលើពិភពលោក៕

March 6, 2023

ស្រីស្អាត Kathryn Newton គឺជាកំពូលវីរនារីជំនាន់បន្ទាប់របស់ Marvel

Kathryn Newton បង្កការចាប់អារម្មណ៍នៅពេលសម្ដែងជាតួអង្គ Cassie Lang ដែលជាកូនស្រីរបស់កំពូលវីរបុរសមនុស្សស្រមោចក្នុងចក្រវាលភាពយន្ត Marvel (Marvel Cinematic Universe)។

Marvel ជ្រើសយក Kathryn Newton មកសម្ដែងជំនួស Emma Fuhrmann ដែលដើរតួជា Cassie ក្នុងភាពយន្តរឿង «Ant-Man and the Wasp: Quantumania»។ ក្រុមហ៊ុន Marvel Entertainment សម្រេចចិត្តជ្រើសយក Kathryn ក៏ព្រោះតែចង់ស្វែងរកតារាសម្ដែងមួយរូបដែលសមស្របសម្រាប់តួអង្គកំពូលវីរនារីរបស់ពួកគេ។ កូនស្រីរបស់មនុស្សស្រមោចត្រូវបានគេរំពឹងថានឹងក្លាយជាម្នាក់ក្នុងចំណោមតួអង្គសំខាន់ៗរបស់យីហោ Marvel Cinematic Universe។

Kathryn Newton គឺជាតារាមួយដួងដែលកំពុងរះនៅ Hollywood។ ស្រីស្អាតដែលកើតឆ្នាំ 1997 ក្នុងត្រកួលធូរធារនៅ Florida រូបនេះ មានម្ដាយជាអ្នកបើកបរយន្តហោះ និងឪពុកជាអ្នកជំនួញ។

Kathryn Newton (ឆ្វេង) សម្ដែងជំនួស Emma Fuhrmann ដែលដើរតួជា Cassie ក្នុងភាពយន្តរឿង «Ant-Man and the Wasp: Quantumania»

Kathryn Newton បានចូលប្រលូកក្នុងវិស័យកម្សាន្តតាំងពីអាយុបួនឆ្នាំ ដោយបង្ហាញវត្តមានក្នុងភាពយន្តទូរទស្សន៍រឿង «All My Children»។ អាយុ 12 ឆ្នាំ Kathryn Newton និងគ្រួសារបានទៅរស់នៅក្នុងទីក្រុង Los Angeles ដើម្បីឱ្យ Kathryn អាចផ្ដោតលើអាជីពអ្នកសម្ដែង។

ឆ្នាំ 2010 នាងធ្លាប់ឈ្នះពានរង្វាន់ចំនួនពីរនៅ Young Artist Awards ដោយបានសម្ដែងក្នុងរឿង «Gary Unmarried»។ ចាប់តាំងពីពេលនោះមក អាជីពរបស់ Kathryn Newton នៅ Hollywood ចេះតែរីកចម្រើនយ៉ាងឆាប់រហ័ស។ នាងបន្តបង្ហាញវត្តមាននៅក្នុងរឿង «Paranormal Activity», «Supernatural», «Big Little Lies», «Three Billboards Outside Ebbing», «Missouri», «Pokemon Detective Pikachu» ឬ «Freaky» ជាដើម។

ភាគច្រើននៃឈុតឆាកសម្ដែងរបស់ Kathryn Newton ទទួលបានការវាយតម្លៃល្អពីក្រុមអ្នកជំនាញ ក៏ដូចជាទស្សនិកជន។ នាពេលខាងមុខ Kathryn Newton ប្រាកដជាធ្វើឱ្យកក្រើកវិស័យភាពយន្តនៅពេលនាងបង្ហាញខ្លួនក្នុងនាមជាតួអង្គឯករបស់រឿង «Lisa Frankenstein» និង «Winner»។

ក្រៅពីការសម្ដែង Kathryn Newton ក៏ចូលចិត្តលេងកូនគោល និងធ្លាប់ចូលរួមប្រកួតប្រជែងជាច្រើនលើក ហើយសម្រេចបានពិន្ទុខ្ពស់ផងដែរ។ ក៏ប៉ុន្តែ ស្រីស្អាតរូបនេះបានសម្រេចចិត្តចាប់យកអាជីពជាអ្នកសម្ដែងជាជាងធ្វើជាកីឡាការិនីអាជីព៕

March 4, 2023

ព្រឹត្តិការណ៍បាល់ទាត់អាស៊ី Asian Cup 2023 ត្រូវពន្យារពេលដល់ឆ្នាំ 2024

សហព័ន្ធកីឡាបាល់ទាត់អាស៊ី (AFC) បានសម្រេចចិត្តប្រារព្ធព្រឹត្តិការណ៍ Asian Cup 2023 ចាប់ពីថ្ងៃទី 12 មករា 2024 ដល់ 10 កុម្ភៈ 2024 នៅប្រទេសកាតា។

ការសម្រេចចិត្តខាងលើនេះត្រូវបានធ្វើឡើងបន្ទាប់ពីមានកិច្ចប្រជុំនានារវាង AFC និងសហព័ន្ធកីឡាបាល់ទាត់ពិភពលោក (FIFA)។ វគ្គផ្ដាច់ព្រ័ត្រនឹងត្រូវធ្វើឡើងនៅថ្ងៃទី 10 កុម្ភៈ 2024។ ក៏ប៉ុន្តែ កាលបរិច្ឆេទខាងលើមិនទាន់ស្ថិតក្នុង FIFA Days ដូច្នេះ AFC សង្ឃឹមថា FIFA នឹងមានវិធីរៀបចំសមស្របដើម្បីជួយឱ្យក្រុមជម្រើសជាតិនានាមានកម្លាំងខ្លាំងបំផុតសម្រាប់ការប្រកួត។

ដំបូងឡើយ ប្រទេសចិនគ្រោងនឹងប្រារព្ធព្រឹត្តិការណ៍បាល់ទាត់ Asian Cup 2023 ចាប់ពីថ្ងៃទី 16 មិថុនា 2023 ដល់ 16 កក្កដា 2023 ប៉ុន្តែមកដល់ឆ្នាំ 2022 ប្រទេសនេះក៏សុំដកខ្លួនដោយសារតែកូវីដ-19។ ប្រទេសកាតាដែលទើបតែបានទទួល World Cup 2022 ត្រូវបានជ្រើសរើសឱ្យធ្វើជាម្ចាស់ផ្ទះបន្ទាប់ពីបានទទួលការគាំទ្រច្រើនជាងកូរ៉េខាងត្បូង និងអូស្ត្រាលី។

កីឡាករកាតាលើកពាន Asian Cup 2019 ដែលបានធ្វើឡើងនៅ UAE

ក្រោយពីបានកំណត់ពេលវេលាជាក់លាក់ AFC នឹងធ្វើការចាប់ឆ្នោតយ៉ាងយូរត្រឹមខែមិថុនា 2023។ ក្រុមជម្រើសជាតិចំនួន 24 ក្រុមដែលត្រូវបានកំណត់រួចហើយ ត្រូវចែកជា 6 ពូល ដោយប្រកួតជាជុំ ដើម្បីជ្រើសយក 6 ក្រុមដែលជាប់ចំណាត់ថ្នាក់លេខមួយ, 6 ក្រុមជាប់លេខពីរ និង 4 ក្រុមជាប់លេខបី ដែលមានសមិទ្ធផលល្អជាងគេ ឡើងទៅប្រកួតនៅវគ្គ 1/8។

ព្រឹត្តិការណ៍ Asian Cup លើកចុងក្រោយនាពេលកន្លងក៏ត្រូវបានធ្វើឡើងក្នុងខែមករា នៅអាស៊ីខាងលិច ដោយប្រទេសអេមីរ៉ាត់អារ៉ាប់រួម (UAE) ធ្វើជាម្ចាស់ផ្ទះ។ ប្រទេសកាតាវិញ បច្ចុប្បន្នគឺជាជើងឯកបាល់ទាត់ Asian Cup ហើយនេះគឺជាលើកទីបីដែលកាតាធ្វើជាម្ចាស់ផ្ទះ Asian Cup បន្ទាប់ពីបានទទួលលើកទីមួយកាលពីឆ្នាំ 1988 និងលើកទីពីរកាលពីឆ្នាំ 2011៕

March 4, 2023

ក្លឹបបាល់ទាត់ Barcelona ត្រូវបានហាមមិនឱ្យទិញកីឡាករថ្មី

(អេស្ប៉ាញ) – យោងតាមប្រធាន La Liga ក្លឹប Barcelona មិនមានសិទ្ធិទិញកីឡាករថ្មី ដោយសារមិនសម្រេចបានតាមគោលការណ៍ស្ដីពីហិរញ្ញវត្ថុ។

«រដូវរងាកន្លង Barca មិនអាចទិញកីឡាករថ្មីបាន» ប្រធាន La Liga លោក Javier Tebas ឱ្យដឹងកាលពីថ្ងៃទី 02 មីនាដូច្នេះ។ «យើងមិនអនុញ្ញាតឱ្យពួកគេ។ ហើយរដូវក្ដៅខាងមុខ ពួកគេក៏មិនអាចទិញកីឡាករថ្មី»។

សារព័ត៌មានអេស្ប៉ាន Marca បានឱ្យដឹងថា សន្ទស្សន៍ហិរញ្ញវត្ថុរបស់ Barca មិនទាន់ប្រសើរឡើងវិញ បើទោះកំពុងនាំមុខនៅ La Liga។ តារាងប្រាក់បៀវត្សរ៍របស់ពួកគេនៅតែខ្ពស់ ខណៈដែលប្រាក់ចំណូលកើនឡើងយ៉ាងយឺតដោយសារតែត្រូវបានជម្រុះត្រឹមវគ្គដំបូងនៃពានរង្វាន់ Champions League និងវគ្គជម្រុះផ្ទាល់នៅ Europa League។

March 3, 2023

Will Smith ទទួលបានពានរង្វាន់លើកដំបូងក្រោយហេតុវាយមនុស្សលើវេទិកា

(សហរដ្ឋអាម៉េរិក) – កំពូលតារាសម្ដែង Will Smith បានឡើងឆាកទទួលពានរង្វាន់ភាពយន្តជាលើកដំបូង បន្ទាប់ពីមានរឿងរ៉ាវវាយតប់ Chris Rock នៅក្នុងព្រឹត្តិការណ៍ Oscar 2022។

កាលពីថ្ងៃទី 02 មីនា 2023 Will Smith បានទទួលពានរង្វាន់ Beacon នៅក្នុងព្រឹត្តិការណ៍ប្រចាំឆ្នាំរបស់សមាគមអ្នករិះគន់ភាពយន្តអាម៉េរិកដើមកំណើតអាហ្វ្រិក (AAFCA) នៅ Los Angeles។ Will Smith និយាយថា «Emancipation គឺជាគម្រោងភាពយន្តដែលពិបាកបំផុតសម្រាប់ខ្ញុំ។ … ខ្ញុំសូមអរគុណ AAFCA …ដែលជួយឱ្យរឿងនេះបានរស់»។

Emancipation ទទួលបានខ្ទង់ថវិកាវិនិយោគប្រហែល 120 លានដុល្លារពី Apple TV។ សាច់រឿងនេះត្រូវបានបង្កើតឡើងដោយយោងទៅតាមរឿងរ៉ាវពិតស្ដីពីទាសករម្នាក់នៅ Louisiana ក្នុងទសវត្សរ៍ឆ្នាំ 1860។ បុរសជាទាសករនេះបានរត់ចោលចំការរបស់ម្ចាស់គាត់ ហើយរកផ្លូវទៅកាន់ភាគខាងជើងសហរដ្ឋអាម៉េរិក ដើម្បីសុំចូលធ្វើទាហានក្នុងសង្គ្រាមស៊ីវិល។ ក្រៅពី Smith គម្រោង Emancipation ក៏មានការចូលរួមសម្ដែងពីតារាល្បីៗមួយចំនួន មានជាអាទិ៍ Ben Foster, Steven Ogg ឬ Charmaine Bingwa ជាដើម។

AAFCA គឺជាទីដែល Will Smith បង្ហាញវត្តមានជាលើកដំបូងនៅក្នុងព្រឹត្តិការណ៍ប្រគល់ពានរង្វាន់ភាពយន្ត ក្រោយពី Oscar 2022។ កំពូលតារាសម្ដែងរូបនេះត្រូវបានហាមចូលរួមព្រឹត្តិការណ៍នានារបស់បណ្ឌិត្យសភាវិទ្យាសាស្ត្រ និងសិល្បៈភាពយន្តរយៈពេល 10 ឆ្នាំ បន្ទាប់ពីគាត់បានវាយ Chris Rock នៅលើឆាក។ Will Smith នៅតែអាចក្លាយជាបេក្ខភាពសម្រាប់ពានរង្វាន់នានានៅក្នុងអំឡុងពេលទទួលការពិន័យ ប៉ុន្តែមិនត្រូវបានអនុញ្ញាតឱ្យចូលទទួលពានរង្វាន់បើសិនជាឈ្នះ។

អាជីពរបស់ Will Smith រងផលប៉ះពាល់ធ្ងន់ធ្ងរក្រោយហេតុការណ៍ខាងលើ។ គម្រោងភាពយន្តរឿង Fast and Loose និង Bad Boys 4 ត្រូវបានផ្អាកការផលិតដោយមិនទាន់ដឹងពីមូលហេតុ។ ចំណែកគម្រោងភាពយន្តដទៃទៀតដែលគ្រោងនឹងមានវត្តមានរបស់ Smith ក៏អាចត្រូវគេផ្លាស់ប្ដូរ៕

March 3, 2023

Cristiano Ronaldo ជួយឱ្យក្លឹប Al-Nassr យកឈ្នះលើ Man United ស្ដីពីសមិទ្ធផលដែលពិបាកស្មានដល់

ថ្មីៗនេះ កំពូលតារាបាល់ទាត់ Cristiano Ronaldo បានធ្វើឱ្យអ្នកគាំទ្រមានការភ្ញាក់ផ្អើលខ្លាំង ព្រោះតែសមិទ្ធផលដ៏អស្ចារ្យដែល CR7 ធ្វើបានសម្រាប់ Al-Nassr ដោយជួយឱ្យក្លឹបនេះយកឈ្នះលើ Manchester United ដែលគ្រប់គ្នានឹកស្មានមិនដល់។

ចាប់តាំងពីបានចូលរួមជាមួយនឹងក្លឹប Al-Nassr កីឡាករ Ronaldo បាននាំមកនូវការផ្លាស់ប្ដូរយ៉ាងច្រើនដល់ក្រុមបាល់ទាត់ដែលមិនមានឈ្មោះល្បីនៅក្នុងផែនទីបាល់ទាត់ពិភពលោក។ ក្រៅពីការរកបានគ្រាប់បាល់ ឬបង្កឱកាសរកបានគ្រាប់បាល់ កំពូលតារាបាល់ទាត់ជនជាតិព័រទុយហ្កាល់ថែមទាំងបានជួយឱ្យចំនួននៃការធ្វើអន្តរកម្មលើទំព័របណ្ដាញសង្គមរបស់ក្លឹប Al-Nassr ឡើងដល់តួលេខខ្ពស់បំផុតក្នុងប្រវត្តិសាស្ត្រ។

យោងតាម DeporFinanzas កំពូលថ្វីជើង CR7 បានជួយឱ្យ Al-Nassr សម្រេចបាន 150 លានលើកស្ដីពីការទាក់ទងគ្នារវាងទំព័របណ្ដាញសង្គមរបស់ក្លឹប និងអ្នកគាំទ្រ។ តួលេខនេះច្រើនជាង 149 លានលើករបស់ Man United ជាក្លឹបដែល Ronaldo ធ្លាប់បានសាងកេរ្តិ៍ឈ្មោះកាលពីអតីតកាល។ អ្វីដែលគួរឱ្យចាប់អារម្មណ៍ជាងនេះ នោះគឺ វត្តមានរបស់ Ronaldo ក៏បានជួយឱ្យក្លឹប Al-Nassr ឡើងដល់ Top 10 ក្នុងចំណោមបណ្ដាក្លឹបបាល់ទាត់ទូទាំងពិភពលោកដែលមានឥទ្ធិពលជាងគេលើបណ្ដាញសង្គមផងដែរ។

ក្នុងចំណោមក្លឹបទាំង 10 ដែលមានឥទ្ធិពលជាងគេលើពិភពបណ្ដាញសង្គម Real Madrid កំពុងនាំមុខគេ ដោយមានការធ្វើអន្តរកម្មចំនួន 209 លានលើក ខណៈ PSG ឈរលំដាប់ទីបី។ ក្រៅពីនេះក៏នៅមានបណ្ដាក្លឹបដែល CR7 ធ្លាប់បានលេង និងកំពុងលេងឱ្យ រួមមាន Man United, Real Madrid និង Al-Nassr។

ប្រការខាងលើបង្ហាញថា បើទោះជាចាកឆ្ងាយពីពិភពបាល់ទាត់លំដាប់កំពូលក្នុងវ័យ 38 ឆ្នាំ ប៉ុន្តែឥទ្ធិពលរបស់ Ronaldo នៅតែខ្លាំង ហួសពីការស្មានរបស់អ្នកគាំទ្រ៕

March 3, 2023

បាតុកម្មផ្ទុះឡើងនៅប្រទេសក្រិក បន្ទាប់ពីមានហេតុការណ៍រថភ្លើងពីរខ្សែបុកគ្នា

ពលរដ្ឋក្រិករាប់ពាន់នាក់ដែលកំពុងខឹងខ្លាំង នាំគ្នាចេញធ្វើបាតុកម្មពីរថ្ងៃបន្តបន្ទាប់ ក្រោយពីមានករណីរថភ្លើងពីរខ្សែបុកគ្នាបណ្ដាលឱ្យមានមនុស្សស្លាប់យ៉ាងតិច 57 នាក់។

ទោះបីមេឃភ្លៀងធំកាលពីថ្ងៃទី 02 មីនា ក្រុមបាតុករនៅតែនាំគ្នាចេញធ្វើបាតុកម្មនៅរដ្ឋធានីអាថែន ដោយដង្ហែក្បួនពីទីស្នាក់ការរបស់ក្រុមហ៊ុនផ្លូវដែក Hellenic Train ទៅកាន់វិមានសភា ក្នុងនោះ បាតុករជាច្រើនស្រែកថា «អំពើឧក្រិដ្ឋនេះនឹងមិនត្រូវបានបំភ្លេចចោល»។ នេះគឺជាថ្ងៃទីពីរហើយដែលបាតុកម្មបានកើតឡើង។

ក្នុងថ្ងៃដដែល បាតុកររាប់ពាន់នាក់ក៏បានចេញសម្ដែងមតិនៅក្នុងទីក្រុងធំៗចំនួនពីរ គឺ Thessaloniki និង Patras។ បាតុករខ្លះគប់ដុំថ្ម និងគ្រាប់បែកសាំង ធ្វើឱ្យស្ថានការណ៍កាន់តែច្របូកច្របល់។ ប៉ុន្តែ ប៉ូលិសឱ្យដឹងថា ស្ថានភាពប្រែជាស្ងប់ស្ងាត់នៅវេលាយប់។

នៅឯតំបន់ Tempe ភាគកណ្ដាលប្រទេសក្រិក ហ្វូងបាតុករនាំគ្នាគប់ដុំថ្មលើការិយាល័យក្រុមហ៊ុនផ្លូវដែក Athens កាលពីព្រលប់ថ្ងៃទី 01 មីនា បណ្ដាលឱ្យប៉ូលិសចេញបង្ក្រាប។

បាតុកម្មនៅប្រទេសក្រិកបានកើតឡើងបន្ទាប់ពីរដ្ឋាភិបាលរបស់នាយករដ្ឋមន្ត្រី Kyriakos Mitsotakis ទទួលស្គាល់ថា ការប្រឹងប្រែងស្ដារគម្រោងផ្លូវដែកនានាក្នុងប្រទេសនេះបានបរាជ័យ។

កម្មករផ្លូវដែក និងរថភ្លើងអគ្គិសនីក្រោមដីក៏បានប្រកាសធ្វើកូដកម្មរហូតដល់ថ្ងៃទី 04 មីនា ដើម្បីប្រឆាំងនឹងការមិនគោរពដែលអាជ្ញាធរធ្វើឡើងចំពោះបណ្ដាលផ្លូវដែកនៅប្រទេសក្រិក» ដែលបានបណ្ដាលឱ្យកើតមានសោកនាដកម្មរថភ្លើងបុកគ្នាកាលពីពេលថ្មីៗនេះ។

រថភ្លើងពីរខ្សែបុកគ្នានៅប្រទេសក្រិកកាលពីថ្ងៃទី 28 កុម្ភៈ 2023

កាលពីព្រលប់ថ្ងៃទី 28 មីនា ខ្សែរថភ្លើងដឹកអ្នកដំណើរ 350 នាក់ រត់ពីអាថែន ទៅកាន់ទីក្រុង Thessaloniki ភាគខាងជើងប្រទេសក្រិក បានបុកគ្នាជាមួយនឹងរថភ្លើងដឹកទំនិញនៅ Larissa ភាគខាងកើតប្រទេសនេះ។ ហេតុការណ៍នេះបានសម្លាប់មនុស្សយ៉ាងតិច 57 នាក់ ដែលភាគច្រើនគឺជានិស្សិត។ មូលហេតុដែលនាំឱ្យមានហេតុការណ៍នេះត្រូវបានមេដឹកនាំប្រទេសក្រិកនិយាយថា ដោយសារកត្តាមនុស្ស ចំណែកអតីតបុគ្គលិកម្នាក់របស់ក្រុមហ៊ុនផ្លូវដែកខាងលើនិយាយថា ការធ្វើឱ្យប្រសើរឡើងនូវហេដ្ឋារចនាសម្ព័ន្ធដែលបានចាប់ផ្ដើមពីឆ្នាំ 2016 មកដល់បច្ចុប្បន្ន នៅតែមិនទាន់រួចរាល់ ហើយល្បឿន 200 គីឡូម៉ែត្រ/ម៉ោងគឺជារឿងគ្រោះថ្នាក់៕

March 3, 2023

ក្រុមចម្រៀងនារីល្បីនៅ Kpop សុទ្ធតែជា U40 ប៉ុន្តែនៅតែមិនទាន់មានគូជីវិត

មិនដូចទៅនឹងក្រុមចម្រៀងនារីដទៃដែលស្ថិតនៅក្នុងជំនាន់ជាមួយគ្នា SNSD មកដល់បច្ចុប្បន្នទើបតែមានសមាជិកម្នាក់គត់ដែលបង្ហាញទំនាក់ទំនងស្នេហាជាសាធារណៈ។

នៅកូរ៉េខាងត្បូង សូម្បីតែតារាល្បីឈ្មោះខ្លាំងក៏នៅតែអាចជ្រើសរើសជីវភាពធម្មតា គឺរៀបការ បង្កើត និងចិញ្ចឹមកូននៅពេលពួកគេឈានចូលដល់វ័យ 30 ឆ្នាំ ពិសេសគឺស្រីស្អាត។ ព្រោះថា ដល់វ័យនេះ ពួកគេមានជីវភាពល្អប្រសើរគ្រប់គ្នា។

ក៏ប៉ុន្តែ នៅមានក្រុមចម្រៀងនារីមួយដែលផ្ទុយពីនិន្នាការខាងលើ។ ថ្វីបើចូលដល់ដំណាក់កាល U40 (អាយុពី 31 ដល់ 40 ឆ្នាំ) ប៉ន្តែ SNSD ឬហៅថា Girls’ Generation ដែលជាក្រុមចម្រៀងនារីចូលចិត្តជួបជុំអ្នកគាំទ្រជាងការយកស្វាមី នៅតែមិនចង់មានគូ។

ចាប់តាំងពីបង្ហាញខ្លួនកាលពីខែសីហា 2007 ជាមួយនឹងបទ Into the New World ក្រុម SNSD បានក្លាយជាមួយក្នុងចំណោមក្រុមចម្រៀងនារីកំពូលៗរបស់កូរ៉េខាងត្បូង ក៏ដូចជាពិភពលោក នៅពេលត្រូវបានគ្រប់គ្រងដោយក្រុមហ៊ុន SM Entertainment។

មកដល់ឆ្នាំ 2009 SNSD បានក្លាយជាក្រុមចម្រៀងដែលមានឥទ្ធិពលបំផុតនៅកូរ៉េខាងត្បូង ដោយសារបទ Gee និង Genie។ ក្នុងរយៈពេលជិតពីរទសវត្សរ៍ SNSD រក្សាកម្រិតនៃភាពទាក់ទាញបានយ៉ាងល្អ តាមរយៈសកម្មភាពជាក្រុម និងបុគ្គល។ ពួកគេត្រូវបានប្រជាជនកូរ៉េខាងត្បូងដាក់រហ័សនាមឱ្យថា «ក្រុមនារីជាតិ» ព្រោះតែការពេញនិយម។ មិនត្រឹមតែនៅក្នុងប្រទេសនោះទេ នៅលើឆាកអន្តរជាតិ SNSD ក៏មានភាពល្បីល្បាញខ្លាំងផងដែរ។

សមាជិកក្រុម SNSD បង្ហាញខ្លួនដំបូងក្នុងវ័យនៅក្មេងណាស់ តែក្រោយបង្ហាញវត្តមានបាន 16 ឆ្នាំ ពួកគេក៏បានឈានចូលដល់វ័យជាង 30 ឆ្នាំ។ ក្នុងនោះ Taeyeon, Sunny, Tiffany, Hyoyeon និង Yuri កើតឆ្នាំ 1989 មានអាយុ 35 ឆ្នាំ។ ចំណែក Yoona និង Sooyoung កើតឆ្នាំ 1990 មានអាយុ 34 ឆ្នាំ និង Seohyun មានអាយុ 33 ឆ្នាំ។

ទោះជាមានអាយុច្រើនហើយក៏ដោយ SNSD នៅតែផ្ដល់អាទិភាពដល់ការអភិវឌ្ឍអាជីពជាងការកសាងគ្រួសារថ្មីរៀងខ្លួន៕

March 3, 2023

Category: សង្គម និងសេដ្ឋកិច្ច