បច្ចុប្បន្នការិយាល័យឥណទានកម្ពុជា(CBC)មានសមាជិកសរុបចំនួន 149ស្ថាប័នដែលរួមមានធនាគារពាណិជ្ជចំនួន 53ស្ថាប័នគ្រឹះស្ថានមីក្រូហិរញ្ញវត្ថុចំនួន 75 ស្ថាប័នក្រុមហ៊ុនភតិសន្យា (Leasing Company)ចំនួន 11ស្ថាប័ន និងប្រតិបត្តិករឥណទានជនបទមានចំនួន 10ស្ថាប័នដោយឡែកប្រតិបតិ្តករឥណទានជនបទជាង 300ស្ថាប័នផ្សេងទៀតនៅមិនទាន់ចូលជាសមាជិកនៅឡើយ។
លោក អឿ សុធារ័ត្ន នាយកប្រតិបត្តិនៃការិយាល័យឥណទានកម្ពុជាបានមានប្រសាសន៍ថា សមាជិក CBC ទាំងអស់គឺសុទ្ធតែទទួលបានអាជ្ញាប័ណ្ណពីធនាគារជាតិនៃកម្ពុជាក្នុងការធ្វើប្រតិបត្តិការឥណទាននៅកម្ពុជា ហើយនៅពេលស្ថាប័នទាំងនោះទទួលបានអាជ្ញាប័ណ្ណពីធនាគារជាតិ គឺត្រូវបានគេដាក់បញ្ចូលជាសមាជិកនៃការិយាល័យឥណទានដោយស្វ័យប្រវត្តិ។
លោកបន្តថា នៅពេលចូលជាសមាជិកនៃការិយាល័យឥណទាន ស្ថាប័នទាំងនោះទទួលបានអត្ថប្រយោជន៍ជាច្រើនដែលមានដូចជា ទទួលបានព័ត៌មានពិត ច្បាស់លាស់ និងទុកចិត្តបានដោយសារអ្នកដែលផ្តល់ទិន្នន័យមកការិយាល័យឥណទាន គឺជាស្ថាប័នផ្លូវការដែលជាសមាជិករបស់ CBC។
ម្យ៉ាងទៀត CBC មានបុគ្គលិកពោរពេញដោយសមត្ថភាពក្នុងការបញ្ចូលទិន្នន័យទៅក្នុងប្រព័ន្ធដោយសុក្រឹតធ្វើឱ្យសមាជិកអាចដឹងពីប្រវត្តិឥណទានរបស់អតិថិជនម្នាក់ៗដែលជាប្រយោជន៍ធ្វើឱ្យពួកគេស្គាល់អតិថិជនទាំងនោះបានកាន់តែច្បាស់។
លោកបញ្ជាក់ដូច្នេះថា “ក្នុងវិស័យឥណទាន សំខាន់គឺការស្គាល់អតិថិជន នៅពេលស្គាល់គាត់ នឹងដឹងពីប្រវត្តិអតិថិជនថាយ៉ាងដូចម្តេច។ ចំណុចទាំងអស់នេះការិយាល័យឥណទានអាចផ្តល់ជូនបានដោយសារការិយាល័យឥណទានមានព័ត៌មានទាំងអស់នេះ មានទិន្នន័យទៅលើអតិថិជនម្នាក់ៗថា តើអតិថិជនទាំងនោះធ្លាប់ប្រើប្រាស់ឥណទានឬទេ?
បើសិនធ្លាប់ប្រើ តើប្រើនៅទីណាខ្លះ? ការបង់សងទៀងទាត់ ឬមិនទៀងទាត់យ៉ាងណា? ដែលព័ត៌មានទាំងអស់នេះអាចជួយសម្រួលក្នុងការសម្រេចចិត្តផ្ដល់ឥណទានបាន។
ទិន្នន័យទាំងនេះនឹងជួយដល់ការសម្រេចចិត្តផ្ដល់ឥណទានប្រកបដោយការទទួលខុសត្រូវព្រោះថា បញ្ហាសំខាន់នៅពេលដែលភ្នាក់ងារឥណទានដឹងពីព័ត៌មានអតិថិជនហើយពួកគាត់អាចសម្រេចចិត្តបានថា គួរផ្តល់កម្ចីឱ្យឬទេ? ឬយើងអាចសម្រេចចិត្តផ្តល់កម្ចីដោយផ្អែកលើគោលការណ៍កណ្តាលមួយ។
ឧទាហរណ៍បើសិនអតិថិជនមានហានិភ័យខ្ពស់ធ្លាប់ទទួលបានកម្ចីតែសងវិញយឺត ឬលំបាក ភ្នាក់ងារឥណទានអាចសម្រេចផ្តល់ឱ្យក្នុងកម្រិតទាបជាងមុនបន្តិច ហើយការប្រាក់ក៏ខ្ពស់ជាងមុនបន្តិចដែរ តែបើអតិថិជនមានហានិភ័យទាបមានប្រវត្តិល្អ ភ្នាក់ងារឥណទានអាចផ្តល់កម្ចីកាន់តែខ្ពស់តែការប្រាក់ទាបជាងមុនបន្តិចវិញ។ ចំណុចមួយទៀតទិន្នន័យនេះអាចជួយពន្លឿនពេលវេលាក្នុងការសម្រេចចិត្ត ផ្តល់ឥណទាន។
ដូចយើងធ្លាប់ដឹងហើយថា ដើមឡើយនៅពេលអតិថិជនម្នាក់គាត់ចង់ខ្ចីឥណទានគឺគាត់ទូរស័ព្ទមកមន្ត្រីឥណទានហើយមន្ត្រីឥណទានតែងជិះម៉ូតូទៅដល់ផ្ទះសួរនាំអំពីគោលបំណងកម្ចី និងប្រវត្តិផ្សេងៗដូចជាធ្លាប់ខ្ចីឥណទានពីមុនមកឬអត់? ធ្លាប់ប្រើប្រាស់ឥណទានផ្សេងណាឬអត់? ជួនកាលអតិថិជនឆ្លើយពិត ជួនកាលឆ្លើយមិនពិតរួចភ្នាក់ងារឥណទានទៅសួរអ្នកជិតខាង ហើយបន្តសួរទៅមេឃុំ/ចៅសង្កាត់ ពេលទទួលបានចម្លើយហើយ ចម្លើយនោះអាចពិត និងមិនពិតដូចគ្នា ហើយមកទល់ពេលបច្ចុប្បន្ន សំនួរនេះនៅតែត្រូវបានសួរដដែល។ ប៉ុន្តែពេលដែលភ្នាក់ងារឥណទានដែលជាសមាជិក CBC មកដល់ការិយាល័យវិញ គាត់គ្រាន់តែយកអត្តសញ្ញាណប័ណ្ណអតិថិជនមកវាយឈ្មោះចូលក្នុងប្រព័ន្ធភ្លាមគាត់នឹងទទួលបានព័ត៌មានដែលអាចធ្វើឱ្យគាត់សម្រេចចិត្តបានកាន់តែលឿន និងមានទំនុកចិត្តកាន់តែខ្ពស់។
យ៉ាងណា មកទល់បច្ចុប្បន្នគេសង្កេតឃើញថា ប្រតិបត្តិករឥណទានជនបទប្រមាណជាង300 ស្ថាប័ននៅមិនទាន់ចូលជាសមាជិកការិយាល័យឥណទានកម្ពុជា(CBC)នេះទេ ដោយសារពួកគាត់នៅមិនទាន់ទទួលបានអាជ្ញាប័ណ្ណពេញលេញពីធនាគារជាតិ។
លោក សុធារ័ត្ន បានបញ្ជាក់ថា នៅក្នុងប្រព័ន្ធធនាគារជាតិ គឺគ្របដណ្តប់ទៅលើតែធនាគារពាណិជ្ជ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងមួយផ្នែកទៀតដែលជាស្ថាប័នឥណទានជនបទដែលកន្លងមកបានដើរតួជាអង្គការផ្តល់កម្ចីឥណទាន។ ពួកគេបានទទួលអាជ្ញាប័ណ្ណពីក្រសួងមហាផ្ទៃ។ ហើយដើម្បីសម្រួលបញ្ហានេះ កាលពីឆ្នាំ2015កន្លងទៅ ធនាគារជាតិនៃកម្ពុជាបានសហការជាមួយក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុចេញសេចក្តីថ្លែងការណ៍រួមមួយបញ្ជាក់ថា អង្គការទាំងអស់ដែលធ្វើប្រតិបត្តិការឥណទាននៅកម្ពុជា គឺខុសច្បាប់ ដោយសារមិនមានការទទួលស្គាល់ពីធនាគារជាតិដែលតម្រូវឱ្យពួកគេស្នើសុំអាជ្ញាប័ណ្ណពីធនាគារជាតិបន្ថែមទៀត។
ពេលនោះដែរ ស្ថាប័នមួយចំនួនបានបញ្ឈប់ប្រតិបត្តិការរបស់ខ្លួន ហើយស្ថាប័នចំនួនជាង 300ផ្សេងទៀតបន្តទៅសុំអាជ្ញាប័ណ្ណពីធនាគារជាតិ ប៉ុន្តែអង្គការជាស្ថាប័នឥណទានប្រភេទថ្មីនេះ ធនាគារជាតិនៅមិនទាន់ផ្តល់អាជ្ញាប័ណ្ណឱ្យនៅឡើយ គឺបានត្រឹមតែទទួលស្គាល់ជាបណ្តោះអាសន្នសិនប៉ុណ្ណោះ។ ទោះជាដូច្នេះក្ដីគ្រឹះស្ថានឥណទានជនបទចំនួន10 ក្នុងចំណោមជាង 300នោះបានចូលជាសមាជិករបស់CBC រួចហើយ។
ដើម្បីទទួលបានព័ត៌មានរបស់អតិថិជនគ្រប់ជ្រុងជ្រោយប្រកបដោយទំនុកចិត្ត លោកអំពាវនាវឱ្យស្ថាប័នឥណទានជនបទទាំងនោះចូលជាសមាជិក CBC ដើម្បីពង្រឹងប្រតិបត្តិការឥណទានរបស់ខ្លួនឱ្យកាន់តែប្រសើរឡើងដោយសារក្នុងប្រព័ន្ធ CBCមានប្រវត្តិអតិថិជនដែលធ្លាប់ប្រើឥណទានជិត 5លាននាក់មកទល់បច្ចុប្បន្ន ប៉ុន្តែអ្នកដែលកំពុងប្រើប្រាស់មានចំនួនតែជិត3លាននាក់ប៉ុណ្ណោះខណៈជាង2លាននាក់ទៀតឈប់ប្រើប្រាស់កម្ចីឥណទានទៅហើយ។
ពាក់ព័ន្ធករណីនេះលោកឧកញ៉ា ហួត អៀងតុង ប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា និងជាប្រធានអគ្គនាយកនៃគ្រឹះស្ថានមីក្រូហិរញ្ញវត្ថុហត្ថាកសិករលីមីតធីតបានឱ្យដឹងថា បើទោះបីជាប្រតិបត្តិករហិរញ្ញវត្ថុមួយចំនួនមិនបានចូលជាសមាជិករបស់ CBCក្ដី ប្រតិបត្តិការហិរញ្ញវត្ថុក្នុងទីផ្សារមិនប្រឈមហានិភ័យខ្លាំងនោះទេ។
លោកថា ទិន្នន័យបានពីការិយាល័យCBC គឺជាផ្នែកមួយសម្រាប់ការវិភាគទៅលើស្ថានភាពទូទៅរបស់វិស័យហិរញ្ញវត្ថុប៉ុណ្ណោះ ប៉ុន្តែដល់ពេលផ្តល់កម្ចីជាក់ស្តែងគ្រឹះស្ថាននីមួយៗនៅតែត្រូវការមូលដ្ឋានរបស់ខ្លួនឯងសម្រាប់វាយតម្លៃដដែល មុនការទម្លាក់កម្ចីដល់អ្នកស្នើសុំកម្ចី “ខ្ញុំយល់ថា វាគ្មានហានិភ័យសម្រាប់វិស័យហិរញ្ញវត្ថុទេ ស្របពេលដែលប្រតិបត្តិករខ្លះនៅក្រៅការិយាល័យឥណទានកម្ពុជាព្រោះទិន្នន័យនោះជាផ្នែកមួយសម្រាប់វិភាគផ្នែកហិរញ្ញវត្ថុ ឬក៏ជាទិន្នន័យបន្ទាប់បន្សំ ហើយក្រុមហ៊ុនប្រតិបត្តិករនីមួយៗមានមូលដ្ឋានចុះវាយតម្លៃផ្ទាល់ខ្លួនដែលមានភាពច្បាស់លាស់ និងគ្រប់គ្រងហានិភ័យបានស្រាប់ទៅហើយ។
យោងតាមទិន្នន័យរបស់ធនាគារជាតិបានបង្ហាញថា មកទល់បច្ចុប្បន្នមានប្រតិបត្តិករហិរញ្ញវត្ថុរហូតដល់ 312ស្ថាប័ន មិនមែនជាសមាជិករបស់ការិយាល័យឥណទានកម្ពុជាដែលជាក្រុមហ៊ុនកណ្តាលមួយសម្រាប់ចែករំលែកព័ត៌មានឥណទានរួមដល់សមាជិករបស់ខ្លួនសម្រាប់ជាមូលដ្ឋានវិភាគអំពីប្រវត្តិជាប់បំណុលរបស់អតិថិជនដែលខ្ចីប្រាក់។
ករណីនេះការិយាល័យឥណទានកម្ពុជា បាននិងកំពុងអភិវឌ្ឍប្រព័ន្ធចែករំលែកព័ត៌មានឥណទានដើម្បីឱ្យគ្រឹះស្ថានជាសមាជិកអាចបញ្ចូល និងទាញយករបាយការណ៍ព័ត៌មានឥណទានក្រុមហ៊ុនបន្ថែមលើទិន្នន័យឥណទានបុគ្គល។
របាយការណ៍ប្រចាំឆ្នាំរបស់ធនាគារជាតិនៃកម្ពុជាបានបញ្ជាក់ទៀតថា គ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុដែលជាសមាជិកទាំងអស់របស់ក្រុមហ៊ុន CBC បានផ្តល់នូវទិន្នន័យឥណទានអតិថិជនដែលមានសារៈសំខាន់មួយចំនួនរួមមានទំហំឥណទានឯកត្តជនចំនួន អ្នកខ្ចីប្រាក់ ចំនួនអ្នកធានា និងចំនួនប្រតិបត្តិការឆែកព័ត៌មានអតិថិជន។ សម្ពាធឥណទានសរុបដែលគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុបានផ្តល់ និងបញ្ចូលទៅក្នុងប្រព័ន្ធចែករំលែកព័ត៌មានឥណទានមានចំនួន 64.9ទ្រីលានរៀល និងមានគណនីចំនួន2.5លាន៕
