Category: សង្គម និងសេដ្ឋកិច្ច

ឆុំ វត្តី ត្រូវគូស្នេហ៍ពញ្ញាក់អារម្មណ៍នៅថ្ងៃខួបកំណើតដល់ទៅ 2 ដង
តាមរយៈបណ្ដាញទំនាក់ទំនងសង្គមហ្វេសប៊ុករបស់តារាស្រី ឆុំ វត្តី នៅពេលថ្មីៗនេះ បានឱ្យដឹងថា បុរសជាគូស្នេហ៍របស់នាង បានបង្កភាពភ្ញាក់ផ្អើលយ៉ាងផ្អែមល្ហែមចំពោះរូបនាង នាឱកាសថ្ងៃខួបកំណើតដល់ទៅពីរដងឯណោះ ដែលធ្វើឱ្យនាងរំភើប និយាយលែងចេញ។
មួយរយៈកាលចុងក្រោយនេះ តារាសម្ដែងស្រី ឆុំ វត្តី កំពុងតែមានប្រជាប្រិយភាពខ្លាំងឡើងៗតាមរយៈការសម្ដែងរឿងភាគតាមបណ្ដាស្ថានីយទូរទស្សន៍នានា តែកន្លងមកនាងមិនបានបង្ហាញ ឬបង្ហើបពីដំណឹងបុរសជាគូស្នេហ៍របស់នាងឡើយ បើទោះបីជាបង្ហោះរូបនៅលើហ្វេសប៊ុក ក៏បាននូវការបិទបាំងផងដែរ។ តែដោយឡែក ការបើកចំហគូស្នេហ៍របស់តារាល្បីៗជាច្រើនបានចូលរោងការ និងប្រកាសឱ្យមហាជនបានដឹងនោះ បានជំរុញចិត្តឱ្យតារាស្រីធ្លាប់សម្ដែងរឿង « ហ្លួងព្រះស្ដេចកន » រូបនេះ បង្ហាញមុខគូស្នេហ៍ ដោយមិនភ័យខ្លាចធ្លាក់ប្រជាប្រិយភាព។
ការបង្កភាពភ្ញាក់ផ្អើលនៅក្នុងថ្ងៃខួបកំណើតនាង ថ្ងៃម្សិលមិញនេះ បុរសជាគូស្នេហ៍បានជូនកាដូជាគ្រឿងអលង្ការមាស ជាខ្សែជើង ធ្វើឱ្យនាងរំភើបហើយនិយាយមិនចេញ ញាប់ញ័របេះដូង ។ បុរសជាគូស្នេហ៍ក៏កាន់តែបង្ហាញពីភក្ដីភាព និងក្ដីស្រឡាញ់ស្មោះស្ម័គ្រ ដោយព្រមបំពាក់ខ្សែជើងឱ្យរូបនាង មើលទៅគួរឱ្យរំភើបជំនួស។ ដើម្បីបានឃើញពីសកម្មភាពផ្អែមល្ហែមរវាង តារាសម្ដែងស្រី ឆុំ វត្តី និងគូស្នេហ៍ សូមទស្សនារូបភាពទាំងឡាយខាងក្រោមនេះ៖
April 3, 2018
ទំហំវិនិយោគកម្ពុជាចិនកើនឡើង 27%ក្នុងឆ្នាំ2017
ឯកឧត្តម ឈួន ដារ៉ា រដ្ឋលេខាធិការក្រសួងពាណិជ្ជកម្មមានប្រសាសន៍ថា ទំហំវិនិយោគកម្ពុជាចិននៅក្នុងឆ្នាំ2017កន្លងទៅនេះមានការកើនឡើងចំនួន 27% បើធៀបរយៈពេលពេញមួយឆ្នាំក្នុងឆ្នាំ2016។
នាឱកាសអញ្ជើញជាអធិបតីភាពក្នុងពិធីពិព័រណ៍ពាណិជ្ជកម្មកម្ពុជាចិននៅសាលសន្និសីទកោះពេជ្រ ឯកឧត្តមរដ្ឋលេខាធិការបានបញ្ជាក់ថា ប្រទេសចិនបានឈរលំដាប់លេខរៀងទី1 នៅកម្ពុជាកាលពីឆ្នាំ2017 ជាមួយទំហំទឹកប្រាក់វិនិយោគរហូតដល់ជិត 15ប៊ីលានដុល្លារអាមេរិក។
ឯកឧត្តមបានបន្ថែមទៀតថា ទំហំវិនិយោគចិនមកកម្ពុជាក្នុងឆ្នាំ2017 មានចំនួន 14,3ប៊ីលានដុល្លារអាមេរិក ឬស្មើ27% នៃទឹកប្រាក់វិនិយោគពីបរទេសសរុបដែលចំនួននេះ បានកើនឡើងស្ទើរពាក់កណ្ដាលបើធៀបនឹងឆ្នាំ2016 ដែលមានត្រឹមតែ 748លានដុល្លារអាមេរិកប៉ុណ្ណោះ។
ក្រៅពីកំណើនទឹកប្រាក់វិនិយោគហើយ ស្ថានភាពពាណិជ្ជកម្មទ្វេភាគីរវាងចិន និងកម្ពុជា នៅក្នុងឆ្នាំ2017 ក៏មានវឌ្ឍនភាពល្អប្រសើរផងដែរ។ បើតាមទិន្នន័យផ្លូវការបានបង្ហាញថា ពាណិជ្ជកម្មនៃប្រទេសទាំងពីរសម្រេចបានដល់ 5,790លានដុល្លារអាមេរិក ពោលគឺបានកើនឡើង21.7% បើប្រៀបធៀបនឹងឆ្នាំ2016។ ទន្ទឹមគ្នានេះ ភ្ញៀវទេសចរចិនដែលបានចូលមកកម្ពុជាកាលពីឆ្នាំ2017 មានចំនួន 1,210,000នាក់ គឺបានកើនឡើងជិត 46% បើធៀបនឹងឆ្នាំ2016ដូចគ្នា។
គួរបញ្ជាក់ថា គម្រោងភាគច្រើនដែលចិនដាក់ទុនវិនិយោគនៅកម្ពុជា ភាគច្រើនលើវិស័យសំណង់ កសិកម្ម ថាមពល ឧស្សាហកម្មកាត់ដេរ ធនាគារ និងហិរញ្ញវត្ថុ ទូរគមនាគមន៍ និងទេសចរណ៍ជាដើម៕
April 3, 2018
លោក Pardew ចាកចេញពី West Brom ក្រោយពីក្លិបកាន់តែលិចលង់ដល់បាតតារាង
លោក Alan Pardew បានទទួលលទ្ធផលតបមកវិញសម្រាប់ការរងបរាជ័យក្នុងការប្រកួតក្របខ័ណ្ឌ Premier League ចំនួន 8លើកជាប់ៗគ្នាតាមរយៈការចាកចេញពីតំណែងក្នុងនាមជាអ្នកចាត់ការទូទៅរបស់ក្លិប West Bromwich Albion ដោយការព្រមព្រៀងគ្នាទាំងសងខាង កាលពីថ្ងៃចន្ទ។
គ្រូបង្វឹកវ័យ 56ឆ្នាំរូបនេះបានកាន់តំណែងក្នុងក្លិបនេះត្រឹមតែរយៈពេល 4ខែគត់ ក្រោយពីបានជំនួសកន្លែងរបស់លោក Tony Pulis ប៉ុន្តែមិនអាចជួយសង្គ្រោះជោគវាសនារបស់ក្លិបបានឡើយ ហើយលោកបានធ្វើឱ្យពួកគេស្ថិតនៅបាតតារាង ដោយដេញតាមពីក្រោយក្រុមស្ថិតក្នុងតំបន់សុវត្ថិភាពដល់ទៅ 10ពិន្ទុ ខណៈដែលនៅសល់ការប្រកួតត្រឹមតែ 6លើកទៀតប៉ុណ្ណោះនៅរដូវកាលនេះ។
ខណៈដែលគ្រូបង្វឹកជំនួយ John Carver ក៏នឹងចាកចេញដែរនោះ ក្លិប West Bromបានឱ្យដឹងនៅលើគេហទំព័ររបស់ខ្លួនថា៖ «West Bromwich Albion និងលោក Alan Pardew បានយល់ព្រមចែកផ្លូវគ្នា ក្រោយពីការពិភាក្សាផ្សេងៗរវាងភាគីទាំង 2រួចរាល់ហើយ»។ West Bromបានបន្ថែមទៀតថា៖ «ក្លិបសូមថ្លែងអំណរគុណដល់លោក Alan និងលោក John សម្រាប់ការខិតខំប្រឹងប្រែងរបស់ពួកគេ និងសូមជូនពរឱ្យអ្នកទាំងពីរជួបតែសំណាងល្អនៅថ្ងៃអនាគត»។ លោក Darren Moore គ្រូបង្វឹកនៃក្រុមឈុតធំ នឹងកាន់តំណែងបន្តរហូតទាល់តែមានការប្រកាសជាថ្មីណាមួយទៀត។
លោក Pardew អតីតអ្នកចាត់ការទូទៅរបស់ក្លិប Reading, Charlton Athletic, West Ham, Southampton, Newcastle United និង Crystal Palace ចូលកាន់តំណែងជំនួសលោក Pulis បានត្រឹមតែ 4ខែប៉ុណ្ណោះ៕
ប្រភពព័ត៌មាន៖ The Straits Times
April 3, 2018
ស្ងាត់ៗ!! កញ្ញា ស៊ុន ស្រីពេជ្រ បង្កាត់ភ្លើងស្នេហ៍ថ្មីបុរសសង្ហាមិនចាញ់តួកុន
នៅពេលថ្មីៗនេះ មហាជនជាច្រើនបានទន្ទឹងចាំផ្លូវចំពោះការចេញបទចម្រៀងចូលឆ្នាំរបស់តារាចម្រៀងបែបមនោសញ្ចេតនា គឺកញ្ញា ស៊ុន ស្រីពេជ្រ ដែលជាកូនស្រីរបស់តារាកំប្លែងនាយ សង់ ស៊ីស ហៅតាស៊ីស នៅក្នុងផលិតកម្មចម្រៀងថោន ហាក់បីដូចជាស្ងប់ស្ងាត់ និងមិនមានចេញបទភ្លូកទឹកភ្លូកដីដូចតារាចម្រៀងដទៃរួមផលិតកម្ម។
តែដោយឡែក ស្រាប់តែនៅថ្ងៃទី 3 ខែមេសា នេះ នៅលើបណ្ដាញទំនាក់ទំនងសង្គមហ្វេសប៊ុក បានទម្លាយរូបតារាស្រី ស៊ុន ស្រីពេជ្រ ដែលគេមើលឃើញថាកំពុងលួចបង្កាត់ភ្លើងស្នេហាជាមួយនឹងបុរសម្នាក់ ដែលកញ្ញាមិនធ្លាប់បង្ហាញមុខមាត់ពិតរបស់គូស្នេហ៍ពីមុនឡើយ បើទោះបីវ័យកាន់តែជ្រេហើយក៏ដោយ តែស្រី ពេជ្រ កំពុងស្និទ្ធស្នាលជាមួយកំឡោះគូស្នេហ៍នេះ មានសម្រស់នៅក្មេងស្រស់សង្ហា មិនចាញ់តារាសម្ដែងនោះទេ។
ពិតជាភ្ញាក់ផ្អើលបំផុតបង្ហោះរូបភាពស្និតស្នាលក្នុងដំណើរកម្សាន្ដនៅឯក្រៅប្រទេស និងក្នុងស្រុកជាមួយនឹងបុរសម្នាក់ដែលមានរូបរាងសង្ហា រាងខ្ពស់ស្រលះ ទម្រង់មុខកូនកាត់ចិន ស្បែកសថ្លា បានធ្វើមហាជនជាច្រើនបានសរសើរថា កញ្ញា ស៊ុន ស្រីពេជ្រ មិនត្រឹមតែពូកែច្រៀងទេ ថែមទាំងពូកែរើសដៃគូស្នេហាទៀតផង មើលចុះសង្ហាណាស់។
ដើម្បីឱ្យកាន់តែច្បាស់ សូមទស្សនារូបភាពទាំងឡាយខាងក្រោមនេះ ៖
April 3, 2018
ដាំមមាញលើដីជាង 30អា មួយថ្ងៃរកប្រាក់បានពី 20 ទៅ30ម៉ឺនរៀល
មមាញ គឺជារុក្ខជាតិអាហារមួយប្រភេទដែលប្រជាពលរដ្ឋខ្មែរយើងនិយមបេះយកដើមខ្ចីៗយកទៅធ្វើជាបន្លែជ្រក់ លាយជាមួយសណ្តែកបណ្តុះមានរសជាតិឆ្ងាញ់ពិសា ពិសេសញ៉ាំផ្ទាប់ជាមួយត្រីអាំង (ជាម្ហូបខ្មែរសុទ្ធ) ពិតជាមានឱជារសគួរឱ្យចង់ទទួលទានខ្លាំងណាស់។
កសិករដែលដាំដើមមមាញនៅភូមិក្បាលកោះ ឃុំកោះខ្សាច់ជន្លា ស្រុកស្អាង ខេត្តកណ្តាល គឺអ្នកស្រីឯក សៀកគីម បានឱ្យដឹងថា គ្រួសារគាត់បានប្រកបរបរដាំដើមមមាញលក់ អស់រយៈពេល 3ឆ្នាំមកហើយនៅលើផ្ទៃដី 50 គុណនឹង70ម៉ែត្រ។ ក្នុងមួយថ្ងៃអាចកាត់លក់បានចន្លោះពី20ម៉ឺនរៀល ទៅ30ម៉ឺនរៀល និងងាយស្រួលថែទាំជាងដំណាំដទៃទៀត ហើយថែមទាំងឆាប់ទទួលបានផលទៀតផង។
អ្នកស្រីបញ្ជាក់ថា ដាំដើមមមាញមិនសូវជាមានសត្វល្អិតមកយាយីនោះទេ គ្រាន់តែប្រើជីអាចម៌គោរោយលើថ្នាលពេលដាំដំបូង ហើយស្រោចទឹកឱ្យបានជាប់ជាប្រចាំ ត្រឹមតែរយៈពេល1ខែប៉ុណ្ណោះ ដើមមមាញនឹងផ្តល់ផលអាចច្រូតបាន មានម៉ូយមកទទួលទិញដល់ចម្ការ ឬយកទៅបោះឱ្យម៉ូយនៅផ្សារនាគមាសក្នុងក្រុងភ្នំពេញក៏បាន។
ចំពោះវិធីសាស្ត្រដាំដុះ មុនដំបូងគេគ្រាន់តែភ្ជួរដីហាលចោលមួយសប្តាហ៍ ដើម្បីឱ្យដីបានឆ្អិនល្អ សម្លាប់មេរោគ និងកុំឱ្យស្មៅដុះច្រើន រួចហើយគេលើកជាថ្នាល ចន្លោះមួយម៉ែត្រពីរងមួយទៅរងមួយទៀត បន្ទាប់មកទើបយកចំបើងទៅក្រាលពីលើស្តើងៗដើម្បីការពារឱ្យដីរក្សាសំណើមបានយូរ រួចទើបយកគ្រាប់មមាញទៅរោយពីលើថ្នាល ហើយស្រោចទឹកព្រឹក-ល្ងាច។ រយៈពេល 3ថ្ងៃគ្រាប់មមាញនឹងដុះពន្លកចេញស្លឹកពីរ បន្ទាប់ពីនោះមិនបាច់ស្រោចទឹកជាប្រចាំទេ ត្រូវស្រោចទឹកមួយថ្ងៃរំលងមួយថ្ងៃ ដោយមិនបាច់ថែទាំបាញ់ថ្នាំសម្លាប់សត្វល្អិតនោះទេ ព្រោះដើមមមាញមិនមានពពួកដង្កូវ ឬសត្វល្អិតផ្សេងៗមកយាយីច្រើនទេ ហើយត្រឹមតែមួយខែដើមមមាញក៏នឹងលូតលាស់ធំឡើង និងអាចកាត់យកទៅលក់បានហើយ។
អ្នកស្រីបន្ថែមថា ក្នុងទំហំដី 50ម៉ែត្រគុណនឹង 70ម៉ែត្រ គ្រួសារគាត់អាចច្រូតលក់បានចន្លោះពី200គីឡូក្រាម ទៅ300គីឡូក្រាមក្នុងមួយថ្ងៃ ដោយលក់ក្នុងតម្លៃ1,000រៀល ទៅ1,200រៀលក្នុងមួយគីឡូក្រាម ទៅតាមការកុម្ម៉ងទិញរបស់ម៉ូយ។ ដើមមមាញមិនមែនច្រូតលក់តែមួយដងហើយអស់នោះទេ ពេលច្រូតម្តងរួចហើយ ត្រូវស្រោចទឹកថែទាំដាក់ជីឡើងវិញម្តងទៀត ពេលនោះដើមមមាញនឹងបែកមែកលូតលាស់សាជាថ្មី និងអាចកាត់លក់បានទៀត។
ពោលគឺកាត់វិលជុំនៅលើផ្ទៃដីទំហំ 50គុណនឹង70ម៉ែត្រនេះ គេអាចកាត់មួយថ្ងៃខានមួយថ្ងៃបាន ប៉ុន្តែទោះយ៉ាងណាវាមានអាយុកាលត្រឹមតែពីរខែប៉ុណ្ណោះ ព្រោះពេលនោះដើមមមាញនឹងចាស់ លែងឱ្យផល តែគេអាចទុកឱ្យវាចេញផ្លែទុកធ្វើពូជបន្ត ឬយកគ្រាប់លក់បន្តបាន ដែលជាទូទៅគ្រាប់មមាញមួយគីឡូក្រាម មានតម្លៃពី 6ទៅ7ម៉ឺនរៀល។
ទោះយ៉ាងណា ក្រោយពីមមាញចាស់ដើម គេអាចភ្ជួរដីហាលចោលសាជាថ្មី ដើម្បីដាំវាឡើងវិញម្ដងទៀត ដោយប្រើរយៈពេលត្រឹមតែ1ខែដូចមុន ដើមមមាញថ្មីនឹងឱ្យហុចផលអាចកាត់លក់បានបន្តទៀតហើយ ឯតម្លៃទៀតសោតក៏នៅនឹងមិនសូវប្រែប្រួលទេ ពោលគឺនៅត្រឹម1,000រៀល ទៅ1,200រៀលក្នុងមួយគីឡូក្រាមរហូត ដោយសារតែមិនសូវមានអ្នកដាំច្រើន៕

April 3, 2018
ឥណ្ឌូណេស៊ី គំរាមបិទ Facebook បើសិនព័ត៌មានអ្នកប្រើប្រាស់ត្រូវបានរំលោភបំពាន និងបែកធ្លាយ
ហ្សាការតា៖ រដ្ឋមន្ត្រីទូរគមនាគមន៍ និងទំនាក់ទំនងឥណ្ឌូណេស៊ី លោក Rudiantara បានគំរាមបិទបណ្ដាញទំនាក់ទំនងសង្គមយក្ស Facebook ចោល បើសិនទិន្នន័យ ឬព័ត៌មានឯកជនរបស់អ្នកប្រើប្រាស់នៅក្នុងប្រទេសឥណ្ឌូណេស៊ី ត្រូវបានរំលោភបំពាន និងបែកធ្លាយ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters ចេញផ្សាយនៅព្រឹកថ្ងៃទី03 ខែមេសា ឆ្នាំ2018។
នៅក្នុងកិច្ចសម្ភាសន៍ជាមួយស្ថានីយទូរទស្សន៍ Bloomberg លោក Rudiantara បាននិយាយថា «ប្រសិនបើខ្ញុំតម្រូវឱ្យបិទ (Facebook) នោះខ្ញុំនឹងធ្វើវា»។ លោកបានបញ្ជាក់បន្ថែមទៀតថា «ខ្ញុំបានបិតកម្មវិធី Telegram ដូច្នេះខ្ញុំគ្មានអ្វីស្ទាក់ស្ទើក្នុងការបិទ (Facebook) នោះទេ»។
រដ្ឋមន្ត្រីជាន់ខ្ពស់រូបនេះ បានឱ្យដឹងទៀតថា ប្រសិនបើខ្លួនទទួលបានព័ត៌មានថា ទិន្នន័យនៃអ្នកប្រើប្រាស់ Facebook នៅឥណ្ឌូណេស៊ី ត្រូវបានរំលោភបំពាន នោះលោកនឹសម្រេចចិត្តបិទ Facebook។
គួរបញ្ជាក់ថា ថ្មីៗនេះ Facebook បានទទួលរងការចោទប្រកាន់ ថាបានអនុញ្ញាតឱ្យមានការលូកដៃចូលយកព័ត៌មានសម្ងាត់របស់អ្នកប្រើប្រាស់ប្រមាណជាង ៥០លាននាក់ ដែលទើបត្រូវបានបែកធ្លាយកាលពីខែមុននេះ ជាពិសេស លោក Mark Zuckerberg សហបិតាស្ថាបនិក និងនាយកប្រតិបត្តិ ក៏កំពុងប្រឈមមុខនឹងការឡើងស្រាយបំភ្លឺ មុខសភាអាមេរិក និងអង់គ្លេស ព្រមទាំងបានសុំទោសដល់ពិភពលោកទាំងមូលថែមទៀត ហើយក្រោយពីបែកធ្លាយព័ត៌មាននេះ បានធ្វើឱ្យ Facebook ខាតបង់ប្រាក់រាប់ពាន់លានដុល្លារ ក្នុងតម្លៃជាភាគហ៊ុន៕
April 3, 2018
ព្រះសង្ឃមួយអង្គពន្លះបទចម្រៀង ពេជ្រ សោភា « បីឆ្កែចូលរាំ » ថាជាមនុស្សឆ្កួត
នៅថ្ងៃទី 1 ខែមេសា ឆ្នាំ 2018 នេះ មានគណនីហ្វេសប៊ុកមួយបានបង្ហោះវីដេអូ និងរូបភាពដែលស្ដែងឱ្យគេឃើញពីព្រះសង្ឃមួយអង្គ មិនបានបញ្ចេញព្រះនាមច្បាស់ បានពន្លះតារាចម្រៀងស្រីប្រចាំផលិតកម្មរស្មីហង្សមាស អ្នកនាង ពេជ្រ សោភា ដែលបានចេញបទចម្រៀង « បីឆ្កែចូលរាំ » នោះជាមនុស្សឆ្កួត ដោយព្រះសង្ឃអង្គនេះ បានអះអាងពីរឿងទាល់តែស្ត្រីមានអត្តចរឹតវិកលមិនគ្រប់ទឹក ទើបបានជាបីឆ្កែចូលទៅរាំអីចឹង។
ខណៈកំពុងទេសនានៅក្នុងគេហដ្ឋានពុទ្ធបរិស័ទមួយកន្លែង ព្រះសង្ឃអង្គនោះ បានមានពុទ្ធដិកាសង្កត់ធ្ងន់ៗចំៗថា« បើគេកំពុងតែរាំសប្បាយគ្រប់គ្នា ហើយឯងបីឆ្កែចូលរាំ តើជាមនុស្សជាដែរឬអត់? មានតែមនុស្សឆ្កួត បានធ្វើបែបហ្នឹង គិតពិចារណាមើលផង » ។ មិនតែបានរិះគន់អំពីបទ « បីឆ្កែចូលរាំ » នោះទេ កាលពីឆ្នាំមុន តារាស្រី ពេជ្រ សោភា ក៏បានចេញបទចម្រៀង « ឆ្កែរត់បុកប៉ោត » ក៏ត្រូវព្រះសង្ឃមួយអង្គនេះ ពន្លះថា ជាមនុស្សឆ្កួតដូចគ្នាផងដែរ។
ស្របគ្នានោះដែរ អ្នកគាំទ្រ និងអ្នកលេងបណ្ដាញសង្គមហ្វេសប៊ុកជាច្រើននាក់ បានបញ្ចេញមតិប្រតិកម្មតបតទៅកាន់ព្រះសង្ឃអង្គនោះថា « ព្រះពុទ្ធសាសនាឥលូវ ភ្លាវអស់ហើយ ដោយសារបុគ្គលសង្ឃមួយចំនួនប្រព្រឹត្តខុសធម៌វិន័យ ដ៏អីចឹងប្រជាពលរដ្ឋខ្មែរលែងមានជំនឿហើយនិងប៉ះពាល់ដល់សង្ឃដែលល្អៗទៀត តេជគុណចង់ល្បីទេសនាប្លែក មិនទេសនាពីគុណឳពុកម្តាយ ទៅចេះវែកញែករឿងបីឆ្កែចូលរាំអីណា»។ ខ្លះទៀតបានលើកឡើងថា « មិនមែនលោកសង្ឃទេ មើលឫកវា យីគេនិមន្តឱ្យទៅសូត្រធម៌បែរជាទៅរិះគន់រឿងគេច្រៀង ច្រណែននិងឆ្កែមែន អាត្រងោលនេះធ្វើខូចសង្ឃគេអស់ហើយ គេបទឆ្កែព្រោះឆ្នាំច ហើយគេបីឆ្កែថាគេឆ្កួត អីចឹងអ្នកចិញ្ចឹមឆ្កែសុទ្ធតែឆ្កួត ហើយអ្នកលោកដែលយកឆ្កែមកនិយាយក៏វាឆ្កួតជាង ឆ្កែទៀត យីអាត្រងោល ហើយបងប្អូនជួយស្តាប់សម្តីលោកនេះ ស្រែកលឺៗដូចយូគោមបាតវត្ត យីអាត្រងោល ជួយshareអោយវាឃើញផង »៕
ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ ៖
April 3, 2018
សម្ពាធកំពុងកើតមានលើ Real និងលោក Zidane ពេលប៉ះ Juventus រាត្រីនេះ
សម្ពាធផ្សេងៗ នឹងត្រូវកើតមានឡើងចំពោះលោក Zinedine Zidane ម្តងទៀត នៅពេលដែលក្រុម Real Madrid របស់លោកត្រូវធ្វើដំណើរទៅកាន់ទីក្រុង Turin ក្នុងការប្រកួតដ៏សំខាន់នៅរាត្រីថ្ងៃអង្គារនេះ។ លោក Zidane បាននិយាយកាលពីសប្តាហ៍មុនថា លោកចង់បន្តដឹកនាំក្លិប Real ប៉ុន្តែ បច្ចុប្បន្នបំណងរបស់លោកនឹងត្រូវអាស្រ័យទៅលើការប្រកួតក្របខ័ណ្ឌ Champions League របស់ក្រុមដ៏ធំមួយនេះ ជាមួយនឹងក្រុម Juventus។
Real នឹងត្រូវប៉ះជាមួយអតីតក្លិបរបស់លោក Zidane ក្នុងការប្រកួតជើងទី1 នៃវគ្គ 8ក្រុមចុងក្រោយនារាត្រីនេះ ដោយដឹងថា រដូវកាលរបស់ពួកគេ និងអនាគតរបស់គ្រូបង្វឹកសញ្ជាតិបារាំងរូបនេះ នឹងស្ថិតលើការឈានទៅដល់វគ្គពាក់កណ្តាលផ្តាច់ព្រ័ត្រឬក៏អត់។ ការមានឱកាសយ៉ាងស្តួចស្តើងក្នុងការការពារពានក្របខ័ណ្ឌ La Liga រួមទាំងការធ្លាក់ចេញពីពាន Copa del Rey មានន័យថា បច្ចុប្បន្ន ពួកគេនៅសល់ត្រឹមតែ 1យុទ្ធនាការទៀតប៉ុណ្ណោះក្នុងការប្រជែងដណ្តើមពាននៅរដូវកាលនេះ។
ប៉ុន្តែ ទោះបីជាយ៉ាងណា ក្រុម Real កំពុងតែស្ថិតក្នុងទម្រង់លេងយ៉ាងល្អនាពេលថ្មីៗនេះ។ Real ដណ្តើមបានជ័យជម្នះ 10លើក ក្នុងចំណោមការប្រកួត 11លើកចុងក្រោយរបស់ពួកគេ ក្នុងនោះរាប់បញ្ចូលទាំងការយកឈ្នះលើក្រុម PSG ផងដែរ។ ពួកគេបានស៊ុតបាល់បញ្ចូលទី 36គ្រាប់ក្នុងការប្រកួតទាំង 11លើកនោះ ដែលមានន័យថា ជាមធ្យមពួកគេរកបាន 3គ្រាប់ក្នុងមួយប្រកួត។ ខ្សែប្រយុទ្ធ Lucas Vazquez បានឱ្យដឹងថា៖ «ការប្រកួតនេះកើតចំពេលដ៏ល្អសម្រាប់យើង។
យើងកំពុងតែស្ថិតក្នុងទម្រង់លេងយ៉ាងល្អក្នុងរយៈពេលប៉ុន្មានខែចុងក្រោយនេះ ដោយយើងបានលេងកាន់តែល្អ រកបានគ្រាប់បាល់កាន់តែច្រើន។ វាជាពេលវេលាដ៏ល្អមួយ ហើយបច្ចុប្បន្ន យើងត្រូវតែដណ្តើមយកប្រៀបក្នុងការប្រកួតនេះ»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕
ប្រភពពី៖ Sport24
April 3, 2018
មុនចូលឆ្នាំខ្មែរអ្នកភ្នំពេញនឹងបានធ្វើដំណើរតាមផ្លូវទឹកហើយ
ដើម្បីផ្តល់ភាពងាយស្រួលក្នុងការធ្វើដំណើរ និងកាត់បន្ថយការកកស្ទះចរាចរណ៍ ក៏ដូចជាការចំណាយពេលវេលាយូរក្នុងការធ្វើដំណើរក្នុងទីក្រុង ក្រសួងសាធារណការ និងដឹកជញ្ជូន គ្រោងនឹងដាក់ឱ្យដំណើរការកាណូតដឹកជញ្ជូនអ្នកដំណើរក្នុងក្រុងតាមផ្លូវទឹកនៅមុនឱកាសបុណ្យចូលឆ្នាំខ្មែរប៉ុន្មានថ្ងៃខាងមុខទៀតនេះហើយ។
តាមការប្រកាសរបស់ក្រសួងកាលពីសប្តាហ៍មុន បានឱ្យដឹងថា នាវាដឹកជញ្ជូនអ្នកដំណើរតាមផ្លូវទឹកពីព្រែកព្នៅទៅក្រុងតាខ្មៅដែលគ្រោងដាក់ឱ្យដំណើរការនាពេលឆាប់ៗនេះបានសម្រេច 95%ហើយ គិតត្រឹមចុងសប្តាហ៍មុននេះ។
លោក ចាន់ តារា អគ្គនាយកនៃអគ្គនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូន បានថ្លែងគូសបញ្ជាក់ប្រាប់ឱ្យដឹងនាថ្មីៗនេះថា ក្រុមការងារកំពុងតែសាងសង់ចំណតកំពង់ផែទាំង 5ទីតាំងដំណាលៗគ្នាដើម្បីឱ្យសម្រេចបានទៅតាមផែនការនៃការគ្រោងទុកដែលបានកំណត់ថានឹងដាក់ឱ្យដំណើរការមុនពេលពិធីបុណ្យចូលឆ្នាំខ្មែរមកដល់។
ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងកាលពីពេលថ្មីៗនេះថា រាជរដ្ឋាភិបាលកម្ពុជាគ្រោងដាក់ឱ្យដំណើរការសេវាដឹកអ្នកដំណើរទៅមកព្រែកព្នៅ-ភ្នំពេញ-តាខ្មៅ នៅថ្ងៃទី6 ខែមេសា ខាងមុខនេះ ដែលជាប្រវត្តិសាស្ត្រលើកដំបូង របស់កម្ពុជាដើម្បីចូលរួមចំណែកកាត់បន្ថយការកកស្ទះចរាចរណ៍តាមផ្លូវគោក និងបង្កើនសុវត្ថិភាពចរាចរណ៍ដល់អ្នកធ្វើដំណើរចូល-ចេញ និងឆ្លងកាត់រាជធានីភ្នំពេញជារៀងរាល់ថ្ងៃ។
លោកបន្តថា ការដាក់ឱ្យដំណើរការលើកដំបូងនៅថ្ងៃទី6 ខែមេសា ឆ្នាំ2018 ខាងមុខនេះ នឹងមានកាណូតដឹកអ្នកដំណើរចំនួន 3គ្រឿង ក្នុងនោះ 2គ្រឿងជាកាណូតរបស់ក្រុមហ៊ុន Royal Express Boat ដែលអាចផ្ទុកអ្នកដំណើរបាន 60នាក់ និង3គ្រឿងទៀតជាកាណូតរបស់កំពង់ផែស្វយ័តភ្នំពេញដែលកំពុងសាងសង់ដែលអាចផ្ទុកអ្នកដំណើរបាន 54នាក់ និងមានបំពាក់ដោយម៉ាស៊ីនត្រជាក់ និងពោងសុវត្ថិភាព។
ជាមួយកាណូត 3គ្រឿងជាជំហានដំបូងនេះនឹងធ្វើចរាចរផ្តល់សេវាដឹកអ្នកដំណើរដោយចេញដំណើរពីព្រែកព្នៅឆ្ពោះទៅក្រុងតាខ្មៅដែលមានចម្ងាយផ្លូវសរុបប្រមាណ 25គីឡូម៉ែត្រ និងចំណាយពេលវេលាធ្វើដំណើរជាមធ្យម 34នាទី មានចំណតផែចំនួន5 រួមមានចំណតផែព្រែកព្នៅ ទីលានប្រជាធិបតេយ្យថ្មី ផ្សាររាត្រី កោះពេជ្រ និងក្រុងតាខ្មៅ។
ឯកឧត្តមសង្ឃឹមថា ការដឹកជញ្ជូនអ្នកដំណើរក្នុងទីក្រុងតាមផ្លូវទឹកនេះនឹងបានចូលរួមចំណែកយ៉ាងសំខាន់ក្នុងដំណោះស្រាយការកកស្ទះ និងកាត់បន្ថយគ្រោះថ្នាក់ចរាចរណ៍ ព្រមទាំងធ្វើឱ្យចំណេញពេលវេលាក្នុងការធ្វើដំណើររបស់ប្រជាពលរដ្ឋទៀតផង៕
April 3, 2018
កញ្ញា ម៉ុក អានីត និងលោក ខេវិន ចេញវីដេអូបកស្រាយផ្ទាល់ពីករណីប្រធានសមាគមខ្មែរនៅកាណាដា
ក្រោយពីកញ្ញា ម៉ុក អានីត និងលោក ខេវិន ទទួលបានការអនុញ្ញាតិពីព្រះរាជអាជ្ញានិងយោបល់មេធារីដើម្បីចេញមុខបកស្រាយជុំវិញរឿងបទបរិហារកេរ្ត៏នឹងបង្ខូចកេរ្ត៏ឈ្មោះ ថ្មីនេះៗ តារាចម្រៀងទាំងពីរដួងនេះ បានចេញវីដេអូនៅលើបណ្ដាញទំនាក់ទំនងសង្គមហ្វេស លាតត្រដាងការពិតពីបុរសជាប្រធានសមាគមខ្មែរនៅកាណាដាលោក ឃុន ដេវិត ឱ្យបងប្អូនប្រជាពលរដ្ឋខ្មែរបានជ្រាបដឹងពីដំណើរហេតុដែលបានកើតឡើង ។
ក្រោយពេលផ្ទុះរឿងបរិហាកេរ្ដិ៍ខ្មាសរបស់កញ្ញា ម៉ុក អានីត ដែលត្រូវបានលោក ឃុន ដេវិត ឬមានឈ្មោះ ទន់ ពូន បានបង្ហោះនៅលើបណ្ដាញហ្វេសប៊ុករួចមក តារាស្រីរូបនេះ បានដាក់ពាក្យបណ្ដឹងនៅកាន់សមត្ថិកិច្ច និងផ្ដល់សិទ្ធិជូនមេធាវីដើម្បីដោះស្រាយរឿងនោះទៅតាមនិតិវិធីច្បាប់។ យ៉ាងណាមិញ លោក ខេវិន បានសង្កត់ធ្ងន់នៅលើហ្វេសប៊ុកផ្ទាល់ខ្លួនថា « នេះឬលោកប្រធានសមាគមល្បីក្នុងFacebook? សរសេលើអត្ថបទ Account របស់ខ្លួនឯងអសិលធម៌បែបនឹង អត្តអន់ជាងសត្វឆ្កែតិឆ្ឆានទៅទៀត ហើយអួតលើកតម្កើនខ្លួនឯងខ្ពស់ពេកហើយនេះទទួលយកអត់បានទេ តើឪពុកម្ដាយលោកឯងបានប្រដៅលោកឯងអត់???បានជាមើលងាយមនុស្សីដល់ថ្នាក់និង។ នេះសរបញ្ចក់ឱ្យឃើញពីចរិកដ៏ថោកទាបបំផុតខ្វះសុជិវៈធម៌គ្មានការអប់រំគ្មានម៉ែឪប្រដៅ ចាស់ហើយនៅភ្លីភ្លើទៀត ក្រែងតាកណ្ដុលធ្លាក់ឯងកើតពីមនុស្សស្រីដែរ ឬក៏កើតដូចស៊ិនអូខុង អត់មានម៉ែមានឪនឹងគេ បានជាហ៊ានប្រមាថមនុស្សីដល់ថ្នាក់នឹង កុំលាបពណ៏គេយកឈ្មោះប្រធានសមាគមន៏គេល្អពិតប្រកដជួយសង្គមទៅជាន់ឈ្លីធ្វើឱ្យមហាជនគេច្រឡំព្រោះតាកណ្ដុលធ្លាក់ទឹកឯងសោះ »។
លោក បន្ដបញ្ជាក់បន្ថែមទៀតថា « ប្រធានសមាគមល្អពិតប្រាកដ គេបើកសមាគមដើម្បីជួយខ្មែរលើកតម្កើនជាតិនឹងពូជសាសន៍ខ្លួនឯង មិនមែនដូចតាឯងបោះឆ្នោតមា្នក់ឯង ជាប់ម្នាក់ឯង ចាត់តាំងខ្លួនឯង ស៊ីញ៉េម្នាក់ ហើយសម្មត់ថាខ្លួនជាប្រធានសង្គមខ្មែរកាដាណា ជាឈ្លើងជាចៃសង្គមទើបត្រឹមត្រូវជាង ត្រៀមខ្លួនឱ្យហើយទៅ ឈប់អោយគេអង្វរអោយពួកខ្ញុំដកពាក្យបណ្ដឹងទៀតទៅ No way No way
ចាស់ចំណាស់ហ្នឹងហ៊ាន Selfie ខ្លួនឯងហើយសរសេរពាក្យភាសាបាតផ្សារ posted ឱ្យគេមើលខ្លាចគេគិតថាខ្លួនឯងមិនមែនឆ្កែ ជួយ Share ឱ្យតានឹងល្បីនឹងពីភពលោកបានឃើញទង្វើដ៏លាមកថោបទាបបំផុតរបស់តាហ្នឹង(The Guy very crook man) »។
ខាងក្រោមនេះ គឺជាវីដេអូបកស្រាយផ្ទាល់របស់កញ្ញា ម៉ុក អានីត និងលោក ខេវិន ដែលបានលាតត្រដាងរឿងពិតជូនមហាជនបានជ្រាបដឹង ដើម្បីឱ្យកាន់តែជាក់ច្បាស់ សូមទស្សនាវីដេអូខាងក្រោមនេះ៖
April 3, 2018