Category: សង្គម និងសេដ្ឋកិច្ច

វិធីបោកសម្អាតខ្នើយ តើត្រូវបោកយ៉ាងណាឱ្យឡើងសស្អាតដូចថ្មី?
ខ្នើយកើយ គឺជាវត្ថុមួយដែលបងៗស្ត្រីមេផ្ទះ និងសមាជិកក្នុងគ្រួសារត្រូវតែប្រើប្រាស់រៀងរាល់ថ្ងៃ ហើយអ្វីដែលសំខាន់នោះ គឺខ្នើយត្រូវប៉ះនឹងផ្ទៃមុខរបស់អ្នកគ្រប់ពេលដែលអ្នកគេងសម្រាក ដូច្នេះហើយទើបអ្នកចាំបាច់ខ្លាំងណាស់ត្រូវតែឧស្សាហ៍បោកគក់សម្អាតឱ្យបានញឹកញាប់ ដើម្បីការពារវត្ថុកខ្វក់ផ្សេងៗទាំងនោះមិនឱ្យមកប៉ះដល់រាងកាយរបស់អ្នកបាន។
ការបោកសម្អាតខ្នើយកើយ និងខ្នើយគង គឺជារឿងសំខាន់មួយ តែសម្រាប់វិធីការថែទាំក៏មានភាពសំខាន់មិនចាញ់គ្នាប៉ុន្មានដែរ។ ខាងក្រោមនេះ គឺជាវិធីបោកសម្អាតខ្នើយតាមបែបផ្សេង ដែលបងៗស្ត្រីមេផ្ទះគួរតែយល់ដឹង ដើម្បីភាពស្អាតមានអនាម័យ និងសុខភាពល្អរបស់សមាជិកក្នុងគ្រួសារ និងខ្លួនឯងផ្ទាល់។
• ការបោកសម្អាតខ្នើយថ្មី
សម្រាប់ខ្នើយដែលទើបតែទិញមកថ្មីៗ ចាំបាច់ណាស់ត្រូវតែបោកសម្អាតជាមុនសិន មុននឹងយកមកប្រើ ដោយវិធីការបោកគក់ក៏អាចធ្វើឡើងដោយការប្រើម៉ាស៊ីនបោកគក់បានដែរ។ ដោយមុនដំបូងចូរយកម្សៅសាប៊ូប្រមាណជា 1កូនពែង លាយជាមួយទឹកថ្នាំដាក់ឱ្យស 1/2កូនពែង និងម្សៅបេកគីងសូដា 1/2កូនពែង ដាក់
ត្រាំនៅក្នុងទឹកក្ដៅរយៈពេល20នាទី រួចហើយសឹមយកទៅដាក់ចូលក្នុងម៉ាស៊ីនបោកគក់ ដើម្បីបោកតាមធម្មតា រួចហើយទើបយកទៅដាក់ហាលឱ្យស្ងួត។
• ការបោកសម្អាតខ្នើយធ្វើពីអេប៉ុង
គឺជាខ្នើយដែលមនុស្សជាច្រើនជ្រើសរើសប្រើ តែរឿងដែលសំខាន់នោះគឺ ដោយសារតែវាមិនអាចបោកសម្អាតដោយម៉ាស៊ីនបោកគក់បាន ដូច្នេះហើយទើបត្រូវបោកសម្អាតដោយការដោះស្រោមចេញមកបោកដោយឡែក និងសម្រាប់អេប៉ុងវិញអាចធ្វើការសម្អាតដោយការប្រើម៉ាស៊ីនបូមធូលីចេញ ហើយបន្ទាប់ពីនោះអាចប្រើផលិតផលកម្ចាត់ស្នាមប្រឡាក់ វែនីស ដើម្បីកម្ចាត់ស្នាមប្រឡាក់ផ្សេងៗ ហើយសឹមលាងចេញដោយទឹកស្អាត និងជូតផ្ដិតដោយកន្សែងពោះគោ រួចហើយទើបយកទៅដាក់ហាលថ្ងៃឱ្យស្ងួត។
• ការបោកសម្អាតខ្នើយដែលប្រឡាក់ញើសឡើងពណ៌លឿង
សម្រាប់ខ្នើយដែលប្រឡាក់ឡើងពណ៌លឿងនេះគឺជារឿងធំណាស់ តែក៏អាចចាត់ការបញ្ហានេះបានយ៉ាងងាយដែរ ដោយការយកខ្នើយនោះទៅដាក់ត្រាំនៅក្នុងទឹកក្ដៅ រួមទាំងដាក់ម្សៅសាប៊ូ 1ពែង ទឹកសាប៊ូលាងចានមួយពែង ម្សៅបូរែកស៍(អាចរកទិញបាននៅក្នុងហាង និងផ្សារទំនើប) 1/2ពែង ត្រាំទុកចោលរយៈពេល30នាទី រួច
ហើយទើបបោកគក់នឹងដៃតាមធម្មតា ឬដាក់បោកក្នុងម៉ាស៊ីនរហូតដល់ស្នាមលឿងៗទាំងនោះរលាយបាត់អស់។
• ការបោកសម្អាតខ្នើយដែលដុះផ្សិត
ខ្នើយដែលកខ្វក់ឡើងដុះផ្សិត គឺជារឿងធំមួយទៀតដែលចាំបាច់យ៉ាងខ្លាំងត្រូវតែយកចិត្តទុកដាក់ តែក៏អាចធ្វើការបោកសម្អាតបានដោយងាយដែរ ដោយចាប់ផ្ដើមពីការយកខ្នើយនោះមកដាក់ត្រាំនៅក្នុងទឹកក្ដៅ ហើយបន្ថែមទឹកថ្នាំហាយដ្រូជេន ភើរ៍អុកសាយដ៍(Hydrogen Peroxide) 1ពែង បន្ទាប់មកដាក់ទឹកសាជូរចូលទៅ 1/2ពែង រួចត្រាំទុកចោល។ បន្ទាប់ពីនោះមកទើបបន្ថែមម្សៅបេកគីងសូដា និងបន្ថែមទឹកសាជូរចូលទៅទៀត រួចហើយសឹមបន្តក់ទឹកប្រេងក្រអូបចូលទៅបន្តិច។ បន្ទាប់ពីកម្ចាត់មេរោគផ្សិតរួចហើយ ទើបយកទៅបោកសម្អាតតាមប្រក្រតី។
ចំណេះដឹងបន្ថែម
បងៗស្រីមេផ្ទះជាច្រើនតែងនឹកឆ្ងល់ថា ក្នុងការបោកសម្អាតក្រណាត់ផ្សេងៗ ហេតុអ្វីចាំបាច់ត្រូវកំណត់សីតុណ្ហភាពទឹក(ទឹកក្ដៅ)? ព្រោះថា ការបោកគក់ខោអាវ ឬក្រណាត់ផ្សេងៗដោយប្រើទឹកដែលមានសីតុណ្ហភាព 40 អង្សានោះគឺ ដោយសារតែទឹកក្ដៅមានប្រសិទ្ធភាពក្នុងការសម្លាប់មេរោគផ្សេងៗ រួមទាំងអាចកម្ចាត់ស្នាមប្រឡាក់ផ្សេងៗបានយ៉ាងល្អ ដែលនឹងធ្វើឱ្យយើងកាន់តែងាយបោកគក់សម្អាតបានកាន់តែស្អាតឡើង៕
April 4, 2018
បើគ្មានអ្វីប្រែប្រួល ធនាគារ SMEs នឹងកើតនៅឆ្នាំ2019
ភាពបរាជ័យលើការដោះស្រាយឧបសគ្គក្នុងការអភិវឌ្ឍសហគ្រាសខ្នាតតូច និងមធ្យមអស់រយៈពេលជាច្រើនឆ្នាំ ដោយម្ចាស់សហគ្រាសក្នុងស្រុកបានត្អូញត្អែរឥតល្ហែអំពីការខ្វះលទ្ធភាពពង្រីកអាជីវកម្មរបស់ខ្លួននោះ រាជរដ្ឋាភិបាលកម្ពុជាទំនងជាអាចនឹងបង្កើតធនាគារសម្រាប់សហគ្រាសធុនតូច និងមធ្យមនេះជាផ្លូវការនៅឆ្នាំ2019។ “ដំណើរការកសាងនីតិវិធីកំពុងត្រូវបានរៀបចំ…” នេះតាមការអះអាងរបស់ ឯកឧត្តមវង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ។
ការបង្ហាញពីជំហរបង្កើតធនាគារ SMEs នេះ ត្រូវបានថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុអះអាងថា បន្ទាប់ពីមើលឃើញពីគម្លាតខ្លាំងនៃការអភិវឌ្ឍអាជីវកម្មនៅក្នុងប្រទេសកម្ពុជា ដែលខ្វះការផ្សារភ្ជាប់រវាងសហគ្រាសតូច និងសហគ្រាសធំនោះ។ ការបង្ហាញពីដំណើរការបង្កើតធនាគារនេះ បានធ្វើឡើងក្រោយពីប្រមុខរាជរដ្ឋាភិបាលកម្ពុជា សម្តេចនាយករដ្ឋមន្ត្រី ហ៊ុនសែន បានប្រកាសជាសាធារណៈលើកដំបូងកាលពីចុងឆ្នាំ2017។
ឯកឧត្តម វង្សី វិស្សុត បានថ្លែងថា រដ្ឋមិនចង់លួកដៃចូលក្នុងការបង្កើតធនាគារមួយនេះទេ ប៉ុន្តែក្នុងល្បឿននៃការអភិវឌ្ឍសង្គមរយៈពេលប្រមាណ 20ឆ្នាំកន្លងមកនេះ វិស័យឯកជន និងវិស័យហិរញ្ញវត្ថុឯកជនមិនបានបំពេញគម្លាតនៃការអភិវឌ្ឍនេះទេ ដែលបណ្តាលឱ្យមានវិស័យសហគ្រាសខ្នាតតូចបំផុតច្រើន និងសហគ្រាសធំៗក៏មានច្រើនដែរ។
ឯកឧត្តម វង្សី វិស្សុត បានបញ្ជាក់ថា៖ “ប្រព័ន្ធធនាគារយើងសព្វថ្ងៃនេះ មានតែធំបំផុត និងតូចបំផុត ប៉ុន្តែធនាគារថ្នាក់កណ្តាលបែជាអត់មាន ក្នុងផ្នែកសេដ្ឋកិច្ចក៏បែបហ្នឹង ក្នុងវិស័យហិរញ្ញវត្ថុក៏បែបហ្នឹង។
បើតាមប្រសាសន៍ ឯកឧត្តម វង្សី វិស្សុត ធនាគារ SMEs នឹងត្រូវបង្កើតឡើងនៅឆ្នាំ2019 បើសិនគ្មានអ្វីប្រែប្រួលទេនោះ ហើយធនាគារនេះនឹងនាំមុខក្នុងការជំរុញការអភិវឌ្ឍ ដើម្បីទាក់ទាញការចូលរួមពីផ្នែកហិរញ្ញវត្ថុឯកជន។ “អត្រាការប្រាក់ និងលក្ខខណ្ឌត្រូវតែពិសេសជាងធនាគារ និងគ្រឹះស្ថានមីក្រូហិរញ្ញវត្ថុដែលមាននាពេលបច្ចុប្បន្ន។
កាលពីថ្ងៃទី20 ខែធ្នូ ឆ្នាំ2017 សម្តេច ហ៊ុន សែនធ្លាប់បានប្រកាសថា រាជរដ្ឋាភិបាលកម្ពុជានឹងឈានទៅបង្កើតធនាគារថ្មីមួយទៀតសម្រាប់ផ្តល់ឥណទានដល់សហគ្រាសធុនតូច និងមធ្យម ដោយចាប់ផ្តើមពីដើមទុន 100លានដុលា្លរអាមេរិក។
ប្រមុខរដ្ឋាភិបាលបានអះអាងនៅពេលនោះថា គម្រោងបង្កើតធនាគារថ្មីមួយទៀតនេះ គឺដើម្បីបង្កើនការផលិតក្នុងស្រុក បម្រើសេចក្តីត្រូវការរបស់ប្រជាពលរដ្ឋ និងជំរុញការនាំចេញ ព្រមទាំងបង្កើនឱកាសការងារកាន់តែច្រើនទៀតសម្រាប់ប្រជាពលរដ្ឋ។
យោងតាមប្រកាសរបស់ក្រសួងឧស្សាហកម្ម និងសិប្បកម្ម សហគ្រាសធុនតូច គឺជាសហគ្រាសដែលមានកម្លាំងពលកម្មចាប់ពី 10នាក់រហូតដល់ 49នាក់ ជាមួយដើមទុនចាប់ពី 1ម៉ឺនដុល្លាររហូតដល់ 19.9ម៉ឺនដុល្លារ រីឯសហគ្រាសធុនមធ្យម គឺជាសហគ្រាសដែលមានកម្លាំងពលកម្មចាប់ពី 50នាក់រហូត 199នាក់ ជាមួយដើមទុនចាប់ពី 20ម៉ឺនដុល្លារ រហូតដល់ជិត 1លានដុល្លារ។
យោងរបាយការណ៍របស់ធនាគារជាតិនៃកម្ពុជា ការផ្តល់កម្ចីដល់ផ្នែកសិប្បកម្ម ឬឧស្សាហកម្មកែច្នៃ (កម្មន្តសាល) មានត្រឹមតែ 6.3%ប៉ុណ្ណោះនៃកម្ចីឥណទានសរុបដែលបានផ្តល់ដល់ផ្នែកជាច្រើនដូចជា ការជួញដូររាយស្មើការជួញដូរដុំ កសិកម្ម រុក្ខាប្រមាញ់ និងនេសាទ សំណង់ ការទិញផ្ទះផ្ទាល់ខ្លួន ការជួញដូរអចលនទ្រព្យ សណ្ឋាគារ និងភោជនីយដ្ឋាន និង វិស័យលម្អិតជាច្រើនទៀត៕
April 4, 2018
អ្នកវិទ្យាសាស្ត្រទទួលស្គាល់ថា ភាពឯកាអាចជះផលអាក្រក់ដល់សុខភាព
ដោយសារតែការវិវឌ្ឍរបស់ពិភពលោក មនុស្សម្នាក់ៗបានចាប់ផ្តើមមានការរវល់ខ្លាំងជាមួយនឹងការងារ ការសិក្សា អាជីវកម្ម និងបច្ចេកវិទ្យា ធ្វើឱ្យពួកគេកាន់តែឃ្លាតឆ្ងាយពីទំនាក់ទំនងដោយផ្ទាល់ជាមួយមនុស្សដទៃ ខណៈគ្រួសារខ្លះទៀតមានការជួបជុំគ្នាតិចបំផុត។
Share of adults reporting they felt lonely some/all of the time in the United Kingdom (UK) in November 2014, by age group
ជាឧទាហរណ៍ជាក់ស្តែង អ្នកស្រាវជ្រាវបាននាំអ្នកទាំងអស់គ្នាឱ្យមើលទៅលើជីវិតស្ត្រីម្នាក់ដែលមានអាយុ 60ឆ្នាំដែលកំពុងមានបញ្ហាផ្នែកផ្លូវកាយ ហើយធ្លាក់ចុះទ្រុឌទ្រោមយ៉ាងឆាប់រហ័ស។ គាត់ប្រហែលជាអាចចាប់ផ្តើមពីអាការឈឺឆ្អឹងខ្នង បន្ទាប់មកឈឺក្បាលម្តងម្កាល ហើយមានអារម្មណ៍ថា សុខភាពរាងកាយចុះទ្រុឌទ្រោមជាបន្តបន្ទាប់។ ពេលខ្លះគាត់បានទៅធ្វើតេស្តសុខភាព ហើយវេជ្ជបណ្ឌិតបែរជារកមិនឃើញអាការដែលខុសប្លែក ឬបញ្ហាផ្នែកសុខភាពរាងកាយនោះទេ តែគាត់នៅតែមានបញ្ហាសុខភាព។
បញ្ហាទាំងអស់នេះប្រហែលជាអាចកើតមានឡើងចំពោះប្រជាជនខ្មែរយើងមួយចំនួនដូចគ្នា ដែលមានអាការមិនស្រួល ឬមិនស្រណុកក្នុងខ្លួន តែពេលទៅដល់មន្ទីរពេទ្យ បែរជារកមិនឃើញមានរោគសញ្ញាអ្វីគួរឱ្យកត់សម្គាល់នោះទេ។
បន្ទាប់ពីគេបានស្រាវជ្រាវលម្អិតពីប្រវត្តិរបស់អ្នកជំងឺរួចមក គេបានរកឃើញថា គាត់ធ្លាប់ជាមនុស្សដែលបានបាត់បង់ប្តីកាលពី 5ឆ្នាំមុន ហើយរស់នៅតែម្នាក់ឯងតាំងពីពេលនោះរហូតមក ខណៈដែលកូនរបស់គាត់ចំនួន 3នាក់សុទ្ធតែទៅរស់នៅឆ្ងាយពីគាត់ទាំងអស់។ អ្នកជំងឺបានជួបនឹងកូនចៅរបស់គាត់តែម្តងប៉ុណ្ណោះក្នុងមួយឆ្នាំ ហើយសម្រាប់មិត្តភ័ក្តិរបសគាត់វិញ គឺបានជួបគ្នាតែក្នុងឱកាសពិសេសៗម្ដងម្កាលតែប៉ុណ្ណោះ ដែលជាហេតុធ្វើឱ្យគាត់ចំណាយពេលនៅផ្ទះតែម្នាក់ឯងច្រើនជាងជួបមនុស្សដទៃ។
ជាការសន្និដ្ឋានក្នុងរឿងនេះ និងលទ្ធផលនៃស្រាវជ្រាវលើអ្នកជំងឺផ្សេងទៀត គេសង្កេតឃើញថា បញ្ហាចុះទ្រុឌទ្រោមខាងផ្លូវចិត្ត និងសុខភាពរាងកាយទាំងអស់នេះ បណ្តាលមកពីការបាត់បង់ទំនាក់ទំនងជាមួយមនុស្សដទៃ និងមានភាពតានតឹងធុញទ្រាន់ក្នុងអារម្មណ៍ (strees & boredom)។ ដោយក្នុងការស្រាវជ្រាវនោះបានបង្ហាញយ៉ាងច្បាស់ថា អ្នកដែលមានភាពឯកា ច្រើនមានបញ្ហាប្រឈមផ្នែកសុខភាពកាយ និងចិត្តខ្ពស់ជាងមនុស្សធម្មតា ហើយឆាប់ចុះទ្រុឌទ្រោមមុនអាយុ។
តាមរយៈការស្រាវជ្រាវនៅសាកលវិទ្យាល័យ Brigham Young University ដែលផ្តោតការសិក្សាលើមនុស្សជាច្រើននាក់ផ្សេងៗគ្នាដែលកំពុងរស់នៅក្នុងស្ថានភាពឯកា និងរស់នៅដាច់ពីគេនោះ បានបង្ហាញឱ្យឃើញថា 50%នៃពួកគេបានស្លាប់មុនអាយុកំណត់។ ភាពឯកា និងការរស់នៅឆ្ងាយពីសង្គម ក៏មានការពាក់ព័ន្ធនឹងបញ្ហាលើសឈាម ឡើងជាតិកូលេស្តេរ៉ូល និងជំងឺតានតឹងធុញថប់អារម្មណ៍ដែរ ប្រសិនបើពួកគេគេងសម្រាកមិនបានគ្រប់គ្រាន់ ដែលងាយនឹងធ្វើឱ្យសុខភាពធ្លាក់ដុនដាបយ៉ាងឆាប់រហ័សជាងមនុស្សដែលមានកម្លាំងចិត្តរឹងមាំទៅទៀត៕
April 4, 2018
ម៉ៃ សុគន្ធ រិះគន់បទចម្រៀងរបស់ក្មេងខ្មែរ
ក្រោយពេលដែលក្មេងខ្មែរបានបង្ហោះចម្រៀងសម្រាប់ស្វាគមន៍កម្មវិធីបុណ្យភូមិ ដែលមានចំណងជើងថា « កំឡោះទាំងបី » ក៏ទទួលបានការគាំទ្រស្នាដៃយ៉ាងភ្លូកទឹកភ្លូកដី ដោយពោលសរសើរថា ទាំងពីរោះ និងមានអត្ថន័យ ។ ក៏ប៉ុន្ដែ ដោយឡែក ថ្មីៗនេះ តារាចម្រៀង ម៉ៃ សុគន្ធ បានបង្ហោះរូប និងសាររិះគន់ MV ចម្រៀងខាងលើនេះយ៉ាងចាស់ដៃទៅវិញ។
នៅក្នុងសារ និងរូបភាពមានគូររង្វង់ក្រហម បានបញ្ជាក់ថា« មិនដឹងថា ក្មេងទាំង2នាក់ហ្នឹង បទគាត់ចង្វាក់អីអោយប្រាកដវៃ hip hop មិនចំម hip hop តែបើថា សារ៉ាវ៉ាន់ មិនចំមសារ៉ាវ៉ាន់ រាំវង់ក៏មិនចំ ថាម៉ាឌីហ្សុនក៏មិនត្រូវ ចង្វាក់អីទៅណ៎ ប្រាប់ផងអ្នកដឹង Original Song សម័យនេះ ខ្មែរអើយខ្មែរ អូភ្លេច បើកបរអត់ពាក់មួកសុវត្តិភាពជិះគ្នាបីនាក់ទៀត »៕
April 4, 2018
សុខ សុម៉ាវត្តី និយាយរឿងឈុតរបស់សិស្សនៃវិទ្យាល័យហ៊ុនសែនប៊ុនរ៉ានីវត្តភ្នំ
បន្ទាប់ពីមហាជនអ្នកលេងហ្វេសប៊ុក បាននាំគ្នារិះគន់ចំពោះសិស្សនុសិស្សនៃវិទ្យាល័យហ៊ុនសែនប៊ុនរ៉ានីវត្តភ្នំ នាំគ្នាស្លៀកសម្លៀកបំពាក់ឈុតបុរាណថៃ ហើយអះអាងថាខ្លួនស្លៀកឈុតបុរាណខ្មែរសម័យលង្វែកនោះ បានធ្វើឱ្យភ្ញាក់ផ្អើអស់បណ្ដាញសង្គមហ្វេសប៊ុក។ មតិភាគច្រើនបានលើកឡើងថា ខ្មែរមួយចំនួនតូចនេះប្រហែលជាឈ្លក់វង្វេងមើលរឿងថៃពេកទេដឹង បានជាមិនស្គាល់សំលៀកបំពាក់សៀម ហើយពោលថាជារបស់ខ្មែរទៅវិញ។
យ៉ាងណាមិញតារាស្រី សុខ សុម៉ាវត្តី បានស្ដែងចំណាប់អារម្មណ៍នៅលើគណនីហ្វេសប៊ុករបស់ខ្លួនថា «ខុសខ្លះត្រូវខ្លះលើកលែងគ្នាទៅហើយប្រាប់ទៅថាវាខុសកន្លែងណាត្រូវខុសកន្លែងណា សំខាន់កុំបំបាក់ទឹកចិត្តក្មេងទោះយ៉ាងណាក៏គ្នាលើកយករបស់សំខាន់ដែលបំភ្លេចត្រលប់មកវិញដែរ មិនដូចអ្នកខ្លះបានតែរិះគន់ហៃអើតែមិនបានជួយអី មិននិយាយច្រើនសុំនិយាយតែមួយម៉ាត់ « ខ្មែរលួចបច្ចុប្បន្ន សៀមប្លន់អតីតកាល » សង្ឃឹមថាអ្នកទាំងអស់គ្នាយល់ហើយខំការពារអតីតកាលយើងត្រលប់មកវិញ» ៕
April 4, 2018
តែមួយយប់ អាជ្ញាធរចិនចាប់ទូរស័ព្ទ iPhone រត់ពន្ធសរុប 80លានដុល្លារ
ចិន៖ ថ្មីៗនេះ អាជ្ញាធរចិនបានបង្ក្រាបករណីរត់ពន្ធទូរស័ព្ទ iPhone ចំនួនដ៏ច្រើនសន្ធឹកមួយ ពីទីក្រុងហុងកុងចូលទៅកាន់តំបន់ផ្សេងៗនៅក្នុងប្រទេសចិន ដែលសរុបជាទឹកប្រាក់មានរហូតដល់ 80លានដុល្លារអាមេរិក។ នេះបើយោងតាមការចេញផ្សាយរបស់ទីភ្នាក់ងារសារព័ត៌មានចិន ស៊ិនហួ។
យោងតាមការចេញផ្សាយរបស់ស៊ិនហួ បានឱ្យដឹងថា នេះជាករណីបង្ក្រាបការរត់ពន្ធទូរស័ព្ទ iPhoneក្នុងទ្រង់ទ្រាយដ៏ធំបំផុតមួយដែលមិនធ្លាប់មាន ពីមុនមកឡើយសម្រាប់ប្រទេសចិន ដែលនៅក្នុង នោះមានមនុស្ស 26នាក់ត្រូវបានឃាត់ខ្លួន។ ក្រុមអ្នករត់ពន្ធទូរស័ព្ទ iPhone បានប្រើប្រាស់យន្តហោះ Drone ដឹកទូរស័ព្ទ iPhone ឆ្លងកាត់ព្រំដែនហុងកុង-ចិន ដោយសកម្មភាពនេះត្រូវបានធ្វើឡើងនៅវេលាយប់ពាក់កណ្ដាលអាធ្រាត្រ ដោយក្នុងនោះមានទូរស័ព្ទ iPhone ប្រមាណជា 15,000គ្រឿង ត្រូវបានរត់ពន្ធក្នុងរយៈពេលតែមួយយប់ប៉ុណ្ណោះ។
គួរបញ្ជាក់ផងដែរថា ហុងកុងគឺ ជាទីផ្សារដ៏ធំបំផុតមួយដែលមានករណីរត់ពន្ធទូរស័ព្ទ iPhone ចូលទីផ្សារប្រទេស ចិនច្រើនជាងគេ ដោយកាលពីឆ្នាំ2015 មានបុរសម្នាក់ត្រូវបានឃាត់ខ្លួន ក្នុងករណីរត់ពន្ធទូរស័ព្ទ iPhone នេះដែរ ដោយនៅពេលនោះ ក្រោយពីធ្វើការឆែកឆេរលើខ្លួនគេរួចមក អាជ្ញាធរបានរកឃើញទូរស័ព្ទ iPhone ចំនួនដល់ទៅ 94គ្រឿង ឯណោះ៕
April 4, 2018
សាន ផានិត ប្រដៅជនជាប់ចោទ ឡាយ វណ្ណៈ នៅលើបណ្ដាញសង្គមហ្វេសប៊ុក
កាលពីម្សិលមិញ អតីតតារាចម្រៀងដែលធ្លាប់មានកេរ្ដិ៍ឈ្មោះល្បីកាលពីទសវត្សរ៍ឆ្នាំ 90 លោក សាន ផានិត បានបង្ហោះរូប ព្រមទាំងសារនិយាយស្ដីថាឱ្យ លោក ឡាយ វណ្ណៈ ក្រោយមានការឃុំខ្លួន ដោយមិនប្រណីមាត់ថា «ពេលដែលអ្នកនៅមានជីវិតល្អ ជាបុគ្គលសាធារណៈ នៅមានពេលវេលាច្រើនធ្វើរឿងដែលត្រឹមត្រូវ កុំពុលនឹងលុយ នឹងអំណាច ចំណាយសប្បាយតែលើស្រីស្អាត និងនៅឆ្ងាយពីអ្នកក្រ និងគ្រួសារខ្លាំងពេក យើងមិនដឹងថា តើនឹងមានអ្វីកើតឡើងនៅថ្ងៃស្អែកសម្រាប់យើងឡើយ យ៉ាងហោចណាស់ក៏អ្នកនៅសល់រូបថតល្អៗ ទុកផូស្តក្នុងហ្វេសប៊ុក ទុកជាទ្រព្យដល់កូនៗ និងសង្គមជាតិផង ឥឡូវឃើញទេ? ថ្ងៃនេះអ្នកមានបញ្ហារឿងស្រី អ្នកផ្សេងទៀតដែលអ្នកធ្លាប់ឱ្យលុយ និងបក្ខពួកបូសក្លៀកគេនៅណា៎? ទីបំផុតមានតែប្រពន្ធកូន និងម្តាយឪពុក ដែលអ្នកតែងតែកុហកគាត់រហូតមកប៉ុណ្ណោះ ដែលកំពុងគិតដល់អ្នក ហើយមិនបោះបង់ អូ! នៅមានទៀត គីពលរដ្ផរបស់អ្នក បើអ្នកជាមេខេត្តដ៏ល្អកន្លងមក»៕

April 4, 2018
Ronaldo រកបានគ្រាប់បាល់ដ៏អស្ចារ្យ ខណៈ Thiago សង្គ្រោះ Bayern
តារាឆ្នើម Cristiano Ronaldo បានស៊ុតបាល់បញ្ចូលទី 2គ្រាប់ ក្នុងនោះរាប់បញ្ចូលទាំងគ្រាប់បាល់ដ៏ល្អតាមរយៈការស៊ុតបករំលងក្បាលមួយគ្រាប់ផងដែរ ខណៈដែលក្រុម Real Madrid បានបោះជំហានយ៉ាងកៀកឆ្ពោះទៅកាន់វគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីថ្ងៃអង្គារ តាមរយៈការផ្តួលក្រុមម្ចាស់ផ្ទះ Juventus 3-0 ក្នុងការប្រកួតជើងទី1 នៃវគ្គ 8ក្រុមចុងក្រោយ។
ស្របពេលជាមួយគ្នានេះ ក្រុម Bayern Munich ក៏បានបោះជំហានឆ្ពោះទៅកាន់វគ្គ 4ក្រុមចុងក្រោយនៃក្របខ័ណ្ឌ Champions Leagueផងដែរ ខណៈដែលគ្រាប់បាល់តែតបញ្ចូលទីរបស់ខ្សែបម្រើ Thiago Alcantara បានជួយឱ្យពួកគេទទួលជ័យជម្នះក្នុងលទ្ធផល 2-1 នៅលើទឹកដីក្រុម Sevilla កាលពីថ្ងៃអង្គារ ក្នុងការប្រកួតជើងទី1 នៃវគ្គ 8ក្រុមចុងក្រោយរបស់ពួកគេនៅលើទឹកដីក្រុមអេស្ប៉ាញ។
Ronaldo បានរកគ្រាប់បាល់បើកឆាកក្នុងទីក្រុង Turin ក្រោយពីលេងបានត្រឹមតែ 3នាទី និងបានបន្ថែមគ្រាប់បាល់ទី2 នៅនាទីទី64តាមរយៈការស៊ុតបាល់បករំលងក្បាលយ៉ាងល្អ ដើម្បីក្លាយជាកីឡាករដំបូងគេក្នុងការស៊ុតបាល់បញ្ចូលទី 10ប្រកួតជាប់ៗគ្នានៃក្របខ័ណ្ឌ Champions League និងដើម្បីជួយឱ្យរូបគេរកបានគ្រាប់បាល់សរុប 14គ្រាប់ក្នុងយុទ្ធនាការនៅរដូវកាលនេះ។ ខ្សែប្រយុទ្ធ Paulo Dybala របស់ Juventus បានរងពិន័យកាតក្រហមនៅនាទីទី66 នៅមុនពេល Ronaldo បានជួយឱ្យ Marcelo បំពេញជ័យជម្នះសម្រាប់ក្រុមខ្លួន និងជួយឱ្យ Real ស្ថិតក្នុងការគ្រប់គ្រងទាំងស្រុង មុននឹងឈានទៅកាន់ការប្រកួតជើងទី2 ក្នុងទីក្រុងម៉ាឌ្រីដ នាថ្ងៃទី11 ខែមេសា ខាងមុខនេះ៕
ប្រភពពី៖ Sky Sports
April 4, 2018
ការបង្ហាញផលិតផលទឹកត្រចៀកកាំ Jin Soon និង Hong Soon

April 4, 2018
« នាំប្រពន្ធដើរលេង » សួន ពិសិដ្ឋ ដឹកដៃកញ្ញា អេដា បង្ហាញពីចង្វាក់ភ្លេងប្រជាប្រិយខ្មែរ
នៅពេលថ្មីៗនេះ តារាចម្រៀង Original Song កញ្ញា អេដា រួមគ្នាជាមួយលោក សួន ពិសិដ្ឋ បានផលិត និងសម្រិតសម្រាំងស្នាដៃនិពន្ធបទភ្លេងថ្មី ដែលមានចំណងជើងថា « នាំប្រពន្ធដើរលេង » ដែលបានស្ដែងឱ្យអ្នកគាំទ្របានឃើញពីការច្នៃប្រឌិតឧបករណ៍ភ្លេងបុរាណខ្មែរ និងភ្លេងសម័យរួមបញ្ចូលគ្នា ។ ទន្ទឹមនឹងការសាទរអំណរទទួលទេវតាឆ្នាំថ្មី ឆ្នាំច សំរិទ្ធិស័ក ព.ស 2562 គ.ស 2018 តារាចម្រៀងទាំងពីរដួងនេះ បានរំពឹងទុកថា ចម្រៀងចង្វាក់ប្រជាប្រិយប្រពៃណីខ្មែរមួយនេះ និងអង្រួនដួងចិត្តមហាជនគ្រប់ស្រទាប់វណ្ណៈ បានរាំចម្រៀងលេងសប្បាយទៅតាមគ្រប់ខេត្តក្រុង។
លោក សួន ពិសិដ្ឋ អ្នកនិពន្ធបទភ្លេងក៏បានលើកឡើងថា « ឆ្នាំនេះនាំប្រពន្ធដើរលេងសិនបានៗ! សាងគុណសម្បត្តិឱ្យច្រើនវិញទើបបានខ្លាចប្រពន្ធទារលែង! ។ បទថ្មីរបស់ខ្ញុំជាមួយកញ្ញាអេដា (ADDA ANGEL MUSIC ) សម្រាប់ចូលរួមឱកាសបុណ្យចូលឆ្នាំខ្មែរឆ្នាំថ្មី2018យើងនេះ! សាច់រឿងទំនុកច្រៀងកញ្ញាអេដានិងខ្ញុំតាក់តែងឡើងរួមគ្នា ចំពោះបទភ្លេងលក្ខណៈប្រពៃណីខ្មែរយើង ខ្ញុំតែងនិពន្ធជាចង្វាក់ សារ៉ាវ៉ាន់ តាលុង ម៉ាឌីស្សុន ល្បាយលាយជាមួយ ចាប៉ីដងវែង ទ្រ ខ្លុយ ស្គដៃ ស្គយីកេ និងឆៃយ៉ាំទម្រង់ខ្មែរ។ អរគុណបងប្អូនសម្រាប់ការគាំទ្រខ្ញុំទាំងពីរនាក់និងប្រពៃណីវប្បធម៌ខ្មែរយើង»។
ជាមួយគ្នានោះដែរ កញ្ញា អេដា ក៏បានបន្ថែមថា « បទថ្មីពី នាងខ្ញុំ និង បងសួន ពិសិដ្ឋ សហការគ្នាជាលើកដំបូង តោះរាំចង្វាក់ តាលុង ទាំងអស់គ្នា អរគុណសំរាប់ការគាំទ្រ ចា! »។ ចង់ដឹងថា បទ « នាំប្រពន្ធដើរលេង » ជាចង្វាក់តាលុងឆ្នាំ 2018 នេះ រណ្ដំចិត្តប៉ុនណានោះ សូមទស្សនា និងរាំកម្សាន្ដជាមួយវីដេអូខាងក្រោមនេះ៖
https://www.youtube.com/watch?v=w2eYhgcvtv8&feature=share
April 4, 2018