សង្គម និងសេដ្ឋកិច្ច - La Reine Media

នាវាមុជទឹកអគ្គិសនីដែលអាចធ្វើដំណើរបានជិតមួយពាន់គីឡូម៉ែត្រ

(អេមីរ៉ាតអារ៉ាប់រួម) – នាវាមុជទឹកខ្នាតតូចដែលមានរូបរាងដូចទៅនឹងយន្តហោះអវកាស ឬយានអវកាសក្នុងភាពយន្ត មានល្បឿនលឿនជាងឆ្ងាយធៀបនឹងនាវាផ្លាស់ទីក្រោមទឹកនាបច្ចុប្បន្ន។

នាវាមុជទឹកគំរូ ឈ្មោះ Kronos ធ្លាប់ត្រូវបានដាក់បង្ហាញនៅកំពង់នាវាទេសចរណ៍ក្នុងមជ្ឈមណ្ឌលជាតិពិព័រណ៍ Abu Dhabi របស់អេមីរ៉ាតអារ៉ាប់រួម (UAE) នេះបើតាម Popular Science ចុះផ្សាយកាលពីថ្ងៃទី 06 មីនា។ ដោយមានស្លាបនៅក្រោមផ្ទៃទឹក និងកាប៊ីនសម្រាប់អ្នកបើកបរមានរាងដូចដំបូលមូល Kronos ស្រដៀងទៅនឹងយានហោះអវកាស។

Kronos ត្រូវបានផលិតដោយក្រុមហ៊ុន Desert Power Design និង Highland System នៅ UAE។ នាវាមុជទឹកនេះសមស្របសម្រាប់ប្រើប្រាស់ក្នុងគោលដៅសម្ងាត់ផ្នែកយោធា សង្គ្រោះ និងបច្ចេកទេសក្រោមទឹក។ យោងតាមក្រុមហ៊ុន នាវាមុជទឹកគំរូនេះមានបណ្ដោយ 9.1 ម៉ែត្រ និងទទឹង 7.4 ម៉ែត្រ អាចបំពាក់មីស៊ីលក្រោមទឹក Black Scorpion ផលិតដោយអ៊ីតាលី ចំនួន 6 គ្រាប់។ Kronos ត្រូវការអ្នកបើកបរម្នាក់ និងអាចដឹកមនុស្សបាន 10 នាក់។

ដោយមានល្បឿន 48 គីឡូម៉ែត្រ/ម៉ោងពេលបរក្រោមទឹក និង 80 គីឡូម៉ែត្រ/ម៉ោងពេលបរលើទឹក Kronos អាចប្រៀបផ្ទឹមបានទៅនឹងនាវាមុជទឹកនុយក្លេអែរសម្រាប់ប្រើប្រាស់ក្នុងការវាយប្រហារ និងលឿនជាងឆ្ងាយបើធៀបនឹងនាវាដឹកជញ្ជូនក្រោមទឹកសម្រាប់កងកម្លាំងពិសេសនាបច្ចុប្បន្ន។

Kronos ដំណើរការដោយម៉ូទ័រអគ្គិសនីដែលអាចបរបាន 18 ម៉ោង។ នាវានេះក៏មានបំពាក់ម៉ាស៊ីនម៉ាស៊ូត ដូច្នេះអាចដំណើរការដោយប្រភពអគ្គិសនីពីម៉ាស៊ូត និងអគ្គិសនីពីថ្មក្នុងរយៈពេលជាង 50 ម៉ោង៕

March 7, 2023

CR7 បន្តទទួលបានកិត្តិនាមដ៏គួរឱ្យមានមោទកភាពនៅអាស៊ីខាងលិច

Cristiano Ronaldo កំពុងរកបានសេចក្ដីសុខនៅឯក្លឹប Al Nassr របស់អារ៉ាប៊ីសាអូឌីត នៅពេលបន្តដណ្ដើមបានតំណែងប្រកបដោយកិត្តិយសគួរឱ្យចាប់អារម្មណ៍។

កាលពីថ្ងៃទី 06 មីនា សហព័ន្ធកីឡាបាលទាត់អាស៊ី (AFC) បានប្រកាសជាផ្លូវការថា កីឡាកខ្សែប្រយុទ្ធ Cristiano Ronaldo របស់ក្លឹប Al Nassr ដណ្ដើមបានពានរង្វាន់កីឡាករឆ្នើមបំផុតនៅអាស៊ីខាងលិចប្រចាំខែកុម្ភៈ ដែលបោះឆ្នោតជ្រើសរើសដោយអ្នកគាំទ្រ។ កំពូលតារាបាល់ទាត់ជនជាតិព័រទុយហ្កាល់នេះទទួលបានសន្លឹកឆ្នោតគាំទ្រចំនួន 73,957 សំឡេង ស្មើនឹង 48%។

ឈរលំដាប់ទីពីរសម្រាប់ពានរង្វាន់ខាងលើ គឺ Aso Rostam របស់ក្លឹប Al Shorta (អ៊ីរ៉ាក់) ដោយទទួលបានសំឡេងគាំទ្រ 45%។ ចំណែក Odion Ighalo អតីតកីឡាកររបស់ Manchester United ដែលបច្ចុប្បន្នកំពុងប្រកួតឱ្យ Al Hilal នៅ Saudi Pro League ដូច Ronaldo ដែរនោះ ជាប់ចំណាត់ថ្នាក់លេខបី ដោយមានសំឡេងគាំទ្រ 4%។

រីឯកីឡាករមួយរូបផ្សេងទៀតដែលប្រកួតនៅពានរង្វាន់ជើងឯកអារ៉ាប៊ីសាអូឌីត គឺខ្សែប្រយុទ្ធ Omar Al Somah (ក្លឹប Al Arabi) ទទួលបាន 3% ក្នុងចំណោមសំឡេងគាំទ្រសរុប និងត្រូវជាប់លេខបួន។ យោងតាមស្ថិតិ ការបោះឆ្នោតជ្រើសរើសកីឡាករឆ្នើមនៅអាស៊ីខាងលិចប្រចាំខែកុម្ភៈ មានអ្នកគាំទ្រប្រមាណ 157,000 នាក់ចូលរួមបោះឆ្នោត។

AFC ឱ្យដឹងថា ពានរង្វាន់នេះត្រូវបានរៀបចំឡើងដើម្បីឱ្យអ្នកគាំទ្រជ្រើសរើសកីឡាករដែលលេងបានល្អបំផុតនៅតំបន់អាស៊ីខាងលិច ដោយយោងទៅលើលក្ខខណ្ឌមួយចំនួនមានដូចជា ចំនួនគ្រាប់បាល់ដែលរកបាន ឬបង្កឱកាសស៊ុតបញ្ចូលទីបានសម្រេច ចំណាត់ថ្នាក់របស់ក្លឹបនៅក្នុងស្រុក និងស្ថានភាពនៃការទាត់ឱ្យក្រុមជម្រើសជាតិជាដើម។

Ronaldo បានមកទាត់ឱ្យ Al Nassr ចាប់ពីចុងឆ្នាំ 2022 ក្រោយពីត្រូវ Man Utd បញ្ចប់កិច្ចសន្យាមុនកាលកំណត់។ នៅទីនេះ ម្ចាស់ពានរង្វាន់បាល់មាសចំនួន 5 រូបនេះ ទទួលបានប្រាក់បៀវត្សរ៍ឡើងដល់ 200 លានដុល្លារអាម៉េរិក/ឆ្នាំ៕

March 7, 2023

ខ្សែភាពយន្ត «Creed 3» រកចំណូលបាន 100 លានដុល្លារក្នុងសប្ដាហ៍ដំបូង

វគ្គទីបីរបស់ «Creed» ដែលតួអង្គសំខាន់សម្ដែង និងដឹកនាំរឿងដោយ «បុរសទាក់ទាញបំផុតប្រចាំឆ្នាំ 2020» Michael B. Jordan កំពុងនាំមុខគេនៅបញ្ជរលក់សំបុត្រក្នុងសប្ដាហ៍ដំបូងនៃការចាក់បញ្ចាំងឯរោងកុន។

កំពូលខ្សែភាពយន្តខាងលើរកចំណូលបាន 58.7 លានដុល្លារនៅអាម៉េរិកខាងជើង ខ្ពស់ជាង Ant-Man and the Wasp: Quantumania និងក្លាយជាភាពយន្តមានទស្សនិកជនច្រើនជាងគេនៅក្នុងរោងកុនកាលពីសប្ដាហ៍កន្លង។ «Creed 3» ក៏រកបាន 41.8 លានដុល្លារនៅលើទីផ្សារអន្តរជាតិ ជួយឱ្យប្រាក់ចំណូលសរុបទូទាំងសកលលោករបស់ភាពយន្តនេះ កើនឡើងដល់ 100.4 លានដុល្លារ។

តួលេខខាងលើខ្ពស់ជាងឆ្ងាយ បើធៀបនឹងការរំពឹងទុកពីក្រុមអ្នកជំនាញ។ ពីរវគ្គដំបូងរបស់ «Creed» រកចំណូលបាន 29.6 លានដុល្លារក្នុងឆ្នាំ 2015 និង 35.5 លានដុល្លារក្នុងឆ្នាំ 2018។ តម្លៃសំបុត្រកើនឡើងខ្ពស់នៅឯបន្ទប់បញ្ចាំងភាពយន្ត Imax ក៏ជាមូលហេតុជួយឱ្យវគ្គបីរបស់ខ្សែភាពយន្តនេះរកប្រាក់បានច្រើន។

ឈុតខ្លីៗ សំខាន់ៗរបស់ Creed 3

វគ្គបីនិយាយអំពីជីវភាពរបស់អ្នកប្រដាល់ល្បីឈ្មោះ Adonis Creed។ ពេលនេះគាត់បានក្លាយជាតារា និងទទួលបានការគាំទ្រច្រើន។ ចៃដន្យ ថ្ងៃមួយតួអង្គឯកបានជួបមិត្តចាស់ Anderson Dame (សម្ដែងដោយ Jonathan Majors) ដែលទើបតែចេញពីពន្ធនាគារ។ Adonis រកវិធីដើម្បីជួយស្ដារជីវភាពរបស់ Anderson ឡើងវិញ។ ប៉ុន្តែ អ្វីដែល Anderson ចង់បាន គឺជីវភាពពេញដោយភាពជោគជ័យរបស់ Adonis ជារឿងដែល Anderson គិតថា ដើមឡើយវាយជារបស់ខ្លួន បើសិនមិនប្រថុយជួយដល់ Adonis កាលពីប៉ុន្មានឆ្នាំមុន។

Creed គឺជាវគ្គចុងក្រោយរបស់យីហោ Rocky របស់ Sylvester Stallone។ តួអង្គសំខាន់ក្នុងខ្សែភាពយន្តនេះគឺជាកំពូលអ្នកប្រដាល់ Adonis Creed កូនប្រុសរបស់ម្ចាស់ជើងឯក Apollo Creed។ វគ្គមួយរបស់ខ្សែភាពយន្តដែលចាប់បញ្ចាំងកាលពីឆ្នាំ 2015 បានទទួលជោគជ័យ និងទទួលបានបេក្ខភាព Oscar។ Michael B. Jordan មានឈ្មោះល្បីបន្ទាប់ពីសម្ដែងជាតួអង្គឯកក្នុងរឿង Creed។ ខ្សែភាពយន្តនេះក៏ជួយឱ្យ Jordan ទទួលបានការចាប់អារម្មណ៍ពី Marvel និងត្រូវបានអញ្ជើញឱ្យចូលរួមសម្ដែងក្នុងរឿង Black Panther៕

March 7, 2023

កម្ពុជាលក់លេខយានយន្តពិសេសបានជាង 50 លានដុល្លារក្នុងបីឆ្នាំកន្លង

ឯកឧត្តមទេសរដ្ឋមន្ត្រី ស៊ុន ចាន់ថុល នាថ្ងៃទី 07 មីនា 2023 នេះ បានថ្លែងថា កម្ពុជាលក់លេខយានយន្តពិសេសបានប្រមាណ 52 លានដុល្លារអាម៉េរិក ក្រោយពីដាក់លក់បានបីឆ្នាំ។

ក្រសួងសាធារណការ និងដឹកជញ្ជូន នាថ្ងៃទី 07 មីនា 2023 បានសម្ពោធបើកកម្មវិធី «អបអរសាទរខួបបីឆ្នាំ លេខពិសេសផ្ទាល់ខ្លួន» អមជាមួយនឹង ការតាំងពិព័រណ៍ផ្លាកលេខ និងរថយន្ត, ការដាក់តាំងលក់ និងដេញថ្លៃលេខពិសេសនៅសួនវត្តបទុម ក្រោមអធិបតីរបស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

នៅក្នុងព្រឹត្តិការណ៍ខាងលើ ឯកឧត្តមទេសរដ្ឋមន្ត្រីបានមានប្រសាសន៍ថា ថវិកាដែលបានពីការលក់លេខពិសេសផ្ទាល់ខ្លួននេះ មួយផ្នែកនឹងត្រូវបានយកទៅជួនមូលនិធិគន្ធបុប្ផា និងមន្ទីរពេទ្យកុមារជាតិ។

ទាក់ទងទៅនឹងការវិវត្តនៃការលក់លេខពិសេស ឯកឧត្តមទេសរដ្ឋមន្ត្រី បានឱ្យដឹងថា ក្នុងរយៈពេលបីឆ្នាំមកនេះ ក្រសួងលក់លេខពិសេសផ្ទាល់ខ្លួនបាន 16,000 លេខ រកចំណូលបានប្រមាណ 28 លានដុល្លារអាម៉េរិក ខណៈលេខពិសេសខេត្តក្រុងលក់បាន 101,000 លេខ រកចំណូលបានជាង 24 លានដុល្លារ។ ដូច្នេះ ក្នុងបីឆ្នាំកន្លង កម្ពុជាលក់លេខពិសេសបានប្រមាណជាង 52 លានដុល្លារអាម៉េរិក។

នៅក្នុងឆ្នាំ 2022 កម្ពុជាលក់លេខពិសេសបាន 25 លានដុល្លារ កើន 22% បើធៀបនឹងឆ្នាំ 2021។ ក្រសួងសាធារណការ និងដឹកជញ្ជូនរំពឹងថា ការលក់លេខពិសេសក្នុងឆ្នាំនេះនឹងកើត 5% ធៀបនឹងឆ្លាំកន្លង៕

March 7, 2023

Piers Morgan ថា «Man United ទទួលផលកម្មព្រោះតែធ្វើអាក្រក់ដាក់ Ronaldo»

Piers Morgan ដែលជាអ្នកធ្វើបទសម្ភាសជាមួយ Cristiano Ronaldo នាំឱ្យ CR7 ត្រូវក្លឹបបញ្ចប់កិច្ចសន្យានាពេលកន្លង បង្ហាញពីការសប្បាយចិត្តនៅពេល Manchester United ចាញ់ Liverpool 0-7 នៅលិគកំពូលអង់គ្លេស (English Premier League)។

«Ten Hag លាលែងពីតំណែងហើយនៅ? ធ្វើយ៉ាងណាទើបគ្រូបង្វឹករបស់ Man Utd អាចរក្សាបានតំណែង បន្ទាប់ពីការប្រកួតទទួលបានលទ្ធផលអាក្រក់បែបនេះ» Morgan សរសេរលើបណ្ដាញសង្គម Twitter ដូច្នេះ អមជាមួយរូបថត Erik ten Hag ឆ្លើយនឹងសំណួរក្នុងកិច្ចសម្ភាស ក្រោយពីការប្រកួតរវាង Manchester United និង Liverpool នៅ Anfield។

Morgan ធ្លាប់បានលើកជាសំណួរដើម្បីឱ្យ Ronaldo បង្ហើបអាថ៌កំបាំងផ្ទៃក្នុងរបស់ Man Utd ក៏ដូចជាចោទប្រកាន់ក្លឹបនេះថាក្បត់រូបគាត់ កាលពីដើមខែវិច្ឆិកា 2022។ កិច្ចសម្ភាសនោះបាននាំឱ្យ Man Utd សម្រេចចិត្តបញ្ចប់កិច្ចសន្យាមុនកាលកំណត់ជាមួយ CR7 ធ្វើឱ្យកំពូលកីឡាករជនជាតិព័រទុយហ្កាល់ត្រូវទៅទាត់ឱ្យក្លឹប Al Nassr នៅអារ៉ាប៊ីសាអូឌីត។

Piers Morgan, Ronaldo និងសាររបស់ Piers Morgan ចំអកឱ្យ Man Utd

ចាប់ពីពេលនោះមក ពិធីករផ្នែកកីឡា Morgan ក៏ផ្ដើមបញ្ចេញមតិកាន់ជើង Ronaldo និងរិះគន់ Man Utd ជាញឹកញាប់។ កាលពីថ្ងៃទី 06 មីនា 2023 បន្ទាប់ពីបានទស្សនាការប្រកួតដែលក្រុមរបស់គ្រូបង្វឹក Ten Hag ចាញ់ Liverpool 0-7 លោក Morgan បានបង្ហោះអត្ថបទចំនួន 4 ជាបន្តបន្ទាប់នៅលើបណ្ដាញសង្គមដើម្បីចំអកឱ្យ Man Utd។

«ពិតជារឿងដ៏គួរឱ្យចាប់អារម្មណ៍ និងអស់សំណើច ប៉ុន្តែនេះប្រាកដជាកម្មពារ ជាផលកម្ម» ពិធីករជនជាតិអង់គ្លេស Morgan សរសេរ និងបង្ហោះអមជាមួយរូបដែលលោកបានថតជាមួយ Ronaldo ពេលធ្វើបទសម្ភាសដែលនាំឱ្យ Man Utd មិនសប្បាយចិត្តនាពេលកន្លង។

បន្ទាប់មក ពិធីករវ័យ 57 ឆ្នាំខាងលើក៏បានថតអត្ថបទសម្ភាស Ten Hag នៅលើទំព័រកាសែតមួយ ហើយបង្ហោះលើបណ្ដាញសង្គម។ ក្នុងអត្ថបទសម្ភាសនេះ គ្រូបង្វឹករបស់ Man Utd និយាយថា គាត់ដេកលក់ស្រួលបន្ទាប់ពីបានលុបបំបាត់ Ronaldo ចេញពីក្រុម។ Morgan សរសេរថា «ជូនពរសំណាងល្អក្នុងដំណេកនៅយប់នេះណា៎ អ្នកមានទេពកោសល្យ»។

https://www.youtube.com/watch?v=FP9MCTFVutw

Man Utd ចាញ់ Liverpool 0-7

ការចាញ់ Liverpool 0-7 គឺជាបរាជ័យអាក្រក់បំផុតរបស់ Man Utd នៅក្នុងប្រវត្តិសាស្ត្រលិគកំពូលអង់គ្លេស។ លទ្ធផលនេះបានធ្វើឱ្យមានការសង្ស័យចំពោះសមត្ថភាពរបស់ «បីសាចក្រហម» បន្ទាប់ពីសម័យកាលត្រចះត្រចង់ ដែលមួយផ្នែកធំគឺដោយសារ Ronaldo។

Ronaldo មិនបានបញ្ចេញមតិទាក់ទងនឹងបរាជ័យរបស់ Man Utd ខាងលើនោះទេ។ CR7 ក៏ទើបតែបានរួមដៃជាមួយ Al Nassr យកឈ្នះ Al Batin 3-1 នៅពានរង្វាន់អារ៉ាប៊ីសាអូឌីត កាលពីថ្ងៃទី 04 មីនា។ ជ័យជម្នះនេះបានជួយឱ្យ Al Nassr រក្សាបានតំណែងកំពូលតារាង ដោយមានពិន្ទុច្រើនជាង Al Ittihad ចំនួនពីរពន្ទុ៕

March 7, 2023

ក្រុមតារាម៉ូដែលយកដៃបិទបាំងដើមទ្រូងដែលគ្មានអាវពេលកំពុងបង្ហាញម៉ូដ

(បារាំង) – ទស្សនិកជនមានការភ្ញាក់ផ្អើលនៅពេលក្រុមតារាម៉ូដែលដើរបង្ហាញម៉ូដសម្លៀកបំពាក់ដោយមិនមានអាវទ្រនាប់ នៅក្នុងព្រឹត្តិការណ៍បង្ហាញម៉ូដសម្លៀកបំពាក់របស់ Ann Demeulemeester។

វគ្គបង្ហាញម៉ូដសម្លៀកបំពាក់រដូវស្លឹកឈើជ្រុះ-រដូវរងា 2023 របស់ Ann Demeulemeester បើកសម្ពោធកាលពីថ្ងៃទី 05 មីនានៅក្នុងព្រឹត្តិការណ៍ Paris Fashion Week (27 កុម្ភៈ ដល់ 07 មីនា)។ ពិធីបង្ហាញម៉ូដទទួលបានចំណាប់អារម្មណ៍ខ្លាំងនៅពេលក្រុមតារាម៉ូដែលដើរលើឆាកដោយស្លៀកជើងរ៉ូប និងទុកល្វែងលើឱ្យនៅទទេ។ ក៏ប៉ុន្តែ ស្រីស្អាតទាំងនេះយកដៃទាំងពីររបស់ពួកគេបិទបាំងដើមទ្រូងដែលមិនមានអាវទ្រនាប់។

អ្នកស្រី Ann Demeulemeester បានបកស្រាយនៅលើ Vogue អំពីគំនិតនេះថា «នោះគឺជាកាយវិការទន់ភ្លន់ បាទដៃដូចទៅនឹងស្លាបសត្វព្រាប»។

ចំពោះ Ann Demeulemeester ស្លាបសត្វ និងរោមសត្វគឺជាចំណុចដែលអ្នកស្រីចូលចិត្តយកមករចនាម៉ូដសម្លៀកបំពាក់ ដើម្បីបង្ហាញពីភាពក្មេងវ័យ។

Ann Demeulemeester កើតនៅប្រទេសបែលហ្ស៊ិក និងស្ថិតក្នុង Antwerp Six ជាក្រុមអ្នករចនាម៉ូដសម្លៀកបំពាក់ល្បីឈ្មោះដែលបានបញ្ចប់ការសិក្សាផ្នែកម៉ូដែលនៅវិទ្យាស្ថាន Antwerp ក្នុងឆ្នាំ 1980, 1981 និង 1982៕

March 6, 2023

ការផលិតរថយន្តអគ្គិសនីគ្រឿងទី «បួនលាន» ជួយឱ្យ Tesla នាំមុខគេយ៉ាងឆ្ងាយ

ក្នុងព្រឹត្តិការណ៍ «អ្នកវិនិយោគឆ្នាំ 2023» របស់ Tesla សម្រាប់ភាគហ៊ុនិក ដែលធ្វើឡើងកាលពីថ្ងៃទី 01 មីនា 2023 ក្រុមហ៊ុន Tesla បានឱ្យដឹងថា ចំនួនរថយន្តអគ្គិសនីដែលបានផលិតរបស់ពួកគេ សម្រេចបានបួនលានគ្រឿង។

រថយន្តទីបួនលានរបស់ Tesla គឺ Model Y ផលិតនៅរោងចក្រ Giga Texas ជាទីដែលប្រារព្ធព្រឹត្តិការណ៍ «អ្នកវិនិយោគឆ្នាំ 2023»។ Tesla ក៏បានចុះផ្សាយវីដេអូខ្លីមួយ ក្នុងនោះគេឃើញមានបុគ្គលិកទាំងឡាយនាំគ្នាជប់លៀងអបអរជោគជ័យដែលពួកគេសម្រេចបាន។

យោងតាម Tesla ក្រុមហ៊ុននេះត្រូវចំណាយពេលរហូតដល់ 12 ឆ្នាំ ទើបផលិតបានរថយន្តអគ្គិសនីមួយគ្រឿងដំបូង។ រថយន្តអគ្គិសនី Tesla ទីមួយលានត្រូវបានផលិតកាលពីឆ្នាំ 2020។ មុននោះយ៉ាងយូរ រថយន្តដំបូងរបស់ Tesla គឺ Tesla Roadster ជំនាន់ដំបូងត្រូវបានផលិត និងលក់ក្នុងឆ្នាំ 2008។

ចាប់តាំងពីឆ្នាំ 2008 Tesla ក៏បានបង្កើនការផលិត និងការលក់ចេញជាបន្តបន្ទាប់។ គិតត្រឹមចុងឆ្នាំ 2022 Tesla ផលិតបានជាង 3.7 លានគ្រឿង។

We produced our 4 millionth vehicle at Giga Texas today ✌ pic.twitter.com/YMxb4zX5WB
— Tesla (@Tesla) March 1, 2023

រាប់ចាប់ពីចំណុចបីលានគ្រឿងដល់បួនលានគ្រឿង Tesla ប្រើពេល 7 ខែ។ តួលេខ និងពេលវេលានេះបង្ហាញថា បច្ចុប្បន្ន Tesla អាចផលិតបានជាង 1.7 លានគ្រឿង/ឆ្នាំ ខ្ពស់ជាងឆ្ងាយបើធៀបនឹងតួលេខជិត 1.3 លានគ្រឿងកាលពីឆ្នាំ 2022។ ឆ្នាំនេះ Tesla អាចផលិតបាន 1.8 លានគ្រឿង ប៉ុន្តែអ្នកខ្លះជឿថា អាចឡើងដល់ 2 លានគ្រឿង។

ជាក់ស្ដែង ល្បឿននៃការផលិតរបស់ Tesla គ្រោងនឹងកើនឡើងដល់ 20 លានគ្រឿង/ឆ្នាំ ជិតស្មើនឹងទ្វេដងនៃចំនួនរថយន្តដែលបណ្ដាក្រុមហ៊ុនធំៗសម្រេចបាន៕

March 6, 2023

រៀងរាល់មួយនាទី តើ Ronaldo រកប្រាក់បានប៉ុន្មានដុល្លារពីក្លឹប Al-Nassr?

ការចាកចេញពីពិភពបាល់ទាត់លំដាប់កំពូលក្នុងវ័យ 38 ឆ្នាំ ប្រហែលជាជម្រើសដ៏សមស្របសម្រាប់ Cristiano Ronaldo ប៉ុន្តែ ប្រការនេះជួយឱ្យ CR7 ក្លាយជាកីឡាករដែលទទួលបានប្រាក់បៀវត្សរ៍ខ្ពស់ជាងគេលើពិភពលោក។

ក្រោយការសម្ភាសប្រកបដោយភាពចម្រូងចម្រាសនៅលើទូរទស្សន៍ មិនយូរប៉ុន្មាន Ronaldo ក៏ត្រូវបាន Man United បញ្ចប់កិច្ចសន្យា ហើយ CR7 ក៏បានទៅលេងឱ្យក្លឹប Al-Nassr របស់អារ៉ាប៊ីសាអូឌីត។ ថ្វីបើមកលេងឱ្យក្លឹបដែលមិនល្បីឈ្មោះ ប៉ុន្តែ CR7 នៅតែមានឥទ្ធិពលខ្លាំង។

ប្រការខាងលើនេះហើយបានជាកំពូលកីឡាកររបស់ព័រទុយហ្កាល់ ទទួលបានប្រាក់បៀវត្សរ៍ខ្ពស់ពី Al-Nassr។ យោងតាមទំព័រ Marca កីឡាករ Ronaldo ទទួលបាន 200 លានដុល្លារអាម៉េរិក/ឆ្នាំ ពីក្លឹប Al-Nassr។ បើសិនជាចែកខ្ទង់ប្រាក់នេះជាចំណែកតូចៗ គេឃើញថា CR7 រកបាន 16.6 លានដុល្លារ/ខែ, 548,000 ដុល្លារ/សប្ដាហ៍ និងជាង 21,000 ដុល្លារ/ម៉ោង។

នៅពេលគិតក្នុងមួយនាទីវិញ គេឃើញថា Ronaldo រកបានជិត 400 ដុល្លារឯណោះ។ ស្ដាប់ទៅគួរឱ្យភ្ញាក់ផ្អើលខ្លាំងណាស់។ ក៏ប៉ុន្តែ គ្មានអ្វីចម្លែកឡើយ ព្រោះថា CR7 គឺជាតារាបាល់ទាត់មួយរូបក្នុងចំណោមកំពូលកីឡាករពីររូបដែលមានឈ្មោះល្បីខ្លាំងនាបច្ចុប្បន្ន។

នៅឯក្លឹប Al-Nassr Ronaldo គោរពយ៉ាងខ្ជាប់ខ្ជួននូវរបបនៃការរស់នៅ និងការហ្វឹកហាត់ ហើយជាលទ្ធផល គាត់បានជួយឱ្យក្លឹបនេះស្ថិតនៅលើកំពូលតារាងចំណាត់ថ្នាក់នៅ Saudi Pro League រហូតដល់ពេលនេះ៕

March 6, 2023

យន្តហោះអ៊ីដ្រូសែនធំជាងគេលើពិភពលោក ហោះហើរសាកល្បងដោយជោគជ័យ

(សហរដ្ឋអាម៉េរិក) – យន្តហោះគំរូ ATR72 មានកៅអី 40 ហោះហើរដោយប្រើថាមពលអ៊ីដ្រូសែនក្នុងរយៈពេល 15 នាទី អាចហោះឡើងដល់កម្ពស់ 1,000 ម៉ែត្រ។

យន្តហោះដឹកអ្នកដំណើរ 40 កៅអី ដំណើរការដោយថ្មផ្ទុកថាមពលអ៊ីដ្រូសែន ដែលបានហោះហើរសាកល្បង លើកដំបូងបានជោគជ័យ ត្រូវបានធ្វើឡើងដោយ Universal Hydrogen។ ក្រុមហ៊ុននេះឱ្យដឹងថា យន្តហោះបានហោះឡើងពីព្រលានយន្តហោះអន្តរជាតិខណ្ឌ Grant នៅវ៉ាស៊ីងតោន និងហោះឡើងដល់កម្ពស់ 1,066 ម៉ែត្រដោយប្រើពេលតែ 15 នាទី។ នេះបើតាមទំព័រ Interesting Engineering ចុះផ្សាយកាលពីថ្ងៃទី 03 មីនា 2023។

ក្រុមហ៊ុនបច្ចេកវិទ្យាដែលមានទីស្នាក់ការកណ្ដាលនៅ Los Angeles នេះ បានប្ដូរប្រព័ន្ធបញ្ជូនកម្លាំងរបស់យន្តហោះដោយការផ្លាស់មួយក្នុងចំណោយទួរប៊ីនម៉ូទ័រចំនួនពីររបស់យន្តហោះ និងជំនួសដោយម៉ូទ័រអគ្គិសនីដែលប្រើប្រាស់ថ្មផ្ទុកថាមពលអ៊ីដ្រូសែន។ ជាលទ្ធផល អ្នកបើកបរអាចកាត់បន្ថយការប្រើប្រាស់ម៉ាស៊ីនធម្មតាក្នុងពេលហោះហើរ។

កញ្ចប់ប្ដូរផ្លាស់ម៉ាស៊ីនរបស់ Universal Hydrogen បានលុបបំបាត់តម្រូវការអភិវឌ្ឍយន្តហោះអ៊ីដ្រូសែនថ្មីទាំងស្រុង។ ក្រុមហ៊ុននេះបានធ្វើការហោះហើរសាកល្បងដោយមានកិច្ចសហការពីក្រុមហ៊ុនអាកាសចរណ៍ Connect និង Amelia ដើម្បីសុំលិខិតអនុញ្ញាតពីអាជ្ញាធរគ្រប់គ្រងអាកាសចរណ៍អាម៉េរិក។

យោងតាម Universal Hydrogen នេះគឺជាការសាកល្បងដំបូងនៅក្នុងគម្រោងសាកល្បងពីរឆ្នាំ ដែលគ្រោងនឹងបញ្ចប់នៅឆ្នាំ 2025។ ក្រុមហ៊ុននេះក៏ទទួលបានការបញ្ជាទិញសេវាកម្មប្ដូរផ្លាស់ម៉ាស៊ីនរបស់យន្តហោះចំនួន 247 គ្រឿងពីអតិថិជន 16 ស្ថាប័នមកពីជុំវិញពិភពលោក ក្នុងតម្លៃសរុបជាងមួយពាន់លានដុល្លារអាម៉េរិក៕

March 6, 2023

គម្រោងបញ្ចុះកម្ដៅផែនដីដោយប្រើប្រាស់កញ្ចក់ខ្នាតយក្សក្នុងទីអវកាស

អង្គការសហប្រជាជាតិកំពុងពិចារណាលើសំណើពង្រាយកញ្ចក់ខ្នាតយក្សក្នុងទីអវកាសដើម្បីបញ្ចៀសគ្រប់គ្រងពន្លឺព្រះអាទិត្យ និងកាត់បន្ថយផលប៉ះពាល់នៃកម្ដៅផែនដីដែលកំពុងកើនឡើងនៅទូទាំងសកលលោក។

របាយការណ៍ពីស្ថាប័នពាក់ព័ន្ធរបស់អង្គការសហប្រជាជាតិបានឱ្យដឹងថា ដើម្បីឆ្លើយតបនឹងគោលដៅស្ដីពីអាកាសធាតុ មនុស្សលោកអាចត្រូវការដំឡើងផ្ទាំងកញ្ចក់ដ៏ធំដើម្បីបង្វែរពន្លឺព្រះអាទិត្យទៅកាន់ទីអវកាស។ នេះបើតាម Interesting Engineering ចុះផ្សាយកាលពីថ្ងៃទី 02 មីនា។

«ក្នុងចំណោមគំនិតដែលត្រូវបានកម្មវិធីបរិស្ថានអង្គការសហប្រជាជាតិលើកឡើងដើម្បីទប់ស្កាត់បញ្ហាបន្ទាន់ស្ដីពីអាកាសធាតុ គឺការកែប្រែវិទ្យុសកម្មព្រះអាទិត្យ (SRM)។ SRM គឺជាវិធីតែមួយគត់ដែលគេស្គាល់ថា អាចប្រើប្រាស់ដើម្បីបញ្ចុះកម្ដៅផែនដីក្នុងរយៈពេលច្រើនឆ្នាំ» របាយការណ៍ខាងលើបានឱ្យដឹងដូច្នេះ។ ការពិសោធនានាទាក់ទងនឹងអាកាសធាតុសុទ្ធតែបង្ហាញថា SRM អាចគ្រប់គ្រងផលប៉ះពាល់របស់ឧស្ម័នផ្ទះកញ្ចក់ ដែលជាដើមហេតុនាំឱ្យកម្ដៅផែនដីកើនឡើង។

ក៏ប៉ុន្តែ របាយការណ៍របស់អង្គការសហប្រជាជាតិនេះបានសង្កត់ធ្ងន់ថា គេត្រូវការការសិក្សាស្រាវជ្រាវបន្ថែមដើម្បីយល់ច្បាស់នូវផលវិបាកដែលអាចនឹងកើតឡើងនៅពេលប្រើប្រាស់បច្ចេកវិទ្យាបញ្ចុះកម្ដៅផែនដី៕

March 6, 2023

Category: សង្គម និងសេដ្ឋកិច្ច