សង្គម និងសេដ្ឋកិច្ច - La Reine Media

ចុំ!? គ្រាប់ពេជ្រថ្មីៗរបស់ផលិតកម្មរស្មីហង្សមាស សុទ្ធតែមានឈ្មោះ «ថៃ»

តើជារឿងចៃដន្យ ឬយ៉ាងណាដែរ ដែលតារាថ្មីៗខ្លាំងៗរបស់ផលិតកម្មរស្មីហង្សមាស នាពេលបច្ចុប្បន្ននេះសុទ្ធតែមានឈ្មោះ «ថៃ» ដល់ទៅ 3ដួង ហើយសុទ្ធតែប្រុសទាំងអស់ទៀត រួមមាន លោក ថែល ថៃ ម្ចាស់ពានកម្មវិធីប្រឡងចម្រៀងលំដាប់ពិភពលោក The Voice Cambodia រដូវកាលទី2។ កុមារា ពេជ្រ ថៃ ជាម្ចាស់ជយលាភីកម្មវិធីប្រឡងចម្រៀងកុមារលំដាប់ពិភពលោក The Voice Kids Cambodia ដំបូងគេបង្អស់ និងក្រោយគេគឺលោក គ្រី ថៃពៅ ដែលទើបតែក្លាយជាម្ចាស់ពានរង្វាន់កម្មវិធី Cambodia Idol រដូវកាលទី 3 ថ្មីៗនេះ។

1- លោក ថែល ថៃ

បេក្ខជន ថែល ថៃ បានលើកពាន The Voice Cambodia នៅរដូវកាលនោះ បន្ទាប់ពីលោកបានបកស្រាយបទចម្រៀងក្នុងវគ្គផ្ដាច់ព្រ័ត្រ ហើយត្រូវបានទស្សនិកជនបោះឆ្នោតឱ្យដោយសំឡេងច្រើននាំមុខគេ។ លោកទទួលបានទឹកប្រាក់ រង្វាន់ 100លានរៀល និង2ពាន់ដុល្លារផ្សេងទៀត ព្រមជាមួយកុងត្រាពេញសិទ្ធិនៅក្នុងផលិតកម្មហង្សមាសមួយទៀត។ លោកគឺជាអតីតអ្នកចម្រៀងប្រចាំក្លិបកម្សន្ដមួយ មុនពេលទទួលបានពាននេះ។

2-កុមារា ពេជ្រ ថៃ

ក្រៅពីការទទួលបានពានរង្វាន់ The Voice Cambodia រដូវកាលទី2ហើយ កុមារា ពេជ្រ ថៃ នៅបានទទួលទឹកប្រាក់100លានរៀលដែលជាកញ្ចប់ប្រាក់អាហារូបករណ៍លើការសិក្សា និងសម្រាប់ទស្សនកិច្ចនៅប្រទេសជប៉ុន អមដោយថវិកាជាសាច់ប្រាក់សុទ្ធចំនួន 10លានរៀលពីម្ចាស់ឧបត្ថម្ភកម្មវិធី ទឹកប្រាក់ 3ពាន់ដុល្លារពីសម្ដេចនាយករដ្ឋមន្ត្រី និង ទទួលបានរង្វាន់ជាទឹកប្រាក់ជាច្រើនផ្សេងទៀត។

3-លោក គ្រី ថៃពៅ

លោក គ្រី ថៃពៅ ទទួលបានប្រាក់រង្វាន់ចំនួន 150លានរៀល ប្រហែលជាជាង 30,000ដុល្លារ ព្រមជាមួយកិត្តិយសក្នុងនាមជាម្ចាស់ពាន Cambodian Idol ក្នុងរដូវកាលទី3។ ក្រៅពីនោះ លោកក៏ត្រូវបានកំណត់ឱ្យក្លាយជាតារាចម្រៀងជាប់កុងត្រាប្រចាំផលិតកម្មរស្មីហង្សមាសពេញរយៈពេល1ឆ្នាំ ក្នុងនាមជាតារាចម្រៀងពេញសិទ្ធិទៀតផង៕

April 10, 2018

ធនាគារ PPCBank និង Wing បង្កើតសេវាផ្ទេរប្រាក់ពីកូរ៉េទៅដល់ទីជនបទ

ក្នុងសន្និសីទសារព័ត៌មាននាពេលថ្មីៗនេះ ដោយថ្នាក់ដឹកនាំនៃស្ថាប័នហិរញ្ញវត្ថុដ៏សំខាន់ទាំងពីរនេះបានចាត់ទុកថា វានឹងរួមចំណែកផ្តល់នូវជម្រើសថ្មីមួយសម្រាប់ការផ្ទេរប្រាក់ពីប្រទេសកូរ៉េខាងត្បូងមកកាន់ប្រទេសកម្ពុជាដោយផ្តល់ជូននូវសេរីភាពហិរញ្ញវត្ថុ និងភាពងាយស្រួលក្នុងការគ្រប់គ្រងហិរញ្ញវត្ថុសម្រាប់ពលករ និងជនអន្តោប្រវេសន៍កម្ពុជាជាង 4ម៉ឺននាក់ដែលកំពុងរស់នៅ និងធ្វើការនៅប្រទេសកូរ៉េខាងត្បូង។

លោក Shin Chang Moo ប្រធានធនាគារ PPCBank បាននិយាយថា ជាមួយកិច្ចសហការថ្មីនេះ អតិថិជននឹងមានភាពងាយស្រួលកាន់តែខ្លាំងឡើង សម្រាប់ការសម្រេចចិត្តផ្ទេរប្រាក់ទៅឱ្យសាច់ញាតិរបស់ខ្លួនដែលនៅទីជនបទក្នុងប្រទេសកម្ពុជា ព្រោះពលករកម្ពុជាដែលកំពុងបម្រើការងារនៅប្រទេសកូរ៉េ តែងតែផ្ទេរប្រាក់យ៉ាងច្រើនមកឱ្យមនុស្សជាទីស្រឡាញ់របស់ខ្លួន។

លោកនិយាយថា៖ “ភាពជាដៃគូនេះបានផ្តល់ឱ្យយើងនូវឱកាសដើម្បីផ្តល់ជូនអតិថិជនរបស់យើងនូវភាពងាយស្រួលក្នុងការផ្ញើប្រាក់ចាប់ពីថ្ងៃទី2 ខែមេសានេះតទៅ ទៅឱ្យមនុស្សជាទីស្រឡាញ់របស់ពួកគេនៅគ្រប់ទីកន្លែងក្នុងប្រទេសកម្ពុជា។

លោក Ruan Swanepoel នាយកផ្នែកពាណិជ្ជកម្មនៃធនាគារឯកទេស Wing បានលើកឡើងថា ថ្នាក់ដឹកនាំរបស់ធនាគារឯកទេសវីងតែងតែស្វែងរកវិធីដើម្បីបង្កើនប្រសិទ្ធភាពនៃលំហូរមូលនិធិសម្រាប់អតិថិជនរបស់ខ្លួន និងតែងតែរិះរក និងផ្តល់ដំណោះស្រាយទូទាត់ថ្មីៗជានិច្ច។

យោងតាមការផ្សព្វផ្សាយរបស់ធនាគារទាំងពីរប្រជាជនកម្ពុជានៅកូរ៉េខាងត្បូងអាចផ្ញើប្រាក់មកផ្ទះវិញដោយប្រើកម្មវិធីធនាគារចល័តរបស់ធនាគារ PPCBank បានភ្លាមៗ ដោយនេះជាមធ្យោបាយផ្ទេរប្រាក់យ៉ាងលឿនរវាងប្រទេសទាំងពីរ ហើយអ្នកទទួល អាចទទួលបានសាច់ប្រាក់នៅគ្រប់ទីកន្លែង និងគ្រប់ពេលវេលានៅក្នុងប្រទេសកម្ពុជាតាមរយៈកម្មវិធីវេរលុយ ឬតាមបណ្តាញរបស់វីងចំនួន 5ពាន់កន្លែងនៅទូទាំងប្រទេស។

អតិថិជនក៏អាចផ្ទេរប្រាក់ពីគណនី ធនាគារ PPCBank របស់ពួកគេទៅគណនីវីងបានដែរ។ នេះជាការផ្តល់ដំណោះស្រាយហិរញ្ញវត្ថុរួមសម្រាប់ប្រជាពលរដ្ឋ ដែលជាគោលបំណងរួមគា្នទៅវិញទៅមករបស់ធនាគារ PPCBank និងវីង។ ភាពជាដៃគូនេះមានចំណុចសំខាន់ៗ ដូចជាឆាប់រហ័ស និងមានសុវត្ថិភាព ងាយស្រួល និងមានតម្លៃសមរម្យ។ សាច់ប្រាក់អាចផ្ទេរដោយផ្ទាល់ទៅគណនីវីង ឬប្រមូលនៅភ្នាក់ងារវីងដែលមានជាង 5ពាន់កន្លែងនៅទូទាំងប្រទេសតាមរយៈលេខកូដសម្ងាត់ 8ខ្ទង់។

ទិន្នន័យផ្ទេរប្រាក់ពីប្រទេសកូរ៉េតាមរយៈធនាគារអេស៊ីលីដា បានបង្ហាញថា ការផ្ទេរប្រាក់ពីសាធារណរដ្ឋកូរ៉េខាងត្បូង មានចំនួនជិត 235លានដុល្លារដោយមានកំណើនប្រមាណ13% ធៀបនឹងឆ្នាំ2016 ដែលមានចំនួនទឹកប្រាក់ជិត 208លានដុល្លារ។

ទិន្នន័យដដែលនេះបង្ហាញថា តាមរយៈចំនួនទឹកប្រាក់ខាងលើនេះ ចំនួននៃការផ្ទេរប្រាក់បានកើនឡើងប្រមាណ15% រហូតដល់ចំនួន 84,057ដងក្នុងឆ្នាំ2017 ធៀបនឹងឆ្នាំ2016 ដែលចំនួននៃការផ្ញើប្រាក់មានចំនួន 73,146ដង។

ពលករកម្ពុជាដែលកំពុងធ្វើការងារនៅប្រទេសសាធារណរដ្ឋកូរ៉េមានជាង 4ម៉ឺននាក់ ដោយផ្ទេរប្រាក់មកប្រទេសកម្ពុជាវិញ ប្រមាណ 300លានដុល្លារ ក្នុង1ឆ្នាំ។ នេះបើយោងតាមទិន្នន័យរបស់ក្រសួងការងារ និងបណ្តុះបណ្តាលវិជ្ជាជីវៈ៕

April 10, 2018

វេទិកាសេដ្ឋកិច្ចពិភពលោកបង្ហាញពីប្រទេសដែលមានបណ្ឌិត (PhD) ច្រើនជាងគេបំផុត

ការអប់រំ ជាកូនសោមិនអាចខ្វះបានដែលជំរុញឱ្យមានកំណើនសេដ្ឋកិច្ចនៅលើពិភពលោក។ គ្រប់ប្រទេសអភិវឌ្ឍន៍ទាំងអស់សុទ្ធតែត្រូវការធនធានមនុស្ស ព្រោះធនធានមនុស្សជាបេះដូងនៃរបកគំហើញថ្មីៗទាំងអស់ ដែលពួកគេជាចំណែកមិនអាចខ្វះបានសម្រាប់សង្គម និងអភិវឌ្ឍន៍ប្រទេស។

ដោយមើលឃើញពីចរន្តនេះ ប្រទេសជាច្រើនលើពិភពលោកបានចាប់ផ្តើមវិនិយោគលើការអប់រំកម្រិតឧត្តម និងក្រោយឧត្តម ហើយប្រទេសមួយចំនួនក៏ជំរុញឱ្យប្រជាជនរបស់ខ្លួនធ្វើការស្រាវជ្រាវរហូតដល់បញ្ចប់ថ្នាក់បណ្ឌិតផងដែរ។ ខាងក្រោមនេះជាទិន្នន័យចុងក្រោយ បំផុតទាក់ទងនឹងចំនួនបណ្ឌិត (PhD) ក្នុងប្រទេសដែលមានអ្នកបញ្ចប់ថ្នាក់បណ្ឌិតច្រើនបំផុតលើពិភពលោក។

យោងតាមរបាយការណ៍របស់ OECD បានសហរដ្ឋអាមេរិកជាអ្នកនាំមុខគេដែលមានប្រជាជនបញ្ចប់ថ្នាក់ PhD ដល់ទៅ 67,449នាក់នៅក្នុងឆ្នាំ2014។ បន្ទាប់មកគឺប្រទេសអាល្លឺម៉ង់ ដែលមានអ្នកចប់ PhD ចំនួន 28,147 និងបន្ទាប់មកទៀតគឺប្រទេសអង់គ្លេសដែលល្បីល្បាញខាងផ្នែកអប់រំលើពិភពលោក និងមានអ្នកចប់ PhD ប្រមាណ 25,020នាក់។

ងាកមកបណ្ដាប្រទេសនៅក្នុងអាស៊ីវិញ ឥណ្ឌា បានឈរក្នុងចំណាត់ថ្នាក់លេខ4 ដែលមានប្រជាជនជាប់ PhD ចំនួន 24,300នាក់។ ចំនួននេះ គឺតាមពីក្រោយដោយប្រទេសល្បីល្បាញផ្នែកបច្ចេកវិទ្យាគឺ ជប៉ុន ខណៈប្រទេសនេះមានអ្នកជាប់ PhD ចំនួន 16,039នាក់។

យោងតាមរបាយការណ៍របស់ OECD ក៏បានបង្ហាញផងដែរពីចំនួនបណ្ឌិតដែលបានកើនឡើងយ៉ាងឆាប់រហ័សនៅលើពិភពលោកក្នុងរយៈពេល 2ទសវត្សរ៍ចុងក្រោយនេះ។ នៅក្នុងពិភពលោកដែលពោរពេញដោយលំហូរនៃសេដ្ឋកិច្ចយ៉ាងលឿននេះ ការបណ្តុះបណ្តាលធនធានមនុស្សត្រូវបានគេយកចិត្តទុកដាក់ខ្លាំង។ ក្នុងនោះចំនួន 40% នៃបណ្ឌិតដែលបានបញ្ចប់ការសិក្សាគឺជំនាញ វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ចំណែកឯជំនាញទាក់ទងនឹងសុខភាព និងជំនាញពាក់ព័ន្ធដទៃទៀតគឺ 58%៕

April 10, 2018

Facebook សារភាពថា បានឆែក និងមើលរាល់សាររបស់អ្នកប្រើប្រាស់ទាំងអស់

បណ្ដាញទំនាក់ទំនងសង្គមធំបំផុតរបស់ពិភពលោក Facebook បានសារភាពថា ខ្លួនពិតជាបានបំពានលើសិទ្ធិឯកជនរបស់អ្នកប្រើប្រាស់មែន ប៉ុន្តែការបំពាននោះគឺធ្វើឡើងក្នុងគោលបំណងល្អ ដែលផ្ទុយស្រឡះពីការចោទប្រកាន់។ នេះបើយោងតាមការចេញផ្សាយរបស់សារព័ត៌មាន Daily Mail។

បើតាមសម្តីរបស់ លោក Mike Schroepfer ដែលជានាយកផ្នែកបច្ចេកវិទ្យា (CTO) របស់ Facebook បានឱ្យដឹងថា Facebook បានធ្វើការស្គែនទៅលើសារ រូបភាព និង Link ដែលអ្នកប្រើប្រាស់បានផ្ញើឱ្យគ្នាទៅវិញទៅមកតាមរយៈ Facebook Messenger ប៉ុន្តែការដែលខ្លួនធ្វើបែបនេះគឺទី1 ត្រួតពិនិត្យទៅលើរូបភាពដែលបានផ្ញើនោះ តើវាជាការផ្សព្វផ្សាយពាណិជ្ជកម្មដែរឬទេ? និងមួយទៀតខ្លាចរូបភាពដែលផ្ញើនោះប៉ះពាល់ដល់ក្មេង និងជាពិសេសគឺ Link ដែលបានផ្ញើខ្លាចមានមេរោគបង្កប់ទៅជាមួយ ព្រោះថា មួយរយៈមុននេះមានមេរោគជាច្រើនបានឆ្លងតាមរយៈការផ្ញើ Link។

លោក Mike Schroepfer ក៏បានឱ្យដឹងទៀតដែរថា មានភាគីទី3 ទំនងជាបានកេងចំណេញ និងលួចទិន្នន័យរបស់អ្នកប្រើប្រាស់ តាមរយៈការប្រើឧបករណ៍ស្វែងរក (Search Tool) ក្លែងក្លាយក្នុងការប្រមែប្រមូលទិន្នន័យផ្ទាល់ឯកជនរបស់អ្នកប្រើប្រាស់ Facebook នៅជុំវិញពិភពលោកប៉ុន្តែករណីនេះ Facebook កំពុងធ្វើការស៊ើបអង្កេត។

នាពេលថ្មីៗនេះផងដែរ រដ្ឋមន្ត្រីទូរគមនាគមន៍ និងទំនាក់ទំនងឥណ្ឌូនេស៊ី លោក Rudiantara បានគំរាមបិទបណ្ដាញទំនាក់ទំនងសង្គមយក្ស Facebook នេះចោល បើសិនទិន្នន័យ ឬព័ត៌មានឯកជនរបស់អ្នកប្រើប្រាស់នៅក្នុងប្រទេសឥណ្ឌូនេស៊ី ត្រូវបានរំលោភបំពាន និងបែកធ្លាយ។

គួរបញ្ជាក់ផងដែរថា លោក Mark Zuckerberg សហស្ថាបនិក និងជានាយកប្រតិបត្តិ Facebook នឹងចូលផ្តល់សក្ខីកម្មនៅចំពោះមុខសភាសហរដ្ឋអាមេរិក នាថ្ងៃទី11 ខែមេសា ខាងមុខនេះ ជុំវិញរឿងអាស្រូវបែកធ្លាយទិន្នន័យរបស់អ្នកប្រើប្រាស់នេះ៕

April 9, 2018

ជឿទៅ… ក្នុងឱកាសបុណ្យចូលឆ្នាំខ្មែរថ្មីនេះ បទចម្រៀង “មាន់ស្រែ” របស់ រ៉ាប៊ី ល្បីកប់

ទើបតែបានបញ្ចេញផ្សាយនៅលើបណ្តាញ Youtube មិនទាន់បានប៉ុន្មានផងនោះ បទចម្រៀងចង្វាក់ញាក់កន្ត្រាក់អារម្មណ៍ និងត្រៀមចេញ ដើម្បីអបអរសាទរនៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះរបស់កំពូលតារាចម្រៀងស្រីវ័យក្មេងសាច់ម៉ដ្ឋស កញ្ញា រ៉ាប៊ី ត្រូវបានសាទរយ៉ាងកក់ក្ដៅពីសំណាក់អ្នកគាំទ្រ រហូតធ្លាយចេញទៅដល់បណ្តាប្រទេសមួយចំនួនទៀត ចម្លងយកទៅផ្សព្វផ្សាយបន្តគួរជាទីមោទន ក្នុងនោះសម្រាប់អ្នករស់នៅប្រទេសថៃគាំទ្រច្រើនជាងគេ។

ត្រឹមរយៈពេលមិនដល់2សប្ដាហ៍ផង សម្រាប់ការបង្ហោះបទចម្រៀង Original Song លក្ខណៈសំឡេង Audio “មាន់ស្រែ” របស់ស្រីស្រស់ រ៉ាប៊ីនៅលើបណ្តាញសង្គម YouTube មានអ្នកគាំទ្រចុចចូលស្តាប់យ៉ាងច្រើនកុះករស្ទើរមិនគួរឱ្យជឿរហូតដល់ជាង1លានកន្លះនាក់រួចបាត់ទៅហើយ។ ជាមួយនឹងការចុចចូលស្តាប់បទចម្រៀងថ្មីចង្វាក់ញាក់រាំបែកស្លុយ បែបសប្បាយៗប្រចាំឆ្នាំ2018របស់កំពូលតារាចម្រៀងស្រីវ័យក្មេងប្រចាំនៅក្នុងផលិតថោន ដែលធ្លាប់រងពាក្យចចាមអារ៉ាមថាមានសម្ពន្ធស្នេហាជាមួយតារាចម្រៀងប្រុស លោក សុគន្ធ ថេរ៉ាយុ ម្នាក់នេះក៏មានមនុស្សជាច្រើននាក់នាំគ្នាសរសេរ Comment ជាហូរហែថា បានត្រៀមខ្លួនរួចជាស្រេចក្នុងការចូលរាំលេងកម្សាន្តនៅក្នុងឱកាសចូលឆ្នាំថ្មីខាងមុខនេះ។ ជាថ្មីម្ដងទៀត កាលពីសប្ដាហ៍កន្លងទៅនេះ ជាការឆ្លើយតបទៅនឹងការចង់បាន និងក្ដីទន្ទឹងរបស់ប្រិយមិត្តស្នេហាវិស័យចម្រៀងក៏ដូចជាអ្នកគាំទ្ររបស់ខ្លួននោះ MV របស់បទចម្រៀង “មាន់ស្រែ” ដែលកំពុងទទួលបានការគាំទ្រខាងលើ រឹតតែធ្វើឱ្យបណ្តាញសង្គម YouTube មានភាពកក្រើករហូតគាំងម្ដងៗ ដោយសារតែមានអ្នកចូលមើលសកម្មភាព និងកាយវិការរាំដ៏រស់រវើករបស់កញ្ញា រ៉ាប៊ី រួមជាមួយក្រុមរាំប្រុសស្រីដ៏ស្រស់ស្អាតជាច្រើននាក់នៅតាមទីតាំងផ្សេងៗគ្នា ស្អាតៗ ប្លែកភ្នែកគួរឱ្យទាក់ទាញជាទីបំផុត។

ជាការសម្ដែងពីកិច្ចដឹងគុណចំពោះការគាំទ្រពីសំណាក់មហាជនខាងលើនេះ កញ្ញា រ៉ាប៊ី ក៏បានបង្ហាញពីក្ដីរំភើប និងរីករាយជាទីបំផុត រួមជាមួយនឹងការសន្យាព្យាយាមបង្កើតបទចម្រៀងថ្មីៗ ពីរោះៗ ប្រកបដោយភាពទាក់ទាញ ដើម្បីធ្វើយ៉ាងណាបម្រើអារម្មណ៍អ្នកគាំទ្រទាំងអស់ឱ្យមានក្ដីរីករាយជាមួយបទចម្រៀងរបស់ខ្លួនរហូតទៅ។

គួរបញ្ជាក់ផងដែរថា នៅក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ក្រៅពីបទចម្រៀងដែលកំពុងទទួលបានការគាំទ្រ “មាន់ស្រែ” កញ្ញា រ៉ាប៊ី ក៏មានចម្រៀងពីរោះៗជាច្រើនបទទៀត ដែលក្នុងនោះមានបទខ្លះច្រៀងតែម្នាក់ឯង និងមួយចំនួនទៀតច្រៀងឆ្លើយឆ្លងគ្នា ជាក់ស្ដែងដូចជាបទ “ស្នេហ៍អើយស្នេហ៍” និងបទ “អ្នកបម្រើ007” ច្រៀងឆ្លើយឆ្លងជាមួយនាយ ពាក់មី និងបទ “ខ្ញុំមានបង្ខំឱ្យរាំណា” និងបទ “និយាយពីអី” ច្រៀងម្នាក់ឯង(មានអ្នករ៉េប) ជាដើម៕

សូមរីករាយទស្សនាវីដេអូខាងក្រោម៖

April 9, 2018

ស្អែកនេះអ្នកដំណើរអាចជិះរថភ្លើងពីភ្នំពេញទៅព្រលានយន្តហោះបានហើយ

បន្ទាប់ពីដាក់ឱ្យដំណើរការសាកល្បងកាណូតដឹកអ្នកដំណើរពីព្រែកព្នៅទៅក្រុងតាខ្មៅរួចមក នៅព្រឹកស្អែកនេះក្រសួងសាធារណការ និងដឹកជញ្ជូននឹងដាក់ឱ្យដំណើរការសាកល្បងរថភ្លើងដឹកអ្នកដំណើរពីភ្នំពេញទៅព្រលានយន្តហោះអន្តរជាតិ ភ្នំពេញដែរហើយ។

យោងតាមសេចក្តីជូនដំណឹងរបស់ក្រសួងសាធារណការ និងដឹកជញ្ជូនបានឱ្យដឹងថា ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ ស៊ុន ចាន់ថុល នឹងអញ្ជើញជាអធិបតីភាពនៅក្នុងពិធីបើកឱ្យប្រើប្រាស់ជាបណ្តោះអាសន្នគម្រោងរថភ្លើងដឹកអ្នកដំណើរ ភ្នំពេញ-ព្រលានយន្តហោះអន្តរជាតិភ្នំពេញដែលនឹងប្រព្រឹត្តទៅនៅថ្ងៃអង្គារ ទី10 ខែមេសា ឆ្នាំ2018 វេលាម៉ោង06:30នាទីព្រឹកនៅស្ថានីយរថភ្លើងភ្នំពេញ។

សម្រាប់ការដាក់ឱ្យប្រើប្រាស់ជាបណ្តោះអាសន្ននេះ ប្រជាពលរដ្ឋអាចធ្វើដំណើរតាមក្បួនរថភ្លើងនេះដោយឥតគិតថ្លៃ ចាប់ពីថ្ងៃទី10 ខែមេសា រហូតដល់ថ្ងៃទី31 ខែកក្កដា ឆ្នាំ2018។

រថភ្លើងដឹកអ្នកដំណើរនេះនឹងចំណាយពេលប្រមាណ30នាទីក្នុងការដឹកជញ្ជូនអ្នកដំណើរពីស្ថានីយរថភ្លើងភ្នំពេញទៅព្រលានយន្តហោះអន្តរជាតិភ្នំពេញ និងអាចផ្ទុកអ្នកដំណើរបានប្រមាណ100នាក់(រួមទាំងអ្នកអង្គុយ និងអ្នកឈរ)៕

April 9, 2018

សេដ្ឋកិច្ចអាស៊ានឆ្នាំ2018 ត្រូវបានប៉ាន់ប្រមាណថា នឹងកើនឡើងជាង 5%

តាមការវាយតម្លៃរបស់មូលនិធិរូបិយវត្ថុអន្តរជាតិ ធនាគារអភិវឌ្ឍន៍អាស៊ី ក៏ដូចជាការិយាល័យម៉ាក្រូសេដ្ឋកិច្ចអាស៊ាន+3 បានឱ្យដឹងថា នៅឆ្នាំ2018 សេដ្ឋកិច្ចអាស៊ាននឹងបន្តរក្សាបានកំណើនរឹងមាំប្រមាណ5,2% ដែលគាំទ្រដោយភាពល្អប្រសើរនៃសេដ្ឋកិច្ចពិភពលោក និងកំណើនតម្រូវការក្នុងស្រុក ក្រោមបរិការណ៍ដែលវិស័យសេដ្ឋកិច្ច និងហិរញ្ញវត្ថុក្នុងតំបន់មានភាពសមាហរណកម្មកាន់តែកើនឡើង។

ការព្យាករក៏ដូចជាការវាយតម្លៃខាងលើត្រូវបានបង្ហាញនៅក្នុងកិច្ចប្រជុំប្រចាំឆ្នាំថ្នាក់ទេសាភិបាលធនាគារកណ្តាលអាស៊ាន និងកិច្ចប្រជុំពាក់ព័ន្ធនៅប្រទេសសិង្ហបុរីដែលដើរតួនាទីជាប្រធានអាស៊ាននៅឆ្នាំ2018នេះ។ ក្នុងនោះប្រទេសសិង្ហបូរីបានបន្តកំណត់គោលដៅជាអាទិភាពសម្រាប់តំបន់ចំនួន2 គឺការពង្រឹងភាពធន់ (resilience) និងលើកកម្ពស់នវានុវត្តន៍ (Innovation)។

ថ្លែងក្នុងកិច្ចប្រជុំនោះ ឯកឧត្តម ជា ចាន់តូ ទេសាភិបាលនៃធនាគារជាតិនៃកម្ពុជា បានគាំទ្រការកំណត់អាទិភាពសម្រាប់ឆ្នាំ2018 របស់ប្រទេសសិង្ហបុរី ដោយសារក្នុងស្ថានភាពសេដ្ឋកិច្ចពិភពលោកបច្ចុប្បន្ន ការពង្រឹងភាពធន់ និងលើកកម្ពស់នវានុវត្តន៍គឺជាកត្តាដ៏សំខាន់មួយដើម្បីឱ្យប្រទេសនានារក្សាបាននូវស្ថិរភាពទាំងម៉ាក្រូសេដ្ឋកិច្ច និងហិរញ្ញវត្ថុ ព្រមទាំងទាញយកអត្ថប្រយោជន៍ពីការរីកចម្រើនបច្ចេកវិទ្យា និងបង្កើតផលិតផលហិរញ្ញវត្ថុថ្មីៗស្របតាមតម្រូវការទីផ្សារ និងសម្រាប់ប្រជាជនក្រីក្រ សំដៅលើកកម្ពស់បរិយាប័ន្នហិរញ្ញវត្ថុ និងរក្សាចីរភាពកំណើន។

ឯកឧត្តមបានវាយតម្លៃខ្ពស់ចំពោះលទ្ធផលការងាររបស់គណៈកម្មាធិការការងារនានារបស់អាស៊ាន ដែលទទួលបានក្នុងឆ្នាំ2017 កន្លងទៅ និងលើកទឹកចិត្តឱ្យបន្តកិច្ចខិតខំប្រឹងប្រែងបន្ថែមទៀត ដើម្បីឈានទៅសម្រេចបានតាមគោលដៅនានា ដែលបានដាក់ក្នុងផែនការ 2016-2025។ ធនាគារជាតិនៃកម្ពុជា ក៏បានបង្ហាញជំហរគាំទ្រ និងចូលរួមជាមួយគណៈកម្មាធិការការងារនានាអាស៊ានដើម្បីអនុវត្តនូវគំនិតផ្តួចផ្តើមនានា ដែលជួយពង្រឹងសមាហរណកម្មវិស័យហិរញ្ញវត្ថុអាស៊ាន។

គួរបញ្ជាក់ថា តាមការវាយតម្លៃរបស់ស្ថាប័នអន្តរជាតិនានា រួមនឹងក្រសួងសេដ្ឋកិច្ចកម្ពុជា បានឱ្យដឹងថា កម្ពុជានៅតែរក្សាកំណើនសេដ្ឋកិច្ចរបស់ខ្លួនក្នុងរង្វង់ 6.9% ឬ7.0% ដែលជាកំណើនមានស្ថិរភាពអូសបន្លាយប្រមាណជាង 2ទសវត្សរ៍មកហើយ៕

April 9, 2018

ឆ្នាំនេះខេត្តតាកែវសល់ស្រូវជិត 80ម៉ឺនតោន

កសិកម្មជាវិស័យមួយយ៉ាងសំខាន់នៅប្រទេសកម្ពុជា ហើយពេលថ្មីៗនេះរាជរដ្ឋាភិបាលកម្ពុជាបានព្យាយាមគ្រប់លទ្ធភាពដើម្បីជំរុញដល់កសិករឱ្យផលិតស្រូវដើម្បីនាំចេញឱ្យបាន 1លានតោនក្នុងមួយឆ្នាំ។

ខេត្ត តាកែវ ត្រូវបានគេមើលឃើញថា ជាខេត្តដែលមានសក្តានុពលមួយក្នុងចំណោមខេត្តសំខាន់ៗដូចជាខេត្តបាត់ដំបង ពោធិ៍សាត់ និងកំពង់ធំជាដើម។

នៅឆ្នាំនេះ បើយោងតាមការឱ្យដឹងរបស់ប្រធានមន្ទីរកសិកម្ម រុក្ខាប្រមាញ់ និងនេសាទ លោក ញ៉ិប ស្រ៊ន បានលើកឡើងថា ការបង្កើតផលស្រូវរដូវវស្សាឆ្នាំ 2017-2018នេះ កសិករនៅខេត្ត តាកែវបានបង្កបង្កើនផលស្រូវលើផ្ទៃដីចំនួន 198,438 ហិកតា ស្មើនឹង 116.72 ភាគរយនៃផែនការ ក្នុងទិន្នផលមធ្យមជាង 3តោនក្នុងមួយហិកតា ដោយទទួលបានបរិមាណផលសរុបចំនួន 662,778តោន។

ងាកមកទិន្នផលស្រូវប្រាំងវិញប្រជាជនខេត្តតាកែវអនុវត្តបាន 98,580ហិកតា ស្មើនឹង 131.44ភាគរយនៃផែនការក្នុងទិន្នផលមធ្យមប្រមាណជិត 5តោនក្នុងមួយហិកតា ដែលទទួលបានបរិមាណផលសរុបចំនួន 484,062តោន។

សម្រាប់ឆ្នាំ2018នេះ លោកប្រធានមន្ទីរបានបញ្ជាក់ថា ប្រជាពលរដ្ឋនៅខេត្តតាកែវមានចំនួន 1,003,927នាក់ ខណៈម្នាក់ៗមានតម្រូវការស្បៀងប្រមាណ 143គីឡូក្រាមក្នុងមួយឆ្នាំ ហេតុនេះប្រជាជនទូទាំងខេត្តអាចនឹងត្រូវការស្បៀងប្រមាណ 143,562តោនក្នុងមួយឆ្នាំ។

តាមការប៉ាន់ប្រមាណលើតុល្យភាពស្បៀង ដោយដកចេញស្រូវសម្រាប់ការហូបចុកក្នុងមួយឆ្នាំ ការទុកពូជ ទុកជាចំណីសត្វ និងការបាត់បង់ស្រូវខ្លះពេលប្រមូលផល យើងឃើញថា នៅទូទាំងខេត្តតាកែវ អាចនៅសល់ស្រូវប្រមាណ 773,436តោន និងគិតជាអង្ករប្រមាណ 494,999តោន សម្រាប់ធ្វើការនាំចេញទៅបណ្តាខេត្តនានា និងក្រៅប្រទេស៕

April 9, 2018

Bayern វាយបកផ្តួល Augsburg ដើម្បីលើកពាន Bundesliga ជាលើកទី6 ជាប់ៗគ្នា

ក្រុម Bayern Munich បានឈ្នះពានក្របខ័ណ្ឌ Bundesliga សម្រាប់រយៈពេល 6រដូវកាលជាប់ៗគ្នា ក្រោយពីបានវាយបកដើម្បីផ្តួលក្រុម Augsburg ក្នុងលទ្ធផល 4-1 កាលពីថ្ងៃសៅរ៍។ លោក JuppHeynckes ដែលបានចូលកាន់តំណែងកាលពីខែតុលា ក្រោយពីលោក Carlo Ancelotti ត្រូវបានបណ្តេញចេញនោះ បានដឹកនាំឱ្យក្រុមរបស់លោក ជួបលទ្ធផលដ៏ជឿជាក់មួយ ដោយចាញ់ត្រឹមតែ 2លើកគត់ក្នុងចំណោមការប្រកួតទាំង 31លើករបស់លោក។

Bayern បានរបូតឱ្យមានគ្រាប់បាល់ 1គ្រាប់នាំមុខនៅលើទឹកដីក្រុម Augsburg ក្រោយពីខ្សែការពារ NicklasSule បានធ្វើឱ្យបាល់ចូលទីខ្លួនឯង នៅមុនពេលកីឡាករ CorentinTolisso, James Rodriguez និង Arjen Robben រកបានគ្រាប់បាល់មកវិញដើម្បីជួយឱ្យក្រុម Bayern ឈ្នះពានមួយនេះតែម្តង។

ខ្សែប្រយុទ្ធចំណូលថ្មី Sandro Wagner បានរកគ្រាប់បាល់ទី4នៅជិតបញ្ចប់ការប្រកួតសម្រាប់ក្រុម Bayern Munich ដែលក៏កំពុងតែស្ថិតក្នុងទីតាំងដ៏ល្អនៃការប្រកួតជាមួយនឹងក្រុម Sevilla ក្នុងក្របខ័ណ្ឌ Champions League ផងដែរ។ ការឈ្នះពាន 6លើកជាប់ៗគ្នា គឺជាការគ្រប់គ្រងដ៏យូរអង្វែងបំផុតក្នុងប្រវត្តិសាស្ត្រប្រកបដោយផ្លែផ្ការបស់ក្លិបនេះ។ បច្ចុប្បន្ន Bayern បានឈ្នះពានក្របខ័ណ្ឌអាល្លឺម៉ង់សរុបចំនួន 28លើក។

លទ្ធផលនេះ ធ្វើឱ្យក្រុម Bayern នាំមុខ 20ពិន្ទុដាច់ ខណៈដែលនៅសល់ការប្រកួតលីក 5លើកទៀតនៅរដូវកាលនេះ និងបានបង្ហាញពីសមត្ថភាពដ៏ខ្លាំងរបស់ពួកគេក្នុងការគ្រប់គ្រងក្របខ័ណ្ឌ Bundesliga ទាំងស្រុង។ តារាជើងចាស់ Robben ដែលបច្ចុប្បន្ន បានឈ្នះពានក្របខ័ណ្ឌ Bundesliga 7លើក ចាប់តាំងពីចូលរួមជាមួយនឹងក្លិប Bayern ក្នុងឆ្នាំ2009នោះ បានឱ្យដឹងថា៖ «វាតែងតែជារឿងដ៏ល្អក្នុងការឈ្នះពានមួយ។ យើងបានដឹងថា វានឹងកើតឡើង ប៉ុន្តែ យើងនៅតែត្រូវឈ្នះជាផ្លូវការ។ គ្មានអ្វីដែលកើតឡើងដោយងាយៗឡើយនៅក្នុង Bundesliga»៕

ប្រភពពី៖ The Sun

April 9, 2018

G Mekong សណ្ឋាគារ ដ៏ប្រណីត បង្ហាញពីបែបបទរស់នៅ នៃប្រជាជនខ្មែរតាមដងទន្លេមេគង្គ

វិស័យសណ្ឋាគារនៅរាជធានីភ្នំពេញនាពេលបច្ចុប្បន្ននេះ គឺមានភាពរីកចម្រើន និងរីកដុះដាលដូចផ្សិតដោយសារតែតម្រូវការការស្នាក់នៅមានការកើនឡើង ហើយវិស័យទេសចរណ៍របស់ប្រទេសកម្ពុជាក៏មានការរីកចម្រើនយ៉ាងខ្លាំងផងដែរ។ ដោយមើលឃើញពីភាពរីកចម្រើននៃវិស័យទេសចរណ៍ និងវិស័យបដិសណ្ឋារកិច្ចនៅកម្ពុជា សណ្ឋាគារ G Mekong ដែលជាបុត្រសម្ពន្ធនៃ G Group Investmentត្រូវបានបង្កើតឡើងនៅថ្ងៃទី5 ខែមករា ឆ្នាំ2017 ដោយផ្តល់នូវសេវាកម្មដូចជា កន្លែងស្នាក់នៅ និងភោជនីយដ្ឋានជាដើម។

សណ្ឋាគារ G Mekong កំពុងបង្ហាញដល់ពិភពលោកទាំងមូលនូវអត្តសញ្ញាណខ្មែរ វប្បធម៌ និងអរិយធម៌ដ៏រុងរឿងរបស់ខ្មែរយើងដោយគ្រប់ការរចនា និងការតុបតែងលម្អនៅក្នុងសណ្ឋាគារនេះ គឺសុទ្ធតែជារបស់ខ្មែរ ច្នៃឡើងដោយដៃដូចជា ឧបករណ៍នេសាទបែបប្រពៃណីខ្មែរ ទូកចែវ រូបគំនូរ និងរូបសំណាក់របស់ខ្មែរជាច្រើនទៀត។ អ្វីដែលកាន់តែពិសេសទៅទៀតនោះនៅក្នុងសណ្ឋាគារ G Mekong ក៏មានសាលតាំងពិព័រណ៌រូបគំនូររបស់ខ្មែរ ព្រមទាំងរូបចម្លាក់ដ៏ប្រណីត ដែលជាស្នាដៃរបស់កូនខ្មែរពិតៗ ដើម្បីបង្ហាញដល់ភ្ញៀវទេសចរទាំងអស់ដែលបានមកស្នាក់នៅក្នុងសណ្ឋាគារឱ្យបានស្គាល់និងបានឃើញពីវប្បធម៌ និងអារិយធម៌របស់ខ្មែរយើងដោយផ្ទាល់ភ្នែក។ សណ្ឋាគារ G Mekong គឺពិតជាស្រស់ស្អាត និងប្លែកទាក់ភ្នែកណាស់ហើយបើពិនិត្យមើលពីវិសាលភាពនៃសណ្ឋាគារវិញគឺនឹកស្មានមិនដល់នោះទេ ពីព្រោះនៅខាងក្រៅមើលទៅដូចជាមានលក្ខណៈតូច តែពេលចូលមកដល់ខាងក្នុងគឺធំទូលាយខ្លាំងណាស់ជាមួយនឹងវិសាលភាពនៃអគារចំនួន2បញ្ចូលគ្នា និងមានរហូតដល់9ជាន់ ព្រមទាំងមានបន្ទប់រហូតដល់91បន្ទប់ ដែលមានជម្រើស5ប្រភេទបន្ទប់ផ្សេងៗគ្នាជូនដល់ភ្ញៀវទេសចរ និងអ្នកជំនួញដែលមកសា្នក់នៅក្នុងសណ្ឋាគារលំដាប់ផ្កាយ4នេះ។

ងាកមកចាប់អារម្មណ៍ផ្នែកភោជនីយដ្ឋានដែលស្ថិតនៅក្នុងសណ្ឋាគារវិញម្តង ភោជនីយដ្ឋាន G Star ដែលជាសាខាទី2បន្ទាប់ពីសាខាទី1ដែលស្ថិតនៅក្នុងបរិវេណកោះពេជ្រ គឺបើកបម្រើជូនអាហារទាំង3ពេល ដោយអាហារពេលព្រឹកចាប់បើកពីម៉ោង6ព្រឹក ដល់ម៉ោង10ព្រឹកអាហារពេលថ្ងៃត្រង់ចាប់បើកពីម៉ោង11ព្រឹកដល់ម៉ោង2រសៀល និងអាហារពេលល្ងាចពីម៉ោង6ល្ងាច ដល់ម៉ោង10យប់ ដែលបម្រើជូនអាហារបែបខ្មែរ បែបអឺរ៉ុប និងបែបចិន។ អាហារដែលទទួលបានការពេញនិយមជាងគេប្រចាំភោជនីយដ្ឋាន G Star មានដូចជា ឡុកឡាក់សាច់គោ អាម៉ុកត្រីខ្ចប់ស្លឹកចេក សម្លការីខៀវ សម្លការីក្រហមបែបខ្មែរ ស្តេកសាច់គោ ស្តេកសាច់ចៀម ស្តេកសាច់ជ្រូក និងស្តេកសាច់ត្រីសាល់ម៉ុន និងមីឆាឆាវហ្វាន់សាច់គោ។ ក្រៅពីអាហារនៅភោជនីយដ្ឋាន G Star ក៏មានជាប្រភេទភេសជ្ជៈមានជាតិអាល់កុល ហើយនឹងភេសជ្ជៈមិនមានជាតិអាល់កុលជាច្រើនជម្រើសទៀត ដែលភ្ញៀវទាំងអស់អាចជ្រើសរើសទទួលទានផ្ទាល់នៅក្នុងភោជនីយដ្ឋានដែលស្ថិតនៅជាន់ផ្ទាល់ដីនៃសណ្ឋាគារ ឬអាចឡើងទៅជាន់ទី7 ទទួលទានបណ្តើរហែលទឹកលេងបណ្តើរនៅឯ Pool Bar ក៏បាន។ ភេសជ្ជៈដេលទទួលបានការពេញនិយមជាង
គេនៅភោជនីយដ្ឋាន G Star មានដូចជា ស្រាក្រឡុកដែលជារូបមន្តក្រឡុកយ៉ាងពិសេសប្រចាំភោជនីយដ្ឋានគឺ ស្រាក្រឡុក G Star Blue Sky និងស្រាក្រឡុក Passion Corona៕

April 9, 2018

Category: សង្គម និងសេដ្ឋកិច្ច