Category: សង្គម និងសេដ្ឋកិច្ច

ក្លៀកខ្មៅ ប្រែជាសបានក្នុងរយៈពេល 1 ខែតាមវិធីបែបធម្មជាតិ
ក្លៀកខ្មៅ ជាបញ្ហាដ៏ធំណាស់សម្រាប់សុភាពនារីយើង និងជាមូលហេតុមួយធ្វើឱ្យនារីៗមិនហ៊ានពាក់អាវវាលក្លៀក ឬមិនចង់បង្ហាញបរិវេណវង្វង់ក្លៀកឡើយ ព្រោះខ្មាសគេខ្លាំងណាស់ ព្រមទាំងជាបញ្ហាដ៏គួរឱ្យរំខានចិត្តទៀតផង។ តែពេលនេះ នារីៗដែលមានបញ្ហាក្លៀកខ្មៅនេះនឹងអស់កង្វល់តទៅទៀតហើយ ព្រោះគេហទំព័រ ឡារ៉ែន នឹងជម្រាបប្រាប់អំពីវិធីកែបញ្ហានេះ ដើម្បីឱ្យសុភាពនារីទាំងឡាយមានទំនុកចិត្តមកលើខ្លួនឯងជាថ្មីឡើងវិញ ដោយការកែប្រែក្លៀកខ្មៅ ឱ្យទៅជាសស្អាត ហើយតឹងណែន គ្មានស្លាកស្នាម ក្នុងរយៈពេល 1 ខែ តាមរូបមន្ដធម្មជាតិ។
វត្ថុត្រៀមសម្រាប់ធ្វើម៉ាស្សាសម្អាតស្បែកក្លៀក៖
1.ទឹកត្រសក់ច្របាច់ 1 ស្លាបព្រាកាហ្វេ
2.ទឹកក្រូចឆ្មារ 1 ស្លាបព្រាកាហ្វេ
3.ម្សៅមើមរមៀត កន្លះស្លាបព្រាកាហ្វេ
4.ប្រេងដូង 1 ស្លាបព្រាបាយ
វិធីធ្វើ៖ គ្រាន់តែយកវត្ថុធាតុផ្សំដែលបានតៀមខាងលើ មកលាយឱ្យក្លាយជាល្បាយស្មើសាច់មួយ តែមិនចាំបាច់លាយជាមួយប្រេងដូងនៅក្នុងចានតែមួយទេ (ទុកប្រេងដូងនៅដោយឡែក)។
វីធីម៉ាស្សា ៖ បន្ទាប់ពីងូតទឹករួច ជូតខ្លួនឱ្យស្ងួត រួចយកសំឡីជ្រលក់ជាមួយប្រេងដូង យកមកលាប និងធ្វើម៉ាស្សាថ្មមៗនៅបរិវេណរង្វង់ក្លៀក ។ ក្រោយមកទៀតក៏យកសំឡីជ្រលក់ជាមួយល្បាយវត្ថុធាតុដែលបានលាយរួចនោះ មកលាបថ្នមៗពីលើបរិវេណក្លៀកបន្ថែម ទុកចោលរយៈពេល 20 នាទី ទើបទៅលាងទឹកឱ្យស្អាត ជាការស្រេច។
បន្ថែម៖ សម្រាប់អ្នកដែលមានបញ្ហាក្លៀកខ្មៅខ្លាំង យកល្អ គួរតែអនុវត្តវិធីនេះ យ៉ាងហោចណាស់ឱ្យបាន 2-3 ដងក្នុងមួយសបា្ដហ៍៕
April 20, 2018
ប្រព័ន្ធបច្ចេកវិទ្យានឹងជួយឱ្យសហគ្រាសក្នុងស្រុកពង្រីកទីផ្សារទៅកាន់ពិភពលោក
ថ្លែងក្នុងព្រឹត្តិការណ៍ «សប្ដាហ៍ស្ដីពីពាណិជ្ជកម្មតាមអេឡិចត្រូនិក (E-Commerce Week)» ដែលរៀបចំដោយសន្និសីទសហប្រជាជាតិស្ដីពីពាណិជ្ជកម្ម និងអភិវឌ្ឍន៍ (UNCTAD) ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មមានប្រសាសន៍ថា ការប្រើប្រាស់ប្រព័ន្ធឌីជីថលដើម្បីកាត់បន្ថយរបាំងសម្រាប់ការនាំចេញ ជាចលករជំរុញឱ្យសហគ្រាសធុនតូច និងមធ្យមអាចមានឱកាសចូលរួមធ្វើពាណិជ្ជកម្មនៅក្នុងទីផ្សារសកលលោក ជាពិសេសប្រព័ន្ធបច្ចេកវិទ្យាឌីជីថលអាចបង្ខិតឱ្យកាន់តែជិត និងបង្កើតភាពងាយស្រួលដល់សហគ្រាសធុនតូច និងមធ្យមទាំងនោះក្នុងការជួបជាមួយនឹងអតិថិជន និងធ្វើការផ្សព្វផ្សាយលក់ទំនិញរបស់ខ្លួនបានយ៉ាងឆាប់រហ័ស។
លើសពីនេះទៀត ការប្រើប្រាស់ប្រព័ន្ធឌីជីថលដែលមានភាពទូលំទូលាយនឹងជំរុញឱ្យមានគំនិតច្នៃប្រឌិត និងនវានុវត្តន៍ថ្មីៗសម្រាប់ធ្វើពាណិជ្ជកម្ម បង្កើនសហគ្រិនភាព និងបង្កើតការងារសម្រាប់ស្ត្រី យុវជន និងអ្នកជំនួញដទៃទៀត ក៏ដូចជាប្រជាពលរដ្ឋនៅតាមជនបទជាដើម។ បើទោះបីជាប្រព័ន្ធឌីជីថលមានផលប្រយោជន៍ច្រើនក៏ពិតមែន ប៉ុន្តែក៏នៅមានបញ្ហាប្រឈមមួយចំនួនដែរដូចជា កង្វះខាតចំណេះដឹងលើប្រព័ន្ធព័ត៌មានវិទ្យា ហេដ្ឋារចនាសម្ព័ន្ធទាំងផ្នែករឹង និងទន់ លិខិតបទដ្ឋានគតិយុត្ត ដែលទាំងអស់នេះត្រូវតែដោះស្រាយឱ្យបានរួចរាល់មុននឹងអាចទាញយកផលប្រយោជន៍ពីប្រព័ន្ធបច្ចេកវិទ្យានេះបាន។
ជាមួយគ្នានេះ ឯកឧត្តមរដ្ឋមន្ត្រីក៏បានអញ្ជើញចូលរួមនៅក្នុងកិច្ចពិភាក្សាលើ «បែបផែនអភិវឌ្ឍន៍នៃផ្លាតហ្វ៉មឌីជីថល (Development Dimensions of Digital Platforms)» ដែលមានការចូលរួមពីថ្នាក់ដឹកនាំកំពូលៗមកពីប្រព័ន្ធអង្គការសហប្រជាជាតិ និងឯកឧត្តម Roberto Azevedo អគ្គនាយកនៃអង្គការពាណិជ្ជកម្មពិភពលោកផងដែរ។ នៅក្នុងកិច្ចពិភាក្សានេះ ឯកឧត្តមរដ្ឋមន្ត្រីក៏បានចូលរួមមតិផងដែរ ដោយបានលើកឡើងថា ប្រព័ន្ធបច្ចេកវិទ្យាមានការផ្លាស់ប្ដូរជាលំដាប់ ហើយផ្លាតហ្វ៉មឌីជីថល គឺបានរួមចំណែកធំមួយដល់ការប្រែក្លាយគំរូធុរកិច្ច (Business Model) ដើម្បីស្វែងរកផលចំណេញអតិបរមា។
សម្រាប់ផ្លាតហ្វ៉មឌីជីថលដែលមានទ្រង់ទ្រាយជាទីផ្សារពាណិជ្ជកម្មតាមអេឡិចត្រូនិក ជាកម្លាំងចលករមួយដើម្បីជំរុញឱ្យមានការគិតគូរឡើងវិញអំពីរបៀបធ្វើពាណិជ្ជកម្មដើម្បីផ្ដល់ផលប្រយោជន៍ជាបរិយាប័ន្នដល់អ្នកពាក់ព័ន្ធ ដូចនេះកម្ពុជាត្រូវតែបន្តដំណើរទៅមុខទៀត និងប្រឹងប្រែងយល់ឱ្យបានច្បាស់លាស់អំពីផ្លាតហ្វ៉មឌីជីថលនេះ ដើម្បីទាញយកផលប្រយោជន៍ពីផ្លាតហ្វ៉មឌីជីថលដែលមានស្រាប់ ឬបង្កើតផ្លាតហ្វ៉មឌីជីថលក្នុងស្រុកស្របតាមបរិបទកម្ពុជា ដើម្បីជាច្រកមួយក្នុងការធ្វើពាណិជ្ជកម្មទៅកាន់ទីផ្សារពិភពលោក៕
April 20, 2018
ក្រុមហ៊ុនAmazon ចាប់ផ្តើមលក់ទំនិញពីសហរដ្ឋអាមេរិកទៅទូទាំងពិភពលោក
ក្រុមហ៊ុនAmazon.com Incបានបើកដំណើរការជាលក្ខណៈពិសេសក្នុងការទិញឥវ៉ាន់ជាអន្តរជាតិមួយដែលនឹងជួយដល់អតិថិជនទូទាំងពិភពលោកដើម្បីទិញទំនិញជាង 45 លានមុខពីសហរដ្ឋអាមេរិកដែលអាចដឹកជញ្ជូនទៅកាន់ប្រទេសរបស់ពួកគេបានយ៉ាងងាយស្រួល។
លក្ខណៈពិសេសនៃការទិញទំនិញបែបអន្ដរជាតិដែលមាននៅលើកម្មវិធី browser និងMobile app ដែលដំណើរការដោយប្រព័ន្ធ iOS និងAndroid នេះត្រូវបានពង្រីកទៅដល់អ្នកប្រើប្រាស់ទូទាំងពិភពលោកដើម្បីទិញផលិតផលនៅខាងក្រៅទីផ្សារក្នុងស្រុករបស់ពួកគេ និងអាចប្រើបានចំនួន 5ភាសា ដែលរួមមានភាសាអង់គ្លេស ចិន ប្រេស៊ីល ព័រទុយហ្គាល់ និងអាល្លឺម៉ង់។
កម្មវិធីនេះនឹងអនុញ្ញាតឱ្យអតិថិជនទិញតាមរយៈរូបិយប័ណ្ណចំនួន 25ប្រភេទ ហើយនឹងមានដាក់បញ្ចូលភាសាបរទេស និងរូបិយប័ណ្ណផ្សេងៗបន្ថែមទៀតជាច្រើនក្នុងឆ្នាំ 2018នេះ ហើយក្រៅពីនេះអតិថិជនក៏អាចជ្រើសរើសប្រើសេវាដឹកជញ្ជូនផ្សេងៗ និងរយៈវេលានៃការដឹកជញ្ជូនបានទៀតផង។
លក្ខណៈពិសេសនៃការទិញឥវ៉ាន់បែបអន្ដរជាតិនេះនឹងមានដាក់បង្ហាញពីការកំណត់តម្លៃទំនិញ ប៉ុន្តែតម្លៃការដឹកជញ្ជូន និងតម្លៃសេវាផ្សេងៗពាក់ព័ន្ធនឹងការនាំចូល គឺអតិថិជនជាអ្នកបង់ក្នុងប្រទេសរបស់ខ្លួន៕
April 19, 2018
លោក Kovac ដឹកនាំឱ្យ Frankfurt ទៅជួប Bayern ក្នុងវគ្គផ្តាច់ព្រ័ត្រ
ការស៊ុតបាល់ដោយការប្រើកែងជើងទាត់បកទៅក្រោយដ៏ល្អពីសំណាក់កីឡាករ Luka Jovic បានជួយឱ្យក្រុម Eintracht Frankfurt កត់ត្រាជ័យជម្នះក្នុងលទ្ធផល 1-០ លើក្រុម Schalke ក្នុងការប្រកួតវគ្គពាក់កណ្តាលផ្តាច់ព្រ័ត្រនៃពាន German Cup កាលពីថ្ងៃពុធ ដែលមានន័យថា ក្រុម Bayern Munich នឹងត្រូវប៉ះជាមួយអនាគតគ្រូបង្វឹករបស់ពួកគេ គឺលោក Niko Kovacក្នុងវគ្គផ្តាច់ព្រ័ត្រ នាខែក្រោយនេះ។
គ្រាប់បាល់របស់ Jovic គ្រប់គ្រាន់ក្នុងការជួយឱ្យក្រុមសល់សមាជិកត្រឹមតែ 10នាក់ Frankfurt ទទួលបានជ័យជម្នះក្នុងការប្រកួតដ៏ស្វិតស្វាញមួយ ដើម្បីឈានទៅវគ្គផ្តាច់ព្រ័ត្រនៃពាន German Cup ជាប់ៗគ្នា និងបង្កើតឱ្យមានការជួបគ្នារវាងលោក Kovac និងក្រុម Bayern នាថ្ងៃទី19 ខែឧសភាខាងមុខនេះ។ ការប្រកួតវគ្គផ្តាច់ព្រ័ត្រនៃកីឡដ្ឋាន Olympiastadion ក្នុងទីក្រុងប៊ែរឡាំងនឹងក្លាយជាការប្រកួតចុងក្រោយរបស់លោក Kovac ក្នុងនាមជាគ្រូបង្វឹករបស់ក្រុម Frankfurt នៅមុនពេលលោកចូលកាន់តំណែងដដែលនេះនៅឯក្លិប Bayern នៅរដូវក្តៅនេះ។ លោក Kovac បានប្រាប់ទូរទស្សន៍ Sky Sports ថា៖ «វាបានក្លាយជាការប្រកួតដ៏ស្វិតស្វាញមួយ ប៉ុន្តែក្រុមនេះពិតជាធ្វើបានល្អមែន។ ខ្ញុំគិតថា នៅទីបំផុត ក្រុមរបស់ខ្ញុំចង់បានវាខ្លាំងជាងបន្តិច»។
ស្របពេលជាមួយគ្នានេះ Kevin-Prince Boateng របស់ក្រុម Frankfurt ដែលត្រូវនឹងប៉ះជាមួយនឹងប្អូនប្រុសកណ្តាលរបស់គេគឺ Jerome នៅក្នុងការប្រកួតជាមួយនឹងក្រុម Bayern នោះ បានឱ្យដឹងថា៖ «ខ្ញុំមិនអាចមានអារម្មណ៍ឈឺចាប់ទៅលើបញ្ហារបួសខ្ញុំទៀតឡើយ។ ទោះបីជាយ៉ាងណា យើងនឹងទៅទីក្រុងប៊ែរឡាំង។ ខ្ញុំពិតជាមានមោទនភាពទៅលើក្រុមនេះណាស់»៕
ប្រភពពី៖ sports.yahoo.com
April 19, 2018
Man Utd វិលទៅកាន់ផ្លូវនៃជ័យជម្នះវិញ ខណៈលោក Mourinho ធូរស្រាលមុនប៉ះ Spurs

ក្រុម Manchester United បានផ្តល់ការឆ្លើយតបយ៉ាងល្អឥតខ្ចោះទៅកាន់ការរិះគន់របស់លោក Jose Mourinho ខណៈដែលពួកគេបានវិលទៅកាន់ផ្លូវនៃជ័យជម្នះវិញតាមរយៈការផ្តួលក្រុម Bournemouth ក្នុងលទ្ធផល 2-០ កាលពីថ្ងៃពុធ។
គ្រាប់បាល់ស៊ុតបញ្ចូលទីពីខ្សែការពារ Chris Smalling និងខ្សែប្រយុទ្ធ Romelu Lukakuបានជួយឱ្យ Man Utd រកបាន 3ពិន្ទុពេញនៅកីឡដ្ឋាន Dean Court ក្រោយពីលោក Mourinhoបានធ្វើការផ្លាស់ប្តូរកីឡាករ 7នាក់បន្ទាប់ពីក្រុមរបស់លោកបានរងបរាជ័យយ៉ាងមិននឹកស្មានដល់ក្រោមស្នាដៃក្រុមបាតតារាងWest Bromwich Albion កាលពីថ្ងៃអាទិត្យ។ លទ្ធផលចាញ់នេះបានផ្តល់ពានក្របខ័ណ្ឌ Premier League ទៅឱ្យក្រុម Manchester City ដែលបណ្ដាលឱ្យលោក Mourinho ចោទប្រកាន់កីឡាកររបស់លោកថា មានមោទនភាពលើខ្លួនឯងខ្លាំងជ្រុលពេក។
ក្នុងកិច្ចខិតខំព្យាយាមក្នុងការតឿនរំឭកដល់តារាឆ្នើមៗដែលធ្លាក់ចុះទម្រង់លេងរបស់ខ្លួនអ្នកចាត់ការទូទៅរបស់ Man United រូបនេះបានសម្រេចធ្វើការផ្លាស់ប្តូរក្នុងក្រុមនៅពេលប្រកួតជាមួយនឹងBournemouth ខណៈដែល Lukaku, Alexis Sanchez និងJuan Mata សុទ្ធសឹងស្ថិតក្នុងតារាឆ្នើមៗដែលអវត្តមានក្នុងជម្រើសទាំង 11នាក់ដំបូងនៅមុនពេលការប្រកួតពានFA Cup វគ្គពាក់កណ្តាលផ្តាច់ព្រ័ត្រជាមួយនឹងក្រុម Tottenham នៅថ្ងៃសៅរ៍នេះ។ នៅមុនពេលការប្រកួត លោក Mourinho បាននិយាយថា៖ «តើការជ្រើសរើសក្រុមផ្អែកទៅលើការប្រកួតកាលពីចុងសប្តាហ៍មុននេះ ឬនៅមុនពេលការប្រកួតវគ្គពាក់កណ្តាលផ្តាច់ព្រ័ត្រ? វាផ្អែកទៅលើចំណុចទាំង2 បន្តិចបន្តួច»៕

ប្រភពពី៖ Channel News Asia

April 19, 2018
ករុណា ពេជ្រ ប្រកាសលក់ផ្ទះវីឡាទោល ដើម្បីយកប្រាក់ព្យាបាលឪពុកនៅឯបរទេស
ប៉ុន្មានម៉ោងមុននេះបន្ដិច តារាចម្រៀងប្រុសប្រចាំផលិតកម្មថោន លោក ករុណា ពេជ្រ បានបង្ហោះរូបភាពជាច្រើនសន្លឹកដែលបង្ហាញឱ្យឃើញថា ស្ថានភាពជំងឺរបស់ឪពុកលោកហាក់ដូចជាកាន់តែធ្ងន់ធ្ងរខ្លាំងហើយ រហូតដល់រូបលោកត្រូវប្រកាសដាក់លក់ផ្ទះវីឡាប្រណីតមួយ ដើម្បីយកប្រាក់ទៅព្យាបាលជំងឺឪពុករបស់លោកនៅប្រទេសក្រៅជាបន្ដទៀត។
លោក ករុណា ពេជ្រ បានរៀបរាប់ថា «កូនមកដល់ផ្ទះវិញហើយប៉ា…ផ្ទះធំពេក ហើយប៉ាឈឺទៀត…កូននឹងនាំប៉ាទៅព្យាបាលបន្តនៅក្រៅប្រទេសឆាប់ៗនេះ…។ កុំឱ្យសៅហ្មង ខ្ញុំសូមប្រកាសលក់ផ្ទះវីឡាទោល ហើយកែងផ្លូវខាងមុខតែម្តង…ដែលមានទីតាំងនៅបុរីពិភពថ្មី សំរោងអណ្តែត3 ផ្ទះលេខ 2 ( E0,E1,E2 ) ផ្លូវA…ទល់មុខសួនច្បារធំ2 មានទីធ្លាធំទូលាយនៅមុខផ្ទះ….ចំណាយពេលតែ 5នាទីដល់ផ្សារ Makro និងផ្សារទំនើបAEON II។ ទំហំដី : ទទឹងមុខ 18,40 m រីកទទឹងក្រោយ 19,40m និងបណ្តោយ 33,40 m»។ លោកបានបញ្ជាក់ដែរថា ប្រសិនបើប្រិយមិត្តមានចំណាប់អារម្មណ៍ អាចទំនាក់ទំនងមកកាន់ Inbox ហ្វេសប៊ុករបស់លោកផ្ទាល់តែម្ដង។
គួរំឭកផងដែរថា កន្លងមកស្ថានភាពជំងឺរបស់ឪពុកលោកបានធូរស្បើយ និងបានដឹងខ្លួនមកវិញម្ដងហើយ អាចនិយាយបាន កម្រើកខ្លួនបានខ្លះហើយ ទើបបានជាតារាប្រុសរូបនេះនាំលោកឪពុកមកធ្វើលំហាត់ប្រាណនៅមុខផ្ទះជារៀងរាល់ព្រឹក តែមកដល់ពេលនេះវិញ ស្ថានភាពជំងឺហាក់ដូចជាមិនទាន់ធូរស្បើយនៅឡើយទេ ទើបធ្វើឱ្យតារាប្រុសរូបនេះ សម្រេចចិត្តនាំឪពុកទៅបន្ដព្យាបាលនៅឯបរទេសតែម្ដង៕
April 19, 2018
ទឹម រដ្ឋា សុខចិត្តចោលឱកាសមាស ឱកាសប្រាក់ដើម្បីបានជួបជុំក្រុមគ្រួសារយ៉ាងកក់ក្ដៅ
នៅថ្ងៃម្សិលមិញនេះ អ្នកនាង ទឹម រដ្ឋា បានបង្ហោះរូបភាពជាច្រើនសន្លឹកអមដោយសារខ្លះៗ ដែលបានប្រាប់ពីមូលហេតុពិតឱ្យមហាជនបានជ្រាបពីការដែលនាងមិនមានវត្តមានក្នុងការបង្ហាញជូននូវការសម្ដែងឱ្យពុកម៉ែបងប្អូនប្រជាពលរដ្ឋខ្មែរបានទស្សនា បានជួប និងបានឃើញរូបនាងដោយផ្ទាល់នាឱកាសមហាសង្ក្រាន្ដឆ្នាំថ្មីនៅលើទឹកដីទីក្រុងអង្គរ ខេត្ត សៀមរាបនាពេលកន្លងមកនោះ។
បើទោះបីជាមានឱកាសមាស ឱកាសប្រាក់នៅក្នុងថ្ងៃប្រារព្ធពិធីអង្គរសង្ក្រាន្ដយ៉ាងណាក្ដី អ្នកនាងទឹម រដ្ឋា បានអះអាងប្រាប់ថា «ជារៀងរាល់ពេលចូលឆ្នាំខ្មែរប្រពៃណីជាតិរយៈពេល 3ថ្ងៃ មានគេសួរខ្ញុំច្រើនណាស់នូវពាក្យដដែលៗថា ហេតុអឺអត់ឃើញខ្ញុំទៅចូលរួមមហាសង្រ្កាន្ត សម្ដែងរាំច្រៀងនៅខេត្តសៀមរាបនឹងគេអ៊ីចឹង? ខ្ញុំបានប្រាប់ទៅគេវិញថា អត់បានចូលរូមទេ ព្រោះខ្ញុំចង់ចំណាយពេលវេលា 3ថ្ងៃដ៏សែនពិសេសមួយនេះនៅជាមួយនឹងគ្រួសារដ៏សែនកក់ក្ដៅរបស់ខ្ញុំ ដូចជាបងប្អូនទាំងអស់គ្នាខ្លះក៏អ៊ីចឹងដែរ»។
ជាការពិតណាស់ តាមការបង្ហោះរូបភាពជាហូរហែមកត្រូវបានគេដឹងថា ក្នុងរយៈពេល 3ថ្ងៃនៃពិធីបុណ្យចូលឆ្នាំថ្មីកន្លងទៅនេះ តារាសម្តែងទឹម រដ្ឋា បាននាំអ្នកម្តាយ និងក្រុមគ្រួសារទៅដើរលេងសង្ក្រាន្តដល់ទៅ 2ខេត្តយ៉ាងសប្បាយរីករាយ គឺសង្រ្កាន្តព្រៃវែង និងបាត់ដំបង។ អ្នកនាងបន្ដថា «ព្រោះពេលវេលាធម្មតាយើងរវល់ធ្វើការរកស៊ីរៀងៗខ្លួន ហើយក៏មិនមានពេលបានផ្ដល់ឱ្យគ្នាជាញឹកញាប់ទេ អ៊ីចឹងឱកាសនេះជាឱកាសដ៏ល្អដែលយើងបានជូបជុំគ្នាដែលមិនអាចខ្វះបាន ហើយខ្ញុំក៏សុំទោសដល់បណ្ដាក្រុមការងារទាំងអស់ដែលតែងតែទាក់ទងមកខ្ញុំ ហើយខ្ញុំមិនបានទទួល តែឥឡូវពិធីបុណ្យចូលឆ្នាំថ្មីត្រូវបានបញ្ចប់ហើយ ហើយខ្ញុំក៏មកទទួលការងារវិញដែរ»៕
April 19, 2018
អស្ចារ្យ!! ឈុតបុរាណខ្មែររចនាម៉ូដយ៉ាងប្រណីតក្នុងព្រឹត្តិការណ៍អង្គរសង្ក្រាន្ត ឆ្នាំ2018
បើទោះជាអាកាសធាតុក្តៅបន្តិចក៏ដោយ តែវាមិនអាចរារាំងដំណើរកម្សាន្តដ៏សប្បាយរីករាយ និងពោរពេញដោយស្នាមញញឹមក្រោមម្លប់នៃសុខសន្តិភាពរបស់អ្នកទេសចរជាតិ និងបរទេសបានឡើយនាព្រឹត្តិការណ៍អង្គរសង្ក្រាន្ត ឆ្នាំ2018នេះ។ ល្បែងប្រជាប្រិយ របាំប្រពៃណីខ្មែរ សិល្បៈ និងការតាំងពិព័រណ៍ចម្រុះបានជំរុញទឹកចិត្តភ្ញៀវទេសចរគ្រប់រូបមិនឱ្យអល់អែករារែកក្នុងការផ្តិតយកទស្សនីយភាពទុកជាអនុស្សាវរីយ៍ឡើយ និងកាន់តែអស្ចារ្យថែមទៀតនោះ គឺព្រឹត្តិការណ៍អង្គរសង្ក្រាន្ត ឆ្នាំ2018នេះ មានការលេងល្បែងប្រជាប្រិយខ្មែរជាច្រើនប្រភេទ និងមានការច្រៀងរាំ សម្តែងរបាំ ល្ខោនយីកេ ផ្ទាំងទស្សនីយភាពប្លែកៗ សប្បាយៗជាច្រើនទៀត និងការបង្ហាញម៉ូដសម្លៀកបំពាក់ច្នៃប្រឌីតស្អាតៗជាច្រើនម៉ូដ ដែលជាស្នាដៃកូនខ្មែរពិតៗទៀតផង។
ភាពសប្បាយរីករាយនេះនឹងជំរុញការផ្សព្វផ្សាយវប្បធម៌ ប្រពៃណី សម្លៀកបំពាក់បុរាណខ្មែរទៅកាន់ភ្ញៀវបរទេសទូទាំងសកលលោកដែលបានមកចូលរួមទស្សនាកម្មពិធីព្រឹត្តិការណ៍អង្គរសង្ក្រាន្ត ឆ្នាំ2018នេះឱ្យបានស្គាល់កាន់តែច្បាស់ ដោយអ្នករៀបចំកម្មវិធីបានធ្វើការដាក់តាំង និងធ្វើការដើរបង្ហាញម៉ូដសម្លៀកបំពាក់បែបបុរាណច្នៃលាយសម័យ ដែលផលិតចេញពីវត្ថុសម្ភារនានា ជាស្នាដៃកូនខ្មែរដែលធ្លាប់យកទៅប្រកួតនៅលើឆាកអន្ដរជាតិមកបង្ហាញជូនទស្សនាទៀតផង។ ចង់ដឹងថា សម្រស់នារីខ្មែរ និងឈុតបុរាណច្នៃ មានសោភ័ណភាព និងប្រណីតភាពបែបណានោះ សូមទស្សនារូបភាពទាំងអស់ខាងក្រោមនេះ៖
April 19, 2018
ឌីជេ ក្ដឹប ប្រកាសបញ្ចប់អាជីពតែងនិពន្ធ ព្រោះហេតុផល…
កាលពីពេលថ្មីៗនេះ ក្រោយពីតារាចម្រៀងស្រីប្រចាំផលិតកម្មថោន កញ្ញា ស៊ូ ស៊ីរិកា បានប្រកាសដើរចេញពីវិថីសិល្បៈ និងទៅតាំងជំហរលើអាជីពថ្មីមួយដែលមិនមានការរងសម្ពាធខាងផ្លូវចិត្តនោះ ប៉ុន្មានម៉ោងក្រោយមកទៀត ស្រាប់តែ ឌីជេ ក្ដឹប ជាតារាចម្រៀង និងជាអ្នកនិពន្ធបទភ្លេងថ្មីនៅផលិតកម្មរស្មីហង្សមាស បានចេញឃ្លីបវីដេអូរយៈពេលខ្លីប្រកាសថា ខ្លួននឹងលាឈប់ពីអាជីពនិពន្ធបទចម្រៀងមួយនេះ។
លោក ចាន់ សំណាង ហៅឌីជេ ក្ដឹប បានរៀបរាប់រឿងរ៉ាវជីវិតផ្ទាល់ខ្លួននៅក្នុងឃ្លីបវីដេអូនោះថា លោកបានតស៊ូជាមួយអាជីពសិល្បៈជាអ្នកនិពន្ធបទចម្រៀងនេះអស់រយៈពេលជាង 9ឆ្នាំមកហើយ លោកពិតជានឿយហត់មែនទែន ដែលរូបលោកផ្ទាល់ត្រូវបោះជំហានពុះពារជម្នះគ្រប់ឧបសគ្គនៅលើវិថីមួយនេះតែម្នាក់ឯង។ ពោពេញទៅដោយអារម្មណ៍ក្ដុកក្ដួលអួលដើមក និងទប់ទឹកភ្នែកមិនបាន លោក សំណាង បានប្រាប់មហាជនថា «ខ្ញុំបានតាំងចិត្តបញ្ចប់អាជីពជាអ្នកនិពន្ធនេះ ចាប់តាំងពីប៉ារបស់ខ្ញុំ គាត់លួចទៅដើរលេងមានស្រីក្មេង ខ្ញុំបានតស៊ូម្នាក់ឯងអស់រយៈពេល 9ឆ្នាំហើយ តែវាគ្មានតម្លៃសម្រាប់ខ្ញុំទៀតទេ ខ្ញុំមិនចង់ឃើញគាត់ទៅចោលពួកខ្ញុំបែបនេះឡើយ ខ្ញុំសុខចិត្តទៅធ្វើការលក់ដូរជាមួយម៉ាក់ខ្ញុំធម្មតាវិញ ព្រោះអីខ្ញុំនៅសល់តែគាត់មួយទេ»។
ជាចុងក្រោយ អ្នកនិពន្ធ និងសម្រួលតន្ត្រីក្នុងបទ «រាំអីចេះ» រូបនេះបានបញ្ជាក់ប្រាប់អ្នកគាំទ្រទាំងអស់គ្នាថា «អរគុណបងប្អូនដែលបានស្រឡាញ់ និងគាំទ្រស្នាដៃរបស់ខ្ញុំកន្លងមក ហើយខ្ញុំរំពឹងទុកថា ខ្ញុំនឹងមានឱកាសត្រឡប់មកតែងនិពន្ធឡើងវិញ ប្រសិនបើខ្ញុំចង់.. »៕
April 19, 2018
Walmart ទទួលបានប៉ាតង់ថ្មីសម្រាប់ផលិតសត្វឃ្មុំយន្តដើម្បីជួយវិស័យកសិកម្ម
ក្រុមហ៊ុនដែលពោរពេញដោយភាពច្នៃប្រឌិត និងល្បីល្បាញលើពិភពលោក Walmart ឥឡូវនេះទើបនឹងទទួលបានប្រកាសនីយបត្រតក្កកម្ម (ប៉ាតង់) ដើម្បីផលិតសត្វឃ្មុំអេឡិចត្រូនិកសម្រាប់ជួយដល់វិស័យកសិកម្ម។ គ្រឿងយន្តថ្មីនេះ គឺមានរាង និងទំហំដូចជាសត្វឃ្មុំពិតប្រាកដ ដែលវាមានតួនាទីក្នុងការព្រោះគ្រាប់ស្រូវ និងជួយដល់ការងារថែទាំមួយចំនួន។
សត្វឃ្មុំយន្តនេះ គឺត្រូវបានដំណើរការឡើងដោយប្រើ សិនស័រ (sensors) និងកាមេរ៉ាដើម្បីជួយត្រួតពិនិត្យមើលលើគ្រាប់កសិផល។ គ្រឿងយន្តនេះត្រូវបានផលិតឡើងស្រដៀងនឹងដ្រូន ដែលវាអាចពង្រាយគ្រាប់ធញ្ញជាតិ ដូចជាលម្អងសត្វឃ្មុំពិតប្រាកដដែរ ហើយវាអាចជួយដល់ដំណាំខ្លាំងជាងការធ្វើដោយដៃរបស់មនុស្សទៀតផង។
ការទទួលបានប័ណ្ណប៉ាតង់ចុងក្រោយនេះ ជាប៉ាតង់ទី6 ហើយដែល Walmart ទទួលបានសម្រាប់ការបង្កើតជាប្រភេទនៃដ្រូនសម្រាប់វិស័យកសិកម្ម ដែលអាចធ្វើគ្រប់យ៉ាងពាក់ព័ន្ធនឹងការពិនិត្យមើលចន្លោះប្រហោងនៃគ្រាប់ដំណាំថាវាខូច ឬមានបញ្ហាដែលត្រូវជួសជុល ហើយវាក៏មានមុខងារក្នុងការបាញ់ថ្នាំសម្លាប់សត្វល្អិតផងដែរ។ ការបង្កើតគ្រឿងយន្តអេឡិចត្រូនិកសម្រាប់វិស័យសិកម្មនេះត្រូវបានអ្នកជំនាញបញ្ជាក់ថា វាជាចំណែកមួយក្នុងការកាត់បន្ថយចំណាយលើការធ្វើកសិកម្ម និងបង្កើនប្រសិទ្ធភាពក្នុងការផលិត។
ពាក់ព័ន្ធនឹងការងាកមកផលិតឧបករណ៍របស់ Walmart នេះត្រូវបានគេមើលឃើញថា វាជាវិធីសំខាន់មួយដែរដែល Walmart ខ្លួនឯងត្រូវធ្វើ ដើម្បីកាត់បន្ថយចំណាយក្នុងការទិញយកផលិតផលកសិកម្មពីគ្រប់ទីកន្លែងមកពង្រាយលក់ក្នុងម៉ាតរបស់ខ្លួនដែលមានគ្រប់ទីកន្លែងនៅក្នុងសហរដ្ឋអាមេរិក និងតំបន់ជាច្រើននៅលើពិភពលោក ព្រោះថា នៅពេលដែលគុណភាពនៃផលិតផលកសិកម្មនៅគ្រប់ទីកន្លែងមានលក្ខណៈល្អប្រសើរ ហើយកន្លែងណាក៏អាចផលិតបានល្អដែរនោះ ខ្លួនក៏នឹងអាចទទួលបានផលិតផលល្អសម្រាប់ចែកចាយបានលឿន និងចំណាយតិចផងដែរ៕

April 18, 2018