Category: សង្គម និងសេដ្ឋកិច្ច

តារាសម្ដែង រ៉ូហ្សា ប្ដូរស្តាយល៍មកជាតារាចម្រៀងនិពន្ធថ្មី មានសម្ទុះនឹកស្មានមិនដល់
ទើបតែចូលប្រឡូកសិល្បៈបានជិតមួយឆ្នាំប៉ុណ្ណោះកញ្ញា រ៉ូហ្សា ដែលជាកូនអ្នកជនបទហាក់មានយីអ៊ុនលោតឡើងខ្ពស់តែម្ដង ដោយនាងទទួលបានការសម្ដែងសុទ្ធតែបទមេៗរបស់តារាចម្រៀងល្បីៗនៅក្នុងផលិតកម្មសាន់ដេ ដូចជាលោកឆាយ វីរៈយុទ្ធ និងកញ្ញាសុខ ពិសី ជាដើម។ លើសពីនេះនាងក៏បានប្រឹងប្រែងវិវឌ្ឍខ្លួនទៅជាតារាចម្រៀងក្នុងផលិតកម្មថ្មីមួយឈ្មោះថា One Entertainment Production ផងដែរ។
ប្រិយមិត្ដរបស់លោក ឆាយ វីរៈយុទ្ធ និងកញ្ញា សុខ ពិសី ប្រាកដជាធ្លាប់បានឃើញការសម្ដែងរបស់កញ្ញា រ៉ូហ្សា នៅក្នុងបទ«ដឹកឆ្កែទៅលេងស្រុក» និង«បំភ្លេចពាក្យបែកបានទេ»ជាក់ជាមិនខាន។ ទោះបីជានាងជាតារាសម្ដែងថោ្មងថ្មីមែន ប៉ុន្ដែទេពកោសល្យសម្ដែងរបស់នាងមិនជាចាញ់តារារៀមច្បងប៉ុន្មានឡើយ។ ពិសេសភាពក្លាហានក្នុងការសម្ដែងជាមួយតារាចម្រៀងជើងចាស់តែម្ដង។ ជួបជាមួយកញ្ញា អែម ស្រីអូន ហៅកញ្ញា រ៉ូហ្សា នាងបានប្រាប់ថា ទោះបីនាងជាកូនអ្នកជនបទរស់នៅខេត្ដព្រៃវែងក៏ពិតមែន តែនាងមានចិត្ដស្រឡាញ់សិល្បៈតាំងពីក្មេងមកម្ល៉េះ។ នាងបន្ដថា ទើបតែចូលមកឆ្នាំ2018 នេះទេដែលនាងមានឱកាសបានចូលប្រឡូកសិល្បៈ។
ដោយមើលឃើញពីទេពកោសល្យថានាងអាចទៅរួច អ្នកដឹកនាំក៏តម្រូវឱ្យនាងសម្ដែងសុទ្ធតែជាបទកំពូលៗរបស់តារាចម្រៀងល្បីនៅក្នុងផលិតកម្ម សាន់ដេ។ កញ្ញា រ៉ូហ្សា បន្ថែមអាជីពថ្មីមួយពីការសម្ដែង ដោយមានការលើកទឹកចិត្ដពីមិត្ដភ័ក្ដិក្នុងសិល្បៈផងនោះ នាងក៏បានសម្រេចចិត្ដបោះជំហានមួយទៀត ដើម្បីក្លាយជាតារាចម្រៀង Original Song បទដែលទើបតែចេញចំណងជើងថា «រង់ចាំមនុស្សម្នាក់»។ តារាសម្ដែង និងចម្រៀងថ្មោងថ្មីរូបនេះបានប្រាប់អ្នកសារព័ត៌មាន ឡារ៉ែន ថា «ខ្ញុំដឹងថា ការចេញបទចម្រៀងជាលើកដំបូងនេះ នៅមានចំណុចខ្វះខាត ប៉ុន្ដែចាត់ទុកថា ជាការបង្ហាញសមត្ថភាពទៅកាន់មហាជនដើម្បីឱ្យពួកគាត់ស្ថាបនាមកវិញ ដើម្បីងាយស្រួលខ្ញុំដុសខាត់សមត្ថភាពខ្លួនបន្ថែមទៀត។ ខ្ញុំគិតថា មនុស្សយើងគ្មាននរណាម្នាក់ធ្វើបានល្អទាំងស្រុងទេ ពិសេសនៅពេលចេញដំណើរតែម្ដង ដូច្នេះខ្ញុំសុខចិត្ដទទួលយករាល់ការរិះគន់ទាំងអស់របស់បងប្អូនដើម្បីអភិវឌ្ឍខ្លួនឱ្យបានល្អទៅអនាគត»។
គួរបញ្ជាក់ផងដែរថា ទោះជាបទថ្មីនេះ នាងមិនទាន់បានបង្ហាញពីសមត្ថភាពគ្រប់ជ្រុងជ្រោយក្នុងសិល្បៈក៏ពិតមែន ប៉ុន្ដែមានមិត្ដភ័ក្ដិជាច្រើន ដែលបានស្គាល់នាងបានលើកសរសើរពីទេពកោសល្យ និងទឹកចិត្ដក្លាហានរបស់នាងដែលហ៊ានប្រឈមការពិត មិនបោះបង់ចោលនូវទេពកោសល្យពីកំណើត។ គ្រាដែលមានតារាសិល្បៈជាច្រើនបានចូលប្រឡូកក្នុងវិស័យសិល្បៈយូរឆ្នាំហើយនៅតែពុំមានការអភិវឌ្ឍ។ យ៉ាងណាក្ដី កញ្ញា រ៉ូហ្សា បានអះអាងថា នាងនឹងក្រាលននាលជាមួយសិល្បៈមិនរាថយឡើយ ខណៈនាងមានហាងសាឡនមួយឈ្មោះថា រ៉ូហ្សា សាឡន ដើម្បីបង្កើតប្រាក់ចំណូលទប់ទល់ក្នុងជីវភាពសិល្បៈបន្ថែមផងដែរ៕
https://www.youtube.com/watch?v=f-6kS5_9WQ0&feature=youtu.be
April 27, 2018
ប៊ុត សីហា គ្រោងចេញបទចម្រៀងនិពន្ធថ្មី ដែលនិយាយរៀបរាប់សុំទោសអ្នកមានគុណ
ក្រោយពីស្ងប់ស្ងាត់រឿងអាស្រូវពាក់ព័ន្ធជាមួយគ្រឿងញៀនមួយរយៈពេលមក តារាចម្រៀងប្រុសលោក ប៊ុត សីហា បានរៀបចំបង្កើតបទចម្រៀងនិពន្ធថ្មី ដែលជាស្នាដៃរបស់លោកផ្ទាល់ ជូនប្រិយមិត្តអ្នកគាំទ្រលោកបានស្ដាប់ និងយល់ពីអារម្មណ៍របស់លោក បន្ទាប់ពីកើតមានរឿងមិនល្អកន្លងមក។
ម្ចាស់កម្មវិធីប្រលងចម្រៀង The Voice Cambodia រដូវកាលទី 1 រូបនេះ មិនបានបញ្ជាក់ប្រាប់ពីចំណងជើងនៃបទចម្រៀងនៅឡើយ តែបើតាមការស្ដាប់ពីអត្ថន័យចម្រៀងខ្លីៗនៅក្នុងវីដេអូដែលលោកបានបង្ហោះនោះ បានសឱ្យដឹងថា ជីវិតរបស់លោកមានវិប្បដិសារីយ៉ាងខ្លាំង ដែលបានប្រព្រឹត្តចំពោះអ្នកមានគុណ ហើយលោកបានពោលសុំទោសចំពោះអ្នកម្ដាយ និងវិញ្ញាណក្ខន្ធរបស់លោកឪពុកដែលបានចែកឋានទៅហើយ។ លោក សីហា បានសរសេរខ្លីៗមួយ ប្រាប់ទៅអ្នកគាំទ្រលោកថា « នេះជាបទរបស់ខ្ញុំបាទទំនុកថ្មីតែ….អីចឹងពេលហើយអស់ខ្ញុំនិងផុសឲ្យពេញ ហើយនិងថត MV ពីបទនេះ។ ៥ថ្ងៃទៀតទើបខ្ញុំអាចចេញបទថ្មីភ្លេងស្នាដៃថ្មី អីចឹងជួយគ្រាំទ្រផងពុកម៉ែបងប្អូន។ ខ្ញុំចេញកំដរបងប្អូនស្តាប់កម្សន្តគ្រាន់និងនឹកខ្ញុំ »។
គួរកត់សម្គាល់ផងដែរថា វីដេអូចម្រៀងខ្លីនេះ បង្ហោះមិនទាន់បានប៉ុន្មានផង ក៏មានសន្ទុះអ្នកទស្សនាដល់ទៅ 18 ពាន់នាក់ទៅហើយ នេះក៏ជាទឹកចិត្តមួយធ្វើឲ្យតារាចម្រៀងប្រុសរូបនេះមានកម្លាំងចិត្តនិងតស៊ូឡើងវិញមិនអស់សង្ឃឹមដូចមុន។ អ្នកគាំទ្រជាច្រើននាក់ ភាគច្រើនសុទ្ធតែពោលពាក្យលើកទឹកចិត្ត សីហា ថា « មិនអីទេ idol ត្រូវតស៊ូបន្តទៀតណា កុំចុះចាញ់និងបញ្ហា ព្រោះបញ្ហាជាឱកាសមួយ ដែលអាចធ្វើឲ្យយើងឈ្ពោះទៅរកភាពជោគជ័យបាន ស៊ូៗ..»។
គួររំឭកផងដែរថា នៅគ្រាកើតរឿងពាក់ព័ន្ធជាមួយករណីគ្រឿងញៀន រឿងអាស្រូវនេះបានធ្វើឱ្យប្រជាប្រិយភាពរបស់លោកធ្លាក់ចុះជាខ្លាំង ហើយបាត់បង់ឱកាសទៅសម្ដែងនៅឯសហរដ្ឋអាមេរិក ដោយស្ថានទូតអាមេរិកប្រចាំប្រទេសកម្ពុជាដើម្បីស្នើសុំទិដ្ឋាការ (Visa) ទៅសម្ដែងនៅនោះតែម្ដង។ រីឯខាងផលិតកម្មហង្សមាសវិញ ក៏បានប្រកាសនិងអះអាងដែលថា ខាងផលិតកម្មមិនអាចទទួលយករូបលោកឱ្យច្រៀងក្នុងផលិតកម្មបន្ដទៀតបានទេ៕
April 27, 2018
ទស្សនារូបភាព ពិធីភ្ជាប់ពាក្យរបស់លោក នី រតនា និងគូដណឹ្ដង
ថ្ងៃជាពេលាល្អបានមកដល់ហើយ គឺនៅថ្ងៃសុក្រ ទី27 ខែមេសា ឆ្នាំ2018 នេះឯង…តារាចម្រៀង និងជាម្ចាស់ពានរង្វាន់ Cambodian Idol រដូវកាលទី1 គឹលោកនី រតនា បានចូលរោងជ័យកាន់ដៃកូនស្រីអ្នកជំនួញខាងផលិតផលគ្រឿងសម្អាងម្នាក់ក្នុងទីក្រុងភ្នំពេញ ដើម្បីភ្ជាប់ពាក្យនឹងគ្នាជាគូដណ្ដឹង ដែលមានការផ្សំផ្គុំពីសំណាក់មាតាបិតាទាំងសងខាង ឱ្យចៅមហា និងមហាជនបានដឹង និងទទួលស្គាល់ថា អ្នកទាំងពីរជាគូគាប់នឹងគ្នាពិតមែនហោង…។
បើរូបភាពដែលអណ្ដែតនៅលើបណ្ដាញទំនាក់ទំនងសង្គមហ្វេសប៊ុក បានមើលឃើញថា មានតារាប្រុសស្រីនៅក្នុងទ្រនំរស្មីហង្សមាសជាច្រើននាក់ដូចជា កញ្ញា សួស វីសា កញ្ញា ឈីន តរនៈ កញ្ញា វី ឌីណែត កញ្ញា ប៉ាច គីមមួយ លោក សយ រតៈ លោក ឃុន វុត្ថា លោក នួន សុធារ័ក្ស ជាដើម បានចូលរួមអបអរនៅក្នុងកម្មពិធីពរជ័យមង្គលរបស់លោក នី រតនា និងកញ្ញា លាង សុវណ្ណភក្ដិណា ។ ចង់ដឹងសម្រស់ នី រតនា និងគូដណ្ដឹងមានសម្រស់ស្រស់ស្អាតបែបណានោះ សូមទស្សនារូបភាពខាងក្រោមនេះ៖
April 27, 2018
វិស័យសំណង់បន្តរួមចំណែកដល់សេដ្ឋកិច្ច ប៉ុន្តែថយចុះក្នុងឆ្នាំបោះឆ្នោតនេះ
ក្រសួងសេដ្ឋកិច្ច និងហិរញ្ញវត្ថុបានដាក់ការព្យាករថា វិស័យឧស្សាហកម្មដែលគ្របដណ្តប់លើវិស័យវាយនភណ្ឌ និងវិស័យសំណង់នឹងបន្តរួមចំណែកធំក្នុងការជំរុញសេដ្ឋកិច្ចកម្ពុជាឱ្យសម្រេចបានក្នុងរង្វង់7% សម្រាប់ឆ្នាំ2018នេះ ខណៈដែលក្រសួងដែនដីនគរូបនីយកម្ម និង សំណង់ពង្រឹងបែបបទក្នុងការសាងសង់។
ឯកសារគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ការៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2019 បានបង្ហាញថា វិស័យសំណង់នឹងមានការរីកចម្រើនក្នុងអត្រាប្រមាណ16.7% ក្នុងឆ្នាំ2018 និងក្នុងអត្រា16.9% ក្នុងឆ្នាំ2019។
ការរីកចម្រើនក្នុងវិស័យសំណង់នេះត្រូវបានមន្ត្រីក្រសួងសេដ្ឋកិច្ច និងហិរញ្ញវត្ថុព្យាករថា វានឹងផ្តោតលើប្រភេទគម្រោងសំណង់តម្លៃទាប និងមធ្យមដែលជួយប៉ះប៉ូវដល់កំណើនយឺតនៃប្រភេទសំណង់តម្លៃខ្ពស់។
យោងតាមឯកសារដដែលបានឱ្យដឹងថា វិស័យសំណង់មានភាពរឹងមាំដោយសារការអនុវត្តគម្រោងអភិវឌ្ឍន៍លំនៅឋានតម្លៃសមរម្យ ការប្តេជ្ញាចិត្តរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធជារូបវន្ត និងភាពជឿជាក់ចំពោះការវិនិយោគ និងដោយសារភាពរឹងមាំនៃកំណើនសេដ្ឋកិច្ចកម្ពុជា ទោះជាមានឥរិយាបថប្រុងប្រយ័ត្នពីសំណាក់វិនិយោគិនមួយចំនួនក្នុងឆ្នាំ2018 ដែលជាឆ្នាំបោះឆ្នោតក្ដី។
អ្នកសេដ្ឋកិច្ចវ័យក្មេងនៃក្រសួងសេដ្ឋកិច្ច និងហិរញ្ញវត្ថុ អ្នកស្រី តាន់ ឡានីន បានកត់សម្គាល់ថា វិស័យឧស្សាហកម្មដែលគ្របដណ្តប់លើអនុវិស័យពីរ គឺវិស័យកាត់ដេរ និងសំណង់បានទ្រទ្រង់ដល់កំណើនសេដ្ឋកិច្ចអស់រយៈពេលជាច្រើនឆ្នាំកន្លងមកហើយ វិស័យទាំងពីរនេះក៏បានរួមចំណែកធំក្នុងកំណើនសេដ្ឋកិច្ចនាពេលកន្លងមកក៏ដូចជាទៅអនាគតដែរ។
អ្នកស្រី តាន់ ឡានីន និយាយថា៖ “កម្ពុជាកំពុងស្ថិតក្នុងនិន្នាការនៃការផ្លាស់ប្តូររចនាសម្ព័ន្ធសេដ្ឋកិច្ចរបស់ខ្លួន ជាប្រទេសដែលពឹងផ្អែកលើវិស័យកសិកម្មទៅជាប្រទេសដែលពឹងផ្អែកលើវិស័យឧស្សាហកម្ម។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ឆ្នាំ2018 ក្រសួងរៀបចំដែនដីបានចេញលិខិតអនុញ្ញាតសាងសង់ចំនួន 3,418គម្រោង ស្មើនឹងជាង 11លាន 3សែន 8ម៉ឺនម៉ែត្រការ៉េ និងមានទុនវិនិយោគ 6,799លានដុល្លារអាមេរិក។
កាលពីពេលថ្មីៗនេះ ក្រសួងរៀបចំដែនដី នគរូបនីយកម្ម និងសំណង់បានផ្សព្វផ្សាយសៀវភៅណែនាំអំពីសុវត្តិភាពនៅក្នុងការដ្ឋានសំណង់ទៅដល់អ្នកម៉ៅការសំណង់ ម្ចាស់ការដ្ឋាន និងក្រមហ៊ុនផ្សេងៗទៀតដែលពាក់ព័ន្ធនឹងការងារសំណង់ដើម្បីបង្ការគ្រោះថ្នាក់ផ្សេងៗ និងធានាសុវត្ថិភាពជូនទាំងកម្មករសំណង់ អ្នកដែលរស់នៅក្បែរ និងអ្នកដែលធ្វើដំណើរជុំវិញការដ្ឋានដែលកំពុងធ្វើការសាងសង់៕
April 26, 2018
កសិករខ្មែរដំបូងនាំពូជផ្លែ Strawberry ពីបរទេសមកដាំដើម្បីលើកកម្ពស់វិស័យកសិកម្ម
កសិករខ្មែរមួយរូបបានចំណាយប្រាក់ជាង 1សែនដុល្លារនាំយកពូជផ្លែស្ត្របឺរី (Strawberry) ពីប្រទេសអេស្ប៉ាញមកដាំសាកល្បងនៅក្នុងប្រទេសកម្ពុជាជាលើកទី3 ដែលការដាក់ដាំកាលពីលើកទី1 និងទី2 កំពុងទទួលបានជោគជ័យជាបណ្តើរៗហើយ។
កសិករវ័យក្មេងលោក អ៊ូច សំបូរ ម្ចាស់ចម្ការ Strawberry ក្នុងខេត្តពោធិ៍សាត់បានផ្តល់បទសម្ភាសជាមួយនឹងអ្នកយកព័ត៌មាននៃកាសែតឡារ៉ែនពាណិជ្ជថា លោកបាននាំពូជស្ត្របឺរី (Strawberry)មកពីប្រទេសអេស្ប៉ាញតាមជើងយន្តហោះមកដាំសាកល្បងនៅក្នុងស្រុកខ្មែរអស់រយៈពេលជាង 2ឆ្នាំមកហើយ ដោយមានទីតាំងស្ថិតនៅភូមិកៀន ជង្រុក ឃុំអូរសោម ស្រុកវាលវែង ដែលកាលពីការដាំលើកដំបូងបានទទួលផលតិចតួចប៉ុណ្ណោះដោយសារតែអាកាសធាតុមិនសូវអំណោយផល ពិសេសមានភ្លៀងធ្លាក់ច្រើន ប៉ុន្តែការដាំលើកទី2 ទទួលបានផលច្រើនគួរសម ហើយលោកសង្ឃឹមថា ការដាក់ដាំលើកទី3នេះនឹងទទួលបានផលច្រើនជាងពេលមុនៗ ព្រោះធ្លាប់បានធ្វើពិសោធទៅលើអាកាសធាតុចំនួនពីរលើករួចមកហើយ។
ម្ចាស់ចម្ការវ័យក្មេងខាងលើបន្តថា ការដាំលើកទី3 នេះគឺដាំផ្ទាល់ដីចំនួនតែ 5,000កូនប៉ុណ្ណោះ និងកំពុងរៀបចំដាំលើទុយោទឹកចំនួន10,000កូនផ្សេងទៀតដែលសរុបទាំងអស់មានចំនួន 15,000កូន ដោយបានប្រក់ដំបូលពីលើដើម្បីការពាររដូវភ្លៀងធ្លាក់ច្រើន និងការពារសត្វល្អិតបំផ្លាញ។ ប្អូនប្រុសបន្តថា ការធ្វើពិសោធដាំផ្ទាល់ដីកន្លងមក គឺមិនសូវទទួលបានផលច្រើននោះទេ ដោយសារភ្លៀងធ្លាក់ច្រើនធ្វើឱ្យងាប់ដើម នៅសល់តែមួយចំនួនតូចប៉ុណ្ណោះដែលនៅមានសុខភាពរឹងមាំល្អ និងហុចផលឱ្យក្នុងមួយសប្តាហ៍ម្តង ដោយបេះផ្លែបានចន្លោះពី20 ទៅ30គីឡូក្រាម តែបើដើមធំពេញវ័យវិញអាចប្រមូលផលបានចន្លោះពី100 ទៅ200គីឡូក្រាមក្នុងមួយសប្តាហ៍លើចំនួនស្ត្របឺរី 15,000ដើមនេះ និងមានម៉ូយទៅទិញដល់កន្លែង បានតម្លៃក្នុងមួយគីឡូក្រាមចន្លោះពី10 ទៅ11ដុល្លារ ដែលម៉ូយអាចយកទៅលើលក់បន្តបានថ្លៃពី13 ទៅ15ដុល្លារក្នុងមួយគីឡូក្រាម។ ស្ត្របឺរីខ្មែរនេះមានផ្លែតូចជាងរបស់បរទេស តែមានរសជាតិផ្អែមជាង។
លោកថា ដើមស្ត្របឺរីអាចដាំនៅលើដី ឬរៀបចំដាំនៅលើប្រព័ន្ធទុយោទឹកក៏បាន ប៉ុន្តែត្រូវរកដីដែលមានជីជាតិល្អ មានអាកាសធាតុត្រជាក់ខ្លាំងគួរសម ប៉ុន្តែត្រូវចេះការពារទឹកភ្លៀងដែលបណ្ដាលឱ្យងាប់ដើមស្ត្របឺរី។
សម្រាប់ការដាំនៅលើដី មុនដំបូងគេត្រូវរកទីតាំងក្នុងតំបន់ណាដែលដីមានជីជាតិល្អ ហើយត្រូវរៀបចំដីឱ្យបានស្អាតជាមុន ដោយត្រូវភ្ជួរឱ្យបានពីរទៅបីលើក រួចហើយសឹមលើកជារង រួចរៀបចំប្រព័ន្ធទឹក និងក្រាលផ្ទាំងកៅស៊ូពីលើដី។ ក្រោយពីរៀបចំដីរួច គេត្រូវដឹកកូនយកមកដាំឱ្យបានលឿន ចៀសវាងទុកចោលយូរដែលនាំឱ្យកូនដើមស្ត្របឺរីខ្សោយកម្លាំង និងលូតលាស់មិនបានល្អ។
ក្រោយពីដាំរួច គេត្រូវស្រោចទឹក2 ឬ3ថ្ងៃម្តងហើយត្រូវដើរមើលកូនណាដែលលូតលាស់មិនសូវល្អត្រូវយកជីលាមកគោ ឬជីកំប៉ុស្តទៅដាក់បំប៉នដើមឱ្យលូតលាស់បានល្អឡើង និងត្រូវចេះពីបច្ចេកទេសការពារដំណាំពីសត្វល្អិតចង្រៃ ដូចជាដង្កូវ ស្រមោច ឬសត្វខ្ញុងមកស៊ីស្លឹក និងលំអងផ្កាជាដើម។ រហូតដល់2 ទៅ3ខែ ដើមស្ត្របឺរីនឹងចាប់ផ្តើមចេញផ្កា និងឱ្យផ្លែជាបណ្តើរៗ ដោយអាចបេះក្នុងមួយសប្តាហ៍បានម្តង រហូតដល់ 18ខែទើបដើមវាងាប់ទៅវិញ ទើបរង់ចាំការដាំសាជាថ្មីទៀត។
កសិករវ័យក្មេងរូបនេះបានបញ្ជាក់ថា អ្វីដែលធ្វើឱ្យលោកសុខចិត្តចំណាយប្រាក់ច្រើនដើម្បីនាំយកពូជស្ត្របឺរីមកដាំជាលើកដំបូងនេះគឺ៖ ទី1.ដោយសារចង់លើកកម្ពស់មុខមាត់វិស័យកសិកម្មនៅកម្ពុជាយើង។ ទី2.ផ្លែឈើមួយនេះនៅកម្ពុជាយើងមានតម្រូវការទីផ្សារខ្ពស់ និងអាចលក់បានថ្លៃជាងនៅក្រៅប្រទេស។ ទី3.មានដៃគូជាអ្នកបច្ចេកទេសមកពីក្រៅប្រទេសស្រាប់។ និងទី4.អាកាសធាតុកម្ពុជាអាចដាំដុះបានល្អដូចនៅប្រទេសគេដែរ។ ហើយបើសិនជាបងប្អូនប្រជាកសិករខ្មែរយើងមានបំណងចង់ដាំពូជស្ត្របឺរីនេះ អាចទំនាក់ទំនងរកទិញពូជយកទៅដាំបានព្រោះលោកបាននាំចូលមកផ្ទាល់ពីប្រទេសអេស្ប៉ាញដោយក្នុងមួយដើមតម្លៃតែ5 ទៅ6ពាន់រៀលប៉ុណ្ណោះអាស្រ័យទៅលើការកុម្ម៉ង់ទិញតិច ឬច្រើន ហើយលោកនឹងបង្រៀនពីបច្ចេកទេសដាំដុះ និងថែទាំទៀតផង៕

April 26, 2018
3ចំណុច ដែលធ្វើឱ្យកម្ពុជានឹងក្លាយជាប្រទេសមានចំណូលមធ្យមកម្រិតខ្ពស់
បន្ទាប់ពីបានឆ្លងកាត់ពីប្រទេសមានចំណូលទាប មកជាប្រទេសមានចំណូលមធ្យមកម្រិតទាបនាពេលបច្ចុប្បន្ននេះ កម្ពុជាត្រូវបានគេរំពឹងថានឹងប្រែក្លាយខ្លួនជាប្រទេសដែលមានចំណូលមធ្យមកម្រិតខ្ពស់នៅត្រឹមឆ្នាំ2030ខាងមុខ។ តើមានកត្តាសំខាន់ៗជាអាទិភាពអ្វីខ្លះដែលនឹងរុញច្រានឱ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់នេះ?
នៅក្នុងកិច្ចប្រជុំកំពូលធុរកិច្ចមហាអនុតំបន់មេគង្គនៅសាលសន្និសីទជាតិ (NCC) ប្រទេសវៀតណាមដែលរៀបចំឡើងដោយធនាគារអភិវឌ្ឍន៍អាស៊ី ធនាគារពិភពលោក និងសភាពាណិជ្ជកម្មនៃប្រទេសមហាអនុតំបន់មេគង្គកាលពីពេលកន្លងទៅនេះ ប្រមុខរដ្ឋាភិបាលកម្ពុជា សម្ដេចនាយករដ្ឋមន្ដ្រីហ៊ុន សែន បានលើកឡើងពីការងារអាទិភាពចំនួន3 ដែលរាជរដ្ឋាភិបាលកម្ពុជាបាន និងកំពុងយកចិត្តទុកដាក់សំដៅប្រែក្លាយកម្ពុជាឱ្យទៅជាប្រទេសដែលមានចំណូលមធ្យមកម្រិតខ្ពស់ នៅឆ្នាំ2030 ដែលការងារអាទិភាពទាំង3 នោះរួមមាន៖ ទី1. កសាងហេដ្ឋារចនាសម្ព័ន្ធរូបវន្ដ ជាពិសេសផ្ដោតលើការអភិវឌ្ឍរបៀងសេដ្ឋកិច្ច សំដៅតភ្ជាប់ប៉ូលសេដ្ឋកិច្ចក្នុងស្រុក និងតំបន់ ដោយប្រកាន់យកនូវអភិក្រមនៃអភិវឌ្ឍន៍ប្រព័ន្ធដឹកជញ្ជូនពហុមុខ។
ទី2. អភិវឌ្ឍហេដ្ឋារចនាសម្ព័ន្ធផ្នែកទន់ តាមរយៈធ្វើឱ្យប្រសើរនូវប្រព័ន្ធឡូជីស្ទិក និងសេវាកម្ម ដើម្បីប្រែក្លាយកម្ពុជាទៅជាមជ្ឈមណ្ឌលឡូជីស្ទិកនៃមហាអនុតំបន់មេគង្គ ដោយបន្ដជំរុញកិច្ចខិតខំប្រឹងប្រែង ក្នុងការអនុវត្ដកិច្ចព្រមព្រៀងដឹកជញ្ជូនឆ្លងកាត់ព្រំដែន។ ទី3. ការអភិវឌ្ឍធនធានមនុស្សតាមរយៈការលើកកម្ពស់កិច្ចសហប្រតិបត្តិការជាមួយវិស័យឯកជន ជាពិសេសផ្ដោតលើកម្មវិធីសិក្សាអប់រំ ផ្នែកវិទ្យាសាស្ដ្រ បច្ចេកវិទ្យា វិស្វកម្ម និងគណិតវិទ្យា និងកម្មវិធីបណ្ដុះបណ្ដាលបច្ចេកទេស និងវិជ្ជាជីវៈ។
ជាមួយគ្នានេះកំណើនសេដ្ឋកិច្ចពិភពលោកកំពុងមានលក្ខណៈល្អប្រសើរ ដែលបានងើបឡើងនៅឆ្នាំ2017 និងបន្ដកើនឡើងថែមទៀតនៅឆ្នាំ2018 និងឆ្នាំ2019។ ស្របគ្នានេះ សេដ្ឋកិច្ចប្រទេសមហាតំបន់មេគង្គក៏មានសម្ទុះគួរជាទីមោទនៈ ក៏ប៉ុន្ដែលទ្ធភាពកំណើននៃអតិផរណា និងអត្រាការប្រាក់ដែលបណ្ដាលមកពីកំណើនតម្រូវការ និងទំនោរគាំពារសេដ្ឋកិច្ចក្នុងស្រុករបស់ប្រទេសមួយចំនួនកំពុងបង្កផលប៉ះពាល់ដល់ពាណិជ្ជកម្ម និងការវិនិយោគផ្ទាល់ពីបរទេសផងដែរ។
បញ្ហានេះប្រទេសមហាអនុតំបន់មេគង្គចាំបាច់ត្រូវបង្កើនល្បឿននៃសមាហរណកម្ម និងការតភ្ជាប់តំបន់ដោយផ្ដោតលើវិស័យអាទិភាពមួយចំនួនបន្ថែមទៀត ដូចជាវិស័យហរិញ្ញវត្ថុ ពាណិជ្ជកម្មតាមប្រព័ន្ធអេឡិចត្រូនិក និងការអភិវឌ្ឍទីក្រុងនៅតាមតំបន់ជាប់ព្រំដែន។ ការពង្រឹងវិសាលភាពនៃកិច្ចសហប្រតិបត្តិការ កិច្ចការរបស់យើងនឹងផ្ដល់នូវលំហូរសម្រាប់កំណើនសេដ្ឋកិច្ចតំបន់ក្នុងពេលអនាគតតាមរយៈការតភ្ជាប់ក្របខ័ណ្ឌមហាអនុតំបន់មេគង្គ និងតាមរយៈកាលានុវត្ដភាពពីគំនិតផ្ដួចផ្ដើមតំបន់ផ្សេងទៀត។
ជាមួយគ្នានេះដែរ សម្ដេចតេជោនាយករដ្ឋមន្ត្រីបានទាញនូវចំណាប់អារម្មណ៍លើបញ្ហាប្រឈមមុខមួយចំនួនដែលទាមទារឱ្យមានការគិតគូរ និងដោះស្រាយរួមមាន៖
1.ការមិនទាន់ទាញយកប្រយោជន៍អស់ពីសក្ដានុពលដែលមាននៅតាមរបៀងសេដ្ឋកិច្ចដ៏រស់រវើករបស់មហាអនុតំបន់មេគង្គ។
2.បញ្ហាប្រឈមនៃកំណើននគរូបនីយកម្ម ដោយសារការអភិវឌ្ឍដ៏ឆាប់រហ័សនៅក្នុងតំបន់។
3.ការកកស្ទះនៅតាមច្រកព្រំដែន ដែលបណ្ដាលមកពីសកម្មភាពពាណិជ្ជកម្ម និងធុរកិច្ច។
4.ប្រព័ន្ធហេដ្ឋារចនាសម្ព័ន្ធ និងកិច្ចសម្រួលពាណិជ្ជកម្មបច្ចុប្បន្ននៅមិនទាន់ឆ្លើយតបបានទៅនឹងកំណើននៃតម្រូវការ។
5.ការបន្ដពឹងផ្អែកទៅលើធនធានធម្មជាតិ និងកម្លាំងពលកម្មមានតម្លៃទាបក្នុងការទាក់ទាញការវិនិយោគ និងធុរកិច្ច និងមិនអាចរក្សាបានឡើយនូវកំណើនប្រកបដោយចីរភាព និងបរិយាប័ន្ន។
គួរបញ្ជាក់ថា កម្ពុជាបានឆ្លងផុតពីប្រទេសមានចំណូលទាបទៅជាប្រទេសមានចំណូលមធ្យមកម្រិតទាបជាផ្លូវការក្នុងឆ្នាំ2015 ព្រមទាំងត្រូវបានចាត់ទុកថាជា “ខ្លាសេដ្ឋកិច្ចអាស៊ី” នៅឆ្នាំ2016។ កំណើនសេដ្ឋកិច្ចនេះបានបង្កើតការងារជាច្រើនដល់ប្រជាពលរដ្ឋដែលឆ្លុះបញ្ចាំងដោយធនាគារពិភពលោកដែលបង្ហាញថា ភាពគ្មានការងារធ្វើនៅប្រទេសកម្ពុជាស្ថិតក្នុងអត្រា 0.3% និងភាពក្រីក្រតោកយ៉ាកត្រូវបានលុបចោលទាំងស្រុងកាលពីឆ្នាំ2017។
ទន្ទឹមនឹងនេះ ប្រាក់ចំណូលរបស់ប្រជាពលរដ្ឋខ្មែរក៏មានការកើនឡើងផងដែរ ដោយផលិតផលក្នុងស្រុកសរុប(GDP) ក្នុងមនុស្សម្នាក់កើនពី 1,042ដុល្លារអាមេរិកក្នុងឆ្នាំ2013 ដល់ប្រមាណ 1,427ដុល្លារអាមេរិកក្នុងឆ្នាំ2017 និង1,563 ដុល្លារអាមេរិកនៅឆ្នាំ2018នេះ៕
April 26, 2018
ស្អែកនេះ! … នី រតនា ដល់ថ្ងៃភ្ជាប់ពាក្យជាមួយស្រីស្អាតហើយ
តារាចម្រៀង និងជាម្ចាស់ពានរង្វាន់ Cambodian Idol រដូវកាលទី1 គឹលោកនី រតនាបានរកឃើញនារីនៅក្នុងសុបិនពិតប្រាកដហើយ នាងជាកូនស្រីអ្នកជំនួញខាងផលិតផលគ្រឿងសម្អាងម្នាក់ក្នុងទីក្រុងភ្នំពេញ ជាអនាគតគូដណ្ដឹងរបស់តារាចម្រៀងប្រុសរូបនេះផងដែរ។ ថ្ងៃជាពេលាល្អបានរកឃើញហើយ នៅសល់តែមួយថ្ងៃទៀតទេ តារាប្រុសរូបនេះនឹងដល់ថ្ងៃដែលត្រូវភ្ជាប់ពាក្យហើយ គឺនៅថ្ងៃសុក្រ ទី27 ខែមេសា ឆ្នាំ2018 ស្អែកនេះឯង។
តារាចម្រៀងសំឡេងផ្អែមរូបនេះ ស្ម័គ្រចិត្តសាងអនាគតរួមគ្នាជាមួយនារីរូបស្រស់សោភាជាកូនស្រីរបស់អ្នកជំនួញនាំចូលផលិតផលគ្រឿងសម្អាង ម៉ាក WOMEA ដែល នី រតនាធ្វើជាអ្នកតំណាងឱ្យនោះ។ អ្នកទាំងពីរមានវ័យស្រករៗគ្នា ហើយចាស់ទុំដែលបានដឹងឮទាំងសងខាង បានរកថ្ងៃជាពេលាល្អដើម្បីភ្ជាប់ពាក្យរួចហើយ តែគេនៅមិនទាន់ដឹងថា លោកនី រតនានឹងមានគម្រោងរៀបការនៅពេលណាឱ្យច្បាស់លាស់នៅឡើយទេ តែទោះជាយ៉ាងណាក្តី បន្ទាប់ពីបានឃើញបែបនេះហើយ អ្នកគាំទ្រជាច្រើនបានសម្តែងក្តីរំភើបរីករាយ ហើយថែមទាំងជូនពរលោក និងអនាគតគូដណ្តឹងទៀតផង៕
April 26, 2018
អាមេរិក និងចិនត្រៀមផលិតកង់នៅកម្ពុជាដើម្បីនាំចេញទៅទីផ្សារក្រៅប្រទេស
ដោយមើលឃើញពីសក្តានុពលសេដ្ឋកិច្ចកម្ពុជា ក្រុមអ្នកវិនិយោគរបស់អាមេរិក និងចិនតៃវ៉ាន់ គ្រោងបណ្តាក់ទុនរួមគ្នាបង្កើតរោងចក្រផលិតកង់នៅក្នុងប្រទេសកម្ពុជា ដោយដាក់ម៉ាកសញ្ញាផលិតនៅកម្ពុជា (Made in Cambodia) ដើម្បីនាំចេញទៅលក់នៅលើទីផ្សារក្រៅប្រទេស។
ក្នុងជំនួបពិភាក្សាការងារជាមួយឯកឧត្តមរដ្ឋមន្ត្រីក្រសួងពាណិជ្ជកម្ម លោក Robert Margevicius បានមានប្រសាសន៍ថា កម្ពុជាបានក្លាយជាប្រទេសដំឡើង និងផលិតកង់សម្រាប់នាំចេញធំបំផុតលំដាប់ទី2 នៅលើពិភពលោក ដែលមានចំណែកទីផ្សារនៅសហគមន៍អឺរ៉ុប សហរដ្ឋអាមេរិក កាណាដា អាស៊ាន និងប្រទេសអាស៊ីផ្សេងទៀត ក៏ប៉ុន្តែកម្ពុជាពុំមានរោងចក្រផលិតគ្រឿងផ្គុំកង់នៅឡើយទេ គឺត្រូវនាំចូលពីប្រទេសផ្សេង។ លោក Robert Margevicius បានស្នើសុំក្រសួងពាណិជ្ជកម្មកម្ពុជាជួយគាំទ្រគម្រោងនេះផង ដើម្បីឱ្យក្រុមហ៊ុនទាំងអស់អាចចូលរួមធ្វើពិពិធកម្មវិស័យការងារ និងអភិវឌ្ឍសេដ្ឋកិច្ចជាមួយរាជរដ្ឋាភិបាលកម្ពុជា។
ឯកឧត្តមរដ្ឋមន្ត្រី ប៉ាន សូរស័ក្តិ បានគាំទ្រទាំងស្រុងចំពោះគម្រោងវិនិយោគនេះ ហើយបានណែនាំដល់មន្ត្រីជំនាញឱ្យធ្វើការសម្របសម្រួល និងជួយដោះស្រាយបញ្ហាផ្សេងៗ ដើម្បីឱ្យគម្រោងនេះដំណើរការទៅមុខដោយជោគជ័យ។ ឯកឧត្តមរដ្ឋមន្ត្រី បានបង្ហាញជូនគណៈប្រតិភូអំពីព័ត៌មានសំខាន់ៗទាក់ទិននឹងឱកាសវិនិយោគនៅកម្ពុជា និងផលិតផលអាទិភាពមួយចំនួនដែលក្រសួងកំពុងជំរុញការនាំចេញ មានដូចជា សម្លៀកបំពាក់ ស្បែកជើង អង្ករ ដំឡូងមី ពោត ម្រេច សូត្រប្រណីត និងផលិតផលឧស្សាហកម្មដូចជា គ្រឿងបន្លាស់រថយន្ត ម៉ូទ័រ និងម្ហូបអាហារកែច្នៃ។
តាមរបាយការណ៍ពីសភាពាណិជ្ជកម្មអឺរ៉ុប ប្រចាំនៅប្រទេសកម្ពុជាបានបង្ហាញឱ្យដឹងថា កាលពីឆ្នាំ 2017 កម្ពុជាបានផលិត និងដំឡើងកង់នាំចេញទៅកាន់ទីផ្សារពិភពលោកចំនួន 1,824,895គ្រឿង (មួយលានប្រាំបីសែនពីរម៉ឺនបួនពាន់ប្រាំបីរយកៅសិបប្រាំ) គិតជាទឹកប្រាក់ស្មើនឹង 391លានដុល្លារអាមេរិក គឺបានកើនឡើង 29% បើធៀបនឹងឆ្នាំ2016 ដែលបច្ចុប្បន្នកម្ពុជាកំពុងផលិតកង់នៅតំបន់សេដ្ឋកិច្ចពិសេសក្រុងបាវិត ខេត្តស្វាយរៀង ជិតព្រំប្រទល់ព្រំដែនកម្ពុជា និងវៀតណាម៕
April 26, 2018
នាយ ព្រែក សម្ដែងក្ដីស្រឡាញ់ចំពោះម្ដាយ គួរឱ្យច្រណែនអ្វីម្ល៉េះទេ…(លោកអ៊ើយ)
មហាជនគ្រប់គា្នលាន់មាត់សរសើរនាយ ព្រែក គ្រប់ៗគ្នា បន្ទាប់ពីនាយយើងបានបង្ហោះរូបភាពពីរសន្លឹកដែលបង្ហាញឱ្យឃើញគ្រាថើបថ្ពាល់ម្ដាយកាលពីកុមារភាព និងក្នុងឆ្នាំថ្មី 2018 នេះ។ ការបង្ហាញក្ដីស្រឡាញ់របស់នាយ ព្រែក ចំពោះម្ដាយបានធ្វើឱ្យមហាជនអ្នកគាំទ្រទាំងឡាយអត់មិនសរសើរមិនបាន ព្រោះថា នាយយើងពិតជាមានភាពកតញ្ញូចំពោះលោកយាយ យ៉យ ខ្លាំងណាស់។
ពិធីករប្រចាំស្ថានីយទូរទស្សន៍ MY TV និងជាតារាកំប្លែងវ័យក្មេង នាយ ព្រែក បានបង្ហោះសារជូនចំពោះម្ដាយថា «ស្នាមថើបរបស់កូនចំពោះម៉ែកាល 20ឆ្នាំមុន និងបច្នុប្បន្នពិតជាខុសគ្នាឆ្ងាយណាស់ តែស្ថិតក្នុងអត្ថន័យតែមួយគឺ «កូនស្រលាញ់ម៉ែខ្លាំងបំផុត» ពិតជាចាក់ដោតអារម្មណ៍មិត្តអ្នកអានខ្លាំងណាស់(ហ៊ឺៗ បេលរំភើបចង់ស្រក់ទឹកភ្នែក…)។
គួរបញ្ជាក់ផងដែរថា តារាកំប្លែងវ័យក្មេងរូបនេះ មិនត្រឹមតែស្រឡាញ់ម្ដាយទេ តែនាយយើងក៏មានគូគាប់ទ្រនាប់ចិត្តរួចហើយដែរ ដោយបានភ្ជាប់ពាក្យជាមួយកូនស្រីអ្នកខេត្តកំពង់ចាម នាមថាកញ្ញា ជា ស្រីតី អស់រយៈពេលយូរក្រែលគួរសមដែរហើយ ប៉ុន្ដែមកដល់ពេលនេះ គូស្នេហ៍វ័យក្មេងមួយគូនេះនៅមិនទាន់លេចឮដំណឹងថានឹងចូលរោងការនៅពេលណានៅឡើយទេ តែមហាជនទាំងអស់(ជាពិសេស បេល)សង្ឃឹមថានឹងមានដំណឹងល្អនាពេលឆាប់ៗខាងមុខនេះ៕
April 26, 2018
គង់ ចាន់ស្រីមុំ ពោលចង់បានកូនញឹក ដោយសារប្ដីចេះថ្នាក់ថ្នម
ថ្មីៗនេះ តារាសម្ដែងស្រី គង់ ចាន់ស្រីមុំ បានបង្ហោះរូបភាពផ្អែមល្ហែមជាមួយស្វាមីនៅលើបណ្ដាញសង្គមហ្វេសប៊ុក ខណៈដែលរូបនាងបានធ្វើដំណើរកម្សាន្ដជាមួយស្វាមីនៅឯប្រទេសចិន ។ បើទោះបីជាទំហំពោះររបស់ ស្រីមុំ កាន់តែធំពីមួយថ្ងៃទៅមួយថ្ងៃក្ដី តែការយកចិត្តទុកដាក់ និងថ្នាក់ថ្នមរូបនាងពីសំណាក់ស្វាមី ពោលគឺមិនឱ្យទាស់ចិត្តឡើយ នេះបើតាមការបង្ហើបប្រាប់ពីតារាស្រីរូបនេះ។
កាន់តែភ្ញាក់ផ្អើលថែមទៀត ខណៈដែលអ្នកទាំងពីរកាន់តែបង្ហាញពីភាពផ្អែមល្ហែមជាមួយគ្នាកាន់តែខ្លាំងឡើងៗ សុខៗស្រាប់តែតារាស្រីរូបនេះ បាននិយាយឡើងថា «ចង់បានកូនញឹក»។ នៅក្នុងសាររបស់នាងដែលបានសរសេរប្រាប់ជាសាធារណៈបានឱ្យដឹងថា «ឱ្យតែប្តីយកចិត្តទុកដាក់អ៊ីចឹង ចង់តែមានកូនឱ្យញឹក» ។ តែយ៉ាងណាក៏ដោយ នាងបន្ដទៀតថា « ល្អអូន! បងចង់បានកូនប្រាំនាក់ (សម្ដីប្ដី)»។ អូហូ! គ្រាន់តែឮបែបនេះ ប្រិយមិត្តទាំងអស់គ្នាសាកទាយទៅមើល តើគង់ ចាន់ស្រីមុំ ឆ្លើយតបដូចម្ដេច?
គួររំឭកផងដែរថា បើគិតចាប់ពីថ្ងៃពពោះរហូតមកទល់ថ្ងៃនេះ តារាស្រីរូបស្រស់ម្នាក់នេះកំពុងពពោះជិតគ្រប់ 7 ខែហើយ តែបើនិយាយពីការរៀបចំខ្លួនវិញ ពិតជាស្រស់ស្អាត និងសមសួនខ្លាំងណាស់ ថែមទាំងថ្ពក់ចិត្តសា្វមីជាប់ទៀតផង។ រីឯកូនក្នុងផ្ទៃវិញ ក៏បានទទួលការបញ្ជាក់ពីការពិនិត្យអេកូហើយដែរថា ជាកូនស្រី៕
April 26, 2018