សង្គម និងសេដ្ឋកិច្ច - La Reine Media

IFR បង្ហាញពីប្រទេសដែលប្រើប្រាស់ Robot ច្រើនជាងគេបំផុតលើពិភពលោក

ឧស្សាហកម្មនាពេលបច្ចុប្បន្ននេះហាក់លែងស្ទាក់ស្ទើរទៀតហើយក្នុងប្រើប្រាស់គ្រឿងយន្តស្វ័យប្រវត្តិ (Robot) ដើម្បីប្រតិបត្តិការផលិតកម្មរបស់ខ្លួន ព្រោះថា បច្ចេកវិទ្យាបានអភិវឌ្ឍឱ្យ Robot កាន់តែមានភាពឆ្លាតវៃខ្លាំងឡើង ទន្ទឹមនឹងបច្ចេកវិទ្យា AI (Artificial Intelligence) ដែលកំពុងវាយលុកកាន់តែខ្លាំងលើការងារសំខាន់ៗក្នុងពិភពលោក។

នៅចន្លោះឆ្នាំ2015 និងឆ្នាំ2016 ចំនួនជាមធ្យមនៃការប្រើប្រាស់ Robot ក្នុងវិស័យឧស្សាហកម្មក្នុងពិភពលោកបានកើនឡើងពីចំនួន 66ផ្នែក ក្នុងចំណោមមនុស្ស 10,000នាក់ ដល់ចំនួន 74ផ្នែកក្នុងចំណោម 10,000នាក់។

ទិន្នន័យនេះបង្ហាញថា ការអភិវឌ្ឍបច្ចេកវិទ្យា Robot កាន់តែមានសម្ទុះទៅមុខលឿនខ្លាំងឡើង ហើយគ្មានសញ្ញានៃការថយចុះនោះទេ នេះបើយោងតាមទិន្នន័យរបស់សហព័ន្ធគ្រឿងយន្តស្វ័យប្រវត្តិអន្តរជាតិ (International Federation of Robotics = IFR) ដែលបានធ្វើស្ថិតិពីចំនួនសហគ្រាសដែលដំឡើង Robot នៅក្នុងឆ្នាំ2016។

ប្រទេសដែលមានការប្រើប្រាស់ Robot ច្រើនជាងគេលើពិភពលោក គឺប្រទេសកូរ៉េខាងត្បូងជាមួយនឹងវត្តមានរបស់ Robot 631ផ្នែកក្នុងចំណោមមនុស្ស10,000នាក់។ សហព័ន្ធ IFR បានបង្ហាញថា ការកើនឡើងនេះ ដោយសារតែសមត្ថភាពនៃ Robot មានប្រសិទ្ធភាពកាន់តែខ្លាំងឡើងក្នុងកិច្ចការងារសំខាន់ៗលើពិភពលោក ជាពិសេសលើវិស័យអេឡិចត្រូនិក និងឧស្សាហកម្មស្វ័យប្រវត្តិ។

ឈរនៅលំដាប់ថ្នាក់លេខ2 លើពិភពលោក ដែលមាន Robot ធ្វើការច្រើនជាងគេលើពិភពលោក ប្រទេសសិង្ហបុរី បានដំឡើង Robot ចំនួន 488គ្រឿងក្នុងចំណោមមនុស្ស 10,000នាក់។ ហើយបើយោងតាមរបាយការណ៍របស់ IFR បានបង្ហាញថា 90% នៃ Robot នៅក្នុងប្រទេសសិង្ហបុរី គឺធ្វើការងារលើឧស្សាហកម្មអេឡិចត្រូនិក។

ងាកទៅទ្វីបអឺរ៉ុបវិញ ប្រទេសអាល្លឺម៉ង់បានឈរនៅលំដាប់ថ្នាក់លេខ3 លើពិភពលោក ដែលមាន Robot និងប្រព័ន្ធបច្ចេកវិទ្យាស្វ័យប្រវត្តិច្រើនជាងគេលើពិភពលោក និងជាប្រទេសដែលឈរនៅលំដាប់ថ្នាក់លេខ1 ក្នុងទ្វីបអឺរ៉ុប។ អាល្លឺម៉ង់ មានRobot កំពុងធ្វើការងារចំនួន 309គ្រឿង ក្នុងចំណោមមនុស្ស 10,000នាក់។ យោងតាមទិន្នន័យរបស់ IFR បានបង្ហាញថា ប្រទេសអាល្លឺម៉ង់បានបង្កើត Robot ដើម្បីលក់ទៅទ្វីបអឺរ៉ុបចំនួន 41% ក្នុងឆ្នាំ2016 ហើយតាមការរំពឹងទុក នៅចន្លោះឆ្នាំ 2018 និងឆ្នាំ2020 នឹងមានការកើនឡើងប្រមាណ 5% បន្ថែមទៀត។

ប្រៀបធៀបពីការងាររបស់ Robot នៅក្នុងទ្វីបនីមួយៗបើគិតពីចំនួនប្រទេសក្នុងទ្វីបអឺរ៉ុបមានចំនួន Robot ដែលកំពុងធ្វើការងារច្រើនជាងទ្វីបដទៃ បើគិតជាមធ្យមក្នុងពិភពលោក។ ក្នុងនោះប្រទេសស៊ុយអែត មាន Robot ចំនួន 223គ្រឿង ដាណឺ-ម៉ាក មានចំនួន 211គ្រឿង អ៊ីតាលីមានចំនួន 185គ្រឿង និងបែលហ្សិកមានចំនួន 184គ្រឿង។

ចំពោះប្រទេសអង់គ្លេសវិញថ្វីត្បិតតែជាប្រទេសដែលមានសេដ្ឋកិច្ចសំខាន់ជាងគេ (G7) ក៏ពិតមែនតែមាន Robot ធ្វើការត្រឹមតែចំនួន 71គ្រឿងតែប៉ុណ្ណោះក្នុងចំណោមអ្នកធ្វើការងារចំនួន 10,000នាក់។ របាយការណ៍របស់ IFR បានបង្ហាញថា ចក្រភពអង់គ្លេស គួរតែបង្កើនការវិនិយោគលើគ្រឿងយន្តទំនើបបន្ថែមទៀត ដើម្បីបង្កើនប្រសិទ្ធភាពការងារ។

នៅអឺរ៉ុបខាងកើត ប្រទេសស្លូវេនៀ មានការប្រើប្រាស់គ្រឿងយន្តចំនួន 137គ្រឿង ក្នុងចំណោមមនុស្ស 10,000នាក់ ហើយប្រទេសស្លូវាគីមានចំនួន 135គ្រឿង ដែលវាជាទិន្នន័យបង្ហាញពីការប្រើប្រាស់កើនឡើងនៃការប្រើប្រាស់ Robot និងសាធារណរដ្ឋឆែក ក៏ជាប្រទេសមួយដែលមានការប្រើប្រាស់គ្រឿងយន្តកើនឡើងខ្ពស់ផងដែរជាមួយនឹងវត្តមានគ្រឿងយន្តចំនួន 101គ្រឿងក្នុងចំណោមអ្នកធ្វើការងារ 10,000នាក់ ដែលមានន័យថា ការងារជាច្រើនរបស់មនុស្សកំពុងត្រូវបានជំនួសដោយម៉ាស៊ីនកាន់តែច្រើន។

លោក Zbynek Frolik អគ្គនាយកនៃក្រុមហ៊ុន Linet បាននិយាយប្រាប់ The New York Times ថា៖ “យើងព្យាយាមគ្រប់លទ្ធភាពដើម្បីជំនួសការងាររបស់មនុស្សដោយម៉ាស៊ីន តាមដែលយើងអាចធ្វើទៅបាន។

យោងតាមរបាយការណ៍ពីស្ថាប័នប្រឹក្សាយោបល់ផ្នែកគ្រប់គ្រងលើពិភពលោក McKinsy បានព្យាករថាមួយភាគប្រាំនៃប្រជាជនលើពិភពលោកនឹងអាចប៉ះពាល់ដល់វិស័យការងារ ឬអាចនិយាយបានថា មានអ្នកធ្វើការងារចំនួន 800លាននាក់អាចនឹងបាត់បង់ការងារដោយសារតែការជំនួសដោយម៉ាស៊ីនស្វ័យប្រវត្តិ។

អាមេរិកខាងជើងនៅក្នុងសហរដ្ឋអាមេរិក ដែលជាប្រទេសមានសេដ្ឋកិច្ចធំជាងគេលើពិភពលោកត្រូវបានគេដឹងតាមរយៈទិន្នន័យក្នុងឆ្នាំ2016 ថា មាន Robot ចំនួន189គ្រឿងត្រូវបានដំឡើងក្នុងចំណោមអ្នកធ្វើការងារចំនួន 10,000នាក់។

យោងតាមទិន្នន័យរបស់ IFR បានបង្ហាញថា ផលប៉ះពាល់ខ្លាំងដែលអាចនឹងងើបឡើងយ៉ាងឆាប់រហ័សនៅសហរដ្ឋអាមេរិកគឺការធ្វើឱ្យចង្វាក់ផលិតកម្មមួយចំនួននៅក្នុងវិស័យឧស្សាហកម្មត្រូវធ្វើដោយគ្រឿងយន្ត ហើយចង្វាក់ផលិតកម្មខ្លះត្រូវធ្វើនៅផ្ទះ។

នៅជាប់របងភាគខាងត្បូងនៃអាមេរិក គឺប្រទេសម៉ិកស៊ិក មាន Robot ចំនួន 33គ្រឿងក្នុងចំណោមអ្នកធ្វើការ 10,000នាក់ដែលចង្វាក់ផលិតកម្មទាំងអស់នោះក៏ជាផ្នែកមួយនៃការនាំចេញទៅអាមេរិកដែរ។

ទ្វីបអាស៊ីខណៈពេលដែលប្រទេសកូរ៉េខាងត្បូង និងសិង្ហបុរី កំពុងនាំមុខគេផ្នែកការប្រើប្រាស់បច្ចេកវិទ្យា Robot នៅលើពិភពលោក និងទីផ្សារគ្រឿងយន្តនៅអាស៊ី ចិនក៏ជាប្រទេសមួយដែលបានប្រើប្រាស់ Robot ជំនួសពលកម្មមនុស្សច្រើនគួរសមដែរ ។ ចិនបានប្រើប្រាស់ Robot ចំនួន 68គ្រឿងក្នុងចំណោមមនុស្ស 10,000នាក់ក្នុងឆ្នាំ2016 ហើយមកដល់ពេលថ្មីៗនេះ វាត្រូវបានគេមើលឃើញថា កាន់តែមានការកើនឡើងបើទោះបីជាមិនទាន់មានទិន្នន័យចុងក្រោយបំផុតណាមួយបង្ហាញឱ្យឃើញច្បាស់លាស់នៅក្នុងឆ្នាំ2018 នេះក៏ដោយ៕

May 4, 2018

ការធ្វើទំនើបកម្មក្នុងវិស័យកសិកម្មស្ថិតក្នុងភាពប្រឈម

បច្ចុប្បន្នដោយសារមានការចូលរួមពីផ្នែកឯកជនប្រជាកសិករខ្មែរស្ទើរតែ90% បានប្រើប្រាស់គ្រឿងយន្តកសិកម្មក្នុងការជំរុញឱ្យប្រសើរឡើងនូវមុខរបរកសិកម្មរបស់ខ្លួនដែលត្រូវបានគេមើលឃើញថាកំពុងជួបប្រទះនូវបញ្ហាប្រឈមមួយចំនួនដូចជាការធ្លាក់ចុះកម្លាំងពលកម្ម ការប្រែប្រួលអាកាសធាតុ និងឱនភាពដីបានធ្វើឱ្យវិស័យកសិកម្មមិនអាចឈានទៅសម្រេចបាន ឬប្រើឱ្យអស់លទ្ធភាពនូវសក្តានុពលរបស់ខ្លួនដែលមាន។

បញ្ហានេះអ្នកជំនាញក្នុងវិស័យកសិកម្មយល់ថា ការធ្វើទំនើបកម្មក្នុងវិស័យកសិកម្មនៅមិនទាន់លឿននៅឡើយទេ ដោយសារតែបញ្ហាក្បាលដីសម្រាប់ធ្វើកសិកម្មនៅមានទំហំតូច និងកម្សោយវិនិយោគលើការកសាងប្រព័ន្ធធារាសាស្ត្រ។ ការណ៍នេះទាមទារឱ្យមានការធ្វើទំនើបកម្មកាន់តែខ្លាំងឡើងថែមទៀតក្នុងវិស័យសំខាន់មួយនេះ។ នេះបើតាមការអះអាងរបស់រដ្ឋមន្ត្រីក្រសួងកសិកម្ម។

លោក វេង សាខុន រដ្ឋមន្ត្រីក្រសួងកសិកម្មបានថ្លែងថា វិស័យកសិកម្មបានប្រឈមនឹងបញ្ហាមួយចំនួន ដែលបានធ្វើឱ្យវិស័យនេះមិនអាចអភិវឌ្ឍទៅមុខលឿនបាន។ នេះបើយោងតាមព័ត៌មានដែលបានសរសេរលើគណនីហ្វេសប៊ុករបស់លោក។

លោកបានបញ្ជាក់ថា៖“កសិករមានក្បាលដីតូចៗសម្រាប់ធ្វើកសិកម្ម ហើយជាការត្រឹមត្រូវណាស់ ក្បាលដីតូចៗទាំងនោះមិនអនុញ្ញាតឱ្យពួកគាត់ប្រើប្រាស់គ្រឿងយន្តធំៗបានទេ។ គាត់មិនអាចទៅទិញត្រាក់ទ័រមួយ ឬម៉ាស៊ីនច្រូតមួយមកប្រើបានទេ អ៊ីចឹងគាត់មានតែប្រើសេវាជួលរបស់អស់ហ្នឹង ដែលនេះគឺជាការចូលរួមពីវិស័យឯកជន។

លោកបានថ្លែងបន្តថា ខណៈដែលកម្ពុជាប្រឹងប្រែងធ្វើទំនើបកម្មក្នុងវិស័យកសិកម្ម តែវិស័យនេះក៏នៅតែមានបញ្ហាប្រឈមមួយចំនួនផងដែរ ពាក់ព័ន្ធនឹងការកែច្នៃផលិតផលកសិកម្ម។ លោកបានបន្តទៀតថា កម្ពុជាមិនអាចពឹងតែពីការលក់ផលិតផលកសិកម្មរបស់ខ្លួនប៉ុណ្ណោះទេ ព្រោះការលក់បានថ្លៃ ឬថោក អាស្រ័យទៅលើទីផ្សារអន្តរជាតិ។

លោក សម វិទូ នាយកប្រតិបត្តិនៃអង្គការសេដាក (CEDAC) បានផ្ដល់ទស្សនៈមួយចំនួនដែលអាចពន្លឿនការធ្វើទំនើបកម្មក្នុងវិស័យនេះបានលឿនជាងមុន និងធ្វើឱ្យវិស័យនេះ បានរីកដុះដាលបន្ថែមទៀតនោះគឺ៖

ទី1-ទាក់ទងនឹងចំណេះដឹង ការយល់ដឹងរបស់ប្រជាកសិករយើង។ ត្រូវបណ្តុះបណ្តាលគាត់ និងអប់រំពីការវិនិយោគវិស័យកសិកម្ម ដូចជាការស្ទូងស្រូវដោយម៉ាស៊ីនជាដើម“ចំណុចនេះឱ្យគាត់សម្លឹងមើលទៅប្រទេសជិតខាងដើម្បីថ្លឹងថ្លែងពីការធ្វើទំនើបកម្មលើវិស័យកសិកម្មនេះ ពីព្រោះពេលខ្លះវាអាចនាំមកនូវជោគជ័យ តែពេលខ្លះវាក៏មិននាំមកនូវជោគជ័យដែរ។ដោយហេតុថា ផលដែលទទួលបានពីការវិនិយោគនេះមិនសមនឹងតម្លៃដែលបានចំណាយ ឧទាហរណ៍ការធ្វើស្រូវដី 1ហិកតាដោយការប្រើត្រាក់ទ័រ វាខុសគ្នានឹងការភ្ជួរដោយគោ-ក្របី។

ទី2-ទាក់ទងនឹងផ្ទៃដី ភាគច្រើនប្រជាកសិករមានទំហំដីធ្វើកសិកម្មតូចៗ ហើយនៅដាច់ឆ្ងាយពីគ្នា។លោកបានបញ្ជាក់បន្ថែមថា៖ “ការប្តូរប្រព័ន្ធក្បាលដីហ្នឹង គឺសំខាន់ណាស់ដើម្បីឱ្យគាត់ប្រមូលដីហ្នឹងមកជិតគ្នាបើគាត់មានមួយហិកតា កុំឱ្យមានច្រើនស្រែពេក គឺមួយហិកតា នៅប្រមូលផ្តុំគ្នាតែមួយហិកតាហ្នឹង គឺជាការល្អដែលអាចឲ្យគាត់ធ្វើអីបានច្រើននៅលើផ្ទៃដីផ្តុំគ្នាហ្នឹង។

ទី3-ទាក់ទងនឹងភាពដែលអាចរកបាន រដ្ឋាភិបាលត្រូវជួយដល់កសិករនូវការនាំចូលនូវក្រមហ៊ុនដែលមានគ្រឿងចក្រដែលអាចជួលក្នុងតម្លៃទាបដើម្បីឱ្យកសិករចំណាយក្នុងការផលិតសមស្របមិនចំណាយដើមទុនធំពេក។

ទី4-ទាក់ទងនឹងការឧបត្ថម្ភធន រដ្ឋាភិបាលត្រូវជួយដល់កសិករដោយផ្តល់នូវដីសម្បទានសង្គមកិច្ច និងជួយជំរុញឱ្យមានការផ្តល់ឥណទាន ឬទុនកម្ចីដែលមានកម្រិតការប្រាក់ទាប ដែលអាចផ្តល់ឱកាសឱ្យកសិករមានទុនវិនិយោគលើដីកសិកម្មរបស់ពួកគេបាន៕

May 4, 2018

សហគ្រាសធុនតូច និងមធ្យមដើរតួនាទីយ៉ាងសំខាន់ក្នុងការជួយដល់កំណើនសេដ្ឋកិច្ច

សហគ្រាសធុនតូច និងមធ្យម (SME)មិនត្រឹមតែជួយផ្តល់ការងារដល់ពលរដ្ឋខ្មែរប៉ុណ្ណោះទេ ប៉ុន្តែថែមទាំងបានដើរតួនាទីយ៉ាងសំខាន់ក្នុងការជួយដល់កំណើនសេដ្ឋកិច្ចកម្ពុជាឱ្យមានការរីកលូតលាស់យ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ នេះជាប្រសាសន៍លើកឡើងរបស់ឯកឧត្តម ប៉ាន់ សូរស័ក្តិ រដ្ឋមន្ត្រីក្រសួងពាណិជ្ជកម្ម។

ឯកឧត្តមបានមានប្រសាសន៍ក្នុងកម្មវិធីបណ្តុះបណ្តាលរវាងក្រសួងពាណិជ្ជកម្ម និង ICC បង់ក្លាដែសស្តីអំពីពាណិជ្ជកម្មហិរញ្ញវត្ថុអន្តរជាតិ និងការអភិវឌ្ឍខ្សែចង្វាក់តម្លៃសកល កាលពីសប្តាហ៍មុនថា កំណើនសេដ្ឋកិច្ចយ៉ាងឆាប់រហ័សរបស់អាស៊ីក្នុងរយៈពេល 4ទសវត្សរ៍កន្លងមកនេះបានជះឥទ្ធិពលយ៉ាងខ្លាំងដល់សេដ្ឋកិច្ចពិភពលោក និងបានដាក់ទីតាំងអាស៊ីជាអ្នកជំរុញកំណើនសេដ្ឋកិច្ចពិភពលោកដែលសហគ្រាសធុនតូច និងមធ្យមបានដើរតួនាទីយ៉ាងសំខាន់ក្នុងការរីកចម្រើននេះ ក៏ដូចជាការស្តារសេដ្ឋកិច្ចឡើងវិញបន្ទាប់ពីវិបត្តិហិរញ្ញវត្ថុពិភពលោកឆ្នាំ2008-2009 តាមរយៈការជំរុញពាណិជ្ជកម្មក្នុងស្រុក និងការប្រមូលតម្រូវការក្នុងស្រុក។

ឯកឧត្តមបន្តថា សហគ្រាសធុនតូច និងមធ្យមជំរុញឱ្យមានតម្រូវការក្នុងស្រុកតាមរយៈការបង្កើតការងារ ការច្នៃប្រឌិត និងការប្រកួតប្រជែងជាដើមដូច្នេះហើយពួកគេគឺជាកម្លាំងជំរុញមួយនៅពីក្រោយសេដ្ឋកិច្ចជាតិ។ ប៉ុន្តែសម្រាប់សហគ្រាសធុនតូច និងមធ្យមវិញ ដើម្បីរស់ និងរីកចម្រើន លទ្ធភាពទទួលបានហិរញ្ញវត្ថុគ្រប់គ្រាន់ និងបង្កើនផលិតភាពរបស់ពួកគេ គឺពិតជាសំខាន់យ៉ាងខ្លាំង។ ក្រៅពីវិស័យគាំទ្រហិរញ្ញវត្ថុឧស្សាហកម្ម និងការលើកកម្ពស់ការធ្វើអន្ដរជាតូបនីយកម្ម (ដំណើរការជាអន្តរជាតិ) នៃសហគ្រាសធុនតូច និងមធ្យម គឺជាគន្លឹះក្នុងការជំរុញកំណើនសេដ្ឋកិច្ចដែលមានលក្ខណៈទូលំទូលាយ និងការគេចចេញពីអន្ទាក់នៃប្រាក់ចំណូលមធ្យមសម្រាប់ប្រទេសជាសមាជិកនៅក្នុងតំបន់អាស៊ី និងប៉ាស៊ីហ្វិក។

ទោះយ៉ាងនេះក្តី នៅតំបន់អាស៊ី សហគ្រាសខ្នាតតូច និងមធ្យមនៅតែបន្តខ្វះខាតហិរញ្ញវត្ថុដោយស្ថានភាពនេះកាន់តែធ្ងន់ធ្ងរថែមទៀតនៅពេលមានភាពមិនច្បាស់លាស់ផ្នែកហិរញ្ញវត្ថុសកលដែលកំពុងបន្តដោយសារការទទួលបានប្រភពហិរញ្ញវត្ថុសមស្របបានក្លាយទៅជាការពិបាកសម្រាប់ SME។ វិបត្តិហិរញ្ញវត្ថុបានប៉ះពាល់ដល់សហគ្រាសខ្នាតតូច និងមធ្យម និងសហគ្រិនដោយមិនសមហេតុផលកាន់តែធ្ងន់ធ្ងរទៅលើឧបសគ្គហិរញ្ញវត្ថុរបស់ពួកគេ។ ក្រៅពីហិរញ្ញវត្ថុមានកម្រិតស្ថានភាពហិរញ្ញវត្ថុរបស់សហគ្រាសធុនតូច និងមធ្យមជាច្រើនត្រូវបានចុះខ្សោយបន្ថែមទៀតដោយសារការធ្លាក់ចុះនៃតម្រូវការសម្រាប់ទំនិញ និងសេវាកម្មដែលកំពុងរារាំងឥណទាន។

ជាមួយគ្នានេះលោក Mahbubur Rahman ជាប្រធាន ICC ប្រទេសបង់ក្លាដែសមានប្រសាសន៍ថា ភាពមិនមានហិរញ្ញវត្ថុជាឧបសគ្គចំពោះពាណិជ្ជកម្មអន្តរជាតិដែលរាំងស្ទះដល់ការអភិវឌ្ឍប្រកបដោយនិរន្តរភាពខណៈដែលពាណិជ្ជកម្មអន្ដរជាតិគឺជាកម្លាំងចលករមួយសម្រាប់ការអភិវឌ្ឍសេដ្ឋកិច្ចនៅក្នុងបណ្តាប្រទេសកំពុងអភិវឌ្ឍ និងទីផ្សារដែលកំពុងរីកចម្រើន ហើយការផ្តល់ហិរញ្ញប្បទានពាណិជ្ជកម្មមានសារៈសំខាន់ខ្លាំងណាស់សម្រាប់ការអភិវឌ្ឍប្រកបដោយចីរភាព ជាពិសេសការបញ្ចូលសហគ្រាសខ្នាតតូច និងមធ្យម (SME) ទៅក្នុងពាណិជ្ជកម្មអន្តរជាតិតែម្តង។

លោកថា បណ្តាប្រទេសនៅអាស៊ីគ្មានជម្រើសអ្វីក្រៅពីបញ្ចូលទៅក្នុងប្រព័ន្ធហិរញ្ញវត្ថុ និងសេដ្ឋកិច្ចពិភពលោកនោះទេ ថ្វីបើគម្លាតសេដ្ឋកិច្ចមានក្នុងចំណោមបណ្តាប្រទេសជាសមាជិកអាចនាំមកនូវការផ្លាស់ប្តូរយ៉ាងសំខាន់នៅក្នុងរចនាសម្ព័ន្ធ និងនីតិវិធីនៃការសម្រេចចិត្តក្ដី។ ហើយថា ការបណ្តុះបណ្តាលរវាងក្រសួងពាណិជ្ជកម្ម និង ICC បង់ក្លាដែសស្តីអំពីពាណិជ្ជកម្មហិរញ្ញវត្ថុអន្តរជាតិ និងការអភិវឌ្ឍខ្សែចង្វាក់តម្លៃសកល និងជួយអភិវឌ្ឍសមត្ថភាពហិរញ្ញវត្ថុ នៅក្នុងតំបន់ពិសេសនៅកម្ពុជាឱ្យកាន់តែប្រសើរឡើង។

ដើម្បីពន្លឿនការពិភាក្សាគោលនយោបាយស្តីពីការផ្តល់ហិរញ្ញប្បទានដល់សហគ្រាសធុនតូច និងមធ្យមក្នុងវិស័យសេដ្ឋកិច្ចនីមួយៗ កិច្ចសហប្រតិបត្តិការសកល និងថ្នាក់តំបន់គឺចាំបាច់ជាពិសេសក្នុងការចែករំលែកការអនុវត្តល្អ លើការអភិវឌ្ឍគំរូច្នៃប្រឌិតដើម្បីដោះស្រាយកង្វះខាតក្នុងហិរញ្ញវត្ថុ SME។ ក្នុងន័យនេះធនាគារអភិវឌ្ឍន៍អាស៊ីបានចាប់ផ្តើមរៀបចំក្របខ័ណ្ឌសម្រាប់វេទិកាចែករំលែកព័ត៌មាន SME ដែលមានលក្ខណៈទូលំទូលាយនៅអាស៊ី-ប៉ាស៊ីហ្វិកដែលហៅថា S-RDTA (SME Finance Monitor – S-RDTA) ហើយសព្វថ្ងៃនេះកម្ពុជាបានដាក់ឱ្យដំណើរការជាលើកទី2 នៃកម្មវិធីត្រួតពិនិត្យហិរញ្ញវត្ថុ SME Finance របស់អាស៊ី ដែលគ្របដណ្តប់ 20DMCs មកពី 5 តំបន់នៃ ADB៕

May 4, 2018

ដាំទំពាំងបារាំងទទួលបានផលរាល់ថ្ងៃ និងមានតម្រូវការខ្ពស់នៅលើទីផ្សារ

ទំពាំងបារាំង ជាប្រភេទបន្លែថ្មីម្យ៉ាងដែលស្ត្រីមេផ្ទះអាចយកទៅច្នៃធ្វើជាម្ហូបបានច្រើនយ៉ាង ពិសេសយកទៅធ្វើជាបន្លែអន្លក់ផ្ទាប់ជាមួយសាច់អាំង ឆាជាមួយសាច់មាន់-សាច់គោ ឬឆាប្រេងខ្យងមានរសជាតិឆ្ងាញ់ប្លែកមាត់គួរឱ្យចង់ទទួលទាន និងថែមទាំងជួយលើកកម្ពស់សុខភាពទៀតផង។

អ៊ំស្រី ជួន ជឿន ជាកសិករដាំទំពាំងបារាំងនៅក្នុងភូមិក្រចាប់ ឃុំអូតាវ៉ៅ ស្រុកប៉ៃលិន ខេត្តប៉ៃលិនមានប្រសាសន៍ថា គ្រួសារលោកអ៊ំទើបតែចាប់ផ្តើមដាំបន្លែទំពាំងបារាំងនេះបានត្រឹមរយៈពេល 2ឆ្នាំប៉ុណ្ណោះ និងពេលដាំដំបូងៗពុំសូវមានអ្នកស្គាល់ប៉ុន្មានទេ ប៉ុន្តែបន្ទាប់ពីបានទទួលទានតៗគ្នាមក ធ្វើឱ្យបន្លែមួយនេះទទួលបានការគាំទ្រខ្ពស់នៅលើទីផ្សារថែមទាំងផ្គត់ផ្គង់មិនគ្រប់គ្រាន់ទៀតផង។

អ៊ំស្រីបន្តថា ដើមឡើយជនជាតិថៃបានមកផ្សព្វផ្សាយលក់គ្រាប់នៅក្នុងភូមិ តែពុំមានអ្នកចាប់អារម្មណ៍ដាំនោះទេ ហើយដោយសារតែចង់ដឹង គ្រួសារលោកអ៊ំក៏ទិញគ្រាប់យកមកដាំសាក ល្បងលើផ្ទៃដីចំនួនមួយរ៉ៃ(40មx40ម) ហើយក៏ទទួលបានទិន្នផលដូចការផ្សព្វផ្សាយរបស់គេមែន។ ដំបូងឡើយបានចំនួនតិចតួចប៉ុណ្ណោះ ប៉ុន្តែរហូតដល់អាយុ 8ខែទើបអាចប្រមូលបានចន្លោះពី8 ទៅ10គីឡូក្រាមជារៀងរាល់ថ្ងៃមិនដែលអត់នោះទេ ហើយបោះឱ្យម៉ូយយកទៅលក់បន្តនៅខេត្តសៀមរាប និងក្រុងភ្នំពេញក្នុងតម្លៃតែ 3.50ដុល្លារប៉ុណ្ណោះក្នុងមួយគីឡូក្រាម ចំណែកម៉ូយគេយកទៅលក់បោះដុំបន្ត ឬលក់រាយបានប្រហែល 5ដុល្លារក្នុងមួយគីឡូក្រាម។

អ៊ំស្រីបានបញ្ជាក់ថា “បច្ចុប្បន្នមានឈ្មួញមករកទិញដែរ តែដោយសារយើងដាំបានតិចពេក គេមិនទទួលយកទេ បើសិនប្រមូលផលបាន 30គីឡូក្រាមក្នុងមួយថ្ងៃគេនឹងចាំទិញដុំតែម្តង ហើយពេលនេះខ្ញុំកំពុងតែពង្រីកដីថែមមួយរ៉ៃទៀតហើយ។ សម្រាប់គ្រួសារលោកអ៊ំ បច្ចុប្បន្នកំពុងតែកាប់ដំណាំមួយចំនួនចោលដើម្បីពង្រីកដីដាំដុះបន្លែទំពាំងបារាំងនេះ ទោះបីវាជួបការលំបាកក្នុងការធ្វើស្មៅ និងស្រោចទឹកបន្តិចក៏ដោយ ប៉ុន្តែវាផ្តល់ផលប្រយោជន៍បានច្រើន ដោយក្នុងមួយហិកតាអាចប្រមូលផលលក់បានប្រហែល 100ដុល្លារដែរក្នុងមួយថ្ងៃ ហើយថែមទាំងផ្តល់ទិន្នផលបានច្រើនឆ្នាំទៀតផងទម្រាំតែវាងាប់ដើមទៅវិញ។

ការដាំដំណាំបន្លែទំពាំងបារាំងនេះដំបូងឡើងគេត្រូវយកគ្រាប់ទៅដាក់បណ្តុះក្នុងកូនកន្ទោង ប្រហែលជាមួយសប្តាហ៍ រួចមកកូនទំពាំងបារាំងនឹងចាប់ផ្តើមដុះ ហើយត្រូវស្រោចទឹកឱ្យសើមល្មមជាប្រចាំ និងដាក់ជីទើបកូនទំពាំងបារាំងលូតលាស់បានល្អ។ រហូតដល់ 3ខែទើបយកកូនទាំងនោះទៅដាក់ដាំនៅតាមរងនីមួយៗ ដែលមានចម្ងាយពីគ្នាប្រហែល1.5ម៉ែត្រ និងត្រូវដាក់ដាំឃ្លាតពីគ្នាប្រហែលកន្លះម៉ែត្រ។ អំឡុងពេលបណ្តុះកូន កសិករត្រូវរៀបចំដីឱ្យល្អ ដោយត្រូវភ្ជួររាស់ដីឱ្យបាន2-3ដង ដើម្បីហាលដីឱ្យបានឆ្អិនល្អ សម្លាប់ស្មៅ និងសម្លាប់មេរោគផ្សេងៗ រួចហើយទើបលើកជារងចន្លោះពីគ្នា1.5ម៉ែត្រ។ រហូតដល់កូនអាយុ 3ខែទើបត្រូវលើកយកមកដាំ ហើយមើលថែទាំបោចស្មៅដាក់ជីកំប៉ុស និងស្រោចទឹករាល់ថ្ងៃ (តែកុំស្រោចច្រើនពេកខ្លាចវាជាំទឹក អាចធ្វើឱ្យកូនទំពាំងបារាំងរលួយដើម) រហូតដល់ 3ខែក្រោយមកទៀត ទើបដើមទំពាំងបារាំងចាប់ផ្តើមដុះកូនចេញមកបណ្តើរៗ និងរហូតដល់អាយុ 8ខែទើបវាឱ្យហុចផលពេញលេញអាចដកលក់បានរាល់ថ្ងៃ។

យោងតាមឯកសារស្រាវជ្រាវបង្ហាញថា ទំពាំងបារាំងមានផ្ទុកជីវជាតិ និងវីតាមីនជាច្រើនដូចជា វីតាមីនអា (A) វីតាមីនសេ (C) វីតាមីនអ៊ី(E) វីតាមីនបេ1 (B1) ហើយសម្បកវាសម្បូរទៅដោយជាតិដែក កាល់ស្យូម(CA) សារធាតុខ្លាញ់ និងមានសារធាតុចិញ្ចឹមផ្សេងៗជាច្រើនទៀតដែលរាងកាយមនុស្សយើងត្រូវការ។ ក្រៅពីនេះ ជាតិកាកសរសៃដ៏ល្អក្នុងដំណាំនេះអាចជួយទប់ទល់ជាតិស្ករនៅក្នុងឈាមមិនឱ្យឡើងខ្លាំង ជួយកាត់បន្ថយជាតិខ្លាញ់ក្នុងរាងកាយ ជួយឱ្យពោះវៀនធំងាយស្រួលធ្វើការ ជួយឱ្យសរសៃសក់មានសុខភាពល្អ ជួយថែរក្សាសុខភាពភ្នែក និងជួយថែរក្សាសុខភាពបេះដូងថែមទៀតផង៕

May 3, 2018

អាជីវកម្មទូទាត់ប្រាក់តាមប្រព័ន្ធអនឡាញរីកចម្រើនខ្លាំងនៅកម្ពុជា

ស្របពេលដែលជីវភាពប្រជាពលរដ្ឋកាន់តែមានភាពប្រសើរឡើងពីមួយឆ្នាំទៅមួយឆ្នាំ គេសង្កេតឃើញថា ក្រុមហ៊ុនប្រតិបត្តិការទូទាត់សាច់ប្រាក់តាមប្រព័ន្ធអនឡាញបានចូលមកបណ្តាក់ទុននៅលើទីផ្សារកម្ពុជាកាន់តែច្រើនឡើងក្នុងរយៈពេលប៉ុន្មានឆ្នាំចុងក្រោយនេះ។

អាជីវករលក់ដូរនៅក្រុងភ្នំពេញម្នាក់ លោកស្រី ឃិត សុភក្ត្រ មានប្រសាសន៍ថា លោកស្រីក៏បានប្រើប្រព័ន្ធទូទាត់សាច់ប្រាក់តាមអនឡាញនេះដែរ ដោយជ្រើសយកប្រតិបត្តិការទូទាត់សាច់ប្រាក់អេស៊ីលីដាទាន់ចិត្ត។ លោកស្រីអះអាងថា ប្រព័ន្ធនេះផ្តល់ភាពងាយស្រួលក្នុងការផ្ទេរប្រាក់ទូទាត់ថ្លៃទិញទំនិញនៅលើទីផ្សារអាចបង់វិក្កយបត្រទឹក-ភ្លើងដោយមិនអស់ថ្លៃសេវា និងអាចទិញកាតទូរស័ព្ទជាដើម ពិសេសអ្នកស្រីមិនលំបាកដាក់លុយតាមខ្លួនច្រើននាំឱ្យបារម្ភពីសុវត្ថិភាពផ្ទាល់ខ្លួនទៀតផង។

សាស្ត្រាចារ្យផ្នែកសេដ្ឋកិច្ច នៃសាកលវិទ្យាល័យភូមិភ្នំពេញ លោក ឡាយ សុខហេង មានប្រសាសន៍ថា អ្វីដែលធ្វើឱ្យប្រព័ន្ធទូទាត់សាច់ប្រាក់តាមអនឡាញ ហូរចូលមកប្រទេសកម្ពុជាកាន់តែច្រើនឡើងៗនេះ គឺដោយសារកត្តាសំខាន់3៖

ទី1.គឺកត្តាតម្រូវការរបស់មនុស្ស ស្របពេលដែលប្រាក់ចំណូលពួកគាត់មានការកើនឡើងជាលំដាប់ពីមួយឆ្នាំទៅមួយឆ្នាំបានធ្វើឱ្យប្រជាពលរដ្ឋចង់ប្រើនូវបច្ចេកវិទ្យាថ្មីៗដូចយើងដឹងហើយថាកន្លងមកពលរដ្ឋទូទាត់សាច់ប្រាក់តាមមធ្យោបាយលុយសុទ្ធ ប៉ុន្តែនៅពេលជីវភាពកាន់តែប្រសើរឡើង មនុស្សតែងមានតម្រូវការអ្វីៗដែលថ្មី ដូចជាប្រើប្រព័ន្ធទូទាត់សាច់ប្រាក់តាមអនឡាញនេះ គឺមានភាពងាយស្រួល និងចំណេញពេលវេលាទៀតផង។

ទី2.គឺកត្តាបច្ចេកវិទ្យាបើតាមតួលេខរបស់ក្រសួងប្រៃសណីយ៍ និងទូរគមនាគមន៍ កាលពីឆ្នាំមុនបង្ហាញថា ក្នុងចំណោមប្រជាពលរដ្ឋខ្មែរជាង15លាននាក់ គឺប្រើស៊ីមកាតទូរស័ព្ទរហូតដល់ជាង 20លានស៊ីមកាត ដូច្នេះបានន័យថា ប្រជាពលរដ្ឋវ័យកណ្តាលម្នាក់ប្រើស៊ីមដល់ទៅពីរ ហើយពិសេសគឺប្រើទូរស័ព្ទប្រភេទស្មាតហ្វូនដែលងាយស្រួលក្នុងការប្រើប្រាស់ប្រព័ន្ធទូទាត់សាច់ប្រាក់តាមអនឡាញនេះ “ពីមុនប្រជាពលរដ្ឋប្រើទូរស័ព្ទសាមញ្ញធម្មតាទេ តែឥឡូវគាត់ប្រើទូរស័ព្ទទំនើបៗស្របពេលដែលប្រព័ន្ធអ៊ីនធើណិត កាន់តែមានល្បឿនលឿនជាងមុនធ្វើឱ្យពលរដ្ឋចង់ប្រើបច្ចេកវិទ្យាថ្មីៗនេះ ដើម្បីសម្រួលដល់ការងារប្រចាំរបស់ខ្លួន។

ចំណែកទី3 គឺកត្តាច្បាប់ ដោយធនាគារកណ្តាលបានលើកទឹកចិត្តផ្តល់ភាពងាយស្រួល និងលើកទឹកចិត្តឱ្យក្រុមហ៊ុនវិនិយោគបរទេសចូលមកបណ្តាក់ទុនលើប្រព័ន្ធទូទាត់សាច់ប្រាក់តាមអនឡាញនេះឱ្យកាន់តែច្រើន និងកាន់តែសម្បូរបែបសម្រាប់ផ្តល់ជាជម្រើសផ្សេងៗផ្តល់ដល់អតិថិជន។

ជាក់ស្តែង បច្ចុប្បន្នប្រព័ន្ធទូទាត់សាច់ប្រាក់តាមអនឡាញមានច្រើនក្រុមហ៊ុននៅលើទីផ្សារកម្ពុជា ដូចជាប្រព័ន្ធទូទាត់សាច់ប្រាក់អេស៊ីលីដាទាន់ចិត្ត ប្រព័ន្ធទូទាត់សាច់ប្រាក់ Pi Pay និង Wingជាដើម។ ឥឡូវនេះ ធនាគារឯកទេសអុីអន (Aeon Specialized Bank Cambodia ) បានបើកសម្ពោធដាក់ឱ្យប្រើប្រព័ន្ធទូទាត់សាច់ប្រាក់តាមអនឡាញឈ្មោះថា Aeon Wallet Cambodia ជាផ្លូវការថ្មីមួយទៀតហើយកាលសប្តាហ៍មុន ដើម្បីផ្តល់ភាពងាយស្រួល និងរហ័សក្នុងការទូទាត់ថ្លៃទំនិញដោយមិនបារម្ភពីការអាប់ប្រាក់ឬការគិតលុយខុសនិងកាត់បន្ថយហានិភ័យផ្សេងៗដូចជាបាត់លុយឬត្រូវចោរលួចជាដើម។

Aeon Wallet Cambodiaគឺជាប្រព័ន្ធទូទាត់សាច់ប្រាក់តាម Mobile App ដែលអតិថិជនអាច Download ដាក់ក្នុងទូរស័ព្ទដៃហើយបន្ទាប់មកអាច បញ្ចូលទឹកប្រាក់ ក្នុងគណនីរបស់ខ្លួននៅតាមបញ្ជរ Aeon Wallet Cambodia ដែលមាននៅក្នុងផ្សារទំនើបអុីអន ប៉ុន្តែ បច្ចុប្បន្ន តាមរយៈ Aeon Wallet Cambodia អតិថិជនអាចទូទាត់ត្រឹមជាប្រាក់រៀលសិន។

លោក Taketo Ando នាយកគ្រប់គ្រងធនាគារឯកទេសអុីអនបានបញ្ជាក់ដូច្នេះថា ធនាគារឯកទេសអុីអន ខេមបូឌា មានឆន្ទៈជួយអភិវឌ្ឍប្រទេសកម្ពុជា និងជួយលើកតម្កើង និងជំរុញឱ្យមានការប្រើប្រាស់រូបិយប័ណ្ណប្រាក់រៀលខ្មែរ ដោយជួយផ្សព្វផ្សាយសេវានេះឱ្យក្លាយជាសេវាកម្មដែលគួរឱ្យទុកចិត្តបាន មានសុវត្ថិភាព និងងាយស្រួលដើម្បីធ្វើឱ្យជីវិតរស់នៅប្រចាំថ្ងៃរបស់ប្រជាពលរដ្ឋនៅក្នុងប្រទេសកម្ពុជា និងបណ្តាប្រទេសអាស៊ីផ្សេងទៀតកាន់តែប្រសើរឡើង។

ជាមួយគ្នានេះ លោកជំទាវ ជា សេរី អគ្គនាយិកាបច្ចេកទេសនៃធនាគារជាតិនៃកម្ពុជាមានប្រសាសន៍ថា ការប្រើប្រព័ន្ធទូទាត់សាច់ប្រាក់តាមអនឡាញនេះ គឺអតិថិជនទទួលបានអត្ថប្រយោជន៍ជាច្រើនក្នុងការទិញទំនិញតាមបណ្តាក្រុមហ៊ុន ឬផ្សារទំនើបនានា ដោយក្រុមហ៊ុនទាំងនោះបានលក់បញ្ចុះតម្លៃនៅពេលទូទាត់សាច់ប្រាក់តាមរយៈប្រតិបត្តិការទាំងនេះ ដូចជា ធនាគារឯកទេសអុីអនដែលទើបសម្ពោធដាក់ឱ្យប្រើប្រព័ន្ធទូទាត់ទំនិញអនឡាញនេះ ដែលអតិថិជនអាចទទួលបានប្រយោជន៍ពីការទិញទំនិញនៅលើផ្សារអុីអន និងបណ្តាក្រុមហ៊ុន និងហាងដៃគូជាច្រើនទៀត។

ទោះយ៉ាងណា ការប្រើប្រព័ន្ធទូទាត់សាច់ប្រាក់តាមអនឡាញក៏អាចជួបហានិភ័យខ្លះផងដែរនៅពេលដែលមិនមានការប្រុងប្រយ័ត្នចំពោះលេខកូដនៅលើទូរស័ព្ទដៃផ្ទាល់ខ្លួន ឬពេលមានបញ្ហាទូរស័ព្ទជ្រុះបាត់ត្រូវគេរើសបានយកទៅប្រើដើម្បីដកសាច់ប្រាក់ពីម្ចាស់គណនីដែលបានបាត់ទូរស័ព្ទនោះ។ ម្យ៉ាងទៀតប្រព័ន្ធប្រតិបត្តិការនេះអាចជួបបញ្ហាបច្ចេកទេសមិនដំណើរការម្តងម្កាលផងដែរ។ ចំណុចនេះលោកជំទាវ ជា សេរី បានបញ្ជាក់ថា ធនាគារជាតិនៃកម្ពុជាបានគិតគូរ និងយកចិត្តទុកដាក់ខ្លាំងលើបញ្ហានេះ ដើម្បីចៀសវាងហានិភ័យណាមួយដែលអាចកើតឡើង ដោយធនាគារជាតិបានចាត់មន្ត្រីជំនាញទៅជួបប្រជុំជាមួយក្រុមហ៊ុនឯកជននានានា ធ្វើយ៉ាងណាបញ្ចៀសហានិភ័យពីអតិថិជន៕

May 3, 2018

ក្លាយជាសិស្សពូកែទូទាំងប្រទេស ជាក្តីស្រមៃធំមួយសម្រាប់សិស្សនៅកម្ពុជា

ជាប់ជាសិស្សពូកែទូទាំងប្រទេស ជាជោគជ័យយ៉ាងធំមួយសម្រាប់សិស្សដែលកំពុងខិតខំប្រឹងប្រែងជារៀងរាល់ឆ្នាំ ព្រោះការទទួលជ័យលាភីដ៏សំខាន់មួយនេះ មិនគ្រាន់តែអាចទទួលបានឱកាសអាហារូបករណ៍សម្រាប់សាកលវិទ្យាល័យ សំខាន់ៗប៉ុណ្ណោះទេ តែវាជាកិត្តិយសយ៉ាងធំធេងសម្រាប់ខ្លួនឯង គ្រួសារ និងសាលារៀនដែលយើងកំពុងសិក្សាថែមទៀតផង។

ពាក់ព័ន្ធនឹងបញ្ហានេះ អតីតសិស្សពូកែទូទាំងប្រទេសផ្នែករូបវិទ្យា គឹម គីណាល់ បានលើកឡើងថា ដើម្បីសម្រេចក្តីស្រមៃជាសិស្សពូកែទូទាំងប្រទេស គាត់បានចែករំលែកបទពិសោធថា ទី1 ត្រូវស្វែងយល់ពីមេរៀនឱ្យបានច្បាស់លាស់ និងគ្រប់ជ្រុងជ្រោយសិនមុនពេលចាប់ផ្តើមអនុវត្តលំហាត់ផ្ទាល់ខ្លួនសំខាន់ៗ ហើយចំណុចទី2 គឺត្រូវធ្វើលំហាត់ដែលធ្លាប់បានស្រាវជ្រាវឱ្យអស់ តាមរយៈការសរសេរលើក្រដាសមិនមែនគិតតែមាត់នោះទេ និងចុងក្រោយគឺត្រូវចេះសួរឱ្យបានត្រូវរឿង ព្រោះអ្នកស្រាវជ្រាវអ្វីដែលថ្មីតែងតែមានសំណួរជាច្រើន ហេតុនេះការរកឃើញសំណួរត្រឹមត្រូវអាចនឹងធ្វើឱ្យយើងទទួលបានលទ្ធផលល្អ ឬចម្លើយប្រកបដោយ ភាពត្រឹមត្រូវដើម្បីស្វែងយល់ពីឫសគល់នៃមេរៀនផងដែរ។

យុវជន គឹម គីណាល់ បាននិយាយថា៖ “ការសិក្សាផ្នែករូបវិទ្យាគឺត្រូវការយល់ឱ្យបានច្បាស់ពីគោលបំណងនៃមេរៀន និងបាតុភូត បើមិនដូច្នោះទេយើងនឹងមិនអាចមានលទ្ធភាពយករូបមន្តទៅអនុវត្តដើម្បីដោះស្រាយលំហាត់ស្មុគស្មាញនោះបានទេ។

សិស្សពូកែរូបវិទ្យាខាងលើបានលើកឡើងផងដែរថា ការយករូបមន្តមកអនុវត្តលំហាត់ចាំបាច់ត្រូវធ្វើដោយការសរសេរជាក់ស្តែង ព្រោះវាអាចជួយយើងឱ្យមានសមត្ថភាពដោះស្រាយលំហាត់បានល្អប្រកបដោយភាពហ្មត់ចត់នៅពេលដែលយើងប្រឡងជាក់ស្តែងលើក្រដាស។ អ្នករៀនរូបវិទ្យាជាច្រើនមិនសូវចូលចិត្តធ្វើលំហាត់ដោយសរសេរលើក្រដាសនោះទេ ព្រោះគេចូលចិត្តគិតតែពីល្បិច និងគន្លឹះ រួចហើយក៏រំលងវាផុតដោយមិនបានសរសេរនោះទេ។

ចំណុចនេះ អាចធ្វើឱ្យពួកគេបរាជ័យនៅពេលប្រឡងសិស្សពូកែដែលមានលំហាត់ច្រើននិងសុទ្ធតែល្បិចខ្លាំងៗដែល ទាមទារឱ្យសរសេរប្រកបដោយភាពហ្មត់ចត់។ ថ្វីត្បិតតែពួកគេមានភាពវៃឆ្លាតក៏ពិតមែន តែការដែលមិនឧស្សាហ៍អនុវត្តលំហាត់ដោយការសរសេរអាចធ្វើឱ្យពួកគេមានចន្លោះប្រហោងច្រើននៅពេលសរសេរជាក់ស្តែងលើក្រដាសវិញ្ញាសាប្រឡង ឬងាយច្រឡំទៀតផង។

ងាកមកសិស្សពូកែគណិតវិទ្យាវិញម្តងលោក លឹម ម៉េងសាយ អតីតសិស្សពូកែគណិតវិទ្យាលេខ1ទូទាំងប្រទេស បានលើកឡើងថា មុននឹងក្លាយជាសិស្សពូកែទូទាំងប្រទេសផ្នែកគណិតវិទ្យា មុន

ដំបូងគឺចាំបាច់ត្រូវមានចិត្តស្រឡាញ់មុខវិជ្ជានេះជាមុនសិន ព្រោះនៅពេលដែលយើងស្រឡាញ់មុខវិជ្ជាណាមួយហើយ យើងនឹងមើលឃើញថាមុខវិជ្ជានោះជាផ្នែកដែលមិនសាំញ៉ាំ ហើយពេលចាប់ផ្តើមអនុវត្តជាក់ស្តែងក៏មិនងាយនឹងធុញទ្រាន់ដែរ។

នៅពេលដែលយើងស្រឡាញ់មុខវិជ្ជាគណិតវិទ្យា យើងនឹងមើលឃើញថា វាហាក់បីដូចជាល្បែងកម្សាន្តដែលអាចធ្វើឱ្យយើងកាន់តែជក់ចិត្តក្នុងការរៀន និងដោះស្រាយលំហាត់លំបាកៗបាន។ ចំណុចមួយផ្សេងទៀតគឺ ត្រូវព្យាយាមចូលទៅជិតសិស្សច្បងដែលមានជំនាញខ្លាំងផ្នែកគណិតវិទ្យា ដើម្បីសុំការណែនាំ និងគន្លឹះសំខាន់ៗដើម្បីដោះស្រាយលំហាត់គណិតវិទ្យា។

លោក លឹម ម៉េងសាយ បាននិយាយថា៖ “នៅពេលដែលយើងម្នាក់ៗមានចំណាប់អារម្មណ៍ខ្លាំងលើមុខវិជ្ជាដែលយើងកំពុងសិក្សា យើងនឹងឃើញថា ការសិក្សា ឬដំណោះស្រាយលំហាត់កាន់តែលំបាក គឺជារឿងមានន័យសម្រាប់ជីវិត ព្រោះយើងអាចធ្វើវាបានដោយខ្លួនឯង។

លោក លឹម ម៉េងសាយ បានបន្ថែមទៀតថា ក្រៅពីរកឃើញមុខវិជ្ជាដែលខ្លួនស្រឡាញ់ហើយ ការបែងចែកពេលវេលាគឺជារឿងសំខាន់មួយដែលអ្នកសិក្សាមិនគួរមើលរំលង។ ការបែងចែកពេលវេលាត្រូវធ្វើឡើងដោយទន់ភ្លន់តែម៉ឺងម៉ាត់សម្រាប់ខ្លួនឯង គឺកុំបង្ខំឱ្យត្រូវតែធ្វើតាមការកំណត់ទុកជាក់លាក់ណាមួយទាំងស្រុង។ ហើយពេលខ្លះសម្រាប់រូបលោកធ្លាប់ប្តូកាលវិភាគសម្រាប់ខ្លួន-

ឯងដល់ទៅ2ដងក្នុងមួយសប្តាហ៍ក៏មាន។ កាលវិភាគត្រូវធ្វើទៅតាមចិត្តដែលចង់រៀនខ្លាំងបំផុត មានពេលខ្លះចង់រៀនធរណីមាត្រមុនគេទាំងអស់ហេតុនេះកុំអាលបង្ខំខ្លួនឯងឱ្យរៀនផ្នែកផ្សេងដែលមិនចង់ គឺត្រូវរៀនផ្នែកនេះឱ្យបានខ្លាំងជាមុនសិនបន្ទាប់មកទើបចាប់ផ្តើមគិតពីផ្នែកដែលខ្លួនចង់រៀនបន្ទាប់ដើម្បីកំណត់ម៉ោងសម្រាប់ផ្នែកនោះឱ្យបានច្រើនជាងមុខវិជ្ជាដទៃ។

ចំពោះសិស្សពូកែទូទាំងប្រទេសផ្នែកអក្សរសិល្ប៍ខ្មែរវិញ កញ្ញា លី សុខុម បានលើកឡើងថា ការប្រឡងសិស្សពូកែផ្នែកនេះចាំបាច់ត្រូវការយល់ពីមេរៀនឱ្យច្រើនជាងការទន្ទេញ។ ចំណុចដែល

ត្រូវទន្ទេញគឺមានតែឈ្មោះរបស់អ្នកនិពន្ធ កាលបរិច្ឆេទច្បាស់លាស់ និងសម័យកាលនៃព្រឹត្តិការណ៍រឿងក្នុងអក្សរសិល្ប៍តែប៉ុណ្ណោះ តែការប្រឡងអក្សរសាស្ត្រខ្មែរ គឺមានសំណួរជាច្រើនដែលទាមទារឱ្យយើងចេះវិភាគ និងវែកញែកដោយលើកយកទឡ្ហីករច្បាស់លាស់មកសរសេរ។

កញ្ញា លី សុខុម បាននិយាយថា៖ “ចំពោះសំណួរបែបវិភាគ គឺត្រូវសរសេរតាមការយល់ និងចំណេះដឹងដែលបានរៀនលើផ្នែកអក្សរសិល្បិ៍ហើយចំពោះសំណួរណាដែលយើងយល់ថា មិនសូវច្បាស់ឬមិនចេះសូមកុំរំលងចោល យើងត្រូវព្យាយាមសរសេរដើម្បីបំពេញចន្លោះនោះឱ្យអស់ព្រោះបើគ្មានសំណេរសោះគឺត្រូវបានសូន្យ តែប្រសិនបើសរសេរត្រូវខ្លះប្រាកដជាបានពិន្ទុ។

សិស្សពូកែអក្សរសាស្ត្រខ្មែរខាងលើបានលើកឡើងផងដែរថា នៅពេលប្រឡងសិស្សពូកែទូទាំងប្រទេសអ្នកប្រឡងត្រូវមើលសំណួរឱ្យបានយល់ច្បាស់សិន សឹមសរសេរ ព្រោះកាលណាសរសេរខុស ឬច្រឡំប្រធានបទណាមួយប្រាកដជាធ្វើឱ្យខាតពេលវេលា។ ម្យ៉ាងវិញទៀត ត្រូវព្យាយាមបង្កើនជំនឿជាក់លើខ្លួនឯងឱ្យបានខ្ពស់ ព្រោះវាជាពេលបញ្ចេញសមត្ថភាព មិនមែនជាពេលដែលត្រូវព្រួយបារម្ភនោះទេ៕

May 3, 2018

អាណាព្យាបាលសម័យថ្មីគួរបង្រៀនកូនឱ្យមានភាពទទួលខុសត្រូវ

អាណាព្យាបាលសម័យមុន តែងចង់ឱ្យកូនស្តាប់បង្គាប់ តែអាណាព្យាបាលសម័យនេះបានចាប់ផ្តើមផ្លាស់ប្តូរនិន្នាការចាស់ទាំងអស់នោះ ដោយងាកមកជំរុញឱ្យកូនៗមានភាពទទួលខុសត្រូវ និងមានភាពច្នៃប្រឌិតខ្ពស់វិញម្ដង។ ការបង្រៀនកូនឱ្យគ្រាន់តែចេះស្តាប់បង្គាប់តែម្យ៉ាង អាចជាកត្តាអវិជ្ជមានមួយដែលបង្កើតជាដែនកំណត់ដល់ការអភិវឌ្ឍសមត្ថភាពរបស់កូន ព្រោះក្មេងអាចមានសមត្ថភាពល្អៗ និងអស្ចារ្យជាច្រើនដែលមនុស្សចាស់នឹកស្មានមិនដល់ ហេតុនេះអ្វីដែលជាចំណុចសំខាន់ដើម្បីអភិវឌ្ឍសមត្ថភាពរបស់ពួកគេ គឺជំរុញឱ្យគេមានការទទួលខុសត្រូវខ្ពស់លើអ្វីដែលគេចង់ធ្វើ ឬបានធ្វើហើយ។

បើនិយាយពីគំនិតវិញ យើងឃើញថា អ្វីដែលក្មេងគិត មិនដូចគ្នាទៅនឹងអ្វីដែលមនុស្សធំគិតនោះទេ ព្រោះក្មេងមានការយល់ដឹងតិច តែពោរពេញដោយក្តីសង្ឃឹម និងភាពស្រស់ស្រាយ ខុសប្លែកពីមនុស្សធំដែលមានបទពិសោធជីវិតច្រើន ជួបរឿងរ៉ាវច្រើន និងក៏មានការភ័យខ្លាចច្រើនដូចគ្នា ហេតុនេះសូមកុំព្យាយាមឱ្យក្មេងធ្វើអ្វីដើម្បីតម្រូវចិត្តមនុស្សធំ តែគួរតែធ្វើជាអ្នកតម្រង់ទិសក្នុងពេលដែលឃើញក្មេងធ្វើខុសវិញទើបជាការប្រសើរ។

ខាងក្រោមនេះជាវិធីមួយចំនួនក្នុងការជំរុញក្មេងតូចៗឱ្យមានការទទួលខុសត្រូវ មានភាពជាអ្នកដឹកនាំខ្ពស់ និងមានការសម្រេចចិត្តបានល្អ។

ផ្តល់ការសម្រេចចិត្តលើរឿងតូចៗ

ក្មេងៗតែងតែស្រមៃចង់បានឯករាជភាព ចង់ធ្វើតាមមនុស្សធំ និងចង់សម្រេចចិត្តដោយខ្លួនឯង។ ថ្វីដ្បិតតែពេលខ្លះយើងមើលឃើញថា ក្មេងនៅក្នុងប្រទេសកំពុងអភិវឌ្ឍន៍មួយចំនួនមិនសូវចូលចិត្តសម្រេចចិត្តក៏ដោយ តែវាមានមូលហេតុមួយចំនួនដែលជំរុញឱ្យពួកគេស្ថិតក្នុងស្ថានភាពបែបនោះ។

ក្មេងដែលមិនចូលចិត្តសម្រេចចិត្ត ឬមិនហ៊ានសម្រេចចិត្ត ភាគច្រើនមកពីពួកគេមិនមានទម្លាប់ក្នុងការសម្រេចចិត្ត ឬត្រូវបានឪពុកម្តាយសម្រេចចិត្តជំនួសគ្រប់បែបយ៉ាងតាំងពីតូចដល់ធំ ហេតុនេះនៅពេលដែលគាត់ត្រូវសម្រេចចិត្តដោយខ្លួនឯងម្តងៗគាត់តែងតែមានអារម្មណ៍តឹងតែង ហើយចង់គេចចេញពីបញ្ហា។ បញ្ហានេះ ជាកត្តាមួយដែលនាំឱ្យក្មេងក្លាយជាមនុស្សខ្វះការទទួលខុសត្រូវ។

អ្នកជំនាញអប់រំ បានណែនាំថា ការជំរុញឱ្យក្មេងមានការសម្រេចចិត្តដោយខ្លួនឯង ដូចជាការជ្រើសរើសពណ៌នៃសម្ភារ ប្រើប្រាស់ជ្រើសរើសទីតាំងទុកដាក់សម្ភារក្នុងបន្ទប់របស់គេ ឬលើកទឹកចិត្តឱ្យជ្រើសរើសដំណាំណាមួយដើម្បីដាំនៅក្នុងផ្ទះជាដើម នឹងអាចជួយឱ្យគេចាប់ផ្តើមមានអារម្មណ៍ថា កក់ក្តៅ និងមានទំនុកចិត្ត ព្រោះពួកគេបានក្លាយជាផ្នែកមួយនៃការសម្រេចចិត្តលើជីវិតខ្លួនឯង។ ជាបន្តបន្ទាប់ពួកគេនឹងចាប់ផ្តើមហ៊ានសម្រេចចិត្តលើរឿងធំឡើងៗ ក្រោយពេលដែលយើងជួយតម្រង់ទិស និងផ្តល់ឱកាសឱ្យគេកាន់តែច្រើនទៅតាមវ័យ។ នៅពេលដែលក្មេងហ៊ានសម្រេចចិត្ត គេនឹងហ៊ានទទួលខុសត្រូវចំពោះការសម្រេចចិត្តនោះ ព្រោះពួកគេមានភាពម្ចាស់ការលើសកម្មភាពរបស់ខ្លួន។

បើសិនគ្មានអ្វីខូចខាត សាកល្បងបណ្តោយឱ្យគេបង្កើតគំនិតថ្មីដោយខ្លួនឯង

ការជំរុញឱ្យក្មេងបង្កើតគំនិតថ្មីដោយខ្លួនឯង ឬស្តាប់សម្តីរបស់គេជាវិធីមួយដ៏សំខាន់ដែលអាណាព្យាបាលជាច្រើនបានមើលរំលង។ ពេលខ្លះសំណួរដែលសួរថា “តើគួរធ្វើយ៉ាងណា?” ជាសំណួរដ៏មានន័យបំផុតសម្រាប់ក្មេង ព្រោះពួកគេហាក់កំពុងទទួលបានអំណាចសំខាន់មួយសម្រាប់ខ្លួនឯង។

នៅពេលក្មេងបានផ្តល់ចម្លើយមកយើងវិញថាគួរធ្វើយ៉ាងណាហើយនោះ គេនឹងចាប់ផ្តើមព្យាយាមគ្រប់លទ្ធភាពដើម្បីធ្វើវាឱ្យបានល្អបំផុត ព្រោះជាធម្មជាតិរបស់ក្មេងគឺចង់បង្ហាញប្រាប់មនុស្សធំថា គេមានសមត្ថភាពគ្រប់គ្រាន់ក្នុងការធ្វើរឿងគ្រប់យ៉ាង។ អាណាព្យាបាលជាច្រើន អាចប្រើប្រាស់វិធីនេះបាន ព្រោះថា នៅពេលដែលយើងចង់ឱ្យក្មេងធ្វើរឿងអ្វីមួយ យើងមិនដែលគិតដល់អារម្មណ៍របស់ក្មេងនោះទេ ហេតុនេះហើយទើបធ្វើឱ្យពួកគេព្យាយាមប្រឆាំង តែប្រសិនបើយើងសាកល្បងសួរពួកគេតែមួយម៉ាត់វិញនោះ វានឹងមានប្រសិទ្ធភាពហួសពីការស្មាន ព្រោះពួកគេនឹងធ្វើដោយមិនបាច់បង្ខំ។

រំឮក និងទទួលយកចំណុចល្អដែលក្មេងៗមាន

មិនថាមនុស្សវ័យណាទេ សុទ្ធតែចង់ឱ្យគេសរសើរ បើទោះបីជាពេលខ្លះគេតែងតែឮមនុស្សធំនិយាយថា ធ្វើការងារមិនចាំបាច់គេសរសើរក៏ដោយ។ ក្មេងកាន់តែត្រូវការពាក្យសរសើរខ្លាំងជា

មនុស្សធំទៅទៀត ហេតុនេះប្រសិនបើមនុស្សធំចាប់ចំណុចនេះបាន ពួកគេនឹងអាចជំរុញឱ្យកូនតូចៗក្លាយជាមនុស្សដែលពោរពេញដោយការទទួលខុសត្រូវក្នុងផ្លូវល្អបាន។

ក្មេងជាវ័យដែលឆាប់ភ្លេច ឬជាវ័យដែលចូលចិត្តធ្វើអ្វីតែមួយឆាវ ហេតុនេះដើម្បីរក្សាទម្លាប់ល្អ និងជំរុញឱ្យមានការទទួលខុសត្រូវកាន់តែច្រើនក្នុងជីវិតរបស់គេ មនុស្សធំអាចសាកល្បងលើកសរសើរ

នូវចំណុចល្អដែលគេធ្លាប់ធ្វើនៅចំពោះមុខ ហើយជំរុញលើកទឹកចិត្តបន្ថែមទៀត នោះពួកគេនឹងចាប់ផ្តើមគិតថាខ្លួនគេកាន់តែមានតម្លៃ ហើយនឹងបន្តធ្វើរឿងល្អៗជាច្រើនផ្សេងទៀតដើម្បីទទួលបានការសរសើរពីមនុស្សធំ។

បន្ថយការចាប់កំហុស តែបង្កើតទម្លាប់ទទួលខុសត្រូវ

កើតជាមនុស្សតែងតែមានកំហុសជារឿងធម្មតាមិនថាវ័យណាក៏ដោយ។ នៅពេលដែលយើងធ្វើខុស យើងតែងតែមានការព្រួយបារម្ភថានឹងទទួលរងនូវការស្តីបន្ទោស ទទួលរងនូវការឈឺចាប់ជាដើម ហេតុនេះពេលខ្លះមនុស្សធំក៏ព្យាយាមគេចចេញពីការទទួលខុសត្រូវ ឬចាប់ផ្តើមចេះលាក់បាំងកំហុសខ្លួនឯង ដែលអាចធ្វើឱ្យរឿងកាន់តែរីកធំឡើងដូចគ្នា។ ងាកមកក្មេងតូចៗវិញក៏ដូចគ្នា

ប្រសិនបើមនុស្សធំចាំតែចាប់កំហុសគ្រប់ពេល ពួកគេនឹងព្យាយាមលាក់បាំងកាន់តែច្រើន តែប្រសិនបើមនុស្សធំផ្តល់ឱកាសឱ្យគេបកស្រាយពីហេតុផល និងមិនធ្វើឱ្យពួកគេមានភាពភ័យខ្លាចនឹងសារភាពកំហុសនោះ គេនឹងហ៊ានទទួលខុសត្រូវកាន់តែច្រើនឡើងនៅក្នុងការរស់នៅ៕

May 2, 2018

តម្លៃដីនៅខេត្តកំពតកំពុងតែហក់ឡើងខ្លាំងតាមខេត្តព្រះសីហនុដែរហើយ

បន្ទាប់ពីខេត្តព្រះសីហនុ បច្ចុប្បន្នតម្លៃដីនៅខេត្តកំពត ក៏កំពុងមានសម្ទុះកើនឡើងខ្លាំងដែរ ដោយសារតែខេត្តនេះក៏មានទីតាំងនៅជាប់សមុទ្រ មានសក្តានុពលក្នុងវិស័យទេសចរណ៍ និងមានសក្តានុពលក្នុងការធ្វើកំពង់ផែដឹកជញ្ជូនទំនិញតាមសមុទ្រដូចគ្នាដែរ។

លោក អៀង ហោ ប្រធានក្រុមហ៊ុនអចលនទ្រព្យ សុវណ្ណភូមិ គ្រុប មានប្រសាសន៍ថា បច្ចុប្បន្នតម្លៃដីនៅខេត្តនោះកំពុងមានសម្ទុះឡើងខ្លាំងមែនពិសេសនៅចំណុចតាមដងព្រែកកំពង់បាយដែលមានសក្តានុពលខ្លាំងខាងវិស័យទេសចរណ៍ និងដីនៅតាមសងខាងផ្លូវជាតិឆ្លងកាត់ពីខេត្តកំពតទៅខេត្តព្រះសីហនុតែម្តង។ លោកថា កាលពីឆ្នាំមុន ដីនៅតំបន់ទាំងនោះមានតម្លៃប្រមាណជា25 ទៅ30ដុល្លារប៉ុណ្ណោះក្នុងមួយម៉ែត្រការ៉េ ប៉ុន្តែមកទល់បច្ចុប្បន្នដីនៅ តំបន់នោះបានស្ទុះឡើងយ៉ាងខ្លាំងក្នុងមួយម៉ែត្រការ៉េ មានតម្លៃដល់ទៅជាង 100ដុល្លារឯណោះ។

អ្វីដែលធ្វើឱ្យដីនៅតំបន់នោះឡើងថ្លៃខ្ពស់ គឺដោយសារជនបរទេសបានចូលមករស់នៅទីនោះកាន់តែច្រើនឡើងៗ ដូចជាជនជាតិអឺរ៉ុបបានចូលមកជួលដីប្រជាពលរដ្ឋបើកធ្វើអាជីវកម្មផ្សេងៗពិសេសធ្វើជាភោជនីយដ្ឋានលក់ម្ហូបអាហារជូនភ្ញៀវទេសចរបរទេសដូចគ្នា។ មួយវិញទៀតវិនិយោគិនក៏កំពុងឈានជើងចូលទៅទីនោះ ដើម្បីទិញដីទ្រង់ទ្រាយធំទុកវិនិយោគថែមទៀតផង។

ចំណែកលោក ឃាង ពុទ្ឋិ ប្រធានក្រុមហ៊ុន Sleukrith Realty ក៏មានប្រសាសន៍ទទួលស្គាល់ដែរថាតម្លៃដីនៅខេត្តកំពតឥឡូវកំពុងមានសម្ទុះកើនឡើងបណ្តើរៗហើយ ស្របពេលដែលរដ្ឋាភិបាលប្រកាសសាងសង់កំពង់ផែអន្តរជាតិទឹកជ្រៅ និងពង្រីកផ្លូវជាតិលេខ3 ពីភ្នំពេញទៅខេត្តកំពតកាលពីពេលថ្មីៗរួចមក។ លោកថា នៅពេលដែលហេដ្ឋារចនាសម្ព័ន្ធនេះសាងសង់រួច តម្លៃដីនៅទីនោះនឹងកាន់តែឡើងថ្លៃខ្ពស់ឡើងៗដូចគ្នានឹងខេត្តព្រះសីហនុដែរ ហើយដោយសារតែតម្លៃដីនៅខេត្តនោះឡើងថ្លៃខ្ពស់រួចទៅហើយ ដូច្នេះអ្នកវិនិយោគនឹងងាកមករកតំបន់ណាដែលមានទីតាំងភូមិសាស្ត្រប្រហាក់ប្រហែលគ្នា ពិសេសគឺខេត្តកំពតតែម្ដង ព្រោះមានទីតាំងជាប់មាត់សមុទ្រដូចនឹងខេត្តព្រះសីហនុដែរ។

យ៉ាងណាក៏ដោយ លោកបានបន្ថែមថា បើសិនជាអាជ្ញាធរខេត្តខិតខំពង្រឹងវិស័យទេសចរណ៍ ឱ្យកាន់តែប្រសើរឡើង ភ្ញៀ់វទេសចរនឹងងាកមកកម្សាន្តក្នុងខេត្តនេះច្រើនឡើងៗ ខណៈដែលទេសចរខេត្តព្រះសីហនុមានកាន់តែច្រើនឡើង ដែលពេលខ្លះអាចនឹងបង្កជាភាពរញ៉េរញ៉ៃ និងម្យ៉ាងទៀតតម្លៃស្នាក់នៅតាមផ្ទះសំណាក់ សណ្ឋាគារ និងម្ហូបអាហារក៏មានតម្លៃខ្ពស់ខ្លាំងដែរ “បើសិនជាទេសចរមកលេងទីនេះ(កំពត)កាន់តែច្រើន ជាធម្មតាវានឹងធ្វើឱ្យតម្លៃដីនៅទីនេះកាន់តែឡើងថ្លៃខ្លាំងឡើង ប៉ុន្តែយ៉ាងណាក៏ឡើងមិនដល់ខេត្តព្រះសីហនុដែរ។

លោកក៏បានអំពាវនាវទៅដល់ឈ្មួញក៏ដូចជាប្រជាពលរដ្ឋដែរថា ត្រូវធ្វើការពិចារណាឱ្យបានច្បាស់លាស់ មុននឹងសម្រេចចិត្តទិញដីគួរមើលពីទីតាំងភូមិសាស្ត្រ ពិនិត្យមើលឯកសារឱ្យបានច្បាស់លាស់ និងត្រឹមត្រូវតាមផ្លូវច្បាប់ ចៀសវាងហានិភ័យកើតឡើងក្រោយពេលទិញរួច។

គួរបញ្ជាក់ផងដែរថា ក្រុមហ៊ុនទ្រីភាពគ្រុប ក៏បានសហការជាមួយក្រុមហ៊ុនចិន គ្រោងសាងសង់កំពង់ផែទឹកជ្រៅថ្មីមួយទៀតនៅពេលឆាប់ៗខាងមុខ ដើម្បីសម្រួលដល់ការដឹកជញ្ជូនតាមនាវាសមុទ្រទឹកជ្រៅដែលអាចផ្ទុកទំនិញបានច្រើនពាន់តោនផងដែរ។

អគ្គនាយកក្រុមហ៊ុនទ្រីភាពគ្រុប លោកឧកញ៉ា ទ្រី ភាព បានថ្លែងក្នុងពិធីចុះហត្ថលេខាលើកិច្ចព្រមព្រៀងកិច្ចសហប្រតិបត្តិការស្តីពីកំពង់ផែខេត្តកំពត រវាងក្រុមហ៊ុនកំពង់ផែអន្តរជាតិនៃខេត្តគ័ងស៊ី ប្រទេសចិនថា ការបង្កើតកំពង់ផែនៅក្នុងខេត្តកំពត គឺមានគោលបំណងជំរុញវិស័យដឹកជញ្ជូនតាមផ្លូវទឹកឱ្យកាន់តែទូលាយឡើងក្នុងការធ្វើពាណិជ្ជកម្មរួមគ្នារវាងប្រទេសកម្ពុជា- ចិន ដែលជាផ្នែកមួយយ៉ាងសំខាន់ក្នុងការចូលរួមអភិវឌ្ឍវិស័យដឹកជញ្ជូន ជាពិសេសការចូលរួមចំណែកជំរុញកំណើនសេដ្ឋកិច្ចសង្គមផងដែរ ដែលធ្វើឱ្យខេត្តនោះមានសក្តានុពលសេដ្ឋកិច្ច និងធ្វើឱ្យតម្លៃដីនៅទីនោះកាន់តែឡើងខ្ពស់ដែរ។

ជាមួយគ្នានេះដែរ រដ្ឋាភិបាលក៏បានប្រកាសដែរថា គម្រោងពង្រីកផ្លូវជាតិលេខ3 ចាប់ពីរង្វង់មូលចោមចៅក្នុងភូមិសាស្ត្ររាជធានីភ្នំពេញឆ្ពោះទៅទីរួមខេត្តកំពតនឹងចាប់ផ្តើមសាងសង់នៅដើមខែឧសភាខាងមុខនេះ ក្រោមកម្ចីសម្បទាន 215លានដុល្លារពីប្រទេសចិនដើម្បីសម្រួលដល់ការតភ្ជាប់រវាងប្រទេសទាំងមូល។

គម្រោងនេះត្រូវបានបែងចែកជាពីរកំណាត់ គឺកំណាត់ផ្លូវចោមចៅ-បែកគូស និងកំណាត់ផ្លូវបែកគូស-កំពត ដែលផ្លូវចោមចៅ-បែកគូសនឹងសាងសង់ជាផ្លូវបួនគន្លង (2ទៅ 2មក) ដោយមានទទឹងសរុប 24.5 ម៉ែត្រ។ ចំណែកឯកំណាត់ផ្លូវពីបែកគូស-កំពតនឹងពង្រីកជាផ្លូវទទឹង 12 ម៉ែត្រ ប៉ុន្តែមានពីរគន្លង ដែលករណីនេះគេរំពឹងថា នៅពេលគម្រោងហេដ្ឋារចនាសម្ព័ន្ធផ្លូវថ្នល់ និងកំពង់ផែទឹកជ្រៅសាងសង់រួចរាល់ជាស្ថាពរ តម្លៃដីនៅខេត្តកំពតនឹងឡើងថ្លៃខ្ពស់ជាមិនខាន៕

May 2, 2018

លោក ម៉ៃ សុគន្ធ ទទូចឱ្យក្រសួងវប្បធម៌ និងវិចិត្រសិល្បៈ ក្រឡេកមើលលោកបណ្ឌិតច្នៃម៉ូដ ឯម រៀម

ខណៈមានមតិជាច្រើនបានលើកឡើងថា លោក ឯម រៀម កំពុងបំពុលសង្គម និងធ្វើឱ្យកូនខ្មែរមានការយល់ច្រឡំកាន់តែខ្លាំងពីរឿង «អប្សរាប្រុស»។ ទោះជាយ៉ាងណាក៏ដោយ ឆ្លើយតបនឹងការរិះគន់នេះ ភ្លាមៗរបស់លោក ឯម រៀម ដែលមាននាមថា បណ្ឌិតច្នៃម៉ូដ បានចេញមុខបកស្រាយថា សូមចែករំលែកដល់កូនខ្មែរ គួរដឹងថា ម្កុដអប្សរាពាក់បានទាំងបុរស ទាំងស្ត្រី ហើយអប្សរាក៏មាន 2ប្រភេទដែរ ដោយការមើលឃើញនៅតាមសសរពេជ្រនៃប្រាសាទបាយ័ន គឺមិនមានដើមទ្រូងធំៗដូចស្ត្រីទេ ថែមទាំងមានស្លៀកប៉ឹង ដោយមិនមានស្លៀកសំពត់ទៀតផង ដូច្នេះហើយ តាមការមើលឃើញ គឺអប្សរាមានទាំងបុរស មានទាំងស្ត្រី។

បើទោះជាមានការបកស្រាយដូច្នោះពិតមែន តែតារាចម្រៀងប្រុស ម៉ៃ សុគន្ធ បានប្រតិកម្មចំពោះការនិយាយរបស់បណ្ឌិតច្នៃម៉ូដថា «បកស្រាយលើកនេះ បណ្ឌិតម្នាក់នេះឆ្កួតហើយ អប្សរាមាន 2ភេទ? ហាហាហហា លោកបណ្ឌិតឆ្កួតបំពុលកូនខ្មែរ បោកគេទៀតហើយ លោកបណ្ឌិតស្រាវជ្រាវមកពីណា លោកបណ្ឌិតស្គាល់ប្រភេទចម្លាក់អស់ ចម្លាក់វាមាន3ប្រភេទ លោកយល់ច្រឡំលើចម្លាក់លិបហើយ អប្សរាគ្មានប្រុសទេ អប្សរាកើតចេញមកពីណា? ម៉េចបានជាចេញជាប្រុសកើត លោកបណ្ឌិតហើយលោកបណ្ឌិត (ណាមួយចម្លាក់ខ្លះរងសំណឹក និងបរិយាកាស ទើបមើលទៅឃើញបែបនោះ)»។ តើពិតដូចជាតារាប្រុសរូបនេះនិយាយដែរឬទេ ព្រោះថា ចាប់តាំងពីបានសិក្សាមក «អប្សរ ឬអប្សរា» គឺបានកើតចេញការកូរសមុទ្រទឹកដោះ ដែលមាននៅក្នុងរឿងព្រេងទេវកថា ក៏មានឆ្លាក់ជាប់នៅលើប្រាង្គប្រាសាទអង្គរវត្តដូចគ្នា ដូច្នោះហើយ តើអប្សរាប្រុសចេញមកពីអ្វីទៅវិញ?។

កាន់តែនិយាយត្រូវចិត្តមហាជនខ្លាំង លោក ម៉ៃ សុគន្ធ បានទទូចឱ្យក្រសួងវប្បធម៌ និងវិចិត្រសិល្បៈ មានចំណាត់ការចំពោះរឿងធំមួយនេះ លោកថា «សូមក្រសួងវប្បធម៌ ក្រឡេកមើលបណ្ឌិតម្នាក់នោះបកស្រាយផង គាត់ថា មានអប្សរាឈ្មោល អ៊ីចឹងអប្សរាឈ្មោលកើតពីពេលណា? កើតពីការកូរសមុទ្រទឹកលិង្គមែន??? បើអប្សរាស្រី កើតពីការកូរសមុទ្រទឹកដោះ ស៊ែរឱ្យគាត់បានភ្លឺខួរផង (អប្សរាគឺស្រីសួគ៌ រាំរបាំថ្វាយអស់ទេវតា និងព្រះឥន្រ្ទ អ៊ីចឹងអប្សរាឈ្មោលរាំថ្វាយព្រះឥន្រ្ទដែរមែន? ចម្លាក់ខ្មែរ ចែកជា 3ប្រភេទណា៎ Shareផង ឱ្យបណ្ឌិតមួយនេះឈប់ឆ្កួត និងវង្វេងវប្បធម៌ ហើយឈប់បំផ្លាញវប្បធម៌ខ្លួនឯង»។

នៅក្នុងវីដេអូរបស់តារាប្រុសរូបនេះ ក៏បាននិយាយរិះគន់ក្ឌាំងៗដូចគ្នា។ ចង់ដឹងថាបែបណាវិញនោះ សូមទស្សនាវីដេអូខាងក្រោមនេះ៖

May 2, 2018

កម្ពុជា-បង់ក្លាដែស៖ ពិនិត្យលក្ខខណ្ឌបំពេញបន្ថែម ដើម្បីឈានទៅនាំចេញអង្ករ 1លានតោន

ក្រសួងពាណិជ្ជកម្មកម្ពុជា និងក្រសួងពាណិជ្ជកម្មរបស់ប្រទេសបង់ក្លាដែស បានចាប់ផ្ដើមពិនិត្យឡើងវិញនូវលក្ខខណ្ឌបំពេញបន្ថែមមួយចំនួនទៀត ដើម្បីឈានទៅធ្វើការនាំអង្ករចេញចំនួន 1លានតោន ក្នុងរយៈពេល 5ឆ្នាំ និងផលិតផលកសិកម្មមួយចំនួនទៀតពីកម្ពុជាទៅកាន់ប្រទេសរបស់ខ្លួន។ នេះបើយោងតាមប្រសាសន៍របស់ឯកឧត្តម ប៉ាន សូរស័ក្ដិ រដ្ឋមន្ដ្រីក្រសួងពាណិជ្ជកម្មដែលបានថ្លែងក្នុងសិក្ខាសាលាស្ដីពីហិរញ្ញវត្ថុពាណិជ្ជកម្មអន្ដរជាតិ និងការអភិវឌ្ឍនៃចង្វាក់តម្លៃសកលរវាងកម្ពុជា និងបង់ក្លាដែស។

ឯកឧត្តមបានបញ្ជាក់ថា៖ ប្រទេសទាំងពីរបានចុះហត្ថលេខាលើការទិញ-លក់អង្ករពីកម្ពុជាចំនួន 1លានតោន កាលពីចុងឆ្នាំ2017 កន្លងមក ក្នុងរយៈពេល 5ឆ្នាំ និងការទិញផលិតផលដំឡូងមី និងផលិតផលមួយចំនួនទៀតពីកម្ពុជាហើយបង់ក្លាដែសក៏នឹងមកវិនិយោគលើម៉ាស៊ីនកិនស្រូវនៅក្នុងប្រទេសកម្ពុជាវិញផងដែរ។ ជាពិសេស ការពង្រឹងទំនាក់ទំនងនិងកិច្ចសហប្រតិបត្ដិការរវាងកម្ពុជា និងបង់ក្លាដែសគឺផ្ដល់នូវផលប្រយោជន៍ និងពិនិត្យលើសក្ដានុពលរបស់ប្រទេសទាំងពីរ ក្នុងការជួយគ្នាទៅវិញទៅមក ជាពិសេសកិច្ចសហប្រតិបត្តិការក្នុងតំបន់ និងក្នុងក្របខ័ណ្ឌប្រទេសអភិវឌ្ឍន៍តិចតួចដូចគ្នា។

ឯកឧត្តមរដ្ឋមន្ដ្រីបានបន្ដថា៖ រដ្ឋមន្ដ្រីក្រសួងពាណិជ្ជកម្មនៃប្រទេសទាំងពីរក៏នឹងជំរុញផងដែរឱ្យមានការហោះហើរត្រង់ពីបង់ក្លាដែសមកកម្ពុជា និងការចុះហត្ថលេខាបន្ថែមលើការធ្វើពាណិជ្ជកម្មសេរីរវាងប្រទេសទាំងពីរ ដើម្បីជំរុញទីផ្សារកម្ពុជា និងបង់ក្លាដែសឱ្យកាន់តែមានផលិតផលកើនឡើង និងឆ្លើយតបទៅនឹងតម្រូវការរបស់ប្រជាជននៃប្រទេសទាំងពីរ។

ឯកឧត្តមបានអះអាងថា ប្រទេសទាំងពីរ បាននិងកំពុងតែពិភាក្សាគ្នាក្នុងការពង្រីកឧស្សាហកម្មម្ហូបអាហារហាឡាល់ សម្រាប់នាំចេញពីកម្ពុជាទៅកាន់ប្រទេសបង់ក្លាដែស ហើយកម្ពុជាក៏អាចរៀនសូត្រពីបង់ក្លាដែសក្នុងការរៀបចំម្ហូបអាហារហាឡាល់ឱ្យមានស្ដង់ដារ ដើម្បីពង្រីកទីផ្សារនាំចេញទៅកាន់ប្រទេសផ្សេងៗទៀត។

ឯកឧត្ដម តូហ្វែល អាមេដ(Tofail Ahmed) រដ្ឋមន្ដ្រីក្រសួងពាណិជ្ជកម្មបង់ក្លាដែសបានបញ្ជាក់ថា ជំនួបពិភាក្សាទ្វេភាគីលើវិស័យពាណិជ្ជកម្ម និងការវិនិយោគដែលបានចុះអនុស្សរណៈយោគយល់គ្នារវាងប្រទេសទាំងពីរនឹងបង្កើនកិច្ចសហប្រតិបត្ដិការ ការវិនិយោគ និងពង្រីកទំហំពាណិជ្ជកម្មឱ្យកាន់តែល្អប្រសើរថែមទៀត។ ការចុះអនុស្សរណៈយោគយល់គ្នាជាមួយកម្ពុជាក្នុងការនាំអង្ករ 1លានតោនទៅកាន់ប្រទេសបង់ក្លាដែសកន្លងមកនេះ គឺពិតជាមានសារៈសំខាន់ណាស់ ដោយប្រទេសទាំងពីរត្រូវការពេលវេលាពិភាក្សា និងអនុម័តបន្ថែមទៀតដើម្បីឱ្យសម្រេចបានតាមផែនការនាពេលអនាគត។

លោក សុង សារ៉ន អគ្គនាយកក្រុមហ៊ុនអេមរុរ៉ាយស៍បានមានប្រសាសន៍អំពីវេទិកានេះថា៖ វេទិកានេះនឹងពិនិត្យឡើងវិញនូវលក្ខខណ្ឌបំពេញបន្ថែមមួយចំនួនទៀត ដើម្បីឈានទៅធ្វើការនាំអង្ករចេញ 1លានតោនពីកម្ពុជាទៅបង់ក្លាដែស ជាវេទិកាមួយក្នុងការជំរុញប្រព័ន្ធនាំស្រូវអង្ករចេញរបស់រាជរដ្ឋាភិបាលទៅកាន់បណ្តាប្រទេសមួយចំនួនលើពិភពលោក ពីព្រោះរដ្ឋាភិបាលមានគោលនយោបាយជំរុញការនាំចេញស្រូវ អង្ករ 1លានតោនទៅកាន់ប្រទេសមួយចំនួន រួមមានចិន ប្រទេសក្នុងសហគមន៍អឺរ៉ុប និងប្រទេសមួយចំនួនទៀត។

លោកបន្ថែមថា៖ ដោយគិតរួមទាំងប្រទេសបង់ក្លាដែសនេះផង ប្រហែលជាសម្រេចនូវគោលនយោបាយនេះ។ តែសម្រាប់យើងខ្ញុំជាស្ថាប័នឯកជនគ្រាន់តែមានជំហរគាំទ្រជាមួយរដ្ឋាភិបាលដែលអាចពង្រីកទីផ្សារបន្ថែមទៀតសម្រាប់វិស័យស្រូវអង្ករនេះប៉ុណ្ណោះ។

យោងតាមរបាយការណ៍របស់ក្រសួងពាណិជ្ជកម្មកម្ពុជាបានឱ្យដឹងថា កាលពីចុងឆ្នាំ2017 កន្លងទៅ កម្ពុជា និងបង់ក្លាដែសបានចុះអនុស្សរណៈនៃការយោគយល់គ្នាចំនួន9 និងកិច្ចព្រមព្រៀងស្ដីពីកិច្ចសហប្រតិបត្ដិការលើវិស័យពាណិជ្ជកម្ម ទេសចរណ៍ និងព័ត៌មានវិទ្យា។ ក្នុងឆ្នាំ2016 កន្លងទៅ ពាណិជ្ជកម្មទ្វេភាគីរវាងប្រទេសទាំងពីរ មានត្រឹមតែ5.57 លានដុល្លារអាមេរិកប៉ុណ្ណោះ៕

May 2, 2018

Category: សង្គម និងសេដ្ឋកិច្ច