សង្គម និងសេដ្ឋកិច្ច - La Reine Media

BYD សម្ពោធបើកការដ្ឋានសាងសង់រោងចក្រផលិតរថយន្តអគ្គិសនីនៅប្រទេសថៃ

កាលពីថ្ងៃទី 11 មីនា ក្រុមហ៊ុនផលិតរថយន្តល្បីឈ្មោះរបស់ចិន BYD បានសម្ពោធបើកការដ្ឋានសាងសង់រោងចក្រផលិតរថយន្តអគ្គិសនីដំបូងរបស់ខ្លួននៅប្រទេសថៃ ដែលនេះគឺជាសកម្មភាពថ្មីបំផុតរបស់ក្រុមហ៊ុនផលិតរថយន្តចិន ដើម្បីពង្រីកទីផ្សាររបស់ខ្លួននៅអាស៊ីអាគ្នេយ៍។

រោងចក្រដែលស្ថិតនៅក្នុងតំបន់របៀងសេដ្ឋកិច្ចភាគខាងកើតប្រទេស និងនៅក្នុងខេត្ត Rayong នេះ គ្រោងនឹងក្លាយជាមជ្ឈមណ្ឌលផលិត និងចែកចាយរថយន្តអគ្គិសនីសម្រាប់ប្រទេសថៃ និងបណ្ដាប្រទេសជិតខាង ក៏ដូចជាតំបន់អាស៊ីអាគ្នេយ៍ និងបណ្ដាតំបន់ដទៃទៀត។

គិតត្រឹមឆ្នាំ 2022 ក្រុមហ៊ុន BYD លក់រថយន្តអគ្គិសនីបានលើសពី 1.86 លានគ្រឿង កើន 208.6% បើធៀបនឹងឆ្នាំ 2021។

កាលពីឆ្នាំមុន BYD បាននាំ Atto 3 ដែលជារថយន្តអគ្គិសនីដ៏ពេញនិយមរបស់ខ្លួន ចូលទៅកាន់ទីផ្សារថៃ។ Liu Xueliang អគ្គនាយកផ្នែកលក់របស់ BYD ប្រចាំអាស៊ី-ប៉ាស៊ីហ្វ៊ិក បាននិយាយថា ការសម្រេចចិត្តនេះរបស់ BYD គឺដើម្បី «បំផ្ទុះ» ការប្រើប្រាស់នៅប្រទេសថៃ។ ក្នុងរយៈពេល 42 ថ្ងៃ បន្ទាប់ពីចាប់ផ្ដើមលក់ BYD ទទួលបានការបញ្ជាទិញរថយន្ត Atto 3 ចំនួន 10,000 គ្រឿង។

រោងចក្រថ្មីរបស់ BYD នៅប្រទេសថៃ គ្រោងនឹងចាប់ផ្ដើមការផលិតនៅឆ្នាំ 2024 ហើយអាចផលិតបាន 150,000 គ្រឿង/ឆ្នាំ។

រាជរដ្ឋាភិបាលថៃ កន្លងមកបានដាក់គោលដៅផលិតរថយន្តអគ្គិសនីឱ្យបាន 30% នៅក្នុងចំណោមរថយន្តដែលបានផលិតក្នុងប្រទេសនេះនៅត្រឹមឆ្នាំ 2030 ដើម្បីចូលរួមកាត់បន្ថយការបំភាយឧស្ម័នផ្ទះកញ្ចក់របស់ពិភពលោក៕

March 13, 2023

ក្លឹប PSG មានបញ្ហាហិរញ្ញវត្ថុ! អនាគតរបស់ Messi អាចប្រែប្រួលឆាប់ៗនេះ

ក្នុងស្ថានការណ៍ដែលកំពុងទទួលរងហានិភ័យនៃការពិន័យ ដោយសារការបំពានច្បាប់យុត្តិធម៌ផ្នែកហិរញ្ញវត្ថុ ក្លឹប PSG បានប្រាកដជានឹងធ្វើការសម្រេចចិត្តចុងក្រោយដ៏គួរឱ្យភ្ញាក់ផ្អើលទាក់ទងនឹងអនាគតរបស់ Lionel Messi។

យោងតាមប្រភពព័ត៌មាននៅប្រទេសបារាំងនាថ្មីៗនេះ ក្លឹប PSG កំពុងប្រឈមនឹងការពិន័យទាក់ទិននឹងបញ្ហាតុល្យភាពហិរញ្ញវត្ថុពី UEFA ដោយសារតែបញ្ហាមូលនិធិប្រាក់បៀវត្សរ៍របស់ពួកគេកំពុងរីកធំ។

បើសិនមិនអាចធ្វើឱ្យមានតុល្យភាពនៃខ្ទង់ប្រាក់ចំណូល-ចំណាយ ក៏ដូចជាការកែសម្រួលប្រព័ន្ធរកប្រាក់ចំណូលរបស់ក្រុមកីឡាករនោះទេ ក្លឹប PSG នឹងត្រូវបានហាមឃាត់ មិនឱ្យចូលរួមប្រកួតនៅពានរង្វាន់ Champions League ចាប់ពីរដូវកាល 2024/2025។

ក្នុងកាលៈទេសៈនោះ ទំព័រ L’Equipe ថ្មីៗនេះក៏បានបង្ហើបឱ្យដឹងថា PSG កំពុងត្រូវបង្ខំឱ្យមានការសម្រេចចិត្តសំខាន់មួយដែលគ្មាននរណាចង់ធ្វើ។ ជាក់ស្ដែង PSG ត្រូវបានគេយល់ថាបានផ្អាកការចរចាទាំងស្រុងជាមួយនឹង Messi ទាក់ទងនឹងកិច្ចសន្យាថ្មី។

កាលពីរដូវកាលឆ្នាំ 2021 El Pulga បានចាកចេញពី Barcelona និងបានទៅទាត់ឱ្យ PSG តាមទម្រង់ ទិញដូរដោយសេរី។ ប្រាក់ចំណូលរបស់ M10 ក៏បានឡើងជិតដល់មួយលានអឺរ៉ូ/សប្ដាហ៍។ ក៏ប៉ុន្តែ PSG ទំនងជាត្រូវបង្ខំចិត្តទុកឱ្យម្ចាស់ពានរង្វាន់បាល់មាសចំនួន 7 គ្រាប់នេះ ចាកចេញពីក្លឹប ក្រោយរដូវកាលបាល់ទាត់បានបញ្ចប់នាពេលដ៏ខ្លីខាងមុខ ដើម្បីធ្វើតាមគោលការណ៍របស់ UEFA។

កន្លងមក PSG តែងតែបង្ហាញថា ខ្លួនចង់ឱ្យ Messi បន្តទាត់នៅអឺរ៉ុប។ យ៉ាងណាក៏ដោយ ក្នុងកាលៈទេសៈបច្ចុប្បន្ន ក្រុមមេដឹកនាំរបស់ PSG យល់ថា ពួកគេនឹងជួបបញ្ហាអាក្រក់ បើសិនត្រូវចំណាយច្រើនសម្រាប់ការរក្សា Messi។ ចំណែក M10 ក៏ប្រាកដជានឹងមិនទទួលយកការកាត់បន្ថយប្រាក់បៀវត្សរ៍ដើម្បីបន្តឈរជើងនៅ Parc de Princes។ ដូច្នេះ ភាគរយនៃការចាកចេញពីក្លឹប PSG របស់ Messi មកដល់ពេលនេះគឺមានកម្រិតខ្ពស់៕

March 13, 2023

តារាសម្ដែងស្រីម៉ាឡេស៊ី ដណ្ដើមបានពានរង្វាន់តួឯកស្រីឆ្នើមបំផុតនៅ Oscar 2023

Michelle Yeoh បានក្លាយជាតារាសិល្បៈអាស៊ីដំបូងគេដែលបានឈ្នះពានរង្វាន់តួឯកស្រីឆ្នើមជាងគេនៅក្នុងព្រឹត្តិការណ៍ Oscar 2023។

ពិធីប្រគល់ពានរង្វាន់ Oscar លើកទី 95 ត្រូវបានធ្វើឡើងនាព្រឹកថ្ងៃទី 13 មីនា (ម៉ោងនៅកម្ពុជា) ក្នុងនោះ ខ្សែភាពយន្តរឿង «Everything everywhere all at once» បាននាំមុខគេក្នុងបញ្ជីចំណាត់ថ្នាក់ ដោយមាន 11 បេក្ខភាព។

ដោយការសម្ដែងបានយ៉ាងល្អនៅក្នុងខ្សែភាពយន្តខាងលើ Michelle Yeoh ក៏បានក្លាយជាអ្នកសិល្បដើមកំណើតអាស៊ីដំបូងគេដែលបានឈ្នះពានរង្វាន់ Oscar ស្ដីពីតារាស្រីសម្ដែងជាតួឯកឆ្នើមបំផុត។ Michelle Yeoh បានយកឈ្នះលើ Cate Blanchett នៅក្នុងការដណ្ដើមយកពានរង្វាន់នេះ។

នៅលើវេទិកា Michelle Yeoh រំភើបខ្លាំងរហូតដល់ហូរទឹកភ្នែក ពេលទទួលពានរង្វាន់ Oscar 2023 ដ៏មានតម្លៃនេះ។ Michelle Yeoh គឺជាតារាសម្ដែងស្រីអាស៊ីដំបូងគេ និងជាតារាសម្ដែងស្រីសញ្ជាតិម៉ាឡេស៊ីដំបូងគេដែលបានក្លាយជាបេក្ខភាពសម្រាប់តំណែងតួឯកស្រីឆ្នើមជាងគេនៅ Oscar។

ក្នុងខ្សែភាពយន្ត «Everthing everywhere all at once» Michelle Yeoh សម្ដែងជាតួអង្គជនអន្តោប្រវេសន៍ចិនមួយរូបឈ្មោះ Evelyn Wang ជាម្ចាស់ហាងបោកអ៊ុតសម្លៀកបំពាក់មួយកន្លែងដែលជួបបញ្ហាច្រើនក្នុងជីវភាព។ ក្នុងរឿងនេះ Ke Huy Quan សម្ដែងជាតួអង្គប្ដីដ៏ល្ងង់ខ្សោយរបស់ Evelyn Wang។ ពួកគេរួមដៃគ្នាអនុវត្តភារកិច្ចសង្គ្រោះ។

អ្នកស្រី Michelle Yeoh ក្នុងពិធីប្រគល់ពានរង្វាន់ Oscar 2023

មុននោះ ដោយសារសម្ដែងជាតួអង្គ Evelyn Wang តារាសម្ដែងជនជាតិម៉ាឡេស៊ីដើមកំណើតចិន Michelle Yeoh ក៏បានឈ្នះពានរង្វាន់តារាសម្ដែងស្រីឆ្នើមបំផុតនៅក្នុងពិធីប្រគល់ពានរង្វាន់របស់សមាគមតារាភាពយន្តអាម៉េរិក (SAG Awards) លើកទី 29 ផងដែរ។

https://www.youtube.com/watch?v=pPoYhwaZ9rg

អ្នកស្រី Michelle Yeoh សម្ដែងជាតួអង្គ Evelyn Wang ក្នុងភាពយន្តរឿង «Everthing everywhere all at once»

Michelle Yeoh កើតឆ្នាំ 1962 បានឈានជើងចូលក្នុងវិស័យសិល្បៈ បន្ទាប់ពីបានគ្រងមកុដបវរកញ្ញាឯកម៉ាឡេស៊ីឆ្នាំ 1983។ អ្នកស្រីធ្លាប់ចូលរួមសម្ដែងក្នុងខ្សែភាពយន្តល្បីៗរាប់សិបរឿង មានជាអាទិ៍ Police Story 3: Supercop, Holy Weapon, Yes, Madam ។ល។ អ្នកស្រី Michelle Yeoh ក៏នឹងមានវត្តមាននៅក្នុងរឿង Avatar 3, Avatar 4, Avatar 5។ល។

Michelle Yeoh ក្នុងរឿង «Tomorrow never dies»

Michelle Yeoh ចាប់ផ្ដើមល្បីឈ្មោះនៅសហរដ្ឋអាម៉េរិក បន្ទាប់ពីបានសម្ដែងជាតួអង្គ «Bond girl» ជាគូនឹង James Bond របស់ Pierce Brosnan ក្នុងរឿង «Tomorrow never dies» កាលពីឆ្នាំ 1997។ ខ្សែភាពយន្តបន្តបន្ទាប់មកទៀតក៏បានជួយឱ្យ Michelle Yeoh ល្បីឈ្មោះទូទាំងពិភពលោក។ អ្នកស្រីទទួលបានការគាំទ្រច្រើនក៏ព្រោះតែសមត្ថភាពក្នុងការប្រើប្រាស់ក្បាច់គុន៕

March 13, 2023

U-20 World Cup 2023 កំណត់បានក្រុមជម្រើសជាតិទាំង 24 ដែលត្រូវចូលរួមប្រកួត

វគ្គផ្ដាច់ព្រ័ត្ររបស់ U-20 World Cup 2023 កំណត់បានក្រុមទាំង 24 ដែលនឹងត្រូវចូលរួមប្រកួតដណ្ដើមពានរង្វាន់ជើងឯកលើកនេះ ក្នុងនោះមានទាំងតំណាងចំនួនបួនរបស់ទ្វីបអាស៊ីផងដែរ។

អាស៊ីគឺជាតំបន់ចុងក្រោយដែលបានរកឃើញបណ្ដាតំណាងរបស់ខ្លួនដែលត្រូវទៅចូលរួមវគ្គផ្ដាច់ព្រ័ត្ររបស់ U-20 World Cup 2023។ ដោយសារម្ចាស់ផ្ទះ U-20 ឥណ្ឌូណេស៊ីមិនអាចឡើងដល់វគ្គពាក់កណ្ដាលផ្ដាច់ព្រ័ត្រ តំបន់អាស៊ីក៏មានតែ 5 ក្រុមជម្រើសជាតិប៉ុណ្ណោះដែលនឹងត្រូវចូលរួម World Cup ក្នុងនោះមានបួនក្រុមដែលបានចូលដល់វគ្គពាក់កណ្ដាលផ្ដាច់ព្រ័ត្រ U-20 អាស៊ី 2023។

បួនក្រុមដែលជាតំណាងរបស់អាស៊ី ទៅចូលរួម World Cup លើកនេះ រួមមាន U-20 អ៊ីរ៉ាក់, អ៊ូសបេគីស្ថាន, កូរ៉េខាងត្បូង និងជប៉ុន បន្ទាប់ពីបានឈ្នះនៅវគ្គ 8 ក្រុមចុងក្រោយនាពេលថ្មីៗនេះ។ បួនក្រុមខាងលើនេះ រួមនឹង ឥណ្ឌូណេស៊ី (ព្រោះជាម្ចាស់ផ្ទះ) នឹងឡើងទៅប្រកួតនៅវគ្គផ្ដាច់ព្រ័ត្រ U-20 World Cup 2023 ដែលធ្វើឡើងក្នុងអំឡុងពេលពីខែឧសភា ដល់មិថុនាខាងមុខ។

ក្រុមបាល់ទាត់ជម្រើសជាតិអាយុក្រោម 20 ឆ្នាំ ទាំង 24 ក្រុម ដែលនឹងត្រូវឡើងទៅប្រកួតដណ្ដើមពានរង្វាន់ U-20 World Cup 2023

ទ្វីបអាស៊ី និងអឺរ៉ុប គឺជាតំបន់ដែលមានតំណាងច្រើនជាងគេចូលរួមប្រកួតនៅ U-20 World Cup 2023។ តំបន់អាម៉េរិកខាងត្បូងមានបួនក្រុមត្រូវចូលរួម គឺ U-20 ប្រេស៊ីល, កូឡុំប៊ី, អេក្វេទ័រ និង អ៊ុយរូហ្កាយ ខណៈដែលតំបន់អាម៉េរិកកណ្ដាល និងខាងជើងមានបួនក្រុមគឺ ដូមីនីក, ក្វាតេម៉ាឡា, ហុងឌូរ៉ាស និងសហរដ្ឋអាម៉េរិក។

តំបន់អឺរ៉ុបដែលមានប្រាំក្រុមត្រូវចូលរួម U-20 World Cup 2023 រួមមាន អង់គ្លេស, បារាំង, អ៊ីស្រាអែល, អ៊ីតាលី និង ស្លូវ៉ាគី។ ចំណែក U-20 អ៊ុយក្រែនដែលជាម្ចាស់ជើងឯក U-20 World Cup 2019 មិនអាចឆ្លងផុតវគ្គជម្រុះ។ នៅក្នុងវគ្គផ្ដាច់ព្រ័ត្រកាលពីបួនឆ្នាំមុន U-20 អ៊ុយក្រែន បានយកឈ្នះលើ U-20 កូរ៉េខាងត្បូង ក្នុងលទ្ធផល 3-1។

ទ្វីបអាហ្វ្រិកដែលមានបួនក្រុមត្រូវចូលរួមប្រកួតនៅ U-20 World Cup 2023 គឺ ហ្កំប៊ី, នីហ្សេរីយ៉ា, សេណេហ្គាល់ និង ទុយនីស៊ី។ វគ្គផ្ដាច់ព្រ័ត្របស់ U-20 World Cup 2023 នឹងធ្វើឡើងចាប់ពីថ្ងៃទី 20 ឧសភា ដល់ 11 មិថុនា ឆ្នាំ 2023 នៅប្រទេសឥណ្ឌូណេស៊ី។ ពិធីចាប់ឆ្នោតចែកពូលនឹងធ្វើឡើងនៅថ្ងៃទី 31 មីនា 2023 ក្នុងនោះ 24 ក្រុមត្រូវចែកជា 6 ពូល៕

March 13, 2023

ក្រុមហ៊ុនមេរបស់ Facebook បង្កើត «បណ្ដាញសង្គមថ្មី» ដើម្បីប្រជែងនឹង Twitter

Meta ដែលជាក្រុមហ៊ុនមេរបស់ Facebook កំពុងរៀបផែនការអភិវឌ្ឍបណ្ដាញសង្គមថ្មីមួយទៀតដែលផ្ដោតលើអត្ថបទ ក្នុងបំណងប្រកួតប្រជែងជាមួយ Twitter របស់មហាសេដ្ឋី Elon Musk។

«យើងកំពុងសិក្សាស្រាវជ្រាវបណ្ដាញសង្គមវិម្ឈការឯករាជ្យ ផ្ដោតទៅលើការចែករំលែកព័ត៌មានក្នុងទម្រង់អត្ថបទ។ យើងជឿថាមានឱកាសក្នុងការស្ថាបនាបរិស្ថានដោយឡែក អនុញ្ញាតឱ្យអ្នកនិពន្ធ និងបុគ្គលល្បីឈ្មោះបង្ហោះព័ត៌មានបានទាន់ពេល» អ្នកនាំពាក្យរបស់ Meta កាលពីថ្ងៃទី 10 មីនា និយាយដូច្នេះ។

គម្រោងដែលមានឈ្មោះកូដថា P92 នេះ ត្រូវបានអភិវឌ្ឍទៅជាកម្មវិធីទូរស័ព្ទ (App) ដាច់ដោយឡែក ប៉ុន្តែអ្នកប្រើប្រាស់អាចចូលប្រើដោយគណនី Instagram។ សកម្មភាពនេះនឹងជួយឱ្យ Meta ទាក់ទាញអ្នកប្រើប្រាស់មួយចំនួនពីបណ្ដាញសង្គម Twitter ជាក្រុមដែលចង់ចាកចោល ឬបានចាកចោលបណ្ដាញសង្គមរបស់ Elon Musk ដោយសារតែការកំណត់ថ្មីមួយចំនួន។

ប្រភពព័ត៌មាននានាបានឱ្យដឹងថា P92 ត្រូវបានគ្រប់គ្រងដោយនាយកប្រតិបត្តិរបស់ Instagram លោក Adam Mosseri។ នេះគឺជាផ្នែកមួយនៅក្នុងកិច្ចប្រឹងប្រែងរបស់ Meta ដើម្បីពង្រីកខ្លួនចេញពី Facebook, WhatsApp និង Instagram និងដើម្បីវាយលុកទីផ្សារដែលកំពុងគ្រប់គ្រងដោយ Twitter។

Facebook, Instagram និង Twitter គឺជាបណ្ដាញសង្គម។ ក៏ប៉ុន្តែ Facebook ត្រូវបានបង្កើតឡើងក្នុងគោលដៅជួយឱ្យមនុស្សតភ្ជាប់ទំនាក់ទំនងនឹងគ្នា ដោយមានបំពាក់មុខងារជាច្រើន មានជាអាទិ៍ មុខងារសរសេរ status, បង្ហោះរូបថត វីដេអូ និងលេងហ្កេមជាដើម។ ចំណែក Instagram វិញ គឺជាបណ្ដាញសង្គមចែករំលែករូបថត។ រីឯ Twitter ត្រូវបានអភិវឌ្ឍសម្រាប់ការបង្ហោះសារខ្លីៗ។

បច្ចុប្បន្ន មិនទាន់ដឹងច្បាស់ថា Meta ចាប់ផ្ដើមអភិវឌ្ឍគម្រោង P92 នៅពេលណា ហើយបានចាប់ផ្ដើមដំណើរការអភិវឌ្ឍហើយ ឬនៅ៕

March 11, 2023

ភាពយន្តដំបូងគេលើលោកដែលថតនៅទីអវកាស បញ្ចេញ Trailer ហើយ!

ក្រុមផលិតករភាពយន្តរបស់រុស្ស៊ី បានបញ្ចេញទិដ្ឋភាពដំបូងៗរបស់ភាពយន្តរឿង «The Challenge» ដែលជាភាពយន្តដំបូងគេត្រូវបានថតនៅក្នុងស្ថានីយអវកាសអន្តរជាតិ (ISS)។

Trailer នេះបង្ហាញទិដ្ឋភាព និងស្ថានការណ៍មួយចំនួនទាក់ទងនឹងលោកស្រីវេជ្ជបណ្ឌិត Zhenya (សម្ដែងដោយ Peresild)។ លោកស្រីទទួលភារកិច្ចក្នុងការវះកាត់បេះដូងឱ្យអ្នកអវកាសមួយរូប (សម្ដែងដោយ Oleg Novitskiy) នៅទីអវកាស ព្រោះអវកាសចរនេះមិនអាចត្រលប់មកកាន់ផែនដីដើម្បីទទួលការព្យាបាល។

យោងតាម CNN ភាពយន្ត «The Challenge» ដែលនឹងត្រូវចាក់បញ្ចាំងនៅរោងកុនក្នុងខែមេសាខាងមុខ ត្រូវបានផលិតដោយទីភ្នាក់ងារអវកាសរុស្ស៊ី Roscosmos សហការជាមួយស្ថានីយទូរទស្សន៍ Channel One និងផលិតកម្មភាពយន្ត Yellow, Black and White។

អ្នកដឹកនាំរឿង Klim Shipenko និងតារាសម្ដែង Yulia Peresild រួមនឹងអ្នកអវកាស Anton Shkaplerov បានជិះយានអវកាសហោះទៅកាន់ ISS កាលពីខែតុលា 2021 និងថតឈុតឆាកនានានៅលើរយៈកម្ពស់ 400 គីឡូម៉ែត្រធៀបនឹងផ្ទៃផែនដី និងចំណាយពេលអស់ 12 ថ្ងៃ។ ក្រោយមក យាន Soyuz MS-18 បានដឹកក្រុមអវកាសចរចុះមកកាន់តំបន់ដាច់ស្រយាលមួយនៅកាហ្សាក់ស្ថាន។ Peresild ធ្លាប់បាននិយាយថា នាងមិនអីទេ សុខភាពធម្មតា ប៉ុន្តែ «រាងកាយហាក់មិនទាន់សម្របខ្លួនបានល្អទៅនឹងអ្វីដែលកំពុងកើតឡើង»។

Trailer របស់ភាពយន្តរឿង «The Challenge»

ទីភ្នាក់ងារអវកាសរុស្ស៊ី បានឱ្យដឹងថា ការផលិតភាពយន្តនេះគឺក្នុងបំណងជួយឱ្យយុវវ័យចាប់អារម្មណ៍លើវិស័យអវកាសចរណ៍។

កន្លងមក ធ្លាប់មានវីដេអូខ្លីមួយចំនួនត្រូវបានថតក្នុង ISS ក៏ដូចជាភាពយន្តដែលមានបញ្ចូលទិដ្ឋភាពនៃទីអវកាស។ ក៏ប៉ុន្តែ «The Challenge» ត្រូវបានទទួលស្គាល់ថាជាភាពយន្តខ្នាតវែងដំបូងដែលថតនៅទីអវកាស។ «The Challenge» គឺជាគម្រោងភាពយន្តដំបូងគេដែលមានតារាសម្ដែង និងអ្នកដឹករឿងត្រូវបាននាំទៅថតនៅទីអវកាស។ នៅសហរដ្ឋអាម៉េរិក Tom Cruise បច្ចុប្បន្នក៏កំពុងថតឈុតឆាកសម្រាប់គម្រោងភាពយន្តមួយដែលស្រដៀងទៅនឹង «The Challenge» ដោយសហការជាមួយក្រុមហ៊ុន SpaceX របស់មហាសេដ្ឋី Elon Musk៕

March 11, 2023

U-20 ចិន «តស៊ូ» ជិត 10 ឆ្នាំ ទើបឆ្លងផុតវគ្គសន្សំពិន្ទុ និងឡើងដល់វគ្គ 8 ក្រុមចុងក្រោយនៅ U-20 អាស៊ី

ជាលើកដំបូងហើយក្រោយរយៈពេល 9 ឆ្នាំ ដែលក្រុមកីឡាបាល់ទាត់វ័យក្រោមម្ភៃឆ្នាំរបស់ចិន ដណ្ដើមបានជោគជ័យ ដោយឆ្លងផុតវគ្គសន្សំពិន្ទុ និងបានចូលដល់វគ្គជម្រុះផ្ទាល់ (knock-out) នៅពានរង្វាន់ជើងឯក U-20 អាស៊ី 2023 (2023 AFC U-20 Asian Cup)។

នៅក្នុងអត្ថបទដែលមានចំណងជើងថា «ឡើងដល់វគ្គ ¼ ហើយ! សម្រាប់បាល់ទាត់ចិន នេះគឺជាពន្លឺដ៏មានតម្លៃក្នុងរាត្រីងងឹត» នៅលើទំព័រ Sina របស់ចិន អ្នកនិពន្ធបានវាយតម្លៃអំពីក្រុមជម្រើសជាតិ U-20 ចិន និងផ្ដល់យោបល់ដើម្បីជួយឱ្យក្រុមនេះមានប្រៀបជាងគូប្រកួតនៅក្នុងវគ្គ 8 ក្រុមចុងក្រោយ។

«…ការណ៍ដែល U-20 ចិន ឡើងដល់វគ្គ ¼ គឺជារឿងដ៏គួរឱ្យត្រេកអរ។ ក្រោយអវត្តមានរយៈពេល 9 ឆ្នាំពេញ U-20 ចិន បានឆ្លងផុតវគ្គសន្សំពិន្ទុ ប៉ុន្តែ អ្នកគាំទ្រពុំមានការជឿជាក់នៅពេលធ្លាក់ទៅក្នុង «ពូលមរណៈ» (ពូលដែលមានក្រុមខ្លាំង) នៅបួនគូចុងក្រោយ»។

សារព័ត៌មាន Sina ក៏បានចង្អុលបង្ហាញកត្តាសំខាន់ដែលនឹងជួយឱ្យ U-20 ចិន ដោះស្រាយសម្ពាធនៅពេលប្រឈមនឹង U-20 កូរ៉េខាងត្បូង នៅក្នុងវគ្គ ¼។ Sina បានសរសេរលើកតម្កើងអ្នកចាំទី Li Hao ថា ក្នុងបីប្រកួតនៅវគ្គសន្សំពិន្ទុ អ្នកចាំទីរូបនេះបានជួយសង្គ្រោះក្រុមរបស់ខ្លួនបានជោគជ័យរហូតដល់ 22 លើក។

នៅក្នុងការប្រកួតបន្ទាប់ U-20 ចិននឹងត្រូវប្រឈមនឹងការវាយលុកខ្លាំងក្លាពី U-20 កូរ៉េខាងត្បូង ប៉ុន្តែពេលនោះ អ្នកចាំទី Li Hao នឹងមានតួនាទីច្រើននៅក្នុងការសម្រេចលើលទ្ធផលឈ្នះ-ចាញ់ នេះបើតាមទំព័រ Sina។

Sina បានបន្ថែមថា U-20 ចិន ត្រូវតែលេងឱ្យដូចទៅនឹងរបៀបដែលគ្រូបង្វឹកជនជាតិកូរ៉េខាងត្បូង Park Hang-seo ធ្លាប់ដឹកនាំកូនសិស្សលេងនៅអាស៊ី។ ប៉ុន្តែ បើសិនបញ្ចេញកម្លាំងសុទ្ធសាធដើម្បីប្រជែងជាមួយ U-20 កូរ៉េខាងត្បូង នោះមិនយូរមិនឆាប់ ភាពខុសគ្នាអំពីសមត្ថភាពផ្ទាល់ខ្លួនរវាងក្រុមទាំងពីរនឹងលេចឡើងយ៉ាងច្បាស់ ហើយពេលនោះ U-20 ចិន ប្រាកដជាចាញ់។

នៅក្នុងវគ្គបួនក្រុមចុងក្រោយរបស់ U-20 អាស៊ី 2023 នេះ រួមមាន អ៊ីរ៉ង់-អ៊ីរ៉ាក់, អ៊ុយបេគីស្ថាន-អូស្ត្រាលី, កូរ៉េខាងត្បូង-ចិន និង ជប៉ុន-ហ្ស៊កដានី ដែលគូទីមួយ និងទីពីរត្រូវប្រកួតនៅថ្ងៃទី 11 មីនា ចំណែកគូទីបី និងទីបួនត្រូវប្រកួតក្នុងថ្ងៃទី 12 មីនា 2023៕

March 11, 2023

«រថយន្តអគ្គិសនីបើកបរស្វ័យប្រវត្តតម្លៃទាប» របស់ Elon Musk ជិតបង្ហាញខ្លួន

Elon Musk បានឱ្យដឹងថា ម៉ូដែលរថយន្តអគ្គិសនីតម្លៃទាបដែលជិតបង្ហាញវត្តមានរបស់ Tesla នឹងបំពាក់បច្ចេកវិទ្យាបើកបរស្វ័យប្រវត្ត។

ក្រោយពីត្រូវបានមហាសេដ្ឋីអាម៉េរិកប្រកាសលើកដំបូងកាលពីឆ្នាំ 2020 Tesla ក៏បានអភិវឌ្ឍរថយន្តអគ្គិសនីតម្លៃទាប ហើយវាក៏ជិតត្រូវបានបង្ហាញខ្លួន ជាមួយនឹងតម្លៃប្រហែល 2.5 ម៉ឺនដុល្លារអាម៉េរិក។

ថ្មីៗនេះ លោក Musk បានរម្លឹកដល់រថយន្តអគ្គិសនីតម្លៃទាបបំពាក់បច្ចេកវិទ្យាបើកបរស្វ័យប្រវត្ត នៅក្នុងកិច្ចសម្ភាសមួយនៅសន្និសីទ Morgan Stanley។ លោក Musk ថា «មានគម្រោងលំអិតមួយដើម្បីផលិតរថយន្តអគ្គិសនីតូចជាង និងមានការចំណាយក្នុងការផលិតទាបជាងពាក់កណ្ដាលធៀបនឹង Model 3។ រថយន្តនោះនឹងបំពាក់បច្ចេកវិទ្យាបើកបរស្វ័យប្រវត្ត»។

រថយន្តអគ្គិសនីតម្លៃទាបបើកបរដោយស្វ័យប្រវត្តរបស់ Tesla នឹងមានតម្លៃប្រហែល 25,000 ដុល្លារអាម៉េរិក

ក្រោយមក លោក Musk បន្តនិយាយថា រថយន្តខាងលើនេះនឹងអាចបើកបរបានពី 50 ទៅ 60 ម៉ោង/សប្ដាហ៍ យូរជាងឆ្ងាយ បើធៀបនឹងពី 10 ទៅ 12 ម៉ោងរបស់រថយន្តអគ្គិសនីដឹកអ្នកដំណើរនាបច្ចុប្បន្ន៕

March 11, 2023

គម្រោងបង្កើតរោងចក្រកាត់ដេរសម្លៀកបំពាក់ថ្មីពីរកន្លែងនឹងបង្កើតការងារជិតបីពាន់កន្លែង

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានអនុញ្ញាតឱ្យក្រុមហ៊ុនវិនិយោគចំនួនពីរ បង្កើតរោងចក្រកាត់ដេរសម្លៀកបំពាក់ ដែលគ្រោងនឹងបង្កើតការងារថ្មីប្រមាណជាង 2,900 កន្លែង នៅភ្នំពេញ និងខេត្តកំពង់ស្ពឺ ដោយមានទុនសរុបប្រមាណ 10.2 លានដុល្លារអាម៉េរិក។

ក្រុមហ៊ុនវិនិយោគថ្មីទាំងនេះរួមមាន៖

ក្រុមហ៊ុន DUN TAI GARMENT (CAMBODIA) CO., LTD ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ 3 ភូមិព្រៃស្រួល ឃុំពោធិ៍អង្ក្រង ស្រុកបសេដ្ឋ ខេត្តកំពង់ស្ពឺ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 1,326 កន្លែង។

ក្រុមហ៊ុន PRECLO (CAMBODIA) CO., LTD ៖ គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 1,639 កន្លែង។

March 10, 2023

ចិនប្រគល់កប៉ាល់ដឹកកុងតឺន័រធំជាងទីលានបាល់ទាត់បួនដងដល់អតិថិជន

ប្រទេសចិនកាលពីម្សិលមិញបានប្រគល់កប៉ាល់ដឹកកុងតឺន័រខ្នាតយក្សថ្មីដល់ក្រុមហ៊ុនដឹកជញ្ជូននៅតំបន់សមុទ្រមេឌីទែរ៉ាណេ ដែលមានទីស្នាក់ការនៅប្រទេសស្វ៊ីស។

កប៉ាល់ដែលអាចផ្ទុកទំនិញបាន 24,116 TEU នេះ ត្រូវបានប្រគល់នៅសៀងហៃកាលពីថ្ងៃទី 09 មីនា 2023។ កប៉ាល់នេះមានឈ្មោះថា Mediterranean Tessa និងមានបណ្ដោយ 399.99 ម៉ែត្រ ខណៈផ្ទៃក្រឡានៃជាន់របស់វា ធំជាងបួនដងធៀបនឹងទីលានបាល់ទាត់ ហើយអាចដឹកទំនិញបាន 240,000 តោន។

កប៉ាល់ Mediterranean Tessa ត្រូវបានប្រគល់ឱ្យក្រុមហ៊ុនដឹកជញ្ជូនតំបន់សមុទ្រមេឌីទែរ៉ាណេ (MSC) ដែលមានទីស្នាក់ការនៅទីក្រុងហ្សឺណែវ ប្រទេសស្វ៊ីស។ Mediterranean Tessa គឺជាកប៉ាល់មួយក្នុងចំណោមកប៉ាល់ដឹកកុងតឺន័រធំជាងគេលើពិភពលោក។ កប៉ាល់នេះនឹងដឹកជញ្ជូនទំនិញទៅមករវាងទ្វីបអាស៊ី និងអឺរ៉ុប។

ទំព័រ CGTN របស់ចិន បានផ្សាយថា នេះគឺជាកប៉ាល់ដឹកកុងតឺន័រធំជាងគេលើពិភពលោក

កប៉ាល់ Mediterranean Tessa បំពាក់បច្ចេកវិទ្យាទំនើបៗចុងក្រោយ។ វាអាចកាត់បន្ថយការបំភាយឧស្ម័នកាបូនបានពីបីទៅបួនភាគរយ ដែលស្មើនឹង 6,000 តោន/ឆ្នាំ ហើយអាចដឹកទំនិញច្រើនប្រភេទ៕

March 10, 2023

Category: សង្គម និងសេដ្ឋកិច្ច