សង្គម និងសេដ្ឋកិច្ច - La Reine Media

តោះ! ទៅទស្សនាផ្ទះចម្លែក នៅក្នុងប្រទេសហូឡង់ទាំងអស់គ្នា

ស្ថាបត្យករនីមួយៗតែងតែរិះរកគំនិតប្លែកៗ ដើម្បីគូរប្លង់ស្ថាបត្យកម្មសំណង់អគារលំនៅឋាន ឬអគារពាណិជ្ជកម្មនានា ដែលជាការបន្សល់ទុកនូវស្នាដៃ ក៏ដូចជាការចងចាំសម្រាប់ប្រជាជនរបស់ខ្លួន។ ពេលនេះយើងសូមនាំមិត្តអ្នកអានទាំងអស់ទៅទស្សនា និងស្វែងយល់ពីសំណង់ស្ថាត្យកម្មលំនៅឋានថ្មីមួយកន្លែងដែលមានលក្ខណៈខុសប្លែកពីសំណង់លំនៅឋានទូទៅ ហើយវារឹតតែអស្ចារ្យបំផុត ខណៈដែលសំណង់លំនៅឋានដែលស្ថិតនៅប្រទេសហូឡង់ មានឈ្មោះថាផ្ទះ Cube House ឬហៅជាភាសាហូឡង់ថា Kubuswoningen ត្រូវបានទាក់ទាញភ្ញៀវទេសចរឱ្យទៅទស្សនាជាហូរហែ។

Cube House គឺជាផ្ទះដែលមានលក្ខណៈច្នៃប្រឌិត ត្រូវបានសាងសង់ឡើងនៅទីក្រុង Rotterdam និង Helmond ប្រទេសហូឡង់។ ផ្ទះនេះត្រូវបានរចនាដោយស្ថាបត្យករ លោក Piet Blom ដែលផ្អែកលើគំនិតនៃ “ការរស់នៅលើកដំបូងនៃទីប្រជុំជន” ខណៈដែលលំនៅឋាននៅក្នុងទីក្រុងដែលមានដង់ស៊ីតេខ្ពស់នេះ មានទំហំសមស្របទៅនឹងទំហំដី ដោយរាប់បញ្ចូលពីគោលបំណងចម្បងធំៗរបស់វា ដើម្បីបង្កើនប្រសិទ្ធភាពទំហំនៅខាងក្នុងលំនៅឋាន។

ការរចនារបស់វិចិត្រករនេះ គឺជាតំណាងឱ្យភូមិមួយនៅក្នុងទីក្រុង ដែលផ្ទះនីមួយៗតំណាងឱ្យដើមឈើមួយដើម និងផ្ទះទាំងអស់គ្នាគឺជាព្រៃ។ គំនិតនៃផ្ទះ Cube នៅជុំវិញពិភពលោក គឺត្រូវបានធ្វើឱ្យប្រសើរជាអចិន្ត្រៃយ៍ មានដូចជាទីធ្លាផ្ទះ ទាំងការបែងចែកបន្ទប់នៅខាងក្នុង។ ការសាងសង់សាកល្បងចំនួនបីដង ដោយលើកដំបូងនៅក្នុងឆ្នាំ1974 និងនៅឆ្នាំ1977 ដែលមានផ្ទះចំនួន18 ត្រូវបានសាងសង់នៅក្នុងទីក្រុង Helmond។ ផ្ទះជាច្រើនតម្រូវឱ្យសាងសង់ពីឈើ ប៉ុន្តែមិនត្រូវបានគេដឹងនោះទេ។ ផ្ទះនៅ Rotterdam ត្រូវបានគេរចនាឡើងក្នុងឆ្នាំ1977 ក្នុងផែនការ55 ដែលក្នុងនោះផ្ទះចំនួន39 ត្រូវបានសាងសង់។ ផ្ទះ Cube ស្ថិតនៅក្នុងទីក្រុង Helmond បានហ៊ុមព័ទ្ធដោយរោងមហោស្រពមួយឈ្មោះថា Theatre Speelhuis។

ប្រជាពលរដ្ឋដែលរស់នៅក្នុងផ្ទះនេះ ត្រូវបានរំខានជាញឹកញាប់ដោយសារអ្នកធ្វើដំណើរឆ្លងកាត់ចង់ដឹង ចង់ឃើញ។ ម្ចាស់ផ្ទះម្នាក់បានសម្រេចចិត្តបើក “បង្ហាញផ្ទះគំរូ” ដើម្បីទាក់ទាញ និងផ្តល់ឱកាសឱ្យភ្ញៀវទេសចរមកចូលលេងកម្សាន្ត និងរស់នៅ។ ផ្ទះនេះមានបីជាន់រួមមាន ជាន់ទី1មានបន្ទប់ទទួលភ្ញៀវ និងផ្ទះបាយ ជាន់ទី2 មានបន្ទប់គេងពីរ និងបន្ទប់ទឹក និងជាន់ទី3 ខាងលើបង្អស់ត្រូវបានប្រើជាសួនច្បារតូចមួយ។

ជញ្ជាំង និងបង្អួចនៃផ្ទះនេះ ត្រូវបានគេធ្វើឱ្យមានរូបរាងកោងក្នុងកម្រិត54,7ដឺក្រេ។ ផ្ទៃដីសរុបនៃផ្ទះទាំងមូលមានទំហំប្រហែល100ម៉ែត្រការ៉េ។ នៅឆ្នាំ2006 សារមន្ទីរមួយត្រូវបានបើកនៅក្រោមផ្ទះនោះ ហើយនៅឆ្នាំ2009 ផ្ទះធំៗ ត្រូវបានបំលែងទៅជាសណ្ឋាគារ ហើយក្រោយមកត្រូវបានគ្រប់គ្រងដោយក្រុមហ៊ុនសណ្ឋាគារ Stayokay របស់ប្រទេសហូឡង់៕

May 7, 2018

តោះ! ជិះរថយន្ដ Sky Bike ទស្សនាសម្រស់ទឹកសមុទ្រនាពេលថ្ងៃលិច

យើងជឿថាអ្នកដែលធ្លាប់ធ្វើដំណើរកម្សាន្ដទៅប្រទេសកូរ៉េខាងត្បូង គឺធ្លាប់បានប្រទះឃើញរថយន្ដ Sky Bike ដែលជាប្រភេទយានយន្ដតូចមួយស្រដៀងទៅនឹងរថភ្លើង ហើយជិះកម្សាន្ដអារម្មណ៍លេងនាពេលរសៀលថ្ងៃរៀបលិច គយគន់មើលរលកទឹកសមុទ្រភ្លេកៗប្រដេញគ្នាយ៉ាងសប្បាយក្អាកក្អាយ។ នៅក្នុងអំឡុងពេលរដូវស្លឹកឈើជ្រុះស្លឹកឈើតែងប្ដូរពណ៌យ៉ាងស្រស់ស្អាត គេសង្កេតឃើញមានភ្ញៀវទេសចរជាតិ និងអន្ដរជាតិជាច្រើននិយមជិះលេងកម្សាន្ដ ហើយបានពោលពាក្យសរសើរពីសម្រស់ទេសភាពនៅទីនោះថា ពិតជាស្រស់ស្អាតខ្លាំងណាស់ ប្រៀបបីដូចជាកំពុងតែស្ថិតនៅក្នុងស្ថានសួគ៌ពិតៗ។

ជាទូទៅ មានគូស្នេហ៍ជាច្រើនគូតែងចូលចិត្តជិះរថយន្ដ Sky Bike នេះខ្លាំងណាស់ គឺពួកគេពិតជារំភើបចិត្តខ្លាំងណាស់ ខណៈដែលបានឃើញទេសភាពជុំវិញខ្លួនដែលមានសភាពស្រស់ត្រកាលបែបនេះ។ សូមណែនាំអំពី Daecheon Sky Bike ឬមានឈ្មោះម្យ៉ាងទៀតថា Boryung Sky Bike គឺជាប្រភេទយានយន្ដផលិតថ្មី ដែលមានរូបរាងលក្ខណៈស្រដៀងទៅនឹងរថភ្លើង ដែលអ្នកអាចជិះកម្សាន្ដតាមដងឆ្នេរសមុទ្របាន។ ថ្មីៗនេះ ប្រទេសកូរ៉េខាងត្បូងមានគម្រោងរៀបចំកម្មវិធីដ៏ធំមួយ ដើម្បីអបអរនូវការគាំទ្ររថយន្ដ Sky Bike ថ្មីសន្លាងនោះគឺ Boryeong Mud Festival និងគ្រោងធ្វើឡើងជារៀងរាល់ឆ្នាំ នៅក្នុងខេត្តសុងឆង។ សូមជម្រាបបន្ថែមថា រថយន្ដ Sky Bike អាចជិះកម្សាន្ដបានត្រឹមតែមនុស្ស2ទៅ3នាក់តែប៉ុណ្ណោះព្រោះវាមានទំហំតូច និងអាចធ្វើឱ្យលោកអ្នកស្លុងអារម្មណ៍ជាមួយនឹងទឹកសមុទ្របានយ៉ាងល្អ។

ចំពោះតារាងតម្លៃសំបុត្រសម្រាប់មនុស្សពេញវ័យមានដូចជា ៖
• 2នាក់ /រថយន្ត : 22,000វ៉ុន
• 3នាក់ /រថយន្ដ : 26,000វ៉ុន
• 4នាក់ /រថយន្ត : 30,000វ៉ុន

សម្រាប់សំបុត្រកុមារដែលមានកម្ពស់មិនលើសពី120 CM គឺ ៖
• ក្មេង2នាក់ /រថយន្ដ : 24,000វ៉ុន
• ក្មេងម្នាក់ និងមនុស្សពេញវ័យ2នាក់ ទាំងអស់3នាក់ /រថយន្ដ : 28,000វ៉ុន
• កុមារ2នាក់មនុស្សពេញវ័យ /រថយន្ត : 26,000វ៉ុន
ការធ្វើដំណើរមកកាន់កន្លែងកម្សាន្ដមួយនេះមាន4គោលដៅគឺ៖

1. ជិះឡានក្រុងនៅស្ថានីយរថយន្តក្រុង Express Bus ទៅកាន់ស្ថានីយចំណតរថយន្តក្រុង Boryeong ហើយបន្ទាប់ឡើងឡានក្រុងលេខ100 ឬ101។ ចំណាយពេលជិះឡានក្រុងប្រហែល30នាទី ពី Fountain Plaza ទៅកាន់ Busan Junction ប្រហែល300ម៉ែត្របន្ថែមទៀត។

2. ជិះរថភ្លើងក្រោមដីទៅស្ថានីយ៍យ៉ុងសាន ដោយឡើងរថភ្លើងទៅសេមូល និង មូកាំងវ៉ា។

3. ចំពោះគោលដៅ KTX (ប្រព័ន្ធផ្លូវដែកល្បឿនលឿនបំផុត)គឺត្រូវជិះពីស្ថានីយ៍ Yongsan សូមទៅកាន់ស្ថានីយ៍ Cheonan Asan រួចផ្លាស់ទិសដៅទៅកាន់ស្ថានីយ៍ Daecheon។ ចំណាយពេលប្រហែលជា30នាទី បន្ទាប់មកដើរ300ម៉ែត្រមកឡើងរថយន្ដក្រុងលេខ100 ឬ101 ដើម្បីធ្វើដំណើរទៅបន្ដទីប្រជុំជនឌេហ្សូន ទាំងអស់ឆ្លងកាត់ស្លាកសញ្ញាទាំង6។

4. បើឡើងពីស្ថានីយចំណតរថយន្ដក្រុង Daejeon Seobu intercity bus terminal ចូរជិះរថយន្ដក្រុងទៅកាន់ផ្លូវ Boryeong Promenade បន្ទាប់មកជិះរថយន្ត Daecheon លេខ100 ឬ101៕

May 7, 2018

បើកប្រវត្តិមហាវិហារ Saint Basil ភាពស្រស់ស្អាតដែលត្រូវដូរដោះដោយកែវភ្នែករបស់ស្ថាបត្យករ

បើកប្រវត្តិសាស្ត្រមហាវិហារ សេនត៍ បាហ្ស៊ីលនៃប្រទេសរុស្ស៊ី ដែលត្រូវចេញម៉ូដសាងឡើងយ៉ាងស្រស់ស្អាតល្អវិចិត្ររហូតដល់ក្រុមស្ថាបនិកត្រូវបញ្ជាឱ្យខ្វេះគ្រាប់ភ្នែកចេញ ដើម្បីឱ្យទីកន្លែងផ្សេងទៀតមិនអាចប្រៀបស្មើបាន។

បើកប្រវត្តិរឿងរ៉ាវរបស់មហាវិហារ សេនត៍ បាហ្ស៊ីល(Saint Basil’s Cathedral) មួយក្នុងចំណោមមហាវិហារល្បីឈ្មោះលំដាប់ពិភពលោក ដោយភាពចម្រុះពណ៌ និងរូបរាងដែលស្អាតចម្លែកភ្នែកមិនដូចវិហារផ្សេងទៀត។ ស្ថិតនៅលើបរិវេណទីលានក្រហមក្នុងទីក្រុងមូស្គូប្រទេសរុស្ស៊ី វិហារមួយនេះមានបញ្ជាឱ្យសាងសង់ឡើងក្នុងយុគសម័យរបស់ស្ដេច ត្យាអ៊ីវ៉ាន ទី4 នៃរុស្ស៊ី ឬមានរហស្សនាមថា “ត្យាអ៊ីវ៉ានកំពូលឃោរឃៅ” ដើម្បីជប់លៀងឆ្លងជ័យជម្នះលើកងកម្លាំងម៉ុងហ្គោលីនៅទីក្រុងខាសាន ក្នុងគ្រិស្តសករាជ 1552 តែមហាវិហារមួយនេះចាប់ផ្ដើមសាងសង់នៅឆ្នាំ1555។

វិហារមួយនេះត្រូវបានសាងឡើងចែកជារូបអគារដូម(Dome) 9ចំណែក ស្ថិតនៅជុំវិញដូមទី9 ដែលជាមណ្ឌលកណ្ដាល មានលក្ខណៈជាអគារដូមរូបរាងមើមខ្ទឹមបារាំងដែលមានពណ៌ចម្រុះក្បូរក្បាច់ដែលស្មុគស្មាញខុសប្លែកពីគ្នា។ ទិដ្ឋភាពរួមរបស់វិហារមានលក្ខណៈជារូបស្រដៀងទៀនដែលមានអណ្ដាតភ្លើងចាំងជះពន្លឺនៅចុងកំពូល។ យ៉ាងណាក៏ដោយ កាលពីដំបូង តួអគារប៉មផ្នែកខាងក្រៅជាថ្មពណ៌ស និងកំពូលដូមគ្មានពណ៌ចម្រុះបែបនេះទេ រហូតដល់មានការជួសជុលឡើងវិញ និងតុបតែងបន្ថែមនៅក្រោយសតវត្សរ៍ទី17។ ក្រៅពីនេះ ទោះជាមើលពីលក្ខណៈខាងក្រៅវិហារទៅឃើញរាងធំទូលាយមែន តែខាងក្នុងវិញហាក់ដូចជាតូច និងចង្អៀតបន្តិច។

ស្ថាបនិកអ្នកគូរម៉ូដព្រះវិហារមួយនេះមានឈ្មោះថា ផូស្ត៍និក យ៉ាខូវលេហ្វ( Postnik Yakovlev) តែយ៉ាងណាក៏ដោយ គ្មាននរណាដឹងពីមូលហេតុពិតប្រាកដថា ក្រោយពីគូរម៉ូដវិហារមួយនេះហើយ មូលហេតុអីបានជារូបគាត់ពិការភ្នែកមើលអ្វីលែងឃើញនោះឡើយ? មានត្រឹមតែរឿងតំណាលតៗគ្នាដោយអ្នកស្រុកដែលថា គាត់ត្រូវស្ដេច ត្យាអីុវា៉ន មហាឃោរឃៅបញ្ជាឱ្យគេខ្វេះគ្រាប់ភ្នែកគាត់ចោល ដើម្បីឱ្យគាត់មិនអាចទៅគូរម៉ូដទីកន្លែងផ្សេងឱ្យស្រស់ស្អាតវិចិត្រដូចទីនេះបានទៀត។

សម្រាប់ឈ្មោះរបស់ព្រះវិហារមួយនេះ ពីដើមមានឈ្មោះថា មហាវិហារនៃការអធិដ្ឋានរបស់ព្រះមាតាម៉ារី (Cathedral of the Intercession of the Virgin) មុននឹងត្រូវបានហៅឈ្មោះតាមបព្វជិត សេនត៍ បាហ្ស៊ីល ឬពីដើមដែលមានឈ្មោះថា វ៉ាស៊ីលី ប្លា ហ្សេននី(Vasily Blazhenny) អ្នកដែលមានតួនាទីខ្លាំងចំពោះវប្បធម៌រុស្ស៊ីមកជាច្រើនសតវត្សរ៍ ដែលជាទីទទួលស្គាល់ថា មានទេពកោសល្យខាងការព្យាករទស្សន៍ទាយជោគជតា។ គាត់អាចទស្សន៍ទាយរឿងរ៉ាវនៃសេចក្ដីស្លាប់ និងហេតុការណ៍ផ្សេងៗដែលកើតឡើងក្នុងអតីតកាលបានយ៉ាងឆុតហើយថែមទាំងជាមនុស្សដ៏កម្រម្នាក់ដែលអាចនិយាយដាស់តឿនស្ដេច ត្យាអីុវ៉ាន កំពូលឃោរឃៅអំពីទង្វើរបស់ព្រះអង្គបាន។ ពេលគាត់ស្លាប់នៅថ្ងៃទី15 ខែសីហា ឆ្នាំ1557 សាកសពរបស់គាត់ត្រូវបានបញ្ចុះនៅជិតនឹងវិហារនោះក្នុងអំឡុងពេលកំពុងសាងសង់។ បន្ទាប់ពីនោះមកគាត់ក៏បានទទួលការលើកឋានៈឱ្យក្លាយជាបព្វជិត មានភាពស័ក្តិសិទ្ធិ ដោយមានមនុស្សម្នានាំគ្នាមកសូត្រមន្តនៅនឹងផ្នូរសពរបស់គាត់ រហូតក្លាយជាពាក្យស្លោកដែលថា “សូត្រមន្តភាវនានៅឯមហាវិហារ សេនត៍ បាហ្ស៊ីល” ទើបឈ្មោះរបស់មហាវិហារនេះក្លាយជាទីពេញនិយមខ្លាំងបំផុត។

មហាវិហារមួយនេះ រួចផុតពីមហន្តភ័យផ្សេងៗជាច្រើន ទាំងគ្រោះធម្មជាតិ ហេតុការណ៍អគ្គិភ័យ និងពីការត្រូវសត្រូវរុករានដោយនៅតែតាំងជ្រងោលើផ្ទៃដីកន្លែងនោះអស់រយៈពេលយូរជាង400ឆ្នាំមកហើយ។ បច្ចុប្បន្នមហាវិហារមួយនេះមិនមែនជាវិហារទៀតទេ តែបានក្លាយជាសារមន្ទីរដែលមានព័ត៌មានពាក់ព័ន្ធនឹងប្រវត្តិសាស្ត្ររបស់រុស្ស៊ី ដែលជាលែនដ៍ម៉ាកសំខាន់របស់ប្រទេសដែលបើកឱ្យភ្ញៀវទេសចរបានធ្វើដំណើរចូលទៅទស្សនានូវភាពស្រស់ស្អាតដ៏វិចិត្រទាំងនោះ៕

May 7, 2018

អាចទេ…ដែលលោក ព្រាប សុវត្ថិ ច្រៀងជាមួយ មាស សុខសោភា ជាការបើកឱកាសឱ្យនាងចូលហង្សមាស??

មិនចង់និយាយទេ តែបើនិយាយហើយ គឺទប់ចិត្តមិនបានតែម្ដង ព្រោះស្របពេលដែលកំពូលតារាចម្រៀងដ៏ល្បីល្បាញមួយដួង គឺលោកព្រាប សុវត្ថិ កំពូលតារាចម្រៀងបុរស ប្រចាំផលិតកម្មរស្មីហង្សមាស ដែលមានឈ្មោះល្បីល្បាញអស់រយៈពេល 20ឆ្នាំជាងមកហើយនោះ ងាកមកចាប់ដៃគូចម្រៀងជាមួយនឹងនាងមាស សុខសោភា ជាកំពូលតារាចម្រៀងប្រចាំផលិតកម្មថោន នៅក្នុងកម្មវិធីរៀបអាពាហ៍ពិពាហ៍មួយ។ អូហូ!!!! ពិតជាស័ក្ដិសមគ្នាឥតខ្ចោះតែម្ដង ទាំងបច្ចេកទេសការប្រើសំឡេងច្រៀង ការផ្ដោះផ្ដង កាយវិការស៊ីចង្វាក់គ្នា។ និយាយទៅ មិនឱ្យសរសើរ គឺមិនបានតែម្ដង(ហាស ហាស ហា!)។

ជាការពិតណាស់ប្រិយមិត្តរបស់សារព័ត៌មាន ឡារ៉ែន ជាទីគោរព! កំពូលតារាចម្រៀងទាំងពីរដួងពិតជាកម្រនឹងមានឱកាសសម្ដែង ឬបកស្រាយបទចម្រៀងរួមគ្នាជូនទស្សនិកជនបានទស្សនាណាស់ មិនថាតាមប៉ុស្តិ៍ទូរទស្សន៍ ឬក្នុងកម្មវិធីប្រគំតន្ត្រីធំៗ ឬសូម្បីតែកម្មវិធីប្រពៃណីក្នុងពិធីបុណ្យជាតិធំៗក៏ដោយ នោះក៏ព្រោះតែអ្នកទាំងពីរជ្រកក្រោមផលិតកម្មខុសគ្នា ដែលសុទ្ធសឹងតែជាផលិតកម្មធំនៅកម្ពុជា ទើបធ្វើឱ្យអ្នកទាំងពីរមមាញឹកនឹងការងាររៀងៗខ្លួន។ តែដោយឡែក ម្ចាស់កម្មវិធីអាពាហ៍ពិពាហ៍មួយនេះ បានអញ្ចើញឱ្យអ្នកទាំងពីរមកប៉ះគ្នានៅលើឆាក ដែលជាការទន្ទឹងរង់ចាំជាយូរមកហើយរបស់មហាជនអ្នកគាំទ្រ ធ្វើឱ្យការបញ្ចេញសមត្ថភាពច្រៀងរបស់អ្នកទាំងពីរ ក្លាយជាវេទិកាមួយអង្រួនដួងចិត្តយ៉ាងញាប់ញ័រ ព្រឺសម្បុរទៅតាមបទចម្រៀង ដែលមានចំណងជើងថា «ភ័ព្វសំណាង» ខណៈច្រៀងរួមគ្នា។

ពិតជាមិនធម្មតាមែន ហើយកាន់តែអស្ចារ្យខ្លាំងណាស់ ធ្វើឱ្យអ្នកគាំទ្រភ្ញាក់ផ្អើលស្ងើចសរសើរមិនដាច់ពីមាត់ចំពោះសំឡេងដ៏ក្រអួនក្រអៅរបស់អ្នកទាំងពីរដែលបានលើកយកចម្រៀងមរតកដើមមួយបទនេះមកច្រៀងរួមគ្នាលើឆាកតន្រ្តីអាពាហ៍ពិពាហ៍ ដោយសារមានការសំណូមពរពីកូនកំលោះក្រមុំ ឱ្យបង្ហើរទឹកដមសំនៀងរបស់កំពូលតារាចម្រៀងទាំងពីរដ៏សែនពីរោះ និងលន្លង់លន្លោច។ គួរជម្រាបផងដែរ ការចាប់ដៃគូរវាងកំពូលតារាចម្រៀងទាំងពីរនេះ ក៏បានធ្វើឱ្យកើតការសង្ស័យពីអ្នកគាំទ្រដែរថា តិចលោអ្នកនាង មាស សុខសោភា ទៅជួបគ្នាជាមួយលោក ព្រាប សុវត្ថិ ក្នុងពេលឆាប់ៗនេះទេដឹង? ឬមួយនេះជាការបើកទំព័រថ្មីក្នុងទ្រនំរួមគ្នាទេដឹង?។

នេះអាចជាតម្រុយមួយក៏ថាបានដែរ ព្រោះថា កន្លងមក សុខសោភាយើងក៏ធ្លាប់លេចឮព័ត៌មានថា នឹងចូលហង្សមាសជាច្រើនដងណាស់មកហើយ បើទោះនាងខំបដិសេធយ៉ាងណាក៏ដោយ។

ដើម្បីឱ្យកាន់តែជ្រាបច្បាស់បន្ថែមទៀត សូមទស្សនាវីដេអូខាងក្រោម៖

May 7, 2018

8 ហេតុផលដែលត្រូវគិតមុនរៀបការ

ខែកុម្ភៈ ខែនៃសេចក្ដីស្រឡាញ់បានកន្លងផុតទៅហើយ មានគូស្នេហ៍ជាច្រើនគូបានសម្រេចចិត្តត្រៀមរៀបចំពិធីមង្គលការនៅក្នុងថ្ងៃទី14 កុម្ភៈឆ្នាំក្រោយ តែការរៀបការមានបច្ច័យជាច្រើនដែលមិនមែនត្រឹមតែសេចក្ដីស្នេហា ឬសេចក្ដីស្រឡាញ់តែម្យ៉ាងនោះទេ គេអាចសង្កេតឃើញបានតាមរយៈបច្ចុប្បន្ននេះមានគូអាពាហ៍ពិពាហ៍ជាច្រើនគូដែលបានរៀបការនឹងគ្នាមិនទាន់បានប៉ុន្មានផង ក៏កើតមានបញ្ហាក្នុងគ្រួសាររហូតឈានទៅដល់ការលែងលះគ្នាវិញក៏មាន។

ព្រោះការរៀបការគឺគ្រាន់តែជាចំណុចចាប់ផ្ដើមនៃជីវិតគូប៉ុណ្ណោះ បន្តពីនេះទៅ ក្រៅពីសេចក្ដីស្រឡាញ់ហើយ ទាំងពីរនាក់ត្រូវប្រើហេតុផល និងការយល់ចិត្តគ្នា រួមជាមួយសេចក្ដីស្រឡាញ់ដើម្បីថែរក្សាជីវិតអាពាហ៍ពិពាហ៍ឱ្យបានស្ថិតស្ថេរគង់វង្សយូរអង្វែងរហូតដល់ចាស់ស្លាប់រៀងៗខ្លួន។ ដោយសារតែរឿងទាំងនេះហើយទើបថ្ងៃនេះឡារ៉ែនសូមលើកយក “8 ហេតុផលដែលត្រូវគិតមុនរៀបការ…” មកធ្វើជាចំណុចដាស់តឿនចិត្តទាំងខាងប្រុស និងខាងស្រីឱ្យបានត្រិះរិះគិត និងរំឭកពីអារម្មណ៍ឱ្យបានច្បាស់ដូចតទៅ៖

1. កុំរៀបការព្រោះតែ ខ្លាចមិនបានរៀបការ: គូគ្រងដែលអ្នកជ្រើសរើសដោយមិនបានពិចារណាយ៉ាងត្រឹមត្រូវអាចនឹងនាំឆ្ពោះទៅរកសេចក្ដីទុក្ខសោករហូត និងហុចផលអាក្រក់ដល់ជីវិតគូ ដូច្នេះចូរកុំឱ្យមនុស្សនៅជុំវិញខ្លួនមកមានឥទ្ធិពលលើការសម្រេចចិត្តរបស់អ្នកឱ្យសោះ។

2. កុំរៀបការ ព្រោះតែចង់រំដោះខ្លួនឯង: អ្នកខ្លះចង់រៀបការដោយសារតែចង់ចាកចេញពីក្រុមគ្រួសារ ឬសភាពជុំវិញខ្លួនដែលដដែលៗដើម្បីទៅរស់នៅក្នុងបែបបទថ្មីមួយរបស់ខ្លួនឯង។ តែអ្នកមិនអាចដឹងបានឡើយថា ការទៅរស់នៅក្នុងកន្លែងថ្មីដែលអ្នកមិនបានស្គាល់ច្បាស់លាស់គ្រប់គ្រាន់នោះ មិនដឹងថា ត្រូវប្រឈម ឬត្រូវជួបនឹងបញ្ហាអ្វីខ្លះឡើយ ដែលវាអាចនឹងជួបនឹងបញ្ហាច្រើនជាងដែលអ្នកធ្លាប់ជួបមកក៏អាចថាបានដែរ។

3. កុំរៀបការ ព្រោះតែកំពុងតែខកចិត្តនឹងស្នេហ៍ចាស់: ការរៀបការក្នុងអំឡុងពេលកំពុងជួបព្យុះស្នេហា ធ្វើឱ្យអ្នកមើលមិនឃើញដំណោះស្រាយ ឬធ្វើឱ្យយើងរៀបការគ្រាន់តែដើម្បីបញ្ចួសបន្សោកអតីតគូស្នេហ៍ប៉ុណ្ណោះ ដូច្នេះគួរពិចារណាឱ្យច្បាស់លាស់ថា តើអ្នករៀបការព្រោះតែសេចក្ដីស្រឡាញ់ ឬបញ្ចួសបន្សោកស្នេហ៍ចាស់?

4. កុំរៀបការ ព្រោះតែអាណិត: ការរៀបការគួរកើតចេញពីសេចក្ដីស្រឡាញ់ មិនមែនដោយសារការអាណិតឡើយ ព្រោះការអាណិតវាមិនស្ថិតស្ថេរ និងពិតប្រាកដដូចសេចក្ដីស្នេហាទេ។

5. កុំរៀបការ ព្រោះតែឈ្លក់វង្វេង: ភាពមានបាន លុយកាក់ប្រាក់កាសទ្រព្យសម្បត្តិច្រើន គ្រាន់តែជាសម្បកក្រៅប៉ុណ្ណោះ។ គួរសិក្សាពីគ្នាទៅវិញទៅមកឱ្យបានច្បាស់ជាមុនសិន ព្រោះការរៀបការ គឺជាបែបបទជីវិតថ្មីដែលកំពុងតែចាប់ផ្ដើមថ្មីឡើង។

6. កុំរៀបការ ព្រោះតែចង់រត់គេចចេញពីខ្លួនឯង: ការរៀបការដើម្បីនឹងបិទបាំង ឬចៀសគេចចេញពីទង្វើដែលមិនល្អរបស់ខ្លួនឯងនោះ មិនអាចជួយអ្វីបានឡើយ ព្រោះបើសិនជាអាទម្លាប់និស្ស័យដើមត្រឡប់មកវិញទៀត វានឹងមិនមែនជាផលល្អចំពោះជីវិតយ៉ាងពិតប្រាកដ។

7. កុំរៀបការ ព្រោះតែគិតថាអាចផ្លាស់ប្ដូរចរិតរបស់គូស្នេហ៍បាន: ចរិតនិស្ស័យគ្រឹះដើមរបស់មនុស្សម្នាក់នោះជារឿងដែលមិនងាយផ្លាស់ប្ដូរបានឡើយ។ ការយកជីវិតទៅដាក់ចូល ព្រោះត្រូវការឱ្យគូស្នេហ៍ផ្លាស់ប្ដូរអត្តចរិតនិស្ស័យដើមនោះ គឺជាការសម្រេចចិត្តដែលមិនត្រឹមត្រូវឡើយ។ គួរទទួលយក និងយល់ពីចរិតនិស្ស័យនោះវិញប្រសើរជាង ព្រោះបើមិនអាចចូលគ្នាចុះ ឬទទួលយកពីគ្នាមិនបាន ក៏គួរតែបែកផ្លូវគ្នាទៅតាមការគួរទៅ។

8. កុំរៀបការ ព្រោះតែក្ដីអផ្សុក: បើអ្នកចាត់ការក្ដីអផ្សុកខុសវិធី ជីវិតនឹងដើរទៅតាមផ្លូវដែលមិនត្រឹមត្រូវ មិនសមគួរមិនខាន ដូច្នេះការរៀបការដោយសារតែក្ដីអផ្សុកនេះអាចមិនបានកើតចេញពីសេចក្ដីស្រឡាញ់ និងការយល់ចិត្តដែលជាហេតុផលរបស់ការរៀបការឡើយ។ យ៉ាងណាក៏ដោយ ចុងក្រោយទៅ បើអ្នកគិតថា បានត្រៀមខ្លួនរួចរាល់ក្នុងការរស់នៅជាជីវិតគូហើយនោះ ដើម្បីធ្វើឱ្យជីវិតគូស្ថិតស្ថេរគង់វង្សតទៅ ពេលមានបញ្ហាទាស់ទែងគ្នា ចូរកុំភ្លេចនឹកដល់ “គន្លឹះសុភមង្គល 10 យ៉ាង” ក្នុងការគ្រប់គ្រងសេចក្ដីស្នេហ៍ឱ្យរលូនដែលមានដូចជាសរសើរតម្កើង អត់ទោស តស៊ូ យូរអង្វែង បត់បែនចែករំលែក ញែកឱ្យដាច់ ទប់ស្កាត់ ញញឹមញញែមចិត្តត្រជាក់។ ត្រឹមតែប៉ុនហ្នឹង ជីវិតគូក៏នឹងពេញទៅដោយសេចក្ដីស្រឡាញ់ និងសេចក្ដីសុខសុភមង្គល ឆ្ពោះទៅរកការក្លាយជាក្រុមគ្រួសារដែលល្អឥតខ្ចោះបានបាត់ទៅហើយ៕

May 7, 2018

អតីតបេក្ខនារីលេចធ្លោ «Cambodian Idol» សោភា ទេពី ស្រឡាំងកាំងពេលម្ដាយធ្វើរឿងនេះចំពោះនាង…

ហ៊ឺៗ!! ចង់ស្រក់ទឹកភ្នែក និងរំភើបចិត្តអ្វីម្ល៉េះទេ ខណៈកញ្ញា ញឹម សួនសោភាទេពី នៅពេលដែលពុកម៉ែបងប្អូនបានស្គាល់នាងច្បាស់ថា ជាបេក្ខនារីលេចធ្លោបំផុតនៅក្នុងកម្មវិធីប្រឡងចម្រៀងលំដាប់ថ្នាក់ពិភពលោក Cambodian Idol កន្លងទៅថ្មីៗនោះ ព្រោះពេលនាងកំពុងឈរច្រៀងអបអរភ្ញៀវនៅលើឆាកក្នុងហាងសុខៗ ស្រាប់តែសមាជិកក្រុមគ្រួសាររបស់នាងដែលមានម្ដាយ បងស្រី និងក្មួយៗនាំគ្នាដើរចូលទៅរកនាងទាំងកាន់នំ និងទៀន ឡើងទៅលើឆាកពញ្ញាក់អារម្មណ៍នាងឡើងស្រឡាំងកាំងដោយមិនបានដឹងខ្លួនមុន គិតស្មានតែជាខួបកំណើតរបស់ភ្ញៀវ។ មិនមែនតែប៉ុណ្ណឹងទេ នៅមានទៀត គឺតារាចម្រៀងកញ្ញា ញឹម សួនសោភាទេពី ហៅ សោភា ទេពី ទទួលបានកាដូរថយន្តទំនើបជាចំណងដៃពីលោកឪពុកថែមទៀតផង អ៊ឺម៍…រំភើបឥតឧបមា ហ៊ូៗ!!…(បេល! បេលឯងរំភើបចិត្ត ឬក៏ច្រណែនគេហ្នឹង?)។

សម្រាប់ឆ្នាំនេះសូម្បីតែសាមីខ្លួនផ្ទាល់ ស្ទើរតែពុំបានចាំពីថ្ងៃពិសេសរបស់ខ្លួននេះផង ដោយសារតែក្រោយពីបានចូលប្រឡងក្នុងកម្មវិធី The Cambodia Idol រដូវកាលទី3 រួចមក ការងារសិល្បៈរបស់នាងកាន់តែមមាញឹកខ្លាំងជាងមុន។ទោះយ៉ាងណាក្ដី កញ្ញា សោភា ទេពី ត្រូវគេមើលឃើញច្បាស់ពីអារម្មណ៍រំភើបឥតព្រាងទុក ខណៈនាងកំពុងឈរច្រៀងនៅលើឆាកក្នុងហាងសុខៗ បែរជាត្រូវចំហមាត់ស្រឡាំងកាំង ចង់គាំងបេះដូងបន្ដិច ចង់រកកលណែនបំពង់ក រកនិយាយមិនចេញបន្ដិច ក្ដុកក្ដួលខ្លាំងណាស់ រហូតដល់នាងស្រក់ទឹកភ្នែក អមដោយចម្រៀងសាទរថ្ងៃកំណើតរបស់ខ្លួន។

តារាចម្រៀងស្រីរូបនេះ បានផ្ដល់បទសម្ភាសជាមួយអ្នកសារព័ត៌មាន ឡារ៉ែន ក្រោយពេលទទួលនំខួបកំណើតហើយថា នាងពិតជាសប្បាយចិត្តខ្លាំងណាស់ ស្របពេលដែលកំពុងតែហត់នឿយផង នៅសុខៗក៏មានមនុស្សជាទីស្រឡាញ់បង្កបរិយាកាសភ្ញាក់ផ្អើលចំពោះនាងដូច្នេះ។ នាងមិននឹកស្មានថា ក្នុងថ្ងៃខួបកំណើតមានសមាជិកគ្រួសារសុខចិត្ដកាន់នំយកមកទាំងយប់មកដល់កន្លែងនាងច្រៀងបែបនេះឡើយ។

ទេពី និយាយដូច្នេះថា «រូបខ្ញុំស្ទើរតែភ្លេចថ្ងៃកំណើតខ្លួនឯងទៅហើយ ប៉ុន្ដែគ្រាន់តែឮបទចម្រៀងថ្ងៃកំណើតអមជាមួយការមកដល់របស់ម្ដាយ បងស្រី និងក្មួយៗដែលបានកាន់នំខួបដើរសំដៅមកខ្ញុំ ពេលនោះស្រាប់តែខ្ញុំរំភើបអួលដើមកស្ទើរតែទប់ទឹកភ្នែកមិនបានតែម្ដង»។ ថ្វីដ្បិតតែថ្ងៃខួបសម្រាប់ឆ្នាំនេះ មិនមានរៀបចំធំដុំ និងមិនមានកាដូរាប់ម៉ឺនដុល្លារដូចមុនមែន ប៉ុន្តែអនុស្សាវរីយ៍មួយនេះធ្វើឱ្យចងចាំមិនភ្លេចទេ។ នាងបន្ដថា «អ្វីដែលធ្វើឱ្យខ្ញុំរំភើបនោះ គឺមុនថ្ងៃកំណើត ខ្ញុំគិតថាចង់ញ៉ាំអីជុំគ្នាជាមួយគ្រួសារតែ បងស្រី និងម្ដាយសុទ្ធតែរវល់ម្នាក់ៗប្រាប់ថា រវល់ស្ទើរដកឃ្លាមិនបាន ស្រាប់តែកាន់នំមកឱ្យកាត់អ៊ីចឹង នរណាមិនរំភើប?»។ គ្មានអ្វីមានតម្លៃជាងបានគ្រួសារផ្ដល់នូវភាពកក់ក្ដៅបែបនេះទេ អ៊ីចឹងហើយទើបនាងស្រឡាំងកាំងផង សប្បាយចិត្តផង នៅពេលឃើញនំខួបរបស់ខ្លួន និម្មិតឡើងនៅចំពោះមុខទាំងមិនដឹងខ្លួន។

គួរបញ្ជាក់ថា សោភា ទេពី នាងគ្រោងបញ្ចេញបទចម្រៀងផ្ទាល់ខ្លួនក្នុងពេលឆាប់ៗផងដែរ បើទោះជាមិនទាន់មានតម្រុយចូលជ្រកនៅក្នុងផលិតកម្មណាមួយនៅឡើយក្ដី។ ស្រីស្រស់សាច់សខ្ចីរូបនេះថា ឆ្នាំនេះនាងមានវ័យ 16ឆ្នាំហើយ នាងនៅមានឱកាសតស៊ូសាងភាពល្បីល្បាញនៅក្នុងវីថីសិល្បៈបានយូរតទៅទៀត៕

https://www.youtube.com/watch?v=BW_kK_Lbi9I

May 7, 2018

នៅពេលកូនតូច ឈានចូលខែទី9

លក្ខណៈរបស់កូនតូច
កូនច្រើនតែគេងនៅពេលព្រឹក និងអំឡុងពេលរសៀល ក្នុងមួយពេលៗប្រមាណជា 1 – 2.5ម៉ោង តែក្មេងខ្លះអាចមិនគេងនៅពេលព្រឹកក៏មាន។ ក្មេងដែលភ្ញាក់នៅពេលកណ្ដាលយប់ហើយ នឹងពិបាកគេងលក់ទៅវិញ ហើយក្មេងដែលកំពុងបៅទឹកដោះគោស្រាប់ហើយ លុះដល់វ័យនេះ មានតិចនាក់ណាស់ដែលនៅតែមឹមទឹកដោះគោនៅពេលយប់នោះ តែបើសិនជាភ្ញាក់យំរំខាននៅពេលកណ្ដាលយប់ ពេលឱ្យបៅទឹកដោះគោហើយ ក៏នឹងគេងលក់ទៅវិញយ៉ាងងាយស្រួល ដូច្នេះអ្នកម្ដាយអាចឱ្យមឹមទឹកដោះគោពេលយប់តទៅទៀតខ្លះៗក៏បាន។ ចំណែករឿងការបន្ទោបង់របស់កូនវិញនោះនៅពេលកូនបានទទួលអាហារបន្ថែមច្រើនឡើងលាមកនឹងមានក្លិនកាន់តែស្អុយឡើង ឯពណ៌ក៏ប្រែប្រួលដែរ។ កូននឹងជុះមួយថ្ងៃ 1 – 2ដង ឬ2ថ្ងៃមួយដង សម្រាប់នោមវិញ នៅតែនោមប្រមាណមួយថ្ងៃ 10 ដងដដែល។ ចំនួនដងដែលនោមនៅពេលកណ្ដាលយប់នឹងខុសប្លែកពីគ្នា ក្មេងដែលញ៉ាំតិច នឹងនោមតិចដែរ ក្មេងខ្លះថែមទាំងមិននោមផងរហូតដល់ព្រឹក។ ក្មេងដែលញ៉ាំទឹកដោះគោ 1ដបមុនគេង ច្រើនតែនោមនៅពេលកណ្ដាលយប់ប្រហែល 1 – 2ដង និងក្មេងណាដែលគេងសើមខ្លួន នឹងភ្ញាក់ឡើងយំរំខាន តែពេលផ្លាស់ខោអាវ ឬកន្ទបឱ្យហើយ ក៏នៅតែមិនព្រមគេងលក់ទៅវិញនោះ អ្នកម្ដាយអាចបង្ខិតពេលឱ្យបៅទឹកដោះគោឱ្យឆាប់ជាងមុនបន្តិចក៏បាន និងមុនពេលដែលអ្នកម្ដាយចូលគេង គួរចាប់លើកកូនមកឱ្យនោមចេញបានម្ដង ក៏ជួយកាត់បន្ថយការភ្ញាក់យំរំខាននៅពេលកណ្ដាលយប់បានដែរ។

ល្មមឱ្យឈប់បៀបបាយបានហើយ
កាលពីអាយុមិនលើស 8ខែ កូននឹងចាប់ផ្ដើមលែងចូលចិត្តអាហារម៉ដ្ឋខ្ទេចៗហើយ ច្រើនតែចូលចិត្តញ៉ាំរបស់ដែលត្រូវទំពាដូចជា ផ្លែឈើត្រូវហាន់ចែកជាបំណែកតូចៗ ដូចជា ផ្លែត្របែកជម្ពូ ប៉ោម ស្វាយ និងឱ្យកាន់ខាំញ៉ាំខ្លួនឯង។ វ័យនេះមិនសូវនៅស្ងៀមទេ បើឱ្យអង្គុយនៅលើកម្រាលឥដ្ឋ ប្រហែលជាត្រូវរត់ដេញតាមបញ្ចុកអាហារហើយ ដូច្នេះគួរឱ្យអង្គុយនៅក្នុងតុបាយសម្រាប់កុមារ ឬក្នុងកៅអីហាត់ដើរ ចំណែកការបញ្ចុកឱ្យញ៉ាំបាយវិញ អាស្រ័យលើទម្លាប់ និងនិស្ស័យរបស់ក្មេង ក្មេងខ្លះចូលចិត្តញ៉ាំយឺតៗ ក្មេងខ្លះញ៉ាំលឿន តែបើសិនជាញ៉ាំយឺតជ្រុលពេក ដូចជាទម្រាំតែញ៉ាំអស់បបរមួយកូនចាន ត្រូវខាតពេលបញ្ចុកដល់ទៅជិតមួយម៉ោងនោះបញ្ជាក់ថា កូនតូចមិនចូលចិត្តអាហារនោះទេ នឹងបៀមក្នុងមាត់មិនព្រមលេប ព្រោះតែមានអារម្មណ៍ថាមិនឆ្ងាញ់ ដូច្នេះអ្នកម្ដាយមិនចាំបាច់ខាតពេលបញ្ចុកទៀតទេ គួរឱ្យកូនញ៉ាំអ្វីផ្សេងវិញប្រសើរជាង។

ជាក្មេងដែលរើសច្រើន
កូនក្នុងវ័យនេះ អ្នកម្ដាយនឹងមើលឃើញបានកាន់តែច្បាស់ឡើងហើយថា កូនចូលចិត្តញ៉ាំអ្វី? ក្មេងខ្លះមិនចូលចិត្តញ៉ាំបន្លែ អ្នកម្ដាយក៏គួរឱ្យញ៉ាំរួមជាមួយរបស់ដទៃទៀត ដូចជា ចិញ្ច្រាំបន្លែដាក់លាយនៅក្នុងបបរ ដាក់លាយនៅក្នុងស៊ុតក្រឡុកចៀនជាដើម ឬបើមិនចូលចិត្តញ៉ាំបន្លែប្រភេទណាមួយ ក៏ប្ដូរទៅញ៉ាំបន្លែប្រភេទផ្សេងទៀត។ បើមិនចូលចិត្តញ៉ាំបន្លែសោះ ក៏ឱ្យញ៉ាំផ្លែឈើជំនួសវិញក៏បាន បើកូនតូចនៅតែញ៉ាំបបរ នំប៉័ង ឬទឹកដោះគោបានដដែលនោះ។ទោះជាមិនសូវញ៉ាំ និងរើសច្រើនក្ដី ក៏មិនធ្វើឱ្យកូនខ្វះសារធាតុអាហារដែរ បើកូនមិនចូលចិត្តញ៉ាំស៊ុត ក៏ឱ្យញ៉ាំសាច់មាន់ជំនួសវិញ បើមិនចូល-ចិត្តញ៉ាំទាំងស៊ុត និងសាច់មាន់ ក៏ឱ្យញ៉ាំសាច់ត្រីជំនួសវិញ។ កូនដែលរើសអាហារ ច្រើនតែឆាប់ដឹងរសជាតិ បើប្រាកដក្នុងចិត្តថា កូនមិនបានញ៉ាំបានតិចរហូតដល់ថ្នាក់ខ្វះសារធាតុអាហារទេនោះ ក៏មិនគួរបង្ខំខ្លាំងពេកដែរ។

អាការដែលអាចកើតឡើង
** ប្រយ័ត្នហើមសួត
នៅពេលកូនមានអាការគ្រុនក្ដៅខ្លាំង នឹងពិបាកដកដង្ហើម ពេលក្អកច្រើនតែឈឺចាប់ តែបច្ចុប្បន្នកុមារលែងមានគ្រោះថ្នាក់ដោយសារជំងឺនេះហើយ បើបណ្ដាលមកពីមេរោគវីរុសនឹងច្រើនតែជាទៅវិញដោយឯកឯង ហើយគ្រូពេទ្យនឹងឱ្យញ៉ាំថ្នាំបដិបក្ខប្រាណ(Antibiotic)។ បើកូននៅញ៉ាំអាហារបាន ក៏ឱ្យញ៉ាំអាហារបន្ថែមតទៅទៀត ញ៉ាំទឹកផ្លែឈើស្រស់ឱ្យបានច្រើន បើក្អក ចូរលើកពឱ្យទ្រោបលើស្មា ហើយទះអង្អែលខ្នងថ្នមៗ នឹងជួយឱ្យស្លេស្មធ្លាក់ចេញមកស្រួលជាងដាក់ឱ្យគេងរាបនៅលើគ្រែ។ តែបើសិនជាកើតអាការគ្រុនក្ដៅខ្លាំងយូរថ្ងៃ និងហើមសួតដែលបណ្ដាលមកពីឆ្លងមេរោគផ្ដាសាយពីមនុស្សធំ ត្រូវតែនាំទៅមន្ទីរពេទ្យ។

**វិវឌ្ឍនាការរបស់កូន
• រាងកាយ
• ក្មេងខ្លះអាចវារឡើងកាំជណ្ដើរបានហើយ។
• ពេលវារ ដៃម្ខាងអាចកាន់របស់លេងបានទៀតផង។
• ក្មេងខ្លះអាចអង្គុយចុះពីឥរិយាបថឈរដោយខ្លួនឯងបានហើយ។
• ចេះអង្គុយមួយកន្លែងបានយូរហើយ។
• ចូលចិត្តទះដៃ យករបស់លេងគោះគ្នា និងបោះរបស់លេងទៅលើឥដ្ឋជាដើម។
• ចូលចិត្តយកម្រាមដៃលូកចូលរន្ធផ្សេង(ចំណុចនេះ ឪពុកម្ដាយត្រូវប្រយ័ត្ន ព្រោះកូនតូចអាចលូកចូលរន្ធព្រីភ្លើង)។

សង្គមជុំវិញខ្លួន
• ក្មេងខ្លះចេះនិយាយពាក្យដែលមានអត្ថន័យបានហើយ ដូចជា ម៉ស់ ញ៉ាំៗ និងចូលចិត្តនិយាយដដែល។
• ចេះធ្វើតាមបញ្ជាស្រួលៗបានហើយ ដូចជា ឱ្យទៅយករបស់លេងជាដើម។
• ខ្លាចមនុស្សដែលមិនធ្លាប់ស្គាល់មុខ និងពេលឃើញក្មេងដទៃយំ អាចនឹងយំតាម។
• ចេះរើសរបស់លេងដែលខ្លួនឯងចូលចិត្តបានហើយ។
• ចំណាំហ្គេមដែលខ្លួនឯងធ្លាប់លេងបានហើយ។

**ឧស្សាហ៍លេងជាមួយកូនផង
• បង្ហាត់ឱ្យកូនឈរ: ការបង្ហាត់ឱ្យចេះឈរ ឬឈានជើងដើរនេះ កូនអាចយកដៃចាប់ដៃម្ដាយ ឬម្ដាយជួយចាប់លើកឱ្យកូនឈានជើងដើរទៅខាងមុខ ក្នុងមួយថ្ងៃឱ្យបានមួយដង ឬ2ដង ម្ដងៗមិនគួរលើស5នាទី។ ពេលបង្ហាត់គួរបង្ហាត់នៅខាងក្រៅផ្ទះក្នុងអំឡុងពេលដែលធាតុអាកាសល្អត្រជាក់ស្រួល។ ឪពុកម្ដាយគួរតែសប្បាយរីករាយជាមួយនឹងការបង្ហាត់នេះ បើកូនល្មមអាចឈរដោយខ្លួនឯងបាន ចូរស្រែកលើកទឹកចិត្តកូនថា “ឈានជើងដើរកូន! ឈានជើងដើរកូន!” កូននឹងបានសប្បាយ មានកម្លាំងចិត្ត ដែលទោះជាដួល ក៏នឹងព្យាយាមក្រោកឡើងវិញបានដែរ៕

May 7, 2018

វិនិយោគិនជប៉ុនត្រៀមផ្តល់កម្ចីការប្រាក់ទាបជូនកសិករខ្មែរសម្រាប់វិស័យកសិកម្ម

ក្នុងគោលបំណងលើកកម្ពស់កម្រិតជីវភាពកសិករ និងលើកស្ទួយវិស័យកសិកម្មនៅកម្ពុជាឱ្យកាន់តែប្រសើរឡើង ក្រុមអ្នកវិនិយោគជប៉ុនគ្រោងនឹងបោះទុនវិនិយោគលើវិស័យហិរញ្ញវត្ថុ សម្រាប់ផ្តល់ជាកម្ចីក្នុងអត្រាការប្រាក់ទាបជូនដល់កសិករកម្ពុជា។

គម្រោងវិនិយោគលើវិស័យមីក្រូហិរញ្ញវត្ថុនេះត្រូវបានបង្ហើបឱ្យដឹងនៅក្នុងជំនួបរវាងថ្នាក់ដឹកនាំក្រសួងពាណិជ្ជកម្មកាលពីចុងសប្តាហ៍មុនជាមួយក្រុមអ្នកវិនិយោគក្រុមហ៊ុន Idemitsu Saison Microfinance ។

នៅក្នុងជំនួបនោះលោក Koichi Watanabe តំណាងរបស់ក្រុមហ៊ុន Idemitsu Saison Microfinance បានលើកឡើងអំពីប្រវត្តិ និងចក្ខុវិស័យរបស់ក្រុមហ៊ុនដែលផ្តោតសំខាន់លើការចូលរួមពង្រីកឥណទានសម្រាប់វិស័យកសិកម្មតាមរយៈសេវាកម្មផ្ដល់ប្រាក់កម្ចីរយៈពេលវែង និងការប្រាក់ទាបដល់កសិករផ្ទាល់ ឬដល់សហគមន៍ណាមួយក្រោមរូបភាពដាក់ទ្រព្យបញ្ចាំនិងមិនមានទ្រព្យបញ្ចាំ។

ជាកិច្ចឆ្លើយតបឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានថ្លែងស្វាគមន៍ចំពោះវត្តមានក្រុមហ៊ុនខាងលើដែលបានរួមចំណែកជួយដល់វិស័យកសិកម្ម និងកសិករកម្ពុជា។ ឯកឧត្តមរដ្ឋមន្ត្រីបានគូសបញ្ជាក់ថា ការពង្រីកឥណទានក្នុងវិស័យកសិកម្ម គឺជាកិច្ចការអាទិភាពមួយរបស់រាជរដ្ឋាភិបាល ហើយការវិនិយោគរបស់ក្រុមហ៊ុន Idemitsu Saison នឹងរួមចំណែកដោះស្រាយបញ្ហាដែលកសិករ និងម្ចាស់អាជីវកម្មខ្នាតតូចភាគច្រើនបានជួបប្រទះដោយសារតែឥណទានកសិកម្មមានសារៈសំខាន់ដល់ការពង្រីកមុខរបរ ក៏ដូចជាបង្កើនផលិតកម្មឱ្យស្របទៅនឹងតម្រូវការនៃទីផ្សារ។

ឯកឧត្តមរដ្ឋមន្ត្រី ក៏បានស្នើសុំឱ្យក្រុមហ៊ុន បន្តសហការឱ្យបានស្អិតល្មួតជាមួយប្រជាកសិករ សហគ្រាសធុនតូច និងមធ្យម និងសមាគមកសិកម្មមួយចំនួនថែមទៀតដូចជា ស្រូវ-អង្ករ ដំឡូងមី ម្រេច ពោត កៅស៊ូ ស្វាយ និងស្វាយចន្ទី-ល- ដោយសារតែផលិតផលទាំងអស់នោះ មានសក្ដានុពលខ្ពស់សម្រាប់អភិវឌ្ឍខ្សែចង្វាក់តម្លៃ ដើម្បីធ្វើពិពិធកម្មការនាំចេញទៅកាន់ទីផ្សារអន្តរជាតិ៕

May 7, 2018

អូហូ! ដេននី ក្វាន់ ទំនេរៗទិញពេជ្រពាក់លេង ហើយឆ្លៀតបង្ហាញដើមទ្រូងទៀត

ពិតជាគួរឱ្យច្រណែនណាស់លោកអ៊ើយ! ទាំងស្រស់ស្អាត ទាំងពូកែរកស៊ី និងនិយមបង្ហាញពីភាពហ៊ឺហាថែមទៀត។ មិនបាច់រៀបរាប់វែងឆ្ងាយទេ មានអ្នកណាទៀត? គឺតារាសម្ដែងស្រី ដេននី ក្វាន់ ហ្នឹងឯង។ កាលពីពេលថ្មីៗនេះ នាងបានសម្ញែងពីភាពហ៊ឺហាក្នុងជីវិតប្រចាំថ្ងៃរបស់ខ្លួននៅលើបណ្ដាញសង្គមហ្វេសប៊ុកទៀតហើយ។ ការខិតខំប្រឹងប្រែងរកស៊ី ពិតជាមានយីអ៊ុនឡើងមែន ព្រោះនាងបានបង្ហាញរូបភាពជាច្រើនសន្លឹក ព្រមទាំងបញ្ជាក់ថា «ទំនេរៗមិនដឹងធ្វើអី មកទិញពេជ្រពាក់លេង» ។ អ្វីដែលចាប់អារម្មណ៍ជាងនេះទៅទៀតនោះ គឺម៉ូដអាវចំហដើមទ្រូងធំៗដូចភ្នំព្រះសុមេរុ និងសាច់ពោះសខ្ចីល្វក់ដូចអន្លក់ទឹកគ្រឿង ឃើញហើយចាក់ដោតអារម្មណ៍សត្វលោក(ប្រុសៗ)ម្ល៉េះទេព្រះអ៊ើយ។

តារាសម្ដែងសិចស៊ី សាច់សខ្ចី កញ្ញា ដេននី ក្វាន់ មួយរយៈចុងក្រោយនេះ ហាក់បីដូចជាស្ងប់ស្ងាត់ ក្នុងវិស័យសិល្បៈ ដោយបង្វែរគោលដៅមកចាប់អាជីពក្នុងវិស័យជំនួញវិញម្ដង។ កន្លងមកតារាសាច់សខ្ចី ដេននី ក្វាន់ បានបង្ហោះរូបភាពជាច្រើនសន្លឹកនៅក្នុងបណ្ដាញហ្វេសប៊ុក សម្ញែងបង្អួតគ្រឿងអលង្ការជាច្រើនដូចជា ខ្សែក ចិញ្ចៀន ក្រវិល ដែលវត្ថុធាតុដើមសុទ្ធសឹងតែធ្វើអំពីមាស ព្រមទាំងប្រាក់ដុល្លារទាំងខ្ទាស់ៗ ធ្វើឱ្យមហាជនកោតសរសើរយ៉ាងខ្លាំង ចំពោះសមត្ថភាពរបស់នាង ដោយសារមិនទាន់រៀបការផង តែអាចសន្សំលុយបានច្រើនបែបនេះទៅហើយ។

គួររំឭកផងដែរថា ស្រីស្រស់ ដេននីក្វាន់ ធ្លាប់សម្ញែងក្រដាសប្រាក់ដុល្លារទាំងខ្ទាស់ៗ ហើយថា «ក្តីស្រមៃតូចៗរបស់ខ្ញុំ បានដូចបំណងហើយ នៅឡើយតែក្តីស្រមៃធំៗ សង្ឃឹមថានឹងបាននាពេលឆាប់ៗនេះ សំខាន់វាស្ថិតលើការតស៊ូរបស់ខ្ញុំ ខ្ញុំជឿជាក់លើសមត្ថភាពរបស់ខ្ញុំ»។ ជាមួយគ្នានឹងភាពជោគជ័យរបស់កញ្ញា មានទស្សនិកជនមិនតិចទេដែលនាំគ្នាសរសើរថា នាងគឺជាស្ដ្រីម្នាក់មានការតស៊ូក្នុងជីវិត ចេះទុកដាក់លុយកាក់ត្រឹមត្រូវបានល្អ មានសមត្ថភាពរកចំណូលបានទាំងនៅក្មេង ហើយអាចសន្សំប្រាក់រហូតសម្រេចក្ដីបំណងបាន ដោយមិនបានពឹងផ្អែកលើសមត្ថភាពបុរសឡើយ៕

May 7, 2018

គន្លឹះល្អៗក្នុងការអភិវឌ្ឍសតិបញ្ញាកូនឱ្យធំធាត់សមនឹងវ័យ

ចាប់ផ្ដើមពីវ័យកើតដំបូង រហូតចូលដល់បឋមវ័យ(6 ឆ្នាំដំបូង) កូនរបស់អ្នកនឹងមានវិវឌ្ឍនាការទាំងផ្នែករាងកាយ និងចិត្តគំនិតឆាប់រហ័សខ្លាំងណាស់ បើអ្នកអាចជួយបន្ថែមឱ្យកូនមានវិវឌ្ឍនាការដែលត្រឹមត្រូវ ស័ក្តិសមតាមវ័យរបស់គេបានទៀតផងនោះ នឹងរឹតតែធ្វើឱ្យកូនរបស់អ្នកក្លាយជាក្មេងដែលមានអាកប្បកិរិយា និងទង្វើដែលល្អ មានភាពឆ្លាតវៃខាងផ្នែកអារម្មណ៍ខ្ពស់ជាមិនខាន។

យើងអាចជួយបន្ថែមវិវឌ្ឍនាការផ្សេងៗរបស់កូនបានតាមវិធី4យ៉ាងតទៅនេះ៖

1. ឱ្យកូនបានឃើញនូវអ្វីដែលល្អ
កូនរបស់អ្នក(ទោះជាទើបនឹងកើតក្ដី)អាចរៀនយល់ដឹងនូវអ្វីដែលខ្លួនឯងមើលឃើញបាន។ ការមើលឃើញនេះ មានន័យរួមទាំងទង្វើមួយចំនួនរបស់ឪពុកម្ដាយ ឬអ្នកចិញ្ចឹមដែលធ្វើចំពោះកូនរបស់អ្នកផងដែរ ដោយទង្វើផ្សេងៗដែលក្មេងមើលឃើញនោះគេនៅមិនទាន់អាចញែកបំបែកបានថា រឿងនោះជារឿងត្រឹមត្រូវ ឬស័ក្តិសមនោះទេ តែក្មេងនឹងជ្រួតជ្រាបនូវអ្វីដែលបានឃើញទាំងអស់ ហើយចុងក្រោយក៏នឹងក្លាយជាទង្វើរបស់កូនខ្លួនឯងតែម្ដង ដូចជា ក្មេងដែលមើលឃើញឪពុកម្ដាយចូលចិត្តច្រៀង មានអារម្មណ៍ល្អ ឬលេងតន្ត្រី នៅពេលកូនធំឡើង កូនក៏នឹងមានសេចក្ដីស្រឡាញ់ក្នុងផ្នែកតន្ត្រី មានផ្លូវចិត្តទន់ភ្លន់ ឬករណីដែលឪពុកម្ដាយ ឬអ្នកចិញ្ចឹមមិនចូលចិត្តញ៉ាំបន្លែ នៅពេលកូនធំឡើងក៏ច្រើនតែមិនញ៉ាំបន្លែដែរ។

2. ឱ្យកូនបានឮនូវអ្វីដែលល្អ
ពាក្យសម្ដីល្អៗ សំឡេងពីរោះៗទន់ភ្លន់ ទារកទើបនឹងកើតក៏អាចដឹងបានដែរ ជាពិសេសក្មេងក្នុងអំឡុងបឋមវ័យ(កើតដំបូង-6ឆ្នាំ) ក្មេងនឹងតាំងចិត្តស្ដាប់ និងមានអារម្មណ៍ឆាប់ចាំបានចំពោះសំឡេងផ្សេងៗ។ បើអ្នកណាដែលធ្លាប់ចិញ្ចឹមកូន នៅពេលកូនតូចអាយុបានប្រមាណ3-4ខែនឹងបានឃើញថា ពេលដែលយើងពកូនហើយនិយាយជាមួយកូន កូននឹងធ្វើមាត់ជីបអូចៗ កែវភ្នែកនឹងសម្លឹងចំមុខឪពុក ឬម្ដាយដែលកំពុងពគេ។ គេនឹងតាំងចិត្តស្ដាប់សំឡេងផ្សេងៗដែលបន្លឺមករកគេ ដូច្នេះ សំឡេង ឬពាក្យសម្ដីផ្សេងៗដែលមិនល្អ ជាពិសេសពាក្យលាន់មាត់ ពាក្យជេរបញ្ចោរដែលច្រើនតែជាពាក្យខ្លី(1 – 2 ម៉ាត់) នឹងក្លាយជាពាក្យដែលក្មេងបឋមវ័យអាចចងចាំបានយ៉ាងងាយ ដូច្នេះបើមិនចង់ឱ្យកូននិយាយស្ដីអាក្រក់ស្ដាប់ ឪពុកម្ដាយ និងអាណាព្យាបាលត្រូវតែប្រយ័ត្នប្រយែង កុំប្រើពាក្យសម្ដីណាដែលមិនល្អឱ្យក្មេងបានឮ។ កុំគិតថា កូននៅតូច នៅមិនទាន់ស្ដាប់យល់ឱ្យសោះ ព្រោះក្មេងអាចចងចាំលក្ខណៈការបញ្ចេញសំឡេងខ្លីៗទាំងនោះ និងអាចនិយាយចេញមកដោយមិនដឹងពីអត្ថន័យបាន ដែលទម្រាំឪពុកម្ដាយដឹងថា កូនរបស់ខ្លួនធ្លាប់មាត់នឹងពាក្យសម្ដីអាក្រក់ ជេរបញ្ចោរទាំងនោះ អាចនឹងពិបាកកែកុនក៏ថាបានដែរ។

3. ឱ្យកូនលេង និងធ្វើកិច្ចការងារល្អៗ
ក្មេងក្នុងបឋមវ័យច្រើនតែចូលចិត្តលេង ដែលជាធម្មជាតិរបស់កុមារ។ ឪពុកម្ដាយដែលយល់ដឹងពីវិវឌ្ឍនាការរបស់កូនក៏អាចនឹងរកមើលកិច្ចការងារណា ឬការលេងណាដែលស៊ីគ្នាជាមួយនឹងអំឡុងអាយុរបស់កូនបានដែរ។ ក្រៅពីនោះ ការលេងរបស់កុមារនេះនឹងក្លាយជាការរៀនយល់ដឹងដែលជំរុញប្រព័ន្ធប្រសាទទាំង5 របស់គេបានយ៉ាងល្អ។

4. ផ្ដល់ការអប់រំបង្ហាត់បង្រៀនកូនតាំងពីនៅក្មេង
ក្មេងក្នុងអំឡុងបឋមវ័យ មានភាពចង់ដឹងចង់ឃើញគ្រប់ពេលវេលា គេនឹងមានភាពក្លៀវក្លាស្វាហាប់ក្នុងការរៀនយល់ដឹងគ្រប់អ្វីៗដែលនៅជុំវិញខ្លួន ដូច្នេះការអប់រំបង្ហាត់បង្រៀនគឺជារឿងចាំបាច់ណាស់ ដោយការបង្ហាត់បង្រៀននោះគួរជាការបង្ហាត់បង្រៀនក្នុងលក្ខណៈអធិប្បាយ មិនមែនជាការបញ្ជា ឬហាមនោះទេ។ ទោះជាក្មេងក្នុងវ័យនេះនៅមិនទាន់អាចយល់នូវអ្វីដែលឪពុកម្ដាយអធិប្បាយបានទាំងអស់ក៏ដោយ តែការអធិប្បាយឱ្យកូនបានស្ដាប់តាំងពីតូច ឬបណ្ដោយឱ្យគេបានសាកល្បងធ្វើដោយខ្លួនឯង(ជាកិច្ចការងារដែលមិនបង្កគ្រោះថ្នាក់) ហើយឪពុកម្ដាយនៅចាំណែនាំចង្អុលបង្ហាញថាហេតុអ្វីបានក្លាយជាបែបហ្នឹង នឹងធ្វើឱ្យកុមារអាចរៀនយល់ដឹង និងយល់ច្បាស់បានយ៉ាងឆាប់រហ័សជាងការបង្ហាត់បង្រៀនបែបប្រើពាក្យសម្ដីតែម្យ៉ាង ដូចជា ការបង្ហាត់កូនឱ្យចេះដុសធ្មេញដោយប្រើសម្ភារប្រដូច ដូចជាធ្មេញក្លែងក្លាយជាដើម។ ឱ្យកូនបានហាត់កាន់ច្រាសដុសធ្មេញដោយខ្លួនឯង ហើយឪពុកម្ដាយចង្អុលបង្ហាញថាហេតុអីបានត្រូវដុសធ្មេញ ហេតុអីបានត្រូវកាន់ច្រាសដុសធ្មេញបែបហ្នឹង និងដុសរបៀបម៉េច ជាដើម៕

May 7, 2018

Category: សង្គម និងសេដ្ឋកិច្ច