Category: សង្គម និងសេដ្ឋកិច្ច

ឱកាសសម្រេចក្តីស្រមៃទៅសិក្សានៅប្រទេសសិង្ហបុរីបានមកដល់ហើយ!
ការបានទៅសិក្សានៅឯប្រទេសអភិវឌ្ឍន៍ ឬប្រទេសដែលមានភាពល្បីល្បាញផ្នែកអប់រំ គឺជាក្តីស្រមៃយ៉ាងធំមួយរបស់សិស្ស ហើយវាក៏ជាមោទនភាពមួយផងដែរសម្រាប់ក្រុមគ្រួសារ និងជីវិតខ្លួនឯងផ្ទាល់ដែរ។
សិង្ហបុរី ដែលជាប្រទេសមួយមានភាពល្បីល្បាញផ្នែកអប់រំនៅលើពិភពលោក ថ្មីៗនេះបានប្រកាសផ្តល់អាហារូបករណ៍សម្រាប់សិស្សកម្រិតមធ្យមនៅក្នុងបណ្ដាប្រទេសក្នុងអាស៊ានដែលក្នុងនោះ សិស្សពីកម្ពុជាក៏អាចមានសិទ្ធិក្នុងការសម្រេចក្តីស្រមៃរបស់ខ្លួនដើម្បីបន្តការសិក្សាដោយឥតបង់ប្រាក់នៅសិង្ហបុរីបានដែរ។
អាហារូបករណ៍ដែលផ្តល់ជូននេះជាអាហារូបករណ៍របស់ក្រសួងអប់រំ នៃប្រទេសសិង្ហបុរី ដែលក្នុងនោះគឺមានការផ្គត់ផ្គង់ដល់អ្នកប្រឡងជាប់ទាំងអស់នូវប្រាក់សម្រាប់ការហូបចុក រ៉ាប់រងលើថ្លៃសិក្សា ការស្នាក់នៅ និងសំបុត្រយន្តហោះ ទៅ-មកកម្ពុជា-សិង្ហបុរីទៀតផង។
ចំពោះលក្ខខណ្ឌនៃការជ្រើសរើសគឺបេក្ខជនទាំងអស់ត្រូវតែជាសមាជិក ឬប្រជាជនដែលស្ថិតនៅតំបន់អាស៊ាន (ASEAN) ដែលកើតនៅចន្លោះឆ្នាំ2002 ដល់ឆ្នាំ2004 ដែលជាសិស្សពូកែ និងជាសិស្សដែលកំពុងសិក្សានៅថ្នាក់ទី10 ឬទី11 នៅសាលាមធ្យមសិក្សាចំណេះទូទៅ។ បេក្ខជនត្រូវតែជាអ្នកដែលមានចំណេះដឹងជ្រៅជ្រះលើភាសាអង់គ្លេសដែលអាចប្រើប្រាស់បានទាំងការទំនាក់ទំនង និងការសិក្សាជាផ្លូវការនៅប្រទេសសិង្ហបុរី។
ចំណែកឯដំណាក់កាលនៃការជ្រើសរើសគឺ ក្រោយពីបេក្ខជនជាប់ដំណាក់កាលទី1 ឬត្រូវបានជាប់ជាជម្រើសសម្រាប់ការប្រឡងហើយ បេក្ខជនត្រូវចូលរួមប្រឡងប្រជែងសមត្ថភាពទូទៅដូចជាភាសាអង់គ្លេស និងគណិតវិទ្យា ហើយត្រូវចូលរួមសម្ភាសជាបន្តបន្ទាប់។ ការប្រឡង និងការសម្ភាសនឹងប្រព្រឹត្តទៅនៅភ្នំពេញ ហើយចំពោះបេក្ខជនដែលទទួលបានជោគជ័យជាស្ថាពរនឹងត្រូវប្រកាសលទ្ធផលនៅចុងខែកញ្ញា ឆ្នាំ2018នេះ។
សម្រាប់លក្ខខណ្ឌក្នុងការដាក់ពាក្យសម្រាប់សិស្សកម្ពុជា គឺត្រូវដាក់ពាក្យនៅការិយាល័យអាហារូបករណ៍ និងកម្មសិក្សានៃនាយកដ្ឋានទំនាក់ទំនងវប្បធម៌ និងអាហារូបករណ៍នៃក្រសួងអប់រំ យុវជន និងកីឡា ដោយបេក្ខជនតម្រូវឱ្យដាក់ពាក្យជា Hard Copy។ ប្រសិនបើបេក្ខជនចង់ដាក់ពាក្យតាមបណ្តាញអនឡាញ ក៏អាចដាក់ពាក្យបានតាមគេហទំព័ររបស់ក្រសួងអប់រំ យុវជន និងកីឡា ដែលចាប់ផ្តើមបើកពីថ្ងៃទី2 ខែឧសភា ឆ្នាំ2018 នេះតទៅ៕
May 8, 2018
ដំណាំ ត្រកួនចិន
ត្រកួនចិន ឬឈ្មោះខាងវិទ្យាសាស្ត្រហៅថា Ipomcea aquatica Forsk ជាបន្លែចេញត្រួយពេញមួយឆ្នាំ មានលក្ខណៈជាដើមត្រង់ៗពណ៌បៃតងខ្ចី មានផ្កាពណ៌ស កម្ពស់ដើមប្រមាណជា40-50សង់ទីម៉ែត្រ គេនិយមបរិភោគទាំងដើម និងស្លឹក ព្រោះជាបន្លែមានប្រយោជន៍ ថែមទាំងមានសារធាតុត្រជាក់ទៀតផង ទើបជាបន្លែដែលអាចជួយសម្រាលអាការក្ដៅក្នុងបានយ៉ាងល្អ។ បន្លែត្រកួនមានច្រើនពូជណាស់ តែសម្រាប់នៅក្នុងប្រទេសយើងវិញ គេនិយមដាំ “ត្រកួនចិន”។
គ្រប់ចំណែករបស់ដើមត្រកួនចិនអាចយកមកចម្អិនធ្វើជាម្ហូបអាហារដើម្បីទទួលទានបានច្រើនមុខច្រើនយ៉ាងណាស់ តាំងពីបរិភោគត្រួយខ្ចីស្រស់ឆៅ ឬស្រុសធ្វើជាអន្លក់ ឆា ស្លម្ជូរ-ល- ទើបអាចនិយាយបានថា ត្រកួនចិន គឺជាបន្លែចម្ការក្នុងផ្ទះដ៏ពេញនិយមដែលងាយស្រួលដាំ និងអាចបេះយកមកធ្វើជាអាហារបានពេញមួយឆ្នាំ។
**ការដាំ
• ការត្រៀមដី: ភ្ជួរដាស់ដីជម្រៅប្រមាណ30-40សង់ទីម៉ែត្រ រួចហាលទុកចោល1-2អាទិត្យ បន្ទាប់មកដាក់ជីលាមកគោ ឬជីធម្មជាតិ រួចរាស់ច្របល់ឱ្យចូលគ្នាជាមួយដី ហើយលើកជារងទទឹងទំហំ1.5-2ម៉ែត្រ កម្ពស់ប្រមាណ10-15សង់ទីម៉ែត្រ ដោយទុកចន្លោះពីរងមួយទៅរងមួយទទឹង30-40សង់ទីម៉ែត្រ។ ព្យាយាមកៀរដីខាងលើរងឱ្យរាបស្មើគ្នា ដើម្បីឱ្យដើមត្រកួនបានលូតលាស់ឡើងស្ថិតក្នុងកម្ពស់ស្មើៗគ្នាទាំងអស់។ បើដីមានជាតិអាស៊ីតច្រើន ចូរដាក់ម្សៅកំបោរសចូលទៅ ដើម្បីកែសម្រួលសភាពដីឱ្យល្អឡើងវិញបន្តិច។
• វិធីដាក់ដាំ: យកគ្រាប់ពូជត្រកួនចិនទៅត្រាំទឹកក្ដៅឧណ្ហៗ ជ្រើសរើសស្រង់គ្រាប់ណាដែលអណ្ដែតទឹកចេញ រួចហើយយកគ្រាប់ពូជដែលលិចក្នុងទឹកមកដាក់ត្រាំបន្តរយៈពេល12ម៉ោងទៀត បន្ទាប់មកសឹមយកគ្រាប់ពូជទាំងនោះទៅព្រោះនៅលើរង ឬក៏រោយជាជួរៗក៏បានដោយទុកចន្លោះកណ្ដាលពីជួរនីមួយៗប្រមាណ1.5សង់ទីម៉ែត្រ។ បន្ទាប់ពីនោះ ទើបរោយលុបពីលើស្ដើងៗដោយជីលាមកគោ ឬជីធម្មជាតិព្រមទាំងគ្របពីលើដោយចំបើងស្ងួតមួយជាន់ទៀត មុននឹងស្រោចទឹកព្រមជាមួយទឹកជីធម្មជាតិសរីរាង្គពីលើ។ ប្រមាណជា2-3ថ្ងៃ កូនត្រកួននឹងចាប់ផ្ដើមលាស់ចេញមក ហើយរីកធំធាត់លូតលាស់ឡើងយ៉ាងឆាប់រហ័សរហូតដល់ពេលប្រមូលផល។
**វិធីមើលថែទាំ
• ការស្រោចទឹក: ត្រកួនចិនជាបន្លែដែលចូលចិត្តដីត្រជាក់សើម តែមិនដក់ទឹកប៉ប៉ិចប៉ប៉ាច់។ ត្រូវស្រោចទឹកឱ្យបានជាប់លាប់ មួយថ្ងៃ 1-2ដងតែត្រូវផ្អាកចន្លោះថ្ងៃណាដែលមានភ្លៀងធ្លាក់។
• ការដាក់ជី: ចូរដាក់ជីធម្មជាតិសរីរាង្គរៀងរាល់ 7 – 10ថ្ងៃម្ដង ព្រមទាំងស្រោចទឹកលាយទឹកជីធម្មជាតិសរីរាង្គបន្ថែមពីលើការដាក់ជីមួយជាន់ទៀត ឬចង់ជ្រើសរើសប្រើជីរូបមន្ត 25-7-7 ដោយអាចដាក់ស្ដើងៗដើម្បីជំរុញការរីកចម្រើនធំធាត់ថែមទៀតក៏បាន។
• ការការពារ និងការកម្ចាត់សត្រូវដំណាំ: បើឃើញថា មានការរាតត្បាតដោយមេរោគ និងសត្វល្អិតសត្រូវដំណាំ ចូរប្រើទឹកថ្នាំដែលចម្រាញ់ពីសម្បក ឬស្លឹកស្ដៅ ម្រេច និងថ្នាំជក់ លាយជាមួយទឹកបាញ់ពីលើដើមត្រកួនមួយថ្ងៃម្ដងនៅពេលល្ងាច។
**វិធីប្រមូលផល
ក្រោយពីព្រោះគ្រាប់ពូជត្រកួនចិននៅលើរងបានប្រមាណជា20-25ថ្ងៃរួចមក គេអាចធ្វើការប្រមូលផលដោយធ្វើការដកឡើងទាំងឫស តែមុននឹងធ្វើការប្រមូលផល ចូរស្រោចទឹកឱ្យសើមជោកជាមុនសិនដើម្បីឱ្យងាយស្រួលក្នុងការដក និងធ្វើឱ្យដើមត្រកួននៅស្រស់ល្អ មិនបែកជាំ៕

May 8, 2018
ម៉ូដសម្លៀកបំពាក់នារីម៉ាក LOOKSWOMEN លេខ 120

May 8, 2018
កំពុងតែថតកម្មវិធី «ឆ្ងាញ់ទេ?» សុខៗ ស្រាប់តែ…ចង់ដាក់មេផាយ!
ដូចដែលលោកអ្នកបានដឹងហើយថា កម្មវិធីដ៏ល្បីល្បាញមួយដែលផលិតឡើងដោយគំនិតច្នៃប្រឌិតរបស់កូនខ្មែររបស់ប៉ុស្តិ៍ទូរទស្សន៍ថោន គឺកម្មវិធី «ឆ្ងាញ់ទេ?» នោះ មានតារាគោលៗដែលជាពិធីការិនីចំនួន 2នាក់ គឺអ្នកនាង កាតុ និងកញ្ញា រ៉ូលីន រួមជាមួយក្រុមការងារ និងលោក ករុណា ពេជ្រ និងថែមទាំងបានអញ្ចើញតារាកិត្តិយសមួយដួងទៀតធ្វើដំណើរចុះទៅតាមតំបន់ភូមិស្រុកនៅតាមបណ្ដាខេត្ត-ក្រុងនានាដើម្បីផ្ដិតយកទស្សនីយភាពនៃការចម្អិនម្ហូបអាហារខ្មែរប្លែកៗប្រចាំតំបន់ ជូនពុកម៉ែបងប្អូនទស្សនិកជនបានទស្សនាកម្សាន្ដសប្បាយមុនពេលទទួលទានអាហារថ្ងៃត្រង់។
ដោយឡែកនៅសប្ដាហ៍ថ្មីនេះ កញ្ញា នៅ សូនីតា គឺជាតារាកិត្តិយសដែលបានរួមដំណើរជាមួយកញ្ញា រ៉ូលីន អ្នកនាង កាតុ និងលោក ករុណា ពេជ្រ។ នៅថ្ងៃនោះ ខណៈពេលកំពុងថតកម្មវិធីធ្វើម្ហូប ដែលបានពញ្ញាក់អារម្មណ៍ប្រជាពលរដ្ឋនៅតាមទីជនបទនោះ ស្រាប់តែពួកគេបានជួបនឹងរឿងមួយដ៏ស្ទើរមិនគួរឱ្យជឿ និងធ្វើឱ្យភ័យស្លន់ស្លោស្លេកមុខ រកកល់រត់ផាស់ក្រញាំគ្រប់ៗគ្នាតែម្ដង។
តាមរយៈវីដេអូដែលបានបង្ហោះនៅលើបណ្ដាញសង្គម គេមើលឃើញថា នៅពេលដែលក្រុមការងារកំពុងតែដំណើរការថតសុខៗ ក៏ស្រាប់តែលោកអ៊ំម្ចាស់ផ្ទះដែលមិនដឹងជាស្រវឹង ឬក៏ខឹងរឿងអ្វីឡើយនោះ បានស្រែកវ៉ាស់មួយទំហឹងឡើងថា «ពួកហែ្អងឆាប់ចេញពីផ្ទះអញភ្លាម!!»។
គ្រាន់តែឮសំឡេងស្រែកបែបហ្នឹងភ្លាម កញ្ញា នៅ សូនីតា ស្រាប់តែស្លេកមុខងាំង…ហើយអ្នកនាង កាតុ វិញស្រាប់តែស្លន់ស្លោរញីរញ័រខ្លាំង…ទម្លាក់គ្រឿងគ្រៅសម្លចោល ប្រុងដាក់មេផាយចោលស្បែកជើងយកប្រាសអាយ៉ូសតែម្ដង(អូ My God!!)។
តែយ៉ាងណាក៏ដោយ ហេតុការណ៍ដ៏សែនលោះព្រលឹងមួយនេះ មិនបានបង្កជារឿងហេតុអ្វីធំដុំនោះទេ ព្រោះក្រោយពីអ៊ំម្ចាស់ផ្ទះដែលជាប្តី បានស្រែកហើយ ក៏ដើរចេញទៅក្រៅបាត់ទៅ ឯក្រុមការងារយើងក៏បន្តការថតរបស់ពួកគេ រហូតដល់ចប់ដោយមិនមានបញ្ហាអ្វីទៀតឡើយ(គ្រាន់រាងស្រៀវៗ ខ្លាចអ៊ំប្រុសម្ចាស់ផ្ទះនោះត្រឡប់មកម្ដងទៀត ប៉ុណ្ណឹងឯង អូ៎យ…)។
ដើម្បីឱ្យបានឃើញច្បាស់ថា តើទឹកមុខកញ្ញា នៅ សូនីតា កញ្ញា រ៉ូលីន អ្នកនាង កាតុ និងលោកករុណា ពេជ្រ មានសភាពបែបណាខ្លះពេលជួបស្ថានការណ៍បែបនោះ សូមទស្សនាវីដេអូខាងក្រោមទាំងអស់គ្នា៖
https://youtu.be/mpM8-kkvrfU
May 8, 2018
Giggs ជឿជាក់ថា លោក Ferguson នឹងជាសះស្បើយយ៉ាងឆាប់រហ័ស
កីឡាករប្រកបដោយភាពជោគជ័យបំផុត Ryan Giggs របស់ក្លិប Manchester United បានដឹកនាំឱ្យមានការធ្វើសារជូនពរជាច្រើនមួយផ្សេងទៀត ពីពិភពកីឡាបាល់ទាត់សម្រាប់អតីតអ្នកចាត់ការទូទៅរបស់ពួកគេ គឺលោក Alex Ferguson ក្រោយពីបុរសសញ្ជាតិស្កុតលែនម្នាក់នេះទទួលការវះកាត់ខួរក្បាល។
ខណៈដែលត្រូវបានចាត់ទុកថា ជាអ្នកចាត់ការទូទៅដ៏មានភាពជោគជ័យបំផុតក្នុងប្រវត្តិសាស្ត្រនៃកីឡាបាល់ទាត់ចក្រភពអង់គ្លេស លោក Ferguson វ័យ 76ឆ្នាំ បានឈ្នះពានសរុប 38ពាន ក្នុងរយៈពេល 26ឆ្នាំ ក្នុងនាមជាគ្រូបង្វឹករបស់ក្លិប Man United ក្នុងនោះរាប់បញ្ចូលទាំងការឈ្នះពានក្របខ័ណ្ឌ Premier League ចំនួន 13លើក និងពាន Champions League 2លើកផងដែរ មុនពេលចូលនិវត្តន៍ក្នុងឆ្នាំ2013។ Man United មិនបានផ្តល់ព័ត៌មានថ្មីៗទាក់ទងនឹងស្ថានភាពរបស់លោក Ferguson ទៀតឡើយ បន្ទាប់ពីបានបញ្ជាក់ថា ដំណើរការនៃការវះកាត់សាច់ដុះក្នុងខួរក្បាល កាលពីថ្ងៃសៅរ៍ បានដំណើរការយ៉ាងល្អ ប៉ុន្តែចាំបាច់ត្រូវតែមានការថែទាំយ៉ាងយកចិត្តទុកដាក់ អំឡុងពេលលោកសម្រាកព្យាបាលក្រោយវះកាត់។
លោក Giggs ដែលបច្ចុប្បន្នជាគ្រូបង្វឹកនៃក្រុមបាល់ទាត់ជម្រើសជាតិវេលស៍ គឺជាសមាជិករបស់ក្រុមរបស់លោក Ferguson ដែលបានឈ្នះពាន 13លើកក្នុងការលេងអាជីពរយៈពេល 24ឆ្នាំរបស់គាត់ នាកីឡដ្ឋាន Old Trafford។ Giggs បានប្រាប់ទូរទស្សន៍ BBC ថា៖ «បច្ចុប្បន្ន គឺជាពេលវេលានៃការជូនពរ និងសង្ឃឹមថាគាត់អាចជាសះស្បើយយ៉ាងឆាប់រហ័ស។ គាត់មានឥទ្ធិពលដ៏ធំបំផុតក្នុងអាជីពរបស់ខ្ញុំ ទាំងនៅលើទីលាន និងក្រៅទីលាន»៕
ប្រភពពី៖ Channel News Asia
May 8, 2018
Neymar នឹងបង្ហាញវត្តមានក្នុងការប្រកួតពាន French Cup វគ្គផ្តាច់ព្រ័ត្ររាត្រីនេះ
Neymar នឹងមានវត្តមានក្នុងការប្រកួតពាន French Cup វគ្គផ្តាច់ព្រ័ត្រ នៅរាត្រីនេះ រវាងក្រុម Paris Saint-Germain និង Les Herbiers។ នេះបើយោងតាមការប្រកាសរបស់ Thiago Silva ប្រធានក្រុមនៃក្រុម PSG។
ក្នុងសន្និសីទសារព័ត៌មានមួយកាលពីថ្ងៃចន្ទ នៅមុនពេលការប្រកួតនេះ Silva បានប្រាប់អ្នកយកព័ត៌មានថា៖ «រូបគេទទួលបានការលើកទឹកចិត្តទាំងស្រុង ប៉ុន្តែបាននិយាយថា រូបគេមិនអាចហ្វឹកហាត់ជាមួយនឹងពួកយើងបានឡើយ។ រូបគេនឹងមានវត្តមានដើម្បីគាំទ្រពួកយើងនៅថ្ងៃស្អែកនេះ នាកីឡដ្ឋាន Stade de France ហើយខ្ញុំគិតថា រូបគេនឹងមានការរីករាយ»។ Neymar បានវិលទៅកាន់ទីក្រុងប៉ារីស កាលពីថ្ងៃសុក្រ ដើម្បីបន្តការសម្រាកព្យាបាលរបស់គេ រយៈពេល 2ខែ ក្រោយពីទទួលបានការវះកាត់ប្រអប់ជើងរបស់គេ នៅក្នុងប្រទេសប្រេស៊ីល។
រូបគេប្រហែលមិនអាចចូលលេងឱ្យក្រុម PSG ម្តងទៀតឡើយនៅរដូវកាលនេះ ខណៈដែលការផ្តោតអារម្មណ៍របស់គេនាពេលបច្ចុប្បន្នគឺទៅលើការត្រៀមលក្ខណៈឱ្យទាន់ពេលសម្រាប់យុទ្ធនាការ World Cup ជាមួយនឹងក្រុមបាល់ទាត់ជម្រើសជាតិប្រេស៊ីល នាខែមិថុនា និងកក្កដា។ Silva បានបន្ថែមទៀតថា៖ «Neymar កំពុងតែមានសុខភាពល្អ។ វាពិតណាស់ រូបគេកំពុងតែសម្រាកព្យាបាល។ គេចាប់ផ្តើមហ្វឹកហាត់រួចជាស្រេចក្នុងក្លិបហាត់ប្រាណ»។ PSG គឺជាក្រុមមានក្តីសង្ឃឹមច្រើនក្នុងការឈ្នះពាន ក្នុងពេលប៉ះជាមួយនឹងក្រុម Les Herbiers នៅរាត្រីនេះ ក្រោយពីបានឈ្នះពានក្របខ័ណ្ឌ Ligue 1 និងពាន League Cup រួចមកហើយនៅរដូវកាលនេះ។ ការប្រកួតនេះនឹងចាប់ផ្តើមនៅម៉ោង 2:05ទៀបភ្លឺ៕
ប្រភពពី៖ Channel News Asia
May 8, 2018
បន្ទប់ផ្ទះបាយ Size Mini 4 បែប… តូចមែន តែមានគំនិតខ្ពស់
គេនាំគ្នានិយាយថា បន្ទប់ផ្ទះបាយ គឺជាបេះដូងចម្បងរបស់ផ្ទះ បើគ្មានបន្ទប់ផ្ទះបាយ ប្រហែលជាត្រូវទិញម្ហូបថង់មកទទួលទានរាល់ថ្ងៃមិនខាន តែតឱ្យជាម្ហូបអាហារថង់យ៉ាងណា ក៏ត្រូវតែមានបន្ទប់ផ្ទះបាយដដែលហ្នឹង! មែនទេ? ព្រោះណាមួយត្រូវលាងចាន-ក្បានទុកដាក់ កម្ដៅម្ហូបអាហារ និងការងារចង្ក្រានជើងឆ្នាំងមួយគំនរទៀត ដូច្នេះហើយទើបបន្ទប់ផ្ទះបាយចាំបាច់ណាស់សម្រាប់គ្រប់ផ្ទះ តែទំហំរបស់បន្ទប់ផ្ទះបាយមិនចាំបាច់ត្រូវតែធំជានិច្ចនោះទេ។ ដែលខំរៀបរាប់ហូរហែមកបែបនេះ មិនមែនមានអីធំដំុនោះទេ គ្រាន់តែចង់ឱ្យមិត្តអ្នកអានណាដែលផ្ទះមានទីធ្លាបន្ទប់ចង្ក្រានបាយមានកំណត់នោះ ងាកមករៀបចំតុបតែងបន្ទប់ផ្ទះបាយឱ្យបានស្អាតម្ដងជាមួយនឹង 4បែបនៃបន្ទប់ផ្ទះបាយទំហំតូច តែស្អាតៗតែប៉ុណ្ណោះ។
បែបទី1
បន្ទប់ចង្ក្រានបាយតូច តែមួយជ្រុង
បន្ទប់ផ្ទះបាយខ្នាតតូចក្នុងបរិយាកាសពណ៌ឈើធម្មជាតិ មានទីធ្លាប្រើប្រាស់ត្រឹមតែបន្តិចបន្តួច តែក៏មានឧបករណ៍គ្រប់សម្រាប់រាល់ការប្រើការ។ ដោយចាប់ផ្ដើមពីការច្នៃម៉ូដឱ្យក្លាយជាបន្ទប់ផ្ទះបាយតែមួយជ្រុងជាប់ជញ្ជាំង ក្រាលឥដ្ឋការ៉ូពណ៌ឈើធម្មជាតិ។ ខាងក្រោមតុដាក់ម៉ាស៊ីនបោកខោអាវខ្នាតមីនីសន្សំសំចៃទីកន្លែង អាងលាងចានតូចមួយ និងឆ្នាំងម៉ៃក្រូវេហ្វអាចដាក់នៅលើតុនៅក្នុងផ្ទះបាយក៏បាន។ ធ្វើបង្កាន់ដៃដែកអីុណុកជាប់ជញ្ជាំងទុកព្យួរឧបករណ៍ផ្ទះបាយដែលត្រូវប្រើជាប្រចាំ គ្រឿងបន្ថែមរសជាតិដាក់តម្រៀបជាជួរស្រេច និងទូជាប់ជញ្ជាំងសម្រាប់ទុកដាក់ចានក្បាន។
បែបទី2
តូច តែខ្លឹម
បើអ្នកណាស្នាក់អាស្រ័យនៅក្នុងបន្ទប់អាផាតមិន ឬខុនដូ ដែលទីធ្លាមានកំណត់នោះ ប្រាកដណាស់ថា បន្ទប់ផ្ទះបាយរបស់អ្នកច្បាស់ជាត្រូវប្រើការរួមជាមួយបន្ទប់ផ្សេងទៀត និងមិនបានបែងចែកទីកន្លែងប្រើការយ៉ាងច្បាស់លាស់ឡើយ ដោយចាត់ចែងទុកត្រឹមតែជ្រុងតូចមួយប៉ុណ្ណោះ។ មុនគេបង្អស់ គឺត្រូវកំណត់ទីធ្លាជាមុនសិន ទុកដាក់របស់គ្រប់យ៉ាងឱ្យទៅជិតជញ្ជាំងបំពាក់ទូព្យួរឧបករណ៍សម្រាប់ទុកដាក់ តុបាយម៉ូដបែបសាមញ្ញសមល្មមនឹងទីធ្លា លាក់ភាជនៈផ្សេងៗ និងឧបករណ៍គ្រប់យ៉ាងទុកនៅក្នុងទូ ដើម្បីភាពមានរបៀប និងមើលទៅស្អាតភ្នែកគួរឱ្យចង់ប្រើការរាល់ថ្ងៃ។
បែបទី3
បន្ទប់ផ្ទះបាយស្រឡះ សែនស្អាត
បន្ទប់ផ្ទះបាយរបស់មនុស្សវ័យក្លៀវក្លាសម្រាប់អ្នកដែលនិយមចូលចិត្តភាពស្រឡះ។ ស៊ីម៉ង់ត៍លាតគ្មានលាបពណ៌ គឺជាសម្ភារដែលបង្ហាញពីភាពសាមញ្ញបានគ្រប់ពេលវេលា។ គំនិតនេះ គឺយកស៊ីម៉ង់ត៍ធ្វើជាតុបាយនៅក្នុងផ្ទះបាយ ជ្រើសរើសបំពាក់ទូថ្នាក់សម្រាប់ដាក់របស់របរឱ្យស័ក្តិសម ដោយមានជាន់ថ្នាក់ធ្វើពីឈើនៅផ្នែកខាងក្រោម ខណៈដែលធ្នើរដាក់របស់របរផ្នែកខាងលើបើកចំហ ជួយឱ្យការចាប់យកឧបករណ៍ចម្អិនម្ហូបអាហារមានភាពងាយស្រួល និងឆាប់រហ័សឡើង។ ប្រើប្រាស់ទីធ្លាមិនច្រើន ត្រឹមតែជញ្ជាំងមួយខាង និងប្រើរួមគ្នាជាមួយបន្ទប់ទទួលទានអាហារ។
បែបទី4
តុកណ្ដាលបន្ទប់ក្នុងក្ដីស្រមៃ
សម្រាប់បន្ទប់ផ្ទះបាយខ្នាតតូច តែក៏ចង់មានតុនៅកណ្ដាលបន្ទប់ដែលអាចច្នៃប្រើប្រាស់បានយ៉ាងងាយស្រួលនោះ តុថ្មម៉ាបអាចជាជម្រើសដ៏ល្អមួយសម្រាប់ទាំងការទទួលទានអាហារពេលព្រឹកបែបងាយៗ និងជាតុសម្រាប់ត្រៀមរៀបចំម្ហូបអាហារទៀតផង។ ចំណែកតុសម្រាប់ត្រៀមអាហារវិញ ជាបែបមីនីស្ទូឌីយោ ស័ក្តិសមបំផុតសម្រាប់បន្ទប់ដែលមានទីធ្លាតូច គ្រប់យ៉ាងស្ថិតនៅក្នុងទូតែមួយ ទាំងអាងលាងចាន ចង្ក្រានម៉ៃក្រូវេហ្វទូទឹកកក និងធ្នើរថ្នាក់ៗដាក់របស់របរជាដើម៕
May 8, 2018
រំភើបចិត្តណាស់!! សម្ដេច ហ៊ុន សែន សរសើរពីប្រវត្តិតស៊ូរបស់សិល្បករ ឡេង ណាវ៉ាត់ត្រា
មិនគួរឱ្យជឿឡើយថា នៅក្នុងពិធីសំណេះសំណាលជាមួយលោកគ្រូ-អ្នកគ្រូប្រមាណជាង 3ពាន់នាក់ នៅសាលមហោស្រពកោះពេជ្រកាលពីពេលថ្មីៗនេះ សម្ដេចនាយករដ្ឋមន្ត្រី ហ៊ុន សែន នៃព្រះរាជាណាចក្រកម្ពុជា បានលើកយកឈ្មោះលោក ឡេង ណាវ៉ាត់ត្រា ដែលជាតារាចម្រៀង និងម្ចាស់ផលិតកម្ម Galaxy ដែលបានក្លាយជាម្ចាស់បុរី មកសរសើរជាសាធារណៈ។
នេះចាត់ទុកថាជារឿងកម្រមួយដែលប្រមុខរដ្ឋាភិបាលលើកឈ្មោះអ្នកសិល្បៈជោគជ័យមួយរូប យកមកសរសើរនៅក្នុងវេទិកាសាធារណៈបែបនេះ។ តាមរយៈវីដេអូនៅលើគណនីផ្លូវការរបស់សម្ដេច ហ៊ុន សែន ត្រូវបានគេមើលឃើញពីការលើកឡើងនូវឈ្មោះតារាចម្រៀងដែលទើបវិវឌ្ឍខ្លួនក្លាយជាឧកញ៉ាវ័យក្មេងដ៏លេចធ្លោ។ ខណៈពេលនោះសម្ដេចក៏បានសួររកលោក ឡេង ណាវ៉ាត់ត្រា ហើយក៏បានប្រកាសឡើង រហូតដល់មន្ត្រីក្រោមឱវាទស្រែកបន្ទរឡើងថា«ឡេង ណាវ៉ាត់ត្រាៗ!!»។
តាមរយៈវីដេអូដែលបានផ្សាយផ្ទាល់ពីជំនួបសំណេះសំណាលជាមួយលោកគ្រូ-អ្នកគ្រូក្នុងរាជធានីភ្នំពេញនៅក្នុងសាលមហោស្រពកោះពេជ្រ សម្ដេចនាយករដ្ឋមន្ត្រី ហ៊ុន សែន បានពោលសរសើរ លោកឡេង ណាវ៉ាត់ត្រា ម្ដងហើយម្ដងទៀតនៅក្នុងឱកាសនោះ ដោយបានទាំងអះអាងថា សម្ដេចបានទូរស័ព្ទទៅលោក ឡេង ណាវ៉ាត់ត្រា ដោយផ្ទាល់នៅពេលដឹងថា លោក ណាវ៉ាត់ត្រាមានបំណងជួយដល់មន្ទីរពេទ្យគន្ធបុប្ផា។ ជាមួយគ្នានោះសម្ដេចតេជោក៏បានសម្ដែងនូវការរំភើបចិត្តចំពោះតារាចម្រៀងរូបនេះ ដោយបានបញ្ជាក់ថា អ្នកដែលមានការតស៊ូ និងមានគំនិតបែបនេះ គឺត្រូវតែជួយបំផុស និងលើកទឹកចិត្ត។
ចំណែកឯលោកឡេង ណាវ៉ាត់ត្រា វិញបានប្រាប់អ្នកសារព័ត៌មានទាំងអស់វិញថា លោកមានក្ដីរំភើបចិត្តយ៉ាងខ្លាំងដែលការតស៊ូរបស់លោកត្រូវបានប្រមុខដឹកនាំកំពូល គឺសម្ដេចនាយករដ្ឋមន្ត្រីទទួលស្គាល់ និងបានលើកយកឈ្មោះរបស់លោកមកប្រកាសនៅក្នុងពិធី នេះគឺជាមោទនភាពរបស់លោកយ៉ាងខ្លាំង ចាប់់តាំងពីលោកបានបញ្ចប់ការងារជាពលករនៅក្នុងប្រទេសកូរ៉េ ហើយបានត្រឡប់មករស់នៅប្រទេសកំណើតវិញ។ លោកបន្ដថា «ការលើកសរសើររបស់សម្ដេចគឺជាកម្លាំងចិត្តដ៏ធំមួយក្នុងជីវិតរបស់ខ្ញុំ ហើយខ្ញុំនឹងរួមចំណែកក្នុងការវិនិយោគលើគម្រោងបុរី និងជួយដល់សង្គមឱ្យកាន់តែច្រើនបន្ថែមទៀតផងដែរ និងចែករំលែកបទពិសោធតស៊ូដល់ក្រុមពលករជាច្រើនផ្សេងទៀត»។
គួរបញ្ជាក់ថាមកទល់ពេលបច្ចុប្បន្ននេះ តារាចម្រៀង តារាសម្ដែង និងជាឧកញ៉ាវ័យក្មេង ឡេង ណាវ៉ាត់ត្រា ទទួលបានជោគជ័យយ៉ាងខ្លាំងក្នុងទីផ្សារលក់គម្រោងសង់បុរី ដោយបានពង្រីកទីតាំងពីមួយទៅមួយនារយៈពេលចុងក្រោយនេះ។ យ៉ាងណាមិញ លោកក៏បានបញ្ជាក់ប្រាប់ដែរថា លោកមិនអាចដកខ្លួនចេញពីសិល្បៈ និងការងារសង្គមបានទេ ទើបលោកនៅតែបន្តផលិតចម្រៀងក្នុងផលិតកម្ម Galaxy និងរួមចំណែកជួយសង្គមឱ្យបានច្រើនតទៅទៀត រួមទាំងបរិច្ចាគជួយដល់កាកបាទក្រហមកម្ពុជា និងមន្ទីរពេទ្យគន្ធបុប្ផាផងដែរ៕
May 8, 2018
ស្មាតហ្វូន Android 2018 ជាមួយ Feature និងលក្ខណសម្បត្តិ ដ៏ពេញនិយមនាពេលអនាគត
មនុស្សជាច្រើនប្រហែលជានិយាយថា “ស្មាតហ្វូនចាប់ផ្ដើមលែងមានអីថ្មីហើយ” បន្ទាប់ពីឆ្នាំដែលកន្លងៗទៅ ភាគ
ច្រើនមានតែស៊េរី និងម៉ូដដដែលៗ មិនខុសគ្នាប៉ុន្មានឡើយ។ តែក្នុងឆ្នាំ2018នេះ ក្រុមហ៊ុនផលិតស្មាតហ្វូនធំៗចាប់ផ្ដើមអភិវឌ្ឍលក្ខណសម្បត្តិ និង Feature ដែលប្លែកថ្មីៗចេញមកទៀតជាច្រើន ដែលនៅក្នុងឆ្នាំនេះ វានឹងក្លាយជាទិសដៅថ្មីរបស់ស្មាតហ្វូនសម្រាប់អនាគត។ តើមានអ្វីថ្មីខ្លះ យើងនាំគ្នាមកមើលដូចតទៅ។
អេក្រង់គ្មានគែម
ទោះជាធ្លាប់មានស្មាតហ្វូនអេក្រង់គ្មានគែមដំបូងគេគឺ Sharp Aquos Crystal ដែលបង្ហាញខ្លួនឡើងតាំងពីឆ្នាំ2014 ក៏ដោយ តែ Trend នេះទើបតែមកល្បីមែនទែននៅឆ្នាំ2016 ក្រោយពី Xiaomi Mi Mix បង្ហាញខ្លួនឡើង និងចាប់ផ្ដើមតាមគ្នាមកក្រោយបង្ហាញខ្លួន Samsung Galaxy S8 ជាមួយ Note 8 និង iPhone X ហ្នឹងឯង។ សម្រាប់ Feature គ្មានគែម ភាគច្រើននឹងចេញមកព្រមជាមួយទំហំ18ៈ9 មានចំណុចល្អត្រង់ដែលធ្វើឱ្យទូរស័ព្ទកាន់តែស្អាតខ្លាំងឡើង និងជួយឱ្យមានអេក្រង់កាន់តែធំឡើង តែតួគ្រឿងមិនធំតាម។ តែយ៉ាងណាក៏ដោយ ក៏នៅមានចំណុចមិនល្អដែលរង់ចាំការកែសម្រួលដែរ ដូចជា App មួយចំនួននៅមិនទាន់ Support ការបង្ហាញទិន្នន័យជាមួយអេក្រង់នេះ និងការមើលវីដេអូបែបបើកឱ្យពេញអេក្រង់ដែលអាចធ្វើឱ្យរូបភាពត្រូវ Crop បាត់អស់មួួយផ្នែក។
កាមេរ៉ាគូ (oo)
តពី Trend គ្មានគែមមក ក៏មាន Feature ដែលចេញមកមួយគូៗដូចជា Dual Camera ឬកាមេរ៉ាក្រោយមួយគូ (oo) ដែលសព្វថ្ងៃនេះចាប់ផ្ដើមមាននៅលើស្មាតហ្វូនស្ទើរតែគ្រប់ស៊េរីទៅហើយ ដូចជា Samsung ដែលទើបតែដាក់មកនៅក្នុង S9+ ថ្មីៗនេះឯង និងខាង Sony ក៏ចាប់ផ្ដើមបង្ហើប Feature នេះឱ្យឃើញដែរ ដែលគេរំពឹងថានឹងចេញមកនៅក្នុង “Sony Xperia XZ Pro” ដែលកំពុងនាំគ្នាល្បីថ្មីៗនេះឯង។ ចំណែកកាមេរ៉ាគូនៅទីនេះក៏មានន័យពីលេនស៍ពីរគ្រាប់ដែរ ចែកចេញជាលេនស៍ Telephoto និងលេនស៍ Wide ឬ Normal មកបំពាក់នៅជិតៗគ្នា ដោយការធ្វើការក៏នឹងឆ្លាស់គ្នាតាមការប្រើការ។
កាមេរ៉ាវីដេអូ Slow Motion
សម្រាប់ Feature នេះ គឺការថតវីដេអូបែបស្លូម៉ូស្សិន(រូបភាពយឺត) ដូចឈ្មោះហៅអ៊ីចឹងធ្វើឱ្យយើងសប្បាយជាមួយនឹងការថតវីដេអូកាន់តែខ្លាំងឡើង ហើយសម្រាប់ប្រែ៊នដ៍ដំបូងគេដែលធ្វើបាននោះគឺ Sony លើស៊េរី XZ1 កាលពីឆ្នាំទៅ ដែលអាចថតវីដេអូស្លូម៉ូស្សិនបែប 960fps ក្នុងមួយវិនាទី ក្នុងភាពលម្អិតច្បាស់កម្រិត HD (720p) រហូតកាលពីពេលថ្មីៗនេះខាង Samsung បានបង្ហាញ Galaxy S9 និង S9+ ដែលចេញមកព្រមជាមួយកាមេរ៉ា Slow Motion ដូចគ្នាដែរ ធ្វើឱ្យ Feature នេះត្រូវបានគេលើកមកនិយាយជាថ្មីម្ដងទៀត (ដោយសារកម្លាំងទីផ្សាររបស់ Samsung) តែមិនទាន់បានល្បីប៉ុន្មានផង ខាង Sony ក៏បង្អួត Feature ថតវីដេអូស្លូម៉ូស្សិនបែប 960fps ដែលមានភាពលម្អិតច្បាស់ Full HD (1080p) ចេញមកទៀតក្នុង XZ2 ដែលទើបបង្ហាញខ្លួនថ្មីៗនេះឯង។
RAM 6GB+
នាំគ្នាមកមើលផ្នែកលក្ខណសម្បត្តិវិញម្ដង។ បច្ចុប្បន្នស្មាតហ្វូនស្ទើរតែគ្រប់ស៊េរីតែងចេញមកព្រមជាមួយ RAM 4GB ឡើងតែម្ដង ដើម្បីការប្រើការដែលរលូនល្អ តែដោយសារតែមានទាំង App ដែលត្រូវប្រើRAMធំឡើង និងរួមជាមួយទង្វើរបស់អ្នកប្រើដែលចូលចិត្តបើក App ច្រើនដំណាលៗគ្នា(Multitasking) ធ្វើឱ្យត្រូវប្រើទំហំផ្ទុកក្នុងផ្នែកនេះច្រើនផងនោះ ទើបថ្មីៗនេះខាង Asus បានបង្ហាញខ្លួន Zenfone 5Z ដែលចេញមកព្រមជាមួយRAMឱ្យជ្រើសរើសដល់ទៅ 8GB តែម្ដង ចំណែកស៊េរីផ្សេងៗទៀតក៏ចេញមកព្រមជាមួយ RAM 6GB ដូចជា Samsung Galaxy S9+, LG V30S ThinQ និង Nokia 8 Sirocco ជាដើម ទើបក្លាយជាថា RAM ស្មាតហ្វូនសម័យថ្មីនេះត្រូវតែចេញមកព្រមជាមួយទំហំ 6GB ឡើងទៅតែម្ដង។
កន្លែងស្គែនខ្ចៅម្រាមដៃក្រោមអេក្រង់
ពេលនេះមានប្រែ៊នដ៍តែមួយគត់ដែលសម្រុកធ្វើ គឺ Vivo ដោយនៅក្នុងពិធីតាំងពិព័រណ៍ CES 2018 Vivo ក៏បានបង្ហាញគំរូដើមរួចរាល់ហើយនៅក្នុងស៊េរី Vivo X20 Plus UD បែបពេញលេញជាលើកដំបូង និងកាលពីពេលថ្មីៗនេះ ក៏មានបង្ហាញគំរូមួយម៉ូដែលទៀតក្នុងឈ្មោះថា “Apex” ដែលចេញមកព្រមជាមួយស្គែនស្នាមខ្ចៅម្រាមដៃក្រោមអេក្រង់ដូចគ្នា តែលើកនេះកន្លែងស្គែនធំទូលាយជាងមុនច្រើន និងក្រៅពីស្គែនស្នាមខ្ចៅម្រាមដៃក្រោមអេក្រង់ហើយ នៅចេញមកព្រមជាមួយអេក្រង់គ្មានគែមទៀតផង។
e-SIM
ទោះជានៅមិនទាន់មាននៅក្នុងស្មាតហ្វូនក៏ដោយ តែគេជឿថា នៅពេលខាងមុខនឹងប្រាកដជាមានមិនខានក្រោយពីខាង Apple បានញាត់ Feature នេះនៅក្នុង Apple Watch Series 3 ដែលបានដាក់លក់នៅក្នុងប្រទេសក្នុងតំបន់អា-ស៊ីរួចហើយ។ សម្រាប់ e-SIM នេះគឺជាស៊ីមកាតបែបថ្មី ដែលពីមុនធ្លាប់ជាឈិពក្នុងរូបរាងជាកាតខ្នាតតូចមួយ ឥឡូវប្ដូរមកជាឈិពបង្កប់នៅក្នុងឧបករណ៍តែម្ដង ហុចផលឱ្យឧបករណ៍នោះមិនអាចដោះប្ដូរស៊ីមកាតបានឡើយ តែជំនួសដោយចំណុចល្អមកវិញគឺ មិនចាំបាច់ធ្វើកន្លែងដាក់ស៊ីម-កាតនាំឱ្យខាតទីកន្លែង ធ្វើឱ្យអ្នកច្នៃម៉ូដស្មាតហ្វូន ឬឧបករណ៍ដទៃទៀតមានទីកន្លែងសម្រាប់ដាក់ Feature បន្ថែមបានកាន់តែច្រើនឡើង។
AI
ក្នុងឆ្នាំកន្លងទៅ យើងបានភ្ញាក់ផ្អើលជាមួយស្មាតហ្វូនដែលចេញមកព្រមជាមួយខួរក្បាលសិប្បនិម្មិត(Artificial Intelligence) ឬ AI នៅខាងក្នុង ដែលជួយឱ្យស្មាតហ្វូនមាន Feature ថ្មីៗតាមមកជាច្រើន ដោយតួនាទីដែលលេចធ្លោបំផុត ក៏ប្រហែលជាគេចមិនផុតពីរឿងកាមេរ៉ាដែលក្រៅតែពីជួយឱ្យថតរូបបានស្អាតហើយ នៅជួយធ្វើជាកែវភ្នែកវិសេសដែលអាចវិភាគវត្ថុនៅចំពីមុខបានទៀតផង ដូចជា Bixby នៅក្នុង Samsung Galaxy ឬការបកប្រែភាសាតាមរយៈកាមេរ៉ាដោយ Google Assistant នៅក្នុងស្មាតហ្វូន Android សឹងតែគ្រប់ម៉ូដែល ហើយខាង Apple ក៏មាន Siri ដែលនៅគូគ្នាជាមួយ iPhone តាំងពីណាពីណីមកហើយ ដោយវាជួយឱ្យយើងអាចបញ្ជាតាមរយៈសំឡេងបានតែម្ដង ធ្វើឱ្យការប្រើការស្មាតហ្វូនកាន់តែមានភាពសម្បូរបែបច្រើនឡើង ដែលនាពេលអនាគតនឹងរឹតតែសម្បូរបែបជាងនេះទៅទៀត។
AR
សម្រាប់ AR ឬ Augmented Reality ការបង្ហាញរូបភាពដូចរូបភាពពិតនៅក្នុងពិភពនៃការពិត ឬនិយាយងាយៗក៏គឺ Feature 3D Emoji ឬ Animoji ដែលយើងឃើញមាននៅក្នុង Galaxy S9/S9+ និង iPhone X ហ្នឹងឯង។ ដែលវានឹងដាក់រូបភាពពីលើរូបភាព Emoji បែប 3D លើផ្ទៃមុខរបស់យើងពិតតាមរយៈកាមេរ៉ាស្មាតហ្វូន។ ក្រៅពីផ្នែកនេះហើយ ក៏នៅមានការប្រើរួមជាមួយវ៉ែនតា Mixed Reality ឬ MR ផងដែរដែលជួយឱ្យមើលឃើញរូបភាព AR បានតាមរយៈភ្នែកខ្លួនយើងតែម្ដង ដោយមិនចាំបាច់មើលតាមរយៈអេក្រង់ស្មាតហ្វូនដូចពីមុនឡើយ។
ប្រព័ន្ធ Security ថ្មី
ប្រព័ន្ធ Security ឬ Feature ការពារសុវត្ថិភាពនៅទីនេះ គឺមានទាំង Feature ដោះសោ និងប្រព័ន្ធសុវត្ថិភាពផ្ទៃក្នុងដែលភាគច្រើនមាននៅក្នុងប្រព័ន្ធប្រតិបត្តិការស្រាប់ហើយ ដោយមានអាប់ឌែតថ្មីជារៀងរាល់ខែ។ តែមើលទៅហាក់ដូចជាមិនទាន់គ្រប់គ្រាន់នៅឡើយ បន្ទាប់ពីមួយរយៈកន្លងមកនេះមានរបាយការណ៍រឿងស្មាតហ្វូនត្រូវបានហ៊ែកជាញឹកញាប់នោះ ទើបមានការបង្ហាញស្មាតហ្វូនស៊េរីថ្មីដែលចេញមកព្រមជាមួយប្រព័ន្ធការពារសុវត្ថិភាពកម្រិតខ្ពស់ដូចជា SikurPhone ស្មាតហ្វូនសែស្រឡាយ Cryptocurrency ដែលចេញមកព្រមជាមួយ e-Wallet នៅក្នុងម៉ាស៊ីនជាមួយប្រព័ន្ធការពារសុវត្ថិភាពកម្រិតខ្ពស់ ដែលខាង Samsung ក៏មានបង្ហាញនៅក្នុង Galaxy Note 8 និង Galaxy S8 ស៊េរី Enterprise Edition (EE) ផងដែរ។ គេជឿថា ស្មាតហ្វូនស៊េរីថ្មីៗតទៅទៀតនឹងចេញមកព្រមជាមួយប្រព័ន្ធការពារសុវត្ថិភាពដែលកាន់តែរឹងមាំឡើងមិនខាន៕

May 7, 2018
ដំណាំ សាលាដ
សាលាដ ឬឈ្មោះខាងវិទ្យាសាស្រ្តហៅថា Lactuca sativaជារុក្ខជាតិដំណាំដែលមានដែនដីកំណើតទាំងនៅក្នុងទ្វីបអាស៊ី និងទ្វីបអឺរ៉ុប ជាដំណាំតែមួយរដូវ មានដើមធំខ្លី ស្លឹកញឹក និងលាស់ធំចេញពីថ្នាំងជាកញ្ចុំ អាចក្ដោបត្រួយ ឬមិនក្ដោបត្រួយក៏មាន។ មានលក្ខណៈរូបរាង និងពណ៌ខុសប្លែកពីគ្នា ដោយទាំងអស់នេះអាស្រ័យលើពូជរបស់វា ដោយពូជខ្លះអាចមានស្លឹកក្រាស់រឹង តែពូជខ្លះទៀតបែរជាមានស្លឹកទន់ស្រួយ មានពណ៌ត្រួយចេក រហូតទៅដល់ពណ៌បៃតងចាស់ ពណ៌ស្ករលាយក្រហម ពណ៌ក្រហម និងពណ៌ស្ករតែម្ដងជាដើម។ ក្រៅពីនេះ ដើមសាលាដនៅមានប្រព័ន្ធឫសកែវដែលអាចរីកលូតលាស់ចុះទៅក្នុងដីបានយ៉ាងឆាប់រហ័ស។ កញ្ចុំផ្កាមានរូបរាងបែប Panicle មានកម្ពស់ជាមធ្យមពី6-12សង្ទីម៉ែត្រ ប្រកបដោយផ្កាពី10-25ផ្កា/កញ្ចុំ។ ស្រទាប់ផ្កាមានពណ៌លឿង ឬពណ៌សលាយលឿង។ ផ្កានឹងរីកនៅពេលព្រឹក ជាពិសេសក្នុងអំឡុងពេលដែលមានសីតុណ្ហភាពទាប។
ការដាក់ដាំ
• ការត្រៀមដី: ភ្ជួរដាស់ដីឱ្យជ្រៅទៅក្រោមប្រមាណ30-40សង្ទីម៉ែត្រ រួចហាលដីទុកចោលឱ្យស្ងួត7-10ថ្ងៃ បន្ទាប់មករាស់កិនកម្ទេចដីឱ្យល្អិតមុននឹងដាក់ជីលាមកគោស្ងួតចូលទៅក្នុងដី ប្រមាណជា 2 – 3 ក្នុងទំហំដី 10 X 100 ម៉ែត្រ និងជីរូបមន្តស្មើ 15-15-15 បរិមាណ30-50គីឡូក្រាម រួចរាស់ត្រឡប់ឱ្យដីនិងជីចូលគ្នា បន្ទាប់មកទើបលើកជារងកម្ពស់ប្រមាណជា 30 សង្ទីម៉ែត្រ X ទទឹង120 សង្ទីម៉ែត្រ X បណ្ដោយដី។
• វិធីដាំ: ក្រោយពីត្រៀមរងរួចរាល់ហើយ ចូរគ្របពីលើដោយចំបើងស្ងួតស្ដើងៗ ស្រោចទឹកឱ្យជោក មុននឹងព្រោះគ្រាប់ពូជសាលាដប្រមាណជា300-500ក្រាម(3-5ខាំ)ក្នុងទំហំដីដូចខាងលើ និងព្រោះឱ្យសព្វលើរង រួចស្រោចទឹក1ដងទៀត។ នៅពេលកូនសាលាដចាប់ផ្ដើមលាស់មានស្លឹកពិត2-3សន្លឹក ចូរដកដើមណាដែលមិនសូវល្អ ឬដើមមិនសូវរឹងមាំចោល ដោយទុកចន្លោះ25 ពីមួយគុម្ពទៅមួយគុម្ព 25សង្ទីម៉ែត្រសម្រាប់ការដាំសាលាដស្លឹក និងទុកចន្លោះ 40 សង្ទីម៉ែត្រសម្រាប់ការដាំសាលាដពូជស្លឹកក្ដោបត្រួយ។
វិធីមើលថែទាំ
• ការស្រោចទឹក: ចូរស្រោចទឹករាល់ថ្ងៃឱ្យដល់គល់សាលាដ មួយថ្ងៃ2ដង ព្រឹក និងល្ងាច តែកុំស្រោចរហូតដល់បែកភក់។ បន្ទាប់ពីនោះក៏ប្ដូរមកស្រោចទឹកមួយថ្ងៃខានមួយថ្ងៃវិញ ហើយក្នុងរយៈពេលដែលបន្លែសាលាដកំពុងក្ដោបស្លឹកត្រួយ ចូរកុំស្រោចទឹកឱ្យត្រូវស្លឹកត្រួយ ព្រោះអាចនឹងធ្វើឱ្យកើតរោគរលួយស្លឹកបាន។
• ការដាក់ជី: ប្រើជីរូបមន្ត 46-0-0 ឬ 25-7-7 ក្រោយពេលដាក់ដាំហើយ7-10ថ្ងៃក្នុងអត្រា30-50គីឡូក្រាមក្នុងទំហំដី15 X 100 ម៉ែត្រ និងនៅពេលអាយុបានប្រមាណជា25-30ថ្ងៃ ចូបន្ថែមជីរូបមន្ត 16-16-16 ក្នុងអត្រា30-50គីឡូក្រាមដូចគ្នា។
• ការការពារ និងកម្ចាត់សត្រូវដំណាំ: ចូរបាញ់ទឹកចម្រាញ់ចេញពីរក្ខជាតិ ដូចជា ស្លឹកស្ដៅស្លឹកទន្ន្រានខែត្រ ស្លឹកម្រេច ឬស្បៃរឿងជាដើមទៅលើដើម និងស្លឹក ដើម្បីការពារសត្វដង្កូវមូរស្លឹក និងសត្វល្អិតចង្រៃផ្សេងៗ ដោយត្រូវបាញ់រៀងរាល់5-7ថ្ងៃម្ដង ឬអាចដាំដើមផ្កាស្បៃរឿងនៅតាមសងខាងរងផងក៏បាន។
វិធីប្រមូលផល
អាយុការប្រមូលផលបន្លែសាលាដ គឺប្រមាណជា40-50ថ្ងៃ (បន្ទាប់ពីពេលព្រោះគ្រាប់ពូជ)។ គួរជ្រើសរើសប្រមូលផលនៅពេលដែលស្លឹកសាលាដនៅខ្ចី ស្រួយ និងមិនស្វិត រឹង រីឯការរក្សាទុកវិញ គួរទុកដាក់នៅក្នុងកន្លែងដែលមានសីតុណ្ហភាពត្រជាក់ និង មិនត្រូវពន្លឺថ្ងៃ៕

May 7, 2018