Category: សង្គម និងសេដ្ឋកិច្ច

អ្នកនាង ម៉ៅ ស៊ីណាត រន្ធត់ចិត្ត និងខ្នះខ្នែងមើលថែទាំស្វាមីជួបគ្រោះថ្នាក់ចរាចរណ៍
កាលពីរាត្រីថ្ងៃទី20 ខែឧសភា ឆ្នាំ2018 ស្វាមីរបស់តារាចម្រៀង អ្នកនាង ម៉ៅ ស៊ីណាត បានទទួលរងគ្រោះថ្នាក់ចរាចរណ៍ ហើយត្រូវបានបញ្ជូនទៅសង្រ្គោះបន្ទាន់នៅមន្ទីរពេទ្យ ព្រះកេតុមាលា។ នេះបើតាមគណនីហ្វេសប៊ុករបស់តារាចម្រៀងស្រីរូបនេះ ដែលគេមើលឃើញថា អ្នកនាងពិតជាមានក្ដីរន្ធត់ចិត្ត និងមិនដាច់អាល័យចំពោះស្វាមីអ្នកនាងឡើយ ពោលគឺ អ្នកនាងបានខ្នះខ្នែងមើលថែរក្សា និងអង្គុយកំដរស្វាមីនៅក្នុងមន្ទីរពេទ្យមួយយប់ទល់ភ្លឺតែម្ដង។
គួរបញ្ជាក់ផងដែរថា ហេតុការណ៍នេះបានកើតឡើងនៅវេលាម៉ោងប្រមាណជា 10យប់នៅម្ដុំចំណុចអូឌឹម ជិតទីតាំងបម្រើការរបស់ស្វាមីអ្នកនាង ម៉ៅ ស៊ីណាត ដោយលោក វិសាល ត្រូវបានគេឃើញជិះម៉ូតូត្រឡប់មកផ្ទះ ហើយក៏បានបុកគ្នាពេញទំហឹងជាមួយនឹងរ៉ឺម៉កម៉ូតូកង់3 ដែលបត់ទាំងទទឹងទិស ដែលបណ្ដាលឱ្យស្វាមីអ្នកនាង ម៉ៅ ស៊ីណាត ដួលបោកក្បាលបែករយះ និងត្រូវបានក្រុមគ្រូពេទ្យអះអាងថា លោកត្រូវប្រឈមនឹងការបាក់ឆ្អឹងខាងក្នុងមួយចំនួន ឯរ៉ឺម៉កកង់បីនោះរត់បាត់ស្រមោល។
លោកត្រូវបានអ្នកនាង ម៉ៅ ស៊ីណាត បញ្ជូនទៅសង្គ្រោះបន្ទាន់នៅមន្ទីរពេទ្យលោកសង្ឃ ប៉ុន្តែត្រូវបានបញ្ជូនចេញនៅប៉ុន្មានម៉ោងក្រោយ ដោយសារតែស្វាមីអ្នកនាង ម៉ៅ ស៊ីណាត មានក្របខ័ណ្ឌជាទាហាន ហើយត្រូវបានគេស្នើឱ្យទៅព្យាបាលនៅមន្ទីរពេទ្យព្រះកេតុមាលា ដែលត្រូវគេស្គាល់ថាជាពេទ្យទាហានវិញ៕
May 21, 2018
ភ្លៅជ្រូកបំពងពិសេស
ជើងជ្រូកបំពង គឺជាមុខម្ហូបមួយប្រភេទដែលមានរសជាតិឈ្ងុយឆ្ងាញ់យ៉ាងពិសេសហើយក៏ជាមុខម្ហូប ដែលត្រូវបានភោជនីយដ្ឋាន Motor Café ជ្រើសធ្វើជាអាហារប្រចាំហាងផងដែរ។ ចំពោះមុខម្ហូបមួយនេះ ហាក់មានការពិបាកក្នុងការចម្អិន និងច្រើនវគ្គបន្តិច ប៉ុន្តែទោះជាយ៉ាងណា បន្ទាប់ពីឆ្លងកាត់នូវការចម្អិនរួចរាល់នោះពិតជាមិនធ្វើឱ្យលោកអ្នកស្តាយកម្លាំងនោះឡើយ។ ជាមួយគ្នានេះ ភ្លៅជ្រូកបំពងពិសេសនេះត្រូវបានគេទទួលទានជាមួយនឹងទឹកជ្រលក់ពិសេស រួមនឹងជ្រក់ស្ពៃក្ដោបផងដែរ។
គ្រឿងផ្សំ
• ភ្លៅជ្រូក 1.2Kg
• ការ៉ុត 0.3Kg
• ខ្ទឹមបារាំង 0.3Kg
• ខឹ្ទមខ្យល់ 0.2Kg
• ដើមសេរី 0.2Kg
• អំបិល 25g
វិធីចម្អិន
យកភ្លៅជើងជ្រូកទៅលាងទឹកឱ្យស្អាត រួចដាំទឹកឱ្យពុះដាក់អំបិល ការ៉ុត ខ្ទឹមបារាំង ខ្ទឹមខ្យល់ ដើមសេរី និងដាក់ភ្លៅជ្រូកចំហុយជាមួយគ្នារហូតឆ្អិន និងកាត់បន្ថយជាតិខ្លាញ់ បន្ទាប់មកយកទៅបំពងជាមួយប្រេងឆាដែលក្តៅខ្លាំងរហូតស្រួយជាការស្រេច។
គ្រឿងផ្សំទឹកត្រីជ្រលក់ជើងជ្រូក
• ម្ទេសខៀវ 80g
• ម្ទេសហឹរ 80g
• ខ្ទឹមស 70g
• ស្ករស 120g
• ក្រូចឆ្មារ 100g
• ទឹកត្រី 80g
• ម្សៅស៊ុប 2tbs
• អំបិល 2tbs
វិធីធ្វើទឹកត្រីជ្រលក់ជើងជ្រូក
យកខ្ទឹមសមកបុកជាមួយម្ទេស រួចដាក់ស្ករសចូល កូរឱ្យសព្វ បន្ទាប់មកដាក់ទឹកត្រី ម្ស៉ៅស៊ុប អំបិល និងទឹកក្រូចឆ្មារចូលជាការស្រេច។
គ្រឿងផ្សំជ្រក់ស្ពៃក្ដោប
• ស្ពៃក្ដោប
• ទឹកខ្មេះ
• អំបិល
• ស្រាស
• Juniper Berries
វិធីធ្វើជ្រក់ស្ពៃក្ដោប
យកស្ពៃក្ដោបទៅលាងទឹកឱ្យស្អាត រួចយកស្ពៃក្ដោបមកឈូស បន្ទាប់មកដាំទឹកឱ្យពុះ ដាក់អំបិល ស្ដៃក្ដោប ស្រាស ទឹកខ្មេះ និង Juniper Berries រួចហើយទុករយៈពេល2ម៉ោងជាការស្រេច៕
May 20, 2018
នៅពេលខ្ញុំតាំងគភ៌ចូលខែទី2
មកដល់ខែទី2នេះ តួកំណើតនៅខាងក្នុងគភ៌នឹងមានរូបរាងកាន់តែស្រដៀងមនុស្សឡើងហើយ បើវាស់ពីប្រវែងក៏ប្រមាណជា11/4អីុញ និងមានទម្ងន់ប្រមាណជា10ក្រាម។ កូនរបស់អ្នកនៅក្នុងគភ៌ចាប់ផ្ដើមមានការលោតរបស់បេះដូង មានដៃ ជើង មានម្រាមដៃ ម្រាមជើង និងចាប់ផ្ដើមសាងឆ្អឹងច្រើនឡើងហើយ…។
ក្នុងខែទី2នៃការតាំងគភ៌ នឹងមានការប្រែប្រួលផ្សេងៗដែលស្ត្រីមានគភ៌ខ្លួនឯងអាចមានអារម្មណ៍ដឹងបានដូចខាងក្រោមនេះ។
– អស់កម្លាំងទន់ល្វើយ និងមានអារម្មណ៍ថាខ្លួនឯងគេងយូរជាងមុនច្រើនឡើង។ កាលពីមុនធ្លាប់គេងលក់68ម៉ោង នៅពេលនេះអាចនឹងពី7-10ម៉ោង តែទាំងអស់នេះ ក៏អាស្រ័យលើរាងកាយរបស់ស្ត្រីមានគភ៌ម្នាក់ៗដែរ។
– បត់ជើងតូចញឹកញាប់ជាងមុន រហូតអាចសង្កេតដឹងដោយខ្លួនឯង។
– ក្អួតចង្អោរ ឬចេញទឹកមាត់ច្រើននៅក្នុងមាត់ពេលបានធំុក្លិនអាហារអ្វីក៏ដោយ។
– ទល់លាមក។
– ឈឺក្រហាយក្នុងពោះ អាហារមិនរំលាយ ចុកឆ្អល់ពោះ។
– អ្នកខ្លះធុញទ្រាន់ចំណីអាហារ តែអ្នកខ្លះបែរជាឃ្លានញឹ្ញកញាប់។
– រមាស់សុដន់ សុដន់រីកធំឡើង ក្បាលសុដន់រីកធំ និងមានពណ៌ស្រអាប់ឡើង មើលឃើញសរសៃឈាមខៀវៗនៅលើសុដន់។
– ឈឺក្បាល ដូចគ្នានឹងអាការឈឺក្បាលវិលៗរបស់អ្នកញ៉ាំថ្នាំពន្យារកំណើតដែរ។
– វិលមុខ រកកល់ខ្យល់គញឹកញាប់។
– មានអារម្មណ៍ទើសទាល់ថប់ៗ តឹងណែនចង្កេះ ដោយសារតែពោះចាប់ផ្ដើមរីកធំឡើង និងពោះឆាប់តឹងឆ្អល់។
– អារម្មណ៍ឆាប់ប្រែប្រួលយ៉ាងមើលឃើញច្បាស់តែម្ដង ស្រដៀងគ្នានឹងអំឡុងពេលមុនមានវដ្តរដូវដែរ ដូចជា ឆាប់ខឹងមួម៉ៅ អ្នកខ្លះអាចដល់ថ្នាក់យំញឹកញាប់ មានអារម្មណ៍ភ័យខ្លាច និងរំភើបញាប់ញ័រលាយឡំគ្នា។
រឿងដែលគ្រូពេទ្យមើលពិនិត្យថែទាំគភ៌នឹងប្រាប់ឱ្យអ្នកធ្វើនៅក្នុងខែនេះ មានដូចតទៅ ៖
1. ថ្លឹងទម្ងន់ វាស់សម្ពាធឈាម។
2. ពិនិត្យជាតិស្ករ និងសារធាតុស៊ុតសនៅក្នុងទឹកមូត្រ។
3. ពិនិត្យមើលអាការហើម និងសរសៃឈាមត្បៀតនៅបរិវេណចុងជើង។
4. ត្រួតពិនិត្យអាការខុសប្រក្រតីផ្សេងៗទៀត(បើសិនមាន)។
ក្នុងខែនេះ ក្រៅពីអាការដែលបានរៀបរាប់មកខាងលើហើយ ស្ត្រីខ្លះអាចមានឡើងមុននៅលើមុខ អ្នកខ្លះស្បែកអាចស្ងួតបែកមានស្លាកស្នាម ដោយសារតែអ័រម៉ូននៅក្នុងរាងកាយដែលប្រែប្រួលហ្នឹងឯង។ វិធីប្រតិបត្តិដែលល្អនោះគឺ ញ៉ាំទឹកឱ្យបានច្រើន លាងសម្អាតមុខដោយសាប៊ូកូនក្មេង (សាប៊ូបែបខ្សោយ) ក្នុងមួយថ្ងៃ2-3ដង។ ស្ត្រីខ្លះ គ្រូពេទ្យអាចនឹងឱ្យញ៉ាំវីតាមីន B6 ដើម្បីជួយកាត់បន្ថយអាការស្ងួតបែករបស់ស្បែក តែរឿងដែលត្រូវប្រយ័ត្ននោះគឺ កុំទិញថ្នាំអ្វីមកញ៉ាំដោយខ្លួនឯងឱ្យសោះ ជាពិសេសបើមានកើតមុន ហាមទិញថ្នាំមកញ៉ាំ ឬលាបដោយចិត្តឯងជាដាច់ខាត ព្រោះថ្នាំព្យាបាលមុនប្រភេទខ្លះអាចបង្កគ្រោះថ្នាក់ដល់ទារកក្នុងផ្ទៃ ដូចជា ធ្វើឱ្យរលូត ឬពិការបាន៕
May 20, 2018
ប្អូនប្រុសនាយ ពែក មី ត្រូវឃាតករជិះឡានដេញបុករបួសធ្ងន់ធ្ងរកំពុងសម្រាកព្យាបាល
មុននេះបន្ដិច តារាកំប្លែងប្រចាំស្ថានីយទូរទស្សន៍ CTN គឺ នាយ ពែក មី បានបង្ហោះរូបភាពជាច្រើនសន្លឹក និងវីដេអូខ្លី ដែលលោកបាននិយាយ និងស្ដែងឱ្យដឹងថា ប្អូនប្រុសរបស់នាយ ត្រូវបានឃាតករចិត្តឃោឃៅ បើករថយន្ដដេញបុក រហូតដល់ប្អូនប្រុសភ័យស្លន់ស្លោ និងរងរបួសយ៉ាងធ្ងន់ធ្ងរ កំពុងសម្រាកព្យាបាលនៅក្នុងមន្ទីរពេទ្យ តែជាអកុសល ដោយសារតែសម្រាកព្យាបាលអស់រយៈពេលជាង 9 ថ្ងៃហើយ នៅមិនទាន់បានធូរស្បើយ ហើយកាន់តែមានអាការៈខ្លាំងជាងមុន រហូតដល់ក្អួតចេញឈាមនោះ ទើបតារាកំប្លែងរូបនេះ សម្រេចចិត្តចង់បញ្ចូនប្អូនប្រុសទៅព្យាបាលនៅប្រទេស វៀតណាម។
លោក ពែក មី បានរៀបរាប់នៅលើហ្វេសប៊ុកថា « នៅយប់ថ្ងៃទី10ខែឧសភា ឆ្នាំ2018នេះ ឃាតកជិះឡានដេញបុកប្អូនប្រុសខ្ញុំ សូមបងប្អូនជួយស៊ែរវីដេអូនេះ ឱ្យឃាតករបានឃើញផង យើងខ្ញុំបានដាក់ពាកក្យបណ្តឹងហើយ មកដល់ថ្ងៃនេះសមត្ថកិច្ចខណ្ឌ ឫស្សីកែវ មិនទាន់ហៅឃាតករមកដោះស្រាយបានទេ»។ គួរបញ្ជាក់ផងដែរថា នាយ ពែក មី បានអំពាវនាវដល់មន្ត្រីសមត្ថកិច្ចខណ្ឌ ឫស្សីកែវ មេត្តាជួយមានវិធានការណ៍ឱ្យបានលឿនជាងនេះ ដើម្បីជួយរកយុត្តិធម៌ និងដំណោះស្រាយជូនក្រុមគ្រួសារលោក។ ដើម្បីឱ្យកាន់តែជាក់ច្បាស់ សូមទស្សនាវីដេអូ នាយ ពាក់ មី ខាងក្រោមនេះ៖
May 19, 2018
នោះ!! តន់ ច័ន្ទសីមា ប្រតិកម្មយ៉ាងខ្លាំងចំពោះសារព័ត៌មានក្នុងស្រុកផ្សាយព័ត៌មានមិនពិតពីនាង
នៅពេលថ្មីៗនេះ តារាចម្រៀងស្រីវ័យក្មេង តន់ ច័ន្ទ សីមា បានចេញវីដេអូនៅលើបណ្ដាញទំនាក់ទំនងសង្គមហ្វេសប៊ុក រិះគន់ចំៗយ៉ាងខ្លាំងចំពោះគេហទំព័រសារព័ត៌មានក្នុងស្រុក ដែលបានចេញផ្សាយមិនពិតពីនាង ដោយបានសរសេរថា នាងស្រវឹងហើយបើករថយន្ដបុកគេ និងជ្រុលទៅបុករបងវត្តបន្ដទៀត នោះបើតាមសម្ដីតារាស្រីរូបនេះ បាននិយាយនៅក្នុងវីដេអូ។ យ៉ាងណាមិញ នាងក៏បានបកស្រាយពីហេតុការណ៍ច្បាស់លាស់ នាថ្ងៃកើតហេតុគ្រោះថ្នាក់ចរាចរណ៍នោះ។
គួររំឭកផផងដែរថា ក្រោយពេលកើតហេតុភ្លាមៗ តារាចម្រៀងស្រីរូបនេះបានប្រាប់ ប្រាប់សមត្ថកិច្ច និងអ្នកសារព័ត៌មានថា ខ្លួន និងមិត្តភ័ក្តិជាច្រើននាក់ទៀត ទើបតែចេញពីពិធីខួបកំណើតបានបើករថយន្ត Lexus ខាងលើ ធ្វើដំណើរតាមបណ្ដោយផ្លូវលេខ284 ទិសដៅពីលិចទៅកើតក្នុងល្បឿនលឿនល្មម និងបានបើកឆ្លងកាត់ផ្លូវលេខ173 តែបំពានស្លាកសញ្ញាចរាចរណ៍ ក៏ត្រូវរថយន្ត Camryពណ៌ក្រហម ធ្វើដំណើរតាមបណ្ដោយផ្លូវលេខ173 ទិសដៅពីត្បូងមកជើងក្នុងល្បឿនយ៉ាងលឿនមកបុក ទើបមិនទាមទារសំណង ហើយភាគីខាងរថយន្ត Camry វិញ ក៏មិនចង់មានរឿងវែងឆ្ងាយដែរ ទើបយល់ព្រមបញ្ចប់រឿងនៅមុខសមត្ថកិច្ចតែម្ដងទៅ។
ចង់ដឹងថា តារាស្រី តន់ ច័ន្ទសីមា ចេញមុខបកស្រាយហេតុការណ៍គ្រោះថ្នាក់ចរាចរណ៍ កើតឡើងយ៉ាងណានោះ សូមស្ដាប់ និងទស្សនាវីដេអូខាងក្រោមនេះ៖
May 19, 2018
លោក ខេមរៈ សិរីមន្ដ ធ្វើរឿងរំភើបចិត្តមួយដល់នាយ ក្ដឹប រហូតលាន់មាត់ថា…
ដូចដែលលោកអ្នកបានស្គាល់ហើយថា លោក ចាន់ សំណាង ហៅ ឌី ជេក្តឹប ជាតារាចម្រៀងរ៉េប និងជាអ្នកនិពន្ធមួយរូប ដែលទទួលបានការគាំទ្រខ្លាំងតាមរយៈ « រាំអ៊ីចេះ »កាលពីឆ្នាំមុន និងមានបទចម្រៀងល្បីៗជាច្រើនបទទៀត ដែលលោកបាននិពន្ធឱ្យកំពូលតារាចម្រៀង លោក ព្រាប សុវត្ថិ លោក ខេមរៈ សិរីមន្ដ កញ្ញា ឱក សុគន្ធកញ្ញា លោក និងអ្នកនាង មាស សុខសោភា បានច្រៀងបទចម្រៀងជាស្នាដៃរបស់លោក។ តែមួយរយៈចុងក្រោយនេះ សង្កេតឃើញលោកហាក់បីដូចជាមានជំងឺបាក់ទឹកចិត្តជាខ្លាំងជាមួយអាជីពសិល្បៈដែលខ្លួនបានប្រឡូកអស់ពេលជាង9ឆ្នាំមកនេះ។
ឌី ជេក្តឹប រមែងបង្ហាញឥរិយាថបប្លែកៗ ប្រៀបមនុស្សបែកសតិ តាមរយៈវីដេអូនៅលើគណនីហ្វេសប៊ុករបស់លោក រហូតដល់ថ្នាក់មហាជនគិតថា លោកជាបុរសកំពូលដ្រាម៉ា ស៊ីអារម្មណ៍ណាស់។ តែនៅពេលថ្មីៗនេះ ស្រាប់តែវត្តមានកំពូលតារាចម្រៀងនៅទ្រនំហង្សមាសលោក ខេមរៈ សិរីមន្ត ស្កាត់ទៅជួបឌីជេល្បីមួយរូបនេះ ដើម្បីលើកទឹកចិត្ត និងវិលត្រឡប់មកធ្វើការរួមគ្នាជាថ្មីម្ដងទៀតវិញ ដោយ ក្ដឹប បានអះអាងថា លោក សិរីមន្ដ ជាបុគ្គលមុនគេបង្អស់ដែលផ្ដល់តម្លៃ និងកត្តិយសចំពោះស្នាដៃនិពន្ធរបស់លោក។
នាយ ក្ដឹប បានរៀបរាប់ថា« អរុណសួស្ដីស្នាមញញឹមថ្មីលើសពីក្ដីស្រម៉ៃ! បងមន្ត! ហេតុអ្វីបងបង្ហាញខ្លួនពេលនេះចឹង? តើបងអត់ខ្លាចខូចខាតកិត្តិយសដោយសារប្អូនទេអី? បានជាហ៊ានមកលើកទឹកចិត្តប្អូនដល់ថ្នាក់នេះ
បងដឹងទេថាវត្តមានរបស់បងបានធ្វើឲ្យក្ដីស្រម៉ៃរបស់លោកប៉ាប្អូនបានសម្រេចហើយ ។ មិនគួរណាបុគ្គលដែលផ្ដល់តំលៃនិងកិត្តិយសដល់ស្នាដៃនិពន្ធរបស់ប្អូនមុនគេបង្អស់គឺជាបងអ៊ីចឹងសោះ (ពិតជាមិនខុសពីការរំពឹងទុករបស់ប្អូនមែន)។ នាយបន្ដបញ្ជាក់ទៀតថា « អ៊ីចឹង! តើអោយខ្ញុំគេចទៅងាប់នៅណាកើត (បើទេវតាឱកាសបានបង្ហាញវត្តមានហើយហ្នឹង) ។ ដូច្នេះ! ដល់វគ្គចម្រៀង230បទ កំណត់កម្មសិទ្ធិបញ្ញាលើថ្នាលស្នាដៃរបស់អ្នកនិពន្ធខ្មែរ (ដែលប្អូនតស៊ូ 9ឆ្នាំឡើងចង់ឆ្គួតមែនទែនម្ដងៗហើយ)»៕
May 19, 2018
រំភើបចិត្ត!! ខណៈឃើញតារាចម្រៀង ប៊ុត សីហា ងាកមកចូលរួមកិច្ចការសង្គម
នៅពេលថ្មីនេះ តាមរយៈបណ្ដាញទំនាក់ទំនងសង្គមហ្វេសប៊ុក លោក ប៊ុត សីហា បានមើលឃើញថា មានតារាចម្រៀងប្រុសស្រីល្បីឈ្មោះជាច្រើននឹងបង្ហាញវត្តមានក្នុងកម្មវិធីជួបជុំសំណេះសំណាលសាកសួរសុខទុក្ខ និងរួមគ្នាធ្វើសកម្មភាពសង្គមមួយចំនួនទៀតជាមួយក្មេងៗនៅសាលាដូងស្ថិតនៅលើភ្នំគិរីរម្យ។ នៅក្នុងនោះលោក ប៊ុត សីហា បានចូលរួមកិច្ចការជាមួយអង្គការ IKARE និងក្រោមការចូលរួមស្ម័គ្រចិត្ត និងបរិច្ចាកថវិការផ្ទាល់ខ្លួនពីសំណាក់សិល្បករដើម្បីសម្រួលទុកលំបាករបស់ក្មេងៗដែលរស់នៅតំបន់នោះ។
លោក ប៊ុត សីហា បានសរសេរប្រកាសប្រាប់មហាជនកាលពីថ្ងៃម្សិលមិញនៅលើហ្វេសប៊ុកខ្លួនថា « សួរស្តីពុកម៉ែបងប្អូន! តោះស្អែកជួបគ្នាម៉ោង7ព្រឹកនៅរង្វង់មូលចោមចៅ ហើយជុំគ្នាចេញតែម្តង។ បងប្អូនមិនបានទៅបើមានអីចូលរួមយកមកខ្ញុំ សីហា ចាំយកទៅ មានទឹកសុទ្ធក៏យកបាយ1ប្រអប់ក៏យក ត្រីខកំប៉ុង មីកញ្ចប់ ត្រីសាច់ សៀវភៅ សម្ភារៈផ្សេងៗ អ្វីក៏ដោយឱ្យតែយកមកខ្ញុំយកទៅចែកក្មេងៗនៅលើភ្នំទាំងអស់។ តោះស៊ែមួយៗជួបគ្នាណាគិរីរម្យស្អែក។ អ្នកណាមានអត់ស្អែកដល់ហើយ ហើយត្រូវការបន្ទះសូឡាជាច្រើនចាំបាច់ណាស់។ អូខេ! កម្មវិធីសប្បុរសធម៌មិនដែលសូវបានធ្វើទេ (លូវចូលរួមជាមួយIKARE ) ម្តងកុំខ្វល់សំខាន់វគ្គសប្បាយហើយ»។
គួបញ្ជាក់ផងដែរថា កម្មវិធីសប្បុរសធម៌នេះសង្កេតឃើញមានតារាចម្រៀងដួងនឹងបង្ហាញវត្តមាន ធ្វើការងារសង្គមមួយចំនួនមានដូចជា លោក ប៊ុត សីហា , លោក ដួង វីរៈសិទ្ធិ, កញ្ញា នាង គន្ធា, លោក នាង សុគន្ធ, លោក យឹម យន ជាដើម។ លោក ប៊ុត សីហា បានបញ្ជាក់លើគណនីយផ្ទាល់ខ្លួនបន្ថែម ដោយស្នើឲ្យមានការចូលរួមពីសំណាក់សប្បុរសជនដើម្បីជួយជាសម្ភារៈ អាហារ ជួយដល់កុមារដែលកំពុងសិក្សានៅតំបន់នោះ និងកំពុងប្រឈមនឹងការខ្វះខាត។ កម្មវិធីជួបជុំនេះក៏នឹងធ្វើការប្រមូលថវិកាដើម្បីទិញជាផ្ទាំងបន្ទះសូឡាសម្រាប់ផ្គត់ផ្គង់ចរន្តអគ្គីសនីនៅក្នុងសាលាផងដែរ៕
May 19, 2018
តុមយ៉ាំ បង្គាធំ
តុមយ៉ាំបង្គាធំ គឺជាមុខម្ហូបដ៏ល្បី និងកំពុងពេញនិយមប្រចាំភោជនីយដ្ឋាន Needa សាខាទួលគោក ដែលមានអាសយដ្ឋានស្ថិតនៅអគារលេខ58 ផ្លូវ337 សង្កាត់បឹងកក់1 ខណ្ឌទួលគោក រាជធានីភ្នំពេញ។ ដោយមានការណែនាំពីមេចុងភៅប្រចាំភោជនីយដ្ឋាន Needa សូមប្រិយមិត្តអ្នកអានទាំងអស់រៀនធ្វើមុខម្ហូបដែលពេញដោយឱជារស និងគ្រឿងផ្សំនៃមុខម្ហូបនេះដូចខាងក្រោមនេះ។
គ្រឿងផ្សំ
• បង្គាធំ
• ស្លឹកក្រូចសើច
• គល់ស្លឹកគ្រៃ
• ម្ទេសក្រហម ឬម្ទេសទុំ
• ផ្សិតម្ជុល
• ផ្សិតចំបើង
• ប៉េងប៉ោះ
• ខ្ទឹមក្រហម
• ជីវ៉ាន់ស៊ុយ
• កាពិផាវ
• ដុំស៊ុបខ្នរ
• រំដេង
• ទឹកត្រី
• ស្ករស
• រ៉តឌី
• ប្រេងម្ទេស
វិធីចម្អិន
ដាំទឹកស៊ុប រួចដាក់បន្លែចូល ដូចជា ផ្សិតចំបើង កាពិផាវ ដុំស៊ុបខ្នរ រំដេងគល់ស្លឹកគ្រៃ ស្លឹកក្រូចសើច និងប៉េងប៉ោះ។ រួចបន្ថែមខ្ទឹមក្រហម ម្ទេសទុំបុក និងផ្សិតម្ជុលចូល បន្ទាប់មកដាក់បង្គាធំចូល ដោយលាយជាមួយទឹកក្រូចឆ្មារបន្តិច ទឹកត្រី ស្ករស រ៉តឌី ជាមួយនឹងប្រេងម្ទេសបន្តិចចូល។ នៅពេលមើលឃើញថា ឆ្អិនល្មមហើយ សឹមលើកចេញពីភ្លើង ហើយរោយជីវ៉ាន់ស៊ុយបន្ថែមពីលើជាការស្រេច៕
May 19, 2018
លោក Mourinho ថា ជម្លោះជាមួយនឹងលោក Conte បញ្ចប់ហើយ មុនប៉ះគ្នារាត្រីនេះ
លោក Jose Mourinho អ្នកចាត់ការទូទៅរបស់ក្រុម Manchester United បាននិយាយថា ពេលខ្លះជម្លោះដ៏ជូររវាងរូបលោកផ្ទាល់ និងគ្រូបង្វឹករបស់ក្រុម Chelsea លោក Antonio Conte បានបញ្ចប់ហើយ នៅមុនពេលក្រុមទាំង២ជួបគ្នាក្នុងការប្រកួតពាន FA Cup វគ្គផ្តាច់ព្រ័ត្រ នៅរាត្រីនេះ។
គ្រូបង្វឹកទាំង២ បានធ្លាក់ចូលក្នុងជម្លោះពាក្យសម្តីចាប់តាំងពីរដូវកាលឆ្នាំ២០១៦-២០១៧ ដែលនៅពេលនោះលោក Mourinho បានរិះគន់លោក Conte សម្រាប់ការអបអរយ៉ាងខ្លាំងក្លា ក្រោយពីក្រុម Chelsea ដណ្តើមបានជ័យជម្នះក្នុងលទ្ធផល ៤-០ លើក្រុម Man United ស្របពេលដែលគ្រូបង្វឹកសញ្ជាតិអ៊ីតាលីរូបនេះ បានចោទប្រកាន់គូបដិបក្ខសញ្ជាតិព័រទុយហ្គាល់របស់លោកបង្កើតការរំខានដល់ក្រុម Chelsea។
ជម្លោះនេះ បានបន្តដល់រដូវកាលនេះ ខណៈដែលលោក Mourinho បានចាត់ទុកឥរិយាបថរបស់គ្រូបង្វឹកសញ្ជាតិអ៊ីតាលីរូបនេះ សម្តែងដូចជាតួថ្លុក និងបាននិយាយឌឺដងទាក់ទងនឹងការចោទប្រកាន់នៃការកំណត់លទ្ធផលទុកជាមុនប្រឆាំងនឹងលោក Conte ដែលត្រូវបានគេប្រកាសថា មិនមានកំហុសអ្វីឡើយក្នុងប្រទេសអ៊ីតាលី។ ដោយឡែក លោក Conte បានចាត់ទុកលោក Mourinho អតីតអ្នកចាត់ការទូទៅរបស់ក្រុម Chelsea ជា «បុរសកូនក្មេង និងជាបុរសក្លែងក្លាយ»។
លោក Mourinho បានប្រាប់សារព័ត៌មានព័រទុយហ្គាល់ Record ថា៖ «វាមិនមានបញ្ហាអ្វីឡើយ។ គាត់បានដើរមកចាប់ដៃរលាក់ ហើយខ្ញុំបានចាប់ដៃរលាក់វិញ។ យើងមានការធុញទ្រាន់។ ក្រោយពីការប្រកួតនៅទីក្រុង Manchester ខ្ញុំបានអញ្ជើញរូបគាត់មកកាន់ការិយាល័យរបស់ខ្ញុំ។ យើងបានជជែកគ្នា ហើយគ្មានអ្វីដែលមិនត្រឹមត្រូវឡើយ»។ ការប្រកួតនេះនឹងចាប់ផ្តើមនៅម៉ោង១១:១៥នាទីយប់៕
ប្រភពពី៖ Channel News Asia
May 19, 2018
តើក្នុងអំឡុងអាយុប៉ុន្មាន ទើបស័ក្តិសមនឹងការមានបុត្រខ្លាំងបំផុត?
ដោយយុគសម័យដែលផ្លាស់ប្ដូរ និងតិចណូឡូជីខាងវេជ្ជសាស្រ្តកាន់តែឈានទៅមុខនោះ បានធ្វើឱ្យគូស្នេហ៍ជាច្រើនគូកាន់តែក្ររៀបការ ខុសពីសម័យមុនដែលក្រោយពីរៀនចប់បានតែប៉ុន្មានឆ្នាំក៏នាំគ្នាមានគ្រួសារអស់ទៅហើយ តែមនុស្សនាពេលបច្ចុប្បន្ននេះភាគច្រើនច្រើនតែរង់ចាំឱ្យមានភាពសម្បូរបែបគ្រប់ផ្នែកជាមុនសិន ទើបសម្រេចចិត្តរៀបការ និងមានបុត្រ។
យ៉ាងណាក៏ដោយ លទ្ធផលនៃការសិក្សាស្រាវជ្រាវពី Royal College of Obstetrics and Gynecology ក្នុងប្រទេសអង់គ្លេសបានរកឃើញថា អំឡុងអាយុដែលស័ក្តិសមក្នុងការមានបុត្រខ្លាំងបំផុតគឺ 20-35ឆ្នាំ ព្រោះឱកាសប្រថុយនឹងការរលូតមានតិចតួចបំផុត ហើយថែមទាំងងាយស្រួលប្រសូតដោយមិនចាំបាច់ពឹងលើការវះប្រសូតដែលត្រូវការពេលវេលាសម្រាកព្យាបាលយូរជាងទៀតផង។
ក្រៅពីនេះ ក្នុងអំឡុងអាយុខាងលើនៅអាចទប់ទល់នឹងសភាវគេងមិនលក់ ឬគេងមិនឆ្អែតបានល្អជាងអំឡុងអាយុដែលច្រើនជាងនេះពេលដែលត្រូវភ្ញាក់ឡើងមកមើលកូនតូចនៅពេលយប់ព្រលប់ទៀតផង ក្នុងពេលជាមួយគ្នា ការមានបុត្រក្នុងអំឡុងអាយុ20ឆ្នាំ-35ឆ្នាំនេះថែមទាំងរឹងប៉ឹង និងមានកម្លាំងថាមពលខ្លាំងគ្រប់គ្រាន់ក្នុងការរួមធ្វើកិច្ចការងារជាមួយកូនៗក្នុងពេលលេងកីឡានៅពេលដែលពួកគេធំឡើងបានយ៉ាងរីករាយទៀតផង។
យ៉ាងណាក៏ដោយ លទ្ធផលនៃការស្រាវជ្រាវពីមហាវិទ្យាល័យ Aarhus University ក្នុងប្រទេសដាណឺម៉ាក បានរកឃើញថា អំឡុងអាយុដែលស័ក្តិសមក្នុងការអប់រំចិញ្ចឹមមើលថែកូន គួរតែស្ថិតក្នុងអំឡុងអាយុ33ឆ្នាំឡើងទៅ ព្រោះស្រ្តីជាម្ដាយនឹងមានវុឌ្ឍិភាពច្រើនគ្រប់គ្រាន់ក្នុងការអប់រំ និងទប់ទល់ជាមួយទង្វើរបស់កូនបាន។ ដោយសារតែក្មេងដែលមានអាយុចន្លោះ 7-11ឆ្នាំជាអំឡុងពេលដែលពិបាកចិញ្ចឹមមើលថែខ្លាំងបំផុត ដូច្នេះអ្នកម្ដាយដែលមានអាយុច្រើនឡើងបន្តិច នឹងមានភាពអំណត់អត់ធន់ និងចេះអត់ឱនអភ័យឱ្យកូនៗរបស់ខ្លួនបានខ្លាំងជាង ដោយលទ្ធផលនៃការវិភាគបានរកឃើញថា ពួកគាត់ច្រើនតែចៀសវាងពីការដាក់ទោសកូនៗដោយការវាយ ឬប្រើកម្លាំងបាយ៕
May 19, 2018