មនុស្សជោគជ័យក្នុងការងារ ឬការធ្វើអាជីវកម្មមួយឱ្យទទួលបានជោគជ័យត្រូវបានគេរកឃើញថា មានធាតុផ្សំជាច្រើន ដោយក្នុងនោះការធ្វើការងារជាក្រុមគឺជាចំណុចដ៏សំខាន់មួយដែលរុញច្រានឱ្យពួកគេរក្សាបាននូវនិរន្តរភាពដ៏វិជ្ជមានលើគ្រប់សកម្មភាពការងារ។
នាយកប្រតិបត្តិគ្រឹះស្ថានសិក្សាដើម្បីជោគជ័យ លោក កឹម អឿន បានលើកឡើងថា ការធ្វើការងារជាក្រុមជារឿងសំខាន់ណាស់សម្រាប់មនុស្សគ្រប់គ្នា ព្រោះវាអាចជួយឱ្យយើងសម្រេចគោលដៅបានយ៉ាងប្រសើរ។ លោកបញ្ជាក់ថា មនុស្សយើងម្នាក់ៗមានជំនាញខុសៗគ្នា ហើយយើងម្នាក់ៗមិនអាចចេះគ្រប់យ៉ាងនោះទេ ហេតុនេះកិច្ចការមួយចំនួនដែលយើងមិនអាចធ្វើបាន យើងអាចស្វែងរកជំនួយពីអ្នកដទៃដែលមានជំនាញច្បាស់លាស់មកជួយ ហេតុនេះទំនាក់ទំនងល្អនៅក្នុងក្រុមគឺជារឿងសំខាន់។ ម្យ៉ាងវិញទៀត ការដោះស្រាយបញ្ហាក្នុងការធ្វើការងាររួមជាមួយគ្នាក៏ជារឿងមួយមិនអាចខ្វះបានផងដែរ ព្រោះធ្វើការជាក្រុមតែងតែមានបញ្ហាមិនអាចចៀសផុតបានទេ ដោយសារមនុស្សម្នាក់ៗមានគំនិតខុសៗគ្នា។
លោក កឹម អឿន បាននិយាយថា៖ “វិធីសាស្ត្រសំខាន់ដែលធ្វើឱ្យយើងអាចដោះស្រាយបញ្ហាបានល្អសម្រាប់ខ្លួនឯង និងក្រុមការងារគឺ ការឆ្លើយតបដោយវិជ្ជមាន (proactive)។ ជាទូទៅ ប្រសិនបើយើងមិនប្រយ័ត្ន យើងអាចបញ្ចេញប្រតិកម្មតបខ្លាំងភ្លាមៗនៅពេលដែលយើងជួបរឿងមិនល្អ ឬមានអ្នកណាម្នាក់ប៉ះពាល់ដល់យើង តែប្រសិនបើយើងមានទម្លាប់ proactive យើងនឹងអាចទុកពេលសម្រាប់ខ្លួនឯងដើម្បីគិតឱ្យទូលាយហើយស្វែងរកដំណោះស្រាយប្រកបដោយភាពវិជ្ជមាន ដែលវាក៏អាចជំរុញឱ្យមានលទ្ធផលវិជ្ជមានដែរ។
លោក កឹម អឿន បានលើកឡើងផងដែរថា ក្រៅពីនេះ ការបើកចិត្តឱ្យទូលាយ ការធ្វើការងារប្រកបដោយភាពច្បាស់លាស់ និងយកចិត្តទុកដាក់ចំពោះគ្នា អាចជាគន្លឹះមួយក្នុងការធ្វើឱ្យក្រុមការងារទាំងមូលមានស្មារតីប្រកបដោយសាមគ្គីភាព។
លោក គង់ វិចិត្រា ស្ថាបនិកស្ថាប័នបណ្តុះបណ្តាល Asia Leading Academy បានលើកឡើងថា បញ្ហាជាច្រើនដែលអ្នកធ្វើការងារជាក្រុមជួបប្រទះ គឺការមានគំនិតខុសគ្នា និងការមិនយល់ច្បាស់ពីតួនាទីរបស់សមាជិកក្រុម។ ជាធម្មតាយើងគិតថា មនុស្សដែលមានគំនិតខុសគ្នាប្រហែលជាមិនអាចធ្វើការងារជាក្រុមជាមួយគ្នាបានទេ តែមនុស្សដែលមានគំនិតស្រដៀងគ្នា ក៏មានចំណុចជំទាស់គ្នាបានដែរ នៅពេលជួបឧបសគ្គ។ ហេតុនេះការប្រជុំដោះស្រាយបញ្ហា និងទទួលយកគំនិតយោបល់ពីគ្នាដើម្បីពិចារណា គឺជាចំណុចល្អមួយដែលធ្វើឱ្យក្រុមទាំងមូលមានស្មារតីរឹងមាំ ហើយការដោះស្រាយបញ្ហាក៏អាចធ្វើទៅបានល្អដែរ ព្រោះបើយើងមិនផ្តល់ឱកាសឱ្យបុគ្គលគ្រប់គ្នាក្លាយជាជនសំខាន់ក្នុងដំណោះស្រាយទេនោះ ពួកគេនឹងធ្វើអ្វីដោយឯកជន ហើយវាអាចនឹងធ្វើឱ្យស្មារតីក្រុមចុះទន់ខ្សោយ។
លោក គង់ វិចិត្រា បាននិយាយថា៖ “ការពន្យល់ពីតួនាទីឱ្យបានច្បាស់ប្រាប់សមាជិកម្នាក់ៗនៅក្នុងក្រុម ជាចំណុចខ្លាំងមួយដែលអាចធ្វើឱ្យក្រុមរឹងមាំ ហើយយើងក៏អាចធ្វើការងារជាមួយគ្នាដោយងាយស្រួលដែរ។
គ្រូបណ្តុះបណ្តាល និងជាស្ថាបនិកស្ថាប័នអប់រំរូបនេះបានលើកឡើងផងដែរថា នៅពេលដែលសមាជិកនៃក្រុមម្នាក់ៗយល់ច្បាស់ពីការចូលរួម និងគោលដៅសំខាន់របស់ក្រុមហើយ ពួកគេនឹងអាចបើកចិត្តទូលាយហើយគិតថាកិច្ចការងារទាំងនោះជារបស់ទាំងអស់គ្នា មិនមែនបំពេញតែកិច្ចការងាររបស់ខ្លួនចប់ហើយ ក៏លែងរវល់នោះទេ។ ម្យ៉ាងវិញទៀត ដើម្បីជំរុញឱ្យមានភាពជាអ្នកដឹកនាំកាន់តែខ្លាំងដល់សមាជិកក្រុមទាំងអស់ យើងអាចផ្តល់ឱកាសឱ្យសមាជិកម្នាក់ៗកាន់តែច្រើនឡើង ហើយព្យាយាមលើកទឹកចិត្ត និងបង្កើនភាពរីករាយឱ្យកាន់តែច្រើននៅពេលដែលពួកគេទទួលបានលទ្ធផលល្អក្នុងការងារ ព្រោះការលើកទឹកចិត្តនេះជាការជំរុញឱ្យស្មារតីក្រុមទាំងមូលរក្សាបាននូវភាពវិជ្ជមានយូរអង្វែង ហើយក៏ជាការបង្កើនល្បឿននៃការងារបានល្អជាងការស្តីបន្ទោសដែរ។
យុវនារីមួយរូបដែលជាអ្នកដឹកនាំក្រុមតស៊ូមតិកញ្ញា ឆាយ ឈីងស្រ៊ាន បានលើកឡើងថា ការធ្វើការងារជាក្រុមអាចធ្វើឱ្យយើងយល់ច្រើនណាស់ពីភាពជាអ្នកដឹកនាំ និងធ្វើឱ្យយើងមានភាពចាស់ទុំជាងមុន។ តែការងារនេះមិនស្រួលប៉ុន្មាននោះទេ ព្រោះថា ការធ្វើការងារជាមួយមនុស្សច្រើនដែលមានកម្រិតនៃការយល់ដឹង និងសកម្មខុសគ្នា ជាបញ្ហាមួយដែលតែងតែធ្វើឱ្យក្រុមទាំងមូលឈឺក្បាល។ សមាជិកក្រុមការងារខ្លះ ធ្វើតែអ្នកដែលសកម្មដដែលៗ ហើយអ្នកដែលមិនសកម្ម នៅតែខ្ជិល ឬនៅតែមិនជួយ ដែលពេលខ្លះធ្វើឱ្យអ្នកដែលខិតខំមានការបាក់ទឹកចិត្ត ឬបែកបាក់ក្រុមទៅវិញក៏មាន។ តែទោះជាយ៉ាងនេះក្តី វាមានវិធីសាស្ត្រក្នុងការដោះស្រាយ ហើយវាក៏មិនលំបាករហូតដល់អនុវត្តមិនកើតនោះដែរ។
កញ្ញា ឆាយ ឈីងស្រ៊ាន បាននិយាយថា៖ “ដើម្បីឱ្យក្រុមការងារមានតុល្យភាព យើងចាំបាច់ត្រូវបង្កើតលក្ខខណ្ឌ និងនិយាយគ្នាឱ្យបានច្បាស់លាស់ពីលក្ខខណ្ឌដោយហ្មត់ចត់ ហើយគ្រប់គ្នាត្រូវតែអនុវត្ត ឱ្យបានហ្មត់ចត់ដោយស្មារតីទទួលខុសត្រូវ។
កញ្ញា ឈីងស្រ៊ាន បានបញ្ជាក់ផងដែរថា ពេលខ្លះមុននឹងសម្រេចចិត្តធ្វើការតាមលក្ខខណ្ឌយ៉ាងម៉ឹងម៉ាត់ យើងក៏ត្រូវយល់ពីបញ្ហា និងឧបសគ្គសម្រាប់បុគ្គលដែលយើងមើលឃើញថាមិនសូវសកម្មនោះដែរ ព្រោះថា ពេលខ្លះ នៅពេលដែលយើងសម្រេចចិត្តខុស យើងនឹងអាចបាត់បង់សមាជិកល្អ តែបើយើងដឹងហេតុផលច្បាស់លាស់ យើងនឹងអាចធ្វើឱ្យក្រុមទាំងមូលមានភាពរីករាយ ហើយមានភាពរឹងមាំកាន់តែខ្លាំងឡើង។ នៅពេលដែលយើងគិតគូរពីសុខទុក្ខរបស់សមាជិកម្នាក់ៗ បានល្អយើងនឹងឃើញថា បុគ្គលដទៃក៏នឹងខិតខំកាន់តែខ្លាំងឡើង ព្រោះយើងមានស្មារតីល្អមួយគឺ ជួយគ្នាគ្រប់កាលៈទេសៈ រហូតសម្រេចគោលដៅរួមមួយ៕
