សង្គម និងសេដ្ឋកិច្ច - La Reine Media

ណាសា (NASA) អភិវឌ្ឍយានអវកាសថ្មីដើម្បីអូសទម្លាក់ស្ថានីយអវកាសអន្តរជាតិ

(សហរដ្ឋអាម៉េរិក) – ទីភ្នាក់ងារអវកាសអាម៉េរិក (ណាសា-NASA) កំពុងរៀបផែនការអភិវឌ្ឍយានអវកាសមួយដែលអាចអូសស្ថានីយអវកាសអន្តរជាតិ (ISS) ចេញពីគន្លងគោចរ ដើម្បីឱ្យ ISS រំលាយខ្លួនឯងពេលហោះធ្លាក់ឆ្លងកាត់បរិយាកាសផែនដី។

ក្នុងសន្និសីទសារព័ត៌មានកាលពីថ្ងៃទី 13 មីនា ណាសាឱ្យដឹងថា នឹងចំណាយប្រាក់ 180 លានដុល្លារដើម្បីផលិតយានអវកាសមួយសម្រាប់ជួយឱ្យ ISS ចាកចេញផុតពីគន្លងគោចរដោយសុវត្ថិភាព និងទម្លាក់ខ្លួនទៅលើសមុទ្រ ក្រោយពីបានបញ្ចប់ដំណើរការនៅឆ្នាំ 2030។ យានអវកាសថ្មីរបស់ណាសា ក៏នឹងគាំទ្រដល់សកម្មភាពចាកចេញពីគន្លងតារាវិថីរបស់បណ្ដាដៃគូសហការរបស់ ISS ដែលរួមមាន ស្ថាប័នអវកាសរបស់សហរដ្ឋអាម៉េរិក រុស្ស៊ី អឺរ៉ុប កាណាដា និងជប៉ុន។

គម្រោងនៅចំពោះមុខគឺការបញ្ឆេះម៉ាស៊ីនរបស់យានអវកាសដឹកទំនិញស្វ័យប្រវត្ត Progress របស់រុស្ស៊ី ដើម្បីឱ្យ ISS បន្ទាបខ្លួនជាបណ្ដើរ។ រុស្ស៊ីក៏បានប្រកាសដកខ្លួនពី ISS បន្ទាប់ពីឆ្នាំ 2024 ដើម្បីសាងសង់ស្ថានីយអវកាសផ្ទាល់ខ្លួន។ ព័ត៌មាននេះទំនងជាបានជំរុញឱ្យណាសាអភិវឌ្ឍយានអវកាសថ្មី។

ណាសាក៏បានឱ្យដឹងថា ថវិកាដែលត្រូវប្រើប្រាស់នៅឆ្នាំក្រោយសម្រាប់កម្មវិធី Artemis គឺ 8.1 ពាន់លានដុល្លារ។ កញ្ចប់ថវិកានេះនឹងជួយឱ្យណាសាអនុវត្តបេសកកម្ម Artemis 2 និង Artemis 3 នៅឆ្នាំ 2024 និង 2025។ នេះបើយោងតាមទំព័រ Space។

បេសកកម្ម Artemis 2 នឹងនាំអ្នកអវកាសហោះជុំវិញឋានព្រះចន្ទ ខណៈដែល Artemis 3 នឹងចុះចតក្បែរប៉ូលខាងត្បូងរបស់ព្រះចន្ទនៅក្នុងបេសកកម្មមានមនុស្សដំបូង រាប់ចាប់តាំងពីសម័យ Apollo 17 កាលពីឆ្នាំ 1972។ ចំណែក បេសកកម្ម Artemis 4 ដែលគ្រោងនឹងដំឡើងស្ថានីយអវកាស Gateway របស់ណាសានៅលើគន្លងគោចរព្រះចន្ទ នឹងត្រូវពន្យារពេលដល់ឆ្នាំ 2028 បើសិនជាគ្រប់យ៉ាងដំណើរការត្រូវតាមផែនការ៕

March 15, 2023

Erling Haaland បំបែកកំណត់ត្រារបស់ Mbappe ហើយឈ្នះដាច់លើ Messi, Ronaldo ក្រោយពី Man City ផ្ដួល Leipzig 7-0

(អង់គ្លេស) – ក្រោយជ័យជម្នះលើ Leipzig ក្នុងលទ្ធផល 7-0 កាលពីម្សិលមិញ Erling Haaland បានបំបែកកំណត់ត្រារបស់ Kylian Mbappe ក្លាយជាកីឡាករវ័យក្មេងបំផុតរកបាន 30 គ្រាប់នៅ Champions League។

Haaland ស៊ុតបញ្ចូលទីបានប្រាំគ្រាប់នៅក្នុងការប្រកួតឈ្នះ Leipzig 7-0 ក្នុងជើងទីពីរនៃវគ្គ 1/8។ អំឡុងពេលបង្កើតបាន hat-trick (រកបានបីគ្រាប់ក្នុងមួយប្រកួត) Haaland បានក្លាយជាកីឡាករវ័យក្មេងជាងគេ (អាយុ 22 ឆ្នាំ និង 236 ថ្ងៃ) ដែលរកបាន 30 គ្រាប់នៅឯពានរង្វាន់ Champions League។ កំណត់ត្រាចាស់គឺវ័យ 22 ឆ្នាំ និង 352 ថ្ងៃ របស់ Kylian Mbappe។

Haaland និង Mbappe សុទ្ធតែបានឆ្លងផុតឆ្ងាយពី Lionel Messi និង Cristiano Ronaldo។ Messi រកបាន 30 គ្រាប់នៅ Champions League ក្នុងវ័យ 23 ឆ្នាំ និងបីខែ ខណៈដែល Ronaldo រកបាន 30 គ្រាប់ក្នុងវ័យ 26 ឆ្នាំ និង 7 ខែ។

បើគិតអំពីចំនួនប្រកួត (25 ប្រកួត) Haaland ក៏ក្លាយជាកីឡាករដែលរកបាន 30 គ្រាប់ឆាប់ជាងគេបង្អស់នៅ Champions League។ ដោយមានឯតទគ្គកម្មនេះ Haaland ក៏យកឈ្នះលើកំណត់ត្រាចាស់របស់ Ruud Van Nistelrooy អតីតខ្សែប្រយុទ្ធរបស់ Man Utd និង Real ផងដែរ។

ទន្ទឹមនឹងនេះ Haaland ក៏តាមទាន់កំណត់ត្រាស៊ុតបញ្ចូលទីបានច្រើនជាងគេក្នុងមួយប្រកួតនៅ Champions League។ Messi ធ្លាប់កាន់កាប់កំណត់ត្រានេះ នៅពេលរកបានប្រាំគ្រាប់ក្នុងការប្រកួតជើងទីពីរនៃវគ្គ 1/8 នៅឆ្នាំ 2011-2012 ជារដូវកាលដែល Barca បានឈ្នះ Leverkusen 7-1។ ក្នុងខែតុលា 2014 Luiz Adriano ក៏បានក្លាយជាកីឡាករទីពីរដែលស៊ុតបញ្ចូលទីបានប្រាំគ្រាប់ក្នុងមួយប្រកួតនៅ Champions League ពេលដែល ក្រុម Shakhtar Donetsk បានឈ្នះ Bate Borisov 7-0 នៅវគ្គសន្សំពិន្ទុ។

ក៏ប៉ុន្តែ បើធៀបទៅនឹងសិស្សច្បងពីររូប ការស៊ុតបញ្ចូលទីប្រាំគ្រាប់ក្នុងមួយប្រកួតរបស់ Haaland នៅតែគួរឱ្យជក់ចិត្តជាងគេ។ ខ្សែប្រយុទ្ធរបស់ Man City ត្រូវការពេលតែ 57 នាទីប៉ុណ្ណោះដើម្បីសម្រេចបានលទ្ធផលនេះ ខណៈដែល Messi និង Adriano ត្រូវការ 84 នាទី និង 82 នាទី។

Haaland ក៏បំបែកកំណត់ត្រាស្ដីពីការរកបានគ្រាប់បាល់ច្រើនជាងគេក្នុងមួយរដូវកាលសម្រាប់ក្លឹប Man City។ ខ្សែប្រយុទ្ធជនជាតិន័រវែស កំពុងកាន់កាប់ 39 គ្រាប់ក្នុងរដូវកាល 2022-2023 ច្រើនជាងមួយគ្រាប់ធៀបនឹងកំណត់ត្រាចាស់របស់ Tommy Johnson ក្នុងរដូវកាល 1928-1929។

ពេលបានជួយឱ្យ Man City រកបានបីគ្រាប់នៅចុងការប្រកួតតង់ទីមួយ ចំនួន hat-trick របស់ Haaland ក៏បានកើនឡើងដល់ប្រាំលើកសម្រាប់ក្លឹបនៅគ្រាប់ការប្រកួតក្នុងរដូវកាលនេះ ច្រើនជាងបី hat-tricks បើធៀបនឹងកីឡាករដទៃនៅឯពានរង្វាន់ជើងឯកកំពូលៗចំនួនប្រាំនៅអឺរ៉ុប។ ខ្សែប្រយុទ្ធរបស់ន័រវែសនេះថែមទាំងក្លាយជាកីឡាករដែលកំពុងលេងនៅលីគកំពូលអង់គ្លេសដំបូងគេដែលរកបានប្រាំ hat-tricks ក្នុងមួយរដូវកាល រាប់ចាប់តាំងពី Harry Kane សម្រេចបានកាលពីរដូវកាល 2016-2017។

Haaland ធ្លាប់រកបាន 29 គ្រាប់ក្នុង 27 ប្រកួតសម្រាប់ Salzburg និង 86 គ្រាប់ក្នុង 89 ប្រកួតសម្រាប់ Dortmund។ កាលពីឆ្នាំ 2022 គាត់បានមកទាត់ឱ្យ Man City ក្នុងតម្លៃខ្លួន 66 លានដុល្លារអាម៉េរិក។ បច្ចុប្បន្ន Haaland នាំមុខគេក្នុងការដណ្ដើមយកតំណែងស្ដេចកម្ទេចសំណាញ់ទី Champions League 2022-2023 ដោយរកបានដប់គ្រាប់។ Haaland ស៊ុតបញ្ចូលទីបានច្រើនជាង Mohamed Salah ចំនួនពីរគ្រាប់ និងច្រើនជាង Mbappe បីគ្រាប់។ Mbappe អស់ឱកាសក្នុងការរកគ្រាប់បាល់បន្ថែម ព្រោះ PSG ត្រូវបានជម្រុះ។ ចំណែក Salah ក៏ទំនងជានឹងត្រូវមានវាសនាដូច Mbappe ដោយសារ Liverpool ចាញ់ Real 2-5 នៅជើងទីមួយនៃវគ្គ 1/8។

https://www.youtube.com/watch?v=HVuWbCAe0mU

Manchester City បានឡើងដល់វគ្គ 8 ក្រុមចុងក្រោយ (1/4) បន្ទាប់ពីបានឈ្នះ Leipzig 8-1 នៅវគ្គ 1/8។ ដោយសារតែនៅសល់ប្រហែលប្រាំប្រកួតទៀតនៅ Champions League នារដូវកាលនេះ Haaland ប្រាកដជារកបានគ្រាប់បាល់បន្ថែម និងបន្តបំបែកកំណត់ត្រានានាក្នុងវិស័យបាល់ទាត់៕

March 15, 2023

Volkswagen គ្រោងចំណាយជិត 200 ពាន់លានដុល្លារក្នុងប្រាំឆ្នាំសម្រាប់រថយន្តអគ្គិសនី

ក្រុមហ៊ុនអាល្លឺម៉ង់ Volkswagen មានគម្រោងវិនិយោគ 192.76 ពាន់លានដុល្លារអាម៉េរិកក្នុងប្រាំឆ្នាំខាងមុខ ទៅលើវិស័យមួយចំនួនមានដូចជា ការផលិតថ្មផ្ទុកអគ្គិសនី និងបណ្ដាសកម្មភាពនៅអាម៉េរិកខាងជើង រួមនឹងការកាត់បន្ថយការផលិតម៉ាស៊ីនចំហេះក្នុងចាប់ពីឆ្នាំ 2025។

Volkswagen កំពុងឆ្ពោះទៅកាន់គោលដៅលក់រថយន្តអគ្គិសនីឱ្យបាន 50% នៅទូទាំងសកលលោកនៅត្រឹមឆ្នាំ 2030 ក្នុងនោះ 2/3 នៃខ្ទង់វិនិយោគក្នុងប្រាំឆ្នាំខាងលើនឹងត្រូវបានប្រគល់ឱ្យផ្នែកផលិតរថយន្តអគ្គិសនី ហើយរថយន្តដែលលក់ចេញនឹងសម្រេចឱ្យបាន 56% នៅក្នុងផែនការប្រាំឆ្នាំដែលពួកគេបានលើកឡើងកាលពីមួយឆ្នាំមុននោះ។

ក្នុងផែនការថ្មីបំផុត ប្រាក់ជាង 16 ពាន់លានដុល្លារអាម៉េរិកនឹងត្រូវបានវិនិយោគទៅលើបណ្ដារោងចក្រផលិតថ្មផ្ទុកថាមពលអគ្គិសនី និងវត្ថុធាតុដើម, 2.1 ពាន់លានដុល្លារនឹងត្រូវវិនិយោគទៅលើរោងចក្រផលិតរថយន្តអគ្គិសនីរបស់ Scout ដែលជាក្រុមហ៊ុនបុត្រសម្ព័ន្ធរបស់ Volkswagen នៅ Carolina ខាងជើង ក្នុងទឹកដីអាម៉េរិក។

ការវិនិយោគទៅលើបច្ចេកវិទ្យាសម្រាប់ម៉ាស៊ីនចំហេះក្នុងនឹងឡើងដល់ចំណុចកំពូលនៅឆ្នាំ 2025 ហើយនេះក៏នឹងជាពេលវេលាដែល Volkswagen គ្រោងនឹងកាត់បន្ថយការផលិតរថយន្តម៉ាស៊ីនប្រើម៉ាស៊ីនចំហេះក្នុងជាបណ្ដើរៗ។

កាលពីថ្ងៃទី 13 មីនា 2023 Volkswagen បានប្រកាសអំពីរោងចក្រផលិតថ្មផ្ទុកអគ្គិសនីនៅកាណាដា ដែលជារោងចក្រផលិតថ្មដំបូងរបស់ខ្លួននៅខាងក្រៅអឺរ៉ុប។ រោងចក្រនេះគ្រោងនឹងចាប់ផ្ដើមការផលិតនៅឆ្នាំ 2027៕

March 14, 2023

ថ្វីបើត្រូវបានជម្រុះតាំងពីដំបូង U-20 ឥណ្ឌូណេស៊ីនៅតែទទួលបានភារកិច្ចធំនៅ World Cup

ក្រុមបាល់ទាត់ U-20 ឥណ្ឌូណេស៊ី ត្រូវបានប្រគល់ភារកិច្ចមួយចំនួននៅក្នុងរដូវកាលបាល់ទាត់ U-20 World Cup នាពេលខាងមុខ។

នៅឯព្រឹត្តិការណ៍បាល់ទាត់ U-20 អាស៊ី 2023 ក្រុមជម្រើសជាតិ U-20 ឥណ្ឌូណេស៊ីត្រូវបានរំពឹងច្រើនពីអ្នកគាំទ្រក្នុងស្រុក។ ក៏ប៉ុន្តែ ជាក់ស្ដែង កូនសិស្ស និងគ្រូបង្វឹក Shin Tae-yong ត្រូវជួបឧបសគ្គច្រើន នៅពេលបានចាញ់ U-20 អ៊ីរ៉ាក់ក្នុងការប្រកួតដំបូង។ U-20 ឥណ្ឌូណេស៊ីក៏មិនអាចបន្តដំណើរទៅមុខ ក្រោយពីត្រូវអ៊ូសបេគីស្ថានយកស្មើនៅក្នុងការប្រកួតចុងក្រោយនៃវគ្គសន្សំពិន្ទុ។

ទោះជាយ៉ាងនេះក៏ដោយ U-20 ឥណ្ឌូណេស៊ីនៅតែមានសិទ្ធិឡើងទៅទាត់នៅឯ U-20 World Cup 2023 ដោយសារតែជាម្ចាស់ផ្ទះ។

ថ្មីៗនេះ លោក Erick Thohir ប្រធានសហព័ន្ធបាល់ទាត់ឥណ្ឌូណេស៊ីបានកំណត់គោលដៅធំសម្រាប់ក្រុមជម្រើសជាតិ U-20 ឥណ្ឌូណេស៊ី នោះគឺ «ឥណ្ឌូណេស៊ីប្ដេជ្ញាឆ្លងឱ្យផុតវគ្គសន្សំពិន្ទុនៅ U-20 World Cup Indonesia 2023 នាពេលខាងមុខ»។

ដូច្នេះ នៅមុនការមកដល់របស់ព្រឹត្តិការណ៍បាល់ទាត់ FIFA U-20 World Cup Indonesia 2023 ក្រុមបាល់ទាត់វ័យក្រោមម្ភៃឆ្នាំរបស់ឥណ្ឌូណេស៊ី នឹងហ្វឹកហាត់រយៈពេលយូរ ហើយក្រោយមក គ្រូបង្វឹក Shin Tae-yong នឹងជ្រើសរើសកីឡាករដែលមានសក្ដានុពលបំផុតសម្រាប់ឡើងទៅប្រកួតនៅ៕

March 14, 2023

រថភ្លើងល្បឿនលឿនចិន-ឡាវ នឹងជំរុញលំហូរទេសចរបរទេសមកកម្ពុជា

(វៀងចន្ទន៍)៖ រថភ្លើងល្បឿនលឿនគួនមិញ (ប្រទេសចិន)-វៀងចន្ទន៍ (ប្រទេសឡាវ) ជាក្តីសង្ឃឹមនៃលំហូរទេសចរមកប្រទេសកម្ពុជា នាថ្ងៃអនាគត នេះបើតាមប្រសាសន៍របស់ ឯកឧត្ដម ថោង ខុន រដ្ឋមន្ត្រីក្រសួងទេសចរណ៍។

ឯកឧត្ដម ថោង ខុន ក្នុងខែមីនាឆ្នាំនេះ បានដឹកនាំប្រតិភូក្រសួងទេសចរណ៍ទៅបំពេញទស្សនកិច្ចនៅប្រទេសឡាវ ដើម្បីបង្កើនកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងពីរ។ នាឱកាសនោះ រដ្ឋមន្ត្រីក្រសួងទេសចរណ៍កម្ពុជា បានធ្វើដំណើរតាមរថភ្លើងល្បឿនលឿនរត់ពីរដ្ឋធានីវៀងចន្ទ ទៅកាន់ហ្លួងព្រះបាង។

«រថភ្លើងល្បឿនលឿនរត់ពីវៀងចន្ទទៅហ្លួងព្រះបាង ឆ្លងទៅទីក្រុងគួនមិញ ខេត្តយូណាន (ប្រទេសចិន) មានអ្នកដំណើរឡាវ ថៃជិះច្រើនទៅលេងចិន និងអ្នកដំណើរចិនមកកាន់ឡាវ និងថៃ» លោករដ្ឋមន្ត្រីបានថ្លែងដូច្នេះ និងបន្តថា ប្រការនេះបង្ហាញពីក្តីសង្ឃឹមអំពីលំហូរទេសចរមកកម្ពុជានៅថ្ងៃមុខ។

រដ្ឋមន្ត្រីក្រសួងទេសចរណ៍កម្ពុជាសង្កត់ធ្ងន់ថា «មានមនុស្សច្រើមនណាស់ចូលចិត្តធ្វើដំណើរ។ ថ្លៃសំបុត្រថោក ហើយសុវត្ថិភាព»។

យោងតាមក្រសួងទេសចរណ៍ គណៈប្រតិភូកម្ពុជា និងភាគីឡាវ ក៏បានជំរុញឱ្យមានការសម្រួលការធ្វើដំណើរឆ្លងកាត់ព្រំដែន ដើម្បីជំរុញកំណើនទេសចរទៅ-មករវាងប្រទេសទាំងពីរ។

ផ្លូវរថភ្លើងល្បឿនលឿនដែលតភ្ជាប់រដ្ឋធានីវៀងចន្ទន៍របស់ឡាវ និងទីក្រុងរដ្ឋបាលគួនមិញនៃខេត្តយូណានរបស់ប្រទេសចិន ត្រូវបានសម្ពោធដាក់ឱ្យប្រើប្រាស់កាលពីថ្ងៃទី 03 ធ្នូ 2021 បន្ទាប់ពីការស្ថាបនាក្នុងរយៈពេលប្រាំឆ្នាំ។

ដោយអាចបើកបរក្នុងល្បឿន 160 គីឡូម៉ែត្រ/ម៉ោង ផ្លូវដែកប្រវែង 1,035 គីឡូម៉ែត្រពីគូនមិញទៅកាន់វៀងចន្ទន៍នេះ ត្រូវឆ្លងកាត់ផ្លូវរូងក្នុងភ្នំ និងស្ពានរាប់រយគីឡូម៉ែត្រ។ កំណត់ផ្លូវដែលស្ថិតក្នុងប្រទេសឡាវមានប្រវែង 422 គីឡូម៉ែត្រ រាប់ពីរដ្ឋធានីវៀងចន្ទន៍ដល់ស្ថានីយ Boten នៅក្បែរព្រំដែនឡាវ-ចិន។

គម្រោងផ្លូវដែកល្បឿនលឿននេះមានតម្លៃ 6 ពាន់លានដុល្លារអាម៉េរិក។ នេះគឺជាផែនការដំបូងនៅក្នុងមហិច្ឆតារបស់ប៉េកាំង ទាក់ទងនឹងបណ្ដាញផ្លូវដែកដែលតភ្ជាប់ភាគខាងត្បូងប្រទេសចិនជាមួយនឹងបាងកក (ប្រទេសថៃ), កូឡាឡាំពួ (ម៉ាឡេស៊ី) និងចុងក្រោយគឺសិង្ហបុរី៕

March 14, 2023

ក្រុមហ៊ុនអាម៉េរិកផលិតនាវាដំណើរការដោយអាម៉ូញ៉ាក់មិនបំភាយឧស្ម័នពុល

ក្រុមហ៊ុន Amogy ដែលមានទីស្នាក់ការកណ្ដាលនៅ Brooklyn មានគម្រោងសាកល្បងនាវាដំណើរការដោយថាមពលអាម៉ូញ៉ាក់ (Ammonia) នៅក្នុងឆ្នាំនេះ ហើយផលិត និងលក់ចាប់ពីឆ្នាំក្រោយ។

វិស័យដឹកជញ្ជូនតាមផ្លូវសមុទ្រ មានបំណងចូលរួមកាត់បន្ថយការបំភាយឧស្ម័នកាបូន។ ក៏ប៉ុន្តែ បច្ចេកវិទ្យាថ្មផ្ទុកអគ្គិសនីបច្ចុប្បន្នមិនអាចឆ្លើយតបនឹងតម្រូវការដឹកជញ្ជូនតាមផ្លូវសមុទ្ររយៈចម្ងាយឆ្ងាយបាន។ ដូច្នេះ អាម៉ូញ៉ាក់ (NH3) គឺជាដំណោះស្រាយល្អប្រកបដោយសក្ដានុពល។ នេះបើតាមក្រុមហ៊ុន Amogy ប្រកាសកាលពីសប្ដាហ៍កន្លង។

កាលពីឆ្នាំមុន ក្រុមហ៊ុននេះបានបង្ហាញពីវិធីផ្គត់ផ្គង់ថាមពលសម្រាប់យានយន្តធុនធ្ងន់នៅលើដីគោក ដោយប្រើប្រាស់អាម៉ូញ៉ាក់។ ឆ្នាំនេះ Amogy នឹងផ្ដោតទៅលើការអភិវឌ្ឍ និងបង្ហាញបច្ចេកវិទ្យារបស់ខ្លួនដែលប្រើប្រាស់ក្នុងកប៉ាល់ ដោយចាប់ផ្ដើមជាមួយនឹងកប៉ាល់សណ្ដោង។

Amogy នឹងជ្រើសយកកប៉ាល់ផលិតកាលពីឆ្នាំ 1957 ដែលប្រើប្រាស់ម៉ាស៊ីនម៉ាស៊ូតដើម្បីផ្គត់ផ្គង់អគ្គិសនីសម្រាប់ម៉ូទ័ររបស់វា។ ក្រុមហ៊ុនមានគម្រោងដាក់ជំនួសម៉ាស៊ីនផលិតអគ្គិសនីប្រើម៉ាស៊ូត ដោយម៉ាស៊ីនផលិតអគ្គិសនីដើរដោយអាម៉ូញ៉ាក់។ ម៉ាស៊ីនអាម៉ូញ៉ាក់នេះនឹងផលិតអគ្គិសនីបានច្រើនជាងបីដងធៀបនឹងម៉ាស៊ីនដែលត្រូវបានប្រើប្រាស់ដើម្បីបង្ហាញពីរថយន្តទ្រុងនាពេលកន្លង។

កន្លងមក Amogy បានប្រើប្រាស់អាម៉ូញ៉ាក់ធ្វើជាឥន្ធនៈសម្រាប់ដុត ប៉ុន្តែក្នុងការបង្ហាញបច្ចេកវិទ្យានៅលើសមុទ្រ ពួកគេមានគម្រោងបំបែកសមាសធាតុនេះទៅជាអ៊ីដ្រូសែន និងអាសូត អនុញ្ញាតឱ្យប្រើប្រាស់បានក្នុងថ្មផ្ទុកថាមពលដើម្បីផលិតអគ្គិសនី និងផ្គត់ផ្គង់ថាមពលដល់ម៉ាស៊ីន។

អាម៉ូញ៉ាក់អាចនឹងមិនមានថាមពលខ្លាំងដូចប្រេងម៉ាស៊ូត តែចំហេះរបស់វាមិនបំភាយឧស្ម័នកាបូនឡើយ។ ទោះជាយ៉ាងនេះក៏ដោយ ដំណើរការផលិតអាម៉ូញ៉ាក់នាពេលបច្ចុប្បន្ននៅតែជាប្រភពបំភាយឧស្ម័ន។ ក្រុមហ៊ុន Amogy កំពុងប្រឹងប្រែងដើម្បីផលិតអាម៉ូញ៉ាក់ដែលស្អាតជាងនេះក្នុងពេលឆាប់ៗខាងមុខ៕

March 14, 2023

ភាពយន្តដែលមានតួអង្គព្រះនាងទេពមច្ឆាស្បែកខ្មៅ បញ្ចេញ Trailer ជាលើកដំបូង

ភាពយន្តរឿង «The Little Mermaid» បានបញ្ចេញ Trailer ជាលើកដំបូង បង្ហាញថា នេះគឺរឿងស្ដីពីទេពមច្ឆា Ariel ដែលសម្ដែងដោយតារាស្បែកខ្មៅ Halle Bailey បានជួបកូនស្ដេច។

កាលពីថ្ងៃទី 13 មីនា ផលិតកម្មភាពយន្ត Disney បានបញ្ចេញ trailer វែងជាលើកដំបូងរបស់រឿង «The Little Mermaid» ដែលជាកំណែសម្ដែងដោយមនុស្ស នៅក្នុងព្រឹត្តិការណ៍ប្រគល់ពានរង្វាន់ Oscar 2023។ វីដេអូខ្លី ប្រហែលពីរនាទី បានចាប់ផ្ដើមដោយការបង្ហាញទិដ្ឋភាពជួបគ្នាដោយចៃដន្យរវាង Ariel និងព្រះអង្គម្ចាស់ Eric (សម្ដែងដោយតារាអង់គ្លេស Jonah Hauer-King)។ ទេពមច្ឆា Ariel ជួយសង្គ្រោះ Eric បន្ទាប់ពីហេតុការណ៍លិចកប៉ាល់។ ប៉ុន្តែ ទង្វើនេះត្រូវរងការស្ដីបន្ទោសពីព្រះបិតា Triton (Javier Bardem) ព្រោះតែ Ariel ឡើងគោកដោយចិត្តឯង។

Trailer នេះក៏បង្ហើបឱ្យដឹងអំពីឧបាយកលរបស់មេធ្មប់ Ursula (Melissa McCarthy) ដែលប្រើប្រាស់ភាពស្មោះត្រង់របស់ Ariel ដើម្បីប្លន់យកសំឡេងច្រៀងរបស់នាង។ មិត្តភ័ក្ដិបីរូបរបស់ទេពមច្ឆា Ariel រួមមាន ត្រី Flounder, ក្ដាម Sebastian និងសត្វរំពេរ Scuttle ក៏មានវត្តមាននៅក្នុង trailer នេះ។ ចំណែកចម្រៀងវិញគឺជាបទដ៏ល្បីល្បាញ Part of Your World របស់ «The Little Mermaid» ប៉ុន្តែត្រូវបានប្រគំទៅតាមបែបថ្មី។

តារាស្បែកខ្មៅ Halle Bailey សម្ដែងជាតួអង្គឯក ព្រះនាងមច្ឆា Ariel

ខ្សែភាពយន្តដែលដឹកនាំសម្ដែងដោយ Rob Marshall នេះគឺជាគម្រោង live-action (មនុស្សសម្ដែង) ដែលមានការចំណាយច្រើន និងត្រូវបានផលិតតាមលំនាំភាពយន្តគំនូរជីវចលឆ្នាំ 1989។ សាច់រឿងរបស់ភាពយន្តនេះគឺយោងតាមរឿងព្រេងនិទានដែលសរសេរដោយ Hans Christian Andersen។ ក្រៅពី Bailey ភាពយន្តនេះក៏មានវត្តមានរបស់តារាសម្ដែងល្បីៗមួយចំនួនទៀត មានដូចជា Melissa McCarthy, Jacob Tremblay និង Awkwafina ជាដើម។

Trailer ដំបូងរបស់ «The Little Mermaid»

រឿង «The Little Mermaid» គឺជាភាពយន្តដំបូងដែល Halle សម្ដែងជាតួអង្គឯក។ មុននោះ តារាភាពយន្តកើតឆ្នាំ 2000 រូបនេះធ្លាប់បានចូលរួមសម្ដែងក្នុងភាពយន្តទូរទស្សន៍មួយចំនួនក្នុងនាមជាតារាកុមារ៕

March 14, 2023

ក្រុមហ៊ុន VW ចូលរួម «ធ្វើសង្គ្រាមបញ្ចុះតម្លៃ» រថយន្តអគ្គិសនីជាមួយ Tesla

Volkswagen នឹងយកតម្រាប់តាម Tesla ក្នុងការបញ្ចុះតម្លៃនៅពេលការប្រកួតប្រជែងដណ្ដើមតំណែងលេខមួយក្នុងវិស័យរថយន្តអគ្គិសនីមានសភាពកាន់តែខ្លាំងក្លា ស្របពេលដែលបណ្ដាក្រុមហ៊ុនក្នុងស្រុកកំពុងប្រជែងគ្នានៅទីផ្សារចិន។

ក្រុមហ៊ុនផលិតរថយន្តអាល្លឺម៉ង់ Volkswagen បានប្រកាសកាលពីសប្ដាហ៍កន្លងថា កំណែថ្មីរបស់ម៉ូដែលរថយន្តអគ្គិសនីលំដាប់កំពូលរបស់ខ្លួនគឺ ID.3 នឹងត្រូវដាក់លក់ចាប់ពីចុងខែមីនា ក្នុងតម្លៃក្រោម 42,600 ដុល្លារអាម៉េរិក។

តម្លៃខាងលើនេះគឺទាបជាង 3,200 ដុល្លារ បើធៀបនឹងតម្លៃរបស់ ID.3 នាពេលបច្ចុប្បន្ន ហើយស្មើនឹងតម្លៃរបស់រថយន្តអគ្គិសនី Tesla Model Y។

ក្រុមអ្នកវិភាគយល់ថា នេះគឺជាឥរិយាបថដែលធ្វើឡើងដើម្បីឆ្លើយតបដោយផ្ទាល់ទៅនឹងការបញ្ចុះតម្លៃរបស់ Tesla ក្នុងប៉ុន្មានខែកន្លងទៅនេះ។ Tesla បានបញ្ចុះតម្លៃរហូតដល់ 20% នៅអឺរ៉ុប និងសហរដ្ឋអាម៉េរិក។

នៅប្រទេសអាល្លឺម៉ង់ ចំនួនរថយន្តដែលបានលក់ចេញរបស់ Tesla ក្នុងខែមករា 2023 បានកើនជាង 900% ធៀបនឹងដំណាក់កាលដូចគ្នាក្នុងឆ្នាំកន្លង ជួយឱ្យ Tesla ក្លាយជាក្រុមហ៊ុនដែលលក់រថយន្តបានច្រើនជាងគេនៅអាល្លឺម៉ង់ក្នុងខែនោះ។

ក្រុមហ៊ុន Volkswagen លក់រថយន្តអគ្គិសនីបានប្រមាណ 352,000 គ្រឿងក្នុងឆ្នាំ 2022 ប៉ុន្តែ ការលក់បញ្ចុះតម្លៃរបស់ Tesla បានបង្ខំឱ្យ VW ត្រូវធ្វើសកម្មភាពទប់ទល់។

Tesla មិនមែនជាគូប្រជែងខ្លាំងតែមួយគត់របស់ Volkswagen នោះទេ។ ប្រទេសចិនគឺជាទីផ្សាររថយន្តធំជាងគេលើពិភពលោក ហើយការអភិវឌ្ឍ និងការប្រើប្រាស់រថយន្តអគ្គិសនីនៅទីនេះក៏បានហក់ឡើងដល់ចំណុចខ្ពស់ថ្មីមួយទៀត ធ្វើឱ្យ VW ត្រូវ «រត់តាមពីក្រោយ» ក្រុមហ៊ុនដទៃ។

រថយន្តប្រហែល 40% ក្នុងចំណោមរថយន្តសរុបរបស់ VW ត្រូវបានទិញដោយអតិថិជននៅប្រទេសចិន ក្នុងនោះភាគច្រើនគឺជារថយន្តមានម៉ាស៊ីនចំហេះក្នុង។ តួលេខនេះកាន់កាប់ចំណែកទីផ្សារ 16% នៅប្រទេសចិន។

ក្នុងចំណោមរថយន្តអគ្គិសនីនៅប្រទេសចិន VW កាន់កាប់ចំណែកទីផ្សារត្រឹមតែ 2.4% ប៉ុណ្ណោះ ខណៈដែល Tesla ក្ដោបក្ដាប់បាន 7.8% និង BYD កាន់កាប់ 16%។ ក្នុងចំណោមរថយន្តអគ្គិសនីជាង 55 លានគ្រឿងដែលត្រូវបានលក់នៅក្នុងប្រទេសចិនកាលពីឆ្នាំទៅ VW មានតែ 155,700 គ្រឿងប៉ុណ្ណោះ។

នៅប្រទេសចិន បណ្ដាក្រុមហ៊ុនរថយន្តដទៃមានដូចជា Wuling, GAC និង Chery Automobile ជាដើម ក៏កំពុងលេចធ្លោជាង VW។ ចំណែកបណ្ដាក្រុមហ៊ុនរថយន្តរបស់អាល្លឺម៉ង់ មានដូចជា BMW និង Mercedes-Benz ក៏លក់មិនបានច្រើន បើធៀបនឹងម៉ូដែលរថយន្តអគ្គិសនីក្នុងស្រុករបស់ចិន ក្នុងនោះរថយន្តមួយម៉ូដែលៗរបស់ពួកគេ កាន់កាប់ចំណែកទីផ្សារមិនដល់ 1%៕

March 14, 2023

ក្នុងបញ្ជី Top 10 ស្ដីពីកីឡាកររកប្រាក់បានច្រើនជាងគេគ្រប់សម័យកាល Michael Jordan ជាប់លេខមួយ

និមិត្តរូបបាល់បោះ Michael Jordan ឈរលើកំពូលតារាងចំណាត់ថ្នាក់ស្ដីពីបណ្ដាកីឡាករដែលរកប្រាក់ចំណូលបានច្រើនជាងគេនៅក្នុងអាជីពរបស់ខ្លួន។

ទំព័រពាណិជ្ជកម្មកីឡា Sportico បានស្រង់ស្ថិតិ និងបង្កើតជាបញ្ជីចំណាត់ថ្នាក់មួយស្ដីពីកីឡាករដែលរកប្រាក់ចំណូលបានច្រើនជាងគេ រួចគណនាទៅតាមអតិផរណាដូចបច្ចុប្បន្ន ហើយចុងក្រោយក៏បានរកឃើញកំពូលកីឡាករ 10 រូបដែលទទួលបានប្រាក់បៀវត្សរ៍ខ្ពស់ជាងគេនៅគ្រប់សម័យកាល។

ខាងក្រោមនេះគឺជា Top 9 ស្ដីពីកីឡាកររកប្រាក់បានច្រើនជាងគេគ្រប់សម័យកាល៖

និមិត្តរូបបាល់បោះ Michael Jordan ឈរលើកំពូលតារាងចំណាត់ថ្នាក់នេះ ដោយរកបាន 1.9 ពាន់លានផោន ប៉ុន្តែនៅពេលគណនាទៅតាមអត្រានៃអតិផរណានាបច្ចុប្បន្ន តួលេខនេះបានឡើងដល់ 2.7 ពាន់លានផោន ដែលប្រហែលនឹង 3.2 ពាន់លានដុល្លារអាម៉េរិក។

ចំណាត់ថ្នាក់លេខពីរបានទៅលើ កីឡាករវាយកូនគោល Tiger Woods ដោយរកបាន 1.4 ពាន់លានផោន ស្មើនឹង 2 ពាន់លានផោន (ប្រហែល 2.4 ពាន់លានដុល្លារអាម៉េរិក) ក្រោយពីបានគណនាទៅតាមតម្លៃក្នុងសម័យអតិផរណា។

កីឡាករវាយកូនគោលអាម៉េរិក Arnold Palmer ឈរលំដាប់ទីបី ដោយមានទ្រព្យ 735 លានផោន ស្មើនឹង 1.4 ពាន់លានផោននាបច្ចុប្បន្ន (ប្រហែល 1.7 ពាន់លានដុល្លារ)។

កីឡាករដែលធ្លាប់ជាគូប្រជែងរបស់ Palmer គឺ Jack Nicklaus រកប្រាក់ចំណូលបាន 722 លានផោន ស្មើនឹង 1.35 ពាន់លានផោននាបច្ចុប្បន្ន (ប្រហែល 1.6 ពាន់លានដុល្លារអាម៉េរិក) ត្រូវជាប់លេខបួន។

កីឡាករដែលគួរឱ្យភ្ញាក់ផ្អើលបំផុតគឺ កីឡាករបាល់ទាត់ Cristiano Ronaldo ដែលបច្ចុប្បន្នលេងឱ្យក្លឹប Al-Nassr ត្រូវជាប់ចំណាត់ថ្នាក់លេខប្រាំ ដោយរកប្រាក់ចំណូលសរុបបាន 1.31 ពាន់លានផោន ប្រហាក់ប្រហែលនឹង 1.59 ពាន់លានដុល្លារ។

តារាបាល់បោះនាបច្ចុប្បន្ន Lebron James ឈរលំដាប់ទី 6 ដោយរកចំណូលសរុបបាន 1.27 ពាន់លានផោន ប្រហែលនឹង 1.54 ពាន់លានដុល្លារអាម៉េរិក។

ចំណែកម្ចាស់ជើងឯកបាល់ទាត់ World Cup 2022 Messi វិញ រកបាន 1.22 ពាន់លានផោននៅក្នុងអាជីពជាកីឡាករបាល់ទាត់។ តួលេខនេះស្មើនឹង 1.49 ពាន់លានដុល្លារអាម៉េរិក។ Messi ជាប់ចំណាត់ថ្នាក់លេខ 7។

អតីតកំពូលកីឡាករប្រដាល់ Floyd Mayweather គឺជាអ្នកគុននិយមដំបូងដែលមានឈ្មោះក្នុងបញ្ជីចំណាត់ថ្នាក់នេះ ដោយរកបាន 922 លានផោន មុនពេលចូលនិវត្តន៍កាលពីឆ្នាំ 2017 ហើយបច្ចុប្បន្ន ខ្ទង់ប្រាក់ចំណូលនេះមានតម្លៃស្មើនឹង 1.17 ពាន់លានផោន ស្មើនឹង 1.42 ពាន់លានដុល្លារ ជាប់លេខ 8។

ឈរលំដាប់ទី 9 គឺកំពូលថ្វីដៃតេន្នីស Roger Federer ដោយរកបាន 1.14 ពាន់លានផោន ប្រហាក់ប្រហែលនឹង 1.39 ពាន់លានដុល្លារអាម៉េរិក។

ផ្ទុយទៅវិញ Michael Schumacher, David Beckham, Kobe Bryant, Neymar និង Lewis Hamilton គឺជាកីឡាករកំពូលៗដែលត្រូវបានជម្រុះចេញពី Top 10 នេះ៕

March 14, 2023

Ronaldo ក្លាយជាទីប្រឹក្សារបស់ក្លឹប Al Nassr ក្នុងការទិញដូរកីឡាករអន្តរជាតិ

Cristiano Ronaldo មិនត្រឹមតែ «បង្កព្យុះភ្លៀង» បន្ទាប់ពីបានមកទាត់ឱ្យក្លឹបអារ៉ាប៊ីសាអូឌីតនោះទេ តែគាត់ក៏មានឥទ្ធិពលលើគម្រោងទិញដូរកីឡាកររបស់ក្លឹប Al Nassr ផងដែរ។

CR7 នៅតែបង្ហាញឥទ្ធិពលរបស់ខ្លួននៅក្លឹប Al Nassr។ ក្រៅពីការរកគ្រាប់បាល់ គាត់ក៏ក្លាយជាទីប្រឹក្សារបស់ក្រុមបាល់ទាត់ដែលកំពុងប្រកួតនៅ Saudi Pro League។ បើតាមអ្នកយកព័ត៌មាន Ben Jacobs ថ្មីៗនេះ ក្លឹប Al Nassr កំពុងសុំយោបល់ពី Ronaldo ទាក់ទងនឹងគម្រោងទិញកីឡាករអន្តរជាតិនៅក្នុងការដោះដូរកីឡាករនារដូវក្ដៅឆ្នាំនេះ។ បញ្ជីឈ្មោះទិញដូរកីឡាមួយត្រូវបានលើកឡើង ប៉ុន្តែ កីឡាករដែល Ronaldo ចង់បានបំផុតគឺ Roberto Firmino របស់ Liverpool។

ព័ត៌មាននេះធ្វើឱ្យមានការភ្ញាក់ផ្អើលខ្លាំង ព្រោះថា អ្នកណាក៏ដឹងដែរថា Liverpool និងអតីតក្លឹបរបស់ CR7 (Man United) គឺជាគូសត្រូវធំនឹងគ្នា។ ប៉ុន្តែ ការជ្រើសរើសរបស់ CR7 នៅតែជា «កូនសិស្សសំណព្វ» របស់គ្រូបង្វឹក Jurgen Klopp។

ខ្សែប្រយុទ្ធ Roberto Firmino វ័យ 32 ឆ្នាំ រកបាន 10 គ្រាប់ និងបង្កឱកាសស៊ុតបញ្ចូលទីបានសម្រេចចំនួន 5 គ្រាប់ឱ្យ Liverpool ក្រោយ 27 ប្រកួត។ កិច្ចព្រមព្រៀងរវាង Rirmino និង Liverpool នឹងអស់សុពលភាពនៅរដូវក្ដៅឆ្នាំនេះ។

ខាងក្លឹប Al Nassr វិញ ប្រាកដជាជឿជាក់លើកីឡាករដែលមានបទពិសោធន៍ច្រើនដូច CR7 ហើយក្លឹបរបស់អារ៉ាប៊ីសាអូឌីតក៏យល់ថា Firmino គឺជាកីឡាករដែលមានសក្ដានុពលដើម្បីចាប់ដៃជាមួយ Ronaldo បង្ហាញថ្វីជើងនៅលើទីលានប្រកួត៕

March 13, 2023

Category: សង្គម និងសេដ្ឋកិច្ច