សង្គម និងសេដ្ឋកិច្ច - La Reine Media

លេចនោម មិនមែនជាបញ្ហាតូចតាចទេ សម្រាប់ស្ត្រី

លេចនោម ជាបញ្ហាដែលជួបប្រទះច្រើននៅលើមនុស្សស្រី ដោយសារបច្ច័យមួយចំនួន ដូចជា ការមានគភ៌ ការប្រសូតបុត្រ ការវះកាត់ខាងជំងឺស្ត្រី ជាពិសេសការវះកាត់ស្បូន។ល។ តាមរយៈការសិក្សាស្រាវជ្រាវបានរកឃើញថា មនុស្ស1នាក់ក្នុងចំណោម5នាក់ដែលកើតជំងឺនេះ គឺជាស្ត្រី និងច្រើនជាងបុរសដល់ទៅ3ដងឯណោះ។

មូលហេតុផ្សេងៗរបស់ជំងឺលេចនោម

មូលហេតុសំខាន់គឺភាពខុសប្រក្រតីដែលកើតឡើងទាំងខាងផ្នែកនៃការធ្វើការងារ និងខាងផ្នែករូបរាងរបស់អវយវៈដែលមានចំណែកក្នុងការគ្រប់គ្រងការបន្ទោបង់ទឹកនោម ដូចជា ខួរក្បាល និងប្រព័ន្ធប្រសាទដែលគ្រប់គ្រងទ្រាំទប់ និងបញ្ចេញទឹកនោម ប្លោកនោម បង្ហួរនោម ប្រព័ន្ធខ្ជឹបបង្ហួរនោម និងសាច់ដុំក្នុងឆ្អឹងត្រគាក។

ក្នុងវ័យកុមារ : កើតឡើងដោយសារប្រព័ន្ធគ្រប់គ្រងការបន្ទោបង់នៅមិនទាន់ដំណើរការស្រួល និងទង្វើរួមទាំងទម្លាប់និស្ស័យមួយចំនួន និងច្រើនតែចេញមកក្នុងរូបបែបនៃការលេចនោមដាក់ពូកនៅពេលយប់ញឹកញាប់។

ក្នុងវ័យក្រមុំ : ច្រើនតែកើតឡើងដោយសារតែមានទម្លាប់និស្ស័យមួយចំនួនដែលមិនត្រឹមត្រូវ ដូចជា ទទួលទានទឹកតិច ទ្រាំទប់មិនព្រមនោមរយៈពេលយូរ ឬញឹកញាប់ ធ្វើឱ្យប្លោកនោមកើតមានការច្របាច់ខ្លួនខុសប្រក្រតីរហូតដល់ទ្រាំទប់ទឹកនោមលែងរួច។

សម្រាប់មនុស្សវ័យកណ្តាល ៈ អ្នកដែលធ្លាប់មានគភ៌ ឬធ្លាប់វះកាត់ស្បូនពីមុនមក អាចមានការចុះខ្សោយរបស់សាច់ដុំខ្ជឹបមាត់ប្លោកនោម ធ្វើឱ្យបិទមិនជិត។ នៅលើមនុស្សវ័យចំណាស់ និងអស់វដ្តរដូវវិញ អ័រម៉ូនភេទស្រីនឹងថយចុះធ្វើឱ្យប្រព័ន្ធការបិទខ្ជឹបរបស់បង្ហួរនោមចុះខ្សោយ ធ្វើឱ្យមានទឹកនោមលេចជ្រាបចេញមកបានដូចគ្នា។

អាការដែលបង្ហាញពីការលេចនោម

អាការផ្សេងៗរបស់ការលេចនោមបែបនេះមានដូចជា មានអារម្មណ៍ថាត្រូវតែនោម តែមិនអាចទៅនោមបានទាន់ ពេលកណ្តាស់ ក្អកមានទឹកនោមលេចចេញមក អាការទឹកនោមហូរចេញមកដោយមិនដឹងខ្លួន ឬទឹកនោមស្រក់ចេញមកក្រោយពេលបត់ជើងតូចរួចជាដើម។

វិធីបំបាត់ និងកែអាការលេចនោម

ការព្យាបាល អាស្រ័យលើមូលហេតុរបស់អាការថា តើកើតភាពខ្វះចន្លោះនៅលើអវយវៈដែលគ្រប់គ្រងការបត់ជើងតូចក្នុងផ្នែកណាមួយ។ ជាទូទៅ វិធីក្នុងការរក្សាព្យាបាលមាន3យ៉ាង គឺ ការព្យាបាលដោយទង្វើ ការព្យាបាលដោយប្រើថ្នាំ និងការព្យាបាលដោយវះកាត់។ អ្នកដែលមានអាការមិនសូវខ្លាំងប៉ុន្មាន គួរចាប់ផ្តើមពីការព្យាបាលដោយទង្វើ គឺការបង្វឹកសាច់ដុំក្នុងឆ្អឹងត្រគាក ដោយការខ្ជឹបមាត់បង្ហួរនោមដែលមានលក្ខណៈដូចពេលខ្ជឹបទ្រាំទប់នោមអ៊ីចឹង ដោយត្រូវធ្វើឱ្យបាន100 ដងក្នុងមួយថ្ងៃ។ វិធីនេះត្រូវមានការអត់ធ្មត់ ព្រោះត្រូវប្រើពេលរាប់ខែទំរាំនឹងឃើញលទ្ធផល និងគួរធ្វើឱ្យបានជាប់លាប់ ដើម្បីកុំឱ្យអាការនេះកើតឡើងទៀត។

វិធីងាយៗក្នុងការការពារមិនឱ្យកើតអាការលេចនោម

. គួរទទួលទានទឹកឱ្យបានយ៉ាងតិចក្នុងមួយថ្ងៃពី8-10កែវ។

. មិនគួទ្រាំទប់នោមញឹកញាប់ ឬយូរៗជ្រុលពេកឡើយ។

. ចៀសវាងពីសភាវណាដែលត្រូវប្រើកម្លាំងប្រឹងនៅខាងក្នុងប្រអប់ពោះខ្លាំងៗ និងអាការទល់លាមក។

. ធ្វើលំហាត់ប្រាណសាច់ដុំក្នុងឆ្អឹងត្រគាកដោយការខ្ជឹបមាត់បង្ហួរនោមជាប្រចាំ។

បញ្ហាធំនឹងក្លាយជាបញ្ហាតូចដែលអាចការពារ និងដោះស្រាយវិញបាន ដោយគ្រាន់តែកែសម្រួលទង្វើណាដែលប្រថុយនឹងការកើតជំងឺ និងឧស្សហ៍មើលថែទាំខ្លួនដោយវិធីងាយៗទាំងនេះ នារីៗសម័យថ្មីយើង នឹងច្បាស់ជាស្ថិតនៅឆ្ងាយពីជំងឺលេចនោមនេះជាមិនខាន៕

May 25, 2018

ឧកញ៉ា គិត ម៉េង៖ សភាពាណិជ្ជកម្មជាអ្នកអនុវត្តគោលនយោបាយសេដ្ឋកិច្ច-ពាណិជ្ជកម្មរបស់រាជរដ្ឋាភិបាល

ថ្លែងទៅកាន់សមាជិកសភាពាណិជ្ជកម្មក្នុងឱកាសសរុបបិទរបាយការណ៍ក្នុងពិធីសន្និបាតបូកសរុបលទ្ធផលការងារប្រចាំឆ្នាំ2017 និងលើកទិសដៅការងារឆ្នាំ2018 ដែលប្រព្រឹត្ត

ទៅកាលពីថ្ងៃទី30 ខែមេសា ឆ្នាំ2018 នៅសណ្ឋាគារកាំបូឌីយ៉ាណា អ្នកឧកញ៉ាគិត ម៉េង ប្រធានសភាពាណិជ្ជកម្មកម្ពុជាបានគូសបញ្ជាក់ថា៖ “សភាពាណិជ្ជកម្មកម្ពុជា បាននិងកំពុងបន្តភារកិច្ចស្នូលរបស់ខ្លួនតំណាងឱ្យផលប្រយោជន៍ក្នុងវិស័យឯកជន និងចូលរួមអនុវត្តគោលនយោបាយសេដ្ឋកិច្ច និងពាណិជ្ជកម្មរបស់រាជរដ្ឋាភិបាល ប៉ុន្តែដើម្បីសម្រេចបាននូវផលប្រយោជន៍លើវិស័យសេដ្ឋកិច្ចនេះ យើងចាំបាច់ត្រូវតែខិតខំទាំងអស់គ្នា។

អ្នកឧកញ៉ា គិត ម៉េង បានថ្លែងឱ្យដឹងទៀតថា តាមរយៈយន្តការកន្លងមក វេទិការាជរដ្ឋាភិបាល ផ្នែកឯកជន និងសភាពាណិជ្ជកម្មបានដោះស្រាយនូវបញ្ហាប្រឈមក្នុងវិស័យឯកជនចំនួន 194បញ្ហា ក្នុងជំនួបប្រជុំចំនួន 49លើករបស់ក្រុមការងារទាំង10 នៃសភាពាណិជ្ជកម្ម។ ក្នុងលទ្ធផលដ៏ល្អសម្រាប់វិស័យឯកជនទាំងមូលក៏ដូចជាសមាជិកសភាពាណិជ្ជកម្មទាំងមូល បាននិងកំពុងបន្តពង្រឹងទំនាក់ទំនងល្អជាមួយសមាគមធុរកិច្ចជាតិ និងអន្តរជាតិ និងស្ថានទូតបរទេសនៅកម្ពុជាដោយបានរៀបចំជំនួបពាណិជ្ជកម្មជាង 30លើកជាមួយវិនិយោគិន

បរទេស រួមមានជប៉ុន ចិន កូរ៉េ រុស្ស៊ី ថៃ ម៉ាឡេស៊ី សិង្ហបុរី និងជំនួបពិភាក្សាពាក់ព័ន្ធកិច្ចការពាណិជ្ជកម្មចំនួន 58លើក រួមទាំងការធ្វើទស្សនកិច្ចក្រៅប្រទេសចំនួន6លើកទៅកាន់ប្រទេសរ៉ូម៉ានី រុស្ស៊ី ស៊ែប៊ី ចិន ថៃ និងហ្វ៊ីលីពីន។

តាមរយៈការថ្លែងរបស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា អំពីរបាយការណ៍ស្តីពីសមិទ្ធផលការងារឆ្នាំ2017 របស់សភាពាណិជ្ជកម្មកម្ពុជា លោកបានបង្ហាញពីមោទនភាពយ៉ាងខ្លាំងចំពោះលទ្ធផលដែលសម្រេចបានបើទោះបីជាបានជួបប្រទះបញ្ហាប្រឈមផ្នែកធនធាន និងកត្តាបច្ចេកទេសខ្លះៗក្តី។ លោករដ្ឋមន្ត្រីបានលើកឡើងថា ក្រសួងពាណិជ្ជកម្មបានសម្របសម្រួល និងដោះស្រាយបញ្ហាការងារអាទិភាពមួយចំនួន ដូចជាបានផ្តល់អំណាចជូនសភាពាណិជ្ជកម្មកម្ពុជាក្នុងការបង្កើតការិយាល័យតំណាងសភាពាណិជ្ជកម្មនៅក្រៅប្រទេស ផ្តល់សិទ្ធិពេញលេញជូនសភាពាណិជ្ជកម្មកម្ពុជាក្នុងការប្រើបារកូដទំនិញ រៀបចំជំនួបធុរកិច្ច-ពាណិជ្ជកម្ម និងចុះអនុស្សរណៈផ្សេងៗរវាងសភាពាណិជ្ជកម្មកម្ពុជា នឹងសភាពាណិជ្ជកម្មនៃបណ្តាប្រទេសដទៃទៀត រួមទាំងកិច្ចការសំខាន់ៗមួយចំនួនទៀតក្នុងការជំរុញទីផ្សារសម្រាប់សភាពាណិជ្ជកម្មរាជធានី និងខេត្ត។

ឯកឧត្តម ងួន ម៉េងតិច អគ្គនាយកសភាពាណិជ្ជកម្មបានផ្តល់បទសម្ភាសថា៖ “ការលើកទិសដៅថ្មីរបស់សភាពាណិជ្ជកម្មកម្ពុជា គឺកិច្ចសហការជាមួយក្រសួងពាណិជ្ជកម្មក្នុងការកែប្រែច្បាប់ទម្លាប់លើចំណុចខ្លះៗដើម្បីពង្រីកវិសាលភាពសភាពាណិជ្ជកម្មដែលអាចអនុញ្ញាតឱ្យយើងបើកទីស្នាក់ការនៅក្រៅប្រទេសបាន។ ចំពោះឧបសគ្គចម្បងៗដែលយើងមាន ហាក់ដូចជាមិនមានអ្វីធំដុំនោះទេ បើមិនដូច្នេះទេ យើងមិនអាចមានកំណើនសេដ្ឋកិច្ចដល់ 7%នោះទេ។

ចំពោះប្រទេសយើងក៏មានលក្ខណៈពិសេសដែរដែលយើងមានសក្តានុពលសេដ្ឋកិច្ច និងមានអ្នកដឹកនាំប្រទេសល្អ និងមានកំណើនសេដ្ឋកិច្ចមានលក្ខណៈថេរជាច្រើនឆ្នាំ តែលោកបានបន្ថែមថា៖ “បើមើលពីកំណើនសេដ្ឋកិច្ចនេះវាខ្ពស់ពិតមែន តែភាពប្រឈមវាពិតជាមានខ្លះហើយ តែយើងអាចដោះស្រាយបាន។ សម្រាប់ទិសដៅឆ្នាំ2018នេះក៏យើងមានការទាក់ទាញការវិនិយោគឱ្យបានច្រើនដើម្បីរកទីផ្សារការងារឱ្យយុវជន-យុវនារី និងប្រជាពលរដ្ឋក្នុងការរួមចំណែកកាត់បន្ថយភាពក្រីក្ររបស់ពួកគាត់ និងប្រទេសរបស់យើង។

រដ្ឋមន្ត្រីក្រសួងពាណិជ្ជកម្ម ឯកឧត្តម ប៉ាន សូរស័ក្តិ ក៏៏បានគូសបញ្ជាក់ដែរអំពីការប្តេជ្ញាចិត្តជាថ្មីរបស់ក្រសួងពាណិជ្ជកម្មក្នុងការបន្តគាំទ្រការអភិវឌ្ឍវិស័យឯកជននៅកម្ពុជាប្រកបដោយចីរភាពជាពិសេសប្រែក្លាយវិស័យមួយនេះឱ្យទៅជាក្បាលម៉ាស៊ីនថាមវន្តនៃកំណើនសេដ្ឋកិច្ចជាតិស្របតាមយុទ្ធសាស្ត្រចតុកោណដំណាក់កាលទី3 របស់រាជរដ្ឋាភិបាលកម្ពុជា។

លោកបន្តថា៖ “វិស័យឯកជនគឺជាដៃគូយ៉ាងសំខាន់មិនអាចខ្វះបានរបស់រាជរដ្ឋាភិបាល។ យើងមានមោទនភាពនឹងប្រាប់ពិភពលោកថា វិស័យពាណិជ្ជកម្មរបស់កម្ពុជារីកចម្រើនបាន លុះត្រាតែវិស័យឯកជននៅក្នុងប្រទេសយើងមានសកម្មភាពផុសផុល និងរស់រវើក។

ឯកឧត្តម ប៉ាន សូរស័ក្តិ ក៏បានពន្យល់អំពីវត្ថុបំណងនៃគោលនយោបាយអភិវឌ្ឍន៍ឧស្សាហកម្មឆ្នាំ2015 – 2025 និងគម្រោងវិនិយោគដែលមានលក្ខណសម្បត្តិគ្រប់គ្រាន់ (QIPs) ដែលជារបបលើកទឹកចិត្តផ្តល់តាមរយៈក្រុមប្រឹក្សាអភិវឌ្ឍន៍កម្ពុជាដើម្បីជួយវិនិយោគិនឱ្យទទួលបានអត្ថប្រយោជន៍ផ្សេងៗ ដូចជាការលើកលែងពន្ធលើប្រាក់ចំណេញនៃប្រតិបត្តិការអាជីវកម្មរហូតដល់ 9ឆ្នាំ និងពន្ធលើការនាំចូលវត្ថុធាតុដើម ប្រភេទគ្រឿងម៉ាស៊ីន20% ជាដើម។ ដែលទាំងអស់នេះ គឺជាការបំពេញភារកិច្ចប្រកបដោយស្មារតីម្ចាស់ការ និងភាពទទួលខុសត្រូវខ្ពស់របស់សភាពាណិជ្ជកម្មដើម្បីចូលរួមជាមួយក្រសួងពាណិជ្ជកម្ម និងរាជរដ្ឋាភិបាលកម្ពុជាសំដៅអភិវឌ្ឍវិស័យសេដ្ឋកិច្ច-ពាណិជ្ជកម្ម និងកាត់បន្ថយភាពក្រីក្ររបស់ប្រជាជននិងជំរុញកំណើនសេដ្ឋកិច្ចកម្ពុជា៕

May 25, 2018

ករុណា ពេជ្រ ប្រកាសលក់ផ្ទះ និងដី 4ទីតាំងទៀតដើម្បីប្រមូលប្រាក់ព្យាបាលឪពុក

កន្លងមកលោក ករុណា ពេជ្រ បានប្រកាសលក់ផ្ទះវីឡាដែលមានទីតាំងនៅជិតវត្តសំរោងអណ្តែតជាវីឡាទោល ដើម្បីប្រមូលថវិកាព្យាបាលជំងឺឪពុកដែលកំពុងធ្ងន់ធ្ងរ ក៏ប៉ុន្តែមកដល់ពេលនេះលោកមិនទាន់លក់ដាច់នៅឡើយ ហើយអ្វីដែលធ្វើឱ្យសាធារណជនចាប់អារម្មណ៍ថ្មីៗនេះ គឺតារាចម្រៀងរូបនេះបានប្រកាសលក់ផ្ទះចំនួន 2កន្លែង និងដី 2កន្លែងបន្ថែមទៀត។

លោក ករុណា ពេជ្រ បានប្រកាសនៅលើហ្វេសប៊ុករបស់ខ្លួនថា «ហ៊ឺ ….ពេលមានលុយ គិតតែសន្សំលុយទិញ និងបង់រំលស់ផ្ទះ ព្រោះអត់មានជំនាញរកស៊ីដូចគេ ក៏ប៉ុន្តែដល់ពេលឥឡូវ ត្រូវការលុយ មានតែប្រកាសលក់ផ្ទះវិញហើយ… ហួសពីស្តាយ តែមិនដឹងធ្វើម៉េច…»។ លោកបន្ដថា «ខ្ញុំមានបំណងចង់លក់ផ្ទះ និងដីមួយចំនួន :

1- វីឡាទោល EO,E1,E2 ផ្ទះកែង មានទីធ្លាធំទូលាយ មានទីតាំងក្នុងបុរីពិភពថ្មីសំរោងអណ្តែត2 ទំហំដី 18.40m – 33.40 m ជិតផ្សារបឹងបៃតង ហើយចំណាយពេលតែ 5នាទីដល់ផ្សារទំនើប AEON II និងផ្សារ Makro។

2- ផ្ទះល្វែង Shop House EO,E1,E2 បុរីថៃឈុនគ្រី ផ្លូវបេតុង ជួរខាងមុខ អាចរកស៊ីបាន សល់តែ 3ខែរួចរាល់ (លក់តាមតម្លៃក្រុមហ៊ុនបច្ចុប្បន្ន ) ទំហំ 5mគុណ15m សល់មុខ 4 m ក្រោយ1.5 m ចុះពីផ្លូវធំឧកញ៉ាម៉ុងរិទ្ធី 200 m ហើយចំណាយពេលតែ 5នាទីដល់ផ្សារទំនើប AEON II និងផ្សារ Makro។

3- ដីប្លង់វីឡា 20mគុណ30m ជាប់នឹងរបងបុរីពិភពថ្មីបឹងឈូក ចុះពីផ្លូវ 2011ប្រហែល 200 m ចំណាយពេលតែ 3 នាទី ពីផ្សារឈូកមាស តំបន់អភិវឌ្ឍន៍ខ្លាំង។

4- ផ្ទះវីឡាភ្លោះខ្នាតធំ EO,E1,E2 ទ្វារ ទូតាំង និងទូដាក់ខោអាវធ្វើពីឈើប្រណីតគ្រប់បន្ទប់ ទំហំដី 9.8m គុណ 21m ក្នុងបុរីពិភពថ្មីសំរោងអណ្តែត1 ជិតផ្សារបឹងបៃតង ហើយចំណាយពេលតែ 5 នាទី ដល់ផ្សារទំនើប AEON II និង ផ្សារ Makro។

5- ផ្ទះវីឡាកូនកាត់ EO,E1,E2 ក្នុងបុរីប៉េងហួតវ៉េងស្រេង ទំហំផ្ទះ 4.9m គុណ 12m សល់មុខ 4m

6- ដីធ្វើរោងចក្រ ឬសិប្បកម្ម ចាក់ដីហើយស្អាត នៅតំបន់ទីប្រជុំជនបាក់ដឹង ទីរួមស្រុកឧដុង្គ ទំហំ 2.3ហិកតា លើផ្លូវ 129 (ទំហំផ្លូវ 40m) ចុះពីផ្លូវជាតិ51 ប្រហែល 2 km។

គួរបញ្ជាក់ផងដែរថា ឪពុករបស់តារាចម្រៀង ករុណា ពេជ្រ បានធ្លាក់ខ្លួនឈឺរហូតដល់ដំណាក់កាលបាត់បង់ការចងចាំ ហើយលោកបានបញ្ជូនទៅព្យាបាលនៅមន្ទីរពេទ្យល្បីមួយនៅក្រុងភ្នំពេញ។ ក្រោយមកលោកក៏សម្រេចចិត្តបញ្ជូនទៅព្យាបាលនៅប្រទេសវៀតណាម តែស្ថានភាពជំងឺនៅតែធ្ងន់ធ្ងរដដែល ធ្វើឱ្យលោកមានការសោកស្តាយជាខ្លាំង ។ ពេលនេះករុណា ពេជ្រ បាននាំឪពុកមកព្យាបាលនៅមន្ទីរពេទ្យក្នុងទីក្រុងភ្នំពេញវិញហើយ៕

May 25, 2018

ហេតុអីបានការជជែកលេងជាមួយកូន គឺជារឿងសំខាន់?

កុំគិតថា កូននៅក្មេងមិនដឹងរឿងអី ឬប្រហែលជាមិនយល់អីឱ្យសោះ ព្រោះការពិតទៅ នៅក្នុងជីវិតប្រចាំថ្ងៃ និងកិច្ចការងារផ្សេងៗដែលបានធ្វើរួមគ្នានោះ សំឡេង និងពាក្យសំដីរបស់ឪពុកម្ដាយមានផលទៅដល់អារម្មណ៍ ការគិត និងការរៀនយល់ដឹងរបស់កូនជានិច្ច។ ខាងក្រោមនេះគឺជាចំណុចល្អៗទទួលបានពីការជជែកលេងជាមួយកូន ដែលឪពុកម្ដាយគួរតែប្រតិបត្តិ ដើម្បីជាប្រយោជន៍ដល់កូន។

1. កូនបានរៀនយល់ដឹងពីភាសា: តាមរយៈការធ្វើត្រាប់តាមពាក្យសំដីដែលឪពុកម្ដាយប្រើ តាមរយៈបទសន្ទនាតាមបែបផ្សេងៗដែលបានជជែកឆ្លើយឆ្លងគ្នារឹតតែយើងបានជជែកគ្នាបានច្រើនប៉ុនណា កូនក៏នឹងរឹតតែស្គាល់ពាក្យពេចន៍ និងបង្កើនជំនាញក្នុងការឆ្លើយឆ្លងទាក់ទងកាន់តែច្រើនឡើងប៉ុននោះដែរ។

2. ជំរុញខួរក្បាល: ឪពុកម្ដាយដែលឧស្សាហ៍និទានរឿង ជជែកនិយាយ ឧស្សាហ៍សួរសំណួរ នឹងជួយឱ្យកូនបានហ្វឹកហាត់ប្រើការគិត មានគំនិតច្នៃបង្កើត ចេះបត់បែន និងចេះគិតរឿងរ៉ាវបន្តៗគ្នាបានល្អ។ ក្មេងឆ្លាត ព្រោះមានឱកាសសំលៀងខួរក្បាលញឹកញាប់ហ្នឹងឯង។

3. បង្កើនចំណេះដឹង: ចំណេះដឹងមិនមែនបានមកតែពីក្បួនតម្រាប៉ុណ្ណោះទេ តែមួយផ្នែកក៏បានមកពីការជជែកនិយាយគ្នាដែរ។ ខួរក្បាលរបស់កុមារប្រៀបដូចជាឃ្លាំងផ្ទុកទំនិញដែលធំទូលាយ និងអាចពង្រីកទំហំបានយ៉ាងគ្មានដែនកំណត់។ ឧស្សាហ៍និទានរឿង ឧស្សាហ៍បង្រៀន ឧស្សាហ៍បន្ថែមរឿងរ៉ាវល្អៗចូលទៅ នោះនឹងកើតផលល្អមិនខាន។

4. យល់ពីខ្លួនឯង យល់ពីអ្នកដទៃ: ការបបួលកូនជជែកគ្នាដើម្បីឱ្យកូនបង្ហាញពីគំនិតយោបល់របស់ខ្លួនឯង ប្រាប់ពីអារម្មណ៍របស់ខ្លួនឯងចេញមកឱ្យបាន។ រឿងនេះនឹងធ្វើឱ្យកូនកើតការទទួលស្គាល់ខ្លួនឯង ចេះសម្រាលអារម្មណ៍ និងនាំឆ្ពោះទៅរកការទទួលស្គាល់ និងយល់ពីអារម្មណ៍អ្នកដទៃជាបន្ត។

5. ចេះឆ្លើយឆ្លងទាក់ទង: ចង់ឱ្យកូនក្លាយជាអ្នកនិយាយ និងជាអ្នកស្ដាប់ដ៏ល្អរបស់សង្គម ឪពុកម្ដាយត្រូវជួយគ្នាបង្ហាត់តាំងពីថ្ងៃនេះទៅ ដោយធ្វើជាគំរូដ៏ល្អ និងបង្ហាត់បង្រៀនតាមរយៈការបបួលជជែក មិនថាតែរឿងការចេះទទួលស្ដាប់ពីគំនិតយោបល់របស់អ្នកដទៃ និងការបញ្ចេញគំនិតយោបល់ដែលខុសប្លែកពីគ្នាដោយហេតុផល មិនប្រើអារម្មណ៍ និងជាពិសេស បង្ហាត់កូនៗរបស់អ្នកឱ្យហ៊ានគិត ហ៊ាននិយាយ តែមិនច្រងេងច្រងាង៕

May 25, 2018

អ្នកម្តាយមានគភ៌គេងមិនលក់ គួរធ្វើយ៉ាងម៉េច?

ក្តីលំបាកមួយទៀតរបស់មនុស្សយើងគឺ “ងងុយគេង តែគេងមិនលក់” ហើយអ្នកម្តាយមានគភ៌ជាច្រើននាក់ក៏ប្រហែលជាធ្លាប់កើតអាការបែបនេះញឹកញាប់ដែរ មែនទេ?

ហេតអ្វីបានអ្នកម្តាយមានគភ៌គេងមិនលក់? មូលហេតុចម្បង គឺបណ្តាលមកពីការប្រែប្រួលរបស់អ័រម៉ូននៅក្នុងរាងកាយហ្នឹងឯង។

ក្នុងត្រីមាសទី1 ៖ ជាពិសេសក្នុងអំឡុងពេលត្រីមាសដំបូង ដែលកម្រិតអ័រម៉ូន ប្រូជេស្ទើរ៉ូន កើនឡើងខ្ពស់ជាងប្រក្រតី ធ្វើឱ្យអ្នកម្តាយមានអារម្មណ៍ម៉ួម៉ៅ នឿយល្វើយ សោកសៅ និងគេងមិនលក់ ឬពេលខ្លះមានអារម្មណ៍ងងុយគេងខ្លាំង តែគេងលក់មិនសូវពេញលេញ ឬអ្នកម្តាយខ្លះគេងពេលថ្ងៃច្រើនពេក ក៏ជាមូលហេតុមួយធ្វើឱ្យពេលយប់មានអារម្មណ៍មិនសូវងងុយគេងផងដែរ។

ក្នុងត្រីមាសទី2 ៖ ខណៈដែលក្នុងអំឡុងត្រីមាសទី2 មានមូលហេតុចម្បងមកពីការរើរបស់កូននៅក្នុងពោះ បូកជាមួយក្នុងអំឡុងពេលនេះអ័រម៉ូន ប្រូជេស្ទើរ៉ូន នៅក្នុងរាងកាយរបស់អ្នកម្តាយនៅតែខ្ពស់ដដែល ដូចនេះអ្នកម្តាយក៏អាចនឹងគេងមិនលក់បានដូចគ្នា។

ក្នុងត្រីមាសទី3 ៖ និងក្នុងត្រីមាសចុងក្រោយ អ្នកម្តាយមួយចំនួនអាចគេងមិនលក់ ដោយសារតែការរីកធំរបស់ក្បាលពោះ ទើបមានអារម្មណ៍ថាតឹងពោះ ឈឺខ្នង ឬឈឺបត់ជើងតូចញឹក រហូតត្រូវងើបឡើងទៅចូលបន្ទប់ទឹកជាញឹកញាប់។

ក) គេងមិនលក់មានផលប៉ះពាល់ដល់សុខភាព

បើត្រឹមតែ1ដង ឬ2ដង អ្នកម្តាយគ្រាន់តែងងុយគេង ស្ងាបនៅពេលថ្ងៃតែប៉ុណ្ណោះ តែបើញឹកញាប់រៀងរាល់យប់វិញនោះ វាប្រហែលមិនមែនជារឿងល្អទេ ព្រោះថា៖

. គេងមិនលក់ធ្វើឱ្យមានអារម្មណ៍តានតឹង : អាការគេងមិនលក់ជាមួយភាពតានតឹងក្នុងអារម្មណ៍គឺជារឿងដែលពាក់ព័ន្ធគ្នា ព្រោះនៅពេលអ្នកគេងមិនលក់ វានឹងបង្កឱ្យមានភាពធុញថប់តានតឹង រឹតតែមានអារម្មណ៍តានតឹង រឹតតែភ័យបារម្ភ រហូតទីបំផុតនឹងរឹតតែធ្វើឱ្យគេងមិនលក់ទៅទៀត។

. សម្ពាធឈាមឡើងខ្ពស់ ប្រថុយនឹងសភាវគភ៌មានជាតិពុល : ដោយនៅក្នុងមួយយប់ៗអ្នកម្តាយគួរគេងឱ្យបាន8-9ម៉ោង ដើម្បីឱ្យរាងកាយសម្រួលតុល្យភាព និងគ្រប់គ្រងអ័រម៉ូនផ្សេងៗបានយ៉ាងមានប្រសិទ្ធភាព ជាពិសេសអ័រម៉ូនដែលគ្រប់គ្រងការធ្វើការងាររបស់សរសៃឈាម ព្រោះបើអ្នកម្តាយគេងមិនបានគ្រប់គ្រាន់នោះ អាចធ្វើឱ្យអ័រម៉ូនមានការប្រែប្រួល ហុចផលឱ្យសម្ពាធឈាមឡើងខ្ពស់ និងបង្កឱ្យកើតសភាវគភ៌មានជាតិពុល។

. កូនលូតលាស់ធំធាត់យឺត : នៅពេលអ្នកម្តាយគេងមិនលក់ នឹងធ្វើឱ្យកូនតូចគេងមិនលក់តាមនោះដែរ ដែលអាចនឹងមានផលប៉ះពាល់ដល់ការរីកចម្រើនធំធាត់ផ្នែករាងកាយ និងខួរក្បាលរបស់ទារក។ ការដែលអ្នកម្តាយគេងមិនលក់ នឹងធ្វើឱ្យរាងកាយល្វើយខ្សោយ លំហូរវិលរបស់ឈាមនឹងមិនសូវល្អ ហើយឈាមដែលហូរទៅចិញ្ចឹមកូននៅក្នុងគភ៌មានប្រសិទ្ធភាពទាប ឬមិនគ្រប់គ្រាន់ ពេលប្រសូត្រចេញមកទារកអាចនឹងមានទម្ងន់ខ្លួនតិចជាងប្រក្រតី ហើយការធំធាត់របស់កូនក៏នឹងយឺតជាងធម្មតាដែរ។

ខ) គន្លឹះជួយធ្វើឱ្យងាយគេងលក់

– ជ្រើសរើសឥរិយាបថគេងដែលស័ក្តិសម ព្រោះក្នុងពេលមានគភ៌ អ្នកម្តាយអាចកើតអាការឈឺខ្នង ហើមពោះ ដូច្នេះឥរិយាបថគេងដែលជួយកាត់បន្ថយអាការឈឺខ្នង នឹងធ្វើឱ្យអ្នកម្តាយកាន់តែងាយគេងលក់ឡើង ទោះជាពាក្យណែនាំទូទៅប្រាប់ឱ្យអ្នកម្តាយគេងផ្អៀងខាងឆ្វេង ព្រោះស្បូននឹងមិនសង្កត់លើសរសៃឈាមខ្មៅធំដែលនៅខាងស្តាំមែន តែការពិតអ្នកម្តាយអាចគេងក្នុងឥរិយាបថណាក៏បានឱ្យតែមានអារម្មណ៍ថាសប្បាយស្រួលខ្លួន។

– កែសម្រួលសភាពក្នុងបន្ទប់គេងឱ្យស័ក្តិសមសម្រាប់អ្នកមានគភ៌ ដូចជា ជ្រើសរើសពូក ខ្នើយកល់ ខ្នើយឱបឱ្យអំណោយផលនឹងស្ថានភាពនៃការគេងរបស់អ្នកម្តាយជាដើម។

– គួរចៀសវាងការទទួលទានទឹកច្រើន ជាពិសេស3ម៉ោងមុនចូលគេង ព្រោះនឹងធ្វើឱ្យអ្នកម្តាយមានអារម្មណ៍ឈឺបត់ជើងតូច និងបើភ្ញាក់ពេលកណ្តាលយប់ហើយ ធ្វើឱ្យមិនងាយគេងលក់វិញនោះទេ។

– ព្យាយាមចូលគេង និងភ្ញាក់ឱ្យទៀងពេល ព្រោះបើមានការផ្លាស់ប្តូរកន្លែង ឬខុសពេលវេលា អាចធ្វើឱ្យអ្នកមានអារម្មណ៍មិនងងុយ ឬមិនចង់គេង។

– មុនចូលគេង ចូរអ្នកម្តាយទទួលទានទឹកដោះគោក្តៅឧណ្ហៗ នឹងជួយឱ្យគេងឆាប់លក់។

– ហាត់ប្រាណស្រាលៗជាប់ជានិច្ច ជួយឱ្យឈាមហូរវិលបានកាន់តែល្អឡើង ធ្វើឱ្យអ្នកម្តាយគេងលក់កាន់តែស្រួលឡើង។

– បើកបទចម្រៀងស្តាប់តិចៗមុនចូលគេង ឬធ្វើចិត្តឱ្យស្ងប់ ព្រោះភាគច្រើនអ្នកម្តាយច្រើនតែបារម្ភថា បើគេងមិនលក់ កូននឹងមានបញ្ហា ដូច្នេះកាត់បន្ថយភាពជ្រួលច្រាលនេះចេញ ធ្វើចិត្តឱ្យសប្បាយ តែប៉ុណ្ណឹងមិនបាច់តានតឹងក្នុងអារម្មណ៍រហូតគេងលែងលក់ទៅហើយ។

សាកល្បងនាំយកវិធីទាំងនេះទៅប្រើលលមើល៍ តែបើអ្នកម្តាយណានៅតែគេងមិនលក់ដូចមុនដដែលនោះ សូមប្រញាប់ទៅប្រឹក្សាជាមួយលោកគ្រូពេទ្យភ្លាម ព្រោះបើបណ្តោយទុកយូរនឹងខូចសុខភាព ហើយមានគ្រោះថ្នាក់ថែមទៀត ហើយដែលសំខាន់គឺកុំទិញថ្នាំគេងលក់មកញ៉ាំដោយខ្លួនឯងឱ្យសោះ ព្រោះវានឹងបង្កឱ្យមានគ្រោះថ្នាក់ខ្លាំងណាស់ចំពោះទារក៕

May 25, 2018

ការពន្យារកំណើតជាអ្វី?

ការពន្យារកំណើតគឺជាការអនុវត្តតាមវិធីសាស្ត្រមួយចំនួន ដើម្បីការពារអ្នកពីការបង្ករកំណើត។ ស្ត្រីរាប់លាននាក់ បានជ្រើសរើសវិធីនៃការពន្យារកំណើតទៅតាមកាលៈទេសៈ និងស្ថានភាពសុខភាពរបស់ពួកគេ។ មុននឹងធ្វើការសម្រេចចិត្តថាតើអ្នកនឹងត្រូវប្រើប្រាស់វិធីណា ដើម្បីពន្យារកំណើតនោះអ្នកត្រូវតែបានដឹងពីគុណប្រយោជន៍ ផលវិបាក និងកត្តាមួយចំនួនទៀតឱ្យបានច្បាស់ជាមុនសិន។ ភាពច្បាស់លាស់អស់ទាំងនោះអាចកើតមានឡើងបានលុះណាតែអ្នកបានទៅជួបពិភាក្សាឱ្យបានច្បាស់ ប៉ុន្តែប្រសិនបើអ្នកចង់បានព័ត៌មានខ្លះៗអំពីការពន្យារកំណើតជាមុនសិននោះសូមតាមដានអត្ថបទខាងក្រោមដូចតទៅ៖

ស្រោមអនាម័យ៖ មិនត្រឹមតែមានប្រសិទ្ធភាពក្នុងការការពារមិនឱ្យមានផ្ទៃពោះនោះទេ តែវាថែមទាំងអាចជួយការពារអ្នកពីការចម្លងរោគផ្សេងៗផងដែរ។ ដើម្បីទទួលបាននូវលទ្ធផលជាទីពេញចិត្តនោះ អ្នកក៏ត្រូវតែដឹងពីរបៀបប្រើប្រាស់ និងត្រូវចេះពិនិត្យឱ្យបានច្បាស់មិនឱ្យមានរហែក ឬផុតកំណត់ប្រើប្រាស់នោះឡើយ។ សូមសាកសួរព័ត៌មានបន្ថែមពីអ្នកជំនាញអំពីវិធីប្រើប្រាស់ ប្រសិនបើអ្នកនៅមិនទាន់មានភាពច្បាស់លាស់ក្នុងការប្រើប្រាស់ស្រោមអនាម័យដើម្បីធ្វើការពន្យារកំណើត។

ថ្នាំលេបពន្យារកំណើត៖ ជាវិធីការពារអ្នកពីការមានគត៌មួយប្រភេទទៀតដែលតម្រូវឱ្យអ្នកត្រូវលេបវាជារៀងរាល់ថ្ងៃ។ ថ្នាំនេះ មានប្រភេទអ័រម៉ូនម្យ៉ាងឈ្មោះ អឺសត្រូហ្សែន (estrogen) និង ប្រូដ្យិសស្ដេរ៉ូន (progesterone) ដែលមានតួនាទីការពារកុំឱ្យស្ដ្រីមានផ្ទៃពោះបាន។ ការពន្យារកំណើតតាមរយៈការលេបថ្នាំអាចជួយកាត់បន្ថយភាពស្លេកស្លាំង និងកាត់បន្ថយការឈឺចាប់នៅពេលមានឈាមរដូវបានខ្លះ ប៉ុន្តែវាក៏បណ្តាលឱ្យមានផលវិបាកមួយចំនួនដូចជា វិលមុខ ឡើងទម្ងន់ ដោះឡើងតឹង ឈឺដោះ ឈឺក្បាល ឬក្អួតចង្អោរជាដើម។

ថ្នាំលេបពន្យារកំណើតបន្ទាន់៖ វាមិនមែនជាប្រភេទថ្នាំដែលតម្រូវឱ្យអ្នកលេបជារៀងរាល់ថ្ងៃនោះទេ តែវាអាចការពារអ្នកពីការមានផ្ទៃពោះបានតាមរយៈពេលដែលគេបានកំណត់ បន្ទាប់ពីរួមភេទរួច។ ថ្នាំពន្យារកំណើតបន្ទាន់ អាចមានប្រសិទ្ធភាពបាន លុះត្រាតែលេបបន្ទាប់ពីមានការរួមភេទរួចមិនឱ្យលើសពី72ម៉ោង។

ថ្នាំចាក់ពន្យារកំណើត៖ វិធីមួយផ្សេងទៀតដែលអាចជួយការពារអ្នកពីការមានផ្ទៃពោះនោះគឺការចាក់ថ្នាំពន្យារកំណើតរាល់3ខែម្តង។ ជាទូទៅថ្នាំប្រភេទនេះ គេចាក់នៅលើដើមដៃ និងនៅលើត្រគាក ប៉ុន្តែសូមកុំភ្លេចទៅចាក់ជាថ្មីម្តងទៀតតាមពេលវេលាដែលគ្រូពេទ្យបានណាត់ ព្រោះបើមិនដូច្នេះទេអ្នកអាចនឹងមានកូនដោយមិនដឹងខ្លួនក៏ថាបាន។ ការចាក់ថ្នាំអាចធ្វើឱ្យមានការរំខានមួយចំនួនឡើងដូចជា ការមករដូវយឺតយ៉ាវ ដោះឡើងតឹង ឈឺដោះ ឬឈឺក្បាលតិច។

ការពន្យារកំណើតដោយប្រើកង៖ កងពន្យារកំណើតមានពីរប្រភេទ គឺកងដាក់ក្នុងស្បូន និងកងដាក់ដៃ។ កងដាក់ដៃស្បូនគឺជាឧបករណ៍តូចមួយដែលអាចបត់បានសម្រាប់ដាក់ចូលក្នុងស្បូន ដើម្បីការពារមិនឱ្យមានផ្ទៃពោះ។ ចំណែកឯកងដាក់ដៃវិញ គឺជាបំពង់តូចៗទន់អាចបត់បាន មានទំហំប៉ុនដើមឈើគូសក្នុងនោះមានជាតិអ័រម៉ូន ប្រូហ្សេស្ទីន ដែលជាអ័រម៉ូនដូចគ្នាទៅនឹងអ័រម៉ូនធម្មជាតិក្នុងខ្លួនស្ដ្រីសម្រាប់ការពារការមានផ្ទៃពោះ។ បំពង់ទាំងនេះដាក់បញ្ចូលទៅក្រោមស្បែកដើមដៃរបស់ស្ដ្រី។ កងដាក់ដៃមាន3ប្រភេទ ប្រភេទទី1 គឺជាកងដែលមានបំពង់6ដើម ការពារបាន7ឆ្នាំ។ ប្រភេទទី2 គឺកងមាន2ដើម ការពារបាន5ឆ្នាំ។ រីឯប្រភេទទី3 គឺកង1ដើម ការពារបាន3ឆ្នាំ។ ការដាក់កងអាចផ្តល់នូវភាពងាយស្រួល មិនមានការរំខានដល់ការរួមភេទ មានសុវត្ថិភាព និងមានប្រសិទ្ធភាពខ្ពស់ សមស្របសម្រាប់ស្ត្រីដែលបំបៅដោះកូន ហើយវាក៏ជាវិធីដ៏ល្អមួយសម្រាប់អ្នកដែលមានបំណងចង់ពន្យារកំណើតក្នុងរយៈពេលវែង។

នៅមានវិធីពន្យារកំណើតផ្សេងៗទៀតដែលអ្នកអាចអនុវត្ត ប៉ុន្តែមិនថាអ្នកជ្រើសរើសវិធីពន្យារកំណើតណាមួយនោះទេ សូមទៅជួបពិគ្រោះពិភាក្សាជាមួយគ្រូពេទ្យជំនាញឱ្យបានច្បាស់លាស់ និងត្រឹមត្រូវ ដើម្បីស្វែងរកវិធីពន្យារកំណើតមួយដែលសមស្របបំផុតសម្រាប់ខ្លួនអ្នក។ ម្យ៉ាងវិញទៀតសូមចងចាំឱ្យបានច្បាស់នូវករណីមួយចំនួនដែលគ្រូពេទ្យបានហាមមិនឱ្យធ្វើ ដើម្បីចៀសវាងការកើតមាននូវបញ្ហាផ្សេង៕

May 25, 2018

មន្ទីរពិសោធន៍សុវត្ថិភាពផលិតផលកសិកម្ម និងចំណីអាហារត្រូវបានដាក់ឱ្យប្រើប្រាស់

មន្ទីរពិសោធន៍ផលិតផលកសិកម្ម និងចំណីអាហារមួយត្រូវបានប្រកាសដាក់ឱ្យប្រើដោយក្រសួងកសិកម្ម រុក្ខា ប្រមាញ់ និងនេសាទកាលពីដើមខែនេះ (ឧសភា) ស្របពេលដែលប្រជាពលរដ្ឋកម្ពុជាកំពុងព្រួយបារម្ភយ៉ាងខ្លាំងពីសុវត្ថិភាពចំណីអាហារដែលជាផលិតផលក្នុងស្រុកដែលកំពុងដាក់លក់ពាសពេញនៅលើទីផ្សារក្នុងប្រទេសនាពេលបច្ចុប្បន្ន។

តាមប្រកាសរបស់ក្រសួងកសិកម្ម រុក្ខា ប្រមាញ់ និងនេសាទដែលចុះហត្ថលេខាដោយឯកឧត្ដមរដ្ឋមន្ត្រី វេង សាខុន បានឱ្យដឹងថា មន្ទីរពិសោធន៍នេះនឹងផ្តល់នូវការវិភាគអំពីគុណភាព និងសុវត្ថិភាពលើចំណីអាហារដែលមានវត្ថុធាតុដើមជាផលិតផលកសិកម្មដោយអនុលោមទៅតាមបទដ្ឋានជាតិរបស់អាស៊ាន អង្គការសុវត្ថិភាពស្បៀង និងកសិកម្ម ក្រុមអង្គការសុខភាពពិភពលោក និងស្តង់ដារតម្រូវនៃបណ្តាប្រទេសនាំចូលផ្សេង។

សេចក្តីប្រកាសនេះក៏បានណែនាំឱ្យម្ចាស់សិប្បកម្ម ផលិតកម្ម និងអ្នកជំនួញផ្នែកកសិកម្មអញ្ជើញមកប្រើប្រាស់មន្ទីរពិសោធន៍ផលិតផលកសិកម្ម និងចំណីអាហាររបស់រដ្ឋនេះដើម្បីធានានូវគុណភាព និងសុវត្ថិភាពលើផលិតផល និងទំនិញដែលជាចំណីអាហាររបស់ខ្លួន ព្រោះថា រាល់មុខទំនិញ ឬផលិតផលដែលបានឆ្លងកាត់មន្ទីរពិសោធន៍មួយនេះនឹងត្រូវបានចេញវិញ្ញាបនបត្របញ្ជាក់ពីគុណភាព និងសុវត្ថិភាពជូនទាំងអស់។

លោកស្រី សៀង ហ៊ុយ អតីតអនុប្រធានវិទ្យាស្ថានបច្ចេកវិទ្យា និងវិទ្យាសាស្ត្រនៃរាជបណ្ឌិតសភាកម្ពុជាបានឱ្យដឹងថា៖ មន្ទីរពិសោធន៍មានច្រើនកន្លែង ដូចជាមន្ទីរពិសោធន៍របស់ក្រសួងឧស្សាហកម្ម មន្ទីរពិសោធន៍របស់កាំកុងត្រូល ជាដើម តែវាអាស្រ័យទៅលើការចង់ពិសោធមើលពីអ្វី? ក្រសួងសុខាភិបាលក៏មានមន្ទីរពិសោធន៍របស់គេដែរ តែមានជំនាញ និងធ្វើការផ្សេងពីគ្នា។ ពោលគឺវាមានតួនាទីផ្សេងៗគ្នា ហើយការដាក់ឱ្យប្រើប្រាស់មន្ទីរពិសោធន៍ទាំងនេះ វាមានផលប្រយោជន៍ និងមានសារៈសំខាន់សម្រាប់ស្ថាប័ននីមួយៗចំពោះសាធារណជនទាំងអស់។

លោកស្រីបានបន្តថា៖ “ចំពោះការប្រកាសដាក់ឱ្យប្រើប្រាស់មន្ទីរពិសោធន៍របស់ក្រសួងកសិកម្មនេះវិញ គឺគេប្រើសម្រាប់មើលតែលើផលិតផលកសិ-ឧស្សាហកម្ម ឬផលិតផលកសិកម្មដែលជាចំណីអាហារ ដូច្នេះវាជាការរួមចំណែកមួយដែលជួយដល់ការត្រួតពិនិត្យមើលទៅលើផលិតផលកសិកម្ម(បន្លែផ្លែឈើ ត្រីសាច់-ល-) ទាំងនោះថា តើមានជាតិគីមី ឬជាផលិតផលដែលបង្កឱ្យមានគ្រោះថ្នាក់ដល់សុខភាពប្រជាពលរដ្ឋរបស់យើងដែរឬអត់?។

ផលិតផលកសិកម្ម និងចំណីអាហារដែលផលិតនៅកម្ពុជា

សេចក្តីប្រកាសខាងលើក៏បានបញ្ជាក់ដែរថា មន្ទីរពិសោធន៍នេះក៏មានតួនាទីផ្តល់សេវាកម្មបណ្តុះបណ្តាលធនធានមនុស្សដើម្បីសហប្រតិបត្តិ-ការស្រាវជ្រាវលើការវិភាគគុណភាព និងសុវត្ថិភាពចំណីអាហារដែលជាផលិតផលកសិកម្មផងដែរ។ មន្ទីរពិសោធន៍នេះមានអំណាចចេញលិខិតព្រមាន ផ្អាក ឬបញ្ឈប់ និងដកហូតចំពោះផលិតផលចំណីអាហារណាដែលត្រូវបានរកឃើញមានផ្ទុកសារធាតុគីមី លោហធាតុ កាកសំណល់ថ្នាំគីមីកសិកម្ម សារធាតុកែច្នៃ កម្រិតសារធាតុបន្ថែមដែលហាមឃាត់ និងពពួកមីក្រូសរីរាង្គចម្លងរោគជាដើម។

មន្ទីរពិសោធន៍ផលិតផលកសិកម្ម និងចំណីអាហារនេះនឹងផ្តល់ការវិភាគពីគុណភាព និងសុវត្ថិភាពដ៏គួរឱ្យទុកចិត្តលើចំណីអាហារដែលជាផលិតផលកសិកម្មដោយអនុលោមទៅតាមបទដ្ឋានជាតិអាស៊ាន និងអន្តរជាតិ ដូចជា FAO, WHO, Codex Alimentarius Commission (CAC) និងស្តង់ដារតម្រូវនៃបណ្តាប្រទេសនាំចូលផ្សេង។ល។

មន្ត្រីសង្គមស៊ីវិលបាននិយាយថា មន្ទីរពិសោធន៍នេះនឹងរួមចំណែកដល់ការពង្រឹងគុណភាព និងសុវត្ថិភាពចំណីអាហារនៅកម្ពុជាដែលសព្វថ្ងៃប្រជាពលរដ្ឋខ្មែរយើងកាន់តែច្រើនកំពុងព្រួយបារម្ភពីផលប៉ះពាល់នៃចំណីអាហារដែលមានផ្ទុកសារធាតុគីមីដែលដាក់លក់ដោយគ្មានស្ថាប័នណាត្រួតពិនិត្យ។

លោក អ៊ុក ម៉ាការា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាបានគាំទ្រចំពោះរាជរដ្ឋាភិបាលក្នុងកិច្ចខិតខំប្រឹងប្រែងបង្កើនទំនុកចិត្តលើគុណភាពបន្លែផ្លែឈើ និងចំណីអាហារប្រកបដោយការទទួលខុសត្រូវចំពោះសុខភាពសាធារណៈ។ តែលោកបានឱ្យដឹងដែរថា ចំពោះផលិតផលមួយចំនួនដែលកសិករផលិតបាន ឈ្មួញបានទិញពីកសិករយកទៅកែច្នៃជាចំណីអាហារ ហើយលក់ចេញទៅដោយមិនបានឆ្លងកាត់មន្ទីរពិសោធន៍នោះឡើយ ដូច្នេះស្ថាប័នរដ្ឋពាក់ព័ន្ធគួរតែកំណត់ ឬតម្រូវឱ្យផលិតផលទាំងនោះត្រូវតែឆ្លងកាត់ការត្រួតពិនិត្យយ៉ាងត្រឹមត្រូវជាចាំបាច់ដើម្បីពិសោធន៍រកមើលសារធាតុពុលដែលប៉ះពាល់ដល់សុខភាពមនុស្សមុននឹងដាក់លក់នៅលើទីផ្សារក្នុងស្រុក ឬនាំចេញជាដើម។

លោកបន្តថា៖ “តាមការពិត មន្ទីរពិសោធន៍នេះថែមទាំងត្រូវពិនិត្យមើលលើផលិតផលដែលបម្រើឱ្យផលប្រយោជន៍ខាងកសិកម្ម ដូចជាជីគីមី ថ្នាំសម្រាប់ប្រើលើការដាំដុះដំណាំកសិកម្មទៀតផង ហើយពួកគេមានសិទ្ធិចុះទៅត្រួតពិនិត្យមើលផលិតផលដែលកសិករកំពុងផលិតហ្នឹងថាតើមានសារធាតុពុលច្រើន ឬតិចកម្រិតណា? ប៉ះពាល់ដល់សុខភាពអ្នកទទួលទានឬទេ? ទៀតផងដើម្បីធ្វើឱ្យផលិតផលឬមុខទំនិញដែលជាចំណីអាហារមានសុវត្ថិភាពត្រឹមត្រូវទៅតាមកម្រិតស្តង់ដារដែលក្រសួងពាណិជ្ជកម្មបានកំណត់”៕

May 25, 2018

ប្អូនប្រុស ដេននី ក្វាន់ ប្រតិកម្មចំពោះភាពអយុត្តិធម៌លើបងស្រី

ប៉ុន្មានម៉ោងមុននេះបន្ដិច ម្ចាស់បទចម្រៀង “ស្នេហ៍ខ្ញុំខុសអ្វី?” ដែលគេស្គាល់ថា ជាប្អូនប្រុសបង្កើតរបស់តារាសម្ដែងស្រីសិចស៊ី ដេននី ក្វាន់ បានបង្ហោះសារសម្ដែងការមិនពេញចិត្តចំពោះការរងនូវភាពអយុត្តិធម៌របស់បងស្រីខ្លួន។

លោក គីម សាន ប្អូនបង្កើតអ្នកនាង ដេននី ក្វាន់ បានស៊ែរព័ត៌មានរបស់តារាស្រីវ័យក្មេងម្នាក់ដែលបានបង្ហាញភាពសិចស៊ីនៅលើបណ្ដាញសង្គមហ្វេសប៊ុក ដោយគ្មានការអើពើ និងចំណាត់ការពីសំណាក់ក្រសួងវប្បធម៌ និងវិចិត្រសិល្បៈសោះឡើយ។ លោកបានរៀបរាប់ថា «អយុត្តិធម៌ចំពោះ ដេននី ក្វាន់ ពេកហើយ ហេតុអ្វីក៏ក្រសួងវប្បធម៌លម្អៀងម្ល៉េះ? ធ្វើជាមនុស្សចាស់ តែចាស់លម្អៀង មិនត្រឹមត្រូវ ធ្វើអ្វីមិនស្មើភាព សិល្បះស្រុកខ្មែរប្រកាន់បក្ខពួកណាស់…គ្រាន់តែ ដេននី ក្វាន់ ស្លៀកពាក់សិចស៊ីលក់ផលិតផលនៅក្នុងផ្ទះសោះ នាំគ្នាប្រតិកម្មពេញសិល្បៈថា ធ្វើឱ្យខូចវប្បធម៌ និងបិទមិនឱ្យសម្តែងពេញមួយឆ្នាំ ។ ចុះម៉េចក៏ក្រសួងវប្បធម៌មិនក្រឡេកមើលតារាសិចស៊ីផ្សេងផង មានច្រើនណាស់ តែបែជាធ្វើមិនដឹងមិនឮ ឬក៏ខាងក្រសួងមានបញ្ហាភ្នែកមើលមិនច្បាស់ មិនដឹងសមិនដឹងខ្មៅ…ចប់ហើយអ៊ីចេះៗ សូម្បីតែក្មេងអាយុ 3ឆ្នាំក៏មើលឃើញថា ក្រសួងវប្បធម៌លម្អៀង មិនយុត្តិធម៌…ប្រកាន់បក្ខពួកគាបសង្កត់តែ ដេននី ក្វាន់!» ។

គួរបញ្ជាក់ផងដែរថា គិតមកទល់ពេលនេះ ការដាក់ពិន័យសិល្បៈ លើតារាសម្តែងស្រីកញ្ញា ដេននី ក្វាន់ គឺគ្រប់រយៈពេល1ឆ្នាំហើយ (ថ្ងៃទី27 ខែឧសភា ឆ្នាំ2017-11 ខែឧសភា ឆ្នាំ2018) ខណៈដែលក្រសួងវប្បធម៌ និងវិចិត្រសិល្បៈ បានបើកកិច្ចប្រជុំពិនិត្យសម្រេចលើកលែងការដាក់ពិន័យ ចំពោះតារាសម្តែងស្រីរូបនេះ។ ជាមួយគ្នានោះដែរ តារាសម្តែងសិចស៊ី ដេននី ក្វាន់ ក៏ធ្លាប់បានលើកឡើងពីអារម្មណ៍របស់ខ្លួនថា «លទ្ធផលយ៉ាងណា នាងខ្ញុំព្រមទទួលយ៉ាងពេញចិត្ត…! បើទោះជាឱ្យសិទ្ធិនាងខ្ញុំចូលសិល្បៈវិញ ឬមិនឱ្យ ក៏ស្របតាម គឺអត់ប្រកែកទេ។ អស់រយៈពេលមួយឆ្នាំហើយដែលខ្ញុំផ្អាកពីសិល្បៈ ចុះបើឥឡូវខ្ញុំមានឱកាសចូលសិល្បៈវិញ តើអ្នកទាំងអស់គ្នា នៅគាំទ្រខ្ញុំដែរទេ?»។

នេះហើយជាមេរៀនជីវិតសិចស៊ីរបស់តារាស្រី ដេននី ក្វាន់ នៅក្នុងសង្គមសិល្បៈ ដែលតារាៗជំនាន់ក្រោយគួរតែពិចារណាពីភាពសិចស៊ីរបស់ខ្លួនឡើងវិញ៕

May 25, 2018

រតនៈ ពិសី ក្អួតឈាម ខណៈដែល ម៉ៃ សុគន្ធ ប្រគល់ពាន “សិចស៊ីជិតអស់ពីខ្លួន”

កាលពីពេលថ្មីៗនេះ ពិតជាមានការភ្ញាក់ផ្អើលយ៉ាងខ្លាំងនៅលើបណ្ដាញទំនាក់ទំនងសង្គមហ្វេសប៊ុក ខណៈដែលតារាចម្រៀងស្រី-ប្រុស 2ដួង បានប្រគល់ពានរង្វាន់ប្រចាំឆ្នាំឱ្យគ្នាទៅវិញទៅមក ដែលទាំងពីរនាក់នោះគឺ តារាចម្រៀងស្រីសិចស៊ី និយមបញ្ចេញល្វែងលើមិនក្រែងចិត្តបុរសៗ គឺកញ្ញា រតនៈ ពិសី និងតារាចម្រៀងដែលមានរហស្សនាមថា “កំពូលទើស” នៅក្នុងពិភពសិល្បៈ គឺលោក ម៉ៃ សុគន្ធ។

កញ្ញា រតនៈ ពិសី បានបង្ហោះសារប្រគល់ពានរង្វាន់បែបឌឺដងផ្លែផ្កាឱ្យ ម៉ៃ សុគន្ធថា «នេះជាពានរង្វាន់ប្រចាំឆ្នាំរបស់រៀមច្បង ម៉ៃ សុគន្ធ…សូមជួយដាក់ងារផងថា ស័ក្ដិសមជាមួយនឹងជំនាញអ្វីរបស់គាត់…ពាន “ទើសប្រចាំឆ្នាំ” ឬក៏ពាន ” Mother of copy” សូមជួយឱ្យយោបល់គ្នាបន្តិចមើល ជូនរៀមច្បងខ្ញុំ May Sokun»។ មិនមែនត្រឹមតែតួអក្សរប៉ុណ្ណោះទេ នាងថែមទាំងបានបង្ហោះភ្ជាប់ជាមួយនូវរូបភាពពានមាសមួយដែលមានកាត់តដោយមានដាក់ឈ្មោះ ម៉ៃ សុគន្ធទៀតផង។ ក្រឡេកមកមើលខាងភាគី ម៉ៃ សុគន្ធ ឯណេះវិញម្ដង ក៏បានមិនបង្អែបង្អង់បណ្ដែតបណ្ដោយឱ្យតារាស្រីខាងលើទន្ទឹងចាំយូរឡើយ លោកក៏បានប្រគល់ពានរង្វាន់ពិសេសឱ្យទៅកញ្ញាសិចស៊ីបញ្ចេញដើមទ្រូងដូចគ្នា។ លោកសរសេរថា «បើបងបានពានហ្នឹង អ៊ីចឹងអូនទៅយកពានដែរទៅ គឺពាន “សិចស៊ីជិតអស់ពីខ្លួន» លើសហើយខ្មែរ មើលតែថតកុនព្រិលៗ…អ៊ីចឹង»។

គួរបញ្ជាក់ផងដែរថា ពិតជាគួរឱ្យញាក់សាច់មែន ខណៈដែល ម៉ៃ សុគន្ធ ប្រមូលរូបភាពសិចស៊ីរបស់ រតនៈ ពិសី មកបង្ហោះទាំងអស់ ដូច្នេះដើម្បីឱ្យកាន់តែជាក់ច្បាស់ សូមទស្សនារូបភាពខាងក្រោមនេះ៖

May 25, 2018

តើហេតុអ្វីបាន Sadio Mane ទិញអាវ Liverpool 300 អាវឱ្យទៅអ្នកភូមិរបស់គេនៅសេណេហ្គាល់?

អាវរបស់ក្លិប Liverpool ចំនួន 3០០អាវត្រូវបានបញ្ជូនទៅកាន់ភូមិ Bambali របស់ប្រទេសសេណេហ្គាល់ នៅមុនពេលការប្រកួតក្របខ័ណ្ឌ Champions League វគ្គផ្តាច់ព្រ័ត្រចាប់ផ្ដើម ដោយអាវនោះជាអំណោយរបស់តារាឆ្នើម Sadio Mane។

នៅថ្ងៃសៅរ៍នេះ រូបគេមានបំណងផ្តល់នូវការសន្យាមួយក្នុងការជួយមិត្តភ័ក្តិកាលពីកុមារភាពរបស់គេ ឱ្យលុបចោលនូវការអស់សង្ឃឹម និងគ្មានជំនឿចិត្ត តាមរយៈការរំឭកពីជ័យជម្នះរបស់ក្រុម Liverpool ក្នុងទីក្រុង Istanbul។ កាដូនេះនឹងត្រូវបំពេញ នៅពេលដែលរូបគេនាំយកពាន និងមេដាយរបស់ Champions League វិលត្រឡប់ទៅផ្ទះវិញ។

Mane បានពន្យល់ថា៖ «ខ្ញុំចងចាំពីការប្រកួតរវាងក្រុម AC Milan និង Liverpool កាលពីឆ្នាំ2005។ ការដេញតាមពីក្រោយ 3-០ បន្ទាប់មកតាមស្មើ 3-3 និងស៊ុតបាល់ប៉េណាល់ទី។ នេះគឺជាការចងចាំដ៏ធំមួយសម្រាប់ខ្ញុំ។ ខ្ញុំបានទស្សនាការប្រកួតក្នុងភូមិរបស់ខ្ញុំគឺ Bambali។ ខ្ញុំនៅចងចាំថា ខ្ញុំបានស្ថិតនៅជាមួយនឹងមិត្តភ័ក្តិរបស់ខ្ញុំ និងជាមិត្តភ័ក្តិសម្លាញ់ចិត្តខ្ញុំ ហើយការដេញតាមពីក្រោយ 3-០ គឺជាលទ្ធផលកាត់សេចក្តីរួចជាស្រេច»។

Mane បានបន្ថែមទៀតថា៖ «បន្ទាប់មក រូបគេបានឈប់ទស្សនាការប្រកួត និងបានរត់ចេញពីទីនោះដូចមនុស្សឆ្កួតអ៊ីចឹង។ បន្ទាប់មក រូបគេបានវិលត្រឡប់មកវិញនៅពេលបញ្ចប់ការប្រកួត ហើយរូបគេស្ទើរតែមិនជឿលើលទ្ធផលនៅពេលនោះឡើយ ព្រោះនៅពេលនោះ Liverpool បានទទួលជ័យជម្នះ»៕

ប្រភពព័ត៌មាន៖ The Guardian

May 25, 2018

Category: សង្គម និងសេដ្ឋកិច្ច