ដោយផ្អែកទៅលើវីដេអូនៅលើបណ្ដាញទំនាក់ទំនងសង្គមហ្វេសប៊ុករបស់អ្នកនាង គង់ ចាន់ស្រីមុំ និងស្វាមី នៅថ្ងៃទី 7 ខែកក្កដា ឆ្នាំ 2018 នេះបានឱ្យដឹងថា ពេលនេះអ្នកម្ដាយវ័យក្មេងសម័យថ្មីប្រសូតបុត្រីដ៏គូរឱ្យស្រលាញ់បានដោយសុវត្ថិភាពហើយ។
គួរបញ្ជាក់ផងដែរថា នាងតូចដែលទើបកើតនេះត្រូវបាន អ្នកម៉ាក់លោកប៉ាវ័យក្មេងទាំងពីរ ដាក់ឈ្មោះថា គឹម សីហ៍មរកត ហៅក្រៅថា ម៉ូ ម៉ូ ដែលប្រិយធ្លាប់ស្គាល់ថា ជឈ្មោះប្រ៊េនហាងគ្រឿងសម្អាងរបស់អ្នកនាង។ ចំពោះរូបសម្រស់ កូនតូចនេះវិញ ទើបតែកើតសោះតែមានមុខមាត់ឃ្យូដស្រស់ស្អាតខ្លាំងមិនចាញ់លោកប៉ាអ្នកម៉ាក់គេឡើយ៕
តាមរយៈសារព័ត៌មានថៃ Teenee បានចេញផ្សាយនៅពេលមុននេះបន្ដិចបានឱ្យដឹងថា នាយប្រតិបត្តិក្រុមហ៊ុន SpaceX &The Boring Co. លោក អេឡន ម៉ាសក៍ (Elon Musk) បានប្រកាថា នឹងបញ្ជូនក្រុមវិស្វករជំនាញ របស់លោកឱ្យទៅចូលរួមក្នុងប្រតិបត្តិការជួយសង្រ្គោះក្រុមកីឡាបាល់ទាត់ « ក្រុមជ្រូកព្រៃ» ទាំង 12 រូបនិងគ្រូបង្វឹករបស់ពួកគេម្នាក់ចេញពីរូងភ្នំថាំលួង ខេត្ត ឈៀងរ៉ាយ ប្រទេសថៃ ដែលកំពុងជាប់នៅក្នុងល្អាងអស់រយៈពេល 14 ថ្ងៃមកហើយ។
លោក Elon Musk បានបង្ហោះសារនៅលើធី្វតតឺរបស់ខ្លួនថា «ក្រុមវិស្វករជំនាញមកពី SpaceX & Boring Co នឹងធ្វើដំណើរទៅកាន់ប្រទេសថៃនៅថ្ងៃស្អែកនេះត្រូវនឹងថ្ងៃសៅរ៍ទី 7 ម៉ោងប្រទេសថៃ ដើម្បីពិនិត្យថា ពួកគេអាចជួយអ្វីខ្លះដល់រដ្ឋាភិបាលថៃ ក្នុងការជួយសង្រ្គោះក្រុមជ្រូកព្រៃទាំង 13 រូបចេញពីរូងភ្នំថាំលួង»។
សូមជម្រាបបន្ថែមថា មន្ត្រីថៃ និងក្រុមអ្នកជួយសង្រ្គោះស្ម័គ្រចិត្តកំពុងបង្រៀនអ្នកទាំង 13រូបពីរបៀបជ្រមុជ និងហែលទឹក ការផ្សងព្រេងដ៏គ្រោះថ្នាក់ របៀបរស់នៅក្នុងរូងភ្នំរយៈពេលយូរ រហូតដល់រដូវភ្លៀងបញ្ចប់ ឬទឹកស្រក ព្រោះថា អ្នកជំនាញបានធ្វើការអះអាងថា អ្នកទាំង 13 រូប នឹងត្រូវជាប់ក្នុងរូងយូររហូតដល់ទៅ 4 ខែឯណោះ ដូច្នេះទើបមានក្រុមជំនាញពីអន្តរជាតិបន្ថែមទៀត ដូចជាមកពីជប៉ុន និង SpaceX ចូលរួមជួយ៕
ក្រោយពីកម្ពុជាត្រូវបានគណៈកម្មការ World Guiness Records បានប្រកាសពីជយលាភីជាប្រទេសទី1 លើពិភពលោកបង្កើតក្រមាវែងបំផុតជាង1ពាន់ម៉ែត្រ បានធ្វើឱ្យមហាជនកោតស្ងប់ស្ងែងខ្លាំង។ វីដេអូបទចម្រៀង”ក្រមាសាមគ្គីក្រមាកម្ពុជា” ដែលរៀបរាប់អំពីគុណតម្លៃក្រមា និងទិដ្ឋភាពរីកចម្រៀងនៃសង្គមកម្ពុជានោះក៏បានបញ្ចេញរហូតទទួលបានការកោតសរសើរខ្លាំង។
បទចម្រៀងថ្មី”ក្រមាសាមគ្គីក្រមាកម្ពុជា” ជាការបកស្រាយលើកដំបូងរបស់ម្ចាស់បទ « រាំជាន់អាចម៍ឆ្កែ» តារាចម្រៀងចេនរ៉ូហ្វើ និងអតីតបេក្ខភាពកម្មវិធីប្រលងចម្រៀង Cambodian Idol រដូវកាលទី 3 កញ្ញា ចែម ស្រីលក្ខ ផ្ទុះការចាប់អារម្មណ៍ខ្លាំង ទាំងអត្ថន័យបង្កប់ន័យជ្រាលជ្រៅ និងការផលិតបទចម្រៀងប្រកបដោយគុណភាពទាំងរូបភាពដ៏គួរឱ្យទាក់ទាញ។
តារាចម្រៀង ចេន រ៉ូហ្វើ បានថ្លែងពីមោទកភាពខ្លាំងក្រោយពីបទចម្រៀងនេះផ្ទុះការគាំទ្រខ្លាំង។ តារាចម្រៀង និងជាអ្នកនិពន្ធបទភ្លេងរូបនេះបានបញ្ជាក់ថា លោកមានគោលបំណងបង្កើតបទចម្រៀងបែបនេះជាយូរមកហើយគាប់ជួនទទួលបានការផ្តល់ឱកាសលើកទឹកចិត្តពីកងរាជអាវុធហត្ថរាជធានីភ្នំពេញ គឺកាន់តែធ្វើឱ្យលោកមានកម្លាំងចិត្ត និងខិតខំផលិតបទចម្រៀងនេះដោយមិនរុញរា។
លោកបន្តថាបទចម្រៀងនេះនិពន្ធទំនុកច្រៀងដោយកញ្ញា ថាវ ពេជ្រអម្រិត ចំណាយពេលនិពន្ធសាច់ភ្លេងត្រឹមចំនួន5ថ្ងៃ ដោយចេញថត ជាវីដេអូចំនួន2ថ្ងៃ និងចំណាយពេលកាត់តចំនួន4ថ្ងៃ។ លោកថាបទចម្រៀងនេះមានព័ណ៌សម្បុរបែបខ្មែរច្រើនដោយ មានការដាក់លាយបញ្ចូលគ្នានូវបទចម្រៀងខ្មែរពីដើមជាមួយបទថ្មីដែលមានលក្ខណៈ អត្តសញ្ញាណជាខ្មែរ។
លោកថាកាន់តែធ្វើឲ្យបទចម្រៀងនេះគួរឱ្យចាប់អារម្មណ៍គឺសំនៀងរួមគ្នារបស់លោកជាមួយបេក្ខភាពវគ្គចុងក្រោយរបស់កម្មវិធី The Voice Cambodia កញ្ញាចែមស្រីលក្ខ ពិសេសគឺការកាត់តបទចម្រៀងជាមួយនឹងទិដ្ឋភាពដ៏ស្រស់ត្រកាលនៃតំបន់នានាដែលធ្វើឲ្យអ្នកទស្សនាកាន់តែមានមោទកភាពសម្រាប់ជាតិសាសន៍របស់ខ្លួនឯង។ ជាចុងក្រោយលោកថ្លែងអំណរគុណចំពោះកងរាជអាវុធហត្ថរាជធានីភ្នំពេញ និងទស្សនិកជនដែលបានផ្តល់ឱកាស លើកទឹកចិត្ត និងគាំទ្រស្នាដៃផលិតបទចម្រៀងថ្មីរបស់លោក ហើយលោកនឹងបន្តការខិតខំប្រឹងប្រែងនេះទៅមុខទៀតផងដែរ៕
តាមរយៈទំព័រផ្លូវការ Fa Thailand បានប្រកាសឱ្យដឹងថា លោក Gianni Infantino ប្រធានសហព័ន្ធកីឡាបាល់ទាត់ពិភពលោក Fifa បានផ្ញើលិខិតមកកាន់ លោក ស៊ុមយុធ ផុមផាន់មួង នាយកពុហកីឡដ្ឋានប្រចាំប្រទេសថៃ ដើម្បីសម្ដែងក្ដីរីករាយចំពោះការរកឃើញក្រុមកីឡាករបាល់ទាត់ជ្រូកព្រៃទាំង 12 រូប និងគ្រូបង្វឹក ទាំងអស់ 13 នាក់ ដែលបានជាប់នៅក្នុងរូងភ្នំថាំលួង-ឃុនណ៉ាមណាងណន ខេត្ត ឈៀងរ៉ាយ អស់រយៈពេលជាងមួយសប្ដាហ៍។
ដោយក្រុមកីឡាករទាំង 12 រូប និងគ្រូបង្វឹកម្នាក់នៃក្រុមជ្រូកព្រៃ បានបាត់ខ្លួននៅបរិវេណតំបន់ទេសចរណ៍ដែលពោលខាងលើនៅថ្ងៃទី 23 ខែមិថុនា ឆ្នាំ 2018 រហូតបានដឹងដំណឹងរកឃើញវិញនៅយប់ថ្ងៃទី 2 ខែកក្កដា ឆ្នាំ 2018 នេះ ទើបហេតុរន្ធត់ចិត្តមួយនេះ បានអង្រួនដួងចិត្តមនុស្សទូទាំងពិភពលោក បានចូលរួមបួងសួងដល់ការស្វែងរក រួមទាំងបានជ្រាបដល់ក្រុមកីឡា Fifa ដូចគ្នា និងផ្នែកខាងប្រធានសហព័ន្ធកីឡាបាល់ទាត់ពិភពលោក Fifa ក៏បានចូលរួមសម្ដែងក្ដីរីករាយ។
គួរបញ្ជាក់ផងដែរ ដើម្បីជាក្ដីសម្ដែងការស្វាគមន៍ និងជាកម្លាំងចិត្តនៃការវិលត្រឡប់របស់ក្រុមកីឡាករបាល់ទាល់ក្រុមជ្រូកព្រៃ Fifa បានធ្វើការអញ្ជើញអ្នកទាំង 13 ឱ្យទៅចូលរួមទស្សនា World Cup វគ្គផ្ដាច់ព្រ័ត្រ ខណៈដែលពួកគេបានត្រឡប់មកវិញដោយសុខសវត្ថិភាពទាន់ពេលវេលា ៕
លោក Gareth Southgate ដែលជាអ្នកចាត់ការទូទៅ បានបញ្ជាក់ថា ក្រុមបាល់ទាត់ជម្រើសជាតិអង់គ្លេស «ប្រហែលជាមិនមានឱកាសបែបនេះម្តងទៀតឡើយ» ខណៈដែលលោកកំពុងតែរៀបចំផែនការផ្សេងៗក្នុងការយកឈ្នះលើក្រុមជម្រើសជាតិស៊ុយអែត ក្នុងការប្រកួតវគ្គ៨ក្រុមចុងក្រោយ ដើម្បីឈានទៅប្រកួតក្នុងព្រឹត្តិការណ៍ World Cup វគ្គពាក់កណ្តាលផ្តាច់ព្រ័ត្រ ជាលើកទី1ក្នុងរយៈពេល៣ទសវត្សរ៍។
លោក Southgate បានប្រាប់បណ្តាញសារព័ត៌មាន BBC កាលពីថ្ងៃព្រហស្បតិ៍ថា ក្រុមប្រជុំដោយកីឡាការវ័យក្មេងរបស់លោក ដែលត្រូវបានដឹកនាំដោយខ្សែបយុទ្ធ Harry Kane «ត្រូវតែប្រឹងឲ្យអស់ពីសមត្ថភាព» ក្នុងយុទ្ធនាការនៅប្រទេសរុស្ស៊ី។ លោក Southgate បានឲ្យដឹងថា៖ «វាជាឱកាសដ៏អស្ចារ្យមួយ ហើយបើទោះបីក្រុមរបស់យើងនឹងមានទេពកោសល្យល្អប្រសើរជាង2ឆ្នាំមុនក៏ដោយ ប៉ុន្តែ យើងប្រហែលជាមិនមានឱកាសបែបនេះម្តងទៀតឡើយ»។
ការដណ្តើមបានជ័យជម្នះដោយការស៊ុតបាល់ប៉េណាល់ទីរបស់អង់គ្លេស លើក្រុមជម្រើសជាតិកូឡុំប៊ី ក្នុងវគ្គ16ក្រុមចុងក្រោយមានន័យថា មានតែក្រុមស៊ុយអែតប៉ុណ្ណោះ ជាឧបស័គ្គរបស់ពួកគេក្នុងការឈានទៅវគ្គពាក់កណ្តាលផ្តាច់ព្រ័ត្រ ជាលើកទី1 បើគិតចាប់តាំងពីឆ្នាំ1990។
លោក Southgate បានបញ្ជាក់ថា លោកកំពុងតែសម្លឹងឆ្ពោះទៅកាន់ការប្រកួតវគ្គ៨ក្រុមចុងក្រោយជាមួយនឹងក្រុមស៊ុយអែត នៅថ្ងៃសៅរ៍នេះ រួចជាស្រេច ក្នុងទីក្រុង Samara ដើម្បីប្រជែងយកកៅអីទៅជួបក្រុមក្រូអាស៊ី ឬរុស្ស៊ី ក្នុងវគ្គ៤ក្រុមចុងក្រោយ។
លោក Southgate ដែលការស៊ុតបាល់ប៉េណាល់មិនចូលទីរបស់លោកបានធ្វើឲ្យក្រុមអង់គ្លេស ចាញ់អាល្លឺម៉ង់ ក្នុងវគ្គ1/2ផ្តាច់ព្រ័ត្រនៃព្រឹត្តិការណ៍ Euro ឆ្នាំ1996 នាកីឡដ្ឋាន Wembley នោះ បានឲ្យដឹងថា៖ នេះគឺជាលទ្ធផលដ៏ពិសេស ប៉ុន្តែ ខ្ញុំចង់ឲ្យយើងបន្តដំណើរទៅមុខ។
គ្រូបង្វឹករូបនេះបានបន្ថែមទៀតថា៖ ស៊ុយអែត គឺជាក្រុមមួយទៀតដែលយើងមានកំណត់ត្រាដ៏អន់ពេលជួបគ្នា។ យើងបានមើលស្រាលពួកគេអស់រយៈពេលជាច្រើនឆ្នាំមកហើយ។ ពួកគេបានបង្កើតរឿងផ្ទាល់របស់ពួកគេ និងបានបង្កើតប្រវត្តិសាស្ត្រ។ ខ្ញុំមិនទាន់ចង់ទៅផ្ទះនៅឡើយទេ។ ការប្រកួតនៅថ្ងៃសៅរ៍នេះ នឹងចាប់ផ្តើមនៅម៉ោង៩យប់៕
ប្រភពពី៖ Channel News Asia
ភ្នំពេញ៖ ក្រោយពីសង្កេតឃើញថា មានប្រជាពលរដ្ឋខ្មែរភាគច្រើន ដែលកំពុងប្រើប្រាស់បណ្ដាញសង្គម និងចែករំលែកព័ត៌មានមិនពិត ដែលជាហេតុនាំឱ្យមានការយល់ច្រឡំពីស្ថានភាពសង្គមជាក់ស្ដែងនោះ ក្រសួងមហាផ្ទៃ ក្រសួងប្រៃសនីយ៍ និងទូរគមនាគមន៍ និងក្រសួងព័ត៌មាន បានចេញសេចក្តីប្រកាសព័ត៌មានរួមគ្នាមួយ ដែលមាន 10មាត្រា ដោយជូនដំណឹងដល់អ្នកប្រើប្រាស់ទាំងនោះ ឱ្យមានការប្រុងប្រយ័ត្នមុននឹងផ្សព្វផ្សាយ។
សេចក្ដីប្រកាសនេះ មានគោលដៅប្រឆាំង ទប់ស្កាត់ រាល់ការផ្សព្វផ្សាយ ឬចែករំលែកខ្លឹមសារព័ត៌មាន ឬសារជាអក្សរ សំឡេង រូបភាព វីដេអូ ឬក្នុងទម្រង់ផ្សេងៗ ដែលមានចេតនាបង្កជាចលាចលបណ្ដាលឱ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សាធារណៈ ការរើសអើង និងវប្បធម៌ ប្រពៃណីជាតិ។
សេចក្ដីប្រកាសខាងលើនេះមានខ្លឹមសារដូចតទៅ៖
ឪពុកម្ដាយភាគច្រើនចង់ឱ្យកូនឆ្លាត មានខួរក្បាលល្អ និងព្យាយាមស្វះស្វែងរកវិធីដែលនឹងធ្វើឱ្យកូនឆ្លាតវាងវៃ តើលោកឪពុកអ្នកម្ដាយដឹងឬទេ? ភាពឆ្លាតវៃមានជាប់នឹងខ្លួនកូនមកតាំងពីពេលកើតដំបូង និងមួយផ្នែកមកពីអាហារ និងការចិញ្ចឹមមើលថែ ដូច្នេះថ្ងៃនេះ អ្នកគ្រូ ឆវី សូមបបួលលោកឪពុកអ្នកម្ដាយមករៀនយល់ដឹងពីវិធីចិញ្ចឹមកូនឱ្យក្លាយជាក្មេងឆ្លាត និងមានខួរក្បាលវាងវៃដូចតទៅ។
កូនឆ្លាត មានខួរក្បាលវាងវៃដោយបច្ច័យច្រើនយ៉ាងតើលោកឪពុកអ្នកម្ដាយដឹងឬទេ? អាហារ និងការចិញ្ចឹមមើលថែមានចំណែកជួយបង្កើនវិវឌ្ឍនាការរបស់កូន។ អាហារដែលជួយបំប៉នខួរក្បាលកូនដែលល្អបំផុត គឺទឹកដោះម្ដាយ ព្រោះសារធាតុអាហារចម្បងៗនៅក្នុងទឹកដោះម្ដាយមានជាតិខ្លាញ់ ប្រូតេអីុន លែកតូស និងសារធាតុអាហារផ្សេងៗទៀត ក្រៅពីនេះនៅមាន ស្វ៊ីងហ្គោម៉ៃអីុលីន (Sphingomyelin) ខ្លាញ់ប្រភេទផូស្វ័រលីពីដ ដែលឃើញមានច្រើននៅក្នុងទឹកដោះម្ដាយដូចគ្នា។
ចរន្តប្រសាទជាមួយការធ្វើការរបស់ខួរក្បាលរបស់កូនតូច
“ខួរក្បាល” ជាអវយវៈដែលមានតួនាទីសំខាន់ក្នុងការទទួលដឹង ការគិតវិភាគសមត្ថភាពខាងសតិបញ្ញា ការទំនាក់ទំនង និងការធ្វើចលនារបស់រាងកាយ។ លោកឪពុកអ្នកម្ដាយដឹងឬទេថា ខួរក្បាលប្រកបដោយជាតិខ្លាញ់ដល់ទៅ 60% ដែលខ្លាញ់ជាចំណែកផ្គុំចម្បងរបស់ម៉ៃអីុលីនក្នុងខួរក្បាល។ សរសៃប្រសាទដែលមានម៉ៃអីុលីននឹងមានការបញ្ជូនសញ្ញាប្រសាទរហ័សជាងសរសៃប្រសាទដែលគ្មានម៉ៃអីុលីនដល់ទៅ 60ដង ដោយមាន Sphingomyelin ជាសារធាតុមួយក្នុងចំណោមសារធាតុអាហារសំខាន់ក្នុងការសាងម៉ៃអីុលីន។
Sphingomyelin សារធាតុមួយក្នុងចំណោមសារធាតុអាហារសំខាន់ដើម្បីខួរក្បាលកូន
ក្នុងពេលបច្ចុប្បន្ន ទោះជាគ្រូពេទ្យ និងអ្នកវិទ្យាសាស្រ្តមិនទាន់អាចកែសម្រួល ឬទៅគ្រប់គ្រងការសាងម៉ៃអីុលីនឱ្យកើតឡើងតាមសេចក្ដីត្រូវការបានដោយត្រង់ក៏ដោយ តែក៏យើងអាចបង្កើនការសាងស្រោមម៉ៃអីុលីនបានដោយ Sphingomyelin ព្រោះ Sphingomyelin ជាសារធាតុអាហារដែលមានតួនាទីក្នុងការសាងម៉ៃអីុលីន ដែលម៉ៃអីុលីននេះនឹងជួយឱ្យខួរក្បាលប្រមូលទិន្នន័យបានលឿន និងមានប្រសិទ្ធភាព។
ស្រោមម៉ៃអីុលីនមានអង្គប្រកប (ចំណែកផ្គុំ) ជាខ្លាញ់ដល់ទៅ 70% ដូច្នេះខ្លាញ់ដែលបានទទួលពីអាហារ ជាពិសេសខ្លាញ់ពីទឹកដោះម្ដាយនឹងក្លាយជាប្រភពដ៏សំខាន់ក្នុងការសាងស្រោម៉ៃអីុលីនក្នុងខួរក្បាលរបស់កូនសម្លាញ់។ សម្រាប់វ័យដែលចាប់ផ្ដើមឱ្យញ៉ាំអាហារបន្ថែមហើយអាចបានទទួលសារធាតុអាហារ Sphingomyelin ពីប្រភពផ្សេងៗដូចជា ស៊ុត ក្រែម ឈីស ទឹកដោះ រួមទាំងផលិតផលធ្វើពីទឹកដោះផងដែរ។ក្រៅពីបានទទួលសារធាតុអាហារដែលសំខាន់ក្នុងការបំប៉នខួរក្បាលហើយការជំរុញវិវឌ្ឍនាការខ្លះទៀតក៏ធ្វើឱ្យខួរក្បាលកើតមានការសាងស្រោនម៉ៃអីុលីនបានដែរ ដូចជា ក្នុងអំឡុងខួបឆ្នាំដំបូង ការស្ដាប់សំឡេងដែលសម្បូរបែប និងការស្ដាប់សំឡេងតន្ត្រី ការដោះស្រាយចំណោទបញ្ហានឹងជួយអភិវឌ្ឍចរន្តប្រសាទ និងការសាងស្រោមម៉ៃអីុលីនជាដើម។
ការបង្កើនវិវឌ្ឍនាការកូនឱ្យឆ្លាតវាងវៃមិនពិបាកឡើយ បើមានការយល់ដឹង។ ការបង្កើនឱ្យកូនបានទទួលទឹកដោះម្ដាយយ៉ាងជាប់លាប់ ជាបន្តបន្ទាប់ និងយូរបំផុតគឺជាចំណុចចាប់ផ្ដើមដ៏សំខាន់ និងឱ្យកូនញ៉ាំអាហារឱ្យគ្រប់5ប្រភេទក្រុម តាមរយៈអាហារដែលសម្បូរបែប ជាប់ជាប្រចាំ រួមទាំងការចិញ្ចឹមមើលថែកូនឱ្យទទួលបានភោជនាហារដែលល្អ សមនឹងវ័យ គួបផ្សំនឹងការជំរុញវិវឌ្ឍនាការជាប់ជានិច្ច នឹងជួយអភិវឌ្ឍខួរក្បាលរបស់កូនឱ្យក្លាយជាក្មេងដែលមានខួរក្បាលវាងវៃបានយ៉ាងពិតប្រាកដ៕
តាមរយៈសារព័ត៌មានថៃ Teenee បានចេញផ្សាយមុននេះបន្ដិចបានឱ្យដឹងថា រឿងរ៉ាវថ្មីអាចរាប់ទុកថា ជារឿងសោកសៅនិងគួរឱ្យសង្រេងក្នុងចិត្តជាទីបំផុត សម្រាប់ការបាត់បង់ជីវិតរបស់លោក សាម៉ាណ គុណាន់ ឬឈ្មោះហៅក្រៅ ចា សែម ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មានអាយុ 38 ឆ្នាំ ខណៈលោកបានចូលរួមប្រតិបត្តិការណ៍ជួយសង្គ្រោះជីវិតក្រុមកីឡាករបាល់ទាល់ជ្រូកព្រៃទាំង 13 រូបកំពុងជាប់នៅក្នុងរូងភ្នំថាំលួង ឃុនណ៉ាមណាងណន ស្រុក ម៉ែសាយ ខេត្ត ឈៀងរ៉ាយ ដែលបានមរណភាពនៅវេលាពាក់កណ្ដាលយប់ថ្ងៃទី 6 ខែកក្កដា ឆ្នាំ 2018។
សូមជម្រាបដែរថា សម្រាប់លោក សាម៉ាណ គុណាន់ មានអាយុ 38 ឆ្នាំ ជាអ្នកវាយប្រហារក្រោមផ្ទៃទឹកស្ម័គ្រចិត្ត ជំនាន់ទី 30 មុនពេលលោកលាចេញទៅធ្វើការនៅក្នុងតំណែង ជាអ្នកសម្របសម្រួលសន្ដិសុខនៅក្នុងព្រលានអកាសយានដ្ឋានសុវណ្ណភូមិ ចាប់ពីឆ្នាំ 2006។ លោកមានចំណេះដឹង សមត្ថភាព ជាកីឡាករឆ្នើមប្រចាំក្រុមជម្រើសជាតិថៃ ជាគ្រូបង្វឹកក្រុមអ្នកធាក់កង់រយៈឆ្ងាយ ដែលឆ្លងកាត់ការប្រកួត និងទទួលបានពានរង្វាន់ជាច្រើនទៅលើកីឡាផ្នែកផ្សងគ្រោះថ្នាក់។
មិនតែប៉ុណ្ណោះ លោកក៏ជាម្ចាស់ជយលាភីប្រចាំកាប្រកួត « Amarin Outdoor Unlimited Chiang Mai » ដែលរៀបចំការប្រកួតកីឡា ធាក់កង់ឆ្លងកាត់ភ្នំ រត់ ហែលទឹក អ៊ំទូកកៃយ៉ាក់ ដោយលោកទទួលបានជ័យជំនះនៅក្នុងជំនាន់ទី 1 នៅក្នុងថេរវេលា 4.26 ម៉ោង អំឡុងឆ្នាំ 2009 និងឆ្នាំបន្ទាប់ លោកបានឈ្នះនៅក្នុងកម្មវិធី « The ibis Koh Samui Trophy 2010 » ក្នុងថេរវេលា 4.15 ម៉ោង៕
ខ្សែប្រយុទ្ធអន្តរជាតិអ៊ុយរូហ្គាយ Edinson Cavani អាចនឹងត្រូវអវត្តមានក្នុងការប្រកួតព្រឹត្តិការណ៍ World Cup វគ្គ8ក្រុមចុងក្រោយរបស់ក្រុមរបស់គេ ក្នុងពេលប៉ះជាមួយនឹងក្រុមជម្រើសជាតិបារាំង នៅរាត្រីថ្ងៃសុក្រនេះ ក្រោយពីបានរងរបួសកំភួនជើង ក្នុងពេលក្រុមខ្លួនទទួលជ័យជម្នះក្នុងវគ្គ 16ក្រុមចុងក្រោយ លើក្រុមជម្រើសជាតិព័រទុយហ្គាល់។
សហព័ន្ធកីឡាបាល់ទាត់អ៊ុយរូហ្គាយហៅកាត់ថា UFA បានបង្ហោះរូបថតជាច្រើនទាក់ទងនឹងការហ្វឹកហាត់កាលពីថ្ងៃពុធ នៅលើបណ្តាញសង្គម ខណៈដែល Cavani បានអវត្តមាន។ ក្រោយពីការត្រួតពិនិត្យកាលពីថ្ងៃចន្ទ ក្រុមវេជ្ជបណ្ឌិតបានប្រកាសថា តារាឆ្នើមរបស់ក្លិប Paris Saint-Germain រូបនេះ បានរងរបួសត្រងកំភួនជើងឆ្វេងរបស់គេ បើទោះបីវាមិនរហែកសាច់ដុំដោយ។
ស្របពេលដែល Cavani វ័យ31ឆ្នាំ នឹងត្រូវអវត្តមាន លោក Oscar Tabarez គ្រូបង្វឹកនៃក្រុមជម្រើសជាតិអ៊ុយរូហ្គាយ អាចនឹងប្រើប្រាស់ Cristhian Stuani នៅតំបន់ប្រយុទ្ធរួមជាមួយនឹងខ្សែប្រយុទ្ធ Luis Suarez។ ជាមួយគ្នានេះ តំបន់ការពារដ៏រឹងមាំរបស់ក្រុមជម្រើសជាតិអ៊ុយរូហ្គាយ អាចនឹងក្លាយជាចំណុចកាត់សេចក្តីក្នុងពេលប្រកួតជាមួយនឹងបារាំង ខណៈដែលពួកគេបានរបូតគ្រាប់បាល់ត្រឹមតែ១គ្រាប់គត់ក្នុងយុទ្ធនាការ World Cup មកទល់ពេលនេះ។
បើទោះបី ក្រុមជម្រើសជាតិបារាំង ដាក់ក្តីសង្ឃឹមទៅលើខ្សែប្រយុទ្ធវ័យក្មេង Kylian Mbappe ក៏ដោយ ប៉ុន្តែ វាហាក់ដូចជាមិនអាចទៅរួចឡើយដែលតារាឆ្នើមរូបនេះ អាចទម្លុះតំបន់ការពារដ៏រឹងមាំមួយដូចជាក្រុមអ៊ុយរូហ្គាយ ដោយងាយស្រួលនោះ។ ការប្រកួតក្នុងវគ្គ8ក្រុមចុងក្រោយ ដ៏រំភើបមួយនេះ ក្នុងទីក្រុង Nizhny Novgorod អាចនឹងត្រូវកាត់សេចក្តីដោយការប្រជែងគ្នាមួយរវាងតំបន់ការពាររបស់អ៊ុយរូហ្គាយ និងខ្សែប្រយុទ្ធល្បឿនលឿន Mbappe វ័យ19ឆ្នាំ។
ខណៈដែលត្រូវបានដឹកនាំដោយប្រធានក្រុម Diego Godin ដែលចាប់ដៃគូជាមួយនឹងកីឡាករ Jose Gimenez, Martin Caceres និង Diego Laxalt រួមជាមួយនឹងអ្នកចាំទីដៃស្អិត Fernando Muslera តំបន់ការពាររបស់អ៊ុយរូហ្គាយ មានកំណត់ត្រាដ៏ល្អបំផុតក្នុងយុទ្ធនាការ World Cup។ ការប្រកួតនេះនឹងចាប់ផ្តើមនៅម៉ោង9យប់៕
ប្រភពពី៖ Channel News Asia
