Category: សង្គម និងសេដ្ឋកិច្ច

កាលពីរសៀលថ្ងៃទី១២ ខែកក្កដា កន្លងទៅនេះ «ដានស៊ីងរ៉េន» (DancingRains) ដែលជាក្រុមហ៊ុនចែកចាយ ភាពយន្តខ្នាតធំរឿង«កម្ម» របស់ផលិតកម្ម «រាម» (Ream Production) បានរៀបចំសិក្ខាសាលាពិសេសមួយនៅ ទីតាំងថតផ្ទាល់របស់រឿងរន្ធត់មួយនេះតែម្តង ដល់សមិទ្ធិករភាពយន្តនៅក្រុងបាត់ដំបង ដើម្បីពង្រឹងចំណេះដឹងរបស់ ពួកគាត់លើផ្នែកថតភាពយន្ត ដោយកាមេរ៉ាទំនើបកម្រិតហូលីវូឌ ហៅថាARRI (ដែលអានថា «អេរី»)។

ក្នុងឱកាសនោះ លោក ភិជិត ឬទ្ធា អ្នកដឹកនាំរឿង«កម្ម» និងជាតំណាងចែកចាយARRI Cambodia មានប្រសាសន៍ថា៖ «ប្រសិនបើទាំងអស់គ្នាចូលចិត្តរឿងហូលីវូដ ហើយចាប់អារម្មណ៍គុណភាពរូបពីអេក្រង់ នោះខ្ញុំអាចប្រាប់ថា​គឺមកពី កាមេរ៉ាARRIនេះឯង។ ចំពោះដំណើរការផលិតរឿង «កម្ម» ក្រុមការងារយើងសម្រេចប្រើកាមេរ៉ា ARRI Alexa Mini LF ដែលជាម៉ូដែល ARRI ALEXA MINI  ចុងក្រោយគេ ដែលជួយលើកគុណភាព រូបភាពបានកម្រិតខ្ពស់ ដែលធ្វើឱ្យ យើងមាន ភាពងាយស្រួលកែសម្រួលទាំងក្រាហ្វិច និងការរចនាប្លង់ផ្សេងៗ នៅកំឡុង ពេលប្រើប្រាស់បច្ចេកទេសកាត់ត ដែលក្រុមបច្ចេកទេសរចនារូបភាពយើងចង់បាន ក្នុងការធ្វើឱ្យគុណភាពរូបភាព និងសម្លេងរបស់រឿងនេះកាន់តែ ប្រណីត។»

ចំណែក លោកនៅ សុវណ្ណារ័ត្ន ដែលជាប្រធានផ្នែករូបភាព (Director of Photography) ឯនោះវិញ បានបញ្ជាក់ ថា៖ «មូលហេតុដែលផលិតកម្ម«រាម»ជ្រើសរើសយកARRI គឺដោយសារ៣ចំណុច។ ទី១ ផលិតកម្មចង់ពង្រឹងគុណភាព ភាពយន្តឱ្យខ្លាំង ដោយប្រើកាមេរ៉ាលំដាប់អន្តរជាតិ។ ទី២ យើងចង់នាំចេញស្នាដៃដែលយើងផលិត ឱ្យបានលក់ចេញទៅ ក្រៅស្រុក ដោយការសម្រិតសម្រាំងទាំងរូបភាព និងប្រភេទកាមេរ៉ា។ ទី៣ បើស្ត់ងដាររូបភាព និងការងារយើងល្អហើយ មិនថាទស្សនិកជនក្នុងស្រុក ឬបរទេស ពួកគាត់នឹងទទួលស្គាល់បាន។»

សម្រាប់លោក រុន សុខហេងដែលជាការីថតអាជីព (Cinematographer) និងត្រូវបណ្តាញអ្នកថតភាពយន្ត ស្គាល់តាម រយៈគណនី Frame29 ហើយត្រូវបានជ្រើសរើសថតរឿង«កម្ម»នេះវិញ យល់ថា៖ «ក្នុងនាមខ្ញុំជា អ្នកថតយូរឆ្នាំហើយ ខ្ញុំតែងតែស្វែងរកម៉ាកកាមេរ៉ាណាដែលផ្តល់ភាពងាយស្រួលសម្រាប់ការងារខ្ញុំ។ ដូច្នេះ ARRI ជាពិសេស Alexa Mini LF សម្រាប់ខ្ញុំ ប្រៀបដូចជាជំនួយការដ៏តូចច្រឡឹង (compact)ផ្នែករូបភាពរបស់ដែលដឹងចិត្ត ខ្ញុំ។ មិនថាខ្ញុំថតក្នុងម្លប់ ឬ ប្រើពន្លឺថ្ងៃ កាមេរ៉ាសម្រួលកម្រិតពណ៌ (Color-grading) បានងាយ។ ឧបករណ៍ភ្ញោច (Sensor) មានភាពរស់ជាមួយ ពន្លឺខាងក្រៅ ដែលកាត់បន្ថយការកែសាច់ពណ៌ (Color Tone)។» មួយវិញទៀត ARRI សម្រួលដល់ការកាត់ត រូបភាព ជាមួយអេក្រង់ខៀវ ឬបៃតង (Green or Blue Screens) សក្តិសមជាមួយរូបារម្មណ៍ របស់រឿងរន្ធត់ដូចជា «កម្ម»នេះ តែម្តង។»

បើក្រឡេកទៅលោក ប៉ោយ ឈុនលី តំណាងឱ្យសិក្ខាកាមវគ្គបង្ហាត់បង្ហាញARRIនេះវិញ ដែលគេឯងច្រើនហៅថា Pacquiao ខ្មែរនោះ លោកបានសម្តែងការភ្ញាក់ផ្អើលថា៖ «បន្ទាប់ពីសិក្សាស្វែងយល់ពីARRI តាមរយៈឧទាហរណ៍ រឿង «កម្ម»រួចហើយ ខ្ញុំមិននឹកស្មានថា មានកាមេរ៉ាផ្តល់រូបភាពអស្ចារ្យ និងបែបអាជីពដូចARRIសោះ។ ដូច្នេះខ្ញុំក៏នឹង សាកប្រើកាមេរ៉ា សម្រាប់ភាពយន្តខ្លី ក្រោយរបស់ខ្ញុំ និងក្រុមខ្ញុំនៅបាត់ដំបងផងដែរ។»

ដូច្នេះសូមទស្សនិកជនទាំងអស់កុំភ្លេចតាមដាន រូបភាពទាំងស្រុងពីរឿង «កម្ម» តាមរយៈARRI នៅថ្ងៃចាក់បញ្ចាំង ខាងមុខនេះ ដើម្បីដឹងថាតើគុណភាពរូបពិតជា មិនខុសបំណងលោកអ្នកមែននោះ។ តាមតម្រុយខ្លះៗពី«ដានស៊ីងរ៉េន» ដែលជាក្រុមហ៊ុនចែកចាយផលិតផលARRI និងភាពយន្តរឿង «កម្ម»នេះ បើស្ថានភាពអំណោយផល ខ្សែភាពយន្ត ខ្នាតធំរន្ធត់១នេះ នឹងបង្ហាញជូនទស្សនិកជន នៅគ្រប់រោង ភាពយន្តក្នុងស្រុក នៅដើមឆ្នាំ ២០២១នេះ ហើយក្រុមហ៊ុន សង្ឃឹមថានឹងអាចនាំភាពយន្ត១នោះ​ ទៅចែកចាយក្រៅស្រុក ដោយសារគុណភាពរូបពីកាមេរ៉ាទំនើបចុងក្រោយគេមួយ នេះ។

(វីដេអូឈុតខ្លីពីភាពយន្តដែលប្រើARRIក្នុងឆ្នាំ២០១៩)

អំពី ARRI

មានទីស្នាក់ការដើមនៅប្រទេសអាល្លឺម៉ង់ និងការិយាល័យតំបន់នៅហុងកុង ARRI បម្រើជូនទាំងផលិតផល និងសេវាកម្ម លើប្រព័ន្ធកាមេរ៉ា ភ្លើង ផ្សព្វផ្សាយ និងជួល ដែលសុទ្ធតែសម្រាំងផ្សារភ្ជាប់សិល្បៈ និងបច្ចេកវិទ្យាអនាគត ដើម្បី ប្រយោជន៍វិស័យភាពយន្ត។ ARRI Mini LF រួមបញ្ចូលទំហំតូច និងទម្ងន់ស្រាលរបស់ប្រភេទARRI Miniដ៏ពេញនិយម ដោយប្រើសិនស័រAlexa LFខ្នាតធំ ដោយនាំមកនូវជម្រើស ចាប់រូបភាពថ្មីប្លែក ដល់ប្រព័ន្ធកាមេរ៉ាខ្នាតធំរបស់ARRI។ តំណាងចែកចាយផ្លូវការនៅកម្ពុជាចាប់តាំងពីឆ្នាំ២០១៩មកគឺ ក្រុមហ៊ុន «ដេនស៊ីងរ៉េន» (DancingRains Co., Ltd.)។

សង្ខេបរឿង «កម្ម»

អ្វីៗចាប់ផ្តើមឡើង នៅភូមិគ្រឹះ១នៅខេត្តបាត់ដំបង ក្នុងឆ្នាំ១៩៦០។ ស្នេហាដ៏ស្អិតរមួត រវាងវិសុទ្ធ និងលំអងឈានដល់គម្រួប ១ឆ្នាំ ដែលជាថ្ងៃដ៏មានក្តីសុខរបស់លំអង។ នាងលាន់មាត់ ជាចុងក្រោយថា៖ «ឱ្យថ្ងៃណា ក៏ដូចថ្ងៃនោះរហូត»។ ប៉ុន្តែ ក្រោយពីវត្តមានមាលា ដែលជាប្អូនបង្កើតម្តាយទីទៃចូលមកក្នុងថ្ងៃនោះ លំអងមានអាការៈប្លែក រហូតត្រូវស្លាប់ដោយ អាថ៌កំបាំង។

សម្រា់ព័ត៌មានបន្ថែមអំពីARRI និងរឿង«កម្ម» សូមទាក់ទង៖

[email protected]

+85512 684 955 /15 226 602

កម្ពុជា​ជា​ប្រទេស​កំពុង​អភិវឌ្ឍ​ដែល​ទាមទារ​ឱ្យមាន​ធនធានមនុស្ស​ជាច្រើន​ផ្នែក ជាពិសេស​ផ្នែក​បច្ចេកទេស និង​វិជ្ជាជីវៈ ព្រោះ​ស្ថិតក្នុង​ដំណាក់កាល​នេះ​គ្រប់​ក្រុមហ៊ុន សហគ្រាស និង​ចង្វាក់​ផលិតកម្ម​នានា រួមទាំង​វិស័យ​សំណង់​ផង​សុទ្ធតែ​ត្រូវការ​អ្នកជំនាញ​បច្ចេកទេស។

ឯកឧត្តម អ៊ិត សំហេង រដ្ឋមន្ត្រីក្រសួង​ការងារ និង​បណ្តុះបណ្តាល​វិជ្ជាជីវៈ បាន​លើកឡើងថា វិទ្យា​សា្ថ​ន​អប់រំ​បណ្តុះបណ្តាល បច្ចេកទេស និង​វិជ្ជាជីវៈ ពិតជា​បាន​ដើរតួនាទី​សំខាន់​ណាស់ និង​ជា​ដៃគូ​មិនអាច​ខ្វះ​បាន​របស់​ក្រសួង​ការងារ និង​បណ្តុះបណ្តាល​វិជ្ជាជីវៈ ក្នុង​ការជួយ​លើកកម្ពស់​វិស័យ​ការងារ អប់រំ និង​ធនធានមនុស្ស ដែល​រហូតមក​ដល់ពេលនេះ មាន​ធនធានមនុស្ស​ជាច្រើន បានកើត​ចេញពី​វិទ្យាស្ថាន​ក្នុងប្រទេស​កម្ពុជា ជាពិសេស​បានបង្ហាញ​នូវ​លទ្ធផល​ជាក់ស្តែង​ទាំង​បរិមាណ និង​គុណភាព។

កន្លងមក​ឯកឧត្តម ក៏​ធ្លាប់​បានលើកឡើង​ផងដែរ​ថា ផ្នែក​បច្ចេកទេស និង​បណ្តុះបណ្តាល​វិជ្ជាជីវៈ បាន​ចូលរួមចំណែក​យ៉ាងច្រើន​តាមរយៈ​ការបណ្តុះបណ្តាល​ធនធាន​មនុស្ស​បំពេញ​ឱ្យ​សេចក្តីត្រូវការ​របស់​ក្រុមហ៊ុន​សហគ្រាស​នានា​ដែល​កំពុង​ដាក់​ការវិនិយោគ​នៅ​កម្ពុជា។ ទោះជា​យ៉ាងនេះ​ក្តី ពាក់ព័ន្ធ​នឹង​បញ្ហា​នេះ ក៏​នៅមាន​បញ្ហា​ប្រឈម​មួយចំនួន​ផងដែរ​ដោយសារតែ​យុវជន​កម្ពុជា​មិនទាន់​ចាប់អារម្មណ៍​ច្រើន​ក្នុងការ​រើស​ជំនាញ​នេះ។ ជា​យន្តការ​ក្រសួង និង​ភាគី​ពាក់ព័ន្ធ​ក៏បាន​យកចិត្តទុកដាក់​ច្រើន​ដើម្បី​ជំរុញ​ឱ្យ​ប្រជាជន​ចាប់ផ្តើម​មានលទ្ធភាព​កាន់តែច្រើន​ក្នុងការ​សិក្សា​លើ​ជំនាញ​បច្ចេកទេស និង​វិជ្ជាជីវៈ៕

មនុស្ស​ជាច្រើន​យល់ថា ទាល់តែ​មាន​លុយ​ជា​ទុន​ច្រើន​ទើប​អាចធ្វើ​អាជីវ​កម្មបាន តែ​សម្រាប់​លោក ង៉ែត ជូ អ្នកជំនាញ​ហិរញ្ញវត្ថុ​យល់ថា​ទោះ​មនុស្ស​គ្មាន​ប្រាក់​ក៏ដោយ ក៏​ពួកគេ​អាចមាន​ដើមទុន​សម្រាប់ធ្វើ​អាជីវកម្ម​បានដែរ។

អ្នកជំនាញ​ខាងលើ​បាន​លើកឡើងថា គ្មាន​ប្រាក់​ចាប់ផ្តើម​អាជីវកម្ម​មិនមែន​មានន័យថា​គ្មាន​ដើមទុន​នោះទេ។ អ្នក​ត្រូវ​ដឹងថា​ដើមទុន​មាន3ប្រភេទ​គឺ៖

1. ដើមទុន​ផ្នែក​ហិរញ្ញវត្ថុ​ឬ​សេដ្ឋកិច្ច (Economic or Financial Capital)៖ រួមមាន​ដូចជា​សាច់ប្រាក់ អចលនទ្រព្យ និង​ទ្រព្យសម្បត្តិ​ដទៃទៀត។
2. ដើមទុន​ជា​ធនធានមនុស្ស (Human Capital)៖ រូបអ្នក​ក៏​ជាដើម​ទុន​ដែរ អ្នក​អាច​យកចំណេះ-ជំនាញ​ទៅ​បំរើ​ការអោយ​អ្នកដទៃ​ដោយ​ប្តូរ​យក​ជា​ប្រាក់ខែ ហើយ​សន្សំ​ដើម្បី​ធ្វើជា​ដើមទុន​ចាប់ផ្តើម​អាជីវកម្ម។ ហើយ​បើ​ខ្វះ ខ្ចី​អ្នកដទៃ​ដូចជា​ក្រុមគ្រួសារ ឬ​មិត្តភក្តិ​ខ្លះទៅ។
3. ដើមទុន​សង្គម (Social Capital)៖ ក្រុមគ្រួសារ មិត្តភក្តិ និង​មនុស្ស​ដែល​អ្នក​រាប់អាន​ក៏​ជាដើម​ទុន​ដែរ។ ឧទាហរណ៍ ក្រុមគ្រួសារ​ផ្គត់ផ្គង់​អោយ​អ្នក​បាន​រៀនសូត្រ​ដើម្បី​សន្សំ​ចំណេះ-ជំនាញ រួច​ក្លាយខ្លួនជា​ធនធានមនុស្ស​ក្នុងសង្គម នោះ​ហើយ​គឺជា​ដើមទុន។

ដូច្នេះ​ពេល​គ្មាន​ប្រាក់​ចាប់ផ្តើម​អាជីវកម្ម​កុំ​និយាយថា​ខ្លួន​បាតដៃ​ទទេ។ អ្នកមាន​ដើមទុន​ទី3 (ដើមទុន​សង្គម) ដើម្បី​ឈានទៅ​កសាង​ដើមទុន​ទី2 (ដើមទុន​ជា​ធនធានមនុស្ស) និង​សន្សំ​ជាដើម​ទុន​ទី1 (ដើមទុន​ផ្នែក​ហិរញ្ញវត្ថុ)។ អ្នក​មិនមែន​បាតដៃ​ទទេ​ទេ គ្រាន់តែ​អ្នកត្រូវការ​ការព្យាយាម ការខិតខំ និង​ប្រើ​ពេលវេលា​អោយមាន​តម្លៃ​ប៉ុណ្ណោះ៕

ទីភ្នាក់ងារអវកាសអេមរិក (NASA) បានទទួលជោគជ័យក្នុងការរចនា ហើយឈានដល់ដំណាក់កាលផលិតយានអវកាសដើម្បីហោះទៅកាន់អាចម៍ផ្កាយដែលសម្បូរទៅដោយលោហធាតុដ៏កម្រ ដែលមានឈ្មោះថា Psyche 16។

យានអវកាសនេះនឹងត្រូវបានបញ្ជូនទៅកាន់គោលដៅដោយប្រើកាំជ្រួចរុញច្រាន Falcon Heavy របស់ SpaceX នៅខែសីហា2022។ គម្រោងដែលមានតម្លៃទឹកប្រាក់117លានដុល្លារនេះ បានឈានដល់ដំណាក់កាលអនុម័តជ្រើសរើសរចនារូបរាងនៃយានអវកាសនេះ។ ប្រការនេះមានន័យថា ក្រុមវិស្វករអាចចាប់ផ្ដើមផលិតយានអវកាសនេះបានហើយ។

ក្រោយពីត្រូវបានបាញ់បង្ហោះ យានរុករក Spyche 16 នឹងហោះឆ្លងកាត់ពិភពព្រះអង្គារ ទៅកាន់ខ្សែក្រវាត់អាចម៍ផ្កាយដែលនៅចន្លោះពិភពព្រះអង្គារនិងពិភពព្រហស្បតិ៍។ យានអវកាសនេះនឹងប្រើប្រាស់ឧបករណ៍វាស់ដែនម៉ាញេទិចរបស់អាចម៍ផ្កាយ និងកាមេរ៉ាពហុវិសាល (Multispectral cameras) ដើម្បីថតផ្ទៃខាងលើរបស់អាចម៍ផ្កាយនេះ។ គម្រោងនេះក៏នឹងប្រមូលយកទិន្នន័យអំពីធាតុផ្សំនិងស្ថានភាពភូមិសាស្ត្ររបស់ Psyche 16 នេះផងដែរ។

Psyche 16 ត្រូវបានរកឃើញជាលើកដំបូងកាលពីឆ្នាំ1852។ ក្រុមអ្នកវិទ្យាសាស្ត្រយល់ថា នេះគឺជាសំណល់នៃភពមួយដែលត្រូវបានកម្ទេចដោយការប៉ះទង្គិចក្នុងគ្រាដែលប្រព័ន្ធព្រះអាទិត្យកំពុងកកើត។ អាចម៍ផ្កាយនេះមានទទឹង225គីឡូម៉ែត្រ។ អ្នកវិទ្យាសាស្ត្របានគណនាឃើញថា គ្រាន់តែបរិមាណធាតុដែករបស់អាចម៍ផ្កាយនេះ មានតម្លៃដល់ទៅ1,000កោដិ (10.000 quadrillion/10,000,000,000,000,000,000) ដុល្លារអាមេរិកឯណោះ។ Psyche 16 ក៏មានផ្ទុកលោហធាតុកម្រផ្សេងទៀតជាច្រើនផងដែរ រួមមានមាស ប្រាក់ និងសំរឹទ្ធជាដើម។

គោលដៅចម្បងនៃគម្រោង Psyche គឺការសិក្សាលើអាចម៍ផ្កាយនេះដើម្បីស្វែងយល់អំពីដំណើរការនៃការកកើតពិភពផែនដី។ NASA បានឱ្យដឹងថា “ដោយសារតែយើងមិនអាចពិនិត្យមើល ឬវាស់វែងស្នូលផែនដីដោយផ្ទាល់ ដូច្នេះ Psyche នឹងផ្ដល់ការយល់ដឹងអំពីប្រវត្តិនៃការប៉ះទង្គិចដ៏ខ្លាំងក្លាដែលបង្កើតឱ្យមានអាចម៍ផ្កាយថ្ម”។

ការដំឡើងនិងសាកល្បងយានអវកាសខាងលើនេះនឹងចាប់ផ្ដើមពីខែកុម្ភៈ2021។ ឧបករណ៍ទាំងឡាយនឹងត្រូវបានបញ្ជូនទៅកាន់បន្ទប់គ្មានមេរោគនៃមន្ទីរពិសោធន៍ Jet Propulsion Laboratory (JPL) នាខែមេសា2021។ ផ្នែកចម្បងរបស់យានអវកាសដែលគេហៅថា Solar Electric Propulsion (SEP) Chassis កំពុងត្រូវបានផលិតនៅក្នុងក្រុងហ៊ុន Maxar Technologies នៅទីក្រុង Palo Alto រដ្ឋ California សហរដ្ឋអាមេរិក។ តាមផែនការ យានអវកាសនេះនឹងហោះចេញពីផែនដីក្នុងខែសីហា2022 ហើយប្រើប្រាស់ដែនទំនាញរបស់ផ្កាយព្រះអង្គារនៅក្នុងខែឧសភា2023 ដើម្បីហោះឆ្ពោះទៅដល់អាចម៍ផ្កាយ Psyche 16 នៅដើមឆ្នាំ2026៕

ប្រភព៖ Sci Tech Daily

Tesla ត្រូវតែជោគជ័យនៅប្រទេសចិនដើម្បីគ្រប់គ្រងទីផ្សាររថយន្តអគ្គិសនី ដែលនេះបាននាំឱ្យលោក Elon Musk ស្វែងរកលោក Zeng Yuqun ជាបុរសដែលធ្លាប់ជួយឱ្យ Apple អាចបង្កើនអាយុកាលរបស់ថ្មសម្រាប់ MacBook។

Zeng Yuqun ឆ្នាំនេះមានអាយុ52ឆ្នាំ។ លោក Zeng បានប្រែក្លាយ Contemporary Amperex Technology Co. Ltd (CATL) ឱ្យទៅជាក្រុមហ៊ុនផលិតថ្មផ្ទុកថាមពលអគ្គិសនីលំដាប់ជួរមុខនៅប្រទេសចិន ដោយប្រើពេលមិនដល់1ទសវត្សរ៍។ បច្ចុប្បន្ន CATL គឺជាក្រុមហ៊ុនផលិតថ្មផ្ទុកថាមពលធំជាងគេក្នុងពិភពលោកសម្រាប់ប្រភេទរថយន្តដែលត្រូវបានគេចាត់ទុកថាជាអនាគតរបស់វិស័យរថយន្ត (រថយន្តអគ្គិសនី)។ ប្រការនេះហើយបាននាំឱ្យលោក Zeng ដែលមានស្រុកកំណើតនៅជនបទ និងធ្លាប់ជាមន្ត្រីរដ្ឋការដែលទទួលបានប្រាក់ខែត្រឹម30ដុល្លារ/ខែ ក្លាយជាមហាសេដ្ឋីដែលមានទ្រព្យ17ពាន់លានដុល្លារអាមេរិក។ នេះបើតាមទស្សនាវដ្ដី Bloomberg។

ផលិតផលរបស់ CATL ត្រូវបានប្រើប្រាស់នៅលើរថយន្តស្ទើរតែទាំងអស់នៃបណ្ដាក្រុមហ៊ុនផលិតរថយន្តធំៗក្នុងពិភពលោក។ ចាប់ពីខែកក្កដានេះ CATL ចាប់ផ្ដើមផលិតថ្មផ្ទុកថាមពលសម្រាប់រថយន្តរបស់ Tesla ដែលផលិតនៅរោងចក្រក្នុងខេត្តសៀងហៃ ប្រទេសចិន។ កិច្ចសហការនេះពិតជាមានសក្កានុពលធំធេងខ្លាំងណាស់។ ពួកគេនឹងធ្វើការរួមផ្សំស៊េរីរថយន្តអគ្គិសនីដែលទទួលបានការប្រើប្រាស់ច្រើនបំផុត (Tesla Model 3) ជាមួយនឹងថ្មថាមពលតម្លៃទាបនៅក្នុងទីផ្សារដែលមានការប្រើប្រាស់រថយន្តអគ្គិសនីច្រើនជាង បើធៀបជាមួយនឹងសហរដ្ឋអាមេរិកកាលពីឆ្នាំទៅ(2019)។

លោក Zheng និងលោក Musk បានពិភាក្សាគ្នាអំពីការរីកចម្រើននៃបច្ចេកវិទ្យា រួមនឹងដំណោះស្រាយដើម្បីឆ្លងកាត់ឧបសគ្គក្នុងវិបត្តិសុខភាពនាបច្ចុប្បន្ន និងការព្រួយបារម្ភរបស់ CEO នៃក្រុមហ៊ុន Tesla។ នោះគឺជារថយន្តអគ្គិសនី និងថ្មបញ្ចូលថាមពលអគ្គិនតម្លៃទាប។ លោក Zheng បានឱ្យដឹងថា “Elon និយាយអំពីការប្រើប្រាស់ថ្មឱ្យបានពេញមួយថ្ងៃ។ ហើយខ្ញុំបានប្រាប់គាត់ថា ខ្ញុំមានវិធី។ យើងស៊ីចង្វាក់គ្នាគ្រាន់បើ។ គាត់គឺជាមនុស្សមានចរឹតរីករាយ”។

បណ្ដាប្រភេទថ្មថាមពលរបស់ក្រុមហ៊ុន CATL អាចនាំមកនូវអត្ថប្រយោជន៍ដែលអាចសម្រេចបានជោគជ័យសម្រាប់ក្រុមហ៊ុន Tesla នៅប្រទេសចិន ពិសេសគឺសមត្ថភាពក្នុងការបង្កើនប្រាក់ចំណេញ និងបញ្ចុះតម្លៃរថយន្តនៅលើទីផ្សារចិនដែលត្រូវបានព្យាករថានឹងមានរថយន្តអគ្គិសនីចំនួន59គ្រឿងនៅឆ្នាំ2030។ សំខាន់បំផុតនោះគឺថា លោក Zeng អាចផ្គត់ផ្គង់ថ្ម LFP ដែលប្រើប្រាស់វត្ថុធាតុមានតម្លៃទាបជាង និងការចំណាយក្នុងការផលិតក៏ទាបជាងដល់ទៅ20% បើធៀបនឹងថ្មផ្ទុកថាមពលប្រភេទធម្មតា។

ធ្វើការជាមួយនឹងក្រុមហ៊ុនក្នុងស្រុក ដូចជា CATL គឺអាចជួយឱ្យ Tesla រឹតចំណងទាក់ទងជាមួយនឹងក្រុមមន្ត្រីចិន។ នេះក៏ជាចំណុចសំខាន់សម្រាប់ជោគជ័យរបស់ក្រុមហ៊ុន Tesla នៅក្នុងទីផ្សារមួយនេះផងដែរ។ លោក Zeng ក៏ជាសមាជិកម្នាក់នៃគណៈកម្មាធិការជាតិពិគ្រោះយោបល់នយោបាយប្រជាជនចិន (National Committee of the Chinese People’s Political Consultative Conference) ផងដែរ។ លោក Zeng កំពុងតែជំរុញឱ្យមានការស្នើដើម្បីផ្ដោតទៅលើថាមពលកកើតឡើងវិញទៀតផង។

សម្រាប់ CATL កិច្ចសហការនេះបានកើតឡើងនៅក្នុងកាលៈទេសៈសំខាន់។ បរិមាណនៃផលិតផលថ្មរបស់ក្រុមហ៊ុននេះ បានថយចុះជិត1ភាគ3 នៅក្នុងរយៈពេល5ខែដើមឆ្នាំ2020។ SNE Research បានឱ្យដឹងថា បញ្ហានេះកើតឡើងដោយសារCOVID-19 សង្គ្រាមពាណិជ្ជកម្ម និងការដែលរដ្ឋាភិបាលកាត់បន្ថយការឧបត្ថម្ភ។ បណ្ដាក្រុមហ៊ុនផលិតរថយន្តរបស់ចិន កាលពីថ្ងៃទី10កក្កដាបានឱ្យដឹងថា បរិមាណរថយន្តដែលត្រូវបានលក់ចេញ បានថយចុះប្រមាណជា38% បើធៀបជាមួយនឹងអំឡុងពេលដូចគ្នាក្នុងឆ្នាំ2019។

យោងតាមការគន់គូររបស់ Sanford C. Bernstein ចាប់ពីដើមឆ្នាំក្រោយ CATL អាចផ្គត់ផ្គង់ថ្មថាមពលសម្រាប់រថយន្ត Tesla ដែលផលិតនៅសៀងហៃ ដល់ទៅពាក់កណ្ដាលឯណោះ។

Daixin Li អ្នកវិភាគមកពី BNEF ឱ្យដឹងថា “CATL ជោគជ័យក៏ដោយសារតម្រូវការយ៉ាងខ្ពស់នៅប្រទេសចិន។ ក្នុងអនាគត នៅពេលទីផ្សាររថយន្តអគ្គិសនីចិនរីកចម្រើនខ្លាំង ការរក្សានិងបង្កើនចំណែកទីផ្សារនៅលើឆាកអន្តរជាតិ នឹងអាស្រ័យលើបញ្ហាថា តើពួកគេបង្កើតបានតម្រូវការប៉ុន្មាននៅខាងក្រៅប្រទេសចិន”។

ភាគីក្រុមហ៊ុនរបស់លោក Zeng រំពឹងថា នឹងអាចផ្គត់ផ្គង់ថ្មសម្រាប់រថយន្តរបស់ Tesla ដែលផលិតនៅប្រទេសផ្សេងៗ ដូចជារោងចក្រដែលកំពុងត្រូវបានសាងសង់នៅអាល្លឺម៉ង់ជាដើម។ CATL ក៏បានលក់គ្រឿនបន្លាស់ទៅឱ្យក្រុមហ៊ុន Vlkswagen និង BMW ព្រមទាំងកំពុងសាងសង់រោងចក្រនៅទីនេះទៀតផង។

លោក Zeng ថ្លែងថា បច្ចុប្បន្ន CATL កំពុងតែបង្កើនល្បឿនក្នុងការស្រាវជ្រាវស្វែងរកវិធីសាស្ត្រកាត់បន្ថយចំណាយដើម្បីអាចបញ្ចុះតម្លៃរថយន្តអគ្គិសនីមកនៅប្រហាក់ប្រហែលនឹងរថយន្តប្រើសាំង។ លោក Zeng ក៏ជាមនុស្សដែលធ្លាប់បានជួយឱ្យ Apple អាចអូសបន្លាយអាយុកាលរបស់ថ្ម MacBook ផងដែរ។

CEO របស់ CATL បញ្ជាក់ថា ពួកគេអាចផលិតប្រភេទថ្មដែលអាចប្រើប្រាស់បានរហូតដល់16ឆ្នាំ និងជួយឱ្យរថយន្តអាចបរបាន2លានគីឡូម៉ែត្រ។ នេះគឺជាចំណុចមួយដែលបណ្ដាក្រុមហ៊ុនផលិតរថយន្ត ដូចជា Tesla ឬ General Motors ជាដើម កំពុងតែតាមរក។

បច្ចុប្បន្ន ក្រុមហ៊ុន CATL មានបុគ្គលិកចំនួន5,400នាក់កំពុងធ្វើការក្នុងផ្នែកស្រាវជ្រាវនិងអភិវឌ្ឍ (R&D/Research & Development) ក្នុងនោះមាន143នាក់មានសញ្ញាបត្របណ្ឌិត។

Bernstein គន់គូរឃើញថា ប្រភេទថ្មតូច និងតម្លៃទាបរបស់ CATL សម្រាប់ Model 3 នឹងជួយឱ្យតម្លៃរថយន្ត Tesla ថយចុះពី600ទៅ1,200ដុល្លារក្នុង1គ្រឿង។

Mark Newman អ្នកវិភាគម្នាក់មកពី Bernstein បានព្យាករថា “CATL នឹងទទួលបានផលប្រយោជន៍ច្រើន បើសិនអាចនាំយកប្រភេទថ្មថាមពលនេះចេញទៅទីផ្សារអន្តរជាតិ ព្រោះថា ក្រៅពីប្រទេសចិន គឺមិនទាន់មានប្រទេសណាមួយប្រើប្រាស់ថ្ម LFP សម្រាប់រថយន្តអគ្គិសនីនៅឡើយ”។ អ្នកវិភាគរូបនេះក៏បានសង្កត់ធ្ងន់ដែរថា “Tesla នឹងមានប្រៀបច្រើនជាងគូប្រជែង (នៅក្នុងទីផ្សាររថយន្តអគ្គិសនី)”។

ប្រភព៖ Bloomberg

តារាបង្ហាញម៉ូដរបស់ New Face Cambodia កញ្ញា ផៃ រ៉ាវី បានកំពុងសម្លឹងរកឱកាសអាជីពជាតារាសម្តែងមួយទៀត បន្ថែមពីលើអាជីពតារាបង្ហាញម៉ូដសព្វថ្ងៃ។ ផ្តើមប្រឡូកវិស័យបង្ហាញម៉ូដក្នុងឆ្នាំ 2016 អតីតបេក្ខភាព Miss Cambodia 2017 និង Miss Cosmoworld 2019 ធ្លាប់ទទួលការហ្វឹកហាត់លើសិល្បៈសម្តែងពីស្ថាប័នគ្រប់គ្រងរបស់ខ្លួន ហើយធ្លាប់បង្ហាញសមត្ថភាពសម្តែងតាមរយៈ MV កាលពីពេលកន្លងទៅ។ តែឱកាសថតភាពយន្តដុំ និងភាគ នាងនៅមិនទាន់ទទួលបានពីផលិតករក្នុងស្រុកឡើយ។

យ៉ាងណាមិញ ស្រីស្រស់សោភានេះមិនបោះបង់ការប៉ងចង់ចាប់យកអាជីពសម្តែងនេះទេ ដោយសង្ឃឹមថាថ្ងៃណាមួយនាងនឹងអាចទទួលបានឱកាសនេះពីផលិតករណាម្នាក់។ ជាមួយមហិច្ឆតាខ្ពស់ ក្រៅពីការប៉ងចង់ក្លាយជាតារាសម្តែង ផៃ រ៉ាវី បានលើកឡើងពីបំណងចង់រៀនរាំមួយមុខទៀត។ ដោយឡែកអាជីពផ្សេងៗក្នុងវិស័យសិល្បៈគឺនាងចង់ចេះទាំងអស់ ជារួមគ្រប់យ៉ាងក្នុងរង្វង់សិល្បៈតែម្តង។

ទើបប្រឡូកសិល្បៈ៤ឆ្នាំក៏ពិតមែន ប៉ុន្តែ រ៉ាវី បានសាងកេរ្តិ៍ឈ្មោះឱ្យគ្រប់គ្នាស្គាល់តាមរយៈការបញ្ចេញសមត្ថភាពដើរម៉ូដតាមកម្មវិធីបង្ហាញម៉ូដធំៗក្នុងស្រុកជាច្រើន កាលពីពេលកន្លងទៅ។

កាលពីថ្ងៃអាទិត្យ ទី១២ ខែកក្កដា នោះ តារាចម្រៀងស្រី ស៊ុន ស្រីពេជ្រ បានសម្រាលកូនប្រុសបណ្ដូលចិត្ត និងសម្រេចមិនយកឈ្មោះត្រកូលស្វាមីមកដាក់ឱ្យកូនឡើយ ពោលគឺនាងសម្រេចដាក់ឈ្មោះអ្នកនាង ជាត្រកូលកូន គឺ «ពេជ្រ វឌ្ឍនា» ដែលចំណុចនេះ រឹងតែធ្វើឱ្យមហាជនសង្ស័យកាន់តែខ្លាំងពីរឿងប្រះឆារបស់នាងជាមួយស្វាមី។

រូបភាពនៅបណ្ដាញសង្គមហ្វេសប៊ុកដែលទើបបង្ហោះនោះ ក៏ត្រូវបានគេកត់សម្គាល់ឃើញថា ស្វាមីរបស់នាងមកមើលថែឡើយ បើទោះបីជាសម្រាលហើយ ក៏នៅតែមិនឃើញវត្តមានស្វាមីនាងមកមើលដែរ។  អ្នកនាង ស៊ុន ស្រីពេជ្រ បានបដិសេដមិនផ្ដល់បទសម្ភាសន៍ចំពោះបញ្ហានេះទេ បើទោះបីជាមហាជនកំពុងចាប់អារម្មណ៍លើរឿងនេះខ្លាំងកម្រិតណាក៏ដោយ។

គួរឱ្យរំឭកដែរថា ជិវិតស្នេហារបស់អ្នកនាង ស៊ុន ស្រីពេជ្រ ន ស្រីពេជ្រ បានសម្រេចចិត្តចូលរោងការជាផ្លូវការហើយនៅថ្ងៃទី២៣ខែតុលា ឆ្នាំ2019 ។ ការសម្រេចចិត្តចូលរោងការនោះ ក្រោយពីនាងបានរួមរស់ជាមួយស្វាមីក្រោមការដឹងលឺពីចាស់ទុំរហូតទទួលបានចំណងដៃកូនស្រីម្នាក់វ័យជិត១ខួប។ រហូតដល់សម្រាលកូនប្រុសមួយ ពេជ្រ វឌ្ឍនា នេះ ក៏ស្រាប់ធ្វើឱ្យមានការភ្ញាក់ផ្អើលនូវរឿងអាស្រូវថ្មីមួយទៀតឈានដល់ផ្លូវស្នេហាបំបែកជាមួយស្វាមី។

កញ្ញា រឿន ណាត កញ្ញាឯកចក្រវាលកម្ពុជា2018 បានប្រាប់អ្នកសារព័ត៌មានថា ខ្លួនគ្រោងនឹងបើកជំនួញមួយនាពេលឆាប់ៗខាងមុខ ខណៈបច្ចុប្បន្ននាងកំពុងសាកល្បងធ្វើតេសលើគុណភាពផលិតផលឱ្យបានជាក់លាក់មុននាំចូលមកកាន់ទីផ្សារកម្ពុជា។

យ៉ាងណាមិញ កញ្ញាឯកចក្រវាលកម្ពុជា2018 រូបនេះ នៅមិនទាន់បញ្ជាក់នៅឡើយទេថាផលិតផលនោះជាផលិតផលអ្វីឱ្យប្រាកដ គ្រាន់តែថាឆាប់ៗនេះ ទស្សនិកជន អ្នកគាំទ្រច្បាស់ជាបានឃើញជំនួញថ្មីនេះ។ ទន្ទឹមគ្នានឹងគ្រោងការបើកជំនួញនេះ ស្រីស្អាត រឿន ណាត ក៏កំពុងសំលឹងមើលកម្មវិធីអន្តរជាតិថ្មី សម្រាប់ការចូលប្រកួតដូចគ្នាដែល ដោយពេលនេះនាងកំពុងសិក្សាលក្ខខណ្ឌរបស់កម្មវិធីចំនួន គឺ Miss International និង Miss Supranational។

គួររំលឹកថា ក្រោយត្រឡប់ពីការប្រកួត Miss Universe International 2018 នៅប្រទេសថៃ ទីផ្សារការងារសិល្បៈរបស់ កញ្ញា រឿន ណាត ផ្ទុះឡើងខ្លាំងគួរឱ្យកត់សម្គាល់ ដោយនាងមានការងាររដឹកជាប់គ្នាដូចកន្ទុយខ្លែង ដូចជាការងារជាតារាម៉ូដែល ការសម្តែង ការថតម៉ូដសម្អាងការ ការថតផ្សព្វផ្សាយផលិតផល និងការងារផ្សេងៗទៀតជាច្រើន។

ខ្សែការពារ​កណ្តាល​រប​ស់​ក្លិប Bacelona ដ៏​ល្បីល្បាញ លោក Gerard Piqué ត្រូវបាន​គេ​ថត​បាន​ថា កំពុង​ជិះ​កង់​យ៉ាង​លឿន​ទៅកាន់​កីឡដ្ឋាន​របស់ខ្លួន នៅក្នុង​ថ្ងៃ​ប្រកួត​ជាមួយ Espanyol កាលពី​ម្សិលមិញ។

ទោះបីជា​បែបនេះ​ក៏ពិតមែន តែ​កីឡាករ​រូបនេះ នៅតែ​បង្ហាញខ្លួន​បាន​យ៉ាង​ល្អ ដោយបាន​ជួយ​ឱ្យ​ក្រុម​របស់លោក ឈ្នះ​លើ​ក្រុម Espanyol ដោយ​លទ្ធផល 1ទល់នឹង0 និង​ឈរលើ​កំពូល​តារាង​របស់ La Liga។

កីឡាករ​អេ​ស្ប៉ា​ញ​រូបនេះ ត្រូវបាន​គេ​ដឹងថា ស្រឡាញ់​កង់​ខ្លាំងណាស់ ដោយ​ថែមទាំង​ធ្លាប់បាន​បបួល Messi ទិញ​កង់​ដូច​ខ្លួន ដើម្បី​ទុក​ជិះ​កម្សាន្ត​ពេលទំនេរ​ទៀតផង៕

តើលោកឪពុកអ្នកម្តាយដឹងឬទេថា រឿងដែលសំខាន់ជាងការបានរបស់លេងធំៗ ឬបានញ៉ាំនំដ៏សែនចូលចិត្តជាប្រចាំនោះគឺការបានទទួលសេចក្តីស្រឡាញ់អំពីឪពុកម្តាយហ្នឹងឯង និងទោះបីជាលោកអ្នកចង់ប្រាប់ថា លោកអ្នកត្រូវតែស្រឡាញ់កូនរបស់ខ្លួនឯងស្រាប់ហើយក៏ដោយ តែហ្នឹងវាគ្រាន់តែជាពាក្យសំដីដែលកូនៗមិនអាចចាប់ ឬប៉ះពាល់បានឡើយ ដូច្នេះបើចង់ឱ្យកូនបានដឹងពីសេចក្តីស្រឡាញ់របស់ឪពុកម្តាយយ៉ាងពិតប្រាកដនោះ សូមសាកល្បងធ្វើតាម 10 វិធីដែលឡារ៉ែននាំមកជូនខាងក្រោមនេះ ធានាថា កូនៗនឹងមានសេចក្តីសុខ និងមានអារម្មណ៍កក់ក្តៅយ៉ាងអស់ពីចិត្តមិនខាន។

– ប្រើពេលវេលារួមជាមួយកូន

បដិសេធមិនបានឡើយថាឪពុកម្តាយសម័យនេះត្រូវខាតបង់ពេលវេលាទៅជាមួយនឹងរឿងការងារ និងរឿងផ្សេងៗទៀតអស់​ជាច្រើន រហូតអាចហៅបានថា ស្ទើរតែគ្មានពេលបាននៅជាមួយកូនឡើយ ដូច្នេះពេលណាដែលដល់ថ្ងៃឈប់សម្រាក ឬថ្ងៃទំនេរ ក៏គួរតែប្រើពេលវេលាដ៏សែនវិសេសនេះនៅជាមួយកូនៗ អាចនឹងរៀបចំពិធីជប់លៀងតូចមួយនៅក្នុងផ្ទះ ឬនាំគេទៅលេងសួនកំសាន្ត ទៅទិញរបស់លេង ឬអ្វីក៏ដោយដែលលោកអ្នកគិតថា កូននឹងមានសេចក្តីសុខ។

– ស្តាប់គ្រប់យ៉ាងដែលកូននិយាយប្រាប់

ក្មេង ក៏គឺក្មេងហ្នឹងឯង ពួកគេក៏ចង់និយាយ ចង់រៀបរាប់អ្វីៗឱ្យលោកឪពុកអ្នកម្តាយស្តាប់នូវអ្វីដែលគេបានជួបមក ដែលលោកអ្នកក៏គួរតែទទួលស្តាប់គេយ៉ាងយកចិត្តទុកដាក់ មិនមែនគ្រាន់តែស្តាប់ហើយឆ្លើយឱ្យតែរួចៗពីមាត់តែម្យ៉ាងនោះទេ។

– និយាយពាក្យថា ស្រឡាញ់ឱ្យបានញឹកញាប់

ជាវិធីដែលល្អ និងត្រង់ៗបំផុតដែលកូននឹងដឹងបានថា ឪពុកម្តាយស្រឡាញ់គេប៉ុនណា។ បើចង់ឱ្យកូនមានអារម្មណ៍ថាខ្លួនឯងសំខាន់ និងមានអារម្មណ៍កក់ក្តៅនោះ ក៏និយាយប្រាប់គេឱ្យបានញឹកញាប់តាមដែលអាចធ្វើបាន នោះធានាថា គេច្បាស់ជាហេពភីយ៉ាងពិតប្រាកដ។

– ឱប និង ថើប នៅពេលមានឱកាស

នៅពេលមានឱកាសបានជិតស្និទ្ធជាមួយកូនហើយ វិធីដែលជាការប្រគល់សេចក្តីស្រឡាញ់បានល្អបំផុតនោះ គឺការឱប និងថើបថ្ពាល់កូនហ្នឹងឯង សាកល្បងធ្វើសាកលមើល ហើយលោកអ្នកនឹងបានឃើញស្នាមញញឹមតូចមួយនៅលើផ្ទៃមុខរបស់គេមិនខាន។

– សួរនាំពីជីវិតប្រចាំថ្ងៃរបស់គេ

ក្រោយពីត្រឡប់មកពីសាលារៀនរៀងរាល់ថ្ងៃ ឬថ្ងៃណាក៏ដោយដែលមានឱកាសបាននិយាយលេងជាមួយកូននោះ សាកល្បងសួរនាំពីជីវិតប្រចាំថ្ងៃរបស់គេទៅមើល ឬអាចនឹងសួរនាំពីរឿងរៀន រឿងអនាគត ឬរឿងអ្វីដែលពាក់ព័ន្ធនឹងខ្លួនគេទៅមើល រឿងអស់ហ្នឹងឯងដែលបង្ហាញឱ្យឃើញថា អ្នកយកចិត្តទុកដាក់ និងផ្តល់ភាពសំខាន់ចំពោះគេខ្លាំងប៉ុនណានោះ។

– នាំគេទៅញ៉ាំបាយនៅតាមហាង

នៅពេលលោកឪពុកអ្នកម្តាយមានណាត់ចេញទៅញ៉ាំបាយល្ងាចនៅក្រៅផ្ទះ ឬថ្ងៃណាទំនេរៗមិនបានមានធុរៈអ្វីនោះ ក៏អាចនឹងសាកល្បងនាំកូនៗទៅញ៉ាំបាយនៅក្រៅផ្ទះដើម្បីផ្លាស់ប្តូរបរិយាកាសម្តងក៏ល្អម្យ៉ាងដែរ ដើម្បីឱ្យគេបានចេញទៅឃើញគេឃើញឯង និងបានញ៉ាំអ្វីឆ្ងាញ់ៗ និងដែលសំខាន់នោះគឺ បានមានពេលវេលានៅជួបជុំគ្នាហ្នឹងឯង។

– កោតសរសើរនៅពេលគេធ្វើជាក្មេងល្អ

នៅពេលណាដែលកូនធ្វើអំពើល្អ ឬធ្វើជាក្មេងល្អ លោកឪពុកអ្នកម្តាយមិនគួរធ្វើព្រងើយនោះទេ តែគួរប្រគល់ពាក្យកោតសរសើរដល់គេជារង្វាន់ ឡារ៉ែនសូមប្រាប់ទៅចុះថា មិនចាំបាច់មានកាដូអ្វីមកឱ្យនោះទេ ត្រឹមតែពាក្យសំដីល្អៗ ពាក្យកោតសរសើរអំពីអ្នកហ្នឹងឯងគឺកាដូដ៏ល្អបំផុតនោះ។

– រក្សាពាក្យសន្យា

មិនថាតែការសន្យាក្នុងរឿងតូចតាច ដូចជា នឹងនាំទៅដើរលេងសួនកំសាន្ត ឬនឹងនាំទៅញ៉ាំនំនៅហាងទំនើបៗនោះទេ សូមប្រាប់ទៅចុះថា បើលោកអ្នកសន្យាហើយមិនធ្វើតាមនោះ អាចនឹងបំផ្លាញអារម្មណ៍របស់កូនបាន វិធីដែលល្អនោះគឺ នៅពេលដែលបានសន្យាអ្វីមួយហើយនោះ គួរតែធ្វើតាមអ្វីដែលបានប្រាប់នោះទៅប្រសើរជាង។

– ធ្វើឱ្យកូនៗញញឹម

សូមប្រាប់ទៅចុះថា ការធ្វើរឿងកំប៉ិកកំប៉ុកដែលអាចធ្វើឱ្យកូនៗញញឹមបាននេះហើយ គឺជារឿងដែលមានតម្លៃខ្លាំងជាងអ្វីទាំងអស់ មិនថាតែការដាស់គេដោយការថើបថ្ពាល់ ឬមានស៊ើផ្រៃស៍ដ៏គួរឱ្យស្រឡាញ់សម្រាប់គេ ឱ្យគេញញឹម និងសើចបានយ៉ាងមានសេចក្តីសុខនោះ ឡារ៉ែនសូមប្រាប់ទៅចុះថា ត្រឹមតែប៉ុណ្ណឹងកូនៗក៏បានដឹងស្រេចទៅហើយថា អ្នកស្រឡាញ់គេប៉ុនណានោះ៕