Category: សង្គម និងសេដ្ឋកិច្ច

ការច្នៃម៉ូដផ្ទះសម្រាប់ក្រុមគ្រួសារដែលមានមនុស្សចាស់ ឬកំពុងចង់សាងសង់ផ្ទះជូនឪពុកម្តាយ ឬទុកស្នាក់នៅក្នុងអំឡុងពេលចុងក្រោយរបស់ជីវិត ដែលទោះជាវាជាផ្ទះរបស់យើងខ្លួនក៏ដោយ ក៏ត្រូវតែរៀបផែនការយ៉ាងល្អិតល្អន់ និងគិតទុកជាមុនសម្រាប់ការស្នាក់នៅ និងភាពងាយស្រួលរបស់បណ្តាមនុស្សចាស់ក្នុងផ្ទះផងដែរ ជាពិសេសរឿងសំខាន់ខាងក្រោមនេះគឺជារឿងដែលគួរយកចិត្តទុកដាក់ជាពិសេសក្នុងការច្នៃម៉ូដ និងការតុបតែងផ្ទះដែលមានមនុស្សចាស់រស់នៅជាមួយ។

1. ផ្ទះត្រូវមានសីតុណ្ហភាពដែលស័ក្តិសម

ដោយរាងកាយរបស់មនុស្សចាស់ដែលមិនអាចស៊ូទ្រាំចំពោះសភាពធាតុអាកាសដែលប្រែប្រួលយ៉ាងឆាប់រហ័សបាននោះ ទើបយើងចាំបាច់ត្រូវតែនឹកដល់សីតុណ្ហភាពក្នុងផ្ទះជាចម្បង ទាំងទិសខ្យល់ ប្រឡោះខ្យល់ ឌីហ្សាញខាងក្នុង និងការជ្រើសរើសប្រើសម្ភារៈដែលមានគុណសម្បត្តិជួយសម្រួលសីតុណ្ហភាពក្នុងផ្ទះឱ្យសក្តិសមល្ម មិនក្តៅ ឬត្រជាក់រហូតជ្រុលពេកទោះជាធាតុអាកាសខាងក្រៅប្រែប្រួលយ៉ាងណាក៏ដោយ។

2. ពន្លឺភ្លើងភ្លឺល្មមគ្រប់គ្រាន់

ដោយសារតែការមើលឃើញរបស់មនុស្សចាស់មិនសូវជាល្អប៉ុន្មាននោះ ដូច្នេះចំណុចផ្សេងៗនៅក្នុងផ្ទះ មិនថាតែបន្ទប់គេង បន្ទប់ទឹក បន្ទប់អង្គុយលេង ប្រឡោះផ្លូវដើរ និងផ្លូវចូលផ្ទះនោះឡើយ គួរតែមានកម្រឹតនៃភាពភ្លឺ និងពន្លឺភ្លើងដែលភ្លឺល្មមគ្រប់គ្រាន់ដើម្បីការពារឧបត្តិហេតុ។

3. កម្រាលឥដ្ឋគឺជាការងារដែលត្រូវប្រយ័ត្ន

ឌីហ្សាញដែលសំខាន់សម្រាប់ផ្ទះដើម្បីមនុស្សចាស់នោះក៏គឺ កម្រាលឥដ្ឋ ដូច្នេះយើងគួរតែជ្រើសរើសប្រើកម្រាលឥដ្ឋដែលមានភាពប្រថុយប្រថានក្នុងការរអឹលតិចបំផុត កុំឱ្យមានកម្រាលឥដ្ឋដែលខ្ពស់ទាបជាងគ្នាច្រើនពេក ក្រៅពីនេះបើចង់ក្រាលកម្រាលព្រំ បន្ថែមពីលើផងនោះ នឹងធ្វើឱ្យមនុស្សចាស់ដើរបានកាន់តែងាយស្រួលខ្លាំងឡើងទៀតផង តែត្រូវមិនភ្លេចបិទបន្ទះការពាររអឹលនៅពីក្រោមកម្រាលព្រំដើម្បីការពារឧបត្តិហេតុផ្សេងៗនោះឡើយ។

4. ឌីហ្សាញបន្ទប់ចង្រ្កានបាយដែលធ្វើឱ្យមនុស្សចាស់ជួយខ្លួនឯងបានងាយស្រួល

មនុស្សចាស់ច្រើនតែធ្វើការងារក្នុងចង្រ្កានបាយមិនសូវបានពេញទំហឹងឡើយ ដូចជាមានបញ្ហារឿងទូជាប់ជញ្ជាំងខ្ពស់ពេក កម្ពស់របស់តុត្រៀមម្ហូបអាហារមិនសមល្មមជាមួយការប្រើការ ជាដើម ដូច្នេះបើចង់ច្នៃម៉ូដបន្ទប់ចង្រ្កានបាយឱ្យសក្តិសមជាមួយមនុស្សចាស់នោះ យើងចាំបាច់ត្រូវតែរៀបកម្ពស់របស់ទូជាប់ជញ្ជាំងឱ្យមានកម្ពស់សមល្មមនឹងកម្ពស់របស់មនុស្សចាស់ ធ្វើតុត្រៀមអាហារឱ្យមនុស្សចាស់អាចឈរធ្វើការបានយ៉ាងងាយស្រួល មិនបាច់ឱន ឬជំទើត។

5. សុវត្ថិភាពក្នុងបន្ទប់ទឹកគឺជារឿងសំខាន់បំផុត

បន្ទប់ទឹកនេះឯង គឺជាផ្នែកសំខាន់មួយដែលយើងត្រូវតែផ្តល់ភាពប្រយ័ត្នប្រយែងខ្ពស់បំផុត ដោយត្រូវបំពាក់បង្កាន់ដៃឱ្យពេញក្នុងទីកន្លែងដែលប្រើការ បំបែកបន្ទប់ងូតទឹកចេញពីបរិវេណផ្សេងៗដោយឡែក ត្រៀមកៅអីអង្គុយងូតទឹកទុកជាស្រេច បំពាក់ពន្លឺឱ្យភ្លឺគ្រប់គ្រាន់ បំពាក់កញ្ចក់ផ្ទាំងធំៗដែលមើលពីត្រង់ណាក៏មើលឃើញច្បាស់ ដើម្បីកុំឱ្យមនុស្សចាស់ត្រូវដើរចូល-ចេញបន្ទប់ទឹកញឹកញាប់ និងពិសេសបំផុតគឺក្រាលកម្រាលឥដ្ឋដែលការពារការរអឹលផង៕

រដូវភ្លៀងបែបនេះ បញ្ហាដែលចាំតែរំខានចិត្តលោកឪពុកអ្នកម្តាយនោះ ប្រហែលជាគេចមិនផុតពីសត្វមូសចង្រៃដែលចាំតែខាំកូនជាទីស្រឡាញ់គ្រប់ពេលវេលា។ មូសដែលខាំកូនៗយើង ភាគច្រើនៗតែជាមូសរំខានភេទញី ដែលវាត្រូវតែប្រើឈាមក្នុងការបង្កើតស៊ុត ហើយនៅពេលវាខាំ វានឹងបញ្ចេញទឹកមាត់ចេញមក ដែលជាមូលហេតុរបស់អាការកន្ទួលរមាស់ និងប្រតិកម្មចាញ់ហ្នឹងឯង ស្បែករបស់កុមារតូចៗដែលនៅស្តើង នៅពេលត្រូវមូសខាំក៏ក្លាយជាកន្ទួលពណ៌ក្រហមតូចមួយ មានអាការរមាស់ និងនៅលើក្មេងខ្លះដែលមានប្រតិកម្មចាញ់ទឹកមាត់មូសផងនោះ អាចឡើងកន្ទួលរឹងពណ៌ក្រហម ដែលវានឹងប្រើពេលវេលាយូរទំរាំនឹងស្រករាបទៅវិញ។ គឺជាបញ្ហាមួយដែលធ្វើឱ្យលោកឪពុកអ្នកម្តាយពិបាកចិត្តខ្លាំង ថែមទាំងធ្វើឱ្យកូនតូចយំរករឿង មិនស្រួលខ្លួន និងអាចបន្សល់ទុកស្លាកស្នាមនៅលើស្បែកទៀតផង។

ការមើលថែទាំព្យាបាលនៅពេលមូសខាំកូន និងមានអាការប្រតិកម្មចាញ់មូសខាំ

– នៅពេលកូនត្រូវមូសខាំ ចូរលាងសម្អាតដោយទឹកស្អាត ឬទឹកលាយសាប៊ូតិចៗនៅត្រង់កន្លែងដែលមូសខាំនោះ

– ស្អំទឹកកក ឬជេលត្រជាក់ ដើម្បីកាត់បន្ថយអាការរមាស់

– បើមានអាការធ្ងន់ធ្ងរខ្លាំង ចាំបាច់ត្រូវតែនាំកូនតូចទៅជួបគ្រូពេទ្យ

– កាត់ក្រចកដៃកូនឱ្យខ្លីៗ ព្រោះកូនអាចនឹងអេះ ខ្វាច កន្លែងមូសខាំនោះរហូតក្លាយជាដំបៅ

ការមើលថែទាំកូនតូចក្នុងរដូវភ្លៀងបែបនេះ គឺជារឿងសំខាន់ណាស់ ព្រោះក្រៅពីមូសហើយនោះ នៅមានជំងឺ និងរោគចង្រៃជាច្រើនទៀតដែលមកជាមួយទឹកភ្លៀង វិធីដែលល្អបំផុតនោះគឺ ត្រូវស្លៀកពាក់ឱ្យកូនតូចឱ្យបានជីតគត់មត់ និងឱ្យនៅក្នុងទីកន្លែងដែលភ្លឺស្រឡះ ដើម្បីសុវត្ថិភាពរបស់កូន៕

ប្រឡូកសិល្បៈមកជាច្រើនឆ្នាំមកហើយ តារា​កំប្លែង​ជើង​ចាស់ដែលពោរពេញ​ដោយ​ទេពកោសល្យ និង​វោហាស័ព្ទ​ទាំង​២រូប ​យាយ​យ៉យ​ និង​យាយ​អឿន​ មិនដែលធ្វើឱ្យមហាជនអ្នកគាំទ្រខកចិត្តជាមួយការ​លេង​កំប្លែងរបស់ពួកគាត់។ អាជីពជាតារាកំប្លែងនេះ គឺជា​ផ្នែក​មួយ​នៃ​ជីវិត​របស់​គាត់​ ហើយ​គាត់​ក៏​ពេញ​ចិត្ត​នឹង​ការងារ​នេះ​ដែរ​ ពីព្រោះ​វា​ហាក់​ដូច​ជា​ការ​ធ្វើ​បុណ្យ​អ៊ីចឹង​ ដោយ​អាច​ធ្វើ​ឱ្យ​ទស្សនិកជន​សើច​សប្បាយ​ បំភេ្លច​អស់​ទុក្ខ​កង្វល់​ និង​ជួយ​បង្កើន​អាយុ​ទៀត​ផង​។

ថ្មី​ៗនេះ ​តារាកំប្លែង​ដែលមាន ​វោហាកោសល្យទាំង​២រូប ​បើ​ធ្វើឱ្យអ្នកគ្រប់​គ្នា​មាន​ការ​ចាប់​អារម្មណ៍​​ បន្ទាប់​ពី​បាន​​បង្ហាញ​ នៅ​មុខ​មាត់​​ថ្មី ​ក្រោយ​ពី​បាន​ធ្វើ​ការ​កែ​សម្ផស្ស​រួចមក​។ ពោល​ឃើញថា តារាកំប្លែង​ទាំងពីរ ​បាន​ធ្វើ​ការ​អ៊ុត​មុខ វះកាត់​សាច់​ត្របក​ភ្នែក​ធ្លាក់ ធ្វើ​ច្រមុះ​ដែល​បាន​ជួយ​ឱ្យ​សម្រស់ ​កាន់​តែក្មេង​ជាង​វ័យ ស្រស់​ស្អាត​បានមួយកម្រិតថែមទៀត។ ស្រប​ពេល​ជា​មួយ​គ្នា​​នេះ​ដែរ ​ក៏​មាន​អ្នកលេង ​បណ្តាញ​សង្គម​ជាច្រើន​បាន​​ចូល​ទៅ​បញ្ចេញ​មតិ ​សរសើរ​ពី​សម្រស់ ​ស្រស់ស្អាតប្លែក​​ខ្លាំង ​ក្រោយពីតារាកំប្លែង​យាយ​យ៉យ​ និង​យាយ​អឿន​ ​បាន​កែមុខ​មាត់ រួចហើយ​នោះ​ផងដែរ៕

រហូតដល់ជាង១ខែ ដែលបទចម្រៀង « អំពើល្អ »ត្រូវបានសម្ងំផលិតដោយយកចិត្តទុកដាក់ ដោយទើបតែបានចេញបង្ហោះជាផ្លូវការប៉ុណ្ណោះ កាលពីថ្ងៃទីយប់ថ្ងៃទី 18 កក្កដា ឆ្នាំ2020 នៅលើផេក Merl Merl TV ដែលជាផេកផ្លូវការរបស់ក្រុមហ៊ុនដែលជាជួយក្នុងការផលិត។

នៅក្នុង MV នេះ សាច់រឿងសំខាន់ៗទាំង៩ ដែលជាការនិពន្ធឡើងដោយស្ថាបនិកគ្រួសារតារាកម្ពុជា ក្រោមការដឹកនាំសម្ដែងដោយផលិតករលោក ឆាយ វណ្ណៈ ទទួលបានការសរសើរពីសំណាក់មហាជនយ៉ាងខ្លាំង ដោយសារតែសាច់រឿងនៅក្នុងបទនេះ មានន័យចាក់ដោត ឆ្លុះបញ្ចាំងពីអំពើល្អ។ នេះជាស្នាដៃរបស់លោក ផាត់ តារារដ្ឋ ដែលជាស្ថាបនិកគ្រួសារតារាកម្ពុជា និង ជាអ្នកបកស្រាយផ្ទាល់នៅក្នុងបទចម្រៀង បន្ទាប់ពីលោកយល់ថា គួរតែមានស្នាដៃមួយ ដើម្បីបំផុសពីអំពើល្អនៅក្នុងសង្គម។

បទនេះមានការបកស្រាយដោយតារាចម្រៀងស្រី កញ្ញា ហុិន លីដា ដែលជាបេក្ខជន3នាក់ចុងក្រោយ របស់កម្មវិធី Cambodian idol រដូវកាលទី2។ MV បទនេះ មានការចូលរួមសម្ដែងដោយតួសម្ដែងសរុបទាំងអស់ជាង៥០តួ ក្រោមការផលិតរបស់ក្រុមហ៊ុនអាំអាតមេឌា របស់ផលិតករ លោក ឆាយ វណ្ណៈ។ ដោយសារតែមានការចូលរួមសម្ដែង និង ផលិតសុទ្ធតែពីអ្នកមានស្នាដៃនេះហើយ ទើបធ្វើឱ្យសាច់រឿងក្នុង MV បទ”អំពើល្អ”ដែលទើបចេញបង្ហោះ ទាក់ទាញអ្នកគាំទ្រពីគ្រប់ស្រទាប់វណ្ណៈ។ លោក ផាត់ តារារដ្ឋ អ្នកនិពន្ធបទភ្លេង និងទំនុកច្រៀង បានបង្ហាញនូវការកោតសរសើរយ៉ាងខ្លាំង ចំពោះដៃគួចម្រៀង គឺកញ្ញា ហុិន លីដា ចំពោះតារាសម្ដែងទាំងអស់ ជាពិសេសគឺផលិតកររបស់ក្រុមអាំណាតមេឌាតែម្ដង ដែលបានសហការរួមកន្លងគ្នា ធ្វើអោយបទ”អំពើល្អ”លេចចេញជារូបរាងឡើង។

ស្នាដៃបទនេះ លោកថានឹងក្លាយជាវីដេអូឯកសារចំពោះមនុស្សគ្រប់ស្រទាប់វណ្ណៈ ដើម្បីបំផុសអោយកាន់តែមានអំពើល្អនៅក្នុងសង្គម ជាមួយមនុស្សជាវិញខ្លួន និងចំពោះក្រុមគ្រួសារតែម្ដង។ ចង់ដឹងថា MV បទ”អំពើល្អ”មានរសជាតិកម្រិតណា សូមរីករាយទស្សនា៖

យោងតាមការបង្ហោះរបស់ផេកសិល្បករកម្ពុជា បានរៀបរាប់ថា « ទោះបីគាត់ឈឺធ្ងន់យ៉ាងណារហូតដល់ទទួលមរណភាពថ្ងៃនេះក៏គាត់មិនដែលលើកដៃ សុំអំណោយគេឡើយ សូមចូលរួមសោកស្តាយ ចំពោះការបាត់បង់មរតកមនុស្សរស់ លោកតាព្រឹទ្ធាចារ្យ ព្រីង សាឃន ជាព្រឹទ្ធាចារ្យសិល្បៈ ដែលពោពេញទៅដោយទេពកោសល្យ ភាពយន្ត របាំ ល្ខោន យីកេ និងស្នាដៃជាច្រើនទៀត ពិសេសបងប្អូនប្រជាពលរដ្ឋខ្មែរទូទាំងប្រទេសបានចាំពីទេពកោសល្យសម្តែងរបស់លោកតាយ៉ាងច្បាស់ តាមរយៈតួរអង្គ «តាជូជក» នៅក្នុងយីកេររឿងព្រះវេសន្តរអំឡុងឆ្នាំ80ជាង ។ សូមបួងសួងដល់វិញ្ញាណក្ខន្ធរបស់លោកតា សូមបានទៅកាន់សុគតិភពកុំបីឃ្លៀងឃ្លាតឡើយ»។

សូមជម្រាបបន្ថែមថា ព្រឹទ្ធាចារ្យ​​សិល្ប ព្រីង សាឃន (ប្រហែល​ជា​កើត​នៅ​ឆ្នាំ 1936 ឬ 1937) កើត​នៅ​ ភូមិ​​ព្រែក​ដំបូក ស្រុក​ស្រី​សន្ធរ ខែត្រ​កំពង់ចាម ។ នៅ​ឆ្នាំ 1953 លោក​បាន​ចូល​រៀន​ផ្នែក​ល្ខោន​និយាយ​នៅ​អតីត​សាលា​ល្ខោន​ជាតិ ដែល​ក្រោយ​មក​ប្ដូរ​ឈ្មោះ​មក​ជា សាកល​វិទ្យាល័យ​ភូមិន្ទ​វិចិត្រ​សិល្បៈ ។ បន្ទាប់​ពី​រៀន​ចប់​ហើយ លោក​បាន​សម្ដែង​នៅ​លើ​ឆាក​ជា​ច្រើន​រឿង តែ​ក្នុង​តំណែង​ជា​តួ​រាយរង​ប៉ុណ្ណោះ ។

នៅ​ក្រោយ​របប​ខ្មែរ​ក្រហម​ដួល​រលំ​ទៅ គាត់​បាន​ត្រឡប់​មក​ភ្នំពេញ​វិញ ដោយ​ប្រកប​អាជីព​ជា​អ្នក​សម្ដែង​​ជា​តួ​រាយរង​ដ​ដែរ ។ តួអង្គ​ដែល​ធ្វើ​ឲ្យ​​ទស្សនិកជន​ស្គាល់​គាត់​ច្បាស់​បំផុត​នោះ គឺ​ការ​សម្ដែង​ជា​ តា​ជូជក ក្នុង​រឿង​ព្រះ​វេស្សន្ដរ នៅ​ឆ្នាំ 1993 ។
នៅ​ថ្ងៃ9 ខែមករា 2013 គាត់​បាន​ទទួល​ងារ​ជា​ នាដ​កោសល្យ​វដ្តី យោង​តាម ព្រះរាជ​ក្រឹត្យ ស្ដី​ពី​ប្រព័ន្ធ​មត៌ក​មនុស្ស​រស់ នៃ​ព្រះ​រាជាណាចក្រ​កម្ពុជា ដើម្បី​ឆ្លើយ​តប​នឹង ការ​លះបង់​ និង​ការ​ពុះ​ពារ​ឥត​ខ្លាច​នឿយ​ហត់ ក្នុង​ការ​​ធ្វើ​ពលិកម្ម​ជា​ច្រើន​បម្រើ​ឲ្យ​វិស័យ​សិល្បៈ​ខ្មែរ និង​ដោយ​ផ្អែក​លើ​តម្លៃ​គុណ​សម្បត្តិ ដូច​ជា ចំណេះ​ដឹង ជំនាញ ទេពកោសល្យ និង​បច្ចេកទេស ស្នាដៃ​ឯក​ ផ្នែក​បេតិកភណ្ឌ​វប្បធម៌​អរូបី ។ ជាមួយគ្នានេះដែរគាត់​ទទួល​បាន​ មេដាយ​មាស​ការងារ​ ពី​ក្រសួង​វប្បធម៌ និង​វិចិត្រ​សិល្បៈ​ផង​ដែរ៕

នាយកដ្ឋាន​ព័ត៌មានវិទ្យា៖ កាលពី​ប៉ុន្មាន​ម៉ោង​មុននេះ មានការ​ចែករំលែក​សារ​បន្ត​គ្នា​ក្នុង​កម្មវិធី Telegram អំពី​ការទទួលបាន​ប្រាក់​ចន្លោះ​ពី ១០០ ទៅ ១៥០ ដុល្លារ​អាមេរិក ដោយ​គ្រាន់តែ​ចុច​តំណ​ភ្ជាប់ និង​ធ្វើតាម​ការណែនាំផ្សេង។ សារ​នោះ​មាន​ខ្លឹមសារ​ថា “Hi. I am earning from $100 to $150 on “myxfreelance.cc” You need log in via Telegram and do what written in site”។

បន្ទាប់ពី​ការស្រាវជ្រាវ​របស់​ក្រុមការងារ​បច្ចេកទេស​នៃ​នាយកដ្ឋាន​ព័ត៌មានវិទ្យា បាន​រកឃើញថា សារ​ដែល​បាន​ចែករំលែក​នោះ​គឺជា​ល្បិចបញ្ឆោត​របស់​ឧក្រិដ្ឋជន​បច្ចេកវិទ្យា ក្នុង​គោលបំណង​ដូចខាងក្រោម៖

– អូសទាញ​ជនរងគ្រោះ​ចុច​លើ​តំណ​ភ្ជាប់ និង​ធ្វើការ Login ចូលក្នុង​កម្មវិធី Telegram ដោយ​ប្រើប្រាស់​គណនី Telegram ផ្ទាល់​របស់​ជនរងគ្រោះ

– ប្រើប្រាស់ Session នៃ​កម្មវិធី Telegram របស់​ជនរងគ្រោះ​ដើម្បី​ធ្វើការ​ចែករំលែក​សារ​ឆបោក​បន្ត ទៅកាន់​មិត្ត​ភ័​ក្រ និង​ជាពិសេស​ទៅកាន់ Group ទាំងអស់​ដែល​ជនរងគ្រោះ​នៅក្នុង​នោះ

– ណែនាំ​ជនរងគ្រោះ​ធ្វើ​ការទាញយក​កម្មវិធី​កុំព្យូទ័រ ដើម្បី​ទទួលបាន​ប្រាក់រង្វាន់​ចំនួន ១៥ ដុល្លារ​អាមេរិក​បន្ថែម ដែល​កម្មវិធី​នោះ​មាន​ឈ្មោះថា “apc_apcsite-apcsite.exe” ដែលជា​ប្រភេទ​មេរោគ TrojanHorse។ បន្ទាប់ពី​ចុច​លើ File មេរោគ​នេះ ជនអនាមិក​នឹងធ្វើ​ការ​គ្រប់​គ្រង់​ម៉ាស៊ីន​កុំព្យូទ័រ​របស់​ជនរងគ្រោះ​ពី​ចម្ងាយ​តែម្តង

– ឧក្រិដ្ឋជន​ក៏បាន​បញ្ឆោត​ជនរងគ្រោះ បញ្ចូល​លេខ​គណនី Credit/Debit Card ដើម្បី​ភ្ជាប់​គណនី​ទទួល​ប្រាក់រង្វាន់ តាមពិត​គឺជា Phishing លួច​ព័ត៌មាន Credit / Debit Card របស់​ជនរងគ្រោះ​ប៉ុណ្ណោះ។

ដើម្បី​ការពារ​ខ្លួន​ពី​ល្បិចបញ្ឆោត​ខាងលើ សូម​បងប្អូន​ប្រជាពលរដ្ឋ​មេត្តា​កុំ​ចុច​តំណ​ភ្ជាប់​ដែល​ទទួលបាន ជៀសវាង​ការទាញយក File មេរោគ និង​មេត្តា​កុំ​បញ្ចូល​ព័ត៌មាន Credit / Debit Card របស់ខ្លួន។

ក្នុងករណី​អ្នក​បាន Login ចូល​កម្មវិធី Telegram តាម​តំណ​ភ្ជាប់​របស់​ឧក្រិដ្ឋជន សូម​អនុវត្ត​វិធានការ​មួយចំនួន​ដូចខាងក្រោម៖

– ចូល​កម្មវិធី Telegram -> Settings -> Privacy and Security -> លុប Sessions ដែល​សង្ស័យ

– ធ្វើការ​កំណត់ 2FA ដោយ​ចូល Settings -> Privacy and Security -> Two-Step Verification -> Turn On -> វាយ​បញ្ចូល​លេខ​សម្ងាត់​របស់​អ្នក ដើម្បី​ការពារ​គណនី Telegram៕

ប្រភព៖ នាយកដ្ឋានព័ត៌មានវិទ្យា ក្រសួងមហាផ្ទៃ

បណ្ដាញ​សង្គម​Twitter ថ្មីៗនេះ​បានឱ្យដឹងថា ការដែល Hacker អាច​លុកលុយ​គណនីល្បីៗជាច្រើន​បែបនេះ​បាន គឺ​ដោយសារតែ​បុគ្គលិក​របស់ខ្លួន បាន​ធ្វេសប្រហែស ធ្វើ​លេច​ធ្លាយ Tool សម្រាប់​ប្រើប្រាស់​ផ្ទៃក្នុង។ នេះ​បើ​យោងតាម​ការបញ្ជា​ក់រប​ស់​ក្រុមហ៊ុន Twitter។

ក្នុង​សប្ដាហ៍​នេះ គេ​សង្កេតឃើញថា គណនី​លោក Elon Musk និង​លោក Bill Gates ត្រូវ​រងគ្រោះ​មុនគេ បន្ទាប់មក​គឺ Apple ក៏​ស្ថិតក្នុង​ចំណោម​គណនី Twitter ល្បីៗ ដែល​ត្រូវ​ជនអនាមិក​ចូលលុកលុយ​បានដែរ។

សម្រាប់​រឿង Hack ចូល Apple ជា​ដំណឹង​ភ្ញាក់ផ្អើល​ជាងគេ ដោយសារតែ​ជា​សារ​បោក​យកប្រាក់​អំពី Bitcoin ដោយ​សរសេរថា “សុំឱ្យ​ផ្ញើ Bitcoin ទៅកាន់​អាសយដ្ឋាន​មួយ​ដែល​ដាក់​ក្នុង​សាររ​បង្ហោះ” តែ​សារ​បោកប្រាស់​នេះ ត្រូវបាន​គេ​លុបចេញភ្លាមៗ ពី​គណនី ក្រោយពេល​បង្ហោះ​រួច។

គួរ​រំឭក​ដែរ​ថា Apple បាន​បង្កើត​គណនី Twitter ជា​ផ្លូវការ​ក្នុង​ឆ្នាំ2016 ដែល​ក្រុមហ៊ុន​អាច​ប្រើប្រាស់​វា​សម្រាប់​ផ្សព្វផ្សាយ​ផលិតផល​របស់ខ្លួន។ ប៉ុន្តែ​តាំងពី​ពេល​បង្កើត រហូតមកដល់​បច្ចុប្បន្ន​នេះ Apple មិនដែល​ធ្វើការ​បង្ហោះ​អ្វី សូម្បី​តែម្ដង នៅលើ​គណនី​នេះឡើយ៕

អ្នកចម្រៀងនិងសម្ដែងថ្គាមខ្លាខ្ពស់ស្រឡះស្រស់សង្ហា នូ ឧសភា ក្រោយពីចូលរួមក្នុងកម្មវិធី My Reaction My TV ដែលតម្រូវឱ្យលោកបង្ហាញអារម្មណ៍ពិតក្រោយពេលមើលវីដេអូចម្រៀងរបស់ក្រុម EXO ជាក្រុមចម្រៀង K-pop ដ៏ល្បីរួចមក ស្រាប់តែធ្វើឱ្យអ្នកគាំទ្រក្រុមនេះមានការខឹងសម្បារលោកយ៉ាងខ្លាំងព្រោះតែលោកបាននិយាយលេងសើចថាសមាជិកម្នាក់ក្នុងក្រុមនេះពេលដោះមួកចេញមើលទៅដូច សុខា ។ ក្រោយនិយាយលេងសើចបែបនេះរួចមកបណ្ដាអ្នកគាំទ្រក្រុមនេះមួយចំនួនបានទាមទារឱ្យម្ចាស់បទ “ព្រងើយ” រូបនេះសុំទោសដល់ក្រុម EXO ជាសាធារណៈ ប៉ុន្តែលោកមិនបានបង្ហាញឥរិយាបថណាមួយព្រមសុំទោសតាមការទាមទារនោះឡើយ។

ដោយឡែក មួយរយៈពេលមុននេះ តារាចម្រៀងវ័យក្មេងគឺលោក ថេណា ក៏ត្រូវបានអ្នកគាំទ្រក្រុម BTS រិះគន់ចំៗនិងចោទថាលោកលួចចម្លងរូបគំនូរក្នុងបទចម្រៀង “Forever Rain” របស់ក្រុម BTS តារាល្បីកូរ៉េ ផងដែរ។ ក្រោយរងការរិះគន់ លោក ថេណា ក៏បានបកស្រាយភ្លាមៗថា៖ “រូប​នឹង​ខ្ញុំ​យក​ពី​ Pinterest មក​ទេ​អត់​មាន​ដឹង​ថា​ជា​របស់​បទ​ BTS នោះ​ទេ​ ឃើញ​វា​ស្អាត​មើល​ទៅ​កំសត់​ក៏​យក​មក​ដាក់​ទៅ​ហើយ​រូប​អត់​ច្បាស់​ក៏​ពួក​ម៉ាក​ខ្ញុំ​វា​គូរតាម​ឡើង​វិញ​ម្តង​ទៀត​ មូលហេតុ​ដែល​ខ្ញុំ​ប្រើ​រូប​តាម​ internet ក៏​ដោយ​សារ​គិត​ថា​វា​ជា​បទ​ដែល​ខ្ញុំ​មិន​សូវ​ជា​យក​ចិត្ត​ទុក​ដាក់​ជា​មួយ​ខ្ញុំ​គ្រាន់​តែ​ធ្វើ​លេង​តែ​ប៉ុណ្ណោះ ហើយ​ខ្ញុំ​ថា​ខ្លួន​ឯង​មិន​មែន​ជា​តារា​ស្តង់ដាអី​ដូច​គេ​ទេ​ គ្រាន់​តែ​ច្រៀង​បង្ហោះ​តាម​ internet លេង​គិត​ថា​វា​មិន​ប៉ះពាល់​អី​ទេ​គ្រាន់​តែ​រូបភាព​គេ​ដាក់​ឱ្យប្រើ​ប្រាស់​ free តែ​បើ​ចឹង​ហើយ​ចាំ​លុប​ក៏​បា​ន​ ហើយ​អ្នក​ផ្សេង​ក៏​យក​រូប​ពី​ internet ដូច​តែ​គ្នា​នឹង​គ្រាន់តែ​មិន​ចំ​របស់​ BTS យាយ​ត្រង់បើ​ដឹង​របស់​ BTS អត់​យក​ទេ​ស្អែក​ post ថ្មី​ចាំ​លុប​ចោល​ក៏បាន​”។

មិនត្រឹមតែមិនធ្វើឱ្យ អ្នកគាំទ្រក្រុម BTS ស្ងប់អារម្មណ៍ទេ ប៉ុន្តែឃ្លាដែលតារាចម្រៀងរូបនេះនិយាយថា “…BTS យាយ​ត្រង់​បេី​ដឹង​របស់​ BTS អត់​យក​ទេ​ស្អែក​ post ថ្មី​ចាំ​លុប​ចោល​ក៏បាន…” គឺកាន់តែធ្វើឱ្យមានការមិនពេញចិត្តទ្វេឡើង ព្រោះគេយល់ឃើញថាជាពាក្យដែលបង្កប់ការរើសអើងមិនឱ្យតម្លៃដល់ក្រុមតារា K-pop នេះកាន់តែខ្លាំង។ ទោះបីជាយ៉ាងណា ថេណា មិនបានសុំទោសជាសារណៈតាមការស្នើសុំនោះឡើយ៕

បើអ្នកមិនប្រាកដក្នុងចិត្តថា មនុស្សដែលកំពុងសេពគប់គ្នានោះ គឺជាមនុស្សដែល “មែន” ឬ “មិនមែន” សម្រាប់រូបអ្នកនោះវាមិនមែនជារឿងចម្លែកទេ ព្រោះដំបូងៗថ្មីៗ អ្វីៗក៏មើលទៅល្អគ្រប់យ៉ាង តែលុះពេលវេលាកន្លងទៅ អារម្មណ៍ដែលថា​ដូចជាមិនមែនជាមនុស្សដែលអ្នកត្រូវការនោះ ក៏លេចភ្លែតឡើងនៅក្នុងខួរក្បាល។

– មិនអាចទទួលយកអតីតកាលដែលកន្លងមករបស់អ្នកបាន

យើងគ្រប់គ្នាសុទ្ធតែមានអតីតកាលដូចគ្នាទាំងអស់ បើគូសង្សារបស់អ្នកជាមនុស្សម្នាក់ដែលមិនអាចទទួលយករឿងកាលពីអតីតរបស់អ្នកបាន ជាពិសេសក្នុងរឿងស្នេហាកាលពីអតីតដែលបានបញ្ចប់ទៅហើយនោះ ក៏សាកល្បងគិតទៅមើលថា តើគេនៅបារម្ភ និងចង់នៅថែទាំអ្នកតទៅទៀតដែរឬទេ?។

– មានអារម្មណ៍មួម៉ៅដាក់អ្នករហូត

បើគេតែងតែមានអារម្មណ៍មួម៉ៅ ឆេវឆាវដាក់អ្នករហូតដល់ថ្នាក់ហួសហេតុពេក មិនថាតែពេលអ្នកសើចសប្បាយ យំ ត្រេកអរ ឬពិបាកចិត្តនោះ ចូរដឹងទៅចុះថា អ្នកមិនគួរសេពគប់ជាមួយមនុស្សប្រភេទនេះយ៉ាងដាច់ខាត។

– បង្ហាញពីភាពគ្មានសុជីវធម៌

បើគូសង្សារបស់អ្នកជ្រើសរើសក្នុងការបង្ហាញពីទង្វើគ្មានសុជីវធម៌ដាក់អ្នក និងគ្មានសញ្ញាណាមួយដែលថា គេ(នាង)នឹងបញ្ឈប់ ឬផ្អាក ឬគ្រប់គ្រងវាបានមិនថាតែក្នុងទីសាធារណៈ ឬក្នុងកន្លែងដែលគ្មានអ្នកណាឃើញនោះ អ្នកគួរតែនាំខ្លួនឯងចេញឱ្យឆ្ងាយពីគេ(នាង)ជាបន្ទាន់។

– ភូតកុហកអ្នកជាប់ជានិច្ច

តើអ្នកដែលសង្កេតមើលដែរទេថា ពេលដែលអ្នកសួរគេនូវសំនួរដែលថា តើគេធ្វើអី? នៅឯណា? នៅជាមួយអ្នកណា? នោះ តើប្រតិកម្មដំបូងដែលគេ(នាង)មានចំពោះអ្នកយ៉ាងណាដែរ? តើគេច្រើនតែប្រើពេល 2 – 3 នាទីក្នុងការរកនឹកចម្លើយដែរឬទេ?

បើេវាជារឿងតូចតាច ក៏ល្មមអាចទទួលយកបាន តែទីបំផុតទៅមនុស្សយើងក៏ត្រូវតែជ្រើសរើសយកការនៅជាមួយការពិតច្រើនជាងរស់នៅជាមួយភាពកុហកបោកប្រាស់។

មុនអ្វីទាំងអស់ អ្នកត្រូវតែទទួលយកឱ្យបានជាមុនសិនថា នៅលើពិភពលោកនេះ គ្មាននរណាឥតខ្ចោះនោះទេ តែបើអ្នកមានអារម្មណ៍ថា គេ(នាង)គ្មានភាពសហការចំពោះសម្ព័ន្ធភាពលើកនេះជាមួយអ្នកទេនោះ វាក៏មិនមែនជារឿងអ្វីដែលអ្នកត្រូវមកខាតពេលវាលានៅជាមួយមនុស្សដែល “មិនមែន” សម្រាប់អ្នកតទៅទៀតដែរ៕