Category: សង្គម និងសេដ្ឋកិច្ច

ក្រុមហ៊ុន Ant Group របស់មហាសេដ្ឋី Jack Ma នឹងធ្វើ IPO ទាំងនៅហុងកុងនិងសៀងហៃ
ក្រុមហ៊ុន Ant Group ដែលជាអ្នកគ្រប់ពីលើក្រុមហ៊ុន Alipay កំពុងតែស្វែងរកកម្រិតនៃការកំណត់តម្លៃឡើងដល់2សែនលានដុល្លារអាមេរិក ជាមួយនឹងគម្រោង IPO ព្រមៗគ្នានៅទីក្រុងហុងកុង និងនៅទីក្រុងសៀងហៃ។
Alibaba ដែលជាក្រុមហ៊ុនមេរបស់ក្រុមហ៊ុន Ant Group កំពុងអនុវត្តផែនការនាំយកក្រុមហ៊ុនទូទាត់ចល័តធំបំផុតនៅប្រទេសចិន ចូលទៅក្នុងផ្សារមូលបត្រហុងកុង និងសៀងហៃ ដែលនេះត្រូវបានគេរំពឹងថានឹងក្លាយជាព្រឹត្តិការណ៍ IPO (ការបោះផ្សាយលក់មូលបត្រដំបូង/Initial public offering or stock market launch) ធំបំផុតប្រចាំឆ្នាំ2020។ ក្រុមហ៊ុន Ant Group អាចមានតម្លៃទុនខ្ពស់ជាងច្រើនបើធៀបនឹងក្រុមហ៊ុននៅ Wall Street។ ប្រភពអនាមិករបស់សារព័ត៌មាន Bloomberg បានឱ្យដឹងថា បើសិនជាមានលក្ខណអំណោយផល Ant Group អាចប្រមូលទុនបានលើសពីកំណត់ត្រា29ពាន់លានដុល្លាររបស់ក្រុមហ៊ុន Saudi Aramco ទៀតផង។
“មាន់ពងមាស” របស់ Alibaba កំពុងតែរីកចម្រើនយ៉ាងខ្លាំងក្លា។ Simon Hu ដែលជា CEO របស់ក្រុមហ៊ុន Ant Group បានថ្លែងថា លោកចង់ឱ្យគ្រប់គ្នាគិតដល់ Alipay មិនត្រឹមតែជាអ្នកផ្គត់ផ្គង់សេវាកម្មហិរញ្ញវត្ថុ និងសេវាទូទាត់សម្រាប់ពាណិជ្ជកម្មអេឡិចត្រនិចធំបំផុតរបស់ពិភពលោកនោះទេ ប៉ុន្តែ Ant Group បាននិងកំពុងអភិវឌ្ឍខ្លួនដើម្បីក្លាយជាមជ្ឈមណ្ឌលពាណិជ្ជកម្មអនឡាញដែលមានសេវាកម្មគ្រប់បែបសព្វយ៉ាង តាំងពីឥណទាន ទេសចរណ៍ រហូតដល់សេវាដឹកជញ្ជូនអាហារ ដែលជាគូប្រជែងដ៏ “សាហាវ” របស់ក្រុមហ៊ុន Tencent។
ក្រុមហ៊ុន Ant កំពុងតែពង្រីកវិសាលភាពយ៉ាងឆាប់រហ័សនៅពាសពេញទ្វីបអាស៊ី ក្នុងនោះមានការសហការនិងផ្ដល់ជំនាញទាក់ទិននឹងការគ្រប់គ្រងទ្រព្យ និងគ្រប់គ្រងហានិភ័យទៅឱ្យបណ្ដាក្រុមហ៊ុនផ្គត់ផ្គង់សេវាកម្មទូទាត់បែបបច្ចេកវិទ្យានៅប្រទេសជាច្រើន ដូចជាឥណ្ឌា និងប្រទេសថៃជាដើម។
ក៏ប៉ុន្តែ លោក Pamela Chung អ្នកជំនាញផ្នែក IPO មកពីក្រុមហ៊ុន Tricor Group ប្រចាំហុងកុង បានអះអាងថា “បើទោះជាមានប្រភពទុនសម្បូរបែប ប៉ុន្តែគេនៅមិនទាន់ដឹងច្បាស់ថា អ្នកវិនិយោគនឹងវាយតម្លៃយ៉ាងណាចំពោះ Ant Group នៅឡើយ ព្រោះថា នៅក្នុងផ្សារហ៊ុន មានក្រុមហ៊ុនបច្ចេកវិទ្យាច្រើនណាស់”។
ការសម្រេចចិត្តរបស់ក្រុមហ៊ុន Ant គឺជាជោគជ័យថ្មីសម្រាប់សន្ទស្សន៍ STAR ដែលមានជំនាញខាងមូលបត្របច្ចេកវិទ្យារបស់ទីក្រុងសៀងហៃ ដែលដូចទៅនឹងសន្ទស្សន៍ Nasdaq នៅសហរដ្ឋអាមេរិក។
ការសម្រេចខាងលើក៏ជួយឱ្យផ្សារហ៊ុនហុងកុង អូសទាញក្រុមមូលបត្របច្ចេកវិទ្យា ក្រោយពីបានបាត់បង់ឱកាសទទួលយកបណ្ដាក្រុមហ៊ុនបច្ចេកវិទ្យាធំបំផុតរបស់ចិន ដូចជា Alibaba (Alibaba កាន់កាប់ភាគហ៊ុនចំនួន1ភាគ3នៅក្នុងក្រុមហ៊ុន Ant) ជាដើម ដោយបានបណ្ដោយឱ្យធ្លាក់ទៅក្នុងដៃផ្សារហ៊ុន New York។
យោងតាមរបាយការណ៍របស់ Alibaba ក្រុមហ៊ុន Ant ត្រូវបានកំណត់តម្លៃ 150ពាន់លានដុល្លារនៅក្នុងការប្រមូលទុនលើកចុងក្រោយ។ ក្រុមហ៊ុននេះ រកបានប្រាក់ចំណេញ2ពាន់លានដុល្លារក្នុងត្រីមាសទី4នៃឆ្នា2019។ ដូចទៅនឹង Alibaba ក្រុមហ៊ុន Ant បានជួបការលំបាកខ្លាំងក្នុងការពង្រីងសកម្មភាពនៅសហរដ្ឋអាមេរិក ដោយសារតែភាពតានតឹងផ្នែកនយោបាយរវាងចិនជាមួយនឹងសហរដ្ឋអាមេរិក។ កាលពីឆ្នាំ2018 មហាសេដ្ឋី Jack Ma ធ្លាប់បានថ្លែងថា ការសន្យាបង្កើតការងារចំនួន1លាននៅសហរដ្ឋអាមេរិករបស់លោក មិនអាចអនុវត្តបានឡើយ ព្រោះតែសង្គ្រាមពាណិជ្ជកម្មរវាង “មហាយក្សចិន និងមហាយក្សអាមេរិក”។
ជំនួសមកវិញ Ant បានប្ដូរទិសដៅរបស់ខ្លួន ដោយមានមហិច្ឆតាកសាងវត្តមាននៅលើទ្វីបអាស៊ី ជាកន្លែងដែល Ant កំពុងឈរក្នុងលំដាប់លេខរៀងទី10 បន្ទាប់ពីបណ្ដាក្រុមហ៊ុនផ្ដល់សេវាទូទាត់ធំៗនៅទីនេះ ក្នុងនោះមាន Paytm នៅឥណ្ឌា និង GCash នៅហ្វីលីពីន។
នៅក្នុងប្រទេសចិន Ant បានពង្រីកវិសាលភាពរបស់ខ្លួនទៅក្នុងវិស័យសេវាកម្មអ្នកប្រើប្រាស់ និងបច្ចេកវិទ្យា។ ដំណោះស្រាយរបស់ក្រុមហ៊ុន Ant រួមមាន សេវាកម្ម cloud computing បញ្ហាសិប្បនិម្មិត blockchain និងគ្រប់គ្រងហានិភ័យ ដោយមានអតិថិជនសំខាន់ៗដូចជា KFC Holdings និង Marriott International ជាដើម។
លោក Simon Hu កំពុងតែដាក់ការផ្នល់ថា បណ្ដាយុទ្ធសាស្ត្រខាងលើ នឹងជួយឱ្យ Ant រក្សាការគ្រប់គ្រងទៅលើទីផ្សារទូទាត់ចល័តដែលមានតម្លៃ29លានលានដុល្លារអាមេរិករបស់ប្រទេសចិន។ ក្រុមហ៊ុន iResearch បានឱ្យដឹងថា ទីផ្សារទូទាត់ចល័តរបស់ Alipay នឹងកើនឡើងនៅក្នុងត្រីមាសចំនួន3ជាបន្តបន្ទាប់ខាងមុខ ដោយសារវាបានកើនឡើង55,1% ក្នុងត្រីមាសទី4នៃឆ្នាំ2019 ខណៈដែល Tencent កាន់កាប់38.9% នៃចំណែកទីផ្សារនៅប្រទេសចិន។
Ant ក៏បានធ្វើពិធិធកម្មលើសកម្មភាពពាណិជ្ជកម្មរបស់ខ្លួន ទៅក្នុង “តំបន់” ដែលមិនសូវមានការ “រសើបខ្លាំង” បន្ទាប់ពីក្រុមហ៊ុននេះត្រូវបានអាជ្ញាធរតាមដានទាក់ទិននឹងការពង្រីកសេវាកម្មហិរញ្ញវត្ថុជាមួយនឹងផលិតផលក្នុងស្រុក។ ដើម្បីបង្ហាញអំពីការប្ដូផ្លាស់ Ant បានប្ដូរឈ្មោះពី Ant Financial Services Group ទៅជា Ant Group កាលពីខែឧសភាកន្លងទៅ៕
ប្រភព៖ Bloomberg
July 21, 2020
ចម្ការបន្លែគ្រួសារជុំវិញផ្ទះ
លក្ខណៈការដាំដុះបន្លែជិតកន្លែងស្នាក់អាស្រ័យ ឬក្នុងទីប្រជុំជន ដោយប្រើប្រាស់ផ្ទៃដីដែលដាំដុះត្រឹមតែបន្តិចបន្តួច ដើម្បីទុកធ្វើជាប្រភពអាហារ ឬដែលហៅថា “ចម្ការបន្លែគ្រួសារ” នេះ មិនត្រឹមតែជាការធ្វើកសិកម្មដែលមានភាពចំណាស់យូររាប់រយឆ្នាំមកហើយនោះទេ តែក្នុងសភាវសេដ្ឋកិច្ចក្នុងសង្គមបច្ចុប្បន្ន ដែលការចាយវាយក្នុងការចិញ្ចឹមជីវិតរបស់ប្រជាជនកំពុងកើនខ្ពស់ឡើងជាបន្តបន្ទាប់នោះ ប្រជាជនជួបប្រទះបញ្ហាប្រាក់ចំណូលមិនគ្រប់គ្រាន់ ជាមួយនឹងប្រាក់ចំណាយនោះ ទើប “ការដាំបន្លែគ្រួសារជុំវិញផ្ទះ” ក្លាយជាប្រព័ន្ធការធ្វើកសិកម្មមួយដែលគាំទ្រឱ្យមនុស្សគ្រប់រូបមានភាពស្ថិតស្ថេរខាងអាហារខ្លាំងឡើង ព្រោះការដាំបន្លែគ្រួសារនៅក្នុងផ្ទៃដីតូចមួយ មិនថាតែដើម្បីទុកបរិភោគក្នុងក្រុមគ្រួសារ ចែករំលែកទៅឱ្យអ្នកជិតខាង ឬដើម្បីលក់ជាប្រាក់ចំណូលបន្ថែមដល់គ្រួសារនោះទេ វាសុទ្ធតែសាងនូវផលប្រយោជន៍ដល់អ្នកបរិភោគទាំងអស់ ព្រោះទាំងអ្នកដាំ និងអ្នកទទួលទាននឹងបានបរិភោគបន្លែដែលមានសុវត្ថិភាពពីសារធាតុពុល និងថែមទាំងជាការធ្វើការងារក្រៅម៉ោង ឱ្យសមាជិកគ្រប់គ្នាក្នុងក្រុមគ្រួសារបានប្រើប្រាស់ពេលវេលាទំនេររួមគ្នាយ៉ាងមានប្រយោជន៍ទៀតផង។
ប្រយោជន៍នៃការដាំបន្លែគ្រួសារ
– សមាជិកក្នុងគ្រួសារបានទទួលទានបន្លែ ដែលមានគុណតម្លៃខាងអាហារគ្រប់ចំនួន និងមានសុវត្ថិភាពពីសារធាតុពុល។
– ប្រើប្រាស់ធ្វើជារុក្ខជាតិឱសថបុរាណ សម្រាប់ព្យាបាលរោគ ដូចជា ខ្ទឹមក្រហម ខ្ទឹមស ខ្ញី ជីអង្កាម ជាដើម។
– ជួយកាត់បន្ថយប្រាក់ចំណាយ និងអាចលក់ដើម្បីសាងប្រាក់ចំណូលបន្ថែមដល់គ្រួសារបាន។
– ប្រើប្រាស់សម្រាប់តុបតែងលម្អបរិវេណជុំវិញផ្ទះ ឬអាចធ្វើជាព្រំកំណត់(របង)របស់ផ្ទះបានទៀតផង ដូចជា ដើមកន្ទុំទេស ដើមស្អំ ស្លឹកបាស់ និងម្រះ ជាដើម។
– ជាការប្រើពេលវេលាទំនេរៗ និងផ្ទៃដីទំនេរខាងក្នុងរបងផ្ទះ ឱ្យកើតប្រយោជន៍ដល់សមាជិកក្នុងគ្រួសារ និងថែមទាំងធ្វើឱ្យកើតមានការធ្វើកិច្ចការងាររួមគ្នា ជាការសាងសម្ព័ន្ធភាព និងភាពកក់ក្តៅឱ្យកើតមានក្នុងក្រុមគ្រួសារទៀតផង។
ចំណុចគួរពិចារណាក្នុងការដាំដុះ
1 . ទីកន្លែង និងទីធ្លាសម្រាប់ដាំដុះ ៖ ការជ្រើសរើសទីកន្លែងដាំដុះបន្លែបង្ការ គួរតែនៅជិតទីកន្លែងស្នាក់អាស្រ័យ មានប្រភពទឹក ទីធ្លាដាំដុះត្រូវមានពន្លឺព្រះអាទិត្យគ្រប់គ្រាន់ ក្នុងករណីដែលគ្មានដីធ្លីសម្រាប់ដាំដុះ លោកអ្នកអាចដាំបន្លែក្នុងភាជនៈផ្សេងៗ ដូចជា ថូ ផើង ពាង ឬធុង(ស្នោ) ជាដើម ដោយដាក់នៅលើកម្រាលឥដ្ឋ ឬព្យួរនៅក្នុងកន្លែងណាដែលមានពន្លឺថ្ងៃចាំងមកដល់ និងមិនគួរស្ថិតនៅឆ្ងាយពីកន្លែងស្នាក់នៅពេកនោះទេ ដើម្បីងាយស្រួលក្នុងការប្រតិបត្តិការងារផ្នែកការដាំដុះ ការរក្សាថែទាំ និងថែមទាំងងាយស្រួលក្នុងការបេះយកមកធ្វើជាម្ហូបអាហារបានភ្លាមៗតាមតម្រូវការទៀតផង។
2 . ការគណនាទីធ្លា កំណត់ទំហំ និងចំនួនរង ៖ ដោយសភាពទីធ្លាស្នាក់អាស្រ័យក្នុងពេលបច្ចុប្បន្ន ជាពិសេសមនុស្សម្នាក្នុងសង្គមទីក្រុង សុទ្ធតែមានដែនកំណត់ក្នុងរឿងធនធាន ទាំងដីធ្លី ទឹក និងពន្លឺថ្ងៃ ជាពិសេសការដាំបន្លែនៅក្នុងតំបន់ទីក្រុង ត្រូវតែស្គាល់ពីការគ្រប់គ្រងចាត់ចែងទីធ្លាឱ្យកើតប្រយោជន៍ខ្ពស់បំផុត ដោយទំហំរងបន្លែដែលស័ក្តិសមក្នុងគ្រួសារគឺ ទទឹងមិនលើស 1ម៉ែត្រ X 4ម៉ែត្រ ឬបណ្តោយតាមទំហំទីធ្លា ព្រមទាំងលើករងខ្ពស់ឡើងយ៉ាងតិច 30 – 50សង្ទីម៉ែត្រ ចំណែកចំនួនរងដែលស័ក្តិសមស្ថិតក្នុងចំនួនប្រមាណជា 3រង គឺមានបន្លែហូបស្លឹក 2រង និងបន្លែហូបផ្លែបានយូរ 1រង។
(នៅមានត)
July 21, 2020
ស្រ្តីមានគភ៌ បើមិនចង់ប្រថុយនឹងការប្រសូតមុនកំណត់ ត្រូវបញ្ឈប់ទង្វើ 6 យ៉ាងខាងក្រោមនេះ!
ការប្រសូតមុនពេលកំណត់ ក្រៅពីបណ្តាលមកពីភាពខុសប្រក្រតីរបស់ការតាំងគភ៌ហើយនោះ អាចជាលទ្ធផលមកពីទង្វើរបស់ស្រ្តីមានគភ៌ខ្លួនឯងផងដែរ ដោយសារតែទង្វើមួយចំនួនអាចហុចផលប៉ះពាល់ដល់ទារកក្នុងគភ៌រហូតធ្វើឱ្យមានភាពប្រថុយប្រថានក្នុងការប្រសូតមុនពេលកំណត់ហ្នឹងឯង ដូច្នេះ បើអ្នកមិនចង់ប្រសូតមុនកំណត់រហូតដល់ធ្វើឱ្យកូនតូចមានសុខភាពមិនល្អឥតខ្ចោះនោះ ចូរបញ្ឈប់ទង្វើ 6 យ៉ាងខាងក្រោមនេះជាបន្ទាន់។
1 . ញ៉ាំទឹកតិចជ្រុលពេក
ព្រោះការញ៉ាំទឹកតិចពេកនឹងធ្វើឱ្យស្រ្តីមានគភ៌មានអាការឈឺពោះប្រសូតមុនពេលកំណត់ និងហុចផលឱ្យស្រ្តីមានគភ៌មានអាការល្វើយអស់កម្លាំង ឆាប់ហត់ ដូច្នេះទើបត្រូវញ៉ាំទឹកឱ្យបានគ្រប់គ្រាន់ក្នុងមួយថ្ងៃៗ ជាពិសេសនៅថ្ងៃណាដែលមានញើសចេញមកច្រើន ស្រ្តីមានគភ៌គួរញ៉ាំទឹកឱ្យបានច្រើនជាងប្រក្រតី ដើម្បីបំពេញជាតិទឹកដែលបាត់បង់ទៅនោះ។
2 . ព្រងើយកន្តើយក្នុងការញ៉ាំវីតាមីនបន្ថែម
ក្នុងខណៈតាំងគភ៌ គ្រូពេទ្យនឹងឱ្យវីតាមីនបន្ថែមមក រួមទាំងថ្នាំបំប៉នលោហិតទៀតផង ដើម្បីថែបំប៉នទារកនៅក្នុងផ្ទៃ និងសុខភាពរបស់ស្រ្តីមានគភ៌ខ្លួនឯងឱ្យរឹងមាំ ហើយវីតាមីនទាំងនោះថែមទាំងជាជំនួយការដែលនឹងជួយឱ្យស្រ្តីមានគភ៌អាចពពោះកូនបានយូររហូតដល់គ្រប់កំណត់ ដូច្នេះទើបមិនគួរព្រងើយកន្តើយ ឬធ្វេសប្រហែសក្នុងការទទួលទានវីតាមីនបន្ថែមតាមវេជ្ជបញ្ជាជាដាច់ខាត៕
3 . បណ្តោយឱ្យទម្ងន់ខ្លួនធ្លាក់ចុះ ឬកើនឡើងជ្រុលពេក
ក្នុងអំឡុងពេលកំពុងតាំងគភ៌ ការមានទម្ងន់ខ្លួនតិច ឬច្រើនជ្រុលពេកសុទ្ធតែហុចផលដល់ភាពប្រថុយប្រថានក្នុងការប្រសូតមុនពេលកំណត់ទាំងអស់ ព្រោះដូច្នេះស្រ្តីមានគភ៌គួរតែគ្រប់គ្រងទម្ងន់ខ្លួនឱ្យស្ថិតក្នុងកម្រិតប្រក្រតី គឺកើនឡើងមុនពេលមានគភ៌ប្រមាណជា 11,5 – 15,8 គីឡូក្រាម ដែលក្រៅពីមិនធ្វើឱ្យប្រសូតមុនពេលកំណត់ហើយនោះ នៅជួយឱ្យទារកមានទម្ងន់ខ្លួនស្ថិតក្នុងកម្រិតប្រក្រតីល្អទៀតផង។
4 . មិនមើលថែទាំសុខភាពមាត់ធ្មេញ
ដឹងឬទេថា សុខភាពមាត់ធ្មេញ ជាពិសេសអញ្ចាញធ្មេញដែលល្អក៏មានផលដល់ការប្រសូតបុត្រតាមកំណត់បានដែរ នោះក៏ព្រោះថា នៅពេលដែលស្រ្តីមានគភ៌មានបញ្ហារលាកសាច់អញ្ចាញធ្មេញ វានឹងទៅជំរុញឱ្យស្បូនបង្រួញខ្លួន និងអាចប្រសូតមុនពេលកំណត់បានហ្នឹងឯង ដូច្នេះទើបត្រូវមើលថែទាំសុខភាពអញ្ចាញធ្មេញឱ្យល្អជាប់ជានិច្ច រួមទាំងសុខភាពមាត់ធ្មេញផងដែរ។
5 . មានអារម្មណ៍តានតឹងធុញថប់
យល់ថា ភាពធុញថប់តានតឹងនេះវាពិបាកចៀសផុតណាស់ តែដោយសារភាពធុញថប់តានតឹងនេះឯង ដែលធ្វើឱ្យស្រ្តីមានគភ៌ភាគច្រើនត្រូវប្រសូតមុនពេលកំណត់ ដូច្នេះក្នុងអំឡុងពេលមានគភ៌ ស្រ្តីទាំងឡាយគួរតែកម្ចាត់អារម្មណ៍ធុញថប់តានតឹងចេញឱ្យអស់ ដោយសាកល្បងស្វែងរកកិច្ចការងារណាសប្បាយៗ បន្ធូរអារម្មណ៍មកធ្វើឱ្យបានញឹកញាប់ នោះភាពធុញថប់តានតឹងនឹងមិនកើតមានឡើយ។
6 . ទ្រាំទប់មិននោមញឹកញាប់ពេក
គឺជារឿងមួយដែលគេដឹងច្បាស់ទៅហើយថា ក្នុងអំឡុងពេលមានគភ៌ ស្រ្តីមានគភ៌នឹងឈឺបត់ជើងតូចញឹកញាប់ណាស់ ហើយដោយសារតែត្រូវធ្វើការងារ ទើបស្រ្តីមានគភ៌ច្រើនតែទប់ទ្រាំមិនទៅបញ្ចេញចោលជាញឹកញាប់ ព្រោះតែពិបាកក្នុងការទៅចូលបន្ទប់ទឹក តែដឹងទេថា ការទប់ទ្រាំមិនបត់ជើងតូចនេះឯង ជាមូលហេតុមួយរបស់ការប្រសូតមុនកំណត់ ព្រោះវានឹងធ្វើតួស្បូនច្របាច់ខ្លួនញឹកញាប់ឡើង និងថែមទាំងប្រថុយប្រថាននឹងសភាវរលាកប្លោកនោមទៀតផង ដូច្នេះ បើមិនចាំបាច់ទេ កុំខំទ្រាំទប់មិនទៅបញ្ចេញចោលជាដាច់ខាត។
មិនចង់ប្រថុយប្រថានក្នុងការប្រសូតមុនពេលកំណត់ដែលវានឹងធ្វើឱ្យកូនសម្លាញ់មានភាពមិនប្រក្រតីនោះ គួរតែបញ្ឈប់ទង្វើ 6 យ៉ាងខាងលើនោះជាបន្ទាន់ នោះធានាថា កូនតូចជាទីស្រឡាញ់របស់អ្នកនឹងប្រសូតចេញមកយ៉ាងល្អប្រក្រតីឥតខ្ចោះមិនខាន៕
July 21, 2020
5 វិធី កែបញ្ហាកូនខាំក្រចកដៃ គួរតែបញ្ឈប់ទង្វើនេះមុនក្លាយជាទម្លាប់
គឺជាបញ្ហាមួយទៀតដែល ឡារ៉ែនជឿថាលោកឪពុកអ្នកម្តាយជាច្រើននាក់ត្រូវតែធ្លាប់ជួបមិនខាន គឺបញ្ហាដែលកូនជាទីស្រឡាញ់ចូលចិត្តតែខាំក្រចកខ្លួនឯងជាញឹកញាប់ហ្នឹងឯង ដែលទង្វើនេះអាចនឹងធ្វើឱ្យកូនបាត់បង់សុជីវធម៌ រួមទាំងអាចនឹងធ្វើឱ្យកើតបញ្ហាពាក់ព័ន្ធនឹងធ្មេញ និងប្រថុយប្រថានជាមួយមេរោគបាក់តេរីផ្សេងៗដែលនឹងធ្វើឱ្យឈឺថ្កាត់បានទៀតផង បើដូច្នេះយើងសាកល្បងមកកែបញ្ហានេះទាំងអស់គ្នាមុននឹងកូនធ្វើវាឱ្យក្លាយជាទម្លាប់អាក្រក់ដោយ 5 វិធីដែល ឡារ៉ែននាំយកមកជម្រាបជូនក្នុងថ្ងៃនេះដូចតទៅ។
1 . កុំធ្វើឱ្យកូនមានកង្វល់ក្នុងចិត្ត
លោកឪពុកអ្នកម្តាយគួរតែយល់ជាមុនសិនថា ការដែលកូនចូលចិត្តខាំក្រចកដៃនេះដោយសារតែគេកំពុងមានអារម្មណ៍តានតឹង មានសម្ពាធ ឬអាចនឹងអផ្សុកគ្មានអ្វីធ្វើ ទើបបន្ធូអារម្មណ៍ដោយការខាំក្រចកលេងហ្នឹងឯង ដូច្នេះបើលោកឪពុកអ្នកម្តាយណាចូលចិត្តស្តីបន្ទោសកូន ឬចូលចិត្តឈ្លោះទាស់ទែងគ្នាស្រែកឡូឡាជាប្រចាំនោះ សូមប្រាប់ទៅចុះថា ទង្វើរបស់លោកអ្នកហ្នឹងឯងគឺជាប្រភពកំណើតរបស់ការដែលកូនចូលចិត្តខាំក្រចកហ្នឹងឯង តទៅមុខទៀត ពេលមានការអ្វី ក៏និយាយស្តីជាមួយកូនស្រួលៗល្អៗ អធិប្បាយឱ្យកូនស្តាប់យ៉ាងចិត្តត្រជាក់ ឬបើលោកឪពុកអ្នកម្តាយចាប់ផ្តើមមានការប្រកែកគ្នានោះ ក៏សុំឱ្យចិត្តត្រជាក់វិញ ឬទៅជជែកគ្នានៅកន្លែងផ្សេងឱ្យឆ្ងាយពីភ្នែកកូនទៅប្រសើជាង។
2 . អធិប្បាយឱ្យកូនយល់
មុននឹងហាមឱ្យកូនសម្លាញ់ឈប់ខាំក្រចកដៃ លោកឪពុកអ្នកម្តាយគួរអធិប្បាយឱ្យគេយល់អំពីចំណុចអាក្រក់ជាមុន បើកូនយល់ហើយថា ការខាំក្រចកដៃលេងនឹងធ្វើឱ្យកូនឈឺថ្កាត់រហូតខានបានទៅជួបពួកម៉ាកនៅឯសាលារៀន ឬនឹងធ្វើឱ្យអ្នកឯទៀតគេចំអកឡកលើយកូនបាន នោះនឹងធ្វើឱ្យគេយល់ថា ហេតុអីទើបគួរបញ្ឈប់ទង្វើហ្នឹង។
3 . កាត់ក្រចកដៃឱ្យខ្លីជាប់ជានិច្ច
ជាវិធីងាយៗដែលលោកឪពុកអ្នកម្តាយគួរតែធ្វើស្រាប់ទៅហើយ ព្រោះការដែលបណ្តោយឱ្យកូនទុកក្រចកវែងៗនោះ វាមានតែចំណុចអាក្រក់ទាំងអស់ ទាំងធ្វើឱ្យមានមេរោគជាប់ច្រើន ទាំងអាចនឹងគ្រវាសដៃមកត្រូវមុខខ្លួនឯងទៀតផង តែអ្វីដែលច្បាស់លាស់ពិតប្រាកដនោះគឺ ការកាត់ក្រចកដៃឱ្យខ្លីៗជានិច្ចនោះ នៅជួយបញ្ឈប់ទង្វើចូលចិត្តខាំក្រចកដៃលេងបានផងដែរ។
4 . ការកិច្ចការងារឱ្យគេធ្វើ
ជំនួសការដែលឱ្យគេនៅស្ងៀមៗ ទំនេរៗ គ្មានអ្វីធ្វើរហូតរកដំណោះស្រាយដោយការខាំក្រចកដៃលេងនោះ លោកឪពុកអ្នកម្តាយគួរតែសាកល្បងរកកិច្ចការងារសប្បាយៗ ការងារច្នៃបង្កើតណាមួយឱ្យគេធ្វើលមើល មិនថាតែការបបួលទៅជិះកង់ ដើរលេង ទាត់បាល់ ឬអាចជាកិច្ចការងារក្នុងផ្ទះ ដូចជា ការគូររូបផាត់ពណ៌ ឬការលេងតរូបភាពក៏បានដែរ និយាយងាយៗគឺ កុំឱ្យកូនបានទំនេរដៃ នាំគេធ្វើជារឿយៗ ធានាថា ការងារអស់ទាំងនោះ នឹងជួយបំបាត់ទង្វើនេះបានយ៉ាងពិតប្រាកដ។
5 . កោតសរសើរនៅពេលកូនលែងសូវខាំក្រចកដៃលេងហើយនោះ
នៅពេលដែលសាកល្បងប្រើវិធីឱ្យកូនឈប់ខាំក្រចកដៃលេងហើយ លទ្ធផលបង្ហាញថា កូនលែងសូវធ្វើទង្វើនោះដូចពីមុនទៀតហើយនោះ ក៏សាកល្បងពោលពាក្យសរសើរគេបន្តិចទៅ ឬអាចនឹងរករង្វាន់ ឬក៏នាំទៅញ៉ាំអ្ីឆ្ងាញ់ៗ រួចប្រាប់គេថា អ្វីដែលប៉ា និងម៉ាក់ឱ្យកូននៅថ្ងៃនេះ គឺជារង្វាន់ដែលកូនឈប់ខាំក្រចកដៃហ្នឹងឯង។
ដឹងហើយមែនទេថា បញ្ហាដែលកូនចូលចិត្តខាំក្រចកដៃនេះ មិនមែនកើតចេញពីខ្លួនក្មេងតែម្យ៉ាងនោះទេ តែគួរចាប់ផ្តើមកែខៃលើខ្លួនលោកឪពុកអ្នកម្តាយខ្លួនឯងផង ហើយការចង់បញ្ឈប់ទង្វើនេះ លោកឪពុកអ្នកម្តាយគួរតែចិត្តត្រជាក់ៗ និងសង្កេតមើលទង្វើរបស់កូនជាប្រចាំ ធានាថា វាមិនពិបាកជ្រុលពេកនោះទេ៕
July 20, 2020
គ្រឹះស្ថានបោះពុម្ព និងចែកផ្សាយនៃក្រសួងអប់រំ ប្រកាសទិញស្នាដៃវិភាគអត្ថបទ និងអក្សរសិល្បិ៍ខ្មែរ
គ្រឹះស្ថានបោះពុម្ព និងចែកផ្សាយ ដែលជាស្ថាប័នបោះពុម្ពផ្សាយសៀវភៅសិក្សាគោល និងឯកសារជាច្រើនរបស់ក្រសួងអប់រំ យុវជន និងកីឡា បានប្រកាសដល់អ្នកនិពន្ធថាខ្លួនត្រូវការទិញស្នាដៃវិភាគអត្ថបទ និងវិភាគអក្សរសិល្បិ៍ខ្មែរ។
ស្ថាប័នខាងលើបានបញ្ជាក់ថា ស្នាដៃវិភាគអក្សរសិល្បិ៍ដែលគ្រឹះស្ថានបោះពុម្ព និងចែកផ្សាយត្រូវការមានបែងចែកជា2កម្រិតគឺសម្រាប់មធ្យមសិក្សាបឋមភូមិគឺរឿងសូផាត រឿងមាលាដួងចិត្ត រឿងកូលាបប៉ៃលិន និងរឿងផ្កាស្រពោន។ ចំណែកឯសម្រាប់កម្រិតមធ្យមសិក្សាទូតិយភូមិវិញ មានដូចជារឿងព្រះអាទិត្យថ្មីរះលើដីចាស់ រឿងតេជោយ៉ត រឿងថៅកែចិត្តចោរ រឿងរាមកេរ្តិ៍ និងរឿងព្រះវេសន្ត។
អ្នកនិពន្ធ ឬអ្នកស្រាវជ្រាវដែលមានស្នាដៃវិភាគអត្ថបទ និងអក្សរសិល្បិ៍លើស្នាដៃខាងលើអាចទាក់ទងទៅនាយកដ្ឋានអភិវឌ្ឍសៀវភៅ និងសម្ភារសិក្សាតាមរយៈទូរស័ព្ទលេខ 012 867 897៕
July 20, 2020
រហូតមកដល់ពេលនេះប្រជាជនខ្មែរជាង 10លាននាក់ប្រើ Facebook
បច្ចុប្បន្ននេះ បណ្តាញសង្គមបានចូលកាន់តែជ្រៅទៅក្នុងជីវិតរស់នៅរបស់ប្រជាជនលើពិភពលោក ដោយក្នុងនោះនៅកម្ពុជាយើងក៏មានចំនួនមិនតិចដែរដែលប្រើប្រាស់បណ្តាញសង្គម ជាពិសេស Facebook។
តាមការបញ្ជាក់របស់លោក អ៊ឹម វត្ថា អ្នកនាំពាក្យនិយ័តករទូរគមនាគមន៍កម្ពុជា បានឱ្យដឹងថា បច្ចុប្បន្ននេះប្រជាជនខ្មែរប្រមាណ 10,950,000នាក់បានប្រើប្រាស់បណ្តាញសង្គមយក្ស Facebook។ លោកបានបញ្ជាក់ផងដែរថារហូតមកដល់ពេលនេះ ប្រជាជននៅក្នុងប្រទេសយើងបានទិញស៊ីមកាតប្រើប្រាស់ពីប្រតិបត្តិករទាំង6 នៅកម្ពុជាចំនួន 20,481,054ស៊ីម។
អ្នកនាំពាក្យនិយ័តករទូរគមនាគមន៍កម្ពុជា ក៏បានបញ្ជាក់ផងដែរថា រហូតមកដល់ពាក់កណ្តាលឆ្នាំ2020នេះ ប្រជាជនយើងបានជាវសេវាអ៊ីនធើណិតចល័តពីប្រត្តិបត្តិករចំនួន7 នៅកម្ពុជាចំនួន 14,863,435នាក់ ឬស៊ីមកាត និងជួលសេវាអ៊ីនធើណិតអចល័តប្រតិបត្តិករទាំង37 សរុបចំនួន 249,132នាក់៕

July 20, 2020
7 ប្រយោគដែលធ្វើឱ្យស្នេហាស្ថិតស្ថេរគង់វង្សយូរអង្វែង
រឿងប្រើពាក្យសំដីជាមួយគូស្នេហ៍គឺជារឿងសំខាន់ខ្លាំងណាស់ ព្រោះគូស្វាមីភរិយាដែលឈ្លោះគ្នាច្រើនតែកើតចេញពីពាក្យសំដីហ្នឹងឯង តើវានឹងល្អដែរទេ បើសិនជាយើងមានពាក្យសំដីដែលល្អៗពិរោះៗដែលសាងសម្ព័ន្ធភាពឱ្យកាន់តែរឹងមាំឡើងនោះ? ចូរនាំគ្នាហ្វឹកហាត់ឱ្យធ្លាប់មាត់ នោះជីវិតស្នេហ៍របស់អ្នកនឹងគ្មានថ្ងៃមានបញ្ហាដោយសារពាក្យសំដីឡើយ ដូច្នេះសូមសាកល្បងមើលប្រយោគដែលគួរនិយាយជាមួយមនុស្សដែលយើងស្រឡាញ់ ដែល ឡារ៉ែនលើកយកមកណែនាំក្នុងលេខនេះម្តងមើល។
1 . បង(ឬអូន)នៅត្រង់នេះណា៎
ពាក្យសំដីធម្មតាៗដែលអាចបង្ហាញបានថា អ្នកនឹងមិនព្រមលែងដៃពីគេ(ឬនាង)យ៉ាងពិតប្រាកដ មិនថាមានបញ្ហាអ្វីកើតឡើងនោះឡើយ។ បើអ្នកមិនដឹងថានឹងនិយាយអ្វីនៅពេលដែលគេ(ឬនាង)មានបញ្ហានឿយហត់នោះ សុំឱ្យនិយាយពាក្យនេះសិនទៅ ធានាថាអ្នកស្តាប់នឹងមានអារម្មណ៍សប្បាយចិត្តឡើងវិញមិនខាន។
2 . បង(ឬអូន)មានអ្វីល្អៗជាងបង(ឬអូន)ខ្លួនឯងគិតទៅទៀត
ពាក្យសំដីដែលសាងកម្លាំងចិត្តបានយ៉ាងល្អ គឺការជឿជាក់លើមនុស្សដែលយើងស្រឡាញ់បែបនេះឯង ត្រឹមតែប៉ុណ្ណឹងក៏នឹងធ្វើឱ្យផ្ការីកស្គុះស្គាយនៅក្នុងចិត្តអ្នកស្តាប់ និងត្រៀមជាស្រេចក្នុងការក្រោកឡើងធ្វើអ្វីតាមក្តីស្រមៃរបស់ខ្លួនបានបាត់ទៅហើយ។
3 . សុំទោសណា៎
បើអ្នកដឹងខ្លួនថាខុស កុំបណ្តោយឱ្យបញ្ហាវារលាយបាត់ទៅដោយខ្លួនឯងដោយគ្មានអ្នកណានិយាយពាក្យថា សុំទោសឱ្យសោះ ពាក្យខ្លីៗមួយនេះមានមានថាមពលខ្លាំងក្លាខ្លាំងណាស់ អ្នកខ្លះគ្រាន់តែបានឮពាក្យថាសុំទោស ដួងចិត្តរបស់គេក៏ទន់ត្រជាក់ភ្លាមបាត់ទៅហើយ ដូច្នេះចូរនិយាយវាចេញមក វាគ្មានទៅខាតបង់អ្វីទេ។
4 . បង(ឬអូន)បារម្ភណា៎
បើសង្កេតឃើញថា គេ(ឬនាង)មានបញ្ហា មានរឿងពិបាកចិត្ត ឬកំពុងជួបនឹងបញ្ហាអ្វីមួយនោះ ប្រយោគដែលគួរនិយាយជាមួយគូស្នេហ៍ក៏គឺ “បង(ឬអូន)បារម្ភណា៎” តែប៉ុណ្ណឹងនឹងធ្វើឱ្យគូស្នេហ៍របស់អ្នករំភើបចិត្តបានទៅហើយ ដែលសំខាន់នោះវាថែមទាំងជាពាក្យសំដីដែលធ្វើឱ្យអ្នកស្តាប់ចង់ទម្លាយបញ្ហាប្រាប់យើងកាន់តែខ្លាំងឡើងទៀតផង។
5 . មានអ្វីអាចឱ្យបង(ឬអូន)ជួយបានទេ?
កុំបណ្តោយឱ្យបញ្ហារបស់គូស្នេហ៍ ក្លាយជាបញ្ហារបស់គេ(ឬនាង)តែម្នាក់ឯងអី គ្រាន់តែសួរគេយ៉ាងងាយៗថា មានអ្វីអាចឱ្យជួយបានទេ ប៉ុណ្ណឹង ក៏ប្រៀបដូចជាទឹកដ៏ត្រជាក់មកស្រោចស្រប់លើបេះដូងមនុស្សដែលកំពុងតានតឹងក្នុងអារម្មណ៍ឱ្យស្រស់ថ្លាឡើងវិញបានទៅហើយ។
6 . ខឹងតើ…តែមិនចង់បាត់បង់បង(ឬអូន)ទេ
ជាមួយសម្ព័ន្ធភាពស្នេហ៍ យ៉ាងណាៗក៏ត្រូវតែមានថ្ងៃដែលអ្នកឈ្លោះគ្នាដែរ តែបើសិនជាអ្នកប្រាប់ទៅគេ(ឬនាង)ថា អ្នកខឹងតែនៅតែស្រឡាញ់ តែប៉ុណ្ណឹងក៏នឹងធ្វើឱ្យអ្នកបានឮធូរស្រាលក្នុងចិត្ត ឬត្រៀមជាស្រេចក្នុងការចាប់ដៃកែខៃបញ្ហាជាមួយគ្នាបាត់ទៅហើយ។
7 . មនុស្សយើងសុទ្ធតែធ្លាប់ធ្វើខុសទាំងអស់
ដូចគ្នានោះដែរ បើគូស្នេហ៍របស់អ្នកមានអារម្មណ៍តានតឹងធុញថប់ពីកំហុសឆ្គងរឿងការងារ រឿងផ្សេងៗក្នុងជីវិតប្រចាំថ្ងៃនោះ អ្នកត្រូវតែនិយាយឱ្យអារម្មណ៍គេត្រជាក់វិញ និងកែសម្រួលទស្សនៈរបស់គេ(ឬនាង)ថា មនុស្សគ្រប់រូបលើពិភពលោកនេះសុទ្ធតែធ្លាប់ធ្វើខុសទាំងអស់ហ្នឹង ហើយអ្នកត្រៀមជាស្រេចក្នុងការអត់ទោសឱ្យគេ(ឬនាង)ដូចគ្នានឹងគេ(ឬនាង)ក៏គួរតែអត់ទោសឱ្យខ្លួនឯងដែរ៕
July 20, 2020
របស់លេង 11 ប្រភេទដែលស័ក្តិសមសម្រាប់ក្មេងអាយុ 1 ឆ្នាំឡើង
ការទិញរបស់លេងឱ្យកូនគឺជារឿងសំខាន់ ព្រោះរបស់លេង បើជ្រើសរើសទិញឱ្យសមនឹងវ័យរបស់កូន វានឹងជួយបង្កើនវិវឌ្ឍនាការរបស់កូនឱ្យក្លាយជាប្រព័ន្ធ និងថែមទាំងជួយក្នុងរឿងការហ្វឹកហាត់សាច់ដុំម្រាមដៃ ការហ្វឹកហាត់ប្រើភ្នែក និងការប្រើសតិបញ្ញាទៀតផង ដូច្នេះអីលូវយើងនាំគ្នាមកមើលថា តើរបស់លេងបែបណាដែលស័ក្តិសមសម្រាប់កូនតូចវ័យ 1 ឆ្នាំឡើងទៅខ្លះ?។
1 . របស់លេងដែលមានរូបទ្រង់ទ្រាយផ្សេងៗ
របស់លេងដែលមានរូបទ្រង់ទ្រាយផ្សេងៗ(មូល ជ្រុង ត្រីកោណ -ល-) ជារបស់លេងដំបូងគេដែលកូនគួរបានលេង ព្រោះមិនថាវត្ថុអ្វីដែលនៅជុំវិញខ្លួននោះទេ តែងតែមានរូបរាងទ្រង់ទ្រាយផ្សេងៗទាំងអស់។
2 . របស់លេងដែលបិទជាប់តៗគ្នា ពីតូចទៅធំ ពីធំមកតូច
របស់លេងប្រភេទនេះស័ក្តិសមនឹងការប្រើសតិបញ្ញាបំផុត ព្រោះអាចយកមកលេងបានច្រើនយ៉ាង។
3 . ឡានរុញដើរតាម
សូមប្រាប់ទៅចុះថា ក្មេងតូចៗគ្រប់គ្នា ចូលចិត្តក្នុងការចាប់កាន់វត្ថុរបស់របរដែលស្ថិតក្នុងកំពស់ដើមទ្រូងរបស់គេ និងរុញ ដើម្បីដើរទៅខាងមុខ បើក្នុងផ្ទះកៅអីមានកញ្រ្ចែងដាក់ខោអាវរាងខ្ពស់ៗ ឬកៅអីនោះ ធានាថា ក្មេងអាយុ 1 ឆ្នាំឡើងនឹងដើរទៅកាន់ រួចរុញដើរទៅមុខទាំងអស់។
4 . របស់លេងដែលគោះ ឬវាយ ហើយមានឮសំឡេង
ដូចជា ស្គ សៃឡូហ្វូន(រនាតបារាំង) ឆ្នាំង ធុង ចានដែក កូនតូចនឹងចូលចិត្តខ្លាំងណាស់។
5 . របស់លេងក្នុងអាងងូតទឹក
ត្រឹមតែងូតទឹកក៏ធ្វើឱ្យវិវឌ្ឍនាការផ្សេងៗរបស់កូនដំណើរការទៅមុខបានយ៉ាងឆាប់រហ័សដែរ អ្នកម្តាយមិនចាំបាច់ត្រូវងូតទឹកឱ្យកូនលឿនៗ ឱ្យឆាប់រួចនោះទេ គួររបណ្តោយឱ្យកូនបានលេងទឹកក្នុងចានដែកងូតទឹក និងលេងរបស់លេងផ្សេងៗនៅក្នុងទឹក តែអ្នកម្តាយត្រូវនៅមើលកូនជាប់ជានិច្ចផង។
6 . របស់លេងវាយ
របស់លេងមួយនេះសម្រាប់ហ្វឹកហាត់សាច់ដុំដៃបានយ៉ាងល្អ និងនៅបានជួយឱ្យកូនសប្បាយពេលបានឃើញដុំពណ៌ផ្សេងៗត្រូវបានវាយ បិងបាត់ទៅទៀតផង។
7 . ទូរស័ព្ទរបស់លេង
បើលោកឪពុកអ្នកម្តាយទិញឱ្យកូនលេង កូននឹងចូលចិត្តខ្លាំងណាស់ រឹតតែប្រភេទដែលមានសំឡេងជាបទភ្លេងផងនោះ កូនរឹតតែចូលចិត្តទៅទៀត។
8 . ដុំពណ៌ផ្សេងៗ
របស់លេងប្រភេទនេះកូនអាចយកមកដាក់តម្រៀបតគ្នាបានដោយសេរី សាងការនឹកស្រមៃបានល្អ ដោយកូននឹងបានហ្វឹកហាត់សាច់ដុំដៃ និងហាត់រឿងស្គាល់ពណ៌ផងដែរ។
9 . របស់លេងមានកង់អូស
មានលក្ខណៈជាកង់មានខ្សែទុកឱ្យដឹកដើរ ក្មេងក្នុងវ័យហាត់ដើរនឹងចូលចិត្តខ្លាំងណាស់។
10 . កូនបាល់ជ័រលោតផ្លោតៗ
កូននឹងរត់តាមលេងកូនបាល់ពណ៌ស្អាតៗនេះយ៉ាងសប្បាយរីករាយ រឹតតែមានភ្លើងភ្លឹបភ្លែតនៅខាងក្នុងផង កូនរឹតតែចូលចិត្តខ្លាំងជាពិសេសតែម្តង។
11 . សៀវភៅ
សៀវភៅដែលមានរូបភាពធំៗ សង្កេតឃើញបានច្បាស់ៗ ជាវត្ថុចាំបាច់ណាស់សម្រាប់ក្មេងវ័យហាត់និយាយ ហាត់រៀនយល់ដឹង គួរទិញទុកឱ្យកូនបើកមើលឱ្យបានច្រើនក្បាល សង្កត់ធ្ងន់លើរូបភាពដែលមើលទៅឃើញដូចមែនទែនផងនឹងល្អបំផុត៕

July 20, 2020
ក្រុមហ៊ុនជប៉ុនចំនួន30 ចាកចេញពីប្រទេសចិន មកកាន់អាស៊ីអាគ្នេយ៍
ក្រុមហ៊ុនជប៉ុនចំនួន30 នឹងទទួលបានជំនួយពីរដ្ឋាភិបាលប្រទេសនេះ ដើម្បីរើរោងចក្រ ឬចង្វាក់ផលិតកម្មចេញពីប្រទេសចិន ចូលមករកស៊ីនៅក្នុងតំបន់អាស៊ីអាគ្នេយ៍។
អង្គការលើកកម្ពស់ពាណិជ្ជកម្មជប៉ុន Jetro (Japan External Trade Organization) ទើបតែបានប្រកាសបង្ហាញបញ្ជីឈ្មោះក្រុមហ៊ុនចំនួន30នៃប្រទេសនេះ ដែលនឹងទទួលបានជំនួយសម្រាប់ការរើរោងចក្រ ក្រុមហ៊ុន ចេញពីប្រទេសចិន ចូលមករកស៊ីនៅក្នុងបណ្ដាប្រទេសនៃតំបន់អាស៊ីអាគ្នេយ៍ ដែលនេះគឺគោលនយោបាយថ្មីមួយរបស់ជប៉ុន។
មកដល់ពេលនេះ គេមិនបានដឹងច្បាស់ថា តើក្រុមហ៊ុនទាំងនេះដែលកំពុងស្ថិតនៅប្រទេសចិន នឹងរើចង្វាក់ផលិតកម្មរបស់ខ្លួនទាំងស្រុង ឬផ្នែកណាមួយរបស់ពួកគេចេញពីប្រទេសចិននៅឡើយ។
ក្រុមហ៊ុនជប៉ុនដែលនឹងរើចេញពីប្រទេសចិន មានដូចជា វិស័យផលិតសម្ភារៈសុខាភិបាល គ្រឿងបន្លាស់ទូរស័ព្ទ ម៉ាស៊ីនត្រជាក់ និងគ្រឿងអេឡិចត្រនិចផ្សេងៗទៀត។ នៅក្នុងបញ្ជីខាងលើនេះ ក្រុមហ៊ុន Hoya ដែលផលិតគ្រឿងបន្លាស់ផ្នែករឹងកុំព្យូទ័រជាដើម នឹងរើរោងចក្រពីប្រទេសចិនទៅកាន់ប្រទេសឡាវ និងវៀតណាម។
យោងតាមសេចក្ដីប្រកាសរបស់ Jetro ខ្ទង់ប្រាក់ជំនួយរបស់រាជរដ្ឋាភិបាលជប៉ុនសម្រាប់ប៉ះប៉ូវទៅលើការចំណាយនានានៅក្នុងពេលរើ និងដំឡើងរោងចក្រនៅប្រទេសផ្សេងៗ នឹងឡើងដល់ចន្លោះពី100លានយ៉េន (931,445ដុល្លារ) ដល់5ពាន់លានយ៉េន (46,572,250ដុល្លារ)។
ក្រៅពីក្រុមហ៊ុនចំនួន30ដែលនឹងមកកាន់តំបន់អាស៊ីអាគ្នេយ៍ រាជរដ្ឋាភិបាលជប៉ុនក៏ផ្ដល់ជំនួយយ៉ាងតិច57.5ពាន់លានយ៉េន (536លានដុល្លារ) ទៅឱ្យបណ្ដាក្រុមហ៊ុនជប៉ុនចំនួន57ផ្សេងទៀត រួមទាំងក្រុមហ៊ុនឯកជនផលិតម៉ាស់ Iris Ohyama និងក្រុមហ៊ុន Sharp ផងដែរ សម្រាប់ការរើត្រលប់មកកាន់ប្រទេសជប៉ុនវិញ។
ខាងលើនេះគឺជាផ្នែកមួយនៃគោលនយោបាយពិពិធកម្មខ្សែចង្វាក់ផ្គត់ផ្គង់ទូទាំងសកលលោកដែលត្រូវបានជប៉ុនប្រកាសកាលពីខែមេសាកន្លងទៅ។ ប្រទេសជប៉ុនគឺជាខឿនសេដ្ឋកិច្ចទីពីរហើយ (បន្ទាប់ពីកោះតៃវ៉ាន់) ដែលមានគោលនយោបាយលម្អិតដើម្បីជំរុញការធ្វើពិពិធកម្មខ្សែចង្វាក់ផ្គត់ផ្គង់ទូទាំងពិភពលោក ដើម្បីកាត់បន្ថយការពឹងផ្អែកលើសេដ្ឋកិច្ចចិន។
កាលពីឆ្នាំ2019 រដ្ឋាភិបាលកោះតៃវ៉ាន់ក៏បានផ្ដល់ជំនួយទាំងទឹក អគ្គិសនី ដី ទុន និងពន្ធ ដើម្បីអូសទាញក្រុមហ៊ុនតៃវ៉ាន់នានាឱ្យរើចង្វាក់ផលិតកម្ម ត្រលប់ចូលប្រទេសវិញផងដែរ៕
ប្រភព៖ សារព័ត៌មានបរទេស
July 20, 2020
តាំងគភ៌ដំបូងៗ ជាមួយអារម្មណ៍ប្រែប្រួល
បញ្ហាស្រ្តីមានគភ៌ នៅពេលដែលអនាគតអ្នកម្តាយថ្មោងថ្មីចាប់ផ្តើមតាំងគភ៌ដំបូងៗ ច្រើនតែមានអាការឆាប់ខឹងមួម៉ៅ និងមានអារម្មណ៍ប្រែប្រួល តែស្រ្តីមានគភ៌ទាំងឡាយកុំអាលកង្វល់ចិត្តអី ព្រោះអាការទាំងនេះនឹងកើតឡើងក្នុងអំឡុង 3 ខែដំបូងប៉ុណ្ណោះឯង តែត្រូវអាស្រ័យកម្លាំងចិត្តអ្នកដែលនៅក្បែរខ្លួន ជាពិសេសអនាគតលោកឪពុក គឺជាកម្លាំងសំខាន់បំផុត។ ថ្ងៃនេះ ឡារ៉ែនមានគន្លឹះល្អៗក្នុងការត្រៀមទប់ទល់ក្នុងអំឡុងពេលមានគភ៌ដំបូងៗមកជម្រាបអនាគតអ្នកម្តាយ និងលោកឪពុកដូចតទៅ។
នៅពេលដែលដឹងពិតប្រាកដហើយថា មានគភ៌…ក្តីត្រេកអរតែងតែចេញមកលាយឡំជាមួយក្តីកង្វល់ រឹតតែនៅក្នុងសង្គមព័ត៌មានផងនោះ រឹតតែអាន រឹតមានអារម្មណ៍ថាភ័យព្រួយឡើង ដូចជា “តើខ្ញុំនឹងធ្វើបានទេ?” “តើខ្ញុំនឹងធ្វើយ៉ាងណាតទៅទៀត” ជាដើម។
គួបផ្សំជាមួយការប្រែប្រួលរបស់រាងកាយ និងផ្លូវចិត្តរបស់ស្រ្តីមានគភ៌ខ្លួនឯងដែលត្រូវប្រឈមទៀតផង តែមិនចាំបាច់កង្វល់ទេអនាគតអ្នកម្តាយថ្មោងថ្មីទាំងឡាយ គ្រាន់តែតាំងស្មារតី ហើយដកដង្ហើមវែងៗ យល់ដឹងអំពីកម្មវិធីការប្រែប្រួលរបស់រាងកាយ និងផ្លូវចិត្ត និងដឹងពីបញ្ហាច្បាស់ ក៏អាចកែខៃបានដែរ។
តាំងគភ៌ដំបូងៗ ជាមួយអារម្មណ៍ប្រែប្រួល
នៅពេលចាប់ផ្តើមមានផ្ទៃពោះក្នុង 3 ខែដំបូងភាពប្រែប្រួលផ្សេងៗ មិនថាតែអាការនឿយល្វើយ ក្អួតចង្អោរ រមាស់ក្បាលដោះ និងអារម្មណ៍ដែលផ្លាស់ប្តូរខុសពីមុនយ៉ាងស្រឡះ ជួនកាលមានអារម្មណ៍ថា មានសេចក្តីសុខតែមួយភ្លែត ក៏សោកសៅវិញភ្លាមតែម្តង ដោយសារតែមានការកង្វល់ពីការតាំងគភ៌របស់អ្នកម្តាយថ្មោងថ្មី និងបញ្ហាជាច្រើនដែលខ្លួនបារម្ភ ដូចជា មិនដឹងជាប្រសូតបុត្រយ៉ាងណា មើលថែទាំកូនយ៉ាងណា -ល- ក្នុងអំឡុងពេលនេះត្រូវអាស្រ័យកម្លាំងចិត្តពីអ្នកដែលនៅក្បែរខ្លួន ជាពិសេសស្វាមីគឺជាមនុស្សដែលសំខាន់បំផុត។
ប្រើពេលវេលាមិនយូទេនឹងសម្របសម្រួលខ្លួនបានមិនខាន
បន្ទាប់ពីការសម្របសម្រួលខ្លួនពេញមួយរយៈពេល 3 ខែមកហើយ និងឈានចូលខែទី 3 – 6 ស្រ្តីមានគភ៌នឹងចាប់ផ្តើមស៊ាំធ្លាប់ជាមួយតួនាទី “ខ្ញុំគឺជាស្រ្តីមានគភ៌” ហើយ។ ស្រ្តីមានគភ៌ភាគច្រើនចាប់ផ្តើមមានអារម្មណ៍ធូរស្រាលឡើង ចាប់ផ្តើមរៀនយល់ដឹងពីភាពផ្លាស់ប្តូរដែលកើតឡើងបានងាយជាងមុន មានអារម្មណ៍ដឹងពីជីវិតតូចមួយដែលនៅក្នុងគភ៌របស់ខ្លួន ពេលកូនរើបំរះគឺជាវិនាទីដែលអស្ចារ្យបំផុតដែលពិបាកនឹងបរិយាយអំពីអត្ថន័យរបស់ភាពជាម្តាយ និងកូនខ្លាំងណាស់។
ជិតប្រសូត សុំឱបម្តងទៀត
នៅពេលភាពអ៊ីកអ៊ាកមកដល់ រាងកាយរបស់ស្រ្តីមានគភ៌ចាប់ផ្តើមមានសាច់មានឈាម និងមានទម្ងន់ខ្លួនច្រើនឡើង ដើរហើរ ចាប់កាន់អ្វីលែងងាយស្រួល ជួយខ្លួនឯងលែងសូវបានដូចមុន រឹតតែជីតប្រសូត ក៏រឹតតែមានកង្វល់រឿងការប្រសូត ខ្លាចកូនមិនរឹងប៉ឹង និងកង្វល់ជាច្រើនរឿងទៀត។
ការយកចិត្តទុកដាក់ និងកម្លាំងចិត្តគឺជារឿងសំខាន់ មនុស្សនៅជុំវិញខ្លួនគឺជាថ្នាំលើកកម្លាំងដែលធ្វើឱ្យស្រ្តីមានគភ៌អាចសម្របសម្រួលអារម្មណ៍ក្នុងមួយថ្ងៃៗបានយ៉ាងមានសេចក្តីសុខ ជាពិសេសស្វាមីគួរយកចិត្តទុកដាក់ថែទាំភរិយាមានគភ៌ជាពិសេស កុំឱ្យមានការតូចចិត្តជាដាច់ខាត គួរប្រើពាក្យសំដីដែលផ្តល់នូវភាពជឿជាក់ថា នឹងនៅក្បែរគ្នាជាកម្លាំងថាមពលវិជ្ជមានដល់អ្នកម្តាយឱ្យឆ្លងផុតអ្វីៗគ្រប់យ៉ាងទៅបានយ៉ាងសុវត្ថិភាព។
បើសិននៅពេលណាដែលស្រីមានគភ៌មានអារម្មណ៍មិនសប្បាយចិត្ត ឬមានកង្វល់នោះ សាកល្បងប្រើវិធីរៀនបែបងាយៗ ដែលអាចធ្វើបានដោយខ្លួនឯងគ្រប់ពេលវេលា ដូចជាការអង្គុយសម្រាកបន្ធូរអារម្មណ៍ឱ្យសប្បាយៗនៅក្នុងទីកន្លែងដែលខ្លួនចូលចិត្ត ក្នុងបន្ទប់ដែលមានខ្យល់អាកាសចេញចូលល្អ សម្រាកបន្ធូរសាច់ដុំគ្រប់ផ្នែក បិទភ្នែកយឺតៗ ដកដង្ហើមចេញចូលវែងៗយឺតៗ នឹកដល់តែរឿងរ៉ាវល្អៗ ទិដ្ឋភាពដែលស្អាតៗ ម្តងៗប្រមាណជា 5 – 10 នាទី ព្រមជាមួយសំឡេងបទភ្លេងស្រាលៗ នោះស្រ្តីមានគភ៌នឹងបានជួបនឹងសេចក្តីសុខដែលមាននៅក្បែរៗខ្លួនមិនខាន៕
July 20, 2020