Category: សង្គម និងសេដ្ឋកិច្ច

មាសពិភពលោកឡើងថ្លៃខ្ពស់ជាងគេបង្អស់ រាប់ចាប់ពីឆ្នាំ2011
ក្រោយពីបានបង្កើតកំណត់ត្រាខ្ពស់បំផុតក្នុងរយៈពេល9ឆ្នាំកាលពីយប់ថ្ងៃទី21កក្កដាកន្លងទៅ តម្លៃមាសនាព្រឹកនេះ (22កក្កដា) បន្តកើនជាង20ដុល្លារ ពោលគឺកើនឡើងលើសពី1,860ដុល្លារក្នុង1អោន។
បិទការជួញដូរកាលពីថ្ងៃទី21កក្កដា តម្លៃមាសលក់ចេញផ្ទាល់បានកើនជិត24ដុល្លារក្នុង1អោន គឺកើនឡើងដល់1,841ដុល្លារ ខ្ពស់ជាងគេបង្អស់រាប់ចាប់តាំងពីខែកញ្ញា ឆ្នាំ2011។ ព្រឹកនេះ មាសក៏នៅតែបន្តឡើងថ្លៃ ដោយបច្ចុប្បន្ន ការជួញដូរមាស មានតម្លៃប្រមាណជា1,863ដុល្លារក្នុង1អោន។
Bart Melek ដែលជានាយកផ្នែកយុទ្ធសាស្ត្រទំនិញមកពីក្រុមហ៊ុន TD Securities យល់ថា “រូបិយប័ណ្ណដុល្លារអាមេរិកធ្លាក់ថ្លៃ នាំឱ្យពិភពលោកងាកទៅរកទ្រព្យផ្សេងទៀតដែលល្អជាងនេះ។ ប្រភេទទ្រព្យដែលមានអត្រាការប្រាក់ធ្លាក់ចុះ ក៏ជាកត្តាមួយជួយដល់មាសផងដែរ”។
តម្លៃរូបិយវត្ថុដុល្លារអាមេរិក កាលពីម្សិលមិញបានដាំក្បាលចុះជ្រៅបំផុតក្នុងរយៈពេល4ខែកន្លងទៅនេះ បើធៀបនឹងកញ្ចប់រូបិយវត្ថុធំៗឯទៀត។ ប្រាក់ដុល្លារត្រូវបានចាត់ទុកថាជាគូប្រជែងសំខាន់របស់មាស នៅពេលដែលក្រុមអ្នកវិនិយោគមានតម្រូវការគេចចេញពីហានិភ័យ។
ក្រុមមន្ត្រីសហរដ្ឋអាមេរិក សប្ដាហ៍នេះ កំពុងតែពិភាក្សាគ្នាអំពីកញ្ចប់ថវិកាថ្មីសម្រាប់ជំនួយសេដ្ឋកិច្ច។ ចំណែកក្រុមមេដឹកនាំនៃសហភាពអឺរ៉ុប កាលពីម្សិលមិញក៏សម្រេចបានកិច្ចព្រមព្រៀងមួយស្ដីអំពីការបញ្ចេញកញ្ចប់ថវិកាជំរុញកំណើនសេដ្ឋកិច្ចដែលមានតម្លៃជាង850ពាន់លានដុល្លារអាមេរិក ក្រោយការពិភាក្សាគ្នាអស់ជាច្រើនថ្ងៃ។
ការស្រង់ស្ថិតិមួយរបស់ទីភ្នាក់ងារសារព័ត៌មាន Reuters បានបង្ហាញថា តម្លៃមាសកំពុងតែឆ្ពោះទៅរកកំំណត់ត្រាថ្មីមួយទៀតក្នុងរយៈពេល18ខែទៅមុខ។ ក៏ប៉ុន្តែ អត្រានៃការលក់គ្រឿងអលង្ការនៅទ្វីបអាស៊ី នៅមានកម្រិតទាប បូករួមនឹងការរំពឹងដ៏តិចតួចចំពោះកំណើនសេដ្ឋកិច្ចទូទាំងពិភពលោកទៀត នោះនឹងអាចកាត់បន្ថយកំណើនដ៏ខ្លាំងក្លានៃតម្លៃមាសនាពេលខាងមុខ។
ចំណែកនៅក្នុងទីផ្សារក្នុងស្រុកវិញ តម្លៃមាសមួយចំនួនរួមមានដូចជា មាសគីឡួលក់ចេញ1តម្លឹងស្មើនឹង2,170ដុល្លារ ខណៈមាសគីឡួទិញចូល1តម្លឹងស្មើនឹង2,150ដុល្លារ និងមាសដេញលក់ចេញ1ជីស្មើនឹង822.000រៀល (ប្រហែល202ដុល្លារ)៕
ប្រភព៖ សារព័ត៌មានបរទេស/សាលាក្រុងភ្នំពេញ
July 22, 2020
ត្រូវធ្វើតាំងពីក្មេង! 5 វិធីបង្កើនក្តីមោទនភាពដល់កូន
នៅពេលត្រូវទទួលតួនាទីជាឪពុកម្តាយ ឬអាណាព្យាបាល ក្រៅពីការចិញ្ចឹមមើលថែទាំដ៏ស័ក្តិសមល្អហើយនោះ ការបង្កើនក្តីមោទនភាពដល់កូនចៅក៏ជារឿងមួយសំខាន់មិនតិចតួចឡើយ។
ក្តីមោទនភាពលើខ្លួនឯង ( Self-esteem ) ជារឿងសំខាន់ក្នុងការរស់នៅ និងជារឿងដែលត្រូវតែសាងបណ្តើរៗតាំងពីក្មេងៗ។ ក្មេងដែលមានមោទនភាពលើខ្លួន នឹងក្លាយជាក្មេងដែលមានភាពជឿជាក់ក្នុងចិត្ត អាចដោះស្រាយបញ្ហា មានភាពអត់ទ្រាំចំពោះសម្ពាធផ្សេងៗ និងជម្លោះទាំងឡាយបានយ៉ាងល្អ និងជាមនុស្សដែលសម្លឹងពិភពលោកក្នុងន័យវិជ្ជមាន។
ក្តីមោទនភាពលើខ្លួនឯងត្រូវចាប់ផ្តើមតាំងពីអាយុខួបឆ្នាំដំបូង ក្មេងនឹងមានអារម្មណ៍ថា “ខ្លួនឯងធ្វើបាន” បន្ទាប់ពីព្យាយាមមកជាច្រើនដងរហូតទទួលបានជោគជ័យ និបបង្រៀនខ្លួនឯងថា “យើងធ្វើបាន បើយើងព្យាយាម”។
ចំណែកឯតួនាទីរបស់ឪពុកម្តាយ និងអាណាព្យាបាលក្នុងការបង្កើនក្តីមោទនភាពដល់កូនៗនោះមានដូចតទៅ ៖
1 . ចាប់តាំងពីកើតដំបូង ជាពិសេសក្នុងអំឡុងខួបឆ្នាំដំបូង ឪពុកម្តាយគួរផ្តល់ពេលវេលា សេចក្តីស្រឡាញ់ ភាពកក់ក្តៅ ភាពជិតដិតស្និទ្ធស្នាល ដូចជា ឱ្យបៅទឹកដោះនៅពេលកូនឃ្លាន លួងលោមនៅពេលកូនមួម៉ៅ ឬមិនស្រួលខ្លួន លេងជាមួយនៅពេលកូនត្រូវការ ទាំងអស់នេះជួយឱ្យក្មេងមានអារម្មណ៍ល្អជាមួយខ្លួនឯងដែលបានទទួលការតបស្នង ឬបានទទួលសេចក្តីស្រឡាញ់ពីអ្នកដទៃ។
2 . វ័យ 1 – 3 ខួប ក្មេងចាប់ផ្តើមហ្វឹកហាត់ និងត្រូវការធ្វើអ្វីម្យ៉ាងដោយខ្លួនឯងហើយ ឪពុកម្តាយគួរផ្តល់ឱកាសឱ្យកូនបានចាប់ផ្តើមធ្វើដោយខ្លួនឯង ព្រោះនៅពេលធ្វើបានសម្រេច គេនឹងកើតភាពជឿជាក់លើខ្លួនឯង មោទនភាពលើខ្លួនឯង និងមើលមកខ្លួនឯងថាជាមនុស្សមានសមត្ថភាព។
3 . វ័យមត្តេយ្យ និងវ័យរៀន ឪពុកម្តាយគួរប្រគល់ការងារងាយៗដែលស័ក្តិសមនឹងវ័យ ឱ្យក្មេងធ្វើដោយខ្លួនឯង ឬឱ្យក្មេងមានការងារល្អៗ ដូចជា មានទឹកចិត្តចែករំលែក និងធ្វើការរួមជាមួយអ្នកដទៃ ជាដើម។
4 . ការទំនាក់ទំនង និងបរិយាកាសដែលល្អក្នុងគ្រួសារសំខាន់សម្រាប់កុមារគ្រប់វ័យ ឪពុកម្តាយគួរសម្តែងអាកប្បកិរិយា ឬផ្តល់នូវពាក្យកោតសរសើយ៉ាងល្មមសមរម្យនៅពេលក្មេងធ្វើរឿងដែលល្អ។ តែបើកូនធ្វើរឿងដែលមិនល្អ គួរតែណែនាំចង្អុលបង្ហាញ និងផ្តល់កម្លាំងចិត្តយ៉ាងល្អប្រសើរ គួរចៀសវាងការទិតៀនតវ៉ាក្មេងដដែលៗ ព្រោះនឹងធ្វើឱ្យគេមើលមកខ្លួនឯងថាមិនល្អរហូតលែងមានកម្លាំងជំរុញចិត្ត។
5 . ចុងក្រោយ គឺការធ្វើជាគំរូល្អដល់ក្មេងៗ។ ក្នុងខណៈដែលឪពុកម្តាយកោតសរសើ មើលឃើញចំណុចល្អរបស់កូន ឬរបស់អ្នកដទៃនោះ ក្មេងៗនឹងរៀនយល់ដឹងជាបណ្តើរៗ ជ្រួតជ្រាបពីការមើលឃើញគុណតម្លៃរបស់អ្នកដទៃដែរ។ ផ្ទុយទៅវិញ ក្មេងដែលខ្វះភាពជឿជាក់ក្នុងចិត្ត និងក្តីមោទនភាពលើខ្លួនឯង ច្រើនតែជាមនុស្សដែលវិតក្កកង្វល់ កើតមានភាពថុញថប់តានតឹងចំពោះបញ្ហាផ្សេងៗ មិនអាចដោះស្រាយបញ្ហាបាន ក្មេងទាំងនេះច្រើនតែមានគំនិតពាក់ព័ន្ធនឹងខ្លួនឯងថា “យើងជាមនុស្សមិនពូកែ” ឬ “យើងមិនដែលធ្វើអ្វីត្រូវឡើយ” ធ្វើឱ្យក្លាយជាក្មេងដែលស្ងាត់ស្ងៀម មិនសូវមានមិត្តភ័ក្តិ ឬអាចដល់ថ្នាក់ក្លាយជាក្មេងមានសម្ពាធក្នុងចិត្តបានទៀតផង។
សម្រាប់ក្មេងក្រុមខ្លះ ចាំបាច់ត្រូវតែបានទទួលការអភិវឌ្ឍដើម្បីឱ្យចម្រើនធំធាត់ទាំងរាងកាយ និងផ្លូវចិត្ត តែបើហួសពីសមត្ថភាពរបស់អាណាព្យាបាលនោះ ក៏គួរតែនាំកូនទៅជួបនឹងគ្រូពេទ្យចិត្តសាស្រ្តកុមារ ដើម្បីគ្រូពេទ្យ នឹងរួមគ្នាជាមួយក្រុមគ្រួសាររិះរកផ្លូវកែខៃដែលស័ក្តិសម ឱ្យក្មេងសម្លឹងមើលពិភពលោកក្នុងន័យវិជ្ជមានតាមសភាពការពិត ស្គាល់ និងយល់ពីខ្លួនឯង ស្រឡាញ់ និងមានមោទនភាពលើខ្លួនឯងកាន់តែខ្លាំងឡើង៕
July 22, 2020
8 ដំបូន្មានរបស់អ្នកដែលមានស្នេហាស្ថិតស្ថេរយូរអង្វែង
សេចក្តីស្នេហា ជារឿងដែលស្រស់ស្អាត តែតាមមកដោយការទទួលខុសត្រូវជាច្រើនយ៉ាង មិនថាតែ អារម្មណ៍របស់គូស្នេហ៍ ស្ថានភាពរស់នៅដ៏ល្អរបស់គូស្នេហ៍ ក្រុមគ្រួសាររបស់គូស្នេហ៍ ជាដើម។ ឃើញទេថា សេចក្តីស្នេហាមិនមែនជារឿងតូចតាចនោះទេ ដូច្នេះទើបមិនមែនជារឿងប្លែកឡើយដែលគូស្នេហ៍ជាច្រើនគូត្រូវបញ្ចប់គ្នា ព្រោះតែមិនអាចទប់ប្រគងសេចក្តីស្នេហារហូតដល់ទីបញ្ចប់បាន។ ខាងក្រោមនេះគឺជាមេរៀនល្អៗដែលធ្លាយចេញពីមាត់របស់អ្នកដែលស្រឡាញ់គ្នាបានគង់វង្សយូរអង្វែង តើពួកគេធ្វើយ៉ាងណាខ្លះ?។
1 . មើលថែទាំខ្លួនឯងឱ្យបានល្អជាមុនសិន មុននឹងគិតចង់មានស្នេហា ៈ រៀនយល់ដឹងពីការរស់នៅម្នាក់ឯងឱ្យបានច្បាស់ល្អជាមុនសិន ធ្វើអ្វីៗដើម្បីខ្លួនឯងឱ្យបានឱ្យអស់សិន ដូចជា បោសជូតសម្អាតផ្ទះ ឬបន្ទប់ ធ្វើចំណីអាហារញ៉ាំ បោកអ្៊ុតខោអាវ ទិញរបស់របរប្រើប្រាស់មកផ្ទះ-ល- ពេលអ្នកធ្វើបានល្អហើយ គូស្នេហ៍របស់អ្នកនឹងគ្មានផ្លូវរអ៊ូរទាំរឿងដែលអ្នកខ្វះខាតអ្វីទាំងអស់នោះឡើយ។
2 . ធ្វើអ្វីដែលខ្លួនឯងចូលចិត្តឱ្យដូចដើម ៈ ការងារបន្ទាប់បន្សំដែលខ្លួនឯងស្រលាញ់ ដែលខ្លួនឯងចូលចិត្តធ្វើជាប្រចាំ កុំគិតតែពីបបួលគេ(ឬនាង)ឱ្យចូលរួមធ្វើ ព្រោះរឿងខ្លះ កិច្ចការងារខ្លះ អាចនឹងស័ក្តិសមចំពោះតែរូបអ្នកតែម្នាក់ប៉ុណ្ណោះ មិនដូច្នោះទេ អាចជារូបអ្នកហ្នឹងឯងដែលមួម៉ៅនោះ។
3 . រៀនយល់ដឹងក្នុងការអភ័យទោសក្រោយពេលឈ្លោះគ្នាហើយ ៈ អ្នកសរសេរអត្ថបទម្នាក់នៅក្នុងវេបសាយមួយបានសរសេរថា “រឿងនេះជារឿងសំខាន់ណាស់ ខ្ញុំនឹងគូដណ្តឹងរបស់ខ្ញុំឈ្លោះគ្នា 4 – 5 ដងក្នុងអំឡុងពេល 7 ឆ្នាំ តែគ្មាននរណាចងចាំរឿងទាំងនោះឡើយ ព្រោះយើងមានការតាំងចិត្តក្នុងការបំភ្លេចវាចោល យើងទាំងពីរនាក់នៅតែស្រឡាញ់គ្នា និងមានសេចក្តីសុខគ្រប់ពេលដែលនៅជាមួយគ្នា”។
4 . ជ្រើសរើសរឿងណាដែលជាបញ្ហាពិតៗ ៈ កុំនិយាយរឿងតូចតាចឱ្យក្លាយជាបញ្ហាធំរហូតធ្លាប់ខ្លួន ព្រោះវាអាចនឹងបំផ្លាញអារម្មណ៍ និងសម្ព័ន្ធភាពបាន ជ្រើសរើសយករឿងណាដែលជាប្រធានបទដែលស័ក្តិសមក្នុងការជជែកតវ៉ាគ្នាពិតៗ ឬមុននឹងហាមាត់ប្រកែកតវ៉ាគ្នា ចូរគិតឱ្យបានល្អជាមុនសិនថា តើរឿងនេះគួរលើកយកមកប្រកែកគ្នា ឬក៏បញ្ចប់វាទៅប្រសើរជាង?។
5 . កុំខឹងគ្នា ដោយគ្រាន់តែគេ (ឬនាង) ធ្វើអ្វីគ្រប់យ៉ាងដើម្បីអ្នកមិនបាន ៈ មនុស្សម្នាក់អាចមានចំណុចល្អជាច្រើន តែអាចគ្មានចំណុចល្អគ្រប់យ៉ាងត្រូវប៉ាច់ៗទៅនឹងអ្វីដែលអ្នកត្រូវការនោះឡើយ ត្រឹមតែគេ (ឬនាង) មានអ្វីម្យ៉ាងដែលធ្វើឱ្យអ្នកមានសេចក្តីសុខក៏គ្រប់គ្រាន់ណាស់ទៅហើយ កុំបង្ខំរុញច្រានសេចក្តីសង្ឃឹមដែលមិនអាចកើតឡើងបានទៅឱ្យគូស្នេហ៍ជ្រុលហួសហេតុពេក ព្រោះនឹងធ្វើឱ្យគេ(ឬនាង)មានអារម្មណ៍តានតឹងធុញថប់ ដែលជាដើមហេតុរបស់ក្តីស្នេហ៍ដែលដួលរលំ។
6 . កុំប្រជែងគ្នា តែចូរដោះស្រាយបញ្ហារួមគ្នា ៈ នេះគឺជាកូនសោសំខាន់ អ្នកទាំងពីរគឺជាក្រុមតែមួយ កុំគិតថា ត្រូវតែជារូបអ្នកតែម្នាក់ឯងគត់ដែលត្រូវកែបញ្ហា ក្រុមត្រូវតែជួយគ្នា កុំបណ្តោយឱ្យអ្នកណាម្នាក់ជួបបញ្ហាតែម្នាក់ឯង។
7 . រៀនយល់ដឹងក្នុងការអត់ទោសយ៉ាងស្មោះស្ម័គ្រ ៈ កុំបណ្តោយឱ្យរឿងវាកន្លងទៅដោយមិនបាននិយាយអ្វីមួយម៉ាត់ សូម្បីតែពាក្យសុំទោសឱ្យសោះ ចូរនិយាយពាក្យថាសុំទោសឱ្យបានញឹកញាប់ ព្រោះមនុស្សទាំងអស់គ្មានអ្នកណាឥតខ្ចោះនោះទេ ទទួលស្គាល់កំហុសទាំងនោះ និងធ្វើឱ្យស៊ាំធ្លាប់បើអ្នកបារម្ភពីអារម្មណ៍របស់អ្នកនៅក្បែរខ្លួននោះ។
8 . តាំងគោលដៅនៅក្នុងជីវិតគូជាប់ជានិច្ច ៈ នៅពេលអ្នកមានគោលដៅ គ្រប់យ៉ាងក្នុងជីវិតក៏គូនឹងក្លាយជា ភាពស្រុះស្រួលគ្នា ភាពយោគយល់គ្នា និងមានសេចក្តីសុខរាល់ថ្ងៃក្នុងជីវិត ដូច្នេះចូរញញឹមដាក់វា មានសេចក្តីសុខជាមួយវា នេះគឺជារឿងវិសេសបំផុតដែលកើតឡើងចំពោះជីវិតគូហ្នឹងឯង៕
July 22, 2020
មេ Samsung បង្ហើបថា នឹងមានរបស់ថ្មីៗ 5ទៀត ក្នុងថ្ងៃប្រកាសចេញស្មាតហ្វូន Note 20…
ក្នុងអំឡុងកម្មវិធី Galaxy Unpacked ដែលនឹងប្រារព្ធធ្វើឡើងនៅថ្ងៃទី5 ខែសីហា ខាងមុខនេះ Samsung នឹងប្រកាសផលិតផលថ្មីចំនួន5 មាន កាសស្ដាប់ឥតខ្សែ និងនាឡិកាវៃឆ្លាត បន្ថែមពីលើស្មាតហ្វូនថ្មីៗទៀត។ នេះបើយោងតាមសម្ដីរបស់ប្រធានផ្នែកទូរស័ព្ទ Samsung គឺលោក TM Roh តែលោកមិនបានផ្ដល់ព័ត៌មានលម្អិតបន្ថែមទៀតទេ ដោយគ្រាន់តែប្រាប់តម្រុយខ្លះៗប៉ុណ្ណោះ។
Galaxy Note20 នឹងក្លាយជាតួឯក នៅក្នុងកម្មវិធី Galaxy Unpacked ដែលមាន Galaxy Note20 ធម្មតា និង Galaxy Note20 Ultra។ ចំណែកផលិតផល 2ទៀត ទំនងជា Galaxy Z Fold 2 អ្នកស្នងតំណែង Galaxy Fold និង Galaxy Tab S7។
កម្មវិធី Galaxy Unpacked ដែលនឹងធ្វើឡើងនៅខែក្រោយនេះ នឹងរៀបចំឡើងជាលក្ខណៈអនឡាញ មានផ្សាយផ្ទាល់តាមរយៈគណនីផ្លូវការរបស់ Samsung ដោយមិនមានមនុស្សចូលរួមផ្ទាល់ដូចពេលមុនៗឡើយ៕
July 22, 2020
Xiaomi ជាអ្នកលក់ស្មាតហ្វូនបានច្រើនជាងគេ ជាង 5.3លានគ្រឿង ទោះជាមានមេរោគកូវីដ-19
Xiaomi ជាអ្នកលក់ស្មាតហ្វូនបានច្រើនជាងគេ ដោយលក់បានចំនួន 5.3លានគ្រឿង កាន់កាប់ចំណែកទីផ្សារ 30.9%។ ចំនួនលក់នេះ គឺថយចុះ ៤៨% បើធៀបនឹងឆ្នាំមុនដែលលក់បាន 10.3លានគ្រឿង។
ក្រុមហ៊ុនលំដាប់លេខ2 បានទៅលើ vivo លក់បាន 3.7លានគ្រឿង (-36%) ឯលេខ3 គឺ Samsung លក់បាន 2.9លានគ្រឿង (-60%) និង OPPO លក់បាន 2.2លានគ្រឿង (-27%) និង realme លក់បាន 1.7លានគ្រឿង (-35%)។ នេះបើតាមការបញ្ជាក់ពីក្រុមហ៊ុនស្រាវជ្រាវទីផ្សារ Canalys ដែលបានបង្ហាញតួលេខប្រចាំត្រីមាសទី2 ឆ្នាំ2020 អំពីទីផ្សារស្មាតហ្វូនក្នុងប្រទេសឥណ្ឌា ដែលជាទីផ្សារធំលំដាប់លេខ2 ក្នុងពិភពលោក។
នៅក្នុងត្រីមាសទី2 ពេលដែលប្រទេសកំពុងប្រយុទ្ធប្រឆាំងនឹងជំងឺកូវីដ-19 ដែលបានអនុវត្តវិធានការបិទខេត្ត/ក្រុងនោះ ទីផ្សារស្មាតហ្វូននៅឥណ្ឌាបានធ្លាក់ចុះ 48% ធៀបនឹងឆ្នាំមុន ពោលគឺធ្លាក់ចុះពី 33លានគ្រឿង មកនៅត្រឹម 17.3លានគ្រឿង៕
July 22, 2020
មហាសេដ្ឋី Elon Musk ក្លាយជាអ្នកមានជាងគេលំដាប់ទី5ក្នុងពិភពលោក បន្ទាប់ពីម្ចាស់ Facebook
ភាគហ៊ុននៃក្រុមហ៊ុនផលិតរថយន្តអគ្គិសនី Tesla បានកើនឡើងជិត300% នៅក្នុងឆ្នាំ2020 ប្រការនេះបានជួយឱ្យទ្រព្យសម្បត្តិរបស់មហាសេដ្ឋី Elon Musk កើនឡើងជិត3ដង ដោយបច្ចុប្បន្ន លោក Musk មានទ្រព្យជាង74ពាន់លានដុល្លារ។
ក្រោយបញ្ចប់ការជួញដូរកាលពីថ្ងៃទី20មករា តម្លៃមូលបត្ររបស់ Tesla បានកើន9.5% ពោលគឺក្នុង1ហ៊ុនមានតម្លៃ1,643ដុល្លារ។ ទ្រព្យសម្បត្តិរបស់ Elon Musk ដែលជា CEO នៃក្រុមហ៊ុន Tesla ក៏កើនឡើងទៅតាមនោះដែរ គឺកើនឡើងដល់74.2ពាន់លានដុល្លារអាមេរិក។ ដូច្នេះ មហាសេដ្ឋីរូបនេះ ក៏បានក្លាយជាអ្នកមានជាងគេលំដាប់ទី5ក្នុងពិភពលោក។ នេះបើតាមទស្សនាវដ្ដី Forbes។
ជាសរុប នៅក្នុងរយៈពេល3សប្ដាហ៍កន្លងទៅ មូលបត្រ Tesla កើនឡើង60% ហើយបើគិតតាមឆ្នាំវិញ Tesla កើនឡើងជិត300%។ លោក Musk កាន់កាប់ភាគហ៊ុន Tesla ប្រមាណជា21% ប៉ុន្តែជាងពាក់កណ្ដាលនៃចំនួននេះ ត្រូវបានយកទៅដាក់បញ្ចាំនៅធនាគារដើម្បីខ្ចីប្រាក់មកវិនិយោគបន្ថែម។ ក្រៅពីនេះ ភាគហ៊ុនរបស់លោក Musk នៅក្នុងក្រុមហ៊ុនអវកាស SpaceX ក៏មានតម្លៃប្រមាណជា15ពាន់លានដុល្លារផងដែរ។
បច្ចុប្បន្ន Tesla មិនត្រឹមតែជាក្រុមហ៊ុនផលិតរថយន្តដែលមានតម្លៃជាងគេបំផុតក្នុងពិភពលោក ជាមួយនឹងទុនសរុបចំនួន304.5ពាន់លានដុលារនោះទេ ប៉ុន្តែ Tesla មានតម្លៃទុនសរុបច្រើនជាងទុនរបស់ក្រុមហ៊ុនផលិតរថយន្ត Ford, Ferrari, General Motors និង BMW បូកចូលគ្នាទៀតផង។
តម្លៃមូលបត្ររបស់ Tesla បានឡើងថ្លៃជាបន្តបន្ទាប់ នាំឱ្យទ្រព្យរបស់លោក Musk បង្កើតបានកំណត់ត្រាថ្មីៗជាហូរហែក្នុងមួយរយៈពេលខ្លីកន្លងទៅនេះ។ ទស្សនាវដ្ដី Forbes បានឱ្យដឹងថា កាលពីពាក់កណ្ដាលខែមីនា លោក Musk មានទ្រព្យមិនដល់25ពាន់លានដុល្លារនោះទេ និងឈរលំដាប់លេខ31ក្នុងចំណោមអ្នកមានជាងគេក្នុងពិភពលោក។ លោក Elon Musk ចាប់ផ្ដើមមានវត្តមានជាលើកដំបូងក្នុងបញ្ជីឈ្មោះអ្នកមានជាងគេទាំង400នៅសហរដ្ឋអាមេរិកកាលពីឆ្នាំ2012 ដោយមានទ្រព្យសរុប2.4ពាន់លានដុល្លារ និងឈរលំដាប់ទី190ក្នុងបញ្ជីនេះ។
លោក Jeff Bezos, លោក Bernard Arnoult, លោក Bill Gates និងលោក Zuck Markerberg (រាប់ពីឆ្វេងមកស្ដាំ ពីលើចុះក្រោម)
ក្រុមហ៊ុន Tesla ផលិតបានរថយន្តចំនួន103,000គ្រឿងក្នុងត្រីមាសទី1នៃឆ្នាំ2020។ ចំណែក Toyota វិញ បាននាំចេញរថយន្តដល់ទៅ2.4លានគ្រឿងឯណោះ។
នៅក្នុងពិភពលោក អ្នកមានជាងគេបង្អស់នាបច្ចុប្បន្ន នៅតែជាម្ចាស់ក្រុមហ៊ុន Amazon គឺលោក Jeff Bezos ដោយមានទ្រព្យសរុប189ពាន់លានដុល្លារអាមេរិក។ កាលពីថ្ងៃទី20កក្កដា ទ្រព្យរបស់លោក Bezos បានកើន13ពាន់លានដុល្លារបន្ថែមទៀត ដោយសារតម្លៃមូលបត្រ Amazon កើន8%។ ឈរលំដាប់ទី2 គឺម្ចាស់ក្រុមហ៊ុន LVMH លោក Bernard Arnault ជាមួយនឹងទ្រព្យសរុប114ពាន់លានដុល្លារ។ លោក Bill Gates ឈរលំដាប់ទី3 (113ពាន់លានដុល្លារ) និងទី4គឺលោក Mark Zuckerberg (90ពាន់លានដុល្លារ)៕
ប្រភព៖ Forbes
July 22, 2020
ចម្ការបន្លែគ្រួសារជុំវិញផ្ទះ (តពីលេខមុន)
3.ស្ថានភាពពន្លឺថ្ងៃ និងម្លប់ ៖ អាចរាប់បានថាមានភាពចាំបាច់ណាស់នៅក្នុងក្បួនការកែច្នៃពន្លឺរបស់រុក្ខជាតិ ដើម្បីសាងវាជាអាហារ។ បរិមាណពន្លឺថ្ងៃដែលបានទទួលនៅក្នុងទីកន្លែងដាំដុះក្នុង 1ថ្ងៃៗនោះ នឹងមានផលប្រយោជន៍ចំពោះប្រភេទបន្លែដែលយើងដាំនោះ ដោយជាទូទៅ គេអាចបែងចែកដំណាំបន្លែទៅតាមតម្រូវការពន្លឺថ្ងៃដូចតទៅ ៖
3/1.កន្លែងដែលមិនបានទទួលពន្លឺថ្ងៃរហូតពេញ 1ថ្ងៃ គួរដាំរុក្ខជាតិបន្លែណាដែលអាចលូតលាស់ធំធាត់ឡើងនៅក្នុងម្លប់បាន ដូចជា ដើមស្លឹកឆះភ្លូ ជីអង្កាម ស្លឹកគ្រៃ ជីនាងវង ខ្ញី ម្តេង និងដើមម្រះព្រៅ ជាដើម។
3/2.កន្លែងដែលបានទទួលពន្លឺថ្ងៃរហូតពេញ 1ថ្ងៃ គួរជ្រើសរើសដាំបន្លែណាដែលអាចលូតលាស់ធំធាត់ឡើងបាននៅក្នុងកន្លែងដែលមានពន្លឺថ្ងៃប្រក្រតី ដូចជា ដើមសណ្តែកកួរ ខាត់ណា ស្ពៃខ្មៅ ស្ពៃចង្កឹះ ម្ទេសផ្សេងៗ លើកលែងតែម្ទេសអាចម៍ចាប។
4.ប្រភេទ ៖ ការដាំបន្លែ គួរជ្រើសរើសយកប្រភេទបន្លែឱ្យបានច្រើនប្រភេទ ដើម្បីឱ្យទទួលបានគុណតម្លៃខាងអាហារ ដែលសម្បូរបែប ដែលសម្រាប់ចម្ការបន្លែគ្រួសារនេះ គេអាចបែងចែកចេញជា 4ប្រភេទធំៗដូចតទៅ៖
1.យកផ្លែធ្វើជាអាហារ ដូចជា ត្រសក់ ប៉េងប៉ោះ ម្ទេស ត្រប់។ល។
2.យកស្លឹក និងដើមធ្វើជាអាហារ ដូចជា ត្រកួន ខាត់ណា ស្ពៃ ជីនាងវង ស្លឹកម្រះព្រៅ។ល។
3.យកផ្កាធ្វើជាអាហារ ដូចជា ផ្កាខាត់ណា ផ្កាអង្គារដី ផ្កាគុយឆាយ ផ្កាស្រឡឹត។ល។
4.យកមើម ឬឫសដែលនៅក្នុងដីធ្វើជាអាហារ ដូចជា ខ្ទឹមស ខ្ទឹមក្រហម ខ្ញី ម្តេង ឆៃថាវ ការ៉ុត។ល។
5.ប្រភេទរបស់បន្លែ ៖ បន្លែប្រភេទនីមួយៗមានភាពខុសប្លែកពីគ្នាក្នុងរឿងវិធីការដាំដុះ និងអាយុ ក្នុងការប្រមូលផល ដូច្នេះទើបគេអាចបែងចែកប្រភេទបន្លែទៅតាមអាយុនៃការប្រមូលផល ដូចខាងក្រោមនេះ ៖
5/1.បន្លែអាយុខ្លី (តិចជាង 2 ខែ)៖ ដូចជា ជីវ៉ាន់ស៊ុយ សាលាដ ស្ពៃខ្មៅ ខាត់ណា ត្រកួនចិន ស្ពៃបូកគោ ត្រសក់។ល។
5/2.បន្លែអាយុកណ្តាល(2 – 5 ខែ) ៖ ដូចជា ផ្កាខាត់ណា ស្ពៃក្តោប សណ្តែកកួរ ខ្ទឹមបារាំង ប៉េងប៉ោះ ម្ទេស ននោង ល្ពៅ។ល។
5/3.បន្លែដើមខ្ពស់(យូរជាង 1ឆ្នាំ)៖ ដូចជា ត្រប់ ស្អំ ជីនាងវង ម្រះព្រៅ ខ្ញី ទំពាំងបារាំង ខ្ជាយ ម្តេង។ល។
6.ដាំបន្លែ គួរដាំឱ្យត្រូវរដូវកាល ៖ ដើម្បីឱ្យទទួលបានបន្លែដែលមានគុណភាព និងរសជាតិល្អ ងាយស្រួលថែទាំ មិនសូវមានសត្វល្អិត និងជំងឺមករុកកួន ទើបយើងគួរពិចារណាជ្រើសរើសដាំបន្លែតាមរដូវកាលដែលត្រឹមត្រូវ ដូចតទៅនេះ ៖
បន្លែដែលគួរដាំក្នុងរដូវក្តៅ ៖ មានដូចជា បន្លែដែលស៊ូនឹងកម្តៅបានល្អ និងធន់ជាមួយភាពស្ងួតក្រៀមក្រោះបានល្មមគួរសម។ ទោះបីជាបន្លែទាំងនោះធន់នឹងកម្តៅ និងភាពហួតហែងបានមែនក៏ដោយ តែបើចង់ដាំនៅក្នុងរដូវក្តៅនោះ បន្លែមួយចំនួនក៏ត្រូវតែស្រោចទឹកព្រឹក-ល្ងាច ត្រូវតែជ្រួយដី ហើយគ្របគល់ដោយចំបើងដើម្បីរក្សាសំណើមឱ្យបានគ្រប់គ្រាន់ ដូចជា ពោត ននោង ម្រះ សណ្តែកកួរ ឃ្លោក ល្ពៅ ពពាយ ខាត់ណា ស្ពៃចង្កឹះ សាលាដ ជីវ៉ាន់ស៊ុយ (សាលាដ និងជីវ៉ាន់ស៊ុយនេះគួរធ្វើដំបូលបាំងកម្តៅឱ្យផង) ស្ពៃខ្មៅ ត្រប់ពុតលំញង ជាដើម។ល។
បន្លែដែលគួរដាំក្នុងរដូវភ្លៀង ៖ បន្លែណាដែលដាំនៅដើមរដូវភ្លៀង ក៏អាចដាំបានផលល្អនៅចុងរដូវភ្លៀងបានដែរ ខ្លាំងជាងនោះទៅទៀត ថែមទាំងអាចដាំបន្លែទាំងនោះនៅក្នុងរដូវរងាបានផងដែរ ដូចជា ស្ពៃក្តោប ផ្កាខាត់ណា ប្រូកខូលី សណ្តែកហោឡាន់តៅ ខ្ទឹមបារាំងប៉េងប៉ោះ ស្លឹកឃឹនឆាយ ម្ទេសប្លោក។ល។
(នៅមានត)
July 22, 2020
រៀបផែនការរឿងម៉ឺនុយអាហារ ដើម្បីការអភិវឌ្ឍរបស់កូនតូច
សម្រាប់កូនតូចជាទីស្រឡាញ់ក្នុងអំឡុងវ័យ 3 ខួបដំបូងនៃជីវិត លោកឪពុកអ្នកម្តាយអាចនឹងជួបប្រទះនឹងបញ្ហាពាក់ព័ន្ធនឹងទស្សនគតិក្នុងការញ៉ាំអាហាររបស់កូនតូចដែលមិនសូវជាអំណោយផលចំពោះសុខភាពប៉ុន្មានឡើយ ដូច្នេះការមានផែនការច្បាស់លាស់ក្នុងការរៀបចំម៉ឺនុយអាហារក្នុងមួយថ្ងៃៗសម្រាប់កូនក្នុងវ័យនេះគឺជារឿងសំខាន់ណាស់ ព្រោះវាពាក់ព័ន្ធនឹងសុខភាពរាងកាយ សមាធិ និងបទពិសោធន៍ក្នុងការញ៉ាំអាហាររបស់កូនតូច។
ទង្វើរើសច្រើន ញ៉ាំតែអាហារណាដែលខ្លួនឯងចូលចិត្ត បើមិនចូលចិត្ត ដូចជាបន្លែ ឬសាច់ត្រី ជាដើម នឹងមិនព្រមញ៉ាំទាល់តែសោះ ឬញ៉ាំបាយមួយម៉ាត់ប្រើពេលជិតកន្លះម៉ោង ថែមទាំងត្រូវមានអ្នកនៅចាំលេងជាមួយទៀត ចំណែកអ្នកម្តាយវិញ ក៏ត្រូវរត់ដេញចាប់បញ្ចុកបាយរហូតអស់កម្លាំង ដូច្នេះសម្រាប់គន្លឹះល្អៗក្នុងការបណ្តុះទម្លាប់ឱ្យកូនមាននិស្ស័យញ៉ាំអាហារដែលមានប្រយោជន៍ដល់រាងកាយដែលលោកឪពុកអ្នកម្តាយអាចសាកល្បងនាំយកទៅប្រើបានយ៉ាងងាយៗនោះគឺ ៖
រៀបផែនការរឿងមុខម្ហូបរួមគ្នា
ឱ្យកូនតូចជួយគិតជាមួយអ្នកម្តាយផងថា តើមួយពេលៗគួរគួរញ៉ាំម្ហូបអាហារអីល្អ និងឱ្យកូនមានចំណែកក្នុងការជួយត្រៀមរៀបចំអាហារផង ព្រោះវិធីនេះកូននឹងមានអារម្មណ៍សប្បាយជាមួយនឹងការញ៉ាំមួយពេលនោះកាន់តែខ្លាំងឡើង។
អាហារមួយពេលៗ កុំដាច់ឆ្ងាយពីគ្នាយូរពេក
អ្នកម្តាយគួរនាំយកអាហារមកឱ្យកូនញ៉ាំឱ្យត្រូវវេលាក្នុងមួយពេលៗ ព្រោះបើកូនឃ្លាន ហើយត្រូវរង់ចាំអាហារយូរជ្រុលពេកវានឹងក្លាយជាឱកាសឱ្យគេងាកទៅញ៉ាំអាហារសម្រន់ដែលគ្មានប្រយោជន៍ចំពោះសុខភាពវិញ។
អាហារញ៉ាំពេលទំនេរដែលមានប្រយោជន៍
លោកឪពុកអ្នកម្តាយគួរតែមានអាហារញ៉ាំលេងពេលទំនេរប្រភេទដែលមានគុណតម្លៃខាងភោជនាហារទុកនៅក្នុងផ្ទះឱ្យកូនញ៉ាំលេងជាប់ជានិច្ច ដូចជា ផ្លែឈើ នំប៉័ង ជាដើម និងមិនគួរមានតែស្ករគ្រាប់ ឬនំបង្អែមតែម្យ៉ាងនោះឡើយ។
បង្ហាត់កូនតាំងពីថ្ងៃនេះ
លោកឪពុកអ្នកម្តាយគួរបង្រៀនឱ្យកូនចេះញ៉ាំអាហារដែលមានគុណប្រយោជន៍ដល់រាងកាយរបស់គេតាំងពីថ្ងៃនេះ ដោយអាចនឹងត្រូវប្រើភាពអត់ធន់ក្នុងការអធិប្បាយពីហេតុផលឱ្យកូនបានដឹងថា អាហារប្រភេទនីមួយៗដែលគេញ៉ាំចូលទៅនោះនឹងមានប្រយោជន៍ចំពោះរាងកាយយ៉ាងណាខ្លះ ដូចជា បើកូនញ៉ាំអាហារគ្រប់ទាំង 5 ប្រភេទក្រុមរាល់ថ្ងៃ និងថែមទាំងញ៉ាំបន្លែផ្លែឈើផងនោះ នឹងធ្វើឱ្យកូនមានសតិបញ្ញាឆ្លាតវៃសមនឹងវ័យ និងមានរាងកាយរឹងមាំស្រស់ថ្លាមើលមកឃើញគួរឱ្យស្រឡាញ់។ ដូច្នេះទើបកូនមិនគួរជ្រើសរើសក្នុងការញ៉ាំតែអាហារណាដែលឆ្ងាញ់ត្រូវមាត់តែម្យ៉ាងនោះទេ។ ដោយសារវិធីទាំងនេះ លោកឪពុកអ្នកម្តាយនឹងបានឃើញថា កូនតូចរបស់អ្នកមានភាពត្រៀមជាស្រេចទាំងផ្នែករាងកាយ សតិបញ្ញា អារម្មណ៍ និងសង្គម មុននឹងឈានចូលទៅក្នុងសង្គមក្នុងសាលារៀនបានយ៉ាងជឿជាក់ខ្លាំងឡើង។
ព្រោះកូនតូចរបស់យើងនៅតូចខ្លាំងណាស់ ដូច្នេះលោកឪពុកអ្នកម្តាយចាំបាច់ត្រូវជ្រើសរើសយកតែអ្វីដែលល្អៗឱ្យដល់កូន ដើម្បីឱ្យកូនបានរៀនយល់ដឹងពីអ្វីផ្សេងៗជុំវិញខ្លួនបានយ៉ាងឆ្លាតវៃតទៅទៀត៕
July 22, 2020
មុខរបរប្រមូលសាកសពអ្នកជំងឺCOVID-19 កំពុងត្រូវប៉ាន់នៅប៉េរូ
“យមរាជៗ! យើងមកដល់ហើយៗ” Néstor Vargas និង Luis José Cerpa កំពុងតែឆ្លើយឆ្លងគ្នានៅលើរលកវិទ្យុទាក់ទង ក្នុងពេលពួកគេបើកបររថយន្តទៅកាន់មន្ទីរពេទ្យដែលបានជូនដំណឹងមកពួកគេថា “មានអ្នកជំងឺCOVID-19 បានស្លាប់”។
ស្លៀកពាក់ឈុតការពារវីរុសតាំងពីក្បាលដល់ចុងជើង Néstor Vargas និង Luis José Cerpa កំពុងតែធ្វើដំណើរទៅប្រមូលសាកសពនៃអ្នកជំងឺCOVID-19 នៅពាសពេញទីក្រុង Lima ក្នុងប្រទេសប៉េរូ។ នោះគឺជាមុខរបរដែលមានមនុស្សតិចតួចណាស់ដែលហ៊ានធ្វើ ព្រោះតែខ្លាចឆ្លងវីរុស។ ក៏ប៉ុន្តែ Néstor Vargas និង Luis José Cerpa ដែលជាជនអន្តោប្រវេសន៍មកពីប្រទេសវេណេស៊ុយអេឡានេះ ហ៊ានប្រឈមមុខនឹងហានិភ័យគ្រប់យ៉ាងនៅពេលពួកគេជ្រើសរើសការងារជាអ្នកប្រមូលសាកសពអ្នកជំងឺCOVID-19។
Vargas កាន់ទូរស័ព្ទដែលមានរូបភរិយាបណ្ដើរ ប្រាប់អ្នកយកព័ត៌មានបណ្ដើរថា “យើងពិតជាមានការភ័យខ្លាចឆ្លងវីរុស និងការចម្លងទៅអ្នកផ្ទះ ជាកន្លែងដែលខ្ញុំរស់នៅជាមួយម្ដាយ ភរិយា និងកូនៗ”។
យោងតាមអង្គការសហប្រជាជាតិ ពលរដ្ឋវេណេស៊ុយអេឡាជិត5លាននាក់បានចាកចេញពីប្រទេស ចាប់ពីឆ្នាំ2016 ក្នុងនោះមានយ៉ាងតិច878,000នាក់បានចូលមកកាន់ប្រទេសប៉េរូ ដើម្បីធ្វើការរកប្រាក់ចិញ្ចឹមជីវិត ឬផ្ញើទៅកាន់សាច់ញាតិដែលកំពុងជួបការលំបាកនៅឯស្រុកកំណើត។
Néstor Vargas និង Luis José Cerpa
Cerpa អាយុ21ឆ្នាំ ធ្លាប់ជានិស្សិតផ្នែករចនាក្រហ្វិកនៅមុនពេលមកកាន់ប្រទេសប៉េរូធ្វើជាអ្នករត់តុ។ ចំណែក Vargas វ័យ38ឆ្នាំ ធ្វើការនៅក្នុងក្រុមហ៊ុនរៀបចំពិធីបុណ្យសពនៅវេណេស៊ុយអេឡា ប៉ុន្តែ បច្ចុប្បន្នធ្វើជាអ្នកបើកបររថយន្តឱ្យក្រុមហ៊ុយហ្គាសមួយនៅប៉េរ៉ូ។ ពេល COVID-19 បានរាលដាលពេញតំបន់ ភ្ញៀវទេសចរណ៍ក៏លែងមាន ការងារក្នុងវិស័យដែលពួកគេធ្វើក៏ត្រូវបាត់បង់នៅសល់តែការងារក្នុងវិស័យរៀបចំបុណ្យសពតែប៉ុណ្ណោះ។
Vargas និយាយថា “ពួកយើងមិនបានធ្វើការអស់រយៈពេល3ខែមកហើយ ពួកយើងត្រូវការហូបចុក បង់ថ្លៃផ្ទះ និងផ្ញើប្រាក់ទៅឱ្យគ្រួសារនៅវេណេស៊ុយអេឡា។ មុខរបរនេះពិតជាមានការលំបាកច្រើនណាស់ ប៉ុន្តែដោយសារត្រូវការប្រាក់ ពួកយើងនៅតែធ្វើ”។
Vargas និង Cerpa ម្នាក់ៗអាចរកបានប្រហែល500ដុល្លារក្នុង1ខែៗ គឺច្រើនជាងជិតពីរដងបើធៀបនឹងប្រាក់ខែអប្បបរមានៅប្រទេសប៉េរូ។ ពួកគេធ្វើការរហូតដល់19ម៉ោងក្នុង1ថ្ងៃ និង7ថ្ងៃក្នុង1សប្ដាហ៍។
បើទោះជាប្រទេសប៉េរូ បានចាប់ផ្ដើមចាត់វិធានការទប់ស្កាត់យ៉ាងឆាប់រហ័សក៏ដោយ ប៉ុន្តែ COVID-19 នៅតែឆ្លងរាលដាលដូចភ្លើងឆេះព្រៃ បណ្ដាលឱ្យមនុស្សជាង353,000នាក់បានឆ្លងវីរុស និងជាង13,000នាក់បានបាត់បង់ជីវិត។ ជារៀងរាល់លើក នៅពេល Vargas និង Cerpa ចូលទៅយកសាកសពតាមការហៅរក ពួកគេតែងតែត្រូវបានទទួលស្វាគមន៍ដោយសំឡេងទ្រហោយំពីម្ចាស់ផ្ទះជានិច្ច។ ពួកគេតាំងតែព្យាយាមដើរចូលយ៉ាងប្រញាប់ដើម្បីនាំយកសាកសព រួចត្រលប់ចេញយ៉ាងលឿន ប៉ុន្តែក៏នៅតែសំដែងការគោរពចំពោះគ្រួសារនៃសព។
នៅក្នុងសាលបូជាសព El Angel Cemetery បុគ្គលិកដែលធ្វើការងារជាអ្នកបូជា ឬរំលាយសព ក៏ជាជនជាតិវេណេស៊ុយអេឡាដែរ។ ពលរដ្ឋម្នាក់ឈ្មោះ Orlando Arteaga បាននិយាយថា “ជនជាតិប៉េរូមិនធ្វើការងារនេះទេ។ ពិតជាលំបាកណាស់”។
ឡបូជាសព និងក្ដារមឈូសដាក់សាកសពយ៉ាងច្រើនគរលើគ្នាក្នុងទីលានរបស់ក្រុមហ៊ុន El Angel Cemetery នៅទីក្រុង Lima ប្រទេសប៉េរូ
លោក Orlando Arteaga ធ្វើការ7ថ្ងៃក្នុង1សប្ដាហ៍ ដើម្បីរកប្រាក់ចិញ្ចឹមកូនៗចំនួន3នាក់នៅវេណេស៊ុយអេឡា និងកូនស្រីអាយុ2ឆ្នាំម្នាក់នៅ Lima។ លោក Orlando Arteaga ថ្លែងថា លោកមិនដែលស្មានដល់ថា លោកបានឃើញទិដ្ឋភាពស្លាប់យ៉ាងច្រើនបែបនេះសោះ។
លោក Arteaga អាយុ40ឆ្នាំ ជាអ្នកទទួលខុសត្រូវលើឡបូជាសព កំពុងតែធ្វើការយ៉ាងមមាញឹក។ សាកសពដែលដាក់ក្នុងមឈូសធ្វើអំពីក្រដាស់រឹងយ៉ាងច្រើនកំពុងស្ថិតនៅគរលើគ្នានៅក្បែរនោះ រង់ចាំដល់វេនត្រូវបូជា។
លោក Orlando Arteaga បន្តថា “នេះគ្រាន់តែជាសាកសពមួយចំនួនតួចប៉ុណ្ណោះ។ នៅមានសាកសពជាច្រើនទៀតដែលដាក់នៅកន្លែងផ្សេងៗ ដោយសារតែទីនេះពេញអស់ហើយ”។ លោកថ្លែងថា “ពិតជាមិនមានអ្នកណាម្នាក់គួរតែត្រូវធ្វើការនេះឡើយ សូម្បីតែមនុស្សដែលខ្ញុំស្អប់បំផុត”៕
ប្រភព៖ សារព័ត៌មានបរទេស
July 21, 2020
អារ៉ាប់រួម បាញ់បង្ហោះយានអវកាស ឆ្ពោះទៅពិភពផ្កាយព្រះអង្គារ ជាបេសកកម្មរុករកពិភពក្រៅផែនដីដំបូងបំផុត
ប្រទេសអារ៉ាប់រួម បានធ្វើការបាញ់បង្ហោះយានអវកាសរបស់ខ្លួនមួយ ដែលនឹងធ្វើដំណើរឆ្ពោះទៅពិភពផ្កាយព្រះអង្គារ។
យានអវកាសដំបូងមួយនេះ ត្រូវបានបាញ់បង្ហោះចេញពីកោះ Tanegashima ប្រទេសជប៉ុន នាព្រឹកថ្ងៃទី20 ខែកក្កដា ឆ្នាំ2020។ នេះជាបេសកកម្មរុករកពិភពក្រៅផែនដី លើកដំបូងហើយ របស់ពិភពអារ៉ាប់។
យានអវកាសនេះ នឹងមិនចុះចតលើផ្ទៃដីពិភពផ្កាយព្រះអង្គារទេ ដោយគ្រាន់តែហោះនៅលើគន្លងផ្លូវ ក្នុងរយៈពេល 1ឆ្នាំនៃពិភពផ្កាយព្រះអង្គារ ឬស្មើនឹង 687ថ្ងៃរបស់ផែនដីប៉ុណ្ណោះ។
យានអវកាសដែលមានឈ្មោះថា «Amal ឬ HOPE» គ្រោងនឹងធ្វើដំណើររយៈពេល 7ខែ ចម្ងាយ 500លានគីឡូម៉ែត្រ ដើម្បីទៅដល់ពិភពផ្កាយព្រះអង្គារ ពោលគឺរំពឹងថា នឹងទៅដល់ទីនោះក្នុងអំឡុងខែកុម្ភៈ ឆ្នាំ2021 ដែលត្រូវនឹងខួប 50ឆ្នាំនៃការបង្កើតប្រទេសអារ៉ាប់រួម។
យាន HOPE ត្រូវបានបាញ់បង្ហោះតាមរយៈគ្រាប់រ៉ុក្កែត H-IIA F42 របស់ក្រុមហ៊ុនជប៉ុន Mitsubishi។ ដើមឡើយ បេសកកម្មនេះ គ្រោងបាញ់បង្ហោះតាំងពីថ្ងៃទី14 កក្កដា ប៉ុន្តែត្រូវពន្យារពេលមកដល់ថ្ងៃម្សិលមិញ(ទី20កក្កដា)នេះ ដោយសារបញ្ហាអាកាសធាតុ។
បេសកកម្មរបស់វា គឺដើម្បីផ្តិតយករូបភាពអាកាសធាតុ បរិយាកាសលើពិភពផ្កាយព្រះអង្គារ ដើម្បីធ្វើជាមូលដ្ឋានសម្រាប់ស្រាវជ្រាវបន្ថែម ក្នុងការបញ្ជូនមនុស្សទៅពិភពនោះ ក្នុងរយៈពេល 100ឆ្នាំក្រោយ។ អារ៉ាប់រួម ក៏ចង់ឱ្យគម្រោងការនេះ ក្លាយជាប្រភពជំរុញយុវជនអារ៉ាប់ផងដែរ៕
July 21, 2020