សង្គម និងសេដ្ឋកិច្ច - La Reine Media

ប្រាក់ចំណូលនៃក្រុមហ៊ុនបច្ចេកវិទ្យាលំដាប់កំពូលចំនួន3 កើនឡើងខ្ពស់ជាងគេក្នុងត្រីមាសទី2នេះ

ក្រុមបច្ចេកវិទ្យា Amazon, Apple និង Facebook បានចេញរបាយការណ៍សម្រាប់ត្រីមាសទី2 ជាមួយនឹងលទ្ធផលគួរជាទីគាប់ចិត្ត ដោយសារតែតម្រូវការប្រើប្រាស់សេវាកម្មបានកើនឡើងខ្ពស់នៅក្នុងសម័យCOVID-19។

ក្រុមហ៊ុន Amazon កាលពីម្សិលមិញ (30កក្កដា) បានប្រកាសថា រកបានចំណូល88.9ពាន់លានដុល្លារអាមេរិក កើត40% បើធៀបជាមួយនឹងដំណាក់កាលដូចគ្នាកាលពីឆ្នាំទៅ និងខ្ពស់ជាងឆ្ងាយ បើធៀបជាមួយនឹងការព្យាករ (81.6ពាន់លានដុល្លារ) របស់ក្រុមអ្នកវិភាគ។ ប្រាក់ចំណេញក៏បានកើនឡើងទ្វេដង (5.2ពាន់លានដុល្លារ) បើទោះជាក្រុមហ៊ុននេះបានចំណាយជាង4ពាន់លានដុល្លារដើម្បីប្រឆាំងCOVID-19 កាលពីត្រីមាសកន្លងទៅ។ មូលបត្រ Amazon បានកើន4% ក្នុងការជួញដូរក្រៅម៉ោង បន្ទាប់ពីរបាយការណ៍ខាងលើត្រូវបានប្រកាស។

ក្រុមហ៊ុន Apple ក៏មានឈ្មោះនៅក្នុងបញ្ជីស្ដីអំពីក្រុមហ៊ុនដែលរកចំណូលបានច្រើនជាងគេក្នុងវិបត្តិសុខភាពនេះដែរ។ អតិថិជនចាស់ និងថ្មីជាច្រើន បានងាកមកប្រើប្រាស់សេវាកម្មអនឡាញរបស់ក្រុមហ៊ុននេះក្នុងគ្រាដែលពួកគេត្រូវបានបង្ខាំងខ្លួន ឬរឹតត្បិតលើការដើរហារ ដែលប្រការនេះបានជួយឱ្យ Apple រកបានចំណូលឡើងដល់59.7ពាន់លានដុល្លារអាមេរិកនៅក្នុងត្រីមាសទី2នេះ។ តួលេខនេះបានកើន11%បើធៀបនឹងដំណាក់កាលដូចគ្នាកាលពីឆ្នាំទៅ។ ប្រាក់ចំណេញសុទ្ធរបស់ Apple ក៏បានកើនដល់11.2ពាន់លានដុល្លារ។

ទីផ្សារពិភពលោកបានរួមចំណែកដល់ទៅ60% នៅក្នុងចំណូលសរុបរបស់ក្រុមហ៊ុននេះកាលពីត្រីមាសមុន។ សេវាកម្ម App Store, Apple Music, Video និង iCloud សុទ្ធតែរកបានចំណូលខ្ពស់ជាងពេលណាៗទាំងអស់។

ចំណែកក្រុមហ៊ុន Facebook វិញ ក៏ទទួលបានអ្នកប្រើប្រាស់ច្រើនផងដែរ។ រហូតដល់ដំណាច់ត្រីមាសទី2នេះ តួលេខអ្នកប្រើប្រាស់សកម្មប្រចាំខែរបស់ Facebook បានឡើងដល់2.7ពាន់លាននាក់ កើន12% បើធៀបនឹងដំណាក់កាលដូចគ្នាកាលពីឆ្នាំ2019។ បើសិនជាបូករួមទាំង Instagram និង WhatsApp ក្រុមហ៊ុននេះមានអ្នកប្រើប្រាស់សកម្មប្រចាំខែឡើងដល់3ពាន់លាននាក់ឯណោះ។

ប្រាក់ចំណូលរបស់ Facebook ក៏បានកើន11% ហើយបើគិតជាប្រាក់គឺស្មើនឹង18.7ពាន់លានដុល្លារ កាលពីត្រីមាសមុន។

របាយការណ៍ហិរញ្ញវត្ថុរបស់ក្រុមហ៊ុនទាំង3ខាងលើនេះ ត្រូវបានប្រកាសក្នុងថ្ងៃតែមួយជាមួយនឹង GDP សហរដ្ឋអាមេរិក។ GDP សហរដ្ឋអាមេរិក បានថយចុះ32.9% ដោយសារតែ COVID-19៕

ប្រភព៖ សារព័ត៌មានបរទេស

July 31, 2020

តារាចម្រៀងវ៉ាន់ នីឡា ៖ «ខ្ញុំជឿហើយ បុរសពាក់សក្តិលើស្មាដែលមានឪពុកជាមន្ត្រីជាន់ខ្ពស់»

ដូចមហាជនបានដឹងហើយថា អតីតសង្សារ របស់តារាចម្រៀងស្រី កញ្ញា វ៉ាន់ នីឡា គឺលោក គុយ សិទ្ធិសក្តិ ត្រូវបានគេស្គាល់គ្រប់គ្នាថា ជាមន្ត្រីប៉ូលីសពាក់សក្តិ4កន្លះ បម្រើការងារនៅអគ្គនាយកដ្ឋានពន្ធនាគារ ក្រសួងមហាផ្ទៃ និងត្រូវជាកូនប្រុសរបស់លោកឧត្តមសេនីយ៍ គុយ ប៊ុនសន អតីតអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ។

រឿងក្តីជនជាប់ចោទ គុយ សិទ្ធិសក្តិ ជាមួយកញ្ញា សុខ ចិន្ដា ហៅ វ៉ាន់ នីឡា អតីតតារាចម្រៀងហង្សមាស ពាក់ព័ន្ធការប្រើហិង្សា និងបង្ហោះរូបភាពអាក្រាតនោះ ត្រូវបានសាលាដំបូងរាជធានីភ្នំពេញប្រកាសសាលក្រមម្ដងហើយ នៅរសៀលថ្ងៃ15 ខែសីហា ឆ្នាំ2017 ដោយផ្តន្ទាទោសជនជាប់ចោទ ដាក់ពន្ធនាគាររយៈពេល1ឆ្នាំ និងបង្គាប់ឱ្យសងសំណងជំងឺចិត្ត ដល់ដើមបណ្ដឹងចំនួន200លានរៀល។

នៅក្នុងការប្រកាសសាលក្រមនេះ គេពុំបានឮលោក កោ វណ្ឌី អនុប្រធានសាលាដំបូងរាជធានីភ្នំពេញ ប្រកាសចេញដីកាបង្គាប់ឱ្យចាប់ខ្លួនជនជាប់ចោទ គុយ សិទ្ធិសក្តិ ទេ (ពុំមានចេញដីកាបង្គាប់ឱ្យចាប់ខ្លួនទេ) តែបើកផ្លូវឱ្យជនជាប់ចោទប្តឹងឧទ្ធរណ៍តាមកំណត់ច្បាប់។ ជនជាប់ចោទ គុយ សិទ្ធិសក្តិ ត្រូវបានចោទប្រកាន់ពីបទ «ហិង្សាដោយចេតនានិងចែកចាយរូបភាពអាសអាភាស» ប្រព្រឹត្តនៅរាជធានីភ្នំពេញ កាលពីអំឡុងឆ្នាំ2016 តាមមាត្រា217 នៃក្រមព្រហ្មទណ្ឌ និងមាត្រា38 និងមាត្រា39 ច្បាប់ស្តីពីការបង្ក្រាបអំពើជួញ ដូរមនុស្ស និងអំពើធ្វើអាជីវកម្មផ្លូវភេទ។

ពាក់ព័ន្ធរឿងរ៉ាវ និងការអូសបន្លាយក្ដីរហូត 4 ឆ្នាំនេះ តារាចម្រៀងវ៉ាន់ នីឡា បានលើកឡើងថា នៅថ្ងៃទី 31 ខែកក្កដានេះ នាងត្រូវឡើងទៅសាលាឧទ្ធរណ៍ ព្រោះបណ្ដឹងនេះ ត្រូវបានអតីតសង្សារ ប្តឹងជំទាស់ទៅកំពូល តែកំពូលជំរុញមកឧទ្ធរណ៍វិញ។ នីឡា បញ្ជាក់ថា អ្វីដែលខ្លួនចង់បានពេលនេះ គឺយុត្តិធម៌ ព្រោះជននោះនៅក្រៅឃុំ ធ្វើការដើរហើរធ្វើការងារធម្មតា ក្រោយពីសាលាដំបូងនិងសាលាឧទ្ធរណ៍ ប្រកាសសាលក្រមនិងសាលដីការួចទៅហើយនោះ។ នីឡា បញ្ជាក់ថា «ម្នាក់នឹងគេមានអំណាចខ្លាំងសំបើមណាស់មែនទេ បានជាជននេះនៅរួចខ្លួនធ្វើដូចគ្មានរឿងអ្វីកើតឡើង ។ ព័ត៌មានលំអិត ឱ្យកាន់តែច្បាស ឱ្យកាន់តែភ្លឺ ខ្ញុំបកស្រាយនៅពេលឆាប់ៗ នេះ។ ខ្ញុំជឿហើយ បុរសពាក់សក្តិលើស្មា ដែលមានឪពុកជាមន្ត្រីជាន់ខ្ពស់ អាចធ្វើអ្វីបានស្រេចចិត្តដោយគ្មានអ្នកចាប់ទោស»។ តារាចម្រៀងវ៉ាន់ នីឡា បានសម្ដែងអារម្មណ៍ថា «ខ្ញុំជឿហើយ បុរសពាក់សក្តិលើស្មាដែលមានឪពុកជាមន្ត្រីជាន់ខ្ពស់»៕

July 31, 2020

ត្បូងឃ្មុំ ចាញ់ ព្រៃវែង ទាំងសោកស្តាយ ក្នុងវគ្គផ្តាច់ព្រ័ត្រពានសម្តេច ហ៊ុន សែន ថ្នាក់ខេត្ត

ការប្រកួតវគ្គផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី14 ឆ្នាំ2020 (ថ្នាក់ខេត្ត) បានបញ្ចប់ទៅហើយកាលពីល្ងាចម្សិលមិញនេះ ដោយមានការប្រកួតចំនួន 2គូ គឺខេត្តកែប ប្រកួតជាមួយនឹងខេត្តសៀមរាប ដណ្តើមចំណាត់ថ្នាក់លេខ3 ខណៈដែលព្រៃវែង ប៉ះត្បូងឃ្មុំដើម្បីដណ្តើមតំណែងជើងឯក។

ជាលទ្ធផល ក្រុមខេត្តកែប បានយកឈ្នះ ខេត្តសៀមរាបដោយលទ្ធផល 3ទល់នឹង0 ខណៈដែលជើងឯកឆ្នាំ2019 ខេត្តត្បូងឃ្មុំបានត្រឹមចាញ់ក្រុមខេត្តព្រៃវែង ទាំងមិនអស់ចិត្ត ដោយលទ្ធផល 1ទល់នឹង0។

ចំពោះកីឡាករល្អប្រចាំពានរង្វាន់នេះបានទៅលើ កីឡាករ គី រីណា របស់ខេត្តព្រៃវែង ចំណែកឯគ្រូបង្វឹក និងអ្នកចាំទីល្អ ក៏បានទៅលើខេត្តព្រៃវែង ហើយកីឡាករស៊ុតបញ្ចូលទីបានច្រើនជាងគេបានទៅលើកីឡាករខ្សែប្រយុទ្ធរបស់ខេត្តកែប៕

July 30, 2020

បានពានភ្លាម Juventus ភ្លាត់ 2គ្រាប់ភ្លែត យប់មិញ

ការប្រកួតលីកកំពូលអ៊ីតាលី កាលពីយប់ថ្ងៃទី29 កក្កដា ឆ្នាំ2020 នេះក្នុងសប្តាហ៍ទី37 ខណៈដែលការប្រកួតនៅសល់តែ 1ប្រកួតទៀតប៉ុណ្ណោះ ដោយក្នុងនោះក្រុមដែលដឹងខ្លួនថា ជាជើងឯកហើយគឺ Juventus បែរជាភ្លាត់ស្នៀតចាញ់ក្រុម Cagliari ដល់ទៅ 2ទល់នឹង0។

ក្រុម Juventus ដែលលេងកាលយប់មិញ គឺដើម្បីបង្គ្រប់កិច្ចតែប៉ុណ្ណោះ ខណៈដែលពួកគេបានក្លាយជាជើងឯករួចទៅហើយតាំងពីសប្ដាហ៍មុនមកម្ល៉េះ។ យ៉ាងណាមិញ នៅមានភារកិច្ចមួយទៀតសម្រាប់ Cristiano Ronaldo នៅក្នុងក្របខ័ណ្ឌលីកមួយនេះ ពោលគឺ កាប្រជែងយកស្បែកជើងមាស។ តែការបរាជ័យ កាលយប់មិញ និងការដែលមិនអាចរកគ្រាប់បាល់បាននោះ វាធ្វើឱ្យឱកាសនៃការប្រជែង នៅសល់តិចតួចបំផុត។

គួរបញ្ជាក់ដែរថា ក្រុម Cagliari អាចចាត់ទុកថា ជាក្រុមអន់មួយនៅលីកអ៊ីតាលី ដោយ 8ប្រកួតចុងក្រោយ មិនដែលស្គាល់រសជាតិឈ្នះម្តងណាឡើយ ហើយឈរនៅលេខរៀងទី 14ឯណោះ តែសប្តាហ៍នេះ បែជាអាចឈ្នះក្រុមជើងឯក Juventus ទៅវិញ៕

July 30, 2020

ចំណេះដឹងទូទៅ៖ តើពេលជិះយន្តហោះ យើងត្រូវបិទទូរស័ព្ទ ឬដាក់ Airplane Mode?

ពេលចូលដល់ក្នុងយន្តហោះ ប្រាកដជាមានការណែនាំឱ្យម្ចាស់ស្មាតហ្វូនទាំងអស់បិទទូរស័ព្ទ ឬដាក់ Airplane mode មិនខាន ជាពិសេសពេលមុនហោះឡើង(Take off) និងពេលចុះចត(Landing)។ តើហេតុអ្វី ចាំបាច់ធ្វើបែបនេះ?

លោក Nikita Schmidt ជាអ្នកបើកយន្តហោះ បានពន្យល់ថា បើអ្នកមិនបិទ ឬមិនប្រើមុខងារ Airplane mode ក្នុងទូរស័ព្ទអំឡុងពេលហោះហើរ ប្រព័ន្ធទូរស័ព្ទអាចទៅរំខានដល់អ្នកបើកបរ និងប្រព័ន្ធគ្រប់គ្រងការចរាចរលើអាកាស ប៉ុន្តែការរំខានមិនខ្លាំងដល់ថ្នាក់ មានចំណាត់ការលើទូរស័ព្ទរបស់អ្នកដំណើរឡើយ។ ការបញ្ចេញកម្រិតវិទ្យុសកម្មរបស់ទូរស័ព្ទ អាចខ្លាំងដល់ទៅ 8W ធ្វើឱ្យរំខានតិច ឬច្រើនដល់រលកសញ្ញា។

ឯការបើកប្រើមុខងារ Airplane mode អំឡុងពេលជិះយន្តហោះវិញ មិនត្រឹមតែជួយធានាសុវត្ថិភាពដល់ខ្លួនអ្នក និងអ្នករួមដំណើរប៉ុណ្ណោះទេ តែ វាក៏ជាការបង្ហាញការគោរពដល់អ្នកបើកបរយន្តហោះផងដែរ៕

July 30, 2020

ក្រុមហ៊ុន Airbus ជោគជ័យលើការតេស្តយន្តហោះ បើកស្វ័យប្រវត្តិខ្លួនឯង

ក្រុមហ៊ុន Airbus បានបញ្ចប់ដោយជោគជ័យនូវគម្រោងការ Autonomous Taxi, Take-Off and Landing (ATTOL) ដែលទាក់ទងនឹងយន្តហោះបើកបរស្វ័យប្រវត្តិ តាមរយៈការហោះហើរសាកល្បងកាលពី 2ឆ្នាំកន្លងទៅ។

ក្នុងគម្រោងការដែលជោគជ័យនេះ Airbus អាចសម្រេចលើការបើកបរ, ការហោះឡើង និងការចុះចតយន្តហោះខ្នាតធំដោយស្វ័យប្រវត្តិពិតប្រាកដ បានដោយជោគជ័យ ដោយបានប្រើប្រាស់បច្ចេកវិទ្យាចំណាំរូបភាពបំពាក់លើយន្តហោះផ្ទាល់តែម្ដង។

Airbus បានធ្វើតេស្តហោះហើរជាង 500លើក ដែលការហោះហើរ 450លើក គឺដើម្បីប្រមូលយកទិន្នន័យជាវីដេអូ ដើម្បីឱ្យប្រព័ន្ធការងារ ដំណើរការដោយរលូន។ ក្នុងនោះដែរការហោះហើរចំនួន 6លើក ដែលក្នុង 1លើកៗ មានការហោះឡើង និងចុះចត 5ដង គឺធ្វើឡើងដើម្បីសាកល្បងសមត្ថភាពការបើកបរស្វ័យប្រវត្តិរបស់យន្តហោះ។

គម្រោងការ ATTOL ដែលបង្កើតឡើងដោយ Airbus នេះ គឺក្នុងគោលបំណងស្វែងយល់អំពីផលប្រយោជន៍នៃបច្ចេកវិទ្យាបើកបរដោយស្វ័យប្រវត្តិសម្រាប់យន្តហោះ និងដើម្បីជួយឱ្យពីឡុត ផ្ដោតលើការធ្វើការសម្រេចចិត្តក្នុងស្ថានភាពបន្ទាន់ណាមួយ និងបេសកកម្មដទៃទៀត ជាជាងផ្ដោតតែលើការបញ្ជាយន្តហោះ៕

July 30, 2020

មហាសេដ្ឋីមានប្រភពជាអ្នកបោសសម្អាតក្នុងរោងចក្រ៖ ពេលនេះនៅតែប្រើ Nokia បែបបុរាណ បើទោះមានទ្រព្យ2.2ពាន់លានដុល្លារ

បច្ចុប្បន្ន មហាសេដ្ឋី Lucio Tan គឺជាស្ថាបនិកនិងជាប្រធានក្រុមហ៊ុន LT Group ដែលមានរោងចក្របារី ស្រា ធនាគារ និងអចលនទ្រព្យដែលមានតម្លៃរាប់ពាន់លានដុល្លារអាមេរិក។

Lucio Tan ដែលជា CEO របស់ក្រុមហ៊ុន Philippines Airline និងជាស្ថាបនិករបស់ក្រុមហ៊ុន LT គឺជាមហាសេដ្ឋីដែលមានប្រភពពីគ្រួសារក្រីក្រម្នាក់ ដែលត្រូវបានគេស្គាល់ច្រើននៅតំបន់អាស៊ីអាគ្នេយ៍។

ដើម្បីទទួលបានជោគជ័យដូចសព្វថ្ងៃ មហាសេដ្ឋីហ្វីលីពីនដើមកំណើតចិនរូបនេះ បានឆ្លងកាត់ឧបសគ្គរាប់មិនអស់ ដែលក្នុងនោះ គេមិនអាចមិនរៀបរាប់អំពីដំណាក់កាលដែលលោកធ្វើជាអ្នកបោសសម្អាតដើម្បីរកប្រាក់មកផ្គត់ផ្គង់ការសិក្សារបស់ខ្លួននោះឡើយ។

មិនដូចទៅនឹងកំពូលមហាសេដ្ឋីទាំង10រូបនៅហ្វីលីពីនដែលមានឈ្មោះនៅក្នុងបញ្ជីមហាសេដ្ឋីពិភពលោកឆ្នាំ2020របស់ Forbes នោះទេ លោក Lucio Tan បានចាប់កំណើតនៅក្នុងគ្រួសារដែលមានជីវភាពខ្វះខាតមួយនៅតំបន់ Fujian ប្រទេសចិន។ អំឡុងពេលដែលលោកមានអាយុ4ឆ្នាំ គ្រួសាររបស់លោកបានទៅរស់នៅក្នុងទីក្រុង Cebu ប្រទេសហ្វីលីពីន។

បច្ចុប្បន្ន លោក Lucio Tan គឺជាស្ថាបនិក និងជាប្រធានក្រុមហ៊ុន LT ដែលមានក្រុមហ៊ុនបុត្រសម្ព័ន្ធជាច្រើនរកស៊ីខាងផលិតបារី ស្រា ធនាគារ និងអចលនទ្រព្យដែលមានតម្លៃរាប់ពាន់លានដុល្លារអាមេរិក។

ខាងក្រោមនេះគឺជាព័ត៌មានមួយចំនួនដែលលោកអ្នកប្រហែលជាមិនទាន់បានដឹងអំពីមហាសេដ្ឋី Lucio Tan អាយុ86ឆ្នាំ និងមានទ្រព្យ2.2ពាន់លានដុល្លារ៖

ធ្លាប់ធ្វើជាអ្នកបោសសម្អាតដើម្បីយកប្រាក់ទៅរៀន

ដោយសារតែជាកូនច្បងក្នុងចំណោមបងប្អូនប្រុសស្រីចំនួន8នាក់ លោក Lucio Tan ត្រូវទទួលបន្ទុកច្រើននៅក្នុងគ្រួសារ។ ដើម្បីបានប្រាក់ទៅរៀនផ្នែកបច្ចេកទេសគីមីសាស្ត្រនៅសាកលវិទ្យាល័យ Far Eastern University នៅទីក្រុងម៉ានីល និស្សិតវ័យក្មេង Lucio Tan បានសុំការងារជាអ្នកបោសសម្អាត នៅក្នុងរោងចក្រផលិតបារី។

ក្រោយមួយរយៈពេលយូរ នៅពេលដែលមានបទពិសោធន៍ច្រើនគួរសមនៅក្នុងរោងចក្រ ដោយសារទទួលបានឱកាសចូលធ្វើការជាកម្មករផលិតបារី ដែលក្រោយមកទៀតបានក្លាយជាអ្នកសម្របសម្រួលផ្នែកផលិត និងបានរៀនសូត្រចេះដឹងច្រើនគួរសម លោក Tan ក៏បានសម្រេចចិត្តបើកក្រុមហ៊ុនផ្ទាល់ខ្លួនមួយដែលមានឈ្មោះថា Fortune Tobacco ក្នុងឆ្នាំ1966។ ក្រោយមក Fortune Tobacco ក៏បានក្លាយជាក្រុមហ៊ុនផលិតបារីធំជាងគេបង្អស់នៅប្រទេសហ្វីលីពីន។

នៅតែប្រើប្រាស់ទូរស័ព្ទ Nokia បុរាណ

បើទោះជាមានទ្រព្យច្រើនដែលអាចទិញទូរស័ព្ទតម្លៃថ្លៃមួយណាក៏បាន ប៉ុន្តែ សារព័ត៌មានហ្វីលីពីនបានសង្កេតឃើញថា ក្នុងរយៈពេលច្រើនឆ្នាំមកនេះ លោក Tan ដែលមានវ័យ86ឆ្នាំ តែងតែប្រើប្រាស់ទូរស័ព្ទ Nokia បែបបុរាណ។ អ្វីដែលគួរចាប់អារម្មណ៍ នោះគឺថា លោកមិនមែនប្រើទូរស័ព្ទ Nokia បែបបុរាណនេះតែ1គ្រឿងទេ តែលោកប្រើដល់ទៅ4គ្រឿងឯណោះ ហើយពិសេសជាងនេះទៀត គឺទូរស័ព្ទទាំងនេះ មានម៉ូដែលដូចគ្នាទាំងអស់។

ក្រោកពីដំណេកម៉ោង4ទៀបភ្លឺរាល់ថ្ងៃដើម្បីលេងហ្គោល

ចំណង់ចំណូលចិត្តរបស់លោក Lucio Tan គឺមានច្រើន រួមមានទាំងវប្បធម៌និងប្រវត្តិសាស្ត្រចិន តន្ត្រីបុរាណ និងកីឡាមួយចំនួន។ កីឡាមួយក្នុងចំណោមកីឡាដែលធ្វើឱ្យលោក Lucio Tan ត្រូវក្រោកពីម៉ោង4ទៀបភ្លឺ នោះគឺកីឡាវាយកូនហ្គោល។ លោកតែងតែលេងហ្គោលនៅក្នុងក្លឹប Wack Wack Golf & Country Club ជាមួយនឹងមិត្តភក្ដិចាស់ៗរបស់លោក។ បន្ទាប់ពីការលេងកីឡានេះ ទើបលោកចាប់ផ្ដើមបំពេញការងារនៅក្រុមហ៊ុន ហើយបញ្ចប់ការងារប្រចាំថ្ងៃរបស់លោកនៅមុនម៉ោង9យប់។

លោក Lucio Tan ធ្លាប់ត្រូវបានប្រធានាធិបតី Rodrigo Duterte ចោទប្រកាន់ពីបទគេចពន្ធ

ប្រធានាធិបតីហ្វីលីពីន លោក Rodrigo Duterte (ស្ដាំ) និងមហាសេដ្ឋី Tan

សូម្បីតែក្នុងគ្រាទទួលបានជោគជ័យក្នុងការរកស៊ី លោក Tan នៅតែជាប់ទាក់ទិននឹងរឿងអាស្រូវមួយចំនួន។ ឆ្នាំ2017 ប្រធានាធិបតីហ្វីលីពីន លោក Rodrigo Duterte ធ្លាប់បានចោទប្រកាន់លោក Tan ថា នៅជំពាក់រដ្ឋាភិបាលចំនួន600លានដុល្លារដែលជាប្រាក់ត្រូវបង់ពន្ធ។ បន្ទាប់ពីលោក Tan ត្រូវបានលុបចោលការចោទប្រកាន់ ប្រធានាធិបតី Rodrigo Duterte ប្រកាសថា នឹងលែងនិយាយដល់បញ្ហានេះ។

បញ្ជូននិស្សិត1,000នាក់ទៅសិក្សានៅប្រទេសចិនជារៀងរាល់ឆ្នាំ

ជាមនុស្សចូលចិត្តការសិក្សា លោក Tan ពេញចិត្តជាខ្លាំងក្នុងការធ្វើសកម្មភាពផ្នែកអប់រំ។ ជារៀងរាល់ឆ្នាំ លោកបញ្ជូននិស្សិតចំនួន1,000នាក់ទៅកាន់ប្រទេសចិនដើម្បីសិក្សាស្វែងយល់អំពីប្រវត្តិសាស្ត្រ ភាសា និងវប្បធម៌របស់ប្រទេសនេះ។ មហាសេដ្ឋី Lucio Tan ថែមទាំងផ្ដល់ជំនួយជាប្រាក់កាសជាច្រើនដើម្បីសាងសង់សាលារៀន និងបង្កើតមូលនិធិមនុស្សធម៌មួយដើម្បីកែលម្អបទដ្ឋានមួយចំនួននៅក្នុងវិស័យអប់រំទៀតផង៕

ប្រភព៖ SCMP

July 30, 2020

រដ្ឋាភិបាលចេញយុទ្ធសាស្ត្រ5ចំណុចដើម្បីអភិវឌ្ឍវិស័យកាត់ដេរ ស្បែកជើង និងកាបូបនៅកម្ពុជារហូតដល់ឆ្នាំ2025

វិស័យកាត់ដេរ ស្បែកជើង និងកាបូបនៅកម្ពុជា ជាផ្នែកយ៉ាងសំខាន់មួយដែលអាចផ្តល់ការងារធ្វើសម្រាប់ប្រជាជនជាច្រើននាក់នៅទូទាំងប្រទេស និងផ្តល់ផលចំណេញជាច្រើនសម្រាប់វិស័យសេដ្ឋកិច្ចកម្ពុជា។

ក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា វិស័យកាត់ដេរ ផលិតស្បែកជើង និងកាបូប បានដើរតួយ៉ាងសំខាន់ រួមចំណែកយ៉ាងធំដល់ការអភិវឌ្ឍសេដ្ឋកិច្ចកម្ពុជា តាមរយៈ ការបង្កើតការងារ បង្តើនចំណូលដល់ប្រជាពលរដ្ឋ និងកាត់បន្ថយភាពក្រីក្រ ។ ថ្វីត្បិតវិស័យកាត់ដេរ ផលិតស្បែកជើង និងកាបូបត្រូវបានអភិវឌ្ឍជាបន្តបន្ទាប់ ដោយផ្អែកលើភាពខ្លាំងដែលជាឧត្តមភាពប្រកួតប្រជែងកន្លងមក វិស័យ នេះ នៅជួបនឹងបញ្ហាប្រឈមមួយចំនួន ។

ដើម្បីដោះស្រាយបញ្ហាប្រឈម និងអភិវឌ្ឍវិស័យដ៏សំខាន់នេះ រដ្ឋាភិបាលបានរៀបចំយុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា 2020-2025 ដោយក្នុងនោះមានយុទ្ធសាស្ត្រសំខាន់ៗចំនួន5ចំណុចគឺ៖

បន្តពង្រឹងធនធានមនុស្សដើម្បីបង្កើនផលិតភាព និងបង្កើតគន្លងអាជីពសម្រាប់កម្មករ-និយោជិត
2. បន្តធ្វើឱ្យប្រសើរឡើងនូវលក្ខខណ្ឌការងារ និងសុខុមាលភាពរបស់កម្មករ-និយោជិត
3. លើកកម្ពស់ការវិនិយោគក្នុងស្រុក និងអន្តរជាតិដោយផ្តោតលើផលិតផលមានបន្ថែមតម្លៃខ្ពស់
4. ទាក់ទាញការវិនិយោគនៅក្នុងឧស្សាហកម្មគាំទ្រវិស័យនេះ
5. ជំរុញការធ្វើពិពិធកម្មទីផ្សារសម្រាប់ការនាំចេញផលិតផលកាត់ដេរ ស្បែកជើង និងកាបូប៕

July 30, 2020

វិធីបញ្ឈប់និស្ស័យស្រែកគំហកដាក់កូន ដឹងឱ្យហើយមុនកូនតតាំង

ជារឿងធម្មតាទៅហើយ ដែលពេលកូនៗធ្វើអ្វីខុស ឬមិនត្រូវចិត្ត លោកឪពុកអ្នកម្តាយជាច្រើននាក់តែងតែកើតអារម្មណ័មួម៉ៅ ក្តៅក្រហាយ រហូតពេលខ្លះក្លាយជាទម្លាប់និស្ស័យស្រែកគំហកខ្លាំងៗដាក់កូន តែ ឡា រ៉ែនសូមប្រាប់ទៅចុះថា ទង្វើមួយនេះមិនគួរធ្វើឱ្យក្លាយជាទម្លាប់នោះទេ ព្រោះខ្នាតមានអ្នកមកស្រែកឡូឡា ឬនិយាយស្តីច្រងេងច្រងាងខ្លាំងៗដាក់យើងដែលជាមនុស្សធំម៉េចយើងនៅមិនពេញចិត្តផង ចុះទម្រាំកូនៗដែលគ្នានៅមិនទាន់ដឹងអីនោះ។ ប្រាកដណាស់ថា កូនៗយើងក៏មិនចូលចិត្តដែរ ថែមទាំងជាការធ្វើបាបដួងចិត្តដ៏តូចមួយរបស់គេទៀតផង ដូច្នេះបើចង់បញ្ឈប់និស្ស័យនេះ សូមសាកល្បងធ្វើតាម 5 វិធីដែលឡា រ៉ែននាំយកមកជម្រាបជូននេះលមើល…។

1 . រកការងារអ្វីមួយធ្វើដើម្បីឱ្យអារម្មណ័ និងចិត្តត្រជាក់ចុះវិញ

នៅពេលណាដែលកូនសម្លាញ់ធ្វើឱ្យអ្នកមានអារម្មណ៍ខឹងមួម៉ៅ ចូរសាកល្បងតាំងស្មារតី ហើយនឹកដល់ក្តីតាំងចិត្តដែលអ្នកចង់បញ្ឈប់និស្ស័យនេះ បន្ទាប់ពីនោះក៏សាកល្បងរកការងារអ្វីផ្សេងៗធ្វើដើម្បីឱ្យចិត្តត្រជាក់ចុះវិញ រួចសឹមបែរទៅនិយាយជាមួយកូនដោយហេតុផលល្អៗត្រឹមត្រូវ។ សូមសាកល្បងធ្វើបែបហ្នឹងគ្រប់ពេលដែលមានអារម្មណ៍ថាខឹងមួម៉ៅកូន អាចនឹងជួយកាត់បន្ថយ និងបញ្ឈប់និស្ស័យនេះបាន។

2 . ដូរទឹកដមសំឡេងឱ្យស្រាលចុះ

សាកល្បងប្តូរពីការដែលចូលចិត្តតែប្រើសំឡេងមាំៗរឹងៗ ឬខ្លាំងៗស្រែកឡូឡាដាក់កូនតូច មកជាការនិយាយពិភាក្សាគ្នាដោយសំឡេងធម្មតា ស្រទន់គួរឱ្យចង់ស្តាប់វិញប្រសើរជាង។ ឡា រ៉ែនសូមប្រាប់ទៅចុះថា កូនៗនឹងជឿជាក់ និងស្តាប់អ្នកខ្លាំងជាងការដំឡើងសំឡេងដាក់គេទៅទៀត ព្រោះបើនិយាយដោយសំឡេងក្ឌុងក្ឌាំងវ៉ោកវ៉ាក សូមប្រាប់ទៅចុះថា យូរៗទៅកូនអាចនឹងមានអាការតតាំង និងរឹងទទឹង លែងជឿស្តាប់អ្នកតទៅទៀតក៏អាចថាបានដែរ ដល់ថ្ងៃនោះអ្វីៗនឹងអាចលែងកែកុនបានហើយ។

3 . កាត់បន្ថយការនឹកសង្ឃឹមលើកូន

បើអ្នកសង្កេតឃើញថា ខ្លួនឯងចូលចិត្តស្រែកឡូឡាដំឡើងសំឡេងដាក់កូនជាប្រចាំនោះ អាចនឹងមានន័យពីការដែលអ្នកនឹកសង្ឃឹមលើរូបកូនខ្លាំងជ្រុលពេក ដូច្នេះសូមសាកល្បងកាត់បន្ថយក្តីនឹកសង្ឃឹមនោះឱ្យតិចចុះ យល់ដឹងអំពីកូនឱ្យខ្លាំងឡើង ធានាថា និស្ស័យចូលចិត្តដំឡើងសំឡេងដាក់កូននឹងហាត់អស់យ៉ាងបណ្តើរៗដោយឯកឯងមិនខាន។

4 . តាំងស្មារតីមុននឹងនិយាយ

មុននឹងប្រើពាក្យសំដីស្រែកបន្ទោសស្តីថាឱ្យកូនគ្រប់ពេល សូមឱ្យឪពុកម្តាយតាំងសតិឱ្យល្អជាមុនសិន ឬអាចនឹងទន្ទេញឱ្យជាប់ក្នុងចិត្តថា គេគឺកូនរបស់យើង គេគ្រាន់តែជាកូនក្មេង គ្រាន់តែដាស់តឿនសតិខ្លួនឯងកុំឱ្យខឹងមួម៉ៅរហូតលែងដឹងខុសត្រូវតែប៉ុណ្ណោះ។ បើដាស់តឿនខ្លួនឯងបានគ្រប់ពេលបែបនេះ ធានាថានឹងបញ្ឈប់និស្ស័យយ៉ាប់នេះបានជាមិនខាន។

5 . រកមើលកិច្ចការងារធ្វើបន្ធូរអារម្មណ៍

បើលោកឪពុកអ្នកម្តាយលីសែងភាពតានតឹងធុញថប់ច្រើនរឿង រហូតធ្វើឱ្យបាត់បង់សតិស្មារតីមានរឿងអីបន្តិចគិតែស្រែកឡូឡេដាក់កូនញឹកញាប់នោះ សូមប្រាប់ទៅចុះ គួរតែរិះរកវិធីបន្ធូរអារម្មណ៍ធុញថប់តានតឹងទាំងនោះចោលខ្លះទៅ ដូចជា ស្តាប់បទភ្លេង ឬចម្រៀងបែបសប្បាយៗ ឬហាត់ប្រាណខ្លះក៏ល្អដែរ ធានាថា ដល់លែងមានភាពធុញថប់តានតឹងហើយនោះ និស្ស័យភ្លេចខ្លួនស្រែកគំហកដាក់កូន នឹងបាត់អស់ដោយឯកឯង។

បើសិនបញ្ឈប់និស្ស័យមិនល្អនេះតាំងពីដំបូងៗបាន ក្រៅពីនឹងហុចផលល្អដល់ខ្លួនលោកឪពុកអ្នកម្តាយហើយនោះ នៅជួយឱ្យកូនមិនជាប់និស្ស័យច្រងេងច្រងាងនៅពេលធំឡើងទៀតផង។ ល្អបែបនេះ ឪពុកម្តាយដែលមាននិស្ស័យឆាប់ខឹងមួម៉ៅត្រូវតែនាំគ្នាចាប់ផ្តើមហាត់រៀនហើយមើលទៅ៕

July 29, 2020

តើប្រទេសណាខ្លះនឹងធ្វើជាម្ចាស់ផ្ទះស៊ីហ្គេម បន្ទាប់ពីកម្ពុជា?

កាលពីដើមខែកក្កដា ឆ្នាំ2020 សហព័ន្ធកីឡាអាស៊ីអាគ្នេយ៍ (SEAGF) បានបើកការប្រជុំមួយនៅក្នុងទីក្រុងហាណូយ ប្រទេសវៀតណាម ដែលជាទីក្រុងម្ចាស់ផ្ទះស៊ីហ្គេមឆ្នាំក្រោយនេះ(2021) ដើម្បីពិភាក្សាអំពីបេក្ខភាពម្ចាស់ផ្ទះស៊ីហ្គេមជាបន្តបន្ទាប់ចំនួន 5លើកខាងមុខ។

ក្នុងនោះដែរ បន្ទាប់ពីឆ្នាំ2021 ដែលវៀតណាមនឹងធ្វើជាម្ចាស់ផ្ទះហើយនោះ កម្ពុជាបានបង្ហាញពីភាពរួចរាល់សម្រាប់ការធ្វើជាម្ចាស់ផ្ទះនៅឆ្នាំ2023 ហើយប្រទេសចំនួន 3ទៀត បានប្រកាសយល់ព្រមធ្វើជាម្ចាស់ផ្ទះបន្តបន្ទាប់គ្នា បន្ទាប់ពីឆ្នាំ2023 ទៅ ដែលរួមមានខេត្តឈុនប៊ុរី (ថៃ) នឹងធ្វើជាម្ចាស់ផ្ទះនៅឆ្នាំ2025 ទីក្រុងវៀងច័ន្ទប្រទេសឡាវនៅឆ្នាំ2027 និងទីក្រុងបង់ដាស៊ិរិបេកាវ៉ាន់ ប្រទេសប្រ៊ុយណេ នៅឆ្នាំ2029។

គួររំឭកដែរថា កីឡាស៊ីហ្គេម ឬកីឡានៃភូមិភាគអាស៊ីអាគ្នេយ៍នេះ បានប្រារព្ធធ្វើឡើងចំនួន 30លើករួចមកហើយ ដោយគ្រប់ប្រទេសនៃតំបន់អាស៊ានទាំងអស់ សុទ្ទតែធ្លាប់ធ្វើជាម្ចាស់ផ្ទះ លើកលែងតែប្រទេសទីម័រខាងកើត និងកម្ពុជាប៉ុណ្ណោះ តែនៅឆ្នាំ2023 ខាងមុខ កម្ពុជានឹងធ្វើជាម្ចាស់ផ្ទះជាលើកទី1 បន្ទាប់ពីអាក់ខានធ្វើជាម្ចាស់ផ្ទះតាំងពីឆ្នាំ1963 មក៕

July 29, 2020

Category: សង្គម និងសេដ្ឋកិច្ច