Category: សង្គម និងសេដ្ឋកិច្ច

ក្រុមវិស្វករចិនកំពុងតែ “ដុត​ដៃ​ដុត​ជើង​” សាងសង់ផ្លូវដែកក្រោមសមុទ្រដែលមានប្រវែង9,781ម៉ែត្រនៅក្នុងឈូងសមុទ្រ Shantou ក្នុងខេត្ត Guangdong។

ប្រទេសចិនបានចាប់ផ្ដើមសាងសង់ផ្លូវដែកក្រោមដីឆ្លងកាត់សមុទ្រដែលមានផ្លូវដែកចំនួន2ទន្ទឹម​គ្នា​ដំបូងគេបង្អស់ក្នុងពិភពលោក។

ផ្លូវដែក​ក្រោមដីឆ្លង​កាត់​សមុទ្រ​នេះនឹងអនុញ្ញាតឱ្យរថភ្លើងធ្វើដំណើរក្នុងល្បឿនឡើងដល់350គម/ម៉ោង។ ផ្លូវរូងក្រោមដីដែលមានប្រវែង9,781គមនេះ នឹងឆ្លងកាត់កន្លែងដែលមានគ្រោះរញ្ជូយដីចំនួន17 នៃតំបន់ដែលធ្លាប់មានគ្រោះរញ្ជួយដីកម្លាំង8រិចទ័រ។ ក្នុងចំណោមនោះ មាន8កន្លែងគឺជាទីតាំងដ៏​សកម្ម​នៃ​គ្រោះរញ្ជូយដី។

ផ្លូវរូងក្រោមដីខាងលើនេះ ស្ថិតក្នុងគម្រោងផ្លូវដែកប្រវែង163គម ដែលត្រូវបានបណ្ដាក់ទុនចំនួន3.7ពាន់លានដុល្លារអាមេរិក។

ប្រភព​៖ CGTN

នៅ​ដើមខែ​សីហា​នេះ កម្ពុជា​កំពុង​រៀបចំ​គិតគូរ​ពី​ការដាក់ឱ្យ​ដំណើរការ​សាលារៀន​ឡើងវិញ តែ​ទន្ទឹមនឹងនេះ ក្រសួង​អប់រំ ក៏បាន​ផ្តោត​ខ្លាំង​ផងដែរ​លើ​ការការពារ​សុវត្ថិភាព​របស់​សិស្សានុសិស្ស​ទាំងឡាយ​នៅ​ទូទាំងប្រទេស។ ដើម្បី​ឆ្លើយតប​ទៅនឹង​ការការពារ​ជំងឺ Covid-19 មិនឱ្យ​រីក​រាលដាល​ក្នុង​សាលារៀន ក្រសួង​អប់រំ បានចេញ​នូវ​គោលការណ៍​ប្រតិបត្តិ​ស្តង់ដា (SOP) ដើម្បី​ដំណើរការ​សាលារៀន​ឡើងវិញ​ក្នុង​បរិបទ​នៃ​ជំងឺ Covid-19។

ក្រសួង​អប់រំ បាន​បញ្ជាក់ថា ចាប់តាំងពី​ការរកឃើញ​ការឆ្លង​ជំងឺ Covid-19 ក្រសួង​បានចេញ​នូវ​វិធានការ​ជាច្រើន ដូចជា​ចេញ​សេចក្តីជូនដំណឹង និង​សេចក្តីណែនាំ​ជាច្រើន​ពាក់ព័ន្ធ​នឹង​វិធាន​នានា​ដោយ​ក្នុងនោះ ចំណុច​សំខាន់​ទី1 គឺ​វិធានការ​សុខភាព ដោយ​អនុលោម​ទៅតាម​សេចក្តីណែនាំ និង​វិធានការ​បច្ចេកទេស​ចាំបាច់​របស់​អង្គការ​សុខភាព​ពិភពលោក។ ចំណុច​ទី2 គឺ​ការរៀបចំ​រដ្ឋបាល​ឌីជីថល ចំណុច​ទី3 ការលើកកម្ពស់​វិធានការ​គម្លាត​សុវត្ថិភាព និង​ចំនុច​ទី4 គឺ​ការរៀបចំ​ប្រព័ន្ធ​អប់រំ​អេឡិចត្រូនិក និង​ការផ្តល់សេវា​រៀន​ពី​ចម្ងាយ។

ឯកឧត្តម ហង់ ជួនណា​រ៉ុ​ន បាន​បញ្ជាក់ថា ក្រសួង​អប់រំ បានរៀបចំ​យុទ្ធសាស្ត្រ​ស្តីពី​ការបើក​ដំណើរការ​គ្រឹះស្ថានសិក្សា​ឡើងវិញ ដោយ​ឈរលើ​អភិក្រម​ចំនួន2 គឺ ទី1 ការបើក​ដំណើរការ​ដំណាក់កាល​សម្រាប់​គ្រឹះស្ថានសិក្សា​ណា​ដែល​អាចអនុវត្ត ស្តង់ដា​សុវត្ថិភាព​សុខភាព និង​ទី2 ការអនុវត្ត​សិក្សា​តាមបែប​ចម្រុះ ដោយ​គួបផ្សំ​ការសិក្សា​ក្នុង​ថ្នាក់រៀន និង​ការសិក្សា​ពី​ចម្ងាយ​តាម​ប្រព័ន្ធ​អេឡិចត្រូនិក និង​តាមបែប​ប្រពៃណី រួមទាំង​ការធ្វើ​ស្វ័យ​សិក្សា សម្រាប់​សិស្ស​នៅ​ទីជនបទ។

ឯកឧត្តម​ថា គោល​កាណ៍​ប្រតិបត្តិ​ស្តង់ដា​សម្រាប់​ដំណើរការ​សាលារៀន​ឡើងវិញ​ក្នុង​បរិបទ​នៃ​ជំងឺ Covid-19 ដែល​បាន​រៀបចំឡើង​នេះ មាន​វត្ថុបំណង​ណែនាំ​អំពី​វិធា​នានា រួមទាំង​វិធាន​សុខភាព ដើម្បី​គ្រឹះស្ថានសិក្សា​អាច​រៀបចំ និង​ត្រៀមលក្ខណៈ​ដំណើរការ​ការបង្រៀន និង​រៀន​ឡើងវិញ ក៏ដូចជា​ការបន្ត​គ្រប់គ្រង​គ្រឹះស្ថានសិក្សានីមួយៗឱ្យមាន​និរន្ត​ភាព ធានា​នូវ​សុវត្ថិភាព សុខភាព​សម្រាប់​បុគ្គលិក​សិក្សា គ្រូបង្រៀន និង​សិស្សានុសិស្ស​ក្នុង​បរិបទ Covid-19 និង​ទៅ​អនាគត៕

រឿងស្នេហានេះ ពេលខ្លះពិបាកយល់ណាស់ បើស្រឡាញ់ហើយ អីៗក៏ព្រមដែរ!! តែបើចង់ឱ្យគូស្នេហ៍ស្រឡាញ់យើងយូរអង្វែងនោះ តើត្រូវធ្វើយ៉ាងណាខ្លះ? ធ្លាប់គិតដែរទេថា ពេលខ្លះហេតុផលដែលឈ្លោះគ្នាញឹកញាប់នោះ អាចដោយសារតែយើងមានចំណែកដែរទេដឹង? ដូច្នេះបើចង់ឱ្យសេចក្តីស្នេហាស្ថិតស្ថេរគង់វង្ស នៅជាមួយយើងយូរអង្វែងរហូតទៅនោះ 10 រឿងខាងក្រោមនេះមិនគួរធ្វើជាដាច់ខាត។

1 . ប្រចែប្រច័ណ្ឌគ្មានហេតុផល

រឿងនេះសំខាន់ណាស់សម្រាប់គ្រប់គូស្នេហ៍ បើជឿជាក់ក្នុងចិត្តថា រូបអ្នកមានគុណតម្លៃស័ក្តិសម និងស្រឡាញ់គេតាមដែលអាចស្រឡាញ់បាន ហើយគេក៏ស្រឡាញ់អ្នកវិញដែរនោះ តើហេតុអីអ្នកចាំបាច់ត្រូវប្រចៃប្រច័ណ្ឌរូបគេបែបគ្មានហេតុផលនោះ? គួរតែមានភាពជឿជាក់លើគ្នាទៅវិញទៅមកឱ្យច្រើនទើបល្អ។

2 . និយាយអាក្រក់ពីបុព្វការី

ទោះជាគេតវ៉ា ឬរអ៊ូរទាំឱ្យអ្នកស្តាប់នូវរឿងរ៉ាវផ្សេងៗក្នុងក្រុមគ្រួសាររបស់គេក៏ដោយ តែក៏មិនមែនថាអ្នកអាចនិយាយអំពីមនុស្សក្នុងក្រុមគ្រួសាររបស់គេបានដែរ ជាពិសេសនិយាយពីបុព្វការីរបស់គេក្នុងន័យអវិជ្ជមាន ព្រោះវានឹងហុចផលអាក្រក់ដល់រូបអ្នកយ៉ាងប្រាកដ ហើយរូបអ្នកខ្លួនឯងក៏មិនចង់ឱ្យគូស្នេហ៍និយាយ ឬគិតក្នុងន័យអវិជ្ជមានជាមួយក្រុមគ្រួសាររបស់អ្នកដែរ។

3 . កុំខុសសំដីខ្លួនឯង

មនុស្សប្រុសក៏មិនត្រូវខុសសំដីខ្លួនឯងដែរ នារីក៏មិនខុសគ្នាដែរ បើណាត់គ្នាពេលណា គួរតែទៅឱ្យត្រូវពេល ឬយឺតបន្តិចបន្តួច ឬបើប្រាប់ថានឹងទូរស័ព្ទរក ក៏គួរតែទូរស័ព្ទទៅ ព្រោះការខុសសំដីខ្លួនឯងអាចបង្ហាញឱ្យដឹងថា អ្នកជាមនុស្សដែលមិនខ្វល់ពីអារម្មណ៍អ្នកដទៃ ហើយវានិងហុចផលមិនល្អដល់សម្ព័ន្ធភាពរបស់អ្នកយ៉ាងពិតប្រាកដ។

4 . របៀបរបបច្រើនពេក

រឿងនេះគឺជារឿងធ្ងន់ធ្ងររបស់សម្ព័ន្ធភាពស្នេហ៍ បុរសច្រើនតែមិនសូវចេះទ្រាំចំពោះភាពរបៀបរបបរឿងច្រើនរបស់ស្រ្តី។ ដំបូងៗដែលស្នេហានៅផ្អែមល្ហែម ក៏ធ្វើជាមិនយកចិត្តទុកដាក់ ទទួលយកបានទាំងអស់ តែនៅពេលដែលពេលវេលានៃការសម្របសម្រួលខ្លួនឱ្យចូលគ្នាចប់អស់នោះ ហើយភាពរបៀបរបបច្រើន រឿងច្រើនបែរជាកើនឡើង រអ៊ូឥតឈប់ រអ៊ូគ្រប់រឿង ប្រហែលជាគ្មាននរណាចង់ស្តាប់ និងធ្វើតាមឡើយ។

5 . ខឹងសម្បាមិត្តភ័ក្តិរបស់គេ

មុនពេលដែលគេស្គាល់រូបអ្នក គេមានក្រុមមិត្តភ័ក្តិរបស់គេ ភាពជិតដិតស្និទ្ធស្នាលខ្លាំងជាងរូបអ្នកច្រើនណាស់ ដូច្នេះអ្នកគួររៀនយល់ដឹងអំពីវិធីក្នុងការចូលទៅរកក្រុមមិត្តភ័ក្តិរបស់គេ បើសិនជាវាមិនធ្ងន់ធ្ងរពេកទេនោះ និងវិធីដែលល្អបំផុតនោះគឺ ព្យយាមធ្វើខ្លួនឱ្យសប្បាយរីករាយជាមួយអ្វីដែលគេធ្វើវិញប្រសើរជាង។

6 . បំផ្លាញក្តីជឿទុកចិត្ត

ការភូតកុហកប្រភេទ White lie ពេលខ្លះក៏បានលទ្ធផលដែរ តែពេលខ្លះបើនិយាយគ្នាត្រង់ៗបាន ក៏គួរតែនិយាយ ព្រោះបុរសៗច្រើនតែមិនគិតច្រើនដូចនារីៗទេ ព្រោះបុរសៗពេលខ្លះមិនបានយកចិត្តទុកដាក់នឹងអ្វីដែលនារីៗធ្វើប៉ុន្មានឡើយ ដូច្នេះបើមានអ្វីនិយាយគ្នាត្រង់ៗទៅប្រសើរជាងការភូតកុហកដែលបើថ្ងៃក្រោយបែកការ វានឹងមានផលប៉ះពាល់ដល់សម្ព័ន្ធភាពស្នេហ៍យ៉ាងប្រាកដ។

7 . បន្ទោសគេគ្រប់យ៉ាង

អ្នកខ្លួនឯងអាចនឹងមិនដឹងខ្លួនថា ពេលអ្នកនៅជាមួយគ្នាហើយមានអ្វីខុសឆ្គង អ្នកតែងតែតវ៉ាបន្ទោសគេ និងពេលខ្លះក៏បន្ទោសតវ៉ាហួសហេតុពេកទៀតផង។ សម្ព័ន្ធភាពដែលល្អ គឺការជួយគ្នាដោះស្រាយ កែបញ្ហា មិនថាអ្នកណាខុសក៏ដោយ ចូរខឹងចុះ តែកុំឱ្យយូរពេក បន្ទាប់ពីនោះក៏ងាកមកនិយាយគ្នាដើម្បីកែបញ្ហា នោះគ្រប់យ៉ាងនឹងល្អប្រសើរឡើងមិនខាន។

8 . ព្យាយាមផ្លាស់ប្តូរ កែចរឹតនិស្ស័យរបស់គេ

តើអ្នកសេពគប់គេព្រោះអ្វី និងតើគេសេពគប់អ្នកព្រោះអ្វី? ចូរសម្លឹងរកមើលចំណុចនោះឱ្យជាប់ជានិច្ច ព្រោះការសេពគប់គ្នាពិតជាមានការសម្របសម្រួលខ្លួនចូលរកគ្នា តែការសម្របសម្រួលខ្លួនមិនមែនជាការផ្លាស់ប្តូរទាំងអស់នោះទេ និងកុំប្រៀបធៀបគូស្នេហ៍របស់អ្នកទៅនឹងបុរសណាផ្សេងឱ្យសោះ។

9 . មិនដែលនិយាយល្អជាមួយគេ

មនុស្សឆ្លាតតែងតែធ្វើជាអ្នកស្តាប់ច្រើនជាង ហើយបើនិយាយ នឹងច្រើនតែមានពាក្យដែលឆ្លាតៗជានិច្ច បើអ្នកឈ្លោះគ្នា ចូរចៀសវាងការនិយាយបន្តជម្លោះ បើអ្នកណាម្នាក់អាចត្រជាក់ចុះបាន រឿងដែលឈ្លោះគ្នានោះនឹងកាន់តែឆាប់ចប់ឡើង ចូរកុំភ្លេចថា ការផ្តល់កិត្តិយសដល់គ្នាទៅវិញទៅមកគឺជារឿងសំខាន់ក្នុងជីវិតគូរបស់មនុស្សគ្រប់គ្នា ការនិយាយជាមួយគ្នាល្អៗ ច្បាស់ជាហុចផលល្អក្នុងរយៈពេលយូរមិនខាន៕

លោកឪពុកអ្នកម្តាយគ្រប់រូបក្រៅពីនឹកសង្ឃឹមឱ្យកូនក្លាយជាក្មេងល្អហើយ ក្នុងជម្រៅចិត្តក៏ចង់ឱ្យកូនមានភាពអច្ឆរិយ និងមានវិវឌ្ឍនាការតាមវ័យ អាចរៀនយល់ដឹងបានឆាប់រហ័ស និងអាចសម្របសម្រួលខ្លួនចូលក្នុសង្គមបាន តែ…តើយើងនឹងធ្វើឱ្យទារកដែលប្រសូតចេញមកហើយក្លាយជាក្មេងអច្ឆរិយនាពេលអនាគតយ៉ាងម៉េចបាននោះ យើងនាំគ្នាមើលទាំងអស់គ្នា។

1 . បច្ច័យពូជកំណើតពីឪពុក និងម្តាយ

ទារកកើតចេញពីការរំលាយបញ្ចូលរួមគ្នារវាងកោសិការបស់ខាងឪពុក និងម្តាយ ដោយកោសិកាប្រកបទៅដោយ ខ្រូម៉ូហ្សូម ( Chromosome ) ដែលមានលក្ខណៈជាខ្សែ 2 សរសៃដែលតម្រៀបគ្នាជាគូៗ តោងគ្នាជាប់យ៉ាងណែនប្រៀបដូចជណ្តើរគូទខ្យង និងនៅលើសរសៃខ្រូម៉ូហ្សូមនឹងមានហ្ស៊ែន ដែលហ្ស៊ែននេះបានមកពីការផ្សំគ្នារវាងខាងឪពុក និងខាងម្តាយម្នាក់ពាក់កណ្តាល។

ហ្ស៊ែនជាអង្គភាពគ្រប់គ្រងគុណភាព និងលក្ខណៈផ្សេងៗរបស់មនុស្ស មិនថាតែមុខមាត់ រូបរាង កម្ពស់ ពណ៌សម្បុរស្បែក ភាពឆ្លាតវៃ-ល- ដែលហ្ស៊ែនក្នុងផ្នែកអវយវៈខួរក្បាលនេះឯងដែលបានទទួលមកពីហ្ស៊ែនរបស់ឪពុក និងម្តាយម្នាក់ពាក់កណ្តាល ដែលមានផលឱ្យទារកនៅពេលធំធាត់ឡើងនឹងមានលក្ខណៈស្រដៀងនឹងមេពូជកំណើតពីឪពុក និងម្តាយ ទើបវាជាផ្នែកមួយដែលមានភាពសំខាន់ដល់គុណភាពរបស់ទារក ព្រោះថាទារកនឹងឆ្លាតច្រើនតិចប៉ុនណា ហ្ស៊ែនដែលបានទទួលពីឪពុក និងម្តាយនោះមានចំណែកពាក់ព័ន្ធយ៉ាងខ្លាំង។ ក្រៅពីហ្ស៊ែនដែលបានទទួលពីឪពុក និងម្តាយហើយនោះ នៅមានបច្ច័យផ្សេងៗទៀតដែលមានផលចំពោះក្មេងទារកដូចគ្នា។

2 . បច្ច័យផ្នែកភោជនាហារ

អាហារដែលយើងញ៉ាំចូលទៅក្នុងមួយថ្ងៃៗនឹងត្រូវប្រែក្លាយឱ្យទៅជាសារធាតុអាហារ នាពេលបច្ចុប្បន្នក្នុងពិភពវេជ្ជសាស្រ្តបានផ្តល់នូវការទទួលស្គាល់ហើយថា បើទារកតាំងពីនៅក្នុងផ្ទៃបានទទួលសារធាតុអាហារដែលល្អ និងស័ក្តិសមនោះ នឹងជួយឱ្យរាងកាយរបស់ទារកអាចអភិវឌ្ឍ និងធំធាត់ក្លាយជាក្មេងអច្ឆរិយបានដូចគ្នា ព្រោះសារធាតុច្រើនប្រភេទមានផលល្អក្នុងការសាងរាងកាយរបស់ទារកតាំងតែពីនៅក្នុងគភ៌ ដូចជា ប្រូតេអ៊ីន ជាសារធាតុអាហារដែលរាងកាយត្រូវការប្រើដើម្បីបង្កើនទំហំ និងគុណភាពរបស់ខួរក្បាល។ បើទារកបានទទួលសារធាតុអាហារដែលគ្រប់គ្រាន់ រាងកាយរបស់ក្មេងក៏នឹងអាចអភិវឌ្ឍខួរក្បាលបានយ៉ាងឥតខ្ចោះ។ នៅពេលខួរក្បាលសម្បូរពេញលេញក៏នឹងធ្វើឱ្យការធ្វើការរបស់ខួរក្បាលធ្វើការបានយ៉ាងពេញទំហឹង។ ខួរក្បាលជាអវយវៈដែលសំខាន់ខ្លាំងណាស់ និងខួរក្បាលក៏ប្រកបដោយកោសិកាចំនួនដ៏ច្រើនដូចគ្នាដែរ បើស្រ្តីមានគភ៌បានទទួលសារធាតុអាហារប្រូតេអ៊ីនតិចជ្រុលពេក កោសិកាខួរក្បាលរបស់កូននៅក្នុងផ្ទៃក៏នឹងមានទំហំតូច និងធ្វើឱ្យទារកដែលប្រសូតចេញមកមានកម្រិតសតិបញ្ញាទាបជាងក្មេងដទៃទៀត។ ក្រៅពីប្រូតេអ៊ីនហើយនៅមានសារធាតុអាហារដទៃទៀតដូចគ្នា ដូចជា ក្រុមវីតាមីនផ្សេងៗក៏មានផលដូចគ្នាដែរ ព្រោះវីតាមីនប្រភេទខ្លះក៏មានផលចំពោះប្រព័ន្ធសរសៃប្រសាទរបស់ទារកដែរ ដូច្នេះហើយទើបអាហារដែលស្រ្តីមានគភ៌បានទទួលចូលទៅនោះមានផលយ៉ាងខ្លាំងចំពោះទារកក្នុងគភ៌។

3 . បច្ច័យផ្នែកបរិស្ថានជុំវិញខ្លួន

បរិស្ថានជុំវិញខ្លួនក្នុងទីនេះនឹងមានផលតាំងតែពីស្រ្តីជាម្តាយចាប់ផ្តើមតាំងគភ៌មកម្ល៉េះ។ មានលទ្ធផលនៃការវិភាគខាងវេជ្ជសាស្រ្តមួយបានបញ្ជាក់ថា បើស្រ្តីដែលតាំងគភ៌ត្រូវទ្រាំទ្ររស់នៅក្នុងបរិស្ថានជុំវិញខ្លួនដែលមិនល្អ ទាំងរឿងសំឡេងឮក្ឌុងក្ឌាំងខ្លាំងជ្រុលពេក មានក្លិនមិនគួរប្រាថ្នា ឬធ្វើឱ្យស្រ្តីមានគភ៌នោះមានអារម្មណ៍ធុញថប់មួម៉ៅនោះ ទារកក៏នឹងបានទទួលផលប៉ះពាល់ពីបរិស្ថានជុំវិញខ្លួនទាំងនេះដូចគ្នា និងហុចផលប៉ះពាល់ផ្សេងៗដូចជា នៅពេលទារកប្រសូតចេញមកហើយទម្ងន់ខ្លួននឹងតិចជាងប្រក្រតី ឬត្រូវប្រសូតមុនពេលកំណត់ ទារកងាយភ្ញាក់ផ្អើល ពិបាកចិញ្ចើម ឬយំច្រើនជាដើម៕

តើក្រោយពេលរៀបការហើយមានសេចក្តីសុខពិតមែនឬ? តាមរយៈដែលមានការធ្វើជំរឿនបានរកឃើញថា គូអាពាហ៍ពិពាហ៍ 10 គូនឹងមានត្រឹមតែ 3 – 4 គូប៉ុណ្ណោះដែលជីវិតគូល្អឥតខ្ចោះ មានសេចក្តីសុខខ្លាំងជាងកាលពីពេលនៅលីវ នេះជាការបង្ហាញឱ្យដឹងថា ឱកាសដែលជីវិតគូបរាជ័យមានច្រើនជាងពាក់កណ្តាលឯណោះ ដូច្នេះតើត្រូវការពារយ៉ាងណា?

បុរសៗរៀបការប៉ុន្មានដងក៏មិនខាតបង់អ្វីដែរ តែស្រ្តីវិញនឹងឈឺចាប់ និងឈឺខ្លាំងជាង និងឱកាសក្នុងការចាប់ផ្តើមជាថ្មីនឹងកាន់តែតិចទៅជារឿយៗ ខាងក្រោមនេះគឺហេតុផល 8 ចំណុចដែល ឡារ៉ែនបានសរុបយកមកជូននារីៗដែលគិតចង់រៀបការ។

1 – កុំរៀបការដោយសារតែខ្លាចថាមិនបានរៀបការ ៈ គូគ្រងដែលរកមកបានដោយការមិនបានពិចារណាឱ្យបានល្អិតល្អន់នោះ នឹងមានផលអាក្រក់ចំពោះជីវិត និងរងទុក្ខសោករហូតដល់ស្លាប់។ មានការងារស្រាវជ្រាវវិភាគជាច្រើនបានបង្ហាញថា ការនៅលីវមានសេចក្តីសុខច្រើនជាងការមានគូគ្រងដែលមិនសមនឹងបំណង។

2 – កុំរៀបការព្រោះតែអ្នកចង់ចាកចេញពីក្រុមគ្រួសារចាស់របស់អ្នក ៈ ព្រោះទោះជាផ្ទះរបស់យើងនឹងមានបញ្ហាច្រើនប៉ុនណាក៏ដោយ តែតើអ្នកនឹងប្រាកដក្នុងចិត្តយ៉ាងណាបានថា ក្រុមគ្រួសារដទៃទៀតគ្មានបញ្ហានោះ?។ ការដែលរៀបការហើយទៅនៅជាមួយក្រុមគ្រួសារមួយផ្សេងដែលអ្នកជាមនុស្សមកពីក្រៅនោះ នឹងមានបញ្ហាដែលអ្នកមិននឹកស្មានដល់ច្រើនណាស់។

3 – កុំរៀបការនៅពេលដែលអ្នកកំពុងតែខកស្នេហ៍ ឬត្រូវការបញ្ឈឺអតីតគូស្នេហ៍ ៈ អំឡុងពេលនោះជាអំឡុងពេលដែលផ្សែងអ័ព្ទខ្មៅកំពុងគ្របដណ្តប់លើជីវិត ចូររង់ចាំឱ្យអ្វីៗគ្រប់យ៉ាងភ្លឺស្រឡះឡើងវិញសិន នោះអ្នកនឹងមើលអ្វីៗឃើញបានកាន់តែច្បាស់។

4 – កុំរៀបការព្រោះតែអ្នកអាណិតគេ ៈ បុរសដែលគួរឱ្យអាណិតច្រើនតែមានចំណុចខ្សោយ មានចំណុចអន់ និងមានទង្វើប្តូរផ្លាស់ច្រើនបន្ទាប់ពីរៀបការហើយ។ ក្តីអាណិតមិនស្ថិតស្ថេរយូអង្វែងស្មើនឹងសេចក្តីស្រឡាញ់ទេ ថ្ងៃណាមួយអ្នកអាចគិតមិនដូចមុន។

5 – កុំរៀបការព្រោះតែឈ្លក់វង្វេងលើរូបកាយ និងទ្រព្យសម្បត្តិរបស់គេតែម្យ៉ាងឱ្យសោះ ៈ រូបរាងមុខមាត់ ទ្រព្យសម្បត្តិជារឿងខាងក្រៅ ជាសំបកក្រៅដែលអ្នកមិនដឹងថា មានសាច់ពិតប្រាកដដែលស្អុយកខ្វក់នៅខាងក្នុងឡើយ។

6 – កុំរៀបការព្រោះតែចង់គេចចេញពីខ្លួនឯង ៈ ព្រោះការរៀបការមិនបានជួយឱ្យអ្នកគេចពីខ្លួនឯងរួចឡើយ ទោះជារៀបការប៉ុន្មានដងក៏ដោយ។

7 – កុំរៀបការព្រោះគិតថា នឹងផ្លាស់ប្តូរនិស្ស័យគេបាន ៈ ក្នុងផ្នែកចិត្តវិទ្យាវិញ និស្ស័យពិតប្រាកដរបស់មនុស្សយើងមិនអាចផ្លាស់ប្តូរបានទេ នឹងនៅតែជាដូច្នោះរហូតមួយជីវិត ដូច្នេះការសម្រេចចិត្តរៀបការដោយគិតថា គេប្រហែលជាផ្លាស់ប្តូរនិស្ស័យក្រោយពេលរៀបការហើយនោះ គឺជាការគិតដែលខុសយ៉ាងធំធេង។

8 – កុំរៀបការព្រោះតែក្តីអផ្សុក ៈ ក្តីអផ្សុកជាឧបករណ៍របស់កម្មម្យ៉ាង បើយើងមិនដឹងពីវិធីចាត់ការជាមួយវាទេនោះ ជីវិតនឹងត្រូវច្បាប់នៃកម្មអូសទាញទៅមិនខាន។ អ្នកខ្លះទៅញៀនថ្នាំញៀន អ្នកខ្លះទៅវក់ល្បែងស៊ីសង ញៀនសុរា អ្នកខ្លះរស់នៅបែបស៊ែរលែជាមួយមិត្តភ័ក្តិ និងប្រាកដណាស់ ការសម្រេចចិត្តរៀបការព្រោះខ្លាចអផ្សុក គឺជាការសម្រេចចិត្តដែលខុសឆ្គង។

ធ្វើតាមច្បាប់ទាំង 8 ចំណុចនេះយ៉ាងម៉ឺងម៉ាត់ អ្នកអាចនឹងក្លាយជាមនុស្សគិតតែពីប្រយ័ត្ន និងមិនទុកចិត្តអ្នកណាទាំងអស់ តែរឿងស្នេហា ពេលខ្លះក៏គ្មានហេតុផលដែរ បើសិនជាអ្នកបានជួបមនុស្សម្នាក់ មនុស្សដែលអ្នកគិតថា គឺម្នាក់ហ្នឹងហើយ ជាសេចក្តីស្នេហាដែលពិតប្រាកដ មិនមែនជាការឈ្លក់វង្វេង មិនមែនជាភាពរ៉ូមែនទិក និងដែលពិតប្រាកដបំផុតនោះគឺ គេត្រូវតែស្រឡាញ់អ្នកយ៉ាងស្មោះស្ម័គ្រទៀតផង បើសិនជាដូច្នោះមែន សម្រេចចិត្តរៀបការតែម្តងទៅ ព្រោះ…សេចក្តីស្រឡាញ់អាចយកឈ្នះគ្រប់អ្វីៗទាំងអស់…ស្រ្តីច្រើនតែកង្វល់រឿងអនាគត…រហូតទាល់តែនាងមានស្វាមី បុរសមិនដែលកង្វល់ពីអនាគតខាងមុខឡើយ…រហូតទាល់តែគេមានភរិយា៕

41 . វិធីកំចាត់ស្នាមឆ្កូតនៅលើគ្រឿងសង្ហារិមដែលធ្វើអំពីឈើនោះគឺ យកក្រណាត់ស្អាតមួយបន្ទះមកបៀកថ្នាំខាត់ស្បែក​ជើងដែលមានពណ៌ដូចឈើ ហើយដុសខាត់ត្រង់ស្នាមឆ្កូតនោះ រួចហើយយកក្រណាត់ស្អាតមួយផ្ទាំងទៀតមកខាត់តម្តងទៀត ស្នាមឆ្កូតទាំងនោះនឹងរលប់បាត់អស់មិនខាន។

42 . វិធីកែបញ្ហាកៅអីផ្តៅទន់រយីករយាកនោះគឺ បើចង់ឱ្យវាតឹងឡើងវិញ ចូរលាងកៅអីផ្តៅនោះដោយទឹកសាប៊ូក្តៅៗ រួចហើយលាងទឹកសាប៊ូនោះចេញ រួចយកទៅដាក់ហាលថ្ងៃកណ្តាលវាលឱ្យស្ងួត កៅអីផ្តៅដែលទន់រយីករយាកនោះនឹងឡើងតឹងជាប់ណែនដូចដើមមិនខាន។

43 . វិធីការសម្អាតក្តារកម្រាលផ្ទះឱ្យនៅតែភ្លឺរលោងជាប់ជានិច្ចនោះគឺ ចូរលាយទឹកខ្មេះកន្លះពែងក្នុងទឹក 8 លិត្រ យកមកដុសសម្អាតកម្រាលក្តារផ្ទះ វានឹងជួយកំចាត់កំទេចធូលីដី ហើយកម្រាលក្តារក៏ភ្លឺរលោងទៀតផង។

44 . ការថែរក្សាគ្រឿងសង្ហារិមធ្វើពីលោហៈមិនឱ្យងាយមានច្រែសចាប់នោះគឺ ចូរស្រោបផ្នែកដែលជាលោហៈនោះដោយក្រមួនប៉ូលាឡាននៅពេលណាដែលចាំបាច់ត្រូវយកគ្រឿងសង្ហារិមដែលធ្វើអំពីដែកនោះទៅប្រើប្រាស់នៅកណ្តាលវាលហាលភ្លៀងហាលខ្យល់ ក្រមួនប៉ូលាឡាននឹងការពារផ្នែកដែលជាលោហៈរបស់គ្រឿងសង្ហារិមនោះមិនឱ្យងាយកើតច្រែសចាប់ឡើយ។

45 . វិធីការបិទរូបផូស្ទើរ៍នៅលើជញ្ជាំងដោយគ្មានបន្សល់ទុកនូវស្លាកស្នាមនៅពេលបកចេញនោះគឺ ចូរយកថ្នាំដុសធ្មេញមកលាបជំនួសកាវខណៈពេលបិទរូប ហើយនៅពេលដែលបកចេញវិញហើយ ក៏គ្រាន់តែដុសស្នាមកំណកថ្នាំដុសធ្មេញដែលស្ងួតៗទាំងនោះចេញប៉ុណ្ណោះ ជញ្ជាំងក៏ស្អាតដូចដើមបាត់ទៅហើយ។

(នៅមានត)

បច្ចុប្បន្ន Microsoft ត្រូវ​បាន​គេ​ចាត់​ទុក​ថា​ជា​ក្រុម​ហ៊ុន​របស់​មនុស្ស​ដែល​មាន​វ័យ​ច្រើន​ ដូច្នេះ​ បើ​សិន​ជា​ទទួល​បាន​ជោគ​ជ័យ​ក្នុង​ការ​ទិញ​ក្រុម​ហ៊ុន​ TikTok នៅ​សហរដ្ឋ​អាមេរិក​ នោះ​​ Microsoft នឹង​ក្លាយ​ជា​ក្រុម​ហ៊ុន​ទាន់​សម័យ​ជាង​មុន​។

Microsoft ទើប​តែ​បាន​ប្រកាស​ថា កំពុង​តែ​ចរចា​ជាមួយ​ក្រុម​ហ៊ុន​ ByteDance របស់​ចិន​ ដើម្បី​ទិញ​ TikTok នៅ​សហរដ្ឋ​អាមេរិក​។ NYT (New York Times) បាន​បញ្ជាក់​ថា Microsoft អាច​ប្រើប្រាស់​ឥទ្ធិពល​ហិរញ្ញវត្ថុ​ដើម្បី​ក្ដោប​ក្ដាប់​ចំណូល​ចិត្ត​របស់​យុវវ័យ​តាម​រយៈ​ជំនួញ​មួយ​នេះ​។

សេចក្ដី​ប្រកាស​ត្រូវ​បាន​ភាគី​ Microsoft លើក​ឡើង​ ក្រោយ​ពី​ជំនួប​រវាង​ CEO Satya Nadella និង​លោក​ Trump។ ប្រធានាធិបតី​សហរដ្ឋ​អាមេរិក​ ធ្លាប់បាន​គំរាម​បិទ​បណ្ដាញ​សង្គម​វីដេអូខ្លី​នេះ​ ដោយ​សារ​មាន​ការ​ព្រួយ​បារម្ភ​អំពី​សន្តិ​សុខ​ជាតិ​។

TikTok កំពុង​ទទួល​បាន​ការ​និយម​ប្រើ​នៅ​ទូទាំង​ពិភពលោក​ ពិសេស​គឺ​យុវវ័យ​។ ដូច្នេះ ការ​ទិញ​ TikTok នេះ​ អាចជួយ​ឱ្យ​ក្រុម​ហ៊ុន​ Microsoft ដែល​មាន​ឈ្មោះ​ល្បី​ល្បាញ​ខាង​ទិន្ន​ន័យ​និង​ប្រព័ន្ធ​ប្រតិបត្តិ​ការស្រាប់​ អាច​គ្រប់​គ្រង​បណ្ដាញ​សង្គម​មួយ​ក្នុង​ចំណោម​បណ្ដាញ​សង្គម​ដែល​មាន​ឥទ្ធិ​ពល​លំដាប់​កំពូល​ៗ​នៅ​សហរដ្ឋ​អាមេរិក​។

Dan Ives ដែលជា​នាយក​ប្រតិបត្តិ​ និង​ជា​អ្នក​ជំនាញ​ខាង​វិភាគ​របស់​ក្រុម​ហ៊ុន​ Wedbush Securities បាន​ថ្លែង​ថា “Microsoft ត្រូវ​បាន​គេ​ចាត់​ទុក​ថា​ជា​ក្រុម​ហ៊ុន​របស់​អាណា​ព្យាបាល​ (សម្រាប់​មនុស្ស​មាន​អាយុ​ច្រើន​) នានា​។ ពួកគេ​កំពុង​តែ​ព្យាយាម​ប្ដូរ​ផ្លាស់​ប្រការ​នេះ​”។ លោក​បន្ត​ថា បើ​សិន​ជា​ជំនួញ​នេះ​បាន​សម្រេច​ជា​ស្ថាពរ​ នោះ​ Microsoft នឹង​វិវឌ្ឍខ្លួន​ពី​ក្រុម​ហ៊ុន​ដែល​មិន​សូវ​ទាក់​ទាញ​សម្រាប់​មនុស្ស​វ័យ​ក្រោម​25​ឆ្នាំ ទៅ​ជា​ក្រុម​ហ៊ុន​ “ទាន់​សម័យ​” ដូច​ TikTok។

ក្រោយពី​បាន​ក្លាយ​ជា​ CEO កាល​ពី​ឆ្នាំ​2014​ លោក Nadella បាន​ជួយ​ឱ្យ​ Microsoft ក្លាយ​ជា​ក្រុម​ហ៊ុន Cloud computing​ លំដាប់​យក្ស​មួយ​ក្នុង​ពិភពលោក​។ ក្រុម​ហ៊ុន​បច្ចេក​វិទ្យា​មួយ​នេះ​​ បច្ចុប្បន្ន មាន​ទុន​សរុប​ជាង​1.5លានលាន​ដុល្លារ​អាមេរិក​ និង​មាន​ទ្រព្យ​ជា​សាច់​ប្រាក់​សុទ្ធ​ចំនួន​130​ពាន់​លាន​ដុល្លារ​។

ក៏ប៉ុន្តែ Microsoft ហាក់​មិន​ទាន់​បាន​កំណត់​ទិស​ដៅ​ជាក់លាក់​ក្នុង​ការ​បម្រើ​អតិថិជន​វ័យ​ក្មេងនៅឡើយ​ ក្រៅ​តែ​ពី​វិស័យ​ហ្គេម​។ ក្នុងដំណាក់​កាល​បណ្ដាញ​សង្គម​ក្លាយ​ជា​ក្រុម​ហ៊ុន​ពាណិជ្ជ​កម្ម​ដ៏មិហា​មា ដូច​ជា​ Facebook ដែល​មាន​តម្លៃ​ដល់​ទៅ​ជាង​720​ពាន់​លាន​ដុល្លារ​ជា​ដើមនេះ Microsoft បែរ​ជា​តាម​មិន​ទាន់​និន្នា​ការ​នេះ​ទៅ​វិញ​។

នៅក្នុង​សម័យ​ Nadella ជំនួញ​ធំបំផុត​របស់​ Microsoft ​គឺ​ការ​ទិញ​ក្រុម​ហ៊ុន​អ៊ីនធឺណិត​នានា។ បណ្ដាក្រុម​ហ៊ុន​នេះ​ មាន​បណ្ដាញ​ដែល​ទាក់​ទាញ​អ្នក​ប្រើប្រាស់​បាន​ច្រើន ប៉ុន្តែ​ពួក​គេ​ក៏ត្រូវ​ការ​ហេដ្ឋារចនាសម្ព័ន្ធ​​ផ្ទុក​ទិន្ន​ន័យ​បែប​ Cloud computing​ ដែល​ Microsoft អាច​ផ្គត់​ផ្គង់​បាន​។

ឆ្នាំ2014​ Microsoft បាន​ទិញ​ក្រុម​ហ៊ុន​ Minecraft ក្នុង​តម្លៃ​2.5​ពាន់​លាន​ដុល្លារ​។ ឆ្នាំ​2016 ក្រុម​ហ៊ុន​នេះ​ក៏​បាន​ទិញ​ក្រុម​ហ៊ុន​ LinkedIn ក្នុង​តម្លៃ​26.2​ពាន់​លាន​ដុល្លារ​។ 2ឆ្នាំ​ក្រោយ​មក​ទៀត​ Microsoft បន្ត​ទិញ​ក្រុម​ហ៊ុន​ GitHub ដែល​ជា​មូលដ្ឋាន​អនឡាញ​សម្រាប់​ក្រុម​អ្នក​អភិវឌ្ឍ​ផ្នែក​ទន់​ (software) ក្នុង​តម្លៃ​7.5​ពាន់​លាន​ដុល្លារ​។

សារព័ត៌មាន NYT បាន​ឱ្យ​ដឹង​ថា យុវវ័យ​មិន​គួរ​ព្រួយ​បារម្ភ​ ខ្លាច​ Microsoft ធ្វើ​ឱ្យ​ការ​ទាក់​ទាញ​របស់​ TikTok ត្រូវ​ថយ​ចុះ​នោះ​ឡើយ​។ ព្រោះ​ថា នៅក្នុង​ករណី​ទិញ​ដូរ​ក្រុម​ហ៊ុន​មួយ​ចំនួន​កាលពី​ពេល​កន្លង​ទៅ​ថ្មី​ៗនេះ Microsoft បាន​បង្កើន​ធនធាន​មនុស្ស ហិរញ្ញវត្ថុ​ និង​បច្ចេក​វិទ្យា​នៅក្នុង​បណ្ដា​ក្រុម​ហ៊ុន​ដែល​ Microsoft បាន​ទិញ​ ប៉ុន្តែ ភាគ​ច្រើន​Microsoft នៅ​តែ​ទុក​ឱ្យ​ក្រុម​ហ៊ុន​ទាំង​នោះ​ ​ដំណើរ​ការ​ដោយ​ឯករាជ្យ​។

ជាមួយ​នឹង​អ្នក​ប្រើប្រាស់​ជាង​100​លាន​នាក់​នៅ​សហរដ្ឋ​អាមេរិក​ TikTok ប្រាកដ​ជា​ទទួល​បាន​ការ​យក​ចិត្ត​ទុក​ដាក់​ខ្ពស់​ ក្រោយ​ពី​​ Microsoft បាន​ទិញ​យក​មក​កាន់​កាប់​។ កិច្ច​ព្រម​ព្រៀង​ដែល​កំពុង​លើក​យក​មក​ចរចា​រួម​មាន​ ការ​ទិញ​ការិយាល័យ​នានា​របស់​ TikTok នៅ​សហរដ្ឋ​អាមេរិក​ កាណាដា អូស្ត្រាលី​និង​នូវែលហ្សេឡង់​។ ByteDance ដែលជា​ក្រុម​ហ៊ុន​មេ​របស់​ TikTok នឹង​នៅ​តែ​បន្ត​កាន់​កាប់​មូលដ្ឋាន​របស់​បណ្ដាញ​សង្គម​នេះ​នៅ​ឯទីក្រុង​ប៉េកាំង​។

Microsoft ក៏​អាច​ផ្ដល់​នូវ​អ្វី​ដែល​គូប្រជែង​នានា​មិន​មាន​ នៅ​ក្នុង​វិស័យ​បច្ចេក​វិទ្យា​នេះ​ នោះ​គឺភាព​សុខសាន្ត​នៅ​វ៉ាស៊ីង​តោន​។ Amazon, Facebook និង Google ធ្លាប់​ត្រូវ​បង្កើន​ការ​ប្រុង​ប្រយ័ត្ន​ក្នុង​កាលៈ​ទេសៈ​មួយ​ដែល​ស្ថិត​ក្រោម​ការ​តាម​ដាន​ទាក់​ទិន​នឹងបញ្ហា​ផ្ដាច់​មុខ​។ ដូច្នេះ ការ​ធ្វើ​កិច្ច​ព្រម​ព្រៀង​លំដាប់​ “យក្ស”​ ជាមួយ​នឹង​បណ្ដា​ក្រុម​ហ៊ុន​ដែល​មិន​មាន​ភាព​រឹង​មាំ​ផ្នែក​នយោបាយ​ ក៏​មិន​មាន​ការ​ទាក់​ទាញ​នោះ​ដែរ​។

បើ​ទោះ​ជា​ប្រឹង​ប្រែង​វាយលុក​ទីផ្សារ​ប្រទេស​ចិន​ជា​ង1​ទសវត្សរ៍​កន្លង​មក ប៉ុន្តែ Microsoft ទទួល​បាន​ជោគ​ជ័យ​តិច​តួច​ប៉ុណ្ណោះ​ក្នុង​ទីផ្សារ​មួយ​នេះ​។ Microsoft Windows និង Office មាន​ការ​ពេញ​និយម​នៅ​ប្រទេស​ចិន ក៏​ប៉ុន្តែ​ ភាគ​ច្រើន​គឺជា​ទំនិញ​គេច​ពន្ធ។ ទីផ្សារ​ប្រទេសចិន​ បាន​រួម​ចំណែក​មិន​ដល់​2​%​ផង​នៅ​ក្នុង​ចំណូល​សរុប​របស់​ Microsoft។

ការ​ជជែក​គ្នា​រវាង​ Satya Nadella ជាមួយ​នឹង​លោក​ Trump បាន​កាត់បន្ថយ​ការ​ព្រួយ​បារម្ភ​របស់​ប្រធានាធិបតី​អំពី​ TikTok ចំពោះ​សន្តិសុខ​ជាតិ​។ ការ​ព្រួយ​បារម្ភ​ធំបំផុត​របស់​រដ្ឋាភិបាល​អាមេរិកាំង​ នោះ​គឺ​បណ្ដាញ​សង្គម​នេះ​អាច​ជួយ​ឱ្យ​ចិន​​ក្ដោប​ក្ដាប់ព័ត៌មាន​ឯក​ជន​របស់​ពល​រដ្ឋ​អាមេរិកាំង​។ ប៉ុន្តែ បើ​តាម​ការ​ប្រកាស​កន្លង​មក​ Microsoft បាន​ធានា​ថានឹង​រក្សា​សុវត្ថិ​ភាព​ទិន្នន័យ​របស់​អ្នក​ប្រើប្រាស់​ TikTok នៅ​សហរដ្ឋ​អាមេរិក​៕

ប្រភព៖ NYT

កូនតូចទើបនឹងកើតដំបូងនៅមានភាពទន់ខ្សោយខ្លាំងណាស់ លោកឪពុកអ្នកម្តាយត្រូវនៅចាំយកចិត្តទុកដាក់មើលថែទាំក្នុងរឿងសុវត្ថិភាពជាពិសេស ដើម្បីសុខភាព និងវិវឌ្ឍនាការដែលល្អរបស់កូនជាទីស្រឡាញ់។ ខាងក្រោមនេះគឺជាទង្វើដែលលោកឪពុកអ្នកម្តាយថ្មោងថ្មីមិនគួរធ្វើជាដាច់ខាតដើម្បីទាំងសុខភាព និងរាងកាយរបស់កូនតូចទើបនឹងកើតដំបូង។

1 – កុំអាលនាំទៅដើរលេងក្រៅផ្ទះ

ទារកក្នុងវ័យនេះប្រព័ន្ធការពារជំងឺក្នុងរាងកាយនៅធ្វើការមិនទាន់ពេញលេញឥតខ្ចោះនៅឡើយទេ ថែមទាំងនៅមិនទាន់បានទទួលវ៉ាក់សាំងការពារជំងឺ និងរោគផ្សេងៗឡើយ ការនាំទារកទៅនៅក្នុងទីកន្លែងដែលពេញទៅដោយល្អងធូលីដី ឬខ្យល់អាកាសពុល ជាដើមនោះ នឹងធ្វើឱ្យប្រថុយប្រថាននឹងការដែលរាងកាយនឹងទទួលមេរោគ និងអាចឈឺថ្កាត់បានយ៉ាងងាយ គួរឱ្យនៅក្នុងផ្ទះសិន ដើម្បីសាងប្រព័ន្ធការពារជំងឺឱ្យរឹងមាំមុននឹងចេញប្រឈមនឹងពិភពខាងក្រៅ និងចូរស្ថិតនៅក្នុងទីកន្លែងដែលមានសុវត្ថិភាពផង។

2 – ហាមឱ្យញ៉ាំអ្វីផ្សេងក្រៅពីទឹកដោះ

អាហារចម្បងតែមួយប្រភេទគត់សម្រាប់ទារកទើបកើតដំបូងគឺ ទឹកដោះម្តាយ ព្រោះក្រពះអាហារ និងពោះវៀនកូនតូចនៅមិនទាន់ត្រៀមខ្លួនក្នុងការទទួលអាហារប្រភេទផ្សេងឡើយ ព្រោះពេលញ៉ាំចូលទៅអាចនឹងធ្វើឱ្យរាករូស និងឈឺថ្កាត់បាន ចំណែកអាហារបន្ថែមអាចចាប់ផ្តើមឱ្យញ៉ាំបាននៅពេលអាយុគ្រប់ 6 ខែ គឺនៅពេលដែលប្រព័ន្ធរំលាយអាហាររបស់កូនត្រៀមស្រេចហើយ។

3 . ប្រើផលិតផលសម្រាប់ទារកតែប៉ុណ្ណោះ

ស្បែករបស់កូនតូចកើតដំបូងមានសភាពស្តើងថ្លាដូចស្លាបសត្វកន្តុំរុយ រហូតអាចមើលឃើញសរសៃឈាមនៅខាងក្នុងបានយ៉ាងច្បាស់ ថែមទាំងនៅលើស្បែកគ្មានមេរោគបាក់តេរីដែលជួយការពារមេរោគពីខាងក្រៅបានដូចមនុស្សធំទៀតផង ទើបស្បែកកូនតូចក្នុងអំឡុងអាយុនេះស្តើងខ្ចីមានឱកាសប្រតិកម្មចាញ់ដោយងាយ និងថែមទាំងងាយកើតដំបៅបានខ្លាំងជាងប្រក្រតីទៀតផង។

ក្រៅពីត្រូវប៉ះពាល់ និងបីពកូនសម្លាញ់យ៉ាងប្រយ័ត្នប្រយែងហើយ ការជ្រើសរើសប្រើផលិតផលសម្រាប់ទារកក៏ចាំបាច់ណាស់ដែរគឺដើម្បីការពារការរលាកក្រហាយស្បែក ទាំងការប្រើប្រាស់ទឹកសាប៊ូលាងសម្អាតឧបករណ៍របស់ប្រើប្រាស់របស់កូនតូច គួរជាផលិតផលសម្រាប់ទារកដែលគ្មានសារធាតុគីមីនៅសេសសល់ផង។

4 – ត្រូវប្រគងទប់កពេលបី ឬព

ឆ្អឹង ឬសន្លាក់របស់កូនតូចទើបកើតដំបូងនៅមិនទាន់រឹងមាំនៅឡើយ អាចនិយាយបានថានៅទន់ស្រួយ និងមានឱកាសងវៀចបានយ៉ាងងាយ ថែមទាំងនៅមិនទាន់អាចទ្រាំទ្របាននឹងកម្លាំងបោកប៉ះ សង្កត់ ឬទាញបានឡើយ ជាពិសេសនៅលើផ្នែកដែលងាយបាក់ និងភ្លាត់គ្រេចញឹកញាប់បំផុតគឺ ឆ្អឹងដៃ ជើង បាតដៃ បាតជើង និងឆ្អឹងស្លាបប្រចៀវ។ ការបីព ឬលេងជាមួយកូនត្រូវតែប្រយ័ត្នប្រយែងកន្លែងដែលមានសន្លាក់ត និងម្តុំកជាពិសេស។ ចំណែកឥរិយាបថគេងសម្រាប់ទារកទើបនឹងកើតវិញ គួរដាក់ឱ្យគេងផ្ងារ ដោយឱ្យដងខ្លួន ដៃ និងជើងព្រលែងសប្បាយៗ មិនឱ្យមានផ្នែកណាមួយត្រូវសង្កត់ ឬកោង-ងឡើយ ឯបញ្ហាដែលច្រើនមានការកង្វល់ថា ក្បាលកូនតូចនឹងសំប៉ែតនោះ ប្រហែលជាមិនគួរឱ្យភ័យខ្លាចស្មើនឹងសុវត្ថិភាពរបស់កូនទេ ដូច្នេះសូមកុំបារម្ភអី។

5 – ហាមចាប់អង្រួន បោះ ឬចាប់យោលខ្លាំងៗជាដាច់ខាត

ខួរក្បាលរបស់កូនតូចខួបដំបូងនៅវិវឌ្ឍមិនទាន់បានពេញទំហឹងទេ ទាំងសរសៃឈាមក៏មានឱកាសដាច់រហែកបានយ៉ាងងាយដែរ ទឹកនៅក្នុងប្រអប់ខួរមានទឹកច្រើនជាងសាច់ខួរក្បាល ការបានទទួលការប៉ះរញ្ជួយខ្លាំងៗ ដូចជា ត្រូវអង្រួន ត្រូវយោក ចាប់បោះទៅលើរួចចាំទ្រវិញ អាចធ្វើឱ្យកើតសភាវ Shaken Baby Syndrom (SBS) គឺអាការដែលសាច់ខួរក្បាលទៅបោកប៉ះនឹងឆ្អឹងលលាដ៍ក្បាលរហូតមានឈាមចេញក្នុងខួរក្បាល ដែលអាការនេះនឹងហុចផលប៉ះពាល់ដល់ការរីកចម្រើនធំធាត់របស់កូនបាន៕

ថ្មីៗនេះ អ្នកលក់Onlineដ៏ល្បីឈ្មោះ អ្នកនាង Love Riya បានធ្វើឱ្យអ្នកលេងបណ្ដាញសង្គមជាច្រើនភ្ញាក់ផ្អើលនៅនឹងរឿងមានចោរចូលគាស់ផ្ទះខ្លួន ខណៈពេលដែលនាងជាមួយនឹងក្រុមគ្រួសារ និងបុគ្គលិកមានដំណើរកម្សាន្តទៅខេត្តកំពត។

ដោយហេតុការណ៍ចោរលួចចូលគាស់ផ្ទះអ្នកនាង រីយ៉ា កើតឡើងកាលពីថ្ងៃទី1 ខែសីហា ឆ្នាំ2020 ក្នុងនោះដែរ នាងក៏បានអះអាងថា កាលកំឡុងពេលនាងទៅដើរលេងនៅក្នុងខេត្តកំពត នាងបានបិទទ្វារបង្អួចផ្ទះជាន់ក្រោមទាំងអស់ ចំណែកជាន់ទីមួយវិញ បានបិទទ្វារតែភ្លេចចាក់សោរ ទើបធ្វើឲ្យចោរចូលផ្ទះបានដោយងាយបែបនេះ។

អ្នកនាង Love Riya និយាយថា នៅក្នុងវីដេអូដែលអ្នកនាងប្រកាសថា បាត់លុយមិនមែនក្នុងបំផុសធ្វើឱ្យសង្គមមានការចលាចលដូចការរិះគន់នោះទេ តែគឺអ្នកនាងចង់និយាយបំភ័យក្រុមចោរ និង ចង់ឱ្យចោរដែលយកបានទូរដែកអាតូចរបស់អ្នកនាងទៅ ដែលនៅក្នុងទូរដែកនោះអត់មានលុយសោះ ចូលមកតវ៉ា និងចេញមុខបង្ហាញអត្តសញ្ញាណ។ អ្នកនាងថា មហាជនភាគច្រើនមើលតែដើមវីដេអូ ដែលអ្នកនាងនិយាយថា បាត់លុយ30ម៉ឺនដុល្លារប៉ុណ្ណោះ តែនៅផ្នែកខាងចុងឃ្លីបដែលអ្នកនាងនិយាយថា នៅក្នុងទូរដែកនោះអត់មានលុយទេ និង ថាអត់បាត់អ្វីទេ ក្រោយពេលមកដល់ផ្ទះ គឺអត់មានអ្នកណាលើកមកនិយាយសោះ។ អ្នកនាងថា បើខ្លួនចង់បំពុលសង្គម ឬ ចង់ល្បី ដោយកុហកគេថាបាត់លុយដើម្បីចង់ល្បី តើនាងចាំបាច់ត្រូវឆ្លើយនៅផ្នែកខាងចុងឃ្លីបថា អត់មានបាត់អ្វី និង លក់ឡេកើតទេ នៅពេលបើកទូរដែកធំហើយមិនឃើញបាត់អីនោះ។ អ្នកនាងថា អ្នកចោទថានាងបំពុលសង្គម និង ថាអ្នកនាងកុហករឿងបាត់លុយ គឺអ្នកមិនមើលវីដេអូរបស់អ្នកនាងឱ្យចប់ ដោយមើលតែដើមវីដេអូ ហើយក៏ចែកចាយគ្នាដើម្បីរិះគន់តែម្ដង។ អ្នកនាងនៅតែអះអាងថា បើអ្នកនាងចង់បំពុលសង្គមតើអ្នកនាងនិយាយថាមិនបាត់អ្វីទេនៅខាងចុងឃ្លីបធ្វើអី ហើយបើអ្នកនាងចង់ល្បីព្រោះតែរឿងកុហកថាបាត់លុយមែន តើចាំបាច់អីដែលអ្នកនាងឆ្លើយប្រាប់សមត្ថកិច្ចថាខ្លួនអត់បានអ្វីទេក្រៅពីទូរដែកទទេមួយ និងបានប្រាប់អ្នកគាំទ្រតាំងពីដើមថា អត់បាត់អ្វីទេ។

យ៉ាងណាអ្នកនាងបញ្ជាក់ថា អ្នករិះគន់ទំនងជាមើលមិនចប់ឃ្លីប និងអាចមកពីពេលអ្នកនាងបកស្រាយថាអត់មានបាត់អ្វីនៅក្នុងឃ្លីប គឺនិយាយមិនលម្អិត។ អ្នកនាងបន្តថា ការលើកឡើងក្នុងវីដេអូដំបូងរបស់អ្នកនាង មានគោលបំណងតែម្យ៉ាងគត់គឺចង់ឱ្យចោរដែលលួចទូរដែកយកទៅហើយមិនមានលុយក្នុងនឹង ឱ្យចេញតវ៉ា ស្របពេលដែលអ្នកនាងដឹងថា កាមេរ៉ាសុវត្ថិភាព ក៏ថតមិនបាន ព្រោះតែអ្នកនាងបិទប៉ារ៉ែតភ្លើង។ តែអ្នកនាងក៏បានបកស្រាយនៅក្នុងវីដេអូឃ្លីបដែរ គឺមិនមែនប្រកាសថាបាត់ហើយមិនមានការបកស្រាយនោះទេ។ ក្នុងវីដេអូ Live ក្រោយៗ អ្នកនាង ក៏បកស្រាយថាមិនបាត់អ្វីផងដែរ គឺមិនមែនទាល់តែក្រុមសមត្ថកិច្ចមកធ្វើការសាកសួរទើបអ្នកនាងសារភាពថាអត់បាត់ដូចការយល់ច្រលំឡើយ។

ជាមួយនឹងការរិះគន់ថា អ្នកនាងជិះឡានថ្លៃមិនសមនឹងផ្ទះ អ្នកនាងបញ្ជាក់ថា អ្នកនាងមិនអត់លទ្ធភាពក្នុងការទៅរស់នៅវីឡាឱ្យសមនឹងតម្លៃឡាននោះទេ ប៉ុន្តែគឺមកពីអ្នកនាងមិនចង់ទៅរស់នៅឆ្ងាយពីកូនចៅ និងម្យ៉ាងមកពីក្នុងផ្ទះនោះគឺមានបន្ទប់ច្រើនសម្រាប់អោយកូនចៅស្នាក់នៅ ហើយបើទៅនៅកន្លែងថ្មី កូនចៅខ្លះទៅតាមមិនកើត ទើបអ្នកនាងនៅបន្តរស់នៅផ្ទះនោះ។ អ្នកនាងថា ផ្ទះនោះជាផ្ទះកក់ក្ដៅ និងធ្វើអោយអ្នកនាងមានបាន ហើយដោយសារតែរស់នៅទីនោះ មិនធ្លាប់មានផលរមាស់ដូចចោរគាស់ផ្ទះម្ដងនោះផង ទើបអ្នកនាងមិនទៅណា។ ក្រោយហេតុការណ៍នេះ អ្នកនាងក៏មិនទាន់ច្បាស់ថាគួររើកន្លែងទៅចោលកូនចៅមួយចំនួន ឬ បន្តរស់នៅផ្ទះនោះនោះដដែរ បើទោះជាអ្នកខ្លះរិះគន់ថាអ្នកនាងរស់នៅផ្ទះមិនសមតម្លៃឡាន។ អ្នកនាងថា ទោះអ្នកមានផ្ទះតូចជាងអ្នកនាង តែអ្នកទាំងនោះ ក៏អាចទិញឡានថ្លៃជិះបានដែរ ឱ្យតែគេស្រលាញ់ គឺមិនគួរយកមកធ្វើជាការរិះគន់ ដើម្បីជាន់ពន្លិចគ្នានោះឡើយ៕

– តើទឹកភេសជ្ជៈមានផលប៉ះពាល់ចំពោះធ្មេញយ៉ាងណាដែរ?

ឆ្លើយ ៈ ទឹកភេសជ្ជៈមានចំណែកផ្សំរបស់ស្ករ ដែលជាអាហាររបស់មេរោគអតិសុខុមប្រាណ នៅពេលអតិសុខុមប្រាណយកធ្វើជា  អាហាររួចហើយ វានឹងបញ្ចេញកាកសំណល់ជាអាស៊ីតមកខាំបំផ្លាញអញ្ចាញ និងធ្មេញ។

– តើគួរដុសសម្អាតធ្មេញក្នុងមួយថ្ងៃប៉ុន្មានដង?

ឆ្លើយ ៈ គ្រប់ពេលក្រោយពីញ៉ាំអាហាររួច ឬយ៉ាងតិចបំផុតមួយថ្ងៃ 2 ដង។

-តើការដុសធ្មេញម្តងៗ គួរប្រើពេលយូរប៉ុនណាទើបស្អាតសព្វ?

ឆ្លើយ ៈ ប្រមាណជា 2 – 3 នាទី តែសម្រាប់អ្នកដែលកើតជំងឺអញ្ចាញធ្មេញ ត្រូវប្រើពេលយូរជាងនេះ។

– ការដុសសម្អាតធ្មេញបែបទទឹងធ្មេញជាប្រចាំ នឹងមានផលអាក្រក់យ៉ាងណា?

ឆ្លើយ ៈ ធ្វើឱ្យសឹកសាច់អញ្ចាញ ពុកធ្មេញ និងស្រៀវធ្មេញ។

– អ្វីជាមូលហេតុដែលធ្វើឱ្យធ្មេញប្តូរពណ៌បណ្តោះអាសន្ន?

ឆ្លើយ ៈ កើតឡើងដោយសារកំណកផ្សែងបារី ទឹកតែ កាហ្វេ តែការដុសសម្អាតធ្វើឱ្យធ្មេញត្រឡប់ទៅជាប្រក្រតីវិញ។

– តើកំណកពណ៌ជាប់ស្អិតខ្លាំងលើធ្មេញដែលបណ្តាលមកពីផ្សែងបារី ទឹកតែ និងការហ្វេគួរកែខៃយ៉ាងណា?

ឆ្លើយ ៈ ការជក់បារី ឬញ៉ាំអាហារ ភេសជ្ជៈដែលមានពណ៌ជាប្រចាំនឹងមានការប្រមូលសន្សំពណ៌នៅលើស្រទាប់ធ្មេញដែលមិនរលោងកើតចេញជាកំណកពណ៌ផ្សេងៗមិនគួរឱ្យចង់ឃើញឡើយ តែអាចកែខៃបានដោយការដុសសម្អាតធ្មេញយ៉ាងត្រឹមត្រូវតាមវិធី និងជាប់លាប់ដោយថ្នាំដុសធ្មេញដែលមានប្រសិទ្ធិភាព។

– អ្វីជាមូលហេតុដែលធ្វើឱ្យធ្មេញប្តូរពណ៌ជានិរន្តរ?

ឆ្លើយ ៈ ដោយសារតែធ្មេញត្រូវបានធ្វើឱ្យបុកប៉ះរញ្ជួយ ធ្វើឱ្យធ្មេញស្លាប់ ក្លាយជាពណ៌ស្រអាប់ ឯការព្យាបាលវិញ គឺព្យាបាលពីឬសធ្មេញ។

– ការជក់បារីក្រៅពីធ្វើឱ្យធ្មេញលឿងហើយ តើនៅមានផលអាក្រក់ចំពោះសុខភាពក្នុងប្រអប់មាត់យ៉ាងណាខ្លះ?

ឆ្លើយ ៈ ធ្វើឱ្យកើតការរលាកក្រហាយក្នុងប្រអប់មាត់ អញ្ចាញ ក្រអូមមាត់ឡើងជ្រាំងសៗ មានការរលាកនៅក្នុងបំពង់បញ្ចេញទឹកមាត់ផ្នែកខាងក្នុង មានការឡើងកម្រាស់របស់សាច់ភ្នាសក្រអូមមាត់ និងអាចធ្វើឱ្យកើតមហារីកបបូរមាត់បាន។

– មូលហេតុដែលធ្វើឱ្យកើតអាការស្រៀវធ្មេញគឺអ្វី?

ឆ្លើយ ៈ បណ្តាលមកពីការដុសធ្មេញខុសវិធី ធ្វើឱ្យធ្មេញសឹក អាចកែខៃបានដោយការដុសធ្មេញឱ្យត្រូវវិធី និងគួរញ៉ុក ឬប៉ះប៉ូវធ្មេញដែលសឹក។

– តើគួរការពារឧប្បតិ្តហេតុចំពោះធ្មេញដែលបណ្តាលមកពីការលេងកីឡាយ៉ាងណា?

ឆ្លើយ ៈ ប្រើធ្មេញជ័រដែលជាឧបករណ៍ការពារចំពោះកីឡាវាយបុក មានលក់នៅតាមហាងលក់ឧបករណ៍កីឡា ឬឱ្យទន្តពេទ្យវាស់ធ្វើឱ្យក៏បាន។

– សុខភាពធ្មេញ និងប្រព័ន្ធរំលាយអាហារ មានភាពពាក់ព័ន្ធគ្នាយ៉ាងណា?

ឆ្លើយ ៈ អាហារដែលឆ្លងកាត់ការទំពាររឹតតែល្អិតប៉ុនណា ក្រពះ និងពោះវៀនរឹតតែធ្វើការស្រួល និងតិចចុះប៉ុណ្ណោះដែរ និងបឺតយកសារធាតុរ៉ែបានកាន់តែច្រើនឡើងទៀតផង។

– តើយើងអាចពិនិត្យកំណកអតិសុខុមប្រាណ ក្រោយពេលដុសធ្មេញហើយបានដោយវិធីណា?

ឆ្លើយ ៈ 1 . ប្រើអណ្តាតប៉ះនៅលើស្រទាប់ធ្មេញ បើមានកំណកអតិសុខុមប្រាណ នឹងមានអារម្មណ៍ថាមានទឹករំអិលគ្រើមៗនៅជាប់នៅលើនោះ។

2 . មើលដោយភ្នែកទទេនឹងឃើញមានកំណកសៗល្អក់ៗជាប់នៅតាមចន្លោះអញ្ចាញ និងធ្មេញ។

– ជំងឺពុកធ្មេញគឺអ្វី?

ឆ្លើយ ៈ គឺការដែលធ្មេញត្រូវបំផ្លាញឱ្យមានរន្ធ ឬប្រហោង ការបំផ្លាញនេះនឹងដំណើរទៅជារឿយៗ ដោយរាងកាយមិនអាចជួសជុលបានឡើយ។

– វិធីពិសោធថា តើធ្មេញពុកឬក៏អត់នោះ ត្រូវធ្វើយ៉ាងណា?

ឆ្លើយ ៈ

• មានចំណុចខ្មៅនៅលើចង្អូរលើធ្មេញ អាចមើលឃើញបានដោយការយកកញ្ចក់មកឆ្លុះជិតៗ។
• មើលដោយភ្នែកទទេនឹងឃើញមានកំណកល្អក់ៗសៗ ជាប់នៅនឹងចន្លោះអញ្ចាញ និងធ្មេញ។
• ពេលយកឈើចាក់ធ្មេញមកកៀសៗបរិវេណចង្អូរលើធ្មេញ នឹងមានអាការស្រៀវធ្មេញ។
• ទទួលទានអាហារត្រជាក់ខ្លាំង ក្តៅខ្លាំង ឬផ្អែមខ្លាំង នឹងមានអារម្មណ៍ស្រៀវរហូតឈឺធ្មេញ។
• មានក្លិនមាត់គ្រប់ពេលវេលា។

(នៅមានត)