Category: សង្គម និងសេដ្ឋកិច្ច

បុគ្គលិកម្នាក់ៗរបស់ Facebook ទទួលបានប្រាក់ឧបត្ថម្ភបន្ថែម1,000ដុល្លារ ដើម្បីទិញឧបករណ៍សម្រាប់បន្តធ្វើការពីចម្ងាយ
Facebook អនុញ្ញាតឱ្យបុគ្គលិករបស់ខ្លួនធ្វើការពីចម្ងាយរហូតដល់ខែមិថុនាឆ្នាំ2021 ព្រមទាំងផ្ដល់ប្រាក់ឧបត្ថម្ភដល់បុគ្គលិកម្នាក់ៗចំនួន1,000ដុល្លារដើម្បីទិញសម្ភារៈសម្រាប់ធ្វើការនៅឯផ្ទះ ក្នុងគ្រាដែលរលកទី2របស់COVID-19បានបង្ហាញខ្លួន។
យោងតាម Reuters ព័ត៌មានខាងលើនេះត្រូវបានអ្នកនាំពាក្យរបស់ Facebook ទទួលស្គាល់កាលពីថ្ងៃទី6សីហាថា៖ “បន្ទាប់ពីបានពិនិត្យទៅលើការណែនាំរបស់អ្នកជំនាញការផ្នែកសុខាភិបាល និងរដ្ឋាភិបាល ក៏ដូចជាកិច្ចប្រជុំផ្ទៃក្នុងអំពីបញ្ហានេះ យើងក៏សម្រេចអនុញ្ញាតឱ្យបុគ្គលិកបន្តធ្វើការពីផ្ទះដោយស្ម័គ្រចិត្តរហូតដល់ពាក់កណ្ដាលឆ្នាំក្រោយ”។
មុននោះ បុគ្គលិករបស់ Facebook ចំនួន45,000នាក់ ត្រូវបានអនុញ្ញាតឱ្យធ្វើការពីចម្ងាយតាំងពីខែមីនា ប៉ុន្តែមិនទាន់បានកំណត់ច្បាស់លាស់ថា ពេលណាទើបអាចត្រលប់មកធ្វើការក្នុងក្រុមហ៊ុនវិញនោះទេ។ ពួកគេនៅតែទទួលបានប្រាក់ខែពេញលេញ ព្រមទាំងទទួលបានប្រាក់ឧបត្ថម្ភចំនួន1,000ដុល្លារដើម្បីដោះស្រាយបញ្ហាក្នុងសម័យCOVID-19នេះ។
កាលពីចុងខែកក្កដា Google ក៏ជាក្រុមហ៊ុនបច្ចេកវិទ្យាធំដំបូងគេនៅជ្រលងភ្នំSilicon បានប្រកាសបន្តឱ្យបុគ្គលិករបស់ខ្លួនចំនួនជិត200,000នាក់នៅទូទាំងពិភពលោក បំពេញការងារពីចម្ងាយរហូតដល់ខែមីថុនាឆ្នាំ2021។
លោក Sundar Pichai ដែលជា CEO របស់ Alphabet (Google) បានសរសេរនៅក្នុងអ៊ីមែលដែលផ្ញើទៅកាន់បុគ្គលិករបស់ខ្លួនថា “ខ្ញុំដឹងថាប្រការនេះមិនងាយស្រួលឡើយ។ ខ្ញុំសង្ឃឹមថា ការសម្រេចចិត្តថ្មីនេះនឹងជួយឱ្យអ្នកទាំងអស់គ្នា មានភាពម្ចាស់ការជាងមុនក្នុងការធ្វើឱ្យមានតុល្យភាពរវាងការងារក្រុមហ៊ុននិងការថែរក្សាសុខភាពផ្ទាល់ខ្លួន រួមនឹងគ្រួសារក្នុងរយៈពេល12ខែទៅមុខទៀត”។
ចំណែកក្រុមហ៊ុន Microsoft មកដល់បច្ចុប្បន្នមិនទាន់បានចេញសេចក្ដីកែប្រែលើការប្រកាសកាលពីពេលកន្លងទៅដែលថានឹងអនុញ្ញាតឱ្យបុគ្គលិកចូលធ្វើការក្នុងក្រុមហ៊ុនវិញនៅរដូវស្លឹកឈើជ្រុះនៅឡើយ។ រីឯក្រុមហ៊ុន Apple ឯណោះ ក៏បានធ្វើសកម្មភាពទៅតាមកាលៈទេសៈ ដោយបើក-បិទហាងរបស់ខ្លួនទៅតាមការប្រែប្រួលនៃស្ថានភាពរបស់COVID-19៕
ប្រភព៖ សារព័ត៌មានបរទេស
August 7, 2020
ចំណេះដឹងល្អៗថ្មី 100 មុខសម្រាប់ស្រ្តីមេផ្ទះ (តពីលេខមុន)
51 . ការខាត់ក្តារកម្រាលផ្ទះឱ្យភ្លឺរលោងបែបបុរាណគឺ រកផ្លែដូងទុំមកពុះបំបែកជាបំណែក ហើយយកមកដាក់ផ្កាប់យកខាងសាច់ដូងមកដុសខាត់ក្តារកម្រាលផ្ទះឱ្យបានញឹកញាប់ ក្តារកម្រាលផ្ទះនោះនឹងភ្លឺរលោងចាំងមិនខាន។
52 . ស្នោ (ហ្វូម) អាចប្រើជាប្រយោជន៍បានច្រើនយ៉ាងណាស់ ដូចជា យកមកធ្វើជាជ័រកាវស្អិតសម្រាប់បិទស្នាមប្រេះលេចរបស់វត្ថុប្រើប្រាស់ផ្សេងៗបានយ៉ាងល្អគឺ មុននឹងយកមកប្រើ ត្រូវយកបំណែកដុំស្នោមកកាច់បំបែកជាកំទេចតូចៗទៅដាក់ត្រាំក្នុងប្រេងសាំងធិននើរ៍ ឱ្យវារលាយទៅជាល្បាយខាប់ៗស្អិតៗ ហើយយកទៅបិទភ្ជិតស្នាមបែកប្រេះលេចរបស់វត្ថុប្រើប្រាស់ផ្សេងៗ ដូចជា ចានដែកជ័រសម្រាប់បោកខោអាវ ជាដើម ទុកឱ្យស្ងួតល្អ របស់របរទាំងនោះនឹងអាចប្រើប្រាស់បានយូរតទៅទៀតមិនខាន។
53 . វិធីកំចាត់ស្នាមច្រែសនៅលើស្នួដែកហាលខោអាវគឺ រកកំទេចក្រណាត់មកជ្រលក់ទឹកខ្មេះ រួចយកទៅដុសលើស្នួច្រែសនោះឱ្យសព្វ ហើយយកទឹកសាប៊ូមកដុសសម្អាតពីលើថែមទៀត បន្ទាប់ពីនោះជូតសម្អាតដោយក្រណាត់ជ្រលក់ទឹកស្រពាប់ៗ តាមដោយក្រណាត់ស្ងួតមួយសាទៀត ស្នាមច្រែសនៅលើស្នួហាលខោអាវនោះនឹងបាត់អស់រលីង។
54 . ការសម្អាតផ្លែកាំបិតប្រើប្រាស់ក្នុងចង្រ្កានបាយដែលមានឡើងស្នាមច្រែសនោះគឺ យកកាំបិតនោះទៅដុសជាមួយក្រូចឆ្មារ ឬមើមខ្ទឹមក្រហមក៏បាន ហើយលាងចេញដោយទឹកស្អាត រួចជូតឱ្យស្ងួត ធានាថា កាំបិតធ្វើម្ហូបរបស់បងៗស្រ្តីមេផ្ទះយើងនឹងលែងមានស្នាមច្រែសឡើងទៀតមិនខាន។
55 . ការសំលៀងកាំបិតដែលប្រើក្នុងចង្រ្កានបាយឱ្យមុតបានយូរ អាចធ្វើបានដោយការបន្តក់ប្រេងកាតប្រមាណជា 2 – 3ដំណក់នៅលើថ្មសំលៀងកាំបិត ហើយសំលៀងតាមធម្មតា ធានាថាកាំបិតរបស់បងៗនឹងមុតយ៉ាងល្អ និងប្រើបានយូរទៀតផង។
(នៅមានត)
August 7, 2020
និយាយជាមួយកូនយ៉ាងណា នៅពេលកូនភ័យខ្លាច ឬមានកង្វល់?
អាការវិតក្កកង្វល់ ឬភ័យខ្លាចនេះ គឺជាអ្វីដែលមនុស្សគ្រប់រូបត្រូវតែធ្លាប់ជួបទាំងអស់ តែនឹងតិច ឬច្រើនប៉ុនណា ត្រង់នេះអាស្រ័យលើករណីរបស់មនុស្សម្នាក់ៗ រឹតតែជាក្មេងផងនោះ ពេលដែលភ័យខ្លាច ឬមានកង្វល់ តើមនុស្សចាស់ ឬឪពុកម្តាយនឹងជួយកុមារឱ្យឆ្លងកាត់អារម្មណ៍មិនសប្បាយចិត្តនេះបានយ៉ាងដូចម្តេច?
មានពាក្យសំដីជាច្រើនដែលឪពុកម្តាយនិយាយជាមួយកូនដោយបំណងប្រាថ្នាល្អ ចង់ឱ្យកូនសម្លាញ់បាត់ភ័យខ្លាច តែពាក្យខ្លះ ក័មិនអាចជួយអ្វីបានដែរ និងអាចនឹងធ្វើឱ្យកូនរឹតតែភ័យខ្លាចឡើងក៏មានដែរ ដូច្នេះតើមានពាក្យសំដីអ្វីខ្លះដែលមិនគួរ និងគួរនិយាយ?
“មិនបាច់ខ្លាចទេណា៎ មិនអីទេកូន…”
ក្មេងៗពេលដែលភ័យខ្លាច ឬមានកង្វល់ វាមិនមែនត្រឹមតែជាអារម្មណ៍ដែលភ័យខ្លាចនោះទេ តែជារាងាកាយដែលសម្តែងចេញមក បេះដូងលោតញាប់ ដៃត្រជាក់ស្រេប ញ័រ ចង់មិនភ័យខ្លាចដែរ តែធ្វើមិនបាន ព្រោះរាងកាយមិនធ្វើតាម។
– រឿងដែលឪពុកម្តាយគួរធ្វើ
បើកូនភ័យខ្លាច មានកង្វល់ខ្លាំង នឹងមានអាការបេះដូងលោតញាប់ ញ័រខ្លួន ដៃជើងត្រជាក់ ចូរឱ្យកូនដកដង្ហើមចេញចូលវែងៗ (ធ្វើឱ្យកូនមើលជាគំរូ) ព្រោះនៅពេលដែលរាងកាយល្អប្រសើរឡើង កូននឹងដឹងថា ចាប់ផ្តើមលែងអីហើយ។
” ប៉ា និងម៉ាក់មិនយល់សោះថា ហេតុអីបានកូនត្រូវភ័យខ្លាចដល់ថ្នាក់ហ្នឹង?”
ក្មេងដែលភ័យខ្លាច ឬមានកង្វល់ នឹងមានអារម្មណ៍មិនល្អ មានអារម្មណ៍ដូចមិនអាចជួយខ្លួនឯងបានស្រាប់ទៅហើយ ដូច្នេះការយល់ចិត្ត ការអាណិតអាសូរគឺជារឿងដែលកូនត្រូវការពីមនុស្សដែលគេស្រឡាញ់ និងទុកចិត្តដូចជាឪពុកម្តាយនេះ។
– រឿងដែលឪពុកម្តាយគួរធ្វើ
សាកល្បងនឹកគិតទៅដល់ពេលដែលឪពុកម្តាយខ្លួនឯងភ័យខ្លាច ឬមានកង្វល់វិញ តើមានអារម្មណ៍យ៉ាងណាខ្លះ? ដូច្នេះពាក្យសំដីដែលនឹងជួយកូនបានខ្លាំងបំផុតនោះគឺ “ប៉ាយល់” “ម៉ាក់ដឹងថាវាយ៉ាងម៉េច” ដើម្បីឱ្យកូនដឹងថា ឪពុកម្តាយយល់ចិត្តគេ ដឹងពីអារម្មណ៍របស់គេ។
ការស្គាល់កូនច្បាស់ ការយល់ចិត្ត ការអាណិតអាសូរ និងក្តីស្រឡាញ់ គឺជាចំណុចសំខាន់បំផុតក្នុងការជួយកូនឱ្យឆ្លងផុតពីក្តីភ័យខ្លាច និងក្តីកង្វល់បារម្ភទាំងឡាយ ព្រោះនៅពេលកូនមានអារម្មណ៍ភ័យខ្លាច ឬមានកង្វល់គេតែងនឹងឃើញឪពុកម្តាយមុនអ្វីៗទាំងអស់៕
August 7, 2020
ទ្រព្យរបស់ម្ចាស់ Facebook កើនឡើងដល់100ពាន់លានដុល្លារអាមេរិក
Mark Zuckerberg បច្ចុប្បន្នគឺជាអ្នកមានជាងគេលំដាប់ទី3ក្នុងពិភពលោក បន្ទាប់ពីម្ចាស់ Amazon គឺលោក Jeff Bezos និងសហស្ថាបនិករបស់ Microsoft លោក Bill Gates។
យោងតាម Bloomberg Billionaires Index មហាសេដ្ឋីវ័យ36ឆ្នាំ Mark Zuckerberg មានទ្រព្យចំនួន100ពាន់លានដុល្លារអាមេរិក។ លោកគឺជាមនុស្សទី3 បន្ទាប់ពីលោក Jeff Bezos (ម្ចាស់ Amazon) និងលោក Bill Gates (សហស្ថាបនិករបស់ Microsoft) ដែលមានទ្រព្យរយពាន់លានដុល្លារអាមេរិក។ ទ្រព្យសម្បត្តិរបស់លោក Zuckerberg ភាគច្រើនបានមកពីភាគហ៊ុនចំនួន13% របស់លោក នៅក្នុងក្រុមហ៊ុន Facebook។
មូលបត្រ Facebook កាលពីម្សិលមិញបានកើន6.5% ដែលនេះគឹជាកំណត់ត្រាថ្មី និងកើតឡើងដោយសារក្រុមអ្នកវិនិយោគជឿជាក់ទៅលើការដែលក្រុមហ៊ុននេះឧទ្ទេសនាម Reals ដែលជាគូប្រជែងរបស់បណ្ដាញសង្គមវីដេអូខ្លី TikTok របស់ចិន។ កត្តានេះបានជួយឱ្យលោក Zuckerberg រកបានទ្រព្យបន្ថែមចំនួន5.9ពាន់លានដុល្លារដោយប្រើពេលត្រឹមតែមួយរាត្រីប៉ុណ្ណោះ។
ចំណែកអ្នកដែលមានជាងគេបង្អស់ក្នុងពិភពលោក នៅតែជា Jeff Bezos ដោយមានទ្រព្យសរុប190ពាន់លានដុល្លារ។ ចំណែកអ្នកមានជាងគេលំដាប់ទី2ក្នុងពិភពលោក គឺលោក Bill Gates ដោយមានទ្រព្យសរុប120ពាន់លានដុល្លារអាមេរិក។
ទីស្នាក់ការកណ្តាលរបស់ Facebook នៅទីក្រុង Menlo Park ក្នុងរដ្ឋ California សហរដ្ឋអាមេរិក
មហាសេដ្ឋីបច្ចេកវិទ្យារបស់សហរដ្ឋអាមេរិក ថ្មីៗនេះ រកបានប្រាក់យ៉ាងច្រើនសន្ធឹក និងយ៉ាងឆាប់រហ័សបំផុត បើទោះសេដ្ឋកិច្ចសហរដ្ឋអាមេរិកកំពុងធ្លាក់ទៅក្នុងវិបត្តិដោយសារCOVID-19យ៉ាងណាក៏ដោយ។ ទ្រព្យរបស់ Zuckerberg បានកើត22ពាន់លានដុល្លារបន្ថែមទៀតនៅក្នុងឆ្នាំនេះ ខណៈដែល Bezos រកបាន75ពាន់លានដុល្លារ រាប់ចាប់ពីដើមឆ្នាំមកដល់បច្ចុប្បន្ន។
ក្រុមហ៊ុនបច្ចេកវិទ្យាធំៗបំផុតនៅសហរដ្ឋអាមេរិកចំនួន5 ដែលរួមមាន Apple, Amazon, Alphabet, Facebook និង Microsoft បច្ចុប្បន្នមានទុនប្រហាក់ប្រហែលនឹង30% នៃ GDP សរុបរបស់ប្រទេសនេះ៕
ប្រភព៖ Bloomberg
August 7, 2020
ប្រទះឃើញ ទៀត គីមហេង ចូលរួមថ្ងៃកំណើត កែវ សុខសិលា តែមិនទាន់បង្ហាញខ្លួនលើទីលាន
ក្រោយពីរងរបួសក្បាលធ្ងន់ធ្ងរ ហើយថែមទាំងបាត់បង់មិត្តស្រី ក្នុងហេតុការណ៍គ្រោះថ្នាក់ចរាចរណ៍ដ៏អាក្រក់មួយ កាលពីខែមិថុនា ឆ្នាំ2020 ផងនោះ កីឡាករ ទៀត គឺមហេង បានបង្ហាញវត្តមានជាលើកដំបូង ក្នុងកម្មវិធីមួយ កាលពីចុងសប្តាហ៍កន្លងទៅ។
ទោះជាបានបង្ហាញទឹកមុខសប្បាយរីករាយក្នុងថ្ងៃនោះក៏ពិតមែន ក៏ប៉ុន្តែកីឡាកររូបនេះ ប្រហែលជាមិនទាន់មានសភាពរាងកាយល្អដូចដើមវិញនៅឡើយ ដោយសារតែមិនទាន់បានបង្ហាញខ្លួននៅក្នុងការហ្វឹកហាត់ ឬការប្រកួតរបស់ក្លិបវិសាខាវិញ នៅឡើយទេ។
គួរបញ្ជាក់ដែរថា កាលពីថ្ងៃសៅរ៏ទី1 ខែសីហា ឆ្នាំ2020 ក្នុងកម្មវិធីខួបកំណើតគម្រប់វ័យ 23ឆ្នាំ របស់កីឡាករអ្នកចាំទីជម្រើសជាតិ កែវ សុខសិលា ដែលធ្វើឡើងនៅឯគេហដ្ឋានផ្ទាល់ខ្លួន ដោយមានការចូលរួមពីសំណាក់មិត្តភក្តិជិតស្និទ្ធ និងកីឡាកររួមអាជីពជាច្រើនរូបផងដែរនោះ ក្នុងនោះគេក៏ប្រទះឃើញវត្តមានរបស់កីឡាករ ទៀត គឹមហេង ក្នុងស្ថានភាពសុខភាពធម្មតាវិញដែរ៕

August 7, 2020
ត្រៀមខ្លួនឱ្យរួចជាស្រេច…បើសិនជាត្រូវរៀបការម្តងទៀត
ការយល់ព្រមបើកបេះដូងឱ្យឱកាសថ្មីៗបានចូលមកក្នុងជីវិតម្តងទៀតមិនមែនជារឿងខាតបង់នោះទេ តែត្រូវគិតពិចារណាត្រិះរិះឱ្យបានហ្មត់ចត់ ដើម្បីកុំអោយការសម្រេចចិត្តលើកនេះទៅប៉ះពាល់ផ្លូវចិត្ត “កូន” (បើសិនមាន)។
– រៀបការម្តងទៀត…ល្អទេ?
ទោះជាការរៀបការម្តងទៀតជាសិទ្ធិដ៏ត្រឹមត្រូវរបស់អ្នកម្តាយក៏ដោយ តែប្រាកដណាស់ រឿងដំបូងគេដែលត្រូវគិតដល់នោះគឺកូន។ ការសម្រេចចិត្តរៀបការម្តងទៀត មិនមែនជារឿងខាតបង់នោះទេ តែសំខាន់បំផុតអ្នកត្រូវអធិប្បាយឱ្យអនាគតស្វាមីថ្មីយល់ដឹងអំពីបន្ទុកភារៈតួនាទីនៃភាពជាម្តាយដែលមានជាប់នឹងខ្លួនឱ្យបានច្បាស់លាស់ថា តើគេអាចទទួលយក និងត្រៀមជាស្រេចក្នុងការស្រឡាញ់ និងអាណិតមេត្តាកូនរបស់អ្នក ដូចដែលគេស្រឡាញ់រូបអ្នកបានដែរឬទេ? បើអ្វីៗគ្រប់យ៉ាង អូខេ អ្នកក៏អាចសម្រេចចិត្តបាន។
– ត្រៀមជាស្រេចចាំទប់ទល់នឹងរឿងរញេរញ៉ៃ
ប្រាកដណាស់ថា បន្ទាប់ពីអ្នកម្តាយសម្រេចចិត្តរៀបការជាលើកទីពីរហើយនោះ មានន័យថា មានមនុស្សម្នាក់ទៀតដែលប្រៀបដូចជាមនុស្សប្លែកមុខម្នាក់ (សម្រាប់កូន) ថែមចូលមកជាផ្នែកមួយក្នុងគ្រួសារ ហើយមនុស្សម្នាក់នេះមើលទៅដូចជាស្និទ្ធស្នាលជាមួយម៉ាក់មែនទែនទៀតផង។ ក្នុងទស្សនៈរបស់កូនអាចនឹងគិតថា ម៉ាក់នឹងស្រឡាញ់បុរសម្នាក់នេះខ្លាំងជាងយើងទេដឹង? ម៉ាក់ច្បាស់ជាឈប់ស្រឡាញ់យើងមិនខាន ឬម៉ាក់លែងជាគ្នាជាមួយប៉ាហើយឬ? ជាដើម។ កុំបណ្តោយឱ្យសំណួរទាំងនេះនៅវិលវល់ដក់ក្នុងចិត្តកូនធ្វើអី អ្នកគួរតែ…ៈ
ប្រាប់ឱ្យកូនយល់ កុំគិតថា កូននៅតូចមិនដឹងរឿងរ៉ាវអ្វីឱ្យសោះ
រកពេលវេលានិយាយជាមួយកូនដោយពាក្យសំដីងាយៗ ខ្លីៗ តែការនឹងអធិប្បាយបែបនេះ អ្នកត្រូវយល់ដឹងពីធម្មជាតិរបស់កូនផងថាយ៉ាងណា ព្រោះក្មេងខ្លះគិតច្រើនជាងមនុស្សធំទៅទៀត ដែលសំខាន់នោះគឺ ការរៀបរាប់ប្រាប់ ឬអធិប្បាយអំពីអ្វីដែលកើតឡើងនៅក្នុងផ្ទះ នឹងជួយឱ្យកូនមិនមានអារម្មណ៍ដាច់ចេញពីរូបអ្នក។
សាងភាពជឿជាក់ក្នុងចិត្តដល់កូន
រឿងសំខាន់គឺ អ្នកម្តាយខ្លួនឯងត្រូវផ្តល់នូវភាពជឿជាក់ក្នុងចិត្តដល់កូនថា អ្នកនៅតែស្រឡាញ់រូបគេដូចមុនដដែល ការមានប៉ាថ្មីមិនអាចផ្លាស់ប្តូរអារម្មណ៍ដែលម៉ាក់មានចំពោះកូនបានទេ សេចក្តីស្រឡាញ់ដែលម៉ាក់ឱ្យដល់កូននៅតែមានរហូតតទៅ។ អ្នកម្តាយអាចនឹងប្រាប់កូនថា កូននៅតែមានរបស់លេងដូចមុនដដែល មានម៉ាក់ជូនទៅ និងទៅទទួលមកវិញនៅឯសាលារៀនដូចមុន តែថ្ងៃខ្លះម៉ាក់អាចនឹងទៅជាមួយបុរសម្នាក់នេះ មានគាត់ចូលមកនៅក្នុងផ្ទះជាមួយយើង និងមានអ្នកញ៉ាំបាយជាមួយយើងថែមម្នាក់ទៀត តែកូននៅតែញ៉ាំបាយជាមួយម៉ាក់ដូចមុនដដែល ជាដើម។
ផ្តល់ពេលវេលាក្នុងការសម្របសម្រួលខ្លួន
នៅពេលដែលអ្នកម្តាយចាប់ផ្តើមស្គាល់អ្នកថ្មី និងរៀបផែនការគិតថា អនាគតអាចនឹងរៀបការ ឬនៅជាមួយគ្នានោះ ក៏អាចនឹងមានការនាំកិច្ចការងារប្រចាំថ្ងៃដែលយើងធ្វើជាមួយកូន និងអ្នកថ្មីមកធ្វើរួមគ្នា តែត្រូវមានតុល្យភាពគ្នាគឺ ត្រូវមានពេលបំបែកគ្នារវាងម្តាយ-កូន ខ្លួនឯង និងអនាគតស្វាមីដោយគ្មានកូន និងកិច្ចការងារដែលនឹងធ្វើរួមគ្នាទាំង 3 នាក់ ជាដើម គឺមិនមែនត្រូវតែធ្វើជាមួយគ្នារហូតគ្រប់ពេលនោះទេ៕
August 7, 2020
ស្រ្តីមានគភ៌ក៏អាចហាត់ប្រាណបាន និងកីឡាដែលស័ក្តិសមសម្រាប់ស្រ្តីមានគភ៌
ក្រៅពីការជួយជំរុញឱ្យម្តាយចិញ្ចឹមកូនដៅយទឹកដោះខ្លួនឯងយ៉ាងតិចបំផុត 6 ខែ និងឱ្យកូនបានញ៉ាំទឹកដោះគួបផ្សំជាមួយអាហារតាមវ័យជាបន្តបន្ទាប់ដល់ 2 ឆ្នាំហើយនោះ ក្រុមវេជ្ជបណ្ឌិតជំនាញនៅបានគាំទ្រឱ្យស្រ្តីមានគភ៌មានសុខភាពរឹងប៉ឹងដោយការហាត់ប្រាណក្នុងកម្រិតសមរម្យទៀតផង ដោយបានណែនាំដូចខាងក្រោម។
ស្រ្តីមានគភ៌មិនមែនជាអ្នកជំងឺទេ តែវាជាអំឡុងពេលដែលស្រ្តីគួរមានរាងកាយរឹងប៉ឹងបំផុតក្នុងជីវិត ព្រោះរាងកាយស្រ្តីមានគភ៌ត្រូវមើលថែទាំជីវិតដល់ទៅ 2 ក្នុងពេលតែមួយ និងកំពុងត្រៀមខ្លួនចូលឆ្ពោះទៅរកកម្មវិធីការប្រសូត ដូច្នេះការហាត់ប្រាណនឹងជួយឱ្យសុខភាពរាងកាយរឹងមាំ និងការធ្វើការងាររបស់ប្រព័ន្ធលំហូរវិលរបស់ឈាមឆ្ពោះទៅកាន់ទារកក្នុងគភ៌កាន់តែល្អឡើង បានទទួលសារធាតុអាហារគ្រប់គ្រាន់ និងចម្រើនធំធាត់បានល្អ។ ក្រៅពីនេះ នៅពេលអ្នកម្តាយធ្វើលំហាត់ប្រាណ រាងកាយនឹងបញ្ចេញអ័រម៉ូនអេនដូហ្វ៊ីន ឬអ័រម៉ូននៃសេចក្តីសុខ ធ្វើឱ្យអ្នកម្តាយមានសភាវខាងអារម្មណ៍ល្អ ដែលមានចំណែកធ្វើឱ្យទារករឹងប៉ឹង និងមានអារម្មណ៍ភ្លឺថ្លា។
វេជ្ជបណ្ឌិតជំនាញបានណែនាំបន្ថែមថា ស្រ្តីមានគភ៌ដែលហាត់ប្រាណត្រូវពិចារណាពីសភាវ និងគ្រឹះភាពរឹងមាំរបស់រាងកាយជាមុនសិនថា តើមុនពេលតាំងគភ៌ធ្លាប់ហាត់ប្រាណយ៉ាងជាប់លាប់ដែរឬទេ? ហាត់ប្រាណខ្លាំងក្លាប៉ុនណា? នៅពេលតាំងគភ៌ហើយនៅអាចហាត់ប្រាណជាបន្តបន្ទាប់បានក្នុងរយៈវេលា និងភាពខ្លាំងក្លារបស់ការហាត់ប្រាណដែលស័ក្តិសមចំពោះសភាពរាងកាយ និងសភាវការតាំងគភ៌ក្នុងអំឡុងអាយុគភ៌ផ្សេងៗ រួមទាំងត្រូវឧស្សាហ៍សង្កេតមើលអាការដែលកើតឡើងក្នុងខណៈពេលហាត់ប្រាណ ឬក្រោយពេលហាត់ប្រាណហើយផង ដូចជា បើមានអាការនឿយ ល្វើយ បញ្ជាក់ថា អ្នកហាត់ប្រាណខ្លាំងជ្រុលពេកហើយ និងចំពោះស្រ្តីមានគភ៌ដែលចាប់អារម្មណ៍ការហាត់ប្រាណ តែរាងកាយមានសភាវជ្រៀតជ្រែកពីអាការផ្សេងៗនោះ អាចប្រឹក្សាជាមួយគ្រូពេទ្យជំនាញបាន។
កម្រិតកំណត់ និង ចំណុចគួរប្រយ័ត្នក្នុងការហាត់ប្រាណរបស់ស្រ្តីមានគភ៌
1 . ចាប់ផ្តើមដោយការហាត់ប្រាណបែបស្រាលៗ នៅពេលរាងកាយស៊ាំធ្លាប់ហើយ ទើបអាចបង្កើនកម្រិតភាពលំបាកបាន។
2 . ស្រ្តីមានគភ៌ដែលអាយុគភ៌នៅមិនទាន់ដល់ 3 ខែ មិនគួរហាត់ប្រាណក្នុងកន្លែងដែលធាតុអាកាសក្តៅ និងសើមឡើយ។
3 . ចៀសវាងការត្រាំក្នុងទឹកដេលមានសីតុណ្ហភាពក្តៅឧណ្ហៗខ្លាំងលើសកម្រិត។
4 . ចៀសវាងក្បាច់ដែលពន្យឺតពង្រឹងខ្លួន ក្បាច់ដែលប្រថុយប្រថាននឹងការប៉ះពាល់ជាមួយផ្ទៃ ឬក្បាច់ដែលស្រ្តីមានគភ៌ត្រូវបញ្ចេញកម្លាំងខ្លាំងៗ។
5 . មិនគួរសម្រុកហាត់ប្រាណរហូតរាងកាយមានអារម្មណ័ថា នឿយ ល្វើយឡើយ។
6 . គ្រប់ពេលដែលហាត់ប្រាណគួរញ៉ាំទឹកស្អាត ដើម្បីបំពេញជំនួសញើសដែលបាត់បង់ទៅ។
7 . បើមានអារម្មណ៍ថា ដកដង្ហើមមិនទាន់ ឈឺដើមទ្រូង វិលមុខ រកកលខ្យល់ មានឈាម ឬវត្ថុរាវចេញមកតាមរន្ធស្បូន ឬមានអាការឈឺដោយសារស្បូនបង្រួញខ្លួន (ច្រើនជាង 6 – 8 ដងក្នុង 1 ម៉ោង) គួរឈប់ហាត់ប្រាណភ្លាម និងប្រញាប់ទៅជួបគ្រូពេទ្យជំនាញជាបន្ទាន់ដើម្បីសុវត្ថិភាព។
កីឡាដែល ឡារ៉ែនចង់ណែនាំសម្រាប់ស្រ្តីមានគភ៌
1 . ហែលទឹក – ជួយធ្វើឱ្យមានអារម្មណ៍ធូរស្រាល និងសប្បាយខ្លួន សាច់ដុំគ្រប់ផ្នែករបស់រាងកាយរឹងមាំ។
2 . ការហ្វឹកយ៉ូហ្កា – ជួយឱ្យអាចគ្រប់គ្រងខ្យល់ដង្ហើម សាច់ដុំរឹងមាំធូរស្រាល មានសតិស្មារតី និងសមាធិក្នុងអំឡុងពេលប្រសូត។
3 . អ៊ែរ៉ូប៊ិក ឌែនស៍ ធ្វើចលនារាងកាយ – ជួយធ្វើចលនាសាច់ដុំស្ទើរតែគ្រប់ផ្នែកក្នុងរាងកាយ ធ្វើឱ្យមានអារម្មណ៍ធូរស្រាល។
ទាំងអស់នេះ ស្រ្តីមានគភ៌អាចហាត់ប្រាណបានយ៉ាងជាប់លាប់រៀងរាល់ថ្ងៃ ឬមួយថ្ងៃខានមួយថ្ងៃ យ៉ាងតិចក្នុងម្តងៗ 30 នាទី តាមក្បួនខ្នាតការហាត់ប្រាណរបស់ស្រ្តីមានគភ៌៕
August 7, 2020
រោងភាយន្ដត្រូវបានប្រកាសឱ្យបើកដំណើរការឡើងវិញ ប៉ុន្ដែត្រូវអនុត្តលក្ខខណ្ឌ 3ចំណុច
យោងតាមសេចក្ដីប្រកាសព័ត៌មានរបស់ក្រសួងវប្បធម៌និងវិចិត្រសិល្បៈស្តីពីការអនុញ្ញាតបើកដំណើរការឡើងវិញនូវរោងភាពយន្តក្នុងរាជធានីភ្នំពេញ បានឱ្យដឹងថា ជាការឆ្លើយតបទៅនឹងការរីករាលដាលនៃជំងឺកូវី៨-១៩ និងយោងតាមលិខិតលេខ ០៤៣សខល ចុះថ្ងៃ ទី១៧ ខែមីនា ឆ្នាំ២០២០ របស់ក្រសួងសុខាភិបាល, បណ្តារោងភាពយន្ត និងរោងសម្តែងសិល្បៈនៅទូទាំង ប្រទេស បានចូលរួមអនុវត្តយ៉ាងពេញលេញតាមការណែនាំ ដោយបានបញ្ឈប់សកម្មភាពចាក់បញ្ចាំងភាពយន្ត និងសកម្មភាពសម្តែងសិល្បៈនានា ចាប់ពីពេលនោះមក។
ដើម្បីជួយសម្រាលការលំបាកផ្នែកសេដ្ឋកិច្ច ក៏ដូចជាការលើកទឹកចិត្តដល់កិច្ចខិតខំប្រឹងប្រែងរបស់សិល្បករ សិល្បការិនី ព្រមទាំងផលិតករ អាជីវករ ម្ចាស់រោងភាពយន្ត និងរោងសម្តែងសិល្បៈ ក្នុងបុព្វហេតុអភិរក្សនិងលើក ស្ទួយវិស័យសិល្បៈវប្បធម៌ជាតិ រាជរដ្ឋាភិបាលបានអនុញ្ញាតជាគោលការណ៍ឱ្យបើកដំណើរការឡើងវិញនូវ រោងភាពយន្ត និងរោងសម្តែងសិល្បៈ ដោយតម្រូវឱ្យគោរពតាមគោលការណ៍ស្តង់ដាប្រតិបត្តិ (SOP) ដែលរៀបចំ ឡើងដោយក្រសួងសុខាភិបាល និងក្រសួងវប្បធម៌និងវិចិត្រសិល្បៈ និងលក្ខខណ្ឌតម្រូវសុវត្ថិភាពនានា រួមមាន៖
១. រោងភាពយន្ត និងរោងសម្តែងសិល្បៈ ដែលមានបំណងបើកដំណើរការសកម្មភាពរបស់ខ្លួនឡើងវិញ ត្រូវដាក់ពាក្យស្នើសុំ និងចុះអនុស្សរណៈនៃការយោគយល់គ្នា ជាមួយក្រសួងវប្បធម៌និងវិចិត្រសិល្បៈ ដើម្បី ធានាការអនុវត្តនូវគោលការណ៍ស្តង់ដាប្រតិបត្តិឱ្យបានត្រឹមត្រូវ។
២. ការអនុញ្ញាតឱ្យបើកដំណើរការរោងភាពយន្ត និងរោងសម្តែងសិល្បៈឡើងវិញ បន្ទាប់ពីរោងភាពយន្ត ឬ រោងសម្តែងសិល្បៈទាំងនោះបានត្រៀមរៀបចំខ្លួនរួចរាល់ និងប្តេជ្ញាចិត្តក្នុងការអនុវត្តតាមលក្ខខណ្ឌតម្រូវ សុវត្ថិភាព ដូចមានចែងក្នុងគោលការណ៍ស្តង់ដាប្រតិបត្តិការពារការចម្លងវីរុសកូវីដ-១៩។
៣. ការបើកដំណើរការរោងភាពយន្ត និងរោងសម្តែងសិល្បៈឡើងវិញ គឺឈរលើគោលការណ៍ស្ម័គ្រចិត្ត ដោយមានការទទួលខុសត្រូវខ្ពស់ និងចូលរួមសហការពេញលេញជាមួយក្រុមការងារចម្រុះរបស់ក្រសួង វប្បធម៌និងវិចិត្រសិល្បៈ និងក្រសួងសុខាភិបាល ដែលមានភារកិច្ចចុះត្រួតពិនិត្យតាមដានការអនុវត្តគោលការណ៍ស្តង់ដាប្រតិបត្តិ និងសេចក្តីណែនាំនានារបស់ក្រសួងសុខាភិបាល។
អាស្រ័យដូចបានជម្រាបជូនខាងលើ សូមសាធារណជន ជ្រាបជាព័ត៌មាន និងសូមសិល្បករ សិល្បការិនី ព្រមទាំងផលិតករ អាជីវករ ម្ចាស់រោងភាពយន្ត និងរោងសម្តែងសិល្បៈ ដែលមានបំណងបើកដំណើរការរោង ភាពយន្ត និងរោងសម្តែងសិល្បៈឡើងវិញ ត្រូវមកដាក់ពាក្យស្នើសុំនៅនាយកដ្ឋានសិល្បៈភាពយន្តនិងផ្សព្វផ្សា វប្បធម៌ នៃក្រសួងវប្បធម៌និងវិចិត្រសិល្បៈ នៅរៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ។

August 6, 2020
(វីដេអូ) SpaceX បាញ់បង្ហោះសាកល្បងរ៉ុកកែតទៅកាន់ផ្កាយព្រះអង្គារ
ការសាកល្បងហោះហើររយៈចម្ងាយខ្លីនៃរ៉ុកកែត Starship នេះ អាចបង្កើតបានជាជំហានធំមួយសម្រាប់មនុស្សនៅក្នុងដំណើរឆ្ពោះទៅរុករកពិភពព្រះអង្គារនាពេលដ៏ខ្លីខាងមុខ។
នៅក្នុងការសាកល្បងនេះ ឧបករណ៍ហោះហើរ Starship SN5 បានហោះឡើងទៅលើក្នុងរយៈពេលត្រឹមតែ40វិនាទីប៉ុណ្ណោះ នៅឯមូលដ្ឋានរបស់ SpaceX ដែលមានទីតាំងក្នុងភូមិ Boca Chica ភាគខាងត្បូងរដ្ឋ Texas សហរដ្ឋអាមេរិក។ គំរូ Starship SN5 ធ្វើអំពីដែកថែបមិនច្រែះនេះ ត្រូវបានបាញ់បង្ហោះសាកល្បងនៅវេលាម៉ោង6និង57នាទីព្រឹក ថ្ងៃទី5សីហា (ម៉ោងនៅកម្ពុជា) ហើយបានហោះឡើងដល់កម្ពស់150ម៉ែត្រ។ ក្រោយមក វាក៏បានចុះចតទៅតាមគម្រោងដោយជោគជ័យ។
SN5 គឺជាគំរូ Starship ទីពីររបស់ក្រុមហ៊ុន SpaceX ដែលបានហោះផុតពីដី។ មុននោះ យានដែលមានរូបរាងតឿ Starhopper ក៏ធ្លាប់ត្រូវបានបាញ់បង្ហោះឡើងជាច្រើនដងកាលពីរដូវក្ដៅ2019 នៅមុនពេលផ្អាកដំណើរការ។ មុនយាន SN5 យានមួយចំនួនដែលជាកំណែសាកល្បង ត្រូវបានបំផ្លាញក្នុងពេលធ្វើការសាកល្បងសម្ពាធ និងបញ្ឆេះម៉ាស៊ីន។
Starhopper និង SN5 សុទ្ធតែបំពាក់ម៉ាស៊ីន Raptor ដែលជាម៉ាស៊ីជំនាន់ថ្មីដ៏ខ្លាំងក្លារបស់ SpaceX។ កំណែ Starship ចុងក្រោយនឹងត្រូវបានបំពាក់ម៉ាស៊ីន Raptor ចំនួន6 និងមានកម្ពស់50ម៉ែត្រ ហើយអាចដឹកមនុស្សបាន100នាក់។ យាននេះនឹងត្រូវបានបាញ់បង្ហោះចេញពីពិភពផែនដីជាមួយនឹងរ៉ុកកែត Super Heavy ដែលមានបំពាក់ម៉ាស៊ីន Raptor ចំនួន31គ្រឿង។ ឧបករណ៍ទាំង2នេះក៏សុទ្ធតែអាចប្រើប្រាស់ឡើងវិញបានដូចគ្នា។ Super Heavy នឹងចុះចតលើផែនដីវិញបន្ទាប់ពីការហោះហើរម្ដងៗ។ ចំណែកយាន Starship ក៏មានថាមពលគ្រប់គ្រាន់ដើម្បីហោះទៅដល់ឋានព្រះចន្ទ និងផ្កាយព្រះអង្គារ។
បើសិនជាដំណាក់កាលអភិវឌ្ឍ Starship និង Super Heavy ដំណើរការដោយរលូត យានទាំងនេះនឹងអនុញ្ញាតឱ្យមនុស្សកសាងមូលដ្ឋានរបស់ខ្លួននៅលើពិភពព្រះអង្គារក្នុងរយៈពេលពី50ទៅ100ឆ្នាំខាងមុខ។
ប្រភព៖ Space
August 6, 2020
វគ្គជម្រុះ World Cup កំពុងតែប្រឈមនឹងការលើកពេលទៀតហើយ
ក្នុងកិច្ចប្រជុំតាមអ៊ិនធើណិត របស់សហព័ន្ធកីឡាបាល់ទាត់ពិភពលោក ឬ FIFA ដោយមានការចូលរួមពីសំណាក់ប្រធាន FIFA លោក Gani Infino ជាមួយនឹងសហព័ន្ធបាល់ទាត់អាស៊ាន (AFF) កាលពីពេលកន្លងទៅនេះ បានបញ្ជាក់ថា តំបន់អាស៊ាន មិនទាន់បានធូរស្បើយនៅឡើយទេពីជំងឺកូវីដ-19។
នៅក្នុងកិច្ចប្រជុំនេះ FIFA បានសួរពីស្ថានភាពរបស់វិស័យបាល់ទាត់នៅក្នុងតំបន់អាស៊ាន និងស្ថានភាពរបស់សមាគមបាល់ទាត់នីមួយៗនៅអាស៊ាន បន្ទាប់ពីជួបប្រទះការឆ្លងរាលដាលនៃវីរុស Covid-19 កន្លងមក ដោយក្នុងនោះ លោកបានដឹងថា តំបន់អាស៊ាន បានទទួលរងផលប៉ះពាល់ពីគ្រប់ទិដ្ឋភាពទាំងអស់ ជាពិសេសបញ្ហាហិរញ្ញវត្ថុ ដោយសារអ្នកគាំទ្រមិនអាចចូលរួមក្នុងការគាំទ្រ ទើបជាមូលហេតុធ្វើឱ្យប្រទេសអាស៊ានទាំងអស់ បានស្នើសុំឱ្យ FIFA ពិចារណាជាបន្ទាន់ក្នុងការពន្យារពេលការប្រកួតនានា។
គួរបញ្ជាក់ដែរថា ការប្រកួតវគ្គជម្រុះ World Cup 2022 ទើបតែដល់ពាក់កណ្តាលផ្លូវទេ ដោយនៅសល់ការប្រកួត ស្ទើរតែពាក់កណ្តាលទៀតឯណោះ ហើយប្រទេសនានាក្នុងតំបន់កំពុងតែបិទព្រំដែន ដែលធ្វើឱ្យពិបាកក្នុងការរៀបចំការប្រកួតដែលនៅសេសសល់ទាំងនោះ៕

August 6, 2020