Category: សង្គម និងសេដ្ឋកិច្ច

ដោយសារតែមានការព្រួយបារម្ភ ខ្លាចត្រូវក្រុមហ៊ុនបញ្ឈប់ពីការងារ អ្នកបើកបរយន្តហោះអាមេរិករាប់ពាន់នាក់ បានចុះឈ្មោះចូលរៀនក្នុងវគ្គសិក្សាអំពីការបញ្ជាយន្តហោះគ្មានមនុស្សបើក (drone) ដើម្បីមានការងារបម្រុង។

គម្រោងបញ្ឈប់បុគ្គលិកក្នុងទ្រង់ទ្រាយធំនៅរដូវរំហើយឆ្នាំនេះរបស់ក្រុមហ៊ុនអាកាសចរណ៍នានា កំពុងតែធ្វើឱ្យអ្នកបើកបរយន្តហោះដូចជា Michelle Bishop ប្រឈមនឹងការបាត់បង់ការងារ។ “ខ្ញុំព្យាយាមហោះហើរឱ្យបានច្រើនបំផុតនៅពេលដែលអាចធ្វើទៅបាន ព្រោះខ្ញុំស្រលាញ់ការងារនេះ” នេះបើតាមសម្ដីរបស់ Bishop ដែលជាអ្នកបើកបរយន្តហោះម្នាក់ដែលមានបទពិសោធន៍20ឆ្នាំក្នុងការងារនេះ។

នៅក្នុងអំឡុងពេលផ្អាកការហោះហើរ ថ្មីៗនេះ Michelle Bishop បានស្វែងរកការងារមួយដែលមិនបាច់អង្គុយពេញមួយថ្ងៃនៅក្បែរតុដែលពេញដោយក្រដាស។ សំណាងល្អ នាងក៏បានរកឃើញការងារមួយដែលពាក់ព័ន្ធនឹងការហោះហើរ នោះគឺការបើកបរយន្តហោះគ្មានមនុស្សបើក ពោលគឺបញ្ជាយន្តហោះ drone។

Aquiline Drones ដែលជាក្រុមហ៊ុនថ្មីមួយនៅក្នុងរដ្ឋ Connecticut មានគម្រោងដំណើរការកម្មវិធីមួយនៅក្នុងរយៈពេល2ខែខាងមុខ ដែលមានមុខងារតភ្ជាប់សេវាកម្មជាមួយនឹងតម្រូវការ សម្រាប់អ្នកទាំងឡាយណាដែលមានវិញ្ញាបនបត្របើកបរ drone និងអតិថិជនដែលមានតម្រូវការថតរូប និងវីដេអូពីលើអាកាស នៅក្នុងព្រឹត្តិការផ្សេងៗ ដូចជាពិធីរៀបការ ឬរូបភាពឯកសារនៃការសាងសង់ហេដ្ឋារចនាសម្ព័ន្ធនានាជាដើម។

ជាមូលដ្ឋាន កិច្ចការរបស់ក្រុមហ៊ុន Aquiline Drones នេះ ស្រដៀងទៅនឹងក្រុមហ៊ុន Uber ឬ ក្រុមហ៊ុន Lyft។ ស្ថាបនិក Barry Alexander ជឿថា អ្នកបើកបរយន្តហោះរាប់ពាន់នាក់នឹងក្លាយជាអ្នកបញ្ជា drone ដែលមានវិញ្ញាបនបត្រ ចូលរួមធ្វើការឱ្យក្រុមហ៊ុននេះ។

បច្ចុប្បន្ន ក្រុមអ្នកប្រើប្រាស់ដែលមានការទទួលស្គាល់ដោយរដ្ឋនៅសហរដ្ឋអាមេរិក គឺនៅមានតិចតួចនៅឡើយ ពោលគឺមិនដល់2សែននាក់ទេ។ ចាប់តាំងពីឆ្នាំ2016 នាយកដ្ឋានអាកាសចរណ៍ជាតិនៅសហរដ្ឋអាមេរិក បានតម្រូវឱ្យក្រុមហ៊ុន និងអ្នកប្រើប្រាស់យន្តហោះគ្មានមនុស្សបើក ត្រូវតែមានវិញ្ញាបនបត្រ។ គោលដៅរបស់ក្រុមហ៊ុន Aquiline Drones គឺជួយផ្ដល់វិញ្ញាបនបត្រដល់អ្នកបញ្ជា drone រាប់ពាន់នាក់នៅប្រទេសនេះ។ Alexander បានឱ្យដឹងថា ស្ទើរតែទាំងអស់នៃពួកគេ នឹងជាអតីតអ្នកបើកបរយន្តហោះរបស់បណ្ដាក្រុមហ៊ុនអាកាសចរណ៍។

កម្មវិធីផ្ដល់វិញ្ញាបនបត្ររបស់ក្រុមហ៊ុន ដែលត្រូវបានហៅថា “ជើងហោះហើរទៅកាន់អនាគត” តាមគម្រោងនឹងបើកវគ្គសិក្សាចាប់ពីថ្ងៃទី1កញ្ញាខាងមុខ។ គ្រប់គ្នាអាចចុះឈ្មោះរៀនក្នុងរយៈពេល8សប្ដាហ៍ ដោយតម្រូវឱ្យបង់ថ្លៃត្រឹមតែ1,000ដុល្លារអាមេរិកប៉ុណ្ណោះ។ ដោយឡែក សិស្សដែលជាអតីតអ្នកបើកបរយន្តហោះ ដែលជាអ្នកបានយល់ច្បាស់អំពីការហោះហើរ អាចចូលរួមវគ្គសិក្សាផ្សេងមួយទៀតដែលមានតម្លៃ800ដុល្លារ។

Alexander បានឱ្យដឹងថា សិក្ខាកាមជាង1,500នាក់បានចុះឈ្មោះរួចរាល់ហើយ ទន្ទឹមនឹងអ្នកបើកបរយន្តហោះចំនួន2,000នាក់ ក្នុងនោះមាន Bishop ផងដែរ។ Bishop បានឱ្យដឹងថា “ខ្ញុំពិតជាមិនដឹងអ្វីអំពីយន្តហោះគ្មានមនុស្សបើក។ ប៉ុន្តែ បើសិនជាជិតឈប់ហោះហើរ ខ្ញុំចង់មានឱកាសរៀនអ្វីមួយដែលថ្មី”។

បើសិនជា ក្រុមហ៊ុន Aquiline ទទួលបានជោគជ័យ នោះអ្នកបើកបរយន្តហោះគ្មានមនុស្សបើកថ្មីដែលទទួលបានវិញ្ញាបនបត្រដូចជា Bishop នឹងបង្កើតបានជាបណ្ដាញនៃអ្នកវិនិយោគស្នូលរបស់កម្មវិធីដែលក្រុមហ៊ុននេះគ្រប់គ្រង។ កិច្ចព្រមព្រៀងផ្ដល់និងទទួលសេវាកម្មផ្ដិតយករូបភាពដោយ drone នឹងមានតម្លៃយ៉ាងតិចចាប់ពី300ដុល្លារឡើងទៅ និងគិតជាម៉ោង វាមានតម្លៃ150ដុល្លារ៕

ប្រភព៖ CNN

ច្រើនឆ្នាំកន្លងមកនេះយើងបានឃើញនូវការផ្លាស់ប្តូរប្រែប្រួលនៅតាមប្រទេសនីមួយ និងសូម្បីតែនៅក្នុងប្រទេសយើងក៏ដោយក៏មានផុសឡើងនូវរូបបែបម៉ូដអគារដែលមានទ្រង់ទ្រាយប្លែកចម្លែកៗបែបមិនដែលធ្លាប់បានឃើញនៅទីណាពីមុនមកឡើយ។

ថ្ងៃនេះទំព័រដេគ័រនៃទស្សនាវដ្តី ឡារ៉ែនសូមរួបរួមកំពូលអគារដែលមានរចនាបទ និងរូបរាងប្លែកស្អាតទូទាំងពិភពលោកមកជូនប្រិយមិត្តអ្នកអានបានទស្សនាទាំងអស់គ្នា។

1 – The sky Pool (London,UK)

ជាអគារម៉ូដជ្រុងៗធម្មតា តែចំណុចលេចធ្លោគឺ នៅលើដំបូលអគារ The sky Pool នេះមានអាងហែលទឹកដែលសាងពីកញ្ចក់ថ្លាកម្រាស់ 20 សង់ទីម៉ែត្រ និងមានកម្ពស់ពីដីដល់ទៅ 35 ម៉ែត្រ សម្រាប់អ្នកណាចង់សាកល្បងភាពក្លាហានដោយការហែលទឹកនៅក្នុងអាងទឹកដែលសាងពីកញ្ចក់ថ្លានេះ។ អាងហែលទឹកកញ្ចក់នេះតភ្ជាប់អគារចំនួន 2 ឱ្យជាប់គ្នាដោយខាងក្រោមគ្មានសសរទ្រ ឬសំណង់អ្វីទប់ទ្រនៅពីក្រោមឡើយ។

2 – The Louvre Abu Dhabi (Abu Dhabi, United Arab Emirates)

សហរដ្ឋអារ៉ាប់ អេមីរេតបានទិញសិទ្ធិពីសារមន្ទី The Louvre ក្នុងតម្លៃ 500 លានដុល្លារ ហើយអគារសារមន្ទី The Louvre នៅក្នុង អាប៊ូ ដាប៊ីនេះថែមត្រូវបានសាងសង់ឡើងដោយការសហការគ្នារវាងអារ៉ាប់ និងបារាំងទៀតផង។ ដោយបានទទួលការរចនាម៉ូដឱ្យក្លាយជាអគារដែលមានរូបរាងជាដូម មានស្នាមបែក និងរន្ធនៅលើដំបូលដែលជួយឱ្យពន្លឺចាំងចុះមក នៅពេលយើងដើរចូលទៅខាងក្នុង ធ្វើឱ្យមានអារម្មណ៍ថា ដូចកំពុងដើរនៅក្រោមទឹក។ គឺជារចនាបទដ៏កំពូលអស្ចារ្យ។

3 – The San Francisco Museum of Modern Art (San francisco, CA)

សារមន្ទីសិល្បៈសម័យថ្មីរបស់ San Francisco ឬ SFMOMA ដែលច្នៃម៉ូដអគារឡើងដោយ Snohetta ដែលស្ថិតនៅលើផ្ទៃដីទាំងអស់ 12,000ម៉ែត្រការ៉េ ទាំងផ្ទៃដីក្នុងម្លប់ និងកណ្តាលវាល។ ផ្នែកខាងក្រោមជាបន្ទប់វិចិត្រសាលបំពាក់កញ្ចក់ដែលអាចឱ្យមនុស្សម្នាទូទៅចូលទៅទស្សនាដោយសេរី និងនៅក្នុងជាន់នីមួយៗថែមទាំងមានការរចនាបទតុបតែងខាងក្នុងខុសប្លែកពីគ្នា មានលក្ខណៈពិសេសដោយឡែកពីគ្នា ធ្វើឱ្យអគារមួយនេះត្រូវបានច្នៃម៉ូដឡើងយ៉ាងចម្លែក។

4 – The Agora Garden (Taipei, Taiwan)

ជាអគារកម្ពស់ 20 ជាន់ កំពូលទំនើបស្ថិតនៅក្នុងទីក្រុងតៃប៉ិ ប្រទេសតៃវ៉ាន់ ជាអគារពណ៌បៃតង មានរូបរាងទ្រង់ទ្រាយជារាងអគាររមួល រចនាម៉ូដឡើងដោយ Paris-based Vincent Callebaut Architecture ។ ខាងក្នុងមានទំហំជាង 42,335 ម៉ែត្រការ៉េ ព្រមជាមួយក្លិបហៅស៍ អាងហែលទឹក រោងហាត់ប្រាណ ចំណតរថយន្ត និងកន្លែងស្នាក់នៅលំដាប់ Luxury ហើយផ្នែកខាងក្រៅនៃអគារថែមទាំងមានទឹកធ្លាក់សិប្បនិម្មិត និងសួនច្បារពណ៌បៃតងខ្ចីដែលពោរពេញទៅដោយរក្ខជាតិ បន្លែផ្លែឈើ និងរុក្ខជាតិឱសថបុរាណដែលបញ្ចេញក្លិនក្រអូបនៅជុំវិញនោះទៀតផង។

5 – Zlota 44 (Warsaw, Poland)

ជាអគារស្នាក់នៅដ៏សែនទំនើបបំផុតកម្ពស់ 54 ជាន់ ត្រូវបានច្នៃម៉ូដឡើងឱ្យមានរូបលក្ខណៈដ៏ទាន់សម័យ និងប្រើប្រាស់នវានុវត្តន៍ដែលទាន់សម័យបំផុតនៅក្នុងប្រទេសប៉ូឡូញ វាក្លាយជាអគារស្នាក់នៅដ៏សែនទំនើបបំផុត និងជានិមិត្តសញ្ញាដ៏លេចធ្លោរបស់ទីក្រុង វ៉-ស ប្រទេសប៉ូឡូញ។ ផ្នែកខាងក្នុងប្រកបទៅដោយទីកន្លែងទំនើបៗជាច្រើនដើម្បីតបស្នងចំពោះអ្នកដែលមកសា្នក់នៅ ដែលមានទាំងអាងហែលទឹក បន្ទប់ចំហុយសៅណា និងស្ប៉ា ជាដើម។

អគារមួយនេះថែមទាំងត្រូវបានសាងសង់ និងរចនាម៉ូដឡើងដើម្បីធ្វើជាអគារកម្រិតស្តង់ដារថ្មីដែលឆ្លុះបញ្ចាំងអំពីភាពជោគជ័យ និងកម្លាំងជំរុញចិត្តរបស់ប្រជាជនប៉ូឡូញទៀតផង៕

អាចរាប់បានថា ជាមណ្ឌលទេសចរណ៍ខាងទឹកដ៏អស្ចារ្យបំផុតដែលកំពុងរង់ចាំឱ្យអ្នកទេសចរណ៍ទូទាំងពិភពលោកបានទៅទស្សនា និងនែបនិត្យជាមួយនឹងបរិយាកាសធម្មជាតិដ៏ស្អាតអស្ចារ្យដែលបានឃើញហើយនឹងធ្វើឱ្យជញ្ជក់មាត់គ្រប់ៗគ្នាមិនខាន។

Plitvice Lake ប្រទេស Croatia

ជាមណ្ឌលទេសចរណ៍ដ៏ល្បីល្បាញបំផុតរបស់ប្រទេស ក្រូអាត ដែលឧត្តមសម្បូរទៅដោយភាពស្រស់ស្អាតរបស់ធម្មជាតិ ភាពស្រស់ថ្លាខៀវខ្ចីរបស់ធម្មជាតិ ភាពត្រជាក់ស្រស់បស់របស់ព្រៃព្រឹក្សា និងភាពត្រជាក់ស្រេងនៃទឹកបឹងទន្លេសាប Plitvice Lake។ គឺជាបឹងមួយក្នុងចំណោមបឹងទន្លេសាបទាំង 16ដែលត្រូវបានតភ្ជាប់គ្នាដោយទឹកជ្រោះធ្លាក់ដ៏ស្រស់ស្អាតជាច្រើនរហូតកើតចេញជាបឹងទន្លេសាបដែលឧត្តមសម្បូរទៅដោយធម្មជាតិដែលទាមទារឱ្យអ្នកទេសចរទៅនែបនិត្យ។

Halong Bay or Bay of Descending Dragons ប្រទេស Vietnam

ប្រហែលជាមិនចាំបាច់អធិប្បាយអ្វីច្រើនទេសម្រាប់ ហាឡុង បេយ៍ ប្រទេសវៀតណាមនេះ ព្រោះអាចរាប់បានថា ជាមណ្ឌលទេសចរណ៍ខាងទឹកបែបធម្មជាតិមួយទៀតដ៏ស្រស់ស្អាតបំផុត ដែលធ្លាប់ទទួលអ្នកទេសចរអស់ជាច្រើនលាននាក់មកហើយ។

ជាមួយនឹងដំណើរទេសចរណ៍បែបអនុរក្សធម្មជាតិ និងនែបនិត្យជាមួយនឹងភាពស្រស់ស្អាតរបស់បណ្តាកោះតូចធំជាង 1,600 កោះដែលពោរពេញទៅដោយដើមឈើ និងព្រៃស្រោង ព្រមទាំងបានរៀនយល់ដឹងពីវិថីជីវិតរបស់អ្នករស់នៅទីនោះយ៉ាងស្ងប់សុខ និងងាយស្រួលផងដែរ។

Wuhua Hai, Five-Flower Lake in China

ទន្លេសាប វូហួ ហៃ ឬទន្លេសាបនៃបុប្ផាទាំងប្រាំ គឺជាទន្លេសាបមួយក្នុងចំណោមទន្លេសាបដែលស្រស់ស្អាតលំដាប់ជួរមុខគេរបស់ឧទ្យាន ជីវ ចូ កូវ៍ ដោយសារតែមានទឹកដែលថ្លាហួសវិស័យរហូតដល់អាចមើលឃើញបាតបឹងបាន និងពណ៌របស់ទឹកថែមទាំងស្រស់ស្អាតរហូតក្លាយជាទីពេញនិយមសម្រាប់ប្រជាជនចិននាំគ្នាចូលមកថតព្រីវេដឌីងទៀតផង។ បឹងទន្លេសាបមួយនេះមានជម្រៅដល់ទៅ 5 ម៉ែត្រ នឹងមានផ្ទៃក្រឡាដល់ទៅ 9 ម៉ឺនម៉ែត្រការ៉េទៀតផង។

និងប្រភពរបស់ឈ្មោះដែលគេនាំគ្នាហៅថា បុប្ផាទាំងប្រាំនោះគឺ ព្រោះតែដុំកករ រុក្ខជាតិ និងថ្មកំបោរដែលស្ថិតនៅក្រោមទឹកនោះមានពណ៌ចម្រុះហ្នឹងឯង។

Cano Cristales, River of Five Colors in Colombia

បើបានទៅលេងកម្សាន្តនៅទីនោះក្នុងអំឡុងពេលដែលមានទឹកច្រើន ភ្ញៀវទេសចរច្បាស់ជាត្រូវនឹកចម្លែកចិត្តមិនខានថា តើហេតុអីបានទីនេះមានឈ្មោះថា ទន្លេ 5 ពណ៌ ទាំងដែលវាមានតែពណ៌បៃតងចាស់មួយដូចទន្លេទូទៅដែរនោះ តែឈប់សិន…បើសិនលោកអ្នកបានទៅលេងក្នុងអំឡុងខែកញ្ញា និងខែវិច្ឆិកាដែលមានទឹកតិច ឬរដូវប្រាំងវិញនោះ ក៏នឹងបានដឹងថា ហេតុអីបានមានដល់ទៅ 5 ពណ៌? ព្រោះថា ពណ៌ទាំងអស់នោះ គឺរុក្ខជាតិដែលដុះនៅក្រោមទឹកដែលមានឈ្មោះថា Macarenia clavigera ដែលនឹងប្តូរទៅជាពណ៌ក្រហម និងពណ៌ផ្កាឈូក ចៃដន្យជួបនឹងពណ៌ដ៏ស្រស់ស្អាតរបស់ដីខ្សាច់ដែលមានពណ៌លឿង និងពណ៌បៃតង និងផ្ទៃទឹកក្នុងទន្លេក៏មានពណ៌ផ្ទៃមេឃដ៏ស្អាតផងនោះ ទើបមានឈ្មោះថាជា ទន្លេ 5 ពណ៌ ហ្នឹងឯង។

Abraham Lake in Alberta, Canada

ភាពស្រស់ស្អាតដ៏គួរឱ្យនឹកចម្លែកចិត្តដែលដូចជាត្រូវបានសាងឡើងដោយកុំព្យូទ័រក្រាហ្វិកខ្លាំងជាងជាស្នាដៃរបស់ធម្មជាតិ តែមិនមែនទេ…នេះគឺជាទន្លេ អាប្រាហាំ នៃប្រទេសកាណាដា នារដូវរងា។ គឺជាបាតុភូតធម្មជាតិដ៏គួរឱ្យនឹកស្ងើច នៅពេលដែលពពុះខ្យល់រាប់លានដុំដែលនៅឯបាតទន្លេអណ្តែតឡើងមកនៅពេលធាតុអាកាសរងាខ្លាំង។ ពពុះខ្យល់ទាំងអស់នេះ ជាហ្កាសដែលកើតឡើងពីបាក់តេរីដែលរលាយពីកម្ទេចរុក្ខជាតិនៅឯបាតទន្លេហ្នឹងឯង៕

ជឿថា ស្រ្តីដែលកំពុងតាំងគភ៌ភាគច្រើនចូលចិត្តញ៉ាំកាហ្វេ ដែលចំណុចនេះអាចធ្វើឱ្យមនុស្សជាច្រើនកើតក្តីកង្វល់ថា នៅពេលញ៉ាំកាហ្វេទៅហើយនឹងមានផលប៉ះពាល់ដល់ការតាំងគភ៌ដែរឬទេ? មានគ្រោះថ្នាក់ដល់កូនក្នុងផ្ទៃដែរឬទេ? ព្រោះគ្រាន់តែតាំងចិត្តថាឈប់ញ៉ាំកាហ្វេភ្លាម មានអារម្មណ៍ថាចង់ដាច់ខ្យល់ស្លាប់បាត់ទៅហើយ ឬចង់ញ៉ាំ ក៏បារម្ភដល់គភ៌ និងកូនក្នុងផ្ទៃ ធ្វើឱ្យកើតមានអារម្មណ៍តានតឹងឡើងទៀត។ ដូច្នេះដើម្បីស្រាយចម្ងល់ជូនស្រ្តីមានគភ៌ដែលចូលចិត្តញ៉ាំកាហ្វេទាំងឡាយ ថ្ងៃនេះ ឡារ៉ែនមានចម្លើយអំពីរឿងនេះមកជម្រាបជូនទុកជាការសិក្សា។

ចម្លើយសម្រាប់សំណួរដែលសួរថា តើស្រ្តីមានគភ៌ញ៉ាំកាហ្វេបានឬទេ? ចម្លើយគឺ “បាន” តែបាននៅទីនេះគឺ ត្រូវញ៉ាំក្នុងបរិមាណប្រក្រតី ឬគួរ “កំណត់” បរិមាណកាហ្វេមិនឱ្យលើសពីមួយថ្ងៃ 300 មីល្លីក្រាមឡើយ។ ដោយសារតែសារធាតុកាហ្វេអ៊ីននៅក្នុងកាហ្វេអាចត្រូវបានបញ្ជូនបន្តតាមរយៈទងសុកឆ្ពោះទៅកាន់ទារកក្នុងគភ៌ ដែលបើសិនជាញ៉ាំក្នុងបរិមាណច្រើនជ្រុលពេក ក៏អាចនឹងមានផលប៉ះពាល់ដល់ទារកក្នុងផ្ទៃបាន ដូចជា ធ្វើឱ្យទារកចម្រើនធំធាត់យឺត ប្រថុយប្រថាននឹងការរលូត ប្រសូតមុនកំណត់ ឬប្រសូតចេញមកហើយ ទារកមានទម្ងន់ខ្លួនតិច ជាដើម។

តែទាំងអស់នេះ ស្រ្តីមានគភ៌ដែលញៀនកាហ្វេក៏មិនចាំបាច់ត្រូវកង្វល់ខ្វល់ខ្វាយខ្លាំងជ្រុលពេកដែរ ព្រោះនៅមិនទាន់មានរបាយការណ៍ពីខាងវេជ្ជសាស្រ្តមកថា ការញ៉ាំកាហ្វេធ្វើឱ្យមានគ្រោះថ្នាក់ដល់ទារកក្នុងគភ៌នៅឡើយ តែទោះយ៉ាងណាក៏វាមិនមែនបានន័យថា មានសុវត្ថិភាព 100 % នោះដែរ ដូច្នេះទើបស្រ្តីមានគភ៌គួរញ៉ាំកាហ្វេក្នុងបរិមាណដែលសមរម្យក្នុងមួយថ្ងៃៗ ឬប្រមាណជា 1 – 2 កែវតូចក្នុងមួយថ្ងៃគឺគ្រប់គ្រាន់ហើយ ឬបើសិនអាចទៅរួច គួរបន្ថយបរិមាណចុះម្តងបន្តិចៗ រហូតដល់លែងញ៉ាំតែម្តងជាការល្អបំផុតរួចងាកមកញ៉ាំទឹកបន្លែ-ផ្លែឈើដែលមានប្រយោជន៍ជំនួសវិញ ព្រោះក្រៅពីមិនបាច់ចាំកង្វល់ព្រួយហើយនោះ ទឹកបន្លែ-ផ្លែឈើទាំងនោះថែមទាំងល្អចំពោះសុខភាពទាំងម្តាយទាំងកូនដែលនៅក្នុងផ្ទៃទៀតផង៕

Elon Musk កំពុងនាំមុខគេក្នុងការប្រកួតប្រជែងនៅក្នុងទីផ្សារអ៊ីនធើណិតផ្កាយរណប ប៉ុន្តែ Jeff Bezos ឯណោះវិញ ក៏កំពុងតែវិនិយោគរាប់សិបពាន់លានដុល្លារដើម្បីប្រណាំងប្រជែងនឹង Elon Musk។

នាពេលខាងមុខ បណ្ដាតំបន់ដាច់ស្រយាលក្នុងពិភពលោកនឹងអាចប្រើប្រាស់សេវាកម្មអ៊ីនធើណិតពីផ្កាយរណប Starlink របស់ក្រុមហ៊ុន SpaceX។ ប្រព័ន្ធអ៊ីនធើណិត Starlink របស់មហាសេដ្ឋី Elon Musk ត្រូវបានដាក់ឱ្យប្រើសាកល្បងរួចមកហើយ។ កាលពីថ្ងៃទី13សីហា ក្រុមអ្នកលេងបណ្ដាញសង្គម Reddit បានបង្ហោះលទ្ធផលដំបូងស្ដីអំពីល្បឿនរបស់អ៊ីនធើណិតផ្កាយរណប Starlink ដោយក្នុងនោះ ជាមធ្យមវាមានល្បឿនប្រមាណជា30Mb/វិនាទី និងខ្ពស់បំផុតត្រឹម60.24Mb/វិនាទី។ បើទោះជាមិនទាន់បានដូចបំណង ប៉ុន្តែវាក៏អាចឆ្លើយតបទៅនឹងសកម្មភាពអនឡាញប្រចាំថ្ងៃបានយ៉ាងល្អ។

ក្រៅពីលោក Musk មហាសេដ្ឋី Jeff Bezos ក៏ចូលរួមដណ្ដើមចំណែកទីផ្សារអ៊ីនធើណិតផ្កាយរណបនេះដែរ។ កាលពីថ្ងៃទី30កក្កដា គម្រោង Kuiper របស់ Amazon ទទួលបានការយល់ព្រមពី FCC រួចហើយ ដែលនេះមានន័យថា Starlink របស់លោក Elon Musk និង Kuiper របស់លោក Jeff Bezos បានឈានចូល “សមរភូមិ” អ៊ីនធើណិតផ្កាយរណបជាផ្លូវការ។

Elon Musk មានប្រៀបជាងគេ

កាលពីខែវិច្ឆិកា2018 FCC បានអនុញ្ញតឱ្យ SpaceX បាញ់បង្ហោះផ្កាយរណបចំនួន12,000គ្រឿងទៅកាន់គន្លងគោចររបស់ផែនដី។ បច្ចុប្បន្ន ក្រុមហ៊ុននេះបានបាញ់បង្ហោះផ្កាយរណប Starlink ប្រមាណជា600គ្រឿង ទៅកាន់ទីអវកាស។ លោក Musk អះអាងថា តួលេខនេះនឹងកើតដល់30,000គ្រឿងនាពេលដ៏ខ្លីខាងមុខ។ ក្នុងដំណាក់កាលពីឆ្នាំ2019-2024 ផ្កាយរណបនេះចំនួន1,584គ្រឿងនឹងត្រូវបានដាក់ពង្រាយនៅលើគន្លងគោចរ។ ពេលនេះ ប្រព័ន្ធផ្កាយរណប “យក្ស” 3ជាន់ ក៏កំពុងត្រូវបាន SpaceX សាងសង់ផងដែរ។

កាលពីខែមិថុនា2020 សេវាកម្មអ៊ីនធើណិតផ្កាយរណបរបស់ Starlink បានអនុញ្ញាតឱ្យប្រើប្រាស់សាកល្បងដោយមិនគិតថ្លៃ។ ភ្លាមនោះ មានអ្នកប្រើប្រាស់ជាង700,000នាក់បានចុះឈ្មោះ។ SpaceX ក៏បានស្នើទៅកាន់ FCC ដើម្បីសុំបន្ថែមឧបករណ៍ទទួលរលកសញ្ញាពី1លាន ឡើងទៅ5លានគ្រឿង។

គោលដៅចុងក្រោយរបស់លោក Musk នោះគឺផ្ដល់សេវាកម្មអ៊ីនធើណិតនៅទូទាំងពិភពលោកក្នុងឆ្នាំ2021 រួមមានទាំងសេវាអ៊ីនធើណិតតម្លៃទាបនៅក្នុងទីក្រុងផងដែរ។

Amazon ប្ដេជ្ញា “រត់ប្រណាំង” ជាមួយ SpaceX

បើទោះជាត្រូវបាន FCC អនុញ្ញាតឱ្យដំណើរការគម្រោងរបស់ខ្លួនយឺតជាង SpaceX ប៉ុន្តែ Amazon កំពុងតែបង្ហាញថា មានការប្ដេជ្ញាខ្ពស់ក្នុងការប្រកួតដណ្ដើមយកចំណែកទីផ្សារអ៊ីនធើណិតផ្កាយរណបនេះដែរ។ Jeff Bezos បានប្រកាសថា នឹងវិនិយោគ1ម៉ឺនលានដុល្លារសម្រាប់គម្រោង Kuiper របស់ខ្លួន។ លោកនឹងបាញ់បង្ហោះផ្កាយរណបចំនួន3,236គ្រឿង ឱ្យបានមុនថ្ងៃទី30កក្កដា2029។ សេវាកម្មអ៊ីនធើណិតរបស់ Kuiper តាមគម្រោងនឹងដាក់លក់ភ្លាមៗក្រោយពីបានបាញ់បង្ហោះផ្កាយរណបអ៊ីនធើណិតបានចំនួន578គ្រឿង។

ក្រៅពី SpaceX និង Amazon ក៏នៅមានក្រុមហ៊ុនជាច្រើនផ្សេងទៀតមានគម្រោងចូលរួមប្រកួតប្រជែងក្នុងទីផ្សារអ៊ីនធើណិតផ្កាយរណប ក្នុងនោះក៏មាន Facebook ឬ OneWeb ផងដែរ៕

ប្រភព៖ សារព័ត៌មានបរទេស

យានអវកាសស្រាវជ្រាវព្រះចន្ទ Chandrayaan-2 សម្រេចបានជោគជ័យជាច្រើន មានដូចជាបង្កើតផែនទីទំហំផ្ទៃដី4លានគីឡូម៉ែត្រក្រឡា ថតរូបភាពគុណភាពខ្ពស់ និងប្រមូលទិន្នន័យអំពីផ្ទៃដីរបស់ឋានព្រះចន្ទ។ល។

អង្គការស្រាវជ្រាវអវកាសឥណ្ឌា (ISRO) កាលពីថ្ងៃទី20សីហា បានប្រកាសថា យានអវកាស Chandrayaan-2 បានហោះហើរជុំវិញឋានព្រះចន្ទចំនួន4,4000ជុំ បន្ទាប់ពីបានដំណើរការអស់រយៈពេល1ឆ្នាំ។ ISRO បានឱ្យដឹងថា “យានអវកាសនេះនៅតែដំណើរការល្អ ហើយប្រព័ន្ធបន្ទាប់បន្សំនានាក៏ប្រតិបត្តិការដូចធម្មតា។ ថាមពលរបស់វា គ្រប់គ្រាន់សម្រាប់ដំណើរការរយៈពេលប្រមាណជា7ឆ្នាំ”។

Chandrayaan-2 បានហោះទៅដល់គន្លងតារាវិថីនៃឋានព្រះចន្ទកាលពីថ្ងៃទី20សីហា ឆ្នាំ2019។ យាននេះបានទម្លាក់យានស្រាវជ្រាវ Vikram ទៅលើផ្ទៃដីរបស់ព្រះចន្ទ ប៉ុន្តែបានទទួលបរាជ័យ។ បើទោះជា Vikram មិនអាចចុះចតលើដីព្រះចន្ទដោយសុវត្ថិភាព តែបទពិសោធន៍នេះនឹងមានប្រយោជន៍សម្រាប់ការអភិវឌ្ឍយានចុះចតនាពេលអនាគត។ នេះបើតាមទីភ្នាក់ងារអវកាសឥណ្ឌា ISRO។

ក្រោយធ្វើសកម្មភាពអស់រយៈពេល1ឆ្នាំ យាន Chandrayaan-2 បង្កើតបានផែនទីជិត4លានគីឡូម៉ែត្រក្រឡានៃផ្ទៃដីលើឋានព្រះចន្ទ។ មួយក្នុងចំណោមតំបន់ដែលគួរចាប់អារម្មណ៍នោះគឺតំបន់បាតខ្ទះ Balmer-Kapteyn ដែលមានស្រទាប់ដីនៅពីលើស្រទាប់ថ្ម basalt ដ៏ចំណាស់។ ទីនេះបង្ហាញអំពីការប្ដូរផ្លាស់ ក្រោយពីមានអាចម៍ផ្កាយជាច្រើនបានធ្លាក់ទៅលើផ្ទៃដីនៃឋានព្រះចន្ទ បង្កើតបានជារណ្ដៅអាចម៍ផ្កាយយ៉ាងច្បាស់។

Chandrayaan-2 បានផ្ដិតយករូបភាពគុណភាពខ្ពស់ និងប្រមូលទិន្នន័យបានយ៉ាងច្រើនអំពីផ្ទៃដីរបស់លោកខែ ដែលនេះនឹងជួយឱ្យអ្នកវិទ្យាសាស្ត្រយល់បន្ថែមអំពីចំណុចពិសេសរបស់ភូមិសាស្ត្រ និងអាចសិក្សាអំពីទីតាំងចុះចតសម្រាប់យាននានាក្នុងពេលអនាគត។

ប្រព័ន្ធរ៉ាដារបស់ Chandrayaan-2 កំពុងបន្តសង្កេតមើលទឹកកកនៅត្រង់តំបន់ប៉ូលនានារបស់ព្រះចន្ទ ដែលវាអាចក្លាយជាធនធានដ៏មានតម្លៃសម្រាប់បេសកកម្មបន្ទាប់។ ក្រុមអ្នកវិទ្យាសាស្ត្រកំពុងតែវិភាគទៅលើទិន្នន័យពីយានឃ្លាំមើលព្រះចន្ទ (LRO) របស់ NASA និង Chandrayaan-2 ដើម្បីយល់បន្ថែមអំពីការកកើត និងទីតាំងរបស់ទឹកកកនៅលើព្រះខែ។

Chandrayaan-2 របស់ឥណ្ឌាថែមទាំងទទួលបានជោគជ័យជាច្រើនផ្សេងទៀត ដូចជាការរកឃើញស្លាកស្នាមវត្ថុធាតុ argon-40 ការបង្កើតផែនដីរ៉ែនៅលើតំបន់មួយចំនួននៃឋានព្រះចន្ទ និងតាមដានសកម្មភាពរបស់ព្រះអាទិត្យដោយប្រយោលផងដែរ។

កាលពីខែមករាឆ្នាំ2020នេះ ឥណ្ឌាក៏ធ្លាប់បានអះអាងថា នឹងបាញ់បង្ហោះយានអវកាស Chandrayaan-3 ឡើងទៅកាន់ទីអវកាស ប៉ុន្តែមិនទាន់បានកំណត់ពេលវេលាជាក់លាក់នៅឡើយ។ គួររំឭកថា Chandrayaan-1 ដែលជាយានអវកាសព្រះចន្ទដំបូងរបស់ឥណ្ឌា ត្រូវបានបាញ់បង្ហោះកាលពីខែតុលា2008 និងបានផ្អាកដំណើរការកាលពីខែសីហាឆ្នាំ2019៕

ប្រភព៖ Space

ខណៈដែលភាពយន្ដដ៏ល្បីមានចំណងជើងថា «ពោះធំ The Movie» បានដាក់បញ្ចាំងតាំងពីថ្ងៃទី20 ខែ​សីហា ឆ្នាំ2020 កន្លងមកនេះ មហាជនជាច្រើនដែលបានទស្សនាហើយ បានពោលសរសើរពីគុណភាពភាពយន្ដខ្មែរ និងតម្លៃអប់រំខ្លាំង។ នៅក្នុងនោះដែរ ក៏មានតារាសិល្បៈខ្មែរជាច្រើនបានចូលរួមទស្សនាភាពយន្ដនេះដូចជា គឺ​​កញ្ញា សឹម ស្រីនិច និង​កញ្ញា អូន​ផ្កាយ ដែលអ្នកទាំងពីរសុទ្ធតែបានបង្ហាញអារម្មណ៍ក្ដុកក្ដួលចេញពីក្នុងចិត្ត។

តារា​​សម្តែង​ ​សឹម ស្រី​និច បាន​​បង្ហោះ​​វីដេអូយំ​​ហើម​ភ្នែក​​​ ក្រោយ​ពេល​​​ចេញ​​ពី​មើល​រឿង​«ពោះធំ The Movie» ជាមួយ​មិត្តភក្តិ​ ដោយ​​ស្រី​​ស្អាត​រូបនេះ​​បាន​និយាយ​ទាំង​​ទឹក​មុខ​ទើប​​នឹង​​យំ​​រួច​ថា​​ «ខ្ញុំ​ទើប​ចេញ​ពី​មើល​រឿង​ពោះធំ។ នេះ​ជា​រឿង​​ខ្មែរ​ដំបូង​ហើយ​ដែល​ធ្វើ​ឱ្យ​ខ្ញុំ​យំ​ហូរ​ទឹក​ភ្នែក​​តាំង​​ពី​ដើម​រឿង​​ដល់​ភាគ​បញ្ចប់​។ អ្នក​ទាំង​គ្នា​មក​មើល​រឿងនេះអត់​​ខក​បំណង​ទេ​​»។ កញ្ញាសឹម ​ស្រីនិច ​ក៏បាន​រៀប​រាប់​បន្ថែម​ថា កញ្ញាសូម​ឱ្យមេដៃ​​សរសើរ​ដល់តួ​សម្តែង​ទាំង​​អស់ ជាពិសេស​​តួឯក​​​ស្រី ​​អាង ​​សុជាតា​ ហៅ​​ឈូ​​ឈូ​​ និង​​​តួឯក​​​ប្រុស​​ ស៊ីវ​សុវណ្ណា​រាជ្យ ដែល​​​ពូកែ​​សម្តែង​​ឈុត​ឆាក​​កម្សត់​​ខ្លាំង​ រួម​ទាំង​​​អ្នក​​​និពន្ធ និង​​អ្នក​​ដឹក​នាំ​រឿង​ដែល​ធ្វើ​ឱ្យ​កញ្ញា​កម្សត់​​តាម​សាច់​រឿង​​រហូត​​យំហើម​ភ្នែក​អស់​​បែបនេះ។

ចំណែក​​ឯ​​តារា​​ស្រី​​រូប​ស្អាត​ អូនផ្កាយ ក៏​បាន​​បង្ហោះ​​វីដេអូ​ ​ដែល​ទើប​នឹង​យំរួច ជាមួយ​​នឹង​ពាក្យ​​ក្នុង​ចិត្​ថា «ឥលូវ​ខ្ញុំ​​បាន​មើល​​រឿង​​ពោះ​​ធំ​ហើយៗ​​ គឺ​​យំ​តាំង​​ពី​ពាក់​​កណ្តាល​​រឿង​ដល់​​​បញ្ចប់​រឿង​​ក៏​នៅ​យំ​អត់​ទាន់​បាត់ ។ ឃ្លា​​ចុង​​ក្រោយ​​ហ្នឹង​​គឺ​​ទប់​​អារម្មណ៍​អត់​​ជាប់​។ និយាយ​ទៅខ្ញុំ​​អត់​​មាន​ពាក្យ​អី​​និយាយ​ទេ​ ព្រោះ​វា​កម្សត់​ខ្លាំង​ពេក​​»។

បន្ទាប់​ពី​ឃើញ​តារា​ល្បី​ៗ​យំ​ហើម​ភ្នែក​បែប​នេះពេល​បាន​មើល​រឿង​ពោះធំ The Movie រួច​បែប​នេះ កាន់​តែ​ធ្វើ​ឱ្យ​អ្នក​​មិន​​ទាន់​​បាន​​ទស្សនា​​ចង់​​ដឹង​​កាន់​​តែ​​ច្បាស់​​ថា​រឿង​«ពោះធំ The Movie» កម្សត់​​ដល់​​​កម្រិត​ណា ទើប​ធ្វើឱ្យ​​តារា​ៗ​​ទប់​​ទឹក​​ភ្នែក​​មិន​ជាប់​​បែប​នេះ។ កុំ​​ភ្លេច​​​ណា ខ្សែ​ភាពយន្ត​​រឿង​«ពោះធំ The Movie» កំពុង​​ចាក់​បញ្ចាំង​នៅ​គ្រប់​រោង​ភាព​យន្ត​ ដូចជា​ Legend Cinema, Major Cineplex និង​​ Prime Cineplex៕

ក្រសួង​អប់រំ យុវជន និង​កីឡា ជា​ស្ថាប័ន​យ៉ាងសំខាន់​មួយ​សម្រាប់​ប្រទេស​កម្ពុជា ព្រោះ​ស្ថាប័ន​នេះ​ជា​អ្នក​បណ្តុះបណ្តាល​ប្រជាជន​គ្រប់រូប​ឱ្យក្លាយ​ជា​បុគ្គល​មាន​សមត្ថភាព​សម្រាប់​ចូលរួម​គ្រប់​វិស័យ​ទាំង​រដ្ឋ និង​ឯកជន​នៅ​កម្ពុជា​រហូតមកដល់​ប​ច្ចុ​ប្បន្ន។

ថ្មីៗនេះ​ក្រសួង​អប់រំ យុវជន និង​កីឡា បានបង្ហាញ​ពី​សមាសភាព​របស់​រដ្ឋ​មន្ត្រី​នៃ​ក្រសួង​អប់រំ យុវជន និង​កីឡា ចាប់តាំងពី​ការដួលរលំ​របប​កម្ពុ​ជា​ប្រជាធិបតេយ្យ ឆ្នាំ1979 រហូតមកដល់​បច្ចុប្បន្ន​នេះ។ រដ្ឋមន្ត្រី​នៃ​ក្រសួង​អប់រំ យុវជន និង​កីឡា មាន​សមាសភាព​ដូចជា៖

ទី1 សម​មិត្ត ចាន់ វ៉ែន គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 3ឆ្នាំ គឺ​ចាប់ពី​ឆ្នាំ 1979 ដល់​ឆ្នាំ 1982។

ទី2 សម​មិត្ត ប៉ែន ណា​វុ​ឍ បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 8ឆ្នាំ គឺ​ចាប់ពី​ឆ្នាំ 1982 ដល់​ឆ្នាំ 1990។

ទី3 ឯកឧត្តម យស់ សុន គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 2ឆ្នាំ គឺ​ចាប់ពី​ឆ្នាំ 1990 ដល់​ឆ្នាំ 1992។

ទី4 ឯកឧត្តម អ៊ឹម ឈុន​លីម គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​ក្នុង​ឆ្នាំ 1992។

ទី5 ឯកឧត្តម ម៉ុម ជឹម​ហ៊ុយ  គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​ក្នុង​ឆ្នាំ 1993។

ទី6 ឯកឧត្តម អ៊ឹង ហួត គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 1ឆ្នាំ គឺ​ចាប់ពី​ឆ្នាំ 1993 ដល់​ឆ្នាំ 1994។

ទី7 ឯកឧត្តម តុល ឡោះ គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 9ឆ្នាំ គឺ​ចាប់ពី​ឆ្នាំ 1994 ដល់​ឆ្នាំ 2003។

ទី8 ឯកឧត្តម កុល ផេង គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 4ឆ្នាំ គឺ​ចាប់ពី​ឆ្នាំ 2004 ដល់​ឆ្នាំ 2008។

ទី9 ឯកឧត្តម អ៊ឹម សិទ្ធី គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​បាន​រយៈពេល 5ឆ្នាំ គឺ​ចាប់ពី​ឆ្នាំ 2008 ដល់​ឆ្នាំ 2013។

ទី10 ឯកឧត្តម ហង់ ជួនណា​រ៉ុ​ន គាត់​បាន​កាន់​ការងារ​ជា​រដ្ឋមន្ត្រីក្រសួង​អប់រំ​ចាប់ពី​ឆ្នាំ2013 រហូតដល់​បច្ចុប្បន្ន៕

ត្នោត គឺជា​ដើមឈើ​មួយ​ដើម​ដែល​បង្ហាញ​ពី​អត្តសញ្ញាណ​យ៉ាងសំខាន់​របស់​កម្ពុជា ព្រោះ​ដើមត្នោត​ជាដើម​ដែលមាន​អត្ថប្រយោជន៍​ច្រើន​បំផុត​ទាំង​ស្លឹក ឫស ធាង ដើម ផ្លែ និង​ផ្នែកផ្សេងៗទៀត។ បន្ថែម​ពីលើ​នេះ ខ្មែរ​យើង​ខ្លះ​ក៏​ប្រៀបធៀប​ផលិតផល​ពី​ត្នោត ថា​ជា​របស់​សំខាន់​ដែល​ល្អ​ឯក​ប្លែក​គេ​លើ​ពិភពលោក​របស់​កម្ពុជា​ថែម​ទៀតផង។

ទោះជា​យ៉ាងនេះ​ក្តី មួយរយៈ​ពេលនេះ ស្ករត្នោត ជា​ផលិតផល​ដ៏​ល្បីល្បាញ​របស់​កម្ពុជា ដែល​ប្រជាជន​ទូទាំងប្រទេស និង​ភ្ញៀវទេសចរ​បរទេស​ទទួល​ស្គាល់ កំពុង​ទទួលរង​នូវ​ការវាយប្រហារ​យ៉ាងធ្ងន់ធ្ង​រ​ពី​ឈ្មួញ​ទុច្ចរិត និង​ការប្រើប្រាស់​សារធាតុ​គីមី។ មួយរយៈ​ពេល​ចុង​ក្រោយនេះ គេ​ឃើញ​មន្ត្រី​ផ្នែក​កាំកុងត្រូល ដែល​ក្រោយមក​បាន​ប្រែ​ក្លាយខ្លួនជា អាជ្ញាធរ​ការពារ​អ្នកប្រើប្រាស់ កិច្ចការ​ប្រកួតប្រជែង និង​ការ​ក្លែងបន្លំ (កប​ប) ចាប់បាន​ទីតាំង​ផលិត​ស្ក​ត្នោត​ក្លែងក្លាយ​ជាច្រើន​កន្លែង​នៅ​ខេត្តតាកែវ និង​ខេត្តកណ្តាល។

បញ្ហា​នេះ អាច​នឹង​ធ្វើឱ្យប៉ះពាល់​ដ​ល់​ចង្វាក់​ផលិតកម្ម និង​ការគាំទ្រ​ផលិតផល​ក្នុងស្រុក ព្រោះ​ដោយសារតែ​របត់​ចុងក្រោយ​នេះ​អាហារ​ពី​បរទេស​សំបូរ​ទៅដោយ​សារធាតុ​គីមី ប្រជាជន​ខ្មែរ​ចាប់ផ្តើម​ងាក​មកប្រើប្រាស់​ផលិតផល​ក្នុងស្រុក​វិញ​ម្តង តែ​ប្រសិនបើ​ផលិតផល​ក្នុងស្រុក​មាន​សារធាតុ​គីមី​ដែរ នោះ​យើង​នឹង​អាច​ជួប​ការលំបាក។ បន្ថែម​ពីលើ​នេះ រដ្ឋាភិបាល និង​ភាគី​ពាក់ព័ន្ធ​កំពុង​ជំរុញ​ការផលិត​ផលិតផល​ក្នុងស្រុក ដោយ​ក្នុងនោះ​ស្ករត្នោត​ជា​ផលិតផល​សំខាន់​មួយ​សម្រាប់​ប្រជាជន ប្រសិនបើ​ស្ក​ត្នោត​ដែល​មានតែ​កម្ពុជា​បែរជា​ផលិតឡើង​ដោយ​របស់​ក្លែងក្លាយ​ទៅហើយនោះ អ្នកទិញ​នឹង​អស់​ទំនុកចិត្ត។ ការ​អស់​ទំនុកចិត្ត​នេះ អាច​នឹង​ជះឥទ្ធិពល​អាក្រក់​ផងដែរ​សម្រាប់​ចង្វាក់​ផលិតកម្ម​ជាច្រើន​ផ្សេងទៀត​ជាពិសេស​សហគមន៍​ផលិត​ស្ក​ត្នោត​ធម្មជាតិ​ពិតប្រាកដ។

កន្លងមក លោក ប៉ោ លាង​គង់ ប្រធាន​សាខា​ការពារ​អ្នកប្រើប្រាស់ កិច្ចការ​ប្រកួតប្រជែង និង​ការ​ក្លែងបន្លំ (កប​ប) ដែល​បាន​ចុះបង្ក្រាប​ទីតាំង​ស្ករត្នោត​ក្លែងក្លាយ​នៅ​ខេត្តតាកែវ​បាន​លើកឡើងថា ស្ក​ត្នោត​ក្លែងក្លាយ​នេះ​ផលិតឡើង​ដោយ​ផលិតផល​ស្ករស លាយ​ជាមួយ​ម្ស៉ៅ និង​ខ្លាញ់ ដែល​សារធាតុ​ទាំងអស់នេះ​អាច​ប៉ះពាល់​ខ្លាំង​ដល់​សុខភាព។ វា​អាច​បណ្តាលឱ្យមាន​បញ្ហា​ជាច្រើន​មកពី​កង្វះ​អនាម័យ និង​បញ្ហា​មួយចំនួនទៀត​ដល់​ក្រពះ ពោះវៀន និង​អាចឈាន​ទៅដល់​ការកើតមាន​ជា​ជំងឺ​ជាដើម។

ហេតុនេះ ការចូលរួម​របស់​ប្រជាជន​ក្នុងការ​បញ្ឈប់​ការផលិត​ស្ករត្នោត​ក្លែងក្លាយ​នេះ ជា​ជំហាន​យ៉ាងសំខាន់​ក្នុង​ការជួយ​ដល់​សុខភាព​ប្រជាជន​ផង និង​ការជួយ​ដល់​ផលិតផល​ក្នុងស្រុក​ផង៕

នៅរាត្រីថ្ងៃទី 14 ខែសីហា ឆ្នាំ2020 កម្មវិធី Miss Grand Cambodia 2020 ដែលរៀបចំការប្រកួតដោយផលិតកម្មមហាហង្ស បានបញ្ចប់ការប្រកួតវគ្គពាក់កណ្ដាលផ្ដាច់ព្រ័តជាផ្លូវការហើយដោយជម្រើសបានបេក្ខនារីចំនួន 25រូបជាបេក្ខនារីពេញសិទ្ធិ និង5រូបជាបេក្ខនារីបម្រុងទៅប្រកួតផ្ដាច់ព្រ័តនៅថ្ងៃទី 26 ខែកញ្ញា ខាងមុខនេះ។

លោក អ៉ិន សុភិន អគ្គនាយកកម្មវិធី Miss Grand Cambodia ឆ្នាំ2020 បានថ្លែងបញ្ជាក់ថា ក្នុងចំណោមបេក្ខនារី៥០រូប ក្នុងនោះជម្រើសបានបេក្ខនារី 25រូបពេញសិទ្ធិនិង5រូបបម្រុងនេះ បេក្ខនារីទាំងនេះមិនតម្រូវឱ្យស្នាក់នៅហ្វឹកហាត់រួមគ្នានោះទេ ដើម្បីជៀសវាងជម្ងឺកូវីត១៩។

ម្ចាស់ផលិតកម្មមហាហង្សរូបនេះបានបន្ដលើកឡើងថា បេក្ខនារីដែលឈានទៅកាន់វគ្គផ្ដាច់ព្រ័ត្រ សុទ្ធតែមានសមត្ថភាពទាំងផ្នែកអង់គ្លេស ទាំងសមត្ថភាពលើវេទិកា និង ភាពក្លាហាន។ បេក្ខនារីដែលជាប់មួយចំនួនក៌ជាតារាអាជីព ដែលមានទេពកោសល្យផងដែរ។ លោករំពឹងថា ផលិតកម្មមហាហង្ស នឹងផលិតបានបេក្ខនារីតំណាងប្រទេសមួយរូប ទៅប្រកួត Miss Grand International 2020 នៅប្រទេសវេណេហ្សូអេឡា នៅខែតុលា ក្នុងឆ្នាំ2020 ដែលមានសមត្ថភាព ដើម្បីមុខមាត់ជាតិ ដោយលោក និង ក្រុមការងារ នឹងប្រឹងផលិតឈុតតំណាងជាតិ អោយល្អ ដើម្បីទទួលបានភាពលេចធ្លោរមួយ នៅក្នុងការប្រកួតនោះ៕