Category: សង្គម និងសេដ្ឋកិច្ច

Jeff Wilke ដែលជា​បុគ្គល​មួយ​រូប​ក្នុង​ចំណោម​ថ្នាក់​ដឹក​នាំ​ដែល​មាន​អំណាច​ខ្លាំង​​របស់​ក្រុម​ហ៊ុន Amazon នឹង​ចាក​ចេញ​ពី​​ក្រុម​ហ៊ុន​នេះ នៅ​ដើម​ឆ្នាំ​​ក្រោយ​។

លោក Jeff Wilke ដែល​ជា​នាយក​ប្រតិបត្តិជើង​ចាស់​​ម្នាក់​​របស់​ Amazon និង​ធ្លាប់​ត្រូវ​បាន​គេ​ចាត់​ទុក​ថា​ជា​អ្នក​ស្នង​តំណែង​បន្ត​ពី​លោក Jeff Bezos នឹង​ឈប់ពី​ការ​ងារ​នៅ​ក្នុងក្រុម​ហ៊ុន​ផ្សារ​អេឡិច​ត្រូនិច​ធំជាង​គេ​លំដាប់​ទី​1​នេះនៅ​ដើម​ឆ្នាំ​2021។ លោក​ Jeff Wilke បាន​ចាប់​ផ្ដើម​ធ្វើ​ការ​ឱ្យ​ Amazon តាំង​ពី​ឆ្នាំ​1999​។ លោក​កាន់​កាប់​តំណែង​ប្រធាន​ផ្នែក​គ្រប់​គ្រង​អតិថិជន​​នៅ​ទូទាំង​ពិភពលោក​​របស់​ក្រុម​ហ៊ុន​ Amazon ចាប់​ពី​ឆ្នាំ​2016​។

ក្រោយពី​លោក​ Wilke បាន​ចាក​ចេញ តំណែង​របស់​លោក​នឹង​ត្រូវ​ធ្លាក់​ទៅ​លើ​ដៃ​ Dave Clark ដែល​បច្ចុប្បន្ន​ជា​អនុ​ប្រធាន​ជាន់​ខ្ពស់​ទទួល​បន្ទុក​គ្រប់​គ្រង​សកម្ម​ភាព​សកល​របស់​ Amazon។ លោក Clark ក៏​បាន​ចូល​រួម​ធ្វើ​ការ​ឱ្យ​ក្រុម​ហ៊ុន​នេះ​ ចាប់​ពី​ឆ្នាំ​1999​។

ការ​ចាក​ចេញ​​ខាងលើ​នេះ​​បាន​កើតឡើង​​​នៅ​ពេល​តម្រូវ​ការ​នៃការ​ប្រគល់​ទំនិញ​របស់​ Amazon កំពុង​តែ​កើន​ឡើង​ជា​លំដាប់​នៅក្នុង​អំឡុង​COVID-19កំពុង​រាត​ត្បាត​ខ្លាំង​។ ប្រាក់​ចំណូល​របស់​ក្រុម​ហ៊ុន​នេះ​ក្នុង​រយៈ​ពេល​3​ខែ​ដែល​បាន​បញ្ចប់​កាល​ពី​ខែ​មីថុនា មាន​ចំនួន​88.9​ពាន់​លាន​ដុល្លារ​អាមេរិក​ កើន​40​% បើ​ធៀប​នឹង​អំឡុង​ពេល​ដូច​គ្នា​ក្នុង​ឆ្នាំ​2019។

ប្រាក់​ចំណេញ​សុទ្ធ​នៅក្នុង​ត្រី​មាស​​នោះ​បាន​កើន​ឡើង​ទ្វេដង​ ពោល​គឺ​ឡើង​ដល់​5.2​ពាន់​លាន​ដុល្លារ​ បើ​ទោះ​ជា​ក្រុម​ហ៊ុន​នេះ​បាន​ចំណាយ​4​ពាន់​លាន​ដុល្លារ​ដើម្បី​គ្រប់​គ្រង​ស្ថាន​ការណ៍​ក្នុង​អំឡុង​COVID-19 ក៏ដោយ៕

ប្រភព​៖ CNN

ខណៈខាងផលិតកម្មថោន បានបង្ហោះលិខិតកោះហៅតារាចម្រៀង ខេម ឱ្យចូលខ្លួនដោះស្រាយបញ្ហាចេញច្រៀងផលិតកម្មផ្សេងមិនទាន់ចប់កុងត្រានោះ ភ្លាមៗតារាប្រុសចាស់វស្សាក្នុងផលិតកម្មថោនរូបនេះ បានបង្ហោះសារក្ដុកក្ដួលសុំក្ដីអាណិតពីចាងហ្វាងផលិតកម្មថោន។

សារដ៏វែងអន្លាយ ត្រូវបានតារាចម្រៀង ខេម រៀបរាប់ទាំងមិនអស់ចិត្តដូចខាងក្រោមនេះ ៖

យប់ជ្រៅហើយ 🙏🙏🙏🙏😭😭😭😭😭😭
អរគុណគ្រប់យ៉ាងមេ មេពិតជាមេដ៏ល្អមែន ច្រើនឆ្នាំមកហើយដែលឆ្កែមួយក្បាលនេះបម្រើម្ចាស់មិនដែលទាមទាអ្វីឡើយ😭😭 ហើយក៏មិនដែលធ្វើអ្វីអោយមេលំបាកនោះទេ គ្រាន់តែឃើញលិខិតមួយដែលមេបង្ហោះជាសាធារណៈថាឆ្កែមួយក្បាលដែលស្មោះត្រង់រាប់ឆ្នាំនេះបំពានកុងត្រានោះគឺពិតជាភ្ញាក់ផ្អើលហួសចិត្ត ព្រោះឆ្កែមួយក្បាលនេះមិនដែលមានបំណងឡើយហើយឆ្កែមួយក្បាលនេះគឺសុំលាឈប់ដោយត្រឹមត្រូវមានទំាងលិខិតលាឈប់ព្រោះគិតថាផុតកុងត្រាហើយ តែមេថានៅកុងត្រា តែឆ្កែមួយក្បាលសុំមើលជាច្រើនលើកហើយ ថាបើនៅនឹងនៅច្រៀងទៀតតែមេគេចវេសរុញទៅអ្នកនេះអ្នកនោះមិនឱ្យមើល 🙏🙏🙏 (ឬមេចង់អោយខ្ញុំបង្ហាញភ័ស្តតាងតាមហ្វេសបុកនេះ) ខ្ញុំមិននឹកស្មានថាមេខ្ញុំដែលសព្វថ្ងៃជា ប្រធានមន្ទីសេដ្ឋកិច្ច និងហិរញវត្តុក្រុងភ្នំពេញមានលុយរាប់សិបលានដុល្លា ហៀរចាយមិនអស់ ជាមនុស្សដែលមានចំណេះដឹងខ្ពស់បែរមានគំនិតចង់បំផ្លាញឆ្កែមួយក្បាលដែលធ្លាប់រស់នៅបម្រើជាច្រើនឆ្នាំ😭បក្សពួកនិយមក្នុងក្រុមហ៊ុនដែលបែងចែកការស្រលាញ់យ៉ាងឆ្ងាយផុតលេខ ទោះដឹងថាមេស្រលាញ់ពួកគេនោះក្នុងឋានះអ្វីក៏ដោយ ទាំងដែលឆ្កែមួយក្បាលនេះប្រឹងព្រុសអោយម្ចាស់ខ្លាំងជាងគេនៅក្រុមហ៊ុន😭😭😭😭ទោះបីមេមិនដែលខ្វល់នឹងបោះឆ្អឹងអោយក៏ដោយក៏ឆ្កែមួយក្បាលនេះគោរពនឹងស្រលាញ់ម្ចាស់ស្មោះស្ម័គ្របំផុត ។ មេអើយមេ😭😭😭 មេមើលឃើញតែអ្នកពិសេសរបស់មេទាំងពីរនាក់ដែលមេផ្ដល់អោយគ្រប់យ៉ាងតែឆ្កែមួយក្បាលនេះមេមិនដែលខ្វល់ទេចង់អោយព្រុសក៏ហៅទៅព្រុស ។ មេកុំបង្ខំអោយឆ្កែអនាថាមួយក្បាលនេះចេះខាំអី មេអើយទុកអោយគ្នារកឆ្អឹងចញ្ចឹមជីវិតនិងម្ដាយជាស្ត្រីមេម៉ាយដ៏កំសត់ផង😭😭😭 មេក៏ដឹង មេមានដឹងទេថាឆ្កែអនាថាមួយក្បាលនេះដេកហូរទឹកភ្នែកប៉ុន្មានឆ្នាំមុននឹងសំរេចចិត្តចេញពីម្ចាស់ ប៉ុន្មានឆ្នាំចុងក្រោយសូម្បីតែចង់បានចម្រៀងចេញក៏ឆ្កែនេះត្រូវរត់ត្រុកៗដើរកបទខ្លួនឯងដែរ មេដែលមើលកំហុសខ្លួនឯងដែលធ្វើដាក់ឆ្កែនេះទេ?😭😭😭😭 បើម្ចាស់ផ្ដល់ភាពកក់ក្ដៅអោយតែ5%នៃមនុស្សពិសេសទាំងពីរបស់មេឆ្កែមួយក្បាលនេះសុខចិត្តបំរើម្ចាស់ដល់ថ្ងៃចុងក្រោយ។ឆ្កែម្នាក់នេះទ្រាំខាំធ្មេញសង្កត់បំផុតព្រោះស្រឡាញ់ម្ចាស់😭😭😭 មានពេលមួយនោះខ្ញុំគេងយំម៉ែសួរខ្ញុំថាកើតអីកូន? ខ្ញុំប្រាប់វិញថាខ្ញុំមិនចង់ចាកចេញពីកន្លែងចាស់ទេ ខ្ញុំមានអនុស្សាវរីយច្រើណាស់😭😭😭😭 ម៉ែប្រាប់ថាគ្មានការជួបណាដែលមិនបែកនោះទេកូនត្រូវស្ងប់ស្ងាត់ 😭😭😭😭😭😭 🙏🙏🙏🙏🙏ម៉ែកូនទ្រាំច្រើនពេកហើយមែនទេ? កូនល្ងង់ណាស់មែនទេ? ឬមកពីគ្រួសារយើងគ្មានឪពុក គ្មានបងប្អូន គ្មានខ្សែ គ្មានខ្នង ទើបខ្ញុំទទួលរឿងទាំងនេះម៉ែអើយតើខ្ញុំគួរទ្រាំទៀតទេ 😭😭😭😭😭 ។
🙏មែនហើយចេតនាមេពេលនេះចង់អោយឆ្កែមួយក្បាលនេះត្រូវគេស្អប់ទ័លច្រកបូករួមទាំងកន្លែងថ្មីមេចង់អោយគេស្អប់ខ្ពើមមែនទេ? មេមិនពិបាកធ្វើទេរឿងនេះ😭😭😭។
លិខិតអញ្ចើញរបស់មេមួយសន្លឹកនេះគឺពិតជាឃើញទឹកចិត្តដ៏ថ្លៃថ្លាណាស់សំរាប់ឆ្កែមួយក្បាលនេះណាស់ ទោះបី ដីកាកោះរបស់តុលាកាក៏ទុកពេលអោយបានយូរជាងនេះដែរបើនិយាយពីផ្លូវច្បាប់ តើមេមានបំណងអ្វី? 😭😭 ហៅថ្ងៃនេះអោយទៅស្អែក ពីព្រោះស្អែកនេះមេដឹងថាឆ្កែនេះទទួលកម្មវិធីគេរកចំណីចញ្ចឹមក្រពះមែនទេ😭😭😭😭 ។ មេក៏ដឹងថាខ្ញុំបានបញ្ចប់ការងាជាមួយគ្នាហើយមុនពេលចាកចេញមេចង់មានកម្មពារជាមួយគ្នាធ្វើអី😭😭😭 ឬមេពិបាកទទួលយកនៃភាពជោគជ័យរបស់ខ្ញុំ😭😭
មេអើយឆ្កែមួយក្បាលនេះមេកុំបង្ខំវាអី😭😭 វាសុំមួយរស់ទេមានរឿងច្រើនណាស់ដែលឆ្កែមួយក្បាលនេះលាក់ក្នុងចិត្តដោយការឈឺចាប់បំផុត😭😭 មេអាចដាក់កំហុសគ្រប់យ៉ាងមកឆ្កែអនាថានេះបានដើម្បីកិត្តិយសមេ 😭😭តែបើមេព្យាយាមវៃក្បាលឆ្កែនេះអាចនឹងពេលមួយវាទ័លច្រក😭😭😭😭

ឡារ៉ែន សូមនាំមិត្តអ្នកអានទៅជួបនឹងភាពប្លែកថ្មីនៃអៃឌៀក្នុងការតុបតែងការិយាល័យធ្វើការរបស់ក្រុមហ៊ុន Google នៅតាមបណ្តាប្រទេសនានាទូទាំងពិភពលោកដើម្បីឱ្យបានដឹងថា តើហេតុអ្វីបានជាបុគ្គលិកទាំងអស់ស្រឡាញ់ការិយាល័យធ្វើការរបស់ពួកគេម្ល៉េះ?។

Google ល្បីល្បាញយ៉ាងខ្លាំងក្នុងការរចនាតុបតែងការិយាល័យធ្វើការឱ្យមានភាពប្រណីត សាមញ្ញ និងច្រើនស្ទីលបានយ៉ាងល្អហួសពីការគិត សាងសេចក្តីសុខដល់បុគ្គលិកដែលអំណោយផលដល់ការសាងផលិតផលផ្នែកតិចណូឡូជីដ៏មានប្រសិទ្ធភាពដូចដែលយើងបានឃើញរួចមកហើយសព្វថ្ងៃនេះ។

ទីស្នាក់ការ Google នៅក្នុងទីក្រុង ហ្សូ៊រិក ( Zurich )ប្រទេសស្វ៊ីស

បានទទួលការចនាតុបតែងដោយក្រុមហ៊ុនស្ថាបនិក Camenzind Evolution ដោយមានបន្ទប់ប្រជុំរូបស៊ុតបក្សី បន្ទប់ប្រជុំក្នុងរូងក្រោមដី និងទីលានសម្រាប់លេងបាល់ទាត់ និងបាល់បោះទៀតផង។

ទីស្នាក់ការរបស់ Google នៅទីក្រុង ដាប់លីន (Dublin ) សាធារណរដ្ឋ អៃលែនដ៍

មានទីកន្លែងធ្វើការចម្រុះពណ៌ ដើម្បីឱ្យបុគ្គលិកមានអារម្មណ៍ធូរស្រាល និងបង្កើនសក្តានុពលក្នុងការធ្វើការងារបានព្រមៗគ្នា ក្រៅពីនេះ បន្ទប់ប្រជុំថែមទាំងរចនាតុបតែងឱ្យចូលគ្នាជាមួយនឹងធម្មជាតិ និងបណ្ណាល័យក៏ហាក់ដូចជារបូតចេញមកពីវណ្ណកម្មរឿង Harry Potter ក៏មិនស្មើ។

ទីស្នាក់ការរបស់ Google នៅទីក្រុង វ៉ាស៊ីនតោន ឌីស៊ី(Washington DC ) ប្រទេសសហរដ្ឋអាមេរិក

មានទាំងចង្រ្កានបាយ និងចម្រាក់ភ្នំសិប្បនិម្មិតសម្រាប់ឱ្យបុគ្គលិកបានបន្ធូរអារម្មណ៍បែបពេញទំហឹង និងថែមទាំងមានផែនទីរបស់ប្រទេសទំហំយក្សទៀតផង។

ទីស្នាក់ការរបស់ Google នៅទីក្រុង ឈិកាហ្គោ (Chicago ) ប្រទេសសហរដ្ឋអាមេរិក

មានតារាងបាល់ហ្វុ៊តសាល និងទូហ្គេមឱ្យបុគ្គលិកលេង ឬហ្វឹកហាត់ខួរក្បាលដោយការតរូបនៅលើជញ្ជាំង និងមានកន្លែងសម្រាប់ឱ្យបុគ្គលិកសម្រាកបន្ធូរអារម្មណ៍យ៉ាងពេញទំហឹង។

ទីស្នាក់ការរបស់ Google ក្នុងទីក្រុង តូរ៉ន់តូ (Toronto ) ប្រទេស កាណាដា

មានទីលានវាយកូនហ្គោលខ្នាតតូចមួយសម្រាប់ឱ្យបុគ្គលិកបានលេងបន្ធូរអារម្មណ៍នៅលើដំបូលទីស្នាក់ការ និងបើចុះមកខាងក្រោមក៏មានបន្ទប់តន្រ្តីដែលមានប្រដាប់ចាក់ថាសចម្រៀងឱ្យបុគ្គលិកបានកម្សាន្តយ៉ាងសប្បាយទៀតផង។

កូនគឺជាចំណងដៃដ៏មានតម្លៃបំផុតរបស់ជីវិត ដូច្នេះហើយទើបឪពុកម្តាយត្រូវយកចិត្តទុកដាក់ និងមើលថែទាំយ៉ាងដិតដល់ដើម្បីធ្វើឱ្យកូនធំធាត់ឡើងយ៉ាងស្ថិតស្ថេរ និងជឿជាក់។ តើយើងគួរបង្កើនវិវឌ្ឍនាការល្អៗយ៉ាងណាដល់កូនតូចជាទីស្រឡាញ់របស់យើង?

កូនតូចវ័យទើបនឹងកើត – 1ខួប ៈ កូនតូចនឹងចូលចិត្តបញ្ចេញសំឡេងប្លែកៗ ដូច្នេះឪពុកម្តាយគួរតែនិយាយទៅរកកូនឱ្យបានច្រើន ដោយបញ្ចេញសំនៀងតាមកូន លុះដល់វ័យចេះវារគួរប្រើរបស់លេងជន្លលេងជាមួយកូនដើម្បីឱ្យកូនមានជំនាញខាងរាងកាយដោយការវារតាមវត្ថុ ឬរបស់លេងនោះ។

កូនតូចវ័យ 2 ខួប ៈ កូនចេះទប់លំនឹងខ្លួនបានល្អហើយ ចេះចូលចិត្តស្តាប់រឿងនិទានហើយ ដូច្នេះគួរឱ្យគេបានស្គាល់ពីពិភពលោកដ៏ធំទូលាយនេះយ៉ាងពេញទំហឹងដោយការនាំគេចេញទៅដើរលេងក្រៅផ្ទះ ក្នុងសួនច្បារ អានរឿងនិទានផ្សេងៗឱ្យស្តាប់ ព្រមទាំងធ្វើសំឡេង និងកាយវិការគួបផ្សំតាមសាច់រឿងផង។

កូនតូចវ័យ 3 ខួប ៈ ប្រើដៃបានល្អហើយ ចូលចិត្តគូរវាស ដូច្នេះឪពុកម្តាយគួរបង្កើនវិវឌ្ឍនាការរបស់កូនដោយបង្ហាត់ឱ្យចេះជួយខ្លួនឯង ដូចជា ស្លៀកពាក់ខោអាវដោយខ្លួនឯងបែបងាយៗ ជួយធ្វើការងារផ្ទះតូចតាច និងបណ្តោយឱ្យគេលេងគូររូបផ្សេងៗតាមការនឹកស្រមៃ ឬបង្ហាត់កូនដោយការចាប់កាន់ដៃឱ្យរៀនគូររូបគំនូរផ្សេងៗជាដើម។

កូនតូចវ័យ 4 ឆ្នាំ ៈ ចេះកាន់ខ្មៅដៃសរសេរបានល្អហើយ ចេះនិយាយប្រយោគវែងៗបានហើយ ចូលចិត្តលេងហក់លោត តោងឡើង និងអាចញ៉ាំអាហារបានដោយខ្លួនឯងហើយ ដូច្នេះឪពុកម្តាយគួរបើកឱកាសឱ្យកូនបានលេងសប្បាយយ៉ាងពេញទំហឹង ដូចជា លេងតោងឡើងនៅក្នុងទីកន្លែងដែលមានសុវត្ថិភាព និងចង្អុលបង្ហាញឱ្យគេបានឃើញអ្វីផ្សេងៗជុំវិញខ្លួន ព្រមទាំងដាក់ជាសំណួរដើម្បីឱ្យកូនបានឆ្លើយតបផង។

កូនតូចវ័យ 5 – 6 ឆ្នាំ ៈ ចូលចិត្តនិយាយ ឬស្រែកឮៗ ចូលចិត្តលេងក្រៅផ្ទះ ចេះដុសធ្មេញខ្លួនឯង ចេះស្លៀកពាក់ និងដោះចេញវិញបានដោយខ្លួនឯងហើយ ដូច្នេះឪពុកម្តាយគួរនាំកូនចេញទៅលេងក្រៅផ្ទះឱ្យបានច្រើនដើម្បីឱ្យគេបានរៀនយល់ដឹងពីរឿងរ៉ាវផ្សេងៗកាន់តែច្រើនឡើង។

ការបង្កើនវិវឌ្ឍនាការដោយមានឪពុកម្តាយជាអ្នកជួយរុញច្រាន នឹងធ្វើឱ្យកូនធំធាត់ឡើងយ៉ាងស័ក្តិសមនឹងវ័យ មានភាពឆ្លាតវាងវៃ និងអាចរស់នៅបានយ៉ាងមានសេចក្តីសុខ៕

សូម្បីព្រីនក៏ទប់ទឹកភ្នែកមិនជាប់ដែរពេលមើលរឿង«ពោះធំ The Movie» ដូច្នេះអ្នកទស្សនាដែលចូលចិត្តរឿងកម្សត់បង្កប់ការអប់រំពីរសជាតិជីវិតស្នេហាយុវវ័យនិងក្តីស្រលាញ់ក្នុងគ្រួសារ អាចមកទស្សនារឿង«ពោះធំ The Movie» ដែលកំពុងចាក់បញ្ចាំងនៅគ្រប់រោងភាពយន្តរួមមាន Major Cineplex, Legend Cinema និង Prime Cineplex ដើម្បីដឹងកាន់តែច្បាស់ថាភាពយន្តថ្មី ដែលល្បីថាកម្សត់ខ្លាំងនេះល្អមើលយ៉ាងណា និងអាចបង្ហូរទឹកភ្នែកអ្នកឱ្យខ្សឹកខ្សួលដូចប៉ាវីដែរទេ។

ធ្លាប់តែជាតារាសម្តែងមួយរូប ព្រីន នៅតែមិនអាចទប់ទឹកភ្នែកបានពេលមើលរឿងកុនដ៏កម្សត់នេះ ព្រោះពេលលោកដើរចេញពីរោងកុនភ្លាម ភ្នែករបស់លោកនៅក្រហមបន្ទាប់ពីយំរួច។ តារាប្រុសរូបនេះបានផ្តល់បទសម្ភាសន៍នៅមុខរោងកុនផ្ទាល់ទាំងទឹកភ្នែកនិងអួលដើមករថា «ពេលអង្គុយមើលរឿងហ្នឹង ខ្ញុំមានអារម្មណ៍ថាកំពុងមើលពីជីវិតក្មេងពីរនាក់ មិនមែនមើលរឿងកុនទេ។ ខ្ញុំឆ្ងល់ថាហេតុអ្វីប៉ាម៉ាក់ដែលអះអាងថាស្រលាញ់កូន បែរជាគ្នាទើបវ័យប៉ុណ្ណឹង សុខចិត្តបោះបង់កូនចោល។ ពេលគ្នាមានបញ្ហរត់ទៅសុំជំនួយ បែរជាគ្មានអ្នកណាជួយសោះ។»

កម្លោះសង្ហារព្រីន បានបន្ថែមទាំងអួលដើមករថា «ខ្ញុំមើលយូរៗទៅ ស្លុងតាមសាច់រឿងក្មេងប្រុសស្រីមួយគូហ្នឹង ដែលលំបាកវេទនាមែនទែន។ តាមពិតខ្ញុំក៏ជាតារាសម្តែងដែរ ខ្ញុំមិនចង់យំទេ តែពិបាកទប់ពេក ខ្ញុំខំទប់ទឹកភ្នែកឡើងឈឺក្បាលទៅហើយ»។ តារាប្រុសរូបនេះ ក៏បានបញ្ជាក់បន្ថែមថា រឿងនេះមិនត្រឹមតែកម្សត់សាច់រឿងនិងការសម្តែងរបស់តួអង្គទេ សូម្បីតែបទចម្រៀងផ្ទាល់ក៏កម្សត់ខ្លាំង គ្រាន់តែសម្លេងគ្រហឹមរបស់តារាចម្រៀងក៏ធ្វើឱ្យលោកព្រឺសម្បុរដែរ។

គួរបញ្ជាក់ថា ខ្សែភាពយន្តរឿងពោះធំ The Movie ដែលជា Version ថ្មី គឺមិនមែនជារឿងពោះធំ Version អនឡាញ ដែលធ្លាប់ចាក់បញ្ចាំងតាម Youtube របស់ផលិតកម្ម Sastra Film នោះទេព្រោះមានការថតឈុតឆាកថ្មីទាំងអស់សម្រាប់បញ្ចាំងជាភាពយន្ត ដែលជាសាច់រឿងថ្មីបន្តពីជីវិតរបស់តួឯកប្រុសស្រីពេជ្រ និងលីនដា សម្តែងដោយកញ្ញា អាំង សុជាតា និងលោក ស៊ីវ សុវណ្ណារាជ្យ ក្រោយពេលចាកចេញពីផ្ទះ ទៅផ្សងជីវិតគ្មានទីជម្រក តស៊ូលំបាកវេទនា ដោយគ្មានការទទួលស្គាល់ពីឳពុកម្តាយ ក្នុងពេលដែលតួស្រីកំពុងមានផ្ទៃពោះវ័យក្មេង ។ ធានាថាឈុតឆាកថ្មីនេះនឹងកាន់តែធ្វើឱ្យអ្នកទស្សនាទប់ទឹកភ្នែកមិនជាប់ អាណិតឆាកជីវិតរបស់ពួកគេ និងស្រាយចម្ងល់អ្នកទស្សនាតាមអនឡាញ ពីវាសនារបស់ឳពុកម្តាយវ័យក្មេង និងកូនក្នុងពោះជាចុងក្រោយនឹងទៅជាយ៉ាងណា ជាពិសេសគឺការបញ្ចប់មួយ ដែលលោកអ្នកនឹកស្មានមិនដល់ថានឹងក្លាយជាបែបនោះ៕

ជារឿងដ៏គួរឱ្យភ្ញាក់ផ្អើលមួយ ​ព្រោះផលិតកម្ម ថោន ដែលជាអតីតទ្រនំសុខសាន្តរបស់តារាចម្រៀង ខេម ស្រាប់តែចេញសេចក្ដីជូនដំណឹងឱ្យលោក ខេម ចូលខ្លួនទៅដោះស្រាយជាមួយផលិតកម្ម ព្រោះតែតារារូបនេះ ចេញទៅច្រៀងនៅផលិតកម្មផ្សេងទាំងមិនទាន់ចប់កុងត្រា។ ​

តាមការប្រកាសជូនដំណឹងបានឱ្យដឹងថា កុងត្រាការងាររបស់តារាចម្រៀងរូបនេះជាមួយផលិតកម្ម​ថោន គឺត្រូវផុតនៅចុងខែធ្នូឆ្នាំ 2020 ឯណោះ។ ការណាត់ជួបនឹងធ្វើឡើងនៅថ្ងៃ25 ខែសីហា ឆ្នាំ2020 វេលាម៉ោង15 រសៀលជាកំហិត។ រហូតមកទល់ពេលនេះ យើងនៅមិនទាន់ទទួលបានការបំភ្លឺពីលោក ខេម ថាលោកនឹងចូលខ្លួនដោះស្រាយទៅតាមការស្នើពីផលិតកម្មឬយ៉ាងណានោះទេ៕

បន្ទាប់ការបើកឱ្យដំណើរការរោងភាពយន្តវិញភ្លាម រឿង «ពោះធំ» របស់ផលិតកម្ម «សាស្រ្តា» បានចាក់បញ្ចាំង ដោយ មិនឱ្យទស្សនិកជនរង់ចាំយូរ តាំងពីថ្ងៃទី២០ សីហានេះមកម៉្លេះ។ នេះបើតាមបើការបញ្ជាក់របស់ «ដានស៊ីងរ៉េន» ដែលជា ក្រុមហ៊ុនចែកចាយរឿងក្នុងស្រុក ទើបនឹងដំណើរអស់រយៈជាង១ឆ្នាំមកនេះ។

លោក ស៊ុំ ស៊ីថែន ប្រធានផ្នែកម៉ាឃិទីងរបស់ «ដានស៊ីងរ៉េន»បានបន្ថែមឱ្យដឹងថា៖ «ក្រៅពីរឿង «ពោះធំ» យើងខ្ញុំ កំពុង រៀបកាលវិភាគបញ្ចេញរឿងមួយទៀត ដែលត្រូវបង្កកដោយវិបត្តិកូវីដ១៩ គឺរឿង «ព្រលឹងល្បុក្កតោ» ដែល សហការដឹកនាំដោយលោកគ្រូតា សាន គឹមស៊ាន និងលោកសុង សូភក្តី នៅចុងឆ្នាំនេះ។ បេសកកម្មរបស់យើងខ្ញុំ គឺ ចំណេះ ជំនាញ និងបទពិសោធន៍ដែលយើងខ្ញុំមានកន្លងមក មកបម្រើការឱ្យផលិតកម្មក្នុងស្រុក ដែលតែងជួបប្រទះ បញ្ហាសម្របសម្រួលជាមួយរោងភាពយន្តដោយផ្ទាល់ និងពុំសូវមានពេលរៀបចំយុទ្ធនាការផ្សេងៗ បន្ទាប់ពីផលិតរួច។ មួយវិញទៀត «ដានស៊ីងរ៉េន» ក៏ព្យាយាមសម្រាំងយកភាពយន្តខ្មែរមានគុណភាព ដើម្បីចាក់បញ្ចាំងនៅបណ្តារោង ភាពយន្តក្នុងស្រុក និងក្រៅស្រុកផងដែរ។»

«មូលហេតុ ដែលយើងខ្ញុំជ្រើសរើស «ដានស៊ីងរ៉េន»ដើម្បីចែកចាយ «ព្រលឹងល្បុក្កតោ» គឺដោយសារទំនុកចិត្ត និង ការរាប់អានយូរអង្វែង។ ខ្ញុំស្គាល់ស៊ីថែន១០ឆ្នាំមកហើយ ហើយទទួលស្គាល់ពីភាពមោះមុតរបស់គាត់ក្នុងការងារ។ រីឯដៃគូ គាត់ទាំងពីរ សុទ្ធជាអ្នកមានទេពកោសល្យ និងបទពិសោធន៍យូរឆ្នាំក្នុងវិស័យភាពយន្ត។» នេះជាមតិបញ្ជាក់របស់លោក តឹក ង៉ូយ ជាផលិតកររបស់រឿង«ព្រលឹងល្បុក្កតោ» ដែលគេឯងតែហៅថា «ស្តេចនំដូណាត់» កាលពីសម័យគាត់រស់នៅ សហរដ្ឋអាមេរិក។

គួរកត់សម្គាល់ថា កាលពីដើមខែកក្កដាកន្លងទៅ​ ផលិតកម្ម «រាម» ក៏បានប្រកាសការផលិតរឿងថ្មីដំបូងរបស់ខ្លួន ដែលមានចំណងជើងថា «កម្ម» ដោយសហការជាមួយ «ដានស៊ីងរ៉េន» ក្នុងនាមជាក្រុមហ៊ុនសហផលិត និងចែកចាយ ផងដែរ។ បើតាមបច្ចុប្បន្នភាពចុងក្រោយ រឿងរន្ធត់មួយនេះដែលចំណាយទុនផលិតដោយម្ចាស់យីហោផលិតផល រក្សាសម្ផស្ស «សម្រស់ធម្មជាតិ» ស្រីអូន និងដៃគូ នឹងបញ្ចប់ការថតរបស់ខ្លួននៅភ្នំពេញ នាចុងខែសីហានេះ។

អំពីក្រុមហ៊ុន «ដានស៊ីងរ៉េន»

ដំណើរការចាប់តាំងពីឆ្នាំ២០១៩មក ក្រុមហ៊ុន «ដានស៊ីងរ៉េន» (DancingRains Co., Ltd.) ផ្តោតលើសេវានានាក្នុង វិស័យភាពយន្តដូចជាភាពយន្តខ្នាតវែង រឿងភាគទូរទស្សន៍ ឬ តាមអុិនធើណេត សេវាលក់ និងចែកចាយភាពយន្ត និង សម្ភារៈថត។ ក្រុមហ៊ុនដែលផ្តល់ដំណោះស្រាយសព្វយ៉ាងមួយនេះ ត្រូវបានបង្កើតឡើងដោយលោក ស៊ុំ ស៊ីថែន និង សហស្ថាបនិក២រូបទៀត។ តាំងពីឆ្នាំ២០០៩ ពួកគាត់ម្នាក់ៗសុទ្ធតែបានប្រឡូកក្នុងការផលិតភាពយន្តខ្លី​ សហផលិត គម្រោង អន្តរជាតិ និងឱ្យទីភ្នាក់ងារផលិតវីដេអូពាណិជ្ជកម្មក្នុងស្រុក រៀបចំមហោស្រពភាពយន្តខ្លី និងធ្លាប់បម្រើការ យ៉ាងសកម្ម នៅរោងភាពយន្តទំនើបផងដែរ។

សម្រាប់ព័ត៌មានបន្ថែមអំពី«ដានស៊ីនរ៉េន» សូមទាក់ទង៖

+85512 684 955 /15 226 602

[email protected]

Lil Miquela ជាតួអង្គតារាប្រឌិតមួយដួងដែលត្រូវបានបង្កើតឡើងដោយកុំព្យូទ័រ អាចរកប្រាក់ចំណូលបាន​រហូត​ដល់​11,738,406​លានដុល្លារនៅក្នុង1ឆ្នាំៗ តាមរយៈការបង្ហោះរូបថតនៅលើបណ្ដាញសង្គម Instagram។

បណ្ដាញសង្គមនានាក្នុងពេលថ្មីៗនេះ បានក្លាយជាទីឋានដ៏ល្អប្រសើរក្នុងការ “កើបលុយ” សម្រាប់ក្រុមមនុស្សដែលមានឥទ្ធិពល (influencer) មកពីជុំវិញពិភពលោក។ សូម្បីតែរ៉ូបូត ឬតួអង្គប្រឌិតក៏បានចាប់ផ្ដើមសាកល្បងរកប្រាក់តាមរយៈបណ្ដាញសង្គមផងដែរ។ ថ្មីៗនេះ OnBuy បានបង្ហើបឱ្យដឹងព័ត៌មានស្ដីអំពីប្រាក់ចំណូលដ៏ច្រើនសន្ធឹកដែលក្រុមតារាប្រឌិត ឬតារានិម្មិតអាចរកបានតាមរយៈបណ្ដាញសង្គម Instagram។

យោងតាមរបាយការណ៍របស់ក្រុមហ៊ុន OnBuy៖ “ចំនួនតួអង្គនិម្មិតដែលមានឥទ្ធិពល កំពុងតែមានការកើនឡើងពីមួយថ្ងៃទៅមួយថ្ងៃ។ ពួកគេត្រូវបានបង្កើតឡើងដោយកុំព្យូទ័រ ដែលហៅថា CGI (Computer-generated imagery) ឬរ៉ូបូត ដែលមានចំណុចពិសេស និងមានលក្ខណៈស្រដៀងនឹងមនុស្សពិត។ ពួកគេបានក្លាយជាកម្លាំងពិតនៅក្នុងវិស័យ influencer ដែលកំពុងដណ្ដើមកាន់កាប់ឥទ្ធិពលនៅលើបណ្ដាញសង្គម។ តើនេះគឺជាសញ្ញាមួយដែលបង្ហាញអំពីទីអវសានរបស់ influencer ដែលជាមនុស្សពិតមែនដែរ ឬយ៉ាងណា?

របាយការណ៍របស់ OnBuy បានឱ្យដឹងថា តួអង្គប្រឌិតដែល “ស៊ីថ្លៃ” បំផុត នោះគឺ Lil Miquela។ នាងរកបាន​ប្រហែល​8,000​ដុល្លារអាមេរិក សម្រាប់អត្ថបទនីមួយៗដែលបង្ហោះនៅលើបណ្ដាញសង្គម Instagram។ ជារៀងរាល់ឆ្នាំ នាងអាចរកបានប្រាក់ដល់ទៅ8.96លានផោន (11,738,406លានដុល្លារអាមេរិក) តាមរយៈការផ្សាយពាណិជ្ជកម្ម។

ឈរលំដាប់ទី2បន្ទាប់ពី Lil Miquela នោះគឺ Noonoouri ដែលត្រូវបានបង្កើតឡើងដោយអ្នកជំនាញខាងរចនាក្រាហ្វិច ឈ្មោះ Joerg Zuber។ ដោយមានអ្នកតាមដានចំនួនជាង362,000នាក់ តាមការគណនា នាងអាចរកបាន1,382ផោន (1,810ដុល្លារអាមេរិក) សម្រាប់អត្ថបទផ្សាយពាណិជ្ជកម្មនីមួយៗ និងរកបានជាង​2​លាន​ផោន (2,620,000ដុល្លារ)/ឆ្នាំ។

តារារូបនិម្មិតមកពីជប៉ុន គឺនាង Imma ឈរលំដាប់ទី3។ ទាក់ទងនឹងវប្បធម៌ ភាពយន្ត និងសិល្បៈជប៉ុន បណ្ដារូបថតដ៏គួរឱ្យស្រលាញ់របស់នាង ត្រូវបានអ្នកប្រើប្រាស់ Instagram ចំនួនជាង237,000នាក់ “គយគន់” ជារៀងរាល់លើក ហើយនាងក៏រកបានប្រាក់ប្រមាណជាជាង498,000ផោន (652,424ដុល្លារអាមេរិក) ជារៀងរាល់ឆ្នាំ ដែលតួលេខនេះ គឺច្រើនជាង13ដង បើធៀបនឹងប្រាក់ខែជាមធ្យមនៅប្រទេសអង់គ្លេសទៅទៀត។

ប្រភព៖ Mirror

លោកឪពុកអ្នកម្តាយដែលមានកូនតូចក្នុងអំឡុងវ័យបឋម ច្រើនតែនឹកកង្វល់ពីការរៀនយល់ដឹងរបស់ពួកគេមែនទេ? ព្រោះកុមារក្នុងវ័យនេះចាប់ផ្តើមចេះចាប់អារម្មណ៍លើរឿងជាច្រើនហើយ ដូចជា ចេះហាត់អានហាត់សរសេរ មានសង្គមមិត្តភ័ក្តិនៅសាលា ហើយខួរក្បាលរបស់កុមារនឹងវិវឌ្ឍពេញទំហឹង ដែលបើសិនជាពួកគេមានទង្វើ និងឥរិយាបទអ្វីប្លែកៗ អាណាព្យាបាលក៏មិនចាំបាច់កង្វល់ចិត្តនោះទេ ព្រោះនោះគឺជាសញ្ញាដែលបង្ហាញថា កូនរបស់អ្នកជាក្មេងឆ្លាត វាងវៃល្អ និងរៀនយល់ដឹងបានលឿនសមនឹងវ័យហើយ តែ…តើនឹងមានទង្វើអ្វីខ្លះដែលក្មេងឆ្លាតច្រើនតែនាំគ្នាធ្វើ? សូមតាមដានជាបន្ត។

ប៉ិនសួរដេញដោល

ក្មេងៗដែលប៉ិនសួរ ប៉ិនឆ្ងល់គ្រប់យ៉ាង ទោះជារឿងអត់ប្រយោជន៍ក៏ដោយនោះ គឺពួកគេកំពុងតែរៀនយល់ដឹងពីអ្វីដែលថ្មីៗហើយ។ បើសិនជាពួកគេសួរក្នុងរឿងដែលពិបាកអធិប្បាយប្រាប់ ឪពុកម្តាយអាចនឹងឆ្លើយបែបឱ្យក្មេងងាយយល់ និងបង្កប់ភាពកំប្លែង ឬមានសំណួរទៅវិញ ឱ្យក្មេងៗបានយកទៅគិតដោយខ្លួនឯង ដែលទង្វើបែបនេះល្អចំពោះក្មេង និងឪពុកម្តាយខ្លាំងណាស់ ព្រោះនឹងធ្វើឱ្យសម្ព័ន្ធភាពក្នុងគ្រួសារស្អិតល្មួតកក់ក្តៅខ្លាំងឡើងទៀតផង។

ចងចាំរឿងរ៉ាវផ្សេងៗបានល្អ

មិនចាំបាច់ត្រូវទន្ទេញពាក្យ ឬចាំតម្រាមេរៀនបានតែម្យ៉ាងនោះទេ តែអាចជាការចងចាំអតីតកាល ឬរឿងដែលកូនតូចរបស់អ្នកធ្លាប់បានឃើញពីមុន ហើយថ្ងៃនេះនាំយកមកសួរអ្នកឡើងវិញ នោះបញ្ជាក់ថា កូនតូចរបស់អ្នកមានការចងចាំដែលល្អ និងអាចចេះគិតកែខៃដោះស្រាយបញ្ហាបានតាមរយៈព័ត៌មានដែលស្ថិតនៅក្នុងការចងចាំរបស់គេហ្នឹងឯង។

ចេះចាប់អារម្មណ៍អានសៀវភៅ

អានសៀវភៅនៅទីនេះ មិនបានមានន័យថា គិតតែពីអានមែនទែននោះទេ សុំត្រឹមតែបើកសៀវភៅមើលលេងក៏គ្រប់គ្រាន់ណាស់ទៅហើយ ដូចជាពពួកសៀវភៅរឿងនិទានដែលមានរូបភាពពណ៌ល្អៗស្អាតៗ ក្មេងៗនឹងចាប់អារម្មណ៍ជាមួយរូបភាពទាំងនោះ និងបើសិនជាពួកគេចង់ដឹងពីសាច់រឿងផងនោះ លោកឪពុកអ្នកម្តាយត្រូវអាស្រ័យចង្វាក់នេះបង្រៀនអក្សរឱ្យកូនតូចចេះអានបានដោយខ្លួនឯង ដោយមិនត្រូវបង្ខំក្មេងឡើយ។

ចេះប្រមូលសន្សំរបស់របរផ្សេងៗ

ធ្លាប់សង្កេតដែរទេថា ពេលនាំកូនៗទៅលេងតាមឆ្នេរសមុទ្រ ពួកគេច្រើនតែរើសសម្បកងាវគ្រំ ឬដុំក្រួសតូចៗស្អាតៗយកមកទុកក្នុងហោប៉ៅ ឬទិញនំមួយកញ្ចប់ 1000 រៀលមក តែបែរជាមិនញ៉ាំនំនោះទេ គ្រាន់តែត្រូវការតែរបស់ថែមដែលនៅក្នុងថង់នំនោះប៉ុណ្ណោះ នេះគឺដោយសារតែកូនរបស់អ្នកមានសេចក្តីសុខជាមួយនឹងអ្វីដែលគេបានធ្វើ ហុចផលឱ្យគេមានអារម្មណ៍ល្អ និងខួរក្បាលក៏អភិវឌ្ឍបានល្អតាមនោះដែរ។

មាននិស្ស័យចូលចិត្តចាត់ចែងរៀបចំ

ក្មេងៗនឹងមានអារម្មណ៍ជក់ចិត្ត និងសប្បាយជាមួយការចាត់ចែងរៀបចំរបស់របរផ្សេងៗឱ្យមានរបៀប ដូចជា រៀបខ្មៅដៃពណ៌ក្នុងប្រអប់ ចាត់រៀបចំពីរបស់លេងតូចៗទៅរករបស់ធំៗ ជាដើម ដែលទង្វើទាំងនេះបង្ហាញថា កូនតូចរបស់អ្នកចាប់ផ្តើមចេះញែកបំបែក និងបែងចែកប្រភេទនៃវត្ថុហើយ និងនេះថែមទាំងជាការហ្វឹកហាត់ពីការមានរបៀបរៀបរយទៀតផង។

បានដឹងបែបនេះហើយ ចូរសាកល្បងសង្កេតមើលកូនតូចរបស់លោកអ្នកទៅមើលថា តើពួកគេមានទង្វើដូចដែលបានរៀបរាប់មកខាងលើដែរឬទេ? បើមាន…នោះបញ្ជាក់ថា កូនតូចរបស់អ្នកចាប់ផ្តើមជះពន្លឺនៃភាពអច្ឆរិយៈហើយ មិនប្រាកដដែរ នៅពេលធំឡើងគេអាចនឹងស្រាវជ្រាវរកឃើញទ្រឹស្តីថ្មីណាមួយរហូតបានទទួលរង្វាន់ណូបេលផងក៏មិនដឹង៕

កាលពីពេលថ្មីៗនេះ​ក្រុម​អ្នកគ្រប់គ្រង​គេហទំព័រ Freepik បាន​ជូនដំណឹង​ដល់​អ្នកប្រើប្រាស់ ពី​ការ​ជ្រៀតចូល​របស់​ជនអនាមិក ដែល​បាន​លួច​យក​អុ​ី​មែ​ល ឬ​លេខ​សម្ងាត់​ដែល​បាន​អុ​ិ​ន​គ្រីប (Hashed Password) របស់​អ្នកប្រើប្រាស់​ប្រមាណ​ជា ៨.៣លាន​នាក់។ សម្រាប់​លោកអ្នក​ដែល​មិន​ធ្លាប់បាន​ប្រើប្រាស់​គេហទំព័រ Freepik វា​ជា​កម្មវិធី​ដ៏​ពេញនិយម​មួយ​ដែល​អាចឱ្យ​លោកអ្នក​ទាញយក​រូបភាព ឬ​ក្រា​ហ្វិ​ច​ឌី​ហ្សា​ញស្អាតៗ ដែលមាន​គុណភាព​ច្បាស់​ដើម្បីឱ្យ​លោកអ្នក​បង្កើត​រូបភាព​ផ្ទាល់ខ្លួន​បាន។

ទាក់ទង​នឹង​ការ​ជ្រៀតចូល​នេះ ក្រុមហ៊ុន​បាន​ប្រាប់ថា ជនអនាមិក​បានធ្វើកា​រ​វាយប្រហារ​តាមរយៈ SQL injection ដោយ​បញ្ចូល​កូដ​ដែលមាន​មេរោគ​តាមរយៈ​នៃ​ភាព​ចន្លោះប្រហោង​របស់​គេហទំព័​រ​នេះ ប៉ុន្តែ​ក្រុមហ៊ុន​មិនបាន​បញ្ជាក់​ពី​ពេលវេលា​ដែល​ត្រូវ​រង​ការវាយប្រហារ ឬ​ពេលវេលា​ដែល​ក្រុមហ៊ុន​បាន​រកឃើញ​ពី​បញ្ហា​នេះ​ទេ។ ក្នុងចំណោម​អ្នកប្រើប្រាស់​ប្រមាណ ៨.៣លាន​នាក់ មាន ៤.៥លាន​នាក់ បាន​ប្រើ​គណនី​ពី​ក្រុមហ៊ុនផ្សេងៗទៀត ដូចជា Google, Facebook ឬ Twitter ដើម្បី login ដូច្នេះ​មានតែ​អុ​ី​មែ​ល​របស់​ពួកគេ​ប៉ុណ្ណោះ ដែល​ត្រូវបាន​លួច​យក ចំណែកឯ​លេខ​សម្ងាត់​វិញ ពុំ​ត្រូវបាន​លួច​យក​នោះទេ។

ដើម្បី​ការពារ​សុវត្ថិភាព​ក្នុងការ​ប្រើប្រាស់ នាយកដ្ឋាន​ប្រឆាំង​បទល្មើស​បច្ចេកវិទ្យា សូមឱ្យ​លោកអ្នក​គួរតែ​ប្ដូរ​លេខ​សម្ងាត់ ប្រសិនបើ​លោកអ្នក​ប្រើ​គេហទំព័រ​នេះ ហើយ​ពុំបាន​ប្រើ​គណនី​ពី​ក្រុមហ៊ុនផ្សេងៗទៀត​ដូចជា Google, Facebook ឬ Twitter ដើម្បី login នោះ។ ជាងនេះទៅទៀត​ប្រសិនបើ​លោកអ្នក​បាន​ប្រើ​លេខ​សម្ងាត់​នេះ​ជាមួយ​គេហទំព័រ​ផ្សេងទៀត​នោះ លោកអ្នក​គួរតែ​ធ្វើការ​ផ្លាស់ប្ដូរ​លេខ​សម្ងាត់​នៅក្នុង​គេហទំព័រ​ទាំងនោះ​ផងដែរ៕

ប្រភព៖ នាយកដ្ឋានប្រឆាំងបទល្មើសបច្ចេកវិទ្យា