Category: សង្គម និងសេដ្ឋកិច្ច

របស់ប្រើប្រាស់នៅក្នុងផ្ទះនីមួយៗអាចមានប្រយោជន៍ច្រើនជាងដែលយើងធ្លាប់ដឹងទៅទៀត ដូចជាថ្នាំអាស្ពីរីន( Aspirin )ជាដើម ដែលក្រៅពីសម្រាប់លេបព្យាបាលជំងឺហើយនោះ នៅអាចនាំយកមកច្នៃប្រើជាមួយនឹងការងារក្នុងផ្ទះបានទៀតផង មិនថាតែជួយកម្ចាត់ស្នាមកខ្វក់ ជួយឱ្យផ្កាក្នុងថូនៅស្រស់បានយូរ ការពារមេរោគផ្សិតនៅក្នុងសួនច្បារ និងផ្សេងៗទៀតជាច្រើន ដូច្នេះបើបងៗស្រី្តមេផ្ទះចង់ដឹងថា តើអាថ្នាំគ្រាប់តូចៗនោះអាចប្រើការអ្វីបានទៀតនោះ សូមតាមដានជាបន្តជាមួយឡារ៉ែនដូចតទៅ។

1 – កម្ចាត់ស្នាមញើសជាប់នៅលើអាវពណ៌ស

សម្រាប់អ្នកដែលមិនហ៊ានទាញយកអាវពណ៌សមកពាក់ ព្រោះតែមានប្រឡាក់ស្នាមញើសរហូតធ្វើឱ្យបាត់បង់ទំនុកចិត្តលើខ្លួនឯងនោះ ចូរកិនថ្នាំអាស្ពីរីន2គ្រាប់ឱ្យម៉ដ្ឋ លាយជាមួយទឹកក្តៅឧណ្ហៗកន្លះពែង រួចយកមកបៀកលាបលើបរិវេណដែលមានស្នាមប្រឡាក់ញើសនោះ ទុកចោលប្រមាណជា 2 – 3 ម៉ោង រួចហើយសឹមបោកសម្អាតតាមធម្មតា។

2 – រក្សាភាពស្រស់ថ្មីរបស់ផ្កា

ចំណែករឿងបញ្ហាផ្កាដែលដោតតាំងលម្អនៅក្នុងថូឆាប់រុះរោយស្រពោននោះ មិនពិបាកទេ គ្រាន់តែកិនថ្នាំអាស្ពីរីន 2 – 3 គ្រាប់ឱ្យម៉ដ្ឋ ហើយលាយជាមួយទឹកនៅក្នុងថូដាក់ផ្កានោះទៅ ផ្កាស្រស់ទាំងនោះនឹងនៅស្រស់បានយូរមិនខាន តែសូមកុំភ្លេចប្តូរទឹករៀងរាល់ 2 – 3 ថ្ងៃម្តងផង។

3 – កម្ចាត់មេរោគផ្សិតនៅក្នុងដីដំណាំ

ថ្នាំប្រភេទនេះមិនមែនត្រឹមតែជួយព្យាបាលជំងឺរបស់មនុស្សប៉ុណ្ណោះទេ តែនៅជួយកម្ចាត់មេរោគផ្សិតនៅក្នុងដីបានទៀតផង

ដោយគ្រាន់តែលាយថ្នាំអាស្ពីរីនជាមួយទឹកក្នុងបរិមាណ 1 គ្រាប់ក្នុងទឹក1 លិត្រ ហើយយកទៅស្រោចនៅលើដីដែលសម្បូរដោយមេរោគផ្សិតដាំអ្វីក៏មិនបាននោះទៅជាការស្រេច។ តែសូមប្រយ័ត្នក្នុងការប្រើថ្នាំនេះបន្តិច ព្រោះបើមានជាតិថ្នាំច្រើនពេកនឹងធ្វើឱ្យដំណាំងាប់ដើមបាន។

4 – សម្អាតស្នាមច្រែះ

ស្នាមច្រែះក៏ជាបញ្ហាមួយដែលពិបាកកែដែរ តែក៏មិនមែនថាគ្មានវិធីសម្អាតបាននោះដែរ បងៗស្រ្តីមេផ្ទះអាចសម្អាតបានដោយយកថ្នាំអាស្ពីរីនមកកិនឱ្យម៉ដ្ឋ(ប្រមាណជា 2 – 3 គ្រាប់) បន្ទាប់មកយកទឹកមកស្រោចពីលើបរិវេណដែលមានស្នាមច្រែះនោះ រួចហើយរោយកម្ទេចថ្នាំនោះពីលើឱ្យសព្វ ទុកចោលប្រមាណ 10 នាទី រួចយកក្រណាត់អេប៉ុងជ្រលក់ទឹកដុសចេញ តែប៉ុណ្ណឹងជាការស្រេច។

5 – ញ៉ុករន្ធ ឬស្នាមចោះរន្ធតូចៗនៅលើជញ្ជាំង

ការលុបបំបាត់ស្នាមចោះរន្ធតូចៗនៅលើជញ្ជាំងជារឿងងាយបំផុត មិនចាំបាច់ទៅទិញស៊ីម៉ងត៍សមួយបាវមកប្រើទេ គ្រាន់តែយកថ្នាំអាស្ពីរីន 4 – 5 គ្រាប់មកកិនឱ្យក្លាយជាម្សៅ ហើយលាយជាមួយទឹកឱ្យខាប់ៗ រួចយកទៅបៀកបិទពីលើរន្ធ ឬស្នាមចោះរន្ធតូចៗនោះ ហើយទុកចោលរហូតដល់ស្ងួត យើងនឹងបានជញ្ជាំងរាបស្មើស្អាតដូចមុនបាត់ទៅហើយ។

6 – ជាជំនួយការលាងសម្អាតបន្ទប់ទឹកពេលបន្ទាន់ៗ

បើសិនជាថ្ងៃនេះដល់ពេលត្រូវលាងសម្អាតបន្ទប់ តែ ទឹកសាប៊ូលាងបន្ទប់ទឹកស្រាប់តែអស់រលីងនោះ បងៗស្រ្តីមេផ្ទះមិនចាំបាច់ចេញទៅទិញភ្លាមៗទេ ព្រោះអាចប្រើថ្នាំអាស្ពីរីនជំនួសមួយគ្រាក៏បាន។ ចាប់ផ្តើមដោយការកិនថ្នាំអាស្ពីរីន 2 – 3 គ្រាប់ ហើយលាយជាមួយទឹកក្តៅឧណ្ហៗ រួចលាងសម្អាតបន្ទប់ទឹកតាមវិធីធម្មតា នោះបន្ទប់ទឹកនឹងស្អាតឡើងវិញ គ្មានទាំងបន្សល់នូវកំណកសាប៊ូ ឱ្យឃើញទៀតផង។

7 – បោកសម្អាតស្នាមប្រឡាក់ស៊ុតមាន់នៅលើខោអាវ

បងៗស្រ្តីមេផ្ទះកុំអាលគិតថា ពិបាកបោកឱ្យជ្រះណាស់ បើមិនទាន់បានសាកល្បងប្រើវិធីនេះ ដំបូងគឺកិនគ្រាប់ថ្នាំអាស្ពីរីនឱ្យម៉ដ្ឋ(ប្រមាណ 1 – 2 គ្រាប់) ហើយលាយជាមួយ ក្រែម អហ្វ ថារ៍ថារ៍( Cream of Tartar ម្សៅដែលគេលាយជាមួយស៊ុតក្រឡុកដើម្បីឱ្យចៀនទៅឡើងប៉ោងល្អ។ អាចរកទិញបានតាមហាងផ្សារទំនើប)បន្តិច រួចចាក់ទឹកចូលទៅបន្តិច លាយឱ្យចូលគ្នាសព្វ ហើយយកទៅលាបពីលើស្នាមប្រឡាក់ស៊ុតលើខោអាវនោះ ទុកចោលប្រមាណ 30 នាទី។ នៅពេលគ្រប់កំណត់ម៉ោងហើយ ចូរស្រោចទឹកក្តៅឧណ្ហៗលាងល្បាយនោះចេញឱ្យអស់ មុននឹងយកទៅបោកគក់តាមប្រក្រតី៕

ក្នុងខណៈតាំងគភ៌ មានអាហារច្រើនប្រភេទណាស់ដែលស្រ្តីមានគភ៌គួរទទួលទាន និងមិនគួរទទួលទាន ដូច្នេះទើបស្រ្តីមានគភ៌ត្រូវផ្ចិតផ្ចង់ក្នុងការជ្រើសរើសមុខម្ហូបអាហារខ្លាំងជាពិសេស ហើយមុខម្ហូបឱសថបុរាណដ៏ល្អមួយដែលស្រ្តីមានគភ៌ហាមខកខាននោះគឺ មើមខ្ញីហ្នឹងឯង។ ប្រហែលជានឹកឆ្ងល់ហើយមែនទេថា តើគុណប្រយោជន៍ និងគុណសម្បត្តិរបស់ខ្ញីចំពោះស្រ្តីមានគភ៌មានយ៉ាងណាខ្លះទៅ? កុំបង្អង់យូរ យើងនាំគ្នាមកមើលដូចតទៅ…។

គុណប្រយោជន៍របស់ខ្ញីចំពោះស្រ្តីមានគភ៌

សម្រាប់គុណប្រយោជន៍ដែលស្រ្តីមានផ្ទៃពោះនឹងបានទទួលពីការទទួលទានខ្ញីនោះ មានច្រើនណាស់ តែដែលមើលឃើញលទ្ធផលច្បាស់ៗបំផុតនោះមាន 3 ចំណុចដូចតទៅ ៈ

1 . សម្រាលអាការចាញ់កូន

ដោយសារតែខ្ញីមានជាតិប្រេងក្រអូបរសាយដែលនឹងជួយធ្វើឱ្យកើតភាពធូរស្រាលក្នុងរាងកាយបានល្អនោះ ទើបអាចសម្រាលអាការក្អួតចង្អោរ វិលមុខដែលបណ្តាលពីការចាញ់កូនបាន និងមើមខ្ញីថែមទាំងសម្បូរទៅដោយសារធាតុប្រឆាំងអនុមូលឥស្សរៈដែលនឹងកម្ចាត់មេរោគផ្សេងៗដែលចូលទៅក្នុងរាងកាយរបស់ស្រ្តីមានគភ៌បានយ៉ាងល្អទៀតផង។

2 . ជួយបណ្ដេញខ្យល់ កែបញ្ហាឆ្អល់ពោះ

ខ្ញីមានចំណែកក្នុងការបណ្ដេញខ្យល់ និងសម្រាលអាការចុកឆ្អល់ពោះរបស់ស្រ្តីមានគភ៌បានយ៉ាងមានប្រសិទ្ធភាព ល្អសម្រាប់ស្រ្តីមានគភ៌ដែលមានអាយុគភ៌ច្រើន(ជិតគ្រប់ខែ) ព្រោះអំឡុងពេលនោះ កូនដែលនៅក្នុងស្បូននឹងទៅច្រានផ្អឹបក្រពះរហូតធ្វើឱ្យកើតអាការចុកឆ្អល់ពោះឡើងជាញឹកញាប់ហ្នឹងឯង។

3 . ជំរុញការផលិតទឹកដោះ

ការទទួលទានខ្ញីញឹកញាប់តាំងពីអំឡុងពេលតាំងគភ៌នឹងជួយជំរុញការផលិតទឹកដោះបានយ៉ាងល្អ ធ្វើឱ្យស្រ្តីមានទឹកដោះសម្រាប់ឱ្យកូនបៅច្រើនឡើង ដោយអាចទទួលក្នុងរូបបែបជាខ្ញីស្រស់ក្នុងការច្នៃជាម្ហូបអាហារ ឬទទួលទានក្នុងរូបបែបជាទឹកខ្ញីក៏បាន។ ក្រៅពីនេះ ក្រោយពេលប្រសូតហើយ ស្រ្តីក៏គួរតែនៅញ៉ាំទឹកមើមខ្ញីជាបន្ត ដើម្បីឱ្យមានទឹកដោះយ៉ាងគ្រប់គ្រាន់ពេញមួយអំឡុងវ័យនៃការបៅទឹកដោះរបស់កូនតូច។

មុខម្ហូបណែនាំសម្រាប់ស្រ្តីមានគភ៌

សម្រាប់ស្រ្តីមានគភ៌ដែលនៅមិនទាន់នឹកឃើញមុខម្ហូបដែលមានលាយផ្សំដោយខ្ញីនោះ ឡារ៉ែនសូមណែនាំមុខម្ហូបងាយៗអំពីខ្ញី ងាយស្រួលធ្វើ និងថែមទាំងឆ្ងាញ់ទៀតផង។ តើមានអ្វីខ្លះនោះ តោះ នាំគ្នាតាមដានជាបន្ត…។

1 . ញាំខ្ញី-ត្រីប្លាធូ

ជាមុខម្ហូបងាយៗដែលនឹងជួយបង្កើនទឹកដោះ និងវីតាមីន C ដល់រាងកាយរបស់ស្រ្តីមានគភ៌បានយ៉ាងល្អ ឯវិធីការញាំវិញ គឺដូចម្ហូបញាំធម្មតាហ្នឹងឯង គ្រាន់តែដាក់ខ្ញីហាន់វែងៗល្អិតៗដាក់ចូលទៅប្រមាណជា 1 ស្លាបព្រាបាយ បន្ថែមរសជាតិជូរដោយក្រូចឆ្មារ… តែប៉ុណ្ណឹងក៏ឆ្ងាញ់ត្រូវចិត្តទៅហើយ។ អូ! ភ្លេចប្រាប់ អាចបន្ថែមរសជាតិផ្អែម ជូរ ប្រៃតាមចំណង់ចំណូលចិត្ត។

2 . ទឹកខ្ញី

សម្រាប់ភេសជ្ជៈមួយនេះក៏អាចញ៉ាំដើម្បីសម្រាលអាការចាញ់កូន និងជួយជំរុញការផលិតទឹកដោះបានល្អដែរ ដោយយកមើមខ្ញីមកស្ងោររយៈពេលប្រមាណជា 2 – 5 នាទី រង់ចាំឱ្យនៅក្តៅឧណ្ហៗ ហើយចាក់ដាក់ពែងយកមកក្រេបឱ្យបានញឹកញាប់ ឬចង់ដាក់ស្ករចូលបន្តិចក៏បាន។

ឃើញពីគុណសម្បត្តិរបស់ខ្ញីល្អបែបនេះហើយមិនអាចខកខានបានទេ ស្រ្តីដែលកំពុងមានគភ៌ទាំងឡាយចូរសាកល្បងធ្វើមុខម្ហូបណាដែលមានលាយផ្សំដោយខ្ញីទទួលទានសាកមើល(ខត្រីដាក់ខ្ញី ឆាខ្ញីសាច់គៅ-ល-) ធានាថា នឹងទទួលបានគុណប្រយោជន៍យ៉ាងគ្រប់គ្រឿងពិតប្រាកដ និងថែមទាំងល្អដល់សុខភាពរបស់កូនតូចក្នុងផ្ទៃទៀតផង៕

នៅរាត្រី ​ថ្ងៃទី25 ខែសីហា ឆ្នាំ2020 នាសណ្ឋាគារហ្គាឌិនស៊ីធី ផលិតកម្ម ​កាឡាក់ស៊ី​ណាវ៉ាត្រា បានរៀបចំ ពិធីទទួលស្វាគមន៍កំពូលតារាចម្រៀង ព្រាប សុវត្ថិ យ៉ាងអធឹកអធម ដោយមានការចូលរួម ពីតារាល្បីៗ និងអ្នកជំនួញធំៗ។

ការ​ចាក​ចេញ​លោក​ព្រាប​ សុវត្ថិ មិន​មានមូលហេតុអ្វីទេ​ គឺ​ជា​ការ​ព្រមព្រៀង​ដោយស្ម័គ្រចិត្ត​ជា​មួយ​ហង្សមាស​ ហើយ​ទាក់​ទង​នឹង​រឿង​ជម្លោះ​ផ្ទៃក្នុង​ក៏​មិនមាន​ដែរ​ គឺ​ជា​ការ​យល់​ព្រម​ដោយ​រាប់​អាន​គ្នា​ធម្មតា​ លក្ខណៈ​ជា​អ្នក​សិល្បៈរួម​អាជីព​។ លោក​ព្រាប​ សុវត្ថិ​ ក៏បាន​ជម្រាប​ជូន​ទស្សនិកជន​ក៏ដូចជា​អ្នកគាំទ្រ​របស់​លោក​ថា លោកនឹង​មាន​អ្វី​ដែល​ប្លែង​ៗ​ បង្ហាញ​នៅ​ក្នុង​ផលិត​កម្ម​កាឡាក់ស៊ី​ ហើយនឹង​រិះរក​អ្វី​ដែល​ថ្មី​បម្រើស​អារម្មណ៍​ទស្សនិកជន។

លោក​ថា លោក​បាន​កាន់​ដៃ​បណ្តើរ​គ្នា​ជាមួយ​ហង្សមាស​ពី​ឆ្នាំ1997គឺ​ជាង23 ឆ្នាំ​នេះ មាន​តែ​ស្នាម​ញញឹម និង​ជោគជ័យ​ជាមួយ​គ្នា។ មក​ដល់​ឆ្នាំ 2020 គឺ​លោក​មាន​គោលដៅ​មួយ​សម្រាប់​ជីវិត។ គោលដៅ​នេះ​ជា​អ្វី​លោក​ចង់​បាន និង​ក៏​ស្រប​តាម​ចំណង់ចំណូល​ចិត្ត​របស់​លោក​ផង​ដែរ។ រួម​រស់​ជាមួយ​ផលិតកម្ម​ហង្សមាស​ជាង​23ឆ្នាំ​ និង​ការ​សម្រេច​ចិត្ត​ចាក​ចេញ​​មក​រួម​ទ្រនំ​ថ្មី​​ជាមួយ​​ផលិត​កម្ម​ចម្រៀង​របស់​សេដ្ឋី​ឡេង ណាវ៉ាត្រា លោក​ព្រាប សុវត្ថិ​ប្រាប់​ថា ការ​ចាក​ចេញ​នៅ​ពេល​នេះ​គឺ​ពោរពេញ​ដោយ​ស្នាម​ញញឹម ហើយ​ក៏​ជា​ការ​បែក​គ្នា​មើល​ឃើញ​គ្នានិង​​មិន​អាច​បំភ្លេច​គ្នា។

កំពូល​តារា​ចម្រៀង​​ប្រចាំ​ប្រទេស​ប្រាប់​ថា រយៈពេលកន្លងមក​នេះ​ លោក​ទទួល​បាន​ការ​គាំទ្រ​និង​មុខមាត់​ ក៏​​ដោយសារ​តែ​ហង្សមាស។ លោក​មិន​គិត​ថា​ចង់​ចាកចេញ​ពី​ហ្សងមាស និង​មិត្ត​រួម​ការងារ​ដែល​បាន​តស៊ូរួម​ដំណើរ​ជាមួយ​គ្នា​​ តែ​ពេល​នេះ​ដល់​ពេល​លោក​ត្រូវ​ចាកចេញ ដើម្បី​សម្រេច​គោលដៅ ស្វែង​រក​បទ​ពិសោធន៍​ថ្មី​លើ​វិថី​សិល្បៈ។ លោក​ថា ការ​បែក​គ្នា​នៅ​ពេល​នេះ​ជា​ការ​បែក​គ្នា​ដោយ​មើល​ឃើញ ហើយ​លោក​នឹង​នៅ​តែ​បន្ត​រាប់​អាន​ និង​ទំនាក់ទំនង​គ្នា​គ្មាន​ថ្ងៃ​ណា​ប្រែប្រួល​ទេ។

លោក​បន្ថែម​ថា ការ​ចាកចេញ​នេះ​ក៏​មិន​ទាក់ទង​ទៅ​កាច់​កុង​គ្នា​ក្នុង​ក្រុមហ៊ុន រួម​ទាំង​ការ​ផ្តល់​កញ្ចប់​លុយ​ពិសេស​ណាមួយ​ពី​ក្រុមហ៊ុន​ថ្មី ដែល​ធ្វើឱ្យលោក​សម្រេច​ចិត្ត​ចាកចេញ​។ លោក​បញ្ជាក់​ថា លោក​ធ្វើ​អ្វី​មួយ​តែងតែ​មាន​គោលដៅ​សម្រាប់​ខ្លួន​ឯង។ ទាក់ទង​ការងារ​សិល្បៈ លោកបញ្ជាក់​ថា ទោះ​បី​ទៅ​ដល់​ទីណា លោក​នៅ​តែ​ចង់​បម្រើ​អារម្មណ៍​ និង​នាំ​អ្វី​ថ្មីៗសម្រាប់​អ្នក​គាំទ្រ​​​៕

91 . វិធីកម្ចាត់ក្លិនថ្នាំកន្លាតដែលដិតជាប់លើខោអាវ អាចធ្វើបានយ៉ាងងាយៗគឺ យកខោអាវដែលធំក្លិនថ្នាំកន្លាតនោះទៅប្រោះទឹកដាក់ល្មមតែសើមៗ ហើយយកទៅដាក់ព្យួរហាលនៅក្នុងកន្លែងដែលមានខ្យល់ចេញចូលល្អ ត្រឹមតែមួយយប់ប៉ុណ្ណោះ ក្លិនថ្នាំកន្លាតដែលដិតជាប់លើខោអាវនោះនឹងរលាយបាត់អស់តែម្តង។

92 . វិធីសម្អាតថូ ដប ឬកែវដែលមានមាត់តូចៗពិបាកលូកដៃចូលទៅជូតសម្អាត ចូរវាយបំបែកសម្បកស៊ុតឱ្យបែកជាបំណែកល្អិតៗដាក់ចូលទៅ ហើយចាក់ទឹកខ្មេះចូលទៅតាមក្រោយបន្តិច រួចក្រឡុកថូ ដប ឬកែវនោះ ហើយត្រាំទុកចោលមួយស្របក់ រួចសឹមចាក់សម្បកស៊ុតចេញ លាងដោយទឹកស្អាតមួយដងទៀត ថូ ដប ឬកែវទាំងនោះនឹងមើលទៅស្អាត ថ្លា លែងមានស្នាមកំណកកខ្វក់ និងក្លិនមិនល្អទៀតហើយ។

93 . វិធីសម្អាតចានដែកលាងបន្លែដែលប្រឡាក់ស្នាម ពែម៉ង់ហ្កាណាត ក្រហមៗ(ថ្នាំសម្រាប់លាងបន្លែ) លាងសម្អាតមិនចេញនោះ ចូរយកសម្បកផ្លែក្រូចឆ្មារមកជូត ព្រោះសម្បកផ្លែក្រូចឆ្មារនឹងបឺត និងទាញយកកំណកស្នាមពណ៌ក្រហមៗរបស់ថ្នាំពែម៉ង់ហ្កាណាតនោះចេញអស់។

94 . វិធីសម្អាតស្នាមប្រឡាក់នៅលើទូរស័ព្ទលើតុពណ៌សៗ អាចធ្វើបានដោយងាយៗគឺ យកក្រណាត់ជ្រលក់ទឹកថ្នាំលាងក្រចកជូតដុសសម្អាតឱ្យសព្វ មួយស្របក់ក្រោយ ស្នាមប្រឡាក់ផ្សេងៗ និងកំណកធូលីដីនឹងរលាយបាត់អស់មិនខាន។

95 . វិធីកម្ចាត់រោមសត្វឆ្កែចេញពីលើកម្រាលព្រំ មានវិធីធ្វើបែបងាយៗគឺ យកដុំអេប៉ុងជ្រលក់ទឹកឱ្យជោក រួចពូតចេញខ្លះឱ្យនៅសើមៗ រួចយកមកប្តិតៗលើកម្រាលព្រំនៅត្រង់កន្លែងដែលមានរោមសត្វឆ្កែជ្រុះជាប់នៅលើនោះ អេប៉ុងសើមៗនោះនឹងប្តិតយករោមទាំងនោះចេញអស់ពីលើកម្រាលព្រំ។

(នៅមានត)

លក្ខណៈរបស់កូនតូច

មកដល់ខែទី 2 កូនតូចមានទម្ងន់ខ្លួនឡើងបានប្រមាណជា 1 គីឡូក្រាមពីទម្ងន់ដែលទើបនឹងកើតមកភ្លាម។ ទោះជាអាយុត្រឹមតែ 2 ខែមែន តែក៏ចាប់ផ្តើមបង្ហាញលក្ខណៈពិសេសរបស់ខ្លួនបានខ្លះៗហើយ បើអ្នកម្តាយណាប៉ឹនសង្កេតនឹងបានដឹងជាមិនខានថា កូនតូចមានគ្រឹះនៃចរិតនិស្ស័យយ៉ាងណាខ្លះមិនខាន ដូចជា ក្មេងខ្លះជាក្មេងដែលងាយស្រួលបំបៅ ស្រួលឱ្យគេង និងគេងបានយូរ ជាដើម តែក្មេងខ្លះជាក្មេងដែលឆាប់ភ្ញាក់ អាចនឹងភ្ញាក់ញឹកញាប់ ប៉ឹនយំ ឬបៅទឹកដោះតិច ជាដើម តែយ៉ាងណាក៏ដោយ អ្នកម្តាយនឹងត្រូវចម្លែកចិត្តជាមួយនឹងវិវឌ្ឍនាការដែលផ្លាស់ប្តូរយ៉ាងឆាប់រហ័សរបស់កូនតូចជាទីស្រឡាញ់ដែរ។

កូនតូចគេងនៅពេលយប់បានកាន់តែយូរឡើង ក្នុងអំឡុងចុងខែទី 2 ទារកខ្លះអាចនឹងគេងយូរដល់ទៅ 7 ម៉ោង ចំណែកពេលថ្ងៃនឹងគេង និងបៅទឹកដោះមានពេលវេលា អាចនិយាយបានថាមានរបៀបរបបច្រើនឡើងហើយ។

ទោះជាភ្នែករបស់កូនអាចនឹងនៅមើលឃើញមិនសូវច្បាស់មែន តែក៏ចេះសម្តែងទឹកមុខបានពូកែជាងមុនហើយ បើមាននរណាមកលេងជាមួយ ឬក៏កូនតូចត្រូវចិត្តក៏នឹងញញឹមដាក់។ រយៈពេលភ្ញាក់កាន់តែវែងឡើង ចាប់ផ្តើមបញ្ចេញសំឡេងបានម្តងម្កាលបៅទឹកដោះបានច្រើនឡើង តែជាប្រក្រតីគឺប្រមាណជា 7 ដងក្នុងមួយថ្ងៃ។

ការកោរសក់ព្រៃចេញ នឹងធ្វើឱ្យសក់ដុះមកក្រាស់មែនឬ?

គ្រួសារខ្លះអាចនឹងជ្រើសរើសកោរសក់ព្រៃរបស់កូនតូចចេញនៅអំឡុងខែទី 2នេះ ព្រោះសក់ក្បាលវែងឡើងហើយ។ បើកូនតូចមានសក់ច្រើន គ្រាន់តែយកកន្រ្តៃដែលមានចុងមិនស្រួច ច្រឹបតម្រឹមសក់កូនបន្តិចៗទៅបានហើយ តែបើត្រូវការកោរសក់ព្រៃនេះចេញ ព្រោះមានជំនឿថា ពេលកោរហើយ នឹងធ្វើឱ្យសក់កូនដុះមកខ្មៅក្រឹប ក្រាស់រលោងនោះ ឡារ៉ែនសូមជម្រាបថា នៅមិនទាន់ការពិសោធអះអាងថា ពិតមែនឬយ៉ាងណានៅឡើយទេ តែអ្វីដែលជារឿងពិតប្រាកដនោះគឺ ការដែលកូនតូចមានសក់ក្របពីលើស្បែកក្បាលនោះ នឹងជួយការពារបង្ហើយ និងភាពត្រជាក់ពីធាតុអាកាសខាងក្រៅបានមួយកម្រិតដែរ។

អាការដែលអាចកើតឡើង

– ទល់លាមក

ការបន្ទោបង់របស់ក្មេងតូចម្នាក់ៗខុសប្លែកពីគ្នា បើកូនតូច 2 ថ្ងៃ ជុះម្តង តែជុះស្រួល មឹមបាន គេងលក់ លេងសប្បាយ អារម្មណ៍ល្អ អាចរាប់បានថា មិនទល់លាមកទេ តែបើជុះពិបាកខ្លាំង លាមកចេញមកជាគ្រាប់មូលៗ រឹងៗ នោះបញ្ជាក់ថា កូនតូចកើតអាការទល់លាមកហើយចា៎ស។

– ប្រតិកម្មចាញ់ម្សៅទឹកដោះគោ

មានក្មេងតូចៗចំនួនមិនតិចទេដែលមានប្រតិកម្មចាញ់ម្សៅទឹកដោះគោ ដោយអាការនេះនឹងបង្ហាញឡើងច្រើនលក្ខណៈ និងពាក់ព័ន្ធជាមួយប្រព័ន្ធក្នុងរាងកាយច្រើនកន្លែង តែដែលប្រទះញឹកញាប់គឺ ប្រព័ន្ធរំលាយអាហារ ប្រព័ន្ធដង្ហើម និងមានប្រតិកម្មនៅលើស្បែក។

រាងកាយ

កូននៅមានរីហ្វ្លេកស៍ខ្លះៗ តែការកម្រើកដៃជើងរាងទន់ភ្លន់ច្រើន មើលទៅមិនដូចកន្រ្តាក់ខ្លាំងៗដូចកាលពីទើបកើតដំបូងនោះទេ។ ពេលដាក់កូនឱ្យគេងផ្កាប់ កូនតូចនឹងងើបក្បាលឡើងប្រមាណជា 45 អង្សាបានមួយភ្លែត ដៃចាប់ផ្តើមស្រវាចាប់នេះចាប់នោះ និងពេលខ្លះចាប់របស់បានយូរ 2 – 3 នាទីទៀតផង។

សង្គមជុំវិញខ្លួន

កូនតូចចាប់ផ្តើមចាប់អារម្មណ៍សំឡេងជុំវិញខ្លួនច្រើនឡើង។ ពេលបានឮសំឡេងដែលធ្លាប់ស្គាល់នឹងនៅស្ងៀមរង់ចាំស្តាប់ ឬសម្តែងទឹកមុខថា បានឮ និងស្គាល់ និងចេះសម្តែងអារម្មណ៍ច្រើនឡើង ដូចជា មួម៉ៅ ត្រេកអរ ជាដើម។ ខ្សែភ្នែកមានការវិវឌ្ឍឡើងជាងខែមុនបន្តិច តែចូលចិត្តក្នុងការសម្លក់សម្លឹង ឬមើលវត្ថុដែលធ្វើចលនានៅពីមុខបានខ្លាំងឡើងហើយ។

លេងជាមួយកូនញឹកញាប់

ការនិយាយលេងជាមួយកូនតូច ការច្រៀងបំពេ គឺជាការបង្កើនប្រព័ន្ធប្រសាទការទទួលដឹងរបស់កូនតូច ធ្វើឱ្យកើតការរៀនយល់ដឹងបានងាយ និងល្អបំផុតក្នុងអំឡុងពេលនេះ៕

យើងនឹងនាំយកអត្តបទដ៏មានប្រយោជន៍សម្រាប់អ្នកម្តាយថ្មោងថ្មីក្នុងការយល់ដឹងពីវិវឌ្ឍនាការ លក្ខណៈ និងអាការផ្សេងៗរបស់កូនតូចទើបនឹងកើត តាំងពីអាយុបាន 1 ខែ រហូតដល់ 1 ខួបមកជម្រាបជូនមួយលេខមួយខែ ទុកជាចំណេះដឹងក្នុងការមើលថែទាំកូនតូចជាទីស្រឡាញ់របស់អ្នកម្តាយ ដោយយើងសូមចាប់ផ្តើមពីអាយុរបស់កូនតូចឈានចូលខែទី 1 នេះតែម្តង។

លក្ខណៈរបស់កូន

ក្នុងរយៈកន្លះខែដំបូង ភាគច្រើនកូនតូចនឹងគេងជាប់រហូត និងមិនទាន់អាចកំណត់ពេលវេលាផ្សេងៗរបស់កូនបានពិតប្រាកដនៅឡើយទេ។ ទារកខ្លះអាចនឹងនោមក្នុងមួយថ្ងៃ 5 – 6 ដង ទារកខ្លះទៀតអាចនឹង10 ដងក៏មាន តែក៏មិនមែនជារឿងគួរឱ្យវិតក្កកង្វល់អ្វីដែរ។ លុះចូលដល់រយៈកន្លះខែក្រោយ អ្នកម្តាយនឹងចាប់លក្ខណៈរបស់កូនបានខ្លះៗហើយថា ក្មេងខ្លះអាចគេងយូរ មិនសូវយំរករឿង បៅម្តងៗបានច្រើន លុះឆ្អែតហើយក៏លក់តែម្តង។ ទារកក្នុងលក្ខណៈនេះអ្នកម្តាយងាយនឹងស្មានពេលវេលាឱ្យបៅត្រូវ តែក្មេងខ្លះអាចភ្ញាក់ញឹកញាប់ ពិបាកគេងលក់ គឺជារឿងដែលអ្នកម្តាយត្រូវខំរៀនយល់ដឹង និងសង្កេតមើលលក្ខណៈ និងទម្លាប់របស់កូនម្តងបន្តិចៗ មួយថ្ងៃបន្តិចៗ។ ទារកដែលបៅទឹកដោះម្តាយ លាមកនឹងទន់ និងជុះញឹកញាប់។

តើកូនយើងបៅទឹកដោះឆ្អែតអត់ហ្ន៎?

អ្នកម្តាយអាចសង្ស័យថា តើកូនតូចបានទទួលទឹកដោះគ្រប់គ្រាន់ឬទេ? តើនឹងមើលដឹងដោយវិធីណា? វិធីសង្កេតមិនពិបាកទេ គ្រាន់តែថ្លឹងទម្ងន់ខ្លួនកូនក៏ដឹងបាត់ទៅហើយ បើទម្ងន់ខ្លួនកូនឡើងល្អ គឺរៀងរាល់ 5 ថ្ងៃ កូននឹងមានទម្ងន់ខ្លួនកើនឡើង 150 ក្រាម នោះអាចរាប់បានថា កូនបានទទួលទឹកដោះគ្រប់គ្រាន់ហើយ តែបើទម្ងន់ខ្លួនទារកតិចជាង 100 ក្រាមវិញ បែបហ្នឹងត្រូវទៅប្រឹក្សាគ្រូពេទ្យហើយ។

អាការដែលអាចនឹងកើតឡើង

– ក្អែទឹកដោះ

ក្រោយពីបៅទឹកដោះរួចប្រមាណជា 10 – 20 នាទី កូនតូចអាចនឹងក្អែទឹកដោះចេញមក មានលក្ខណៈដូចដុំតៅហ៊ូខ្ទេចៗ ដោយទារកខ្លះអាចមានអាការបែបនោះស្ទើរតែគ្រប់ពេល។ ទឹកដោះដែលក្អែចេញមកមានបរិមាណមិនស្មើគ្នាទេ តែនឹងក្អែច្រើនឡើងនៅពេលអាយុបានកន្លះខែ។ បើកូនតូចនៅតែបៅទឹកដោះបានល្អ ទម្ងន់ខ្លួនឡើងតាមប្រក្រតី សប្បាយមានអារម្មណ៍នោះ អ្នកម្តាយមិនចាំបាច់កង្វល់ឡើយ ព្រោះអាការនេះនឹងបាត់ទៅវិញបណ្តើរដោយឯកឯង។ ឯមូលហេតុ អាចបណ្តាលមកពីសាច់ដុំខ្ជិបមាត់ក្រពះរបស់ទារកនៅមិនទាន់រឹងមាំ នៅពេលបៅឆ្អែត នឹងមានហៀរចេញមក។ ដូច្នេះបន្ទាប់ពីបីកូនបំបៅទឹកដោះរួចហើយ មិនគួរដាក់ឱ្យកូនគេងភ្លាមទេ ត្រូវទុកឱ្យកូនភើបន្តិចសិន ដោយការពពាក់លើស្មា ហើយអង្អែលខ្នងប្រមាណជា 10 – 20 នាទី និងឱ្យកូនគេងផ្អៀង ដើម្បីការពារអាការក្អែ។

– ឡើងស្នាមកំណក-សៗក្នុងមាត់

បន្ទាប់ពីកើតមកបានប្រមាណ 1 សប្តាហ៍ ទារកអាចកើតមានស្នាមកំណក-សៗនៅម្តុំសាច់អញ្ចាញ ឬក្នុងថ្ពាល់ អាចបណ្តាលមកពីកំណកទឹកដោះ។ អ្នកម្តាយចូរយកស្បៃ ឬក្រណាត់ស្អាតស្តើងៗជ្រលក់ទឹក ហើយជូតសម្អាតក្រោយពេលកូនបៅទឹកដោះរួច

– ដកដង្ហើមឮខ្លាំង

ទារកទើបនឹងកើត ខណៈពេលដកដង្ហើមនឹងមានឮសំឡេងខ្យល់នៅក្នុងបំពង់ក អ្នកម្តាយច្រើនតែគិតថា កូនកើតជំងឺគ្រុនផ្តាសាយ ឬបំពង់កមានអាការខុសប្រក្រតីណាមួយ តែបើកូននៅតែបៅទឹកដោះបានល្អធម្មតា ទម្ងន់ខ្លួនល្អឡើង សំឡេងខ្យល់ដង្ហើមដែលកើតពីប្រអប់សំឡេងនៅទន់នោះ នៅពេលធំឡើងប្រអប់សំឡេងនោះនឹងរឹងមាំឡើង លែងមានឮសំឡេងខ្យល់ទៀតហើយ។

វិវឌ្ឍនាការរបស់កូនតូច

ការស្រែកយំជាវិធីតែមួយគត់របស់ក្មេងក្នុងវ័យនេះអាចទំនាក់ទំនងឱ្យអ្នកម្តាយដឹងថា ខ្លួនគេត្រូវការអ្វី ដូចជា ឃ្លាន ខ្លួនសើម ចង់ឱ្យព ឈឺកន្លែងណាមួយ ដូច្នេះវិធីដែលល្អបំផុតគឺ ការតបស្នងទៅកូនវិញឱ្យត្រូវនឹងតម្រូវការ ដែលអ្នកម្តាយត្រូវប្រើភាពស៊ាំធ្លាប់ ចេះសង្កេតមើល និងចំណាំថា ការយំម្តងៗរបស់កូននោះត្រូវការអ្វី។

លេងជាមួយកូនញឹកញាប់

ការបី ព ឱប មិនថាតែអំឡុងពេលបំបៅទឹកដោះកូន ពេលបំពេឱ្យគេង ច្រៀងឱ្យកូនស្តាប់ នោះទេ ទាំងអស់នេះសុទ្ធតែចូលទៅជួយជំរុញកោសិកាខួរក្បាលរបស់កូនតូចឱ្យធ្វើការ និងអភិវឌ្ឍបានល្អតទៅមុខទៀតទាំងអស់៕

ក្នុងការ​រស់នៅ​របស់​មនុស្សម្នាក់ៗ បើទោះបីជា​យើង​ជា​មនុស្ស​ដែល​ប្រុងប្រយ័ត្ន ឬ​ចង់បាន​សេចក្តីសុខ​ប៉ុណ្ណា​ក៏ដោយ ក៏​ពេលខ្លះ​មាន​មនុស្ស​ជុំវិញខ្លួន​នៅតែ​អាចបង្កើត​កំហុស និង​ធ្វើឱ្យ​យើង​ទាស់ចិត្ត​ដែរ។ ហេតុនេះ​ប្រសិនបើ​យើង​គ្រប់គ្រង​ស្ថានភាព​ផ្លូវចិត្ត​មិនល្អ យើង​នឹង​អាច​ក្លាយ​មនុស្ស​មាន​បញ្ហា ឬ​បាត់បង់​សេចក្តីសុខ តែ​ប្រសិនបើ​យើង​ឆ្លើយតប​ល្អ​ជាមួយនឹង​ស្ថានភាព​ខាងក្រៅ​នេះ យើង​នឹង​អាច​រស់នៅក្នុង​ភាព​ស្ងប់​សុខ និង​រីកចម្រើន។

លោក​ឧកញ៉ា គួច ម៉េង​លី អគ្គនាយក​ក្រុមហ៊ុន Mengly J.Quoch Edication បាន​លើកឡើងថា លើ​ផែនដី​យើង​នេះ គ្មាន​នរណាម្នាក់​ត្រូវ​រហូត​នោះទេ ហើយក៏​គ្មាន​នរណាម្នាក់​ខុស​រហូត​នោះដែរ អ្វីដែល​សំខាន់ នៅពេល​ខ្លួន​ធ្វើ​ខុស តើ​ចេះ​ទទួលកំហុស​និង​កែខ្លួន​ឱ្យ​ល្អ​ឡើងវិញ​ឬ​អត់? ដូច្នេះ​នៅពេល​មាន​នរណា​ធ្វើ​ខុស​អ្វីមួយ​ចំពោះ​យើង យើង​ត្រូវតែ​ចេះ​លើកលែងទោស​ឱ្យគេ ហើយ​បំភ្លេចចោល​នូវ​អតីតកាល​ដ៏​ជូរជត់​ទាំងនោះ ប៉ុន្តែ​ត្រូវ​ចងចាំ​ទុកជា​បទពិសោធ ជា​មេរៀន​សម្រាប់​ជីវិត នោះ​ទើប​យើង​មិន​ប្រែ​បរាជ័យ​នៅ​ថ្ងៃក្រោយ។

លោក​ថា នៅពេល​បុគ្គលិក​ធ្វើ​ខុស​ម្ដង​ពីរដង លោក​មិនដែល​ចាប់ទោស​អូស​ដំណើរ​ពួកគាត់​នោះទេ អ្វីដែល​កាន់តែ​ពិសេស​ជាងនេះទៅទៀត​នោះ គឺ​គាត់​តែង​អភ័យទោស និង​មិនមាន​គំនិត​គុំកួន​នោះទេ ប៉ុន្ដែ គាត់​គ្រាន់តែ​ចាំ​ក្នុង​ចិ​ត្ដ​ថា មនុស្ស​នោះ​បើ​គាត់​មករក​ទៀត​ត្រូវ​ប្រយ័ត្ន​បន្ដិច ហើយ​មិនដែល​បោះបង់​ទេ មានន័យថា គ្រាន់តែ​ប្រយ័ត្ន​បន្ដិច និង​ពញ្ញាក់​អារម្មណ៍​ខ្លួនឯង​គ្រប់ពេល​ពី​បុគ្គល​នោះ។ ប៉ុន្ដែ​បើ​សួរ​លោក​ថា តើ​លោក​គុំកួន​គាត់​ទេ? ចម្លើយ​គឺថា​អត់​ទេ! គាត់​ឆ្លើយថា​គាត់​បែរជា​មាន​អារម្មណ៍​អាណិត​គាត់ និង​មាន​មេ​ត្ដា​ធម៌​ចំពោះ​បុគ្គល​នោះ​ទៅវិញ ព្រោះ​អាច​ថា​ដោយសារតែ​គាត់​មាន​ភាព​លោភលន់​និង​អាត្មានិយម ទើប​នាំឱ្យ​គាត់​ពូកែ​លេបសម្តី​ខ្លួនឯង ចូលចិត្ត​ការនិយាយ​បាតដៃ​ខ្នងដៃ មាន​ច​រិ​ក​ក្រឡេក​ក្រ​ឡុ​ច ឬ​ឆ្អិន​ក្បាល​ស៊ី​ក្បាល ឆ្អិន​កន្ទុយ​ស៊ី​កន្ទុយ រណេបរណប អែបអប និង​ពូកែ​រករឿង ឈ្នានីស​គេឯង​បែបនេះ។

សហគ្រិន​ខាងលើ​បានបញ្ជាក់​ផងដែរ​ថា នៅពេល​លោក​មិន​ខឹង មិន​គុំកួន បុគ្គលិក​ខ្លួន​មួយចំនួន​បាន​សួរ​លោក​ថា “តើ​មាន​មូលហេតុ​អ្វីដែល​ធ្វើឱ្យ​លោក​ក្លាយទៅជា​មនុស្ស​មិនចេះ​គុំកួន មិនចេះ​ចាប់ទោស​អូស​ដំណើរ​បែបនេះ?” លោក​តប​ទៅ​គាត់​ថា “ដោយសារ​លោក​ធ្លាប់​ឆ្លងកាត់​ភាពលំបាក​ច្រើនដង លោក​ធ្លាប់​ត្រូវគេ​ធ្វើបាប ម្យ៉ាង​លោក​នឹកឃើញ​កាលពី​ក្មេង លោក​គឺជា​ក្មេង​ដ៏​កាច​ម្នាក់។ លោក​តែង​ឈ្លោះ​គ្នា និង​វាយ​គ្នា និយាយ​រួម​ថ្ងៃ​ណា​ក៏​វាយ​គ្នា​ដាច់​មុខ​អស់​ដែរ ហើយ​វា​គួរឱ្យ​អស់សំណើច​ណាស់ កាលពី​ក្មេង​គេ​ហៅ​លោ​កថា​មាត់​គូទ​មាន់ និង​អា​មេខ្យល់​ពូកែ​សន្សំរឿង ធ្វើឱ្យ​គាត់​គ្មាន​អារម្មណ៍​សុខ​ស្ងប់​នោះទេ។ លុះដល់​ពេល​ធំ​ឡើង លោក​មាន​អារម្មណ៍​ថា មិន​ចង់​កាច​ដូច​ពី​ក្មេង​ទៀត​ទេ។ ដូច្នេះ​បច្ចុប្បន្ននេះ រឿង​ឈ្លោះ​គ្នា រឿង​គុំកួន​គ្នា និង​រឿង​ធ្វើបាប​គេ គឺ​លោក​មិន​ចូលចិត្ត​ធ្វើ​នោះទេ។ ដូច្នេះហើយ​ទើប​ឧកញ៉ា​រូបនេះ​មិន​ចូលចិត្ត រឿង​មេខ្យល់​ចាក់​ចូ​ច​សន្សំរឿង​បែបនេះ។ លោក​ថា វា​ពិត​ជាមាន​វិប្បដិសារី​ណាស់​ចំពោះ​ឥរិយាបថ​កាលនោះ។

ដូច្នេះ គាត់​ជឿជាក់​យ៉ាង​មុតមាំ​ថា បើ​មនុស្ស​គ្រប់រូប​សុទ្ធតែ​គ្មាន​ចិត្ត​គុំកួន​គ្នា សុទ្ធតែ​ចេះ​អភ័យទោស​ឱ្យ​គ្នា នោះ​សង្គម​កម្ពុជា​យើង​ប្រាកដជា​ពោរពេញ​ទៅដោយ​សុខសន្តិភាព​មិនខានឡើយ៕

កាលពី​ល្ងាច​ថ្ងៃទី23 ខែសីហា ឆ្នាំ2020 កន្លងទៅនេះ ការប្រកួត​បាល់ទាត់​លី​ក​កំពូល​កម្ពុជា រដូវ​កាល2020 សប្តាហ៍​ទី13 បានបញ្ចប់​ទៅហើយ ដោយ​បឹងកេត និង​ព្រះខ័ន​រាជ បាន​ក្លាយជា​បេក្ខភាព​ដែលមាន​ភាគរយ​ច្រើន ក្នុងការ​ដណ្តើម​ជើងឯក ដ្បិតអី ក្រុម​ដណ្តើម​តំណែង​កំពូល​តារាង​ទាំង 2នេះ ប្រដេញ មុខ-ក្រោយ​គ្នា តែ 1ពិន្ទុ​ប៉ុណ្ណោះ ខណៈដែល​ក្រុម​លេខ3 ខុសគ្នា​ដាច់​ដល់​ទៅ 9ពិន្ទុ​ឯណោះ។

ក្រោយ​បញ្ចប់​ជើង​ទី1 នេះ លី​ក​កំពូល​កម្ពុជា នឹងត្រូវ​បែងចែក​ជា2 ដោយ​ក្រុម​ខ្លាំង​ទាំង6 ខាងលើ​រួមមាន បឹងកេត ព្រះខ័ន​រាជ​ស្វាយរៀង វិសាខា ទ័ព ភ្នំពេញ​ក្រោ​ន និង​ណាហ្គា​វើ​លដ៍ នឹងត្រូវ​ប្រកួត​គ្នា​ដណ្តើម​ជើងឯក។ ខណៈដែល​ក្រុម7 ផ្សេងទៀត រួមមាន អង្គ​រថា​យ​ហ្គឺ​រ គិរីវង់​សុខ​សែន​ជ័យ អាស៊ី​អឺរ៉ុប អគ្គិសនី​កម្ពុជា នគរបាលជាតិ សូល​ទី​ឡូ​អង្គរ និង​យុវជន​បាទី ត្រូវ​ខំប្រឹង​ដើម្បី​គេច​ពី​តំបន់​កាត់ចោល។

គួរ​បញ្ជាក់ដែរថា ការសម្រេច​ប្តូរ​រូបមន្ត​បែបនេះ គឺ​ដោយសារតែ​ឥទ្ធិពល​កូ​វីដ-19 ដែល​ធ្វើឱ្យមាន​ការផ្អាក​ការប្រកួត​អស់​រយៈពេល 3ខែ ដែល​ធ្វើឱ្យ​ពេលវេលា​ប្រកួត​កាន់តែ​ខើច មិនអាច​បញ្ចប់​បាន​ទាន់ពេលវេលា៕

ពហុ​កីឡដ្ឋាន​ជាតិ មរតក​តេ​ជោ បាន​បើក​ការដ្ឋាន​សាងសង់​កាលពី​ខែមេសា ឆ្នាំ2017 ក្រោយ​បញ្ចប់​ការសាងសង់ កីឡដ្ឋាន​នេះ នឹង​អាច​ផ្ទុក​អ្នកទស្សនា​បាន​ប្រមាណ 6ម៉ឺន​នាក់ ពោលគឺ ដើម្បី​ធ្វើជា​ម្ចាស់ផ្ទះ​ការប្រកួត​កីឡា​អាស៊ីអាគ្នេយ៍ (ស៊ី​ហ្គេម) លើក​ទី32 នៅ​ឆ្នាំ2023។

លោក វ៉ា​ត់ ចំរើន បាន​មានប្រសាសន៍ថា៖ «មកទល់ពេលនេះ ការសាងសង់​កីឡដ្ឋាន​ធំ ឬ Main Stadium រួចរាល់​បាន 90% ហើយ នៅសល់តែ​ការបំពាក់​គ្រឿង​បរិក្ខារ​ប៉ុណ្ណោះ ដូចជា​កៅអី កញ្ចក់ បង្កាន់ដៃ ភ្លើង ទីលាន​ខាងក្នុង និង​ការ​ដេ​គ័​រផ្សេងៗទៀត ។ ដូច​យើង​ធ្វើ​ផ្ទះ​អ៊ីចឹង កាលណា​ដល់​ដេ​គ័​រ​ហ្នឹង គឺ​វា​រាង​យឺត​បន្ដិច​ហើយ តែបើ​និយាយ​ពី​ផ្នែក​សំណង់​វិញ សឹងតែ​រួចរាល់​អស់​ទៅហើយ ។ គម្រោង​នេះ អាច​នឹង​បញ្ចប់​ជា​ស្ថាពរ នៅ​អំឡុង​ខែមីនា ឆ្នាំក្រោយ»។

គួរ​រំឭក​ដែរ​ថា ពហុ​កីឡដ្ឋាន​ជាតិ មរតក​តេ​ជោ គឺជា​កាដូ ដ៏​ធំ​ស្កឹមស្កៃ តម្លៃ​ប្រមាណ​ជា 160លាន​ដុល្លារ​អាមេរិក ពី​សាធារណរដ្ឋ​ចិន ដែលមាន​ទំហំ​ផ្ទៃក្រឡា​កីឡដ្ឋាន រហូតដល់​ទៅ 16.22ហិកតា និង​ផ្ទៃក្រឡា​សំណង់​ទំហំ​ប្រមាណ​ជា 8.24ម៉ឺន​ម៉ែត្រការ៉េ៕

បើ​និយាយ​អំពី​កីឡាករ​ស៊ុត​បញ្ចូល​ទី​ច្រើនជាងគេបង្អស់ នៅ​លី​ក​កំពូល​កម្ពុជា ជា​រៀងរាល់ឆ្នាំ តែងតែបាន​ទៅលើ​កីឡាករ​បរទេស ជា​អ្នកឈ្នះ​ជា​រៀងរាល់ឆ្នាំ ដោយឡែក​កីឡាករ​សញ្ជាតិ​ខ្មែរ មិន​ងាយ​នឹង​បាន​ឈរ​ឯបកៀនៗតារាង​កំពូល​អ្នក​ស៊ុត​បញ្ចូល​ទីនេះ​ផង ដោយ​ខុសគ្នា​ដាច់ មិនតិចជាង 10គ្រាប់​ឡើយ ជា​រៀងរាល់ឆ្នាំ។

ដោយឡែក​ឆ្នាំនេះ កីឡាករ​ខ្សែប្រយុទ្ធ​ខ្មែរ ដែល​កំពុង​ឡើង​ជើង​ខ្លាំង​នៅ​លី​ក​កំពូល​កម្ពុជា គឺ​កីឡាករ ម៉ាត់ នុ​រុណ កំពុងតែ​ប្រកៀក​ប្រកិត ដោយ​ចាញ់​គ្រាប់​បាល់​កីឡាករ​បរទេស​តែ 1គ្រាប់​ប៉ុណ្ណោះ។ ក្នុងនោះដែរ កាលពី​យប់មិញ​គេ​បាន​បន្ថែម 2គ្រាប់​ទៀត ក្នុង​សប្តាហ៍​ទី13 នេះ ដោយ​សរុបមក កីឡាករ​រូបនេះ​រកបាន 13គ្រាប់ ឈរ​នៅ​លំដាប់​លេខ2 ជា​កីឡាករ​ស៊ុត​បញ្ចូល​ទី​បាន​ច្រើន​គ្រាប់​ជាងគេ នៅ​លី​ក​កំពូល​កម្ពុជា ខណៈដែល​ឈរ​លេខ1 ជា​កីឡាករ​ខ្មែរ​ដែល​ទាត់​បញ្ចូល​ទី​បាន​ច្រើនជាងគេបង្អស់។

គួរ​រំឭក​ដែរ​ថា កីឡាករ​ខ្សែប្រយុទ្ធ កូនកាត់​អ៊ីស្លាម​រូបនេះ ទើបតែ​ផ្ទេរ​មកពី​ក្រុម​អគ្គិសនី​កម្ពុជា កាលពី​រដូវ​កាល​មុន ក្រោយ​មាន​បញ្ហា​របួស និង​បាន​ចូល​ទីលាន​វិញ កីឡាករ​រូបនេះ​តែងតែ​រកបាន​គ្រាប់​បាល់​បាន សឹងតែ​គ្រប់​ការប្រកួត​ទាំងអស់ មិនដែល​ខាន​ឡើយ៕