Category: សង្គម និងសេដ្ឋកិច្ច

ការ៉ុតជាដំណាំហូបមើម 2 រដូវកាល ដែលក្នុងរដូវកាលដំបូងនឹងលូតលាស់ធំធាត់ផ្នែកដើម ស្លឹក និងឫស ចំណែកក្នុងរដូវកាលទីពីរដំណាំការ៉ុតនឹងលូតលាស់ផ្នែកផ្កា និងគ្រាប់(ដាំទុកយកគ្រាប់ធ្វើពូជ)។ លក្្ខណៈរបស់ដើមការ៉ុតជាស្លឹកបន្ទះដែលនឹងដុះលូតលាស់ចេញពីដើម ជាក្រុមដំណាំដែលមានធាងស្លឹកវែង។ ពូជការ៉ុតដែលមានគុណភាពខ្ពស់នឹងមានបណ្ដូលតូច និងមានពណ៌ដូចគ្នានឹងសាច់ ឬមានផ្នែករបស់សាច់ច្រើនជាផ្នែករបស់បណ្ដូល។

កាដាំរដូវកាលទីពីរដើម្បីទទួលផលជាគ្រាប់ពូជនោះ ដើមការ៉ុតនឹងឈរឡើងត្រង់ ផលិតធាងស្លឹកវែងៗប្រវែង 2 – 4 ហ្វុ៊ត នៅខាងចុងមានកញ្ចុំផ្កា ដែលកញ្ចុំដំបូងនឹងដុះលូតលាស់ចេញពីផ្នែកកណ្ដាលរបស់ដើម បន្ទាប់ពីនោះកញ្ចុះដទៃទៀតនឹងដុះលូតលាស់មកតាម។ កាផ្សំលម្អងកេសរធ្វើឡើងបែបផ្សំចម្លង ដែលភាគច្រើនប្រើសត្វល្អិតជាអ្នកជួយផ្សំលម្អងកេសរ។

ការដាក់ដាំ

– ការត្រៀមដី ៈ ផ្ទៃដីដែលស័ក្តិសមសម្រាប់ការបណ្ដុះដាំ គួរស្ថិតនៅខ្ពស់ជាងកម្រិតកម្ពស់ទឹកសមុទ្រប្រមាណ 600 – 1,300 ម៉ែត្រ ដីគួរតែជាដីល្បាយលាយខ្សាច់។ មិនគួរដាក់ជីលាមកគោស្រស់ទេ ត្រូវធ្វើការលាយផ្សំ រួចដាក់ហាលថ្ងៃចោលមួយរយៈសិន។

ក្នុងដំណាក់កាលភ្ជួរដីត្រៀមលើកជារង ចូរជីកមុខដីរហូតដល់បែកត្រសុសជម្រៅមិនតិចជាង 40 សង់ទីម៉ែត្រ លើកជារងទំហំទទឹង 1 ម៉ែត្រ អាចដាំបាន 3 ជួរ។ បើជាដីស្អិត ត្រូវតែលាយផ្សំជាមួយជីធម្មជាតិផ្អាប់ 2 គីឡូក្រាម ជាមួយផេះអង្កាម 1 ការ៉ុងដាក់លើផ្ទៃដី 2 ម៉ែត្របួនជ្រុង។ (បន្ថែម ៈ នៅក្នុងផ្ទៃដីដាំដុះ មិនគួរមានកម្ទេចឫសឈើធំៗ ក្រួសថ្មធំៗឡើយ)។

– វិធីដាំ ៈ អាចធ្វើបានដោយវិធីបណ្ដុះគ្រាប់ តែគ្រាប់ពូជការ៉ុតមានទំហំតូច និងទន់ខ្សោយណាស់។ មានការរួចផុតពីការស្អុយងាប់ក្រោយការបណ្ដុះជាកូនត្រឹមតែ 50 ភាគរយប៉ុណ្ណោះ ដូច្នេះគួរនាំយកគ្រាប់ពូជ 3 ចំណែក លាយជាមួយដីខ្សាច់ 1 ចំណែកមុននឹងយកទៅព្រោះ។ ស្រោចទឹកលើរងឱ្យជោកមុននឹងចាប់ផ្ដើមព្រោះគ្រាប់ពូជ ដើម្បីបិទរន្ធដី និងឱ្យដីរួមចូលគ្នាមិនឱ្យគ្រាប់ពូជធ្លាក់ចូលទៅក្នុងដីជ្រៅពេក។ បន្ទាប់ពីនោះបាចជីផ្អាប់ធម្មជាតិលាយផេះអង្កាមរោយតិចៗលើបរិវេណរង ស្រោចទឹកលាយទឹកជីសរីរាង្គ រួចហើយយកចំបើងស្ងួតមកគ្របលើរងមួយជាន់ទៀត។

ក្រោយពីព្រោះគ្រាប់ពូជ ក្នុងរយៈដំបូងនៅពេលដើមមានខ្នាតកម្ពស់ 5 – 7 សង់ទីម៉ែត្រ ចូរដកដើមដែលដុះឡើងញឹកចេញខ្លះ ទុកចម្ងាយពីដើមមួយទៅដើមមួយប្រមាណ 2 – 3 សង់ទីម៉ែត្រ។ រង់ចាំរហូតដល់មានអាយុ 20 ថ្ងៃ កូនការ៉ុតមានខ្នាតកម្ពស់ប្រមាណ 10 – 15 សង់ទីម៉ែត្រ អាចដកបំបែកដាំបានហើយ ចំណែកដើមដែលនៅតូចៗកម្ពស់ត្រឹមតែ 1 – 1.5 សង់ទីម៉ែត្រ គួរដកចោល។ ក្នុងដំណាក់កាលទីពីរ នៅពេលដើមមានអាយុប្រមាណ 40 – 50 ថ្ងៃ ក្នុងដំណាក់កាលនេះអាចដកយកមើមការ៉ុតមកទទួលទានបានខ្លះហើយ។ សម្រាប់ការដកយកទៅបំបែកដាំ គួរដាក់ដាំឱ្យឆ្ងាយពីគ្នា 12 – 15 សង់ទីម៉ែត្រ ហើយថែទាំបំប៉នតរហូតដល់ពេលប្រមូលផល។

– វិធីការថែទាំរក្សា

• ការស្រោចទឹក ៈ ត្រូវឧស្សាហ៍មើលថែស្រោចទឹករៀងរាល់ថ្ងៃ ព្រឹក – ល្ងាច។
• ការដាក់ជី ៈ នៅពេលកូនការ៉ុតអាយុបាន 10 – 15 ថ្ងៃ ចូរដាក់ជី 46-0-0 ក្នុងអត្រា 3 ស្លាបព្រាបាយក្នុងផ្ទៃដីមួយម៉ែត្រការ៉េ និងនៅពេលអាយុ 30 ថ្ងៃ ចូរដាក់ជីរូបមន្តស្មើ 16-16-16 ឬអាចប្រើជីសរីរាង្គក្នុងចន្លោះជួរដើមការ៉ុតចំនួន 300 ក្រាមក្នុងផ្ទៃដីមួយម៉ែត្រការ៉េ និងដាក់រៀងរាល់ 20 ម្ដង។
• ការការពារ និងកម្ចាត់សត្រូវដំណាំ ៈ ការពារសត្វល្អិតសត្រូវដំណាំដោយទឹកត្រាំស្លឹកស្ដៅ និងទឹកត្រាំជីសរីរាង្គ ដោយត្រូវបាញ់ដាក់ដំណាំរៀងរាល់ 3 – 5 ថ្ងៃម្ដងជាបន្តបន្ទាប់។

– វិធីការប្រមូលផល ៈ ប្រមាណជា 85 – 90 ថ្ងៃ​យើងអាចធ្វើការប្រមូលផលមើមការ៉ុតបានហើយ។ មុនការប្រមូលផល គួរស្រោចទឹកឱ្យដីសើមជោកជាំជាមុនសិន ដើម្បីបង្កើនភាពងាយស្រួលក្នុងការប្រមូលផល បន្ទាប់ពីនោះត្រូវយកដែចាប់បួងស្លឹកទាំងអស់ រួចហើយព្យាយាមដកថ្នមៗជារាងបញ្ឆិត បន្ទាប់មកនាំយកមើមការ៉ុតទៅលាងទឹកសម្អាត ដាក់សំដឹលឱ្យស្ងួត។

មើមការ៉ុត យើងអាចរក្សាទុកក្នុងទូទឹកកកបានយូរប្រមាណជា 1 – 2 ខែ បើសិនបានរុំដោយថង់ជ័រប្លាស្ទិកខ្ចប់ម្ហូបអាហារ៕

សម្រាប់ស្រ្តីមានផ្ទៃពោះអាចនឹងមានអាការឈឺ និងស្ពឹកម្រាមកើតដៃ ដែលធ្វើឱ្យស្រ្តីមានគភ៌កូនដំបូងជាច្រើនអាចនឹងនឹកសង្ស័យថា តើអាការដែលកើតឡើងនេះ ជាអាការធម្មតារបស់ស្រ្តីមានផ្ទៃពោះដែរឬទេ? ត្រូវប្រញាប់ទៅមន្ទីរពេទ្យឬទេ? និងតើកូនក្នុងគភ៌នឹងមានគ្រោះថ្នាក់ដែឬទេ?ជាដើម។

ដើម្បីកុំឱ្យស្រ្តីមានគភ៌ថ្មោងថ្មីទាំងឡាយត្រូវខូចសុខភាពផ្លូវចិត្ត ឡារ៉ែនមានពាក្យអធិប្បាយមកជម្រាបអនាគតអ្នកម្ដាយទាំងអស់ឱ្យបាត់ចម្ងល់ចំពោះរឿងខាងលើនោះដូចតទៅ។

មូលហេតុរបស់អាការឈឺ និងស្ពឹកតាមម្រាមដៃ ម្រាមជើង

ភាគច្រើនអាការឈឺ និងស្ពឹកម្រាមដៃរបស់ស្រ្តីមានផ្ទៃពោះមានមូលហេតុមកពីការដែលសរសៃប្រសាទដែលទៅចិញ្ចឹមបរិវេណបាតដៃត្រូវបានសង្កត់ ជាហេតុធ្វើឱ្យសាច់ភ្នាសនៅត្រង់ម្ដុំនោះមានអាការហើម រហូតធ្វើឱ្យមានអាការឈឺស្ពឹកនៅតាមម្រាមដៃឡើង ដោយមូលហេតុសំខាន់ដែលធ្វើឱ្យស្រ្តីមានផ្ទៃពោះមានអាការទាំងនេះឡើង ក៏ដោយសារតែ ក្នុងអំឡុងពេលតាំងគភ៌ កម្រិតអ័រម៉ូននៅក្នុងរាងកាយរបស់ស្រ្តីមានគភ៌នឹងប្រែប្រួល ដោយអ័រម៉ូនមួយប្រភេទដែលឈ្មោះថា ប្រូជេស្ទើរ៉ូន បានទៅជំរុញឱ្យសរសៃវាវកើតការបន្ធូរខ្លួន និងធ្វើឱ្យសន្លាក់តឆ្អឹងកើតការបន្ទន់ខ្លួនខ្លាំងឡើង ហុចផលឱ្យខាងក្នុងរាងកាយមានជាតិទឹកប្រមូលសន្សំក្នុងបរិមាណច្រើន និងដោយបរិមាណទឹកដែលច្រើនជ្រុលពេកនេះ វាបានធ្វើឱ្យចន្លោះត្រង់ផ្នែកកដៃរួមតូច និងធ្វើឱ្យសរសៃប្រសាទត្រូវបានសង្កត់។ អាការឈឺ និងស្ពឹកម្រាមដៃនេះ អាចនឹងកើតឡើងនៅលើតែម្រាមដៃណាតែម្ខាង ឬអាចនឹងកើតឡើងទាំងសងខាងដំណាលគ្នាក៏មាន ដោយស្រ្តីមានគភ៌អាចនឹងមានអាការនេះទៅរហូតដល់ថ្ងៃបញ្ចប់ការតាំងគភ៌ គឺពេលឆ្លងទន្លេរួចហ្នឹងឯង។

វិធីសម្រាលអាការនៅពេលឈឺ និងស្ពឹកតាមម្រាមដៃ ម្រាមជើង

1 . នៅពេលស្រ្តីមានគភ៌មានអាការឈឺ និងស្ពឹកកើតឡើងក្នុងខណៈដែលខ្លួនប្រើដៃក្នុងការធ្វើកិច្ចការងារផ្សេងៗនោះ ចូរស្រ្តីមានគភ៌ឈប់សម្រាកដៃពីការងារដែលកំពុងធ្វើនោះភ្លាម និងសម្រាកទុកចោលមួយស្របក់ នោះអាការនឹងល្អប្រសើរឡើងបានដោយឯកឯង។

2 . ចូរយកបាតដៃដាក់ត្រាំនៅក្នុងទឹកក្ដៅឧណ្ហៗ។ ដោយសារតែទឹកក្ដៅឧណ្ហៗនឹងជួយជំរុញឱ្យការហូរវិលរបស់ឈាមធ្វើការបានល្អឡើង ដែលនឹងធ្វើឱ្យស្រ្តីមានគភ៌មានអារម្មណ៍ធូរស្រាល និងបាត់ឈឺជាបណ្ដើរៗរហូតដល់ប្រក្រតីឡើងវិញ។ បើសិនជាធ្វើជាប់ជាប្រចាំមុនពេលគេង នឹងជួយឱ្យភាពញឹកញាប់របស់អាការនេះថយចុះបាន។

3 . ហ្វឹកហាត់ធ្វើយ៉ូហ្កាគ្រប់គ្រងសាច់ដុំ។ ការធ្វើយ៉ូហ្កាជាវិធីមួយទៀតដែលអាចជួយសាងភាពធូរស្រាលដល់សាច់ដុំ និងជួយឱ្យការហូរវិលរបស់ឈាមកាន់តែល្អឡើង និងថែមទាំងជួយឱ្យសាច់ដុំមានភាពរឹងមាំខ្លាំងឡើងទៀតផង តែត្រូវជ្រើសរើសធ្វើក្បាច់ណាដែលមិនប៉ះពាល់ដល់កូនតូចនៅក្នុងផ្ទៃខ្លាំងពេក។

អាការឈឺ និងស្ពឹកម្រាមដៃ ម្រាមជើងគឺជាអាការម្យ៉ាងរបស់អ្នកមានផ្ទៃពោះដែលនឹងអាចបាត់ទៅវិញបានដោយឯកឯង ដោយសារតែក្រោយពីពេលប្រសូត អាការហើមនឹងថយចុះ ធ្វើឱ្យចន្លោះត្រង់ផ្នែកម្រាមដៃធំស្រឡះឡើងវិញ ធ្វើឱ្យអាការឈឺ និងស្ពឹកពីការសង្កត់របស់សរសៃប្រសាទបាត់លែងមាន។ អាការឈឺ និងស្ពឹកម្រាមដៃ ម្រាមជើងនេះមិនបង្កឱ្យមានគ្រោះថ្នាក់អ្វីដល់ស្រ្តីមានគភ៌ និងកូនក្នុងផ្ទៃឡើយ តែយ៉ាងណាក៏ដោយ បើសិនជាអាការនេះកើតឡើងធ្ងន់ធ្ងរខ្លាំង ឬមានកើតអាការខុសប្រក្រតីផ្សេងទៀតរួមជាមួយផងនោះ គួរប្រញាប់ទៅជួបគ្រូពេទ្យជំនាញជាបន្ទាន់៕

មូលបត្រ Tesla បានកើនឡើង12% ដែលនេះបានជួយឱ្យ Elon Musk រកបានប្រាក់ជិត12ពាន់លានដុល្លារបន្ថែមទៀត បន្ទាប់ពីការជួញដូររយៈពេល24ម៉ោង កាលពីដំណាច់ខែសីហា។

CEO របស់ Tesla លោក Elon Musk កាលពីថ្ងៃទី31សីហា បានលោតរំលងម្ចាស់ Facebook លោក Mark Zuckerberg នៅលើតារាងចំណាត់ថ្នាក់នៃក្រុមអ្នកមានបំផុតរបស់ពិភពលោក ដោយសារមូលបត្រ Tesla កើនឡើងជាង12%។ លោក Musk បច្ចុប្បន្នមានទ្រព្យចំនួន115.4ពាន់លានដុល្លារ ខ្ពស់ជាងច្រើនបើធៀបនឹង110.8ពាន់លានដុល្លាររបស់លោក Zuckerberg ដែលជាម្ចាស់ Facebook។ ក្នុងការជួញដូរក្នុងផ្សារមូលបត្រកាលពីម្សិលមិញ លោក Musk រកបានប្រាក់ដល់ទៅ11.7ពាន់លានដុល្លារ។ នេះបើតាម Bloomberg Billionaires Index។

គិតចាប់ពីដើមឆ្នាំ2020នេះ លោក Musk រកបានរហូតដល់87.8ពាន់លានដុល្លារ ដោយសារមូលបត្រ Tesla កើនឡើងជិត500%។ បើសិនជាបានជួយឱ្យក្រុមហ៊ុនសម្រេចបានគោលដៅដែលក្រុមប្រឹក្សាភិបាលបានដាក់ចេញ នោះ Musk នឹងទទួលបានជាង50ពាន់លានដុល្លារបន្ថែមទៀត។

ទុនរបស់ Tesla ដែលបច្ចុប្បន្នមានតម្លៃ464ពាន់លានដុល្លារ រកបានចំណូលច្រើនជាង Walmart ដែលជាក្រុមហ៊ុនលក់រាយធំបំផុតនៅសហរដ្ឋអាមេរិកទៅទៀត។ កាលពីសប្ដាហ៍មុន លោក Musk ក៏មានឈ្មោះនៅក្នុងចំណោមក្រុមមនុស្សដែលមានទ្រព្យសម្បត្តិច្រើនជាងរយពាន់លានដុល្លារ ដែលក្នុងនោះរួមមាន លោក Jeff Bezon (ម្ចាស់ Amazon) លោក Bill Gates (សហស្ថាបនិករបស់ Microsoft) និង Mark Zuckerberg (ស្ថាបនិករបស់ Facebook)។

អ្នកមានជាងគេបង្អស់ក្នុងពិភពលោកនាបច្ចុប្បន្ន នៅតែជា Bezos ដោយមានទ្រព្យសម្បត្តិសរុបឡើងដល់ 202ពាន់លានដុល្លារ។ លោក Bill Gates ឈរលំដាប់ទី2 ជាមួយនឹងទ្រព្យសរុប 125ពាន់លានដុល្លារ៕

ប្រភព៖ Bloomberg

កាលពី​ព្រឹក​ថ្ងៃទី31 ខែសីហា ឆ្នាំ2020កន្លងទៅ ក្លិប​បាល់ទាត់ FC Barcelona បានប្រកាស​នូវ​តម្លៃ​ថ្មី នៃ​ការទិញ​ផ្តាច់​កុងត្រា Messi  ដោយបាន​ដំឡើង​ពី 200លាន​ដុល្លារ ដល់​ទៅ 700លាន​ដុល្លារ ដែល​ត្រូវបាន​គេ​ដឹងថា ជា​តម្លៃ​ពេញ​នៃ​កុងត្រា​របស់​កីឡាករ​វ័យ 33ឆ្នាំ​រូបនេះ ក្រោយ​ពេលដែល​កីឡាករ​រូបនេះ​បង្ហាញ​អាកប្បកិរិយា​ថា មិន​ចង់​ចរចា​ពីអ្វី​ជាមួយនឹង​ក្លិប​ចាស់​របស់គេ។

ទោះជា​បែបនេះ​ក្តី Manchester City ក្លិប​អ្នកមាន របស់​មហាសេដ្ឋី​អារ៉ាប់​ប្រាក់​វាល់​លាន​ដុល្លារ​មួយ​នេះ បានដាក់​សំណើ​ថ្មី​ទៅ Barcelona ដោយបាន​ឱ្យ​ថ្លៃ​ដល់​ទៅ 750លាន​ដុល្លារ តែមាន​លក្ខខណ្ឌ​មួយ​គឺ Messi ត្រូវមាន​កុងត្រា និង​បញ្ចប់​អាជីព​នៅ ManCity នេះ​តែម្តង។

ក្នុង​កុងត្រា​ថ្មី​នេះ ទោះ​ជាមាន​រយៈពេល 5ឆ្នាំ​ក៏ពិតមែន ក៏ប៉ុន្តែ​កីឡាករ​រូបនេះ នឹងត្រូវ​លេង​នៅ​ក្លិប New York City ជា​ក្លិប​ដែល ManCity វិនិយោគ​នៅ​លី​ក​កំពូល​របស់​អាមេរិក ក្នុង​រយៈពេល 2ឆ្នាំ​ចុងក្រោយ​នៃ​កុងត្រា​មួយ​នេះ៕

ស្រ្តីដែលស្ថិតក្នុងអំឡុងពេលតាំងគភ៌ ការជ្រើសរើសញ៉ាំអាហារដែលមានប្រយោជន៍គឺជារឿងចាំបាច់ខ្លាំងណាស់ ជាពិសេសអាហារដែលត្រូវនឹងលក្ខណៈសុខភាព និងមានសារធាតុអាហារគ្រប់ទាំង 5 ប្រភេទក្រុម សុទ្ធតែជួយក្នុងកម្មវិធីការសាងភាពចម្រើនធំធាត់របស់ទារកបានល្អទាំងអស់ រួមទាំងការទទួលទានបន្លែផ្លែឈើក៏មានភាពចាំបាច់មិនតិចជាងគ្នាប៉ុន្មានដែរ ហើយនៅថ្ងៃនេះ យើងនឹងនាំស្រ្តីមានគភ៌ទាំងឡាយឱ្យបានយល់ដឹងពីគន្លឹះគួរដឹងរបស់ការញ៉ាំផ្លែឈើមានជម្រាបជូន។

ញ៉ាំផ្លែឈើបំបាត់អាការទល់លាមក

អាការទល់លាមកនៅលើស្រ្តីមានគភ៌ នៅពេលកើតឡើងហើយ អាចរាប់ថាជារឿងមួយដែលសាងនូវភាពតានតឹងធុញថប់ដល់ស្រ្តីមានគភ៌ខ្លាំងណាស់ ព្រោះធ្វើឱ្យមិនសប្បាយខ្លួន និងអាចធ្ងន់ធ្ងរដល់ថ្នាក់កើតឫសដូងបាតក៏មាន ដូច្នេះជម្រើសដែលល្អសម្រាប់ស្រ្តីមានគភ៌ដើម្បីការពារ និងទប់ទល់បញ្ហាទល់លាមកនេះមិនពិបាកខ្លាំងក្លានោះទេ គ្រាន់តែស្រ្តីយើងជ្រើសរើសទទួលទានផ្លែឈើដែលមានចំណែកជួយក្នុងការបន្ទោបង់ដើម្បីកែបញ្ហាទល់លាមកយ៉ាងងាយៗ ដូចជា ផ្លែល្ហុងទុំ អម្ពិលទុំ ក្រូច ផ្លែប៉ោម ចេកណាំវ៉ា និងផ្លែទំពាំងបាយជូរ ជាដើម តែបើស្រ្តីមានគភ៌ណាមិនមានបញ្ហាទល់លាមកស្រាប់ហើយនោះ ក៏មិនគួរទទួលទានផ្លែអម្ពិលទុំ ទំពាំងបាយជូរ និងល្ហុងទុំច្រើនពេកទេ ព្រោះផ្លែឈើទាំងនោះនឹងទៅជំរុញប្រព័ន្ធបន្ទោបង់ឱ្យកាន់តែធ្វើការស្រួលឡើងដែលមិនល្អសម្រាប់ស្រ្តីមានគភ៌ប៉ុន្មានឡើយ។ ជម្រើសមួយទៀតសម្រាប់ស្រ្តីមានគភ៌ដែលមិនចូលចិត្តទទួលទានផ្លែឈើស្រស់ គឺអាចទទួលទានយ៉ាអួ ឬញ៉ាំទឹកផ្លែឈើស្រស់ធ្វើជាថ្នាំសម្រួលការបន្ទោបង់ក៏បានដូចគ្នា។

ញ៉ាំផ្លែឈើបានប្រយោជន៍យ៉ាងណា?

– វីតាមីន C ដែលមាននៅក្នុងផ្លែឈើច្រើនប្រភេទនោះ មានចំណែកជួយក្នុងការសាងឆ្អឹង និងធ្មេញរបស់កូន ជួយជំរុញប្រព័ន្ធការដុតបំផ្លាញអាហារ ជួសជុលសាច់ភ្នាសផ្សេងៗ ធ្វើឱ្យសម្បុរស្បែករបស់ស្រ្តីមានគភ៌តឹងភ្លឺរលោង ស្រស់ថ្លា។

– អាស៊ីតហ្វូលិក ជាវីតាមីន B ដែលអាចរលាយក្នុងទឹកបាន និងឃើញមានច្រើននៅក្នុងផ្លែឈើដែលមានរសជាតិជូរ ដូចជា ក្រូច ជាដើម ដោយអាស៊ីតហ្វូលិកនេះជាសារធាតុដែលចាំបាច់ដល់ការចម្រើនធំធាត់របស់ទារក និងជួយការពារភាពខុសប្រក្រតីរបស់ឈាម។

– វីតាមីន A មានចំណែកជួយក្នុងការមើលឃើញ បំប៉នខ្សែភ្នែកបានយ៉ាងល្អ និងថែមទាំងមានសារធាតុបេតាឃែរ៉ូធីនដែលចាំបាច់ដល់ការចម្រើនធំធាត់របស់កោសិការាងកាយ ជួយឱ្យកោសិកាស្បែក ឆ្អឹង និងកែវភ្នែកមានភាពល្អឥតខ្ចោះ រឹងមាំ ដែលគេសង្កេតឃើញមានច្រើននៅក្នុងបន្លែផ្លែឈើពណ៌លឿង ដូចជា ផ្លែឃែនតាលូប(ត្រសក់ស្រូវបារាំង) ស្វាយ ល្ហុងទុំ ល្ពៅ ជាដើម។

– កាល់ស្យូម ជួយក្នុងការសាងឆ្អឹង និងធ្មេញឱ្យរឹងមាំ កាត់បន្ថយអាការឈឺជើង ឈឺសន្លាក់ឆ្អឹងរបស់ស្រ្តីពេលតាំងគភ៌បាន។ កាលស្យូមនេះអាចទទួលបានពីផ្លែត្របែកទុំ និងក្រៅពីនេះស្រ្តីមានគភ៌នៅអាចទទួលបានសារធាតុដែក និងផូស្វ័រអំពីផ្លែឈើពណ៌លឿងទុំ ដូចជាផ្លែល្ហុងទុំជាដើមទៀតផង។

ផ្លែឈើដែលស្រ្តីមានគភ៌មិនគួរទទួលទាន

ផ្លែឈើដែលស្រ្តីមានគភ៌មិនគួរទទួលទានគឺ ផ្លែឈើកែច្នៃ(តំណាប់) និងផ្លែឈើជ្រក់ផ្សេងៗ ព្រោះអាហារផ្អាប់ជ្រក់ ឬផ្លែឈើកែច្នៃនេះច្រើនតែឆ្លងកាត់កម្មវិធីការផលិតច្រើនដំណាក់កាល និងទម្រាំនឹងមកដល់ដៃអ្នកបរិភោគគុណតម្លៃសារធាតុអាហារក្នុងផ្លែឈើទាំងអស់នោះរលាយបាត់អស់ទៅហើយ។ ក្រៅពីនេះ ស្រ្តីមានគភ៌គួរចៀសវាងផ្លែឈើដែលមានរសជាតិផ្អែមខ្លាំង ដូចជា ផ្លែទុរេន មៀន សាវម៉ាវ ទៀប ជាដើម ដោយសារតែវាមានជាតិស្ករច្រើនដែលអាចប្រថុយនឹងការកើតសភាវទឹកនោមផ្អែម និងធ្វើឱ្យទម្ងន់ខ្លួនស្រ្តីមានគភ៌ឡើងលើសកម្រិតទៀតផង។

សារៈខ្លឹមសារដែលគួរដឹងពាក់ព័ន្ធនឹងការទទួលទានផ្លែឈើសម្រាប់ស្រ្តីមានគភ៌លែងជារឿងពិបាកតទៅទៀតហើយ ដូច្នេះបន្ទាប់ពីនេះទៅ ស្រ្តីមានគភ៌អាចយកចំណេះដឹងទាំងនេះទៅប្រើបាន ធានាថា សុខភាពរាងកាយនឹងរឹងប៉ឹងល្អទាំងម្តាយ ទាំងកូនយ៉ាងពិតប្រាកដ៕

គិត​មក​ត្រឹម​ពេលនេះ រឿងរ៉ាវ​នៃ​ការដើរ​ចេញពី​ក្លិប FC Barcelona របស់​កីឡាករ​ល្បី សញ្ជាតិ​អា​ហ្ស​ង់​ទីន Lionel Messi នៅ​មិនទាន់បាន​ចប់​ដាច់ស្រេច​សព្វគ្រប់​នៅឡើយ​ទេ ក្រោយ​ភាគី​ទាំង2 គឺ​កីឡាករ និង​ក្លិប​មិនទាន់​ត្រូវរ៉ូវ​គ្នា​លើ​ការដើរ​ចេញ​នេះ​នៅឡើយ។

ក្នុងនោះដែរ La Liga បានចេញ​លិខិត​បញ្ជាក់ថា Lionel Messi មិនអាច​ចាកចេញ​ពី​ក្រុម FC Barcelona ដោយ​ប្រើ​វិធី​ទិញ​ផ្ដាច់​កុងត្រា 700លាន​អឺរ៉ូ​បានទេ។

គួរ​បញ្ជាក់ដែរថា ខ្សែប្រយុទ្ធ Lionel Messi ត្រូវបាន​គេ​ដឹងថា បាន​ជូនដំណឹង​ទៅ​ក្លិប FC Barcelona រួចហើយ​ថា រូបគេ​នឹងមិន​ទៅធ្វើ​តេស្ដ​រក​មេរោគ Covid-19 និង​មិន​ចូល​ហ្វឹកហាត់​ជាមួយ​ក្រុម នា​សប្តាហ៍​នេះឡើយ៕

កាលពី​មុននេះ ក្លិប​បារាំង Paris Saint Germain បានបង្ហាញ​ចំណាប់អារម្មណ៍​ក្នុងការ​នាំយក​កីឡាករ Messi មក​ក្លិប​របស់ខ្លួន បន្ទាប់ពី​លេចឮ​ដំណឹង​ថា កីឡាករ​សញ្ជាតិ​អា​ហ្ស​ង់​ទីន​រូបនេះ អាច​ដើរ​ចេញទៅ​ក្លិប​ណាមួយ​ក៏បាន​ដោយ​គ្មាន​តម្លៃ​ខ្លួន ពោលគឺ ឱ្យតែ​ប្រាក់ខែ​តែប៉ុណ្ណោះ។

គួរ​ដឹង​ដែរ​ថា ទោះបីជា​គ្មាន​តម្លៃ​ខ្លួន​ក៏ពិតមែន តែ PSG ក៏ត្រូវ​ត្រៀម​កញ្ចប់​ថ​រិ​កា​ចំនួន 125លាន​ដុល្លារ​ជា​រៀងរាល់ឆ្នាំ​សម្រាប់​កីឡាករ​រូបនេះ ដូច្នេះ PSG មិនមាន​លទ្ធភាព​នៅឡើយ​នៅពេលនេះ ពីព្រោះ​ខ្លួន​ក៏​កំពុងតែ​ជួប​ផលប៉ះពាល់​ពី​វិបត្តិ​កូ​វីដ-19ដែរ។

តែ តាម​ការចុះផ្សាយ​ព័ត៌មាន​មិន​ផ្លូវការ​មួយចំនួន បាន​និយាយថា ក្លិប​ដែល​ប៉ង​ចង់បាន Messi ហើយ​កំពុង​ទាក់ទង​កីឡាករ​រូបនេះ គឺ Man City ដែល​បាន​ត្រៀម​លុយ​ដល់​ទៅ​ជាង 700លាន​ដុល្លារ​ឯណោះ​សម្រាប់​កីឡាករ​រូបនេះ៕

កាលពីពេលថ្មីៗនេះ សហព័ន្ធ​កីឡាបាល់ទាត់​កម្ពុជា បានបង្ហាញ​បញ្ជី​ឈ្មោះ​កោះហៅ​ជា​លើក​ទី2 របស់​គ្រូបង្វឹក​ជប៉ុន លោក Koji ដើម្បី​ត្រៀមខ្លួន​ទៅ​ចូលរួម​ប្រកួត​ក្នុង​កម្មវិធី​ប្រកួត AFC U19 Championship ប្រចាំ​ទ្វីបអាស៊ី ដើម្បី​ជម្រុះ​យក​បេក្ខភាព 5ក្រុម ទៅ​ចូលរួម​ក្នុង​កម្មវិធី U19 World Cup 2021។

ក្នុង​បញ្ជី​ឈ្មោះ​នោះ មាន​កីឡាករ​ចំនួន 32រូប ដែល​ក្នុងនោះ មាន​មកពី​ក្លិប​ចំនួន8 រូ​ម​មាន សាលា​បាល់ទាត់​ជាតិ​បាទី 9រូប, បឹងកេត 8រូប, វិសាខា 8រូប, ណាហ្គា 2រូប, ភ្នំពេញ​ក្រោ​ន2រូប, អគ្គិសនី​កម្ពុជា 1រូប, ប៉ូលិស 1រូប និង​ស្វាយរៀង 1រូប។

គួរឱ្យ​ដឹង​ដែរ​ថា ការប្រកួត នឹងធ្វើ​ឡើង ចាប់ពី​ថ្ងៃទី14 ដល់ទី31 ខែតុលា ឆ្នាំ2020 នេះ ដោយ​កម្ពុជា បាន​ស្ថិតនៅក្នុង​ពូ​ល A ជាមួយនឹង​ម្ចាស់ផ្ទះ​អ៊ូ​ស​បេ​គី​ស្ថាន ឥណ្ឌូនេស៊ី និង​អ៊ីរ៉ង់ ក្នុងនោះ​កម្ពុជា​ត្រូវ​ជួប​ជាមួយនឹង​ម្ចាស់ផ្ទះ នា​ថ្ងៃ​បើកឆាក៕

ក្រសួង​អប់រំ យុវជន និង​កីឡា នៅ​ថ្ងៃទី1 ខែកញ្ញា នេះ​បានចេញ​សេចក្តីណែនាំ​ថ្មី​មួយ​ស្តីពី​ការបើក​ដំណើរការ​ឡើងវិញ​នូវ​គ្រឹះស្ថានសិក្សា​ឯកជន​ក្នុងដំណាក់កាល​ទី2 ខណៈដែល​សាលា​ជាច្រើន​បានរៀបចំ​អនុវត្តតាម​ការណែនាំ​ដើម្បី​ដាក់ឱ្យ​សិស្ស​បាន​ចូលរៀន​ឡើងវិញ។

ក្រសួង​អប់រំ បាន​បញ្ជាក់ថា ក្រោយពី​ការដាក់ឱ្យ​អនុវត្ត​វិស្សមកាល​តូច​មុន​កាលកំណត់ និង​ការដាក់ឱ្យ​បន្ត​វិស្សមកាល ដើម្បី​ទប់ស្កាត់​ការរីក​រាលដាល​នៃ​ជំងឺ Covid-19 គ្រឹះស្ថានសិក្សា​ឯកជន និង​សិស្សានុសិស្ស និស្សិត​មួយចំនួន​បាន​អនុវត្ត​ការបង្រៀន និង​រៀន​តាម​វិធាន​នៃ​ការសិក្សា​ពី​ចម្ងាយ​តាម​ប្រព័ន្ធ​អេឡិចត្រូនិក ក្រោម​ការជួយ​គាំទ្រ​របស់​មាតាបិតា អ្នកអាណាព្យាបាល លោកគ្រូ អ្នកគ្រូ និង​គណៈ​គ្រប់គ្រង​សាលារៀន។

ស្របពេល​ជាមួយគ្នានេះ ក្រសួង​អប់រំ បានអនុម័ត​នូវ​ឯកសារ​ចំនួន 2 គឺ​ទី1 យុទ្ធសាស្ត្រ​ស្តីពី​ការបើក​ដំណើរការ​គ្រឹះស្ថានសិក្សា​ឡើងវិញ និង​ទី2 គោលការណ៍​ប្រតិបត្តិ​ស្តង់ដា (SOP) សម្រាប់​ដំណើរការ​គ្រឹះស្ថានសិក្សា​ឡើងវិញ​ក្នុង​បរិបទ​នៃ​ជំងឺ Covid-19។ ឯកសារ​ទាំងពីរ​នេះ​ជាការ​តម្រង់ទិស​ក្នុង​ទិដ្ឋភាព​យុទ្ធសាស្ត្រ និង​បច្ចេកទេស សម្រាប់​គ្រឹះស្ថានសិក្សា​រដ្ឋ និង​ឯកជន ក្នុងការ​ត្រៀមលក្ខណៈ​ស​ម្រា​ប់​បើក​ដំណើរការ​ឡើងវិញ។

ក្រសួង​ថា ដើម្បី​ធានា​ឱ្យ​ការបើក​ដំណើរការ​ឡើងវិញ​រប​ស់​គ្រឹះស្ថាន​ឯកជន ក្នុងដំណាក់កាល​ទី2 ឱ្យមាន​ប្រសិទ្ធភាព និង​ប្រកបដោយ​សុវត្ថិភាព ក្រសួង​បានធ្វើ​ការណែនាំ​ដល់​គណៈ​គ្រប់គ្រង​គ្រឹះស្ថានសិក្សា​ឯកជន​ទាំងអស់ មាតាបិតា និង​អ្នកពាក់ព័ន្ធ​ជាច្រើន​ទៀត ឱ្យ​ត្រៀមលក្ខណៈ និង​បើក​ដំណើរការ​គ្រឹះស្ថាន​ឡើងវិញ ដោយមាន​ការយកចិត្ត​ទុកដាក់​លើ​ការរក​ម្សា​គម្លាត​សុវត្ថិភាព ការលើកកម្ពស់​សុខភាព​សិក្សា និង​ផ្នែកសំខាន់ៗជាច្រើន​ផ្សេងទៀត៕

ក្រុមហ៊ុន Honda បានឱ្យដឹងថា ក្រុមហ៊ុន​គ្រោង​នឹង​ចាប់ផ្តើម​ចេញលក់​រថយន្ត​អគ្គិសនី ជា​ផ្លូវការ​នៅ​ថ្ងៃទី30 ខែតុលា ឆ្នាំ2020 ខាងមុខនេះ។

រថយន្ត​ម៉ូ​ដែល Honda e ជា​ប្រភេទ​រថយន្ត​អគ្គិសនី​ខ្នាតតូច មាន​កៅអីអង្គុយ4 និង​មាន​បំពាក់​បច្ចេកវិទ្យា​ជំនាន់​ចុងក្រោយបង្អស់ ដូចជា បញ្ជា​ចាក់​បិទ-បើក​សោ​ទ្វារ និង​បញ្ឆេះ​ម៉ាស៊ីនរថយន្ត​តាមរយៈ​ស្មា​ត​ហ្វូ​ន ជាដើម។ វា​ក៏មាន​បំពាក់​កាមេរ៉ា​សម្រាប់​មើល​ចំហៀង ជំនួស​ឱ្យ​កញ្ចក់​មើល​ចំហៀង​ដែរ ថែមទាំង​មានមុខ​ងារ ចូល​ចត​ស្វ័យប្រវត្តិ​ទៀតផង។

Honda e អាច​បើក​បរបាន​ចម្ងាយ​អតិបរមា​ដល់​ទៅ 283គីឡូម៉ែត្រ នៅពេល​សាក​ភ្លើង​ពេញ​ម្តង។ ចម្ងាយ​នេះ បើ​ធៀប​នឹង​គូប្រជែង ដូចជា Tesla Model 3 និង Nissan Leaf ជាដើម  ឃើញថា វា​មាន​ចម្ងាយ​បើកបរ​តិចជាង។

ក្រុមហ៊ុន Honda បានដាក់​ផែន​ការលក់​រថយន្ត​នេះ​ឱ្យបាន​ចំនួន 1,000គ្រឿងក្នុង 1ឆ្នាំ នៅក្នុង​ប្រទេស​ជប៉ុន ហើយ​វា​នឹងត្រូវ​ដាក់លក់​ក្នុងតម្លៃ​ចាប់ពី 4.51លាន​យ៉េន ឬ​ប្រហែល 42,500ដុល្លារ៕

សូម​ទស្សនា​វីដេអូ ការបើកបរ​សាកល្បង ដូចខាងក្រោម៖