Category: សង្គម និងសេដ្ឋកិច្ច

អាមេរិក ដាស់តឿន ឱ្យគ្រប់គ្នាប្រយ័ត្នស្ថានីយអវកាសអន្តរជាតិរបស់ ចិន
ស្ថានីយអវកាសអន្តរជាតិដែលមានឈ្មោះថា «Tiangong» កំពុងត្រូវបានសាងសង់ ដោយមានការចូលរួមពីប្រទេសចំនួន17 ក្នុងនោះរួមមានទាំង ចិន បារាំង អាល្លឺម៉ង់ និងជប៉ុនផងដែរ។ ចិន រំពឹងថា ខ្លួននឹងអាចប្រតិបត្តិការស្ថានីយអវកាសនេះ ត្រឹមឆ្នាំ2022។ រីឯស្ថានីយអវកាសអន្តរជាតិ (ISS) របស់អាមេរិក ដែលត្រូវបានបាញ់បង្ហោះក្នុងឆ្នាំ1998 ធ្វើជាមន្ទីរពិសោធន៍វិទ្យាសាស្រ្តអវកាស ត្រូវបានរំពឹងថា នឹងបញ្ចប់ប្រតិបត្តិការក្នុងឆ្នាំ2030 ចំណែកដៃគូដែលចូលរួមក្នុងប្រតិបត្តិការនេះ រួមមានដូចជា រុស្ស៊ី ជប៉ុន អឺរ៉ុប និងកាណាដាជាដើម។
បន្ទាប់ពីទទួលបានដំណឹងខាងលើ លោក Jim Bridenstine ប្រធានអង្គការ NASA បានថ្លែងព្រមានទៅកាន់សភាអាមេរិក កាលពីថ្ងៃទី23 ខែកញ្ញា ឆ្នាំ2020 អំពីភាពឈានមុខរបស់ស្ថានីយអវកាសចិន។ លោកបានថ្លែងថា៖ «ខ្ញុំសូមប្រាប់អ្នកនូវរឿង1 ដែលខ្ញុំពិតជាមានការព្រួយបារម្ភខ្លាំងណាស់ ហើយនោះគឺជាអ្វី ដែលកំពុងខិតជិតមកដល់ហើយ គឺនៅពេលស្ថានីយអវកាសអន្តរជាតិ នោះនឹងបញ្ចប់អាយុកាលប្រើប្រាស់ ដូច្នេះដើម្បីអាចឱ្យអាមេរិក បន្តមានវត្តមាននៅលើគន្លងផែនដី យើងត្រូវតែរៀបចំស្ថានីយអវកាសថ្មី»។
លោក Jim Bridenstine បន្តថា៖ «យើងចង់ឃើញការបង្កើតដៃគូរវាងរដ្ឋ និងឯកជន ដែលអង្គការ NASA អាចចុះកិច្ចព្រមព្រៀងជាមួយក្រុមហ៊ុននានា ដូច្នេះយើងអាចរក្សាវត្តមានមនុស្សជាអចិន្រ្តៃយ៍លើគន្លងផែនដីបាន»។ ជាមួយគ្នានេះ មេអង្គការ NASA បានលើកឡើងពីចិនថា ប្រទេសនេះកំពុងសង់ស្ថានីយអវកាសអន្តរជាតិ និងមិនតែប៉ុណ្ណោះការអភិវឌ្ឍនេះ គឺមានការចូលរួមពីប្រទេសដៃគូអាមេរិកទៀតផង។ «វានឹងក្លាយជាសោកនាដកម្ម ប្រសិនបើយើងបោះបង់គន្លងផែនដីនេះចោល»៕
September 28, 2020
Samsung Galaxy S20 Fan Edition ជាស្មាតហ្វូនកម្លាំងខ្លាំង តែតម្លៃទាបជាង S20 ធម្មតា
កាលពីយប់ថ្ងៃទី24 កញ្ញាកន្លងទៅ ក្រុមហ៊ុន សាមសុង បានបង្ហាញចេញផ្លូវការនូវស្មាតហ្វូនម៉ូដែលពិសេសគឺ Galaxy S20 Fan Edition ដោយវាមានបូកបញ្ចូលលក្ខណសម្បត្តិពិសេសៗលើស Galaxy S20 ដែលចេញកាលពីដើមឆ្នាំ និងមានតម្លៃទាបជាងទៀតផង។
ការកុម្ម៉ង់ទិញ S20 FE លើទីផ្សារមួយចំនួនបានបើកទទួលកាលពីថ្ងៃទី23 ខែកញ្ញាតទៅ ហើយសម្រាប់នៅអាមេរិកមានលក់ផ្ដាច់មុខតែប្រភេទ 5G ក្នុងតម្លៃ 699ដុល្លារប៉ុណ្ណោះ ឯនៅទីផ្សារចក្រភពអង់គ្លេស មានទាំងប្រភេទ 4G និង 5G ដោយប្រភេទ 4G តម្លៃ 599ផោន ( 763ដុល្លារ) និងប្រភេទ 5G តម្លៃ 699ផោន ( 890ដុល្លារ)។
លក្ខណសម្បតិ្តត្រួសៗលើ Galaxy S20 FE គឺមានចែកចេញជាប្រភេទ 4G និងប្រភេទ 5G ដែលប្រភេទ 4G ប្រើប្រាស់ឈីប Exynos 990 និងប្រភេទ 5G ប្រើប្រាស់ឈីប Snapdragon 865។ ម៉ូដែលទាំង2 មាន RAM ប្រភេទ LPDDR5 ទំហំ 6GB ដូចគ្នា និងប្រើប្រាស់អង្គផ្ទុក UFS 3.0 ទំហំ 128GB មានរន្ធដោតមេម៉ូរីបានទំហំដល់ 1TB។
អេក្រង់របស់ S20 FE មានចោះរន្ធតូចចំកណ្ដាលសម្រាប់បំពាក់កាមេរ៉ាទំហំ 32MP ដែលមាន Aperture f/2.2 ហើយវាមានបង្កប់ទ្រនាប់ស្គែនម្រាមដៃលើអេក្រង់ ដែលមានទំហំ 6.5អ៊ីញ ជាប្រភេទ Super AMOLED អាចបង្ហាញរូបភាពក្នុងកម្រិត FHD+ មាន Refresh Rate 120Hz និងគាំទ្រនូវ HDR 10+ ហើយអេក្រង់នេះការពារដោយកញ្ចក់ Gorilla Glass 3។
កាមេរ៉ាខាងក្រោយ 3គ្រាប់ ដែលកាមេរ៉ាមេទំហំ 12MP មានបច្ចេកវិទ្យា Dual-Pixel និងមានបច្ចេកវិទ្យារក្សាលំនឹង OIS ហើយមាន Aperture f/1.8។ កាមេរ៉ាបន្ទាប់ជា Ultrawide ទំហំ 12MP ដែលមាន Aperture f/2.2 និងចុងក្រោយជាកាមេរ៉ា Telephoto ទំហំ 8MP ដែលអាច Zoom Optical 3ដង និង Zoom Digital បាន 30ដង ហើយមាន Aperture f/2.4។ វាមានថ្មទំហំ 4500mAh អាចសាកថ្មបាន 25វ៉ាត់ និងសាកថ្មឥតប្រើខ្សែបានកម្លាំង 15វ៉ាត់ និងមានមុខងារ Wireless PowerShare ទុកសាកថ្មឱ្យឧបករណ៍ដទៃបានដែរ។

ក្នុងប្រអប់មានដុំសាកកម្លាំងត្រឹម 15វ៉ាត់ប៉ុណ្ណោះ និងនៅមានចំណុចពិសេសផ្សេងទៀត ដូចជារន្ធបំពងសំឡេងស្ទេរីអូ AKG ជាមួយបច្ចេកវិទ្យាសំឡេង Dolby, សមត្ថភាពធន់នឹងទឹក និងធូលីដីកម្រិត IP68 និងប្រើប្រាស់ USB-C ជាមួយ USB 3.2 ជាដើមទៀតផង៕
September 28, 2020
Google Maps អាប់ឌែតថ្មី អាចឱ្យលោកអ្នកដឹងពីព័ត៌មាន កូវីដ-19 ដោយគ្រាន់តែចុចលើមុខងារស្រួលៗខាងក្រោមនេះ
”COVID-19 layer” នឹងក្លាយជាមុខងារថ្មី 1ទៀតនៅលើកម្មវិធី Google Maps ដែលក្រុមហ៊ុនបានធ្វើការចុះផ្សាយនៅលើប្លុករបស់ខ្លួនកាលពីពេលថ្មីៗនេះ។
ប្រភពច្បាស់ការណ៍ខាងលើ ក៏បានបញ្ជាក់បន្ថែមទៀតថា រាល់ទិន្នន័យដែលយកមកដាក់លើមុខងារថ្មីនេះ បានមកពីរបាយការណ៍ជាក់លាក់របស់ WHO, ស្ថាប័នសុខាភិបាលផ្លូវការជាច្រើន របស់ប្រទេសដែលមាននៅក្នុងតារាងនៃកម្មវិធី Google និងបានមកពីភ្នាក់ងារពិសេសនៃស្ថាប័នសុខាភិបាលគ្រប់អង្គភាព។
គោលបំណងនៃការធ្វើកំណែអាប់ដែតបន្ថែមនេះ Google ចង់ឱ្យអ្នកប្រើប្រាស់ទទួលបានព័ត៌មានជាក់លាក់នៅកន្លែងតែមួយ និងបង្ការខ្លួនកុំឱ្យឆ្លងវីរុស ពេលចង់ទៅកន្លែងណាមួយ។ រីឯរបៀបប្រើងាយៗគឺ
-បើពណ៌ប្រផេះ គឺតិចជាង 1នាក់
-បើពណ៌លឿង គឺនឹងមានចាប់ពី 1 ដល់ 10នាក់
-បើពណ៌ទឹកក្រូច គឺនឹងមានចាប់ពី 10 ទៅ 20នាក់
-បើពណ៌ទឹកក្រូចចាស់ គឺនឹងមានចាប់ពី 20 ទៅ 30នាក់
-បើពណ៌ក្រហម គឺចាប់ពី 30 ទៅ 40នាក់
ហើយបើពណ៌ក្រហមក្រម៉ៅវិញ គឺចាប់ពី 40នាក់ឡើងទៅ។
មុខងារនេះអាចអាប់ឌែតបាន ទាំងលើ iOS និង Android៕

September 28, 2020
NASA ជិតបាញ់បង្ហោះបង្គន់តម្លៃ23លានដុល្លារ ឡើងទៅកាន់អវកាស
អវកាសចរនៅលើស្ថានីយអវកាសអន្តរជាតិ (ISS) នឹងបានប្រើប្រាស់សាកល្បងបង្គន់ថ្មីនៅសប្ដាហ៍ក្រោយ មុនពេលវាត្រូវបានដាក់ឱ្យប្រើនៅក្នុងបេសកកម្មទៅកាន់ឋានព្រះចន្ទ និងពិភពព្រះអង្គារនាពេលខាងមុខ។
ប្រព័ន្ធបង្គន់ដែលមានតម្លៃ23លានដុល្លារអាមេរិក និងមានឈ្មោះថា Universal Waste Management System (UWMS) នេះ មានទំហំតូចជាង65% និងស្រាលជាង40% បើធៀបជាមួយនឹងបង្គន់ដែលកំពុងប្រើប្រាស់នៅលើស្ថានីយអវកាសអន្តរជាតិ ISS ហើយវាក៏អាចបម្រើដល់សេចក្ដីត្រូវការរបស់ក្រុមអវកាសចរដែលមានគ្នាច្រើនជាងមុនផងដែរ។ បង្គន់នេះនឹងត្រូវបាននាំយកទៅកាន់ ISS តាមរយៈយានអវកាស Northrop Grumman Cygnus នាថ្ងៃទី29កញ្ញាស្អែកនេះ ដែលវាស្ថិតក្នុងបេសកកម្មបញ្ជូនសម្ភារទៅកាន់ ISS តាមការកំណត់។
ក្រោយពីត្រូវបានបញ្ជូនទៅដល់ ISS បង្គន់នេះនឹងត្រូវបានដំឡើងនៅក្បែរបង្គន់បច្ចុប្បន្ន ហើយក្រុមអវកាសចរនឹងធ្វើការពិសោធទៅលើសមត្ថភាពរបស់វានៅក្នុងបរិស្ថានគ្មានទម្ងន់។ នេះបើតាមការឱ្យដឹងកាលពីថ្ងៃទី24កញ្ញា ពី Melissa McKinley ដែលជាអ្នកគ្រប់គ្រងគម្រោង Advanced Exploration Systems Logistics Reduction របស់ NASA។
ប្រព័ន្ធបង្គន់នេះ មានឈ្មោះថា Universal Waste Management System (UWMS)
អវកាសចរ Chris Cassidy និង Ivan Vagner បានចាប់ផ្ដើមត្រៀមខ្លួនដើម្បីទទួលយកបង្គន់ថ្មីនេះ។ ក្រុមអវកាសចរ Expedition 63 នឹងប្រើដៃយន្ត Canadarm2 របស់ ISS ដើម្បីចាប់យកយានអវកាស Cygnus។
McKinley និយាយថា៖ “បង្គន់នេះត្រូវបានរចនាឡើងសម្រាប់បេសកកម្មរុករកនានា និងយោងទៅតាមបង្គន់មុនៗ។ ប្រការសំខាន់នៅក្នុងការរចនានេះ គឺការស្វែងរកវិធីដើម្បីបង្កើនប្រសិទ្ធភាពនៃទំហំ និងកម្រិតស៊ីភ្លើងរបស់វា។ ទាំងនេះសុទ្ធតែជាកត្តាសំខាន់ក្នុងការរចនាយានអវកាស”។
ប្រព័ន្ធបង្គន់នេះ មានតម្លៃ23លានដុល្លារអាមេរិក
បង្គន់ UWMS មានកម្ពស់71សម ប្រហាក់ប្រហែលនឹងបង្គន់ខ្នាតតូចដែលប្រើប្រាស់នៅតំបន់បោះជំរំ។ បង្គន់នេះក៏មានប្រព័ន្ធដំណើរការដោយស្វ័យប្រវត្តិ ជំនួសឱ្យម៉ូដែលបង្គន់បច្ចុប្បន្នរបស់ ISS ដែលប្រើប៊ូតុងបិទបើក។ ក្រុមអវកាសចរនៅលើ ISS នឹងប្រើប្រាស់បង្គន់ថ្មីនេះជាញឹកញាប់នៅក្នុងរយៈពេល3ឆ្នាំ ដើម្បីធានាឱ្យបានប្រាកដថា គ្រប់យ៉ាងដំណើរការបានល្អទៅតាមផែនការ៕
ប្រភព៖ Space
September 28, 2020
iPhone 12 ជិតចេញលក់មែនទែនហើយ ម្ដងនេះនឹងមាន 4ប្រភេទ
ប្រភពព័ត៌មានបច្ចេកវិទ្យាធំៗចំនួន3 បានចុះផ្សាយដូចៗគ្នា ពីកាលបរិច្ឆេទប្រកាសចេញ បើកទទួលការកុម្ម៉ង់ និងពេលដាក់លក់ iPhone ជំនាន់ថ្មីជាផ្លូវការ។
ប្រភពទាំង3នោះ មានវេបសាយ MacRumors, AppleInsider និង Jon Prosser បានបញ្ជាក់ដូចៗគ្នាថា iPhone ជំនាន់ថ្មីនឹងប្រកាសចេញថ្ងៃទី13 ខែតុលា និងបើកទទួលការកុម្ម៉ង់នៅថ្ងៃទី16 ខែតុលា ហើយនឹងចេញលក់លើទីផ្សារ ចាប់ពីថ្ងៃទី23 ខែតុលា។
Apple នឹងបញ្ចេញលក់ iPhone លើទីផ្សារជា 2ដំណាក់កាល ដោយដំណាក់កាលទី1 ជាការដាក់លក់ iPhone 12 ដែលមានអេក្រង់ទំហំ 6.1អ៊ីញ ហើយទាំង 2នេះ នឹងចេញលក់មុនគេ។ ចំណែក iPhone 12 អេក្រង់ 5.4អ៊ីញ និង 6.7អ៊ីញ នឹងចេញលក់នៅពេលបន្ទាប់។
iPhone 12 នឹងមាន 4ប្រភេទ ដែលមាន iPhone 12 mini អេក្រង់ 5.4អ៊ីញ iPhone 12 និង iPhone 12 Pro អេក្រង់ទំហំ 6.1អ៊ីញ និង 1ទៀត iPhone 12 Pro Max អេក្រង់ទំហំ 6.7អ៊ីញ៕
September 28, 2020
មិនទាន់បានចេញលក់ផង តម្លៃ Google Pixel 5 ត្រូវគេដឹងមុនបាត់ទៅហើយ!
ស្មាតហ្វូនជំនាន់ទី5 របស់ Google គឺម៉ូដែល Pixel 5 ត្រូវបានប្រភពច្បាស់ការណ៍មួយទម្លាយឱ្យដឹងពីតម្លៃរបស់វា មុននឹងក្រុមហ៊ុនប្រកាសចេញលក់លើទីផ្សារទៅទៀត។ សម្រាប់ Pixel 5 មាន 5G មេម៉ូរី 128GB គឺ 699ដុល្លារ។
ប្រភេទ 5G នឹងបំពាក់មកជាមួយនឹងបន្ទះឈីប Snapdragon 765G RAM 8GB/128 មេម៉ូរីមានកាមេរ៉ាក្រោយ2 ជាមួយនឹងសេនស័រ 12.2MP +16MP Ultra wide-angle និងកាមេរ៉ាមុខ 1គ្រាប់ 8MP។ អេក្រង់ 90Hz មានមុខងារកាពារសឹកឆ្កូត Gorilla Glass 6កម្រិត IP68 និងមានបំពាក់បច្ចេកវិទ្យាសាកភ្លើងល្បឿនលឿន។
ជាមួយគ្នានោះដែរ ម៉ូដែល 1ទៀតគឺ Pixel 4a(5G) ក៏ត្រូវបានក្រុមហ៊ុនបង្ហើបឱ្យដឹងខ្លះៗហើយដែរថា នឹងមានលក្ខណសម្បតិ្តប្រហាក់ប្រហែលគ្នា តែបំពាក់បន្ទះឈីបលេខខុសគ្នា។
សម្រាប់រឿងមួយ ដែលរាងដូចជាធ្វើឱ្យមិនសូវជាពេញចិត្តនោះគឺថា តម្លៃដ៏ខ្ពស់បែបហ្នឹង(699ដុល្លារ) និងលក្ខណសម្បត្តិផ្សេងទៀតរបស់វាដែលមានត្រឹមប៉ុណ្ណឹង ហាក់ដូចជាមិនលើសស្មាតហ្វូនតម្លៃជាង 200ដុល្លារផង បើធៀបគ្នាហើយនោះ។ តែយ៉ាងណា ចំណុចខ្លាំងមួយរបស់ Pixel គឺកាមេរ៉ាដែលបានអាប់ឌែតបន្ថែម ធ្វើឱ្យសមត្ថភាពថតរូប និងវីដេអូ អាចប្រជែងជាមួយស្មាតហ្វូនដទៃដែលមានកាមេរ៉ា3 ឬ 4គ្រាប់បាន៕
September 28, 2020
ព្រលានយន្តហោះទំនើបបំផុត Changi Airport នៅសិង្ហបុរី ដាក់ឱ្យរ៉ូបូតដំណើរការ ផ្នែកសម្អាត 3ប្រភេទផ្សេងគ្នា
ថ្មីៗនេះព្រលានយន្តហោះធំជាងគេ និងទំនើបជាងគេ របស់ប្រទេសសិង្ហបុរី បានប្រកាសដាក់ឱ្យដំណើរការម៉ាស៊ីនសម្អាតស្វ័យប្រវត្តិ ដែលរចនាឡើងដោយមានរូបរាងជា រ៉ូបូត ដោយចែកជាកម្រិតសមត្ថភាពទាំង5 របស់វា និងបន្តចែកជា 3ប្រភេទទៀតគឺ ប្រភេទប្រមូល និងសម្អាតទូទៅ, ប្រភេទអាចលើកទម្ងន់បានច្រើនបំផុត 660គីឡូក្រាម និងប្រភេទផ្តល់ព័ត៌មានទូទៅ។
យោងតាមវេបសាយផ្លូវការរបស់ changiairport បានរំលេចមុខងារទំនើបៗខ្លះ ពីម៉ាស៊ីនសម្អាតស្វ័យប្រវត្តិខាងលើមានដូចជា៖ ប្រភេទទី1 អ្នកធ្វើដំណើរអាចចុចនៅលើខ្លួនរបស់រ៉ូបូត ឬស្គែន QR Code រួចហើយវានឹងលោតចូលគេហទំព័រមួយ ដែលមានរៀបរាប់ពីសំណួរដែលអ្នកចង់បាន។ ទី2 ជាប្រភេទអាចផ្ទុកសំណល់ អាចលើកអីវ៉ាន់ និងសម្អាតបាន ដោយអ្នកគ្រាន់តែឈរក្បែរវា ហើយបញ្ជាឱ្យវាលើកជាការស្រេច និងទី3 ជាប្រភេទផ្តល់ព័ត៌មានទូទៅ៕

September 28, 2020
Genting Highlands មជ្ឈមណ្ឌលកម្សាន្តនៅប្រទេស ម៉ាឡេស៊ី មានអ្វីឱ្យរំភើបខ្លះទៅ?
ពេលនិយាយពីការទៅដើរលេងកម្សាន្តនៅប្រទេស ម៉ាឡេស៊ី មណ្ឌលទេសចរណ៍ដ៏ល្បីល្បាញដែលមនុស្សជាច្រើនត្រូវតែនឹកដល់មុនគេបង្អស់នោះគឺ ហ្គេនធីង ហាយលែនដ៍ ហ្នឹងឯង តែដឹងឬទេថា តើនៅទីនោះមានកន្លែងកម្សាន្តបែបណាខ្លះ ឬមានដំណើរកម្សាន្តអ្វីដែលគួរឱ្យចាប់អារម្មណ៍ខ្លះទៅ?។ តាមឡារ៉ែនមក ថ្ងៃនេះយើងនឹងនាំទៅលុកលុយមណ្ឌលទេសចរណ៍ ហ្គេនធីង ហាយលែនដ៍ទាំងអស់គ្នា។
ហ្គេនធីង ហាយលែនដ៍(Genting Highlands)ស្ថិតនៅក្នុងរដ្ឋ ប៉ាហាំង ដែលនៅឆ្ងាយពីីទីក្រុង គូឡាឡាំពួ ប្រមាណជា 51គីឡូម៉ែត្រ ដោយស្ថិតនៅលើកំពូលភ្នំដែលមានកម្ពស់ដល់ទៅ 2,000ម៉ែត្រ ទើបធ្វើឱ្យទីនោះមានធាតុអាកាសត្រជាក់ និងមានអ័ព្ទពេញមួយឆ្នាំទល់មួយឆ្នាំ។ ផ្ទៃដីខាងលើមិនមែនមានតែភាពស្រស់ស្អាតរបស់ធម្មជាតិ និងទេសភាពដ៏ល្អអស្ចារ្យប៉ុណ្ណោះទេ តែនៅពេញទៅដោយភាពកម្សាន្តសប្បាយដ៏ច្រើនរូបបែប ទាំងកាស៊ីណូ សណ្ឋាគារប្រណីត រោងភាពយន្ត ទីលានវាយកូនហ្គោល និងសួនកម្សាន្ត 2កន្លែងគឺ Outdoor Theme Park និង First World Indoor Theme Park រួមទាំងកិច្ចការងារកម្សាន្តផ្សេងៗទៀតជាច្រើនដែលឡារ៉ែននឹងប្រមូលយកមកជម្រាបជូនមិត្តអ្នកអានដូចតទៅ ៈ
1 . ជិះកន្រ្តកខ្សែរ៉ក Awana Skyway
ដោយសារតែ ហ្គេនធីង ហាយលែនដ៍ ស្ថិតនៅលើកំពូលភ្នំដែលមានកម្ពស់លើនីវ៉ូទឹកសមុទ្រដល់ទៅ 2,000ម៉ែត្រ ដូច្នោះហើយទើបវិធីដែលងាយស្រួលបំផុតដែលយើងនឹងឡើងទៅដល់លើនោះបានគឺ ការជិះកន្រ្តកខ្សែរ៉កហ្នឹងឯង ហើយក្នុងអំឡុងការជិះឡើងនេះ ក្រៅពីនឹងបានជក់ចិត្តលង់ទៅជាមួយធាតុអាកាសនៅលើភ្នំដែលត្រជាក់ពេញមួយរយៈពេល 10នៃការជិះនោះហើយ អ្នកទេសចរនៅបានទទួលបទពិសោធន៍ដ៏គួរឱ្យរំភើបញាប់ញ័រតាមរយៈទស្សនីយភាពរបស់ព្រៃសន្សើមដែលមានអាយុច្រើនជាង 130លានឆ្នាំដែលស្ថិតនៅខាងក្រោមនោះទៀតផង។
2 . ទីសក្ការៈអាទិទេពស័ក្តិសិទ្ធិនៃ Chin Swee Caves Temple
បើអ្នកណាមានឱកាសបានមកលេងហ្គេនធីង ហាយលែនដ៍ ឡារ៉ែនសូមណែនាំថា គួរតែទៅគោរពសក្ការៈរូបចម្លាក់របស់ ព្រះអាចារ្យ ឈិន ស្វ៊ី ជាអាទិទេពដែលអ្នកស្រុកនៅមណ្ឌល ហ្វូ៊ចៀនផ្ដល់នូវការគោរពបូជាយ៉ាងខ្លាំង រួមទាំងអ្នកទេសចរណ៍ទាំងជនជាតិម៉ាឡេស៊ី និងជនជាតិបរទេសផងក៏និយមទៅធ្វើបុណ្យសក្ការៈជាប់ជានិច្ចដែរ។ វត្ត ឈិន ស្វ៊ី ស្ថិតនៅក្នុងព្រៃថ្មដែលមានកម្រិតកម្ពស់លើនីវ៉ូទឹកសមុទ្រដល់ទៅ 4,600ហ្វ៊ីត នៅខាងក្នុងវត្តប្រកបទៅដោយចេតិយ 9ជាន់បែបចិន ព្រះពុទ្ធរូបថ្មដ៏ធំ រូបចម្លាក់ម្ចាស់ម៉ែគង់ស៊ីអ៊ីម បន្ទប់មើលទេសភាព កន្លែងប្រតិបត្តិធម៌ និងភោជនីយដ្ឋានម្ហូបបួស រួមទាំងរូបចម្លាក់ផ្សេងៗដែលតម្រៀបគ្នាជាជួរនៅតាមផ្លូវដើរលើចង្កេះភ្នំ។
3 . បេះផ្លែ ស្រ្តបឺរី នៅ Strawberry Leisure Farm
កិច្ចការងារកម្សាន្តមួយក្នុងចំណោមកិច្ចការងារកម្សាន្តដែលមិនគួររំលងនៅពេលទៅលេងប្រទេសម៉ាឡេស៊ី លើភ្នំហ្គេនធីង ហាយលែនដ៍នោះគឺ ការសប្បាយជក់ចិត្តជាមួយការបេះផ្លែស្រ្តបឺរីធំៗ ពណ៌ក្រហមរលោង ផ្អែមត្រជាក់នៅក្នុង Strawberry Leisure Farm ដែលនៅខាងក្នុងកសិដ្ឋាននោះ ក្រៅពីមានផ្លែស្រ្តបឺរីឱ្យបេះ និងថតរូបទុកជាអនុស្សាវរីយ៍ហើយ ទីនេះនៅមានវត្ថុគួរឱ្យចាប់អារម្មណ៍ផ្សេងៗទៀតជាច្រើន មានទាំង សណ្ដែកបណ្ដុះឥន្រ្ទីយ និងរុក្ខជាតិក្នុងផើងពពួកដើមផ្កាអ័រគីដេដ៏ច្រើនប្រភេទ រួមទាំងហាងកាហ្វេ និងហាងលក់វត្ថុអនុស្សាវរីយ៍ដែលអនុញ្ញាតឱ្យភ្ញៀវចូលទស្សនា និងទិញយ៉ាងសប្បាយដៃ។
4 . បើកពិភពមហស្ចារ្យ នៅ CyberWorld – First World Hotel
Genting CyberWorld គឺមជ្ឈមណ្ឌលរួមនៃការកម្សាន្តដែលអាចបានជួបនៅក្នុង First World Plaza នៅលើហ្គេនធីង ហាយលែនដ៍ ដែលទីនោះនឹងបើកបម្រើសេវាកម្មពេញ 24ម៉ោងតែម្ដង ក្រៅពីនេះនៅផ្ដល់សេវាកម្មអ៊ីនធើណិតល្បឿនលឿនទៀតផង។ ភាគច្រើនអ្នកដែលមកទីនេះ ច្រើនតែមកលេងហ្គេម លេងក្ដារលើទឹករលក រួមទាំងជក់ចិត្តដិតអារម្មណ៍ជាមួយបទពិសោធដ៏សម្បូរបែបពីវត្ថុជួយបង្កើនភាពងាយស្រួលតាមរយៈពិភពឌីជីថល ក្រៅពីនោះ នៅខាងក្នុងក៏មានសួនកម្សាន្តសម្រាប់ឱ្យក្មេងៗបានសប្បាយរីករាយផងដែរ។
ក្រៅពីទាំងអស់ខាងលើនេះហើយ ហ្គេនធីង ហាយលែនដ៍ នៅពេញទៅដោយវត្ថុជួយបង្កើនភាពងាយស្រួល និងទីកន្លែងកម្សាន្តដែលគួរឱ្យសប្បាយរីករាយជាច្រើនទៀតដែលអាចសប្បាយបានគ្រប់ភេទគ្រប់វ័យតែម្ដង និងថែមទាំងស្ថិតនៅមិនឆ្ងាយពីប្រទេសរបស់យើងប៉ុន្មានឡើយ។ អ្នកណាដែលកំពុងសម្លឹងរកមើលកន្លែងដើរលេងសប្បាយទាំងគ្រួសារនៅក្រៅប្រទេសជិតៗខ្លួននោះ ទីនេះក៏ជាជម្រើសមួយដែលគួរឱ្យចាប់អារម្មណ៍ដែរ៕
September 28, 2020
រើសបានពេជ្រ1គ្រាប់ទម្ងន់ជាង9ការ៉ាត់ នៅក្នុងឧទ្យាន
Kinard មកពីទីក្រុង Maumelle នៃរដ្ឋ Arkansas សហរដ្ឋអាមេរិក បានរកឃើញត្បូងពេជ្រ1គ្រាប់ដែលមានទម្ងន់9.07ការ៉ាត់ នៅក្នុងឧទ្យានមួយនៃរដ្ឋ Arkansas ក្រោយពីគិតថា វាគ្រាន់តែជាបំណែកអំបែងកែវប៉ុណ្ណោះ។
យោងតាមសេចក្ដីប្រកាសកាលពីថ្ងៃទី23កញ្ញាកន្លងទៅរបស់ឧទ្យានពេជ្រ ដែលមានទីតាំងស្ថិតនៅក្នុងរដ្ឋ Arkansas លោក Kevin Kinard ដែលជាអ្នកគ្រប់គ្រងធនាគារមួយនៅទីក្រុង Maumelle កាលពីថ្ងៃទី7កញ្ញា បានរកឃើញត្បូងពេជ្រធំលំដាប់ទី2 ចំនួន1គ្រាប់ នៅក្នុងឧទ្យានដែលមានប្រវត្តិ48ឆ្នាំ។
លោក Kinard បានឱ្យដឹងថា គាត់និងមិត្តមួយចំនួន បានយកឧបករណ៍ស្វែងរកទៅកាន់ឧទ្យាននៃទីក្រុង Murfreesboro។ គាត់បន្ថែមថា គាត់មកកាន់ឧទ្យាននេះជាញឹកញាប់កាលពីនៅក្មេង ប៉ុន្តែ មិនដែលរកឃើញត្បូងពេជ្រ1គ្រាប់ណាឡើយ។
“អ្វីក៏ដោយ ឱ្យតែមានរូបរាងស្រដៀងនឹងត្បូង គ្រីស្ដាល់ ខ្ញុំតែងតែរើសឡើង និងដាក់ទៅក្នុងថង់។ វា (គ្រាប់ពេជ្រ) មានពន្លឺភ្លឺ រលោង និងគួរជាទីចាប់អារម្មណ៍ ដូច្នេះ ខ្ញុំក៏ដាក់វាទៅក្នុងថង់ រួចស្វែងរកបន្តទៀត។ ខ្ញុំគិតថា អ្វីដែលខ្ញុំរើសបាន គ្រាន់តែជាបំណែកនៃកញ្ចក់ប៉ុណ្ណោះ” Kinard និយាយដូច្នេះ។
ប៉ុន្មានម៉ោងក្រោយមក Kinard រួមនឹងមិត្តរបស់គាត់ បាននាំយកអ្វីដែលពួកគេរើសបាន ទៅកាន់មជ្ឈមណ្ឌលរុករកត្បូងពេជ្ររបស់ឧទ្យាន ជាកន្លែងដែលបុគ្គលិកនឹងធ្វើការត្រួតពិនិត្យ និងចុះឈ្មោះត្បូងពេជ្រដែលអ្នកទេសចរណ៍រើសបាន។
Kinard បន្តថា “ខ្ញុំស្ទើរតែគ្មានបំណងពឹងឱ្យពួកគេពិនិត្យ ព្រោះគិតថា ខ្ញុំមិនបានរកឃើញអ្វីនោះឡើយ។ ប៉ុន្តែ មិត្តរបស់ខ្ញុំបានយកអ្វីដែលនាងរើសបាន ទៅឱ្យគេជួយពិនិត្យ ហើយខ្ញុំក៏ធ្វើតាមនាង”។
Kinard និយាយថា នៅពេលបុគ្គលិកពិនិត្យប្រកាសថា គាត់រើសបានត្បូងពេជ្រ ភ្លាមនោះទឹកភ្នែករបស់គាត់ក៏ហូរមកដោយមិនដឹងខ្លួន ព្រោះតែការរំភើប និងភ្ញាក់ផ្អើល។ ជំនួយការរបស់ប្រធានឧទ្យាន Dru Edmonds បញ្ជាក់ថា Kinard បានជួបលក្ខខណ្ឌអំណោយផលដែលបានជួយឱ្យគាត់រកឃើញត្បូងពេជ្រនេះ។
គិតមកដល់ថ្ងៃទី23កញ្ញា ត្បូងពេជ្រចំនួន246គ្រាប់ ដែលមានទម្ងន់សរុបឡើងដល់59.25ការ៉ាត់ ត្រូវបានរកឃើញនៅក្នុងឧទ្យានពេជ្រនៃរដ្ឋ Arkansas។ កាលពីឆ្នាំទៅ មានគ្រូបង្រៀនម្នាក់មកពីរដ្ឋ Nebraska ក៏បានរកឃើញត្បូងពេជ្រ1គ្រាប់ដែលមានទម្ងន់2.12ការ៉ាត់ នៅពេលមកលម្ហែកាយក្នុងឧទ្យាននេះ៕
ប្រភព៖ CBS/ AP
September 26, 2020
ក្រសួងថាគ្មានការបន្ថូបន្ថយស្តង់ដាវិញ្ញាសារប្រឡងបាក់ឌុបដោយសារតែបញ្ហា Covid នោះទេ
នៅឆ្នាំ 2020នេះ ក្រសួងអប់រំ យុវជន និងកីឡា បានប្រកាសពន្យារការប្រឡងមធ្យមសិក្សាទុតិយភូមិ (បាក់ឌុប) រហូតដល់ចុងខែធ្នូ ដោយសារតែបញ្ហាវិបត្តិជំងឺ Covid-19 ដែលបានផ្តល់ផលប៉ះពាល់យ៉ាងច្រើនដល់ការអប់រំ។
បើតាមការបញ្ជាក់របស់ក្រសួងអប់រំ យុវជន និងកីឡា បានឱ្យដឹងថា នៅឆ្នាំនេះ ការប្រឡងនឹងប្រព្រឹត្តទៅនៅថ្ងៃទី 21និង22 ខែធ្នូឆ្នាំ 2020 ដោយក្នុងនោះមានបេក្ខជនដែលបានចុះឈ្មោះប្រឡងមានចំនួនសរុប 12ម៉ឺននាក់ មកពីគ្រឹះស្ថានសិក្សារដ្ឋ និងឯកជន។
ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡ បានលើកឡើងថា ក្រសួងអប់រំនៅតែរក្សាស្តង់ដាវិញ្ញាសារប្រឡងដដែល ហើយមិនបន្ថយស្តង់ដាវិញ្ញាដោយសារតែហេតុផលជំងឺ Covid-19នោះទេ។ ក្រសួងនៅតែរៀបចំឱ្យការប្រឡងដំណើរការទៅដោយភាពប្រក្រតី សណ្តាប់ធ្នាប់របៀបរៀបរយល្អ និងធានាគោលការណ៍ ច្បាប់ យុត្តិធម៌ តម្លាភាព និងលទ្ធផលទទួលយកបាន។
គួរបញ្ជាក់ថា កន្លងមកមន្ត្រីជាន់ខ្ពស់ក្រសួងអប់រំ ក៏ធ្លាប់បានលើកឡើងផងដែរថា សិស្សអាចមានពេលគ្រប់គ្រាន់ចាប់ពីពេលនេះរហូតដល់ថ្ងៃប្រឡងនៅចុងឆ្នាំ ដើម្បីត្រៀមប្រឡងមធ្យមសក្សាទុតិយភូមិ ហេតុនេះក្រសួងនៅតែរក្សាស្តង់ដាវិញ្ញាសាដដែល៕
September 25, 2020