Category: សង្គម និងសេដ្ឋកិច្ច

បើគិត​ត្រឹម​ថ្ងៃ​ទី9 ខែ​តុលា​ មាន​ស្រុក​ចំនួន19និង​ឃុំ​ចំនួន​63ស្ថិត​នៅ​ក្នុង​ខេត្ត​ជាង10 កំពុង​រង​ផល​ប៉ះពាល់ដោយ​សារ​ជំនន់​ទឹក​ភ្លៀង។ ខេត្ត​ទាំង​នោះ​រួមមានៈ ប៉ៃលិន បន្ទាយមានជ័យ កំពង់ឆ្នាំង កំពង់ស្ពឺ កណ្ដាល ភ្នំពេញ តាកែវ ស្វាយរៀង ព្រះវិហារ ពោធិ៍សាត់ និងបាត់ដំបង ជាដើម។ ក្នុង​ចំណោម​ខេត្តទាំង​10​នេះ ពោធិ៍សាត់ និងបាត់ដំបង បាន​រង​ផល​ប៉ះ​ពាល់​យ៉ាង​ដំណំ ដោយសារ​ជំនន់​ទឹក​ភ្លៀង​គិតមក​ដល់​ថ្ងៃ​ទី12 ខែ​តុលា​នេះ​នៅ​តែ​បន្ត​ធ្លាក់​យ៉ាង​គំហុគ។ នៅក្នុងនោះដែរ តារាសិល្បៈជាច្រើនដួង ក៏បានធ្វើការបួងសួង និងសរសេរ Cation នៅលើបណ្ដាញសង្គមហ្វេសប៊ុក ព្រមទាំងអំពាវនាវប្រាប់ប្រជាពលឱ្យមានការប្រុងប្រយ័ត្នផងដែរ។

កំពូលតារាចម្រៀងស្រី មាស សុខសោភា ក៏បានបួងសួងដែរថា «នាងខ្ញុំសូមបួងសួងឲ្យប្រទេសកម្ពុជារបស់យើងរួចផុតពីគ្រោះធម្មជាតិទឹកជំនន់នេះឆាប់ៗផងចុះ។ សូមពុកម៉ែបងប្អូនថែរក្សាសុខភាពនិងរក្សាសុវត្ថិភាពទាំងអស់គ្នា ជាពិសេសបងប្អូនដែលរស់នៅតាមបណ្ដាខេត្តដែរកំពុងមានទឹកជំនន់ ។ #prayers #prayforcambodia »។

តារាចម្រៀងប្រចាំផលិតកម្មរស្មីហង្សមាសលោក ណុប បាយ៉ារិទ្ធនិងកញ្ញា សុខ ស្រីនាង បានរៀបរាប់បួងសួងដូចគ្នាថា «សូមបួងសួងអោយទឹកជំនន់បានស្រកចុះអោយឆាប់រហ័ស ហើយកុំបន្តរជនលិចដល់បណ្តារខេត្តក្រុងនៃប្រទេសកម្ពុជាទៀត🙏🏻🙏🏻🙏🏻ពិសេសកុំអោយប៉ះពាល់ដល់អាយុជីវិតពុកម៉ែ បងប្អូន ក្មួយៗអោយសោះ 🙏🏻🙏🏻🙏🏻 សូមបង្កើនការប្រុងប្រយ័ត្នខ្ពស់ រកទីទួលសុវត្តិភាពដើម្បីស្នាក់នៅជាបណ្តោះអាសន្ន និងថែរក្សាសុខភាពអោយបានគ្រប់គ្នា🙏🏻🙏🏻🙏🏻
#សូមបួងសួងដល់កម្ពុជា»។

លោក ឆន សុវណ្ណរាជ បានបួងសួងដែរថា «សូមបួងសួងដល់ប្រជាជនកម្ពុជាអោយរួចផុតពីគ្រោះទឹកជំនន់នេះផងចុះ សូមអោយសុខសុវត្តិភាពទាំងអស់គ្នាណា ខ្មែរតែមួយក្រោមមេឃតែមួយ🙏🥰🙏»។

លោក នីរតនា ក៏បានបួងសួងប៉ុន្មានម៉ោងមុននេះដែរថា «ខ្ញុំសូមបួងសួងទេវតា និងវត្ថុសាកសិទ្ធិក្នុងលោក សូមអោយប្រទេសកម្ពុជាយេីងឆាប់ផុតពីគ្រោះធម្មជាតិនេះផង 🙏🙏🙏 Pray for Cambodia 🇰🇭»។

យ៉ាងណាមិញ តារាសម្ដែងនិងជាពិធីការិនី ថន លក្ខិណា ក៏បានបួងសួងដែរថា «សូមបួងសួងដល់បារមីនៃវត្ថុស័ក្ដិសិទ្ធិ សូមថែរក្សារនិងជួយអោយបងប្អូនប្រជាពលរដ្ធខ្មែរជៀសផុតពីគ្រោះទឹកជំនន់និងជម្ងឺផ្សេងៗនេះផង🙏🏻🙏🏻🙏🏻❤️❤️❤️»៕

បច្ចុប្បន្ននេះមើលទៅដូចជាទីកន្លែងប្រើប្រាស់នៅក្នុងផ្ទះនីមួយៗកាន់តែតិចទៅៗជារៀងរាល់ថ្ងៃ តែឥវ៉ាន់របស់របរប្រើប្រាស់នៅក្នុងផ្ទះវិញបែរជាមានកាន់តែច្រើនឡើងៗ ធ្វើឱ្យត្រូវរៀបចំកែច្នៃប្រើប្រាស់ទីកន្លែងក្នុងផ្ទះឱ្យបានប្រយោជន៍ច្រើនបំផុត និងសង្កត់ធ្ងន់លើការប្រើប្រាស់ទីធ្លាឱ្យតិចបំផុត។ ដូច្នេះយើងនាំគ្នាមកមើលថា តើមានអៃឌៀណាខ្លះដែលស័ក្តិសមសម្រាប់ផ្ទះរបស់មិត្តអ្នកអាន? សូមតាមដានដូចតទៅ…។

ចង្រ្កានបាយតូច តែស្អាត ខ្លឹម ៈ បន្ទប់ចង្រ្កានបាយអាចរាប់បានថាជាចំណុចមួយទៀតដែលអាចប្ដូរអារម្មណ៍ខាងក្នុងផ្ទះបាន អ្នកណាដែលកំពុងមានអារម្មណ៍ថា បន្ទប់ផ្ទះបាយរបស់ខ្លួនមានទំហំតូច បូកនឹងរបស់របរប្រើប្រាស់ទាំងចាំបាច់ និងមិនចាំបាច់ដែលកាន់តែកើនច្រើនឡើងរាល់ថ្ងៃផងនោះ អៃឌៀនេះនឹងជួយធ្វើឱ្យបន្ទប់ចង្រ្កានបាយដែលធ្លាប់តែចង្អៀតស្មុគនោះរលាយបាត់អស់បាន… គ្រាន់តែមិត្តយើងធ្វើថ្នាក់ៗសម្រាប់ដាក់របស់របរ ឬចានក្បាននៅពីលើតុខោនធើរចង្រ្កានបាយ លាបជញ្ជាំងបន្ទប់ពណ៌សដើម្បីឱ្យបន្ទប់មើលទៅរាងភ្លឺស្រឡះ ដុសខាត់ឥដ្ឋការ៉ូឱ្យស្អាតគ្មានកំណកស្នាមកខ្វក់…តែប៉ុណ្ណឹងបន្ទប់ផ្ទះបាយដែលធ្លាប់តែចង្អៀតស្មុគមើលមិនចូលភ្នែកនោះ នឹងស្អាតមានរបៀបឡើងមិនខាន មិនត្រឹមតែប៉ុណ្ណោះ បើជ្រើសរើសប្រើធ្នើរ ឬថ្នាក់ដាក់ឥវ៉ាន់ធ្វើអំពីបន្ទះក្ដារ ស៊ីគ្នានឹងតុខោនធើរ និងជញ្ជាំងបន្ទប់ពណ៌សផងនោះ វានឹងក្លាយជាបន្ទប់ចង្រ្កានបាយដែលមានស្តាយល៍ថ្មីមួយបែបតែម្ដង។

ប្រឡោះមហស្ចារ្យ ៈ បើអ្នកណាស្នាក់អាស្រ័យនៅក្នុងផ្ទះល្វែង ឬបន្ទប់អាផាតមិនទំហំតូច និងមិនមានទីកន្លែងសម្រាប់ការងារបោកគក់លាងសម្អាតនៅខាងក្រៅផ្ទះនោះ យើងណែនាំឱ្យសាកល្បងធ្វើប្រឡោះសម្រាប់ដាក់ម៉ាស៊ីនបោកខោអាវដូចតទៅ ៈ ឱ្យជាងមកធ្វើតុខោនធើរក្នុងបន្ទប់បាយជាថ្មី ទុកប្រឡោះដែលមានកម្ពស់ល្មមអាចដាក់ម៉ាស៊ីនបោកខោអាវនៅខាងក្រោមតុបាន ចង់មានទ្វារបិទ-បើក ឬគ្មានស្រេចតែចំណូលចិត្ត…តែប៉ុណ្ណឹងក៏អាចផ្លាស់ប្ដូរស្តាយល៍បន្ទប់ផ្ទះបាយមើលទៅរាងស្រឡះ និងមានរបៀបបានបាត់ទៅហើយ។

ទូខោអាវអាក្រាត ៈ បើនៅក្នុងបន្ទប់គេងរបស់យើងមានទីកន្លែងសម្រាប់ប្រើប្រាស់តិចស្រាប់ហើយនោះ គួរកែសម្រួលទ្រង់ទ្រាយទូដាក់ខោអាវជាថ្មី ព្រោះការទុកដាក់ខោអាវមិនចាំាបាច់ត្រូវតែទុកដាក់នៅក្នុងទូដែលបិទជិតជានិច្ចនោះទេ។ សាកល្បងរកមើលជញ្ជាំងទំនេរៗធ្វើជាកន្លែងទុកដាក់ខោអាវបែបស្រឡះៗ(មិនបាច់មានអ្វីមកបិទបាំង)ដែលអាចសន្សំសំចៃទីកន្លែងបានយ៉ាងល្អ។

ផ្ញើរបស់របរលើជញ្ជាំង ៈ បន្ទប់គេងអាចចាត់ទុកថាជាអាណាចក្រផ្ទាល់ខ្លួនពេលនឿយហត់មកពីកន្លែងធ្វើការ ជាទីកន្លែងដែលអាចប្រាប់ពីអ្វីដែលជាខ្លួនយើងបានច្បាស់បំផុត។ បើមានបន្ទប់គេងដែលមិនមានរបៀប ប្រហែលជាធ្វើឱ្យយើងឈឺក្បាលមិនស្ទើរឡើយ។ មនុស្សជាច្រើនដែលគិតចង់តុបតែងផ្ទះ ច្រើនចាប់ផ្ដើមពីបន្ទប់គេងរបស់ខ្លួនឯងមុន ដូច្នេះគួរតែរៀបចំទុកដាក់វត្ថុរបស់របរកំប៉ិកកំប៉ុក គ្រឿងតុបតែងឱ្យមើលទៅស្រស់ស្អាតដោយផ្ដល់ភាពសំខាន់ទៅលើទីកន្លែងទំនេរនៅម្ដុំជញ្ជាំង ពីវត្ថុដែលធ្លាប់តែចង្អៀតស្មុគ នឹងមើលទៅសប្បាយភ្នែកមិនខាន។

បង្កាន់ដៃអ៊ីណុកពហុមុខងារ ៈ អៃឌៀកំពូលងាយ មិនអស់លុយច្រើន ប្រហែលជាគេចមិនផុតពីអៃឌៀមួយនេះទេ…បើមានអ្នកណាមានកន្លែងទំនេរនៅម្ដុំមាត់បង្អួច កុំបណ្ដោយឱ្យទំនេរឥតប្រយោជន៍ ចូរចាប់ផ្ដើមពីការបំពាក់បង្កាន់ដៃ ឬស្នួរដែកអ៊ីណុកដែលអាចប្រើប្រាស់ក្នុងការព្យួរក្រណាត់ហាល ឬអាចនឹងយកផើងដែលមានដាំដើមផ្កាជ័រតូចៗ ស្រាលៗមកព្យួរលម្អ ឬទុកកដាក់វត្ថុផ្សេងៗពីលើនោះក៏បាន ស័ក្តិសមខ្លាំងណាស់សម្រាប់ផ្ទះណាដែលមានទីធ្លាកំណត់។

ទុកដាក់របស់របរនៅក្រោមគ្រឿងសង្ហារិម ៈ កន្លែងទំនេរនៅមាន ដូចជាបើចង់បានកៅអីសាឡុង ឬគ្រែគេងមកប្រើ ឡារ៉ែនចង់ណែនាំឱ្យរកទិញបែប ឬម៉ូដណាដែលផ្នែកខាងក្រោមមានជាធ្នើរសម្រាប់ដាក់វត្ថុរបស់របរបាន ដែលអាចនឹងទុកដាក់ស្រោមជើង ស្បែកជើង ឬវត្ថុផ្សេងៗបាន ចំណេញទីកន្លែង និងមិនរាយប៉ាយ កេកកាកពេញផ្ទះទៀតផង៕

ការប្រកួត​ពានរង្វាន់​បាល់ទាត់​លី​គ​កំពូល​កម្ពុជា រដូវ​កាល​ឆ្នាំ2020 សប្តាហ៍​ទី17នេះ បឹងកេត​បាន​យកឈ្នះ​ក្រសួងការពារជាតិ ក្នុង​លទ្ធផល 2ទល់នឹង0 ឯ​ព្រះខ័ន​រាជ​ស្វាយរៀង ក៏បាន​យកឈ្នះ​វិសាខា ក្នុង​លទ្ធផល 2ទល់នឹង0 ដូចគ្នា  ដែរ។

ក្រោយ​ទទួលបាន​ជ័យជម្នះ​នេះ ក្រុម​ទាំង2 នៅតែមាន​លទ្ធភាព​ក្តោប​តំណែង​ពានរង្វាន់ លី​គ​កំពូល​កម្ពុជា រដូវ​កាល​នេះ តែ​ត្រូវ​រង់ចាំ​ដល់​សប្តាហ៍​ចុងក្រោយបង្អស់ ពោលគឺ​នៅ​ថ្ងៃទី25 ខែតុលា ឆ្នាំ2020 ដែល​បឹងកេត​ត្រូវ​ប៉ះ​ភ្នំពេញ​ក្រោ​ន ចំណែកឯ​ព្រះខ័ន​រាជ ត្រូវ​ប៉ះ​ណាហ្គា​វើ​លដ៍។

គួរឱ្យ​ដឹង​ដែរ​ថា ក្រុម​ជើងឯក​ពានរង្វាន់​លី​គ​កំពូល​កម្ពុជា នឹង​ទទួលបាន​សិទ្ធិ​ចូលរួម ក្នុង​វគ្គ​ចែក​ពូ​ល​ពានរង្វាន់​ក្លិប​បាល់ទាត់​ដ៏​ធំ​បំផុត​លំដាប់​ទី2 របស់​ទ្វីបអាស៊ី AFC CUP 2021 ដោយ​ស្វ័យប្រវត្តិ៕

កិច្ចព្រមព្រៀងពាណិជ្ជកម្មសេរី រវាងប្រទេសកម្ពុជានិងប្រទេសចិន ដែលត្រូវបានចុះហត្ថលេខានាព្រឹកថ្ងៃទី​12​តុលា​នេះ នឹងត្រូវបានដាក់ឱ្យអនុវត្តជាផ្លូវការចាប់ពី​ខែមករា ឆ្នាំ2021។

អ្នកនាំពាក្យរបស់ក្រសួងពាណិជ្ជកម្មកម្ពុជា លោក ស៊ាង ថៃ បានឱ្យដឹងថា រដ្ឋាភិបាលកម្ពុជានឹងដាក់ឱ្យប្រើប្រាស់កិច្ចព្រមព្រៀងខាងលើនេះ ចាប់ពីថ្ងៃទី1មករា ឆ្នាំ2021។ យ៉ាងនេះក្ដី ការដាក់ឱ្យអនុវត្តជាផ្លូវការនឹងអាស្រ័យទៅលើពេលវេលានៃការអនុម័តរបស់សភាជាតិ និងការចុះហត្ថលេខាពីអង្គព្រះមហាក្សត្រនៃព្រះរាជាណាចក្រកម្ពុជា។

សូមបញ្ជាក់ថា កិច្ចព្រមព្រៀងពាណិជ្ជកម្មសេរី រវាងប្រទេសកម្ពុជានិងប្រទេសចិន ត្រូវបានចុះហត្ថលេខាកាលពីព្រឹកមិញនេះ (12តុលា2020) ដោយមានវត្តមានរបស់ សម្តេច ហ៊ុន សែន ប្រមុខរាជរដ្ឋាភិបាល និងលោកវ៉ាង យី (Wang Yi) រដ្ឋមន្ត្រីការបរទេសនៃសាធារណរដ្ឋប្រជាមានិតចិន។

ទាក់ទងនឹងផលប្រយោជន៍នៃកិច្ចព្រមព្រៀងពាណិជ្ជកម្មសេរីនេះ គេសង្ឃឹមថា កម្ពុជានឹងអាចនាំចេញផលិត​ផល​របស់ខ្លួនទៅកាន់ប្រទេសចិនបានកាន់តែច្រើន ដោយមិនចាំបាច់បង់ពន្ធដូចមុន៕

អ្នកដែលមានសុខភាពល្អ មិនមែនជាមនុស្សដែលមានសេចក្ដីសុខតែម្យ៉ាងនោះទេ តែបច្ចុប្បន្ននេះគួរតែរាប់ការរៀបការចូលផងដែរ ព្រោះគូអាពាហ៍ពិពាហ៍ គឺជាអ្នកដែលសាងសេចក្ដីសុខដល់រូបអ្នក និងធ្វើឱ្យអាយុរបស់អ្នកកាន់តែវែងឡើងទៀតផង។ ក្រុមអ្នកស្រាវជ្រាវផ្នែកកម្មវិធីកាំរស្មីមហារីកវិទ្យាពីមហាវិទ្យាល័យ ហាវ៉ាដ បានរកឃើញថា អ្នកដែលរៀបការ និងមានជំងឺមហារីកនឹងមានជីវិតរស់នៅបានយូរជាងអ្នកនៅលីវ និងមានជំងឺដូចគ្នា។

ក្នុងអំឡុង 4ឆ្នាំកន្លងមក មានអ្នកជំងឺច្រើនជាង 735,000នាក់បានទទួលការវិនិច្ឆ័យថា កើតជំងឺមហារីក និងជំងឺមហារីកចង្រៃដែលសម្លាប់ជីវិតមនុស្សមានដូចជា មហារីកពោះវៀនធំ មហារីកសុដន និងមហារីកថ្លើម។ តាមរយៈការសិក្សាស្រាវជ្រាវបានរកឃើញថា ការនៅលីវគឺជាបច្ច័យប្រថុយប្រថានសម្រាប់អ្នកកើតជំងឺមហារីក ពួកគេអាចនឹងគ្មានសេចក្ដីព្យាយាម និងតាំងចិត្តចូលទៅទទួលយកការព្យាបាលតាមដែលអាចធ្វើបានឡើយ។ ដោយហេតុនេះ ការគាំទ្រពីដៃគូជីវិតនឹងនឹងជួយជំរុញឱ្យអ្នកមានជីវិតកាន់យឺនយូរឡើង ដូច្នេះគោលបំពងចុងក្រោយនាំការមានជីវិតរស់នៅយូរអង្វែង គឺការមានជីវិតអាពាហ៍ពិពាហ៍ដែលល្អ និងឥតខ្ចោះ។ ក្រៅពីនេះ ការសិក្សាស្រាវជ្រាវផ្សេងៗទៀតនៅបានរកឃើញទៀតថា គូអាពាហ៍ពិពាហ៍ដែលមានសេចក្ដីសុខច្រើនតែមានសុខភាពល្អប្រសើរជាងមនុស្សទាំងឡាយទៀតផង។

ការសិក្សាស្រាវជ្រាវមួយដែលបានបោះពុម្ពផ្សាយនៅក្នុងព្រឹត្តិបត្រពាក់ព័ន្ធនឹងការរៀបការ និងគ្រួសារ បានតាមដានគូស្វាមីភរិយាចំនួន 1,681គូដើម្បីនឹងសង្កេតមើលថា តើសភាវសេចក្ដីសុខក្នុងជីវិតអាពាហ៍ពិពាហ៍មានផលដល់សុខភាពរាងកាយរបស់ពួកគេយ៉ាងណាខ្លះ?។ ការសិក្សាស្រាវជ្រាវនោះបានរកឃើញថា កិច្ចការងាររវាងគូស្វាមីភរិយា ដូចជាការដើរលេងក្នុងពេលរាត្រី ការមើលខ្សែភាពយន្តនៅពេលយប់ ឬការចេញទៅញ៉ាំអាហារនៅក្រៅផ្ទះជាមួយគ្នា សុទ្ធតែធ្វើឱ្យគូស្វាមីភរិយាទាំងនោះមានសេចក្ដីសុខ និងមានសុខភាពល្អឡើង។ អ្នកសិក្សាស្រាវជ្រាវក៏បានធ្វើការវិភាគដោយការដាក់សំនួរ 11ចំណុចសម្រាប់គូស្វាមីភរិយាចំនួន 1,681គូនោះ ដើម្បីសង្កេតមើលថា តើពួកគេមានសេចក្ដីប៉ុនណា និងមានវិធីចាត់ការជាមួយការប្រចណ្ឌហួងហែង កំហឹង និងភាពមិនស្មោះត្រង់នឹងគ្នាយ៉ាងណាខ្លះទៀតផង។

លទ្ធផលនៃការវិភាគបានបង្ហាញឱ្យដឹងថា ជីវិតអាពាហ៍ពិពាហ៍ដែលមានគុណភាព និងការមានសុខភាពល្អនោះ ជារឿងដែលគួបផ្សំទៅជាមួយគ្នា និងទោះបីជាគូស្វាមីភរិយាមានអាយុខុសឆ្ងាយពីគ្នាក៏ដោយ ក៏សម្ព័ន្ធភាពដែលអស្ចារ្យបំផុតនៅតែជាជីវិតអាពាហ៍ពិពាហ៍ដែលពោរពេញទៅដោយសេចក្ដីសុខ និងមានសុខភាពដែលរឹងប៉ឹងល្អដែរ។

គ្មានចំណុចជំទាស់អ្វីទាំងអស់សម្រាប់ការងារវិភាគទាំង 2យ៉ាងនេះ ហើយអ្វីដែលសំខាន់ ការវិភាគនេះថែមទាំងជាការចង្អុលឱ្យឃើញពីភាពសំខាន់របស់តួបុគ្គល សម្ព័ន្ធភាព និងការរៀបការផងដែរហ្នឹងឯង៕

ស្លឹកខ្ទឹម ឬឈ្មោះខាងវិទ្យាសាស្រ្តហៅថា Alli-umcepa var. aggregatum ជាដំណាំដែលមានគល់នៅក្នុងដី មានស្លឹករាងមូលទ្រវែងប្រហោងក្នុង ចុងរាវស្រួច ដុះត្រង់ឡើងលើ និងនៅពេលចាស់ទៅ គល់(មើម)នឹងមានពណ៌ក្រហម។ គេនិយមទទួលទានទាំងស្រស់(ពិសេសគល់) និងធ្វើជាគ្រឿងផ្សំក្នុងម្ហូបអាហារ។ អាចទទួលទានបានគ្រប់ផ្នែក(គល់ ដើម ស្លឹក) និងថែមទាំងមានគុណសម្បត្តិជាឱសថបុរាណជួយក្នុងការបណ្ដេញញើស និងបំប៉នបេះដូង បើញ៉ាំទាំងស្រស់(ឆៅ)យ៉ាងជាប់លាប់ អាចបញ្ចុះជាតិខ្លាញ់នៅក្នុងឈាមបាន និងថែមទាំងជាដំណាំបន្លែដែលអាចដាំបានគ្រប់សភាពដីទៀតផង។

ការដាំដុះ

– ការត្រៀមដី ៈ ចាប់ផ្ដើមពីការភ្ជួរដីចុះទៅក្រោមជម្រៅប្រមាណ 20 – 30សង់ទីម៉ែត្រ រួចហាលដីនោះទុកចោលប្រមាណជា 10 – 15ថ្ងៃ ដើម្បីកម្ចាត់សត្រូវដំណាំ(ស្មៅ និងមេរោគផ្សេងៗ) បន្ទាប់មកត្រូវសម្រួលសភាពដីដោយដាក់កំបោរសបន្តិចបន្តួច រោយស្ដើងៗឱ្យសព្វនៅលើដី មុននឹងបន្ថែមសារធាតុអាហាររុក្ខជាតិទៅក្នុងដីដោយជីកំប៉ុសសរីរាង្គប្រមាណជា 1 – 2តោន និងដាក់កម្ទេចរុក្ខជាតិ ដូចជាកម្ទេចស្លឹកឈើស្ងួតប្រមាណជា 3 – 4តោន ព្រមជាមួយគ្រាប់ស្ដៅកិនម៉ដ្ឋប្រមាណ 200 – 300គីឡូក្រាម។ ទាំង 3ប្រភេទនេះត្រូវរាស់ច្របល់ឱ្យចូលទៅក្នុងដីសព្វដំណាលគ្នាលើផ្ទៃដីប្រមាណជា 1ហិកតា។ បន្ទាប់ពីនោះមក ទើបត្រូវលើកជារងដែលមានទទឹងទំហំ 1ម៉ែត្រ និងបណ្ដោយតាមប្រវែងដី។ សម្រួលដីមុខលើរងឱ្យរាបស្មើ ស្រោចទឹកឱ្យសើមជោក និងផ្អាប់ទុកចោល 5 – 7ថ្ងៃ មុននឹងនាំកូនដើមខ្ទឹមតូចៗមកដាក់ដាំ ដោយទុកចន្លោះចម្ងាយពីគ្នាមួយគុម្ពៗប្រវែង 10 – 15សង់ទីម៉ែត្រ និងឆ្ងាយពីជួរមួយ ទៅជួរមួយ 10 – 15សង់ទីម៉ែត្រដូចគ្នា និងបន្ទាប់ពីដាក់ដាំហើយ ត្រូវស្រោចទឹកលើរងឱ្យជោក។

– វិធីដាំ ៈ ដើមស្លឹកខ្ទឹមគេនិយមដាំពង្រីកពូជ ដោយយកមើមពូជណាដែលរឹងមាំល្អមកកាត់ឫសចេញខ្លះ កាត់ចុងត្រួយរបស់មើមចេញដើម្បីឱ្យកើតការបែកខ្នែងកាន់តែឆាប់ឡើង ទុកចោលប្រមាណជា 2 – 3ថ្ងៃ នៅពេលបែកខ្នែងត្រួយចេញមកហើយ សឹមនាំយកទៅដាក់ដាំនៅលើរងជាបន្ត។

ការមើលថែទាំ

– ការស្រោចទឹក ៈ ស្រោចទឹកទាំងព្រឹក និងល្ងាចរហូតដល់ស្លឹកងើបឡើងឈរត្រង់ សឹមបន្ថយមកស្រោចទឹកតែម្ដងក្នុងមួយថ្ងៃវិញ។

– ការដាក់ជី ៈ នៅពេលដើមស្លឹកខ្ទឹមមានអាយុ 20 -25ថ្ងៃហើយ ចូរដាក់ជីកំប៉ុស ឬជីផ្អាប់សរីរាង្គប្រមាណជា 1គីឡូក្រាមក្នុងទំហំដី 1ម៉ែត្រការ៉េ ព្រមជាមួយជីទឹកសរីរាង្គដែលលាយផ្សំដោយ ជីធម្មជាតិ 10គីឡូក្រាម ជីលាមកគោស្ងួត 3គីឡូក្រាម និងស្លឹករបស់រុក្ខជាតិដំណាំត្រកូលសណ្ដែក 5គីឡូក្រាម ផ្សំច្របល់ចូលគ្នានៅក្នុងពាង ឬធុងដែលមានទឹកប្រមាណ 100 – 200លិត្រ ឬដាក់ទឹកចូលរហូតទាល់តែលិចជីប្រមាណ 10សង់ទីម៉ែត្រ។ ត្រាំផ្អាប់ទុកចោល 1យប់ រួចសឹមនាំយកទៅបាញ់លើដំណាំរៀងរាល់ 7ថ្ងៃម្ដង។

ការការពារ និងកម្ចាត់សត្រូវដំណាំ

បើសិនដើមស្លឹកខ្ទឹមកើតជំងឺ ចូរកាត់ចោល ហើយនាំយកទៅកម្ទេចចោលភ្លាម ឬក៏ការពារ និងព្យាបាល ដូចជា ជំងឺខ្លោចស្លឹក ចូរនាំយកទឹកកំបោរថ្លាមកស្រោចក្នុងអំឡុងពេលដែលកើតរោគ រួមទាំងដាំដើមជីវ៉ាន់ស៊ុយនៅតាមចន្លោះគុម្ពក៏អាចការពារសត្វដង្កូវស៊ីស្លឹកបានដែរ ឬបើចង់បាញ់ទឹកថ្នាំជីសរីរាង្គដើម្បីបង្កើនភាពរឹងមាំរបស់ដើមខ្ទឹមក៏អាចធ្វើបានដែរ ព្រោះវាថែមទាំងជួយកាត់បន្ថយការរាតត្បាតរបស់ជំងឺបានមួយផ្លូវទៀតដែរ។

ការប្រមូលផល

នៅពេលដើមស្លឹកខ្ទឹមមានអាយុបានប្រមាណ 45 – 60 ថ្ងៃ គេអាចប្រមូលផលដើម្បីយកទៅបរិភោគបានហើយ ដោយមុននឹងប្រមូលផល គេត្រូវស្រោចទឹកឱ្យជោគដីជាមុនសិន បន្ទាប់ពីនោះគេយកដៃចាប់នៅត្រង់គល់នៃដើមខ្ទឹម ហើយទាញឡើងថ្នមៗ ឱ្យមានជាប់ឫសមកជាមួយផង រួចនាំយកទៅលាងដីចេញឱ្យស្អាត ហើយសឹមយកទៅដាក់សំដិលឱ្យស្ងួតជាការស្រេច៕

នៅ​ថ្ងៃទី6 ខែតុលា ឆ្នាំ2020 នេះ ក្លិប​បាល់ទាត់ Manchester United បានប្រកាស​ការចុះ​កុងត្រា​កីឡាករ​ថ្មី​របស់ខ្លួន​ចំនួន 3រូប ដើម្បី​មកជួយ​ក្រុម​ដែល​កំពុងតែ​ស្ថិតនៅ​ក្នុងស្ថានភាព​ត្រដាបត្រដួស​ខ្លាំង នា​ប៉ុន្មាន​ប្រកួត​ដំបូង នៃ​ក្របខ័ណ្ឌ English Premier League រដូវ​កាល2020-2021 នេះ។

កីឡាករ​ករទាំង 3រូបនេះ រួមមាន៖ ខ្សែប្រយុទ្ធ​បារាំង Edinson Cavani មកពី​ក្លិប PSG ដោយ​មិនមាន​តម្លៃ​ខ្លួន ក្នុង​កុងត្រា​រយៈពេល 1ឆ្នាំ តែមាន​តម្លៃ​ខ្លួន​ដល់​ទៅ 25ម៉ឺន​ផោន ក្នុង 1សប្តាហ៍ ។ ខ្សែការពារ Alex Telles មកពី​ក្រុម Porto ក្នុងតម្លៃ​ខ្លួន 15លាន​ផោន ។ យុវជន​ខ្សែបម្រើ​ស្លាប Facundo Pellistri វ័យ 18ឆ្នាំ មកពី​ក្លិប Club Atletico Penaro ក្នុងតម្លៃ​ខ្លួន 9លាន​ផោន ដោយមាន​កុងត្រា​រយៈពេល 5ឆ្នាំ៕

អ្នកស្រាវជ្រាវ 2រូប គឺ​លោកស្រី Emmanuelle Charpentier សញ្ជាតិ​បារាំង និង​លោកស្រី Jennifer Doudna សញ្ជាតិ​អាមេរិក ត្រូវបាន​គណៈកម្មការ​ពានរង្វាន់​ណូបែល ជ្រើសរើស ជា​បេក្ខជន​ជយលាភី​ផ្នែក​ណូបែល គីមីវិទ្យា ឆ្នាំ2020។

ស្នាដៃ​របស់​អ្នកស្រាវជ្រាវ 2រូប​ខាងលើ​គឺ អភិវឌ្ឍ​ឧបករណ៍​ឈ្មោះ CRISPR-cas9 ដែលជា​បច្ចេកទេស​សាមញ្ញ​បំផុត សម្រាប់​កាត់​ហ្ស៊ែ​ន​នៅត្រង់​កន្លែង​ជាក់លាក់​មួយ ដែល​អនុញ្ញាតឱ្យ​អ្នកវិទ្យាសាស្ត្រ​ធ្វើការ​វះកាត់​ត្រង់​កន្លែង​មាន​បញ្ហា ដែលជា​មូលហេតុ​ដើម​នៃ​ជំងឺ​ជាច្រើន។

វា​ជា​ឧបករណ៍​សម្រាប់​ប្រើប្រាស់​ក្នុងការ កែ​ហ្ស៊ែ​ន​មួយ បានធ្វើ​បដិវត្តន៍វិទ្យាសាស្ត្រ ដោយ​ការ​ផ្តល់នូវ​វិធី​កែប្រែ DNA (កូដ​ជីវិត) ជា​បច្ចេកវិទ្យា​ដែល​ត្រូវបាន​ប្រើ​រួចហើយ ដើម្បី​ព្យាបាល​ជំងឺ​ជាច្រើន​និង​បង្កើន​ទិន្នផល​ដំណាំ និង​បសុសត្វ​ល្អប្រសើរ​ជាង​មុន។

លោកស្រី Jennifer Doudna និយាយថា “ក្តីសង្ឃឹម​ដ៏​ធំ​បំផុត​របស់ខ្ញុំ គឺថា វា​ត្រូវបាន​ប្រើ​សម្រាប់​រឿងល្អៗដើម្បី​លាតត្រដាង​អាថ៌កំបាំងថ្មីៗ នៅក្នុង​ជីវវិទ្យា និង​ផ្តល់​ផលប្រយោជន៍​ដល់​មនុស្សជាតិ។

ចំណែកឯ ប្រធាន​គណៈកម្មាធិការ​ណូបែល​គីមីវិទ្យា បាន​និយាយថា “មាន​ឥទ្ធិពល​ដ៏​ធំធេង​នៅក្នុង​ឧបករណ៍​ហ្ស៊ែ​ន​នេះ។ ការសាកល្បង​ព្យាបាល​ជាង100លើក កំពុង​ចាប់ផ្តើម​សិក្សា​ដោយ​ប្រើ​ឧបករណ៍ CRISPR ដើម្បី​ព្យាបាល​ជំងឺ​តំណពូជ ហើយ “ការសាកល្បង​ភាគច្រើន​គឺមាន​លទ្ធផល​គួរ​ជាទី​រំពឹងទុក​បាន”៕

ចំណែកឯ​ពានរង្វាន់ ណូបែល ផ្នែកផ្សេងៗទៀត​ដូចជា វិទ្យាសាស្ត្រ​សេដ្ឋកិច្ច រូបវិទ្យា គីមី សន្តិភាព និង​អក្សរសាស្ត្រ អាច​រកមើល​បាន​នៅលើ link ខាងក្រោម​នេះ៖ https://www.nobelprize.org/prizes/peace/2020/press-release/

នៅថ្ងៃនេះ ក្រុមហ៊ុន OnePlus បាន​បង្ហោះ​វីដេអូ​ខ្លី1 នៃ​រូបរាង​ផ្លូវការ ស្មា​ត​ហ្វូ​ន​ម៉ូ​ដែល2020 របស់ខ្លួន​គឺ OnePlus 8T 5G ដែល​រចនា​រូបរាង​បែប​ថ្មី និង​បំពាក់​កាមេរ៉ា​ក្រោយ 4គ្រាប់។

លោក Liu Zuohu ជា​នាយក​ប្រតិបត្តិ​ក្រុមហ៊ុន OnePlus បាន​បង្ហើប​ឱ្យដឹង​រួចមកហើយ ពី​ដំណឹង​នៃ​ការប្រកាស​ចេញ​ផ្លូវការ OnePlus 8T គឺ​ថ្ងៃទី14  ខែតុលា 2020 ខាងមុខនេះ តែ​ម៉ូ​ដែល OnePlus 8T Pro គ្មានទេ។

ស្មា​ត​ហ្វូ​ន​នេះ​បំពាក់​ថាមពល​ថ្ម 4300 mAh ភ្ជាប់​បច្ចេកវិទ្យា​សាក​ភ្លើង​លឿន គាំទ្រ​កម្លាំង​សាក​ដល់​ទៅ 65វ៉ា​ត់ មាន OnePlus Warp Charge, Qi wireless charging និង Reverse wireless charging។

កាមេរ៉ា​ក្រោយ​ទាំង4 មាន​បំពាក់​លេន​ស៍ និង​មាន​តួនាទីខុសៗគ្នា ដូចជា កាមេរ៉ា​ទី1 ទំហំ 48MP (PDAF) កាមេរ៉ា​ទី2 ទំហំ 16MP (Ultra-wide) កាមេរ៉ា​ទី3 ទំហំ 5MP (Macro) កាមេរ៉ា​ទី4 ទំហំ 2 MP (Depth sensor) អាច​ថត​វីដេអូ ដល់​កម្រិត 3840×2160 (4K UHD) ឯ​កាមេរ៉ា​មុខ1 ទំហំ 32MP។

វា​មាន​អេក្រង់​កោង 6.5អ៊ិ​ញ បំពាក់​បច្ចេកវិទ្យា​អេក្រង់ Corning Gorilla Glass 6 មកជា​មួយ Android 11 ប្រើ​ឈី​ប Qualcomm Snapdragon 865+ និង Octa-core, 3100 MHz មាន​ជម្រើស RAM 8GB/មេម៉ូរី 128GB តម្លៃ 759ដុល្លារ រីឯ​ជម្រើស 12GB/មេម៉ូរី 256GB តម្លៃ 829ដុល្លារ និង​បង្ហាញមុខ​នៅ​ថ្ងៃទី14 ខែតុលា 2020 ខាងមុខនេះ៕

សូម​ទស្សនា​វីដេអូ​ខ្លី​ខាងក្រោម​នេះ៖