សង្គម និងសេដ្ឋកិច្ច - La Reine Media

ក្រុមហ៊ុនមេរបស់ TikTok ត្រូវបានកំណត់តម្លៃរហូតដល់ 250ពាន់លានដុល្លារអាមេរិក

ជាមួយនឹងតម្លៃ 250ពាន់លានដុល្លារអាមេរិក ByteDance នឹងក្លាយជាក្រុមហ៊ុនធំជាងគេបណ្ដាលក្រុមហ៊ុនដែលមានអាយុចាស់ៗ ដូចជា Exxon Mobil និង Coca-Cola ទៅទៀត បើគិតទៅលើតម្លៃមូលធនទីផ្សារ។

មូលបត្ររបស់ ByteDance ដែលជាក្រុមមេរបស់បណ្ដាញសង្គមវីដេអូ TikTok កំពុងត្រូវជួញដូរជាមួយនឹងតម្លៃមូលធនរបស់ក្រុមហ៊ុនឡើងដល់ជាង 250ពាន់លានដុល្លារអាមេរិកសម្រាប់ទីផ្សារបន្ទាប់ (Secondary Market)។

យោងតាម Bloomberg ការកំណត់តម្លៃនៃក្រុមហ៊ុនចិនមួយនេះ បានឡើងថ្លៃខ្ពស់នៅក្នុងប៉ុន្មានសប្ដាហ៍ចុងក្រោយនេះ ដោយសារក្រុមអ្នកវិនិយោគសង្ឃឹមលើ TikTok ជាមួយនឹងការដែលស្ថាបនិក Zhang Yiming កំពុងធ្វើការជ្រើសរើសនានាដើម្បីធ្វើ IPO។ នៅក្នុងព្រឹត្តិការណ៍ប្រមូលទុនចុងក្រោយបង្អស់ ByteDance ត្រូវបានកំណត់តម្លៃកត្រឹម 140ពាន់លានដុល្លារអាមេរិក។

Zhang ដែលជាអ្នកបង្កើត ByteDance កាលពីឆ្នាំ 2012 បានបង្ហាញឱ្យឃើញអំពីសមត្ថភាពដ៏កំពូលរបស់ខ្លួន នៅក្នុងការបង្កើតបានផលិតផលដែលទទួលបានជោគជ័យយ៉ាងត្រចះត្រចង់ បើទោះជាត្រូវប្រកួតប្រជែងជាមួយបណ្ដាក្រុមហ៊ុនធំៗ ដូចជា Tencent និង Alibaba ជាដើម។ ជោគជ័យដំបូងរបស់ Zhang គឺ Toutiao ដែលជាកម្មវិធី (App) ព័ត៌មានដ៏ល្បីល្បាញ ប៉ុន្តែបច្ចុប្បន្នក៏ត្រូវបាន TikTok លោតកាត់មុខ។ កាលពីឆ្នាំទៅ ប្រាក់ចំណូលរបស់ ByteDance បានកើនទ្វេរដង ស្មើនឹង 35ពាន់លានដុល្លារអាមេរិក។

Zhang Yiming ស្ថាបនិករបស់ក្រុមហ៊ុន ByteDance

ByteDance ធ្លាប់ជួបបញ្ហាជាមួយនឹងរដ្ឋាភិបាលអាមេរិក ជំនាន់លោក Trump ដែលកាលណោះ លោក Trump ធ្លាប់បានប្រកាសថា នឹងបង្ខំឱ្យក្រុមហ៊ុននេះលក់ TikTok ឱ្យក្រុមហ៊ុនណាមួយរបស់អាមេរិក ដោយសារតែមានការព្រួយបារម្ភអំពីសន្តិសុខជាតិ។ ប៉ុន្តែ ថ្មីៗនេះ រដ្ឋាភិបាលរបស់លោក Biden បានឱ្យដឹងថា នឹងវាយតម្លៃស្ថានការណ៍ឡើងវិញ ដែលនេះទំនងជាបើកផ្លូវឱ្យ ByteDance រក្សាផ្នែកពាណិជ្ជកម្មរបស់ខ្លួននៅសហរដ្ឋអាមេរិក។

Kuaishou Technology ដែលជាគូប្រជែង «ទម្ងន់ស្រាល» មួយរបស់ ByteDance ទើបតែបានធ្វើ IPO នៅលើផ្សារហ៊ុនហុងកុងកាលពីខែមុន។ មូលបត្ររបស់ Kuaishou Technology បានកើនឡើងខ្ពស់ជាងមុនទ្វេដង បើធៀបនឹងតម្លៃក្នុងគ្រា IPO ដែលប្រការមួយជួយឱ្យតម្លៃមូលធនរបស់ក្រុមហ៊ុន ByteDance ឡើងដល់ 140ពាន់លានដុល្លារអាមេរិក។ ក្រុមអ្នកវិភាគយល់ឃើញថា នេះអាចជាកត្តាមួយដែលជំរុញឱ្យក្រុមអ្នកវិនិយោគវាយតម្លៃឡើងវិញអំពីសក្ដានុពលដែលកាន់តែធំឡើងៗរបស់ ByteDance។

ទោះជាយ៉ាងណាក៏ដោយ ByteDance កំពុងតែប្រឈមនឹងហានិភ័យផ្នែកច្បាប់មួយចំនួន។ ក្រៅពីហានិភ័យត្រូវបង្ខំឱ្យលក់ TikTok នៅលើទីផ្សារសហរដ្ឋអាមេរិក ByteDance ក៏កំពុងត្រូវបានរដ្ឋាភិបាលចិនតាមដានយ៉ាងម៉តចត់ផងដែរ៕

ប្រភព៖ Bloomberg
ប្រែសម្រួល៖ បុត្រា

March 30, 2021

មុខរបរថ្មី! បុរសចិនម្នាក់ កំពុងកាក់កបនឹងអាជីព “តាមរកប្ដី” និង “រៀបចំសាច់រឿង ឱ្យលែងលះពីស្រីស្នេហ៍” ដោយរកប្រាក់បានយ៉ាងសន្ធឹក!

អាជីពថ្មីមួយ កំពុងត្រូវបានគេចាប់អារម្មណ៍យ៉ាងខ្លាំង៖ បុរសចិនម្នាក់ ស៊ីឈ្នួលបង្កើតស្ថានការណ៍ឱ្យលោកប្រុសៗ នឹងស្រីស្នេហ៍ លែងលះគ្នា ដើម្បីបានវិលត្រឡប់ទៅរកប្រពន្ធនៅឯផ្ទះវិញ កំពុងរកបានចំណូលច្រើន ខ្ទង់ម៉ឺនៗដុល្លារ!

អាចនិយាយបានថា ជាអាជីពមួយទៀត ដែលកំពុងត្រូវបានគេកត់សម្គាល់យ៉ាងខ្លាំង គឺអាជីព “ផ្ដល់ការប្រឹក្សាខាងអារម្មណ៍” ដែលមានតួនាទីរិះគិត វិភាគ និងរៀបផែនការ និងធ្វើយ៉ាងម៉េចក៏បាន ឱ្យតែលោកប្រុសៗ ដែលក្បត់ចិត្តភរិយា មានសតិស្មារតីឡើងវិញ និងនឹកឃើញ ហើយវិលត្រឡប់មករកភរិយា និងកូនៗរបស់ខ្លួនវិញ។

សៀវ ស៊ឹង បុរសវ័យ 31ឆ្នាំ មានអាជីពជា “អ្នកផ្ដល់ការប្រឹក្សាខាងអារម្មណ៍” ជាង 6ឆ្នាំមកហើយ បានរៀបរាប់ប្រាប់អំពីដើមកំណើតនៃការធ្វើការងារនេះថា ពីមុន គាត់គ្រាន់តែជាអ្នកនាំភ្ញៀវទេសចរធម្មតាម្នាក់ប៉ុណ្ណោះ តែលោកតែងតែផ្ដល់ការប្រឹក្សាទៅពួកម៉ាកមិត្តភក្តិ ពាក់ព័ន្ធនឹងរឿងស្នេហា និងជីវិតស្វាមី-ភរិយា រហូតដល់ពួកគេមានសម្ព័ន្ធគ្រួសារល្អដូចមុនឡើងវិញជាច្រើនគូ។ មិត្តភក្តិនាំគ្នាហៅរូបគេថា “បរមគ្រូខាងអារម្មណ៍” និងទោះជាគ្រាន់តែឈ្មោះហៅលេងៗក៏ដោយ តែវាបានធ្វើឱ្យរូបគេមើលឃើញពីសមត្ថភាពដែលខ្លួនឯងមាន ទើបសុំឈប់ពីអាជីពអ្នកនាំភ្ញៀវ ងាកមកប្រកបអាជីពនេះយ៉ាងពេញទំហឹងតែម្ដង។

តាំងពីអតីតកាល រហូតមកដល់បច្ចុប្បន្ន សៀវស៊ឹង មានក្រុមការងារចម្បងៗ 8នាក់ នៅចាំជួយធ្វើការងារនេះ ឱ្យសម្រេចបានជោគជ័យ មានដូចជា អ្នកវិភាគស្ថានការណ៍ អ្នកចាត់ការគ្រប់គ្រងអតិថិជន ផ្នែកស៊ើបអង្កេតរកព័ត៌មាន រួមទាំងអ្នកបន្លំខ្លួន អ្នកសម្ដែង អ្នកសរសរសាច់រឿង និងអ្នកដឹកនាំសម្ដែង នៅចាំបង្កើតស្ថានការណ៍ទៀតផង។

នៅពេលមានការជួលឱ្យធ្វើការ កើតឡើង គ្រប់គ្នានឹងធ្វើការជួបប្រជុំ ដើម្បីរិះរកវិធីដែលល្អបំផុតក្នុងការកែបញ្ហា ដែលត្រូវបានគេជួលឱ្យធ្វើនោះ។ ពេលខ្លះ ត្រូវជួលតួក្លែងបន្លំ ឱ្យទៅធ្វើជានិយាយជាមួយស្រីស្នេហ៍របស់លោកប្រុស និងលួចថតរូបភាពនោះ ផ្ញើទៅឱ្យលោកប្រុស ហើយប្រាប់ថា ស្រីស្នេហ៍ក្មេងកំពុងក្បត់ចិត្ត ឬជួនកាល តាមដានជីវិតស្នេហាលួចលាក់នោះយ៉ាងដិតដល់ ដើម្បីរកមើលថា តើមានការសម្ងាត់អ្វីខ្លះ ដែលអាចប្រើជាប្រយោជន៍បាន និងរឿងរ៉ាវផ្សេងៗទៀតជាច្រើន ដែលតិចនិកទាំងអស់នេះ ហាក់ដូចជារាងស្មុគស្មាញខ្លាំង ដូច្នេះហើយទើបតម្លៃសេវា ជាមធ្យមស្ថិតក្នុងចំនួនប្រមាណជា 20,000ដុល្លារអាមេរិក ចំណែកការប្រឹក្សាតាមអនឡាញវិញ ស្ថិតក្នុងតម្លៃ 150ដុល្លារ ក្នុង 1ម៉ោង។

សៀវស៊ឹង បានលើកឧទាហរណ៍ ពីវិធីចាត់ការជាមួយពួកគេទាំងនោះថា កាលពីឆ្នាំទៅ លោកបានទទួលការជួលឱ្យធ្វើការនេះ ពីស្ត្រីម្នាក់៖ ស្វាមីរបស់នាងមានស្រីស្នេហ៍ ជានារីក្មេងម្នាក់ ទើបចង់ឱ្យលោកចាត់ការរិះរកវិធី ធ្វើឱ្យស្វាមីលែងលះដាច់ ពីស្ត្រីស្នេហ៍នោះ និងវិលត្រឡប់មករកនាងវិញឱ្យបាន។ លោកក៏បន្លំខ្លួនធ្វើជាអ្នករៀបចំផែនការកម្សាន្ត សម្រាប់ថ្ងៃឈប់សម្រាក រៀបចំដំណើរកម្សាន្តដល់គូស្នេហ៍ទាំងឡាយ ដោយភរិយារូបនោះ នឹងបន្លំខ្លួនធ្វើជាអតិថិជនមកប្រើប្រាស់សេវាកម្មនេះ ឱ្យជួយរៀបចំចាត់ចែងថ្ងៃឈប់សម្រាកលម្ហែរយៈពេល 10ថ្ងៃ ឱ្យរូបនាង និងស្វាមី។

ក្នុងអំឡុងការសម្រាកលម្ហែកាយនោះ ស្វាមីបានទទួលសំបុត្រ 1ច្បាប់ពីអ្នកមានបំណងល្អ តែមិនបង្ហាញឈ្មោះ ដាស់តឿនឱ្យគាត់ចាកចេញឱ្យឆ្ងាយពីស្រីស្នេហ៍។ ស្វាមី គិតតែពីរិះគិត នឹកពិចារណាឡើងវិញ និងក្រោយមក ក៏សម្រេចចិត្ត សុំបែកគ្នាពីស្រីស្នេហ៍ម្នាក់នោះ ដោយមិនបានដឹងថា ទាំងអស់នេះ គឺជាផែនការរបស់សៀវស៊ឹង និងភរិយារបស់ខ្លួនឡើយ។ ការរៀបចំរឿងរ៉ាវទាំងអស់ក្នុងគ្រានោះ លោកបានទទួលតម្លៃឈ្នួលដល់ទៅ 29, 850ដុល្លារអាមេរិក។

មានរឿង 1ទៀត មាននារីម្នាក់ អាយុ 24ឆ្នាំ កើតក្ដីសង្ស័យថា សង្សាររបស់ខ្លួន ដែលសេពគប់មកបាន 1ឆ្នាំហើយនោះ កំពុងក្បត់ចិត្តនាង។ អ្វីដែលនាងសង្កេតដឹងនោះគឺ សង្សារ តែងតែមានអាការព្រងើយកន្តើយជាមួយរូបនាង មិនសូវនិយាយស្ដីជាមួយនាងដូចកាលគ្រាកន្លងមក រួមទាំងតែងតែជាប់និយាយទូរស័ព្ទញឹកញាប់ និងលួចឆាតជាមួយអ្នកណាក៏មិនដឹង នៅពេលយប់។

សៀវស៊ឹង ចាប់ផ្ដើមប្រតិបត្តិការ ដោយការចូលទៅធ្វើជាស្និទ្ធស្នាលជាមួយមិត្តភក្តិរបស់សង្សារ របស់ស្ត្រីដែលជួលរូបគេឱ្យធ្វើការនោះ ដើម្បីលួចស៊ើបអំពីរឿងរ៉ាវនោះ។ នៅពេលស៊ើប និងតាមដានបានមួយរយៈ គេក៏ត្រឡប់មករាយការណ៍ប្រាប់ស្ត្រីម្ចាស់រឿងវិញថា សង្សាររបស់នាង មិនបានក្បត់ចិត្តនាងទេ គ្រាន់តែញៀនលេងហ្គេមក្នុងទូរស័ព្ទច្រើនពេកប៉ុណ្ណោះឯង ចំណែកអ្នកដែលគេឆាតជាមួយនោះ សុទ្ធតែមិត្តភក្តិ ដែលលេងហ្គេមជាមួយគ្នាទាំងអស់ និងព្រមទាំងបានដាស់តឿននាងទៀតផងថា អាចដោយសារតែបុគ្គលិកលក្ខណៈរបស់នាង ជាអ្នកម៉ឺងម៉ាត់ច្បាស់លាស់ពេក ទើបធ្វើឱ្យគូសង្សាររាងរំខានចិត្ត និងធ្វើខ្លួនព្រងើយកន្តើយចំពោះរូបនាង។

ទោះជា ការងារភាគច្រើនរបស់សៀវស៊ឹង ជាការរៀបចំឆាក បង្កើតរឿង ឱ្យលោកប្រុសៗលែងលះជាមួយស្ត្រីស្នេហ៍ក៏ពិតមែន តែវាក៏មានពេលខ្លះដែរ ដែលសមាជិករបស់សៀវស៊ឹង បានចូលទៅរកស្រីស្នេហ៍ទាំងនោះដោយត្រង់ៗដែរ និងនិយាយជាមួយពួកនាងទាំងនោះយ៉ាងត្រង់ទៅត្រង់មកថា គួរតែផ្ដាច់សម្ព័ន្ធភាពជាមួយបុរសដែលមានប្រពន្ធរួចហើយនោះទៅ ព្រោះវាខុសនឹងសីលធម៌សង្គម តែករណីនេះ វាមានឱកាសជោគជ័យតិចតួចណាស់ និងប្រើពេលវេលាយូរទៀតផង៕

ប្រភព៖ odditycentral,page.om.qq.com
ប្រែសម្រួលដោយ ទិទីតំតាតូ

March 30, 2021

មហាសេដ្ឋីលំដាប់លេខមួយប្រចាំសាធារណរដ្ឋឆេក បាត់បង់ជីវិតដោយសារធ្លាក់ឧទ្ធម្ភាគចក្រនៅបរទេស

មហាសេដ្ឋី Petr Kellner អាយុ 56ឆ្នាំ ដែលជាអ្នកមានទ្រព្យច្រើនជាងគេប្រចាំសាធារណរដ្ឋឆេក បានបាត់បង់ជិវិតនៅក្នុងករណីធ្លាក់យន្តហោះនៅក្នុងរដ្ឋ Alaska សហរដ្ឋអាមេរិក កាលពីថ្ងៃទី 27មីនា ឆ្នាំ2021។

«យើងខ្ញុំសូមប្រកាសដោយក្ដីសោកស្ដាយយ៉ាងក្រៃលែងថា នៅក្នុងគ្រោះថ្នាក់ធ្លាក់ឧទ្ធម្ភាគចក្រនៅតំបន់ភ្នំ Alaska កាលពីថ្ងៃទី 27មីនា ស្ថាបនិក និងជាម្ចាស់ភាគហ៊ុនធំជាងគេនៅក្នុងក្រុមហ៊ុនហិរញ្ញវត្ថុ PPF លោក Petr Kellner បានទទួលមរណភាព» PPF បានឱ្យដឹងនៅក្នុងប្រកាសរបស់ខ្លួននាថ្ងៃនេះ។

Kellner គឺជាអ្នកជំនួញល្បីឈ្មោះនៅសាធារណរដ្ឋឆេក ចាប់ពីទសវត្សរ៍ឆ្នាំ 1990។ យោងតាមទស្សនាវដ្ដី Forbes មហាសេដ្ឋីរូបនេះ មានទ្រព្យប្រមាណ 17.5ពាន់លានដុល្លារអាមេរិក។

នៅលើបណ្ដាញសង្គម Twitter នាយករដ្ឋមន្ត្រីនៃសាធារណរដ្ឋឆេក លោក Andrej Babis បានសរសេរថា៖ «ពិតជាមិនគួរឱ្យជឿសោះចំពោះសោកនាដកម្មនេះ។ ខ្ញុំពិតជាមានការសោកស្ដាយខ្លាំងណាស់»។

ប៉ូលិសក្នុងរដ្ឋ Alaska បានឱ្យដឹងថា មនុស្សចំនួន 5នាក់បានស្លាប់ និងម្នាក់រងរបួសធ្ងន់នៅក្នុងឧបទ្ទវហេតុធ្លាក់ឧទ្ធម្ភាគចក្រខាងលើនេះ។ អ្នកទាំងអស់សុទ្ធតែជាកីឡាករជិះស្គីលើព្រឹលដែលកំពុងចូលរួមដើរទេសចរណ៍នៅក្រៅប្រទេស។

មហាសេដ្ឋី Petr Kellner អាយុ 56ឆ្នាំ ដែលជាអ្នកមានទ្រព្យច្រើនជាងគេប្រចាំសាធារណរដ្ឋឆេក

លោក Kellner បានបង្កើត PPF តាំងពីទសវត្សរ៍ឆ្នាំ 1990 ដែលពេលនោះ PPF គឺជាក្រុមហ៊ុនវិនិយោគជាមួយដៃគូនានាដើម្បីចូលរួមអនុវត្តផែនការធ្វើឯកជនភាវូបនីយកម្មលើក្រុមហ៊ុនចំនួនរាប់រយរបស់រដ្ឋ។ ក្រោយពីបានកាន់កាប់ភាគហ៊ុននៃអតីតក្រុមហ៊ុនធានារ៉ាប់រងជាតិ Ceska Pojistovna ក្រុមហ៊ុន PPF ក៏មានឈ្នាន់បន្ថែមដើម្បីពង្រីកខ្លួន។

PPF បន្តរីកចម្រើនក្នុងវិស័យហិរញ្ញវត្ថុ ទូរគមនាគមន៍ ផលិតកម្ម សារព័ត៌មាន និងបច្ចេកវិទ្យាជីវសាស្ត្រ ដោយមានក្រុមហ៊ុនធំៗនៅអឺរ៉ុប អាស៊ី និងអាមេរិក។ ទ្រព្យរបស់ PPF បានកើនឡើងដល់ 51.8ពាន់លានដុល្លារអាមេរិក នៅក្នុងឆ្នាំ 2020។

PPF ក៏ជាម្ចាស់ភាគហ៊ុនធំរបស់ក្រុមហ៊ុនហិរញ្ញវត្ថុ Home Credit ដែលបច្ចុប្បន្នមានវត្តមាននៅប្រទេសចិន និងនៅតាមបណ្ដាប្រទេសក្នុងតំំបន់អាស៊ីអាគ្នេយ៍។

មហាសេដ្ឋី Kellner មិនសូវបង្ហាញខ្លួនជាសាធារណៈ ប៉ុន្តែត្រូវបានគេស្គាល់ថាជាអ្នកជិះស្គីដ៏ពូកែ និងមានបទពិសោធន៍ច្រើន។ PPF ធ្លាប់បានភ្ជាប់រូបថតរបស់លោកកំពុងជិះស្គី នៅក្នុងរបាយការណ៍ប្រចាំឆ្នាំរបស់ខ្លួន៕

ប្រភព៖ CNN, RT
ប្រែសម្រួល៖ បុត្រា

March 29, 2021

«ស្រេកឃ្លានប្រេង» ដោយសារជាប់គាំងកប៉ាល់តៃវ៉ាន់នៅព្រែកជីក Suez

កប៉ាល់ Ever Given ដែលជាប់គាំងនៅក្នុងព្រែកជីក Suez កំពុងរាំងខ្ទប់ប្រភពផ្គត់ផ្គង់ប្រេងទៅឱ្យប្រទេសស៊ីរី នាំឱ្យប្រទេសនេះត្រូវបែងចែកប្រេងដែលមានស្រាប់ ទៅតាមបរិមាណដែលប្រទេសនេះកំណត់។

ផលប៉ះពាល់របស់កប៉ាល់ Ever Given ដែលជាប់គាំងនៅលើព្រែក Suez ចំពោះវិស័យដឹកជញ្ជូនសកល បានបង្ហាញយ៉ាងច្បាស់កាលពីថ្ងៃទី 27មីនា នៅពេលប្រទេសស៊ីរី ដែលបាន និងកំពុងរងគ្រោះដោយសារសង្គ្រាមអស់ជាច្រើនឆ្នាំ ត្រូវបែងចែកប្រេងក្នុងស្រុកទៅតាមបរិមាណកំណត់ដើម្បីការពារប្រភពផ្គត់ផ្គង់ក្នុងប្រទេសដែលកំពុងថយចុះស្រាប់។

ក្រសួងប្រេងនិងរ៉ែនៃប្រទេសស៊ីរី បានឱ្យដឹងថា បញ្ហានៅលើព្រែកជីក Suez នៃប្រទេសអេហ្ស៊ីប បាន «រាំងស្ទះប្រភពផ្គត់ផ្គង់ប្រេង ធ្វើឱ្យកប៉ាល់ដឹកប្រេងដែលផ្គត់ផ្គង់មកឱ្យស៊ីរី ត្រូវពន្យារពេល» នេះបើតាមសារព័ត៌មានជាតិ SANA របស់ស៊ីរី។

ក្នុងគ្រាដែលមានការព្រួយបារម្ភអំពីបញ្ហាខ្វះប្រភពផ្គត់ផ្គង់ប្រេង ប្រទេសស៊ីរី ដែលស្ថិតនៅក្បែរព្រែកជីក Suez ត្រូវបង្ខំចិត្តបែងចែកប្រេងក្នុងស្រុកដែលមានស្រាប់ទៅតាមបរិមាណកំណត់ ក្នុងនោះភាគច្រើនគឺប្រេងម៉ាស៊ូត និងសារធាតុ benzene ដើម្បីឆ្លើយតបនឹងតម្រូវការក្នុងរយៈពេលវែង តាមដែលអាចធ្វើបាន»។

ចំនួនកប៉ាល់ដែលកំពុងស្ទះចរាចរណ៍នៅលើព្រែកជីកដ៏មានសារសំខាន់របស់ប្រទេសអេហ្ស៊ីប បានកើនឡើងដល់ 326គ្រឿង រួមមានទាំងកប៉ាល់ដឹកកុងតឺន័រ កប៉ាល់ដឹកទំនិញផ្សេងៗ និងកប៉ាល់ដឹកប្រេងជាដើម នេះបើតាម Agencies ដែលជាអ្នកផ្គត់ផ្គង់សេវាកម្មរបស់ Suez។

សូមរំលឹកថា កប៉ាល់ដឹកកុងតឺន័រ Ever Given ដែលគ្រប់គ្រងដោយតៃវ៉ាន់ ដែលមានជាង 200,000តោន និងដោតទង់ជាតិរបស់ប៉ាណាម៉ា បានបុកបញ្ឆិតជញ្ជាំងព្រែកជីក Suez កាលពីព្រឹកថ្ងៃទី 24មីនា នៅពេលធ្វើដំណើរពីសមុទ្រក្រហម ទៅកាន់មជ្ឈឹមបូព៌ា ដោយសារតែត្រូវព្យុះបក់បោក។

ជាលទ្ធផល Ever Given ដែលជាកប៉ាល់ធំជាងគេមួយក្នុងពិភពលោក ជាមួយនឹងប្រវែង 400ម៉ែត្រ បានជាប់គាំងទទឹងព្រែកជីកដែលត្រូវបានគេចាត់ទុកថា ជាផ្លូវទឹកសំខាន់បំផុតក្នុងពិភពលោក តភ្ជាប់រវាងសមុទ្រក្រហម និងមជ្ឈមបូព៌ា។

ស្ថាប័នគ្រប់គ្រងព្រែកជីក Suez (SCA) បានបញ្ជាក់ថា ពួកគេកំពុងស្ដារបាតដីនៅជុំវិញកប៉ាល់ និងអូស Ever Given ដោយប្រើប្រាស់កប៉ាល់សង្គ្រោះ។ ការប្រឹងប្រែង បានជួយឱ្យកប៉ាល់នេះផ្លាស់ទីបានបន្តិច ប៉ុន្តែមិនដឹងថា វានឹងត្រូវបានសង្គ្រោះទាំងស្រុងនៅពេលណាឡើយ៕

>ការជួយសង្គ្រោះកប៉ាល់ «យក្ស» Ever Given ដែលជាប់គាំងទទឹងព្រែកជីក Suez កំពុងដំណើរការ

ប្រភព៖ CNN
ប្រែសម្រួល៖ បុត្រា

March 29, 2021

LG ជិតបិទអាជីវកម្មផ្នែកស្មាតហ្វូន តែនៅឈរជើងផ្នែកផលិតគ្រឿងបន្លាស់ និងសម្ភារក្នុងផ្ទះ

LG ធ្លាប់ជាក្រុមហ៊ុនផលិតស្មាតហ្វូនធំបំផុត លំដាប់ទី3 នៅលើពិភពលោក និងថែមទាំងជាគូប្រជែង ជាមួយក្រុមហ៊ុន Apple ទៀតផង។ យ៉ាងណាមិញ អាជីវកម្មស្មាតហ្វូនរបស់ក្រុមហ៊ុនបច្ចេកវិទ្យាល្បីល្បាញ ខាងផលិតអេក្រង់ល្អបំផុតមួយនេះ ត្រូវបានគេមើលឃើញថា មានការធ្លាក់ចុះការនាំចេញ និងថែមទាំងខាតបង់ទឹកប្រាក់អស់ចំនួន 4.5ពាន់លានដុល្លារក្នុងរយៈពេល 5ឆ្នាំកន្លងមក ដែលនេះជាហានិភ័យធំមួយ ដែលតម្រូវឱ្យ LG ធ្វើការវាយតម្លៃឡើងវិញជាបន្ទាន់។

ក្រុមហ៊ុន LG ក៏ត្រូវបានគេរំពឹងទុកដែរថា នឹងផ្សព្វផ្សាយសេចក្តីសម្រេចចិត្តចុងក្រោយ អំពីអនាគតនៃអាជីវកម្មស្មាតហ្វូនរបស់ខ្លួន នៅខែក្រោយ បន្ទាប់ពីប្រជុំសម្រេចពីក្រុមប្រឹក្សាភិបាល ថាតើគួរបន្ដ ឬបិទ?។

LG ដែលជាក្រុមហ៊ុនធំជាងគេទី3 មួយនេះ កំពុងឈានដល់ដំណាក់កាលបិទអាជីវកម្មផ្នែកស្មាតហ្វូនរបស់ខ្លួនទាំងមូលតែម្ដង បន្ទាប់ពីបរាជ័យ ១លើក ជា 2លើក ក្នុងការស្វែងរកម្ចាស់ថ្មី មកជួយស្រោចស្រង់អាជីវកម្មមិនបានសោះ។ ក្រុមហ៊ុនបច្ចេកវិទ្យារបស់កូរ៉េត្បូងមួយនេះ បានពិភាក្សាជាមួយក្រុមហ៊ុន Vingroup របស់វៀតណាម និងក្រុមហ៊ុនផលិតរថយន្ត Volkswagen អំពីការទិញអាជីវកម្មស្មាតហ្វូនរបស់ខ្លួន ប៉ុន្តែគួរឱ្យស្ដាយ ការចរចា មិនបានឈានដល់កិច្ចព្រមព្រៀងអី្វមួយឡើយ។ នេះយោងទៅតាមសារព័ត៌មានក្នុងស្រុកកូរ៉េខាងត្បូង ដែលបានចេញផ្សាយកាលពីពេលថ្មីៗនេះ។

បើទោះជា LG ទំនងជានឹងបិទអាជីវកម្មស្មាតហ្វូនរបស់ខ្លួនក៏ពិតមែន តែសេចក្ដីរាយការណ៍បន្ថែម បានឱ្យដឹងទៀតថា ជំនួសឱ្យការផលិតស្មាតហ្វូននិងលក់ផ្ទាល់ ពួកគេនៅតែដំណើរការអាជីវកម្មផ្សេងៗទៀត ដែលកំពុងតែទទួលបានទំនុកចិត្តយ៉ាងពេញទំហឹងពីអតិថិជន ដូចជា ផ្នែកផលិតគ្រឿងបន្លាស់រថយន្ត និងសម្ភារប្រើប្រាស់ក្នុងផ្ទះ ជាដើម៕

March 26, 2021

Samsung រកឃើញនវានុវត្តន៍អេក្រង់ថ្មី នឹងចាប់ផ្តើមផលិត សម្រាប់ 120Hz ទុកឱ្យ iPhone 13

កាលពីពេលថ្មីៗនេះ ក្រុមហ៊ុន Samsung គ្រោងនឹងចាប់ផ្តើមផលិតបន្ទះអេក្រង់ប្រភេទ LTPO OLED។ បន្ទះបង្ហាញទិន្នន័យប្រភេទថ្មី LTPO នេះ គឺជាបច្ចេកវិទ្យាថ្មីបំផុតជំនាន់ចុងក្រោយ ដែលវាជាគម្រោងស្រាវជ្រាវមួយ ដែលរកឃើញថា ប្រើប្រាស់ថាមពល តិចជាងអេក្រង់ OLED ទូទៅ។ មានន័យថា ទូរស័ព្ទជំនាន់បន្ទាប់ នឹងអាចរក្សារយៈពេលថ្ម ឱ្យរស់បាន1 ឬ 2ថ្ងៃពេញ។

លើសពីនេះផងដែរ វាក៏ជាផ្លូវមួយ សម្រាប់បើកឱ្យ iPhone ជំនាន់ថ្មី របស់ Apple អាចទ្រទ្រង់កម្រិត refresh rate ដល់ទៅ 120Hz ដូចនឹងស្មាតហ្វូនកំពូលៗ របស់ក្រុមហ៊ុនដទៃផងដែរ និងសម្រាប់ផ្គត់ផ្គង់ដល់ Apple ដែលចាប់ផ្ដើមនៅឆមាសទី1 នៃឆ្នាំ2021 នេះតែម្ដង។

គួរបញ្ជាក់ដែរថា Samsung និង Apple បានចាប់ដៃគ្នាក្នុងអាជីវកម្មបន្ទះអេក្រង់នេះ តាំងពីជំនាន់ iPhone X ចេញឆ្នាំ2017 និងបន្តរហូតមកដល់បច្ចុប្បន្ន។ បន្ថែមលើនេះ ក៏មានឈ្មោះក្រុមហ៊ុនល្បីផ្សេងៗចូលរួមផងដែរ ដូចជា LG ជាដើម៕

March 26, 2021

មហាសេដ្ឋី Warren Buffett ទទួលបានប្រាក់ខែប៉ុន្មាននៅក្នុងក្រុមហ៊ុន Berkshire?

មហាសេដ្ឋី Warren Buffett ទទួលបានប្រាក់បៀវត្សគោល ត្រឹមតែ 100,000ដុល្លារប៉ុណ្ណោះក្នុងមួយឆ្នាំ និងមិនទាន់ត្រូវបានដំឡើងប្រាក់ខែម្ដងណានៅឡើយក្នុងអំឡុង 40ឆ្នាំកន្លងមក។

កំពូលអ្នកវិនិយោគជនជាតិអាមេរិក លោក Warren Buffett ដឹកនាំក្រុមហ៊ុនធំជាងគេបំផុតមួយនៅក្នុងពិភលោក។ មហាសេដ្ឋីរូបនេះក៏កំពុងស្ថិតក្នុងចំណោមកំពូលអ្នកមានជាងគេក្នុងពិភពលោក ដោយមានទ្រព្យ 95.2ពាន់លានដុល្លារអាមេរិក នេះបើតាម Bloomberg Billionaires Index។ ប៉ុន្តែ បើទោះជាយ៉ាងនេះក្ដី ឯកសាររបស់គណៈកម្មការមូលបត្រអាមេរិក (SEC) បានង្ហាញថា លោកទទួលបានប្រាក់បៀវត្សត្រឹមតែ 100,000ដុល្លារប៉ុណ្ណោះនៅក្នុងមួយឆ្នាំ និងមិនធ្លាប់ទទួលបានការដំឡើងប្រាក់ខែសោះក្នុងអំឡុង 40ឆ្នាំកន្លងមកនេះ។

Buffett គឺជាប្រធាន និងជា CEO របស់ Berkshire Hathaway។ ដូច្នេះ លោកអាចស្នើក្រុមប្រឹក្សាភិបាលឱ្យដំឡើងប្រាក់បៀវត្សរបស់ខ្លួន តាមដែលលោកចង់បាន ទន្ទឹមនឹងនេះ លោកក៏អាចសម្រេចលើការដំឡើងប្រាក់ខែរបស់ក្រុមមេដឹកនាំផ្សេងទៀតរបស់លោក នៅក្នុងក្រុមហ៊ុននេះ។ ចាប់ពីឆ្នាំ 1980 រហូតដល់បច្ចុប្បន្ន មហាសេដ្ឋីវ័យ 90ឆ្នាំរូបនេះ ទទួលបានប្រាក់បៀវត្សតែ 100,000ដុល្លារអាមេរិកក្នុងមួយឆ្នាំ ស្មើនឹងមួយចំណែកតូច បើធៀបនឹងប្រាក់ចំណូលជាមធ្យម 15លានដុល្លាររបស់ CEO នៃបណ្ដាក្រុមហ៊ុនដែលស្ថិតក្នុងសន្ទស្សន៍ S&P 500 ក្នុងឆ្នាំ 2019។

លោក Warren Buffett ក៏រកប្រាក់មិនបានច្រើនប៉ុន្មានដែរពីប្រភពចំណូលផ្សេង។ ប្រាក់ចំណូលសរុបខ្ពស់បំផុតដែលលោកធ្លាប់ទទួលបានពីក្រុមហ៊ុន Berkshire គឺ 525,000ដុល្លារកាលពីឆ្នាំ 2010 ក្នុងនោះរួមមានទាំងប្រាក់បៀវត្សគោល 100,000ដុល្លារ, ប្រាក់សម្រាប់តំណែងជាសមាជិកក្រុមប្រឹក្សាភិបាល 75,000ដុល្លារ និងប្រាក់សម្រាប់សន្តិសុខចំនួន 350,000ដុល្លារ។

តាមការជាក់ស្ដែង លោក Warren Buffett ក៏មិនត្រូវការប្រាក់បៀវត្សច្រើននោះឡើយ។ លោកមានភាគហ៊ុនក្នុងក្រុមហ៊ុន Berkshire ដែលមានតម្លៃជិត 100ពាន់លានដុល្លារ។ ប្រាក់ទាំងនេះក៏ត្រូវបានលោកយកទៅធ្វើកិច្ចការមនុស្សធម៌ជាបន្តបន្ទាប់។ ការរស់នៅរបស់លោក Warren Buffett ត្រូវបានគេដឹងថា មានភាពសាមញ្ញ ក្នុងនោះ លោកស្នាក់នៅក្នុងផ្ទះធម្មតា ប្រើប្រាស់រថយន្តតម្លៃមធ្យម និងទទួលទានអាហារពេលព្រឹកនៅ McDonald’s។ លោកក៏មិនប្រើប្រាស់រថយន្តរបស់ក្រុមហ៊ុន ឬយន្តហោះផ្ទាល់ខ្លួនដែលក្រុមហ៊ុនបានផ្គត់ផ្គង់នោះដែរ។

ចំណែក Charlie Munger ដែលជាដៃស្ដាំរបស់លោក Warren Buffett និងជាអនុប្រធានរបស់ក្រុមហ៊ុន Berkshire ក៏ទទួលបានប្រាក់បៀវត្ស 100,000ដុល្លារក្នុងមួយឆ្នាំ។ លោក Charlie Munger ទទួលបានខ្ទង់ប្រាក់បៀវត្សគោលនេះ អស់រយៈពេលជាច្រើនទសវត្សរ៍មកហើយ។

ផ្ទុយពីប្រធាន និងអនុប្រធាននៃក្រុមហ៊ុន Berkshire មេដឹកនាំក្រុមហ៊ុនបុត្រាសម្ព័ន្ធរបស់ Berkshire ពីររូបគឺ Greg Abel និង Ajit Jain ទទួលបានប្រាក់បៀវត្សច្រើនជាងមេដឹកនាំកំពូលរបស់ខ្លួនទៅទៀត។ លោក Greg Abel ដែលជាប្រធាន និង CEO ផ្នែកថាមពលរបស់ Berkshire និងលោក Ajit Jain អនុប្រធានផ្នែកប្រតិបត្តិធនារ៉ាប់រងរបស់ Berkshire ទទួលបានប្រាក់បៀវត្សម្នាក់ៗ 16លានដុល្លារក្នុងមួយឆ្នាំៗ បូកជាមួយនឹងប្រាក់រង្វាន់ចំនួន 7លានដុល្លារទៀតផង។ ប្រធានផ្នែកហិរញ្ញវត្ថុរបស់ Berkshire លោក Marc Hamburg ក៏ត្រូវបានដំឡើងប្រាក់បៀវត្សពី 300,000ដុល្លារ/ឆ្នាំ កាលពីឆ្នាំ 1996 ដល់ 3.3លានដុល្លារកាលពីឆ្នាំ2020៕

ប្រភព៖ Business Insider
ប្រែសម្រួល៖ បុត្រា

March 26, 2021

(វីដេអូ)-ន័រវែសសាងសង់ផ្លូវរូងក្រោមដីសម្រាប់កប៉ាល់ដំបូងគេបង្អស់ក្នុងពិភពលោក

ផ្លូវទឹករូងក្រោមដីឈ្មោះ Stad ដែលគ្រោងនឹងត្រូវចំណាយប្រាក់ប្រមាណ 350លានដុល្លារអាមេរិកសម្រាប់ការសាងសង់របស់ប្រទេសន័រវែស នឹងជួយឱ្យកប៉ាល់ធំៗទទួលបានសុវត្ថិភាពនៅពេលឆ្លងកាត់តំបន់សមុទ្រដែលគ្រោះថ្នាក់បំផុតប្រចាំប្រទេសនេះ។

ការសាងសង់ផ្លូវទឹករូងក្រោមដីនេះនឹងត្រូវបានចាប់ផ្ដើមនាពេលដ៏ខ្លីខាងមុខ បន្ទាប់ពីរដ្ឋាភិបាលន័រវែស បានអនុម័តលើថវិកាជាទុនសម្រាប់គម្រោងបច្ចេកទេសដ៏មហិមានេះ។

គម្រោងដែលមានឈ្មោះថា Stad Ship Tunnel (ផ្លូវរូងក្រោមដីសម្រាប់នាវា ស្តាដ) នេះ ទទួលបានទុនវិនិយោគប្រមាណ 350លានដុល្លារអាមេរិក។ Stad Ship Tunnel អនុញ្ញាតឱ្យកប៉ាល់ទម្ងន់ដល់ 16,000តោន ផ្លាស់ទីឆ្លងកាត់ដោយសុវត្ថិភាព ត្រង់សមុទ្រ Stadhavet ដែលល្បីឈ្មោះថា សម្បូរដោយព្យុះកំណាច។

ផ្លូវរូងនេះមានកម្ពស់ 33ម៉ែត្រ និងទទឹង 36ម៉ែត្រ។ Stad Ship Tunnel មានប្រវែង 1.7គីឡូម៉ែត្រ លាតសន្ធឹងឆ្លងកាត់ទីតាំងដែលមានទីតាំងស្រស់ស្អាតបំផុតរបស់ឧបទ្វីប Stad ចាប់ពីតំបន់ Bergen ដល់តំបន់ Alesund។ នេះបើតាមអង្គភាពគ្រប់គ្រងឆ្នេរសមុទ្ររបស់ន័រវែង។

ស្ថាប័នគ្រប់គ្រងឆ្នេរសមុទ្ររបស់ន័រវែស ទទួលបានលិខិតប្រគល់ភារកិច្ចពីក្រសួងគមនាគមន៍ ដែលអនុញ្ញាតឱ្យចាប់ផ្ដើមត្រៀមសម្រាប់ការសាងសង់ផ្លូវរូងនេះ។

បើសិនគ្រប់យ៉ាងដំណើរការដោយរលូនទៅតាមផែនការ ផ្លូវរូងក្រោមដីសម្រាប់នាវានេះនឹងត្រូវស្ថាបនារួចរាល់នៅក្នុងឆ្នាំ 2025 ឬ 2026៕

ប្រភព៖ Next Media
ប្រែសម្រួល៖ បុត្រា

March 26, 2021

របៀបលាយតែទឹកដោះគោ ក្លាយជាមុខរបរថ្មីនៅក្នុងវចនានុក្រម៖ ទំហំទីផ្សារតម្លៃរាប់សែនលានដុល្លារអាមេរិក

ជាមួយនឹងទីផ្សារតែទឹកដោះគោដែលមានទំហំរាប់សែនលានដុល្លារអាមេរិក របៀបលាយតែទឹកដោះគោបានក្លាយជាមុខរបរថ្មីមួយនៅក្នុងវចនានុក្រមដែលនិយាយអំពីប្រភេទការងារក្នុងសង្គម។

មុខរបរលាយតែទឹកដោះគោ រួមនឹងមុខរបរចំនួន 17 ផ្សេងទៀត ដែលមានដូចជា ភ្នាក់ងារលក់រថយន្តមួយទឹក, អ្នកជំនាញខាងលេងហ្គេម និង live streamer (ពិធីករដឹកនាំការផ្សាយផ្ទាល់លើអ៊ីនធើណិត) ជាដើម គឺជាមុខរបរថ្មីដែលទើបត្រូវបានបញ្ចូលឈ្មោះទៅក្នុង «វចនានុក្រមបែងចែកប្រភេទមុខរបរចិន» នេះបើតាមលទ្ធផលស្រាវជ្រាវដែលត្រូវបានប្រកាសកាលពីថ្ងៃទី 23មីនា ដោយក្រសួងធនធានមនុស្សនិងសន្តិសុខសង្គមចិន (MOHRSS) រួមនឹងនាយកដ្ឋានគ្រប់គ្រងទីផ្សារ និងនាយកដ្ឋានស្ថិតិជាតិ។

ទូរទស្សន៍ជាតិចិន (CCTV) ដកស្រង់សំដីរបស់អ្នកជំនាញខាងលាយតែទឹកដោះគោម្នាក់ ឈ្មោះ Huang Peng ឱ្យដឹងថា៖ «បច្ចេកទេសលាយតែទឹកដោះគោ មានការលំបាកនៅត្រង់ថា អ្នកលាយត្រូវលៃលកបរិមាណរបស់គ្រឿងផ្សំផ្សេងៗគ្នា ដើម្បីឆ្លើយតបនឹងចំណូលចិត្តរបស់អតិថិជន»។

អតិថិជនកំពុងរីករាយជាមួយភេសជ្ជតែទឹកដោះគោដែលពួកគេបានទិញកាលពីឆ្នាំ2017 នៅប្រទេសចិន

អ្នកជំនាញខាងលាយតែទឹកដោះគោគឺជាអ្នកបង្កើតភេសជ្ជជាតែទឹកដោះគោដោយការលាយបញ្ចូលគ្នារវាងតែ ផ្លែឈើ និងផលិតផលដែលធ្វើពីទឹកដោះគោ ទៅតាមបរិមាណកំណត់ជាក់លាក់ណាមួយ។ មុខរបរថ្មីនេះ មិនត្រឹមតែបង្កើតឱ្យមានភាពងាយស្រួលក្នុងការជ្រើសរើសបុគ្គលិកពីសំណាក់ក្រុមហ៊ុនប៉ុណ្ណោះទេ តែក៏ជួយជំរុញកំណើតសេដ្ឋកិច្ចដែលទាក់ទងនឹងវិស័យតែ ទឹកដោះគោ និងផ្លែឈើ ឱ្យរីកចម្រើនឆាប់រហ័សផងដែរ។ នេះបើតាម MOHRSS។

បច្ចុប្បន្ន ប្រទេសចិនមានមនុស្សជាង 340លាននាក់ ជាអតិថិជនរបស់តែទឹកដោះគោ។ តាមការរំពឹងទុក ទំហំទីផ្សារការងារក្នុងវិស័យតែទឹកដោះគោនៅប្រទេសចិន នឹងកើនឡើងលើស 110ពាន់លានយុន (16.86ពាន់លានដុល្លារអាមេរិក) នៅក្នុងឆ្នាំ 2021៕

ប្រភព៖ Global Times
ប្រែសម្រួល៖ បុត្រា

March 26, 2021

ការជួយសង្គ្រោះកប៉ាល់ «យក្ស» Ever Given ដែលជាប់គាំងទទឹងព្រែកជីក Suez កំពុងដំណើរការ

ករណីកប៉ាល់ដឹកទំនិញជាង 200,000តោន ឈ្មោះ Ever Given ដែលកំពុងជាប់គាំង និងរាំងស្ទះនៅលើព្រែកជីក Suez កំពុងទទួលបានការយកចិត្តទុកដាក់ពី SMIT Salvage ដែលជាក្រុមហ៊ុនសង្គ្រោះកប៉ាល់ដ៏ល្បីឈ្មោះរបស់ប្រទេសហូឡង់។

យោងតាមស្ថាប័នគ្រប់គ្រងព្រែក Suez កប៉ាក់ដឹកទំនិញដ៏ធំ ឈ្មោះ Ever Given ដែលដំណើរការដោយក្រុមហ៊ុនតៃវ៉ាន់ Evergreen Marine និងដោតទង់ជាតិរបស់ប៉ាណាម៉ា កាលពីថ្ងៃទី 23មីនា បានជួបប្រទះនឹងខ្យល់ព្យុះធូលីមួយនៅពេលកំពុងដឹកទំនិញរាប់ពាន់តោនឆ្ពោះទៅកាន់ Rotterdam នៃប្រទេសហូឡង់ បណ្ដាលឱ្យក្រុមនាវិកពិបាកក្នុងការបញ្ជាកប៉ាល់ក្រោមខ្យល់បោកបក់យ៉ាងខ្លាំង និងមានបញ្ហាដាច់ភ្លើង។

ជាលទ្ធផល Ever Given ដែលជាកប៉ាល់ធំជាងគេមួយក្នុងពិភពលោក ជាមួយនឹងចំណុះជិត 220,000តោន ប្រវែង 400ម៉ែត្រ បានជាប់គាំងទទឹងព្រែកជីកដែលត្រូវបានគេចាត់ទុកថា ជាផ្លូវទឹកសំខាន់បំផុតក្នុងពិភពលោក តភ្ជាប់រវាងសមុទ្រក្រហម និងមជ្ឈមបូព៌ា។

ពណ៌លឿងគឺជាកប៉ាល់ Ever Given ចំណែកនៅជុំវិញគឺជាកប៉ាល់អូស

កប៉ាល់ជាង 100គ្រឿងផ្សេងទៀត កំពុងស្ទះនៅពីក្រោយ Ever Given។ តម្លៃប្រេងកាលពីថ្ងៃទី 24មីនា ក៏បានកើនឡើងនៅពេលមានការព្រួយបារម្ភលើបញ្ហានៃការប្រើប្រាស់ព្រែកជីក Suez ជាកន្លែងដែលចរន្តទឹកប្រាក់ទំហំប្រមាណ 12% របស់ពិភពលោក ត្រូវឆ្លងកាត់ទីនេះ។

ការជួយសង្គ្រោះ Ever Give គឺជាភារកិច្ចយ៉ាងលំបាក។ រូបភាពដែលបានមកពីផ្កាយរណប បានបង្ហាញថា ច្រមុះរបស់កប៉ាល់ស្ថិតនៅជាប់ជញ្ជាំងភាគខាងកើតរបស់ព្រែក ចំណែកកន្ទុយរបស់វា ទំនងជាកំពុងប៉ះនឹងជញ្ជាំងផ្នែកខាងលិច។

«មើលពីក្រៅ កប៉ាល់នេះកំពុងជាប់គាំងយ៉ាងណែន។ កប៉ាល់ទាញជាច្រើនគ្រឿងត្រូវបានបញ្ជូនទៅកាន់កន្លែងកើតហេតុ ប៉ុន្តែគ្មានប្រយោជនសោះ» Julianne Cona វិស្វកររបស់កប៉ាល់ Maersk Denver ដែលកំពុងស្ទះផ្លូវនៅខាងក្រោយ Ever Given បានសរសេរនៅលើទំព័រ Instagram។

SMIT Salvage ក្រុមហ៊ុនបុត្រសម្ព័ន្ធរបស់ Royal Boskalis Westminster NV នៃប្រទេសហូឡង់ គឺជាក្រុមហ៊ុនមួយក្នុងចំណោមក្រុមហ៊ុនដែលត្រូវបានម្ចាស់កប៉ាល់ Ever Given ជ្រើសរើសដើម្បីសង្គ្រោះកប៉ាល់កំពុងជាប់គាំងនេះ។ SMIT Salvage ធ្លាប់បានជួយសង្គ្រោះកប៉ាល់ជាច្រើនដែលមានបញ្ហានៅលើសមុទ្រ ក្នុងនោះមានដូចជា ករណីសង្គ្រោះនាវាមុជទឹករុស្ស៊ីដែលបានលិចកាលពីឆ្នាំ 2001 ឬករណីបូមប្រេងចេញពីក្នុងនាវាទេសចរណ៍ Costa Concordia ដែលជាប់គាំងនៅអ៊ីតាលីកាលពីឆ្នាំ 2012។ល។

Martijn Schuttevaer អ្នកនាំពាក្យរបស់ក្រុមហ៊ុន Boskalis បានឱ្យដឹងថា៖ «ប្រការសំខាន់គឺត្រូវដឹងអំពីកម្រិតនៃការប៉ះទៅលើជញ្ជាំងរបស់ព្រែក។ សំណួរត្រូវបានដាក់ចេញនោះគឺថា តើការផ្លាស់ទីរបស់កប៉ាល់នេះ មានការលំបាកកម្រិតណា?»។

ចម្លើយសម្រាប់សំណួរខាងលើនឹងកំណត់បាននូវអ្វីដែលនឹងត្រូវធ្វើបន្ទាប់។ ក្រុមអ្នកជួយសង្គ្រោះនឹងត្រូវរកវិធីធ្វើឱ្យកប៉ាល់នេះស្រាលជាងមុន ដើម្បីអាចអូសវាទៅកាន់ទីតាំងដែលមិនសូវមានឧបសគ្គ ក្នុងបំណងបើកផ្លូវឱ្យកប៉ាល់ផ្សេងៗអាចឆ្លងកាត់បាន។ ក្រុមអ្នកជួយសង្គ្រោះ អាចបូមទឹក និងឥន្ធនៈចេញពីកប៉ាល់ នេះបើតាម Schuttavaer។

ក្នុងករណីអាក្រក់បំផុត គេអាចត្រូវយកកុងតឺន័រចេញពីកប៉ាល់។ ដំណើរការនេះនឹងស៊ីពេលយូរប៉ុន្មានគឺអាស្រ័យលើឧបករណ៍ដែលត្រូវបានប្រើប្រាស់នៅជុំវិញកប៉ាល់ ក្នុងនោះ ការប្រើប្រាស់ឧទ្ធម្ភាគចក្រគឺជាជម្រើសល្អមួយ។

គម្រោងរបស់ SMIT គឺបញ្ជូនមនុស្សមួយក្រុម រួមមាន 8នាក់ ទៅកាន់ទីតាំងរបស់ Ever Given នៅព្រឹកថ្ងៃទី 25មីនា (ម៉ោងក្នុងស្រុក) ដើម្បីត្រួតពិនិត្យកប៉ាល់។ Joseph Farrell III ជានាយកផ្នែកអភិវឌ្ឍពាណិជ្ជកម្មប្រចាំ Resolve Marine ដែលជាក្រុមហ៊ុនសេវាកម្មជួយសង្គ្រោះមួយផ្សេងទៀត ឱ្យដឹងថា ក្រុមដូច្នេះតែងត្រូវបានដឹកនាំដោយអ្នកជំនាញក្នុងការជួយសង្គ្រោះ មានដូចជាអតីតប្រធានក្រុមនាវិកជាដើម ប៉ុន្តែក៏ត្រូវមានទាំងអ្នកមុជទឹក ជាងផ្សារដែក និងអ្នកបញ្ជាដងស្ទូចជាដើម។

បច្ចុប្បន្ន ភារកិច្ចដំបូងគឺត្រូវស្ដារបាតដីនៅជុំវិញកប៉ាល់។ គណៈគ្រប់គ្រងរបស់ព្រែក Suez បានបញ្ជូនកប៉ាល់ស្ដារទៅកាន់ទីតាំងកើតហេតុ ដើម្បីយកខ្សាច់នៅក្រោមទឹក មុនពេលកម្លាំងជួយសង្គ្រោះ អូសកប៉ាល់នោះចេញ៕

ប្រភព៖ Washington Post, Bloomberg
ប្រែសម្រួល៖ បុត្រា

March 25, 2021

Category: សង្គម និងសេដ្ឋកិច្ច