សង្គម និងសេដ្ឋកិច្ច - La Reine Media

សងសំណងជិត ១,០០០ លានដុល្លារ នឹងត្រូវសង់ដល់ជនរងគ្រោះក្នុងករណីបាក់ស្រុតអគារស្នាក់កម្ពស់ ១២ ជាន់ នៅ Florida

(សហរដ្ឋអាម៉េរិក)-ជនរងគ្រោះដែលនៅមានជីវិត និងសាច់ញាតិរបស់ជនរងគ្រោះដែលបានស្លាប់ក្នុងហេតុការណ៍បាក់ស្រុតអគារកម្ពស់ ១២ ជាន់ នៅ Florida សហរដ្ឋអាម៉េរិក កាលពីឆ្នាំកន្លង សម្រេចដល់ការព្រមព្រៀងសងសំណងយ៉ាងតិច ៩៩៧ លានដុល្លារអាម៉េរិក។

«ខ្ទង់ប្រាក់ដែលត្រូវទូទាត់សងនៅពេលនេះគឺ ៩៩៧ លានដុល្លារអាម៉េរិក។ យើងនឹងទាមទារឱ្យបានរាប់រយលានដុល្លារទៀតសម្រាប់ជូនដល់ជនរងគ្រោះ» មេធាវី Carlos Silva តំណាងរបស់ក្រុមអ្នករងគ្រោះក្នុងហេតុការណ៍បាក់អគារនៅ Miami រដ្ឋ Florida កាលពីថ្ងៃទី ១១ ឧសភា បានឱ្យដឹងដូច្នេះ។

ទឹកប្រាក់ខាងលើនឹងត្រូវបានចែកជូនគ្រួសាររបស់ជនរងគ្រោះដែលបានស្លាប់ រងរបួស ឬបាត់បង់ផ្ទះនៅក្នុងហេតុការណ៍នេះ។ យន្តការនៃការបែងចែកប្រាក់សំណងនេះនឹងត្រូវបានកំណត់នៅសប្ដាហ៍ក្រោយ។ ខ្ទង់ប្រាក់សំណងនេះនឹងបានមកពីបណ្ដាក្រុមហ៊ុនធានារ៉ាប់រង ក្រុមហ៊ុនអភិវឌ្ឍអចលនទ្រព្យ និងភាគីពាក់ព័ន្ធដែលជាចុងចោទ។

ផ្នែកមួយនៃអគារ South Champlain កម្ពស់ ១២ ជាន់ សាងសង់កាលពីឆ្នាំ ១៩៨១ នៅ Surfside ដែលជាក្រុងមួយនៅភាគខាងជើងនៃឆ្នេរ Miami បានបាក់ស្រុតកាលពីថ្ងៃទី ២៤ មិថុនា ២០២១ នៅក្នុងពេលប្រជាជនជាច្រើនសិបនាក់កំពុងទទួលទានដំណេកនៅខាងក្នុង។

បច្ចុប្បន្ន មិនទាន់មានរបាយការណ៍ណាមួយបង្ហាញអំពីមូលហេតុនៃការបាក់ស្រុតនេះ បើទោះជាការរកឃើញដំបូងៗបង្ហាញថា រចនាសម្ព័ន្ធរបស់អគារនេះបានទ្រុឌទ្រោមទៅហើយក្ដី៕

May 12, 2022

ក្រុមហ៊ុនប្រេង Saudi Aramco យកឈ្នះលើ Apple ក្លាយជាក្រុមហ៊ុនដែលមានតម្លៃខ្ពស់ជាងគេបង្អស់ក្នុងពិភពលោក

កាលពីថ្ងៃទី ១១ ឧសភា ២០២២ ក្រុមហ៊ុននាំចេញប្រេងធំផុតក្នុងពិភពលោក Saudi Aramco របស់ អារ៉ាប៊ីសាអូឌីត បានយកឈ្នះលើ Apple របស់ អាម៉េរិក ហើយក្លាយជាក្រុមហ៊ុនដែលមានតម្លៃមូលធនទីផ្សារខ្ពស់ជាងគេបង្អស់ក្នុងពិភពលោក។

ជាមួយនឹងតម្លៃភាគហ៊ុនបញ្ចប់ការជួញដូរកាលពីថ្ងៃទី ១១ ឧសភា ថយចុះជិត ១% មកនៅត្រឹម ៤៥.៥ រីយ៉ាល (១២.១៣ ដុល្លារ)/ហ៊ុន ក្រុមហ៊ុនថាមពល Saudi Aramco នៅតែមានតម្លៃមូលធនទីផ្សារឡើងដល់ ៩.១ ទ្រីលាន (៩.១ លានលាន) រីយ៉ាល (២.៤៣០ ទ្រីលានដុល្លារអាម៉េរិក)។ ចំណែកតម្លៃភាគហ៊ុនរបស់ Apple វិញ ថយចុះ ៤.៥% មកនៅត្រឹម ១៤៧.៦៣ ដុល្លារ/ហ៊ុន ដូច្នេះ តម្លៃមូលធនទីផ្សាររបស់ក្រុមហ៊ុននេះ ធ្លាក់មកនៅត្រឹម ២,៣៩០ ពាន់លាន (ឬ ២.៣៩០ ទ្រីលាន) ដុល្លារអាម៉េរិក។

តម្លៃភាគហ៊ុនរបស់ Saudi Aramco កើនជិត ៣០% ចាប់ពីថ្ងៃទី ២ មករា រហូតដល់បច្ចុប្បន្ន គ្រាដែលភាគហ៊ុនរបស់ Apple ថយចុះជិត ១៦% ចាប់ពីដើមឆ្នាំ ២០២២។

ការដែលតម្លៃប្រេងបានកើនឡើងខ្ពស់ បានជួយឱ្យមូលធនទីផ្សាររបស់ Saudi Aramco ទទួលបានប្រយោជន៍ច្រើន។ ប្រេងឆៅបានឡើងថ្លៃប្រហែល ៦០% រាប់ចាប់ពីឆ្នាំ ២០២១ ដោយសារតែតម្រូវការខ្ពស់ និងសង្គ្រាមនៅ អ៊ុយក្រែន។ ធនាគារមួយចំនួនបានព្យាករថា តម្លៃប្រេងជាធម្យមអាចឡើងដល់ ១២០ ទៅ ១៣៥ ដុល្លារ/ធុងបារ៉ែល ក្នុងឆ្នាំនេះ៕

May 12, 2022

មហាសេដ្ឋីលេខ ១ នៅ វៀតណាម ថា ឡានអគ្គិសនី VinFast ចំនួន ៦ សែនគ្រឿង នឹងត្រូវនាំចេញទៅកាន់ សហរដ្ឋអាម៉េរិក នៅឆ្នាំ ២០២៦

ប្រធានក្រុមហ៊ុន VinGroup អះអាងថា នឹងលក់រថយន្តអគ្គិសនីចំនួន ៧៥០,០០០ គ្រឿង នៅលើទឹកដីអាម៉េរិក ក្នុងឆ្នាំ ២០២៦ ក្នុងនោះរថយន្តដែលត្រូវនាំចូលពី វៀតណាម នឹងមានរហូតដល់ ៦០០,០០០ គ្រឿង។

ក្នុងកិច្ចប្រជុំរវាងក្រុមប្រឹក្សាភិបាល និងភាគហ៊ុនិក នាព្រឹកមិញនេះ ក្រុមហ៊ុន VinGroup បានប្រកាសគម្រោងពាណិជ្ជកម្មសម្រាប់ឆ្នាំ ២០២២ ដែលក្នុងនោះ ក្រុមហ៊ុនគ្រោងនឹងរកបានប្រាក់ចំណូលជាង ៦ ពាន់លានដុល្លារអាម៉េរិក ខណៈដែលប្រាក់ចំណេញក្រោយការបង់ពន្ធរួច នឹងមានចំនួន ២៦០ លានដុល្លារអាម៉េរិក។

ឆ្នាំនេះ VinFast បានបង្ហាញរថយន្តអគ្គិសនីឆ្លាតវៃជាច្រើនម៉ូដែល ហើយបើកឱ្យបញ្ជាទិញចំពោះរថយន្ត ៣ ម៉ូដែល គឺ VF ៥, VF ៨ និង VF ។ បច្ចុប្បន្ន VinFast កំពុងប្រគល់រថយន្ត VFe៣៤ ដល់អតិថិជននៅ វៀតណាម និងត្រៀមប្រគល់ VF ៨ និង VF ៩ ឱ្យអតិថិជននៅទីផ្សារអន្តរជាតិ ចាប់ពីចុងឆ្នាំនេះ។

រោងចក្រ VinFast នៅ សហរដ្ឋអាម៉េរិក អាចផលិតរថយន្តបាន ១៥០,០០០ គ្រឿង/ឆ្នាំ ប៉ុន្តែ ប្រធានក្រុមហ៊ុន VinGroup អះអាងថា នឹងលក់រថយន្តអគ្គិសនីរហូតដល់ ៧៥០,០០០ គ្រឿង នៅលើទីផ្សារនេះនៅឆ្នាំ ២០២៦ ដូច្នេះ ក្រុមហ៊ុននេះ នឹងត្រូវនាំចូលពី វៀតណាម រហូតដល់ ៦០០,០០០ គ្រឿង។

May 11, 2022

សណ្ឋាគារអវកាសនឹងបើកទ្វារទទួលភ្ញៀវទេសរណ៍នៅឆ្នាំ ២០២៥

ក្រុមហ៊ុន Orbital Assembly នៅ Fontana រដ្ឋ California សហរដ្ឋអាម៉េរិក បានបង្ហើបឱ្យដឹងអំពីស្ថានីយអវកាសថ្មីចំនួន ២ ដែលនឹងប្រើប្រាស់ដើម្បីទទួលភ្ញៀវទេសចរណ៍អវកាស ហើយគ្រោងនឹងបើកដំណើរការចាប់ពីឆ្នាំ ២០២៥។

ក្រុមហ៊ុន Gateway Foundation បានណែនាំអំពីគំនិតសាងសង់សណ្ឋាគារអវកាសកាលពីឆ្នាំ ២០១៩។ គោលដៅរបស់ពួកគេគឺបង្កើតទីតាំងមួយដែលនៅឆ្ងាយពីផែនដី មានបន្ទប់ធ្វើការ និងបន្ទប់សម្រាប់ភ្ញៀវទេសចរណ៍។

ស្ថានីយ Pioneer អាចដាក់មនុស្សបាន ២៨ នាក់ នៅពេលបើកដំណើរការនៅឆ្នាំ ២០២៥។ ស្ថានីយមួយទៀតគឺ Voyager ដែលគ្រោងនឹងបើកទ្វារទទួលភ្ញៀវនៅឆ្នាំ ២០២៧ អាចដាក់មនុស្សបាន ៤០០ នាក់។

«គោលដៅរបស់យើងគឺការនាំមនុស្សច្រើននាក់ទៅរស់នៅ ធ្វើការ និងអភិវឌ្ឍនៅទីអវកាស» Tim Alatorre នាយកប្រតិបត្តិរបស់ Orbital Assembly ដែលជាក្រុមហ៊ុនទទួលខុសត្រូវក្នុងការសាងសង់ស្ថានីយអវកាសទាំងពីរខាងលើ ឱ្យដឹងដូច្នេះ។

ស្ថានីយអវកាសទាំង ២ ដែលមានរូបរាងដូចទៅនឹងកង់ឡាន មានទំនាញសិប្បនិម្មិត អនុញ្ញាតឱ្យមនុស្សដើរបានស្រួល។ ស្ថានីយ Pioneer តូចជាងស្ថានីយ Voyager ប៉ុន្តែនឹងមានបន្ទប់ចំនួន ៥ នៅជុំវិញកង់របស់វា។

May 11, 2022

តម្លៃប្រេងសាំងដែលត្រូវអនុវត្តចាប់ពីថ្ងៃនេះ ដល់ថ្ងៃទី ២០ ខែឧសភា ឆ្នាំ ២០២២

ក្រសួងពាណិជ្ជកម្ម ថ្ងៃនេះបានចេញសេចក្ដីប្រកាសព័ត៌មានស្ដីពីតម្លៃប្រេងឥន្ធនៈថ្មី ដែលត្រូវអនុវត្តចាប់ពីថ្ងៃទី ១១ ដល់ថ្ងៃទី ២០ ខែឧសភា ឆ្នាំ ២០២២ ក្នុងនោះ សាំងមានតម្លៃ ៥,៥៥០ រៀល ក្នុង ១ លីត្រ ខណៈដែលម៉ាស៊ូតមានតម្លៃ ៥,៨០០ រៀល ក្នុង ១ លីត្រ។

ធៀបនឹងតម្លៃដែលបានអនុវត្តចាប់ពីថ្ងៃទី ០១ ដល់ថ្ងៃទី ១០ ខែ ឧសភា ឆ្នាំ ២០២២ ឃើញថា តម្លៃសាំង និងម៉ាស៊ូត ដែលនឹងត្រូវអនុវត្តចាប់ពីថ្ងៃនេះ កើន ៣០០ រៀល/លីត្រ សម្រាប់សាំងធម្មតា និងកើន ២០០ រៀល/លីត្រ សម្រាប់ប្រេងម៉ាស៊ូត។

May 11, 2022

សមត្ថកិច្ចឃាត់ខ្លួនជនសង្ស័យម្នាក់ ក្នុងករណី «សម្លាប់មុន រំលោភក្រោយ»

(សៀមរាប)-សមត្ថកិច្ចខេត្តសៀមរាប នាថ្ងៃទី ១១ ខែឧសភានេះ បានបញ្ជូនបុរសម្នាក់ទៅកាន់តុលាការ ដោយជាប់សង្ស័យថា ពាក់ព័ន្ធករណីសម្លាប់ហើយរំលោភ។

ជនសង្ស័យឈ្មោះ អុក វឿ ភេទប្រុស អាយុ ៣១ ឆ្នាំ រស់នៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប ត្រូវកម្លាំងការិយាល័យនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលស្រុកក្រឡាញ់ នៃស្នងការដ្ឋាននគរបាលខេត្តសៀមរាប ចាប់ឃាត់ខ្លួន កាលពីថ្ងៃទី ៩ ខែឧសភា ឆ្នាំ ២០២២ ដោយយោងតាមពាក្យបណ្ដឹងរបស់ឈ្មោះ ខ្វាវ លំ ភេទស្រី អាយុ ៦៨ ឆ្នាំ ត្រូវជាជីដូនរបស់សពនារីរងគ្រោះ ដែលមានទីលំនៅភូមិរវៀង ឃុំស្រណាល ស្រុកក្រឡាញ់ ខេត្តសៀមរាប។

ដើមបណ្ដឹងបានឱ្យដឹងថា នៅថ្ងៃទី ៨ ខែឧសភា ឆ្នាំ ២០២២ វេលាម៉ោងប្រហែល ២១ កន្លះ ចៅស្រីរបស់គាត់ឈ្មោះ ផុន ឃីម ភេទស្រី អាយុ ១៣ ឆ្នាំ បានចេញទៅឆ្លុះកង្កែបតែម្នាក់ឯងនៅក្នុងភូមិ បានប្រហែលមួយសន្ទុះគាត់ក៏ឃើញចៅស្រីរបស់គាត់បានយកកង្កែបមកទុកនៅផ្ទះ។

លោកយាយរបស់ក្មេងស្រីរងគ្រោះរៀបរាប់ថា នៅយប់ថ្ងៃទី ៨ ខែឧសភា ឆ្នាំ ២០២២ វេលាម៉ោងប្រហែល ២១ កន្លះ ចៅស្រីរបស់គាត់បានទៅឆ្លុះរកកង្កែប រហូតដល់ម៉ោង ៣ ទៀបភ្លឺ ទើបគាត់ដឹងថា ចៅស្រីមិនទាន់ត្រលប់មកផ្ទះ ពេលនោះគាត់ក៏ស្រែកហៅឱ្យអ្នកជិតខាងជួយតាមរក។ ដល់ម៉ោង ៥ ភ្លឺ ទើបរកឃើញចៅស្រីរបស់គាត់ ដេកស្លាប់នៅលើវាលស្រែ។

លោកយាយរបស់ក្មេងស្រីរងគ្រោះបញ្ជាក់ថា បុរសឈ្មោះ វឿ គឺជាអ្នកដែលបានប្រាប់ចៅស្រីរបស់គាត់ថា នៅខាងលិចភូមិមានកង្កែបច្រើនណាស់ នេះបើតាមទំព័រ អគ្គស្នងការដ្ឋាននគរបាលជាតិ។

ក្រោយពីត្រូវបានចាប់ឃាត់ខ្លួន ជនសង្ស័យឈ្មោះ អុក វឿ ភេទប្រុស អាយុ ៣១ ឆ្នាំ រស់នៅភូមិ ឃុំកើតហេតុខាងលើ បានសារភាពថា ខ្លួនពិតជាបានចាប់ក្មេងស្រីរងគ្រោះជ្រមុជទឹកឱ្យស្លាប់ មុននឹងយកសាកសពទៅរំលោភ ហើយក៏បោះសាកសពទៅក្នុងទឹក៕

May 11, 2022

ខេត្តឧត្តរមានជ័យ បើកច្រកអន្តរជាតិជាំសាងាំ បន្ទាប់ពីបានបើកច្រកទ្វារអន្តរជាតិអូរស្មាច់ នៅពេលស្ថានភាពកូវីដ-១៩ កាន់តែធូរស្រាល

ច្រកអន្តរជាតិជាំសាងាំ ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ដែលជាប់នឹងស្រុកភូស៊ីង ខេត្តស៊ីសាកេត ត្រូវបាន អាជ្ញាធរខេត្តឧត្តរមានជ័យ សម្រេចបើកឱ្យដំណើរការឡើងវិញ ក្រោយស្ថានភាពកូវីដ-១៩ បានធូរស្បើយ។

ការបើកច្រកអន្តរជាតិជាំសាងាំ ឡើងវិញនេះ ត្រូវបានធ្វើឡើងកាលពីថ្ងៃទី ៩ ខែឧសភា ឆ្នាំ ២០២២ ដោយមានការសម្របសម្រួលពី ភាគីកម្ពុជា ដែលដឹកនាំដោយ ឯកឧត្តម ប៉ែន កុសល្យ អភិបាលខេត្តឧត្តរមានជ័យ និង ភាគីថៃ ដឹកនាំដោយលោក វ៉ាត់ថៈណា វុតធិឆាត អភិបាលខេត្តស៊ីសាកេត រួមជាមួយនឹងក្រុមមន្ត្រីពាក់ព័ន្ធរបស់ប្រទេសទាំងពីរ។

នៅមុនការបើកច្រកអន្តរជាតិជាំសាងាំ នេះ កម្ពុជា-ថៃ ក៏បានសម្រេចបើកច្រកទ្វារអន្តរជាតិអូរស្មាច់ ដែលស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ រួចហើយកាលពីព្រឹកថ្ងៃទី ៦ ឧសភា ២០២២ បន្ទាប់ពីមានការពិភាក្សា និងការសម្របសម្រួលដោយជោគជ័យ។

May 10, 2022

«ដៃស្ដាំ» របស់មហាសេដ្ឋីលេខ ១ របស់ពិភពលោក Elon Musk គឺជាអ្នកណា?

ក្នុងរយៈពេល ៦ ឆ្នាំកន្លង «ដៃស្ដាំ» របស់លោក Elon Musk ទទួលភារកិច្ចដោះស្រាយបញ្ហាទ្រព្យសម្បត្តិ និង «សកម្មភាពនានាដែលកើតឡើងដោយអារម្មណ៍រំជើបរំជួលភ្លាម» របស់មហាសេដ្ឋីអាម៉េរិក ដើមកំណើតអាហ្វ្រិកខាងត្បូង លោក Elon Musk។

លោក Jared Birchall អាយុ ៤៧ ឆ្នាំ ត្រូវបានវាយតម្លៃថា ជាមនុស្សម្នាក់ក្នុងចំណោមមនុស្សសំខាន់បំផុតដែលនៅពីក្រោយភាពជោគជ័យរបស់ Elon Musk និងបណ្ដាញទំនាក់ទំនងរបស់មហាសេដ្ឋីរូបនេះ។ លោក Birchall ត្រូវបានចាត់ទុកដូចជាអ្នកគ្រប់គ្រងគ្រួសាររបស់លោក Musk ព្រោះលោកកាន់កាប់ក្រុមហ៊ុនគ្រួសារ Excession របស់ Musk ដែលជាកន្លែងដោះស្រាយបញ្ហាគ្រប់យ៉ាង ចាប់ពី ការរៀបចំខ្ទង់ប្រាក់កម្ចី ជួលអង្គរក្ស ទិញលក់ផ្ទះ រហូតដល់គំនិត «ឡប់» និងបង្កចម្រូងចម្រាសជាញឹកញាប់របស់ម្ចាស់ SpaceX។

បុគ្គលសំខាន់ក្នុងការទិញដូរ Twitter

ដោយសារតែជាបុគ្គលដែលមានការងារត្រូវដោះស្រាយនៅខាងក្រោយ ទើបលោក Birchall មិនត្រូវបានគេស្គាល់ច្រើន។ ប៉ុន្តែ ថ្មីៗនេះ តួនាទីរបស់លោក Birchall ត្រូវគេដឹងតាមរយៈករណីទិញដូរបណ្ដាញសង្គម Twitter ដោយសារតែ អ្នក «បង្វិលប្រាក់» ក្នុងការទិញដូរដែលមានតម្លៃ ៤៤ ពាន់លានដុល្លារនេះគឺជារូបលោក។

ប្រភពព័ត៌មានរបស់ Bloomberg ឱ្យដឹងថា Birchall គឺជាផ្នែកមួយនៃរង្វង់តភ្ជាប់រវាង Musk ជាមួយនឹង Wall Street នៅក្នុងការរៀបចំខ្ទង់កម្ចីនានា។ បើទោះជាខ្វះបទពិសោធន៍ក្នុងការទិញដូរដែលមានតម្លៃពាន់លានដុល្លារ ប៉ុន្តែ Birchall គឺជាបុគ្គលដែលមានទំនាក់ទំនងល្អជាមួយបណ្ដាធនាគារ តាមរយៈក្រុមហ៊ុនចាស់ Morgan Stanley ដើម្បីជំរុញការខ្ចីប្រាក់ ឬវិនិយោគ។

ថ្ងៃទី ៥ ឧសភា Musk បានបង្ហើបឱ្យដឹងអំពីក្រុមអ្នកវិនិយោគដែលកំពុងបោះទុនជាង ៧ ពាន់លានដុល្លារដើម្បីជួយដល់ការទិញ Twitter។ អ្នកវិនិយោគទាំងនេះរួមមាន មហាសេដ្ឋី Larry Ellison ម្ចាស់ក្រុមហ៊ុន Oracle, ក្រុមហ៊ុន Sequoia Capital និង ផ្សារជួញដូររូបិយវត្ថុឌីជីថល Binance ជាដើម។ ប្រភពព័ត៌មានពី Binance ឱ្យដឹងថា Birchall គឺជាបុគ្គលម្នាក់ក្នុងចំណោមអ្នកដែលបានទាក់ទងមកកាន់ក្រុមហ៊ុននេះ។ Birchall បានប្រឹងប្រែងទាក់ទងតាមរយៈប្រព័ន្ធវីដេអូ ដើម្បីជួយជំរុញការងារទាំងនេះ។

ជីវភាពសុខសាន្ត

Birchall មានរូបរាងខាងក្រៅមិនជាពិសេសប៉ុន្មាន ដូច្នេះ អតីតមិត្តរួមការងារនៅ Goldman Sachs និង Merrill Lynch ហាក់មិនបានចងចាំរូបលោកឡើយ។

Birchall ចាប់ផ្ដើមការងារក្នុងវិស័យហិរញ្ញវត្ថុនៅ Goldman Sachs ឆ្នាំ ១៩៩៩ បន្ទាប់ពីបានបញ្ចប់ការសិក្សានៅ Brigham Young។ ឆ្នាំ ២០០០ លោកប្ដូរទៅកាន់ Merrill Lynch នៅ Los Angeles ប៉ុន្តែក្រោយមកក៏ត្រូវបញ្ឈប់ពីការងារដោយសារតែផ្ញើសំបុត្រឱ្យអតិថិជនដោយមិនមានការយល់ព្រមរបស់គណៈគ្រប់គ្រង។

ឆ្នាំ ២០១០ Birchall ធ្វើការឱ្យ Morgan Stanley។ មនុស្សមួយចំនួនប្រាប់ថា Birchall មិនមែនជាបុគ្គលិកឆ្នើម ប៉ុន្តែ ពូកែខាងគ្រប់គ្រងទ្រព្យសម្បត្តិ ពិសេសគឺទ្រព្យរបស់អ្នកមាន។

ក្រោយមក មហាសេដ្ឋី Elon Musk ក៏បានហៅទូរស័ព្ទទៅកាន់ Birchall។

ឆ្នាំ ២០១៦ Birchall បានចាកចេញពី Morgan Stanley ដើម្បីមកជួយ Tesla បង្កើតក្រុមហ៊ុន Excession ហើយធ្វើការឱ្យ Elon Musk រហូតដល់បច្ចុប្បន្ន៕

May 10, 2022

ប្រទេសនេះកំពុងត្រៀមដំណើរការឧទ្យានអគ្គិសនីព្រះអាទិត្យអណ្ដែតលើទឹកធំបំផុតនៅ អឺរ៉ុប

ព័រទុយហ្គាល់ កំពុងត្រៀមសម្រាប់ដំណើរការឧទ្យានអគ្គិសនីព្រះអាទិត្យអណ្ដែតលើទឹករបស់ទំនប់ Alqueva នៅភាគខាងត្បូងប្រទេសនេះ ចាប់ពីខែកក្កដាខាងមុខ។

ឧទ្យានអគ្គិសនីព្រះអាទិត្យធំបំផុតនៅ អឺរ៉ុប នេះ គឺជាផ្នែកមួយក្នុងចំណោមគម្រោងរបស់ ព័រទុយហ្គាល់ ដើម្បីកាត់បន្ថយការពឹងផ្អែកលើឥន្ធនៈហ្វូស៊ីល នាំចូលពីបរទេស ដែលបច្ចុប្បន្នកំពុងឡើងថ្លៃខ្ពស់ ចាប់តាំងពី រុស្ស៊ី បានចូលឈ្លានពាន អ៊ុយក្រែន។

ថ្មីៗនេះ កប៉ាល់សណ្ដោងចំនួន ២ គ្រឿង បានអូសប្រព័ន្ធមួយដែលមានផ្ទាំងសូឡាចំនួន ១២,០០០ ផ្ទាំង ទំហំប្រហាក់ប្រហែលនឹងទីលានបាល់ទាត់ចំនួន ៤ ទៅដល់ទំនប់ Alqueva រួចហើយ។ ប្រព័ន្ធអណ្ដែតលើទឹកនេះត្រូវបានដំឡើងដោយក្រុមហ៊ុនអគ្គិសនី EDP របស់ ព័រទុយហ្គាល់ នៅលើទឹកបឹងជីកធំបំផុតនៅ អឺរ៉ុបខាងលិច និងមានកម្លាំង ៥ មេហ្គាវ៉ាត់។

ព័រទុយហ្គាល់ កំពុងពន្លឿនការងាកទៅប្រើប្រាស់ថាមពលកកើតឡើងវិញ នៅពេលរងផលប៉ះពាល់ដោយសារតម្លៃប្រេងឡើងថ្លៃ បើទោះប្រទេសនេះស្ទើរតែមិនប្រើប្រាស់ថាមពល អ៊ីដ្រូកាបូន (hydrocarbon) របស់ រុស្ស៊ី។

ផ្ទាំងសូឡាខាងលើនឹងផលិតអគ្គិសនីបាន ៧.៥ GWh ក្នុង ១ ឆ្នាំ ហើយវានឹងត្រូវបានបន្ថែមថ្ម lithium ដើម្បីអាចរក្សាទុកអគ្គិសនីបាន ២ GWh។ គម្រោងនេះនឹងផ្គត់ផ្គង់អគ្គិសនីដល់គ្រួសារចំនួន ១,៥០០ គ្រួ ឬស្មើនឹង ៣០% នៃតម្រូវការអគ្គិសនីរបស់ទីរួមស្រុក Moura និង Portel ដែលនៅក្បែរនោះ។

កាលពីឆ្នាំ ២០១៧ EDP ក៏បានដំឡើងរោងចក្រអគ្គិសនីព្រះអាទិត្យអណ្ដែត ដែលមានផ្ទាំងសូឡាចំនួន ៨៤០ ផ្ទាំង នៅលើផ្ទៃទឹករបស់ទំនប់ Alto Rabagao ផងដែរ។ នេះគឺជាគម្រោងអគ្គិសនីព្រះអាទិត្យអណ្ដែតទឹកដំបូងបង្អស់នៅ អឺរ៉ុប។

May 10, 2022

រថយន្តដឹកទំនិញដើរដោយថាមពលអ៊ីដ្រូសែនធំជាងគេបង្អស់នៅក្នុងពិភពលោក កំពុងតាំងបង្ហាញនៅ អាហ្វ្រិកខាងត្បូង

ក្រុមហ៊ុន Anglo American កាលពីថ្ងៃទី ៨ ឧសភា បានបង្ហាញរថយន្តដឹកទំនិញដើរដោយថាមពលអ៊ីដ្រូសែនដែលមានទម្ងន់ ២២០ តោន នៅឯអណ្ដូងរ៉ែប្លាទីនមួយនៅភាគខាងជើងនៃ ប្រទេសអាហ្វ្រិកខាងត្បូង។

ត្រូវបានគេឃោសនាថាជារថយន្តដែលនឹងចូលមកជំនួសយានយន្តម៉ាស៊ូតរបស់ Anglo American រថយន្តដឹកទំនិញខ្នាតយក្សនេះមានទំហំប្រហាក់ប្រហែលនឹងផ្ទះមួយខ្នង។ វាប្រើប្រាស់ថ្មអ៊ីដ្រូសែន ២ មេហ្គាវ៉ាត់ និងមានសមត្ថភាពដឹករ៉ែទម្ងន់ ២៩០ តោន ហើយបច្ចុប្បន្ន ត្រូវបានដាក់តាំងបង្ហាញនៅអណ្ដូងរ៉ែ Mogalakwena មានចម្ងាយពីទីក្រុង Johannesburg ប្រហែល ២៥០ គីឡូម៉ែត្រ។

ក្រុមហ៊ុនរុករករ៉ែអន្តរជាតិ Anglo American ដែលមានមូលដ្ឋាននៅ ប្រទេសអង់គ្លេស ឱ្យដឹងថា ពួកគេមានបំណងសម្រេចបានគោលដៅបន្សាបកាបូន នៅឆ្នាំ ២០៤០។

បច្ចេកទេសរបស់ Anglo American គឺប្រើប្រាស់ថាមពលព្រះអាទិត្យដើម្បីបំបែកទឹកឱ្យទៅជាអាតូមអ៊ីដ្រូសែន និងអុកស៊ីសែន។ អ៊ីដ្រូសែន នៅពេលត្រូវបានដុតឆេះនឹងបញ្ចេញតែចំហាយទឹកប៉ុណ្ណោះ ពោលគឺមិនដូចទៅនឹងប្រេងឥន្ធនៈដែលបានមកពីហ្វូស៊ីល ដែលបញ្ចេញឧស្ម័ន CO២ ធ្វើឱ្យផែនដីឡើងកម្ដៅ។

នាយកប្រតិបត្តិ Duncan Wanblad បានឱ្យដឹងថា ប៉ុន្មានឆ្នាំទៀតប៉ុណ្ណោះ Anglo American នឹងប្រើប្រាស់រថយន្តដើរដោយថាមពលអ៊ីដ្រូសែន ជំនួសបណ្ដារថយន្តដែលដើរដោយម៉ាស៊ីនម៉ាស៊ូត។

កាលពីខែវិច្ឆិកា ២០២១ បណ្ដាប្រទេសអ្នកមាន រួមមាន បារាំង, អាល្លឺម៉ង់, អង់គ្លេស និង សហរដ្ឋអាម៉េរិក បានសន្យាជួយផ្នែកបច្ចេកទេស និងជំនួយជាទឹកប្រាក់យ៉ាងតិច ៨.៥ ពាន់លានដុល្លារ ដើម្បីជួយឱ្យ អាហ្វ្រិកខាងត្បូង ប្ដូរផ្លាស់ទៅរកសេដ្ឋកិច្ចដែលបញ្ចេញកាបូនកម្រិតទាប៕

May 9, 2022

Category: សង្គម និងសេដ្ឋកិច្ច