សង្គម និងសេដ្ឋកិច្ច - La Reine Media

ក្រុមហ៊ុន Mitsubishi Fuso បង្ហាញរថយន្តដឹកទំនិញអគ្គិសនី eCanter ជំនាន់បន្ទាប់

ក្រុមហ៊ុន Mitsubishi Fuso and Bus Corporation (MFTBC) ដែលជាក្រុមហ៊ុនបុត្រសម្ព័ន្ធរបស់ Mercedes-Benz Group និង Daimler Truck ថ្មីៗនេះបានបង្ហើបឱ្យដឹងអំពីម៉ូដែលជំនាន់បន្ទាប់របស់រថយន្តដឹកទំនិញអគ្គិសនី eCanter។

រថយន្ត Fuso eCanter ត្រូវបានបង្ហាញជាលើកដំបូងកាលពីឆ្នាំ ២០១៧ ហើយចាប់ពីពេលនោះមក រថយន្តនេះប្រហែល ៤៥០ គ្រឿងត្រូវបានប្រគល់ដល់ដៃអតិថិជននៅ ប្រទេសជប៉ុន អឺរ៉ុប អាម៉េរិកខាងជើង អូស្ត្រាលី និង នូវែលសេឡង់។

យោងតាមក្រុមហ៊ុន Fuso រថយន្តដឹកទំនិញអគ្គិសនីជំនាន់បន្ទាប់ដែលត្រូវបានណែនាំកាលពីខែមីនា នឹងមានលក្ខណៈទាន់សម័យបំផុត។ eCanter នឹងមានប្រហែល ២៨ កំណែសម្រាប់ទីផ្សារជប៉ុន និងជាង ៨០ កំណែសម្រាប់ទីផ្សារបរទេស។ MFTBC ឱ្យដឹងថា កំណែថ្មីរបស់ eCanter នឹងត្រូវបានផលិតក្នុងបរិមាណច្រើន។

រថយន្តដឹកទំនិញអគ្គិសនី eCanter ជំនាន់ថ្មីនឹងត្រូវបានដាក់លក់ក្នុង ប្រទេសជប៉ុន ចាប់ពីរដូវផ្ការីកឆ្នាំ ២០២៣ និងបន្ទាប់មកទៀត ដាក់លក់នៅ សិង្ហបុរី ហុងកុង ឥណ្ឌូណេស៊ី អឺរ៉ុប អូស្ត្រាលី និងនូវែលសេឡង់។

ក្រៅពីកំណែដែលមានទម្ងន់ ៧.៥ តោន (GVW) រថយន្តដឹកទំនិញអគ្គិសនី eCanter ជំនាន់ថ្មី ក៏នឹងមានកំណែដែលមានទម្ងន់ចាប់ពី ៤.២៥ តោន ដល់ ៨.៥៥ តោនផងដែរ។ កាប៊ីនរបស់រថយន្តនេះ នឹងមានទទឹង ២,១៣០ មម និងបណ្ដោយប្រវែងពី ២,៥០០ មម ដល់ ៤,៧៥០ មម។

September 13, 2022

គម្រោងស្ថាបនារោងចក្រផលិតអគ្គិសនីពីថាមពលព្រះអាទិត្យធំបំផុតនៅប្រទេសចិន (វីដេអូ)

ប្រទេសចិន កាលពីថ្ងៃទី ០៩ កញ្ញា បានចាប់ផ្ដើមស្ថាបនាស្ថានីយផលិតអគ្គិសនីដើរដោយកម្ដៅព្រះអាទិត្យទំហំ ៤៣,០០០ គីឡូម៉ែត្រក្រឡា នៅលើសមុទ្រខ្សាច់ Tengger។

គម្រោងផលិតអគ្គិសនីខ្នាតយក្សដែលនឹងមានកម្លាំងឡើងដល់ ៣ ជីហ្គាវ៉ាត់ (gigawatt) នេះ ស្ថិតនៅក្នុងទឹកដីនៃតំបន់ស្វយ័ត Ningxia Hui ភាគខាងជើងប្រទេសចិន។ គម្រោងនេះនឹងគ្របដណ្ដប់លើផ្ទៃដីទំហំ ៤៣,០០០ គីឡូម៉ែត្រក្រឡា ជាមួយនឹងកម្លាំងផលិតឡើងដល់ ៣ ជីហ្គាវ៉ាត់ ឬ ៣ លានគីឡូវ៉ាត។

ថវិកាសម្រាប់គម្រោងនេះគឺ ១៥.២៥ ពាន់លានយុនចិន ស្មើនឹង ២.២ ពាន់លានដុល្លារអាម៉េរិក។ បន្ទាប់ពីស្ថាបនារួចរាល់ ស្ថានីយអគ្គិសនីព្រះអាទិត្យដ៏ធំនេះអាចផលិតអគ្គិសនីបាន ៥.៧៨ ពាន់លានគីឡូវ៉ាត់ម៉ោង ជារៀងរាល់ឆ្នាំ និងរកចំណូលប្រចាំឆ្នាំបាន ១.៥ ពាន់លានយុន ស្មើនឹង ២១៧ លានដុល្លារអាម៉េរិក ព្រមទាំងបង្កើតការបាន ១,៥០០ កន្លែង។

គម្រោងខាងលើនឹងរួមចំណែកសំចៃធ្យូងថ្មបាន ១.៩២ លានតោន នៅក្នុងវិស័យផលិតអគ្គិសនីដើរដោយធ្យូងថ្ម។ ជាងនេះ វាក៏កាត់បន្ថយឧស្ម័នកាបូនបានប្រហែល ៤.៦៦ លានតោន និងឧស្ម័នឌីអុកស៊ីតបាន ៣៣,៩០០ តោន ក៏ដូចជាឧស្ម័នអាសូតឌីអុកស៊ីត បាន ៥០,០០០ តោនជារៀងរាល់ឆ្នាំផងដែរ៕

September 13, 2022

រថយន្តអគ្គិសនី XPeng G9 បង្ហាញខ្លួនជាផ្លូវការនៅ ប្រទេសចិន នាសប្ដាហ៍ក្រោយ

ក្រុមហ៊ុន XPeng Motors នឹងចាប់ផ្ដើមដាក់លក់ជាផ្លូវការនូវរថយន្ត SUV អគ្គិសនីលំដាប់ប្រណិត XPeng G9 ដែលកំពុងត្រូវបានទន្ទឹងរង់ចាំ នៅចុងខែកញ្ញានេះ បន្ទាប់ពីត្រូវបានប្រកាសបង្ហាញកាលពីខែវិច្ឆិកាឆ្នាំកន្លង។

យោងតាមព័ត៌មានដែលត្រូវបានផ្សាយលើទំព័រ Weibo កាលពីថ្ងៃទី ០៩ កញ្ញា ២០២២ ក្រុមហ៊ុន XPeng ឱ្យដឹងថា នឹងមានព្រឹត្តិការណ៍បង្ហាញ G9 តាមប្រព័ន្ធអ៊ីនធើណិត នៅថ្ងៃទី ២១ កញ្ញា និងអញ្ជើញក្រុមអ្នកមានចំណាប់អារម្មណ៍តាមដានតាមរយៈវីដេអូ។ បច្ចុប្បន្ន ក្រុមហ៊ុននេះមិនទាន់ប្រកាសជាផ្លូវការអំពីពេលវេលាជាក់លាក់នៃការចាប់ផ្ដើម និងផ្សាយនៅលើថ្នាលបច្ចេកវិទ្យាណាមួយនៅឡើយ។

XPeng G9 ត្រូវបានដាក់បង្ហាញនៅក្នុង showroom របស់ក្រុមហ៊ុននេះ នៅក្នុង ១៥ ទីក្រុងរបស់ ប្រទេសចិន ក្នុងនោះមាន ប៉េកាំង សៀងហៃ ក្វាងចូវ ហាងចូវ។ល។ ក្រៅពីនេះ ពួកគេមិនបានបង្ហើបឱ្យដឹងព័ត៌មានអ្វីទៀតឡើយ។

រថយន្តខាងលើនេះនឹងក្លាយជារថយន្តអគ្គិសនីរបស់ ចិន ដំបូងដែលត្រូវបានផលិតឡើងក្រោមថ្នាល SiC អគ្គិសនីថាមពលខ្ពស់ ៨00V និងប្រព័ន្ធគ្រប់គ្រងរថយន្តដែលប្រើប្រាស់ឈីប Nvidia DRIVE Orin។

កាលពីថ្ងៃទី ១១ សីហា XPeng បានប្រកាសថា រថយន្តអគ្គិសនី XPeng G9 ចំនួន ២២,៨១៩ គ្រឿង ត្រូវបានបញ្ជាទិញជាមុននៅក្នុងរយៈពេលតែ ២៤ ម៉ោង បន្ទាប់ពីក្រុមហ៊ុនបើកទទួលការបញ្ជាទិញ។

កាលពីថ្ងៃទី ១៥ សីហា ក្រុមហ៊ុនចិនខាងលើបានបង្ហាញបច្ចេកវិទ្យាបញ្ចូលថាមពលរហ័សរបស់ខ្លួន។ XPeng G9 អាចធ្វើដំណើរបាន ២០០ គីឡូម៉ែត្រ បន្ទាប់ពីបានបញ្ចូលថាមពលតែ ៥ នាទី ដោយប្រើប្រព័ន្ធបញ្ចូលថាមពលថ្មីនេះ។ លទ្ធផលនេះត្រូវបាន XPeng បញ្ជាក់តាមរយៈការពិសោធជាក់ស្ដែងនៅពេលនោះ។

តម្លៃរបស់ XPeng G9 មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ យោងតាមការស្រាវជ្រាវមួយរបស់ក្រុមអ្នកវិនិយោគ Tim Hsiao ប្រចាំនៅធនាគារ Morgan Stanley បានឱ្យដឹងថា ពួកគេរំពឹងថា កំណែកំពូលរបស់ XPeng G9 នឹងមានតម្លៃប្រហែលពី ៥២,០០០ ដល់ ៥៧,៧៥០ ដុល្លារអាម៉េរិក៕

September 12, 2022

ប្រេងធ្លាក់ថ្លៃចុះទាបខ្លាំង ក្រោយពីការប្រែប្រួលពេញមួយសប្ដាហ៍

ដើមសប្ដាហ៍នេះ (១២ កញ្ញា) តម្លៃប្រេងឆៅ WTI ប្រគល់មានកាលកំណត់ បន្តទិន្នាការថយចុះ។ បច្ចុប្បន្ន ប្រេងឆៅត្រូវបានជួញដូរក្នុងតម្លៃក្រោម ៨៦ ដុល្លារ/ធុង បន្ទាប់ពីបានប្រែប្រួលពេញមួយសប្ដាហ៍។

តម្លៃប្រេង WTI ប្រគល់មានកាលកំណត់នាព្រឹកនេះបន្តធ្លាក់ពីចំណុច ៨៦ ដុល្លារ/ធុង ចុះមកនៅក្នុងរង្វង់ ៨៥.២ ដុល្លារ។ ប្រេង Brent ក៏បានធ្លាក់ថ្លៃ ដោយត្រូវបានជួញដូរក្នុងរង្វង់ ៩១.៥ ដុល្លារ ក្នុង ១ ធុង។

ប្រេងឆៅទើបតែបានឆ្លងកាត់តម្លៃដែលមានការប្រែប្រួលខ្លាំងកាលពីសប្ដាហ៍កន្លង ក្នុងនោះ តម្លៃប្រេង Brent ធ្លាក់ថ្លៃ ០.២% និងប្រេង WTI ធ្លាក់ថ្លៃ ០.១%។

មូលហេតុដែលនាំឱ្យប្រេងឆៅត្រូវធ្លាក់ថ្លៃបែបនេះគឺដោយសារការបារម្ភអំពីការថយចុះនៃតម្រូវការប្រេងសាំងរបស់ពិភពលោក ក្រោយពីធនាគារកណ្ដាលធំៗបន្តដំឡើងការប្រាក់ និងស្ថានការណ៍កូវីដ-១៩ នៅ ចិនដីគោក។ តម្លៃប្រេង Brent បច្ចុប្បន្នបានធ្លាក់ចុះទាបខ្លាំងបើធៀបនឹង ១៤០ ដុល្លារ/ធុង កាលពីខែមីនា និងធ្លាក់ចុះទាបបំផុតរាប់ចាប់ពីខែមករា។

ផ្ទុយទៅវិញ ការសម្រេចកាត់បន្ថយបរិមាណប្រេងឆៅក្នុងខែតុលាខាងមុខរបស់ OPEC+ (ក្រុមប្រទេសនាំចេញប្រេងឆៅ និងដៃគូសហការ) បូករួមនឹងការដែលក្រុមហ៊ុន Gazprom របស់ រុស្ស៊ី បិទប្រព័ន្ធបំពង់បង្ហូរឧស្ម័ន Nord Stream 1 និងភាពតានតឹងរវាង រុស្ស៊ី ជាមួយនឹងលោកខាងលិចនៅក្នុងបញ្ហាកំណត់តម្លៃពិតានរបស់ថាមពល នៅតែជាកត្តាដែលជួយទប់ការធ្លាក់ថ្លៃខ្លាំងរបស់ប្រេងឆៅនាបច្ចុប្បន្ន៕

September 12, 2022

Intel សង់រោងចក្រលិតឈីបអេឡិចត្រូនិចតម្លៃ ២០ ពាន់លានដុល្លារ នៅ សហរដ្ឋអាម៉េរិក

ក្រុមហ៊ុន Intel ទើបតែបានសម្ពោធបើកការដ្ឋានសាងសង់រោងចក្រផលិតឈីបអេឡិចត្រូនិចតម្លៃ ២០ ពាន់លានដុល្លារ នៅក្នុងរដ្ឋ Ohio សហរដ្ឋអាម៉េរិក។

សហរដ្ឋអាម៉េរិក កំពុងតែដោះស្រាយបញ្ហាដាច់ចង្វាក់ផ្គត់ផ្គង់ផលិតផល គ្រឿងបន្លាស់នានា ដោយសារតែកូវីដ-១៩ បញ្ហាប្រែប្រួលនៃទីផ្សារសេដ្ឋកិច្ច និងនយោបាយ។ ឈីបអេឡិចត្រូនិចត្រូវបានគេចាត់ទុកថាជាអាទិភាពដំបូងគេមួយនៅ សហរដ្ឋអាម៉េរិក។

ក្រុមហ៊ុន Intel ទើបតែបានសម្ពោធបើកការដ្ឋានសាងសង់រោងចក្រផលិតឈីបអេឡិចត្រូនិចតម្លៃ ២០ ពាន់លានដុល្លារ នៅលើផ្ទៃដីទំហំជាង ៤០០ ហិកតា ក្នុងរដ្ឋ Ohio សហរដ្ឋអាម៉េរិក។ បុគ្គលិកប្រមាណ ៣,០០០ នាក់នឹងធ្វើការក្នុងរោងចក្រនេះ ហើយផលិតផលរបស់វាគឺឈីបអេឡិចត្រូនិចជាដើម ដែលបម្រើដល់វិស័យអាកាសចរណ៍អវកាស កុំព្យូទ័រ រថយន្ត ឧបករណ៍វេជ្ជសាស្ត្រ ឬទូរស័ព្ទដៃ ទូទឹកកក និងម៉ាស៊ីនបោកគក់។ល។

ប្រធានាធិបតីអាម៉េរិក លោក ចូ បៃដិន បានអះអាងថា ការផលិតឈីបអេឡិចត្រូនិក បច្ចុប្បន្នគឺជាបញ្ហាសន្តិសុខជាតិ។ លោក បៃដិន ថ្លែងថា «យើងត្រូវតែផលិតឈីបនៅទីនេះ ក្នុងទឹកដីអាម៉េរិក ដើម្បីបន្ថយការចំណាយលើការផលិត និងបង្កើតការងារបន្ថែម។ នោះគឺជាបញ្ហាសន្តិសុខសេដ្ឋកិច្ច និងជារឿងសន្តិសុខជាតិ»។

សហរដ្ឋអាម៉េរិក កំពុងតែប្រឹងប្រែងដើម្បីនាំយកវិស័យផលិតឈីបត្រលប់ចូលមកទឹកដីនេះវិញ ដើម្បីប្រកួតប្រជែងនឹង ប្រទេសចិន ជប៉ុន កូរ៉េខាងត្បូង ឬ សហភាពអឺរ៉ុប ជាទីដែលកំពុងត្រូវបានវិនិយោគរាប់ពាន់លានដុល្លារដើម្បីទាក់ទាញអ្នកផលិតឈីប។ សហរដ្ឋអាម៉េរិក បានបញ្ចេញគោលនយោបាយផ្ដល់អត្ថប្រយោជន៍ដល់បណ្ដាក្រុមហ៊ុន រោងចក្រនៅ សហរដ្ឋអាម៉េរិក ក្នុងការប្រើប្រាស់គ្រឿងបន្លាស់ដែលផលិតនៅក្នុងទឹកដីនេះ។

ក្រុមហ៊ុនអន្តរជាតិដូចជា Toyota ឬ Honda ជាដើម ក៏កំពុងតែបន្តវិនិយោគ និងសាងសង់រោងចក្រជាច្រើនទៀតនៅ សហរដ្ឋអាម៉េរិក និងប្រើប្រាស់ឈីបដែលផលិតនៅក្នុងទឹកដីនេះ ដើម្បីទទួលបានអត្ថប្រយោជន៍ ការអនុគ្រោះនានា បន្ទាប់ពីបញ្ហាដាច់បណ្ដាញផ្គត់ផ្គង់កំពុងត្រូវបានដោះស្រាយជាបណ្ដើរ៕

September 12, 2022

តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ១១ ដល់ថ្ងៃទី ២០ ខែកញ្ញា ២០២២

នាព្រឹកថ្ងៃទី ១២ កញ្ញានេះ ក្រសួងពាណិជ្ជកម្ម បានចេញសេចក្តីជូនដំណឹងស្ដីពី តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ១១ ដល់ថ្ងៃទី ២០ ខែកញ្ញា ២០២២។

យោងតាមប្រកាសថ្មីរបស់ ក្រសួងពាណិជ្ជកម្ម សាំងលក់រាយត្រូវបានអនុញ្ញាតឱ្យលក់ក្នុងតម្លៃ ៤,៤០០ រៀល/លីត្រ ខណៈប្រេងម៉ាស៊ូត លក់ ៥,២០០ រៀល/លីត្រ។

September 12, 2022

អតីតសង្សារដាក់លក់ដេញថ្លៃវត្ថុអនុស្សាវរីយ៍របស់មហាសេដ្ឋី Elon Musk

Jennifer Gwynne សង្សារកាលពីជំនាន់នៅសិក្សារបស់មហាសេដ្ឋី Elon Musk កំពុងដាក់លក់ដេញថ្លៃវត្ថុអនុស្សាវរីយ៍ដែលនាងបានទទួលពីលោក Musk កាលពីសហសវត្សរ៍មុន។

វត្ថុអនុស្សាវរីយ៍ទាំងនេះនឹងត្រូវបានលក់តាមរយៈក្រុមហ៊ុនលក់ដេញថ្លៃ RR Auction ដែលមានទីស្នាក់ការនៅ Boston សហរដ្ឋអាម៉េរិក។ យោងតាម RR Auction អ្នកស្រី Gwynne និង Musk ចាប់ផ្ដើមណាត់ជួបគ្នាតាំងពីឆ្នាំ ១៩៩៤ ពេលពួកគេធ្វើជាទីប្រឹក្សាឱ្យអន្តេវាសិកដ្ឋានមួយ។ មិនយូរប៉ុន្មានបន្ទាប់ពីបានបញ្ចប់ការសិក្សានៅសាកលវិទ្យា Pennsylvania លោក Musk ក៏ចាប់ផ្ដើមចូលសិក្សាថ្នាក់បណ្ឌិតនៅសាកលវិទ្យាល័យ Stanford ប៉ុន្តែបានបោះបង់ការសិក្សានេះដើម្បីបង្កើត Zip2 ដែលជាក្រុមហ៊ុនដំបូងរបស់គាត់។

វត្ថុអនុស្សាវរីយ៍ដែលត្រូវបានដាក់លក់ដេញថ្លៃរួមមាន រូបថតកាលពីវ័យក្មេងចំនួន ១៨ សន្លឹករបស់លោក Musk ពេលសិក្សានៅសាកលវិទ្យាល័យ Pennsylvania រួមនឹងវត្ថុអនុស្សាវរីយ៍ជាច្រើនទៀតដែលបង្ហាញអំពីភាពស្និទ្ធស្នាលរវាង Musk និង Gwynne។

រូបថតខាងលើបង្ហាញថា ជីវិតកាលពីនៅរៀនរបស់ Musk មានភាពសាមញ្ញ មុនពេលបានទទួលជោគជ័យ ៖ ជប់លៀងក្នុងបន្ទប់នៅអន្តេវាសិកដ្ឋាន ដើរលេងជាមួយមិត្តភក្ដិ ឬស្និទ្ធនឹងសង្សារ។

វត្ថុអនុស្សាវរីយ៍ដែលមានតម្លៃខ្ពស់ជាងគេនាបច្ចុប្បន្នគឺ បំបុត្រជូនពរថ្ងៃកំណើតដែលមានហត្ថលេខារបស់លោក Musk បន្ទាប់មកគឺកងកដែល Musk បានជូនក្នុងថ្ងៃកំណើតរបស់ Gwynne។

គិតមកដល់ពេលនេះ សំបុត្រជូនពរត្រូវបានគេឱ្យថ្លៃ ៧,០០០ ដុល្លារ ប៉ុន្តែ RR Auction ជឿថា វាអាចត្រូវបានលក់ក្នុងតម្លៃ ១០,០០០ ដុល្លារ។

កងកមាសដែល Musk បានជូន Gwynne ធ្វើពីមាស មានដាំត្បូង ១ គ្រាប់ដែលរុករកបានពីអណ្ដូងរ៉ែ នៅ សំប៊ី និងធ្លាប់ជាកម្មសិទ្ធិរបស់លោក Errol ឪពុករបស់លោក Musk ដែលជាវិស្វករ និងជាអ្នកអភិវឌ្ឍអចលនទ្រព្យ ដែលមានទ្រព្យច្រើនមួយនៅ អាហ្វ្រិកខាងត្បូង។

ក្រុមអ្នកចូលចិត្តមហាសេដ្ឋី Elon Musk អាចចូលរួមការដេញថ្លៃដែលនឹងត្រូវបញ្ចប់នៅថ្ងៃទី ១៤ កញ្ញា ២០២២ ខាងមុខ៕

September 12, 2022

ថ្មផ្ទុកថាមពលនឹងក្លាយជាគ្រោងឆ្អឹងសំខាន់មួយរបស់រថយន្តអគ្គិសនី?

ថ្មផ្ទុកថាមពលរបស់រថយន្តអគ្គិសនី មិនមែនជាឧបករណ៍មួយផ្ទាំងធំស្ថិតនៅក្នុង និងជាប់ជាមួយនឹងតួរថយន្តឡើយ ពោលគឺវានៅដាច់ដោយឡែក នាំឱ្យក្រុមអ្នកផលិតរថយន្តអគ្គិសនីជួបបញ្ហានៅពេលចង់ធ្វើឱ្យរថយន្តរត់បានឆ្ងាយជាងមុន និងនៅតែស្រាល។

រថយន្ត Tesla Model S ប្រើប្រាស់ថ្មប្រភេទគ្រាប់តូចដូចទៅនឹងថ្មពិល ហើយមានចំនួនតិចច្រើនអាស្រ័យលើប្រភេទរថយន្ត។ រថយន្តដែលធ្ងន់នឹងត្រូវបំពាក់ថ្មកាន់តែច្រើន។

រថយន្តអគ្គិសនីមួយគ្រឿងដែលបរបានឆ្ងាយគឺទាមទារឱ្យមានថ្មផ្ទុកថាមពលកាន់តែច្រើន ដូច្នេះទម្ងន់ថ្មទាំងនោះនឹងធ្វើឱ្យរថយន្តកាន់តែធ្ងន់ និងត្រូវការគ្រោងឆ្អឹង ប្រព័ន្ធគ្រឿងក្រោម និងកង់រឹងមាំ ហើយប្រការនេះក៏កាន់តែធ្វើឱ្យទម្ងន់របស់រថយន្តកើនឡើង ទាមទារឱ្យមានថ្មផ្ទុកថាមពលកាន់តែច្រើនបន្ថែមទៀតដើម្បីរត់បានឆ្ងាយជាងមុន។ បញ្ហានេះ ពិតជាពិបាកដោះស្រាយ ដោយសារជាវដ្ដមួយដែលបង្កបញ្ហាមិនចេះឈប់ទៅលើទម្ងន់របស់រថយន្តអគ្គិសនី។

ដើម្បីដោះស្រាយបញ្ហាខាងលើ បច្ចុប្បន្ន ក្រុមអ្នកផលិតរថយន្តអគ្គិសនី ក្នុងនោះមាន Tesla របស់ សហរដ្ឋអាម៉េរិក និង BYD របស់ ប្រទេសចិន ជាដើម កំពុងតែអភិវឌ្ឍរូបរាងរបស់ថ្មផ្ទុកថាមពលនេះឡើងវិញ ដើម្បីឱ្យវាក្លាយទៅជាផ្នែកមួយនៃគ្រោងឆ្អឹងរបស់រថយន្ត ដោយវាត្រូវដើរតួនាទីជាថ្មផ្ទុកថាមពលអគ្គិសនីផង និងជាគ្រោងឆ្អឹងដ៏រឹងមាំរបស់រថយន្តផង។

បើសិនជាធ្វើបានដូចខាងលើ រថយន្តអគ្គិសនីជំនាន់ក្រោយៗប្រាកដជាមានទម្ងន់កាន់តែស្រាល កាត់តែរឹងមាំ ហើយថ្មកាន់តែអាចផ្ទុកថាមពលអគ្គិសនីបានច្រើនជាងមុន អនុញ្ញាតឱ្យបើកបរបានរហូតដល់រាប់ពាន់គីឡូម៉ែត្រ បន្ទាប់ពីបានបញ្ចូលថាមពលពេញ៕

September 10, 2022

ប្រទេសថៃ ចំណាយ ៤ ពាន់លានដុល្លារអាម៉េរិក ដើម្បីជួយដល់ការផលិតស្រូវ

ប្រទេសថៃ ដែលជាអ្នកនាំចេញអង្ករធំជាងគេលំដាប់ទីពីរក្នុងពិភពលោក ថ្មីៗនេះបានបញ្ចេញកញ្ចប់ជំនួយសេដ្ឋកិច្ចតម្លៃជាង ៤ ពាន់លានដុល្លារ ដើម្បីគាំទ្រដល់ការផលិតស្រូវ។

ទន្ទឹមនឹងកញ្ចប់ជំនួយខាងលើ អាជ្ញាធរថៃ ក៏កំពុងរកវិធីដើម្បីដំឡើងថ្លៃអង្ករនាំចេញ ក្នុងពេលដែលការចំណាយលើការដាំដុះស្រូវ បានកើនឡើងខ្ពស់ជិតទ្វេដង ធៀបនឹង ២ ឆ្នាំមុន។

ប្រភពព័ត៌មានឱ្យដឹងថា យោងតាមគណៈកម្មការគ្រប់គ្រង និងគោលនយោបាយជាតិស្ដីពីស្រូវអង្ករ កញ្ចប់ជំនួយតម្លៃជាង ៤ ពាន់លានដុល្លារខាងលើគឺសម្រាប់ជួយដល់គម្រោងធានាប្រាក់ចំណូលពីការលក់ស្រូវអង្កររបស់ពលរដ្ឋថៃប្រមាណ ៤.៦ លានគ្រួសារ នៅក្នុងរដូវធ្វើស្រែសំខាន់ក្នុងឆ្នាំ ២០២២-២០២៣។

គណៈកម្មការគ្រប់គ្រង និងគោលនយោបាយជាតិស្ដីពីស្រូវអង្កររបស់ ប្រទេសថៃ ក៏អនុម័តលើវិធានការជំនួយផ្សេងៗទៀតដើម្បីរក្សាតម្លៃអង្ករ ក្នុងនោះមានដូចជាការលើកទឹកចិត្តដល់កសិករ កុំឱ្យសម្រុកលក់ស្រូវលើទីផ្សារ និងការផ្ដល់ការប្រាក់ក្នុងអត្រា ៣% សម្រាប់ក្រុមហ៊ុន សហគ្រាសទាំងឡាយណាដែលយល់ព្រមរក្សាទុកអង្ករក្នុងឃ្លាំង ក្នុងគ្រាដែលប្រភពផ្គត់ផ្គង់លើទីផ្សារថយចុះ។

យោងតាមស្ថិតិ ក្នុងរយៈពេល ៧ ខែដើមឆ្នាំនេះ ប្រទេសថៃ បាននាំចេញអង្ករជិត ៤ លានតោន តម្លៃជាង ១.៩ ពាន់លានដុល្លារ ដោយបរិមាណស្រូវបានកើន ៥៨% ធៀបនឹង ៧ ខែដើមឆ្នាំ ២០២១ ប៉ុន្តែ ទំហំទឹកប្រាក់កើនឡើងតែប្រហែល ៣៤% ប៉ុណ្ណោះ។

អាជ្ញាធរថៃ បានឱ្យដឹងថា ការចំណាយលើការផលិតស្រូវបានកើនឡើងទ្វេដង ធៀបនឹង ២ ឆ្នាំមុន ដោយសារផលប៉ះពាល់ពីសង្គ្រាមនៅ អ៊ុយក្រែន និងបញ្ហាអាកាសធាតុ ដែលនាំឱ្យផលិតផលថែទាំការពារស្រូវមានតម្លៃខ្ពស់ ស្រូវផ្ដល់ទិន្នផលទាប ខណៈដែលតម្លៃស្រូវអង្ករលើទីផ្សារមិនឡើងប៉ុន្មាន។ ដូច្នេះ ប្រទេសថៃ នឹងដំឡើងថ្លៃអង្ករនាំចេញនាពេលខាងមុខ ដើម្បីឱ្យសមស្របជាមួយនឹងការចំណាយលើការដាំដុះ៕

September 10, 2022

អឺរ៉ុប បញ្ចេញប្រាក់ ៥០០ ពាន់លានដុល្លារ ដើម្បីជួយសម្រាលបញ្ហាចំណាយលើថាមពលរបស់ប្រជាជន

ទឹកប្រាក់សរុបដែល អង់គ្លេស និង សហភាពអឺរ៉ុប (EU) គ្រោងនឹងបញ្ចេញដើម្បីជួយបង់ថ្លៃវិក្កយបត្រថាមពលខ្លះជូនប្រជាជន និងសហគ្រាស បានកើនឡើងដល់ជាង ៥០០ ពាន់លានដុល្លារអាម៉េរិក។

រដ្ឋាភិបាលអង់គ្លេស ទើបតែបានបញ្ជាក់អំពីផែនការផ្ដល់ជំនួយជាថ្លៃថាមពលសម្រាប់គ្រួសារ និងសហគ្រាសរបស់ប្រទេសនេះ ដើម្បីទប់ស្កាត់បញ្ហាឱនភាពសេដ្ឋកិច្ចនៅក្នុងរដូវរងាឆ្នាំនេះ។ សហគមន៍អ្នកវិភាគយល់ថា ផែនការខាងលើរបស់ អង់គ្លេស អាចឡើងដល់ ១៥០ ពាន់លានផោន (ប្រហែល ១៥០ ពាន់លានដុល្លារអាម៉េរិក)។

គិតជាសរុប កញ្ចប់ជំនួយផ្នែកថាមពល នៅទូទាំងអឺរ៉ុប (EU បូកនឹង អង់គ្លេស) បានឡើងដល់ជាង ៥០០ ពាន់លានអឺរ៉ូ (៥០០ ពាន់លានដុល្លារអាម៉េរិ) ទៅហើយ នេះបើតាម CNN។

ចាប់ពីខែតុលាខាងមុខ គ្រួសារដែលមានជីវភាពមធ្យមនៅ ប្រទេសអង់គ្លេសនឹងត្រូវចំណាយមិនលើសពី ២,៥០០ ផោន សម្រាប់វិក្កយបត្រថាមពលក្នុងរយៈពេល ២ ឆ្នាំខាងមុខ។ រដ្ឋាភិបាលអង់គ្លេស ក៏នឹងផ្ដល់ជំនួយដល់បណ្ដាក្រុមហ៊ុន សហគ្រាស និងអង្គការក្រៅរដ្ឋាភិបាល រួមនឹងស្ថាប័នសាធារណៈ នៅក្នុងអំឡុង ៦ ខែទៅមុខ ឬយូរជាងនេះ។

Salomon Fiedler អ្នកវិភាគប្រចាំធនាគារ Berenberg ឱ្យដឹងថា គិតដោយឡែក កញ្ចប់ជំនួយសម្រាប់គ្រួសារនៅ អង់គ្លេស គឺអាចឡើងដល់ ១០០ ពាន់លានផោន ពោលគឺជាង ៤% ធៀបនឹង GDP របស់ប្រទេសនេះ។

បច្ចុប្បន្ន ការចំណាយលើថាមពលជាមធ្យមប្រចាំរបស់គ្រួសារមួយនៅ អង់គ្លេស បានកើន ៥៤% ឡើងដល់ ១,៩៧១ ផោន។ បើសិនមិនមានកញ្ចប់ជំនួយ ខ្ទង់ចំណាយនៃនឹងឡើងដល់លើសពី ៣,៥០០ ផោន នៅក្នុងខែតុលា ហើយអាចខ្ពស់ជាងនេះនៅឆ្នាំបន្ទាប់។ ចំណែកក្រុមហ៊ុន សហគ្រាសជាច្រើននៅ អង់គ្លេស ក៏បានប្រកាសថា មិនអាចឆ្លងផុតរដូវរងានេះ។

«តម្លៃដែលត្រូវខាតដោយសារការមិនធ្វើសកម្មភាព នឹងមានទំហំធំជាងឆ្ងាយធៀបនឹងការចំណាយក្នុងការធ្វើអន្តរាគមន៍» រដ្ឋមន្ត្រីហិរញ្ញវត្ថុអង់គ្លេស Kwasi Kwarteng បានបញ្ជាក់ដូច្នេះ៕

September 10, 2022

Category: សង្គម និងសេដ្ឋកិច្ច