សង្គម និងសេដ្ឋកិច្ច - La Reine Media

គម្រោងវិនិយោគថ្មីចំនួន 6 ដែលមានទុនសរុប 255 លានដុល្លារអាម៉េរិក នឹងបង្កើតការងារ 5 ពាន់កន្លែងនៅ កម្ពុជា

គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួន 6 ដែលមានទុនវិនិយោគសរុបប្រមាណ 255 លានដុល្លារអាម៉េរិក និងគ្រោងបង្កើតការងារបានជិត 5,000 កន្លែង នៅក្នុងខេត្តក្រុងមួយចំនួនរួមមាន ខេត្តព្រះសីហនុ, ខេត្តកំពង់ចាម, រាជធានីភ្នំពេញ, បាត់ដំបង, កំពង់ស្ពឺ, កំពង់ធំ, កំពត, កណ្តាល, កោះកុង, មណ្ឌលគិរី, ឧត្តរមានជ័យ, ព្រះវិហារ, ព្រៃវែង, ពោធិ៍សាត់, សៀមរាប និងតាកែវ។

ក្រុមហ៊ុនវិនិយោគទាំងនេះរួមាន ៖

«HUAN HAI BO LAI INTERNATIONAL INVESTMENT CO., LTD» ៖ គម្រោងវិនិយោគសាងសង់ និងអាជីវកម្មសណ្ឋាគារថ្នាក់ផ្កាយ 5 ចំនួន 957 បន្ទប់ ដែលមានទីតាំងវិនិយោគស្ថិតនៅភូមិ 4, សង្កាត់លេខ 4, ក្រុងព្រះសីហនុ, ខេត្តព្រះសីហនុ ក្នុងទុនវិនិយោគចំនួន 168 លានដុល្លារអាម៉េរិក និងអាចបង្កើតការងារបានចំនួន 955 កន្លែង។

«GREEN VISION RISING CO., LTD» ៖ គម្រោងបង្កើតរោងចក្រកែច្នៃឈើដាំគ្រប់ប្រភេទ (Veneer, Wood Pallet, Plywood…) ដែលមានទីតាំងវិនិយោគស្ថិតនៅភូមិស្រឡៅនិងភូមិអណ្តូងច្រុះ ឃុំអំពិល ស្រុកកំពង់សៀម ខេត្តកំពង់ចាម ក្នុងទុនវិនិយោគប្រមាណ 44.2 លានដុល្លារអាម៉េរិក និងអាចបង្កើតការងារបានចំនួន 1,414 កន្លែង។

«TELEMOBILE (CAMBODIA) CORPORATION (T.C.C)» ៖ គម្រោងវិនិយោគសាងសង់ ដំឡើង និងប្រតិបត្តិការបង្គោលអង់តែនទូរគមនាគមន៍ ដែលមានទីតាំងវិនិយោគស្ថិតនៅរាជធានីភ្នំពេញ បាត់ដំបង កំពង់ចាម កំពង់ស្ពឺ កំពង់ធំ កំពត កណ្តាល កោះកុង មណ្ឌលគិរី ឧត្តរមានជ័យ ព្រះវិហារ ព្រៃវែង ពោធិ៍សាត់ សៀមរាប និងតាកែវ ក្នុងទុនវិនិយោគប្រមាណ 27.5 លានដុល្លារអាម៉េរិក និងអាចបង្កើតការងារបានចំនួន 106 កន្លែង។

«ZHUO KANG SHOES CO., LTD» ៖ គម្រោងបង្កើតរោងចក្រផលិតស្បែកជើងគ្រប់ប្រភេទ ដែលមានទីតាំងវិនិយោគស្ថិតនៅភូមិកន្ទោកជើង, សង្កាត់កន្ទោក, ខណ្ឌកំបូល, រាជធានីភ្នំពេញ ក្នុងទុនវិនិយោគប្រមាណ 5.6 លានដុល្លារអាម៉េរិក និងអាចបង្កើតការងារបានចំនួន 2,149 កន្លែង។

«FANMAR AUTO PART (CAMBODIA) CO., LTD» ៖ គម្រោងបង្កើតរោងចក្រផលិតគ្រឿងបន្លាស់រថយន្តគ្រប់ប្រភេទ ដែលមានទីតាំងវិនិយោគស្ថិតនៅភូមិអន្លង់គង, សង្កាត់ព្រៃស, ខណ្ឌដង្កោ, រាជធានីភ្នំពេញ ក្នុងទុនវិនិយោគប្រមាណ 5.2 លានដុល្លារអាម៉េរិក និងអាចបង្កើតការងារបានចំនួន 127 កន្លែង។

«YANLING ACCESSORIES (CAMBODIA) CO., LTD» ៖ គម្រោងបង្កើតរោងចក្រខារអំបោះគ្រប់ប្រភេទ ដែលមានទីតាំងវិនិយោគស្ថិតនៅភូមិព្រៃខ្វាវ, ឃុំរកាកោះ, ស្រុកគងពិសី, ខេត្តកំពង់ស្ពឺ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 203 កន្លែង៕

November 25, 2022

ហ្វ៊ីលីពីន បញ្ចុះអត្រាពន្ធសម្រាប់យានយន្តអគ្គិសនី ដើម្បីកាត់បន្ថយការពឹងផ្អែកលើឥន្ធនៈនាំចូលពីបរទេស

កាលពីថ្ងៃទី 24 វិច្ឆិកា 2022 ក្រុមប្រឹក្សាអន្តរវិស័យមួយរបស់ ហ្វ៊ីលីពីន ដែលដឹកនាំដោយប្រធានាធិបតី Ferdinand Marcos Jr បានអនុម័តលើការបន្ថយអត្រាពន្ធចំពោះយានយន្តអគ្គិសនី ដើម្បីជំរុញការប្រើប្រាស់ក្នុងគ្រាដែលការចំណាយទៅលើឥន្ធនៈកើនឡើងខ្ពស់។

ប្រធានាធិបតី Ferdinand Marcos Jr នឹងចេញអនុក្រឹត្យស្ដីពីការកាត់បន្ថយពន្ធឱ្យចុះមកនៅត្រឹម 0% សម្រាប់យានយន្តអគ្គីសនី ដែលរួមមានដូចជា កូនរថយន្ត, រថយន្តក្រុង រថយន្តដឹកទំនិញ ម៉ូតូ និងកង់ ក៏ដូចជាគ្រឿងបន្លាស់យានយន្តសម្រាប់យានយន្តអគ្គិសនី ក្នុងរយៈពេល 5 ឆ្នាំ។

នៅ ហ្វ៊ីលីពីន ពន្ធនាំចូលបច្ចុប្បន្នសម្រាប់យានយន្តអគ្គិសនីគឺចាប់ពី 5% ដល់ 30%។ ក៏ប៉ុន្តែ អត្រាពន្ធសម្រាប់យានយន្ត hybrid (យានយន្តដែលដំណើរការដោយអគ្គិសនីផង សាំងផង) នឹងត្រូវបានរក្សាឱ្យនៅដដែល។

រដ្ឋមន្ត្រីក្រសួងផែនការសេដ្ឋកិច្ចហ្វ៊ីលីពីន Arsenio Balisacan ឱ្យដឹងថា សេចក្ដីសម្រេចខាងលើគឺក្នុងបំណងពង្រីកទីផ្សារ និងលើកទឹកចិត្ត ក៏ដូចជាជំរុញឱ្យមានការប្រើប្រាស់យានយន្តអគ្គិសនីកាន់តែច្រើន ដើម្បីកែលំអសន្តិសុខថាមពលដោយការកាត់បន្ថយការពឹងផ្អែកលើឥន្ធនៈនាំចូល និងជំរុញការអភិវឌ្ឍប្រព័ន្ធអេកូឡូស៊ីនៃវិស័យអគ្គិសនីក្នុងប្រទេស។

បច្ចុប្បន្ន អ្នកប្រើប្រាស់នៅ ហ្វ៊ីលីពីន ត្រូវចំណាយប្រាក់ចាប់ពី 21,000 ដុល្លារអាម៉េរិក ដល់ 49,000 ដុល្លារ ដើម្បីទិញបានរថយន្តអគ្គិសនីមួយគ្រឿង ដែលនេះខ្ពស់ជាងឆ្ងាយបើធៀបនឹងពី 19,000 ដល់ 26,000 ដុល្លារសម្រាប់រថយន្តចំហេះក្នុង។

យោងតាមទិន្នន័យរបស់ រដ្ឋាភិបាលហ្វ៊ីលីពីន ក្នុងចំណោមរថយន្តជាង 5 លានគ្រឿងដែលបានចុះឈ្មោះនៅប្រទេសនេះ មានតែ 9,000 គ្រឿងប៉ុណ្ណោះដែលជារថយន្តអគ្គិសនី ក្នុងនោះ ភាគច្រើនគឺជាកូនរថយន្ត។

ចំណែកទិន្នន័យពី ការិយាល័យពាណិជ្ជកម្មអន្តរជាតិរបស់ សហរដ្ឋអាមេរិក វិញ បានបង្ហាញថា រថយន្តអគ្គិសនីផ្ទាល់ខ្លួនរួមចំណែកតែ 1% ប៉ុណ្ណោះនៅក្នុងទីផ្សារ ហើយភាគច្រើនគឺជាកម្មសិទ្ធិរបស់អ្នកមានលំដាប់កំពូល៕

November 25, 2022

Ronaldo បង្កើតបានឯតទគ្គកម្មស៊ុតបញ្ចូលទីនៅ World Cup ចំនួន 5 រដូវកាល

កីឡាករខ្សែប្រយុទ្ធវ័យ 37 ឆ្នាំ លោក Cristiano Ronaldo បានក្លាយជាកីឡាករដំបូងគេដែលរកបានគ្រាប់បាល់នៅក្នុង 5 រដូវកាលរបស់ World Cup បន្ទាប់ពីបានស៊ុតបញ្ចូលទីរបស់ ហ្កាណា កាលពីយប់ថ្ងៃទី 25 វិច្ឆិកា 2022។

នាទីទី 61 ខ្សែប្រយុទ្ធ Joao Felix បញ្ជូនបាល់ឱ្យ Ronaldo ដែលរត់កាត់បញ្ឆិតទៅកាន់តំបន់គ្រោះថ្នាក់បានលឿនជាងខ្សែការពារកណ្ដាល Mohammed Salisu។ ប្រធានក្រុមព័រទុយហ្គាល ក៏រុញបាល់ទៅមុខ និងដួលដោយសារឥទ្ធិពលពីកីឡាករខ្សែការពារកណ្ដាលរបស់ ហ្កាណា។ ភ្លាមនោះ អាជ្ញាកណ្ដាលជនជាតិអាម៉េរិក Ismail Elfath ក៏ផ្លុំកញ្ចែពិន័យ។

មុនពេលស៊ុតគ្រាប់បាល់ពិន័យ Ronaldo ថើបបាល់ និងដកដង្ហើមតាមមាត់ជាបន្តបន្ទាប់ មុននឹងរត់ចូលទាត់បាល់ឱ្យហោះខ្ពស់សំដៅទៅកាន់ជ្រុងខាងឆ្វែង ធ្វើឱ្យអ្នកចាំទី Lawrence Ati-Zigi មិនអាចរារាំងដល់។ កំពូលតារាបាល់ទាត់វ័យ 37 ឆ្នាំនេះ ក៏ងាកក្រោយ អបអរទៅតាមរបៀបដូចសព្វមួយដង។ Ronaldo ក្លាយជាកីឡាករដំបូងគេដែលរកបានគ្រាប់បាល់នៅក្នុង 5 រដូវកាលរបស់ World Cup។

Ronaldo បានចូលលេងនៅ World Cup ដំបូងកាលពីឆ្នាំ 2006 ក្នុងវ័យ 21 ឆ្នាំ និងបានស៊ុតបញ្ចូលទី 1 គ្រាប់ ជួយឱ្យ ព័រទុយហ្កាល់ ឈ្នះ អ៊ីរ៉ង់ 2-0។ 4 ឆ្នាំក្រោយមកនៅ អាហ្វ្រិកខាងត្បូង Ronaldo បន្តរកបាន 1 គ្រាប់នៅក្នុងការប្រកួតជាមួយ កូរ៉េខាងត្បូង ដែលទទួលបានលទ្ធផល 7-0។ World Cup 2014 នៅ ប្រេស៊ីល ប្រធានក្រុមរបស់ ព័រទុយហ្កាល់ ក៏រកបានគ្រាប់បាល់ដែលកំណត់ឱ្យឈ្នះ ហ្កាណា 2-1។ មកដល់ World Cup 2018 Ronaldo បង្កើតបាន hat-trick (រកបាន 3 គ្រាប់តែម្នាក់ឯង) នៅក្នុងការប្រកួតជាមួយនឹង អេស្ប៉ាញ ដែលទទួលបានលទ្ធផល 3-3។ Ronaldo រកបានគ្រាប់បាល់សរុបចំនួន 8 គ្រាប់នៅ World Cup។

November 25, 2022

ក្រុមហ៊ុនផលិតរថយន្តអគ្គិសនីសុទ្ធរបស់ វៀតណាម នាំចេញ VF 8 ជើងដំបូងទៅកាន់ទីផ្សារអន្តរជាតិ

បច្ចុប្បន្ន រថយន្តអគ្គិសនី VinFast របស់ Vingroup កំពុងស្ថិតនៅឯកំពង់ផែភាគខាងជើងប្រទេសវៀតណាម ដើម្បីត្រៀមនាំចេញទៅកាន់ សហរដ្ឋអាម៉េរិក។

រថយន្តអគ្គិសនី VinFast ដែលសុទ្ធតែជាម៉ូដែល VF8 នេះ គ្រោងនឹងត្រូវបានលើកដាក់កប៉ាល់នៅថ្ងៃស្អែក (25 វិច្ឆិកា) មុនពេលយកទៅប្រគល់ដល់ដៃអតិថិជននៅ សហរដ្ឋអាម៉េរិក និង កាណាដា នៅចុងឆ្នាំនេះ។

នៅក្នុងទីផ្សារអាម៉េរិក VinFast VF8 មានតម្លៃចាប់ពី 40,700 ដុល្លារអាម៉េរិក សម្រាប់កំណែ Eco និងពី 47,700 ដុល្លារសម្រាប់កំណែ Plus (មិនទាន់មានថ្ម)។ តម្លៃជួលថ្មនៅក្នុងទីផ្សារខាងលើគឺចាប់ពី 35 ដុល្លារដល់ 110 ដុល្លារ។

មុននេះ VinFast VF8 ក៏ត្រូវបានដាក់លក់នៅក្នុងទីផ្សារវៀតណាម ក្នុងនោះ កំណែ Eco បំពាក់ម៉ូទ័រអគ្គិសនីកម្លាំង 260 kW អាចធ្វើដំណើរបាន 420 គីឡូម៉ែត្រ បន្ទាប់ពីបញ្ចូលថាមពលពេញ។ ចំណែកកំណែ Plus ប្រើប្រាស់ម៉ូទ័រអគ្គិសនី 300 kW និងបំពាក់ថ្មផ្ទុកថាមពលដែលអាចឱ្យជិះបាន 400 គីឡូម៉ែត្រ ក្រោយបញ្ចូលអគ្គិសនីពេញ៕

November 24, 2022

ប្រទេសថៃ ជំរុញដំណើរការបង្កើតមូលនិធិសន្សំប្រាក់បែបកាតព្វកិច្ចសម្រាប់កម្មករ និយោជិត

ក្រសួងហិរញ្ញវត្ថុថៃ កំពុងជំរុញដំណើរការនៃការបង្កើតមូលនិធិសន្សំប្រាក់បែបកាតព្វកិច្ចសម្រាប់កម្មករ និយោជិត ក្រោយពីរកឃើញថា មូលនិធិសន្សំប្រាក់ដោយស្ម័គ្រចិត្តនាបច្ចុប្បន្ន មិនអាចធានាបានថា ពលរដ្ឋមានប្រាក់ចំណូលគ្រប់គ្រាប់សម្រាប់រស់នៅពេលចូលនិវត្តន៍។

ប្រភពព័ត៌មានពី បាងកក បានឱ្យដឹងថា លោកស្រី Sittasri Nakasiri ប្រធានការិយាល័យប្រឹក្សាផ្នែកផលបត្រវិនិយោគ និងតាមដានមូលនិធិសន្សំ នៃ គណៈកម្មការមូលបត្រ របស់ ប្រទេសថៃ បានឱ្យដឹងថា ប្រទេសថៃ នឹងក្លាយជាសង្គមមនុស្សចាស់ (Ageing Population) នៅពេលដ៏ខ្លីខាងមុខ ដូច្នេះ វិស័យសាធារណៈ និងឯកជន កំពុងរកវិធីសាស្ត្រដើម្បីត្រៀមសម្រាប់ពលរដ្ឋចូលនិវត្តន៍។

សង្គមមនុស្សចាស់គឺជាសង្គមដែលមានអត្រាពលរដ្ឋអាយុច្រើនជាង 65 ឆ្នាំ ខ្ពស់ជាង 14% ធៀបនឹងចំនួនប្រជាជនសរុប។ ក្នុងរយៈពេល 10 ទៀត ចំនួនប្រជាជនដែលមានវ័យលើសពី 65 ឆ្នាំ នៅ ប្រទេសថៃ នឹងកើនឡើងលើសពី 20%។

យោងតាមលោកស្រី Sittasri ការពឹងផ្អែកទៅលើតែមូលនិធិសន្សំប្រាក់ដោយស្ម័គ្រចិត្តគឺមិនគ្រប់គ្រាន់ឡើយ។ បច្ចុប្បន្ន ចំនួនសមាជិករបស់មូលនិធិនេះមានតែជិត 3 លាននាក់ប៉ុណ្ណោះ ពោលគឺមិនដល់ 18% ផង បើធៀបនឹងចំនួនកម្មករ និយោជិតសរុបរបស់ប្រទេសនេះ៕

November 24, 2022

គម្រោងរថភ្លើងក្រោមដី និងទីខ្ពស់នៅ ហាណូយ កំពុងត្រៀមសម្រាប់ដំណើរការសាកល្បង

(វៀតណាម)-គណៈកម្មការគ្រប់គ្រងផ្លូវដែកក្នុងក្រុងហាណូយ (MRB), ក្រុមហ៊ុនម៉ៅការ Sytra នៃគម្រោងផ្លូវដែកក្នុងក្រុង (Metro) Nhon – ស្ថានីយហាណូយ ទើបតែបានប្រកាសអំពីការចាប់ផ្ដើមដំណើរការសាកល្បងកំណាត់ផ្លូវដែកលើទីខ្ពស់ ចាប់ពីថ្ងៃទី 05 ធ្នូ ខាងមុខ។

ការដំណើរការសាកល្បងខាងលើនេះ នឹងត្រូវបានចាត់ទុកថា បញ្ចប់ជាស្ថាពរ នៅពេលការធ្វើតេស្តនានាសុទ្ធតែទទួលបានជោគជ័យ។

គម្រោងផ្លូវដែកក្នុងក្រុងកំណាត់ ញ៉ូន (Nhon) – ស្ថានីយហាណូយ ដែលនឹងដាក់ឱ្យដំណើរការសាកល្បងនេះមានប្រវែង 12.5 គីឡូម៉ែត្រ ក្នុងនោះមានជាង 8 គីឡូម៉ែត្រស្ថិតនៅលើទីខ្ពស់ និង 4 គីឡូម៉ែទ្រស្ថិតនៅក្រោមដី។ គម្រោងនេះមានស្ថានីយសម្រាប់អ្នកដំណើរចំនួន 12 និងចំណត់សម្រាប់រថភ្លើងមួយទំហំជាង 15 ហិកតា រួមនឹងរថភ្លើងចំនួន 10 ខ្សែ។

គម្រោងដែលនឹងត្រូវបានដាក់ឱ្យដំណើរការជាផ្លូវការទាំងស្រុងនៅឆ្នាំ 2027 ខាងលើនេះ មានទុនវិនិយោគសរុបប្រហែល 1,176 លានអឺរ៉ូ ដែលជាឥណទានពី ODA របស់ បារាំង, ធនាគារវិនិយោគអឺរ៉ុប, ទីភ្នាក់ងារអភិវឌ្ឍបារាំង, ធនាគារអភិវឌ្ឍអាស៊ី និង 218 លានអឺរ៉ូ ទៀត គឺជាថវិកាបដិភាគរបស់ វៀតណាម៕

November 24, 2022

កម្ពុជា ផ្សព្វផ្សាយអំពី «ការអនុវត្តកិច្ចព្រមព្រៀងពាណិជ្ជកម្មសេរីកម្ពុជា-កូរ៉េខាងត្បូង

នៅទីស្តីការក្រសួងពាណិជ្ជកម្ម នាព្រឹកថ្ងៃទី 24 វិច្ឆិកា 2022 ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានអញ្ជើញចូលរួមជាអធិបតីក្នុងពិធីបើកសិក្ខាសាលាផ្សព្វផ្សាយ ស្តីពីការអនុវត្តកិច្ចព្រមព្រៀងពាណិជ្ជកម្មសេរីកម្ពុជា-សាធារណរដ្ឋកូរ៉េ (CKFTA) សម្រាប់ការនាំចេញ។

សិក្ខាសាលាផ្សព្វផ្សាយខាងលើនេះ ក៏មានវត្តមានរបស់មន្ត្រីថ្នាក់ដឹកនាំក្រសួងពាណិជ្ជកម្មកម្ពុជា តំណាងរដ្ឋាភិបាលកូរ៉េខាងត្បូង និងតំណាងវិស័យឯកជនផងដែរ។

គោលបំណងនៃសិក្ខាសាលានេះគឺដើម្បីលើកកម្ពស់ការយល់ដឹង និងផ្សព្វផ្សាយអំពីនីតិវិធីនៃការនាំចេញដល់វិស័យឯកជន ដើម្បីជំរុញការនាំចេញ និងការទាញយកអត្ថប្រយោជន៍ជាអតិបរិមាពីការអនុវត្តកិច្ចព្រមព្រៀង CKFTA។ កិច្ចព្រមព្រៀង CKFTA នេះ នឹងបំពេញបន្ថែមទៅលើកិច្ចព្រមព្រៀងពាណិជ្ជកម្មសេរី អាស៊ាន-កូរ៉េ និងកិច្ចព្រមព្រៀងអាសិប (RCEP) ដែលមានស្រាប់។

យោងតាមលោករដ្ឋមន្ត្រីក្រសួងពាណិជ្ជកម្ម កិច្ចព្រមព្រៀង CKFTA នេះ នឹងជួយបង្កើនទំហំពាណិជ្ជកម្មរវាងប្រទេសទាំងពីរ។ នៅក្រោមកិច្ចព្រមព្រៀង CKFTA កម្ពុជាបាន បើកទីផ្សារ ចំនួន 89.09% នៃបន្ទាត់ពន្ធគយសរុប ខណៈដែលភាគីកូរ៉េបានបើកទីផ្សារចំនួន 95.03% នៃបន្ទាត់ពន្ធគយសរុប ក្នុងនោះ កម្ពុជា នឹងអាចនាំចេញទំនិញក្នុងអត្រាពន្ធគយសូន្យភ្លាមៗ បន្ទាប់ពីកិច្ចព្រមព្រៀងចូលជាធរមាន។

ក្រសួងពាណិជ្ជកម្មកម្ពុជា បានឱ្យដឹងថា កិច្ចព្រមព្រៀង CKFTA ត្រូវបាន កម្ពុជា ផ្តល់សច្ចាប័នកាលពីថ្ងៃទី 29 មករា 2022 ខណៈភាគីកូរ៉េ បានផ្ដល់សច្ចាប័ន និងជូនដំណឹងមក កម្ពុជា កាលពីថ្ងៃទី 02 តុលា 2022។ កិច្ចព្រមព្រៀងនេះ នឹងចូលជាធរមាននៅថ្ងៃទី 01 ធ្នូ 2022៕

November 24, 2022

គម្រោងប្រព័ន្ធថ្មផ្ទុកថាមពលអគ្គិសនីដែលធំជាងគេបង្អស់នៅទ្វីបអឺរ៉ុប

គម្រោង Pillswood ដែលជាប្រព័ន្ធថ្មផ្ទុកថាមពលទំហំ 98 MW ស្ថិតនៅក្បែរទីក្រុង Hull ក្នុងតំបន់ East Yorkshire ភាគខាងកើតនៃ ប្រទេសអង់គ្លេស ត្រូវបានសម្ពោធដាក់ឱ្យដំណើរការកាលពីថ្ងៃទី 21 វិច្ឆិកា 2022។

គម្រោង Pillswood ដែលអភិវឌ្ឍដោយក្រុមហ៊ុន Harmony Energy Limited គឺជាប្រព័ន្ធថ្មផ្ទុកថាមពលអគ្គិសនីធំបំផុតនៅ ទ្វីបអឺរ៉ុប និងប្រើប្រាស់បច្ចេកវិទ្យា Megapack 2-ម៉ោង របស់ Tesla ដែលអនុញ្ញាតឱ្យវាផ្ទុកអគ្គិសនីបានរហូតដល់ 196 MWh នៅក្នុងមួយវដ្ដៗ អាចផ្គត់ផ្គង់អគ្គិសនីតាមតម្រូវការរបស់មនុស្សប្រហែល 300,000 គ្រួសារក្នុងរយៈពេល 2 ម៉ោង។

Peter Kavanagh ប្រធានក្រុមហ៊ុន Harmony Energy ឱ្យដឹងថា «នេះគឺជាគម្រោងថ្មផ្ទុកថាមពលអគ្គិសនីទី 3 និងធំជាងគេដែលយើងធ្លាប់បានអភិវឌ្ឍ និងប្រគល់ឱ្យអតិថិជនក្រោយពីសាងសង់រួចរាល់»។

យោងតាម Kavanagh ក្រុមហ៊ុន Harmony Energy នឹងដាក់ឱ្យប្រើប្រាស់ប្រព័ន្ធថ្មផ្ទុកថាមពលអគ្គិសនីចំនួន 5 ទៀត ដែលកំពុងស្ថិតក្នុងដំណាក់កាលសាងសង់ នៅមុនខែតុលា 2023៕

November 24, 2022

មិនអាចលក់ស្រាបៀរបាន ក្រុមហ៊ុន Budweiser ចង់ទាមទារប្រាក់ 47 លានដុល្លារពី FIFA

យោងតាម Foxnews ក្រុមហ៊ុន Budweiser ដែលជាម្ចាស់ឧបត្ថម្ភតាំងពីឆ្នាំ 1988 កំពុងរកវិធីដើម្បីទាមទារមកវិញនូវទឹកប្រាក់ 47 លានដុល្លារអាម៉េរិក ស្មើនឹងជាង 60% នៃខ្ទង់ប្រាក់ដែលក្រុមហ៊ុននេះបានឧបត្ថម្ភ FIFA នៅ កាតា ព្រោះតែមិនត្រូវបានអនុញ្ញាតឱ្យលក់ស្រាបៀរនៅ World Cup 2022។

នៅមុនពិធីបើកការប្រកួតនៅ World Cup 2022 ប្រទេសកាតា បានធ្វើឱ្យមានការភ្ញាក់ផ្អើលខ្លាំងនៅពេលហាមការលក់ស្រាបៀរនៅក្នុង និងក្រៅកីឡដ្ឋានទាំង 8 ក្នុង រដ្ឋធានីដូហា។ ការសម្រេចចិត្តនេះបានបណ្ដាលឱ្យគម្រោងរបស់ Budweiser ដែលជាក្រុមហ៊ុនផលិតស្រាបៀរ និងជាម្ចាស់ឧបត្ថម្ភផ្លូវការសម្រាប់ពានរង្វាន់បាល់ទាត់ពិភពលោក FIFA តាំងពីឆ្នាំ 1986 ត្រូវច្របូកច្របល់។

Bud Zero ដែលជាប្រភេទប៊ីយ៉ែរមិនមានជាតិអាល់កុល របស់ក្រុមហ៊ុន Budweiser នៅតែអាចលក់បាននៅ កាតា។ ប៉ុន្តែ ផលិតផលមានអាយុ 2 ឆ្នាំនេះ រួមចំណែកតែមួយផ្នែកតូចប៉ុណ្ណោះ នៅក្នុងប្រភពចំណូលសរុបរបស់ Anheuser-Busch InBev (ក្រុមហ៊ុនមេរបស់ Budweiser) និងមិនមានការពេញនិយមដូចស្រាបៀរធម្មតា។ នៅរដូវកាល World Cup 2018 នៅ ប្រទេសរុស្ស៊ី អ្នកគាំទ្របានប្រើប្រាស់ស្រាបៀរអស់ 3.2 លានកែវ ក្នុងនោះមានតែ 2% ប៉ុណ្ណោះដែលជាប្រភេទមិនមានអាល់កុល។

ការសម្រេចចិត្តហាមលក់ស្រាបៀរ ត្រូវបាន អាជ្ញាធរដូហា លើកឡើងនៅនាទីទី 89 ក្នុងគ្រាដែល AB InBev កំពុងចរចាដើម្បីបន្តការពន្យារកិច្ចសន្យាឧបត្ថម្ភជាមួយ FIFA ដោយសារកិច្ចព្រមព្រៀងបច្ចុប្បន្ននឹងអស់សុពលភាពក្រោយបញ្ចប់ World Cup 2022។

មុននោះ Bedweiser បានពន្យារពេលសម្រាប់ការឧបត្ថម្ភដល់ FIFA កាលពីឆ្នាំ 2021 បន្ទាប់ពី កាតា ត្រូវបានជ្រើសរើសឱ្យធ្វើជាម្ចាស់ផ្ទះសម្រាប់ World Cup 2022។ ពេលនោះ ក្រុមមន្ត្រីរបស់ កាតា បានធានាថា នឹងបន្ធូរបន្ថយការកំណត់ទៅលើការលក់គ្រឿងភេសជ្ជៈមានជាតិអាល់កុល។

នៅ ប្រទេសកាតា ភ្ញៀវអាចទិញស្រាបៀរបាននៅក្នុងសណ្ឋាគារ និងបារដែលមានអាជ្ញាប័ណ្ណ។ ប្រទេសនេះចាត់ទុកការស្រវឹងនៅទីសាធារណៈថាជាអំពើខុសច្បាប់ និងអាចត្រូវបានពិន័យឱ្យជាប់ពន្ធនាគារកន្លះឆ្នាំ៕

November 24, 2022

បច្ចេកវិទ្យាបញ្ចូលថាមពលថ្មពេញ 80% ដោយប្រើពេលតែ 72 វិនាទី ៖ «ស្មើនឹងការចាក់សាំងនៅស្ថានីយឥន្ធនៈ»!

ក្រុមហ៊ុនធុរកិច្ចថ្មីរបស់ ស្វ៊ីស អភិវឌ្ឍប្រព័ន្ធកូនកាត់ (hybrid) ជាមួយនឹងបច្ចេកវិទ្យាថ្មប្រពៃណី និងបច្ចេកវិទ្យា ស៊ុប៉ែកាប៉ាស៊ីទ័រ (supercapacitor) បញ្ចូលថាមពលឆាប់ពេញ ដែលនេះអាចជួយឱ្យរថយន្តអគ្គិសនីកាន់តែទទួលបានការពេញនិយមប្រើប្រាស់នាពេលដ៏ខ្លីខាងមុខ។

ពេលវេលាជាមធ្យមដើម្បីចាក់សាំងពេញសម្រាប់រថយន្តម៉ាស៊ីនចំហេះក្នុងគឺ 2 នាទី នេះបើតាម វិទ្យាស្ថានឥន្ធនៈអាម៉េរិក។ យោងតាម Interesting Engineering ក្រុមហ៊ុនរបស់ ស្វ៊ីស Morand អភិវឌ្ឍបច្ចេកវិទ្យាថ្មផ្ទុកថាមពលថ្មី ជួយឱ្យការបញ្ចូលអគ្គិសនីចំណាយពេលខ្លីបំផុត ដែលអាចប្រៀបផ្ទឹមជាមួយនឹងការចាក់ប្រេងឥន្ធនៈនៅលើរថយន្តដើរដោយម៉ាស៊ីនចំហេះក្នុង។

បច្ចេកវិទ្យាថ្មីដែលត្រូវបានគេដាក់ឈ្មោះឱ្យថា eTechnology គឺជាប្រព័ន្ធកូនកាត់ដែលប្រើប្រាស់បច្ចេកវិទ្យារបស់ថ្មប្រពៃណី និងបច្ចេកវិទ្យាបច្ចូលថាមពលរហ័ស ស៊ុប៉ែកាប៉ាស៊ីទ័រ (supercapacitor) ដែលត្រូវបានរំពឹងថា នឹងជំរុញឱ្យគ្រប់គ្នាងាកទៅប្រើប្រាស់យានយន្តអគ្គិសនី។ ជាងនេះ បច្ចេកវិទ្យាថ្មីនេះក៏មានអាយុកាលវែងជាងឆ្ងាយ បើធៀបនឹងថ្មប្រភេទ lithium-ion ដែលត្រូវបានប្រើលើរថយន្តអគ្គិសនីបច្ចុប្បន្ន។

នៅក្នុងការសាកល្បង ថ្មគំរូ 7.2 kWh របស់ eTechnology អាចបញ្ចូលថាមពលបាន 80% ដោយប្រើពេលតែ 72 វិនាទី, 98% ចំណាយពេល 120 វិនាទី និង 100% រយៈពេល 2.5 វិនាទី ក្នុងកម្រិត 900 A ឬ 360 kW។

បច្ចេកវិទ្យាថ្មីនេះក៏ដំណើរការយ៉ាងមានប្រសិទ្ធភាពនៅក្នុងអាកាសធាតុអាក្រក់ ជាបញ្ហាដែលថ្មរបស់រថយន្តអគ្គិសនីបច្ចុប្បន្នពិបាកធ្វើបាន។

Morand កំពុងតែសហការជាមួយដៃគូជំនួញដើម្បីនាំយក eTechnology ទៅកាន់ទីផ្សារ។ ក្នុងដំណាក់កាលដំបូង ថ្ម eTechnology នេះអាចមានតម្លៃខ្ពស់ជាងថ្ម lithium-ion ប៉ុន្តែ Morand នឹងបញ្ចុះតម្លៃថ្មប្រភេទថ្មី តាមរយៈការពង្រីកចង្វាក់ផលិតកម្ម៕

ប្រព័ន្ធបញ្ចូលថាមពលសម្រាប់ថ្ម eTechnology របស់ Morand

ថ្មផ្ទុកអគ្គិសនីប្រភេទ eTechnology របស់ Morand

November 24, 2022

Category: សង្គម និងសេដ្ឋកិច្ច