សុភាសិតរបស់ព្រះភិរម្យភាសាអ៊ូ (ក្រមង៉ុយ) បានលើកឡើងថា «ចេះស្ទាក់ស្ទើរល្ងីល្ងើឥតបទ ចេះប្រាកដប្រាក់រត់តាមហៅ» តួយ៉ាងដូច លោកឧកញ៉ា ចេង ខេង អគ្គនាយកក្រុមហ៊ុនអចលនទ្រព្យ ស៊ីភីអិល ខេមបូឌា ប្រភើធី លីមីតធីត ដើមឡើយក្រុមហ៊ុនរបស់លោកបានក្ស័យធនអស់ដើមអស់ចុងគ្មានសល់ ហើយដៃគូក៏រត់ចោលទៀត ដោយនៅពេលនោះក្រុមហ៊ុននៅសល់តែ 10ដុល្លារប៉ុណ្ណោះ ប៉ុន្តែដោយសារការខិតខំប្រឹងប្រែងលោកឧកញ៉ា ក៏ទទួលបានការទុកចិត្តពីដៃគូថ្មី ដើម្បីអភិវឌ្ឍន៍ក្រុមហ៊ុនឱ្យរីកចម្រើនឡើងវិញ។
លោកឧកញ៉ា មានប្រសាសន៍ថា នៅក្នុងឆ្នាំ1997 លោកឧកញ៉ាបានជួបវិនិយោគិនអាមេរិកកាំងម្នាក់ឈ្មោះ ចូ លូខីន ដែលជាអ្នកជំនួញដ៏មានសក្តានុពលខាងវិស័យអចលនទ្រព្យ និងមានក្រុមហ៊ុនដែលជាសាខានៅប្រទេសថៃ ហុងកុង និងហ្វីលីពីន។ លោក ចូ លូខីន គឺជាអ្នកចាប់អារម្មណ៍ដំបូងគេបង្អស់មកលើរូបលោកក្នុងការចូលរួមសហការវិនិយោគលើវិស័យអចលនទ្រព្យនៅកម្ពុជា។ បន្ទាប់មកក៏មានការព្រមព្រៀងបណ្តាក់ទុនវិនិយោគរួមគ្នាលើវិស័យអចលនទ្រព្យនេះដោយលោកឧកញ៉ា ត្រូវបានតែងតាំងជាអគ្គនាយកក្រុមហ៊ុនអចលនទ្រព្យ ស៊ីភីអិល ខេមបូឌាប្រភើធី លីមីតធីត ជាមួយនឹងទុនវិនិយោគរួមគ្នាដំបូងក្នុងទឹកប្រាក់ប្រមាណ3ម៉ឺនដុល្លារ ។
បន្ទាប់ពីបានបោះទុនរួចមក នៅអំឡុងឆ្នាំ1997 វិស័យអចលនទ្រព្យពុំមានសន្ទុះងើបឡើងនោះទេនៅកម្ពុជា ដែលជាហេតុធ្វើឱ្យក្រុមហ៊ុនរបស់លោកដែលទើបបង្កើតថ្មីជាមួយជនជាតិអាមេរិកកាំងត្រូវខាតបង់ជារឿយដល់ទៅរាប់ម៉ឺនដុល្លារ ពោលគឺមិនតិចជាង7ម៉ឺនដុល្លារនោះឡើយ។ នៅពេលនោះលោកត្រូវបាត់បង់ទំនុកចិត្តពីដៃគូវិនិយោគជាច្រើន ហើយក៏មានការថ្នាំងថ្នាក់ខ្លះៗជាមួយក្រុមគ្រួសារផងដែរ រហូតដល់ជនជាតិអាមេរិកកាំងនោះសម្រេចចាកចេញពីក្រុមហ៊ុនដោយមិនបានប្រាប់អ្វីដល់លោកមួយម៉ាត់ឡើយ គឺបានត្រឹមតែផ្ញើអុីមែលប្រាប់ឱ្យលោកប្រឹងប្រែងតស៊ូបន្តទៀត ហើយប្រសិនបើបានជោគជ័យនោះ លោកនឹងក្លាយជាមនុស្សពូកែស្ទើររកដៃគូប្រកួតប្រជែងមិនបានឡើយ។ ខ្លឹមសារនៃសារអេឡិចត្រូនិកនោះបានសរសេរថា «ពេលនេះទូកកំពុងលិចលង់នៅកណ្តាលមហាសាគរគ្មានកោះត្រើយ ប្រសិនបើអ្នកអាចស្រង់ទូកនោះវិញបាន អ្នកនឹងក្លាយទៅជាមនុស្សដ៏ពូកែអស្ចារ្យបំផុត»។
ក្រោយពេលទទួលបានសារអេឡិចត្រនិកនេះ ភាពអស់សង្ឃឹមកាន់តែខ្លាំងបានធ្លាក់មកលើរូបលោក ដែលធ្វើឱ្យលោករស់នៅឯកោ ស្ទើរគ្មានអ្នករាប់រកប្រៀបដូចជាទូកកំពុងលិចនៅកណ្តាលសមុទ្រ។ តែទោះបីជាមានរឿងកើតឡើងចំពោះខ្លួនដូច្នេះក្តី លោកនៅតែតាំងចិត្តថា ត្រូវតែដើរទៅមុខឱ្យដល់គោលដៅ និងធ្វើយ៉ាងណាស្រោចស្រង់ក្រុមហ៊ុនឱ្យងើបឈរឡើងវិញ។ យ៉ាងណាក៏ដោយនៅថ្ងៃមួយខណៈពេលដែលលោកកំពុងពិបាកចិត្តខ្លាំង ស្រាប់តែមានគ្រូទាយជនជាតិឥណ្ឌាម្នាក់បានមកដល់ការិយាល័យធ្វើការរបស់លោក ហើយនិយាយថា៖ «លោកគឺជាមនុស្សដែលមានសំណាង មានលុយកាន់ក្នុងដៃច្រើនសឹងចាយមិនអស់ និងមានឡានទំនើបជិះនៅត្រឹមរយៈ3ទៅ4ខែខាងមុខទៀត»។
ពាក្យសម្តីរបស់គ្រូទាយនេះបានធ្វើឱ្យលោករឹតតែខកចិត្តខ្លាំង ដោយហេតុថាក្រុមហ៊ុនកំពុងក្ស័យធន មិនមានទុនបម្រុងសោះសូម្បីតែមួយកាក់មួយសេន ចំណែកលុយសល់ក្នុងក្រុមហ៊ុនមានតែ 10ដុល្លារប៉ុណ្ណោះ រីឯឡានកញ្ចាស់ដែលលោកកំពុងប្រើប្រាស់ពេលនោះស្ទើតែប្រើលែងកើតទៀត តើឱ្យលោកសង្ឃឹមអ្វីទៀតទៅលើពាក្យគ្រូទាយដែលថាមានលុយចាយមិនអស់នោះ?
យ៉ាងណាក៏ដោយពាក្យថា អាគមផ្សំអាយុ គឺពិតជាដូចគ្រូទាយឥណ្ឌាទស្សទាយជើងលេខមើលឃើញជោគវាសនារបស់លោកមែន គឺស្រាប់តែ 3ខែកន្លងផុតទៅលោកបានជួបជាមួយវិនិយោគិនបរទេសមួយទៀត ដែលមានទំនុកចិត្តលើរូបលោក ហើយបានបោះទុនវិនិយោគមកលើក្រុមហ៊ុន ស៊ីភីអិល ខេមបូឌា ប្រភើធី លីមីតធីត ចំនួន 5ម៉ឺនដុល្លារ សម្រាប់ជាទឹកមន្តប្រោសឱ្យលោកមានក្តីសង្ឃឹមឡើងវិញជាថ្មី និងអាចបន្តអាជីពលើការដឹកនាំការងារខាងផ្នែកអចលនទ្រព្យនៅកម្ពុជាបន្តទៀត ហើយទទួលបានជោគជ័យជាបន្តបន្ទាប់ រហូតបានក្លាយជាក្រុមហ៊ុនផ្តល់សេវាកម្មអចលនទ្រព្យដ៏មានសក្តានុពលមួយក្នុងចំណោមក្រុមហ៊ុនចំនួនជាង 90ដែលកំពុងវិនិយោគលើវិស័យនេះនៅកម្ពុជា។
និយាយពីការងារនាពេលបច្ចុប្បន្នវិញ លោកឧកញ៉ា គឺជាអគ្គនាយកក្រុមហ៊ុនអចលនទ្រព្យ ស៊ីភីអិល ខេមបូឌា ប្រភើធី លីមីតធីត ដែលជាភ្នាក់ងារផ្តល់សេវាកម្មទិញលក់ និងវាយតម្លៃផ្នែកអចលនទ្រព្យដូចជា ទិញលក់អគារ ដីធ្លី ផ្ទះល្វែង ខុនដូ លំដាប់ VIP ឈានមុខគេមួយនៅកម្ពុជា ដោយមកទល់ពេលនេះមានក្រុមហ៊ុន និងភ្នាក់ងារឯកជនមិនតិចជាង 5,000ឡើយ ដែលទទួលយកសេវាកម្មពីក្រុមហ៊ុនខាងលើ ប្រកបដោយទំនុកចិត្ត និងមានភាពកក់ក្តៅបំផុត។ សេវាកម្មនេះបានផ្តល់ការងារដល់ប្រជាជនខ្មែរប្រមាណជិត 100នាក់ ហើយគ្រោងនឹងបង្កើតការងារសម្រាប់ពលរដ្ឋខ្មែរឱ្យបានរហូតដល់ 5,000នាក់នៅត្រឹមដំណាច់ឆ្នាំ2020 ខាងមុខ។ បុគ្គលិកធ្វើការផ្នែកនេះមិនចាំបាច់មានសញ្ញាបត្រផ្នែកអចលនទ្រព្យនោះទេ សំខាន់ឱ្យតែមានសញ្ញា-បត្រប្រហាក់ប្រហែល មានការអត់ធ្មត់ខ្ពស់ ស្មោះត្រង់ និងចង់បានការរីកចម្រើនទាំងខ្លួនឯង និងក្រុមហ៊ុនប្រកបដោយភាពស្មោះស្មគ្រនោះ គឺគ្រប់គ្រាន់តាមតម្រូវការខាងផ្នែកសេវាកម្មអចលនទ្រព្យនេះហើយ៕
