Category: សង្គម និងសេដ្ឋកិច្ច

  • អ្វីខ្លះជាគោលដៅអភិវឌ្ឍន៍របស់អង្គការសហប្រជាជាតិនៅឆ្នាំ 2030 សម្រាប់ការអប់រំ?

    អ្វីខ្លះជាគោលដៅអភិវឌ្ឍន៍របស់អង្គការសហប្រជាជាតិនៅឆ្នាំ 2030 សម្រាប់ការអប់រំ?

    ការអប់រំ ជាផ្នែកសំខាន់មួយដែលពិភពលោកកំពុងយកចិត្តទុកដាក់ ក្នុងនោះអង្គការសហប្រជាជាតិ ក៏បានដាក់ចេញនូវកម្មវិធីរបស់ខ្លួនដើម្បីជាគោលដៅអភិវឌ្ឍន៍របស់ខ្លួនឆ្ពោះទៅរកភាពល្អប្រសើរនៅឆ្នាំ 2030។ នៅក្នុងសៀវភៅ «2030 មិនមែនជារឿងនិទាន» ដែលនិពន្ធដោយលោក អាលីន ហ្គមលី បានបង្ហាញពីចំណុចលម្អិតពាក់ព័ន្ធ និងចំណុចសំខាន់ៗដែលជាគោលដៅរបស់អង្គការសហប្រជាជាតិចំពោះកុមារ និងការអប់រំ ដូចខាងក្រោម៖

    1. ការរៀនសូត្រ
    ការរៀនសូត្រ គឺត្រូវធានាថាកុមារគ្រប់រូបនៅទូទាំងពិភពលោក អាចទៅសាលារៀន និងរៀនបានច្រើន ដូចជារៀនអាន សរសេរ រាប់លេខ និងផាត់ពណ៌ ជាដើម។

    2. កុមារ និងកុមារី មានសិទ្ធិស្មើគ្    នា
    ត្រូវធានាការគោរពសិទ្ធិ និងការលើកទឹកចិត្តស្មើៗគ្នារវាងក្មេងប្រុស និងក្មេងស្រី តាមរយៈការទទួលបានការកម្សាន្តដូចគ្នា ដូចជាលេងបាល់បោះ ហោះហើរទៅកាន់ឋានព្រះចន្ទ ឡើងដើមឈើ និងចម្អិនអាហារជាដើម ធ្វើយ៉ាងម៉េចឱ្យពួកគេធ្វើអ្វីគ្រប់យ៉ាងបានដូចៗគ្នា។

    3. ការងារល្អ
    មនុស្សគ្រប់រូបចាំបាច់ត្រូវមានការងារល្អ ទទួលបានប្រាក់កម្រៃសមរម្យ និងមានការគាំពារ។ ចំពោះកុមារគឺមិនត្រូវធ្វើការងារធ្ងន់ដូចមនុស្សពេញវ័យឡើយ។

    4. នាំគ្នាកសាង
    ការសាងសង់អគារថ្មីៗឱ្យមានភាពរឹងមាំ មានសុវត្ថិភាព និងមិនប៉ះពាល់ដល់ផែនដីជារឿងសំខាន់សម្រាប់មនុស្ស។ ក្រៅពីនេះ ប្រព័ន្ធអ៊ីនធើណិត នឹងថាមពលអគ្គិសនី ត្រូវពង្រឹងឱ្យមានគុណភាពដើម្បីបម្រើការនៅតាមទីសាធារណៈ មន្ទីរពេទ្យ និងសាលារៀន។

    ទាំងអស់នេះជាចំណុចសំខាន់ៗដែលផ្តោតជាពិសេសលើកុមារ និងការអប់រំ ក្នុង 17 ចំណុចដែលបានដាក់ចេញសម្រាប់គោលដៅសកល ដែលថ្នាក់ដឹកនាំពិភពលោកត្រូវចាប់ដៃគ្នាសម្រេចឱ្យបាន ហើយត្រូវសន្យាថានឹងធ្វើឱ្យផែនដីក្លាយជាកន្លែងរស់នៅកាន់តែប្រសើរឡើងសម្រាប់គ្រប់គ្នា៕

  • សមាជិកក្រុមតារាចម្រៀង One Direction បដិសេធមិនព្រមរៀបការ

    សមាជិកក្រុមតារាចម្រៀង One Direction បដិសេធមិនព្រមរៀបការ

    គូស្នេហ៍ខុសវ័យរវាងតារាចម្រៀងប្រុស Liam Payne វ័យ 23 ឆ្នាំ ជាសមាជិកក្រុមតារាចម្រៀងប្រុស One Direction របស់អង់គ្លេស ជាមួយតារាស្រី Cheryl Cole ដែលមានវ័យ 33 ឆ្នាំ កំពុងតែកើតមានរឿងដ៏ក្ដៅគគុកទៀតហើយ ដោយតារាប្រុសរូបនេះ បានបដិសេធមិនព្រមរៀបការ ខណៈដែលអ្នកទាំងពីមានកូនជាមួយគ្នាហើយក្ដី ដោយសំអាងលើមូលហេតុថា នាងជាស្ត្រីដែលធ្លាប់ឆ្លងកាត់ការរៀបមង្គលការរួចហើយ ។

    តារាទាំងពីរដួងខាងលើនេះ មានកូនស្រីម្នាក់ ដែលបានចាប់កំណើតកាលពីថ្ងៃទី 22 ខែមីនា ឆ្នាំ 2017 ហើយនៅសប្ដាហ៍នេះ តារាប្រុស Liam Payne បានផ្ដល់បទសម្ភាសជាមួយភ្នាក់ងារសារព័ត៌មានបរទេសមួយ ដោយថ្លែងថា “ ខ្ញុំបានឃើញការរៀបអាពាហ៍ពិពាហ៍ជាច្រើនតាមបែបសាសនាផ្សេងៗ ហើយខ្ញុំក៏ជាមនុស្សមិនប្រកាន់សាសនាដែរ និងសឹងតែមិនធ្លាប់គិតដល់រឿងនេះទៀតផង។ នៅពេលនេះយើងមានកូនជាមួយគ្នាហើយ សេចក្ដីស្នេហារបស់យើងក៏មិនត្រូវការអ្វីដែលច្បាស់លាស់ដល់ថ្នាក់ហ្នឹងដែរ តែខ្ញុំសូមទាយថា នោះគឺជាហេតុផលដែលអាចធ្វើឱ្យខ្ញុំមិនទាន់គិតដល់រឿងរៀបអាពាហ៍ពិពាហ៍ក៏អាចថាបានដែរ “ ។

    គួរបញ្ជាក់ផងដែរថា តារាស្រី Cheryl Cole ជាស្ត្រីដែលធ្លាប់រៀបអាពាហ៍ពិពាហ៍ចំនួន 4 ដងរួចមកហើយ រហូតដល់ដើមឆ្នាំ2016 ទើបចាប់ផ្ដើមមានទំនាក់ទំនងស្នេហ៍ជាមួយនឹង Liam Payne ព្រមទាំងមានកូនមួយជាមួយនឹងគ្នាដោយមិនបានរៀបមង្គលការទៀតផង និងបើទោះបីជា អ្នកសារព័ត៌មានខំចោទសួរលោកយ៉ាងណាក៏ដោយ ក៏លោកនៅតែនិយាយថា មិនទាន់បានគិតពីរឿងរៀបការដែរ ៕

  • កម្ពុជាកំពុងដោះស្រាយបញ្ហាប្រឈមដើម្បីរក្សាកំណើនសេដ្ឋកិច្ច

    កម្ពុជាកំពុងដោះស្រាយបញ្ហាប្រឈមដើម្បីរក្សាកំណើនសេដ្ឋកិច្ច

    ភ្នំពេញៈ ទេសរដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាក៏កំពុងជួបប្រទះនូវបញ្ហាមួយចំនួនដែលត្រូវដោះស្រាយជាចាំបាច់ផងដែរដើម្បីបន្តរក្សាបាននូវចីរភាពកំណើនសេដ្ឋកិច្ចខ្ពស់ក្នុងអត្រា៧ភាគរយក្នុង 1ឆ្នាំ សម្រាប់រយៈពេលមធ្យម និងវែងខាងមុខ។

    ក្នុងជំនួបជាមួយអគ្គនាយករងមូលនិធិរូបិយប័ណ្ណអន្តរជាតិ ហៅកាត់ថា IMF លោក Mr. Mitsuhiro Furusawa លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ចបានថ្លែងថា ស្របនឹងសមិទ្ធផលល្អប្រសើរ ទាំងផ្នែកស្ថិរភាពម៉ាក្រូសេដ្ឋកិច្ច និងផ្នែកសារពើពន្ធនោះ កម្ពុជាក៏កំពុងជួបប្រទះនូវបញ្ហាមួយចំនួនដែលត្រូវដោះស្រាយជាចាំបាច់ផងដែរ ដើម្បីបន្តរក្សាបាននូវចីរភាពកំណើនសេដ្ឋកិច្ចខ្ពស់ក្នុងអត្រា៧ភាគរយក្នុង 1ឆ្នាំ សម្រាប់រយៈពេលមធ្យម និងវែងខាងមុខ ដូចជាការបង្កើនសមត្ថភាពប្រកួតប្រជែង និងផលិតភាពសេដ្ឋកិច្ច ក៏ដូចជាការធ្វើឲ្យកាន់តែប្រសើរឡើងនូវបរិយាកាសវិនិយោគ ព្រមទាំងការត្រៀមខ្លួនរួចជាស្រេច និងការពង្រឹងភាពធន់មាំនៃសេដ្ឋកិច្ចកម្ពុជា ក្នុងបរិការណ៍នៃភាពមិនច្បាស់លាស់ នៃស្ថានភាពសេដ្ឋកិច្ច និងហិរញ្ញវត្ថុពិភពលោក ពាណិជ្ជកម្មអន្តរជាតិ និងសន្តិសុខជាសកល។

    លោក មិស៊ូហ៊ីរ៉ូ ហ្វូរូសាវ៉ា នាយកគ្រប់គ្រងរងរបស់មូលនិធិរូបិយវត្ថុអន្តរជាតិ (IMF) បានសម្ដែងនូវការរីករាយ និងអបអរសាទរចំពោះភាពរីកចម្រើននានាដែលរាជរដ្ឋាភិបាលកម្ពុជាសម្រេចបាននាពេលកន្លងមក ពិសេសនៅលើផ្នែកម៉ាក្រូសេដ្ឋកិច្ច និងហិរញ្ញវត្ថុសាធារណៈ។ នៅក្នុងឱកាសនោះដែរ នាយកគ្រប់គ្រងរងរបស់មូលនិធិរូបិយវត្ថុអន្តរជាតិរូបនេះ បានបង្ហាញពីការប្តេជ្ញាចិត្តរបស់ IMF ថា នឹងបន្តផ្តល់នូវកិច្ចសហការខ្ពស់បន្ថែមទៀត ចំពោះរាល់ការងារទាក់ទងនឹងផ្នែកសេដ្ឋកិច្ច និងសារពើពន្ធ ព្រមទាំងការបន្តគាំទ្រយ៉ាងពេញទំហឹងក្នុងការកសាង និងពង្រឹងសមត្ថភាពមន្រ្តីក្រសួងសេដ្ឋកិច្ច និងហិរញ្ញវត្ថុ ដោយផ្តោតលើការផ្តល់ជំនួយបច្ចេកទេសលើវិស័យរដ្ឋបាល និងគោលនយោបាយពន្ធ ក៏ដូចជាការបន្តពង្រឹងសមត្ថភាពព្យាករម៉ាក្រូសេដ្ឋកិច្ចផងដែរ៕

  • រដ្ឋមន្រ្តីទេសចរណ៍ 21ប្រទេស នឹងជួបប្រជុំគ្នានៅក្រុងសៀមរាបអង្គរ

    រដ្ឋមន្រ្តីទេសចរណ៍ 21ប្រទេស នឹងជួបប្រជុំគ្នានៅក្រុងសៀមរាបអង្គរ

    បន្ទាប់ពីអង្គវត្តជាប់ចំណាត់ថ្នាក់លេខ1 ជាតំបន់ទាក់ទាញទេសចរណ៍ខ្លាំងបំផុត លើពិភពលោកសម្រាប់ឆ្នាំ 2017នេះ រដ្ឋមន្ត្រីទេសចរណ៍ វប្បធម៌ និងប្រតិភូជាន់ខ្ពស់មកពី 21ប្រទេស នឹងមកជួបជុំគ្នាក្នុងកិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី2 និងសន្និសីទអន្តរជាតិលើកទី1 ស្តីពីទេសចរណ៍ប្រកបដោយនិរន្តរភាព និងទីក្រុងបេតិកភណ្ឌនៅខេត្តសៀមរាបចាប់ពីថ្ងៃទី11-16 មិថុនា ឆ្នាំ2017 ដើម្បីពិភាក្សាអំពីគំរូថ្មីៗនៃភាពជាដៃគូ និងតួនាទីអភិបាលកិច្ចល្អក្នុងការគ្រប់គ្រងការពារ ការអភិរក្ស និងការអភិវឌ្ឍប្រកបដោយនិរន្តរភាពនៃទីក្រុងបេតិកភណ្ឌ។

    ឯកឧត្តម ថោង ខុន រដ្ឋមន្រ្តីក្រសួងទេសចរណ៍បានថ្លែងនៅក្នុងកិច្ចប្រជុំគណៈកម្មាធិការអន្តរក្រសួង កាលពីរសៀលថ្ងៃទី06 ខែមិថុនា ឆ្នាំ2017 ថា វេទិកានេះនឹងដាក់ចេញនូវវិធានការ និងទិសដៅថ្មីៗសម្រាប់ពិពិធកម្មផលិតផលទេសចរណ៍ និងការតម្រង់ទិសសម្រាប់ការអភិវឌ្ឍទេសចរណ៍បេតិកភណ្ឌវប្បធម៌ ប្រកបដោយនិរន្តរភាពនៅកម្ពុជា ផ្សារភ្ជាប់ទៅនឹងទស្សនទាននៃការកសាងភាពជាដៃគូសហប្រតិបត្តិការថ្មីនៃទេសចរណ៍ និងវប្បធម៌ដែលបានដាក់ចេញនៅក្នុងសេចក្តីថ្លែងការរួមមួយនៅសៀមរាបនៅក្នុងសន្និសីទពិភពលោកស្តីពីទេសចរណ៍ និងវប្បធម៌ កាលពីអំឡុងខែកញ្ញា ឆ្នាំ2015 នៅកម្ពុជាកន្លងមក។

    ឯកឧត្តមរដ្ឋមន្ត្រីក៏បានគូសបញ្ជាក់ផងដែរថា ទស្សនទាននៃកិច្ចប្រជុំនេះក៏ឆ្លើយតបទៅនឹងគំនិតផ្តួចផ្តើមខ្សែក្រវាត់ និងផ្លូវសូត្ររបស់ចិន ក្នុងក្របខ័ណ្ឌនៃការអភិវឌ្ឍឧស្សាហកម្មទេសចរណ៍ ប្រកបដោយនិរន្តរភាព និងការទទួលខុសត្រូវកម្ពុជា-ចិន ដោយបានចុះហត្ថលេខាលើផែនការអនុវត្តសកម្មភាពការងារ សម្រាប់អនុស្សារណៈយោគយល់គ្នា ស្តីពីកិច្ចសហប្រតិបត្តិការទេសចរណ៍ កាលពីថ្ងៃទី16 ខែឧសភា ឆ្នាំ2017 បន្ទាប់ពីកិច្ចប្រជុំខ្សែក្រវាត់ និងផ្លូវសូត្រនៅទីក្រុងប៉េកាំង ដោយផ្តោតសំខាន់លើការសិក្សារៀបចំ បង្កើតផែនការអភិវឌ្ឍន៍ទេសចរណ៍គ្រប់ជ្រុងជ្រោយមួយសម្រាប់តំបន់សៀមរាបផ្តោតលើបេតិកភណ្ឌវប្បធម៌ពិភពលោកអង្គរវត្ត។

    គួរកត់សម្គាល់ផងដែរថា កិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី1 ត្រូវបានរៀបចំឡើងក្នុងឆ្នាំ2016 នៅទីក្រុង Tabriz សាធារណរដ្ឋអ៊ីស្លាមអ៊ីរ៉ង់ ហើយដែលពិធីបើកកិច្ចប្រជុំរដ្ឋមន្ត្រីទេសចរណ៍នៃដៃគូសន្ទនាសហប្រតិបត្តិការអាស៊ីលើកទី2នេះ នឹងប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចនាយករដ្ឋមន្ត្រី ហ៊ុន សែន នៅថ្ងៃទី12 ខែមិថុនា ឆ្នាំ2017 ខាងមុខនេះនៅទីក្រុងសៀមរាបអង្គរ៕

  • អង់គ្លេសត្រៀមប៉ះជើងខ្លាំងអ៊ីតាលី ក្នុង U20 World Cup នៅថ្ងៃនេះ

    អង់គ្លេសត្រៀមប៉ះជើងខ្លាំងអ៊ីតាលី ក្នុង U20 World Cup នៅថ្ងៃនេះ

    ក្រុមបាល់ទាត់ជម្រើសជាតិអង់គ្លេសអាយុក្រោម 20ឆ្នាំ និងក្រុមយុវជនរបស់អ៊ីតាលី នឹងសម្លឹងរកការធ្វើឲ្យបានល្អប្រសើរដូចគ្នា នៅពេលដែលពួកគេជួបគ្នាក្នុងការប្រកួតព្រឹត្តិការណ៍ U20 World Cup វគ្គពាក់កណ្តាលផ្តាច់ព្រ័ត្រនៅកីឡដ្ឋាន Jeonju World Cup ក្នុងប្រទេសកូរ៉េខាងត្បូងនាល្ងាចថ្ងៃនេះ។

    ក្រុមជម្រើសជាតិអ៊ីតាលី ដែលត្រូវបានដឹកនាំដោយលោក Alberigo Evani បានចាប់ផ្តើមយុទ្ធនាការនេះជាមួយនឹងការរងបរាជ័យដ៏ខកចិត្តក្នុងលទ្ធផល 1-០ ក្រោមស្នាដៃក្រុមជម្រើសជាតិអ៊ុយរូហ្គាយ ប៉ុន្តែបានឈានទៅដល់វគ្គ 16 ក្រុមចុងក្រោយតាមរយៈការដណ្តើមបានជ័យជម្នះក្នុងលទ្ធផលស្មើ 2-០ លើក្រុមជម្រើសជាតិអាហ្វ្រិកខាងត្បូង និងបានបញ្ចប់ក្នុងលទ្ធផលស្មើ 2-2 ជាមួយនឹងក្រុមជម្រើសជាតិជប៉ុនអាយុក្រោម 2០ឆ្នាំ។ ក្រោយមក អ៊ីតាលី បានទម្លាក់ជើងខ្លាំងបារាំងក្នុងលទ្ធផល 2-1 ក្នុងទីក្រុង Cheonan នៅមុនពេលដណ្តើមបានជ័យជម្នះក្នុងលទ្ធផល 3-2 លើក្រុមជម្រើសជាតិហ្សំប៊ីក្នុងម៉ោងបន្ថែម 15នាទីលើកទីពីរ ដើម្បីឈានទៅជួបក្រុមជម្រើសជាតិអង់គ្លេស របស់លោក Paul Simpson។

    ដោយឡែក ក្រុមជម្រើសជាតិអង់គ្លេស មិនទាន់ស្គាល់ចាញ់នៅឡើយទេក្នុងយុទ្ធនាការនេះមកទល់ពេលនេះ ដោយពួកគេបានបញ្ចប់ដោយការឈរលេខ 1ក្នុងពូល ក្រោយពីបានយកឈ្នះលើក្រុមយុវជនអាហ្សង់ទីន ក្នុងលទ្ធផល 3-1 មុននឹងទទួលបានលទ្ធផលស្មើ 1-1 ជាមួយនឹងក្រុមជម្រើសជាតិហ្គីណេ និងផ្តួលក្រុមម្ចាស់ផ្ទះកូរ៉េខាងត្បូង 1-0។ ក្រុមជម្រើសជាតិអង់គ្លេស បានបន្តយកឈ្នះលើក្រុមជម្រើសជាតិកូស្តារីកា ក្នុងលទ្ធផល 2-1 ក្នុងការប្រកួតវគ្គ16ក្រុមចុងក្រោយ មុននឹងផ្តួលក្រុមជម្រើសជាតិម៉ិកស៊ិក 1-០ ដើម្បីឈានទៅកាន់វគ្គផ្តាច់ព្រ័ត្រនេះ។

    ស្របពេលជាមួយគ្នានេះដែរ ក្រុមជម្រើសជាតិអ៊ុយរូហ្គាយអាយុក្រោម 2០ឆ្នាំ នឹងត្រូវប៉ះជាមួយនឹងក្រុមជម្រើសជាតិវ៉េណេស៊ុយអេឡា ក្នុងការប្រកួតវគ្គពាក់កណ្តាលផ្តាច់ព្រ័ត្រមួយគូទៀត រវាងក្រុមស្ថិតក្នុងតំបន់អាមេរិកខាងជើងដូចគ្នា។
    អង់គ្លេស ត្រូវប៉ះជាមួយនឹងក្រុមជម្រើសជាតិអ៊ីតាលី ចាប់ពីម៉ោង 6ល្ងាចតទៅ ខណៈដែលការប្រកួតរវាងអ៊ុយរូហ្គាយ និងវ៉េណេស៊ុយអេឡា នឹងចាប់ផ្តើមនៅម៉ោង 3រសៀលថ្ងៃព្រហស្បតិ៍នេះ៕
    ប្រភពព័ត៌មាន៖ Sky Sport

  • ថ្ងៃនេះ អាចមកយកសំបុត្រ Free បាន ដើម្បីចូលទស្សនារឿង «តាមប្រមាញ់ខ្មោច»

    ថ្ងៃនេះ អាចមកយកសំបុត្រ Free បាន ដើម្បីចូលទស្សនារឿង «តាមប្រមាញ់ខ្មោច»

    តារាសិល្បៈកម្ពុជាជាច្រើនដួងបានតុបតែងខ្លួនយ៉ាងស្រស់ស្អាតដើម្បីចូលទៅបង្អួតរូបសម្ផស្សនៅក្នុងពិធីសម្ពោធកម្មវិធី «Thai Film Festival» ដែលពិធីនេះនឹងប្រព្រឹត្ដទៅរយៈពេល 5ថ្ងៃ ចាប់ពីថ្ងៃទី 7-11 ខែមិថុនា ឆ្នាំ 2017 ។

    នេះជាថ្ងៃទីពីរហើយដែលពិព័រណ៌ភាពយន្ដថៃបានដំណើរការទៅមុខយ៉ាងរលូន។ ទស្សនិកជនទាំងអស់អាចចូលទស្សនាភាពយន្ដមានចំណងជើងថា «តាមប្រមាញ់ខ្មោច» ដោយសេរីនៅថ្ងៃនេះចាប់ពីម៉ោង 1ដល់ម៉ោង 3រសៀល។ ដូច្នេះទស្សនិកជនដែលនិយមទស្សនាខ្សែភាពយន្ដបែបកំប្លែង ភ័យរន្ធត់ អាចរួសរាន់មកយកទទួលសំបុត្រចូលទស្សនា Free នៅរោងភាពយន្ដ Major Cineplex by Cell Card បាន។

    ខាងក្រោមនេះជារូបថតបញ្ជាក់ពីសកម្មភាពតារាសិល្បៈកម្ពុជាដែលបានចូលរួម៖

     

     

  • Man United នឹងបង្កើនសំណើរហូតដល់៦០លានផោនដើម្បីទិញ Morata ពី Real Madrid

    Man United នឹងបង្កើនសំណើរហូតដល់៦០លានផោនដើម្បីទិញ Morata ពី Real Madrid

    ក្លិបបិសាចក្រហម Manchester United កំពុងត្រៀមបង្កើនសំណើរបស់ពួកគេសម្រាប់ខ្សែប្រយុទ្ធ Alvaro Morata ក្នុងតម្លៃខ្លួនរហូតដល់ទៅ៦០លានផោន (ស្មើនឹង៧៧លានដុល្លារអាមេរិក) ក្រោយពីការដាក់សំណើជាលើកទី១របស់ពួកគេក្នុងទឹកប្រាក់៥២លានផោន ត្រូវបានច្រានចោលពីសំណាក់ក្លិប Real Madrid។

    លោក Jose Mourinho បានចាត់ទុកខ្សែប្រយុទ្ធវ័យ២៤ឆ្នាំរូបនេះ គឺជាគោលដៅទិញចូលជាអាទិភាពរបស់លោកនៅរដូវក្តៅនេះ ក្រោយពីខ្សែប្រយុទ្ធអន្តរជាតិបារាំង Antoine Griezmann បានប្រកាសថា រូបគេនឹងមិនចាកចេញពីក្លិប Atletico Madrid ឡើយ។

    ការចរចាផ្សេងៗជាមួយនឹងក្លិប Real Madrid បានធ្វើឡើងនៅសប្តាហ៍នេះ ខណៈដែលសំណើជាលើកទីមួយរបស់ Man United ក្នុងទឹកប្រាក់៦០លានអឺរ៉ូ (ស្មើនឹង៥២លានផោន ) ត្រូវបានច្រានចោល ក្រោយពីក្រុមម្ចាស់ជើងឯកក្របខ័ណ្ឌ Champions League បានដាក់តម្លៃខ្លួនទៅលើ Morata រហូតដល់ទៅ៩០លានអឺរ៉ូ (ស្មើនឹង១០១លានដុល្លារអាមេរិក ឬ៧៨លានផោន)។ Man United ត្រូវបានគេមើលឃើញថា មានការជឿជាក់ក្នុងការបញ្ចុះបញ្ចូលប្រធានក្លិបរបស់ Real Madrid គឺលោក Florentino Perez ឲ្យយល់ព្រមបញ្ចុះតម្លៃខ្លួនរបស់ Alvaro Morata ប្រសិនបើពួកគេអាចបង់ភាគច្រើននៃតម្លៃខ្លួនសរុបរបស់ កីឡាករម្នាក់នេះបាន។

    ខ្សែប្រយុទ្ធរូបនេះ ទើបតែបានវិលត្រឡប់ទៅកាន់កីឡដ្ឋាន Santiago Bernabeu វិញពីក្លិប Juventus កាលពីឆ្នាំមុន ក្រោយពី Real បានប្រើប្រាស់លក្ខខណ្ឌទិញរំលាយកិច្ចសន្យាក្នុងទឹកប្រាក់៣០លានផោន។

    ក្លិបតោខៀវ Chelsea ក៏បានបង្ហាញពីការចាប់អារម្មណ៍ទៅលើ Morata ផងដែរ ក្រោយពីខ្សែប្រយុទ្ធរូបនេះបានស៊ុតបាល់បញ្ចូលទីសរុប២០គ្រាប់ ក្នុងរាល់យុទ្ធនាការប្រកួតទាំងអស់ កាលពីរដូវកាលមុន និងបានជួយឲ្យក្រុមជម្រើសជាតិអេស្ប៉ាញ ទទួលបានលទ្ធផលស្មើ ២-២ ក្នុងការប្រកួតមិត្តភាពជាមួយនឹងក្រុមជម្រើសជាតិកូឡុំប៊ី កាលពីថ្ងៃពុធ ប៉ុន្តែ Chelsea ក៏កំពុងតែស្ថិតយ៉ាងប្រកៀកក្នុងការនាំយក Romelu Lukaku ពីក្លិប Everton ដែរ៕
    ប្រភពពី៖ The Guardian

  • វិធី Save អាសយដ្ឋាន ឬការិយាល័យក្នុងកម្មវិធី Google Maps

    វិធី Save អាសយដ្ឋាន ឬការិយាល័យក្នុងកម្មវិធី Google Maps

    ការបញ្ចូលឈ្មោះ និងអាសយដ្ឋាន ឬការិយាល័យទៅក្នុងកម្មវិធី Google Maps វាជាវិធីសាស្ដ្រល្អមួយ ដែលវាអនុញ្ញាតឱ្យលោកអ្នក និងអ្នកប្រើប្រាស់ដទៃទៀត ងាយស្រួលស្វែងទីតាំងនោះនៅលើផែនទីបែប ឌីជីថលមួយនេះ ដោយមិនចាំបាច់វាយបញ្ជូលច្រើនដងទៀត។ ក្នុងន័យនេះ វាក៏ផ្ដល់ភាពងាយស្រួលផងដែរ លើការប្រាប់ទីតាំង ដើម្បីឱ្យនរណាម្នាក់ទៅដល់ការិយាល័យ ឬផ្ទះរបស់យើងបានតាមរយៈមុខងារ Share Location ឬការចង្អុលបង្ហាញទៅអ្នកបើកបររថយន្តឈ្នួល ឬការដាក់ឱ្យក្មេងៗដែលមិនសូវស្គាល់ផ្លូវងាយស្រួលក្នុងការរកផ្លូវមកផ្ទះដោយខ្លួនឯងជាដើម។ សម្រាប់ការកំណត់នេះ យើងសូមលើកយកជម្រាបជូនសម្រាប់តែទូរស័ព្ទប្រើប្រព័ន្ធ Android មួយសិន៖

    1. ជាដំបូង សូមប្រិយមិត្តចូលទៅកាន់កម្មវិធី Google លើទូរស័ព្ទ Android ហើយចុចលើសញ្ញាឆ្នូត 3 (ដូចក្នុងរូបខាងក្រោម)
    2. បន្ទាប់មក ចុចលើ Your Places

    3. បន្ទាប់មកទៀត ចុចលើ Set home address
    4. វាយបញ្ចូលអសយដ្ឋានផ្ទះរបស់អ្នក
    5. ជ្រើសរើសអសយដ្ឋានរបស់អ្នកដែលបានលោតឡើងជាស្រេច (ប្រសិនបើមាន)
    6. សូមធ្វើតាមដំណាក់កាលទី 1 ដល់ដំណាក់កាលទី 5 ប្រសិនបើលោកអ្នកចង់ Save អាសយដ្ឋាន ឬការិយាល័យធ្វើការរបស់អ្នក៕

  • Liverpool ដកការចាប់អារម្មណ៍លើ Van Dijk ក្រោយ Southampton តវ៉ា

    Liverpool ដកការចាប់អារម្មណ៍លើ Van Dijk ក្រោយ Southampton តវ៉ា

    ក្លិប Southampton ជឿជាក់ថា ខ្សែការពារ Virgil van Dijk នឹងបន្តនៅជាមួយពួកគេនៅរដូវកាលក្រោយនេះ បន្ទាប់ពីក្លិប Liverpool ត្រូវបានបង្ខំឲ្យដកខ្លួនចេញទាំងអាម៉ាសពីការតាមប្រមាញ់ទិញកីឡាកររូបនេះ។

    ក្លិប Southampton បានខឹងសម្បាយ៉ាងខ្លាំង ក្រោយពីមានសារព័ត៌មានចេញផ្សាយថា Liverpool កំពុងតែត្រៀមលក្ខណៈរួចរាល់ក្នុងការបំពេញការផ្ទេរមួយក្នុងតម្លៃខ្លួន៦០លានផោន (ស្មើនឹង៧៧លានដុល្លារអាមេរិក) សម្រាប់ខ្សែការពារកណ្តាលអន្តរជាតិហូឡង់រូបនេះ ហើយពួកគេបានរាយការណ៍ព័ត៌មាននេះទៅកាន់ក្លិប Premier League ដោយចោទប្រកាន់ Liverpool ពីបទដាក់សំណើមិនស្របច្បាប់។ Southampton មានអារម្មណ៍ថា គោលបំណងរបស់ Liverpool ត្រូវបានបង្ហាញនៅក្នុងអត្ថបទព័ត៌មាននោះ ហើយពួកគេបានបញ្ជាក់ថា កីឡាករ Van Dijk ពិតជាចង់ផ្ទេរទៅកាន់កីឡដ្ឋាន Anfield ប្រាកដមែន បើទោះបីមិនមានការដាក់សំណើជាផ្លូវការណាមួយសម្រាប់រូបគេក៏ដោយ។ មានព័ត៌មានជាច្រើនចេញផ្សាយថា Van Dijk បានជួបជាមួយនឹងលោក Jurgen Klopp ដែលជាអ្នកចាត់ការទូទៅរបស់ Liverpool ក្នុងទីក្រុង Blackpool ដើម្បីពិភាក្សាទៅលើការផ្ទេរដែលអាចទៅរួចមួយ ខណៈដែលការពិភាក្សានេះគឺជាការប្រព្រឹត្តខុសនឹងច្បាប់របស់លីកអាជីពអង់គ្លេសដោយសារតែគ្មានការស្នើសុំការអនុញ្ញាតពីក្លិបដែលជាម្ចាស់កម្មសិទ្ធិ។

    កាលពីថ្ងៃពុធម្សិលមិញ Liverpool បានចេញសេចក្តីថ្លែងការណ៍មួយ នៅលើគេហទំព័ររបស់ពួកគេ ដើម្បីបង្ហាញពីភាពសោកស្តាយ និងការសុំអភ័យទោស។ ក្លិបហង្សក្រហមមួយនេះ បានឲ្យដឹងថា៖ «យើងពិតជាសុំទោសដល់ក្លិប Southampton ចំពោះការយល់ច្រឡំណាមួយទាក់ទងនឹងការតាមទិញ Van Dijk ហើយយើងអាចនិយាយបានថា យើងបានដកការចាប់អារម្មណ៍ទៅលើរូបកីឡាករម្នាក់ហ្នឹងហើយ»៕
    ប្រភពព័ត៌មាន៖ The Guardian

  • ពិព័រណ៍អន្តរជាតិស្ដីពី «ស្ថាបត្យករ និងការតុបតែងនៅកម្ពុជា» បានចាប់ផ្ដើមហើយ!

    ពិព័រណ៍អន្តរជាតិស្ដីពី «ស្ថាបត្យករ និងការតុបតែងនៅកម្ពុជា» បានចាប់ផ្ដើមហើយ!

    ពិព័រណ៍អន្តរជាតិស្ដីពី «ស្ថាបត្យករ និងការតុបតែងនៅកម្ពុជា» គ្រោងប្រព្រឹត្តទៅចំនួន 3ថ្ងៃ បានចាប់ផ្ដើមហើយនៅព្រឹកថ្ងៃនេះ ដោយបានរៀបចំឡើងនៅឯមជ្ឈមណ្ឌលសន្និបាត និងពិព័រណ៍កោះពេជ្រ ។

    ពិធីពិព័រណ៍អន្តរជាតិនេះ គេជឿជាក់ថា នឹងផ្ដល់ឱកាសដល់ស្ថាបត្យករ និងអ្នកតុបតែងទាំងអស់ឱ្យបានឃើញនូវសម្ភារទំនើបៗ សម្រាប់ធ្វើការអភិវឌ្ឍន៍លើវិស័យសំណង់ និងស្ថាបត្យកម្ម នៅកម្ពុជាឱ្យកាន់តែល្អប្រសើរ និងមានភាពរីកចម្រើន។ កម្មវិធីនេះនឹងប្រមូលផ្តុំស្ថាបត្យករ អ្នករចនាផ្នែកខាងក្នុង អ្នកអភិវឌ្ឍវិស័យអចលទ្រព្យ និងអ្នកជំនាញខាងសំណង់ ដើម្បីផ្លាស់ប្តូរបទពិសោធ អំពីគំនិតច្នៃប្រឌិត និងនិន្នាការចុងក្រោយបង្អស់ នៅក្នុងវិស័យនេះ។

    ក្នុងការរៀបចំការតាំងពិព័រណ៍នេះ ក្រុមហ៊ុន ICVEX បានចាប់ដៃគូជាមួយនឹងសមាគមស្ថាបត្យករកម្ពុជា (CSA) ដែលនឹងអញ្ជើញវាគ្មិនជាតិ និងអន្តរជាតិមានកេរ្តិ៍ឈ្មោះល្បីល្បាញ ឲ្យចូលរួមចែករំលែកបទពិសោធ។ សមាគមស្ថាបត្យករកម្ពុជា ក៏នឹងត្រូវរៀបចំការប្រកួតប្រជែង ផ្នែករចនារបស់ CSA ឆ្នាំ2017 ដើម្បីប្រគល់រង្វាន់ដល់អ្នកមានគំនិតច្នៃប្រឌិតល្អបំផុត៕