Category: សង្គម និងសេដ្ឋកិច្ច

កសិករដាំសណ្តែកកួរ នៅតាមជាយក្រុងនិយាយថា បន្លែសណ្តែកកួរងាយស្រួលថែទាំជាងបន្លែផ្សេងទៀតណាស់ ហើយឆាប់ឱ្យផលទៀត ដោយចំណាយពេលដាំដុះត្រឹមតែកន្លះខែក៏អាចបេះផ្លែលក់បានហើយ និងបេះបានរាល់ថ្ងៃរហូតដល់ទៅ 2ខែឯណោះទើបដើមងាប់ទៅវិញ។

លោក ស៊ុំ សម្ផស្ស កសិកររស់នៅភូមិព្រែកអុងប៉ាង ឃុំព្រែកថ្មី ស្រុកស្អាង ខេត្តកណ្តាល បានប្រាប់ឱ្យដឹងថា លោកបានងាកមកដាំសណ្តែកកួរ 3-4ឆ្នាំមកហើយ ក្រោយពីសង្កេតឃើញថា ដំណាំនេះងាយស្រួលដាំជាងដំណាំបន្លែផ្សេងទៀត និងមានរយៈពេលដាំត្រឹមតែកន្លះខែ ហើយអាចបេះបានដល់ទៅជាង 2ខែ និងមានម៉ូយមកប្រមូលទិញដល់ចម្ការ ពុំចាំបាច់ដឹកយកទៅលក់នៅឯផ្សារដោយខ្លួនឯងទៀតផង។

កសិករខាងលើបន្តថា ដំបូងឡើយលោកដាំបន្លែផ្សេងៗច្រើនមុខដែរ ប៉ុន្តែដោយសារបានតម្លៃថោក និងពិបាកលក់នោះ ទើបលោកងាកមកដាំសណ្តែកកួរនេះវិញ ព្រោះងាយស្រួលដាំដុះ និងលក់បានថ្លៃគ្រាន់បើ ក៏សម្រេចចិត្តប្រែក្លាយផ្ទៃដីចំនួន 15អា ពីការដាំបន្លែចម្រុះមកដាំសណ្តែកកួរវិញម្តង។ លោកបញ្ជាក់បន្ថែមថា «ឆ្នាំនេះសណ្តែកកួរគឺនៅនឹងថ្លៃគ្រាន់បើ ក្នុង 1គីឡូក្រាមតម្លៃ 1500រៀលតាំងពីដើមដៃមកម្ល៉េះ ខុសពីឆ្នាំមុនតម្លៃត្រឹមតែ 800ទៅ 1000រៀលតែប៉ុណ្ណោះ ហើយក្នុង 1ថ្ងៃលោកអាចបេះបានជាមធ្យមបានពី 30ទៅ 40គីឡូក្រាមក្នុងមួយថ្ងៃ»។

ចំពោះការរៀបចំដាំដុះវិញគឺ មុនពេលដាំកសិករត្រូវតែភ្ជួរដីហាលចោលកន្លះខែឱ្យឆ្អិនដីល្អសិន ទើបឆូតជារងទំហំទទឹងប្រហែល 1ម៉ែត្រ ហើយយកកូនដើមសណ្តែកកួរមកដាក់ដាំ រួចយកមែកឬស្សីមកដោតធ្វើជាទ្រើង ចន្លោះពីគ្នា1ម៉ែត្រ និងយកមងចាស់ៗមកចងពីលើដើម្បីកុំឱ្យអស់មែកឬស្សីច្រើន និងឱ្យសណ្តែកវាងាយស្រួលតោងឡើងផង។ ក្រោយដាំរួចយើងត្រូវស្រោចទឹក 1ថ្ងៃ 2ដង គឺព្រឺក និងល្ងាច និងមើលថែទាំកុំឱ្យសត្វល្អិតចង្រៃ ឬដង្កូវមកស៊ីត្រួយរបស់វា ហើយនៅពេលដែលសណ្តែកកួរជិតបោះដៃឡើងទ្រើង យើងត្រូវស្រោចជីតាមគល់របស់វា ដើម្បីឱ្យវាលូតលាស់បានល្អ និងធន់នឹងជំងឺ។

បន្ទាប់ពីសណ្តែកកួរអាយុបាន 15ថ្ងៃ គឺយើងអាចបេះវាបានហើយ និងបេះបានរាល់ថ្ងៃ និងថែមទាំងអាចបេះបានដល់ទៅ 2ខែឯណោះ ទើបសណ្តែកចាស់ដើម យើងបោចដើមចេញ ហើយបាញ់ថ្នាំសម្លាប់ស្មៅ និងដាក់ដាំសាជាថ្មី។ លោកក៏បានបញ្ជាក់ផងដែរថា ចាប់តាំងពីប្តូរមកដាំសណ្តែកកួរនេះមក ជីវភាពគ្រួសាររបស់លោកគឺមានភាពល្អប្រសើរឡើងជាងមុនច្រើន ហើយដំណាំសណ្តែកកួរនេះពិតជាស្រួលដាំមែន ប៉ុន្តែក៏ត្រូវមើលថែទាំវាក្នុងរយៈពេល 15ថ្ងៃទៅ 20ថ្ងៃដែរ ទើបសណ្តែកចេញផ្កាផ្លែអាចប្រមូលផលបាន។

ចំណែកឯឈ្មួញកណ្តាលម្នាក់ ក្នុងចំណោមឈ្មួញជាច្រើនទៀត គឺអ្នកស្រី ឃុន មួយ ឆេង មានទីលំនៅភូមិព្រែកថ្មី ឃុំទឹកវិល ស្រុកស្អាង ខេត្តកណ្តាលបានឱ្យដឹងដែរថា មិនថាតែសណ្តែកកួរនោះទេគឺអ្នកស្រីទិញបន្លែគ្រប់ប្រភេទ និងចុះទិញដល់ចម្ការតែម្តង គឺប្រមូលទិញយកទៅលក់បោះដុំឱ្យម៉ូយនៅឯផ្សារនាគមាសភ្នំពេញ។ ឈ្មួញរូបនេះបានប្រាប់ដែរថា ឆ្នាំនេះតម្លៃសណ្តែកកួរគឺតម្លៃនៅនឹងគ្រាន់បើតាំងពីដើមដៃមក ដោយ 1គីឡូក្រាមអ្នកស្រីប្រមូលទិញក្នុងតម្លៃ 1500រៀល និងដឹកយកទៅលក់ក្នុងតម្លៃពី 1800ទៅ 2000រៀល ហើយជាមធ្យមក្នុង 1ថ្ងៃគឺទិញបានចន្លោះពី 1តោនទៅ 1តោនកន្លះដែរ ខុសពីឆ្នាំមុនដែលមានតម្លៃក្នុង 1គីឡូក្រាមត្រឹមតែ 800ទៅ 1000រៀលតែប៉ុណ្ណោះ៕

បើទោះជាបច្ចុប្បន្នបទចម្រៀងរបស់លោក ព្រាប សុវត្ថិ នៅតែមានសម្ទុះខ្លាំងនៅក្នុងទីផ្សារក៏ដោយ តែមួយរយៈចុងក្រោយនេះគេហាក់ដូចជាពុំសូវឃើញមានសារព័ត៌មានក្នុងស្រុកចុះផ្សាយអំពីលោកឡើយ។ ថ្មីៗនេះស្រាប់តែលេចឮព័ត៌មានថា មូលហេតុដែលកំពូលតារាចម្រៀងម្នាក់នេះព្យាយាមមិនបង្ហាញមុខក្នុងទំព័រសារព័ត៌មាន ព្រោះតែលោកមិនចង់ឆ្លើយតបទៅនឹងសំណួរជុំវិញតម្លៃខ្លួនក្នុងការងារ គ្រាដែលលោកទទួលបានការងារថតស្ប៉តពាណិជ្ជកម្មជាច្រើននោះ។

ប្រហែលជាជាងពីរឆ្នាំចុងក្រោយនេះគេសង្កេតឃើញថា លោក ព្រាប សុវត្ថិ ហាក់ទទួលបានការងារជាច្រើនពាក់ព័ន្ធនឹងការថតស្ប៉តពាណិជ្ជកម្ម ដូចជាការធ្វើជាតំណាងឱ្យផលិតផលស្រាបៀរអង្គរ និងផលិតផលខោក្នុងម៉ាក ខ្លាស ជាដើម។ គ្រាន់តែឃើញការងារបែបនេះមានមហាជនជាច្រើនបានលើកឡើងថា លោក ព្រាប សុវត្ថិ ច្បាស់ជាគ្រប់ទឹកមិនខាន ព្រោះគេបាននិយាយថា កាលពីប៉ុន្មានឆ្នាំមុនគ្រាដែលលោកទទួលបានការងារថតស្ប៉តឱ្យសេវាទូរស័ព្ទចល័តក្នុងស្រុកមួយ គឺទទួលបានតម្លៃខ្លួនរាប់សិបម៉ឺនដុល្លារ។

យោងតាមប្រភពមួយចំនួនបានបង្ហើបថា ក្នុងឆ្នាំថ្មីនេះលោក ព្រាប សុវត្ថិ កំពុងតែត្រូវប៉ាន់យ៉ាងខ្លាំង ព្រោះគ្រាន់តែលោកធ្វើការងារជាអ្នកតំណាងឱ្យក្រុមហ៊ុនស្រាបៀរអង្គរមួយ លោកទទួលបានតម្លៃខ្លួនក្បែរលានដុល្លារទៅហើយ បន្ថែមពីលើនេះទៀតតម្លៃខ្លួនសម្រាប់ការងារថតស្ប៉តឱ្យផលិតផលខោក្នុងក៏ទទួលបានរាប់ម៉ឺនដុល្លារផងដែរ។

ទោះបីជាព័ត៌មានខាងលើមិនទាន់អាចចាត់ទុកជាព័ត៌មានផ្លូវការក៏ដោយ ប៉ុន្ដែអ្នកគាំទ្ររបស់លោកជាច្រើនបានសាទរជាមួយលោកគ្រាដែល Idol របស់ពួកគេទទួលបានតម្លៃខ្លួនខ្ពស់មិនចាញ់តារាបរទេសនៃប្រទេសជិតខាង។ តែទោះជាយ៉ាងណាក៏ដោយ ក៏ឡា រ៉ែន សូមជួយចូលរួមសម្តែងក្តីត្រេកអរចំពោះអ្វីដែលល្អៗកើតឡើងសម្រាប់វិស័យសិល្បៈ និងជាមួយគ្រប់សិល្បករទាំងអស់របស់កម្ពុជាយើងដែលទទួលបានភាពជោគជ័យក្នុងអាជីពរបស់ពួកគេដោយក្តីមោទនៈ និងចង់បានការអះអាងពីសាមីខ្លួនតារាទាំងអស់ដើម្បីទុកជាការត្រេកអរទាំងអស់គ្នា៕

តារាសម្ដែង នីតា វរវង្ស ត្រូវបានមហាជនមានការកោតសសើរជាខ្លាំងទៅលើទេពកោសល្យក្នុងការសម្ដែងជាតួអង្គកាចឆ្នាស រហូតធ្វើឱ្យប្រជាប្រិយភាពមានសម្ទុះកើនឡើងជាបន្ដបន្ទាប់។ ស្របពេលជាមួយគ្នាក៏លេចឮថា តារាសម្ដែងស្រីស្អាតវ័យ 21ឆ្នាំរូបនេះ កំពុងសម្ងំស្វែងយល់ចិត្ដគ្នាជាមួយបុរសម្នាក់នៅក្រៅប្រទេស។

គ្រាន់តែលេចឮថា តារាសម្ដែងស្រស់ស្អាតរូបនេះកំពុងមានស្នេហាជាមួយបុរសម្នាក់រស់នៅក្រៅប្រទេស គេហាក់មានការចម្លែកចិត្ដភ្លាមតែម្តង ព្រោះកន្លងមកម្ដាយរបស់នាងតែងតែដើរតាមនាងគ្រប់ច្រកល្ហក និងម្យ៉ាងទៀតគាត់ជាមនុស្សម្នាក់ដែលមានការរឹតត្បិតរឿងជីវិតស្នេហារបស់កូនស្រីខ្លួនណាស់ ព្រោះតែចង់ឱ្យកូនស្រីប្រឹងសាងកេរ្ដិ៍ឈ្មោះក្នុងសិល្បៈសិន។

ជួបកញ្ញានីតា វរវង្ស នាងបានប្រាប់ថា រហូតមកដល់ពេលនេះនាងមិនធ្លាប់បានសាងសេ្នហាជាមួយបុរសណាម្នាក់ឡើយ។ កន្លងមកអ្វីដែលមហាជន ក៏ដូចជាមិត្ដភ័ក្ដិក្នុងសិល្បៈបានឃើញសកម្មភាពនៅខាងក្រៅរវាងនាង និងបុរសម្នាក់ដែលមិនមែនជាអ្នកស្ថិតនៅក្នុងរង្វង់សិល្បៈនោះ វាគ្រាន់តែជាការរាប់អានបែបមិត្ដភ័កិ្ដប៉ុណ្ណោះ។

វរវង្ស បានឆ្លើយតបដោយមិនលាក់លៀមថា នាងមិនអាចយកក្រដាសទៅខ្ចប់ភ្លើងបានទេ ការពិតបុរសរស់នៅក្រៅប្រទេសនោះគឺនៅអាមេរិក ជាអ្នកគាំទ្រការសម្ដែងរបស់នាងព្រមទាំងធ្លាប់បានឆាតសួរសុខទុក្ខគ្នាតាមរយៈហ្វេសប៊ុកផងដែរ ព្រោះគាត់ជាអ្នកចូលចិត្ដសិល្បៈ។ នាងបន្ដថា បុរសម្នាក់នោះធ្លាប់បានប្រាប់ថា បើមានឱកាសមកលេងស្រុកខ្មែរ គាត់នឹងមកជួបនាងខ្ញុំផ្ទាល់ ព្រោះគាត់ចង់រាប់អានដូចជាញាតិម្នាក់។ ទើបនៅពេលបុរសនោះមកលេងស្រុកខ្មែរនាងត្រូវរ៉ាប់រងការជូនដើរកម្សាន្ដ ជាពិសេសក៏ធ្លាប់នាំទៅមើលនាងថតកុនផងដែរ។

ទោះជាយ៉ាងណា នីតា វវវង្ស អះអាងដាច់ខាតថានាងអត់ទាន់ចង់មានស្នេហាទេ ព្រោះឱកាសនៃការសាងកេរ្ដិ៍ឈ្មោះក្នុងរង្វង់សិល្បៈនៅមានច្រើន ម្យ៉ាងម្ដាយនាងក៏មិនទាន់ចង់ឱ្យនាងពាក់ព័ន្ធនឹងរឿងស្នេហាទាំងវ័យក្មេងដែរ។ នាងបន្ដថា៖” កន្លងមានអ្នកស្រឡាញ់ច្រើន ប៉ុន្ដែខ្ញុំអត់ចង់គិតទេ ម្យ៉ាងម៉ាក់ជាអ្នកមានគុណ គាត់ប្រឹងមើលថែខ្ញុំ ស្រឡាញ់យកចិត្ដទុកដាក់លើខ្ញុំ គាត់ចង់ឱ្យខ្ញុំសាងកេរ្ដិ៍ឈ្មោះក្នុងសិល្បឱ្យបានយូរ ដូច្នេះខ្ញុំត្រូវតែបំពេញបំណងម៉ាក់”៕

ភ្នំពេញៈ ជំនាញផ្នែកចុងភៅនៅកម្ពុជាកាន់តែត្រូវប៉ាន់ហើយ ដោយអ្នកសិក្សាជំនាញនេះអាចរកប្រាក់ចំណូលបានខ្ពស់ដល់ទៅរាប់រយដុល្លារ ឬឈានដល់ខ្ទង់ពាន់ដុល្លារអាមេរិកក៏មាន។

លោកផេង សំអ៊ីម គ្រូបង្ហាត់នៃសាលាបង្រៀនធ្វើម្ហូប «ខ្លូបល» បានឲ្យដឹងតាមទូរស័ព្ទកាលពីល្ងាចថ្ងៃម្សិលមិញថា បច្ចុប្បន្នយុវជនសិក្សាជំនាញចុងភៅ និងជំនាញវិជ្ជាជីវៈទេសចរណ៍ផ្សេងៗទៀតមានចំនួនកើនឡើងជាលំដាប់ ដែលគិតចាប់ពីឆ្នាំ 2012 មកដល់បច្ចុប្បន្ន មានចំនួនសិស្សប្រមាណជាង 3ពាន់នាក់ហើយ ដោយក្នុងនោះសិស្សជាជនជាតិបរទេសក៏មានចំនួនច្រើនដែរ។ លោកបន្តថា នៅក្នុងប្រទេសកម្ពុជាអ្នកជំនាញចុងភៅ ដែលមានសមត្ថភាព និងជំនាញពិតប្រាកដស្របតាមស្តង់ដារអន្តរជាតិទៀតនោះ អាចនឹងទទួលបានប្រាក់បៀវត្សរ៍ ឬប្រាក់ចំណូលក្នុងជំនាញនេះយ៉ាងហោចណាស់ចាប់ពីជាង 1០០ដល់ 6០០ដុល្លារអាមេរិក ឬអាចឈានដល់ 1ពាន់ដុល្លារអាមេរិកក៏មាន។

លោកស្រី លឹម វណ្ណៈ អនុប្រធានការិយាល័យហិរញ្ញវត្ថុ នៃវិទ្យាស្ថានអភិវឌ្ឍន៍សហគ្រិនភាពកម្ពុជា-ឥណ្ឌាបានមានប្រសាសន៍ឲ្យដឹងផងដែរថា តាមការកត់សម្គាល់ជំនាញវិជ្ជាជីវៈផ្នែកម្ហូបអាហារ និងភេសជ្ជៈ ទទួលបានការចាប់អារម្មណ៍យ៉ាងច្រើនពីយុវជនមកពីតាមបណ្តាខេត្ត ពិសេសយុវជននៅរាជធានីភ្នំពេញបានងាកមកសិក្សាលើជំនាញនេះច្រើន ព្រោះថាជំនាញនេះងាយស្រួលស្វែងរកការងារធ្វើ និងងាយស្រួលបើកអាជីវកម្មខ្លួនផ្ទាល់ដែលអាចរកប្រាក់ចំណូលបានច្រើនគួរសម និងចៀសវាងការធ្វើចំណាកស្រុកបានទៀតផង។

បើយោងតាមលោកលូ ម៉េងសហប្រធានក្រុមការងារឯកជនផ្នែកវិស័យទេសចរណ៍ និងជាមេចុងភៅធំមួយនៅកម្ពុជាបានឲ្យដឹងថា ជំនាញចុងភៅពិតជាជំនាញមួយ ដែលមានការងារច្រើន និងអាចទទួលបានប្រាក់ខែច្រើន ប្រសិនជាពួកគេមានជំនាញ និងទទួលបានការបណ្តុះបណ្តាលច្បាស់លាស់ ព្រោះបច្ចុប្បន្នចំនួនចុងភៅនៅកម្ពុជាមានការខ្វះខាតនៅឡើយ ដោយសារមានតម្រូវការច្រើនពីអ្នកវិនិយោគផ្នែកសណ្ឋាគារ និងភោជនីយដ្ឋាននានាកើនឡើងកាន់តែច្រើន។ លោកអំពាវនាវឲ្យយុវជនចូលសិក្សាជំនាញនេះ ដើម្បីទទួលបានការងារល្អ និងជាជំនាញដែលមានការងារច្រើនសម្រាប់ពួកគេ៕

តារាសម្ដែងស្រី ឯក សុវណ្ណរ័ត្នដែលគេស្គាល់ថា ត្រូវជាប្អូនជីដូនមួយរបស់តារាចម្រៀងលោក ឯក ស៊ីដេ ត្រូវបានប្រភពមួយប្រាប់មកថា បច្ចុប្បន្ននេះនាងកំពុងតែមានទំនាក់ទំនងស្នេហាផ្អែមល្ហែមជាមួយតារាវ័យក្មេងម្នាក់។

កាលពីប៉ុន្មានខែមុនគេនៅចាំបានថា តារាសម្ដែងស្រីម្នាក់នេះបានទម្លាយអាថ៌កំបាំងក្នុងបេះដូងរបស់នាងថា ដោយសារតែនាងជួបស្នេហាមិនសមប្រកបតាមបំណង ធ្វើឱ្យនាងលែងចង់ពាក់ព័ន្ធនឹងរឿងស្នេហាទៀតហើយ។ តែថ្មីៗនេះស្រាប់តែបែរជាលេចឮថា នាងកំពុងតែសាងស្នេហាយ៉ាងល្អូកល្អិនជាមួយកំលោះ សឿន នរៈពិសិដ្ឋ ជាតារាសិល្បៈទើបនឹងរះទៅវិញ។

បើទោះជាមានការលើកឡើងបែបនេះក្ដី ក៏តារាសម្ដែងស្រី ឯក សុវណ្ណរ័ត្ន បានបញ្ជាក់ហាក់ដូចជាមានចេតនាការពារខ្លួនថា នាងចាត់ទុកតារាវ័យក្មេងម្នាក់នោះជាដៃគូ និងជាប្អូនប្រុសក្នុងសិល្បៈតែប៉ុណ្ណោះ ព្រោះនាងមិនដែលនឹកដល់រឿងស្នេហាឡើយទោះជាមានគេនិយាយថា នាងជាគោចាស់ចង់ស៊ីស្មៅខ្ចីក៏ដោយ ក៏នាងពុំដែលគិតដែរ។ នាងបន្ដថា ចំពោះរូបគេ (សឿន នរៈពិសិដ្ឋ) ក៏ចាត់ទុកនាង មិនខុសពីបងស្រីម្នាក់ដែរទើបនាងព្យាយាមខ្វល់ខ្វាយ និងខ្នះខ្នែងជួយឲ្យគេបានចូលសិល្បៈ សម្ដែងយ៉ាងពេញទំហឹង បន្ទាប់ពីគេបានចូលប្រឡូកក្នុងការងារសិល្បៈប្រមាណជា 2ឆ្នាំទៅហើយ តែទទួលបានផ្លែផ្កាត្រឹមបន្តិចបន្ដូច។

គួរបញ្ជាក់ថា នៅលើបណ្ដាញសង្គមតារាសម្ដែងទាំងពីរបានថតរូបកៀកកើយគ្នាបែបសង្សារ ដោយភ្ជាប់ជាមួយការសរសេរសារយ៉ាងផ្អែមល្ហែម។ អ្នកខ្លះទៀតបានលើកឡើងថា សូម្បីតែនៅកន្លែងថតរឿង ក៏គេឃើញតារាចម្រៀងវ័យក្មេង ទៅតាមកំដរអ្នកនាង ឯក សុវណ្ណរ័ត្នដែរ ដែលសកម្មភាពនេះនាងហាក់មានចេតនាបង្ហាញឱ្យមិត្ដភ័ក្ដិក្នុងសិល្បៈបានដឹងថា ពួកគេស្រឡាញ់គ្នា។ ចំណែកតារាវ័យក្មេង សឿន នរៈពិសិដ្ឋ បានច្រាលចោលដំណឹងស្នេហាបែបនេះ និងបានចាត់ទុក ឯក សុវណ្ណរ័ត្នថាជាបងស្រី ដោយលោកមិនខ្វល់រឿងអ្នកណាចោទប្រកាន់ថា តោងកាលីប ឬក៏ជំពាក់ស្នេហ៍តារាសម្ដែងស្រីម្នាក់នេះទេ ទោះគេថា គោចាស់ចង់ស៊ីស្មៅខ្ចីអីក៏ដោយ ក៏លោកមិនឈឺក្បាលដែរ។

មួយរយៈចុងក្រោយនេះកញ្ញាឯក សុវណ្ណរ័ត្នទើបតែបញ្ចប់ការថត រឿង «កំលោះយំក្រមុំសើច» របស់ My TV និងរឿង «ទូកបាត់ច្រវា» របស់ទូរទស្សន៍ PNN៕