Category: សង្គម និងសេដ្ឋកិច្ច

អំឡុងពេល 3ខែចុងក្រោយនេះ អាជ្ញាធរតែងតែលើកជាសំណើទៅដល់វិស្វករ ក៏ដូចជាអ្នកអភិវឌ្ឍន៍ឱ្យចូលរួមថែរក្សារចនាប័ទ្មខ្មែរសម្រាប់គម្រោងអភិវឌ្ឍន៍របស់ខ្លួន ពិសេសថ្មីៗនេះសូម្បីតែអគារ 135ជាន់ដែលជាអគារខ្ពស់ជាងគេនៅក្នុងប្រទេសកម្ពុជាក៏ត្រូវបាននិងកំពុងតែកែប្រែប្លង់ដើម្បីដាក់បញ្ចូលរចនាប័ទ្មខ្មែរដែរ។

ឯកឧត្ដម ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានលើកឡើងថាស្ថាបត្យករគួរតែរក្សាឱ្យបាននូវអត្ដសញ្ញាណជាតិដើម្បីឱ្យស្របគ្នាទៅនឹងការដាក់ចេញរបស់ថ្នាក់ដឹកនាំក្រសួង។ ក្នុងនោះក៏មានការតម្រូវឱ្យគណៈស្ថាបត្យករមានការចងក្រងនូវលក្ខណៈស្ថាបត្យកម្មណាដែលមានលក្ខណៈល្អ ទុកជូនវិនិយោគិនជាតិ និងអន្ដរជាតិធ្វើជាគំរូខ្លះៗសម្រាប់ការងារវិនិយោគ។

រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានបញ្ជាក់ថា៖” ការងារបញ្ជ្រាបចូលនូវរចនាប័ទ្មខ្មែរនេះជាកត្តាសំខាន់ក្នុងរក្សាបានអត្ដសញ្ញាណជាតិ នៅពេលណាដែលយើងធ្វើបានល្អ និងខុសប្លែកពីគេ ទេសចរនឹងមិនទៅមើលកន្លែងផ្សេងទេ គេនឹងមកទស្សនាប្រទេសយើងដោយសារតែយើងមានលក្ខណសម្បត្ដិល្អ និងរក្សាបាននូវអ្វីដែលជារបស់ខ្មែរ ប៉ុន្ដែយើងក៏ត្រូវចេះធ្វើឱ្យទៅជាទំនើបកម្មផងដែរ។ យើងអាចធ្វើរចនាប័ទ្មជាខ្មែរ តែយើងប្រើសម្ភារទំនើបៗដូចជាបេតុង ឬជាកញ្ចក់ក៏បាន”។ ឯកឧត្ដមបន្ដថា អត្ដសញ្ញាណខ្មែរមិនមែនមានន័យថា យើងចាំបាច់ត្រូវធ្វើរូបរាងខាងក្រៅឱ្យចេញមកជាបែបខ្មែរទើបហៅថាមាននិយមន័យបែបហ្នឹងទេ យើងធ្វើរចនាប័ទ្មនៅខាងក្នុងផ្ទះក៏អាចមាននិយមន័យថាជាអត្ដសញ្ញាណខ្មែរបានដែរ។

លោកសេង វណ្ណៈ ជាម្ចាស់អគារលំនៅដ្ឋានមានឈ្មោះថា “ទ្រនំ” ដែលគេមើលឃើញថា ការតុបតែងរចនាផ្ទៃខាងក្នុងអគាររបស់លោកមានលក្ខណៈជារចនាប័ទ្មខ្មែរច្រើន ព្រមទាំងគោរពបាននូវបទដ្ឋានបរិស្ថានបៃតងផងនោះ បានបញ្ជាក់ថា ការសាងសង់អគារមួយនោះគឺលោកបានគិតថា ត្រូវធ្វើយ៉ាងណាឱ្យបានដាក់បញ្ចូលរចនាប័ទ្មខ្មែរខ្លះ និងមានគំនិតអ្វីដែលថ្មី ប្លែក ទើបទីតាំងរបស់លោកអាចទាក់ទាញអ្នកចូលមករស់នៅបានច្រើន ព្រមទាំងទទួលបានកម្រៃពីការជួលខ្ពស់ផងដែរ។

លោកសាស្រ្តាចារ្យ ទួស សាភឿន ប្រធានផ្តួចផ្តើមសម្រាប់គម្រោងប្លង់អគារពាណិជ្ជកម្មភ្លោះ ថៃ ប៊ុនរ៉ុង និងជាអគ្គលេខាធិការរងនៃគណៈស្ថាបត្យករកម្ពុជា បានឱ្យដឹងថា ប្លង់អគារពាណិជ្ជកម្មនេះកំពុងកែប្រែប្រមាណ 40 ភាគរយពីប្លង់អគារចាស់។ ការកែប្រែនេះ គឺដើម្បីបង្កើនសោភ័ណភាព រចនាប័ទ្ម ស្ថាបត្យកម្មពិសេស ការដាក់បញ្ចូលនូវអ្វីជារចនាប័ទ្មរបស់ខ្មែរទៅក្នុងអគារនេះ នឹងត្រូវសាងសង់ដោយប្រើបច្ចេកវិទ្យាទំនើបបំផុត៕

នៅថ្ងៃទី12 ខែមិថុនា ឆ្នាំ2017 នេះ តារាចម្រៀង និងជាអ្នកនិពន្ធបទភ្លេងល្បីឈ្មោះប្រចាំផលិតកម្មរស្មី ហង្សមាស គឺ លោក សួន ពិសិដ្ឋ បានចូលរួមរិះគន់ជុំវិញប្រតិកម្មរឿង ឈុតសម្លៀកបំពាក់ប្រពៃណីជាតិ ដែលត្រូវបានច្នៃម៉ូដដោយជនជាតិថៃ នៅក្នុងកម្មវិធី Mister National Universe 2017 តាមរយៈគណនីបណ្ដាញសង្គមហ្វេសប៊ុក ។

ជុំវិញបញ្ហានេះ លោក សួន ពិសិដ្ឋ បានសរសេរសារលើរូបភាពដែលបានចែករំលែកបន្ដពីគេហទំព័រ AjathomNokorReachថា “សុទ្ធតែពលរដ្ឋខ្មែរធ្វើអន្តរាគមន៍! ចុះឯណាមន្ត្រីពាក់ព័ន្ធរបស់ក្រសួងវប្បធម៌និងវិចិត្រសិល្បៈ ម៉េចអត់មានឃើញអើពើអីសោះអ៊ីចឹង!!?” ។ គួរកត់សម្គាល់ដែរថា អ្នកលេងបណ្ដាញសង្គមហ្វេសប៊ុក បានគាំទ្រជុំវិញការរិះគន់ទៅដល់ខាងមន្ត្រីក្រសួងវប្បធម៌ សមាគមសិល្បៈ និងសុំឱ្យមានការចាត់វិធានការ និងចំណាត់ការផ្សេងៗ និងមិនគួរស្ងាត់ចំពោះរឿងនោះដូច្នេះឡើយ ព្រោះមិនដឹងថា បេក្ខជនទៅប្រកួតតាំងពីពេលណា នៅកន្លែងណា និងអ្នករៀបចំកម្មវិធីនោះជាអ្នកណាឡើយ ។លោក ពិសិដ្ឋ បានឆ្លើយតបបន្ដថា “អ៊ីចឹង អ្នករៀបចំកម្មវិធីហ្នឹង ពិតជាកាន់តែគួរឱ្យខ្លាច និងគួរឱ្យប្រយ័ត្នហើយ” ។

គួររំឭកបន្តិចផងដែរថា កម្មវិធី Mister National Universe 2017 ត្រូវបានអ្នកលេងបណ្ដាញសង្គមរិះគន់យ៉ាងខ្លាំងអំពីការស្លៀកឈុតបុរាណប្រពៃណីខ្មែរដែលខុសលំនាំដោយអ្នកចូលរួមប្រកួតជាជនជាតិខ្មែរកាលពីម្សិលមិញនេះ ដោយកម្មវិធីនោះត្រូវបានរៀបចំឡើងនៅទីក្រុងបាងកក និង តំបន់ទេសចរណ៍ហួហ៊ីន ប្រទេសថៃ ដែលបានចាប់ផ្តើមតាំងពីថ្ងៃទី 5 ដល់ថ្ងៃទី 13 ខែ មិថុនា ឆ្នាំ 2017 នេះ ដោយមានបេក្ខជនចូលរួមប្រកួតមកពីបណ្ដាប្រទេសនានា សរុបចំនួន 25នាក់ ជាបេក្ខជនតំណាងឱ្យជាតិនីមួយៗ និងគួរបញ្ជាក់ផងដែរថា បេក្ខជនដែលបានទៅចូលរួមប្រកួតក្នុងកម្មវិធីខាងលើនោះ ក៏បានចេញសារសុំទោស និងពន្យល់ពីមូលហេតុ និងរាល់កំហុសឆ្គងដែលបានកើតឡើងជាសាធារណៈតាមរយៈហ្វេសប៊ុកហើយដែរ ដោយលោកសង្ឃឹមថា បណ្ដាអ្នករិះគន់នឹងយោគយល់ដល់រូបលោក ហើយប្រទេសកម្ពុជានឹងមានកម្មវិធីចូលប្រកួតលើឆាកអន្ដរជាតិនាពេលខាងមុខនេះដែរ ហើយលោកបានបញ្ជាក់ថា ខ្ញុំគ្រាន់តែចង់បាននូវបទពិសោធសម្រាប់ជីវិតតែប៉ុណ្ណោះ ៕

ភ្នំពេញៈ លោកទេសរដ្ឋមន្រ្តី ឆាយ ថន បានថ្លែងថា កម្ពុជាជាប់ចំណាត់ថ្នាក់ទី6 ក្នុងពិភពលោក គិតក្នុងរយៈពេលជាង 2០ឆ្នាំចុងក្រោយមកនេះ ដែលមានកំណើនសេដ្ឋកិច្ចរីកលូតលាស់លឿនជាងគេនៅក្នុងពិភពលោក។

លោកឆាយ ថន ទេសរដ្ឋមន្រ្តី រដ្ឋមន្រ្តីក្រសួងផែនការ និងជាអនុប្រធានអចិន្ត្រៃយ៍ នៃក្រុមប្រឹក្សាជាតិវិទ្យាសាស្រ្ត និងបច្ចេកទេសបានថ្លែងលើកឡើងក្នុងសិក្ខាសាលាស្តីពីកិច្ចសហប្រតិបត្តិការត្បូង ត្បូង និងកិច្ចសហប្រតិបត្តិការត្រីកោណ ដើម្បីជំរុញការអភិវឌ្ឍតាមរយៈវិទ្យាសាស្រ្ត និងបច្ចេកទេសនៅថ្ងៃទី12 ខែមិថុនា ឆ្នាំ2017នេះថា ប្រទេសកម្ពុជាសម្រេចបានការអភិវឌ្ឍយ៉ាងធំធេង ក្នុងបណ្តាទសវត្សរ៍ចុងក្រោយនេះ គឺចាប់តាំងពីឆ្នាំ1994 ដល់ឆ្នាំ2015 កម្ពុជាមានអត្រាកំណើនផលិតផលក្នុងស្រុកសរុប (GDP) ជាមធ្យមប្រចាំឆ្នាំចំនួន 7.6ភាគរយ ក្នុងឋានៈជាប្រទេសមានកំណើនលឿនជាងគេបង្អស់សម្រាប់រយៈពេលនោះ ។

លោកបន្តទៀតថា «ក្រៅពីការសម្រេចបានកំណើន GDP ល្អហើយ កម្ពុជាក៏សម្រេចបានដោយជោគជ័យក្នុងគោលដៅអភិវឌ្ឍសហវត្សរ៍ ក្នុងការកាត់បន្ថយភាពក្រីក្រ បើគិតមកដល់ឆ្នាំ2015 គឺមុនកាលកំណត់ដែលបានគ្រោងទុកកាលពីឆ្នាំ2009 ក្នុងនោះអត្រានៃភាពក្រីក្របានធ្លាក់ចុះពី47.3ភាគរយនៅឆ្នាំ2007 មកនៅត្រឹម13.5ភាគរយនៅឆ្នាំ2014ផងដែរ ។ ចំណែកនៅឆ្នាំ2015 កម្ពុជាបានចាកចេញផុតពីឋានៈប្រទេសមានការអភិវឌ្ឍតិចតួច ទៅជាប្រទេសមានប្រាក់ចំណូលមធ្យមកម្រិតទាប ។

លោកទេសរដ្ឋមន្រ្តីឆាយ ថន បន្ថែមថា ទន្ទឹមនឹងការរីកចម្រើនជាវិជ្ជមានទាំងនេះ ការរក្សាល្បឿន និងនិរន្តរភាពនៃកំណើន គឺជាកត្តាប្រឈមនៅកម្ពុជាផងដែរ ដើម្បីរក្សានូវស្ថេរភាពនៃកំណើនជាវិជ្ជមាននេះ រាជរដ្ឋាភិបាលកម្ពុជា បានដាក់ចេញនូវយុទ្ធសាស្រ្តសំខាន់ៗមួយចំនួន ក្នុងនោះមានការអភិវឌ្ឍវិទ្យាសាស្រ្ត និងបច្ចេកវិទ្យា ដើម្បីបង្កើនភាពចម្រុះនៃប្រភពកំណើន បង្កើនប្រសិទ្ធភាពការងារ បង្កើនភាពប្រកួតប្រជែងសម្រាប់ជំនួសការនាំចូល ជំរុញការនាំចេញ និងការឈានពីពលកម្មអតិពលកម្ម ទៅពលកម្មជំរុញជាដើម៕

យុវជនកម្ពុជាជាច្រើនក្រុមបានរួមគ្នាប្រកួតប្រជែងលើប្រធានបទសំខាន់ៗនៅក្នុងកម្មវិធី The perspective Cambodia ដែលជាកម្មវិធីជជែកតស៊ូមតិថ្នាក់ជាតិមួយសម្រាប់យុវជននៅកម្ពុជា។ ក្នុងនោះ ប្រធានបទ ស្តីពី «ការខ្ចីបំណុលពីគ្រឹះស្ថានមីក្រូហិរញ្ញវត្ថុជាច្រើនរបស់ប្រជាពលរដ្ឋបានជះឥទ្ធិពលអាក្រក់ទៅលើសេដ្ឋកិច្ចកម្ពុជានាពេលអនាគត» បានក្លាយជាប្រធានបទសំខាន់មួយដែលទទួលបានការចាប់អារម្មណ៍ពីគ្រប់សមាសភាពសង្គម។

បេក្ខជននៃក្រុមដែលស្របលើប្រធានបទនេះ បានធ្វើការបកស្រាយដោយផ្តោតលើទឡ្ហីករណ៍សំខាន់ៗចំនួន 3គឺ ការយល់ដឹងពីផ្នែកហិរញ្ញវត្ថុរបស់ប្រជាជនកម្ពុជានៅមានកម្រិតនៅឡើយ ហើយការប្រើប្រាស់កម្ចីរបស់ប្រជាពលរដ្ឋខ្មែរមានហានិភ័យខ្ពស់ និងហានិភ័យនៃការកំណត់ពិដានអត្រាការប្រាក់។ ដោយក្រុមស្របបានធ្វើការបកស្រាយពីកម្រិតនៃការយល់ដឹងរបស់ប្រជាជនក្នុងការខ្ចីបំណុលពីធនាគារនៅទន់ខ្សោយដែលធ្វើឱ្យពួកគេស្ថិតក្នុងបំណុល ឬជួបហានិភ័យខ្ពស់ក្នុងការប្រើប្រាស់ថវិកាដែលបានមកពីកម្ចីទាំងអស់នោះ ដែលធ្វើឱ្យពួកគេត្រូវជួបភាពក្រីក្រ។ ពួកគេក៏បានបកស្រាយផងដែរពីការដាក់ពិដានអត្រាការប្រាក់ ឬការកំណត់ឱ្យគ្រឹះស្ថានមីក្រូហិរញ្ញវត្ថុទាំងអស់កំណត់យកការប្រាក់ខ្ពស់បំផុតត្រឹម 18% ក្នុងមួយឆ្នាំ ដែលរុញច្រានឱ្យប្រជាជនកាន់តែច្រើនជាប់បំណុលធនាគារ។

ចំណែកឯក្រុមបដិសេធវិញ ក៏បានឆ្លើយតបផងដែរដោយយោងលើទឡ្ហីករណ៍សំខាន់ៗចំនួន 3 ដូចគ្នា គឺទី1 ក្រុមបដិសេធបកស្រាយពីកម្មវត្ថុនៃកម្ចីរបស់ប្រជាពលរដ្ឋខ្មែរ ទី2គឺ កម្ចីធនាគារបានធ្វើឱ្យមានកំណើននៃអាជីវកម្មដែលអាចបង្កើនឱកាសការងារ និងកាត់បន្ថយភាពក្រីក្រ និងចំណុចចុងក្រោយគឺ កំណើនសេដ្ឋកិច្ច និងសេវាសាធារណៈ។ ក្រុមបដិសេធបានបកស្រាយថា តាមពិតទៅការខ្ចីបំណុលគ្រឹះស្ថានមីក្រូហិរញ្ញវត្ថុនឹងមិនមានហានិភ័យនោះទេ ព្រោះកម្មវត្ថុនៃកម្ចីគឺដើម្បីយកទៅបង្កើនចំណូល និងផ្គត់ផ្គង់ជីវភាព។ ក្រុមបដិសេធក៏បានបកស្រាយផងដែរថា កម្ចីអាចជួយឱ្យមានភាពរីកចម្រើនទៅវិញទេក្នុងសង្គមកម្ពុជា។

លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេសនៃធនាគារជាតិនៃកម្ពុជា បានកោតសរសើរចំពោះយុវជនដែលបានខិតខំប្រឹងប្រែងសិក្សាស្រាវជ្រាវលើប្រធានបទស្តីពីមីក្រូហិរញ្ញវត្ថុ ព្រោះវាជាប្រធានបទក្តៅ។ ប្រធានបទនេះជាប្រធានបទដែលមនុស្សគ្រប់គ្នាកំពុងចាប់អារម្មណ៍ ហើយចំណាប់អារម្មណ៍នេះ គឺមានទូទាំងពិភពលោក មិនមែនតែនៅកម្ពុជានោះទេ។
លោកជំទាវ ជា សិរី មានប្រសាសន៍ថា៖ «ការតស៊ូមតិនេះគឺធ្វើបានល្អ តែការស្រាវជ្រាវរបស់ប្អូនៗនៅមានកម្រិតនៅឡើយ។ សម្រាប់ការសរសេរជានិក្ខេបបទ ឬការជជែកពិភាក្សាជាផ្លូវការគួរកុំយកទិន្នន័យ ក៏ដូចជាការអះអាងជាលក្ខណៈបុគ្គល ប្អូនៗគួរយកអំណះអំណាងដែលមានលក្ខណៈជាស្ថាប័នដែលគួរឱ្យទុកចិត្តបាន»។

លោកជំទាវបានបន្ថែមទៀតថា យុវជនដែលធ្វើការជជែកពិភាក្សាស្តីពីប្រធានបទការខ្ចីបំណុលពីគ្រឹះស្ថានហិរញ្ញវត្ថបានជះឥទ្ធិពលលើសេដ្ឋកិច្ចនេះ គួរចែកឱ្យដាច់ពីសេដ្ឋកិច្ច ព្រោះសេដ្ឋកិច្ចមានច្រើន មានទាំងសេដ្ឋកិច្ចមីក្រូ និងសេដ្ឋកិច្ចលក្ខណៈម៉ាក្រូ។ អ្វីដែលបេក្ខជនបានលើកឡើងគឺគ្រាន់តែជាលក្ខណៈគ្រួសារ ឬពាក់ព័ន្ធនឹងបំណុលគ្រួសារតែប៉ុណ្ណោះ។ បេក្ខជនទាំងអស់គួរធ្វើការវិភាគលើបញ្ហាមីក្រូ ហើយទាញភ្ជាប់ទៅកាន់ការស្រាវជ្រាវ និងការបកស្រាយជាលក្ខណៈម៉ាក្រូ ហើយចំពោះឯកសារ និងការពន្យល់ផ្សេងៗទៀតដើម្បីជាការយល់ដឹងឱ្យកាន់តែច្បាស់ បេក្ខជនអាចទៅកាន់ធនាគារជាតិនៃកម្ពុជាដើម្បីសិក្សាឱ្យបានកាន់តែលម្អិត។

នៅក្នុងកម្មវិធីជជែកតទល់នេះមានគណៈកម្មការចំនួន 5រូប គឺ លោកជំទាវ ជា សិរី អគ្គនាយិកានៃអគ្គនាយកដ្ឋានបច្ចេកទេស នៃធនាគារជាតិនៃកម្ពុជា កញ្ញា សឹង សុផារី អ្នកនាំពាក្យក្រសួងពាណិជ្ជកម្ម លោក ឈឹម សំណាង គ្រូបង្វឹកនៃកម្មវិធីទំពាំងស្នងឫស្សី លោក អ៊ុក កំពូល អគ្គនាយករងនៃអគ្គនាយកដ្ឋានព័ត៌មាន និងសោតទស្សន៍ និងលោក អួង បូរិន នាយកធនធានមនុស្សនៃក្រុមហ៊ុន aplus consulting៕