Category: សង្គម និងសេដ្ឋកិច្ច

លោកបណ្ឌិត សុក ស៊ីផាន់ណា ទីប្រឹក្សារាជរដ្ឋាភិបាលកម្ពុជា និងជាប្រធានក្រុមប្រឹក្សាភិបាលនៃវិទ្យាស្ថាន CDRI បានលើកឡើងថា កម្ពុជាមានច្បាប់សឹងគ្រប់អស់ហើយ ដើម្បីផ្តល់ទំនុកចិត្តដល់អ្នកវិនិយោគ។

លោកបានផ្តល់ពេលវេលាខ្លីមួយ ដើម្បីឲ្យអ្នកយកព័ត៌មានផ្នែកសេដ្ឋកិច្ច និងអចលនទ្រព្យនៃគេហទំព័រឡារ៉ែន បានជួបសម្ភាស ៖
-សេដ្ឋកិច្ចកម្ពុជាសម្រេចបានកំណើនជាង 7ភាគរយ ក្នុងរយៈពេលពីរទសវត្សរ៍ តើអ្វីជាមូលដ្ឋាននៃការសម្រេចបាននូវកំណើននេះ?
សេដ្ឋកិច្ចកម្ពុជាសម្រេចបានកំណើនជាង7ភាគរយជាមធ្យមភាគក្នុងរយៈពេលជាងពីរទសវត្សរ៍ ហើយបើប្រៀបធៀបជាមួយប្រទេសនានាក្នុងពិភពលោក តើប្រទេសណាដែលសម្រេចបានកំណើនសេដ្ឋកិច្ចបែបនេះ?។ អ្វីដែលកម្ពុជាសម្រេចបាននូវលទ្ធផលដ៏គាប់ប្រសើរនេះ ដោយសារភាពបើកចំហនៃសេដ្ឋកិច្ចរបស់យើង និងសេរីភាវូបនីយកម្មនៃពាណិជ្ជកម្ម ការចូលជាសមាជិកអង្គការពាណិជ្ជកម្មពិភពលោក និងការផ្តល់លទ្ធភាពឲ្យអ្នកវិនិយោគមកវិនិយោគនៅប្រទេសយើងបានស្ទើរគ្រប់វិស័យ (លើកលែងតែជនបរទេសមិនអាចទិញដីធ្លី) ព្រោះប្រទេសយើងមិនមានការដាក់កំហិត ប៉ុន្តែប្រទេសខ្លះបានដាក់កំហិតក្នុងរឿងមួយចំនួន។

នេះជាការលើកទឹកចិត្តសម្រាប់អ្នកវិនិយោគទុន ពិសេសក្រុមហ៊ុនធំៗដែលមានលក់ភាគហ៊ុននៅក្នុងទីផ្សារហ៊ុន និងក្រុមហ៊ុនខ្លះមិនបានលក់ភាគហ៊ុនទេ តែពួកគេមានក្រុមប្រឹក្សាភិបាលរបស់ពួកគេ។ ក្រុមប្រឹក្សាភិបាលនេះ ជាអ្នកសិក្សាមើលថា គួរវិនិយោគនៅប្រទេសណាដែលគេអាចមានឯករាជ្យភាពក្នុងការសម្រេច និងគ្រប់គ្រងក្រុមហ៊ុនរបស់គេបាន។ នេះជាចំណុចសំខាន់ណាស់។

-មានការរិះគន់ពីគោលនយោបាយថា មានភាពបើកចំហពេក តើអ្វីជាគុណសម្បត្តិ និងគុណវិបត្តិពីភាពបើកចំហរបស់កម្ពុជានេះ?
អ្វីក៏មានគុណសម្បត្តិ និងគុណវិបត្តិដែរ ប៉ុន្តែក្នុងបរិបទកម្ពុជាដែលឆ្លងកាត់សង្រ្គាម ចាប់ផ្តើមពីបាតដៃទទេ និងទទួលបានសន្តិភាពនៅឆ្នាំ1993 យើងមិនអាចប្រៀបធៀបជាមួយប្រទេសថៃ និងមិនអាចធៀបទាំងជាមួយវៀតណាមផង ព្រោះវៀតណាមមានសង្រ្គាមមែន តែមិនមានសោកនាដកម្មដែលមានគេកាប់សម្លាប់អស់បញ្ញវ័ន្តនោះទេ។ កុំនិយាយពីលុយ ធនធានអត់មាន ចំណេះអត់មាន បច្ចេកវិទ្យាអត់មាន និងធនធានមនុស្សក៏កម្ពុជាអត់មាន។

អ៊ីចឹងស្រុកខ្មែរត្រូវចាប់ដៃគូសហការជាមួយបរទេស ដែលពួកគេយកចំណេះដឹង បច្ចេកវិទ្យា និងធនធានមកស្រុកយើងដែលផ្តល់លទ្ធភាពឲ្យខ្មែរដែលមានការព្យាយាម ការប្រឹងប្រែង និងការខិតខំនោះអាចចាប់បាននូវឱកាសទាំងនោះ។ នៅសៀមរាបក្រោយបញ្ចប់សង្រ្គាម យើងមានអូតែលប៉ុន្មាន? ឥឡូវយើងមានអូតែល និងផ្ទះសំណាក់ប៉ុន្មាន? ហើយមានម្ចាស់ភាគហ៊ុនច្រើនជាខ្មែរទៀត។ នេះជាអ្វីដែលយើងទទួលបានពីការរៀនសូត្រអំពីពួកគេ។

-យើងមានគោលនយោបាយសេដ្ឋកិច្ចបើកចំហ ធ្វើពាណិជ្ជកម្មតាមបែបសេរីភាវូបនីយកម្ម តែបើយើងក្រឡេកមើលទៅលើទិដ្ឋភាពច្បាប់វិញ តើច្បាប់របស់កម្ពុជាត្រូវមានលក្ខណៈបែបណាដើម្បីផ្តល់ទំនុកចិត្ត និងទាក់ទាញអ្នកវិនិយោគថ្មីៗ?

ខ្ញុំថា បូកសរុបទាំងមូលក្នុងរយៈពេល2០ឆ្នាំកន្លងមកនេះ ក្នុងពេលដែលយើងទទួលបានសន្តិភាពមកនេះ និងបោះឆ្នោតប៉ុន្មានអាណត្តិមកនេះ យើងឃើញថារដ្ឋាភិបាលបានប្រឹងប្រែងតាក់តែងច្បាប់ ហើយច្បាប់ដែលត្រូវការសម្រាប់អ្នកវិនិយោគទុនសឹងតែមានគ្រប់អស់ហើយ នៅខ្វះខាតតិចតួចប៉ុណ្ណោះ តែមិនមែនមានន័យថា អត់ច្បាប់ហ្នឹងសេដ្ឋកិច្ចយើងមិនដើរទៅមុខនោះទេ។

សំខាន់យើងបានធ្វើច្បាប់វិនិយោគតាំងពីឆ្នាំ1994 ក្រោយមកយើងធ្វើវិសោធនកម្មច្បាប់វិនិយោគជាបន្តបន្ទាប់បីបួនលើកមកហើយ។ ឥឡូវយើងធ្វើវិសោធនកម្មម្តងទៀត ដើម្បីឲ្យកាន់តែល្អ និងទាក់ទាញខ្លាំងឡើង។ យើងមានច្បាប់វិនិយោគទុន យើងមានច្បាប់ក្រុមហ៊ុន យើងមានច្បាប់ក្ស័យទុន យើងមានច្បាប់វិមជ្ឈកម្ម គឺច្បាប់ដោះស្រាយវិវាទក្រៅប្រព័ន្ធតុលាការ ច្បាប់កម្មសិទ្ធិបញ្ញា និងច្បាប់ធនាគារជាដើម។

យើងក៏កំពុងព្រាងច្បាប់សំណង់ ច្បាប់ប្រកួតប្រជែង ច្បាប់ការពារអ្នកប្រើប្រាស់ និងច្បាប់ការធ្វើពាណិជ្ជកម្មតាមប្រព័ន្ធបច្ចេកវិទ្យាជាដើម ប៉ុន្តែទោះជាមិនទាន់មានច្បាប់ធ្វើពាណិជ្ជកម្មតាមបច្ចេកវិទ្យាក្តី ក៏ការធ្វើពាណិជ្ជកម្មតាមបច្ចេកវិទ្យាបានដំណើរការបណ្តើរៗរួចទៅហើយនៅកម្ពុជា៕

ត្រឹមតែរយៈពេលដ៏ខ្លីប៉ុណ្ណោះ កញ្ញាសូ ស្រីលាភ ហាក់ទទួលបានការគាំទ្រពីមហាជនយ៉ាងច្រើន តាមរយៈការសម្ដែងភាពយន្ដភាគនៅតាមបណ្ដាស្ថានីយទូរទស្សន៍នានា។ ស្របពេលគ្នានេះដែរ ក៏មានការលើកឡើងថា តារាសម្ដែងរាងខ្ពស់ស្រឡះនេះមិនត្រឹមឡើងកូដលឿនទេ សូម្បីតែជីវភាពរស់នៅប្រចាំថ្ងៃរបស់នាងឥឡូវ ក៏មានការប្រែប្រួលលឿនខុសពីធម្មតាដែរ ។

គេនៅចាំបានថាគ្រាដែលកញ្ញា សូ ស្រីលាភ ចូលប្រឡូកក្នុងសិល្បៈដំបូងៗ នាងពុំមានជីវភាពធូរធារទេ មានម្ដងម្កាលនាងត្រូវជិះរ៉ឺម៉កកង់បីជាមធ្យោបាយសម្រាប់ធ្វើដំណើរទៅបំពេញការងារថតនៅតាមទីកន្លែងផ្សេងៗនៅក្នុងក្រុងភ្នំពេញ តែមិនបានមួយឆ្នាំផង តារាសម្ដែងរូបនេះស្រាប់តែចាប់ផ្ដើមសម្ញែងភាពហ៊ឺហាតាមរយៈការប្រើសម្ភារល្អៗ និងប្រើប្រាស់រថយន្ដ។
បើទោះជារថយន្ដនោះស្ថិតក្នុងតម្លៃខ្ពង់ត្រឹមជាង 1ម៉ឺនដុល្លារក៏ពិតមែន ប៉ុន្ដែអ្នកស្គាល់នាងពីមុនពិតជាមានការងឿងឆ្ងល់ថា តើនាងបានថវិកាមកពីណាលឿនម្ល៉េះ បើកាលពីមួយឆ្នាំមុន តម្លៃខ្លួនក្នុងការងាររបស់នាងនៅមានកម្រិតទាបសោះហ្នឹង?!។

ជួបជាមួយកញ្ញា សូ ស្រីលាភ នាងពិតជាទទួលស្គាល់ថា ពេលចូលសិល្បៈដំបូង នាងជួបបញ្ហាខ្វះខាតលើជីវភាពពិតមែន ព្រោះពេលនោះឪពុកម្ដាយនាងពុំចង់ឱ្យនាងចូលប្រឡូកក្នុងសិល្បៈឡើយ ព្រោះខ្លាចនាងចំណាយពេលឥតប្រយោជន៍ តែនាងបានជម្នះចិត្ដធ្វើអ្វីៗដោយខ្លួនឯង ប៉ុន្ដែក្រោយពីទទួលបានប្រជាប្រិយភាពមកឪពុកម្ដាយរបស់នាងមានការពេញចិត្ដលើការងាររបស់នាងជាខ្លាំង។

នាងបន្ដថា៖ ”ក្រោយពីមើលឃើញការលំបាករបស់ខ្ញុំដែលបានតស៊ូកន្លងមក ពួកគាត់ក៏សម្រេចទិញរថយន្ដ Prius មួយគ្រឿងឱ្យខ្ញុំធ្វើជាមធ្យោបាយធ្វើដំណើរសម្រាប់បំពេញការងារសិល្បៈ”។

ជាមួយគ្នានេះដែរ កញ្ញាសូ ស្រីលាភ ក៏បានលើកឡើងថា អ្វីៗដែលនាងមានសព្វថ្ងៃនេះ គឺជាកម្លាំងញើសឈាមរបស់នាង លាយគ្នាជាមួយទ្រព្យសម្បត្ដិឪពុកម្ដាយនាង។ នាងមិនធ្លាប់បានទទួលយកការជួយជ្រោមជ្រែងពីនរណាក្រៅពីគ្រួសារឡើយ ព្រោះសូម្បីតែឪពុកម្ដាយនាងក៏ពុំពេញចិត្ដឱ្យនាងទៅធ្វើ ទង្វើខុសសីលធម៌ណាមួយដែរ បើពុំដូច្នេះទេពួកគាត់នឹងឱ្យនាងផ្អាកពីសិល្បៈភ្លាម៕

ប្រជាពលរដ្ឋ និងសហគមន៍ចិញ្ចឹមជ្រូកនៅក្នុងខេត្តស្វាយរៀងបានបោះបង់ការចិញ្ចឹមជ្រូកប្រមាណ60 ភាគរយ គិតមកដល់ខែមិថុនា ឆ្នាំ2017នេះ ដោយពួកគាត់លើកឡើងថា បច្ចុប្បន្នការចិញ្ចឹមជ្រូកកំពុងជួបផលលំបាកខ្លាំង ដោយសារឈ្មួញបាននាំជ្រូកចូលមកយ៉ាងគំហុកពីប្រទេសវៀតណាម ដែលជាកត្តាចម្បងនាំឱ្យជ្រូកចិញ្ចឹមក្នុងស្រុកធ្លាក់ថ្លៃ ។

លោក កឹម ផល កសិករចិញ្ចឹមជ្រូកក្នុងសហគមន៍នៅភូមិជៀសឬស្សី ឃុំកំពង់ចម្លង ស្រុកស្វាយជ្រុំ ខេត្តស្វាយរៀង បាននិយាយថា ការចិញ្ចឹមជ្រូកឆ្នាំនេះបានថយចុះមកនៅត្រឹម17ក្បាល ព្រោះលក់មិនចេញខណៈដែលឆ្នាំមុនៗគ្រួសារគាត់ចិញ្ចឹមជ្រូកចន្លោះពី30 ទៅ40ក្បាល ហើយស្រួលលក់ចេញទៀតផង ដោយមានឈ្មួញមកទិញដល់ផ្ទះភ្លាមៗតែម្តង។ លោកបន្តថា ពេលចិញ្ចឹមជ្រូកកាលពីឆ្នាំមុនៗងាយលក់ចេញណាស់ និងបានតម្លៃថ្លៃទៀតផង ក្នុង1គីឡូក្រាមបានតម្លៃជាមធ្យមចន្លោះពី 7,500រៀល ដល់ 9,000រៀល តែបច្ចុប្បន្នជ្រូករស់1គីឡូក្រាមតម្លៃត្រឹម 5,000រៀល ដល់ 6,000រៀលប៉ុណ្ណោះ ហើយគ្មានអ្នកដើរទិញទៀត។

ពាក់ព័ន្ធរឿងនេះលោក ប៉ែន ចន្ធី ប្រធានការិយាល័យផលិតកម្មបសុព្យាបាលខេត្តស្វាយរៀង បានថ្លែងប្រាប់តាមទូរស័ព្ទថា ពលរដ្ឋបានបោះបង់ចោលការចិញ្ចឹមជ្រូកពិតមែន ហើយកត្តាបោះបង់ការចិញ្ចឹមជ្រូកនេះ គឺដោយសារការទិញកូនជ្រូកមកចិញ្ចឹមមានតម្លៃថ្លៃ និងកត្តារួមផ្សំដូចជា ចំណីជ្រូកក៏មានតម្លៃខ្ពស់ទៀត ទើបបញ្ហាទាំងនោះធ្វើឲ្យការចិញ្ចឹមជ្រូកថយចុះ ស្របនឹងគ្មានទីផ្សារលក់ចេញទៀតផង។

លោកនិយាយថា ក្រសួងកសិកម្មបានអនុញ្ញាតឲ្យនាំជ្រូកចូលថែមទៀតទើបកសិករគ្មានជម្រើស ក៏បោះបង់ចោលការចិញ្ចឹមជ្រូកច្រើនបែបនេះ។ ហើយដំណោះស្រាយគឺ មានតែរាជរដ្ឋាភិបាល និងក្រសួងកសិកម្ម រុក្ខា ប្រមាញ់ និងនេសាទ ត្រូវដោះស្រាយបញ្ហាប្រឈម និងរឹតបន្តឹងច្បាប់ការនាំជ្រូកពីប្រទេសជិតខាងប៉ុណ្ណោះ៕

ភ្នំពេញៈ អង្គភាពស៊ើបការណ៍ហិរញ្ញវត្ថុកម្ពុជារបស់ធនាគារជាតិនៃកម្ពុជា និងគណៈកម្មការមូលបត្រកម្ពុជា បានយល់ព្រមធ្វើកិច្ចសហការជាមួយគ្នា ក្នុងការផ្លាស់ប្ដូរព័ត៌មានពាក់ព័ន្ធនឹងការលាងសម្អាតប្រាក់ និងហិរញ្ញប្បទានភេរវកម្ម។

អនុស្សរណៈនៃការយោគយល់គ្នារវាងស្ថាប័នរដ្ឋទាំង2នេះ ត្រូវបានចុះហត្ថលេខាដោយឯកឧត្ដមស៊ូ សុជាតិ ប្រធានគណៈកម្មការមូលបត្រកម្ពុជា ជាមួយលោកជំទាវសាយ សំអាតអគ្គលេខាធិការអង្គភាពស៊ើបការណ៍ហិរញ្ញវត្ថុកម្ពុជាកាលពីថ្ងៃទី13 មិថុនាកន្លងមកនេះ។

យោងតាមសេចក្តីប្រកាសព័ត៌មានរវាងស្ថាប័នទាំងពីរបានឲ្យដឹងថា គោលដៅនៃកិច្ចសហការរវាងអង្គភាពស៊ើបការណ៍ហិរញ្ញវត្ថុកម្ពុជារបស់ធនាគារជាតិនៃកម្ពុជា និងគណៈកម្មការមូលបត្រកម្ពុជានេះមានគោលបំណងដើម្បីរួមគ្នាពង្រឹង និងពង្រីកកិច្ចសហប្រតិបត្តិការឲ្យកាន់តែមានប្រសិទ្ធភាពថែមទៀត និងបង្កើនកិច្ចខិតខំប្រឹងប្រែងរួមគ្នាក្នុងស្វែងរក និងទប់ស្កាត់ ព្រមទាំងលុបបំបាត់ និងស៊ើបអង្កេតលើករណីលាងសម្អាតប្រាក់ និងហិរញ្ញប្បទានភេរវកម្មដោយអនុវត្តស្របតាម តួនាទី និងភារកិច្ចរបស់អាជ្ញាធរទាំង2 ស្ថិតក្រោមច្បាប់ និងបទប្បញ្ញត្តិជាធរមានរបស់ព្រះរាជាណាចក្រកម្ពុជា។

អនុស្សរណៈនៃការយោគយល់នេះ គឺជាយន្តការដ៏មានសារៈសំខាន់ និងបំពេញឲ្យគ្នាទៅវិញទៅមកក្នុងក្របខ័ណ្ឌនៃកិច្ចសហប្រតិបត្តិការផ្ទៃក្នុង ស្តីពីការផ្លាស់ប្តូរព័ត៌មានហិរញ្ញវត្ថុ ព័ត៌មានរបស់បុគ្គល ឬអង្គភាព និងស្ថាប័នពាក់ព័ន្ធនឹងសកម្មភាពលាងសម្អាតប្រាក់ ឬហិរញ្ញប្បទានភេរវកម្ម៕

ក្រុមបាល់ទាត់ជម្រើសជាតិអាហ្សង់ទីន បានបង្ហាញពីទម្រង់លេងយ៉ាងរឹងមាំលើក្រុមជម្រើសជាតិសិង្ហបុរី ខណៈដែលក្រុមជើងខ្លាំងមកពីតំបន់អាមេរិកខាងត្បូងមួយនេះ បានបំបាក់ក្រុមម្ចាស់ផ្ទះសិង្ហបុរី យ៉ាងចាស់ដៃក្នុងលទ្ធផល 6-០ ក្នុងការប្រកួតមិត្តភាពអន្តរជាតិមួយ កាលពីថ្ងៃអង្គារម្សិលមិញ។

ការប្រកួតនេះត្រូវបានរៀបចំឡើងដើម្បីអបអរដល់ការគម្រប់ខួបលើកទី125ឆ្នាំនៃការបង្កើតសហព័ន្ធកីឡាបាល់ទាត់សិង្ហបុរី ប៉ុន្តែក្រុមបាល់ទាត់ជម្រើសជាតិអាហ្សង់ទីន មិនបានបន្ធូរដៃឲ្យឡើយ ខណៈដែលលោកគ្រូបង្វឹកថ្មី Jorge Sampaoli បានបង្ហាញពីបំណងនៃការចង់ឈ្នះជាមួយនឹងគ្រាប់បាល់ស៊ុតបញ្ចូលទីដ៏ច្រើនតាមរយៈការប្រើប្រាស់រូបមន្តលេង 2-3-5។

អ្នកគាំទ្ររបស់សិង្ហបុរីមួយចំនួនបានទាមទារឲ្យសងប្រាក់ពួកគេមកវិញ នៅពេលដែលតារាឆ្នើម Lionel Messi និង Gonzalo Higuain បានដកខ្លួនចេញពីការប្រកួតនេះ ប៉ុន្តែលោក Sampaoli បានទទួលឱកាសក្នុងការសាកល្បងប្រើប្រាស់ខ្សែប្រយុទ្ធ5នាក់ ដែលដឹកនាំដោយខ្សែប្រយុទ្ធ Joaquin Correa របស់ក្លិប Sevilla។ ក្រោយពីលេងបានរយៈពេល25នាទី ក្រុមជើងខ្លាំងមកពីអាមេរិកខាងត្បូងមួយនេះ បានរកគ្រាប់បាល់បើកឆាកបានតាមរយៈ Federico Fazio ដែលជាខ្សែការពារម្នាក់ក្នុងចំណោមខ្សែការពារទាំងពីរនាក់នៅក្នុងបញ្ជីឈ្មោះក្រុមរបស់ពួកគេ។ រយៈពេល5នាទីក្រោយមកទៀត កីឡាករ Joaquin Correa បានបន្ថែមការនាំមុខឱ្យក្រុមខ្លួន តាមរយៈការរកគ្រាប់បាល់អន្តរជាតិជាលើកទី1របស់គេ។ ស្របពេលដែលក្រុមម្ចាស់ផ្ទះហាក់ដូចជាស្រុតចុះកម្លាំងក្នុងតង់ទី2 ខ្សែបម្រើ Alejandro Gomez របស់ក្លិប Atalanta បានស៊ុតបាល់បំប៉ោងសំណាញ់ទីយ៉ាងល្អនៅនាទីទី6០។

ការឈឺចាប់របស់សិង្ហបុរីបានកើនឡើង នៅពេលការទាត់បាល់ចេញមិនបានល្អពីសំណាក់អ្នកចាំទីបម្រុងនៃក្រុមម្ចាស់ផ្ទះ Izwan Mahmud បានបណ្តោយឲ្យ Leandro Paredes បន្ថែមគ្រាប់បាល់1គ្រាប់ទៀត នៅមុនពេល Lucas Alario និងតារាឆ្នើម Angel Di Maria របស់ក្លិប Paris Saint-Germain រកគ្រាប់បាល់ទី5 និងទី6 បានជាបន្តបន្ទាប់សម្រាប់ក្រុមភ្ញៀវ៕
ប្រភពពី៖ The Straits Times

ដើម្បីជាការទាក់ទាញធ្វើជាដៃគូវិនិយោគពីសាធារណរដ្ឋឆេក ឯកឧត្តម ចម ប្រសិទ្ធ បានស្នើឲ្យខាងភាគីឆេកចាប់អារម្មណ៍លើការបណ្តាក់ទុនវិនិយោគ ដោយយកកម្ពុជាធ្វើជាទីតាំងផលិត ដើម្បីធ្វើការនាំចេញ និងពង្រីកការដោះដូរពាណិជ្ជកម្មរវាងប្រទេសទាំងពីរ។

ការស្នើសុំនេះត្រូវបានលើកឡើងក្នុងជំនួបពិភាក្សាការងារនៅទីស្តីការក្រសួងកាលពីព្រឹកថ្ងៃទី13 ខែមិថុនា ឆ្នាំ2017 រវាងឯកឧត្តម ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម និងឯកឧត្តម Marek Libricky ឯកអគ្គរដ្ឋទូត នៃសាធារណរដ្ឋឆេក ប្រចាំកម្ពុជាដែលមាននិវេសនដ្ឋាននៅទីក្រុងបាងកក ប្រទេសថៃ។

ឯកឧត្តមទេសរដ្ឋមន្ត្រី ចម ប្រសិទ្ធ រដ្ឋមន្រ្ដីក្រសួងឧស្សាហកម្ម និងសិប្បកម្ម បានលើកឡើងពីសក្តានុភាពរបស់ប្រទេសកម្ពុជាក្នុងនាមជាប្រទេសអភិវឌ្ឍន៍តិចតួច និងបានធ្វើសមាហរណកម្មសេដ្ឋកិច្ចរបស់ខ្លួនទៅក្នុងតំបន់ និងពិភពលោក ដោយបានទទួលភាពអនុគ្រោះពាណិជ្ជកម្មពីប្រទេសអភិវឌ្ឃន៍ និងប្រទេសជាដៃគូជាច្រើនបានអនុញ្ញាតឲ្យនាំទំនិញចេញពីកម្ពុជារាប់ពាន់មុខដោយមិនជាប់ពន្ធ និងកូតា ដូចជា៖ ទីផ្សារសហគមន៍អឺរុប អាមេរិក កាណាដា ចិន ជប៉ុន កូរ៉េ និងអូស្ត្រាលី ជាដើម។ ដោយឡែកក្រោមក្របខ័ណ្ឌសហគមន៍សេដ្ឋកិច្ចអាស៊ានវិញ កម្ពុជាជាចំណុចកណ្តាល ឬជាបេះដូងអាស៊ាន ដែលមានលក្ខណៈអំណោយផលទាំងភូមិសាស្ត្រ និងសេដ្ឋកិច្ច។

ដោយមើលឃើញពីចំណុចសក្ដានុពលធំៗទាំងនេះរបស់ប្រទេសកម្ពុជា ពិសេសទំនាក់ទំនងរវាងកម្ពុជា និងសាធារណរដ្ឋឆេកដែលមានរយៈពេលជាយូរឆ្នាំមកហើយនោះ ឯកឧត្តម ចម ប្រសិទ្ធ បានស្នើឲ្យខាងភាគីឆេក ចាប់អារម្មណ៍ការបណ្តាក់ទុនវិនិយោគដោយយកកម្ពុជាធ្វើជាទីតាំងផលិត ដើម្បីធ្វើការនាំចេញ និងពង្រីកការដោះដូរពាណិជ្ជកម្ម ព្រោះថាប្រទេសទាំងពីរនៅមានជញ្ជីងពាណិជ្ជកម្មនាំចេញ-នាំចូល ក្នុងកម្រិតទាបនៅឡើយ។

ក្នុងជំនួបកិច្ចពិភាក្សានេះ ត្រូវបានផ្តោតការយកចិត្តទុកដាក់ជាសំខាន់ទៅលើកិច្ចពង្រឹងទំនាក់ទំនងលើវិស័យសេដ្ឋកិច្ច ពង្រីកការដោះដូរពាណិជ្ជកម្ម និងការទាក់ទាញការវិនិយោគ ព្រមទាំងបានផ្តល់សារៈសំខាន់ទៅលើវិស័យឧស្សាហកម្មបច្ចេកវិទ្យា និងការផលិតកែច្នៃដើម្បីនាំចេញទៀតផង។

ឯកឧត្តម Marek Libricky ឯកអគ្គរដ្ឋទូតនៃសាធារណរដ្ឋឆេក ប្រចាំកម្ពុជា ក្នុងបេសកកម្មលើកទី1 នៅកម្ពុជា បានសន្យានឹងធ្វើការផ្សព្វផ្សាយ ព្រមទាំងអំពាវនាវឲ្យអ្នកវិនិយោគពីប្រទេសឆេកមកបណ្តាក់ទុននៅកម្ពុជាឲ្យបានកាន់តែច្រើនឡើង ដោយបានឯកភាព និងតាមរយៈសភាពាណិជ្ជកម្មនៃប្រទេសទាំងពីរ ក្នុងការពង្រឹងទំនាក់ទំនងដៃគូសេដ្ឋកិច្ច ដោយនឹងមានរៀបចំឲ្យមានសិក្ខាសាលាផ្គូផ្គងរវាងធុរជន ឧស្សាហករ ពាណិជ្ជករ និងសហគ្រិន នៃប្រទេសទាំងពីរផងដែរ៕