Category: សង្គម និងសេដ្ឋកិច្ច

វិទ្យាស្ថានបច្ចេកវិទ្យាកម្ពុជា (តិចណូ) បើកសាខាដំបូងបំផុតនៅត្បូងឃ្មុំ
វិទ្យាស្ថានបច្ចេកវិទ្យាកម្ពុជា (ITC) ដែលគ្រប់គ្នាហៅថា សាលាតិចណូ ជាសាលាល្បីឈ្មោះមួយដែលបង្ហាត់បង្រៀនលើផ្នែកដែលសិស្ស-និស្សិតទូទាំងប្រទេសស្រមៃចង់ចូលរៀន ព្រោះគ្រឹះស្ថានអប់រំមួយនេះ ជាស្ថាប័នបណ្តុះបណ្តាលដែលមានគុណភាពខ្ពស់ រួមទាំងសញ្ញាបត្រប្រកបដោយគុណតម្លៃ និងលេចធ្លោនៅកម្ពុជា។
ជារៀងរាល់ឆ្នាំ សិស្សដែលបញ្ចប់ថ្នាក់ទី12 តែងតែដេករៀននៅរាជធានីភ្នំពេញដើម្បីត្រៀមប្រឡងចូលសាលាដែលល្បីថាមានគុណភាពមួយនេះ។ ថ្មីៗនេះ សិស្ស និស្សិតដែលស្ថិតនៅក្នុងខេត្តត្បូងឃ្មុំ កំពង់ចាម និងខេត្តជិតៗនោះ អាចនឹងមានភាពងាយស្រួលជាងមុនក្នុងការសម្រេចក្តីស្រមៃរបស់ខ្លួនដែលចង់ក្លាយជាសិស្សរបស់វិទ្យាស្ថានបច្ចេកវិទ្យាកម្ពុជា ព្រោះវិទ្យាស្ថាននេះបានពង្រីកសាខារបស់ខ្លួនទៅកាន់សាកលវិទ្យាល័យ ហេង សំរិន ត្បូងឃ្មុំ។
ចំពោះបញ្ហាគុណភាព ដែលគ្រប់គ្នាតែងតែគិតថានៅខេត្តច្រើនតែអន់ជាងនៅរាជធានីភ្នំពេញនោះ នឹងលែងជាក្តីបារម្ភទៀតហើយ ព្រោះកម្មវិធីសិក្សា សាស្រ្តាចារ្យ និងសញ្ញាបត្រ នៃសាខាវិទ្យាស្ថានបច្ចេកវិទ្យា នៅសាកលវិទ្យាល័យ ហេង សំរិន ត្បូងឃ្មុំ គឺដូចគ្នា និងមានតម្លៃស្មើនឹងវិទ្យាស្ថានបច្ចេកវិទ្យានៅភ្នំពេញដែរ។
មុខវិជ្ជាដែលមានសម្រាប់សិស្សនៅត្បូងឃ្មុំ រួមមានមុខវិជ្ជាវិស្វកម្មគីមី និងស្ថាបត្យកម្ម មុខវិជ្ជាវិស្វកម្មសំណង់ និងស្ថាបត្យកម្ម មុខវិជ្ជាវិស្វកម្មអគ្គិសនី ថាមពល និងទូរគមនាគមន៍ និងមុខវិជ្ជាវិស្វកម្មឧស្សាហកម្ម និងមេកានិក៕

June 15, 2017
សុខ ពិសី ចង់បានការចាប់អារម្មណ៍លើការងារច្រើនជាងរឿងផ្ទាល់ខ្លួន
ប្រហែលជាមួយខែមុននេះមានសារព័ត៌មានក្នុងស្រុកជាច្រើនបានចុះផ្សាយយ៉ាងព្រោងព្រាតអំពីរឿងផ្ទាល់ខ្លួនរបស់តារាចម្រៀងសុខ ពិសី ថានាងបានសម្ងំសាងស្នេហ៍ជាមួយអ្នកគ្រប់គ្រងទូទៅរបស់ផលិតកម្មសាន់ដេ គឺលោក ឡាយ សុខចំរើន។
គ្រានោះមានមហាជនមួយចំនួនបានលើកឡើងថា វាមិនទាស់ខុសអ្វីទេដែលតារាចម្រៀងរូបនេះទៅសាងស្នេហ៍ជាមួយអ្នកគ្រប់គ្រងរបស់ខ្លួន ព្រោះអ្នកទាំងពីរមានសិទ្ធគ្រប់គ្រាន់ ខណៈពួកគេនៅអាចប្រើប្រាស់ជីវិតលីវបាននៅឡើយនោះ។
ទោះជាយ៉ាងណាសាមីខ្លួនកញ្ញាសុខ ពិសី ហាក់ពុំសប្បាយចិត្ដនឹងដំណឹងបែបនេះឡើយ ព្រោះកន្លងមកសារព័ត៌មានក្នុងស្រុកជាច្រើនតែងតែចាប់អារម្មណ៍ផ្សាយតែពីរឿងផ្ទាល់ខ្លួនរបស់នាង ដោយលើកឡើងថា នាងមានចំណងស្នេហ៍ជាមួយបុរសនេះ បុរសនោះ ជាដើម។ នាងបន្ដថា៖ «ខ្ញុំមិនចង់ឱ្យមហាជនចាប់អារម្មណ៍លើរឿងស្នេហារបស់ខ្ញុំពេកទេ ដោយសារតែរឿងទាំងនោះវាពុំមានអ្វីជាការពិតទេ ផ្ទុយទៅវិញខ្ញុំចង់ឱ្យមហាជនចាប់អារម្មណ៍មកលើការងារដែលខ្ញុំកំពុងតែខំប្រឹងវិញល្អជាង ដូចជាការបង្កើតបទចម្រៀងថ្មីៗ ឬការប្រឹងហ្វឹកហាត់ក្បាច់រាំថ្មីៗជាដើម »។
សុខ ពិសី បន្ដថា ការគាំទ្រទៅលើការងាររបស់តារាសិល្បៈជាកម្លាំងចិត្ដមួយដ៏ធំសម្រាប់នាង ក៏ដូចជាតារាសិល្បៈដទៃទៀតដែលគេកំពុងតែខំប្រឹងប្រែងបង្កើនសមត្ថភាពដើម្បីប្រកួតប្រជែងក្នុងទីផ្សារ ពិសេសពួកគេត្រូវការឱ្យមានជាចាំបាច់ និងមិនអាចខ្វះបាន គឺការគាំទ្រពីមហាជន។
គួបញ្ជាក់ថា អ្វីដែលនាំឱ្យមានដំណឹងលេចឮជុំវិញចំណងស្នេហ៍រវាងកញ្ញា សុខ ពិសី និងអ្នកគ្រប់គ្រង ដោយសារតែកន្លងមកនាងពុំដែលស្និទ្ធស្នាលជាមួយបុរសណាម្នាក់ឡើយ តែក្រោយមកស្រាប់តែមានមហាជនមួយចំនួនបានឃើញលោកឡាយ សុខចំរើន ឧស្សាហ៍ជូននាងទៅផ្ទះ ទើបធ្វើឱ្យមានការសន្និដ្ឋានបែបនេះឡើង៕
June 15, 2017
អាការ 5យ៉ាង ដែលបុរសច្រើនធ្វេសប្រហែស
មានព័ត៌មានពីលោកគ្រូពេទ្យជាច្រើននាក់បានបញ្ជាក់ថា អ្នកជំងឺភេទប្រុសរបស់ពួកគាត់ច្រើនតែមិនចាប់អារម្មណ៍នឹងអាការដែលចង្អុលបង្ហាញពីសុខភាពរាងកាយខ្លួនឯងប៉ុន្មានឡើយ ទោះវាជាអា-ការដែលកើតឡើងយ៉ាងមើលឃើញច្បាស់ក៏ដោយ ហើយអាការតទៅនេះគឺជារឿងដែលបុរសៗច្រើនមើលរំលង… ដែលប្រាកដណាស់ថា វាមិនមែនជារឿងល្អឡើយ ដូច្នេះបើអ្នកមានអាការទាំងនោះ គួរនឹកដល់ការទៅប្រឹក្សាជាមួយគ្រូពេទ្យមុនគេបង្អស់។
1/ ឈឺដើមទ្រូង : ជឿចុះថា អាការនេះត្រូវបានបុរសៗយើងព្រងើយកន្តើយមករហូត ព្រោះច្រើនតែគិតថា គ្រាន់តែខ្លួនឯងមានរាងកាយមិនសូវមាំមួន មានបញ្ហាបន្តិចបន្តួចពាក់ព័ន្ធនឹងប្រព័ន្ធរំលាយអាហារ ឬគ្រាន់តែមានអារម្មណ៍តានតឹងបន្តិចប៉ុណ្ណោះ តែការពិតវិញ នៅពេលបុរសមានអាការណែន ឬឈឺដើមទ្រូង ឬដកដង្ហើមញាប់ៗ គួរប្រញាប់ទៅប្រឹក្សាជាមួយគ្រូពេទ្យ។
2/ ដុះក្បាលពោះ : អ្នកដែលមានខ្លាញ់ប្រមូលសន្សំច្រើននៅម្តុំក្បាលពោះច្រើន តែងមានភាពប្រថុយប្រថាននឹងបញ្ហាសុខភាពធ្ងន់ធ្ងរខ្លាំងជាងអ្នកដែលមានខ្លាញ់ច្រើននៅលើកន្លែងផ្សេងទៀតរបស់រាងកាយ ដែលខ្លាញ់ក្បាលពោះនេះនឹងបន្ថែមភាពប្រថុយប្រថានដល់អ្នកនូវជំងឺ ឬមានអាការផ្សេងៗបានដូចជា ជំងឺបេះដូង ជំងឺសរសៃឈាមខួរក្បាល ជំងឺមហារីកប្រភេទខ្លះ ជំងឺទឹកនោមផ្អែមប្រភេទទី2 មានសភាវស៊ាំនឹង អុីនស៊ូលីន ត្រៃគ្លីស៊ើរ៉ាយដ៍ខ្ពស់ កម្រិតកូលេស្តេរ៉ូលល្អស្ថិតក្នុងកម្រិតទាប មានអាការរបស់រោគដែលពាក់ព័ន្ធនឹងប្រព័ន្ធដុតបំផ្លាញ កើតសភាវឈប់ដកដង្ហើមខណៈពេលគេងលក់ជាដើម។
3/ ទន់ជ្រាយ : ក្នុងទីនេះគឺ ភាពទន់ជ្រាយខាងផ្នែកផ្លូវចិត្ត ឬក្នុងរឿងសុខភាពផ្លូវចិត្ត តែអាចជាសញ្ញាមួយដាស់តឿនថាអ្នកនឹងមានជំងឺបេះដូង និងជំងឺសរសៃឈាម។ បើសិនសរសៃឈាមក្រហមដែលមានតួនាទីដឹកជញ្ជូនឈាមទៅចិញ្ចឹមអវយវៈភេទ បេះដូង និងខួរក្បាលមួយណាធ្វើការមិនស្រួល ឬមិនពេញប្រសិទ្ធភាពនោះ វានឹងហុចផលឱ្យបុរសយើងកើតរោគសរសៃឈាមបេះដូង សម្ពាធឈាមឡើងខ្ពស់ និងកូលេស្តេរ៉ូល ដែលច្រើនតែនាំទៅរកសភាវចុះខ្សោយសមត្ថភាពផ្លូវភេទ។
4/ នោមញឹកញាប់ : ការដែលបុរសយើងមានអារម្មណ៍ថាខ្លួនឯងបត់ជើងតូចកាន់តែញឹកញាប់ឡើងនោះ សូមកុំមើលរំលងឱ្យសោះព្រោះវាអាចជាសញ្ញាមួយប្រាប់ពីអាការរលាកក្រពេញពងស្វាស ដូច្នេះបើលោកអ្នកចាប់ផ្តើមឈឺបត់ជើងតូច2-3ដងនៅពេលយប់នោះ គួរប្រញាប់ទៅប្រឹក្សានឹងគ្រូពេទ្យជាបន្ទាន់។
5/ សោកសៅ : ខណៈដែលសភាវសោកសៅនេះគឺជារឿងធម្មតាដែលតែងជួបច្រើននៅលើស្ត្រីនោះ តែលោកអ្នកជឿទេថា សម្រាប់បុរសវិញ អាការសោកសៅនេះអាចធ្ងន់ធ្ងរដល់ថ្នាក់នាំទៅរកការធ្វើអត្ថឃាតបាន ដោយសារតែមនុស្សប្រុសមានភាពស្ទាក់ស្ទើរក្នុងការសុំការជួយយកអាសា ឬសុំការប្រឹក្សាពីអ្នកនៅជុំវិញខ្លួនហ្នឹងឯង។ ក្រៅពីនេះអាការសោកសៅនៅធ្វើឱ្យប៉ះពាល់ដល់ការធ្វើការងារសង្គម និងជីវិតគ្រួសាររបស់លោកអ្នកទៀតផង។
បើការធ្វើជាមនុស្សប្រុស ធ្វើឱ្យលោកអ្នកជ្រើសរើសយកការចៀសវាងទៅជួបលោកគ្រូពេទ្យ ឬគិតកាន់ជើងខ្លួនឯងថា ទុកចោលកុំរវល់មួយរយៈ អាការនោះនឹងបាត់ទៅវិញ ហើយលោកអ្នកនឹងជាឡើងវិញនោះ សូមជឿចុះថា លោកអ្នកអាចគិតខុសហើយ ព្រោះការពិតវិញរឿងរ៉ាវដែលនឹងកើតឡើងនោះ អាចនឹងធ្ងន់ធ្ងរជាងការគិតទៅទៀត៕
June 15, 2017
បិសាចក្រហម Man Utd បំពេញការផ្ទេរ Lindelof ពី Benfica ជាផ្លូវការ
ក្លិប Manchester United បានបំពេញការចុះហត្ថលេខាជាមួយនឹងខ្សែការពារអន្តរជាតិស៊ុយអែត Victor Lindelof ជាផ្លូវការពីក្លិបម្ចាស់ជើងឯកព័រទុយហ្គាល់ Benfica ហើយ ក្នុងកិច្ចសន្យារយៈពេល 4ឆ្នាំ ជាមួយនឹងជម្រើសក្នុងការបន្តកិច្ចសន្យារយៈពេល1ឆ្នាំទៀត។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃពុធ។
ក្រុមម្ចាស់ជើងឯករបស់អង់គ្លេស 2០សម័យកាលមួយនេះ បានឲ្យដឹងនៅលើគេហទំព័រផ្លូវការរបស់ខ្លួនថា៖ «ក្លិប Manchester United ពិតជារីករាយណាស់ក្នុងការប្រកាសពីការចុះហត្ថលេខាជាមួយនឹង Victor Lindelof មកពីក្លិប Benfica ចាប់ពីថ្ងៃទី1 ខែកក្កដា ឆ្នាំ2017 តទៅ»។ Man United បានបន្ថែមទៀតថា៖ «ខ្សែការពារកណ្តាលអន្តរជាតិស៊ុយអែតរូបនេះ គឺជាខ្សែការពារដ៏រឹងមាំម្នាក់ ហើយនឹងធ្វើការបង្ហាញខ្លួនជាលើកទី1របស់គេក្នុងដំណើរទៅប្រកួតមិត្តភាពលើទឹកដីសហរដ្ឋអាមេរិក នៅខែកក្កដាខាងមុខ»។
Lindelof ដែលក្លិប Benfica បានបញ្ជាក់ថា នឹងមានតម្លៃខ្លួន35លានអឺរ៉ូ (ស្មើនឹង39លានដុល្លារអាមេរិក) នោះ គឺជាកីឡាករចំណូលថ្មីដំបូងគេរបស់លោក Jose Mourinho នារដូវក្តៅនេះ ក្រោយពីក្រុមរបស់លោកបានឈ្នះពាន Europa League កាលពីខែមុន ដើម្បីឈ្នះសិទ្ធិទៅប្រកួតក្របខ័ណ្ឌ Champions League នារដូវកាលក្រោយ។ លោក Mourinho អ្នកចាត់ការទូទៅរបស់ Man United បានប្រាប់គេហទំព័ររបស់ក្លិបនេះថា៖ «Victor ពិតជាកីឡាករវ័យក្មេងដ៏មានទេពកោសល្យម្នាក់ ដែលមានអនាគតដ៏អស្ចារ្យសម្រាប់រូបគេនៅក្នុងក្លិប Man United»។
គ្រូបង្វឹកសញ្ជាតិព័រទុយហ្គាល់រូបនេះបានបន្ថែមទៀតថា៖ «រដូវកាលរបស់យើងកាលពីឆ្នាំមុន បានបង្ហាញឲ្យយើងឃើញហើយថា យើងត្រូវការជម្រើស និងគុណភាពជាច្រើនទៀតសម្រាប់បន្ថែមឱ្យក្រុមយើងនេះ ហើយ Victor គឺកីឡាករដំបូងគេក្នុងការចូលរួមជាមួយយើងនៅរដូវក្តៅនេះ។ ខ្ញុំដឹងថា ក្រុមកីឡាករដ៏អស្ចារ្យរបស់យើង នឹងស្វាគមន៍រូបគេក្នុងនាមជាសមាជិកម្នាក់របស់យើង»៕
ប្រភពពី៖ Sports.yahoo

June 15, 2017
ទីបំផុតទូរស័ព្ទ Nokia ប្រើប្រព័ន្ធ Android បើកសម្ពោធនៅកម្ពុជាហើយ!!
បន្ទាប់ពីបង្ហាញខ្លួនកាលពីដើមឆ្នាំ ក្នុងពិព័រណ៍ Mobile World Congress នៅទីក្រុងបាសេឡូណា ទូរស័ព្ទស៊េរីថ្មីប្រើប្រាស់ប្រព័ន្ធប្រតិបត្តិការ Android របស់ក្រុមហ៊ុន Nokia បានបើកសម្ពោធជាផ្លូវការហើយក្នុងទីផ្សារកម្ពុជា កាលពីល្ងាចថ្ងៃទី 14 ខែមិថុនា ឆ្នាំ 2017 ម្សិលមិញនេះ។
Nokia បានបង្ហាញរាល់ស្មាតហ្វូន Android ថ្មីៗទាំងអស់ រួមមានទូរស័ព្ទ Nokia3 Nokia5 និង Nokia6 ហើយក្នុងនោះទូរស័ព្ទស៊េរីចាស់តែផ្លាស់ប្ដូរជំនាន់ថ្មី Nokia 3310 ឆ្នាំ 2017 ក៏មានវត្តមានក្នុងកម្មវិធីនោះដែរ។ អ្នកតំណាងក្រុមហ៊ុន Nokia កម្ពុជា ឱ្យដឹងថា ក្រុមហ៊ុននឹងដាក់លក់ Nokia3 និង 3310 ក្នុងទីផ្សារស្រុកខ្មែរនៅចុងខែមិថុនានេះ ចំណែកទូរស័ព្ទ Nokia5 និង Nokia6 នឹងចាប់ផ្តើមដាក់លក់នៅពាក់កណ្ដាលខែកញ្ញាខាងមុខ។
ទូរស័ព្ទ Nokia3 ប្រើអេក្រង់ IPS HD ទំហំ 5.0 អ៊ីញ ស្រោបដោយផ្ទៃកញ្ចក់ Corning® Gorilla® និងមានស្រទាប់អេក្រង់ប្រភេទ Polarised ធ្វើឱ្យមានចំណាំងផ្លាតតិច ដែលផ្តល់នូវរូបភាពកាន់តែច្បាស់ល្អ ទោះបីស្ថិតនៅក្រោមពន្លឺថ្ងៃខ្លាំងក៏ដោយហើយវាក៏មានកាមេរ៉ាមុខក្រោយទំហំ 8MP ដូចគ្នា និងមាន 4 ពណ៌ខុសៗគ្នា គឺ ខ្មៅ ទឹកប្រាក់ ខៀវ និងទង់ដែង។
សម្រាប់ទូរស័ព្ទ Nokia5 អេក្រង់ធំទំហំ 5.2 អ៊ីញ ប្រភេទ IPS HD ដំណើរការដោយអង្គប្រតិបត្តិការ Qualcomm® Snapdragon ™ 430 មានកាមេរ៉ាក្រោយទំហំ 13MP បំពាក់មុខងារ Auto Focus និងមានភ្លើង Flash ពីរ រួមទាំងកាមេរ៉ាមុខទំហំ 8MP កម្រិតចាប់រូបភាព 84 ដឺក្រេដែលធ្វើឱ្យការថតរូបបែបស៊ែលហ្វ៊ីរបស់លោកអ្នកកាន់តែធំទូលាយ និងភ្លឺច្បាស់ត្រជាក់ភ្នែកពិសេសវាមានមុខងារចាប់រូបភាពបានល្អទាំងនៅកន្លែងភ្លឺ និងទីងងឹត។ Nokia5 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវ និងទង់ដែង។
ស្មាតហ្វូនចុងក្រោយ គឺ Nokia6 ដែលវាមានអេក្រង់ធំជាងគេ ទំហំ 5.5 អ៊ីញ Full HD និងមានតួខ្លួនផលិតចេញពីលោហធាតុអាលុយមីញ៉ូមកម្រិត 6000 មីល្លីម៉ែត្រដែលស័ក្តិសមបំផុតសម្រាប់អ្នកដែលចង់បានទូរស័ព្ទដែលរឹងមាំជាមួយកម្មវិធីកម្សាន្តយ៉ាងច្រើនសម្បូរបែប។
វាបំពាក់ដោយប្រព័ន្ធសំឡេងឆ្លាតវៃមានរន្ធសំឡេងចំនួន 2 ដែលអាចឱ្យអ្នកប្រើប្រាស់ទទួលបាននូវសំឡេងឮច្បាស់ល្អ ខណៈដែលប្រព័ន្ធសំឡេង Dolby Atmos® នឹងផ្តល់នូវបទពិសោធការកម្សាន្តផ្នែកភាពយន្តដ៏អស្ចារ្យមួយទៀតដែលពុំធ្លាប់មាន។
ទូរស័ព្ទនេះប្រើបន្ទះឈីប Qualcomm® Snapdragon ™ 430 និងអង្គក្រាហ្វិកQualcomm® Adreno™ 505 ផ្តល់តុល្យភាពរវាងការប្រើប្រាស់ និងថាមពលថ្មបានល្អប្រើបានរយៈពេលយូរ។ Nokia6 មាន 4 ពណ៌ខុសៗគ្នាគឺ ខ្មៅ ទឹកប្រាក់ ខៀវនិងទង់ដែង។
ដោយឡែកទូរស័ព្ទមួយចុងក្រោយគេនេះ គឺ Nokia 3310 ចាស់ផ្លាស់ប្ដូររូបរាងថ្មីស៊េរីឆ្នាំ 2017 ជាមួយនឹងរូបរាងស្តើងស្រាលជាទូរស័ព្ទដែលលក់ដាច់បំផុតមួយក្នុងប្រវត្តិសាស្ត្ររបស់ Nokia។ 3310 ត្រូវបានផលិតជាថ្មីជាមួយកំណែប្រែថ្មី ជាមួយនឹងពណ៌ស្រស់ស្អាតការរចនាមានលក្ខណៈទំនើបពិសេស កាន់ថ្មបានយូរ ដោយអាចនិយាយបានរហូតដល់ 22 ម៉ោង និងទុកចោលបានដល់ទៅមួយខែ។
អ្នកប្រើប្រាស់អាចផ្ញើសារ និយាយបានពេញមួយថ្ងៃ ថតរូប ស្តាប់ចម្រៀង និងលេងហ្គេមពស់ដ៏ល្បីល្បាញជាថ្មីម្តងទៀតដោយប្រើថាមពលថ្មតែមួយ។ ជាមួយនឹងសមត្ថភាពកាន់ថ្មបានយូររហូតដល់ពេញមួយខែ Nokia 3310 មានអ្វីគ្រប់យ៉ាងដែលលោកអ្នកធ្លាប់ស្គាល់ និងស្រឡាញ់ ដូចជាមានស៊ុមផលិតពីប៉ូលីកាបូនរលោងទាន់សម័យជាដើម៕

June 15, 2017
ព្រឹត្តិការណ៍ពិព័រណ៍កុមារឆ្នាំ2017 នឹងធ្វើនៅចុងសប្តាហ៍នេះ
ពិព័រណ៌សម្រាប់កុមារ និងគ្រួសារលើកទី 4 នឹងរៀបចំឡើងនៅថ្ងៃទី 17-18 (សៅរ៍ – អាទិត្យ) ខែមិថុនា ចុងសប្តាហ៍នេះ ចាប់ពីម៉ោង 8ព្រឹក រហូតដល់ម៉ោង 8យប់ នៅអគារពិព័រណ៍កោះពេជ្រ។ ក្រុមគ្រួសារដែលចូលរួមទាំងអស់ នឹងទទួលបានការសប្បាយរីករាយជាមួយនឹងការរៀបចំទីធ្លាកម្សាន្តសប្បាយ ការតុបតែងពិសេសៗតាមបែបគំនូរជីវចលល្បីៗ និងការសម្តែងកម្សាន្ត រួមទាំងសកម្មភាពប្លែកៗជាច្រើនទៀត។
នៅក្នុងពិព័រណ៍នៅឆ្នាំនេះ អ្នកចូលរួមនឹងទទួលបានការបញ្ចុះតម្លៃរហូតដល់ 50% រាល់ការទិញសម្ភារ និងសេវាកម្មសម្រាប់កូនៗពីបណ្តាក្រុមហ៊ុនដែលពាក់ព័ន្ធ ដូចជាក្រុមហ៊ុនម្សៅទឹកដោះគោ អាហារបំប៉ន សម្លៀកបំពាក់ ឧបករណ៍ក្មេងលេង សម្ភារសិក្សា សាលារៀន សាលាភាសា មជ្ឈមណ្ឌលថែទាំកុមារ សេវាកម្មហិរញ្ញវត្ថុ ធានារ៉ាប់រង និងស្តង់អាហារផ្សេងទៀត រួមទាំងរង្វាន់ដោយឥតគិតថ្លៃជាច្រើនមុខទៀត។
លោក សេង ពិសិដ្ឋ នាយកប្រតិបត្តិនៃក្រុមហ៊ុន អនុស្សារៀបចំពិព័រណ៍ បានលើកឡើងថា សមិទ្ធផលដែលពិព័រណ៍សម្រេចបានក្នុងរយៈពេល 3ឆ្នាំកន្លងមកនេះ គឺការផ្តល់ស្នាមញញឹមដល់ក្រុមគ្រួសារជាច្រើន សារអប់រំ និងបទពិសោធល្អៗដល់កុមារតូចៗ។ មានអាណាព្យាបាលប្រមាណ 20,000នាក់ បានចូលរួមពិព័រណ៍កាលពីឆ្នាំមុន ហើយឆ្នាំនេះ យើងរង់ចាំស្វាគមន៍អ្នកចូលរួមឱ្យបានច្រើនជាងមុន។
លោក សេង ពិសិដ្ឋ បាននិយាយថា៖ «ការជំរុញភាពក្លាហាន និងស្មារតីប្រកួតប្រជែងរបស់កុមារ គឺជាប្រធានបទសំខាន់សម្រាប់ពិព័រណ៍ក្នុងឆ្នាំនេះ»។
លោកបានបន្ថែមទៀតថា ឆ្នាំនេះយើងនឹងមានរៀបចំការប្រកួតប្រជែងជាច្រើនប្រភេទសម្រាប់កុមារដូចជា ការប្រកួតសូត្រកំណាព្យ និយាយរឿង សរសេរតាមអាន និងប្រកួតគិតលេខជាដើម៕
June 15, 2017
លោក Claude Puel ត្រូវបានបណ្តេញចេញពី Southampton
លោក Claude Puel ត្រូវបានបណ្តេញចេញពីតំណែងអ្នកចាត់ការទូទៅរបស់ក្លិប Southampton កាលពីថ្ងៃពុធ ក្រោយពីដឹកនាំបានរយៈពេលត្រឹមតែ1រដូវកាលប៉ុណ្ណោះ។ នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌអង់គ្លេស Premier League មួយនេះ។
លោក Puel វ័យ55ឆ្នាំ បានដឹកនាំឲ្យក្រុម Southampton បញ្ចប់ក្នុងចំណាត់ថ្នាក់លេខ៨ នៅលើតារាងក្របខ័ណ្ឌ Premier League និងឈានទៅដល់វគ្គផ្តាច់ព្រ័ត្រដណ្តើមពាន League Cup មុននឹងចាញ់ក្រុម Manchester United ក្នុងលទ្ធផល 3 – 2។ ក្លិបនេះបានឲ្យដឹងក្នុងសេចក្តីថ្លែងការណ៍មួយថា៖ «ក្លិបកីឡាបាល់ទាត់ Southampton អាចធ្វើការប្រកាសនៅថ្ងៃនេះថា យើងបានបញ្ចប់កិច្ចសន្យាជាមួយនឹងលោក Claude Puel ចាប់ពេលនេះតទៅហើយ»។
លោក Puel ដែលជាអតីតគ្រូបង្វឹករបស់ក្លិប Monaco, Lille, Lyon និង Nice នោះ បានរងនូវការស្រែកចំអកឲ្យពីអ្នកគាំទ្រផ្ទាល់របស់លោក នៅពេលដែលក្រុមភ្ញៀវ Stoke City ដណ្តើមបានជ័យជម្នះក្នុងលទ្ធផល 1-០ នៅកីឡដ្ឋាន St Mary’s នៅថ្ងៃប្រកួតចុងក្រោយនៃក្របខ័ណ្ឌ Premier League កាលពីរដូវកាលមុន ក្នុងខែឧសភា។ ថ្ងៃនោះ មន្ត្រីក្នុងក្លិប Southampton បានប្រកាសរួចជាស្រេចអំពីគម្រោងនៃការត្រួតពិនិត្យទៅលើអនាគតរបស់លោកគ្រូបង្វឹកសញ្ជាតិបារាំងរូបនេះ ហើយតួនាទីរបស់លោកមិនអាចរក្សាបានឡើយ ក្រោយពីក្រុមរបស់លោកមិនអាចរកគ្រាប់បាល់បញ្ចូលទីបានសោះក្នុងការប្រកួត៥លើកជាប់ៗគ្នា។
Southampton បានឲ្យដឹងថា៖ «គ្រប់គ្នាក្នុងក្លិប Southampton សូមសម្តែងនូវការអរគុណដល់លោក Claude ចំពោះការខិតខំរបស់លោក និងការប្តេជ្ញាចិត្តនៅឆ្នាំនេះ។ រដូវកាលមុននេះ លោកបានផ្តល់នូវថ្ងៃដ៏គួរឲ្យចងចាំមួយនៅកីឡដ្ឋាន Wembley ក្នុងពាន EFL Cup វគ្គផ្តាច់ព្រ័ត្រ គឺជាថ្ងៃមួយដែលអ្នកគាំទ្ររបស់យើងតែងតែឲ្យតម្លៃជានិច្ច»៕
ប្រភពពី៖ Sky Sport24

June 15, 2017
Bayern ចុះហត្ថលេខាជាមួយ Tolisso ក្នុងតម្លៃខ្លួនជាកំណត់ត្រារបស់ Bundesliga
ក្លិប Bayern Munich បានចុះហត្ថលេខាជាមួយនឹងខ្សែបម្រើអន្តរជាតិបារាំងដ៏មានឥទ្ធិពល Corentin Tolisso សម្រាប់តម្លៃខ្លួនជាកំណត់ត្រាក្នុងក្របខ័ណ្ឌ Bundesliga ដែលមានចំនួន 41.5លានអឺរ៉ូ (ស្មើនឹង 46.8លានដុល្លារអាមេរិក) ពីក្លិប Lyon កាលពីថ្ងៃពុធ។
Bayern បានឲ្យដឹងថា Tolisso វ័យ 22ឆ្នាំ បានចុះហត្ថលេខាលើកិច្ចសន្យារយៈពេល 5ឆ្នាំ ស្របពេលដែលក្លិប Lyon បានប្រកាសពីតម្លៃខ្លួននៃការផ្ទេរនេះ និងបានបញ្ជាក់ថា ការបន្ថែមប្រាក់ឧបត្ថម្ភផ្សេងៗ អាចនឹងធ្វើឲ្យតម្លៃខ្លួនរបស់ Tolisso កើនឡើងក្នុងទឹកប្រាក់ 6លានអឺរ៉ូ បន្ថែមទៀត។
Tolisso បានប្រាប់គេហទំព័ររបស់ក្លិបនេះថា៖ «ខ្ញុំមានពេលវេលាដ៏អស្ចារ្យជាមួយនឹងក្លិប Lyon ហើយខ្ញុំពិតជាថ្លែងអំណរគុណចំពោះពេលវេលានោះ។ ខ្ញុំពិតជារីករាយណាស់ក្នុងការស្ថិតនៅក្នុងក្លិបមួយក្នុងចំណោមក្លិបដ៏ខ្លាំងបំផុតនៅអឺរ៉ុប។ ខ្ញុំមានគោលបំណងដ៏អស្ចារ្យសម្រាប់ពេលវេលារបស់ខ្ញុំនៅឯ FC Bayern នេះ។ ថ្ងៃនេះគឺជាថ្ងៃដ៏អស្ចារ្យមួយសម្រាប់ខ្ញុំ»។ Tolisso ដែលបានចូលរួមជាមួយនឹង Lyon តាំងពីមានវ័យ 13ឆ្នាំនោះ បានធ្វើការបង្ហាញខ្លួនជាលើកដំបូងរបស់គេក្នុងក្រុមឈុតធំ កាលពីឆ្នាំ 2013 និងបានបន្តលេងរហូតបានដល់ទៅ 60ប្រកួត ក្នុងនោះរាប់បញ្ចូលទាំងការប្រកួត32លើកក្នុងក្របខ័ណ្ឌ Champions League និង Europa League ផងដែរ ដោយបានស៊ុតបាល់បញ្ចូលទី29គ្រាប់។ រូបគេក៏ជាគោលដៅមួយសម្រាប់ក្លិប Chelsea ផងដែរ។
លោក Karl-Heinz Rummenigge ប្រធានក្លិប Bayern បានឲ្យដឹងថា៖ «យើងពិតជារីករាយណាស់ដែលយើងអាចចុះហត្ថលេខាជាមួយនឹងកីឡាករវ័យក្មេងម្នាក់ និងជាកីឡាករដ៏គួរឲ្យចាប់អារម្មណ៍ម្នាក់ នៅមុនពេលយុទ្ធនាការដ៏ស្វិតស្វាញមួយ។ Corentin Tolisso គឺជាគោលដៅរបស់លោកគ្រូបង្វឹក Carlo Ancelotti សម្រាប់តំបន់បម្រើរបស់យើង»៕
ប្រភពពី៖ FOXSports

June 15, 2017
នួន បូរ៉ា៖បទ «Sorry អូនសម្លាញ់» នឹងមិនចាញ់បទ «ប៉ង» ប៉ុន្មានឡើយ
បន្ទាប់ពីលោក នួន បូរ៉ា ចេញបទចម្រៀង Original Song របស់ខ្លួន គឺបទ «ប៉ង» ដោយទទួលបានការគាំទ្រខ្លាំងពីប្រិយមិត្ដអ្នកស្ដាប់កាលពីពេលថ្មីៗនេះរួចមក លោកបានចេញបទថ្មីមួយទៀតដែលមានចំណងជើងថា «Sorry អូនសម្លាញ់»។
ក្នុងបទថ្មីដែលលោក នួន បូរ៉ា ទើបបង្ហោះនៅក្នុងបណ្ដាញសង្គមនេះ មានមហាជនជាច្រើនរំពឹងថា បទថ្មីមួយនេះនឹងទទួលបានការគាំទ្រមិនចាញ់បទចាស់ប៉ុន្មានឡើយ។ដោយឡែកសាមីខ្លួនតារាចម្រៀងលោក នួន បូរ៉ា បានលើកឡើងថា កន្លងមកលោកធ្លាប់តែយកបទចម្រៀងរបស់រៀមច្បងនៅក្នុងផលិតកម្មមួយចំនួនមកច្រៀង ទើបធ្វើឱ្យលោកមានគំនិតចង់ផលិតបទចម្រៀងដោយខ្លួនឯងជារបស់ខ្លួនឯង ខណៈយុវវ័យបច្ចុប្បន្នកំពុងតែផ្ដល់តម្លៃឱ្យស្នាដៃកូនខ្មែរ និងម្យ៉ាងទៀត ការផលិតបទចម្រៀង Original Song ក៏មិនចំណាយថវិកាច្រើនប៉ុន្មានដែរ។
នួន បូរ៉ា បន្ដថា បើទោះជាមានការលំបាកបន្ដិចបន្ដួចក្ដី ប៉ុន្ដែចិត្ដរបស់លោកពុំធ្លាប់រួញរាចំពោះការងារនេះឡើយ ព្រោះការផលិតបទចម្រៀងថ្មី ឧបសគ្គរបស់វាមិនស្ថិតនៅលើថវិកាទេ វាស្ថិតនៅលើឆន្ទៈតែប៉ុណ្ណោះ។ ដូច្នេះសម្រាប់អ្នកស្រឡាញ់ការច្រៀងតាំងពីអាយុ13ឆ្នាំដូចជារូបលោក នឹងនៅតែប្រឹងប្រែងផលិតបទចម្រៀងថ្មីៗជាបន្ដបន្ទាប់ទៀតរហូត។
លោកបញ្ជាក់ថា៖ «អ្វីដែលខ្ញុំចង់បានពីមហាជននៅពេលនេះ គឺកម្លាំងចិត្ដតាមរយៈការគាំទ្រលើបទចម្រៀងថ្មីៗជាច្រើន មិនថាតែបទចម្រៀងរបស់ខ្ញុំ ឬរបស់តារាចម្រៀងរូបណាទេ សូមចូលរួមគាំទ្រទាំងអស់គ្នា»។ ទោះយ៉ាងណានួន បូរ៉ា បានបង្ហាញនូវក្ដីរំពឹងថា បទទីពីររបស់លោកនឹងទទួលបានការគាំទ្រមិនចាញ់បទទីមួយនោះឡើយ៕
https://www.youtube.com/watch?v=oh6dcJZUefk
June 14, 2017
Nokia នឹងប្រកាសបង្ហាញ ព្រមទាំងដាក់លក់ស្មាតហ្វូនថ្មីជាផ្លូវការនៅទីផ្សារកម្ពុជានាល្ងាចនេះ
ក្រុមហ៊ុនបច្ចេកវិទ្យា HMD Global ដែលទទួលបានសិទ្ធិប្រើប្រាស់ស្លាកយីហោ Nokia នៅថ្ងៃនេះ បានដាក់បង្ហាញស្មាតហ្វូនស៊េរីថ្មី ជាលើកដំបូងរបស់ខ្លួន នៅក្នុងរួមមាន Nokia 6, Nokia 5 និង Nokia 3 ដែលនឹងមានលក់នៅទីផ្សារកម្ពុជា ចាប់ពីខែមិថុនានេះតទៅ ក្នុងនោះក៏មានទូរស័ព្ទ Nokia 3310 ផងដែរ។
កម្មវិធីប្រកាសបង្ហាញ និងដាក់លក់ស្មាតហ្វូនថ្មីនេះ ត្រូវបានធ្វើឡើងនៅភោជនីយដ្ឋាន Topaz ដែលមានអសយដ្ឋានផ្ទះលេខ 162 មហាវិថីព្រះនរោត្ដម រាជធានីភ្នំពេញ។
សម្រាប់ព័ត៌មានបន្ថែម គេហទំព័រ ឡារ៉ែន នឹងជម្រាប់ជូននៅពេលក្រោយទៀត សូមកុំភ្លេចតាមដាន៕

June 14, 2017