Category: សង្គម និងសេដ្ឋកិច្ច

លោក Loew នឹងប្រើប្រាស់តារាឆ្នើមវ័យក្មេងក្នុង Confederation Cup
ក្រុមម្ចាស់ជើងឯកពិភពលោក អាល្លឺម៉ង់ នឹងធ្វើដំណើរទៅកាន់ព្រឹត្តិការណ៍ Confederation Cup ជាមួយនឹងលោក Joachim Loew ខណៈដែលគ្រូបង្វឹករូបនេះកំពុងសម្លឹងឆ្ពោះទៅរកការប្រើប្រាស់កីឡាករឆ្នើមៗជំនាន់ក្រោយរបស់លោក បន្ទាប់ពីសម្រេចចិត្តមិនកោះហៅកីឡាករជើងចាស់ឆ្នើមៗជាច្រើនរួចមក។
ស្របពេលដែលនៅសល់រយៈពេលតែ 1ឆ្នាំមុនពេលយុទ្ធនាការ World Cup មកដល់ លោក Loew បានសម្រេចអនុញ្ញាតឲ្យកីឡាករឆ្នើមៗជាច្រើននាក់សម្រាកវិស្សមកាល និងបានជ្រើសរើសយកកីឡាករថ្មីៗចំនួន7នាក់ ដើម្បីបញ្ចូលក្នុងក្រុមរបស់លោកសម្រាប់ការទៅប្រកួតនៅប្រទេសរុស្ស៊ី។ ស្របពេលដែលត្រូវអវត្តមានតារាឆ្នើមៗជាច្រើនដូចជា Thomas Mueller, Manuel Neuer, Mario Gomez និង Jerome Boateng ជាដើមនោះ ក្រុមបាល់ទាត់ជម្រើសជាតិអាល្លឺម៉ង់នឹងត្រូវប៉ះជាមួយក្រុមជម្រើសជាតិអូស្ត្រាលី ក្នុងទីក្រុង Sochi នៅថ្ងៃចន្ទ បន្ទាប់ពីក្រុមជម្រើសជាតិស៊ីលី និងអាមេរិក ត្រូវជួបគ្នាក្នុងការប្រកួតក្នុងពូល B នេះដូចគ្នាដែរ។
យុទ្ធនាការនេះនឹងចាប់ផ្តើមនៅថ្ងៃសៅរ៍ស្អែកនេះ នៅពេលដែលក្រុមម្ចាស់ផ្ទះរុស្ស៊ី នឹងត្រូវជួបជាមួយក្រុមជម្រើសជាតិនូវែលសេឡង់ នាថ្ងៃទី17 ខែមិថុនា ខណៈដែលក្រុមជម្រើសជាតិម៉ិកស៊ិក និងព័រទុយហ្គាល់ក៏ស្ថិតក្នុងពូល A ដូចគ្នាដែរ។ ក្រោយពីមិនបានផ្តោតទៅលើការប្រជែងយកកៅអីទៅវគ្គផ្តាច់ព្រ័ត្រក្នុងទីក្រុង St Petersburg នាថ្ងៃទី2 ខែកក្កដា លោក Loew កំពុងតែគិតទៅលើយុទ្ធនាការរយៈពេល12ខែទៅមុខទៀត។ គ្រូបង្វឹកវ័យ57ឆ្នាំរូបនេះ ដែលបានដឹកនាំក្រុមជម្រើសជាតិអាល្លឺម៉ង់ ចាប់តាំងពីឆ្នាំ2006 និងថែមទាំងបានជួយឲ្យប្រទេសនេះឈ្នះពាន World Cup ឆ្នាំ2014 ផងនោះបានឲ្យដឹងថា៖ «ព្រឹត្តិការណ៍ World Cup ឆ្នាំ2018 និងការឈ្នះពាននេះម្តងទៀត គឺជាទស្សនវិស័យចម្បងរបស់យើង»។ លោក Loew បានបន្ថែមទៀតថា៖ «តែបេសកកម្មដែលកំពុងដំណើរការនៅពេលនេះគឺការចូលរួមក្នុងព្រឹត្តិការណ៍ Confederation Cup»៕
កម្មវិធីប្រកួតចុងសប្តាហ៍នេះ
ថ្ងៃសៅរ៍ ទី១៧ ខែមិថុនា
រុស្ស៊ី Vs នូវែលសេឡង់ – 10 យប់
ថ្ងៃអាទិត្យ ទី១៨ ខែមិថុនា
ព័រទុយហ្គាល់ Vs ម៉ិកស៊ិក – 10 យប់
កាមេរូន Vs ស៊ីលី – 1 រំលងអធ្រាត្រ
ប្រភពពី៖ Sky Sport24
June 16, 2017
Everton បំពេញការផ្ទេរ Pickford និង Klaassen សម្រាប់រដូវក្តៅនេះ
ក្លិប Everton បានចាប់ផ្តើមជះទឹកប្រាក់ដ៏ច្រើនបំផុតក្នុងប្រវត្តិសាស្ត្ររបស់ពួកគេ តាមរយៈការបំពេញការចុះហត្ថលេខាជាមួយនឹងអ្នកចាំទី Jordan Pickford ពីក្លិប Sunderland និងខ្សែបម្រើ Davy Klaassen ដែលជាប្រធានក្រុមនៃក្លិប Ajax Amsterdam ក្នុងការផ្ទេរមួយដែលមានតម្លៃខ្លួនសរុប 54លានផោន (ស្មើនឹង 69លានដុល្លារអាមេរិក)។
កីឡាករទាំងពីរសុទ្ធសឹងបានចុះហត្ថលេខាលើកុងត្រារយៈពេល 5ឆ្នាំ ជាមួយនឹងក្លិបមានមូលដ្ឋាននៅ Goodison Park មួយនេះ កាលពីថ្ងៃព្រហស្បតិ៍ ខណៈដែលក្លិប Everton ដែលត្រូវបានផ្តល់មូលនិធិដោយម្ចាស់ភាគហ៊ុនធំគឺលោក Farhad Moshiri នោះ បានចាត់វិធានការយ៉ាងមានប្រសិទ្ធភាពក្នុងការនាំយកកីឡាករពីរនាក់ ដែលជាគោលដៅចម្បងនៅរដូវក្តៅនេះរបស់លោក Ronald Koeman។
Pickford នឹងមានតម្លៃខ្លួនជាបឋមចំនួន25លានផោន ប៉ុន្តែ បើបូកជាមួយនឹងប្រាក់ឧបត្ថម្ភបន្ថែមផ្សេងៗទៀត តម្លៃខ្លួនរបស់គេនឹងកើនដល់3០លានផោន (ស្មើនឹង 38.2លានដុល្លារអាមេរិក) ជាតម្លៃខ្លួនកំណត់ត្រារបស់ក្លិប Everton ខណៈដែលរូបគេក៏ជាអ្នកចាំទី ដែលមានតម្លៃខ្លួនខ្ពស់ជាងគេបំផុតក្នុងចក្រភពអង់គ្លេសផងដែរ។
ស្របពេលមួយគ្នានេះដែរ ខ្សែបម្រើអន្តរជាតិហូឡង់ Klaassen បានផ្ទេរមកក្នុងតម្លៃខ្លួន 24លានផោន (ស្មើនឹង 30.6លានដុល្លារអាមេរិក)។ Klaassen បានឲ្យដឹងថា៖ «ខ្ញុំបាននិយាយកាលពីប៉ុន្មានសប្តាហ៍មុនជាមួយនឹងលោក Ronald Koeman អំពីក្លិប Everton។ ខ្ញុំចង់មកទីនេះ និងត្រួតពិនិត្យមើលថា នេះជាក្លិបដែលត្រឹមត្រូវសម្រាប់ខ្ញុំ ឬយ៉ាងណា ហើយចាប់តាំងពីខ្ញុំបានមកទីនេះ ខ្ញុំពិតជាមានអារម្មណ៍រីករាយណាស់។ វាជាក្លិបដ៏អស្ចារ្យមួយ»។
ខ្សែបម្រើរូបនេះបានបន្ថែមទៀតថា៖ «ពេលវេលាដែលខ្ញុំនិយាយជាមួយនឹងលោកគ្រូបង្វឹកដោយផ្ទាល់ ខ្ញុំមានអារម្មណ៍ល្អណាស់។ គាត់ជាមនុស្សស្មោះត្រង់ ហើយយើងបានជជែកគ្នាអំពីក្លិបនេះ និងអំពីរបៀបដែលគាត់ចង់រៀបចំប្រព័ន្ធលេង ដែលចំណុចនោះបានផ្តល់អារម្មណ៍វិជ្ជមានដល់ខ្ញុំ»៕
ប្រភពព័ត៌មាន៖ The Guardian
June 16, 2017
ស្បែកត្រូវតែស្អាត ដើម្បីសម្លាប់ចិត្តស្វាមី
ប្រពន្ធស្អាត ប្តីណាដែលថាមិនស្រឡាញ់ ពេលបានប្តីស្រឡាញ់ពេញចិត្តហើយនោះ ស្រីៗឯណាដែលថាមិនសប្បាយចិត្តនោះមែនដែរទេ? ភាពស្អាតដែលមនុស្សយើងម្នាក់ៗមានគឺពិតជាបានមកពីការខិតខំ និងការថែរក្សាមកយ៉ាងល្អ។ មានរបស់ល្អគួរតែចែករំលែកឱ្យគ្នាបានដឹង និងបានយកទៅប្រើប្រាស់ ដើម្បីបង្កើនភាពស្រស់ស្អាត បន្ថែមក្តីស្រឡាញ់ពីស្វាមី ដណ្តើមយកក្តីសុខ និងសុភមង្គលក្នុងគ្រួសារឱ្យបានកាន់តែច្រើនឡើងពីមួយថ្ងៃទៅមួយថ្ងៃ។ ដូច្នេះប្រសិនបើអ្នកចង់ដឹង និងចង់យកឈ្នះចិត្តស្វាមីអ្នកនោះ សូមស្វែងរកចម្លើយនៅក្នុងទំព័រនេះដូចតទៅ៖
ស្វែងយល់ពីប្រភេទស្បែក៖ ដំបូងអ្នកត្រូវស្វែងរកឱ្យឃើញសិនថា តើស្បែករបស់អ្នកជាប្រភេទស្បែកបែបណា បន្ទាប់មកទៀតសឹមស្វែងរកផលិតផលណាដែលត្រូវជាមួយនឹងប្រភេទស្បែករបស់អ្នក។ ឡារ៉ែន ដឹងថាអ្នកនាងកញ្ញាទាំងឡាយពិតជាបានជ្រាបពីបញ្ហានេះ ប៉ុន្តែដោយសារតែមានសុភាពនារីច្រើនណាស់ដែលប្រើប្រាស់ផលិតផលខុសពីប្រភេទស្បែករបស់ខ្លួន ហេតុនេះហើយបានជាយើងតែងតែលើកយកបញ្ហានេះមករំឭកដល់អ្នកជារឿយៗ។
ការទទួលទានអាហារ៖ ជំហានបន្ទាប់ដែលអ្នកត្រូវយកចិត្តទុកដាក់គឺការទទួលទានអាហារដែលត្រូវទៅតាមប្រភេទស្បែក និងមានប្រយោជន៍ចំពោះស្បែក។ ប្រសិនបើអាចគួរតែងាកចេញបន្តិចពីអាហារប្រភេទ Fast Food ព្រោះថាអាហារប្រភេទនេះមិនល្អសម្រាប់ស្បែកនោះទេ មានតែអាហារដែលអ្នកចម្អិនដោយផ្ទាល់ គឺសម្បូរទៅដោយវីតាមីន និងសារធាតុចិញ្ចឹមទេទើបល្អ ហើយម្យ៉ាងទៀតបើសួរលោកប្តីវិញនោះក៏ប្រហែលជាមិនរីករាយណាស់ណាទេ បើរាល់ថ្ងៃមានតែអាហារ Fast Food នោះ។ ចម្អិនអាហារខ្លួនឯងមិនត្រឹមតែជួយឱ្យស្បែកស្អាត សុខភាពល្អនោះទេ ថែមទាំងជួយបន្ថែមសុភមង្គលក្នុងគ្រួសារថែមទៀតផង។
ទទួលទានទឹកដើម្បីស្បែករលោងភ្លឺថ្លា៖ ជំនួយការពីធម្មជាតិជួយឱ្យស្បែកមើលទៅភ្លឺថ្លាគឺទឹកនេះហើយ។ បន្ថែមបរិមាណទឹកទៅក្នុងរាងកាយរបស់អ្នកជារៀងរាល់ថ្ងៃ ដើម្បីបណ្តេញជាតិពុលចេញពីក្នុងស្បែក។
បញ្ឈប់ភាពធុញថប់៖ ភាពធុញថប់គឺជាធាតុផ្សំដែលនាំឱ្យស្បែកស្រអាប់គ្មានពន្លឺ។ ការពារ ឬកាត់បន្ថយរឿងបែបនេះដោយវិធីងាយៗដូចជា ស្តាប់តន្ត្រី ដកដង្ហើមវែងៗ និងហាត់ប្រាណបែបយ៉ូហ្គាជាដើម។
ផលិតផលដែលអ្នកគួរតែជ្រើសរើសយកមកប្រើ៖ សម្រាប់លោកអ្នកដែលប្រាថ្នាចង់បានស្បែកដែលមានសភាពភ្លឺរលោងស្រស់ស្អាតនោះសូមចងចាំក្នុងចិត្តថាផលិតផលដែលអ្នកនឹងទិញយកមកប្រើប្រាស់ត្រូវតែមានធាតុផ្សំសំខាន់ៗមួយចំនួនដូចជា វីតាមីន C, Retinoid និង Lacticacid។ វីតាមីន C មានប្រសិទ្ធភាពក្នុងការកម្ចាត់មុន កាត់បន្ថយអាការក្រហម រមាស់ស្បែក មុនក្បាលខ្មៅ និងកាត់បន្ថយស្នាមជ្រួញជាដើម។ ផលិតផលដែលមានផ្សំជាមួយ Retinoid ជួយកម្ចាត់មុន បង្រួមរន្ធរោមជាពិសេសជួយឱ្យស្បែករលោង មានសុខភាពល្អ និងក្មេងជាងវ័យ។ Lactic acid ជួយបន្ថែមសំណើមដល់ស្បែក បន្ថយភាពស្ងួតគ្រើម ធ្វើឱ្យស្បែកមានសុខភាពល្អ និងស្រស់ស្រាយ។
ចំណុចត្រូវហាម
– ផាត់មុខក្រាស់ពេក ព្រោះគ្រឿងសម្អាងនឹងធ្វើការបិទរន្ធញើសរបស់អ្នកជិតពេក ដែលអាចបង្កឱ្យកើតមុន។
– យកដៃប៉ះមុខ សូម្បីតែលាបក្រែមការពារស្បែកក្តី ទាំងដែលមិនទាន់បានសម្អាតដៃឱ្យស្អាត គឺមេរោគអាចចម្លងទៅស្បែកតាមរយៈដៃកខ្វក់របស់អ្នកបាន។
-ចូលគេងទាំងមិនទាន់សម្អាតស្បែកឱ្យស្អាត។
– ចូលគេងយប់ជ្រៅ ជក់បារី ស្រា និងប្រើគ្រឿងញៀន។
– បណ្តោយឱ្យស្បែកទ្រាំទ្រនឹងកម្តៅថ្ងៃ ដោយមិនមានផលិតផល ឬសម្ភារជំនួយការពារស្បែក។
សូមចាំថា លទ្ធផលបានមកពីការខិតខំរបស់អ្នក នោះមានន័យថា ស្អាតៗ ឬមិនស្អាតគឺមានតែរូបអ្នកទេដែលអាចជួយខ្លួនឯងបាន៕
June 16, 2017
រឿងគួរឱ្យអស់សំណើចក្នុងយុគសម័យរាជវង្សចិន វគ្គ «ចាប់ផោម»
ក្នុងពេលដែលលោកចៅហ្វាយស្រុកដ៏មានអំណាចកំពុងតែអង្គុយប្រជុំស្តាប់រឿងរ៉ាវតវ៉ាផ្សេងៗអំពីអ្នកស្រុកនោះ នៅសុខៗក្នុងក្រុមពួកអ្នកស្រុកក៏ស្រាប់តែមានមនុស្សម្នាក់ផោមឡើងលាន់ឮសំឡេងយ៉ាងខ្លាំង «ពូតតតតតត!»។
ចៅហ្វាយស្រុកដែលកំពុងតែវីវក់ជាមួយនឹងឯកសារតវ៉ាទាមទាររបស់ពួកអ្នកស្រុកនោះ ពេលបានឮ ក៏ងើបមុខឡើងដោយអារម្មណ៍មួម៉ៅ ព្រមទាំងស្រែកបញ្ជាខ្លាំងៗឡើងថា «សំឡេងស្អីគេហ្នឹងៗ នាំយកមកឱ្យយើងមើលភ្លាម!»។
ខាងអង្គរក្សដែលកំពុងឈរព័ទ្ធជុំវិញនៅក្នុងបន្ទប់ បានឮហើយក៏សម្លឹងមុខគ្នាឡឺនឡង់ៗ មុននឹងមានម្នាក់ឆ្លើយឡើងថា «ចាប់លែងទាន់ហើយ លោកម្ចាស់!»។
លោកចៅហ្វាយស្រុកបានឮចម្លើយបែបនោះ ក៏រឹតតែខឹងមួម៉ៅខ្លាំងឡើង ក៏ស្រែកគំហកខ្លាំងៗទៅទៀតថា «កុំមកកុហកយើង! ជួយលាក់បាំងជនប្រព្រឹត្តខុសពួកឯងនឹងទទួលទោស យកចេញមកឱ្យយើងមើលភ្លាម!»។
បណ្តាអង្គរក្សទាំងអស់មិនដឹងជាធ្វើយ៉ាងណា ក៏យកក្រដាសកើបអាចម៍មួយកំភ្លូសធំនោះ មកប្រគល់ជូនលោកចៅហ្វាយស្រុក ព្រមទាំងរាយការណ៍ថា «ជនល្មើសរត់បាត់ទៅហើយលោកម្ចាស់ ចាប់បានតែវត្ថុពាក់ព័ន្ធ ទើបនាំខ្លួនមកជូនលោកម្ចាស់ដើម្បីពិចារណាទោសនៅពេលនេះ»៕
ស្រាវជ្រាវដោយ តាវ៉ែនតា
June 15, 2017
ឈុន ស្រីមុំ៖ ខ្ញុំអាចឈរបានថ្ងៃនេះ គ្មានជំនួយពីនរណាទេ…
មួយរយៈចុងក្រោយនេះគេឧស្សាហ៍ឃើញតារាសម្ដែង ឈុន ស្រីមុំ មានវត្ដមានក្នុងការសម្ដែងភាពយន្ដឱ្យស្ថានីយទូរទស្សន៍ប៉ុស្ដិ៍លេខ 5ញឹកញាប់ណាស់ សូម្បីតែរឿងដុំដែលមានចំណងជើងថា «នាងនាថបាត់ដំបង» ជាវណ្ណកម្មដំបូងដែលបានយកមកដាក់បញ្ចាំងក្នុងរោងភាពយន្ដក៏មានវត្ដមានរូបនាងដែរ។
ថ្វីដ្បិតតែនាងជាតារាទើបចូលប្រឡូកសិល្បៈនៅមិនទាន់មានបទពិសោធច្រើនដូចតារាដទៃមែន ប៉ុន្ដែមើលទៅទេពកោសល្យក្នុងការសម្ដែងរបស់នាងត្រូវបានមហាជនភាគច្រើនទទួលយកបាន និងមានការគាំទ្រ រហូតបច្ចុប្បន្ននាងក៏មានហ្វ៊ែនផ្ទាល់ខ្លួនដែលគាំទ្រលើការសម្ដែងរបស់នាងដែរ តែក្រោយពីគេបានដឹងថា នាងជាបងស្រីបង្កើតរបស់អ្នកគ្រប់គ្រងនៅក្នុងផលិតកម្ម BKS គឺលោក ឈុន សុវណ្ណភក្ដី មកនោះ ក៏ស្រាប់តែមានការលើកឡើងថា ប្រសិនបើមិនមានការជួយជ្រោមជ្រែងពីប្អូនប្រុសទេ ប្រហែលជានាងគ្មានឱកាសបែបនេះឡើយ។
ជួបកញ្ញា ឈុន ស្រីមុំ នាងបានបកស្រាយប្រាប់ថា៖ «វាមិនមែនដូចអ្វីដែលគេបានលើកឡើងនោះទេ សម្រាប់ភក្ដី ប្អូនប្រុសរបស់ខ្ញុំវិញ កុំថាឡើយជួយជ្រោមជ្រែងខ្ញុំ សូម្បីតែខ្ញុំចូលសិល្បៈ ក៏គាត់មិនទាំងចង់ឱ្យខ្ញុំចូលប្រឡូកក្នុងអាជីពនេះផង»។ នាងបន្ដថា នាងហាក់មិនយល់ច្បាស់ពីអារម្មណ៍របស់ប្អូនប្រុសឡើយ ប៉ុន្ដែនាងអាចសន្និដ្ឋានបានថា ប្រហែលជាបណ្ដាលមកពីគាត់ខ្លាចនាងចូលប្រឡូកសិល្បៈហើយ ត្រូវរងការរិះគន់ពីរឿងមិនល្អណាមួយដែលអាចបណ្ដាលឱ្យប៉ះពាល់ដល់កិត្ដិយសគ្រួសារ។
ដោយឡែកពាក់ព័ន្ធនឹងការសម្ដែងរឿងភាគនៅស្ថានីយទូរទស្សន៍ប៉ុស្ដិ៍លេខ5ជាញឹកញាប់នោះត្រូវបាន ស្រីមុំ ប្រាប់ថា អ្វីៗដែលនាងទទួលបាន វាកើតចេញពីសមត្ថភាព និងទេពកោសល្យរបស់នាងសុទ្ធសាធ គ្មានការជួយពីនរណាទាំងអស់។ ប្រសិនបើគ្មានសមត្ថភាព ប្រហែលជាអ្នកដឹកនាំរឿងគេមិនត្រូវការទេ។ នាងបានបន្ដថា បើទោះជាមានការលើកឡើងបែបនេះក៏ដោយ ក៏នាងគ្មានអារម្មណ៍អាក់អន់ស្រពន់ចិត្ដអ្វីដែរ ព្រោះជាធម្មតា មានឪពុកជាចាងហ្វាងផលិតកម្ម និងប្អូនជាអ្នកប្រឡូកក្នុងវិស័យសិល្បៈយូរហើយ ហើយគេនាំគ្នានិយាយបែបហ្នឹង វាមិនមានអ្វីប្លែកទេ។
ទោះជាយ៉ាងណានាងបានសម្ដែងនូវមោទនភាពចំពោះខ្លួនឯងដែលអាចធ្វើបាន គ្រាដែលនាងមិនដែលធ្លាប់គិតថា នាងដើរលើផ្លូវនេះតែម្នាក់ឯងបែបនេះ ប្រហែលជាមិនអាចទៅរួចឡើយ ព្រោះអំឡុងពេលនាងចូលសិល្បៈដំបូងក្រុមគ្រួសារពុំសូវជាគាំទ្រប៉ុន្មានឡើយ ដោយសារតែបារម្ភ។
ជាមួយគ្នានេះកញ្ញា ឈុន ស្រីមុំ ប្រាប់បន្ថែមទៀតថា កាលពីចូលសិល្បៈដំបូងៗគ្រួសារពិតជាមានការបារម្ភចំពោះនាងអំពីការចេញទៅថតទីឆ្ងាយៗ និងខ្លាចជួបរឿងមិនល្អពាក់ព័ន្ធនឹងស្នេហា ប៉ុន្ដែពេលនេះអ្នកផ្ទះរបស់នាងមានការទុកចិត្ដលើរូបនាងហើយ។ ម្យ៉ាងនាងក៏មានបទពិសោធច្រើនហើយក្នុងសង្គមសិល្បៈ បន្ទាប់ពីការចេញទៅសម្ដែងឆ្ងាយៗតែឯងញឹកញាប់មកនោះ៕
June 15, 2017
បានដឹងតម្លៃទូរស័ព្ទដែលក្រុមហ៊ុន Nokia សម្ពោធល្ងាចមិញហើយឬនៅ?
ល្ងាចមិញនេះ ក្រុមហ៊ុន Nokia ប្រចាំកម្ពុជា បានធ្វើការសម្ពោធជាផ្លូវការនូវទូរស័ព្ទស៊េរីថ្មីរបស់ខ្លួនហើយ ក្រោយពីបានបង្ហាញខ្លួនតាំងពីដើមឆ្នាំក្នុងព្រឹត្តិការណ៍ MWC ឆ្នាំ2017 ដែលរួមមានទូរស័ព្ទស្មាតហ្វូនប្រើប្រព័ន្ធប្រតិបត្តិការ Android ជំនាន់ចុងក្រោយគេទាំង 3ម៉ូដែល និងទូរស័ព្ទស៊េរីចាស់ តែផ្លាស់ប្ដូរមុខមាត់ថ្មី Nokia 3310 មួយផងដែរ។
ក្នុងការដាក់បង្ហាញនេះ តំណាងក្រុមហ៊ុន Nokia ប្រចាំកម្ពុជា បានឱ្យដឹងថាទូរស័ព្ទទាំង 4ម៉ូដែល មានតម្លៃចាប់ពី 48ដុល្លារ ដល់ 229ដុល្លារ ដោយទូរស័ព្ទ Nokia 3 ដាក់លក់ក្នុងតម្លៃ 143ដុល្លារ ខណៈ Nokia 3310 មានតម្លៃ 48ដុល្លារ ដែលនឹងមានលក់នៅចុងខែមិថុនា ឆ្នាំ2017 នេះជាមួយគ្នា ឯទូរស័ព្ទ Nokia 5 លក់ក្នុងតម្លៃ 193 ដុល្លារ និងទូរស័ព្ទ Nokia 6 លក់ក្នុងតម្លៃ 229ដុល្លារ ដោយគ្រោងនឹងចេញលក់នៅពាក់កណ្តាលខែកក្តដា ឆ្នាំ2017 ខាងមុខ៕
June 15, 2017
រដ្ឋាភិបាលប្រកាសជាផ្លូវការនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025
ភ្នំពេញៈ រដ្ឋាភិបាលបានប្រកាសដាក់ចេញជាផ្លូវការនូវយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 បន្ទាប់ពីរាជរដ្ឋាភិបាលបានពិនិត្យឃើញថា កម្ពុជារក្សាបាននូវស្ថិរភាពពេញលេញ និងមានស្ថិរភាពនយោបាយរឹងមាំ ព្រមទាំងសម្រេចបានកំណើនសេដ្ឋកិច្ចខ្ពស់ប្រកបដោយចីរភាពក្នុងអត្រាជាមធ្យមជិត8ភាគរយក្នុងមួយឆ្នាំ។
ឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជា និងជាអនុប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ និងយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 បានថ្លែងថា ការសម្រេចដាក់សម្ពោធជាផ្លូវការនូវផែនការយុទ្ធសាស្រ្តនេះ គឺជាផ្លែផ្កាដ៏ត្រចះត្រចង់មួយដែលឆ្លុះបញ្ចាំងពីការរួមចំណែកយ៉ាងសកម្មពីវិស័យហិរញ្ញវត្ថុដែលបាន និងកំពុងរីកចម្រើនយ៉ាងឆាប់រហ័សបន្ទាប់ពីរាជរដ្ឋាភិបាលកម្ពុជាបានដាក់ចេញនូវគំនិតផ្ដួចផ្ដើមដ៏សំខាន់ក្នុងការអភិវឌ្ឍវិស័យហិរញ្ញវត្ថុដ៏ក្មេងខ្ចីរបស់ខ្លួន។
ឯកឧត្ដមបន្តថា ដើម្បីអភិវឌ្ឍវិស័យហិរញ្ញវត្ថុឲ្យកាន់តែរឹងមាំស្របតាមការរីកចម្រើនសេដ្ឋកិច្ចនៃនិម្មាបនកម្មហិរញ្ញវត្ថុអន្តរជាតិ និងសម្ទុះនៃសមាហរណកម្មតំបន់ និងពិភពលោក ព្រមទាំងផ្អែកលើបទពិសោធ និងមេរៀនថ្មីៗដែលបានជួបប្រទះក្នុងការអនុវត្តកន្លងមកនៅឆ្នាំ 2016 រាជរដ្ឋាភិបាលបានសម្រេចធ្វើបច្ចុប្បន្នកម្មផែនការយុទ្ធសាស្ត្រជាលើកទី3 ពីយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2011-2020 ទៅជាយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 ដែលដាក់សម្ពោធឲ្យប្រើប្រាស់នាពេលនេះ។
យុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 រៀបចំឡើងដោយមានការចូលរួមពីគ្រប់ស្ថាប័នពាក់ព័ន្ធ ដៃគូអភិវឌ្ឍន៍ ជាពិសេសធនាគារអភិវឌ្ឍន៍អាស៊ីដែលបានចូលរួមចំណែក និងគាំទ្រការធ្វើបច្ចុប្បន្នកម្មឯកសារយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 រហូតទទួលបានជោគជ័យ។
ឯកឧត្ដមទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុ និងជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុបានថ្លែងថាយុទ្ធសាស្រ្តដែលបានសម្រេចដាក់សម្ពោធជាផ្លូវការនេះជាឯកសារបច្ចុប្បន្នកម្មថ្មីមួយរបស់កម្ពុជាដើម្បីធ្វើឲ្យវិស័យហិរញ្ញវត្ថុមានការអភិវឌ្ឍបានយ៉ាងរហ័សក្នុងការនាំកម្ពុជាឈានចូលទំព័រប្រវត្តិសាស្ត្រថ្មី និងមានមុខមាត់ថ្មី និងមានការរីកចម្រើនយ៉ាងឆាប់រហ័សស្របតាមការរីកចម្រើនរបស់សេដ្ឋកិច្ចជាតិ និងពិភពលោក។
ឯកឧត្ដមបន្តថា យុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 នេះគឺផ្ដើមចេញពីជម្រើស និងការអនុវត្តគោលនយោបាយត្រឹមត្រូវរបស់រាជរដ្ឋាភិបាលក្នុងការបង្កបរិស្ថានអំណោយផលសម្រាប់វិស័យឯកជន និងការរក្សាបាននូវស្ថិរភាពម៉ាក្រូសេដ្ឋកិច្ចតាមរយៈការអនុវត្តគោលនយោបាយរូបិយវត្ថុ និងគោលនយោបាយសារពើពន្ធប្រកបដោយការប្រុងប្រយត្ន័គួបផ្សំនឹងការអនុវត្តយ៉ាងខ្ជាប់ខ្ជួនតាមកម្មវិធីកំណែទម្រង់ស៊ីជម្រៅចាំបាច់នានាលើគ្រប់វិស័យ។
យោងតាមឯកសារនៃយុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ 2016-2025 បានបង្ហាញឲ្យដឹងដែរថា តាមរយៈការរក្សាបាននូវសន្តិភាពពេញលេញ ស្ថិរភាពនយោបាយរឹងមាំ និងកំណើនសេដ្ឋកិច្ចខ្ពស់ប្រកបដោយចីរភាពក្នុងអត្រាមធ្យមជិត 8% ក្នុង1ឆ្នាំនោះបានធ្វើឲ្យអត្រាភាពក្រីក្រថយចុះយ៉ាងលឿនពីជាង 53% ក្នុងឆ្នាំ 2004 មកត្រឹម 13.5% នៅឆ្នាំ 2014។
ការអភិវឌ្ឍយ៉ាងឆាប់រហ័សនេះបានធ្វើឲ្យកម្ពុជាឈានចូលទំព័រប្រវត្តិសាស្ត្រថ្មីដោយប្រែក្លាយមុខមាត់ពីប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប និងត្រូវបានធនាគារពិភពលោកចាត់ទុកជាប្រទេសក្នុងក្រុមឯកទគ្គករកំណើនទាំង 8ក្នុងពិភពលោក៕
June 15, 2017
បទចម្រៀងដំបូងរបស់សុខ ស្រីនាង នៅរស្មីហង្សមាស ចេញ Full MV ហើយ!!!
ចាប់តាំងពីបានចូលទៅជ្រកក្នុងផលិតកម្មរស្មីហង្សមាស តារាចម្រៀងសម្បុរខ្មៅស្រអែមសំឡេងក្រអួនក្រអៅ សុខ ស្រីនាង ទើបតែចេញវីដេអូចម្រៀងរបស់ខ្លួនជាលើកដំបូង។ បទចម្រៀងដែលនិយាយពីអារម្មណ៍លួចស្រលាញ់បុរសម្នាក់តែម្នាក់ឯង វាពិតជាលំបាកក្នុងការសម្រួលអារម្មណ៍ខ្លាំងណាស់ ហើយវាពិតជាហត់ក្នុងការតាមស្រលាញ់គេ សូម្បីតែម្ដងក៏គ្មានទេពាក្យថា ស្រលាញ់សម្រាប់យើង ។ អារម្មណ៍ទាំងអស់នេះ បានបង្ហាញនៅក្នុងសាច់រឿងនៃវីដេអូចម្រៀងរបស់ សុខ ស្រីនាង ដែលមានចំណងជើងថា «ហត់ទេស្រលាញ់គេម្នាក់ឯង»។
តាមរយៈគណនី YouTube របស់ រស្មីហង្សមាស បានឱ្យដឹងថា បទចម្រៀង «ហត់ទេស្រលាញ់គេម្នាក់ឯង» ជាទឹកដៃនិពន្ធរបស់កវី នីសគន្ធា និងនិពន្ធបទភ្លេងដោយ សាន់ សុវណ្ណឌីន ហើយក្រោយការដឹកនាំសម្ដែងដោយ លោក Eco Vak Song ផងដែរ ។ មានតែអ្នកដែលស្នេហ៍គេតែម្នាក់ឯងទេដែលយល់អារម្មណ៍មួយនេះ សួរថាហត់ទេ?
ចម្លើយគឺ ពិតជាហត់ តែពេញចិត្តនឹងធ្វើចិត្ត ដើម្បីឱ្យកាន់តែជាក់ច្បាស់ សូមទស្សនាវីដេអូចម្រៀងខាងក្រោមនេះ៖
June 15, 2017
ការប្រឡងជ្រើសរើសសិស្សក្រឡាបញ្ជីជំនាន់ទី5 ចាប់ផ្តើមហើយ
បេក្ខជនជាច្រើនមកពីបណ្តាសាកលវិទ្យាល័យគ្រប់រាជធានី-ខេត្ត រួមទាំងស្ថាប័នមួយចំនួន បានមកជួបជុំគ្នាដើម្បីចូលរួមការប្រឡងជ្រើសរើសក្រឡាបញ្ជីជំនាន់ទី5 ដែលប្រព្រឹត្តទៅនៅរាជបណ្ឌិតសភាវិជ្ជាជីវៈតុលាការ។
ការប្រឡងនេះ គឺធ្វើឡើងដោយបែងចែកចេញជា 2 ដំណាក់កាល។ ដំណាក់កាលទី 1 គឺត្រូវប្រឡងលើវិញ្ញាសាសរសេរចំនួន 3 រួមមាន នីតិរដ្ឋធម្មនុញ្ញ នីតិព្រហ្មទណ្ឌ (ច្បាប់សារធាតុ) និងនីតិរដ្ឋប្បវេណី (ច្បាប់សារធាតុ) 2។ ចំណែកឯវិញ្ញាសាទី ( 2 គឺប្រឡងដោយផ្ទាល់មាត់ស្តីពីវប្បធម៌ទូទៅ ជាមួយនិងជំនាញស្តាប់ និងកត់ត្រា។
គួររំឭកដែរថា កាលពីថ្ងៃទី 13 ខែមិថុនា ឆ្នាំ2017 មុនពេលប្រឡងពីរថ្ងៃ រាជបណ្ឌិតសភាវិជ្ជាជីវៈតុលាការ បានរៀបចំកិច្ចប្រជុំពិភាក្សាអំពីនីតិវិធី និងការប្រព្រឹត្តទៅសម្រាប់ការប្រឡងនៅថ្ងៃនេះ ក្រោមអធិបតីភាព ឯកឧត្តម អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ និងជាប្រធានក្រុមប្រឹក្សាភិបាលនៃរាជបណ្ឌិតសភាវិជ្ជាជីវៈតុលាការ និងមានការអញ្ជើញចូលរួមពីថ្នាក់ដឹកនាំនៃក្រសួងយុត្តិធម៌ ក្រសួងសេដ្ឋកិច្ច និងហិរញ្ញវត្ថុ ក្រសួងមុខងារសាធារណៈ និងរាជបណ្ឌិតសភាវិជ្ជាជីវៈតុលាការ ព្រមទាំងតំណាងអង្គភាពប្រឆាំងអំពើពុករលួយផងដែរ៕
June 15, 2017
ក្រសួងពាណិជ្ជកម្ម និងសហគមន៍ម្រេចអន្តរជាតិ រួមគ្នាលើកកម្ពស់ផលិតផលម្រេចកម្ពុជា
ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មបានជួបពិភាក្សាជាមួយលោកស្រី ហ័ង ធីលៀន (Hoang Thi Lien) នាយិកាប្រតិបត្តិនៃសហគមន៍ម្រេចអន្តរជាតិ (International Pepper Community) ដែលជាស្ថាប័នមួយបង្កើតឡើងក្រោមក្របខ័ណ្ឌគណៈកម្មការសេដ្ឋកិច្ច និងសង្គមប្រចាំតំបន់អាស៊ីប៉ាស៊ីហ្វិក នៃអង្គការសហប្រជាជាតិ (UNESCAP) ក្នុងគោលដៅលើកកម្ពស់ផលិតផលម្រេចកម្ពុជា។
លោកស្រី ហ័ង ធីលៀនមានប្រសាសន៍ថា គោលបំណងនៃជំនួបនេះគឺដើម្បីណែនាំពីគុណប្រយោជន៍នៃការចូលជាសមាជិករបស់សហគមន៍ដែលបច្ចុប្បន្នមានសមាជិកពេញសិទ្ធិចំនួន6 ប្រទេសរួមមាន វៀតណាម ឥណ្ឌូណេស៊ី ប្រេស៊ីល ឥណ្ឌា ស្រីលង្កា និងម៉ាឡេស៊ី។ ការចូលជាសមាជិករបស់សហគមន៍ ប្រទេសជាសមាជិកនឹងទទួលបានអត្ថប្រយោជន៍លើការលើកកម្ពស់ផលិតភាព បច្ចេកទេសថ្មីៗ ការស្រាវជ្រាវនានា ក្នុងការគាំទ្រលើខ្សែសង្វាក់ផលិតផលទាំងមូល ក៏ដូចជាការសម្របសម្រួលរវាងកសិករ និងឈ្មួញ ដើម្បីឈានទៅដល់ការនាំចេញទៅទីផ្សារបរទេស។
ឯកឧត្តមប៉ាន សូរស័ក្ដិបានមានប្រសាសន៍ដែរថា ម្រេចកម្ពុជាជាកសិផលមួយដែលមានភាពល្បីល្បាញ ជាពិសេសម្រេចកំពតដែលជាទំនិញបញ្ជាក់ភូមិសាស្ត្រ (Geographical Indication) និងមានតម្លៃខ្ពស់នៅលើទីផ្សារពិភពលោក។ ចំពោះការចូលជាសមាជិកនេះ ឯកឧត្តម មានប្រសាសន៍ថា កម្ពុជានឹងអាចចូលជាសមាជិកសង្កេតការណ៍របស់សហគមន៍ម្រេចអន្តរជាតិជាមុនសិន ហើយនឹងសិក្សាបន្ថែមទៀតលើលទ្ធភាពក្នុងការចូលជាសមាជិកពេញសិទ្ធិនៅពេលក្រោយ។

ឯកឧត្តមបានណែនាំឲ្យសហគមន៍ម្រេចអន្តរជាតិសហការជាមួយក្រសួងពាណិជ្ជកម្ម រៀបចំសិក្ខាសាលាមួយនៅកម្ពុជាដើម្បីបង្កើតជាវេទិកាប្រឹក្សាជាមួយកសិករ អ្នកប្រមូលទិញ និងអ្នកនាំចេញផលិតផលម្រេច ក្នុងគោលបំណងលើកស្ទួយការអភិវឌ្ឍផលិតផលម្រេចនៅកម្ពុជាបន្ថែមទៀត៕
June 15, 2017