មុខម្ហូបមួយមុខទៀតហើយពីអ្នកស្រី Sakorak Thonn ដែលជាចុងភៅដ៏ចំណានប្រចាំគ្រួសាររបស់អ្នកស្រី នឹងជាអ្នកដែលនិយមចូលចិត្តចម្អិនម្ហូបអាហារឆ្ងាញ់ៗ និងប្លែកៗ ដើម្បីទទួលទាននៅក្នុងគ្រួសារ និងចែករំលែកចំណេះដឹងជូនដល់មេផ្ទះទាំងឡាយ ដើម្បីបញ្ចេញថ្វីដៃចម្អិនអាហារសម្រាប់សមាជិកគ្រួសារជាទីស្រឡាញ់ទទួលទានយ៉ាងឆ្ងាញ់មាត់ជុំគ្នា។ ម្ហូបមួយមុខនេះគឺ “ភ្លាសាច់ជ្រូកក្រូចឆ្មារ” ដូច្នេះសូមតាមដាននូវគ្រឿផ្សំ និងរបៀបធ្វើមុខម្ហូបនេះទាំងអស់គ្នា។
+ គ្រឿងផ្សំ
• សាច់ជ្រូក 3ខាំ
• ទឹកត្រី 2ស្លាបព្រាបាយ
• ស្ករស 1ស្លាបព្រាកាហ្វេ
• ខ្ទឹមស 1មើម
• ក្រូចឆ្មារ 3ផ្លែ
• ម្ទេស 6ផ្លែ
• ខាត់ណា 1ដើម
+ របៀបចម្អិន
របៀបចម្អិន ដំបូងត្រូវសកដើមខាត់ណា រួចលាងទឹកឱ្យស្អាត បន្ទប់បាយកមកកាត់ជាកង់តូចល្មម ហើយយកទៅក្លាសេជាមួយទឹកកកឱ្យត្រជាក់ ទុកមួយអន្លើ។ បន្ទាប់មកសឹមហាន់ខ្ទឹមស និងចិញ្ច្រាំឱ្យម៉ដ្ឋ រួចចិតក្រូចឆ្មារជាចំណិត និងហាន់ម្ទេសស្រស់ឱ្យល្អិត ដើម្បីធ្វើទឹកត្រីជូរអែម។ លាយទឹកត្រី ជាមួយស្ករសក្នុងបរិមាណដូចរៀបរាប់ពីខាងលើ រួចច្របាច់ក្រូចឆ្មារចូល និងដាក់ខ្ទឹមសចិញ្ច្រាំ និងម្ទេសចូល កូរឱ្យសព្វ និងចូលជាតិគ្នាល្អ ទុកមួយអន្លើសិន។ រួចយកសាច់ជ្រូកលាងទឹកឱ្យស្អាត ហើយយកមកហាន់ជាចំណិតស្តើង។ បន្ទាប់មកទៀតសឹមដាក់ឆ្នាំងនៅលើភ្លើងដាំទឹកឱ្យពុះល្អ សឹមដាក់សាច់ជ្រូកចូលស្ងោរឱ្យឆ្អិនល្មមៗបានហើយ។ យកចានមកដាក់សាច់ជ្រូក ដែលស្ងោរឆ្អិននោះឱ្យមានរបៀប រួចចាក់ទឹកត្រីជូរអែមពីលើ និងបន្ថែមដោយដើមខាត់ណា ដែលកាត់ជាដុំតូចៗលម្អ និងទុកទទួលទានជាអន្លក់ដូចរូបជាការស្រេច៕
