Category: សង្គម និងសេដ្ឋកិច្ច

  • ព្រលានយន្តហោះខ្នាតអន្តរជាតិ នៅខេត្តកោះកុងចាប់ផ្តើមសាងសង់

    ព្រលានយន្តហោះខ្នាតអន្តរជាតិ នៅខេត្តកោះកុងចាប់ផ្តើមសាងសង់

    ភ្នំពេញៈ ព្រលានយន្តហោះខ្នាតអន្តរជាតិមួយ ដែលវិនិយោគដោយក្រុមហ៊ុន Union Development Group ស្ថិតនៅក្នុងខេត្តកោះកុង ដែលគ្រោងបោះទុនវិនិយោគតម្លៃ 350លានដុល្លារអាមេរិក បានចាប់ផ្តើមបើកការដ្ឋានសាងសង់ហើយ។

    លោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានថ្លែងឲ្យដឹងតាមទូរស័ព្ទកាលពីម្សិលមិញថា ការសាងសង់ព្រលានយន្តហោះខ្នាតអន្តរជាតិនេះ បាននិងកំពុងចាប់ផ្តើមឈូសឆាយដី ដើម្បីរៀបចំជាការដ្ឋានហើយ។ ព្រលានយន្តហោះនេះស្ថិតនៅក្នុងស្រុកបទុមសាគរ ខេត្តកោះកុង និងវិនិយោគដោយក្រុមហ៊ុន Union Development Group ដែលមានមូលដ្ឋាននៅប្រទេសចិន។

    លោកបន្តថា ព្រលានយន្តហោះនេះមានទំហំដី 750ហិកតា ជាព្រលានយន្តហោះខ្នាតអន្តរជាតិដែលអាចទទួលការចុះចតយន្តហោះបានពីគ្រប់ទិសទី។ លោកបន្ថែមថា “ព្រលានយន្តហោះនេះអាចចុះចតយន្តហោះប្រភេទ 4C ជាយន្តហោះខ្នាតមធ្យមបាន ប៉ុន្តែតើការសាងសង់ត្រូវបញ្ចប់នៅពេលណា លោកមិនទាន់អាចបញ្ជាក់បាននៅឡើយទេនៅពេលនេះ”។

    លោក ស៊ិន ចាន់សិរីវុត្ថា បានបន្តទៀតថា រហូតមកទល់ពេលនេះ ក្រុមហ៊ុនកំពុងឌីហ្សាញគម្រោងប្លង់របស់អាកាសយានដ្ឋាននេះ ប៉ុន្តែការសិក្សាពីបរិស្ថានស្ថិតក្រោមសមត្ថកិច្ចរបស់ក្រសួងបរិស្ថាន និងការសាងសង់ស្ថិតក្រោមក្រសួងរៀបចំដែនដី នគរូបនីយកម្ម និងសំណង់។

    ប្រធាននាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថានលោក ដាញ់ សេរី បានថ្លែងថា ក្រុមហ៊ុននេះបានជួលក្រុមហ៊ុនសិក្សាពីផលប៉ះពាល់បរិស្ថានលំដាប់អន្តរជាតិ ដើម្បីវាយតម្លៃពីផលប៉ះពាល់បរិស្ថាននៃគម្រោងនេះ និងត្រូវដាក់ឯកសារមកកាន់ក្រសួង ប៉ុន្តែរហូតមកទល់ពេលនេះ ក្រសួងមិនទាន់ទទួលបានរបាយការណ៍សិក្សាស្តីពីផលប៉ះពាល់បរិស្ថានរបស់ក្រុមហ៊ុននេះនៅឡើយទេ៕

  • លោក Hudson ជំរុញឲ្យកីឡាករបង្ហាញភាពក្លាហានក្នុងរាត្រីនេះ

    លោក Hudson ជំរុញឲ្យកីឡាករបង្ហាញភាពក្លាហានក្នុងរាត្រីនេះ

    លោក Anthony Hudson គ្រូបង្វឹកនៃក្រុមបាល់ទាត់ជម្រើសជាតិនូវែលសេឡង់ បាននិយាយថា ក្រុមដែលមានរហស្សនាមថា All Whites របស់លោកត្រូវតែមានសេចក្តីក្លាហាន ពេលប៉ះជាមួយនឹងក្រុមខ្លាំងម៉ិកស៊ិក ព្រោះដឹងថា បើពួកគេបរាជ័យនៅរាត្រីនេះ ក្តីសង្ឃឹមរបស់ពួកគេក្នុងយុទ្ធនាការ Confederations Cup នឹងត្រូវបញ្ចប់។

    ការរងបរាជ័យក្នុងលទ្ធផល 2-0 ក្រោមស្នាដៃក្រុមម្ចាស់ផ្ទះរុស្ស៊ី ក្នុងការប្រកួតបើកឆាកនៃពូល A កាលពីថ្ងៃសៅរ៍មានន័យថា ក្រុមម្ចាស់ជើងឯកប្រចាំតំបន់អូសេអានី នូវែលសេឡង់ បច្ចុប្បន្ន មិនដែលស្គាល់ឈ្នះសោះពីការប្រកួត10លើកក្នុងយុទ្ធនាការ Confederations Cup ក្រោយពីបានចាកចេញពីព្រឹត្តិការណ៍នេះកាលពីឆ្នាំ1999-2003 និងឆ្នាំ2009 ដោយមិនទទួលបានលទ្ធផលអ្វីទាំងអស់។

    ចំណែកក្រុមជម្រើសជាតិម៉ិកស៊ិកវិញ ក្រោយពីបានបញ្ចប់ក្នុងលទ្ធផលស្មើ2-2 ជាមួយនឹងក្រុមជម្រើសជាតិព័រទុយហ្គាល់រួចមក ក្រុមនេះកំពុងតែពោរពេញដោយក្តីជឿជាក់ និងត្រូវបានចាត់ទុកថា ជាក្រុមមានប្រៀបក្នុងការឈ្នះលើការប្រកួតនៅទីក្រុង Sochi នៅរាត្រីនេះ។


    ក្រោយពីបានបញ្ចប់ក្នុងលទ្ធផលស្មើក្នុងទីក្រុង Kazan កាលពីថ្ងៃសៅរ៍ លោក Juan Carlos Osorio គ្រូបង្វឹករបស់ក្រុមជម្រើសជាតិម៉ិកស៊ិក បាននិយាយទាំងញញឹមថា៖ «យើងបានជួបការប្រកួតដ៏ស្វិតស្វាញមួយជាមួយនឹងក្រុមម្ចាស់ជើងឯកប្រចាំទ្វីបអឺរ៉ុប ហើយយើងបានធ្វើការការពារ Cristiano Ronaldo ជាប់ទាំងស្រុង»។ ផ្ទុយទៅវិញ ក្រុមជម្រើសជាតិនូវែលសេឡង់ត្រូវតែបញ្ចប់ការមិនអាចរកគ្រាប់បាល់បញ្ចូលទីរបស់ពួកគេឱ្យបាន ដើម្បីទទួលបានឱកាសមួយក្នុងពេលប្រកួតជាមួយនឹងក្រុមម៉ិកស៊ិក។ ក្រោយពីបានចាញ់ក្នុងលទ្ធផល 1-0 ក្នុងការប្រកួតមិត្តភាពក្រោមស្នាដៃក្រុមអៀរឡង់ខាងជើង និងបេឡារុស មុនពេលធ្វើដំណើរទៅរុស្ស៊ីនោះ ក្រុមមានរហស្សនាមថា All Whites បច្ចុប្បន្នមិនទាន់រកបានគ្រាប់បាល់បញ្ចូលទីសោះពីការប្រកួត3លើកចុងក្រោយរបស់ខ្លួន។

    គួរបញ្ជាក់ដែរថា ក្រុមជម្រើសជាតិនូវែលសេឡង់ ធ្លាប់បានចាញ់ក្រុមជម្រើសជាតិម៉ិកស៊ិករួចមកហើយក្នុងលទ្ធផល 2-1 ក្នុងការប្រកួតមិត្តភាព កាលពីខែតុលា ឆ្នាំទៅ។ ការប្រកួតនឹងចាប់ផ្តើមនៅម៉ោង1រំលងអធាត្រ៕
    ប្រភពពី៖ Daily Star

     

  • មិនធម្មតាទេ ឆៃប៉ូវអ្នកស្រុកស្អាងល្បីដល់បរទេស

    មិនធម្មតាទេ ឆៃប៉ូវអ្នកស្រុកស្អាងល្បីដល់បរទេស

    ឆៃប៉ូវ គឺជាអាហារគួបផ្សំមួយប្រភេទ ដែលត្រូវបានច្នៃចេញពីមើមឆៃថាវ និងអាចរក្សាទុកបានយូរ ដែលភាគច្រើនបងប្អូនខ្មែរយើង ដែលកាត់សែស្រឡាយចិនចូលចិត្តធ្វើទុកដើម្បីទទួលទានបានយូរ វាដូចគ្នានឹងប្រហុកផ្អករបស់ខ្មែរយើងដែរ ជាពិសេសគឺទទួលទានជាមួយបបរសនៅពេលព្រឹកតែម្តង។

    អ្នកស្រី ឡាយ គឹមឈន ជាអ្នកលក់ឆៃប៉ូវម្នាក់ក្នុងចំណោមអ្នកលក់ឆៃប៉ូវជាច្រើននៅក្នុងភូមិព្រែកស្នង ឃុំព្រែកគយ ស្រុកស្អាង ខេត្តកណ្តាល បានប្រាប់ថា អ្នកស្រីបានប្រកបមុខរបរនេះជាង 10ឆ្នាំមកហើយ ឆៃប៉ូវដែលលក់នេះ គឺមិនបានទទួលយកពីគេមកលក់បន្តនោះទេ គឺធ្វើដោយខ្លួនឯង ព្រោះចេះធ្វើតៗគ្នាពីឪពុកម្តាយមក ហើយអ្នកនៅទីនេះក៏ដូចគ្នាដែរ គឺក្រៅពីដាក់លក់រាយនៅមុខផ្ទះហើយ នៅបានលក់បោះដុំទៅឱ្យម៉ូយទូទាំង 25រាជធានី-ខេត្តទូទាំងប្រទេស និងបោះឱ្យម៉ូយនៅក្រៅប្រទេសទៀតផង។

    អ្នកស្រីបានបន្ថែមថា វត្ថុធាតុដើមដែលយើងយកមកធ្វើជាឆៃប៉ូវ ជាចម្បងគឺមើមឆៃថាវ អំបិល និងស្ករ ហើយឆៃថាវខែនេះគឺទិញមកពីស្រុកសំឡូត ខេត្តបាត់ដំបង  បើខែកញ្ញាដល់ខែតុលាយើងនាំយកមកពីខេត្តកំពង់ចាម ខេត្តតាកែវ ហើយក៏ទិញនៅក្នុងស្រុកស្អាងកោះធំ ក្នុងខេត្តកណ្តាលនេះមួយចំនួនដែរ។

    ចំណែកឯអ្នកលក់ម្នាក់ទៀតនៅភូមិព្រែកស្នាយ ជាប់ភូមិព្រែកស្នងដែរនោះ គឺលោកហេង ចំរើន បានប្រាប់ឱ្យដឹងស្រដៀងគ្នាដែរថា លោកក៏ធ្វើឆៃប៉ូវនេះលក់ជិត 10ឆ្នាំមកហើយដែរបន្តពីឪពុកម្តាយ។ អ្នកលក់ម្នាក់នេះបាននិយាយថា នៅម្តុំនេះគឺមានអ្នកប្រកបរបរធ្វើឆៃប៉ូវលក់នេះប្រមាណ70% ហើយឆៃប៉ូវគឺ មាន3ប្រភេទ គឺឆៃប៉ូវប្រៃ ឆៃប៉ូវផ្អែម និងឆៃប៉ូវជូរ ហើយបើលក់រាយនៅផ្ទះក្នុង 1ថ្ងៃៗបានប្រមាណជាជាង 200គីឡូក្រាមដែរ ក្រៅពីនោះនៅលក់បោះដុំទៅតាមបណ្តាខេត្តផ្សេងៗ និងរាជធានីភ្នំពេញទៀតផង។

    អ្នកលក់រូបនេះបានប្រាប់ដែរថា សម្រាប់ឆៃប៉ូវផ្អែមបើលក់រាយ 1គីឡូក្រាម 4,000រៀល តែបើបោះដុំ 1គីឡូក្រាមត្រឹមតែ 3,800រៀលប៉ុណ្ណោះ ចំណែកឯឆៃប៉ូវជូរបោះដុំឱ្យម៉ូយ 1គីឡូក្រាម 7,000រៀល និងលក់រាយ 1,0000រៀលក្នុង1គីឡូក្រាម ហើយបើឆៃប៉ូវប្រៃស្ងួតវិញ 1គីឡូក្រាម 3,000រៀល និងសើម 2,000រៀលក្នុង1គីឡូក្រាម។ ក្រៅអំពីម៉ូយក្នុងស្រុក និងអ្នកដំណើរដែលឆ្លងកាត់តាមផ្លូវជាតិលេខ 21 នេះហើយ ក៏នៅមានបងប្អូនមួយចំនួននៅតាមបណ្តាខេត្តផ្សេងៗ និងរាជធានីភ្នំពេញដែរ គឺតែងមកកុម៉្មង់ទិញដើម្បីយកទៅផ្ញើបងប្អូននៅបរទេសជារឿយៗ ផងដែរ ដែលទិញម្តងៗមិនតិចជាង 50ទៅ 100គីឡូក្រាមនោះទេ ព្រោះតែឆៃប៉ូវនៅទីនេះយើងធ្វើតាមគោលការណ៍ធម្មជាតិ មិនប្រើសារធាតុគីមីនោះទេ ហើយជាធម្មតាឆៃប៉ូវផ្អែមគឺអាចរក្សាទុកបានពី 2ទៅ3ខែ ចំណែកឯអាប្រៃវិញទុកបានរហូតដល់1ឆ្នាំឯណោះ។

    អ្នកដំណើរ សេង រ៉ូហ្សា រស់នៅរាជធានីភ្នំពេញដែលបានឈប់រថយន្តទិញឆៃប៉ូវ បានប្រាប់ថា រៀងរាល់ពេលដែលអ្នកស្រីបានមកលេងនៅស្រុកស្អាងនេះ អ្នកស្រីតែងឈប់ទិញឆៃប៉ូវនៅព្រែកស្នាយ និងព្រែកស្នងនេះយកទៅទុកហូបមិនដែលខានឡើយ។ មិនតែប៉ុណ្ណោះនៅឆ្លៀតទិញយកទៅចែកបងប្អូន និងផ្ញើទៅសាច់ញាតិនៅឯបរទេសទៀតផង ព្រោះឆៃប៉ូវនៅទីនេះឆ្ងាញ់ និងមិនប្រើថ្នាំគីមីនាំឱ្យប៉ះពាល់សុខភាពនោះទេ៕

  • Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    Salah ពិនិត្យសុខភាពមុននឹងបំពេញការផ្ទេរពីក្លិប Roma ទៅ Liverpool

    ខ្សែបម្រើស្លាបអន្តរជាតិអេហ្ស៊ីប Mohamed Salah នឹងក្លាយជាកីឡាករចំណូលថ្មីដំបូងគេរបស់លោក Jurgen Klopp ក្នុងរដូវក្តៅនេះ ខណៈដែលខ្សែបម្រើដ៏មានឥទ្ធិពលរូបនេះ បានធ្វើដំណើរទៅដល់ប្រទេសអង់គ្លេស ដើម្បីត្រួតពិនិត្យសុខភាពកាលពីថ្ងៃអង្គារ។

    Salah របស់ក្លិបអ៊ីតាលី Roma អាចនឹងក្លាយជាកីឡាករទីមួយក្នុងចំណោមកីឡាករចំណូលថ្មីទាំង 7នាក់ ដែលនឹងត្រូវទៅចូលរួមនៅកីឡដ្ឋាន Anfield ក្នុងការព្រមព្រៀងគ្នាមួយដែលមានតម្លៃខ្លួនជាបឋមចំនួន 35លានផោន (ស្មើនឹង 44.2លានដុល្លារអាមេរិក) បើទោះបីតម្លៃខ្លួននោះអាចនឹងកើនឡើង បើបូកទាំងប្រាក់ឧបត្ថម្ភផ្សេងៗក៏ដោយ។ ខ្សែបម្រើអន្តរជាតិអេហ្ស៊ីបវ័យ 24ឆ្នាំរូបនេះបានស៊ុតបាល់បញ្ចូលទី15គ្រាប់ និងបានជួយឲ្យមិត្តរួមក្រុមរកបាន 11គ្រាប់ផ្សេងទៀត ខណៈដែលក្រុម Roma បានបញ្ចប់ក្នុងចំណាត់ថ្នាក់លេខ 2ក្នុងក្របខ័ណ្ឌ Serie A នៅរដូវកាលនេះ ហើយការផ្ទេរនេះ នឹងធ្វើឲ្យរូបគេវិលទៅកាន់អង់គ្លេសវិញ ក្រោយពីបានចំណាយពេលមួយរយៈខ្លីក្នុងក្លិប Chelsea នៅចន្លោះឆ្នាំ2014 និងឆ្នាំ2016 ដោយកាលនោះរូបគេបានបង្ហាញខ្លួនត្រឹមតែ 19ប្រកួតប៉ុណ្ណោះ។

    Salah បានយល់ព្រមទៅលើការព្រមព្រៀងគ្នាមួយ ដែលនឹងធ្វើឲ្យរូបគេទទួលបានប្រាក់ចំណូលគុណនឹង 2ដងពោលគឺប្រមាណជា9ម៉ឺនផោន (ស្មើនឹង11.4ម៉ឺនដុល្លារអាមេរិក) ក្នុងមួយសប្តាហ៍។

    ខ្សែការពារ Virgil van Dijk របស់ក្លិប Southampton គឺជាគោលដៅទីមួយរបស់លោក Klopp ប៉ុន្តែ ក្រុមហង្សក្រហមបានបង្ខំចិត្តបោះបង់ការចាប់អារម្មណ៍របស់ពួកគេចោល ក្រោយពីក្លិប Southampton បានប្តឹងតវ៉ាប្រឆាំងនឹង Liverpool ទាក់ទងនឹងការដាក់សំណើមិនស្របច្បាប់៕
    ប្រភពពី៖ Independent

     

  • ផ្ទុះទៀតហើយ! MV «ប្រុសម្នាក់នេះសំខាន់នៅពេលណា» ចម្លងប្លង់បរទេស

    ផ្ទុះទៀតហើយ! MV «ប្រុសម្នាក់នេះសំខាន់នៅពេលណា» ចម្លងប្លង់បរទេស

    គ្រាន់តែ MV មិនទាន់ចេញបានស្រួលបួលប៉ុន្មានផង ស្រាប់តែអ្នកលេងបណ្ដាញសង្គម ហ្វេសប៊ុក ម្នាក់មានឈ្មោះថា ភី ណាត់ បានចូលទៅបញ្ចេញមតិក្នុងទំព័រផ្លូវការរបស់ V Studio ចំពោះវីដេអូបទចម្រៀងដែលមានចំណងជើងថា «ប្រុសម្នាក់នេះសំខាន់នៅពេលណា» ហេតុអ្វីបានជាចម្លងប្លង់ពីបរទេស ព្រមទាំងបង្ហោះរូបភាពកាត់តបទបរទេសចំនួន 4 សន្លឹកជាមួយបទនេះថែមទៀតផង។

    ជាមួយគ្នានេះដែរ គេសង្កេតឃើញថាបទចម្រៀង «ប្រុសម្នាក់នេះសំខាន់នៅពេលណា» ដែលបកស្រាយដោយក្រុមតន្រ្តី Mustache Band ដែលទើបតែចេញវីដេអូចម្រៀងជាផ្លូវការ ក៏ប៉ុន្ដែឃើញមានប្លង់ថតមួយចំនួនស្រដៀងនឹងបទ «Be Together» ច្រៀងដោយ Major Lazer feat. Wild Belle ដែលនេះហើយជាការរិះគន់មួយបានធ្វើឱ្យមានការពន្យល់ពីអ្នកដឹកនាំសម្ដែងវីដេអូចម្រៀងខាងលើ។

    ទន្ទឹមគ្នានោះដែរ ខាង V Studio បានឆ្លើយតបនៅក្នុងគេហទំព័ររបស់ខ្លួនថា “សូមអរគុណច្រើនដែលចោទជាសំណួរក្នុងបញ្ហានេះ។ អ្វីដែលអ្នកបានឃើញនេះ គឺគ្រាន់តែជាវិឌីអូរយៈពេលខ្លីរបស់បទចម្រៀងដែលមានរយៈពេលត្រឹមតែ 55 វិនាទីនៃបទចម្រៀងទាំងមូលតែប៉ុណ្ណោះ។ អ្វីដែលក្រុមការងារយើងខិតខំប្រឹងប្រែងធ្វើនេះគឺដើម្បីធ្វើឱ្យទទួលបាននូវការផលិតដែលល្អឥតខ្ចោះមួយជាមួយនឹងគំនិត ទីតាំង ប្លង់ និង សាច់រឿងដែលមិនធ្លាប់មាននៅក្នុងប្រទេសយើង ដែលជាផ្នែកមួយក្នុងការលើកតម្កើងស្នាដៃក្នុងស្រុកផងដែរ។ ក្រុមការងារយើងសង្ឃឹមថា ភី ណាត់ នឹងយល់អំពីបញ្ហានេះជាជាងវាយតម្លៃ និង សន្និដ្ឋានតាមរយៈពាក្យចចាមអារ៉ាមដែលឃើញត្រឹមតែរូបភាពទាំង4នេះ។ សូមតាមដាននៅលើផេចរបស់យើងជាបន្តដើម្បីដឹងពីការចេញនូវវីឌីអូពេញនៃបទចម្រៀងនេះ”។

    ដើម្បីឱ្យកាន់តែជាក់ច្បាស់ សូមទស្សនាវីដេអូចម្រៀងទាំងមូលខាងក្រោមនេះ ៖ MV  “ប្រុសម្នាក់នេះសំខាន់នៅពេលណា ” ចម្លងប្លង់បរទេស៖

  • Samsung បង្ហាញពីភាពជោគជ័យលើការលក់ Galaxy S8 និង S8Plus

    Samsung បង្ហាញពីភាពជោគជ័យលើការលក់ Galaxy S8 និង S8Plus

    ក្រោយចេញលក់ទូរស័ព្ទ Galaxy S8 និង S8Plus ជាផ្លូវការកាលពីដើមខែឧសភារួចមក ក្រុមហ៊ុន Samsung បានប្រកាសពីភាពជោគ​ជ័យ​ថ្មីមួយ ដោយគិតត្រឹមចុងខែមិថុនា ឆ្នាំ2017​​ នេះ ការលក់របស់ទូរស័ព្ទទាំង 2 ម៉ូដែលបានទទួលការគាំទ្រយ៉ាងច្រើនកុះករពីសំណាក់អ្នកប្រើប្រាស់ជាច្រើនលាននាក់។

    តាមរបាយការណ៍ដែលចេញផ្សាយដោយក្រុមហ៊ុន Samsung កាលពីពេលថ្មីៗនេះបង្ហាញថា ការលក់ Galaxy S8 និង S8Plus បានកើនឡើងដល់ 5 លានគ្រឿងហើយលើទីផ្សារសកល ត្រឹមតែរយៈពេលជិត 2 ខែមកនេះប៉ុណ្ណោះ។ ក្នុងនោះ បើយោងតាមទីផ្សារភាគហ៊ុន Yuanta នៃប្រទេសកូរ៉េ (តាមរបាយការណ៍ The Korea Herald) ក្រុមហ៊ុនបានរំពឹងទុកថា ការលក់នឹងអាចឈានទៅដល់ 50.4 លានគ្រឿង នៅពេញមួយ​ឆ្នាំ 2017 នេះ។ ប្រភពដដែលបានបន្ដទៀតថា ក្នុងចំណោមទូរស័ព្ទទាំង 2 ស៊េរីនេះ ទូរស័ព្ទ S8Plus មានការគាំទ្រច្រើនជាង S8 ធម្មតា ខណៈស្មាតហ្វូននេះ អាចរកចំណូលពីការលក់បានរហូតដល់ 27.1 លានដុល្លាអាមេរិក ស្មើនឹង 54% នៃការលក់សរុប។

    លោក Seungho Choi នាយកគ្រប់គ្រងនៃ Samsung សាខាកម្ពុជា បានឱ្យដឹងបន្ថែមថា សម្ទុះនៃការលក់ទូរស័ព្ទ Galaxy S8 និង S8 Plus មានកម្រិតខ្លាំងនៅតាមខេត្តធំៗក្នុងព្រះរាជាណាចក្រកម្ពុជា លើសពីអ្វីដែលក្រុមហ៊ុនបានរំពឹងទុក។ ភាពខ្លាំងនៃការសម្ពោធទូរស័ព្ទ Galaxy S8 គឺការជឿទុកចិត្តពីអ្នកប្រើប្រាស់ខ្មែរជាច្រើនឆ្នាំមកហើយ។

    ទូរស័ព្ទ Galaxy S8 និង S8 Plus ជាទូរស័ព្ទដំបូងគេដែលត្រូវបានរចនាទ្បើងដោយបំពាក់នូវអេក្រង់ដ៏ធំភ្លឺច្បាស់ល្អ។ គែម​សងខាងនៃទូរស័ព្ទធ្វើពីលោហៈសុទ្ធ និងបំពាក់នូវ Infinity Display ដែលធ្វើឱ្យមានរូបរាងស្អាត និងមានភាពរលោងងា​យ​ស្រួលចាប់កាន់ ដែលវាជាដំណោះស្រាយដ៏វិសេសវិសាលមួយដោយបំពាក់នូវប៊ូតុងដែលបង្កប់ក្នុងអេក្រង់៕

  • កម្ពុជា U17 និងវៀតណាម U17 នឹងប្រើកីឡាករខ្លាំងៗដូចគ្នាពេលល្ងាចនេះ

    កម្ពុជា U17 និងវៀតណាម U17 នឹងប្រើកីឡាករខ្លាំងៗដូចគ្នាពេលល្ងាចនេះ

    ក្រុមបាល់ទាត់ជម្រើសជាតិកម្ពុជា អាយុក្រោម 17ឆ្នាំ និងក្រុមជម្រើសជាតិវៀតណាមអាយុក្រោម 17ឆ្នាំ សុទ្ធសឹងប្តេជ្ញាថា នឹងប្រឹងឲ្យអស់ពីលទ្ធភាពដូចគ្នា នៅពេលដែលក្រុមទាំងពីរជួបគ្នាក្នុងការប្រកួតមិត្តភាពអន្តរជាតិនៅកីឡដ្ឋានជាតិអូឡាំពិក ក្នុងទីក្រុងភ្នំពេញនៅថ្ងៃនេះចាប់ពីម៉ោង 6:30ល្ងាចតទៅ។ នេះបើយោងទៅតាមការបញ្ជាក់ពីគ្រូបង្វឹកនៃក្រុមទាំងពីរកាលពីថ្ងៃម្សិលមិញ។

    នៅមុនពេលការប្រកួតមិត្តភាពអន្តរជាតិនៅល្ងាចនេះ ដើម្បីអបអរដល់ខួបទី 50ឆ្នាំនៃទំនាក់ទំនងការទូតរវាងកម្ពុជា និងវៀតណាម ទាំងលោក Inoue Kazunori គ្រូបង្វឹករបស់កម្ពុជា និងលោក Dinh The Nam គ្រូបង្វឹករបស់វៀតណាម បានអះអាងដូចគ្នាថា លោកនឹងប្រើប្រាស់ក្រុមជម្រើសដំបូងដែលប្រជុំដោយកីឡាករឆ្នើមៗ បើទោះបីវាគ្រាន់តែជាការប្រកួតមិត្តភាពក៏ដោយ។

    គ្រូបង្វឹកសញ្ជាតិជប៉ុន Kazunori របស់ក្រុមកម្ពុជា អាយុក្រោម 17ឆ្នាំ បានប្រាប់អ្នកយកព័ត៌មានក្នុងសន្និសីទសារព័ត៌មានមួយកាលពីថ្ងៃម្សិលមិញថា៖ «ពិតណាស់ យើងត្រៀមលក្ខណៈរួចរាល់ហើយថា យើងនឹងប្រើប្រាស់ក្រុមខ្លាំងរបស់យើង បើទោះបីវាគ្រាន់តែជាការប្រកួតមិត្តភាពក៏ដោយ។ យើងនឹងប្រើប្រាស់កីឡាករខ្លាំងៗដើម្បីសាកល្បងទៅលើកម្រិតការលេងរបស់យើង»។

    ជាមួយគ្នានេះដែរ លោក Dinh The Nam គ្រូបង្វឹករបស់ក្រុមវៀតណាមអាយុក្រោម17ឆ្នាំ ក៏បានអះអាងក្នុងសន្និសីទសារព័ត៌មានដូចគ្នាផងដែរថា៖ «យើងនឹងប្រើប្រាស់ក្រុមខ្លាំងរបស់យើង។ យើងនឹងប្រឹងឲ្យអស់ពីសមត្ថភាពរបស់យើង ហើយជាការរំពឹងទុក ក្រុមទាំងពីរនឹងបង្ហាញពីទម្រង់លេងយ៉ាងល្អ ក៏ដូចជាការផ្តល់ភាពរំភើបដល់អ្នកគាំទ្រទាំងអស់ដែរ»។

    ក្រុមទាំងពីរធ្លាប់បានជួបគ្នាមួយលើករួចមកហើយក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ AFF U-16 Youth Championship ឆ្នាំ2016 ដោយកាលនោះកម្ពុជាU16 បានចាញ់នៅលើទឹកដីខ្លួនក្នុងលទ្ធផល 1-០៕

  • មេរបស់ Nokia ស្នើសុំលុបកូដ Nokia 9 ដែលមាន Ram 4GB ចោល

    មេរបស់ Nokia ស្នើសុំលុបកូដ Nokia 9 ដែលមាន Ram 4GB ចោល

    កាលពីពេលថ្មីៗនេះ ក្រុមហ៊ុន HMD ដែលជាមេរបស់ Nokia បានស្នើឱ្យស្ថាប័ន FFC លុបលេខកូដទូរស័ព្ទ Nokia 9 ដែលមាន Ram ទំហំ 4 GB ចេញវិញ ខណៈក្រុមហ៊ុនមួយនេះ បញ្ជាក់ថា ទំហំប៉ុនហ្នឹងវាតូចពេក មិនអាចបំពេញតម្រូវការអ្នកប្រើប្រាស់បានគ្រប់គ្រាន់ទេ។

    តាមការបង្ហាញរបស់បណ្ដាញព័ត៌មាន Geekbench បានឱ្យដឹងថា លេខកូដដែលទូរស័ព្ទ Nokia 9 ទទួលបានគឺ TA-1004 តែឥឡូវវាបានផ្លាស់ប្ដូរមកជា TA-1012 វិញហើយ ក្រោយពីមានការស្នើសុំលុបរួចមក។ សម្រាប់លេខកូដថ្មីនេះ នឹងមាន Ram 2 ជម្រើសសម្រាប់អ្នកប្រើប្រាស់ គឺ Ramទំហំ 6GB និង 8GB ដោយប្រើនូវបន្ធះឈីប Qualcomm Snapdragon 835។

    Nokia 9 អាចនឹងប្រើប្រាស់កញ្ចក់អេក្រង់កម្រិត QHD Display ទំហំ 5.2 អ៊ីញជាមួយសមត្ថភាពបង្ហាញកម្រិត 1440x2560px, បំពាក់កាមេរ៉ាក្រោយ 2 គ្រាប់ទំហំ 13MP និងដំណើរការដោយ Android 7.0 Nougat៕

     

     

     

  • ក្រុមហ៊ុនចិន ចង់វិនិយោគលើវិស័យថាមពលស្អាត និងសង់មន្ទីរពេទ្យធំមួយនៅកម្ពុជា

    ក្រុមហ៊ុនចិន ចង់វិនិយោគលើវិស័យថាមពលស្អាត និងសង់មន្ទីរពេទ្យធំមួយនៅកម្ពុជា

    ភ្នំពេញៈ សាជីវកម្មធំមួយដែលមានមូលដ្ឋាននៅប្រទេសចិន បានបង្ហាញពីបំណងធ្វើការវិនិយោគលើវិស័យថាមពលស្អាត និងសាងសង់មន្ទីរពេទ្យដ៏ធំមួយនៅកម្ពុជា ជាការវិនិយោគមួយដែលឆ្លើយតបទៅនឹងតម្រូវការជាក់ស្តែង និងការអភិវឌ្ឍនៅកម្ពុជា។

    លោក វ៉ាង ជីនហ្វេង អនុប្រធានសាជីវកម្មវិស្វកម្ម ZhengYuan នៃក្រុមហ៊ុន CNNC របស់ចិនបានជម្រាបនូវព័ត៌មាននេះជូនដល់លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងបានថ្លែងអំណរគុណ ដល់ឯកឧត្តមរដ្ឋមន្ត្រី ដែលតែងតែទទួលជួបថ្នាក់ដឹកនាំរបស់ក្រុមហ៊ុនចិនក្នុងឱកាសរៀបចំវេទិកាជំរុញពាណិជ្ជកម្មកន្លងមក ដែលបានផ្ដល់នូវទំនុកចិត្តក្នុងការចូលមកវិនិយោគនៅកម្ពុជា។

    លោក វ៉ាង គ្រោងនឹងចុះហត្ថលេខាលើអនុស្សរណៈនៃការយោគយល់គ្នាមួយជាមួយក្រសួងពាក់ព័ន្ធរបស់កម្ពុជា ដើម្បីអភិវឌ្ឍធនធានមនុស្សក្នុងវិស័យថាមពលស្អាត (Clean Energy) និងថាមពលនុយក្លេអ៊ែរ។ ក្រុមហ៊ុននឹងសហការជាមួយក្រុមហ៊ុននៅកម្ពុជាសាងសង់មន្ទីរពេទ្យដ៏ធំមួយនៅកម្ពុជា ដែលមានលទ្ធភាពព្យាបាលជំងឺមហារីក ដោយប្រើបច្ចេកវិទ្យានុយក្លេអ៊ែរទៀតផង។

    ក្នុងជំនួបនោះលោករដ្ឋមន្ត្រីបានស្វាគមន៍គម្រោងវិនិយោគដ៏ធំនេះ និងបានជម្រាបសង្ខេបអំពីគោលនយោបាយជំរុញពាណិជ្ជកម្ម និងវិនិយោគនៅកម្ពុជា ជាពិសេសវិនិយោគមកពីប្រទេសមហាមិត្តចិន ដោយស្វាគមន៍រាល់ការមកចូលធ្វើពាណិជ្ជកម្ម និងវិនិយោគនៅកម្ពុជា។ ឯកឧត្តមរដ្ឋមន្ត្រី បានស្វាគមន៍ និងត្រៀមជួយដល់ការមកធ្វើពាណិជ្ជកម្ម និងវិនិយោគ ជាពិសេសផ្នែកសុខាភិបាល ដែលនឹងជួយដល់ប្រជាជនកម្ពុជាទាំងមូល៕

     

  • បណ្ឌិត តាន់ មុនីវណ្ណ ៖ ការតាំងចិត្តខ្ពស់ជាចំណុចខុសគ្នារវាងអ្នកជោគជ័យ និងបុគ្គលធម្មតា

    បណ្ឌិត តាន់ មុនីវណ្ណ ៖ ការតាំងចិត្តខ្ពស់ជាចំណុចខុសគ្នារវាងអ្នកជោគជ័យ និងបុគ្គលធម្មតា

    ជាសហគ្រិនកម្ពុជាប្រកបដោយភាពជោគជ័យម្នាក់ លោកបណ្ឌិត តាន់ មុនីវណ្ណ បានកសាងខ្លួនពីកូនអ្នកក្រម្នាក់នៅជនបទក្រោយបញ្ចប់សម័យប៉ុលពត ក្លាយមកជានិស្សិតច្បាប់ ជាអ្នកជំនាញពាណិជ្ជកម្ម និងអ្នកជំនួញ។

    បណ្ឌិត តាន់ មុនីវណ្ណ បានថ្លែងនៅក្នុងវេទិកា “មាគ៌ាឆ្ពោះទៅរកភាពជាបុគ្គលឆ្នើម” ថា លោកតែងតែប្រកាន់ថា ការតាំងចិត្តខ្ពស់អាចធ្វើឱ្យមនុស្សទទួលបានជោគជ័យក្នុងជីវិត ហើយការខិតខំប្រឹងប្រែងអាចនឹងធ្វើឱ្យមនុស្សទទួលបានលទ្ធផលល្អហួសពីការស្មានទុក។ លោកបានបញ្ជាក់ផងដែរថា កាលពីពេលដែលលោកនៅក្មេង លោកស្រមៃថាលោកនឹងរៀនចប់ត្រឹមបាក់ឌុបតែប៉ុណ្ណោះ ព្រោះបាក់ឌុបសម័យនោះមានតម្លៃធំខ្លាំងណាស់ តែក្រោយពេលដែលលោកខិតខំប្រឹងប្រែងពីមួយដំណាក់កាលទៅមួយដំណាក់កាល លោកបានឈានជើងមកទទួលបានងារបណ្ឌិតមួយចំនួននាពេលបច្ចុប្បន្ននេះ។

    ការតាំងចិត្ត និងការខិតខំប្រឹងប្រែងរបស់មនុស្ស ពិតជាមានសារៈសំខាន់ខ្លាំងណាស់ តែបើគ្រាន់តែមានការតាំងចិត្តនោះ មិនទាន់គ្រប់គ្រាន់ទេ វាត្រូវការវិធីសាស្រ្តដើម្បីទទួលយកវា។ បង្ហាញពីចំណុចនេះលោក មុនីវណ្ណ បានសង្កត់ធ្ងន់លើការប្រឹងប្រែង និងការជឿជាក់លើភាពវិជ្ជមាន រួមទាំងការខិតខំប្រឹងប្រែងពិចារណាឱ្យអស់លទ្ធភាពលើរឿងណាមួយដែលកើតឡើងនៅក្នុងជីវិត។

    លោកបណ្ឌិត តាន់ មុនីវណ្ណ បាននិយាយថា៖ «ខ្ញុំតែងតែគិតឱ្យបានច្បាស់លាស់បំផុត មុនពេលវិនិច្ឆ័យលើរឿងអ្វីមួយក្នុងជីវិតការងារ និងការសិក្សាជាដើម»។

    លោកបានបន្ថែមទៀតថា ការតាំងចិត្ត និងការវិនិច្ឆ័យច្បាស់លាស់ ជាវិធីសាស្រ្តមួយដែលធ្វើឱ្យមនុស្សរីកចម្រើន ហើយក៏ជាចំណុចមួយដែលលោកយកចិត្តទុកដាក់បំផុត ព្រោះការវិនិច្ឆ័យខុស វាអាចធ្វើឱ្យមនុស្សស្តាយក្រោយ។ គ្រប់ពេលដែលលោកមើលឃើញរឿងអ្វីមួយ ឬស្តាប់នូវយោបល់ណាមួយ លោកគ្រាន់តែស្តាប់តែប៉ុណ្ណោះ បន្ទាប់មកលោកធ្វើការវិនិច្ឆ័យដោយគិតឱ្យបានល្អិតល្អន់បំផុតមុននឹងឆ្លើយតប ឬធ្វើសកម្មភាពណាមួយ។ ការគិតច្បាស់លាស់នេះហើយ ទើបធ្វើឱ្យលោកហ៊ានសម្រេចចិត្ត ហើយធ្វើការតាំងចិត្តខ្ពស់ដើម្បីធ្វើអ្វីមួយប្រកបដោយភាពច្បាស់លាស់ និងល្អិតល្អន់។

    ចំណុចសំខាន់មួយផ្សេងទៀតដែលជាចំណុចអប់រំសម្រាប់បុគ្គលិក និងយុវជនកម្ពុជា គឺការខិតខំឱ្យអស់ពីសមត្ថភាពប្រកបដោយភាពវៃឆ្លាត និងមានគំនិតច្នៃប្រឌិតខ្ពស់។

    លោក មុនីវណ្ណ បានបញ្ជាក់ថា ការដែលបុគ្គលម្នាក់អាចឡើងតំណែងបាន ឬអាចក្លាយជាមនុស្សដែលអ្នកគ្រប់គ្រងពេញចិត្ត គឺពួកគាត់មានការតាំងចិត្តដែលពោរពេញទៅដោយថាមពល។ នៅពេលដែលមានគម្រោងមួយត្រូវធ្វើ ឬមានភារកិច្ចត្រូវអនុវត្តសូមខិតខំឱ្យអស់ពីលទ្ធភាពដើម្បីដោះស្រាយវា នៅពេលនោះបើយើងធ្វើមិនកើត អ្នកផ្សេងក៏ពិបាកធ្វើកើតដែរ។

    លោកបានបញ្ជាក់ថា ការខិតខំរបស់យើងក្នុងការបញ្ចេញសកម្មភាពការងារនេះ ជាកត្តាជំរុញខ្លាំងមួយដែលធ្វើឱ្យអ្នកគ្រប់គ្រងចាប់អារម្មណ៍ ហើយការខិតខំនេះក៏ត្រូវមានភាពវៃឆ្លាតផងដែរ។ សូមកុំធ្វើការងារតែម្នាក់ឯង តែត្រូវចេះរកជំនួយពីអ្នកជុំវិញខ្លួន ឬអ្នកជំនាញលើផ្នែកដែលខ្លួនមិនទាន់យល់ច្បាស់ នៅពេលនោះយើងនឹងទទួលបានលទ្ធភាពការងារខ្ពស់ ហើយវាក៏បង្ហាញពីលទ្ធផលនៃការតាំងចិត្តប្រកបដោយភាពឆ្លាតវៃផងដែរ៕