Category: សង្គម និងសេដ្ឋកិច្ច

ភ្នំពេញៈ មេដឹកនាំកម្ពុជា-វៀតណាម បានខិតខំជំរុញធ្វើយ៉ាងណាឲ្យទំហំពាណិជ្ជកម្មទ្វេភាគីសម្រេចបាន 5ពាន់លានដុល្លារអាមេរិក នៅក្នុងពេលឆាប់ៗខាងមុខនេះ។

លោក ថាច់ យ៉ឺ ឯកអគ្គរដ្ឋទូតវៀតណាមប្រចាំកម្ពុជា បានបញ្ជាក់ក្នុងពិធីអបអរសាទរខួបអនុស្សាវរីយ៍លើកទី50 ថ្ងៃបង្កើតទំនាក់ទំនងការទូតកម្ពុជា-វៀតណាម (24 មិថុនា ឆ្នាំ1967-24 មិថុនា ឆ្នាំ2017) នាយប់ថ្ងៃទី22 ខែមិថុនាម្សិលមិញនេះថា កិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរមានការរីកចម្រើនយ៉ាងឆាប់រហ័ស និងមកដល់ពេលនេះវៀតណាមបានក្លាយជាដៃគូសេដ្ឋកិច្ចមួយក្នុងចំណោមដៃគូសេដ្ឋកិច្ចចម្បងរបស់កម្ពុជា។
ក្នុងឆ្នាំ2016 ទំហំពាណិជ្ជកម្មរវាងប្រទេសទាំងពីរ បានកើនឡើងជិតដល់ 3ពាន់លានដុល្លារអាមេរិក ហើយភាគីទាំងពីរបានឯកភាពគ្នាថា នឹងខិតខំជំរុញ ដើម្បីឱ្យទំហំពាណិជ្ជកម្មទ្វេភាគីអាចសម្រេចបានដល់ 5ពាន់លានដុល្លារអាមេរិក នៅក្នុងពេលឆាប់ៗខាងមុខ។

សេដ្ឋវិទូ ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា លោកជឿថាពាណិជ្ជកម្មរវាងកម្ពុជា-វៀតណាម និងជាមួយប្រទេសក្នុងតំបន់ដទៃទៀតនឹងបន្តរីកចម្រើនទៅមុខ ប៉ុន្តែបើគិតពីការនាំចូលវិញ គឺកម្ពុជាបាននាំចូលទំនិញពីប្រទេសថៃច្រើនជាងវៀតណាម។ លោកបន្តថា មានការលើកឡើងពីអ្នកជំនាញនៃមូលនិធិរូបិយប័ណ្ណអន្តរជាតិថា ប្រទេសដែលស្ថិតនៅក្បែរប្រទេសជឿនលឿននឹងទទួលបានភាពជឿនលឿនផងដែរ ដោយសារតែការទទួលបានឥទ្ធិពលវិជ្ជមានពីប្រទេសទាំងនោះ។

លោកបន្តថា “គំនិតធំនៅក្នុងការធ្វើពាណិជ្ជកម្មជាមួយប្រទេសក្នុងតំបន់គឺ ធ្វើយ៉ាងណាឲ្យមានទំនាក់ទំនងល្អជាមួយគ្នា ហើយទំហំសេដ្ឋកិច្ចតូចឬធំជារឿងធម្មតា”។ លោកបន្តថា “យើងមានវត្ថុធាតុដើម ប៉ុន្តែយើងមិនអាចកែច្នៃបាន ហេតុនេះយើងត្រូវពឹងប្រទេសជិតខាងដែលមានកន្លែងកែច្នៃ មានកំពង់ផែជិតដែលធ្វើឲ្យតម្លៃដឹកជញ្ជូនទាបជាងយើង”៕

កន្លងមកគេធ្លាប់តែឃើញកញ្ញាស៊ឹម ស្រីមុំ ស្លៀកពាក់សុភាពៗ មិនថាជីវិតក្នុងឆាក ឬក្រៅឆាកសម្ដែងនោះទេ តែថ្មីៗនេះនាងបានធ្វើឱ្យមហាជន ពិសេសប្រុសៗតែម្តង នាំគ្នាជ្រួលជ្រើមបន្ទាប់ពីបានឃើញនាងស្លៀកឈុតហែលទឹកបង្ហាញសាច់ឈរនៅមាត់សមុទ្រ។

អ្នកដែលចូលចិត្ដបទរបស់លោកខេម ដែលមានចំណងជើងថា៖ «ខា្លចហើយលុយ» ប្រាកដជាចាំមុខតារាសម្ដែងស្រីរូបនេះមិនខាន។ ម៉េចដែរ! តើការសម្ដែងនៅក្នុងបទចម្រៀងនោះចរិតឫកពាសុភាពរាបសារទេ?  អ៊ីចឹងហើយទើបគេមិននឹកស្មានថា កញ្ញាស៊ឹម ស្រីមុំ ហ៊ានលេងខ្លួនឡើងកប់ស៊េរីដូចនារីអឺរុបបែបនេះសោះ។ ជាមួយគ្នានេះដែរ គេបានចាប់អារម្មណ៍នូវសំដីរបស់នាងដែលនិយាយថា៖ «ចូរដាស់តឿនខ្លួនឯងថា អ្វីដែលគេធ្វើកើត យើងក៏ធ្វើកើតដែរ ការងារច្រើន ការងារធ្ងន់ ខ្ញុំមិនខ្លាចទេ ខ្ញុំខ្លាចតែអត់ការងារធ្វើ»។

តាមរយៈឃ្លាទាំងនេះគេសន្និដ្ឋានថា តារាសម្ដែងដែលធ្លាប់តែស្លៀកពាក់សុភាព រម្យទមនោះ ទំនងជាកំពុងតែចង់ផ្លាស់ប្ដូរស្ទីលការតុបតែងខ្លួនហើយ ព្រោះឃើញតារាជាច្រើនហ៊ានចំណាយភាពសិចស៊ីបង្អួតមហាជនតាមរយៈការសម្ដែងហើយទទួលបានជោគជ័យ។

កញ្ញាស៊ឹម ស្រីមុំ បញ្ជាក់ថា នាងគ្មានបំណងចង់បញ្ចេញភាពសិចស៊ីបង្អួតនរណាទេ ការស្លៀកឈុតប៊ីគីនីនេះ គឺនាងស្លៀកនៅពេលទៅហែលទឹកសមុទ្រ  ពោលគឺក្នុងតែគ្រាដែលនាងប្រើជីវិតឯកជនដើម្បីសប្បាយរីករាយជាមួយនឹងមិត្ដភ័ក្ដិប៉ុណ្ណោះ។ នាងបន្ដថា នាងពុំមានអារម្មណ៍ខ្មាស់អៀនអ្វីទេ ព្រោះនៅមាត់សមុទ្រ ភាគច្រើនគេស្លៀកអ៊ីចឹង បើអ្នកណាគេមិនហ៊ានស្លៀកឈុតហែលទឹក គេក៏ស្លៀកជិតៗទៅ ជាសិទ្ធិរបស់គេតើ!។

តារាសម្ដែងរូបនេះបញ្ជាក់ថា ទោះជានាងគ្មានចេតនាបង្អួតភាពសិចស៊ីទៅកាន់មហាជនពិតមែន ប៉ុន្ដែប្រសិនបើមានអ្នកដឹកនាំរឿងណាមានចំណាប់អារម្មណ៍លើនាង  តម្រូវឱ្យនាងលេងស្ទីលសិចស៊ីបែបនេះ ឬឈុតស្នេហាក្នុងរឿងណាមួយ គឺនាងអាចធ្វើបាន។ ស្រីមុំ បញ្ជាក់ថា៖ «កន្លងមកដោយសារតែមានកិច្ចការផ្ទាល់ខ្លួនរវល់ច្រើន ទើបខ្ញុំមិនទាន់ទទួលយកការងារសម្ដែងភាពយន្ដច្រើន ព្រោះខ្លាចខូចការងារគេ ប៉ុន្ដែពេលនេះខ្ញុំអាចទទួលយកការងារសម្ដែងបានពេញទំហឹងហើយ ដូច្នេះប្រសិនបើមានរឿងណាតម្រូវឱ្យសម្ដែងឈុតសិចស៊ីនោះខ្ញុំក៏ចង់ភ្លក្សរសជាតិនៃការសម្ដែងបែបហ្នឹងដែរ ព្រោះធ្លាប់តែសម្ដែងសុភាពៗមករហូតហើយ»៕

ភ្នំពេញ៖ ជា​កូន​កសិករ​រស់​នៅ​ទី​ជនបទ​ដាច់​ស្រយាល ដែល​ពី​តូច​ដើរ​លក់​នំបុ័ង​ដើម្បី​យក​លុយ​ទៅ​រៀន លោក​ឧកញ៉ា ហួត អៀងតុង បាន​ខិត​ខំ​តស៊ូ​ព្យាយាម​យ៉ាង​ខ្លាំង ​គួបផ្សំ​នឹង​ឱកាស​ហុច​ឱ្យ​ផង​នោះ លោក​ក៏​បាន​អភិវឌ្ឍន៍​ខ្លួន​បន្តិច​ម្តងៗ​ពី​បាត​ដៃ​ទទេ រហូត​ក្លាយ​ជា​ប្រធាន​អគ្គ​នាយក​គ្រឹះស្ថាន​មីក្រូ​ហិរញ្ញវត្ថុ ហត្ថា​កសិករ លីមីតធីត និង​ជា​ប្រធាន​សមាគម​មីក្រូ​ហិរញ្ញវត្ថុ​កម្ពុជា។

ពាក់ព័ន្ធ​នឹង​ប្រវត្តិ​ដ៏​កំសត់​នេះ ​អ្នក​យក​ព័ត៌មាន​ ​ឡារ៉ែន ​បាន​ជួប​សម្ភាសន៍​ជា​មួយ​លោក​ឧកញ៉ា ដែល​ស្តាប់​ទៅ​សឹង​មិន​គួរ​ឱ្យ ប៉ុន្តែ​យ៉ាង​ណា​ក៏​ដោយ​លោក​ឧកញ៉ា​បញ្ជាក់​ថា៖​ “​មិន​គួរ​ឱ្យ​ជឿ​យ៉ាង​ម៉េច បើ​ខ្ញុំ​មាន​ប្រវត្តិ​កំសត់​ដូច្នេះ​មែន​នោះ”។ លោក​ឧកញ៉ា ហួត អៀងតុង ចាប់​កំណើត​ក្នុង​ឆ្នាំ 1968 ក្នុង​ភូមិ​លាច ឃុំ​លាច ស្រុក​ភ្នំក្រវាញ ខេត្តពោធិ៍សាត់ ដោយ​មាន​ឪពុក​ជា​គ្រូ​បង្រៀន និង​ម្តាយជា​កសិករ។ ក្នុង​ចំណោម​បង​ប្អូន​ចំនួន ​5​នាក់ លោក​គឺ​ជា​កូន​ទី2 ដែល​មាន​បងស្រី​តែ​ម្នាក់​គត់ ​អាច​ជួយ​ធ្វើ​ការ​ទំនុក​បម្រុង​ក្នុង​គ្រួសារ​ជាមួយ​ម្តាយ។ បន្ទាប់​ពី​ចាប់​កំណើត​មិនទាន់បាន​ដឹង​ក្តី​ផង សង្គ្រាម​បង្ហូរ​ឈាម​រវាង​ខ្មែរ​នឹង​ខ្មែរ​ក៏​បាន​ផ្ទុះ​ឡើង​ ដែល​នៅ​ពេល​នោះជីវិត​កាន់​តែ​កម្សត់​បាន​ធ្លាក់​មក​លើ​​កុមារ​ អៀងតុង ព្រោះ​លោក​ឪពុក​ត្រូវ​ពួក​ខ្មែរ​ក្រហម​យក​ទៅ​សម្លាប់​ចោល ចំណែក​ម្តាយ​ និង​បងប្អូន​ទាំង ​5​នាក់ ត្រូវ​ជម្លៀស​ឱ្យ​ទៅ​នៅ​កន្លែង​ដែល​ជីតា​រស់​នៅ​គឺ​ក្នុង​ឃុំ​ស្យា ស្រុក​កណ្តៀង ខេត្ត​ពោធិ៍សាត់។ យ៉ាង​ណា​ក៏​ដោយ​សារ​នៅ​វ័យ​ក្មេង​ពេក​ ពេល​នោះ​កុមារ អៀងតុង ​មិន​សូវ​បាន​ចាំ​ពី​ការ​លំបាក​ទេ ប៉ុន្តែ​អ្វី​ដែល​រូប​គេ​ចាំ​មិន​ភ្លេច​នោះគឺ​៖ “នា​សម័យ​នោះ​ គេ​មិន​ឱ្យ​ខ្ញុំ​ហូប​គ្រប់​គ្រាន់ទេ ​ជា​ហេតុ​ធ្វើ​ឱ្យ​ខ្ញុំ​​​តែង​លួច​រត់​ចេញ​ពី​កង​កុមារ​ទៅ​រក​ជីតា​ចាស់​ជរា​នៅ​ផ្ទះ​ ហើយ​ទៅ​​ចាប់​ត្រី​ក្នុង​បឹង​ដើម្បី​យក​មក​ឱ្យ​ជីតា​ធ្វើ​ម្ហូប​ឱ្យ​ហូប”។

ព្រលឹម​បាត់​ព្រលប់​មក​ដល់​ ធ្មេច​បើកៗ​ឆ្នាំ​1979 បាន​មក​ដល់ ប្រទេស​ក៏​ត្រូវ​បាន​រំដោះ​ ពេល​នោះ​លោក​ត្រូវ​​ចូល​រៀន តែ​ម្តាយ​ត្រូវ​ត្រឡប់​ទៅ​នៅផ្ទះ​វិញ​ជាមួយ​បង​ប្អូន។ ដូច្នេះ​​កុមារ អៀងតុង ត្រូវ​នៅ​ជាមួយ​ម្តាយ​មីង​នៅ​ទីនោះ​​ដើម្បី​ចុះ​ឈ្មោះ​ចូល​រៀន។ ការ​រស់​នៅ​ជា​មួយ​ម្តាយ​មីង គឺ​លោក​ត្រូវ​ជួយ​ធ្វើ​ការ​សព្វ​បែប​យ៉ាង​នៅ​ក្នុង​ឡ​នំបុ័ង​ ដោយ​​ក្រៅពី​ជួយ​​កិន​ម្សៅ ​ហើយ​នោះ​កុមារា អៀងតុង ត្រូវ​ងើប​ពី​ដំណេក​នៅ​ម៉ោង​​1 ​ឬ2​រំលង​អធ្រាត្រ​ជា​រៀង​រាល់​ថ្ងៃ ​​ដើម្បី​ជួយ​ដុត​ភ្លើង​ឡ​​នំបុ័ង។ នៅ​ជា​មួយ​ម្តាយ​មីង ដោយ​សារ​តែ​ជីវភាព​គ្រួសារ​ខ្សត់​​ខ្សោយ​ដែរ​នោះ គាត់​បាន​ត្រឹម​តែ​ផ្គត់​ផ្គង់​​បាយ​ទឹកប៉ុណ្ណោះ ដោយ​​មិន​មាន​លុយ​ផ្តល់​ឱ្យ​សម្រាប់​ទៅ​រៀន​នោះ​​ទេ ដូច្នេះ​កុមារ អៀងតុង ត្រូវ​ដើរ​ទូល​នំបុ័ង​លក់​ជា​រៀង​រាល់​ថ្ងៃ ដើម្បី​បាន​លុយ​ញ៉ាំទឹកកក​ឈូស​ និង​ទិញ​អន្សម​អាំង​ញ៉ាំ ហើយ​នឹង​សន្សំ​ទុកខ្លះ​សម្រាប់​​ទិញ​សៀវភៅ​ និង​សម្លៀក​បំពាក់​​។

លោក​ឧកញ៉ា​ បាន​រំលឹក​ថា​៖ “ពេល​​នោះដើម្បី​បាន​លុយ​ទៅ​រៀន ខ្ញុំ​ត្រូវ​ដើរ​ទូល​នំបុ័ង​លក់​មួយ​ថ្ងៃ​ឱ្យ​បាន​20​​ ព្រោះ​​​នំ​10​ចំណេញ​បាន​ 2​រៀល ហើយ​នំ​20 ​ចំណេញ​បាន​4​រៀល ដូច្នេះ​ខ្ញុំ​ចាយ​ 2រៀល​ ទុក​2រៀល​សន្សំ​ទិញ​​សៀវភៅ​ និង​ខោអាវ។ កាល​នោះ​​ខ្ញុំ​ចាំ​បាន​ថា ខ្ញុំ​ចូល​ចិត្ត​ញ៉ាំ​បបរ ទឹកកក​ឈូស និង​អន្សមអាំង ដោយ​​អន្សម​​អាំង​មួយ​ថ្លៃ​5​កាក់ ហើយ​ទឹកកក​ឈូស​មួយ​កែវ​​ថ្លៃ​ 5កាក់​ដែរ។ ដោយ​សារ​មាន​អនុស្សាវរីយ៍​បែប​នេះ ទើប​​​​បច្ចុប្បន្ន​ខ្ញុំ​តែង​ទិញ​នំ​អន្សម​​ច្រើនៗ ​យក​មក​ចែកឱ្យ​​បុគ្គលិក​ហូប ទោះ​ហូប​មិន​អស់​ក៏​ទិញ​ច្រើន​ដែរ ព្រោះ​​អន្សម​អាំង​នឹង​ហើយ​ដែល​រួម​ចំណែក​ជួយ​ឱ្យ​ខ្ញុំ​មាន​ថ្ងៃ​នេះ”។

ងាក​មក​ការ​សិក្សា​ដោយ​សារ​វ័យ​កាន់​តែ​ច្រើន នៅ​សម័យ​នោះ​លោកគ្រូ​បាន​តម្រូវ​ឱ្យ​សិស្ស​រៀន​ផ្លោះ​ជា​ច្រើ​នថ្នាក់​ដើម្បី​តាម​ឱ្យទាន់​កម្មវិធី ហើយ​មិនបាន​ប៉ុន្មាន​ផង លោក​ក៏បាន​ជាប់​អាហា​រូបករណ៍​ទៅ​រៀន​នៅ​វិទ្យាល័យ​នេតយ៉ង់ (ខេត្ត​បាត់ដំបង) ដោយ​ត្រូវ​វេច​បង្វិច​ចេញ​ពី​ផ្ទះ​ម្តាយ​មីង​ទៅ​​ស្នាក់​នៅ​រៀន​សូត្រ​ក្នុង​វិទ្យា​ល័យ​​។ លោក​បាន​បន្ត​ថា លោក​ហាក់​ដូចជា​មាន​សំណាង​ដែរ ដែល​បាន​ជាប់​អាហារូបករណ៍​ក្នុង​ចំណោម​​សិស្ស ​​100​នាក់ ចេញ​ពី​អនុវិទ្យាល័យ​ពោធិ៍សាត់។
​
ឧកញ៉ាថ្លែងថា៖ “បន្ទាប់​ពី​បាន​ទៅ​បន្ត​ការ​សិក្សា​​​ អ្វី​ដែល​កម្សត់​នោះ​ គឺ​កន្លែង​គេង​ចង្អៀត​ ហើយ​ត្រូវ​គេង​លើ​តុ​ស្ទើរ​រាល់​យប់ ចំណែក​​ម្ហូប​អាហារ​គឺ​ហូប​គ្រាន់តែ​កុំឱ្យ​ឃ្លាន​ប៉ុណ្ណោះ មិនមាន​អនាម័យ​​ទេ ត្បិត​ថា​ស្ពៃ​ដែល​គេ​យក​មក​ស្ល​មិនមាន​ជាតិ​គីមី ប៉ុន្តែ​មាន​សុទ្ធ​តែ​ចៃ​ ពេល​ស្ល​ហើយ​អណ្តែត​​ពេញ​ឆ្នាំង ទាល់​តែ​យក​វែក​ដួស​ចេញ​ទើប​អាច​ហូប​បានរីឯ​អង្ករ​ គឺ​អង្ករ​លិច​ទឹក​ក្រហម​ពេញ​ឆ្នាំង​តែ​ម្តង។ តែ​ទោះ​បី​ជា​យ៉ាង​ណា​ក៏​វា​​មិន​ប៉ះពាល់​ដល់​សុខភាព​នោះ​ទេ​ ផ្ទុយ​ទៅ​វិញ​​រឹតតែ​ធ្វើឱ្យ​សុខភាព​រឹងមាំ ព្រោះ​បាន​ហូប​អង្ករ​សម្រូប​​​​ច្រើន ហើយ​នៅ​ពេល​មក​លេង​ស្រុក​ម្តង​ៗខ្ញុំ​​តែង​តែ​​យក​ត្រីងៀត​ទៅវិញ​ទុក​គ្រាន់​ដាំ​ហូប​ខ្លួន​ឯង​ម្តង​ម្កាល​​”។

រំលង​ទៅ​ប្រមាណ​ជា2-​3ឆ្នាំ ការសិក្សា​ក៏​ដល់​ថ្ងៃ​ប្រឡង​បាក់​ឌុប ហើយ​ទោះបី​ជា​សម័យ​នោះ​ការ​សិក្សា​​​តឹងរឹង​យ៉ាងណា ក៏​លោកបាន​ប្រឡង​ជាប់​បាក់​ឌុប​ក្នុង​ឆ្នាំ​1983​។ ក្រោយ​​ប្រឡង​ជាប់​បាក់​ឌុបគ្រួសារ​របស់​លោកមិនមាន​លទ្ធ​ភាព​ក្នុង​ការ​បញ្ជូន​​​លោក​ឱ្យ​មក​បន្តការ​សិក្សា​នៅ​​​ភ្នំពេញ​ឡើយ​ ពេល​នោះ​លោក​ក៏​បាន​​ចូលធ្វើការ​នៅ​មន្ទីរ​ស្បៀង​​ខេត្តពោធិ៍​សាត់។ ​កាលនោះ​​ដោយ​សារ​មិន​ទាន់​​អស់​សង្គ្រាម​ ​គេ​តែង​​តម្រូវឱ្យ​កម្មាភិបាល​ទាំង​អស់​ត្រូវ​​កាន់​កាំភ្លើង ដើម្បី​ត្រៀមចាំ​ឃ្លាំមើល​កម្លាំង​ខ្មែរ​ក្រហម​​ខ្លាចក្រែង​ចូលមកឆក់​​ប្លន់​ផ្ទះ​ប្រជាពលរដ្ឋ។ ដោយ​ចិញ្ចឹមចិត្ត​ចង់​រៀន​បាន​ខ្ពស់​លោក​ក៏បាន​ដាក់ពាក្យ​ប្រឡង​យក​អាហារូបករណ៍​នៅវិទ្យាស្ថាន​អប់រំ​កសិកម្ម (​សាកល​វិទ្យាល័យ​​ភូមិន្ទ​កសិកម្ម​) ហើយពេល​នោះ​លោក​ក៏​បានប្រឡង​ជាប់​ ដោយ​ការ​ស្នាក់នៅ​ហូប​ចុក​​ជា​បន្ទុក​របស់​វិទ្យាស្ថាន​។

លោកឧកញ៉ា ​បាន​រំលឹក​ថា ជំនាញ​កសិកម្មនៅ​​ពេល​នោះ គេ​មិនសូវ​ចង់បាន​ទេ ប៉ុន្តែ​ដោយ​សារ​មិន​មាន​​ថវិកាសម្រាប់​ចូល​រៀន​សាលា​ល្អៗ​លោក​ក៏​​ចេះតែ​រៀន​ទៅ។ អំឡុង​ពេល​រៀន​​នោះ​លោក​ក៏បាន​រៀប​អាពាហ៍​ពិពាហ៍​​ជាមួយ​កូនអ្នក​ភ្នំពេញ ជា​អាជីវក​របោះ​ដុំ​សា​រ៉ុង​នៅ​ផ្សារ​អូឡាំពិក ហើយលោក​ក៏​នៅតែ​​​បន្ត​​ការ​សិក្សា​រហូតដល់​ចប់​ក្នុង​​ឆ្នាំ1992។ ជា​​ចៃដន្យនៅ​ពេល​បញ្ចប់​ការ​សិក្សា​​អង្គការ Cambodia Canada Development Bank ត្រូវការ​អ្នកស្រាវជ្រាវ​ផ្នែក​កសិកម្ម​នៅ​ខេត្តពោធិ៍សាត់ លោកក៏បាន​ដាក់ពាក្យ​ជាប់​នៅ​ទីនោះ ក្រោយពី​ចាប់​ប៉ុ​ស្តិ៍​ធ្វើការ​នៅ​មន្ទីរ​កសិកម្ម​ទីនោះ​រួចមក​។

ដោយសារ​​មានការ​យកចិត្តទុកដាក់​ធ្វើការងារ​បាន​ជោគជ័យ​ អង្គការ​ក៏​បាន​ផ្តល់​សេចក្តី​ទុក​ចិត្តឱ្យ​លោក​​​គ្រប់គ្រង​គម្រោង​ថ្មី​ខាង​ផ្នែក​ឥណទាន គឺ​អង្គការ​ហត្ថាកសិករ​នេះ​តែម្តង ដែល​​​​ធ្វើការ​ដំបូង​នៅ​ក្នុង​​ស្រុក​ក្រគរ និង​ស្រុក​សំពៅ​មាស ដោយ​ផ្តល់​តែ​កម្ចី​លើ​ផ្នែក​កសិកម្ម​​​ប៉ុណ្ណោះ។ ដោយសារ​គម្រោង​ទទួល​បាន​ជោគ​ជ័យ លោក​ក៏​បាន​ពង្រឹង​សកម្មភាព​​កាន់​តែ​ធំ​រហូត​ក្នុង​​​ខេត្ត​ពោធិ៍សាត់​​​ទាំង​មូល​តែ​ម្តង​។ នៅ​ឆ្នាំ​2001 ធនាគារជាតិ​​នៃ​កម្ពុជា​ ក៏​បានចេញ​ច្បាប់មួយ​​ដោយ​​បាន​តម្រូវឱ្យ​អង្គការ​ឥណទាន​ទាំងអស់ ត្រូវ​ប្តូរទៅ​ជា​ក្រុម​ហ៊ុន​​ឯក​ជន ពេល​នោះ​លោក​ក៏​បំពេញ​សំណុំបែបបទ​ផ្លាស់ប្តូរ​មកជា​គ្រឹះស្ថាន​មីក្រូហិរញ្ញវត្ថុ​ ហើយ​​ក្រោយមក​ក៏​មាន​​អង្គការ Oxfarm កាណាដា ផ្តល់ជំនួយ​ប្រមាណ​​​​​ 40ម៉ឺន​ដុល្លារ ដើម្បី​ពង្រីកសកម្ម​ភាព​​ទៅគ្រប់​ខេត្ត​នៅ​តាម​​ដង​ទន្លេ​សាប ទើប​ធ្វើឱ្យ​គ្រឹះស្ថាន​កាន់​តែ​រីក​ធំធាត់ ហើយ​ពង្រីក​ជា​បន្តបន្ទាប់​រហូត​គ្រប់​ខេត្ត​ក្រុង​ទូទាំង​ប្រទេស ដោយ​ផ្តល់​កម្ចី​លើ​វិស័យផ្សេងៗជាច្រើន។

គួរ​បញ្ជាក់ថា មកទល់​បច្ចុប្បន្ន​ហត្ថា​កសិករ​មាន​ការិយាល័យ ចំនួន156 នៅ​ទូទាំង​ប្រទេស និង​មាន​បុគ្គលិក​រហូតដល់ ​2,600នាក់។ អ្វីដែល​ធ្វើឱ្យ​គ្រឹះស្ថាន​របស់លោកឧកញ៉ា​ទទួល​បាន​​ជោគជ័យ គឺ​ដោយសារ​កត្តា​ខាងក្នុង​ និង​ខាង​ក្រៅ ដែល​កត្តា​​ខាងក្នុង​នោះ​គឺ​ ហត្ថាកសិករ​មាន​​ធនធានមនុស្ស​មាន​ជំនាញ​គ្រប់​គ្រាន់​ ចំណែក​កត្តា​ខាងក្រៅ នោះគឺ​​កំណើនសេដ្ឋកិច្ច​ដ៏​រឹង​មាំ ​និង​មាន​ស្ថិរភាព​នយោបាយ​ដ៏​ល្អរបស់​កម្ពុជា​៕

អ្នកម្តាយមានគភ៌ចាប់ពី 20សប្តាហ៍ឡើងទៅ មិនគួរដើរ ឬឈរយូរៗឡើយ ព្រោះអាចហុចផលប៉ះពាល់ធ្វើឱ្យជើងហើមខ្លាំងឡើងបាន។ ថ្ងៃនេះ ឡារ៉ែន មានគន្លឹះល្អៗមកណែនាំអ្នកម្តាយមានគភ៌ បើកើតមានអាការចុករួយបាតជើងពេលអាយុគភ៌កាន់តែច្រើនឡើង និងឥរិយាបទហាត់ប្រាណ ការពារជង្គង់ចុះខ្សោយចំពោះអ្នកម្តាយមានគភ៌ មកជម្រាបជូន។

ពេលមានគភ៌ ទាំងសេរីរាង្គ និងអ័រម៉ូនរបស់អ្នកម្តាយមានការប្រែប្រួល ការឈរ ឬដើរយូរៗលើស 30នាទី អាចនឹងហុចផលអាក្រក់ដល់សុខភាពអ្នកម្តាយបាន។

បញ្ហា 4 យ៉ាង បើឈរ ឬ ដើរយូរ
សន្លាក់ជង្គង់ចុះខ្សោយ៖ ជាមធ្យម ទម្ងន់ខ្លួនអ្នកម្តាយនឹងកើនឡើងក្នុងអំឡុងពេលតាំងគភ៌យ៉ាងតិច 11 – 15 គីឡូក្រាម ធ្វើឱ្យជង្គង់ត្រូវទទួលទ្រទម្ងន់ដែលចេះតែកើនឡើងរហូត 9 – 10 ខែនោះ និងថែមទាំងមានកិច្ចការងារត្រូវធ្វើទៀតផង។ រឹតតែអ្នកម្តាយដើរច្រើន ក៏នឹងរឹតតែធ្វើឱ្យទម្ងន់សង្កត់ចុះទៅលើជង្គង់ខ្លាំងឡើង ទើបអ្នកម្តាយច្រើនតែមានអាការឈឺសន្លាក់ជង្គង់ ស្រដៀងជង្គង់ចុះខ្សោយ ឬអាចនឹងកើតការចុះខ្សោយរបស់ជង្គង់មែនក៏អាចថាបានដែរ។

វិធីកែខៃ
– មិនគួរដើរច្រើន ឬ ដើរឡើងចុះជណ្តើរញឹកញាប់ទេ។
– មិនគួរលើករបស់ធ្ងន់ៗ ឬ អង្គុយចោងហោងឡើយ។
– គួរគ្រប់គ្រងទម្ងន់ឱ្យឡើងតាមដំណាក់កាលខណៈតាំងគភ៌ (មួយសប្តាហ៍ប្រមាណជា 0,5 គីឡូក្រាម) ព្រោះអាការឈឺនឹងខ្លាំងឡើងបើទម្ងន់ខ្លួនកើនឡើងខ្លាំងពេក។
– ហាត់ប្រាណធ្វើឱ្យសាច់ដុំភ្លៅរឹងមាំដើម្បីទទួលទ្រទម្ងន់ខ្លួនជំនួសឆ្អឹងសន្លាក់ជង្គង់ដែលជាការការពារការកើតឆ្អឹងសន្លាក់ជង្គង់ចុះខ្សោយ ឬក្នុងករណីដែលកើតឡើងរួចហើយ ក៏នឹងជួយមិនឱ្យយ៉ាប់យ៉ឺនខ្លាំងជាងហ្នឹងទៀត និងបន្ថយអាការឈឺចាប់បាន។

ឈាមស្ទះ ហើមជើង៖ អាយុគភ៌ 20 សប្តាហ៍ឡើងទៅ ស្បូននឹងតោងផ្អៀងទៅខាងស្តាំ ធ្វើឱ្យទៅសង្កត់លើសរសៃឈាមខ្មៅធំនៅក្នុងប្រឡោះត្រគាកដែលហូរនាំឈាមត្រឡប់ទៅបេះដូងវិញ និងចែកចាយឈាមល្អដើម្បីចិញ្ចឹមរាងកាយជាបន្ត នៅពេលត្រូវសង្កត់ជាប់ ការហូរវឹលរបស់ឈាមពីជើងផ្នែកខាងក្រោមត្រឡប់ទៅបេះដូងវិញធ្វើបានតិច ទើបធ្វើឱ្យឈាមស្ទះនៅនឹងជើង និងបាតជើង ធ្វើឱ្យកើតបញ្ហាជើង ឬបាតជើងហើមបានយ៉ាងងាយ ហើយបើអ្នកម្តាយរឹតតែឈរយូរៗ ឬដើរជាប់រហូតរយៈពេលយូរផងនោះ នឹងរឹតតែធ្វើឱ្យជើងហើមកាន់ខ្លាំងឡើង។

វិធីកែបញ្ហា
– ចៀសវាងការឈរយូរៗ ឬដើរជាប់រហូតរយៈពេលយូរ។
– ចៀសវាងការអង្គុយសំយ៉ុងជើងយូរៗ គួរអង្គុយដាក់ជើងឱ្យខ្ពស់ ដូចជា ដាក់ជើងសណ្តូកលើកៅអី ជាដើម។
– ខណៈពេលគេងលក់ គួរយកខ្នើយ ឬភួយមកដាក់ទ្រជើងឱ្យខ្ពស់ នឹងជួយឱ្យឈាមហូរវឹលបានល្អឡើង។
– បើសិនមានអាការហើមជើង ហើយឈឺ ចូរត្រាំជើងក្នុងទឹកក្តៅឧណ្ហៗមុនពេលចូលគេង នឹងជួយកាត់បន្ថយអាការឈឺឱ្យ
ថយចុះបាន។

ឥរិយាបថហាត់ប្រាណ ការពារជង្គង់ចុះខ្សោយ
1/ ឈរត្រង់ ដៃចាប់បង្អែកកៅអី ទម្លាក់ខ្លួនចុះឱ្យជង្គង់បញ្ជុចចុះបន្តិច ស្ថិតក្នុងឥរិយាបថបែបនោះដោយរាប់ 3 – 6 ហើយឈរត្រង់ឡើងវីញ រួចធ្វើដដែលៗ 3 – 6 ដង។
2/ អង្គុយលើកៅអី សណ្តូកជើងម្ខាង និងប្រឹងប្រមាណ 10 វិនាទី ហើយបញ្ជុចជង្គង់ចុះ ហើយប្តូរទៅធ្វើជើងម្ខាងទៀត ធ្វើដដែលៗឱ្យបានច្រើនដង។

សរសៃឈាមខ្វេរនៅនឹងជើង៖ គឺមានឈាមស្ទះនៅនឹងសរសៃឈាមខ្មៅ ធ្វើឱ្យសរសៃឈាមហើមប៉ោង អ្នកម្តាយអាចមានអាការរមាស់ ឬមានអារម្មណ៍ថារាងធ្ងន់ៗនៅនឹងជើង ដែលបណ្តាលមកពីស្បូនទៅសង្កត់ពីលើសរសៃឈាមខ្មៅធំក្នុងប្រឡោះឆ្អឹងត្រគាក និងបណ្តាលមកពីការប្រែប្រួលរបស់អ័រម៉ូនខណៈតាំងគភ៌ ធ្វើឱ្យពេលឈរ ឬអង្គុយសំយ៉ុងជើងយូរៗនឹងរឹតតែមានអាការនោះខ្លាំងឡើង។

ក្រៅពីទម្ងន់ខ្លួនដែលកាន់តែកើនឡើងច្រើនហើយនោះ នៅលើអ្នកម្តាយដែលដើរច្រើន នឹងហុចផលឱ្យកជើង និងបាតជើងទ្រទម្ងន់ខ្លាំងឡើងដែរ ធ្វើឱ្យសរសៃប្រសាទត្រូវបានសង្កត់លើនៅម្តុំកជើង ទើបកើតអាការសរសៃបាតជើងរលាក ឈឺបាតជើងនៅពេលដើរ។

វិធីកែបញ្ហា
ចៀសវាងការឈរ ឬអង្គុយសំយ៉ុងជើងយូរៗ គួរក្រោកផ្លាស់ប្តូរឥរិយាបថរៀងរាល់ 30 នាទី ដាក់ក្រណាត់រឹត ( Support )នៅលើជើង កន្លែងដែលសរសៃឈាមខ្វេនោះ និងអ្វីដែលសំខាន់គឺ ចៀសវាងការពាក់ស្បែកជើងកែងចោត គួរពាក់ស្បែកជើងណាដែលពាក់ទៅស្រួល បាតរាប ក្រាស់ទន់ ការពាររអឹល និងទប់ទល់នឹងការពង្រីកខ្លួនរបស់ជើងបានល្អ។

មិនមែនជារឿងពិបាកក្នុងការកាត់បន្ថយអាការឈឺចាប់ ឬការរលាកដែលកើតចេញពីការដើរក្នុងអំឡុងពេលតាំងគភ៌នោះឡើយ បើប្រតិបត្តិតាមវិធីខាងលើរហូតដល់ពេលក្រោយប្រសូត 3 ខែ នឹងជួយឱ្យរាងកាយឆាប់រឹងប៉ឹងឡើងវិញមិនខាន៕

ខ្សែភាពយន្តខ្នាតខ្លីស្តីពីការតស៊ូរបស់យុវនារីម្នាក់ ដែលជាស្ថាបត្យករវ័យក្មេងបានក្លាយជារឿងមួយ ដែលទទួលបានចំណាប់អារម្មណ៍ខ្លាំងពីយុវវ័យសម័យបច្ចុប្បន្ន ហើយវាក៏ជារឿងមួយដែលជំរុញទឹកចិត្តឱ្យអ្នកដែលបានទស្សនាឲ្យមានកម្លាំងចិត្តក្នុងការខិតខំប្រឹងប្រែងធ្វើការងារដែលខ្លួនស្រឡាញ់យ៉ាងពិតប្រាកដ។

រឿងដែលបង្កើតឱ្យមានភាពភ្ញាក់ផ្អើលនេះ គឺរឿង «យុវជនសម័យឥឡូវ» ដែលផលិតឡើងដោយអង្គការទស្សនពិភពលោកប្រចាំនៅកម្ពុជា។

បើយោងតាមការបង្ហាញរបស់អង្គការទស្សនពិភពលោកបានឱ្យដឹងថា រឿង “យុវជនសម័យឥឡូវ” ជារឿងដែលបង្កប់ដោយអត្ថន័យតស៊ូយ៉ាងជ្រាលជ្រៅ ហើយវាក៏ជារឿងមួយដែលជួយឱ្យយុវជន និងយុវនារីបានដឹងពីវិធីដើម្បីយកឈ្នះការបរាជ័យ និងការខកចិត្ត ជាមួយនឹងកម្លាំងចិត្តយ៉ាងមុតមាំឆ្ពោះទៅរកគោលដៅរបស់ខ្លួន។

នៅក្នុងសាច់រឿងនេះក៏បានបង្ហាញផងដែរអំពីការយល់ឃើញរបស់មនុស្សចាស់ពីរប្រភេទផ្សេងគ្នា គឺរវាងម្តាយរបស់តួអង្គស្រី និងអ្នកជិតខាងម្នាក់ដែលជាអ្នកបម្រើការងារនៅក្នុងក្រុមហ៊ុនឯកជនមួយ។ ចំពោះម្តាយរបស់យុវតីដែលជាស្ថាបត្យករនោះ គឺគាត់គាំទ្រ និងផ្តល់តម្លៃពេញទំហឹងសម្រាប់កូនស្រីក្នុងការធ្វើការរចនាប្លង់ ទោះបីជាកិច្ចការខ្លះត្រូវធ្វើនៅពេលយប់ ហើយតម្រូវឱ្យកូនរបស់គាត់ចេញទៅខាងក្រៅដើម្បីប្រជុំជាមួយមិត្តភ័ក្តិក៏ដោយ។

ផ្ទុយទៅវិញ ការយល់ឃើញរបស់បុរសចំណាស់ម្នាក់ដែលជាអ្នកជិតខាងនោះវិញ គាត់បានវាយតម្លៃបែបផ្សេងដោយគ្រាន់តែឃើញរូបភាពខាងក្រៅប៉ុណ្ណោះ ដូចជាការរិះគន់តួអង្គស្រីដែលងើបយឺតនៅពេលព្រឹក ខណៈដែលគាត់មិនបានដឹងពីការពិតថា ពេលនោះគឺស្ថាបត្យករវ័យក្មេងរូបនេះមិនទាន់បានសម្រាកពីការគូរប្លង់របស់គាត់ពេញមួយយប់នៅឡើយ និងការរិះគន់ផ្សេងៗទៀតនៅពេលដែលឃើញក្មេងស្រីម្នាក់នោះចេញទៅក្រៅនៅពេលយប់ ដែលធ្វើឱ្យគាត់ភ្ញាក់ផ្អើលនៅពេលដែលដឹងពីស្ថានភាពពិត គឺនាងបានទៅចូលរួមកម្មវីធីសម្ពោធប្លង់រចនារបស់ក្រុមហ៊ុនដែលគាត់កំពុងធ្វើការហ្នឹងឯង។
តែទោះជាយ៉ាងណាក៏ដោយ ក៏ថាមពលនៃការខិតខំប្រឹងប្រែង គឺពិតជាធ្វើឱ្យស្ថាបត្យករដ៏ក្មេងខ្ចីម្នាក់នោះទទួលបានជោគជ័យនៅទីបំផុត៕

ភ្នំពេញ៖ សាលារាជធានីភ្នំពេញ នឹងដាក់បន្ថែមរថយន្តក្រុងសាធារណៈចំនួន 100គ្រឿងទៀត ហើយនឹងបន្ថែមខ្សែផ្លូវរត់ចំនួន 5ខ្សែទៀត នៅពាក់កណ្តាលខែកក្កដា ឆ្នាំ2017នេះ ដែលរថយន្តទាំង 100គ្រឿងនេះ ជាជំនួយរបស់រដ្ឋាភិបាលចិន។

លោក ម៉េត មាសភក្តី អ្នកនាំពាក្យរដ្ឋបាលនៃសាលារាជធានីភ្នំពេញបានឲ្យដឹងថា សាលាក្រុងកំពុងគ្រោងពង្រីកខ្សែផ្លូវរត់របស់រថយន្តក្រុងក្នុងរាជធានីភ្នំពេញឱ្យបាន10ខ្សែបន្ថែមទៀតនៅចុងឆ្នាំ2017នេះ ខណៈដែលពេលបច្ចុប្បន្នមានរថយន្តក្រុងចំនួនតែ 57គ្រឿងកំពុងដំណើរការនៅលើផ្លូវរត់ចំនួនតែ 3ខ្សែប៉ុណ្ណោះ ប៉ុន្តែលោកនៅមិនទាន់បានបញ្ជាក់អំពីខ្សែផ្លូវរត់ថ្មីទាំង10នោះនៅឡើយ។

គួរបញ្ជាក់ថា បច្ចុប្បន្នសាលារាជធានីភ្នំពេញបានលក់សំបុត្ររថយន្តក្រុងបានប្រមាណជា 6ពាន់ ទៅ7ពាន់សន្លឹកប៉ុណ្ណោះដល់អ្នកធ្វើដំណើរប្រចាំថ្ងៃ ដែលនេះជាមូលហេតុមួយធ្វើឱ្យរដ្ឋបាលក្រុងភ្នំពេញខំប្រឹងពង្រីកបន្ថែមទៀតនូវខ្សែផ្លូវរត់ថ្មី និងដាក់រថយន្តក្រុងសាធារណៈបន្ថែមទៀត៕

ភ្នំពេញ៖ ដើម្បីផ្តល់ភាពងាយស្រួលក្នុងការទាក់ទាញអ្នកវិនិយោគ ចូលមកបណ្តាក់ទុន បង្កើតរោងចក្រកាន់តែច្រើននៅក្នុងប្រទេសកម្ពុជា ក្រុមហ៊ុនជប៉ុន មានគម្រោងវិនិយោគលើវិស័យថាមពល បន្ថែមទៀតនៅកម្ពុជា។

លោកសាស្ត្រាចារ្យ ហ្វូមីអូ ហូឈិ (Fumio Hoshi) ទីប្រឹក្សាជាន់ខ្ពស់នៃក្រុមហ៊ុន Sumitomo Mitsui Banking Corporation បានមានប្រសាសន៍នៅក្នុងជំនួបជាមួយរដ្ឋមន្រ្តីក្រសួងពាណិជ្ជកម្មថា ថាមពលជាគន្លឹះមួយក្នុងការទាក់ទាញអ្នកវិនិយោគមកកាន់ប្រទេសកម្ពុជាកាន់តែច្រើនឡើង ហើយមុននឹងធ្វើដំណើរទស្សនកិច្ចមកកម្ពុជា លោកបានជួបជាមួយក្រុមហ៊ុនមួយចំនួននៅជប៉ុនដែលបានសម្តែងចំណាប់អារម្មណ៍ក្នុងការធ្វើវិនិយោគនៅកម្ពុជាក្នុងវិស័យនេះ។

ជាមួយនឹងការវិនិយោគនេះដែរ លោកសាស្ត្រាចារ្យបានឲ្យដឹងថា ក្រុមហ៊ុនជប៉ុនកំពុងតែប្រឹក្សាលើយុទ្ធសាស្ត្រវិនិយោគមួយចំនួន ដូចជាការវិនិយោគលើរោងចក្រដែលប្រើប្រេងឥន្ធនៈជំនួសឲ្យការដុតធ្យូងថ្ម ការប្រើថាមពលព្រះអាទិត្យ (Solar) និងការកសាងស្ថានីយតភ្ជាប់ការទិញថាមពលពីប្រទេសឡាវ ជាដើម។ល។

ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានគាំទ្រទាំងស្រុងលើគំនិតផ្ដួចផ្ដើមរបស់លោកសាស្ត្រាចារ្យ Fumio Hoshi តែសូមឱ្យភាគីជប៉ុនបន្តជំរុញ និងលើកកម្ពស់លើកាលានុវត្តន៍ភាពវិនិយោគរបស់កម្ពុជាបន្ថែមទៀតក្នុងនាមលោកសាស្ត្រាចារ្យជាបុគ្គលម្នាក់ដែលមានការគោរពក្នុងចំណោមធុរជនជប៉ុនដូចគ្នា។

ឯកឧត្តមបានជម្រាបជូនបន្ថែមទៀតថា ក្រុមហ៊ុនជប៉ុនមួយចំនួនបាន និងកំពុងវិនិយោគក្នុងប្រទេសកម្ពុជាប្រកបដោយជោគជ័យ និងគួបផ្សំជាមួយនឹងការលើកទឹកចិត្តពិសេសលើការវិនិយោគក្នុងតំបន់សេដ្ឋកិច្ចពិសេស ឯកឧត្តមមានសុទិដ្ឋិនិយមខ្ពស់ថា ក្រុមហ៊ុនជប៉ុននឹងមកវិនិយោគបន្ថែមទៀតនៅកម្ពុជា៕